1 Peter (Aguaruna)

11

11:1b.1PE.011.001 Witjai Pedroitjai, Jisukristu chicham etsegtugkata tusa awemamuitjai. Junak atum mina pataag judío aidautijum nugkem ukuakjum pampagjum nugka Ponto, Galacia, Capadocia, Asia, Bitinia aina nui batsatutigmin agatjime.

11:2b.1PE.011.002 Apajuí iina Apajiya nu, duwik nagkamas dutikatasa anentaimtusbaujiya dutiksag etegtamjajui. Dutijama Jisukristui dekaskeapi tabaunum Wakaní Pegkejin sujamsauwai. Jisukristu mantamnak numpen ukajua duwi, iina tudaujinig Apajuí emtinish bakumamainchau pegkeg etamkauwai, imá minak umigtuktinme tujamu asa. Atumnash Apajuí shiig senchi anempa ibau asa, shiig agkan anentaimsa pujutan amastinme.

11:3b.1PE.011.003 Emematiagmi Apajuí, iina Apuji Jisukristua nuna Apají, iina senchi wait anenjama nuaduí. Ni yamajam pujutan sujamsauwai, iina Apuji Jisukristu maamuitak ataktú anean nantakiu asamtai. Nuaduí pujut tuke atina nu juwaku ashí Apajuí nayaimpinum umigtamkamua dushakam jukitasa dakamu ajutjamui.

11:4b.1PE.011.004 Nu ii jukitna duka tsaitash tsaimaitsui, mamutnash mamumaitsui, tsuwatash wechatnai, yagkug kagaama nunikchatnai. Ashí pegkejak agtinai nayaimpinum pujutak.

11:5b.1PE.011.005 Nuigtushkam Jisukristui kajintsá anentaimaidau asajin, Apajuí niina senchijin kuitamjamui, tsawan nagkantina duwi Kristu wantintai, uwemat tuke atina nuna jukitin atinme tujamu asa.

11:6b.1PE.011.006 Nuniktin asamtai atumshakam ju nugka juwi wajumak tsawan pujuttajum duwi, kuashat waitiamu ajutjamainakuish shiig aneasjum pujustajum.

11:7b.1PE.011.007 Atum aaja waitiamunum Apajuiyai kajintsá anentaimainajum nu dekapsamu asamtai, Jisukristu taatna duwi dekas eme anentsá diyaaku, nuigtú ememattsa diyaam atinaitjume. Oronum pegkegchau peetkau ajapna ayatak orok juwakti tusa, jiiyai apeamu shiig pegkejama nuna nagkaesau wegawai, atum Apajuiyai kajintsajum anentaimjum duka.

11:8b.1PE.011.008 Atumek Jisukristuk wainkachu ainayatkujum aneajume. Yamaikish wainchayatkujum dekaskeapi tabaunum shiig aneasjum dakunkut pujagme, nunú dakujamu iman ajutjamaina duka, nuní dakunkut dekapeamu ajutui tusaish chichamaik shiig tumaitsui.

11:9b.1PE.011.009 Atum dakunkut pujuinajum duka, Apajuí uwemtijamjatna nunú dekau asajum nuniagme. Nuniau asajum niiní kajintsá anentaimjume.

11:10b.1PE.011.010 Duwik Apajuin etsegtujakajua duka: Apajuish aents tudau aidaunash wajuk uwemtijatnukita tusag, dekaatatus anentaimtujakajui. Ditak Apajuí atumin wait anenjamag uwemtijamjatna nunak dekaidau asag: Dusha uwemtash wajuk atinkita, tusag shiig dekaatatus wakegainak kuashat anentaimsau ainawai.

11:11b.1PE.011.011 Wakaní Pegkejiya nu ditai pujau asa ichachinam, Jisukristu waitus jaka nantaktinashkam pachis agajajui, ditak: Nunú aents waittsatnush yaki atinaita, dusha wajutik nunikti, tusag dekaatatus senchi wakegajakajui.

11:12b.1PE.011.012 Nudiagtai Apajuí dekamtikauwai, atum juwi pujagminig nunikchatnai, duka atak tikich batsamtina nuaduí nuniktinai tusa. Nuna yamai Apajuí chichamen etsejin aina nu atumnak, Wakaní Pegkeji senchijin ujapainawai, Jisukristu nayaimpinmaya awemamua nunú uwemtijamainai tusag. Juka senchi wakejumainai, nayaimpinmaya aentskesh shiig dekainachu asag dekaatatus wakejuinawai.

11:13b.1PE.011.013 Ju dekaidau asajum, shiig umintsajum aneaku imagnisjum pujusjum Apajuí dakastajum, nigki wait anenjamu asa, Jisukristu minitai ashí sujamsatin asamtai.

11:14b.1PE.011.014 Apajuí uchijí asajum umigkatajum, atum duwik Apajuí dekachu asajum pegkegchau takajakuitjum duke batsamtutsuk.

11:15b.1PE.011.015 Duka nunitsuk, Apajuí atumin etegtamjawa duka pegkejam asamtai, atumshakam pegkejam amainaitjume, ashí atum wajuk pujagme nuwishkam.

11:16b.1PE.011.016 Apajuí chichame agagbauwa nui: “Wi pegkejam asamtai, atumshakam pegkejam atajum”, tawa duwi.

11:17b.1PE.011.017 Atumek Apajuiya nu: “Apawah”, tajume. Nuniau asajum, ju nugka juwi pujusjumshakam, nigka ajantusjum diimainaitjume. Apajuik aents aidau takasbaujinak betek dita wajuk takasuk ainawa dutiksag suuwai, makichik aentsun imá senchi wait anentsuk. Nuaduí shiig pujumain ainagme.

11:18b.1PE.011.018 Atumek atumi muunjum wainak batsamajakua nuninuk batsatutijum uwemtijamu ainagme. Atumek, wají besen oro, kuichik aina nujaigkish akikmatka uwemtijashbauwaitjum duka shiig dekagme.

11:19b.1PE.011.019 Kristu achinag jaak, uwig makichkish pegkegchauji atsujun maajakú aina numamtuk, niina numpe pegkegman ukajua duwi, akikmatka uwemtijamu ainaji.

11:20b.1PE.011.020 Nunak Apajuí nugkash najannatsaig, Jisukristu nunikti tusa tiuwai. Duwik tibaun imapam yamaya juwi nunak umiké jutiin anempau asa.

11:21b.1PE.011.021 Atumek Kristui kajintsá anentaibaunum Apajuiyaig dekaskeapi tajume. Nigka jakau aig Apajuí inanki, niina inamtaijiya nui Apu ema apusauwai. Dutikau asamtai niiní kajintsá anentaimkujum dakaidautigmek, Apajuí anagtabauwa nunak dekas imatiksagkeap amastatua tumainaitjume.

11:22b.1PE.011.022 Yamaik atumek chicham dekaskea nu umiau asajum, tudaush idaisau ainajum duwi, atumi yatsum aidaujaish dekaskenum aneeniamunum, pempentunisjumek aneeniajum duka nunisjumek aneenitajum.

11:23b.1PE.011.023 Apajuinu chicham pegkeja duka tuke atinai. Atum dekaskeapi tiuwaitjum duwi, pujut tuke atina nu ajutjamjume. Nunú pujut Apajuinumia jukimua duka nagkankashtin tuke atinai, iina apají akimpauwa nu sujamsamua nuninchau asa.

11:24b.1PE.011.024 Apajuí chichame agagbau: “Ashí aents aidauk tuke dupa ainawai, aantsag aentsú imanjishkam yagkugjai betekai, dupa kagatai yagkujishkam kagajá kakegama anmamtinai aentsú pujutji aidauk.

11:25b.1PE.011.025 Tujash Apajuí chichamega duka nuninchauwai, tuke atakea duwish atinai”, tawai. Apajuí chichamega duka, Jisukristui uwemtijamainuk tusa etsegkamua nuuwai.

12

12:1b.1PE.012.001 Nuaduí idaisatajum ashí pegkegchau aidau: Waitjut, tikichdau diigsá wakejaku kajejut, wainka tsanumku pegkeja iman iwainmamat, tikich pegkegchau pachittsa augmatut aina dushakam.

12:2b.1PE.012.002 Nuniakum uchi yamá akiintsau muntsun muntsuatatus senchi wakejuwama numamtuk, Apajuí chichame shiig pegkeja nu wakejitajum. Nujai wakanmin tsakaakjum uwemat jukimnujum.

12:3b.1PE.012.003 Atumek Apu Apajuí pegkeg asa yaijatna duka, dekapsau asajum shiig dekagme.

12:4b.1PE.012.004 Kristu “Kaya tuke pujuwa imana” nujai ijutkau atajum, nunú kaya numamtina nuna Apajuí tikichin nagkaesau emauwai, tujash aents aidauk dakitug idaisajui.

12:5b.1PE.012.005 Atumshakam Jisukristu aentsji wajasugme, Wakaní Pegkeji jukiu asajum. Nuaduí Wakaní Pegkeji wakega duke takaakjum, ashí Kristu nemajin aidaujai ijuntsajum Apajuiyai sumitkau atajum, Apajuí ememattai jega jegamkamua numamtin atasajum. Nunú aaja nuniakjum Apajuik shiig awagmamainaitjume.

12:6b.1PE.012.006 Apajuí chichame duwik agagbauwa nuwishkam: “Shiig puyatjusjum antuktajum, wi Siognum apusattajai makichik aentsun, kaya dekas shiig pegkeg etegka, jega jegamku aputuatasa atsumtayama iman atinun. Nuanuí kajinas ekeemsaju aidauk, dita kajintsá anentaimtusbaujinak makichkish wainkag juwakchatnai”, tawai.

12:7b.1PE.012.007 Atum niiní kajintsá anentaimaidautigminig, Jisukristui dekas ashí aents aidaun nagkaesauwa duka. Tujash niiní kajinas anentaimainatsu nunú aidaunmag, agagbaunum ditan pachis tawa nunisagke: “Aents jegá jegamin aidau kayá ajapawajua nunú, kaya dekas jegá ichichkatin apujtutia iman wajasé. Nunú dutika dakitjamua nu atatui ashí tikich aents aidaun nagkaesauk.”

12:8b.1PE.012.008 Tikich chicham agagbaunmash juna pachis chichaak: “Nunú kaya nunak kuashat aents tukumak iyajagtinai” tawai. Nunak dita Apajuí umijuinachu asag, suwimkan jukiagtin asag nunikagtinai.

12:9b.1PE.012.009 Tujash atumek Apajuí mina uchig atinme tusa etegjamu ainagme. Atumnak ni etegtamjau asa sacerdote etamkajui Apú takajin atinme tusa. Jutii pegkegchaunum batsatjin Apajuí jiigmajui. Dutijamau asamtai, Apajuinu dekas chicham pegkeg shiig anentaimtujaish tumainchauwa nuna etsejuinak pujustinme tibau ainaji.

12:10b.1PE.012.010 Atumek duwikik Apajuí aentsji aajakchauwaitjume, tujash yamaik Apajuí aentsji waigkugme. Tuja duwikik Apajuí wait anenjachbau aajakuitjume, tujash yamaik atumnash Apajuí wait anenjamjaje.

12:11b.1PE.012.011 Aneetaig yatsug aidauh, ubag aidauh, jutiik ju nugka juwiyachu ainaji. Nunin ainag duwi tajime: Wait aneasjum iina iyashí pegkegchau wakegamua duka takaa batsamtigpajum. Iyash pegkegchaun wakega nunak, iina wakanig dakitawai.

12:12b.1PE.012.012 Aents Apajuí nemajuinatsu nujaig shiig kuitamamsajum pujustajum. Atumnak yamaik aents pegkegchauwa iman chichagtamainawai, tujash tsawan jegatna nunú tsawantin atum pegkeg takasuitjum nuna diisag Apajuinak emematiagtinai.

12:13b.1PE.012.013 Apajuí nemaju asajum nugkanmaya apu aina nuna apujin sumimkatajum, Apajuin pegkegchaun chichagkainum.

12:14b.1PE.012.014 Aikasjumek apú atuwe aina dushakam antugkatajum. Wagki ditak aents pegkegchaun takaina nuna suwimkan suwak, pegkejan ayamjukti tusa adaikamu ainawai.

12:15b.1PE.012.015 Apajuik wakegawai pegkejan takastinme tusa, nuna wainainak aents anentainkachu aidaush atumin pegkegchau chichagtamaina dusha itatkatnume tau asa.

12:16b.1PE.012.016 Aents chicham umiktá tibauwa nui agkanmitkamush wajuku amainaita nunisjumek pujustajum. Nunú chicham umiktá tibauwa nuwig agkantaitjai tusam pegkegchau takastasa wakeetsuk. Dekaskenmash Apajuí nemagnush wajuku amainaita nunisjumek shiig pujustajum.

12:17b.1PE.012.017 Ashí aents aidauk ajantusjum diyakjum, Jisukristun nemagkaju yatsut aina dushakam aneetajum, Apajuishkam ajantusa diyakjum, ju nugkanmaya apu aina nuna apujishkam ajantusa diistajum.

12:18b.1PE.012.018 Inak aidautigmesh atumi apujum shiig ajantusjum diyakjum umigkatajum. Apu pegkeg aina imá duke umigkatasa wakeetsuk, tikich apu pegkegchau aidaushkam umigkatajum.

12:19b.1PE.012.019 Atum pegkegchau takasbauk atsugtamaig waitkagmainakuish, Apajuí nemajin asajum katsunjatajum. Duka Apajuinak shiig awagmawai.

12:20b.1PE.012.020 ¿Wají pegkejaita ii pegkegchau takasbaunum suwimak juwayatku katsuntajai tabaush? Pegkeg amainai, ii pegkegchau takaschamunmag suwimak juwaku, kajetsuk emamkesa katsuntamua duka Apajuin shiig awagbau asamtai.

12:21b.1PE.012.021 Kristuk jutii waittsatnun iwaintugmak waittsauwai. Nuniku asamtai Apajuí jutiinak etegtamjauwai, ditash Kristu waittsauwa nunisag waittsatnume tusa.

12:22b.1PE.012.022 Kristuk makichkish tudaunak takaschauwai, waitjutnakesh waitjuachui.

12:23b.1PE.012.023 Pegkegchau chichagmashkam nigka dutiksag iikag tichauwai. Waitkamshakam iikmakchauwai, Apajuin idaitusui ni dekas dutikati tusa.

12:24b.1PE.012.024 Kristu numinum achinag jakauwa duwi jutii tudaujinak akikmatjamkauwai. Nuniku asa nigka wakegawai, tudau takatnak idayinak shiig batsamsag pegkeja nunak takastinme tusa. Niina iyashí asutiam tsupinjauwa duwi pegkeja duke takamainaitji, pegkeg pujustasa.

12:25b.1PE.012.025 Atumek duwikik uwig kuitamkachbau wainak yujama numamtuk yujajakuitjume. Tujash yamaik Jisukristua nuuwai atumin kuitamjamak ayamjutpa duka.

13

13:1b.1PE.013.001 Atum nuwatkamu aidautigmek atumí aishuminig sumimkatajum, Apajuí chichame etsegbaun aishum dekaskeapi tuinachushkam, atum shiig pujamun waipainak, nuniktajum tachamaitak dekaskeapi titinme,

13:2b.1PE.013.002 dekaskenum Apajuí umigkujum imagnisa pujau asagmin.

13:3b.1PE.013.003 Atumek jaanch pegkeg iwajamu aina ibau nugkugjum iwagmamjatasagmek wakemaitsugme. Intashmesh tikich pegkeg diigsatnume tusagmek iwagmaitsugme, nuigtú oro aina imanjai iwagmamjatasagmesh wakemaitsugme.

13:4b.1PE.013.004 Dekas iwagmamta duka pujut pegkeja nuuwai, nunin asamtai atumek nuwa kakagchauch tutitjachu amainaitjume, nuna Apajuik wakegas diiyawai.

13:5b.1PE.013.005 Nuwa pegkeg duwik batsamajakajua dushakam, Apajuiyaig kajinas anentaimaidau asag, imá aishinig sumimajakú ainawai.

13:6b.1PE.013.006 Sarashkam nunisag Abragnak umijak mina apug tujakuí, emematus anentau asa. Atumshakam pegkeg takaakjumek, Sara nawanjiya numamtin ainagme, nunin asajum makichkish puyatkas pujumainaitjume.

13:7b.1PE.013.007 Aishmag aidautigmeshkam nuwemjaig shiig antugdaikajum pujustajum, nuwak kakaakchau asamtai. Apajuishkam nuwanash wait anentau asa pujut nagkanchaun susauwai. Atum nuwemjai shiig pujushtaik, Apajuishkam ni augmash antugtamkachagtatui.

13:8b.1PE.013.008 Aatsa nuniakjum ashí betek nuninuk anentaimkau, puyatjus anentaimtunin, yatsut anendayas aneenin, wait anenkagtin, nuigtush ememachu atajum.

13:9b.1PE.013.009 Pegkegchau awajtamainakuish dutiksagmekek iikaigpajum, pegkegchau chichagtamainakuish dutiksagmek chichagtsuk pegkegnum ausatajum. Jutiinak Apajuí pegkegnum yaimpaktatus etegtamjau asamtai, tikich aidaush pegkegnumag yaimainaitji.

13:10b.1PE.013.010 “Ni shiig aneas dakujus pujustatus wakegauk, pegkegchau chichatnak, waitjutnashkam idaimainai.

13:11b.1PE.013.011 Pegkegchau takat aina duka idaisatajum, nuniakjum pegkeg aina duke takastajum. Nuniakjum shiig agkan anentaimsa pujustasajum wakeetajum.

13:12b.1PE.013.012 Apu Apajuik pegkejan takaina nuna kuitamak dita augmash antujui, untsu aents pegkegchaun takaina nunak dakitawai.”

13:13b.1PE.013.013 Atum imá pegkeja duke takaagminig, makichkish pegkegchau etamainuk atsawai.

13:14b.1PE.013.014 Tujash atum pegkeg takaakjum waitiakjumek shiig aneastajum. Tuja pegkegchau awajtamainakuish ishamkaigpa.

13:15b.1PE.013.015 Apu Kristuwa nu puyatjusjum ememattajum, nuniakjum tikich aents: ¿Wagka Kristush nemagjume? tujamkuish atum Kristui kajintsá anentaimkujum dakainajum nu ujamainush shiig umintsau atajum.

13:16b.1PE.013.016 Tujash niishkam ajantusjum diyakjum, kagkagchauch shiig chichatajum. Atumek pegkeg takat dekajum duke takau atajum, nuniagmin tikich Kristu nemajuinachu pegkegchaun chichagtamaina nu datsajagtatui.

13:17b.1PE.013.017 Dekas pegkejai, Apajuí atumin pegkejan takainak waittsati, pegkegchau takaaku waitmaina nuna tusa wakejutpakuig waitmainaitjum duka.

13:18b.1PE.013.018 Kristushkam makichkia jakauwai ajumaish jakashtinun iina tudaujin tsagkugtamjatatus. Nigka machikish pegkegchau ni waitmainjig atsugmaitak, Apajuijai igkumtijamkata tau asa pegkegchau aidaunum waittsauwai. Iyashinig dekas jakauwai, tujash niina wakaninig jakachui.

13:19b.1PE.013.019 Nunik jakashkam aents jinau wakaní tuke achikbaujai betek batsatbaunum weuwai, chichaman etsegkatatus.

13:20b.1PE.013.020 Apajuí Noen tiuwai: Arca najanata. Tusa tima arcan najana ayatak ocho aents uwemkajui. Nunikmatai tikich aents chichaman umikchaju aidauk ashí jakekajui. Jujú jakekú aajakaju aina nuna wakanin Jisusak wejiuwai ujaktatus.

13:21b.1PE.013.021 Nunú yumia duka Noejai batsatunak ajekjachajui, numamtuk Jisukristu aneantua nujai ijutkau pujamunum uwemjau ainaji. Jutii yamiimainag duwi Jisukristujai ijutkau pujamua nu iwainmamainaji. Yamimamua duka iyash pegkeg emá uwemjatasaik yamimantsui. Jutiik Jisukristu mantamdauwa nui dekaskeapi tabaunum uwemkau asaja, Apajuí emtinig bakumamainchau ainaji.

13:22b.1PE.013.022 Yamaik nigka nayaimpinum waka, ashí nayaimpinmaya aents aidaun Apuji wajas, nuigtú wakan senchigtin nayaimpinmaya aina nunash Apuji wajasá, Apajuí inamtaijin untsujin eketui.

14

14:1b.1PE.014.001 Kristu juwi pujusá niina iyashin waittsauwa nunisjumek atumshakam waitmainaitjume. Wagki iyashnum waitiamua duka, tudau taká takaakua wetanmag dakitmitkagbau asamtai.

14:2b.1PE.014.002 Wajupa tsawanta ju nugka juwi pujuttaji duwik, pegkegchau takatak anentaimtú batsamtsuk, Apajuí wakegamua duke takamainaitji.

14:3b.1PE.014.003 Maake yamaik, yaunchuk Apajuí nemagchau asagmek, atum pegkegchau wakegamu wakejusjum takaakjum, tsanijimta duke tunamatjajum batsamtakjum, umutchakam imanik nampektasajum umakjum, nampekjumesh jiyá jiyanitjai yu wajakuitjume, nuniakjum Apajuí dakitamua nunú apajimat batsamtujakuitjum duka idaisatajum.

14:4b.1PE.014.004 Nunú nuniajumin aents atumjai pegkegchaun takajakú aidauk, atum ditajai ijunja pegkegchau takat dakitamun waipainak: ¿Wagkag yamaish jutiijaish ijuntsua? tusag pegkegchau chichagtamainawai.

14:5b.1PE.014.005 Tujash Jisukristu, aents jakau aidau, iwaaku aidaujai dekagbau atina duwi, dita takasbaujinak diisá titinai.

14:6b.1PE.014.006 Nuaduí Apajuí chichameg aents jakaja dushakam ujakbau ainawai. Aents iwaaku pujusá dekaskeapi tiu jakau aina duka, wakaninig Apajuí tuke pujuwa nunisag pujustin ainawai.

14:7b.1PE.014.007 Tsawantak jegawai ashí wají aina nunú nagkankatnuk. Nuaduí atumek emetmamjajum aneaku pujusjum, Apajuí aujú batsamtajum.

14:8b.1PE.014.008 Tuja juna nagkaesauwa nuuwai puyatjunisa pempeentuniki aneenita duka, aneenita nujaiyai kuashat pegkegchau aidaush pempeentuniki tsagkugdaimaina dushakam.

14:9b.1PE.014.009 Atumi jeemin ayamsatatus minakuishkam, shiig anentsajum awayatajum pegkegchau chichagdaitsuk.

14:10b.1PE.014.010 Makí makichik ii yupichu dutikatnun Apajuí anenjauch amasajua nujai, tikich aidaush yaigtajum. Atumnak Apajuí wait anenjamu asa, ashí ni amasbauwa nunú shiig kuitamsajum takamain ainagme.

14:11b.1PE.014.011 Apajuí chichame etsegkugmesh, niina chichame tawa dutiksagmek etsegkatajum. Tikich yayakjumesh, Apajuí atum yupichu dutikatnun amaa nujai yaigtajum. Nunú aajajum dutikakjum Jisukristu yaimpasmatai, Apajuí ajumaish tuke imanuk senchigtin, imá nigki atina nunú ememattajum. Aatus atí.

14:12b.1PE.014.012 Mina aneetaig yatsug aidauh, ubag aidauh, atum Apajuiyai kajintsá anentaimjum nuna, dekaskeash nuninait tusa dekapjabaunum waitiamu ajutjamainakuish, tikima wají nagkaechataiya imanuk anentaimtú pujuigpajum.

14:13b.1PE.014.013 Ayatak shiig aneastajum Kristu waittsamua nunisjumek waituidau asajum, ni imanjijai wantinkatna duwi imá shiig aneasjum dakunkut pujustin asajum.

14:14b.1PE.014.014 Atum Kristu nemajin asagmin, pegkegchau chichagtamainakuish, shiig aneasjum pujustajum. Wakaní Pegkeji dekas imana nunú atuminig pujau asamtai.

14:15b.1PE.014.015 Nunin asamtai makichkitigmekesh magkagtin, kasa, pegkegchau takau, tikichin pegkegchaujin yujajuinak waitú yujau aina nunin aigpajum.

14:16b.1PE.014.016 Atumek Jisukristu nemajuidau asajum waitiakjumesh datsaamtsuk, Apajuishkam shiig aneasjum emematmainaitjume nu waitiamua duwi.

14:17b.1PE.014.017 Apajuí aentsji aidauti waittsatnuk yamaik nagkamnae, aatus nu jutiiní waitiamu nagkamna aniaish, Apajuí chichamen uminatsu dusha, ¿wajuk nagkankatnukita? Ditak shiig senchi waittsatin ainawai.

14:18b.1PE.014.018 Jisusa nemajuinak uwemkau pegkejan takaidaukesh waituina nuniaish, ¡aents Apajuin dakitin pegkegchau takau aidaush wajukatnus aina!

14:19b.1PE.014.019 Nunin asamtai, atum Apajuí waittsati tusa wakejutpamunum waitiakjumesh, ayatak pegkeja duke takatajum. Nuniakjum Apajuí iina najapauwa nu, ni tibaujinak imatiksag umina nu, atumi wakanmishkam idaitustajum.

15

15:1b.1PE.015.001 Yamai atum Kristu nemajuidaun diin aidautigmin, wishakam Kristu nemajuidaun diin asan tajime. Kristu waitkasa maamunash wi dekas mina jiijuí shiig wainkauwaitjai, nuniku asan dakajai, ni juwi taakui dekas pujut pegkeg iman atina nu jukitnaitag nuna.

15:2b.1PE.015.002 Jisukristu nemajin aidau shiig kuitamkatajum, uwijá kuitamin aidau uwigjin kuitamin aina imatiksajum. Tikich inapakui kuichik jukitasa takamainaitam nunitsuk, shiig wakejusjum Apajuí wakega dutiksagmek takastajum.

15:3b.1PE.015.003 Atum wagagsajum chichagkatasagmek wakeyigpa, nunitsuk atumin pujutjum pegkeg iwaintuktajum.

15:4b.1PE.015.004 Atum nu betek dutiksagmek umiakjumek, Kristu dekaskenum uwijá kuitamna nunú minakui, wají shiig pegkeg tuke atina nu jukitnaitjume.

15:5b.1PE.015.005 Antsagmek datsauch aidautigmeshkam, Jisusa nemajuidaun diin aina nui sumitkau atajum. Ashí atum aidautigmek emematsuk, tikich aidaujaish pempentunisjumek sumimdaimain ainagme, wagki: “Apajuik aents ememachu aidaun wait anentug yayaak, emebau aidaunak yaitsuk idayu asamtai.”

15:6b.1PE.015.006 Apajuí dekas senchigtina nuna emtinig imanchauch anenmamtajum, ni tsawan jegatai iman etamtin asamtai.

15:7b.1PE.015.007 Ashí atum uyumamugmik Apajuí idaitustajum, ni atumnak kuitamjamu asamtai.

15:8b.1PE.015.008 Aneaku niimkau atajum, atumi shiwajum iwanchia duka pegkegchaun takamtijamsatatus, ikamyawa kajeak shinuwama imatak teentugmawai.

15:9b.1PE.015.009 Nuniakuishkam atum Apajuiyai kajintsá anentaibaunum iwanch waitkagmainakuish katsunjatajum. Nuniakjum adeagtajum, ashí tikich nugkanmaya atumi yatsum aidaush, wijai betekap waituinawa tusajum.

15:10b.1PE.015.010 Tujash atum ju nugka juwi pujusjum wajumak tsawantai waittsagminchakam, Apajuí shiig pegkeg etabiagtatui, waittsamujin diisag junik dekapjainum tusa. Dutijama nigka wait anenkagtina ibau asa, Jisukristujai pujustinme tusa niina senchijin amas, kakajus niiní tsujamainchau etami ajumaish wajukashtina nui awaintamawagtinai.

15:11b.1PE.015.011 Niiyai Apuk, iman asa tuke Apuk atinai. Aatus atí.

15:12b.1PE.015.012 Jujú papiinak Silvano yaintsamtai agajan ni minakui awemajai. Nigka yatsut dekas shiig Kristu umignai. Tuja wi papiin agatjim junak, atum Kristui kajintsá anentaimjum duka, nuní nagkaemasjum anentaimtakjum, Apajuí dekaskenum atumnak anempaina dusha dekaatajum tusan agatjime. Ashí wi tajim nuwig emetmamjajum pujustajum.

15:13b.1PE.015.013 Jisukristu nemagkaju Babilonia pujuina nunashkam Apajuik etegjauwai, ni atumin etegtamjauwa dutiksag. Nunú aidaushkam atumnak kumpamjamainawai, Marcos mina uchijua imana dushakam aikasag kumpamjamainawai.

15:14b.1PE.015.014 Makí makichik atum aidautigmeshkam aneenisjum ashí tikich aidaujaishkam kumpamdayatajum, dutikdayakjum atum ditajai aneeniamushkam iwaintuniktajum. Ashí atum Kristunu aidautigminak shiig agkan anentaimsa pujutan amastinme. Aatus atí.