Jn JESU Namen. Amen.
Von dem frieden GOttes oder
geiſtlichen frieden
Vorrede
An alle Kinder deß Friedens.
Liebſte Bruͤder und Schweſtern in
unſerem Friedenfuͤrſten JEſu.

ES ſind faſt merckwuͤrdige
worte/ mit welchen unſer liebſte
Heyland gerad vor dem antritt
ſeines leidens die letzte ſeine pre-
digt an ſeine liebe Juͤnger Jo-
han. 16/ 33. beſchloſſen/ und ſo bald darauff in
dem folgenden Capitel ſich zu ſeinem Himmli-
ſchen Vatter in dem gebet gewendet hat: Sol-
ches habe ich mit euch geredet/ daß ihr
in mir friede habet. Jn der welt habt ihr
angſt/ aber ſeyd getroſt/ ich habe die welt
uͤberwunden. Er erinnert uns 1. unſeres zu-
ſtands in der welt: da haben wir angſt/ und
eine ſolche angſt/ die dem friedē entgegen ſteeht/
daher einen unfrieden und kampff in ſich faſſet/
Amit
[2] mit welchem die welt und dero Fuͤrſt uns angreif-
fet/ und das leben ſauer macht. Ach ja freylich/
angſt und unfriedens gnug in der welt! Auß-
wendig ſtreit/ inwendig forcht/ heiſſet das
Symbolum des treuen ſtreiters JEſu Chriſti des
lieben Pauli/ 2. Cor. 7/ 5. Von dem auch jeglicher
unter uns ſo viel mehr erfahren und koſten muß/
als ihn der HERR auch in andern jenem Apoſtel
naͤher und gleicher zu werden wuͤrdiget. Wir
fuͤhlen unfrieden in uns ſelbſten/ und ſehen ein
ander geſetz in unſern gliedern/ daß da
widerſtreitet dem geſetz in unſerem ge-
muͤth/ und nimmet uns gefangen in der
ſuͤnden geſetz/ welches iſt in unſern glie-
dern. Rom. 7/ 21. Da gehets wahrhafftig
nicht ruhig her/ wann das fleiſch geluͤſtet
wider den geiſt/ und der geiſt wider das
fleiſch/ und dieſelbige widereinander
ſind/ das wir nicht thun was wir wollen.
Gal. 5/ 17. Ob dann ſchon der geiſt den frieden ſu-
chet/ und lieber ſtaͤts in ſeinem GOtt ruhete/ ſo
muß er gleichwol an den kampff/ und ſo wol des
fleiſches ſtreit gegen ſich empfinden/ als ſeiner-
ſeits ſich ſelbſten demſelben maͤchtig entgegen
ſetzen/ daruͤber ſeine ruhe nicht wenig verſtoͤhret
wird. Es aͤngſten auch die begangene ſuͤnden/ und
der durch dero erinnerung in uns empfindlich
entbrennende Zorn GOttes/ da ſeine troͤſtungen
nicht ſo bald denſelben widerum beſaͤnfftigen/ die
bußfertige ſeele/ daß es auch dann und wann mit
David heiſſet Pſal. 38/ 4. Es iſt kein fried in
meinen geheinen fuͤr meinerſuͤnde. Und
v. 9. Jch
[3] v. 9. Jch heule vor unruhe meines her-
tzens. Kommet es an euſſerliches leiden/ ſo will
das gemůth ſich nicht ſo gleich geben/ noch kan
ſich darein finden/ daß es ſich mit goͤttlichem willen
vergnuͤgte/ und alles was demſelben gefaͤllet/ ſich
gleichermaſſen ſtracks gefallen lieſſe/ ſondern es
gehet etwa ein kampff vorher biß der geiſt das un-
gedultige fleiſch unter ſich und zur ruhe bringet.
Es heiſſet abermal bey einem David Pſalm. 42/
12. Was betruͤbſtu dich meine ſeele/ und
biſt ſo unruhig in mir? Harre auff Gott/
denn ich werde ihm noch dancken/ daß Er
meines angeſichts huͤlffe/ und mein Gott
iſt. Heiſſet es von den welt kindern/ und dero
zeitlichen ſorgen/ damit ſie ſich martern Pſalm.
39/ 7. Sie machen ihnen viel vergeblicher
unruhe/ ſie ſamlen/ und wiſſen nicht/ wer
es kriegen wird: ſo iſt auch bey den Juͤn-
gern des HERRN das zu aͤngſtlichen ſorgen ge-
neigte fleiſch/ welches bey jenen ſolchen unruhe
urſach iſt/ noch nicht ſo voͤllig todt/ daß es nicht
unruhige gedancken machte/ denen widerſtanden
werden/ und es alſo neue unruhe geben muß.
Jetzo nicht zuſagen/ wo der HERR ſelbſten ſich
in einen grauſamen verwandelt/ und gegen die
ſeelen/ die er liebet/ eine feindliche geſtalt annim-
met/ und faſt vollends allen frieden und deſſen
empfindung aus der ſeele wegnimmet/ wo nichts
anders als die groͤſſeſie angſt und unfriede fol-
gen kan.

Gibet es nun ſo viel unruhe in denen/ welche
zu dem frieden beruffen ſind/ was wollen wir
A 2dann
[4] dann auſſer ihnen hoffen? Es heiſſet von der
gottloſen unfrieden/ Eſa. 57/ 20. 21. Die gott-
loſen ſind wie ein ungeſtuͤm meer/ das
nicht ſtill ſeyn kan/ und ſeme wellen koth
und unflat außwerffen. Die gottloſen
haben nicht friede/ ſpricht mein GOTT.
Wann dann unter ſolche gottloſe alle die jenige
gehoͤren/ die nicht unter den kindern GOttes be-
griffen ſind/ dieſe aber mitten unter jenen un-
ſchlachtigen und verkehrten leben muͤſſen/ ſo
muͤſſen ſie auch von jener unruhigem geiſt ſtaͤts ge-
plaget werden/ daß es ihnen nicht ſo gut wird/
nach ihrem verlangen das leben in friede zubrin-
gen zu koͤnnen: dann ob ſie wol mit niemand kei-
nen unfrieden anfangen/ weder zancken und ſtrei-
ten/ noch mit krieg und ſchwerdt die friedliche
verunruhigen/ vielmehr dem frieden nach ja-
gen gegen jederman Hebr. 12/ 14. ſo koͤnnen ſie
dannoch nicht in frieden bleiben/ ſondern es heiſ-
ſet Pſal. 120/ 7. Jch halte friede/ aber wenn
ich rede/ ſo fahen ſie krieg an/ und goͤnnet
ihnen alſo der ſtoͤhren friede ihre ruhe nicht. Son-
derlich aber wo der HERR deſſen grimm nicht
eine zeitlang zuruͤcke haͤlt/ und den ſeinigen eine
friſt athem zuholen goͤnnet/ ſo hoͤret er nie auff
die bekenner der Wahrheit zu verfolgen/ und ſie
auch in dem aͤuſſerlichen ſo viel zuplagen und zu
verunruhigen/ als weit ſeine verhengnuͤß gehet:
womit er zwar an ihnen erfuͤllet/ was zu ihrem
beſten in dem weiſen und guͤtigen rath GOttes
beſchloſſen iſt/ Ap. Geſch. 14/ 22. daß ſie durch
viel truͤbſal muͤſſen in das reich GOttes
ein-
[5]eingehen: aber es gehet mit kampff her/ und
wiſſen ſie wenig von frieden: ſie erinnern ſich a-
ber dabey/ was der HERR geſagt Luc. 12/
51. Meinet ihr/ daß ich herkommen bin/
friede zu bringen auff erden? Jch ſage
nein/ ſondern zwitracht. Denn von nun
an werden fuͤnff in einem hauſe uneins
ſeyn/ drey wider zwey/ und zwey wider
drey. So heiſſet es ja/ in der welt habt ihr
angſt.

Gleichwol will uns unſer Heyland nicht bloß
in angſt und unfrieden laſſen/ ſondern 2. zeiget
er einen frieden/ den wir haben ſollen/ daß ihrin
mir friede habt. Weil ſie ihn nicht in ſich ſelbs/
und in ihrer zur unruhe geneigten verdorbenen
natur/ viel weniger in der ſtreit- und kriegſuͤch-
tigen welt finden/ ſo ſollen ſie ihn haben in Chri-
ſto dem Friedenfuͤrſten. Dann weil er ſich ſelbs
ſeinen Juͤngern zu eigen gibet/ ja uns von dem
Vatter geſchencket iſt/ ſo hat der jenige den frie-
den in ihm/ der ihn hat/ als welcher lauter friede
und leben iſt. So hat er verſprochen/ daß er mit
ſeinem Vatter und Geiſt kommen wolle zu ſeinen
glaubigen/ und daſelbs wohnung machen. So
wohnet dann der friede in ſolchen ſeelen/ und der
Heilige Geiſt laͤſſet ſie davon ſoviel ſchmecken/ als
ihnen ſeelig ſeyn mag. Dieſes iſt der wahre frie-
de/ hoͤher als daß die welt an denſelben reichen/
tieffer als daß ſie ihn einſehen und ſtoͤhren koͤnte.
Daher ſolang als die welt mit ihrem Fuͤrſten un-
ſern Heyland muß den jenigen bleiben laſſen/ wo
zu er von ſeinem Vatter gemacht iſt/ und ihn we-
A 3der
[6] der von ſeinem thron zu ſtuͤrtzen/ noch auß ſeinem
pallaſt/ welchen er ſich erwehlet/ außzutreiben
dermag/ ſo lang muß ſie uns auch/ nach dem ſie
uns auß allem uͤbrigen frieden geſetzet hat/ den je-
nigen laſſen/ der in Chriſto und in ihm uns gege-
ben/ und allein wuͤrdig iſt ſolches herrlichen nah-
mens. Alſo die in ſich ſelbſt ſuͤnder und unge-
rechte/ in CHriſto die einig voͤllige gerechtigkeit
haben und wahrhafftig beſitzen/ die haben auch
friede in ihm/ da ſie in ihnen ſelbs und um ſich
mit lauter unfriede ſich plagen muͤſſen/ und da-
her offters des jenigen/ was ſie in ſich haben/ und
deſſen in dem glauben verſichert ſind/ wenig ge-
wahr werden.

Woher komt aber 3. daß in Chriſto ſolcher
friede iſt/ und wir denſelben in ihm haben koͤnnen?
Er ſagt: Jch habe die welt uͤberwunden:
die welt nemlich mit ihrem fuͤrſten/ von dem alle
unruhe/ unfried und ſtreit herkommet/ dahero
wo ſie nicht uͤberwunden waͤren/ nimmermehr
friede ſeyn koͤnte. Aber der HERR hat ſolches
gantze reich/ ſo die welt heiſſet/ deſſen fuͤrſt der
Teuffel/ ſeine gantze krafft die ſuͤnde/ und die un-
terthanen dero knechte/ und alſo natuͤrlicher weiſe
alle menſchen ſind/ uͤberwunden: Da er mit ſei-
nem gehorſam/ leiden und ſterben vor die ſuͤnde
bezahlet und gebuͤſſet/ damit dem Satan alle ſei-
ne gewalt und recht genommen/ allen denen a-
ber auß ſolchem hoͤlliſchē reich/ und auß der macht
der obrigkeit der finſternuͤß außzugehen/ freyheit
und krafft erworben hat/ welche ſeine wolthat an
ſich kraͤfftig ſeyn laſſen wollen. Damit behaltet
zwar
[7] zwar der Satan biß auff die zeit ſeines letzten ge-
richts viele gewalt uͤber alle die jenige/ die ſich
durch den Geiſt CHriſti nicht helffen laſſen wol-
len/ daß er noch unauffhoͤrlich rumort/ und lau-
ter unfrieden wuͤrcket/ in den kindern des unglau-
bens/ ſo viel mehr als er wenig zeit ihm uͤbrig zu
ſeyn weiß: Weil auch der Himmliſche Vatter
ſeinen kindern zu ihrer pruͤffung und mehrerer
reinigung von aller in ihnen ſteckenden weltlichen
luſt nützlich findet/ von auſſen angefochten/ und
alſo vor ſuͤnden verwahret zu werden/ ſo laͤſſet er
noch dem uͤberwundenen feinde zu/ daß er ſie ver-
unruhigen/ und den jenigen frieden ihnen ſtoͤh-
ren darff/ welcher ihnen nicht nuͤtzlich ſeyn wuͤr-
de. Ja er laͤſſet ſie auch die innerliche unruhe
fuͤhlen/|welche er ſonſten/ wo er wolte/ im augen-
blick wegnehmen koͤnte. Jndeſſen iſts ein uͤber-
wundener feind/ welcher zumal dem Siegesfuͤr-
ſten nichts mehr anhaben/ ſondern auch nur vor
ſeinem anſehen erzittern muß/ gegen die ſeinige
auch nichts mehr ſich unterſtehen darff/ als ihm
beliebig iſt zu ihrem beſten zu vergoͤnnen. Alſo ſte-
cket alle urſach des friedens in ſolchem des HErꝛn
ſieg/ daß nicht nur er ſelbs im frieden iſt/ als ei-
ner der uͤber ſeine feinde nunmehr herrſchet/ und
mit einem winck ſie alzumal/ da ſie ſich empoͤren
wolten/ niderlegen kan/ ſondern daß auch alle die
ihn vor und bey ſich haben/ in ihm ihren frieden
wiſſen/ als der verſoͤhnung mit GOtt und ihrer
erloͤſung/ ſo dann der gewalt ihres Heylands/
wider welchen ihre feinde nichts vermoͤgen/ in dem
glauben verſichert. So laſſen ſie dann den euſ-
A 4ſerlichen
[8] ſerlichen menſchen nach Goͤttlichem weiſen und
guͤtigen rath mit unfriede noch eine weile
geuͤbet werden/ da ſie ihren innerlichen menſchen/
mit dem Chriſtus ſich vereiniget/ in dem frieden zu
bleiben wiſſen.

Es zeiget aber der HERR auch 4. das mit
tel/ wie wir ſolches ſeines ſieges/ und folglich des
friedens moͤgen theilhafftig werden: Solches
habe ich zu euch geredet. Jſt alſo das wort
des HErrn von der liebe ſeines Vatters/ von
ſeinem außgang vom Vatter/ von ſeinem hingang
wiederum zu ihm/ von dem Troͤſter/ welchen er
fenden werde/ von der kuͤnfftigen freude/ die nach
dem leiden der ſeinigen warte/ das jenige ge-
ſegnete mittel/ dadurch wir/ wo wir ihm ſeine
krafft bey uns laſſen/ und es annehmen/ ſo bald
in die gemeinſchafft Ehriſti/ ſeines ſiegs und frie-
dens kommen. Dann es iſt daſſelbe Wort/
welches Geiſt und Leben iſt Joh. 6/ 63. der le-
bendige ſaamen/ darauß der Glaube gewuͤrcket
Rom. 10/ 17. und wir auß demſelben widerge-
bohren werden/ 1. Petr. 1/ 23. dadurch komt
Chriſtus zu wohnen in den Hertzen Eph.
3/ 17. und mit ihm alles ſein reich/ welches
gerechtigkeit iſt/ fried und freude in dem
H. Geiſt/ Rom. 14/ 17.

Wo nun ſolcher friede erlanget/ und unſere
ſeele des ſieges Chriſti in dem glauben theilhaff-
tig worden iſt/ ſo folget 5. ſo bald deſſen frucht/
wann der HERR ſagt: Aber ſeyd getroſt.
Die angſt mit dero uns die welt durch ihren un-
friede zuſetzet/ macht uns ſchuͤchtern und verzagt/
wo wir gedencken an unſere ſchwach heit/ und an
die
[9] die macht der feinde/ welche uns aufechten/ denen
wir aber viel zu gering zu widerſtehen ſind/ da
zappelt und bebet das hertz der jenigen/ die nir-
gend anders hin als auff ſich und ihre feinde ſe-
hen. Haben wir aber dem wort des HERRN
von ſeinem ſieg platz gegeben/ das wir ſolchen in
dem glauben ergriffen/ ſo wird nicht nur ſolcher
glaube immer geſtaͤrcket/ jemehr er ſich ſeines
Heylands ſieg vorſtellet/ und in demſelbigen erſie-
het/ ſondern es waͤchſet der muth/ daß man gantz
getroſt wird/ fuͤr den feinden nicht fliehet/ viel-
mehr ihnen getroſt entgegen gehet/ und jemehr
man durch die erfahrung geuͤbet wird/ ſich auch
der truͤbſal und unruhe freuet und rühmet/ je nach
dem der friede/ ſo in dem grund der ſeelen iſt/ ſich
in dero euſſerliche kraͤſſte außgieſſet. Da werden
helden/ die vorhin verzagt waren/ und gehet ein in
ſeinen eigenen und anderer augen kleiner David
einem jeden Goliath ohnerſchrocken und getroſt in
dem nahmen des HErrn unter augen.

Liebſte Bruͤder und Schweſtern/
wir verlangen ja alle/ dann auch dieſe begierde
natuͤrlich iſt/ nach frieden und ruhe. Wornach
haben wir dann fleiſſiger zutrachten/ als nach
einem frieden/ der uns nie wider entnom̃en werde?
Woran haben wir uns mehr zuergoͤtzen/ als daß
der HERR uns einen ſolchen frieden erworben
und geſchencket habe? Sind dann alle guͤter un-
ſers Heils hoch und theur zu achten/ ſo iſt es die-
ſer friede nicht weniger/ ja vielmehr eines der
allervornehmſten/ an deſſen betrachtung wir uns
zu erquicken haben. Wir leben in einer zeit/ da
A 5man
[10] man ſagen mag/ daß wieder erfuͤllet werde/ was
ſchon einmal geheiſſen hat Matth. 24/ 6. Jhr
werdet hoͤren kriege/ und geſchrey von
kriegen. Wir erfahren/ das keinem von und
unter menſchen gemachten/ ja wol theur-be-
ſchworenen frieden ſicher zu trauen ſeye/ und moͤ-
gen leute ſeyn/ die noch kein hohes alter errei-
chet/ und dannoch nicht nur eines ewigen frie-
dens anfang und ende erlebet haben: und wo-
her kommets/ daß man ſo offt friede machen/ und
deßwegen zuſammen tretten muß/ als weil kein
gemachter friede laͤnger gehaltē zuwerden pfleget/
als etwa des maͤchtigern theils nutzen mit ſich zu
bringen ſcheinet? So moͤchte man ſagen/ es
reite noch der rothe reuter auff erden herum/ dem
gegeben war den frieden zu nehmen von
der erden/ und daß ſie ſich untereinander
erwuͤrgeten/ und ihm ein groß ſchwerdt
gegeben ward/ Offenb. Johan. 6/ 4. Wir
ſehen auch die macht Babels immerzu wachſen/
welches noch weiter truncken werden ſolle von
dem blut der heiligen/ und ſich an denjenigen
blutſtuͤrtzungen/ welche laͤngſt auß der huren
grauſamkeit verurſachet und veranlaſſet worden/
nicht erſaͤttigen laſſen wird/ ſondern mit ſeinem
letzten aber heſſtigſten grimm/ auch ſein gericht
ihm uͤber den halß ziehen ſolle: alſo iſt vergebens/
daß wir uns zu dieſer zeit fried und ruhe bey un-
ſerm Gottesdienſt einbilden wolten/ vielmehr
was wir an andern/ welche in der canceley Babels
in gleicher verdamnuͤß mit uns ſtehen/ und das
urtheil auff alle einerley art laͤngſt und ſo offt
gefaͤllet
[11] gefaͤllet iſt/ ſo vielfaͤltig taͤglich erfuͤllet zu werden
ſehen und hoͤren/ muͤſſen wir uns auch vorzuſte-
hen/ die rechnung uns machen.

Wohin dann/ wo man uns nirgend dulden
noch friede wird laſſen wollen?Meine Lieb-
ſten/ es warten nicht nur allein der jenigen/
welche beſtaͤndig an dem HErrn hangen bleiben/
und in krafft des ſiegs JEſu die Welt zuuͤberwin-
den trachten/ ja den Drachen uͤberwunden durch
das blut des Lammes/ und durch das
wort ihres zeugnuͤſſes/ da ſie ihr leben
nicht geliebet haben biß an ihren todt.
Offenb. Johan. 12/ 11. die haͤuſer des friedens
und ſtoltzer ruhe droben in der herrlichkeit und
ewigkeit/ wo vollkommener friede und ewige ruhe
iſt: ſondern auch in dem lande des unfriedens
iſt noch friede vor die kinder des friedens: aber
wie wir gehoͤret haben/ nicht in ihnen ſelbs/ noch
in der welt/ ſondern in ihrem Chriſto und deſſen
heiliger einwohnung bey ihnen. Wer dieſes erken-
net und in ſeiner ſeele beſitzet/ der hat friede mitten
unter allem trompetenſchall/ trommelſchlag/ ge-
praſſel der ſtuͤcke/ ziſchen der feurballen/ oder
was ſonſten die menſchliche grauſamkeit/ und
des Teuffels boßheit/ zuſchaden des menſchlichen
geſchlechts und zerſtoͤhrung alles friedens erſon-
nen hat/ da ſonſten auſſer ſolchem himmliſchen
frieden kein augenblick friede ſeyn koͤnte.

Alſo bleibet dieſer allein unſere zuverſicht und
unſer troſt in aller angſt: auch haben wir uns
denſelben ſo viel fleiſſiger in das Hertz zu trucken/
und uns damit zu ſtaͤrcken als weniger ohne den-
A 6ſelben
[12] ſelben uns in der welt übrig bleibet/ damit wir
uns erhalten/ oder darauff verlaſſen koͤnten.
Hiezu gehoͤret alſo eine fleiſſige und andaͤchtige
betrachtung deß worts deß Evangelii/ ſo ein
friedens-wort iſt/ und auß ſeiner krafft/ was wir
davon hoͤren/ auch in die hertzen truͤcket.

Laſſet uns alſo/ Meine Lieben/ fleiſſig ſeyn/
zu betrachten unſers theuren Heylandes vortreff-
lichen ſieg und die geſamte damit uns verdiente
guͤter/ ſonderlich aber dieſen frieden/ als eine
herꝛliche crone derſelben/ damit ſolches wort da-
von in unſeren hertzen lebendig werde/ und wir
koſten moͤgen die ſuͤſſigkeit dieſes honigs/ de[r] uns
allezeit ſo viel anmuthiger ſchmaͤcket/ als mehr
wir ihn kauen und in dem mund behalten.

Jch wil nach meinem armen vermoͤgen euch et-
was deſſelben vortragen/ deſſen fleiſſige koſtung
und betrachtung/ in der furcht deß HErrn/ und
mit deſſen anruffung nicht vergebens ſeyn kan/
ſondern eure ſeelen mit einem vergnuͤglichen ge-
ſchmack erfuͤllen wi d.

Jhr ſehet hie vor augen einige uͤber den geiſt-
lichen frieden durch GOttes gnade angeſtellte
bet[r]achtungen/ welche daher die gelegenheit ge-
nommen/ da auff eines Chriſtlichen Freundes
vorſchlag in meinem ſo genannten Collegio die
erbauliche frage vor etlichen Jahren vorgetragen
worden: Wie man zu dem wahren frieden
Gottes gelangē/ auch in demſelbenerhaltē
werden/ uñ zunehmē moͤge? Darauff dann
in unterſchiedlichen mahlen von mehrern guten
Freunden/ was jeglichem der HErr vor erkaͤnt-
nuͤß
[13] nuͤß uͤber dieſe materie gab/ außgefuͤhret/ und
von mir nach gewohnheit das ſamtlich vorgekom-
mene zuſammen gefaſſet wurde.

Wann dann nun zu dieſen unſeren zeiten/ wo
in der welt der friede aller orten krachet/ ſolche
materie Gott[-]liebenden ſeelen vor andern erbau-
lich ſeyn/ und ſie in und auff die kuͤnfftige truͤbſa-
len auffs neue ſtaͤrcken kan/ ſo habe nicht ohne
nutzen erachtet/ ſelbige vorige handlungen beſſer
in ordnung zu bringen/ und aller orten das wei-
ter noͤthige nach verleyhung Goͤttlichen bey-
ſtandes beyzuſetzen/ und hiemit zum Truck zu
geben.

Der HErr aber deß friedens/ von dem wir al-
lein allen frieden zu erwarten haben/ ſegne ſolche
in ſeiner forcht abgefaßte arbeit an allen/ welche
unter euch dieſelbe zu leſen gelegenheit haben/
und einiges ſtuͤndlein zu weilen daran wenden
werden/ daß dieſes ſein wort von dem frieden ein
lebendiger ſaame werde/ darauß in ſtaͤrckung
deß glaubens ein herꝛliches gewaͤchs deß friedens
in euren ſeelen auffgehe/ und mehr und mehr reiff
werde zu herꝛlicher frucht/ getroſter gedult in
allem leiden/ freudiger bekaͤntnuͤß in der verfol-
gung/ kraͤfftigem ſieg über die welt/ und was den
frieden ſtoͤhren wolte: Damit ihr alle moͤget in
euch die wahrheit deſſen hie geruͤhmten erfah-
ren/ und von grund der ſeelen ſprechen/ und ſin-
gen: GOtt iſt unſere zuverſicht und ſtaͤr-
cke/ eine huͤlffe in den groſſen noͤthen/ die
uns troffen haben. Darumb fuͤrchten wir
uns nicht/ wann gleich die welt unter-
A 7gienge/
[14]gienge/ und die berge mitten ins meer
ſincken. Wann gleich das meer wuͤtet und
wallet/ und von ſeinem ungeſtuͤmm die
berge einfielen. (Alſo/ wann aller friede und
ruhe umb uns auß und hinweg iſt/) Dannoch
ſol die ſtatt Gottes fein luſtig bleiben mit
ihren bruͤnnlein/ da die heiligen wohnun-
gen deß Hoͤchſten ſind. Gott (der der friede
ſeibſten iſt/) iſt bey ihr drinnen/ darum wird
ſie wol (und in frieden) bleiben. GOTT
hilfft ihr fruͤhe/ Pſal. 46. Ach/ dieſes alles ge-
be euch der HErr auch in dieſer betrachtung zu
ſchmaͤcken/ und daß ihr deſſen faͤhig werdet/ ſo
heilige er euch durch und durch von allem/ was
dem frieden entgegen ſtehet: ſo werdet ihr ewig
gnug haben. Lebet wol in unſerem JEſu/ und er-
bittet mir auch von Jhm gleichen frieden/ ſelbſt
zu ſchmaͤcken die guͤter dieſes friedens/ die ich
euch zeige/ und auch meine ſeele nach ſolchem ſůſ-
[ſen] geſchmack hungerig iſt. Ja/ der friede
GOttes/ welcher hoͤher iſt/ dann alle ver-
nunfft/ bewahre unſere hertzen und
ſinne in Chriſto JESU.
Amen.

Das erſte Capitel.
Der Friede GOttes gegen uns.

Das zweyte Capitel.
Unſer friede mit GOTT.

Das dritte Capitel.
Von unſerem frieden in GOtt.

Das vierdte Capitel.
Von den hindernuͤſſen deß in-
nerlichen friedens.

Das fuͤnffte Capitel.
Von vortrefflichkeit dieſes frie-
dens und deſſen erkantnuß.