Hab rath vor der that.

Man soll alle ding mit rath vor wol erwegen / berathschlagen / vnd überlegen auff alle ort / in Gottes forcht / ob mans also hinauß bringen mag / Dann fahet man das liedlin zuhoch an / vnnd erligt im singen / so můß man den spott zum schaden haben. Derwegen lernen vns die Sprichwörter / nicht on zeitigen rath zuthůn / vnnd soll sich keiner auff sein weißheyt steuren / vnd selbs weise gnůg achten / Dann zwen wissen mehr dann einer. Vil händ heben vil. Vier augen sehen mehr dann zwey / Zů dem seind wir von natur in vnsern eygen sachen blind / Vnd der offt allen menschen rathen kan / weyß jm selbs weder zu rathen noch helffen. Vnd Gott fügt es / daß keiner jm selb gnůgsam / wie mächtig er auch ist / Schmeltzt vnd mischt vns also an einand' / daß ie einer des andern bedarff / diene / vnnd nütz sei.