JNdem ich/ zu fol-
ge der allgemeinen
Gewonheit/ im
Wercke begriffen
bin/ dieſer uͤberſetzten Schrifft
durch Beyfuͤgung hoher Nah-
men noch einigen Glantz zu er-
wecken/ ſo habe ich ſolches vor
dißmahl um ſo viel weniger
durch eine weitlaͤufftige Wahl
in Bedencken zu nehmen/ je
mehrere Urſachen ſich von Sei-
ten E. E. Hoch Gr. Hoch-
Gr.
[]Zuſchrifft.
Gr. Gn. Gn. hervorthun/
um derer willen ſie hiebey nicht
uͤbergangen ſeyn wollen. Deñ
gleichwie bey Aufferziehung
ſolcher Perſonen/ die dermahl-
einſt Land und Leute regieren
ſollen/ ohne Zweiffel der vor-
nehmeſte Zweck dieſer ſeyn
muß/ daß man ſie/ benebenſt
rechtſchaffener Anfuͤhrung zu
dem Chriſtenthum/ beyzeiten
auf die Noꝛm und Richtſchnuꝛ/
wornach nicht allein alle Tu-
gendhafften insgemein/ ſon-
dern auch abſonderlich loͤbliche
Regenten ihre Actiones zu re-
guliren haben/ verweiſe: alſo
wil/ ſonder Anmaſſung einiges
Eigen-Ruhms/ ich verhoffen/
)( 3daß/
[]Zuſchrifft.
daß/ ſeither dem ich das Gluͤcke
gehabt/ E. E. Hoch-Gr.
Hoch-Gr. Gn. Gn. Auff-
erziehung und Information
mich nunmehro in die 7. Jah-
re anzunehmen/ ſo wohl am er-
ſten nichts verſaumet/ als auch
voꝛ allen uͤbrigen Wiſſenſchaff-
ten/ die Dero gegenwaͤrtiges
Alter zu faſſen faͤhig geweſen/
das andere mit genugſamen
Fleiſſe und Eyffer getrieben
worden. Und weil man hiezu
keine beſſere Anleitung finden
koͤnnen/ als die jenige/ ſo der
Welt-beruͤhmte Herꝛ Sam.
von Pufendorff in ſeinem
ſo wol der reinen Schreib-Art
und
[]Zuſchrifft.
und wohlgefaſſeten Ordnung/
als gruͤndlichen Principiorum
halber hochzuſchaͤtzenden Mo-
ral- und Politiſchen Hand-
Buche de officio hominis \& ci-
vis vorgiebet/ und aber bey
Anfange Eu. Eu. Hoch-
Gr. Hoch-Gr. Gn. Gn.
der Roͤmiſch. Sprache ſo weit
noch nicht gewachſen waren/
daß ſie alles ohne Verdolmet-
ſchung verſtehen koͤñen; als ha-
be bloß Jhnen zu Liebe ich mir
damahls die Muͤhe genom̃en/
ſolches/ ſo gut es jedesmahl die
Zeit/ und offtmahls ſchier all-
zu kurtze Verſchraͤnckung derer
wichtigſten Materien leiden
)( 4wol-
[]Zuſchrifft.
wollen/ von Stuͤck zu Stuͤcke
in unſere Mutter-Sprache zu
uͤberſetzen. Nunmehro ſtelle ich
es Jhnen vollſtaͤndig/ und
zwar im Drucke/ und mit der
Vorſchrifft Derer hohen
Nahmen unter die Augen/
welches Sie Sich um ſo viel
mehr und gnaͤdiger werden ge-
fallen laſſen/ indem (zu ge-
ſchweigen des wohlverdienten
Ruhms/ den die Welt durch ſo-
thane Veranlaſſung Dero
Preiß-wuͤrdigen Studien bey-
legen wird) es nicht minder zu
E. E. Hoch- Gr. Hoch-
Gr. Gn. Gn. fernern eige-
nen Nutzen/ als zu Jhres Naͤ-
heſten/
[]Zuſchrifft.
heſten/ und inſonderheit der
Jugend von Jhres gleichen
Stande zum Beſten abgezielet
iſt/ als welche durch Dero vor-
leuchtendes ungemeine Bey-
ſpiel/ und durch die in der
Mutter-Sprache verſchaffete
Erleichterung ſich hinfuͤhro deꝛ
ſo hohen Perſonen unumgaͤng-
lich benoͤthigten Moral- Philo-
ſophie/ etwas mehr duͤrfften
annehmen. Zwar habe ich vor
andere keinen Special Beruff;
allein/ ſo gewiß es gleichwohl
iſt/ daß Fuͤrſten und hohe Lan-
des-Haͤupter/ wofern ſie nicht
mit einem ſonderlichen guten
Naturel begnadiget ſind/ ohne
die Morale ohnmoͤglich eine
)( 5loͤb-
[]Zuſchrifft.
loͤbliche Regierung fuͤhren koͤn-
nen; ſo hoͤchſt noͤthig wil es
ſeyn/ die Fuͤrſtliche und andere
Standes-Jugend/ nebſt Got-
tes Worte/ hierinne vor allen
andern zeitig und gruͤndlich zu
unterweiſen. Denn ſo einem
jedweden Privat-Menſchen
nichts naͤher iſt/ als ſeine eige-
nen Actiones und Gemuͤths-
Begierden/ er ſich auch nichts
eyffriger/ als deroſelben Cul-
tivir- und Erbauung angele-
gen ſeyn laſſen ſoll/ wann er
anders in der Welt vor einen
ehrlichen Mann oder Virtuo-
ſen paßiren/ und hiedurch den
Grund zu aller irrdiſchen
Gluͤckſeeligkeit legen wil: ſo
hat
[]Zuſchrifft.
hat ſich in Warheit ein junger
Printz/ von deſſen Actionen
mit der Zeit nicht allein ſein ei-
genes/ ſondern auch eines o-
der mehrer Laͤnder/ und alſo
vieler tauſend Menſchen
Weh und Wohl/ Gluͤck und
Ungluͤck zu gewarten ſtehet/
um ſo viel genauer und gefliſ-
ſendlicher dahin anzulegen/
daß er ſo wohl von der menſch-
lichen Gemuͤths-Art richtige
Erkaͤntniß einziehen/ als auch
dieſelbige ſeinem End-Zwecke
gemaͤß/ nach der zugleich in
der Natur befindlichen Richt-
ſchnur gebuͤhrend tempenren
lerne/ worinnen denn die Mo-
ral-Philoſophie (ſonder der
)( 6H.
[]Zuſchrifft.
H. Bibel/ die ihr Abſehen weit
auff was hoͤhers richtet/ hie-
durch zum Præjuditz zu reden)
und zumahl nach denen jeni-
gen Principiis, worinnen Hoch-
gedachter Herr von Pu-
fendorff ſolche vortraͤget/ ei-
nig und allein zur Lehr-Mei-
ſterin zu gebrauchen. Zwar/
Gnaͤdigſte Herren/ fin-
den Sie in gegenwaͤrtiger
Schrifft nur einen kurtzen
Entwurff der vollkommenen
Sitten- und Staats-Lehre;
nichts deſto weniger koͤnnen
Sie verſichert ſeyn/ daß Sie
allbereit hierinnen nicht nur
einen ziemlichen Vorſchmack
von
[]Zuſchrifft.
von dem bey aller Welt gnug-
ſam renommirten Sitten- und
Staats-Lehrer/ Hugone Gro-
tio, ſondern auch zugleich ein
helles Licht/ oder Ariadniſchen
Faden bekommen/ vermittelſt
deſſen Sie durch die gefaͤhrli-
chen Jrr-Gaͤnge des Machia-
velli, Hobbeſii, und anderer
verkehrten Anfuͤhrer ſonder
Anſtoß hinfahren/ und ſich
gleichwohl das beſte daraus
zu Nutze machen koͤnnen. Da-
fern Sie nun meiner ſchlech-
ten Uberſetzung auch einigen
Theil der hohen Hulde und
Fleiſſes goͤnnen ſollten/ womit
Sie bißanhero dem Lateini-
ſchen Original hoͤchſt-ruͤhmlich
)( 7zu-
[]Zuſchrifft.
zugethan geweſen/ immaſſen/
daß nachſt denen Sacris dieſes
Jhre angenehmſte und erbau-
lichſte Lection ſey/ Sie zum
oͤfftern ſelbſt gemeldet. Jn-
zwiſchen gebe nur der Grund-
guͤtige GOtt/ daß ſo wohl die
bey Jhrer gantzen Hoch-
Graͤfflichen Aufferziehung/
als auch inſonderheit die hier-
unter gefuͤhrte gute Intention
ihren Zweck vollkoͤmmentlich
erreichen/ alle Widerwaͤrtig-
keit und Hinderniſſe/ ſonder-
lich die bißanhero Eu. Eu.
beyderſeits aͤlterer Her-
ren Hoch-Gr. Hoch-
Gr. Gn. Gn. zugeſtoſſenen
hoch-
[]Zuſchrifft.
hoch - gefaͤhrlichen Leibes-
Schwachheiten/ woran Sie/
mein Gnaͤdigſter Herr Graff/
Auguſt Willhelm/ ley-
der! noch dieſe Stunde in
groͤſſeſten Schmertzen und
Aengſten das Bette halten
muͤſſen/ voͤllig zuruͤcke getrie-
ben/ und Sie Dero hohen
Eltern/ und dem gantzen
Lande zu ſonderm Troſt und
Vergnuͤgen in ſo gedeylichem
Wachsthume ferner fortfah-
ren/ dermahleinſt aber/ als
Chriſt - loͤbliche Regenten/
GOtt und der Republique ge-
faͤllig werden moͤgen. Ob
auch ſchon/ Gnaͤdigſter Herr
Graff
[]Zuſchrifft.
Graff Heinrich/ die vor-
erwehnten Urſachen dieſer un-
terthaͤnigen Zuſchrifft/ Sie
wegen Dero annoch zarten
Kindheit weder verſtehen/
noch auff Sich appliciren koͤn-
nen; ſo habe dennoch der Na-
tur ich hierinne Folge leiſten/
und unſer ſo gluͤcklich vereinig-
tes Schwartzburgiſches
Bruder-Kleeblat nicht
von einander trennen/ ſondern
vielmehr/ wie Blut und Muth
zwiſchen allerſeits eine voll-
kommene Harmonie machet/
alſo ich ſaͤmtlichen zugleich
auch meine unterthaͤnige Auff-
wartung hiemit erweiſen wol-
len.
[]Zuſchrifft.
len. Lebe demnach des zuver-
ſichtlichen Vertrauens/ Sie
werden Sich dereinſt bey er-
langten mehrern Jahren ſo-
thanes bey Dero Wiegen nie-
dergelegtes Denck-Mahl un-
terthaͤniger Zuneigung von
Dero Diener nicht mißfallen
laſſen. Und wie gantz kein
Zweiffel iſt/ daß Eu. Hoch-
Gr. Gn. hinkuͤnfftig bey
hoͤchſt-ſorgfaͤltiger Aufferzie-
hung ſo wohl in Studiis, als an-
dern Dero hohen Stande ge-
ziemenden Sitten und Tugen-
den die Fußtapffen Dero
beyden aͤlteren Herren
Bruͤder finden werden; al-
ſo
[]Zuſchrifft.
ſo wolle der guͤtige Himmel
auch uͤber Sie ſein Goͤttliches
Gedeyen reichlich ausgieſ-
ſen/ und/ damit ichs kurtz faſ-
ſe/ durch gnaͤdige Erfuͤllung
des von Jhres Herrn Va-
ters Hoch-Graͤfflicher
Gnaden bey Dero Tauff-
Nahmen intendirten Ominis,
Sie gleich Dero mehreſten
ebenmaͤßig benahmten Vor-
fahrendereinſt zu dem Ruhme
eines gelehrten/ tapffern/
gluͤcklichen/ und loͤblichen
HEINRICI gelangen laſſen.

E. E. E. Hochgr. Hochgr.
Hochgr. Gn. Gn. Gn.

unterthaͤnig-gehorſamſter
Diener
Jmmanuel Weber.

Des
Uberſetzers Anſprache an
Den Geehrten Leſer.

HJebey liefere ich dir des
Herrn Sam. von Pufen-
dorff uͤberſetzte Officia ho-
minis \& civis. Wie ich an
dieſe Arbeit gekom̃en/ wird dir die unter-
thaͤnige Zuſchrifft Nachricht ertheilen.
Den Titul habe ich um deßwillen etwas
geaͤndert/ weil er ſich im Teutſchen von
Wort zu Wort ſo wohl nicht interpreti-
ren laͤſſet. Denn ob ich wohl etwas
naͤher kommen koͤnnen/ als etwan hie-
bevor Johann Neuber/ Caplan zu
Schwartzenberg/ ſo die Officia Cicero-
nis A. 1531. zu Augſpurg im Teutſchen
unter dem Titul von den tugend-
ſamen Aemtern herausgegeben; ſo
hat mir doch gegenwaͤrtiger/ um der
gleichfalls in der Dedication beruͤhrten
Urſache willen/ beſſer gefallen/ zumahl
er auch den Jnhalt des Wercks ſatt-
ſam erſchoͤpfſet. Wegen der Uberſe-
tzung an ihr ſelbſt iſt kuͤrtzlich zu erin-
nern/ daß ich dem Lateiniſchen meh-
ren-
[]An den Leſer.
rentheils von Fuſſe zu Fuſſe gefolget/
auſſer im V. Capitel des I. Buchs/ all-
wo/ auff Begehren des Herrn von Pu-
fendorff/ etliche §phi aus ſeinem Syſte-
mate Jur. Nat. \& Gentium eingeruͤcket/
und an theils Orten/ da es im Teutſchen
gar zu verzwickt lauten wollen/ dem Ver-
ſtande durch eine kurtze Periphraſin ge-
holffen worden. Ob ſonſt alles eigent-
lich getroffen ſey/ wil ich zwar verhoffen/
jedoch von dem geneigten Leſer einer guͤ-
tigen Entſchuldigung gewaͤrtig ſeyn/ da-
ferne in der Uberſetzung wegen Dunckel-
heit und Wichtigkeit derer Materien ihm
einige Expresſiones zu uneigentlich/ oder
einige verteutſchten Termini fremde vor-
kommen ſollten. Von dem Nutzen dieſer
Arbeit habe vor mich niemanden Re-
chenſchafft zu geben/ ſintemahl ſolche
mein Amt erfordert; und wenn ſie auch
ſchon niemand mehr dienlich waͤre/ als
denen jenigen/ welchen zu Gefallen ſie
verfertiget worden/ ſo haͤtte ſie doch ſchon
Nutzen gnug verſchaffet; gleichwohl wil
ich hoffen/ daß mir noch einige davor dan-
cken werden. Wer etwas wichtigers ma-
chen
[]An den Leſer.
chen kan/ oder ſeine Zeit beſſer anzulegen
weiß/ dem goͤnne ichs gern/ und ſoll er
wiſſen/ daß dergleichen vor ihn nicht ge-
ſchrieben worden. Mich gereuet zur Zeit
noch keine Stunde/ die ich auff die vor-
trefflichen Schrifften des mehr Hoch-
ermeldeten Herrn von Pufendorffs
gewendet/ und wollte wuͤndſchen/ daß die
jenigen/ ſo mich oder andere deßwegen
verdencken/ ſonder vorgefaßte ſiniſtre
Meinung/ ſich auch etwas genauer dar-
innen umſaͤhen/ ſo wuͤrden ſie ſonder
Zweiffel den Ungrund ihrer bißherigen
widrigen Urtheile finden. Moralia und
Moraliſten haben freylich durch die un-
nuͤtzen Scholaſticos einen ziemlichen
Schand-Flecken und uͤbeln Nahmen be-
kommen/ weil ihr meiſtes Thun in leeren
Grillen und einem aus der Philoſophie/
Jurisprudentz und Theologie zuſammen
geſchmiereten Miſch-Maſche beſtehet.
Allein/ wer weiß/ was Grotius, und her-
nach zufoͤrderſt der Herr von Pufen-
dorff bey dieſem edlen Studio gethan/
wie ſie ſolches von der alten Schulfuͤchſi-
ſchen Barbarey geſaubert/ und nach den
deut-
[]An den Leſer.
deutlichſten und eigentlichen Principiis
derer allgemeinen Natur- und Voͤlcker-
Rechte eingerichtet/ der wird die Judicia,
wonach manche die Moral-Lehrer auf ei-
nen Hauffen zu verdammen pflegen/ oh-
ne Entſetzen nicht anhoͤren koͤnnen. Jch
laſſe den Nutzen und die Unſchuld der
Morale zu einer beſondern Apologie aus-
geſetzet/ kan aber diß gleichwohl ſonder
Schmeicheley/ welche mir ohne dem
nichts helffen wuͤrde/ aus danckbarem
Gemuͤthe von mir ſchreiben/ daß ich mich
dem Herrn Thomaſio mehr deßwegen/
als unſerer nahen Anverwandſchafft und
anderer von ihm genoſſener Wohlthaten
halber verbunden befinde/ weil Er mich
erſtlich zum Studio Morali, und ſonderlich
zu des Hꝛn. v. Pufendorff Schrifften
angefuͤhrt/ deßhalben ich auch den Tag/
da ich ſelbige erſtmahls in die Haͤnde ge-
nommen/ mit beſſerm Grunde vor gluͤck-
lich ruͤhmen kan/ als jener denſelbigen/ da
er erſtmahls des Ariſtotelis Organon zu
Geſichte bekommen. Geehrter Leſer/
urtheile vernuͤnfftig/ und lebe
wohl!

Vorrede
des
Herꝛn von Pufendorff.

WOfern aus der durchgaͤngi-
chen Gewonheit der Ge-
laͤhrten nunmehro nicht
faſt ein Geſetz entſtanden
waͤre/ ſo duͤrffte man mir
es wohl vor ein uͤberflüſſiges/ und unnoͤ-
thiges Werck ausdeuten/ daß ich mich
wegen der Beſchaffenheit und den Ab-
ſehen dieſer Schrifft in einer beſondern
Vorrede herauſſer gelaſſen/ indem es die
Sache vor ſich ſelbſt genugſam auswei-
ſet/ daß ich keinen andern Vorſatz ge-
habt habe/ als nur denen jungen Leuten
die vornehmſten Hauptſtuͤcke der Natuͤr-
lichen Rechte auf eine kurtze/ und verhof-
fendlich deutliche Manier beyzubringen/
damit ſie nicht gleich im Anfange ſtutzig
gemachet wuͤrden/ weñ man ſie ohne der-
gleichen kurtzen Vorbericht in den weit-
(1)laͤuff-
[]Vorrede.
laͤufftigen bezirck dieſer Wiſſenſchafft ein-
fuͤhren wolte. Hiebenebenſt habe auch
vor gut angeſehen/ die Moral- oder Sit-
ten-Lehre nicht nach der bißherigen alten
Leyer/ ſondern auf eine ſolche Art einzu-
richten/ damit die Jugend hernach in
buͤrgerlichen Leben und Wandel einen
rechtſchaffenen Nutzen davon ſpuͤren koͤn-
te. Und ob ich wohl ſonſt iederzeit der
Meinung geweſen/ daß es eine ſchlechte
Ehre ſey/ wenn man anderer/ oder wohl
gar ſeine eigene zuerſt weitlaͤufftig abge-
faßte Schrifften wieder ins Enge brin-
get; So hoffe ich doch/ es werden ver-
ſtaͤndige Leute mirs nicht veruͤbeln/ daß/
(zumaln hierunter auch dem Befehle/
und wohl-gemeinten Anſinnen meiner
hohen Obern ein Genuͤgen geleiſtet wer-
den müſſen) ich vor dismal/ einig und al-
lein der lieben Jugend zum Beſten/ der-
gleichen Arbeit auf mich genommen/
um derer willen man ſich keines Dinges
ſchaͤmen ſoll/ wenn es auch an ſich ſelbſt
noch ſo ſchlecht/ und einiger Ruhm dabey
nicht zu erjagen. Jn uͤbrigen wird kein
vernünfftiger Menſch in Abrede ſeyn
koͤn-
[]Vorrede.
koͤnnen/ daß dergleichen Principia zur
Erlernung der geſamten Jurisprudens
diel beqvemer ſeyn/ als alle die andern/
dahin man gemeiniglich unſere Jugend/
wenn ſie den Anfang zur Rechts-Ge-
lehrſamkeit machen wil/ zu verweiſen
pfleget. Und ſo viel ſolte vor dismal an
ſtatt der Vorrede genung ſeyn/ wofern
nicht/ auf guter Freunde Zurathen/ vor
nuͤtzlich waͤre befunden worden/ zuvor-
hero/ ehe ich zum Zweck ſchreite/ noch
ein und anders anzufuͤhren/ welches
uͤberhaupt zu deſto genauerer Erkaͤntniß
der Natuͤrlichen Rechte/ und zu eigent-
licher Abſteckung derer Graͤntzen/ wo-
mit ſie etwan an andere Diſciplinen an-
ſtoſſen/ dienlich ſeyn kan. Welches ich
denn um deſto ſo viel williger uͤber mich
genommen habe/ weil ich hiedurch
Gelegenheit bekommen/ denen jenigen
Sraͤnckern das Handwerck zu legen/
welche unter den nichtigen Vorwandt/
als ob dieſe Diſciplin mit in ihre Profeſ-
ſion lieffe/ ſich allerhand ungeſchickter
Cenſuren unterfangen/ da ſich doch zwi-
ſchen beyderſeits in wahrheit eine ſehe
(2)groſſe
[]Vorrede.
groſſe Klufft befindet. Demnach ſo ſind
gleichſam drey unterſchiedene Qvel-
len/ daraus die Menſchen die Erkaͤnt-
niß ihrer Schuldigkeit/ und alles deß-
jenigen/ ſo ſie in dieſem Leben entwe-
der/ als was loͤbliches zu thun/ oder/
als was ſchaͤndliches zu unterlaſſen ha-
ben/ ſchoͤpffen muͤſſen; Nemlich ihr
natuͤrlicher Verſtand/ die buͤrger-
lichen Geſetze/ und endlich das
geoffenbarte Wort GOttes. Aus
den erſten fluͤſſet die allgemeine Schul-
digkeit der Menſchen herfür/ dadurch
ſie ſich in der menſchlichen Geſellſchafft
gegen einander wohl zu verhalten lernen;
Aus der andern die jenige Gebuͤhr/ die
ein iedweder/ als ein Buͤrger und Glied-
maß einer gewiſſen Republiqve zu beob-
achten hat; Aus den dritten aber/ das
Amt und Pflicht wahꝛer und rechtſchaffe-
ner Chriſten. Daher entſtehē auch drey
unterſchiedeneDiſciplinē deren die
erſte handelt von dem natuͤrlichen
Rechte/ und gehet alle Menſchen und
Voͤlcker an; Die andere von den buͤr-
gerlichen Geſetzen einer ieden Re-
pu-
[]Vorrede.
publiqve, und die kan ſo mancherley
ſeyn/ als viel man Republiqven an-
trifft/ darein ſich das menſchliche Ge-
ſchlechte vertheilet hat. Die dritte wird
genennet die Theologia moralis, oder
die von GOtt geoffenbarete Sit-
ten-Lehre/ welche von den andern
Theile der heiligen Theologie, worinnen
die Glaubens-Articul enthalten ſind/
wohl zu unterſcheiden iſt. Jedwede von
dieſen dreyen Diſciplinen braucht eine
beſonderne/ und zwar ſolche Art/ ihre
Lehr-Setze zu behaupten/ die ihrem
Principio gemaͤß iſt. Jn den natuͤrli-
chen Rechten werden wir etwas zu
thun/ oder zu unterlaſſen angewieſen/
weil man aus der geſunden Ver-
nunfft abnehmen kan/ daß es zu Nutz
und Aufnehmen der menſchlichen Ge-
ſellſchafft gereiche. Fraget man in buͤr-
gerlichen Geſetzen/ warum dis oder
jenes alſo verordnet worden? So laͤufft
es endlich alles darauf naus: Es habe
den Geſetz-Geber ſo/ und nicht
anders gefallen. Jn der Theologia
morali kan man weiter nicht kommen/
(3)als
[]Vorrede.
als daß man es gleichfalls bey den goͤtt-
lichen Willen und Verordnung be-
wenden laͤſſet. Gleich wie aber die buͤr-
gerlichen Geſetze das Natuͤrliche Recht/
als eine allgemeine und viel weitlaͤuffti-
gere Diſciplin præſupponiren/ alſo muß
man nicht flugs gedencken/ daß/ wenn
etwas in denen buͤrgerlichen Geſetzen ent-
halten iſt/ davon die Natürlichen Rechte
nichts melden/ dieſe deßwegen wider je-
ne lauffen muͤſten. Gleicher geſtalt/ weñ
in der Theologiâ morali ein und anders
aus goͤttlicher Offenbarung kund gethan
wird/ darauf ſich unſere Vernunfft von
ſich ſelbſt nicht finden kan/ und alſo auch
das Jus Naturæ, als eine Philoſophi-
ſche Diſciplin, nichts davon weiß; So
waͤre es ſehr ungeraͤumt/ wenn man die-
ſe beyden Diſciplinen deßwegen zuſam-
men hetzen/ und eine Streitigkeit unter
ihnen geſtatten wolte. Hinwiederum/
wenn man in der Lehre von natuͤrlichen
Rechten/ nach Gutbefindung unſerer
Vernunfft/ ie zuweilen etwas præſup-
poniret/ ſo muß es demjenigen/ was
etwa die heilige Schrifft disfalls deutli-
cher
[]Vorrede.
cher und klaͤrer berichtet/ keinesweges/
als etwas ſtreitiges/ entgegen geſetzet/
ſondern/ ſo lange man dieſe Diſciplin
auf Philoſophiſche Art tractiret/ und
der bloſſen Vernunfft folget/ von der
heiligen Schrifft abſtrahiret werden.
Zum Exempel/ man bildet ſich in der
Lehre der natuͤrlichen Rechte den Zu-
ſtand des jenigen Menſchen/ der etwa
zu erſt auf der Welt geweſen/ (er ſey
nun/ wer er wolle;) auf ſolche maſſe ein/
wie wir/ unſerer bloſſen Vernunfft nach/
ermeſſen moͤgen/ daß er muͤſſe ſeyn be-
ſchaffen geweſen/ und koͤnnen uns ſol-
chen in Wahrheit anders nicht/ als elen-
de und duͤrfftig vorſtellen/ indem er
in die wuͤſte Welt ausgeſetzet worden/
und in derſelben das geringſte Vergnuͤ-
gen und Beqvemligkeit/ ſo einig und al-
leine von der menſchlichen Geſellſchafft
herruͤhret/ nicht empfinden koͤnnen. Da-
fern nun iemand dieſe Philoſophiſche
Speculation derjenigen Nachricht/ ſo
das Wort GOttes von der Gluͤckſelig-
keit des im Paradies erſchaffenen erſten
Menſchen/ des Adams/ weit anders
(4)geof-
[]Vorrede.
geoffenbaret/ entgegen ſetzen/ und vor-
geben wuͤrde/ man haͤtte dis durch jenes
aufheben wollen/ ſo muͤſte man es ge-
wißlich vor eine Beſchuldigung boshaff-
tiger/ oder unverſtaͤndiger Leute halten.
Was nun die buͤrgerlichen Geſetze anbe-
langet/ ſo ſcheinets/ daß dieſe ſich wohl
leichte mit denen Natuͤrlichen Rechten
vertragen ſollen; Allein das wil was
muͤhſamer ſeyn/ daß man zwiſchen dem
Jure Naturæ, und der Theologiâ mo-
rali die Grentzen richtig abzeichne/ und
den genauen Unterſcheid dieſer beyden
recht eigendlich ausmache. Jch wil mei-
ne Gedancken hieruͤber kuͤrtzlich eroͤff-
nen/ iedoch ſonder Anmaſſung einer Di-
ctatoriſchen Gewalt/ oder Paͤbſtiſchen
Infallibilität; denn ich eben ſo wenig/
als andere Leute/ vor allen J [...]ꝛthuͤmern
geſichert bin/ habe mich auch keiner
Weisheit aus Goͤttlicher Offenbarung/
oder vielmehr unvernuͤnfftigen und
phantaſtiſchen Antrieb einer ſonderbaren
Erleuchtung zu ruͤhmen; ſondern was
ich disfalls thue/ geſchicht bloß/ meinen
Amte und Pflicht/ nach Vermoͤgen/ ei-
ni-
[]Vorrede.
niges Genügen zu leiſten. Und wie ich
nun rechtſchaffener/ gelaͤhrter Leute Er-
innerungen hieruͤber gern anzuhoͤren/
auch meine Meinung/ dafern es iemand
beſſer weiß/ ſonder einigen Verdruß
zu aͤndern gantz willig und bereit bin/ als
werde ich hingegen derer jenigen neidiſche
und vorwitzige Urtheile wenig achten/
die ſich in Sachen/ ſo ſie gantz nichts an-
gehen/ und davon ſie eben ſo wenig Ver-
ſtand haben/ als der Blinde von der
Farbe/ zu unerbetenen Richtern auf-
werffen moͤchten. Es entſtehet demnach
der erſte Unterſcheid dieſer beyden
Diſciplinen/ nemlich derMoral-
Theologie,und der natuͤrlichen
Rechte daher/ daß ſie ihre Lehr Saͤtze
nicht von einerley Principio, ſondern/
wie bereits erwehnet/ gleichſam aus un-
terſchiedenen Qvellen herleiten/ jene
nemlich aus der Offenbarung/ dieſe aber
aus der Vernunfft. Daraus denn noth-
wendig folget/ daß/ wenn uns die heili-
ge Schrifft etwas zu thun/ oder zu unter-
laſſen anbefiehlet/ darauf ſich unſere
Vernunfft von ſich ſelbſt nicht finden
(5)kan/
[]Vorrede.
kan/ ſelbiges auch nicht dem Juri Natu-
ræ, ſondern der Theologiæ morali zu-
ſtehe. Weiter/ ſo muß man die in
GOttes Wort geoffenbarten Geſetze
auf ſolche Weiſe betrachten/ alsfern ih-
nen eine Goͤttliche Verheiſſung mit an-
gehaͤnget iſt/ und ſie alſo zwiſchen GOtt
und Menſchen/ auf gewiſſe maſſe/ einen
Bund machen. Dieſer Betrachtung
enthaͤlt ſich das Jus Naturæ, ſintemal
ſie blos aus GOttes ſonderbaren Offen-
barung her entſtehet/ welche die Ver-
nunfft aus eignen Kraͤfften nicht ergrün-
den kan. Ferner/ ſo machet auch dieſes
noch einen hauptſaͤchlichen Unterſcheid/
daß die Diſciplinder natuͤrlichen
Rechte ihr Abſehen blos auf die-
ſes zeitliche Leben/ und deſſen
Wohlſtand richtet/ und einen Men-
ſchen nur ſo weit unterweiſet/ daß er ſich/
als ein loͤbliches und nuͤtzliches Gliedmaß
der menſchlichen Geſellſchafft bezeugen
koͤnnen. Hingegen iſt die Theologia
moralis, oder die Gebote GOttes da-
mit nicht zu frieden/ ſondern dieſe wei-
ſen einen Menſchen zufoͤrderſt dahin an/
wie
[]Vorrede.
wie er einen rechten/ GOtt wohlgefaͤlli-
gen Chriſten-Wandel fuͤhren ſolle; Da
er den nicht allein darauf zu dencken hat/
wie er in der Welt ehrlich und tugend-
hafft leben/ ſondern zufoͤrderſt/ wie er
auch dermaleinſt in der Ewigkeit die
Fruͤchte ſeiner Gottſeligkeit genieſſen
wolle/ daß er alſo ſeinen Wandel und
Buͤrgerrecht ſchon in Himmel hat/ in
der Welt aber nur/ als ein Pilgram/ noch
herumer walle. Deñ obgleich derer Men-
ſchen Gemuͤther auch von Natur nach
der Unſterbligkeit ſehr begierig ſeyn/ und
ſich vor ihrer Vernichtung hefftig ent-
ſetzen/ weßwegen auch die meiſten Hey-
den der Meinung geweſen/ daß die See-
le/ nach dem ſie von dem Leibe abgetren-
net/ irgendswo verbleiben muͤſſe/ allda
es denen Frommen wohl/ denen Gottlo-
ſen aber uͤbel ergienge; So muß doch die
wahre und unfehlbare Verſicherung deſ-
ſen einig und allein aus den geoffenba-
reten Worte GOttes geſchoͤpffer wer-
den. Dieſer Urſachen halber muß die Di-
ſciplin der natuͤrlichen Rechte auch nur
nach den menſchlichen Foro eingerichtet
(6)wer-
[]Vorrede.
werden/ welches ſich denn nicht welter/
als auf dieſes zeitliche Leben erſtrecket;
Und thun die jenigen gar unrecht/ wel-
che ſie in vielen Stuͤcken nach dem Goͤtt-
lichen Gerichte accommodiren wollen/
da doch dieſes eigendlich der Theologiæ
morali, und ihren Geſetzen zukoͤmmet,
Hieraus folget nun/ daß/ weil die
menſchlichen Gerichte nur mit den aͤuſ-
ſerlichen Wercken zu thun haben/ oder
die Menſchen nur Richter der aͤuſſerli-
chen Wercke ſeyn/ was aber innerlich/
und im Hertzen verborgen bleibet/ nicht
erforſchen koͤnnen/ es muͤſte ſich denn
etwan durch einige Wuͤrckung/ oder aͤuſ-
ſerliche Anzeigung verrathen; So ſie-
het das Jus Naturæ zu foͤrderſt auch nur
darauf/ wie es die aͤuſſerlichen Actio-
nen der Menſchen wohl einrichten moͤge.
Allein daran hat die Theologia moralis
noch lange nicht genung/ ſondern ſie wil
vornemlich/ daß auch das Gemuͤthe/
und deſſen innerliche Regungen nach den
Willen und Wohlgefallen des groſſen
GOttes recht beſchaffen ſeyn/ und ver-
wirfft demnach alle dasjenige/ ſo zwar
aͤuſ-
[]Vorrede.
aͤuſſerlich den Schein eines tugendhaff-
ten Wandels hat/ innerlich aber von
einen unreinen und unheiligen Urſprun-
ge herruͤhret. Und dis ſcheinet/ ſey auch
die Urſache/ warum in der Heil. Schrifft
nicht ſo offt von denenjenigen Verbre-
chen und Laſtern gehandelt wird/ welche
die Menſchen in ihren Gerichten ab-
ſtraffen/ und daruͤber ſie ſelbſt Urtheil
und Recht ſprechen koͤnnen/ als von de-
nenjenigen/ welche (wie der weiſe Se-
neca an einem Orte redet/) extra tabu-
las publicas, und auſſer denen oͤffentli-
chen Geſetz-Buͤchern zu befinden ſeynd/
wie denn ein ieder leicht ermeſſen kan/
welcher die daſelbſt enthaltenen Gebote
und Tugenden genau betrachtet. Wie-
wohl keinesweges zuleugnen iſt/ daß die
Moral-Theologiehie benebenſt auch
das buͤrgerliche Tugend-Leben treflich be-
foͤrdere/ indem die wahren Chriſten-
Tugenden der Menſchen Gemuͤther zu
Unterhaltung der menſchlichen Geſell-
ſchafft ſehr geſchickt machen/ wie wir an-
derswo weiter erweiſen. Und ingegen-
theil/ wenn man einen ſiehet/ der ſich/
(7)als
[]Vorrede.
als ein unruhiges Glied/ in den Coͤrper
der buͤrgerlichen Geſellſchafft bezeuget/
ſo kan man ſicherlich darvon urtheilen/
daß er auch die Religion nur in Munde
fuͤhre/ das Hertz aber gantz nichts dar-
von wiſſe. Hieraus wird nun verhoffend-
lich nicht allein der eigendliche Unter-
ſchied zwiſchen der Theologia morali,
und dem Juræ Naturæ, nach der Art/
als wir uns ſolches recht univerſal,
nach dem Captu aller Menſchen/ und aus
bloſſen Philoſophiſchen Principiis ab-
zuhandeln vorgenommen haben/ genung-
ſam zu erſehen ſeyn; ſondern auch/ wie
daß die Natuͤrlichen Rechte denen Lehr-
Saͤtzen der geoffenbarten Theologie im
geringſten nicht widerſtreben/ ſondern
ſich nur allein etzlicher/ der Offenbarung
und denen Chriſten zuſtehenden/ Wiſ-
ſenſchafften enthalten/ weil dieſelbigen
durch die bloſſe Vernunfft nicht koͤnnen
ausgegruͤbelt werden. So iſt nunmehro
aus angefuͤhrten ferner auch leichte ab-
zunehmen/ wie nothwendig es ſey/ daß
der Menſch in dieſer unſererDi-
ſciplinder natuͤrlichen Rechte
nicht
[]Vorrede.
nicht nach dem laͤngſt verſchwun-
denen/ und blos uns Chriſten be-
kañten Stande der Unſchuld/ ſon-
dern ſeinen itzigen Zuſtande/ und
der verderbten Natur nach be-
trachtet werden muͤſſe/ nemlich
ſo fern/ als er von boͤſen Begier den
eingenommen/ und gleichſam an-
gefuͤllet iſt. Denn es wird zwar nie-
mand/ auch der aller-blindeſte Heyde/
ſo tum und ſo albern nicht ſeyn/ daß er
die ungeziemenden und boͤſen Reitzungen
nicht bey ſich verſpuͤren ſolte; Allein/
wer wolte doch wohl wiſſen/ daß eben
der erſte Menſch an ſolchem Aufſtande
der Affecten Schuld hat/ wenn es uns
Chriſten die heilige Schrifft nicht inſon-
derheit geoffenbaret haͤtte? Weil man
denn nun in der Diſciplin der natuͤrli-
chen Rechte nicht weiter gehen ſoll/ als
unſere Vernunfft von ſich ſelbſt kommen
kan/ ſo iſt leicht zu ermeſſen/ daß man
auch den Stand der Unſchuld zu deroſel-
ben Erklaͤrung nicht mit zuziehen dürffe;
Zumaln da gewiß iſt/ daß auch der Al-
lerweiſeſte GOtt ſelbſt/ indem Er den
De-
[]Vorrede.
Decalogum meiſtentheils in Præceptis
negativis, oder in Verboten abgefaſ-
ſet/ den Statum corruptum, oder die
verderbte Natur der Menſchen vor Au-
gen gehabt habe. Zum Exempel das
erſte Geſetz/ darinnen die Abgoͤtterey
verboten iſt/ præſupponiret einen ſol-
chen Zuſtand/ darinnen die Menſchen
zu dergleichen Suͤnde geneiget geweſen.
Jm Stande der Unſchuld/ da ſie/ mit
der voͤlligen GOttes Erkaͤntniß erleuch-
ter/ ſich mit GOTT allezeit unterreden
konten/ ſehe ich nicht/ wie es moͤglich ge-
weſen waͤre/ daß ſie ſich/ an ſtatt des wah-
ren GOttes/ etwas anders/ und falſches
haͤtten erdichten koͤnnen/ um ſolches
hernach entweder vor dem wahren GOtt
ſelbſt/ oder doch nur nebenſt demſelben
anzubeten/ oder zu glauben/ daß ſolch
erdichtetes Ding Goͤttliche Macht und
Gewalt habe. Und alſo waͤre es nicht
vonnoͤthen geweſen/ denen Menſchen/
nach damaliger Beſchaffenheit/ ein ſolch
Verbot vorzuſchreiben: Du ſolt nicht
andere Goͤtter haben; ſondern es
haͤtte ihnen nur ſchlechter Dinges Præ-
ceptô
[]Vorrede.
ceptô affirmativô dürffen anbefohlen
werden/ daß ſie GOtt/ ihren und der
gantzen Welt wohlerkañten Schoͤpffer
lieben/ ehren/ und anbeten ſolten. Eben-
falls iſt es auch mit dem andern Ge-
ſetze bewandt. Denn warum haͤtte de-
nenjenigen im Stande der Vollkom-
menheit durch ein Verbot ſollen unter-
ſaget werden/ GOtt zu laͤſtern/ die
doch ſeine heilige Majeſtaͤt und groſſe
Wohlthaten erkanten/ die keine boͤſe Be-
gierden anreitzeten/ und deren Gemuͤ-
ther in den von GOtt ihnen angewieſe-
nen Zuſtande geruhig verharreten? Wie
haͤtten dieſe auf eine ſolche Unſinnigkeit
gerathen koͤnnen? Alſo haͤtte man ſie
nur durch ein bloſſes Gebot erinnern
duͤrffen/ daß ſie den Nahmen GOt-
tes ehren moͤgten. Allein mit den
dritten und vierdten hat es eine an-
dere Bewandniß. Denn weil dieſelbi-
gen Gebots-weiſe abgefaſſet ſeynd/ und
die verderbte Natur nicht eben nothwen-
dig præſupponiren/ ſo koͤnnen ſie ſo
wohl vor/ als nach den Falle/ ſtatt finden.
Was aber die uͤbrigen Decalogiſchen
Ge-
[]Vorrede.
Geſetze anbelanget/ die nicht GOTT/
ſondern unſern Nechſten betreffen/ ſo
iſt die Sache gleichfalls klar. Denn da
dürffte GOTT dem Menſchen zu der
Zeit/ als er noch in der anerſchaffenen
Vollkommenheit lebete/ nur ſchlechter
Dinges befohlen haben/ daß er ſeinen
Nechſten lieben ſolte/ worzu er oh-
ne dem von Natur inclinirete. Allein/
wie haͤtte ihm damals koͤnnen verboten
werden/ nicht zu toͤdten/ zu der Zeit/
da der Tod noch keinen Menſchen uͤber-
fiele/ ſindemal derſelbe allererſt durch die
Suͤnde in die Welt gekommen iſt? Nun-
mehro aber/ und nach dem klaͤglichen
Suͤnden-Falle/ brauchet es des Verbo-
tes mehr als zu ſehr/ da/ an ſtatt der Lie-
be/ ein ſolcher Haß und Feindſeligkeit un-
ter denen Menſchen eiugeriſſen iſt/ daß
auch ihrer viel nicht allein Unſchuldige/
ſondern auch ihre beſten Freunde und
Gutthaͤter/ aus bloſſen Neid/ um ihre
Wohlfahrt zu bringen/ und ihr vergaͤl-
letes und unruhiges Beginnen noch wol
mit dem Deck-Mantel eines guten Ge-
wiſſens zuverſtellen/ kein Bedencken
tra-
[]Vorrede.
tragen. Ferner/ was waͤre es noͤthig gewe-
ſen/ den Ehebruch unter ſolchē Ehleu-
ten zu verbieten/ die einander mit ſo gar
bruͤnſtiger und unverfaͤlſchter Liebe waͤ-
ren zugethan geweſen? Oder/ warum
haͤtte man den Diebſtahl unterſagen
ſollen/ da doch kein Geitz und kein Man-
gel zu ſpuͤren geweſen/ und da niemand
das jenige vor ſein Eigenthum wuͤrde ge-
halten haben/ womit er den andern haͤt-
te dienen koͤnnen? Weßwegen ſolte der
groſſe GOTT zu der Zeit ein Verbot auf
die falſchen Zeugniſſe geleget haben/
da noch niemand (wie heutiges Tages)
in Schaͤnden und Schmaͤhen eine Ehre
wuͤrde geſuchet haben? Schicken ſich al-
ſo die Worte des klugen Taciti wohl hie-
her: Es hingen die Leute vor Al-
ters (im Stande der Unſchuld) ihren
boͤſen Begierden nicht ſo nach/
wie heutiges Tages/ ſondern ſie
lebten ehrlich und aufrichtig/
und brauchte es dannenhero bey
ihnen keiner Straffe. Denn weil
ſie nichts Unrechtes verlangten/
ſo durften ſie ſich auch keiner har-
ten
[]Vorrede.
ten Verbote oder Geſetze befuͤrch-
ten. Wenn man dieſes nun recht ver-
ſtehet/ ſo werden wir leicht einen groſſen
Zweifel abhelffen koͤnnen/ nemlich/ ob
denn ein Unterſcheid ſey zwiſchen
dem natuͤrlichen Geſetze vor/ und
nach dem Suͤnden-Falle/ oder/ ob
es in beyden Zeiten mit denſelben
einerley Beſchaffenheit wuͤrde ge-
habt haben? Darauf mit wenigem
zu antworten iſt/ daß die vornehm-
ſten Hauptſtuͤcke dieſes Geſetzes al-
lendhalben einerley ſeyn/ hingegen er-
eignet ſich wegen des veraͤnderlichen Zu-
ſtandes der Menſchen vor/ und nach dem
Falle in vielenParticulier-Geſetzen
ein mercklicher Unterſcheid. Oder/ daß
ich was eigendlicher rede: Es muß ei-
nerley Jnhalt des natuͤrlichen Geſetzes
durch unterſchiedliche (iedoch nicht con-
traire, oder wider einander-lauffende)
Special-Geſetze erklaͤret werden/ nach-
dem der Menſch/ dem ſolche angehen/
bald ſo/ bald wiederum anders beſchaf-
fen geweſen. Den Jnhalt des gan-
tzen natuͤrlichen Geſetzes ſchluͤſſet
un-
[]Vorrede.
unſer Heiland in dieſe zwey Stuͤcke ein:
Liebe GOtt/ und liebe den Nech-
ſten. Darinnen iſt das gantze Jus Na-
turæ enthalten/ ſo wohl im Stande der
Vollkommenheit/ als auch der Un-
vollkommenheit/ ohne nur/ daß in je-
nen entweder gar keiner/ oder doch nur
ein ſehr geringer Unterſcheid war unter
dem Jure Naturæ, und der Theologiâ
morali. Denn auch die Liebe gegen dem
Nechſten kan gar fuͤglich durch die Socia-
lität, oder Zuneigung zur menſch-
lichen Geſellſchaffs/ welche wir
zum Fundament der Natuͤrlichen Rechte
brauchen/ verſtanden werden. Allein/
wenn man dieparticulier und einze-
len Geſetze nach einander anſiehet/ ſo
findet ſich ein groſſer Unterſchied/ ſo wohl
in denen Geboten/ als auch Verbo-
ten. Und zwar/ was anbelanget die
Gebote/ ſo gibts deren viel in dem itzi-
gen Suͤnden-Stande/ die im Stande
der Unſchuld gar nicht haͤtten ſeyn koͤn-
nen/ theils/ weil ſie eine ſolche Verrich-
tung oder Handlung præſupponiren/
welche in jenem gluͤcklichen Zuſtande
nicht
[]Vorrede.
nicht wuͤrde ſeyn zu finden geweſen;
theils auch/ weil vor etzlichen Jammer
und Kummer/ Noth und Tod vorher ge-
hen muß/ ehe ſie koͤnnen erfuͤllet werden/
wovon man denn zur ſelbigen Zeit eben-
falls nichts gewuſt haͤtte. Zum Exem-
pel/ es befiehlet itzo das Recht der Na-
tur mit iederman im Handel und Wan-
del ehrlich zu verfahren/ rechte Elle/
Maß und Gewichte zu gebrauchen/
Schulden zu rechter Zeit zu bezahlen/ [...].
Alleine das iſt noch nicht ausgemachet/
ob man im Stande der Unſchuld derglei-
chen Handel und Wandel/ wie heutiges
Tages/ wuͤrde getrieben/ oder Geld ge-
brauchet haben. Gleichergeſtalt/ wenn
im Stande der Unſchuld keine Republi-
qven und weltlich Regiment aufkom-
men waͤre/ ſo haͤtte man auch der Geſe-
tze/ ſo hierzu erfordert werden/ nicht be-
durfft. Heute wil das Recht der Natur
haben/ daß man den Nothduͤrfftigen und
Elenden zu Huͤlffe komme/ und die Witt-
ben und Waiſen in Schutz nehme. So-
fern nun gar kein Menſch weder Un-
gluͤck/ noch Armuth/ noch den Tod zu
be-
[]Vorrede.
befahren gehabt haͤtte/ ſo waͤre es ja ver-
gebens geweſen/ deßhalben einige Ge-
ſetze zu geben. Wir ſollen/ nach Erhei-
ſchung der Natuͤrlichen Rechte/ zur Ver-
ſoͤhnligkeit und zum Frieden/ wie auch
unſern Beleidigern das zugefuͤgte Un-
recht zu vergeben und zu vergeſſen/ wil-
lig und geneigt ſeyn. Was haͤtte es aber
deſſen bey denenjenigen bedurfft/ die von
ſelbſt auf die liebreiche Erhaltung des
Bandes menſchlicher Geſellſchafft einig
und allein befliſſen waren? Und eben ſol-
che Bewandniß hat es auch mit denen
Verboten/ welche eigendlich unter die
Natuͤrlichen/ und nicht etwa zu denen
Poſitiv-Geſetzen gehoͤren. Denn ob-
gleich ein jedweders Gebot folglich/
und ſeiner Wuͤrckung nach/ auch das
Gegentheil verbietet/ (als weñ GOtt
befiehlet den Nechſten zu lieben/ ſo
verbeut ER eben dadurch im Gegen-
theil alle das jenige/ was ſolcher Liebe zu
wider iſt) ſo waͤre es doch uͤberfluͤſſig und
vergebens geweſen/ in dem Stande der
Unſchuld ein dergleichen Verbot mit
ausdruͤcklichen Worten zu dictiren/ all-
wo
[]Vorrede.
wo gantz keine Luſt und Begierde nach
ſolchen boͤſen und feindſeligen Dingen zu
vermuthen war. Es kan auch zu deſſen
Erlaͤuterung dienen/ daß der weiſe Ge-
ſetz-Geber Solon in ſeinen Geſetzen
keine Straffe vor die Vater-Moͤrder
verordnen wollen/ weil er ſich nicht
einbilden koͤnnen/ daß ein Kind an ſei-
nen Eltern eine ſolche abſcheuliche That
veruͤben würde. Dieſen iſt nicht ungleich/
was Franc. Lopez. de Gomora, Hiſt.
Gent. Ind. Occident. cap. 207. von
gewiſſen Voͤlckern in Nicaragua erzeh-
let/ daß bey ihnen keine Straffe darauf
geſetzet worden/ wenn einer ihren Caci-
qve, oder Koͤnig umbringen wuͤrde/ weil
ſie davor gehalten/ es wuͤrde niemals
kein Unterthan an eine ſo grauſame That
gedencken/ geſchweige denn dieſelbe voll-
bringen. Die Sache iſt nunmehro ver-
hoffendlich ſo klar/ daß ich mich ſelbſt
ſchaͤme/ ſie weiter auszufuͤhren. Doch
wil ich zum Uberfluß/ und junger Leute
wegen/ nur noch dieſes hinzufuͤgen. Jch
ſetze den Fall/ daß einen zwey Knaben
zur Information waͤren anvertrauet
wor-
[]Vorrede.
worden/ iedoch beyde von gantz unglei-
cher Art; Deren einer ſittſam/ hoͤflich/
und ſehr begierig zum Studiren; Der
andere hingegen liederlich und muthwil-
lig/ der mehr von galaniſiren/ als von
Buͤchern hielte. Beyde haben ſie einer-
ley Pflicht auf ſich/ nemlich/ daß ſie
fleiſſig ſtudiren ſollen. Allein ſie brau-
chen zweyerley Zucht und Geſetze. Den
erſten darff man nur ſchlechter Din-
ges ſagen/ was er thun/ wenn und
wie er ſeine Studia angreiffen ſoll. Den
andern aber muß man unter ernſt-
licher Bedrohung verbieten/ daß
er nicht herum lauffe/ daß er nicht ſpie-
le/ daß er die Buͤcher nicht verkauffe/
daß er ſich in ſeinen Exercitiis keinen an-
dern helffen laſſe/ daß er nicht den Frau-
enzimmer und Sauffen nach gehe. Weñ
man nun dis den erſten und wohlgezoge-
nen Knaben vorſagen/ und immer ein-
blaͤuen wolte/ ſo wuͤrde er wohl bitten/
daß man ihm doch darmit verſchonen/
und es vielmehr denenjenigen vorhalten
moͤgte/ die der gleichen beduͤrffen. Hier-
aus kan man nun Handgreiflich abneh-
(11)men/
[]Vorrede.
men/ daß dasJus Naturægar eine
andere Geſtalt und Form wuͤrde
haben muͤſſen/ wenn man ſich ſol-
ches nach dem Stande der Un-
ſchuld einbilden wolte. Und/ nach-
dem alſo der Unterſcheid zwiſchen dieſer
Diſciplin, und der morali Theologiâ ge-
nau angemercket wordẽ/ ſo wird man ihr
verhoffendlich eben dasjenige Recht auch
goͤnnen/ welches ſonſt die buͤrgerliche
Jurisprudens, die Medicin, die Phy-
ſic, die Matheſis, und andere derglei-
chen Wiſſenſchafften haben. Denn/
wenn irgend ein Pfuſcher nach ſeinen eig-
nen Vorwitz und Gutduͤncken darinnen
ſtoͤhren/ oder allzu-naſenweiſe davon ju-
diciren wil/ ſo wird er auf die Finger
geklopffet/ und mit derjenigen Antwort
abgefertiget/ die jener/ ſeines unzeitigen
Urtheils halben/ von den Apelle anhoͤ-
ren muſte/ nemlich/ er ſolte doch
ſtilleſchweigen/ und von einem
Dinge nicht reden/ wenn er es
nicht verſtuͤnde/ damit ihn ſeine
Lehr-Jungen nicht auslachten.
Mit ehrlichen und verſtaͤndigen Leuten
hoffe
[]Vorrede.
hoffe ich wohl auszukommen; Was
aber ungelaͤhrte Neidhaͤmmel und Miſ-
goͤnner ſind/ die moͤgen ſich meinet-
halben/ uͤber ihrer Thorheit und Opi-
niaſtreté wohl gar die Koͤpffe einſtoſſen/
ſintemal es doch nimmermehr zu hoffen
ſtehet/ daß der Wolff ſeine Duͤcke/
und der Mohr ſeinen ſchwartzen
Balg veraͤn-
dere.

Des
Herꝛn von Pufendorff
Erſtes Buch/
Von der
ſchuldigen Gebuͤhr
aller Menſchen.