Es ist besser ein alt man vnnd ein jung weib /dann ein alt weib vnd ein junger gesell.
Diß Sprichwort lobt nit fast / daß ein alter man ein junges weib neme. Es sagt aber / es sei eins besser /dann das ander / wiewol sie beyde nicht fast gleich seind / böß ist keins an jhm selbs / es können es aber die vmbstände wol böß machen. Im Ehstand ist freundtschafft vnnd eynigkeyt das nötigste vnnd beste. Freundtschafft aber vnnd eynigkeyt kan nicht bestehen / dann auß gleichheyt des alters der sitten / des gemüts / vnnd gantzen wandels / wie mann sagt: Gleich vnnd gleich gesellt sich gern. Soll aber jung vnnd alt sich mit einander vergleichen / so můß da mehr dann glück sein / ja gewißlich ein sonderlich Gottes gnade. Ein alter man kan mit einem jungen weibe kinder zeugen / wann das geschicht / so gewinnet das weib den man lieb vmb der kinder willen. Zu dem / so kan mann die weiber / ein man sei jung oder alt / nit baß geteuschen / dann so mann jnen alle jar ein kind zůrichtet / damit sie jre zeit vertreiben / mit schmertz tragen sie / vnnd müssen [260] biß inn zehenden Monat in gefahr gehn jres leibs vnd lebens. Wann sie das kind zur welt gebracht / so haben sie tag vnd nacht gnůg zu schaffen / vnd wann sie mit dem růh haben / so kompt ein anders / in dem vergeht jhnen vil geylheyt. Wo aber ein junges weib kein kind hat mit einem alten mann / da helff Gott. Ein junger gesell aber / der ein alt weib nimpt / der hat kein vrsach sie zulieben / seitemal kein hoffnung da ist / einiger kinder. Darumb ists auch gar vngleich / vnd gerath selten wol. Man sagt von dreien kauffmännern / der ein war alt vnd graw / vnnd sein weib wolt jhm kein gůt thůn / sonder sprach:
Darumb ward er willens ghen Pariß zureiten / einn weisen meyster zufragen vmm rath / wie jn sein weib möcht lieb gewinnen. Da er außzoge / fand er einen seiner gsellen / da der höret / daß er vmb gůten radt ghen Pariß zoge / wolt er jhm gesellschafft leysten /seitemal er auch ein weib hett / das naget jn nacht vnd tag / vnd het kein gůte stund jrs bösen mauls halben /ob jm möcht radt geschaffet werden.
Dise beide ritten fort / kamen in eins reichen kauffmanns hauß. Da diser höret / warumb die zwen ghen Pariß reysen wolten / sprach er: Er wolt mit jhnen /den meyster zufragen / Ob es auch mit ehren möcht zůgehn / daß sein weib all jar ein kindt hette / vnd er käm doch offt in eim gantzen jar kaum ein mal zů jr. Sie kamen gen Pariß / legten jr frag für / Der meyster lachet / vnd sprach zum ersten: Wann er heym käme /solt er das kind / so in seinem hauß were / darumb fragen / das würde jhn berichten / dann es wer jm schwerlich zuhelffen.
Zů dem andern sagt er:
Zů dem dritten sprach der meyster: Wann du heym kōpst / so wirt dir begegnen ein Hase auff einer wisen / dem werden vil hund nachlauffen / den hasen frage /so wirt er dich deiner frag berichten.
Der ander kam auch heym / vnd ward von seiner frawen entpfangen / mit haddern vnnd schelten. Er geht zum Esel nach des meysters [261] befelch / vnn fragt jn vmb rath. Der esel sagt:
Das schreib ich darumb / dz man sehe / wie sich jung vnd alt übel zusamen schickt / vnnd zubesorgen /wo sie zusamen kommen / also daß ein junges weib einn alten mann vmb des gůts willen nimpt / die freundtschafft vnd eynigkeyt werde sich bald trennen /Sonderlich aber wo ein junger knecht ein alts weib nimmet. Dann was das kind sagt dem alten mann /das lassen wir vil mehr eim alten weib gsagt sein. Seitemal ein alter ehrlicher mann eh zulieben ist / dann ein altes weib. Dann es lassens die alten weiber nit /sie zannen die jungē männer an / vnd haben sorg / sie wenden jhre liebe anderßwohin / Vnnd wo sie ein wenig einen argwon wider sie schöpffen / müssen sie täglich auff dem brot essen / wie sie von jhnen zů ehren vnd gůt seind kommen. Darumb wer freien wil /der neme seines gleichen / so hat keins dem andern nichts fürzuwerffen.