Fleuchstu so ligstu.

Dem übel sol mann entgegen gehn. Wort schlagen dleut nit. Wer dem übel entgegen laufft / den fleucht es / Wer es fleucht / dem laufft es nach. Es werden alleyn die laster / als geitz / vnkeuscheyt / hoffart etc. mit flucht geschlagen / aber der angeber derselben /Satan / mit widerstand vnnd waffen / ij. Cor. x. Ephe. vj. erzelt.

Inn nöten sicht mann wer ein man ist. Wie mann inn nöten den freundt spürt / also auch den man. Er fellt hinein wie ein wild schwein. Verwegen es hinein setzen / als wüchsen köpffe auff bäumen / vnd die es wagen / als haben sie jr leben gestolen. Er kompt allzeit wider / wie ein muck.