[][][][][[1]]
Das ander
Buch
Oden vnd
Geſaͤng.

Durch
Georg—Rodolf Weck-
herlin.
[[2]][[3]]
An den
Durchleuchti-
gen vnd Hochgebornen
Fuͤrſten vnd Herꝛen/
Herꝛen
Georg—Friderichen
Marggrafen zu Baden vnd Hoch-
berg ꝛc. Landgrafen zu Sauſenberg/ Herꝛen
zu Roͤteln vnd Badenweiler ꝛc.
Meinen gnaͤdigen Fuͤrſten
vnd Herꝛen ꝛc.


O Großer Printz/ in deſſen ſchutz

Sich alle Tugenten ergeben/

Das Sie der argen welt zu trutz

Moͤgen auf erden ſicher leben;
Printz
[4.[4]] Printz/ meiner Muſen zuverſicht/

Verſchmaͤhet diſes Buͤchlin nicht

So Euch auf der Muſen begehren

Jch demuͤtiglich thu verehren.

Dan als ich newlich nachts allein

Auf dem feld hin vnd her ſpatzierte

Wahin Phæbe mit halbem ſchein

Meine vnachtſame trit fuͤhrte/

Vnd verdroſſen bey mir gedacht/

Wie uͤbel ich die zeit zubracht/

Jn welcher mit der Muſen lehren

Jch mich ſelbs thet vmbſunſt bethoͤren:

Da fand ich mich an einem Ort

Bald von Jhnen allen vmbgeben/

Vnd hoͤrt Sie durch manch ſuͤßes wort

Meinem verdruß gern widerſtreben:

Jnſonderheit kam auch herfuͤr

Jhr Fuͤhrer Apollo/ der mir

Gleich fuͤr Sie all auf meine klagen

Jhre meinung ſelbs fuͤrgetragen:

Filodor (ſprach Er) laß numehr

All forcht/ ſorgen vnd trawren fahren/

Dan ein Fuͤrſt/ aller Fuͤrſten ehr/
Kan
[5.[5]] Kan vnd will Vns vnd Dich bewahren;

Vnd iſt ſein Nam (der wie ſein gunſt/

Ein getrewer ſchirm vnſrer Kunſt)

Georg-Friderich Marggraf zu Baden/

Bey welchem Wir vnd du in gnaden.

Jhm opfer du auf dein geſang/

Vnd ſchew dich nicht vor ſeinen wafen/

Ab welchen ſeinen Feinden bang/

Welche der Hoͤchſt durch Jhn will ſtrafen:

Dan die große Helden allzeit

Haben vor/ in vnd nach dem ſtreit

Vns geliebet/ Ja vns geehret/

Vnd Jhrer gegenwart gewehret.

Auch iſt Jhr lob noch billich kund/

Vnd kan ewiglich nicht vergehen/

Welches eines Poeten mund

Der gantzen welt gab zuverſtehen;

Darumb gib Jhm auch ehr vnd preiß/

Dan ja der menſchen hoͤchſter fleiß

Kan den Goͤttern mehr nicht erweiſen

Dan Sie loben/ ehren vnd preiſen.

Als Jupiter durch ſeine ſtrahl

Den Riſen jhr leben verkuͤrtzet/
A iijVnd
[6.[6]] Vnd von des himels hohem wahl

Sie uͤber vnd uͤber geſtuͤrtzet/

Begehrte Er (ſigreich) mehr nicht/

Dan das wir ein ſchoͤnes gedicht

Vor ſeinen Ohren wol erklangen/

Vnd ſein lob mit ſeinem ſig ſangen.

Wolan dan/ Caſtaliſcher Chor

Laſſt vns auch diſen Fuͤrſten ehren/

Vnd du ſing mit Vns/ Filodor/

Als wir deinen mund werden lehren:

Vnd weil Er ja vnſer Patron/

So laſſt vns flechten eine Cron/

Die du Jhm deemuͤhtig ſolt bringen.

Fieng demnach alſo zuſingen:


Cron
[7.[7]]

Cron.


Apollo.

GEorg-Friderich iſt der ſterb-

lichen ehr/

Vnd von den Goͤttern ſelbs geehret/

Welche die Welt durch ſeines lebens lehr

Aller jhrer reichtumb gewehret.

Dan Er iſt ja an Tugenten ſo reich/

Das wan ſein Land ſeinem verdienſt waͤr

gleich/

So wuͤrd man Mich darin aufgehen/

Vnd wider—nider—gehen ſehen.

Aber der Goͤtter aigne hand/

Die ſeine Sehl alſo goͤtlich bereichet/

Beraitet Jhm in Jhrem Land

Ein ſolche Cron/ deren der Vmbkraiß wei-

chet:

Doch ſoll ſeine ſtirn wehrt vnd weiß

Noch ſo bald nicht damit geeroͤnet werden/

Auf das Erlaͤnger bleib auf erden

Diſer Welt lieb/ hofnung/ wolluſt vnd preiß.

A iiijClio.
[8.[8]]
Clio.

DJſer welt lieb/ hofnung/ wolluſt vnd

preiß

Wirt Er billich allein geachtet/

Wan man allein ſeine Weißheit mit fleiß

(Als der Tugenten haubt) betrachtet.

Durch Sie kan Er/ weiß/ fuͤrſichtig vnd klug

Wol in dem grund den verſtoͤlten Betrug/

Vnd die verborgne Warheit ſehen/

Vnd jenem vnd der Rew entgehen.

Durch Sie befuͤrdert Er die gleich

Deren verdienſt Jhre bit nicht verneinet;

Durch Sie iſt Er Jhm ſelbs ſtehts gleich/

Dz er nicht ſpꝛicht/ dz haͤt ich nicht vermeinet.

Ja auf diſer Welt wildem Moͤhr/

Kan Er durch Sie ohn forcht aller gefahrẽ

Mit ſeinen Tugenten vmbfahren

Vnverwundlich vnder der Feinden Hoͤhr.

Melpomene.

VNverwundlich vnder der feindẽ hoͤhr

Macht jhn die Dapferkeit verbleibẽ/

Er kan mit Jhr/ als ſeinem ſchilt vnd

woͤhr/

Was
[9.[9]]
Was ſunſt zufoͤrchten iſt vertreiben:

Jn Jhr/ gleichſam in einem voſten ſchloß

Kan ſein gemuͤht/ maͤchtig/ einig vñ groß/

Des Lebens krieg ſicher verwalten/

Vnd die belaͤgrung frey außhalten:

Mit Jhr kan Er in gutem Gluͤck

(Welches oft falſch) ſich gantz ſanftmuͤhtig

naigen;

Aber wider des Vngluͤcks duͤck

Sein ſtarckes hertz allzeit ſigreich erzaigen.

Ja ſeiner ſtreitbaren fauſt macht

Wirt ſeine feind (ob Got will) noch zuſtoͤren/

Das man Jhren verluſt ſoll hoͤren

Durch meiner ſtim vnvergaͤnglichẽ pracht.

Euterpe.

DVrch meiner ſtim vnvergaͤnglichen

pracht

Muß ich ſeine Maͤßigkeit preiſen/

Die als ſein Raht vñ Doctor tag vñ nache

Thaͤt ſeine begird vnderweiſen.

Sie haͤlt den zaum mit ſo gewißer hand

Jn ſeiner ſehl/ das in allem zuſtand

Sein gaiſt/ geberden vnd gedancken

Niemahl vnder einander ſchwancken:

A vSie
[10.[10]]
Sielaſſt keine vnordnung zu/

Zu-wenig vnd Zu-vil in jhm nicht krieget/

Sie macht in Jhm ein ſolche ruh/

Das die Vernunft allen willen vernuͤeget:

Sie macht das ſeiner thaten grund

Nicht auf des Volcks meinung vnd lob be-

ſtehet;

Vnd das ſein red vnd thun gleich gehet/

Damit ſteif bleib ſeiner Tugenten bund.

Thalia.

DAmit ſteif bleib ſeiner Tugẽtẽ bund/

Der ſeinen leib vnd ſehl erquicket/

So ehret Er mit der that vnd dem

mund

Die/ welche Raht vnd That begluͤcket.

Die Nuͤchterkeit (die bey Hof in dem bann/

Die ſchier kein Fuͤrſt/ kein Reicher/ kein

Hofman

Mehr will weder ſehen noch hoͤren/

Vnd darumb in Jhm mehr zuehren)

Die macht das ſein koch Fruͤh-auf-ſein

Seine mahlzeit nach gefallen beraitet;

Vnd das der Reichtumb falſcher ſchein

(Der Gailheit neſt) Jhr banier nicht auß-
ſpraitet:
Ja
[11.[11]]
Ja Sie verhindert den Wolluſt/

Das Er niemal die Tugent vnderdrucket/

Vnd ſie macht/ das die Tugent ſchmucket

Sein volck mit lieb/ vnd mit lob ſeine bruſt.

Erato.

S Ein volck mit lieb/ vnd mit lob ſeine

bruſt

Thut ſeine Embſigkeit erfuͤllen/

Dan keines tags/ nein/ keiner ſtund verluſt

Hat je bethoͤret ſeinen willen.

Es kan kein Fuͤrſt dẽ Staht ſeiner Landſchaft/

Vnd ſeines volcks gemuͤht vñ aigenſchaft

So wol ſehen/ wiſſen/ bekehren/

Vnd mit guten exempeln lehren:

Kein Fuͤrſt kan ſo muͤhſam vnd weiß

Der nohtdurft nach die Ämpter ſelbs be-

ſetzen/

Die geſchaͤften mit ſorg vnd fleiß

Verꝛichten bald/ vnd den verdienſt ergoͤtzẽ;

Noch mit Ruh-verachtender hand

Zujeder zeit das ſtewr ſo gewiß halten/

Vnd alles ſo embſig verwalten/

Wie Er gantz gleich an muͤh/ fleiß vñ verſtãd.

Terp-
[12.[12]]
Terpſichore.

WJe Er gantz gleich an muͤh/ fleiß vnd

verſtand/

Seine Freygaͤbigkeit erklaͤret/

Durch die Er nicht ſeinen pracht/ ruhm

vnd ſtand/

Sondern des Hoͤchſten lob vermehret:

Jndem niemand zu großen uͤberfluß

(Der gemeinglich einen ſpahten verdruß

Vnd widerwillen verurſachet)

Bey Jhm falſch-lobet noch verlachet:

Vnd zu—freyhe Freygaͤbigkeit

Bey Jhm niemand zuverlierẽ erſchroͤcket;

Sondern ſich ſeine Miltigkeit

Auf den verdienſt vnd die nohtdurft erſtroͤcket.

Dan ja ſein hertz vnd hand recht frey/

Die wiſſen wol des bodens zuverſchonen/

Vnd auch nach gebuͤhr wol-zu-lohnen/

Auf das Sein lob wuͤrdig vnd wehrhaft

ſey.

Polymnia.

AVf das ſein lob wuͤrdig vnd wehrhaft

ſey

Bringt ſeine Gnad vnd Guͤt zuwegẽ;

Fuͤr
[13.[13]]
Fuͤr Sie iſt Jhm ſein volck hold vñ getrew/

Als fuͤr ſeinen reicheſten ſeegen:

Durch Sie wirt Er geehret in dem Land/

Sie iſt allein der rechte Amors-brand/

Damit Er die ſehlen anzindet/

Vnd Sie ſo gehorſam erfindet/

Das Sie Jhn/ nein/ vilmehr fuͤr Jhn

Foͤrchten/ vnd Jhn mehr dan Sich ſelbs

bewahren;

Fuͤr Jhn (Jhren beſten gewin)

Weder arbeit noch leib vnd leben ſpahren:

Er iſt Jhr Vatter/ Jhr Patron/

Ja Jhr Got ſelbs von dẽ ſie gnad erlangẽ/

Vnd durch Gnad ſoll auch Er empfangẽ

Von Gottes hand des Himels Gnadẽ-cron.

Vrania.

VOn Gottes hand des Himels Gna-

den-cron

Die Gotsforcht jm zuwegẽ bringet/

Jch waiß wie ſie ſich zu des Hoͤchſtẽ thron

Mit kraͤftigem eyfer aufſchwinget.

Sie deren lob billich in meinem mund/

Die iſt allein aller Tugenten grund/

Ohn welchen Sie zu boden fallen/

Sie
[14.[14]]
Sie iſt der Engeln wolgefallen;

Sie iſt der Sehlen ſtarck es band/

Ohn welches ſich der menſchẽ lieb vernichtet;

Vnd nur durch Jhr maͤchtige hand

Werden die Staͤt vñ Laͤnder aufgerichtet:

Sie gibt Jhm einen ſolchen muht/

Das Er niemand verdam̃et oder haſſet/

Vnd ſich allein auf Got verlaſſet/

Fromb fuͤr ſich ſelbs/ vñ fuͤr jederman gut.

Calliope.

FRomb fuͤr Sich ſelbs/ vnd fuͤr jeder-

man gut

Thut Er loͤblich ſein volck regieren/

Ja wa muͤglich will Er der boͤſen blut

Vilmehr purgieren dan verlieren:

Das thut in Jhm der Gerechtigkeit macht/

Welche des Lands gewiße vhr vnd wacht/

Die Jhn niemahl laſſet entſchlafen/

Wan zu verzeihen vnd zuſtrafen:

Durch ſie der Stand vnd das Geſchlecht

Zichen bey jhm die Wag nicht auf die ſeitẽ;

Durch Sie iſt Recht niemahl Vnrecht/

Noch Vnrecht Recht an jhm noch andern

Leuten:

Ja
[15.[15]]
Ja Sie iſt gleich fuͤr groß vnd klein/

Vnd Sie ſelbs hat mit guldinen buchſtabẽ

Diſe wort in ſein hertz gegraben:

Des volcks wolfahrt ſoll dz hoͤchſt Geſatz ſein.

Der Poet.

DEs Volcks wolfahrt ſoll das hoͤchſt

geſatz ſein

Das thun all ſeine Sitten lehren.

Seines geſichts Mayeſtetiſcher ſchein/

Seiner augen ernſtliche lehren/

Seiner perſon gantz herꝛliche geſtalt/

Seines verſtãds ſtehts-from̃ender gewalt/

Darab ſich die menſchen entſetzen/

Damit ſich die Goͤtter ergoͤtzen/

Seines munds wahrhaftige frucht/

Dadurch die ſehl ſich beſſert vnd erfrewet/

Seiner geberden khuͤne zucht/

Welche mit ernſt ſchand vñlaſter zuſtroͤwet/

Vnd ſein Vrthail/ der Kuͤnſten lohn/

Ja was Er iſt/ alles macht vns bekennen/

Das Wir Jhn muͤſſen billich nennen

Der Muſen troſt/ vñ der Tugenten wohn.

Der
[16.[16]]
Der gantze Chor zuſamen.

DEr Muſen troſt/ vnd der Tugenten

wohn/

Vnd der Potentaten Exempel;

Ja wie zu Rom der tempel Pantheon

War einmahl aller Goͤtter tempel:

Alſo iſt jetz bey vns Georg-Friderich/

Der hat allein die Tugenten bey ſich.

Er iſt Weiß ſich wol fuͤr-zu-ſehen/

Starck gluͤck vnd vngluͤck auß-zu-ſtehen/

Maͤßig/ Nuͤchtern/ Embſig zugleich/

Milt wol-zu-thun/ vnd recht vnd wol zu-

geben/

An Gnad/ Gotsforcht vñ From̃keit reich/

Gerecht fuͤr Sich vnd fuͤr andre zu leben/

Von Sitten die je mehr vnd mehr

Der Menſchen Hertz mit lieb vnd lob durch-

dringen:

Darumb Wir billich zumahl ſingen/

Georg-Friderich iſt der ſterblichen ehr.


Georg-Rodolf Weckherlin.


[17]Das ander Buch.

Des andern
Buchs
Die erſte Ode.


Lobgeſang/
an
DJe Durch-
leuchtigſte Churfuͤrſtin/ ꝛc.
Fraw Eliſabeth/ ꝛc. Geborne Koͤ-
nigliche Princeſſin auß Groß-Bri-
tanien/ ꝛc.


PRinceſſin deren Leib vnd Sehl/

Himeliſch vnd ohn allen fehl/

Ein ſuͤſſes wunder hie auf erden:

Angeſchen Ewre geſtalt/

Vnd Ewrer lieblichkeit gewalt/

Koͤnt Jhr wol Venus genant werden.

BJhr
[18]Das ander Buch.
Jhr habt/ wie ſie/ braunlechte haar/

Augen leuchtend braunlecht vnd klar/

Vnd alles was ſchoͤn zuvermehren:

Jhr koͤnt mit dem reineſten ſtrick

Ewers haars/ vnd einem anblick

Mehr dan ſie fangen vnd verſehren.

Wirt aber Ewer glatte ſtirn/

Vnd der/ auß deſſen weiſem hirn

Jhr goͤtlich entſprungen/ betrachtet:

So werdet Jhr mit groͤſſerm preiß

Von denen die gelehrt vnd weiß

Minerua ſelbs zuſein geachtet.

Ewer ſuͤß-khuͤnes angeſicht

Gibt einen ernſtlichen bericht

Von Ewrer lieb keuſchen gedancken:

Gotsforcht/ die Ewer ſchilt vnd woͤhr/

Vnd Frombkeit/ Ewer ſcharpfes ſpoͤhr

Daͤmpfen hoͤſe luͤſt in den ſchrancken.

Ferꝛners/ Schoͤne Heldin/ wan Jhr

Raͤh/ Hirſch/ vnd andre wilde thier

Zu-faͤllen/ wolt die waͤld durchziehen:

So ſicht man daß die Nymfen Euch

Wie Phæbe folgen/ vnd zugleich

Die uͤppige Wald-goͤter fliehen.

Zwar
[19]Das ander Buch.
Zwar koͤnt Jhr wol Diana ſein/

Als deren ſtehtiger Vollſchein

Kan die nacht in den tag verkehren:

Vnd deren Zucht jhr Koͤcher iſt/

Vnd deren blick zu jeder friſt

Als ſtrahlen dir Goͤter verſehren.

Wan dan Ewer loͤblicher pracht/

Herꝛlichkeit/ Mayeſtet/ vnd macht

Der ſterblichen geſicht durch dringen:

Will ſie alsbald jhre vernunft/

Das Juno durch jhre ankunft

Sie erquick/ zu bekennen zwingen.

Zwar billich/ dan Ewreperſon
(Vil wuͤrdiger der hoͤchſten Cron

Dan Juno) kan ſich wol bereichen

Mit ſolchem ſchmuck nach jhrem ſtand/

Das jhr an koͤſtlichem gewand

Vnd kleinoten Juno muß weichen.

Alſo/ Goͤtin/ koͤnt jhr allein

Mit keuſchem vnbefloͤcktem ſchein

Mehr dan Phæbe; mit Kunſt vnd Lehren

Mehr dan Pallas; mit Lieblichkeit
B ijMehr
[20]Das ander Buch.

Mehr dan Cypris; mit Koͤſtlichkeit

Mehr dan Juno die welt gewehren.


Die andere Ode.


Von dem new-
en Garten/ welchen die
Durchleuchtige ꝛc. Fraw Barbara
Sophia Hertzogin zu Wuͤrtemberg ꝛc. ge-
borne Marggraͤfin zu Branden-
burg ꝛc. angerichtet.


KAnſt du wol gluͤckſeliger ſein/

O du ſtehts geſegneter Garten?

Du darfeſt auf den Sonnenſchein

Nicht wie ſunſt andre gaͤrten warten.

Dan deiner aignen Sonnen glantz

Kan all deine gewaͤchs erlaben/

Vnd deine gaͤng/ ſtoͤck/ vnd baͤum gantz

Mit bequemer Jahrs-zeit begaben.

Der fruͤling jhres angeſichts

Kan dich mit gilg vnd roſen zieren/
Das
[21]Das ander Buch.

Das dir an blumen mangle nichts/

Wan ſchon alle gaͤrten gefruͤeren:

So wirt dein grund mit gruͤnem luſt/

Wa ſie nun jhren fuß hinſetzet/

Wie deine zweig vnd aͤſt mit bluſt

Vnd frucht durch jhre hand/ ergoͤtzet.

Vnd Sie in dir macht das ab dir

Sich himel vnd erden erquicken/

Vnd das du/ aller gaͤrten zier/

Sie all mit blumen kanſt erquicken.

Ja/ wan Sie (aller blumen ruhm)

Jn dir deine gewaͤchs betrachtet/

Werden kaum gegen ſolcher blum

Deine blumen wie graß geachtet.


B iijDie
[22]Das ander Buch.

Die drite Ode.


An ꝛc. HErꝛen
Johan-Friderichen Hertzo-
gen zu Wirtemberg ꝛc.


VOn den thaten Ewrer Vorfahren/

Welche durch jhrer manheit prob

Suchten ein vnſterbliches lob

Jn den toͤdlichſten Kriegs-gefahren:

Von jhrem hochweiſen verſtand

Damit Sie den freunden genuͤtzet/

Vnd oft in hoͤchſter noth das Land

Wider maͤchtige feind beſchuͤtzet:

Ja wol von dem Helden allein/

Deſſen ruhms ſtehts-wehrender ſchein

Diſes Land/ ja die welt bezeuget/

Von deſſen ſamen Jhr gezeuget:

Wolt ich ein ſolches lob beſchreiben

Das jhres namens wahrer preiß
Solt
[23]Das ander Buch.

Solt (O Printz wie Sie from vnd weiß)

Auch Ewers namens preiß verbleiben?

Aber die tugenden/ ſo Euch

Selbs liebreich vnd lobreicher machen/

Wuͤrden Euch ab frembdemlob gleich

Schamroht zuwerden verurſachen

Darumb ich Euch vilmehr begehr/
(Erkennend Ewer aigne ehr)

Ein aignen altar aufzurichten/

Vnd aufzuopfern aigne fruͤchten.

Doch zuvor wolt ich ſein gewehret

Deſſen/ ohn welehes mir hie bang/

Vnd was in ſeinem Lob-geſang

Auch Callimachus recht begehret:

Mit tugent (ſpricht er) vnd mit haab

Thu mich O Jupiter begaben;

Ohn gut iſt die Tugent ſchabab/

Ohn tugent wolt ich kein gut haben:

Dan keines ohn das ander gut/

Darumb gib beedes/ das mein muth

Sich ſtehts der Tugent moͤg ergeben/

Vnd auch mit guͤtern froͤlich leben.

Die Koͤnige hielten vor Jahren

Die Poeten in wehrtem ſtand/
B iiijVnd
[24]Das ander Buch.

Vnd ließ jhnen jhr milte hand

Vil ehr vnd guͤter widerfahren:

Vnd haben die Helden allzeit

Die Poeſy billich geliebet/

Ja jhrer vil auch nach dem ſtreit

Sich ſelbs darinnen gern geuͤbet.

Vnd warlich diſe ſchoͤne Kunſt/

Findet noch vnfehlbarlich gunſt

Bey denen die ſieh zu vermehren

Durch jhre tugent fleiß ankehren.

Dan ein lob kan ja nicht mißfallen/

Sondern iſt ſuͤß/ gut/ vnd recht kund/

Welches ein lob-wuͤrdiger mund

Thut mit getrewer Zier erſchallen.

Vnd ohn ein ſolches lob-geſang

Kan kein groſſer nam lang beſtehen/

Sondern des Tods vnd der Zeit zwang

Machen jhn kuͤrtzlich zu grund gehen.

Darumb ich keinen zweifel hab/

Es werd auch meiner Muſen gaab
(O Fuͤrſt ſo loͤblich als vollkommen!)

Von Euch gnaͤdiglich aufgenommen.


[25]Das ander Buch

Die vierte Ode.


Aigentliche Bildnus
ꝛc. Herꝛen Ge-
org-Friderichs Marggra-
fen zu Baden vnd Hoch-
berg ꝛc.


WJe ein großer Printz triumfier

Vnuͤberwuͤndlich uͤberwunden/

Sein land frey halt vnd wol regier/

Wie die menſchen frey vnd gebunden:

Wie Sie die lieb mach allzeit frey/

Wie fro Sie mach die forcht vnd trew/

Solt du Muſa jetzund betrachten/

Vnd ſingen mit ſo hohem klang/

Das die Nachkoͤmling dein geſang

Als ein wunder ewig hochachten.

Er (in ſich ſelbs gerecht vnd rein)

Die billich keit bey ſich loſieret/
B vDas
[26]Das ander Buch.

Das ſeiner Gerechtigkeit ſchein

Jhn alſo klar vmb vnd vmb zieret:

Vnd jhr vnd ſein ſuͤßer gewalt

Macht frey vnd ſicher dergeſtalt/

Das ſeine leut gluͤckſeelig leben:

So wirt auch ſein geſatz mit lehr

Durch ſeine ſtirn/ oder vilmehr

Durch ſein thun an das liecht gegeben.

Sein goͤtliche form vnd geſicht

Macht das die ſitten/ ſo auferden

Sunſt menſchlich/ mehꝛ fuͤꝛ menſchlich nicht/

Sondern fuͤr goͤtlich erkant werden:

Des himels beyſpihl/ kraft vnd zier

Stoͤllet vns ſeine Gotsforcht fuͤr:

Sein leib/ damit ſein Land belohnet/

Jſt ein Jrdiſches himelreich/

Welches ſein gaiſt maͤchtig vnd reich

An herꝛlichkeit (ſeelig) bewohnet.

Seines weiſen Rahts ſtarcke hand
Öfnet der Fuͤrſichtigkeit tempel;

Vnd ſein all-gruͤndender verſtand

Gibt andern Weiſen ein exempel/

Wie ſie durch ernſtliche anblick

Koͤnden zumahl in allem gluͤck
Ernſt
[27]Das ander Buch.

Ernſt/ guͤte/ ſtraf oder gnad uͤben;

Vnd wie ein menſch zu aller friſt/

Der milt/ guͤtig vnd gnaͤdig iſt

Als ein jrdiſcher Got zu lieben.

Er (als der in der Tugent kraiß

Ein newer Alcides geboren)

Hat auch der Tugent muͤh vnd ſchwaiß

Fuͤr ſeine lieb vnd luſt erkoren:

Der Tugent werck ſeind ſeine ruh/

Muͤſſig bringet er die zeit zu

Mit fortpflantzung guter geſaͤtzen:

Keinen haß noͤhret ſeine ſehl/

Jedoch das ſeine ſinn ohn fehl

Sich den laſtern ſtarck widerſetzen.

Seiner augen klares geſtirn

Kan ſein Land mit dem friden ſegnen:

Seine Mayeſtet-reiche ſtirn

Macht darauf allen ſeegen regnen.

Seiner wahren triumfen pracht

Jſt nicht mit Kriegs wafen vnd macht/

Sondern mit dem friden gezieret:

Alſo der himel ſelbs mit wohn

Vnd hayligem ſchmuck/ ob er ſchon

Nicht krieget/ dannoch triumfieret.

Sein
[28]Das ander Buch.
Sein hertz iſt großmuͤhtig allzeit

Frid zuhalten/ oder zukriegen:

Vnd wie der frid alſo der ſtreit

Kan ſein fridreiches hertz vernuͤegen.

Seiner muͤh vnd vnruh beſtand

Beſtehtiget mit ruh ſein Land:

Auß ſeiner Tugent quellen flieſſen

So vil Tugenten/ das jhr zahl
(Vnzaͤhlich) macht ſein Land zumahl

Ein ſanftes Tugent-moͤhr genuͤſſen.

Wiewol ſeine fauſt/ hertz vnd muht/

Stehts ſigreich/ niemahls uͤberwunden[;]

Hat er doch ſelbs ſein Heldenblut/

Ja ſich ſelbs (ſigreicher) gebunden:

Doch iſt ſein ſuͤße dienſtbarkeit

Nichts dan freyheit vnd herꝛlichkeit.

Jn ſeinem Raht die thaten bluͤhen/

Vnd das ſinwell Gluͤck wirt ſtandhaft/

Ja/ ſeines guten Lebens kraft

Wirt dem tod ſeine kraft entziehen.

Das thier ſo (nur fuͤr ſich ſelbs groß)

Seines nechſten verdienſt verneinet

Auch das thier ſo (niemahl ſchmertzloß)

Ab ſeines nechſten lachen weinet/
Ligen
[29]Das ander Buch.

Ligen gantz beſtutzet zu grund

Ab dem glantz ſeines lobs ſo kund/

Das ſich jhr hertz darab entſetzet:

Jndem ſein ſorgfaͤltiger fleiß/

Stehts jederman auf alle weiß

Zu ergoͤtzen/ Jhn ſelbs ergoͤtzet.

Freygebig gibt er auß ſein gold/

Voͤſt iſt Er ſein ehr hand-zu-haben;

Mit forcht wirt Jhm jederman hold:

Das iſt der gewin ſeiner gaben/

Das moͤniglich mit lieb vnd forcht

Jhn ehret vnd jhm gern gehorcht/

Jndem Er (goͤtlich angefuͤhret)

Gantz ſtreng mit ernſthaftem gemuͤht

Sich ſelbs/ vnd mit geehrter guͤt

Vnd milter lieb andre regieret.

Er herſchet vnder dem gebot/

Sovil jhm der buchſtab anzaiget/

Vber ſich ſelbs/ weil er ohn ſpot

Gehorſam ſich darunder naiget:

Vnd ſeinem Reich (der Rechten ſchatz)

Gehorchet der Natur geſatz:

Vnd wie ernidrigt Er zuſehen

Mit ſeiner tieffen lehr vnd kunſt;
Alſo
[30]Das ander Buch.

Alſo der welt billiche gunſt

Vnd lieb pfleget Jhn zu erhoͤhen.

Jn ſeiner vnderthanen bruſt

Vermehret ſich taͤglich ſein leben;

Sie begehren alle mit luſt

Jhr leben fuͤr jhn aufzugeben:

Vnd iſt jhr wehrte dienſtbarkeit

Ein groͤſſere gluͤckſeeligkeit/

Dan ſo Sie andern zu befehlen:

Alſo diſe lieb beeder werts

Macht auß ſovil hertzen ein hertz/

Vnd nur ein ſehl auß ſovil ſehlen.

Es iſt nicht muͤglich/ das die ehr/

Damit die menſchen jhn bereichen

Vnd uͤberhauffen mehr vnd mehr/

Sich ſeinem verdienſt moͤg vergleichen.

Der thewreſte ſchatz den Er hat

Jſt der vnſchaͤtzliche voꝛraht

Deren willen/ die ſeinem willen

Williglich aufgeopfert ſeind:

Vnd Er des himels lieber freund

Thut den Vmbkraiß mit lieb erfuͤllen.

Nu darf mein vnwuͤrdige hand
(Hand ach! das dir nicht thu mißlingen!)
Nicht
[31]Das ander Buch.

Nicht eine gaab auß Morgenland/

Noch ſunſt uͤber Moͤhr Euch herbringen:

Sondern ein vil reichere gaab/

Namlich Ewer thewreſte haab/

Ja das (ſo nicht gnug zu vermehren)

Was jhr an Euch ſelbs ſeit/ Ja Euch/

Euch ſelbs/ Held/ der Jhr nur Euch gleich/

Hiemit deemuͤhtiglich verehren.


Die fuͤnfte Ode.


Zu Ehren
ꝛc. Herren Chri-
ſtian dem Eltern/ Fuͤrſten
zuͤ Auhalt/ ꝛc.


WEil ich ſah das die lehr vnd kunſt/

So die Muſen vmb fleiß verkauffẽ/

Schier bey allen ſo gar vmb-ſunſt/

Das man damit moͤcht betlen lauffen;
Vnd
[32]Das ander Buch.

Vnd das Sie wie mir jhre lehr

Bey den frembden gunſt/ lieb vnd ehr

Erworben/ hie mich machten haſſen:

So beſchloß ich in Teutſcher ſprach
(Der vnerfahrnen meinung nach

Zu grob) zuſchreiben abzulaſſen.

Aber waͤr es nicht eine ſchand/

Wan ich auf diſer meinung bleiben/

Vnd nicht ſolt mit get rewer hand

Von Euch ein lobgeſang beſchreiben?

Von euch/ Printz/ deſſen wuͤrdigkeit

Vilmehr dan die vndanckbarkeit

Diſer Welt mein gemuͤht anzuͤndet:

Bey deſſen tieffen erkantnus

Wahre Kunſt keine hindernus

Vnd vnverſtand keinen ſchutz findet.

Dan jhꝛ/ Printz/ ſeit des Teutſchlands wohn/

Lieb/ verlangen/ vnd wolgefallen/

Von dem/ ſo der Tugent Patron/

Meine ſtim billich ſoll erſchallen.

Euch/ Euch hat ſeinem volck zu nutz/

Seinen widerſaͤchern zu trutz/

Got als einen Waͤchtern gegeben;

Das es nach Ewrem weiſen raht/
Vnd
[33]Das ander Buch.

Vnd durch Ewer fleiſſige that

Kan ſtill/ ruͤhwig vnd froͤlich leben.

Ajax kont durch ſein ſtarcke hand

So vil als der Kuͤneſtverꝛichten;

Aber zuſchlecht war verſtand

Durch guten raht etwas zuſchlichten:

Alſo ſeit Jhr bey weitem nicht/

Sondern Ewer weiſes gericht
(Deſſen ſich alle fromme froͤwen)

Kan wie Vlyſſes Ewre freund

Durch raht erhalten/ vnd die feind

Wie Ajax durch thaten zuſtroͤwen.

O wie wolt ich diſes geſang

Mit vil ſchoͤnen exempeln zieren/

Vnd ewre fauſt mit klarem klang

Wie Ewers verſtands kraft außfuͤhren?

Wan jhr nicht ſelbs woltet vilmehr

Ewers namens wuͤrdige ehr

Stehts verdienen/ dan loben hoͤren:

Vnd wan eines ſterblichen prob

Kont mit ſeinem mund Ewer lob

Wie mit ſeinem hertzen vermehren.

Es waißt vnd bezeuget Franckreich
(Kriegs vnd fridens halb hochgepriſen)
CWie
[34]Das ander Buch.

Wie weiß vnd wie dapfer jhr euch

Gleich in ewrem fruͤling erwiſen:

Der Groß vnd Gleichloßvon Bourbon/

So der nechſt gebluͤts/ namens/ cron/

Vnd auch ends halb iſt nachgegangen

Dem von Valois/ der hat mit luſt

Vnd lieb von ewrer fauſt vnd bruſt

Manchen dienſt vnd nutzen empfangen.

So hat ſidher Ewer verſtand

Vil Chriſt-fuͤrſtlicher werck vollendet/

Jnſonderheit von dem Tentſchland

Manche gefahren abgewendet:

So wirdt billich Ewre Weißheit/

Wan ſpan/ zwitracht vnd vngleichheit

Vnder Fuͤrſten iſt/ hochgehalten:

So kan Ewer beredter mund

Mit zierlichkeit vnd ſattem grund/

Mehr dan Cincas kont/ verwalten.

Aber damit niemand vermein/

Jch woll Euch in einem Lied ſingen/

Vnd (frech) Ewer lob/ deſſen ſchein

Klar wie die ſonn/ hie gantz fuͤrbringen;

So brich ich jetz deemuͤtig ab/

Vnd bit Jhr wollet diſe gaab
Auf-
[35]Das ander Buch.

Aufnemen/ vnd zumahl erwegen/

Jch folg der beſten Mahler weiß/

Welche fuͤr die Sonn ſelbs mit fleiß

Allein ein aug zu mahlen pflegen.


Die ſechſte Ode.


Lobgeſang
Von ꝛc. Herren
Moritzen/ Fuͤrſten zu Vra-
nien/ Grafen von Naſſaw ꝛc.


JHr menſchen bawet einen tempel

Fuͤr den der aller Fuͤrſten ruhm/

Der aller Soldaten exempel

Vnd auch aller Tugenten blum/

Vnd ſinget ſtehts: Moritz durch deine thaten

Biſt du der ruhm der Fuͤrſten vnd Soldaten.

Aber welche witz darf ſich wagen/

Ja welche ſtim iſt wol hoch gnug/
C ijDer
[36]Das ander Buch.

Der welt mit worten fuͤr zutragen

Seine werck khuͤn/ maͤchtig vnd klug?

Jſt nicht der glantz ſeiner gleichloſen thaten

Ein ſpiegel fuͤr die Fuͤrſten vnd Soldaten?

Gleich in dem fruͤling ſeiner Jugent

Schlug Er alſo die ſtoltze feind/

Das die gedancken/ ſeine Tugenk

Zu beruͤhren/ zu nider ſeind:

Vnd iſt allein die geſchicht ſeiner thaten

Ein wahꝛer Text fuͤr Fuͤrſten vnd Soldaten.

Was hat Griechenland wol erdichtet

Von ſeinen Helden all zumahl?

Vnd was hat Hercules verꝛichtet

Mit euſſerſter muͤh vnd drangſahl?

Das gleichen moͤg vnſers Moritzen thaten/

Die ein lehrbuch fuͤr Fuͤrſten vnd Soldaten.

Sein nam macht das die ſchier verzagẽ

Deren hertz voll ehr geitz vnd pracht:

Er iſt der erſt den feind zuſchlagen/

Vnd der letzt auß der groͤſten ſchlacht;

Er iſt der ruh m der Fuͤrſten vnd Soldaten/

Vnd wunder ſeind ſeine gleichloſe thaten.

Ver-
[37]Das ander Buch.
Was Er mit reiffem raht thut gruͤndẽ

Verꝛichtet Er ſchnell vnd mit fleiß:

Gleichloß iſt Er zu uͤberwuͤnden/

Vnd zu ver zeihen gleicherweiß;

Alſo das Er billich durch ſeine thaten

Ein ſpiegel iſt fuͤr Fuͤrſten vnd Soldaten.

Praͤchtig iſt Er den ſtoltz zu daͤmpfen/

Guͤtig iſt Er gleich nach dem ſtreit;

Vnd wie groß-maͤchtiger zu kaͤmpfen/

So gerecht iſt er fridenszeit:

Er iſt gleichloß durch ſeine Helden-thaten/

Allein der ruhm der Fuͤrſten vnd Soldaten.

Sein aug kan das vngluͤck vertreiben/

Der hertzen troſt ſeind ſeine wort/

Sein vnruh macht vns ruͤhwig bleibẽ/

Seiner muͤh Moͤhr iſt vnſer port:

Vnd die anzahl ſeiner maͤchtigen thaten

Seind dz lehrbuch der Fuͤrſten vnd Soldatẽ.

Seinen ſanftmuht hat man erfahren

Jn ſeiner feinden wuht vnd flucht/

Sigen/ verzeihen vnd bewahren

Jſt ſeiner arbeit ſuͤße frucht:
C iijEin
[38]Das ander Buch.

Ein jedes ſtuͤck ſeiner loͤblichen thaten

Jſt ein beyſpihl fuͤr Fuͤrſten vnd Soldaten.

Er iſt der Welt zier hochgeehret/

Der boͤſen ſtraf/ der guten lohn/

Jn aller Welt hertzen vermehret/

Seiner feind forcht/ ſeiner freũd wohn/

Die ſagen all/ Er ſey durch ſeine thaten

Allein der ruhm der Fuͤrſten vnd Soldaten.

Wolan ſo bawet einen tempel

Fuͤr den/ der aller Fuͤrſten ruhm/

Der aller Soldaten exempel/

Vnd auch aller Tugenten blum/

Vnd ſinget ſtehts: Moritz/ durch deine that?

Biſt du der ruhm der Fuͤrſten vnd Soldaten.



[37[39]]Das ander Buch.

Die ſibende Ode.


Zu lob
ꝛc. Herrn Carln
Marggrafen zu
Baden ꝛc.


DJe aller nothwendigſte raiß/

Die ein Fuͤrſt billich ſoll verꝛichten/

Die raiß deren muͤhſamer ſchwaiß

Bringet vnfehlbarlich vil fruͤchten:

Die treflichſte raiß in der welt/

Da man einbuͤſſet weder gelt

Noch zeit/ ſondern alles gedeyhet/

Ein raiß deren ſich niemand rewet,

Jſt die raiß zu dem voͤſten ſchloß/

Darinen die Tugent ſelbs wohnet/

Die alle pilger klein vnd groß

Mit dem ſo ſie wuͤnſcheu belohnet.

Anfaͤnglich zwar dieweil der weg

Vneben/ eng/ gaͤh/ vngebahnet/
C iiijWirt
[40]Das ander Buch.

Wirt man bald vrdruͤſſig vnd traͤg/

Sonderlich ſo vns niemand mahnet:

So bethoͤret oft der wolluſt

Gleich eingangs eines Juͤnglings bruſt/

Das er ſeine raiß nicht vollendet/

Sondern (zwar mit ſchaden) vmbwendet.

Der aber ſo (ſtandhaft vnd klug)

Nur den erſten huͤgel erſteiget/

Der ſihet troſts/ luſts/ vnd guts gnug/

So jhm ſeine wolfahrt bezeuget.

Dan er kommet bald in das Reich/

Das eine Koͤnigin regieret/

Welche allmaͤchtig/ weiß vnd reich

Jhn gern mit jhrem Orden zieret:

Gotsforcht iſt ſie bey vns genant/

Alle Tugenten ſunſt bekant/

So die menſchen koͤnden erhoͤhen/

Die halten all von Jhr jhr lehen.

Wer nun folget jhres reichs lehr/

Der wirt ſeiner muͤh wol ergoͤtzet

Vnd mit vnvergaͤnglicher ehr

Vnder die Goͤtter ſelbs geſetzet.

Sie (als aller Goͤttinen zier)

Hat bey jhr vil Fuͤrſtinen wohnen;
Son-
[41]Das ander Buch.

Sonderlich tragen auch noch vier
(Als Koͤniginen) reiche Cronen:

Sie haiſſen Weißheit/ Dapferkeit/

Gerechtigkeit vnd Maͤßigkeit;

Jhrer jede kan dich erlaben/

Mit reichtumb/ ehr vnd lob begaben[:]

Vnd noch ein andrer großer hauf

Nymfen an geſtalt gantz volkommen/

Warten den Koͤniginen auf/

Vnd denen die zu jhnen kommen.

Wahrheit/ Glaub/ Trew/ Freygebigkeit/

Vnd die welche je nichts verdrieſſet:

Deemuth/ Lieb/ Gnad/ Beſtaͤndigkeit/

Vnd die ſo iederman begruͤſſet;

Vnd noch vil andre Fraͤwlein mehr/

Deren ſuͤße ſchoͤnheit vnd ehr

Kan nicht betruͤegen noch veralten/

Vnd darumb billich hochzuhalten,

Die empfangen alda die gaͤſt/

Vnderhalten/ tractieren/ lehren/

Vnd erquicken Sie auf das beſt/

Das Sie weiter nichts zu begehren.

Der Alcmenen maͤchtiger ſohn

Hat (khuͤn) erlanget diſen orden,
C vDa-
[42]Das ander Buch.

Darumb Er auch der Goͤtter thron

Zu beſitzen wehrt erkant worden.

O das in dem weiten Weltkraiß

Den jungen Herꝛen diſe raiß

Vor andern raiſen moͤcht gefallen/

Dan Sie auch nuͤtz vor andern allen!

Sie wuͤrden mehꝛ freund/ ruhm/ frewd/ lob/

Dan Wirth/ rew/ laid vnd ſpot erwerben/

Wuͤrden auch nicht betrogen grob

Wie ſunſt gemeine leut abſterben.

Diſe ſchoͤne raiß nu haſt Du/

O Printz Carl/ ſchon langſt angefangen/

Biſt auch der Eytelkeit vnd ruh

Numehr mit ehren weit entgangen:

Zwar hat der Natur milte hand

Dich ſelbs mit ſo gutem verſtand/

Kunſt vnd Fuͤrſichtigkeit gezieret/

Vnd zu diſer raiß angefuͤhret:

Vnd der himel gibt dir die gnad

Das du zu ſeiner freunden frommen/

Noch ſo jung/ auf der Tugent pfad

Weiter dan vil alte gekommen.

Alſo dein leben iſt dein preiß/

Vnd dein preiß iſt wahr vnd dein aigen:
Fahr
[43]Das ander Buch.

Fahr du nu fort muhtig vnd weiß

Andern Printzen den weg zuzaigen/

Wie man nicht ſoll auß einem ſahl

Eine lang-gemahlte anzahl

Seiner Voraͤltern frech entloͤhnen/

Sich damit gnugſam zubeſchoͤnen:

Sondern wie man durch aigne Kraft

Soll ſeinen Vorfahren gleich leben/

Vnd alſo der Nachkommenſchaft

Ein exempel zu leben geben.

Dan der jenig fehlet ſehr weit/

Vnd iſt auch nicht fuͤr klug zuachten/

Der großer Helden werck allzeit

Nach zufolgen nicht wolt betrachten.

Darumb fahr fort mit ſtarckem muth/

Folgend dem nach/ auß deſſen bluht

Du (Carl) gluͤckſeelig biſt entſproſſen;

Fahr du alſo fort vnverdroſſen/

Folg ſeinen fußſtapffen fuͤrhin

Zu erfrewen himel vnd erden/

Vnd glaub das dich gewiß wie Jhn

Goͤtter vnd menſchen lieben werden.



[44]Das ander Buch.

Die achte Ode.


Von ꝛc. beeden
Fraͤwlin ꝛc. Agnes vnd
Anna Hertzoginen zu Wir-
temberg ꝛc.


ZWoer Nymfen lobreicher mund

Hat in der ſuͤſſen morgenſtund

Zwoer Goͤttinen lob vermehret;

Vnd Filodor/ der ſie gehoͤret/

Hat alſobald jhres munds lehr

Mit ſtehts-friſch-wachſenden buchſtaben

Jn manchen gaͤrten hin vnd her

Auf der baͤumrinden eingegraben.

Laura.

SJh wie lieblich/ wie pur vnd klar

Machet ſich der tag offenbahr/

Wie Er den erdboden erfrewet/

Vnd ſchnell mit blumen uͤberſtroͤwet!

Aber nein. Des tags frewdigkeit

Waͤr
[45]Das ander Buch.
Waͤr wol ſo klar nicht aufgegangen/

Wan Er nicht mehr holdſeeligkeit

Vnd mehr glantz von Agnes empfangen.

Myrta.

SJh wie anmutig/ ſchoͤn vnd rein/

Mit wie vngewohnlichem ſchein

Jetzuud die Morgenroͤht aufgehet/

Vnd alles mit luſt uͤberſehet!

Aber nein. So huͤpſch waͤr ſie nicht/

Sie thet dan ſolche ſchoͤnheit borgen

Von Anna/ deren angeſicht

Jſt ſchoͤner dan der ſchoͤnſte morgen.

Laura.

EJn angeſicht voll lieb vnd ehr/

Eine ſtirn voll weißheit vnd lehr/

Ein haar das kan die ſchlen faͤllen/

Ein mund dem die Goͤtter nachſtoͤllen/

Ein leib an zier vnd wolſtand reich/

Vnd werth/ das Er werd wol betrachtet/

Machen/ Agnes/ das mein hertz Euch

Als eine Goͤttin ſtehts hochachtet.

Myrta.
[46]Das ander Buch.
Myrta.

VOn helfenbein ein glate ſtirn/

Ein hell-zwitzerendes geſtirn/

Ein mund/ haar/ kehl/ bruſt/ hand

vnd wangen/

Damit Venus ſelbs gern wolt prangen/

Ein ſchoͤner leib ohn allen fehl/

Der die Goͤtter durch lieb verſehret/

Machen/ das euch ſtehts meine ſehl/

Anna/ als eine Goͤttin ehret.

Laura.

EWer ſtatur gerad vnd lang/

Ewer zierlicher dantz vnd gang

Mit gantz hoͤflich-geſetzten ſchritten/

Mit gantz loͤblich-geuͤbten ſitten/

Die freundliche zucht Ewrer bruſt/

Vnd Ewrer Mayeſtet vermoͤgen

Koͤnden/ Agnes/ nach ewrem luſt

Der Goͤtter gemuͤhter bewoͤgen.

Myrta.

EWer Goͤttin-gleiche perſon/

Segnend die zuſeh er mit wohn/

Ewer
[47]Das ander Buch
Ewer gang/ ſtand/ dantz vnd geberden

Machend ein Paradiß auf erden/

Ewrer ſchoͤnheit hoͤflicher pracht/

Darab ſich die Goͤtter ergoͤtzen/

Machen/ Anna/ mit ſuͤſſer macht

Sich die himel ab Euch entſetzen.

Laura.

SOlt Phæbe ſelbs mit vollem glantz/

Wan Sie der ſternen klaren dantz

Den Goͤttern zu ehren auffuͤhret/

Vnd einig an ſchoͤnheit prachtieret/

Sich in Jhrem geborgten klaid

Vor Euch/ Agnes/ ruhmhaft erzaigen;

Wuͤrd ſie (zwar nicht ohn rew vnd laid)

Vor Euch bald jhren hochmuht naigen.

Myrta.

SOlt Venus ſelbs mit hoͤchſtem fleiß/

Der hoͤchſten ſchoͤnheit hoͤchſtẽ preiß

Zuerwerben/ ſich ſelbs beſchoͤnen/

Sich mit der Schoͤnheit cron ſelbs croͤnen/

Vnd alsdan den ſig alſo frey

Wollen/ Anna/ von Euch erlangen;

Wuͤrd
[48]Das ander Buch.
Wuͤrd Sie (zwar nicht ohnlaid vnd rew)

Fuͤr den ſig ſchimpf vnd ſcham empfangen.

Laura.

AGnes/ Ewer lob/ preiß vnd ehr

Wollen wir Nymfen mehr vnd mehr

Nach ewerm verdienſt ſtehts erklingẽ/

Vnd nach vnſr er ſchuldigkeit ſingen/

Dan Jhr ſo ſchoͤn vnd tugentreich/

Das Euch keine Nymf zuvergleichen/

Dan Ewreſchweſter die Euch gleich/

Deren all andre Nymfen weichen.

Myrta.

ANna/ der ſchoͤnheit zarte blum/

Wir Nymfen wollen Ewern ruhm/

Darab die himel ein gefallen/

Fuͤrhin ſtehts mehr vnd mehr erſchallen/

Dan Jhr ſo ſchoͤn vnd tugentreich/

Das keine Nymf wie Jhr zuehren/

Dan Ewre ſchweſter die Euch gleich/

Deren lob wir allzeit vermehren.



[49]Das ander Buch.

Die neunte Ode.


Vber den fruͤ-
hen tod ꝛc. Fraͤwleins Anna
Auguſta Marggraͤfin zu
Baden ꝛc.


DEin leben/ deſſen end vns plaget/

War wie ein tag ſchoͤn vñ nit lang/

Ein ſtern vor des morgẽs aufgang/

Die Roͤhtin wehrend weil es taget/

Ein ſeufz auß einer edlen bruſt/

Ein klag auß lieb nicht auß vnluſt/

Ein nebel den die ſonn verjaget.

Ein ſtaub der mit dem wind entſtehet/

Ein Daw in des Sommers anbruch/

Ein luft mit lieblichem geruch/

Ein ſchnee der fruͤlingszeit abgehet/

Ein blum die friſch vnd welck zugleich/

Ein regenbog von farben reich/

Ein zweig welchen der wind vmbwehet.

DEin
[50]Das ander Buch.
Ein ſchaur in Sommers-zeit vergoſſen/

Ein eiß an haiſſem Sonnenſchein/

Ein glaß alſo bruͤchig als rein/

Ein waſſer uͤber nacht verfloſſen/

Ein plitz zumahl geſchwind vnd hell/

Ein ſtrahl ſchieſſend herab gar ſchnell/

Ein gelaͤchter mit laid beſchloſſen.

Ein ſtim die lieblich dahin faͤhret/

Ein widerhall der ſtim in eyl/

Ein zeit vertriben mit kurtzweil/

Ein traum der mit dem ſchlaf aufhoͤret/

Ein flug des vogels mit begihr/

Ein ſchat wan die Sonn ſticht herfuͤr/

Ein rauch welchen der wind zuſtoͤret.

Alſo dein leben (ſchnell verflogen)

Hat ſich nicht anderſt dan ein Tag/

Stern/ moꝛgenroͤht/ ſeufz/ nebel/ klag/

Staub/ daw/ luft/ ſchnee/ blum/ regenbogen/

Zweig/ ſchaur/ eiß/ glaß/ plitz/ waſſerfall/

Strahl/ gelaͤchter/ ſtim/ widerhall/

Zeit/ traum/ flug/ ſchat vnd rauch verzogen.



[51]Das ander Buch.

Die zehende Ode.


An
ꝛc. Herꝛn Hein-
rich Wotton/ Engellaͤndi-
ſchen Rittern ꝛc.


DJe morgenroͤht kommet daher

Auß dem Aufgang froͤlich geflogẽ/

Sie hat jhrẽ ſchmuck/ pomp vñ ehr

Jetzund auf einmahl angezogen;

Sie macht mit roht lachendem mund

Durch lieb himel vnd erden wund/

Sie macht mit roht ſchmollenden wangen

Himel vnd erden mit jhr prangen;

Sie macht mit jhrer zarten hand

Einen regen von gilg vnd roſen/

Mit ſo ſuͤß koͤſtlichem gewand

Himel vnd erden lieb-zu-koſen.

Hoͤr wie mit doppeltem getoͤß

Das ſchnell-flieſſende ſilber rauſchet;
D ijWie
[52]Das ander Buch.

Wie (diſer ſchoͤnen zeit gemaͤß)

Der bauͤm laub ſeine kuͤß vertauſchet:

Hoͤr wie Philomela ſo frey

Jhres ſchwagers grim/ buͤberey/

Jhr laid/ lieb vnd truͤbſal erklinget/

Jhr laid wider vnd wider ſinget;

Wie ſie mit uͤberſuͤßer weiß

Jhr laid lindert/ laͤngert/ verzwicket/

Biß ſie ſich ſelbs mit ſuͤßem fleiß

Vnd die Goͤtter gleich wol erquicket.

Warumb dan ſchweig ich nu ſo lang/

Warumb ſoll ich meine ſtim ſpahren/

Vnd durch ein billiches geſang

Der Helden lob nicht offenbaren?

Sonderlich aber deren lob/

Deren leben die wahre prob/

Wie man den Tugenten ergeben

Mit jhnen ewiglich moͤg leben?

So gib mir nu mein Jnſtrument/

Vnd du Thalia hilf mir ſingen/

Auf das biß in das Firmament

Mein wuͤrdiges lied moͤg erklingen.

Heinrich auß der Wotton geſchlecht/

Sokeines Helden geſchlecht weichet/
Du
[53]Das ander Buch.

Du biſt ſelbs der Goͤtter gemaͤcht/

Die dich mit jhrem ſchatz bereichet:

Ja ſie haben mit aigner hand

Sich in deinem leib vnd verſtand

Gewolt ſowol abcontrofehen/

Das man Sie all in dir kan ſehen:

Jupiter hat mit dem gebluͤt/

Phæbus mit dem gaiſt dich gezieret;

Vnd wie Mars dein ſtarckes gemuͤht/

Alſo Lieb dein geſicht regieret.

Der himel hat kein ſchlechte gunſt

Vber Engelland außgegoſſen/

Jn dem er ſo vil lehr vnd kunſt

Jn dein haupt vnd bruſt eingeſchloſſen:

Vnd dein Koͤnig/ dem an weißheit/

Gotsforcht/ lehr vnd geſchicklichkeit

Kein Koͤnig noch menſch gleich zu nennen/

Derkan ſolches leichtlich erkennen:

Darumb Er dich oft hin vnd her

Zu großen Potentaten ſchicket/

Als der weißt/ wie dein tieffe lehr

Die ſchwerſte geſchaͤften begluͤcket.

Mehr dan der beredt Amfion/

Der Thebe mit mauren vmbrungen;
D iijMehr
[54]Das ander Buch.

Mehr dan der ſchoͤnen Mayen ſohn/

Von welchem Argus war bezwungen:

Mehr dan der Griech/ welcher gantz klug

Der Sirenen ſuͤßen betrug

Mit nicht geringerm lob betrogen/

Dan Er den vmbkraiß durchgezogen;

Deſſen mund einen honigfluß

Kont mit ſolchem gewalt außgieſſen/

Wie die ſchnee mit der wolckenguß

Fruͤlingszeit von dem gebuͤrg flieſſen:

Kan dein ſuͤße wolredenheit/

Wie ſie will/ die hertzen bewoͤgen;

Kan deiner red vollkommenheit

Die ſtoltze ſehlen niderloͤgen:

Deine zung kan in jeder bruſt

Lieb oder haß/ laid oder luſt/

Muͤh oder ruh zuwegen bringen/

Die vnwilligſte willen zwingen;

Sie kan/ wie ſie will/ das gemuͤht

Anraitzen/ treiben/ halten/ ſtehlen/

Erfuͤllen mit zorn oder guͤht/

Ja ſie kan ſtein vnd bloͤck beſehlen.

Dir ſeind alle ſprachen ſo kund/

Als ob Sie all zumahldein aigen;
Vnd
[55]Das ander Buch.

Vnd du kanſt mit lehr-reichem mund

Den gelehrteſten noch vil zaigen.

Darumb der ſchoͤnſte Crantz/ den man

Bey Eurota zurichten kan/

Jſt zu ſchlecht dein haupt zu beruͤhren/

Vnd nicht wehrt ſich damit zuzieren:

Sondern (Wotton der Muſen wohn)

Die Goͤtter die dich ſo lieb haben/

Die machen ſelbs ein reiche Cron/

Dich wuͤrdig damit zubegaben.


Die 11. Ode.


Von ꝛc. Bern-
hard Schafelitzki von Mu-
ckendell/ Rittern vnd
Coloneln ꝛc.


SJng fort mein mund/ vnd ſchweig
nicht ſtill/

Damit ich mein geluͤbd erfuͤll/

Vnd ſing des jungen Helden namen/
D iiijWel-
[56]Das ander Buch.

Welcher durch manche khuͤne that

Seiner fauſt gnug bezeuget hat/

Das Er von der Halb-goͤtter ſamen.

Sein lieb—zeugeudes angeſicht

Kan mit ſeinem ſuͤßen bericht

Aller menſchen geſicht vernuͤgen;

Vnd wer anſicht ſeine geſtalt/

Der ſpricht/ Er hab vil mehr gewalt

Wol zu lieben dan wol zu kriegen.

Aber Amor wohnet allein

Jn ſeiner augen klarem ſchein/

Vnd kan Jhm das hertz nicht betruͤeben;

Dan Mars ſelbs iſt in ſeiner bruſt/

Der macht das Er vil groͤßern luſt

Zu kriegen/ dan ſich zu verlieben.

Eh von dem erſten zarten haar

Sein junges kihn bedoͤcket war/

War ſein leib mit eyſen bedoͤcket;

Vnd ſeiner fauſt erſte prob-ſtraich

Haben vil coͤrper wund vnd blaich

Vor ſeinen fuͤßen außgeſtroͤcket.

Alsbald es frid in Niderland/

Jſt Er zu uͤben ſeine hand
Gleich
[57]Das ander Buch.

Gleich Ligurien zu geloffen/

Da auf dem mit-kriegenden Moͤhr

Vil auß dem Mohn-ehrenden Hoͤhr

Durch Jhn erſchlagen vnd erſoffen.

Hernach hat Er auch ſeine macht

Jn Jſtria in mancher ſchlacht

Mit ſolcher Dapferkeit erwiſen/

Das ab jhm die geſchlagne feind

Wie ſeine wolbeſchuͤtzte freund

Sich verwundert vnd jhn gepriſen.

Vnd wan jhn ſchon das ſuͤnwel Gluͤck

Mit einem freundlichen anblick

Nicht allzeit pfleget zu begruͤßen;

Hat Er doch einen ſolchen muht/

Das Er auch wol ſein Helden-bluht/

Den ſig zu kauffen/ ein-darf—buͤſſen.

Wie Hannibal hat Er die raiß

Fuͤr ſein volck mit vil liſt vnd ſchwaiß

Vber die Alpen khuͤn erfunden:

Er fuͤrchtet ſich vor keinem tod/

Er waißt fuͤr ſich von keiner noht/

Sigreich iſt Er auch uͤberwunden.

D vDa-
[58]Das ander Buch.
Darumb mag wol der weiſe Raht

Der Einig-doppelt-ſchoͤnen Stat

Jhn (wie Er thut) lieben vnd ehren:

Dan warlich ſein verſtand vnd ſchwert

Seind alles ruhms vnd gluͤcks ſo wehrt/

Das ſie niemand gnug kan vermehren.


Die 12. Ode.


Brautlied
Zu Ehren der Hochzeit
Filanders
vnd ſeiner
Cloris.


ALs Filander mit groſſem luſt

Dielang-begehrte edle bluſt

Seiner ſtandhaften lieb erꝛungen:

Hat ein hauf Liebelein gar laut/
Dem
[59]Das ander Buch.

Dem Braͤutigam vnd ſeiner Braut

Zu ehren/ diſes lied geſungen.

O Das Jhr moͤget allezeit

Einig/ in keinem andern ſtreit/

Dan nur in dem liebes ſtreit leben!

Darinnen eines jeden hertz

Moͤg dem andern wolluſt vnd ſchertz

Fuͤr ſchertz vnd wolluſt widergeben!

Durch kuͤß von ſuͤſſem nectar feucht

Das hertz vnd ſehl von frewden leicht

Solt Jhr Euch nemen vnd mitthailen:

Jhr ſolt durch tief-wundende kuͤß/

Jhr ſolt durch ſuͤß-hailende buͤß

Euch verwunden vnd wider hailen.

Des einen mund ſoll mit wolluſt

Des andern hertz auß ſeiner bruſt

Zunemen/ jhm die bruſt aufſpalten:

Des andern hertz ſoll mit dem mund

Durch ſuͤße kuͤß verwundend wund

Sich der andern bruſt nicht enthalten.

Mit Ewern armen ſtarck vnd zart/

Mit Ewern glidern ſanft vnd hart
Solt
[60]Das ander Buch.

Solt Jhr einander fro vmbfaſſen:

Vnd Jhr ſolt einander fuͤrhin

Nicht mehr/ dan mit ſuͤßerm gewin

Wider vmb zufaſſen/ verlaſſen.

Deinen ererbten Helden-muht/

Nicht dein ererbtes Helden-blut

Solt du junger held ietzund ſpahren:

Lieb/ lieber ſchertz/ lieblicher glimpf/

Liebkoſen/ kuͤß/ kuͤtzlender ſchimpf

Werden Sie dir machen willfahren.

Wan aber ein ſolches nicht gnug/

Solt du khuͤner mit gutem fug

Dein freundliche feindin anfallen:

Vnd laß dir Jhreſcham vnd zucht/

Jhr klagen/ flehen vnd außflucht

Wolgefallen vnd doch mißfallen.

Durch den ſchwaiß nimmet die muͤh zu/

Die ruh iſt ſuͤßer nach vnruh/

Vnd ſuͤßer die kuͤß ſo genetzet:

Alſo wirt dein laidige fraid/

Alſo wirt Jhr frewdiges laid

Durch beeder laid vnd fraid ergoͤtzet.

Ach
[61]Das ander Buch.
Ach wie forchtſam ſcheinet Sie doch?

Ach wie zittert Sie ab dem Joch/

Darunder Sie deine arm binden?

Nu kan dein mund (duͤrſtig) zumahl

Von ſeufzen vnd zehren ein mahl

Auf Jhrem mund vnd augen finden.

Koͤſtliches mahl! goͤtliche ſpeiß!

Himeliſches getranck! mit fleiß

Jn ſo reiche gefaͤß gegoſſen!

Gefaͤß ſo ſchoͤn/ das auch kein Got

Auß ſchoͤnern in der hoͤchſten noht

Der nahrung noch artzney genoſſen!

Damit nu Jhrer ſuͤßigkeit/

Vnd anraitzenden lieblichkeit

Du vnd Sie moͤgeſt genieſſen/

So laß dich kein bit vmb anſtand/

Kein widerſtehen Jhrer hand

Fangen/ verhindern noch verdrieſſen.

Geh fang nu muhtig an die ſchlacht/

Doch gebrauch nicht zu große macht

Sie nicht gleich zuſchr zu erſchroͤcken:

Sondern gebrauch weil/ liſt/ betrug/

Falſche flucht/ angrif/ vnd aufzug/

Damit die voͤſtung zu entdoͤcken.

Wan
[62]Das ander Buch.
Wan dan mit zitterender ſtim/

Wan dan mit gleißneriſchem grim

Sie dich wirt arg/ frech vnd boͤß nennen;

Hoͤr doch nicht auf mit vollem luſt

Jhre ſtirn/ mund/ hals/ wangen/ bruſt

Mit tauſſent kuͤſſen anzurennen.

Sie mag lang ſagen/ es iſt gnug/

Es iſt gnug/ ſeit ein wenig klug/

Vnd dir mit beeden haͤnden woͤhren/

Damit Sie doch nicht vnden lig/

Heng du gleich wol ſtehts nach dem ſig/

Durch welchen ſich die Lieb muß noͤhren.

Alſo in diſem haiſſen ſtreit

Begihrig nach der ſuͤſſen beut/

Kanſt du den ſturm wider ernewen:

Vnd laß von Jhrer bruſt vnd ſchoß

Weiß/ rund/ ſteif/ glat vnd mangel loß/

Deine gaile hand nichts abſchewen.

Wan du nu ſo nah bey dem platz/

Solt du kuͤß auf kuͤß/ ſchmatz auf ſchmaß/

Schmuck auf ſchmuck/ lieb auf lieb loß-
ſchieſſen/

Alß dan ſolt du dein blut/ den lohn
Der
[63]Das ander Buch.

Der lieb/ namlich die Myrten—cron

Zuerlangen/ hertzhaft vergieſſen.

Mehr dan ſternin der klaren nacht

Mehr dan blumen des Fruͤlings pracht/

Mehr dan bihnen auf Hybla fliegen/

Sollen gantz tief-gruͤndende kuͤß/

Sollen ſuͤß—empfindende buͤß

Jhr vergebliche forcht betriegen.

Achzen mit gailſchimpfender ſchmach/

Vnd laͤchlen mit ſchertzender ſprach/

Vnd boſſen ſollen da nicht faͤhlen:

Seuͤfzen/ ſchmaͤtz/ bitten/ klag vnd lob/

Schimpf/ ernſt vnd ſchertz/ zuͤchtig vnd grob

Solt du mit einander vermaͤhlen.

Alſo durch der lieb rechtekunſt

Wirt Sie Jhr artliche vngunſt

Artlicher nach vnd nach verkchren;

Vnd endlich frey von forcht vnd zorn

Mit gilgen vnd roſen ohn dorn

Deinen leib durch jhren leib ehren.

Dazumahl auf ein newe art

Muſt du mit kuͤſſen lang vnd hart
Jhre
[64]Das ander Buch.

Jhre ſehl auß Jhr in dich ziehen:

Vnd Sie wirt auch auf gleiche weiß/

Sich vnd dich mit lieblichem fleiß

Zu ſaͤttigen/ ſich ſehr bemuͤhen.

Dazumahl frecher dan zuvor

Erheb du das banier entbohr/

Vnd fang von newem an zuſtreitten;

Vb aller ſuͤßen ſchalkeit ſtuͤck/

Vb aller ſuͤßen boßh [...]t duͤck/

Vnd greif Sie an auf allen ſeitten.

Gebrauch liſt auf liſt/ ſchmach auf ſchmach/

Biß Sie fro iſt/ das Sie zu ſchwach/

Vnd zu verlieren ſcharmuͤtzieret:

Gebrauch kunſt/ ſtaͤrck/ betrug vnd macht/

Zwing Sie zu einer freyhen ſchlacht/

Da Jhr beed ſiget vnd verlieret.

Alſo Ewer ſtehts friſcher muht

Soll diſes ſuͤßen kampfs ohn blut

Euch wider vnd wider gewehren:

Vnd ſo oft Phæbe jhren glantz

Macht neunmahl halb vnd neunmahl gantz

Ewer geſchlecht durch Euch vermehren.


[65]Das ander Buch.

Die 13. Ode.


An ꝛc. HErꝛen
Veyras/ Churf. Pfaltzgr.
Secretarj ꝛc.


DEin lob ſo ich zu aller ſtund

Von aller lobwuͤrdigen mund/

Veyras/ begihriglich vernommen/

Vermehrte die begird in mir/

Die ich lang zuvor hat/ mit dir

Jn beſſere kundſchaft zukommen;

Hab demnach kaum erſuchet dich/

Da du alßbald gantz freundlich mich

Vnder deine freund aufgenommen.

Kont alſo weder geitz noch luſt
(Wie ſunſt der brauch) in vnſrer bruſt

Ein ſolches fewr der lieb anzinden:

Sondern der Tugent aigne hand

Muſt mit jhrem tuͤchtigſten band

Vnſre hertzen zuſamen binden:
EWel-
[66]Das ander Buch.

Welches band allein ſo wehrhaft/

Das mit ſolchem eine freundſchaft

Kan Gluͤck/ Zeit/ vnd Tod uͤberwuͤnden.

Darumb ich nu khuͤn von dir ſchreib/

Vnd in guter zuverſicht bleib/

Du werdeſt dich gar nicht beſchwehren/

Wan ich durch diſeſchrift begehr

Meinen namen mit deiner ehr

Vnd deinem namen zu vermehren;

Jn dem ich anderſt nicht thun kan/

Weil ehren einen wehrten man

Jſt gleich ſovil als ſich ſelbs ehren.

Jch waiß wol/ wie der Goͤtter gunſt

Dein haupt mit weißheit/ tugent/ kunſt/

Lehr vnd erfahrenheit gezieret:

Wie deine red lieblich vnd weiß
(Als der ſehlen kraͤftige ſpeiß)

Vber die hertzen trium fieret:

Vnd wie des beſten Nectars kraft/

Vnd der beſt Caſtaliſche ſaft

Von deiner federn diſtillieret.

Wan man/ wie Pythagoras wolt/

Die meinung fuͤr wahr halten ſolt/
Das
[67]Das ander Buch

Das frembde ſehlen vns beleben:

So hielt die welt leichtlich darfuͤr/
(Vnd waͤr glaͤublich) das man in dir

Seh den jenigen widerleben/

Dem/ als er jung ſeine ruh nam/

Die bihnen jhren honigſam

Fuͤr ſein erſte ſpeiß eingegeben.

Darumb dir/ ſolchem verdienſt nach/

Auch wegen ein vnd andrer ſprach

Billich vil Fuͤrſten guͤnſtig bleiben:

Vnd du (dieweil ja Jhr anblick

Vnd gnad kan als das beſte Gluͤck

All ſorg vnd forcht von vns vertreiben)

Thuſt recht jhnen vnd dir zu preiß

Gedenck wuͤrdige werck mit fleiß

Jn ein vnd andrer ſprach zuſchreiben.

Jch meines thails/ in deſſen hertz

Der ehrgeitz weder ſorg noch ſchmertz/

Weder hofnung noch forcht eroͤwcket/

Beſuch lieber das gruͤne feld/

Rauſchende bruͤnlein/ ſtille waͤld/

Vnd baͤch die noch kein thier befloͤcket/

Dan die pallaͤſt von marberſtein/

Mit gold vnd andrer reichtumb ſchein

Gefuͤtert/ vnd mit bley bedoͤcket.
E ijJa
[68]Das ander Buch.

Ja/ ſovil ich immer vermag/

Fleuh ich den poͤfel/ meine tag

Mit den Muſen wol zu volbringen;

Die lehren mich/ vnd ich lehr Sie

Auf newe weiß mit ſuͤßer muͤh

Ein gut Teutſches geſang zuſingen;

Vnd mit vor-vnerhoͤrter prob

Großer Helden vnd Nymfen lob/

Ja auch Amors ehr zu erklingen.

Wan Homerus/ der den wein ſehr

Gelobt/ wein-ſuͤchtig geweſt wer/
(Welches ich zwar nicht kan gedencken)

So gedenck doch du (Veyras) nicht/

Das/ wan ich auch von dem wein dicht/

Jch ſo gern ſey bey dem Weinſchencken:

Dan wider meiner Lands-leut wohn

Glaub ich/ das der Semelen ſohn

Ohn maß thu leib vnd gaiſt bekraͤncken.

So glaub ich auch/ das es gnug ſey/

Wan der Poet ohn heucheley

Ein fromb vnd keuſches leben fuͤhret;

Ob ſchon bißweilen ſein geſang

Gail vnd frech mit froͤlichem klang

Das gehoͤr uͤppiglich beruͤhret;
O[b]
[69]Das ander Buch.

Ob es auch wol die loben nicht/

Denen Timon das angeſicht/

Epicurus das hertz regieret.

Aber es iſt numehr gar gnug/

Dan ich hoͤr vnd ſih ſchon den flug

Viler rappen/ hetzen vnd krehen:

Darumb jhr Muſen eytel fort/

Laſſet vns in ein ſtilles ort

Jhrem wilden geſchray entgehen.

Vnd du/ Veyras der Muſen ruhm/

Wirſt fuͤr einen krantz diſe blum
(Hof ich) zunemen nicht verſchmaͤhen,


Die 14. Ode.


Charitea bekla-
get ſich uͤber den tod jhres
Anaxanders.


DEin glantz/ O Sonn/ iſt laider! fuͤr

mich nicht/

Die ich nicht mehr bey leben/
E iijDan
[70]Das ander Buch.

Dan Er kan ja der verſtorbnen geſicht

Weder liecht noch troſt geben:

Jch nu bin tod zu aller fraid/

Allein lebendig zu dem laid.

Auch vermeid ich williglich deinen ſchein/

Als ab dem liecht verdroſſen;

Vnd lig alhie in der einoͤd allein/

Als in ein grab beſchloſſen;

Alda mich angſt/ ſorg/ pein vnd plag/

Wie wuͤrm verzoͤhren nacht vnd tag.

Nu weiß ich recht/ wie ſchmertzlich der wolluſt

Die gedechtnus beruͤhret/

Wan man allein ohn der begird verluſt

Die genuͤeſſung verlieret:

Vnd wie beſſer zu jeder friſt

Nichts haben dan verlieren iſt.

Alle die frewd/ deren in gutem gluͤck

Jch ſo lieblich genoſſen/

Jſt wie die flut in einem augenblick

Mit vngeſtuͤm verfloſſen;

Vnd ließ mir nichts dan finſternuß

Vnd des verlohrnen guts verdruß.

Ach
[71]Das ander Buch.
Ach weh verdruß! wilt du auch in dem grab

Mein leben noch beſchwehren?

Soll dan/ wan ich kein leben in mir hab/

Gleich wol mein uͤbel wehren?

Ach! laß den armen todten zu/

Zuligen in trawriger ruh!

Wan ich ſo oft deine toͤdliche ſtraich

Vor meinem tod empfunden/

Wan ich ſovil ſchreyhend/ kraftloß vñ blaich

Die himel taub erfunden;

Soll dan auch truͤbſal vnd gefahr

Mir noch beywohnen in der bahr?

Warumb ach weh! wilt du mich nim̃ermehr

Der zeit laſſen vergeſſen/

Darin mein hertz mit ruhm/ frewd/ luſt vñ ehr
(Gluͤckſeelig) war beſeſſen/

Nu da mein hertz vnd ſehl zumahl

Voll jamer/ grewel/ angſt vnd guahl!

Siheſt du nicht je mehr mein armes hertz

Was es gehabt bedencket/

Das deſtomehr der ſehl-moͤrdende ſchmertz

Es racket vnd bekraͤncket;

Vnd das/ indem ich bin nichts mehr/

Geweſt zuſein mir allein ſchwer!

E iiijDan
[72]Das ander Buch.
Dan weil alſo der vntraͤgliche zorn

Des himels mich zuſchlagen/

Verkchren ſich meine roſen in dorn

Vnd mein ſingen in klagen:

Vnd gluͤckſeelig geweſt zuſein

Jſt jetzund meine groͤſte pein.

O Mein beyſtand/ meine hilf/ pracht vñ kraft

Numehr in ſtaub verkehret/

Ohn welchen ich gleich wie ein baum ohn ſaft/

Welchen der ſtrahl entehret;

Von wie hoher gluͤck ſeeligkeit

Stuͤrtzet mich deine ſterblichkeit!

Ach weh! gleich wie von aller trawrigkeit

Mich dein leben gefreyhet/

Das mir niemahls ab des Gluͤcks liſtigkeit
(Stehts hofnung-voll) geſcheyhet;

Alſo troſtloß in diſer noht

Foͤrcht ich alle ding ohn den tod.

Aber was kan in diſem Jamerthal

Mein gemuͤht noch verloͤtzen?

Kan wol mein gaiſt ab einigem truͤbſahl
(So arm) ſich noch entſoͤtzen?
Mein
[73]Das ander Buch.

Mein gaiſt/ dem der tag wie die nacht/

Den die verzweiflung forcht-frey macht?

Nein. Dein abſchid hat gar von mir mit ſich

Hofnung vnd forcht genommen;

Jch bin zumahl durch deinen tod vmb dich

Vnd all mein gut gekommen:

Mein leben allein iſt zu lang/

Vnd dafuͤr allein iſt mir bang.

Dan indem mir kaum vnder diſem laſt

Zu ahtemen gegeben/

Jch doch mein hail/ ja mich ſelbſten ohn raſt

Vnd troſt muß uͤberleben:

Jſt das leben die ſtraf vnd plag/

Die ich zu lang zu leben trag.


Die
[74]Das ander Buch.

Die 15. Ode.


Klag.
Fuͤr einen jungen Helden.


ADe gluͤck/ hofnung/ frewd vnd muht/

Ade alles was kan erlaben:

Nichts dan vngluͤck/ verzweiflung/

wuht/

Nichts danklag vnd laid will ich haben.

Einmahl mein hertz allein auf lieb/

Einmahl mein hertz auf krieg beſtehet:

Lieb aber iſt fuͤr mich ſtehts truͤeb/

Laider der krieg auch nicht fortgehet.

Ach! Amor vnd Mars was hab ich

Allein Euch vor andern geehret?

Da doch noch Ewer keiner mich

Danckbar des ſigs noch ſolds gewehret!

Gluͤck
[75]Das ander Buch.
Gluͤck ohn Vngluͤck hat keine ehr/

Gefahr vnd muͤh zieren die Tugent:

Alſo begehrt ich auch nicht mehr/

Als ſorg vnd dienſt in meiner Jugent.

Mit der Lieb nufuͤhr ich den ſtreit/

Meine Trew ſolt des ſigs genieſſen:

Aber fuͤr ein ſo ſchoͤne beut/

Ach! muß ich mein leben einbuͤſſen!

Jſt es dan aller Goͤtter will/

Jn allem mir zu widerſtreben:

Reiß auß/ meine ſehl/ ich halt ſtill/

Reiß auß/ laß leib vnd lieb ohn leben.

Aber/ was thut in mir der ſchmertz/

Ach ſchatz! wolt jhr mich nicht entlaiden?

Mein gaiſt vnd leib/ mein ſehl vnd hertz

Moͤgen Auß Gunß Noch Vngern Schai-

den.


16. Von
[76]Das ander Buch.

16.


Von vorgehen-
der matery.


AMor vnd Mars je mehr vnd mehr

Mir allzeit widerſtehen;

Nichts/ was ich auf der welt begehr/

Laſſen Sie mir fort gehen;

Darumb mein luſt ſoll ſein

Schmertz vnd pein.

Ein Got allein iſt ſunſt ſtarck gnug

Einen man vmb zubringen?

Lieſſen Sie doch nur den betrug/

Mich ſolten Sie nicht zwingen:

Aber jhr liſt allein

Jſt mein pein.

Amor bracht mir eine Nymf fuͤr

Die mir mein hertz entwendet:

Der Mars foͤrchtet ſich ſelbs vor mir
Da-
[77]Das ander Buch.

Darumb Er den Krieg endet.

Jſt nicht jhr liſt allein

Meine pein?

Gedult/ begird/ hofnung vnd luſt/

Fort ich muß Euch aufgeben:

Angſt vnd ſchmertz fuͤllet meine bruſt/

Vnd vollendet mein leben.

Mein troſt vnd heil muß ſein

Quahl vnd pein.

Mein hertz muß nu auß Amors rach

Meiner liebſten verbrennen:

Aber Sie fraget nichts darnach/

Vnd will es nicht erkennen:

Jhr hertz haͤrter dan ſtein

Jſt mein pein.

Jhr/ Jhr (O doͤrft ich ſagen mein/)

Ach thut die ſach ergruͤnden:

Richtet vnd ſagt ſelbs iſt es fein/

Das ich bey Euch ſoll finden

Fuͤr meine Trew ſo rein

Nichts dan pein.

Ach! Jhr ſolt vilmehr/ Edles hertz/

Mich guͤnſtig zu gewehren/
Mit
[78]Das ander Buch.

Mit freundlich keit/ mit ſchimpf vnd ſchertz

Verzuckern vnd verkheren

Durch ſuͤße ſchmaͤtzelein

All mein pein.


17.


Klag
Etlicher ſo von Hof abſchie-
den.


DEmnach des Gluͤcks zorn gar
ſchwer
(Welchem niemand kan entfliehen)

Vns ernſtlich gebeut numehr

Von diſem hof abzuziehen;

Von diſem hof/ da allein

Lieb/ gunſt vnd wohn vnſre hertzen beſeſſen:

So muß es wol laider! ſein/

Wir muͤſſen Sie laſſen/ doch nicht vergeſſen.

Ja/ laſſen muͤſſen Wir ſie/

Aber an ſtat aller fraiden
Muß
[79]Das ander Buch.

Muß auch pein/ angſt/ ſchmertz vnd muͤh

Fuͤrhin nicht mehr von vns ſchaiden.

Vnſre hertzen gantz getrew

Verlaſſen Wir Jhnen gaͤntzlich ergeben[;]

Vns ſoll Amors tiranney

Hingegen mit verdruß vnd angſt beleben.

Ade vnſrer ſehlen hort/

Jhr ſtehts-friſch-bluͤhende roſen!

Ade erquickende wort/

Die den Goͤttern ſelbs liebkoſen!

Ade keuſche liebes blick/

Ohn ewern ſchein werden wir wol verblindẽ!

Ade krauſe liebes ſtrick

Von welchẽ kaum der Tod vns ſoll entbindẽ!

Ade der Welt wahre Zier/

O ſchoͤnſte Nymfen auf er den!

O Goͤttin die nach gebuͤhr

Von Vns hochgeehret werden!

Ellend ſeind wir/ weil wir Euch

Verlieren von geſicht mit ſolchen ſchmertzen:

Seelig ſeind wir/ wan zugleich

Jhr auch nicht vns verlieret auß dem hertzen.

18. Amors
[80]Das ander Buch.

18.


Amors Woh-
nung.


AMor/ der allſigende Got/

Von hochmuht einmahl uͤberwun-

den/

Rhuͤmet ſich den Goͤttern zu ſpot/

Das Sie all Jhm allein verbunden.

Sie endlich (vnd billich) zumahl

Ab diſes kinds frech heit verdroſſen/

Haben jhn auß des himels ſahl

Verjaget vnd gantz auß geſchloſſen.

Alſo iſt Er/ folgend dem glantz/

Jn meiner Myrten augen kommen/

Da Er auß ſo bequemer ſchantz

Sich zu rechen jhm fuͤrgenommen.

Aber diſes orts lieblichkeit

Hat Jhn alsbald ſo ſehr beſeſſen/

Das Er alle rach gihrigkeit/

Goͤtter vnd himel gar vergeſſen.

19. Ab-
[81]Das ander Buch.

19.


Abweſenheit.


AVf/ auf/ fleug bald mein junges hertz

Zu deren die dich allein noͤhret/

Sag Jhr/ wie uͤber großer ſchmertz

Jhrethalb meine ſehl bethoͤret.

Sag Jhr/ wie mein gaiſt tag vnd nacht

Von jhr nichts dan klagwort erdichtet/

Vnd wie Amoꝛs zu große macht

Alle meine vernunft vernichtet.

Sag jhr wie die abweſenheit

Mein geſicht vnablaͤßlich noͤtzet

Vnd wie jhr ſuͤße freundlichkeit

Mich laider/ jetz toͤdlich verloͤtzet.

Doch ſag auch/ das wa in der pein/

Noht/ angſt/ truͤbſal/ ellend vnd klagen/

Sie meiner ingedenck wirt ſein/

Jch ſeelig ſolches zu ertragen.

20. Newe
[82]Das ander Buch.

Newe-Jahrs-
gaab.
An ſeine Liebſte.


JCh wolt Euch gern zu diſem jahr/

O einige ſchoͤnheit/ was ſchencken/

Dabey Jhr meiner alſo bahr/

Vnd ewiglich moͤchtet gedencken:

Aber weil ich mich Euch ergab

Mit allem ſo mir zugehoͤret;

So folget das ich mehr nichts hab/

Das ich Euch nicht ſchon vor-verehret.

Wan dan mein hertz/ will vnd begihr/

Vnd was ich bin gantz Ewer aigen;

Lieber ſo erlaubet doch mir

Mich durch wuͤnſchen milter zuzaigen.

Nu wuͤnſch ich/ das Jhr an ſchoͤnheit

Die erſt in der welt moͤget bleiben;

Das man Ewre volkommenheit

Jn allen ſprachen moͤg beſchreiben!

Das
[83]Das ander Buch.
Das Ewer liebliche perſon

Als der Tugent perſon auf erden;

Vnd Ewer ſehl (der Engeln wohn)

Fuͤr der Tugent ſehl erkant werden!

Das Ewer ſchoͤnheit ſo lieb reich

Mag bluͤhen nach vil hundert Jahren;

Das die himel allein durch Euch

Vns jhren ſeegen offenbahren!

Kurtzlich/ dieweil ewer verſtand

Selbs beſſer weiſt was zu begehren/

So wuͤnſch ich das Euch Gotes hand

Woͤll all Ewrer wuͤnſchen gewehren!


21.


Beſtaͤhtigung
ſeiner Trew.


ACh was betruͤbt jhr mich ſo ſehr/

Das Jhr mich wanckelmuͤhtig neñet/
F ijJch
[84]Das ander Buch.

Jch weiß/ das mich Amor vil mehr

Dan Euch (ſo ſchoͤn) ſtandhaft bekennet.

Man kan Ewre vollkommenheit

Mit keiner andern bald vergleichen;

Vnd meiner lieb beſtaͤndigkeit

Waiſt keiner lieb vnd trew zuweichen.

Da ich Euch meine trew verſprach/

Hab ich mir ſelbs nichts vorbehalten;

Darumb wer es ein große ſchmach/

Wan Ewer glaub nu ſolt verkalten.

Jn Euch iſt mein hertz/ gaiſt vnd ſinn/

Euch zu lieben bin ich bey leben:

Ach! wan ich nicht mehr Ewer bin/

So ſagt mir/ wem Jhr mich gegeben.


22. Luſt
[85]Das ander Buch.

22.


Luſt vnd ver-
nuͤgen in der pein.


OWie ſuͤß ſeind meine ſchmertzen/

Die ich ihrethalb ertrag/

Weil freundlich in jhrem hertzen

Sie empfindet gleiche plag;

Vnd dieweil Sie mit freundlichen anblicken

Verſehren will vil vnd nur mich erquicken.

Meiner augen klag vermehret

Meines hertzens große brunſt:

Jch ſih/ das Jhr hertz verſehret

Bey Jhres augs ſuͤſſen gunſt/

Deſſen klarheit mit lieblichen anblicken

Will ſtrafen vil vnd nur mein hertz erquicken.

Diſe ſtern zu allen ſtunden

Erzaigen ſich ſo ſigreich/

Das Sie nah vnd ferꝛn verwunden
F iijDem
[86]Das ander Buch.

Dem Cephaliſchen pfeil gleich/

Sie koͤnden auch mit kraͤftigen anblicken

Beedes zugleich verſehren vnd erquicken.

Darumb muß die welt bekennen/

O augen der Natur pracht/

Das wa Ewre facklen brennen

Daſelbſten es niemahls nacht;

Vnd das Jhr koͤnt mit ſeltzamen anblicken

Alle geſchoͤpf betroͤwen vnd erquicken.

Mein hertz mag ſich wol ergoͤtzen

Wan es Euch findet ſo klar/

Ehrend Euch als ſeine goͤtzen

Auf dem ſchoͤneſten altar;

Vor dem ich bit/ das mit ſuͤſſen anblicken

Jhꝛ niemand ſunſt dan mich wollet erquicken.

Jch bit Euch nicht zu verſchmaͤhen/

Mein hertz vor ein Opfer ſchlecht/

Euch verbrennend anzuſehen/

Ein Phænix in lieb gerecht/

Welchen der ſchein Ewrer ſtarcken anblicken

Kantoͤdten vnd mit frewd wider erquicken.


33. Laids
[87]Das ander Buch.

23.


Laids veraͤnde-
rung in Fraid.


FOrt mit euch ſorg vnd laid/

Vnſerer hertzen ſchlang/

Vnd ſehlen plag:

Fort mit euch flehen/ ayd/

Angſt/ trawriges geſang/

Vnd lange klag:

Fort ſchwermuht vnd ſorgfaͤltigkeit

Jhr feind aller leichtmuͤhtigkeit.

Jhr zehren druͤcknet euch/

Weil ich nu ewren grund

Gedruͤcknet find:

Vnd jhr ſeufzen zugleich/

Dieweil ich nu geſund

Legt ewren wind:

Vnd jhr gedancken endet euch/

Durch euch ſah ich noch niemand reich.

F iiijHin-
[88]Das ander Buch.
Hingegen kommet her

Jhr hofnung/ troſt vnd gunſt/

Der liebe luſt/

Erquicket mehr vnd mehr

Durch ein new-ſuͤße brunſt

Mein ſchwache bruſt:

Vnd du begird geneuͤß der waid

Der ſo oft vor gewuͤnſchten fraid.

Der zehern tropfen fall

Werd ein lieblicher flug

Der lieb anblick:

Ein klarer Muſic-ſchall

Werd meiner ſeufzen zug/

Vnd ſing mein glick:

Vnd der gedancken großer hauf

Werd wahrer luſt vnd hoͤr nicht auf.


24.


Kuß.


EJnig ſuͤßes muͤndelein

Roͤhter dan ein roͤſelein
So
[89]Das ander Buch.

So Phæbus durch ſein anſehen

Macht aufgehen:

Lefzen uͤbertreffend weit

Den taw ſo die erden noͤtzet/

Vnd mit fruchtbarkeit ergoͤtzet

Jn der ſuͤßen Fruͤlings zeit.

Holdſeeliges ſchaͤtzelein/

Gib mir ſo vil ſchmaͤtzelein/

Sovil du gibſt meinem hertzen

Pein vnd ſchmertzen;

Sovil pfeil der fliegend Got

Wider mein hertz abgeſchoſſen;

Sovil ich leid vnverdroſſen

Jamer/ truͤbſal/ angſt vnd noht.

Sovil man wol koͤrnlein ſands

Am vfer des Mohren-lands/

Sovil graß in dem feld ſiehen

Man kan ſehen;

Sovil tropfen in dem Moͤhr/

Sovil fiſch alle fluͤß bringen/

Voͤgel durch den luft ſich ſchwingen/

Vnd ſovil der hoͤrbſt weinboͤhr.

Sovil ſchoͤne lieblichkeit/

Schmollende holdſeeligkeit/
F vSo-
[90]Das ander Buch.

Sovil hoͤflichkeit vnd lachen

Lieblich machen

Deinen thewren purpur-mund;

Wievil roſen deine wangen/

Wievil lilgen machen prangen

Deinen buſen ſteif vnd rund.

So oft kuͤß mich Nymfelein/

So oft ſchmaͤtz mich Schimpfelein;

Laß vns mit einander ſchertzen/

Vnd vns hertzen/

Biß ich ſag/ mein frid/ mein fraid/

Jch kan nicht mehr/ laß mich gehen/

So ſolt du ein weil abſtehen/

Das ich ſeufzend halb verſchaid.

Darnach kuͤß mich widerumb/

Das noch groͤßer werd die ſum/

Stuͤpf mich auch mit deiner zungen

Vngezwungen/

Die ſuͤßer dan honig iſt:

Alſo laß vns kurtzweil fuͤhren/

Damit wir ja nicht verlieren

Der Jugent einige friſt.

Laß
[91]Das ander Buch.
Laß vns nach Amors willkhur

Wandlen auf der Jugent ſpuhr/

Biß das alter krum gebogen

Kom gezogen/

Mit zittern/ kaͤlt/ forcht vnd grauß/

Welches mit ſich auf dem rucken

Vil laids bringet vns zu drucken/

Biß es vns macht den gar-auß.


25.


Amor ſiget
alles.


DEr Helden ritterliche hand

Kan die Sig-cronen hinweg fuͤhrẽ;

Aber Amor mit ſeinem brand

Kan allein blind vñ bloß uͤber Sie triumfierk.

Die Nymfen mit jhrer ſchoͤnheit

Koͤnden der Ritter hertz vexieren:

Aber Amors ſuͤße Gotheit

Kan uͤber hertz vnd ſehl beederſeits triumfierẽ.

So
[92]Das ander Buch.
So koͤnden die Goͤtter mit macht

Die Elementen wol regieren:

Aber Amor mit groͤßerm pracht

Kan uͤber himel/ moͤhr/ luft vñ erd triumfierẽ.


Vber abſchai-
den.


ACh ſuͤße ſehl muß ich dich dan veꝛlieren/

Jetz da ich dich ſtarck zu haltẽ gedacht?

Darf ich dan nu laͤnger nicht trium-

fieren

Verꝛingert ſich dan meiner ſchoͤnheit macht?

Ach nein. Vilmehꝛ will ſich deine lieb endẽ;

Dan wahre lieb kan ſich von lieb nicht wendẽ.

Was! ſoll ein Fuͤrſt mehr macht uͤber dich

haben/

Dan Amor ſelbs/ der groͤſten Goͤtter Gott?

Wirt dan der Krieg dich mit blut mehr erla-

ben/

Dan diſe kuͤß meines munds ſuͤß vnd roht?
Ach
[93]Das ander Buch.

Ach nein/ mein hertz/ laß krieg vnd Fuͤrſten

fahren/

Ein buhler ſoll ſeiner Liebſten willfahren.

Was hilft es dir nach lob vnd ehr zuſtreben/

Wan ich allein ohn hofnung zagen ſolt?

Weiſer iſt der/ der ſeinem feind das leben/

Dan der dem feind den tod mitthailen wolt.

Mein hertz ohn dich kan keinen ruhm ver-

mehren/

Ohn mich dein hertz ſoll keinen ruhm begehrẽ.

Alſo thaͤt ſich Myrta weinend beklagen/

Da Filodor auch ſeufzend jaͤmerlich

Sprach/ laß vns doch der Goͤtter zorn ertra-

gen/

Du haſt mein hertz/ Myrta/ dein hertz hab ich:

Vnd wie ſehr vns dzſchaiden nu verloͤtzet/

So ſehr vnd mehr die widerkunft ergoͤtzet.


Der
[94]Das ander Buch.

27.


Der Jugfra
Roſſa ſchimpf.


GMach an junger herꝛ ohn ein bart/

Jhr greiffet zu tief nach dem handel:

Fuͤr Euch iſt diſer ſtein zu hart/

Fuͤr Euch iſt zu ſuͤß diſer mandel.

Ach Junckerlein was zeucht jhr euch/

Langet Jhr ſo nider nach roſen?

Foͤrchtet Jhr nicht das man Euch ſtreich/

Wa Jhr verdoͤrbet ewre hoſen.

Wie ſtoͤlt Jhr Euch einmahl ſo keck/

Das Jhr ein ſo tieffes verlangen!

Ach es gehoͤrt dazu mehr ſpeck/

Wan man ein ſolche mauß will fangen.

Was wollet Jhr ſo ſchwach vnd blaich

Nach ruhm in dem Niderland ſtreben?
Ach
[95]Das ander Buch.

Ach Jhr ſeht auß/ als wan ein ſtraich

Euch ſolte koſten ewer leben.

Darumb ſo ziecht anderſtwa ein/

Hie iſt kein platz vnder-zu-kommen:

Es muß ein ellender wirth ſein/

Der Euch loſiert ohn allen frommen.


28.


An die milte
Jugfra Roſſa.


LJeber wer ſah jemahl ein fewr

So vngehewr

Auf des Schweitzerlands hoͤchſten

bergen/

Als meines hertzens brunſt ſo haiß/

Das ich (die warheit nicht zu pergen)

Nichts davon waiß?

Zwar iſt es vns beederſeits gut

Das vnſre wuht
Jn
[96]Das ander Buch.

Jn der lieb ſo fein ſanft mag bleiben:

Dan ſolt Sie vil maͤchtiger ſein/

So moͤcht wol das ein nicht vertreiben

Des andern pein.

Ein wunder der lieb iſt mein hertz/

Vnd kan der ſchmertz

Den ich nicht fihl mich nicht gnug ſtrafen:

Alles lachen vergehet mir

Wan ich drinck/ vnd ich kan nicht ſchlafen/

Wan ich ſpatzier.

Ewer (weil Jhr mir in geſicht)

Vergiß ich nicht/

Deßhalb ſich mein mund oft beklaget:

Jch empfind die kaͤlt wie hitz;

Man ſicht wie mich die lieb vmbjaget/

Wan ich ſtill-ſitz.

Wan jhr ſaur ſecht/ ſo befind ich

Das wol fuͤr mich

Kein ſchoͤnes wetter wan es regnet:

Gantz verzucket ich mich vergaf/

Wan jhr mir ſo zumpfer begoͤgnet

Gleichwie ein af.

Ein-
[97]Das ander Buch.
Einſam zuſein gen hof ich kom/

Vnd ich ſchein ſtum!
(Weil ich ſchweig) wan Jhr mich begruͤeſſet:

Jch frag weder nach ſpeiß noch wein

Wan ich ſat/ vnd meinen luſt buͤeſſet

Nur Ewer ſchein.

Ewer himel-weit glate ſtirn

Hat ein geſtirn/

Das wie ein liecht den blinden zindet;

Vnd deſſen glantz mit ſuͤßer ſtraf

Mein geſicht wie die Sonn verblindet

Alßlang ich ſchlaf.

Nu aber diſer ſchoͤnheit frucht

Jſt ewre zucht/

Damit Jhr wie Venus ſelbs pranget:

Ewre keuſchheit ſtrafet ſo ſehr/

Das keinen mehr wider verlanget

Nach Ewrer ehr.

Eben das macht/ das ich fuͤr Euch

Kein Koͤnigreich

Mit carten zweifle ein-zu-buͤſſen:

Ja mein blut Euch zu hoͤchſtem preiß
GWolt
[98]Das ander Buch.

Wolt ich in einem Hoͤhr vergieſſen

Gaiſtlicher weiß.

Aber ewer zu milter muht

Liebet kein blut/

Dan das weiß/ vnd will niemand toͤdten:

Jhr haltet auch freundlich gernſtill/

Willig zu helffen auß den noͤhten

Dem der nu will.

Wolan/ das vnſre lieb vnd trew

Auch ewig ſey/

So ſolt Jhr Euch/ ich mich ſtehts lieben:

Vnd einander zuhelfen gleich/

So ſolt Jhr mich niemahl betruͤeben/

Jch niemahl Euch.


29.


Erklaͤrung.


JHr herꝛen (damit ich ja Euch

Nenn eben gleich/
(ret)

Wie Jhꝛ Euch ſelbs guͤnſtig intitulie-

Jhr deren grob verdoͤrbtes blut
Sich
[99]Das ander Buch.

Sich gleichſam ab des fiebers wuht/

Ab meiner ſchrift erhitzet vnd gefruͤeret.

Jhr miſchet Teutſch/ Welſch vnd Latein
(Doch keines rein)

Ewern verſtand nicht zulang zu verhaͤlen:

Vnd ſagt mit zu witziger ſchmach/

Das ich verdoͤrb die Teutſche ſprach/

Weil ich nicht mag frembde wort (wie Jhr)

quaͤhlen.

Zwar wan man ja Welſch reden ſoll/

So muͤſt Jhr wol

Das ich es red beſſer dan Jhr geſtehen:

Kan alſo auch ein blinder tropf

Weniger witz in ewerm kopf/

Dan neid vnd haß in ewerm hertzen ſehen.

Wan dan ewers verſtands gefahr

So offenbahr/

Warumb ſolt ich ſchriftlich ewer gedencken?

Waͤr ich nicht ſelbs kraͤncker dan Jhr/

Vnd auch ein vernunft-loſes thier/

Wan ich Euch wolt mit ſchriften mehr be-

kraͤncken.

G ijEwer
[100]Das ander Buch.
Ewer argwohn iſt gar vmb ſunſt/

Vnd nur ein dunſt

Der Euch das hirn (ſo vorhin ſchwach) ver-

loͤtzet:

Jch waͤr wie Jhr/ wan ich die hand/

Fuͤr oder wider ewreſchand

Zuſchreiben/ nur auf das papier geſetzet.

Dan wuͤrden alle Weiſe nicht

Deſſen gedicht

Welcher Euch wolt loben verlachen?

Hingegen Euch ſchelten wer kaum

Beſſer gethan/ dan einen baum/

So dirꝛ vnd faul/ noch fruchtbar wollen ma-

chen.

Wan ich die zeit ſchadloß vertreib/

Vnd froͤlich ſchreib/

So ſchreib ich doch weder fuͤr noch von allen:

Vnd meine Vers kunſtreich vnd wehrt

Sollen nur denen die gelehrt/

Vnd (wie Sie thun) weiſen Fuͤrſten gefallen.

Vil zu koͤſtlich/ zu rein/ vnd friſch

Fuͤr ewern tiſch

Vnd magen ſeind die trachten meiner ſchrif-

ten:
Den
[101]Das ander Buch.

Den bauren taugt ein hafenkaͤß/

Die pomerantzen ſeind zu raͤß/

Damit Sie ſich wol foͤrchten zu vergiften.

Jch will nicht die torꝛechte muͤh/

So ich alhie/

Jemahls von Euch zuſchreiben ferners habẽ:

Darumb ſo gebt Euch nu zu ruh/

Jch ſag Euch bey den Muſen zu/

Von Euch ſchreib ich weitters keinen buch-
ſtaben.

Auch gebuͤhrt es mir freylich nicht/

Durch ein gedicht

Ewer lob/ ehr/ preiß vnd namen zuſingen:

Sondern dem/ der in hungers noht

Mit ſtarcker ſtim ein ſtuͤcklin broht

Vor ewerm hauß verhoft davon zubringen.


30.


Die Luͤgin.


GEh durch die welt/ O meine ſehl/

Der welt vndanckbarkeit zuſehen;
G iijSag
[102]Das ander Buch.

Sag jedem ohn ſchew ſeine fehl/

Die Warheit ſelbs ſoll dir beyſtehen:

Weil die welt nichts kan dan betruͤegen/

So haiß ſie khuͤn offentlich liegen.

Sag dem Hof/ daß ſein pracht vnd ehr/

Wie faul holtz vnbeſtaͤndig ſcheinen;

Sag der Kirchen/ was jhre lehr

Gut haiſſet/ jhre werck verneinen:

Sagen Sie duſeyeſt betrogen/

So ſag ohn ſcham/ Es iſt ꝛc.

Den Fuͤrſten ſag/ Jhr ſtand vnd haab

Koͤnd ohn anderer hilf nicht wehren/

Vnd daß man pfleg mehr Jhre gaab/

Dan Sie zu lieben vnd zu ehren.

Sa gen Sie du ſeyeſt betrogen/

So ſag ohn forcht/ Es ꝛc.

Sag den Herꝛen/ die ſich beſeits

Jn Jhren hohen aͤmptern ſpreiſſen/

Das Sie mehr des Ehrgeitz vnd Neyds

Dan der Billichkeit ſich befleiſſen.

Sagen Sie du ſeyeſt betrogen/

Antwort du rund/ Es iſt ꝛc.

Sag
[103]Das ander Buch.
Sag zu denen/ die vor der welt

Mit zeug vnd klaidern ſtatlich prangen/

Sie verhoffen dadurch mehr gelt/

Groͤßern dienſt vnd ruhm zuerlangen:

Antworten Sie man ſey betrogen/

So ſag du keck/ Es iſt ꝛc.

Sag zu der Andacht/ Sie ſey daub/

Sag die Jugent muͤß fort paſſieren/

Sag zu dem Flaiſch/ es ſey nur ſtaub/

Sag Lieb laß die Armuth verfrieren:

Antworten Sie man ſey betrogen/

So antwort du/ Es ꝛc.

Sag Bulerey ſey boͤſer luſt/

Sag Ehr moͤg bald verkehret werden/

Sag Schoͤnheit werd kurtzlich ein wuſt/

Sag Alter naig ſich zu der erden:

Antworten Sie man ſey betrogen/

So ſag du frech/ Es iſt ꝛc.

Sag dem Rechten es ſey voll zanck/

Sag Klugheit pfleg ſich zu bethoͤren/

Sag der Artzney/ Sie ſey ſelbs kranck/

Sag das Schulen keinen grund lehren:

Sagen Sie dan/ man ſey betrogen/

So antwort du/ Es ſey ꝛc.

G iiijSag
[104]Das ander Buch.
Sag der Gunſt/ Sie ſey voll betrug/

Sag dem Gluͤck/ es ſey gantz verblindet/

Sag der Reichtumb/ Sie hab nie gnug/

Sag die Kunſt ſey nicht wol gegruͤndet:

Antworten Sie man ſey betrogen/

So ſag du rund/ Es iſt ꝛc.

Der Dapferkeit ſag diſe ſprach/

Das Sie trag ſelten ein mitleyden/

Sag der Natur/ das Sie werd ſchwach/

Vnd koͤnd den abgang nicht vermeiden:

Antworten Sie man ſey betrogen/

So ſag du bald/ Es iſt ꝛc.

Der Freundſchaft zaig an/ wie ſie mag

So wenig fuͤr jhre freund ſorgen;

Aber der Gerechtigkeit ſag/

Sielig vndertruckt vnd verborgen:

Antworten Sie mein ſey betrogen/

So ſag du gleich/ Es iſt ꝛc.

Den Staͤtten ſag/ wie Trew/ Glaub/ Ehr/

Vnd Redlichkeit auß Jhnen fliehen;

Vnd den Doͤrfern ſag/ wie ſo ſehr

Sie an grobheit vnd Jrtumb bluͤhen:

Sagen Sie/ du ſeyeſt betrogen/

So ſag durund/ Es iſt ꝛc.

Letzt-
[105]Das ander Buch.
Letztlich die Tugent auch bericht/
(Wa du Sie anderſt ſolteſt finden)

Das man Jhrer mehr achtet nicht/

Vnd Sie all ein bleib gar dahinden:

Antworten Sie man ſey betrogen/

So ſag du frey/ Es iſt erlogen.

Wolan/ wa du durch die Warheit

Solteſt die Welt gantz zornig machen/

So kanſt du mit gleicheꝛ frechheit

Sie noch ohn forcht dazu außlachen:

Dan wer will/ Sehl/ mag dich anklagen/

Dir auch die geig vmb den kopfſchlagen.


31.


Meine meinung
wie ein Weib zu woͤhlen.


MJch zu entfreyhen/ vnd ein weib
(Ja vilmehr meinen leib) zufreyhen/

Das Jhr leib mein/ mein leib Jhr

bleib/
G vDas
[106]Das ander Buch.

Vnd es mich nicht moͤg wider rewen:

Glaub ich/ ich ſoll vertrawen nicht

Eines andern mund noch geſicht:

Zu buhlen vnd ſich ſelbs zupreiſen

Kan ein man ſelbs das beſt erweiſen.

Damit nu die wahl khuͤn vnd frey/

So wolt ich anfaͤnglich begehren/

Das Sie ſolcher Eltern kind ſey/

Die an freyheit/ frombkeit vnd ehren
Älter dan ein altes geſchlecht.

Eine ſchoͤnheit fromb vnd nicht ſchlecht/

Auch ein ſchlechtes vnd rechtes leben

Kan ſelten das blut allein geben.

Zwar waiß ich wol/ das gute zweig

Noch von alten baͤumen aufſchieſſen/

Zu deren lob ich nicht verſchweig/

Das Sie Jhres ſtammens genieſſen/

Vnd darumb wehrt/ das man ſie ehr:

Doch vermein ich auch/ das je mehr

Ein berg ſich in die hoͤhin ſtroͤcket/

Je baͤlder er mit ſchnee bedoͤcket.

Forchtloß nu vor der Rew zu ſein/

Die vns zu ſpaht doch bald erſchleichet/
Soll
[107]Das ander Buch.

Soll meine wahl nicht auf den ſchein/

Sondern recht nutzlich ſein bereichet.

Wer ſeine freyheit gibt dahin

Vmb Stands oder geſichts gewin/

Der kauffet ein pferd zu prachtieren

Darauf Er ſchimpflich mag verlieren.

Jedoch wolt ich Sie anſtatur

Vnd anſchoͤnheit vollkommen haben/

Auch das Sie ſolt (ſchoͤn von Natur)

Eines Jeden geſicht erlaben:

Gleich wie die Sonn ſolt Sie ſchoͤn ſein/

Das Sie mit vnbeflecktem ſchein/

Zwar von allen augen geſehen/

Moͤg doch nur bey mir nidergehen.

So darf Sie auch nicht ſein gelehrt/

Vil weniger ſprachen ſtudieren;

Der verſtand des weibs iſt vil wehrt/

Der gnug iſt Jhr hauß gnug zuzieren:

Die nur ein ſolches geſpraͤch hab

Als ein koͤſtliche Gottes gaab;

Vnd mehr nicht dan mein thun vnd laſſen
(Als mein ſpiegel) in ſich thufaſſen.

Ja/ ich wolt nicht das Sie mit glimpf

Solt jemand wollen lang vexieren/
Vil
[108]Das ander Buch.

Vil weniger mit ſpot vnd ſchimpf

Jemand verlachen vnd ſtumpfieren:

Sie ſoll foͤrchten boͤſe anblick/

Vilmehr boͤſer geberden ſtuͤck/

Boͤſe buhler foͤrchten zu machen

Jhr fuͤr-zu-bringen boͤſe ſachen.

Das Sie niemahl ab dem werd roht

Was ſie begangen vnd verſaumet;

Das Sie ſey keuſch/ ohn ſchand vnd ſpot/

Das Jhr je nichts boͤſes getraumet.

Dan die Jungfraw in deren bruſt

Sich einmahl niſtet boͤſer luſt/

Die hat/ eh Sie thut boͤſe thaten/

Jhrer zucht voͤſtung ſchon verꝛahten.

Sie ſoll ſtehts mit forcht/ ſcham vnd ehr/

Wan ich ſie beſuch/ der lieb pflegen:

Doch wolt ich das ſie fruchtbar waͤr/

Zwar mehr Namens dan wolluſts wegen:

Dan die ſo in dem werck ſchamhaft/

Hat ſtehts ein newe Jungfrawſchaft;

Vnd die zucht kan die Trew erhalten/

Das der Heurath nicht kan veralten.

Sie ſoll/ wan ſie mir gibt die hand

Vor dem Pfarꝛern/ in Jhr hertz graben/
Wie
[109]Das ander Buch

Wie durch diſes hailige band

Got auß vns beed nur eins woll haben;

Wuͤnſchend mit mir auß hertzen grund/

Das wir beed in gleicher ſtund
(Als Aarons ſteck) zumahl auf erden

Gruͤnen/ bluͤhen/ tragen/ dirꝛ werden.


32.


Vlyſſes vnd Si-
rene.


Sirene.

KOm her/ du wehrter Griech kom her/

Wolteſt du nicht alhie anfahren?

Der Wind vñ das Moͤhr toben ſehꝛ/

Vnd alhie kan dich nichts befahren:

Alhie ſehen vnd hoͤren Wir

Der fuͤr-ſchiffenden muͤh vnd klagen;

Alhie kanſt du froͤlich mit mir

Alle ſorg auß dem hertzen jagen.

Vlyſ-
[10[110]]Das ander Buch.
Vlyſſes.

Schoͤne Nymf/ wan man durch wolluſt

Ein großen namen kont erlangen/

So wolt ich deinen mund vnd bruſt

(So ſchoͤn) gern kuͤſſen vnd vmb fangen:

Aber die muͤh vnd nicht die ruh

Kan recht eines mans leben zieren;

Keinem wehrten man ſteht es zu

Die zeit uͤppiglich zuverlieren.

Siren.

O Vlyſſes bethoͤr dich nicht/

Das du ein lob bringeſt zuwegen;

Dan ſolches ja nur ein gedicht/

Vnd in andrer leut koͤpf gelegen;

Auch nur erfunden/ vnſern muht

Vmb frewd vnd friden zu betriegen/

Vnd fuͤr ruh (vnſer beſtes gut)

Mit muͤh vnd ſtreit vns zu vernuͤegen.

Vlyſſes.

Gaile Nymf/ geſetzt weder lob

Noch geſchray waͤr fuͤr vns zufinden/

Waͤr es doch ſchlechter Manheit prob

Den
[111]Das ander Buch.
Den luſt ſich laſſen uͤber winden:

Dan eben nach muͤh vnd verdruß

Kan man der ruh beſſer genuͤeſſen;

So kan auch des luſts uͤberfluß

Vns ſowol als die muͤh verdrieſſen.

Siren.

So iſt der wolluſt nu der lohn

Vnd port/ der Euch ſo lang verieret;

Den Jhr oͤft/ weil Jhr lang davon

Jhn zu vermehren/ gar verlieret:

Mit wolluſt du abwechßlen muſt/

Dich allzeit froͤlich zuerlaben:

Man kan ja ſo mancherlay luſt/

Als vilerlay geſchaͤften haben.

Vlyſſes.

Doch ſihet man/ das nah vnd fern

Die Recht—edle der muͤh nachtrachten/

Vnd ſie (ſich damit uͤbend gern)

Als Jhr Ewern wolluſt hochachten;

Vnd das ſie ſtehts mit lieb vnd fraid

Jhrer verꝛichtungen gedencken/

Da hingegen mit rew vnd laid

Die laſter leib vnd ſehl bekraͤncken.

Siren.
[112]Das ander Buch.
Siren.

Das macht allein der falſch argwohn/

Den ein boͤſer gebrauch vermehret/

Der klaidet manche werck mit hohn

Welche doch die Natur ſelbs ehret.

Vnſer kampf/ gehend ab ohn blut/

Macht weder waiſen noch witfrawen:

Vnd wazu iſt doch der welt gut

Der Dapferſten ſtechen vnd hawen?

Vlyſſes.

Solcher fleiß/ vnruh/ muͤh vnd ſtreit

Seind oft nohtwendig bey den Staͤnden/

Die die Weiſeſte koͤpf allzeit

Der welt zu den beſten anwenden;

Jndem Sie ſchand/ gewalt vnd liſt

Strafen/ vnd das Recht recht verwalten;

Dan der Krieg ſelbs oft beſſer iſt

Dan mit ſchand vnd uͤbel frid-halten.

Siren.

Wol/ Vlyſſes/ ich kom zu dir/

Weil du ja nicht wilt zu mir kommen;

Vnd weil dein hertz nicht wirt von mir/

Wirt
[113]Das ander Buch.
Wirt mein hertz von dir eingenommen:

Zwar iſt mein verluſt mehr mein pracht/

Dan ſo ich auch dich thet erwerben;

Dan Schoͤnheit iſt allein gemacht

Zu verdoͤrben oder verderben.


Die 33. Ode.


Klag.


WAn der welt Aug ſeinen fruchtbaren
ſchein

Vber den erdboden außſtroͤcket;

Alsdan mein ruh-jagende pein

Ein ſolche klag erwoͤcket:

O ſchoͤnes liecht/ von Jedem (nur von Mit

Nicht gern) all-ſehend gern geſehen/

Lieber/ bracht man di[r] jemahl fuͤr

Ein klaͤglicheres flehen!

Deines geſichts geſicht-troͤſtender luſt

Kanzwar alle geſchoͤpf erlaben;
HAber
[114]Das ander Buch.

Aber das hertz in meiner bruſt

Mit keinem troſt begaben.

Voll qual vnd angſt ein erſchroͤckliche nacht

Meine ſehl vnd geſicht beſchwehret/

Welche mit meines ſchmertzens macht

Mich den weg des Tods lehret.

Heimliche Ort ſuch ich voll finſternuß

Die ich erfill mit meinen klagen/

Das ſie dopplen meinen verdruß/

Wan ſie die widerſagen.

Ein end hat nu mein luſt/ frewd vnd geſang/

Nichts kan mein ellend von mir wenden:

Darumb wart ich nu des Tods gang/

Mein laid vnd klag zu enden.

Wan dan die nacht mit jhrẽ ſchwartzen klaid

Den ſterblichen Jhren ſchlaf bringet/

Alsdan mein ſtehts-wachendes laid

Den luft alſo durch dringet:

O ſchoͤne ſtern/ der Nacht einiger pracht

Die jhr (blaich) meine noht beweinet/
Vnd
[115]Das ander Buch.

Vnd meiner ſehlen letzten nacht

Zu dem grab trawrig ſcheinet:

Jhr koͤnt zwar wol den entmuͤdenden ſaft

Auf der ſterblichen augen gieſſen;

Aber Jhr habt nicht ſo vil kraft/

Mein geſicht zu beſchlieſſen.

Du Nacht thuſt mir mit abſchewlicher hand

Meine gedult gar hinweg rauffen;

Die Furien mit Jhrem brand

Stehts meinem gaiſt nachlauffen.

Alſo hab ich weder liecht noch gedult

Jn meinem geſicht/ gaiſt vnd hertzen;

Vnd nur den troſt/ das meine ſchuld

Groͤßer dan meine ſchmertzen.

Doch wirt mich der/ ſo mich gar toͤdtet nicht/

Seiner gnaden wider-gewehren/

Vnd mein laid durch ſein angeſicht

Gnaͤdig in frewd verkehren.



[116]Das ander Buch.

Die 34. Ode.


Von des Menſchlichen Le-
bens/ vnd von dem blinden menſch-
lichen Vbermuht wenig erkanten
Ellend.


DV wenig koht/ du wenig ſtaub/

Hoch muͤhtig durch ein wenig leben/

Welch es leben dich wie ein laub

Macht ein weil in dem luft vmbſchweben:

Du graß/ du hay/ in einer ſtund

Bald friſch-gruͤnend vnd bald verdorben;

Menſch der du/ eh dein gaͤnger mund

Dich ſterblich bekennet/ geſtorben.

Der du dich nicht achteſt gering/

Menſch/ Nein/ jhr menſchen all zuſamen/

Seit jhr wol mehr danpfifferling/

Oder was einen ſchlechtern namen?

Nein/ wan ſchon Ewers lebens ſaft

Was laͤnger dan eine nacht wehret/

Lieber ſagt mir doch/ auß was kraft

Jhr die welt/ vnd die welt Euch ehret?

Wan
[117]Das ander Buch.
Wan Jhr dan nichts/ iſt die welt mehr

Dan eine verſamblung des boͤſen?

Was iſt jhr luſt/ jhr ruhm/ jhr ehr/

Dan laid/ ſpot/ vnd ſchandliches weſen?

Was ſihet vnd was kan man ſunſt

Bey den Hoͤfen dan dapfer liegen;

Dan mit ehrgeitz/ ſchalckheit/ mißgunſt/

Stoltz/ ſchimpf vnd fuchsſch waͤntzẽ betriegẽ?

Vnd in welchem einſamen hauß

Kan ein menſch wol ohn ſorgen wohnen?

Wer handlet uͤber Moͤhr ohn grauß?

Kan der feldbaw ohn muͤh belohnen?

Wer raiſet durch die welt mit luſt/

Das er ſich niemahls zu befahren?

Welche Reichtumb kan deine bruſt

Stehts vor forcht vnd verdruß bewahren?

Wer iſt/ ſo lang Er arm/ ohn klag?

Wer hat ein weib vnd iſt ſein aigen?

Wer iſt weil Er loͤdig ohn plag/

Wan ſich ohn freund ſeine tag naigen?

Wer iſt nicht ohn kinder/ erbloß/

Gaͤntzlich abzuſterben verdroſſen?
H iijWer
[118]Das ander Buch.

Wer hat vil kinder/ deſſen ſchoß

Nicht oft mit forcht vnd angſt durchſchoſſen?

Welches Juͤnglings hertz/ muht will/ hitz

Thut nichts/ deſſen Er ſich zu rewen?

Vnd welches hohen Alters witz

Kan ſich vor kaͤlt vnd ſchwachheit freyhen?

O dan du ſtoltzer menſch betracht/

Was du nu auß dir ſelbs zu machen!

Ein kind/ kaum in die welt gebracht/

Weinet/ kan oder will nicht lachen:

Vnd (weiſer dan du) lehret dich/

Wie der menſch ſein ellendes leben

Weinend ſoll anfangen/ vnd ſich

Hernach lachend dem tod ergeben.

Ende des andern Buchs.



Del[[119]]

Appendix A Del Sigr Angelo Trono
Sonetto
ALSIG.r GIOR-
GIO RODOLFO WECK-
herlino, Segretario Inter-
pr.e di Sua Ser.ma Alt.a di Wir-
temberga \&c. \& Eccellentiſs.
Poeta.


DOppo’l quint ’anno, che dal patrio hoſtello

Movendo i paſſi à glorioſo ſegno,

Scorſi più d’un Paeſe, e più d’un Regno,

Emirai ogni dì Popolnovello:

Alfin ritrovo in te(Rodolfo)quello,

Che non può compartirſi a humano ingegn[o],

Onde l’ acquiſto mio ſtimo più degno,

Che de Colchidi Heroi l’ aurato vello.

Ilmondo cieco, onde è virtù sbandita,

Mentre à l’ Occaso ogn’ hor fugge, eſ imbruna,

Dal tuo ſoccorſo attende e lume e aita:

Tu giongi à tempo. In vidia indarno impruna

A tuoi paſſi d’ honor la via eſpedita,

E ſerua al tuo valor ſcorgo Fortuna.

[[120]]

Appendix B Etliche faͤhl ſo uͤberſehen
worden.


Jn dem 21. blat/ vnd 20. vers fuͤr erquicken liß be[-]
gluͤcken. 33. blat liß den 5. vers alſo: Aber zu ſchlech[t]
war ſein verſtand. 37. der 17. liny/ liß/ wuͤnſchen. 45. i[n]
der 7. liny. liß jetzund. 60. in dem erſten vers/ liß vmb[-]
faſſen. Eben an demſe[l]bigen blat/ liſe den 17. vers alſo:
Durch den ſchwalß nim̃et die frewd zu. 67. liß in de[m]
19. vers erwoͤcket. 75. in dem letzten vers liſe Gunſt.
96. liß den 14. vers alſo: Jch empfind die kaͤlt wie die hitz [...]


Was ſunſten in diſtinctionen vnd buchſtaben uͤber
ſetzen/ wirt der Loͤſer ſelbs zu verbeſſern wiſſen.



Stutgart/
Gedruckt bey Johan-Wey[-]
rich Roͤßlin.



Jm Jahr 1619.


[[121]][[122]][[123]][[124]][[125]][[126]]
Lizenz
CC-BY-4.0
Link zur Lizenz
Zitationsvorschlag für diese Edition
TextGrid Repository (2025). Weckherlin, Georg Rodolf. Oden vnd Gesäng. Corpus of Literary Modernity (Kolimo+). https://hdl.handle.net/21.11113/4bpj9.0