Ashí nankamamia Nú yaunchu Yusa Uchirí tuke pujuyayi. Niisha Yúsan ti paant awajeakui, Chícham Tíminiaiti. Chichamsha Yusjai pujuyayi. Chichamsha Yúsauyayi.

Yámankamtaik Niisha pujuyayi Yusjai.

Ashí najanamu ainia nu Niijiai najanamuiti. Nii najanachmaka penké atsawai.

Niisha iwiaaku átinia nérenniuti. Nu iwiaaku atincha Tsáapninia ainis Yusna ana nuna Ashí shuaran paant nekamtikiamniaiti.

Nu Tsáapnin kiritniunam Tsáapniawai. Tura kiritniusha Tsáapninian ikiajniaktinian tujinkiaiti.

Aishman ámiayi, Yus akupkamu, ni naari Juan.

Niisha Tsáapnin chichaman etserkatajtsa Támiayi. Nuna étseruk Ashí umirkarat tusa Támiayi.

Juansha nu Tsáapninchauyayi. Ayatik akupkamuyayi Tsáapnin chichaman etserkat tusa.

Nu Tsáapninkia nekas tsaapniniaiti. Ju nunkanam taa Ashí shuaran Enentáin Tsáapniartiniaiti.

Chichamsha taramiayi ju nunkanam. Tura nunkasha ni najanamu ain, nunkaya aents Niin nekaacharmiayi.

Támiayi ni nunkén tura ni shuarsha ni Enentáin itiaacharmiayi.

Tuma ain Chíkich shuar Niin Enentáimtuiniak ni Enentáin itiaawarua nuna Yusa Uchirí ajastinian Yus tsankatkamiayi.

Niisha Yusa Uchirí ajasar ataksha Númpentin Ayashímkiacharmai. Aentsnúmia akiiniachu ainiawai niisha. Aishman wakeramujaisha akiiniacharmai. Antsu Yúsnumia akiiniawaru ásar Yusa Uchirí ainiawai.

Nú Chichamsha ayashtin ajas iijiai Núkap tsawant pujumiayi. Yusa anenkratairijiai piakuyi. Aya nekasa nunak chichaamiayi. Núnisan ni pénkerin, aya Yusa Uchiri chikichkia nu takusminia nuna iniakmamiayi. Nusha iisha paant Wáinkiaitji.

Juansha Niin neka asa, étseruk Tímiayi "Júiti wi Tímiaj nu: "Winia ukuruini winittiana nu Wíjiainkia émkaiti. Maa, wi atsaisha tuke pujuyayi" tiniujai." Tu etserkamiayi.

Chichamsha ti anenkartin asa Ashí pénker ana nuna iniaitsuk Súramji.

Yusa akupeamurin Muisais yaunchu jintintraiti, antsu aneatniuncha tura Ashí nekas ana nunasha Jesukrístu jintintraiti.

Chikichkisha Yúsan penké Wáinkiachuiti. Tura ni Uchirí chikichkia nu tuke Niijiai Tsaníaku asa Yúsan paant awajturmasuitji.

Jerusarénnumia Israer-shuar ni Pátririncha Riwí-shuarjai Juankai akupkarmiayi Yákit tusar.

Inintruiniakui paant ujakmiayi. "Wikia Krístuchuitjai" Tímiayi.

Takui ataksha aniasarmiayi "ṡNuikia Yáitiam. Yúsnan etserin yaunchu amia Nú Eríaskaitiam?" tiarmiayi. Juansha "Atsá, Núchaitjai" Tímiayi. Nuyá ataksha aniasarmiayi "Nuikia ṡYúsnan etserin Tátinia Núkáitiam?" tiarmiayi. Niisha "Atsá" Tímiayi.

Takui "ṡNu arantcha Yáitiam. Iin akuptamkajnia nusha Warí Títiataj~i. Warintia Enentáimiam?" tiarmiayi.

Juansha Tímiayi "Yúsnan etserin Isayas yaunchu timia Núitjai. Niisha aarmiayi "Aents atsamu nunkanam shuar untsumui "Ii uuntri Jintí naka awajsatarum," tu untsumui." Núnaka Isayas aaruiti. Tura wikia untsumna Nú shuaraitjai" Tímiayi.

Juanjai chichainiakka Pariséu akupkarma ármiayi.

Niisha tiarmiayi "Nuikia Krístuchuitiatmesha, Eríaschaitiatmesha, Yúsnan etserin Tátinia Núchaitiatmesha ṡurukamtai imiakratam?" tiarmiayi.

Juansha Tímiayi "Wikia entsajain imiakratjai. Tura átum írutramunam shuar átum nékatsrumna nu wajaawai.

Niisha winia ukuruini winiayat Wíjiainkia ti nankaamantuiti. Nii ti pénker asamtai wisha ni sapatri jinkiamurincha atitrachminiaitjai" Tímiayi.

Nuka Petapara peprunam Túrunamiayi. Petaparasha Juan imiakratmia nui Jurtan entsa amain amai.

Nuyá kashin Juan Jesusan winian Wáiniak Tímiayi "Iistarum. Núiti Yusa Murikri Ashí aentsu tunaarin Júana nu.

Núiti wi timiaj nu, "Winia ukurui winiana nu Wíjiainkia nankaamantuiti. Tura wi atsaisha tuke pujuyayi" Tímiajai.

Wisha Niin nekaachmajai. Tura Ashí Israer-shuar Niin nekaawarat tusan imiakin Támajai" Tímiayi.

Nuyá Tímiayi "Yusa Wakanin Yámpitsa Núnin nayaimpinmayan Táarun Wáinkiámjai. Tura ekemsamai.

Nu Túruntsain tuke Niin nekaachmajai. Tura Yuska winia imiakrattinian akuptak turutmiai "Chikichik shuarnum Yusa Wakaní tara ekemsa Wáinkiam, nujai nekaattame. Yusa Pénker Wakaníjiai imiakratniua Núiti" Túrutmiayi. Tura nujai Niin nekaamjai.

Yamaikia wainkia asan ti paant nékajai Tí nekas Yusa Uchirínti" Tímiayi Juan.

Kashincha ataksha Juan nui wajasmiayi ni unuiniamuri Jímiarjai.

Jesussha nui nankaamakui Juan Tímiayi "Iistarum, Yusa Murikrí áuwiti."

Juanka unuiniamuri nuna antukar mai Jesusan pataatukarmiayi.

Jesussha úkumur iimias nu Jímiaran wininian Wáinkiámiayi. Tura Tímiayi "ṡYa earum?" Niisha "Uuntá, ṡtui pujam?" tiarmiayi.

Jesussha Tímiayi "Wats, iitiarum." Niisha wear ni pujutairin Wáinkiarmiayi. Tura Aankú ajasmatai nu tsawantai nui kintiamprarmiayi.

Juanka chichamen antukar Jesusan pataatukaruka Jímiar ármiayi. Chikichik Antresauyayi. Niisha Semun Pitru yachiiyayi.

Antressha Wárik ni yachi Semunkan eaktajtsa wémiayi. Tura Wáiniak "Misías Wáinkiaji" Tímiayi. Misíaska ni chichamen "Kristu" tawai. Krístuka Israer-shuaran yainkiarat tusa Yus anaikiamuiti.

Nuyá Antres ni yachi Semunkan Jesus pujamunam jukimiayi. Jesussha Wáiniak Tímiayi "Ametme Semun, Junasa Uchirí. Túrasha Sépas átatme." Sépaska Israer-shuar chichamnum kaya tawai. Tura Kriaku chichamnum nuka Pítruiti.

Kashincha Jesus Kariréa nunkanam wétajtsa pujumiayi. Tura Jiripin Wáiniak "Nemartusta" Tímiayi.

Jiripisha Petsaitia péprunmayauyayi. Antressha Pítrusha nu péprunmayauyayi.

Nuyá Jiripi Natanaéran eakmiayi. Tura Wáiniak Tímiayi "Muisais Yus akupkamu papinium "Anaikiamu Tátatui" tu aarchamkia. Yaunchu Yúsnan etserniusha ujakcharmakia. Nu shuar Wáinkiaji. Jesusaiti, Jusé Uchirí. Nasarét péprunmayaiti."

Natanaérsha Tímiayi "ṡNasarétnumia pénker shuar áminkiait?" Jiripisha "Winim Iitiá" Tímiayi.

Jesussha Natanaéran Tíjiuch winian Wáiniak Tímiayi "Ju shuar iistarum. Ti pénker Israer-shuaraiti. Penké anankartichuiti."

Natanaérsha Tímiayi "ṡItiur nékaram?" Jesussha Tímiayi "Jiripi tuke untsurmatsain Wáinkiájme ikiu numirin ejamkam wajamin."

Natanaér nuikia Tímiayi, "Uunta, nekas Yusa Uchirínme. Israer-shuar akupniuitme" Tímiayi.

Tura Jesus Tímiayi "ṡAya wi "Ikiu numirin ajamkam wajamin Wáinkiájme" takui Winia Enentáimturamek? Antsu nuna nankaamas nekaachmin ana nusha Wáinkiáttame" Tímiayi.

Nuyasha Jesus Tímiayi "Wi nekas Tájarme, Aents Ajasu asan atumsha nayaim uranmianum Yusa suntari Winin tara waka ajainia Wáinkiáttarme." Tu Tímiayi.

Menaintiu tsawant nankaamasmatai nuatnaikiatin Jísat Kaná péprunam ámiayi. Kaná péprusha Kariréa nunkanmauyayi. Jesusa Nukurísha nui pujumiayi.

Jesussha ni unuiniamurisha nu nuatnaiyamunam ipiaamu ármiayi.

Umutai amuukamtai Jesusa Nukurí Tímiayi "Umutai amuukai. Penké takakainiatsui."

Tura Jesus Tímiayi "Nukuá, ṡurukamtai Winia Túrutam? Iniáitiústá. Winia kakarmar iniakmastin jeaatsui."

Nuyá umutain Wáinmainia nuna ni Nukurí Tímiayi "Ashí ni tana nu Umiktárum."

Nui kayajai najanamu yumi-yaraatai sais (6) ámiayi. Nu yaraatainmaya Israer-shuar ni ewejéncha ni nawencha nijiamau ármiayi Yus shiir Enentáimtursatí tusar. Chíkich Chíkich yaraatainium uchenta (80) Rítrusha, sian (100) Rítrusha yumi wayamniauyayi.

Nuyá Jesus umutain Wáinmaun "Ju yaraatai aimpratarum" Tímiayi. Takui mete aimprarmiayi.

Aimprarmatai Jesus Tímiayi "Pai, ishichik shikikrum Námper chicharu suutarum." Tutai Nútiksan Túrawarmiayi.

Jista chicharusha nu umutai ajasun Nekáprámiayi. Yaraatainmaya yumi jusamun nekaachmai niisha tura umutai ajamau jusaru ásar nékarmai. Jista chicharusha nuwatun untsuk

Tímiayi "Jístanmanka pénker umutain emka Suíniatsuk. Tura jémararmatainkia Tímianchan suiniatsuk. Túrasha ámeka pénker umutai ikiusam Yamái Jíikchamek" Tímiayi.

Jesus Túramu Kananum Kariréa nunkanam Túrunamiayi. Nújainkia Jesus emka ni kakarmarin paant iniaktusmiayi. Nuna iisar ni unuiniamurisha Niin Enentáimtusarmiayi.

Nuyá Kapernáum péprunam wémiayi. Ni Nukurísha ni yachisha ni unuiniamurisha nemariarmiayi. Nuisha Untsurí tsawant pujusarmiayi.

Israer-shuara namperi, paskua tutai, ishichik ajasmatai Jesus Jerusarénnum wémiayi.

Nui Jeá Yusa Uunt Jeen Súruinian Wáinkiámiayi. Turuncha murikniasha yampitsnasha Súrin ármiayi. Chikichcha ni misarin pujusar Kuítian Yapajíniancha Wáinkiámiayi.

Nuna Wáiniak yaranken chapikmar asutkiartutain najana nujai Ashí waakartiuk murikrintiuk aa Jíirmiayi. Kuítian yapajniu misarincha ayantar ni Kuítrin Nunká utsankarmiayi.

Yampitsan Súrinniasha Tímiayi "Nuka Juyá Jíitiarum. Winia Aparu Jeen surutai jea najanawairap" Tímiayi.

Nuna iisar ni unuiniamuri yaunchu Yus-Papinium aarman Enentáimprarmiayi. Ju aarmaiti: "Ame Jeem shiir Atí tusan ti wakerukuitjai."

Nuikia Israer-shuara uuntri Jesusan aniasarmiayi "Juna Túramniaitjai tusam ṡWarí kakarmak iniakmastatam?"

Jesussha Tímiayi "Ju Jea Sáakiakrumin Menaintiú Tsawantaí iniantaittiajai Wikia."

Israer-shuarsha tiarmiayi "Kuarentisáis (46) uwitin juna jeamtinian pujursarmiayi. Amesha Menaintiú tsawantai Jeamtámeash."

Kame Jesus "Jea" chichayat ni ayashin Tímiayi.

Tuma asamtai Jesus ukunam jakamunmaya nantakmiatai ni unuiniamuri ni timian Enentáimprar ni chichamencha tura yaunchu Yus-Papinium aarmancha "Nekasaiti" tu Enentáimtusarmiayi.

Paskua Námpertin ti Untsurí Jerusarénnum pujuarmia nu, Jesus aents tujintiamun Túramtai, nuna Wáinkiar Niin nekas Enentáimtusarmiayi.

Tuma ain Jesus Ashí neka asa ninkia Enentáimtuscharmiayi.

Ninki Ashí shuara Enentáin neka asa Chíkich ujatkat tusa atsumchamiayi.

Shuar ámiayi ni naari Nikiutému. Niisha Pariséu asa nii tuinia aintsan Yúsnan takauyayi. Niisha Israer-shuara uuntriyayi.

Niisha kashi Jesusai irastajtsa wé Tímiayi "Uuntá, Shuáran unuiniarat tusa Yus Akúptámkaiti. Nu paant nékaji. Yúsaiyanchuitkiumka aentsti tujintiamu Túramna nu tujinkiaintme' Tímiayi.

Jesussha Tímiayi "Tí nekas Tájame. Atak yamaram akiiniachuka Yus akupeamunam pachiinkiashtatui."

Tutai Nikiutému aniasmiayi "ṡItiurak shuar uunta nu ataksha akiiniat. Ataksha ni Nukurí ampujén enkempramniakait atak akiiniatniuna?"

Ataksha Jesus Tímiayi "Ti nekas Tájame. Shuar entsayasha tura Wakanniumiasha akiiniachuka Yus akupeamunam penké pachiinkiashtatui.

Ayashniumia akiinia nuka ayashchakait. Núnisan Wakanniúmia akiinia nuka wakanchakait.

Wi "atak yamaram akiiniatniuiti" takui itiurchat Enentáimpraip.

Nase Enentáimpratá. Nase Nánkamsan Umpúawai. Amesha ántame tura tuyan Winiá Túrasha tuin weti nékatsme. Núniskete Ashí Wakanniúmia akiinia nu."

Tuma asamtai Nikiutémusha atak anias "ṡJusha itiurak áminiait?" Tímiayi.

Jesus aikmiayi "Ame Israer-shuara jintinniurintiatmesha ṡitiura nékatsmea?

Ti nekasan Tájame. Nekas nékakur chichaaji. Iismajnia nusha ujaaji. Tuma ain ii chichame ántatsrume.

Aya ju nunkanmaya Túramu ujaam ántachkurmeka ṡitiurak nayaimpinmaya Túramusha antuktarum?'

`Shuar chikichkisha nayaimpiniam waka atsawai. Aya Wiki, nayaimpinmaya taran Aents Ajasu asan, Túraitjai. Tura Wikia nayaimpinmayaitjai.

Tura Winiasha, Aents Ajasu ain, mantuawartatui. Iis, yaunchu Israer-shuar atsamunam wekainiak napijiai ti Jáiniakui tuke tsuamarti tusa Muisais napin Jirú najana Yakí numiniam awajaimiayi. Núnisnak Wisha awajnitniuitjai.

Nújainkia Ashí Winia Enentáimturna nuka jinium wétsuk Yusai tuke iwiaaku pujustatui."

Yuska Ashí shuaran ti anea asa, ni Uchirin chikichik ana nuna Shuáran uwemtikrarat tusa tsankatkamiayi. Ashí shuar Niin Enentáimtana nu, jinium wécharat tusa, antsu Yúsnum tuke iwiaaku pujusarat tusa ni Uchirín Akúpturmakmiaji.

Yus aentsun kajerak jinium surukat tusa ni Uchirín akupkachmiayi. Antsu uwemtikrarat tusa akupkamiayi.

Yusa Uchirín Enentáimtana nuka jinium penké surunkashtiniaiti. Tura Niin Enentáimtatsna nuka, Yusa Uchirín chikichik ana nuna Enentáimtachu asa, Páchitsuk jinium surukmaiti.

Yusa Uchiri Tsáapninia aintsan ii tunaari paant awajturmaji. Nu Tsáapnisha ju nunkanam Táraiti. Shuar Tunáa ti tura ásar Tsáapninian nakitrar kiritniun wakeriarmai. Nuna tura ásar jinium surunkaruiti.

Ashí tunaan Túruinia nuka Tsáapninian Muíjiainiawai. Túrawar yupitiainiawai ni Tunáa Túramu paant ajasai tusa.

Antsu Ashí nekas Túratniun umiiniana nuka Tsáapninian weantainiawai. Yus ni Enentái pujuram Tsáapninium takainiawai. Nuka ti paantaiti.

Nuyá Jesussha ni unuiniamurijiaisha Jutía nunkanam wear nui pujusar imiakratiarmiayi.

Juansha Enun nunkanam, Sarim Tíjiuchia nui, imiakratuk pujumiayi entsa nui Núkap aa asamtai. Tura aents Táarmatai imiainiarmiayi.

Nusha Juánkan sepunam enkenatsain Túrunamiayi.

Tura Juanka unuiniamuri Israer-shuarjai jianaiktinian nankamawarmiayi. "ṡYa imiakratma Imiá pénkerait?" tusar áujmatiarmiayi.

Juánkai inintrustai tusar wéarmiayi. "Uunta, ame nuik Jurtan entsa amain pujakum shuar nui Pujá "Núiti Yusa Murikri" Tíchamkum. Yamaikia imiakratui tura Ashí shuar Niin nemarainiawai" tiarmiayi.

Tutai Juan Tímiayi "Ashí kakarmaka aya Yúsaiyanchakait.

Wisha paant Tímiajai "Wikia Krístuchuitjai antsu ni jintin iwiarat tusan emka akupkamuitjai." Nusha antukmarme.

Kame shuar nuwan nuatna nuna aishrinti. Nuatnaiyak aishman nuwejai áujnainiakui, ni amikrisha nuna antuk ti waraatsuk. Wisha Núnisnak aents Jesusai wénakui ti waraajai.

Niisha tuke nankaamaku uunt ajastiniaiti antsu wikia tuke Tímiancha ajastiniaitjai." Juan tu chichasmiayi.

Nayaimpinmaya tara nuka Ashí nankaamakuiti. Nunkaya nuka, nunkaya asa Jú nunkanmayanak áujmatui. Nayaimpinmaya tara nuka Ashí nankaamakuiti

tura nui antukmancha iismancha áujmatui. Túrasha ni chichamen ántuiniatsui.

Antsu ni chichamen ántana nuka "Yusa chichame Imiá nekasaiti" tawai.

Yus akupkamuka Yusa chichamen étserui. Yuska ni Wakanín ementutsuk susa asamtai tu étserui.

Yus Apa ni Uchirín anea asa Ashí ana nuna Iistí tusa ataksaiti.

Shuar Yusa Uchirín Enentáimta nuka yamaram iwiaakmanum akiinia asa tuke Yusai shiir pujustiniaiti. Antsu Yusa Uchirín Enentáimtatsna nuka nu iwiaakmanum akiiniachuiti antsu Yus tuke niin kajerkaiti.

"Jesus Untsurí shuaran ni nemarin awajeawai; kame Juanjai nankaamas Untsurí imiaawai" taman Pariseu shuar antukarmiayi.

Nekaska Jesus imiakratchamiayi, antsu ni unuiniamuri Túrawarmiayi.

Pariséu nu chichaman antukarman Jesussha Nekáa Jutía nunkanmaya jiinki Kariréa nunkanam waketkimiayi.

Wáketuk Samaria nunkanmaani nankaamaktiniuyayi.

Samaria nunkanam wéak Sekar péprunam jeamiayi. Nu pepru jeastatuk Jakupa nunke ámiayi. Jakupsha nu nunkan ni Uchirín Jusen Tí yaunchu susamiayi.

Nuisha yumirmat ámiayi. Jakup taurma asamtai "Jakupa yumirmatri" tiarmiayi. Tutupin jeamtai Jesussha pimpiki winis yumirmat ayamach pujusmiayi.

Nui pujai Samarianmaya nuwa Yumí shikiktajtsa Támiayi. Tura Jesus "Entsa surusta" Tímiayi.

Jesusa unuiniamurisha yurumkan péprunam sumaktajtsa wéaru asamtai aya Jesusak pujumiayi.

Samarianmaya nuwa Jesusan Tímiayi "ṡItiura Israer-shuaraitiatmesha Samarianmaya nuwa aisha entsa seatam?" Kame Israer-shuar Samarianmaya shuarjainkia penké chichachu ásar nuna Tímiayi.

Jesussha Tímiayi "Yus Súamu nékakmeka tura entsa surusta Tájam nusha nékakmeka ame antsu Seattínme tura Wikia iwiaaku entsan amasaintjai."

Nuwasha Tímiayi "Uunta, entsasha ti initiaiti tura shikiktincha takaktsume. ṡTuyan iwiaaku entsasha surustam?

Ii uuntri Jakup ju yumirmatan taur juyanak niisha ni Uchirísha ni Waakarísha umararmiayi. Nuyá ikiurtamkimiaji. ṡAmesha Jakupjai nankaamas kakarmakaitiam?"

Jesussha Tímiayi "Ashí shuar ju entsan umarka ataksha kitiamtiatui.

Antsu Wi Súajna Nú entsan umarka penké kitiamchattawai. Antsu nu entsa Wi susamuka ni Enentáin Púkunia aintsan tuke pajamtiatui nujai tuke iwaaku Pujustí tusa.

Tutai nuwa Tímiayi "Uuntá, winiasha nu entsa surusta. Wisha kitiamcha átaj. Tura ju entsancha shikiktinian Táchataj" Tímiayi.

Nuyasha Jesus Tímiayi "Aishrum untsukam utitia, turam jui Tatá."

Nuwasha "Winia aishur atsawai" Tímiayi. Tutai Jesus Tímiayi "Maa, nekas tame. Aishrum atsawai.

Kame ame aishrum senku (5) takusuitme. Yamái takakmena nusha ame aishrumchaiti. Nekas tame."

Nuna antuk nuwasha Tímiayi "Uunta, ame Yúsnan etserniuchukaitiam.

Ii uuntrinkia tuke Samarianam pujuarmia nu Jú nainnium Yúsan tikishmatrarmiayi. Antsu átum Israer-shuar árumna nu aya Jerusarénnum Yus Tikíshmátratniuiti Tárume."

Jesus Tímiayi "Nuwá, Enentáimsata. Tsawant jeattawai átum Jú Náinniumsha Tátsuk tura Jerusarénnumsha wétsuk Yus Apa tikishmatratin.

Atum tikishmatrum nuka nékatsrume. Iikia tikishmatrajnia nu nékaji. Israer-shuarnumia Uwemtikkiartin winiakui nékaji.

Tsawant winittiana nu Yamái jeayi. Ashí shuar Yus Apan nekas tikishmatainiakka tuke wakanjai tuke Enentáijiaisha awajitsuk tikishmatrartatui. Núnisan tikishmatrurat tusa wakerawai Yus Apa.

Yuska Wakaniiti tura Ashí Niin tikishmatainia nuka tuke Wakaníjiai tura tuke Enentáijiai awajitsuk tikishmatratin ainiawai."

Nuwasha Tímiayi "Anaikiamua nu Tátiniaiti. Nusha Krístuiti. Niisha taa Ashí jintintramattaji."

Jesus Tímiayi "Wiitjai. Amin chichaajmena Nú Kristuitjai."

Nuin ni unuiniamuri Táarmiayi tura nuwajai chichaa pujan Wáinkiar ti Enentáimprurarmiayi. Tumaitiat "ṡWarí wakerakmea nuwajai chichaam?" Títinian arantukarmiayi.

Nuyanka nuwa ni yumirin ikiuki péprunam we Ashí aentsun Tímiayi

"Winiirum iitiarum, shuar Ashí wi Túramun Túruta nu. ṡJuka Krístuittiya?"

Tutai péprunmaya Jíinkiar Jesus pujamunam wearmiayi.

Jeainiatsain ni unuiniamuri seak tiarmiayi "Uunta, Yurumáta."

Tura Jesus Tímiayi "Wi Yúatniunka takakjai átum nékachman."

Ni uniuniamurisha Nuámtak anniasarmiayi "ṡChíkich shuar yurumak Itiarím Tátsuash?" tiarmiayi.

Tura Jesus Tímiayi "Winia akuptukua nuna wakeramuri Túrakun tura ni takatrin takaakun Wíjiainkia Yurumátniua aintsan Ikiakáatui.

Atumka "Tuke kuatru nantu árak Júuktin taasai" Tátsurmek. Túrasha Wi Tájarme, shuar wininia nu iistarum. Yus-Chicham ni Enentáin araamuiti. Tura Júuktin tsawant jeayi.

Arakan Júaka akinkiatniuiti. Júukmataisha nu shuar uwemprar tuke iwiaaku pujusartatui. Núnisan arakan araana nusha Júana nusha mai metek warasartatui.

Tiniu armia nuka nekasaiti: "Chikichik araawai Chíkichcha Júawai."

Iis, Chíkich araakmamu Júuktinian akupkaitjarme. Atum araachiatrumek Chíkich takasmanum atumsha pachiintiukuitrume" Tímiayi.

Tura Núwaka péprunam Jeá "Ashí wi Túramun ujatkayi" takui Untsurí shuar Jesusan ti shiir Enentáimtusarmiayi. Niisha Samarianmaya shuar ármiayi.

Nu asamtai Ashí Jesusai taar niijiai Pujusát tusa seawarmiayi. Tutai Jesus Jimiará tsawant nui pujusmiayi.

Nú shuar Untsurí ni chichamen antukar Jesusan ti shiir Enentáimturarmiayi.

Nuyá nuwan tiarmiayi "Yamaikia aya ame chichammijiain Jesus Enentáimtatsji antsu imia iisha ni chichamen anturkaji. Tura nékaji nekas Krístuiti, Ashí shuaran Uwemtikin."

Jimiará tsawant nankaamasmatai Jesus Samaria nunkanmaya jiinki Kariréa nunkanam wémiayi.

Kariréasha Jesusa nunke asamtai, ainsha Jesus timia aintsan ámiayi: "Yúsnan etserniun Ashí shuar pénker anturainiawai antsu nuna nunkeyanka niin anturainiatsui."

Tuma ain Kariréa nunkanam jeamtai auya shuarsha Jerusarénnum paskua Námpernum wearu ásar tura Ashí ni Túramun nui wainkia ásar ti shiir awajsarmiayi.

Nuyá Jesus Kaná péprunam atak Támiayi. Nu péprunmasha nuik Jesus yumin umutai awajsamiayi. Jesussha nui pujai Yajá péprunam Kapernáumnum akupniu takarin ámiayi. Ni Uchirísha jaa tepemiayi.

Niisha Jesus Jutíanmaya Kariréa nunkanam taman antuk Jesusai wémiayi. Tura ni Uchirí Jákatin tepakui ni jeen we ni Uchirín tsuarat tusa Jesusan seamiayi.

Jesussha Tímiayi "Aya aents Túrachminian Túrakui iisrum aya Nújain Winia Enentáimtarme."

Tura takarin Tímiayi "Uunta, winia uchir Jáatsain wari winitia."

Nuinkia Jesus Tímiayi "Jeemiin waketkitia. Yamaikia ame uchiram pénker ajasai." Tutai Nú aishman Jesus Táman antuk wémiayi.

Ni jeen Jeátemámtai ni takarniuri inkiun tiarmiayi "Yamaikia uchiram pénker ajasai."

Apasha inintrusmiayi nantu urukaim pénker ajasma. Niisha tiarmiayi "Yau, nantu pukuntamtai, tsuemun michatramai" tiarmiayi. Nuna antuk Uchí Aparísha Enentáimsamai.

Nantu pukunta ai Jesus "Ame uchiram pénker ajasai" timia Nuní ain michatraiti. Tuma asamtai niisha Ashí ni shuarisha Jesusan nekas Enentáimturarmiayi.

Jesus nu Túramujai ni kakarmarin Jimiará iniakmasmiayi. Nunasha Jutíanmaya jiinki Kariréa nunkanam Jeá Túramiayi.

Nu nankaamasmatai, Israer-shuar namperan najanainiakui Jesus ataksha Jerusarénnum waketkimiayi.

Jerusarén yama wayamunam murik wayatin waiti Tíjiuch amia nui entsa pajamtai jeammauyayi. Nu pajamtain Petesta tiarmiayi. Nuna Wáitirisha senku (5) ármiayi.

Nui Untsurí Jáiniak nunkanam tepearmiayi. Kusurusha shutuapsha tampemakusha tepesar entsa miartukat tusa Nákasarmiayi.

Kame ni Tátaj taku Yusa suntari Táuyayi entsan umuchkiattsa. Nuyanka emka shuar Entsá Wayá nu ni Jáamuriya Tsuámarmiayi.

Aishman Traintiúchu (38) uwi jaa Tepá nui ámiayi.

Jesussha nu shuaran nui tepan Wáinkiámiayi. Tura Untsurí uwitin jaa tepan Nekáa aniasmiayi "ṡShiir ajastiniak wakeram?"

Tutai jaasha Tímiayi "Uunta, entsa muchitkiui ṡwinia yaki Enkétát? Kame wi Enkemátaj tai Chíkich emka Enkemáiniawai."

Nuyá Jesus Tímiayi "Nantaktia. Ame peakrum jukim Wetá."

Nu chichamtaik aishman shiir ajasmiayi. Tura ni peakrin Jukí wémiayi. Nusha ayampratin tsawantai Túrunamiayi.

Tuma asamtai Israer-shuar shiir ajasun tiarmiayi "Yamái ayampratin tsawantaiti. Peakrum Júkishtiniaitme" tiarmiayi.

Aishmansha Tímiayi "Winia tsuara nu "Peakrum jukim Wetá" turutni" Tímiayi.

Nuinkia aniasarmiayi "ṡYa "Peakrum jukim Wetá" Túramam?" tiarmiayi.

Tura aishmansha Niin Tsuárun nékachmiayi. Untsurí shuar nui aa asamtai tura Jesus weu asamtai niin nekaachmiayi.

Atak Jesus Yusa Uunt Jeen aishmankan Wáiniak Tímiayi "Antukta. Yamaikia shiir ajasume. Atak Tunáa Túrawaip; nu arant Ajasáim" Tímiayi.

Nuinkia aishman Jesus niin Tsuárman Nekáa Israer-shuaran ujakmiayi.

Tuma asamtai ayampratin tsawantai Túramtai Israer-shuar Jesusan maatai tusar aintrarmiayi.

Tura Jesus Tímiayi "Wina Apar tuke yamaisha takawiti. Núnisnak Wisha takaajai."

Tutai Israer-shuar nuna nankaamas maatai tusa wakeriarmiayi. Ayampratin tsawantai takaakui kajerkarmiayi. Tura nu arantcha "Yus winia Aparuiti" takui Yusjai métek Enentáimtumawai tusar nu arant kajerkarmiayi.

Nuyá Jesus Tímiayi "Ti nekas Tájarme, Yusa Uchirínkia ni Enentáijiain takaatsui. Antsu aya winia Apar takaana nuna iisan métek takaajai. Ashí winia Apar Túramun Wisha ni Uchirí asan métek takaajai.

Ni Uchirí asamtai winia Apar anentui tura Ashí tura nuna iniakturui. Tura nuna nankaamas tujinkiamnian iniaktursattawai Wisha Túratniun. Tura nuna Túrakui ashamkattarme.

Winia Apar jakamunmayan iwiaaku ajasat tusa Ni wakerana nuna inianteatsuk. Núnisnak, ni Uchirí asan, Wi wakeraj nuna iwiaaku Awájsámniaitjai.

Winia Aparka Súmamtiktsui antsu shuar Súmamtikiatniun ni Uchirín Súsaiti.

Tuma asamtai Ashí shuar Yus Apan shiir awajainia aintsan ni Uchiríncha métek shiir awajsatin ainiawai. Yus Apa ni Uchirín akupka asamtai, Uchin shiir awajeatsna nuka Yus Apancha shiir awajeatsui' Tímiayi.

`Ti nekasaiti. Winia chichamprun ántana Nú shuarka Winia Akuptukun Enentáimtak ni iwiaakmarin tuke amuukashtinian takakui. Nu shuarsha Ayashí iwiaakuitiat Jákauyi antsu Yamái nekas iwiaakuiti. Tuma asa sumamashtatui.

Ti nekasaiti. Tsawant winittiana nu jeayi. Nu tsawant jaka ainia nu Wi untsumman antukar umirkarka iwiaaku ajasartatui.

Iis, winia Apar iwiaaku awajsatniun takakui. Tura Winiasha, ni Uchirí asamtai, iwiaaku awajsatniun surusuiti.

Nu arantcha wi Aents Ajasu asamtai, shuaran Súmamtikiatniun surusuiti.

"Ju chicham itiurchataiti" Enentáimprairap. Atak tsawantai wi untsumman Ashí Jákaru ainia nu antukartatui.

Tura Ashí iwiarsamunmaya Jíinkiartatui. Pénker Túrawarusha nantakiar tuke iwiaaku pujusartatui. Antsu Tunáa Túrawarusha nantakiar jinium surunkartatui' Tímiayi.

`Imia Wíki takaatsjai. Antsu Yus tana Núnisnak Súmamtikeajai. Wi wakeraj nuna Enentáimtsuk antsu winia Apar wakera nuna wakerukan, Nii akupta asamtai, awajitsuk Súmamtikjai.

Aya Wiki "Yúsaiyaitjai" Tákunka winia chichamur ántar ainti.

Chikichcha awai. Niisha "Yúsaiyaiti" Túrutui. Ni chichamesha Imiá nekasaiti.

Atumsha Juankai wi Túramu inintrusmarme tura nii timia nu nekasaiti.

Tuma ain aents Táman atsumatsjai. Antsu Juanka chichame Enentáimkiuram uwempratarum tusan Tájarme.

Juansha jiya Núnis keemai. Atumsha ishichik tsawantin Nú Tsáapninnium warastin Enentáimpramarme.

Tura Winia "Yúsaiyaiti" Túrutna nu, Juanjai nankaamas pénkeran takakjai. Wi takasma Núiti. Winia Apar takastinian surusma nuna takaakun nujai Páantaiti Yus Apa akupkamuitjai.

Winia Aparsha, akuptuku asa, ayamprutui. Túrasha átumka ni chichamesha antukchaitrume tura Wáintiash Wáinkiachuitrume.

Yus Apa akuptukuiti. Tuma asamtai Winia Enentáimturchakrum winia Aparu chichamesha atumi Enentáin wayachuiti.

Atumka Yus-Chicham yaunchu aarma nui iwiaaku átinian Wáinkiataj tusarum ti unuimiaruitrume. Nu chichamsha Wínian áujmatui.

Tuma ain nekas iwiaaku átaj tusarum Winí Tátin nakitiarme" Tímiayi.

"Shuar Winia "Shíiraiti" Túrutainiakuisha nuna Páchiatsjai.

Maa, Wi nékajrume. Atumka Yus aneatsrume.

Winia Apar akuptukmatai Táwitjai Túrasha nakitrarme. Antsu Chíkichka Ní Enentáijiain jeartamkuinkia nuka átum wakerarme.

Atumka Nuámtak "Shiir Enentáimtursatí" tu Enentáimtunaiyarme. Tura Yus Enentáimturma nuka Páchiatsrume. Nújainkia ṡitiurak Yus Enentáimtustam?

"Ii tunaarin Yusai etserturmaktatji" turutiirap. "Muisais akupkamun umirkan uwemprattajai" Tátsurmek. Antsu Muisais aarma nujai Atumí tunaari etsernaktatui.

Iis, Muisais Winia aatrurmiayi. Atumsha ni timia Enentáimtakrumka Winiasha Enentáimturaintrume.

Tura ni aarma Enentáimtachkurmeka ṡitiurak wi tama Enentáimtustarum?" Tímiayi Jesus.

Nu nankaamasmatai Jesus Kariréa antumiannum amain katinmiayi. Nu antumiansha Tipirias antumian tuiniawai. Jimiará Náartiniaiti.

Untsurí shuar Jesus ti Jáinian Timiá Wárik tsuan Wáinkiaru ásar Niin nemariarmiayi.

Israer-shuara paskuanamperi ishichik ajasmatai Jesussha ni unuiniamurijiai Náinnium waka nui pujusmiayi.

Jesussha Untsurí aents wininian Wáiniak Jiripin Tímiayi "Timiá Untsurí shuar ayuratniusha ṡtuyan yurumak sumaktaj~i?' Tímiayi.

Kame Jesuska Nii Túrattana nuna neka asa Jiripi warittin tusa Tímiayi.

Jiripisha Nuyá Tímiayi "Timiá nukap kuitjai tanta sumakmesha Ashí ishichik susamsha jeachaintjia" Tímiayi.

Nuyá Chíkich unuiniamuri Antres, Pitru yachi, Tímiayi

"Uchi jui senku (5) tantan Jimiará namakjai takakui. Ausha Timiá Untsurínmasha jeatpiash" Tímiayi.

Nuyanka ""Ashí pujustarum" titiarum" Tímiayi Jesus. Aishmansha nuwasha uchisha irunmiayi. Tura Chírichri Núkap aa asamtai nuisha senku mir (5.000) aishman pujusarmiayi.

Jesussha nu tantan achik Yúsan yuminkias ni unuiniamurin susamiayi. Niisha Ashí nui pujuinian Súsarmiayi. Namaknasha Núnisan Ashí ni wakeriarmiania nuna Súsarmiayi.

Jémararmataisha Jesus ni unuiniamurin Tímiayi "Ampirma Júukrum chankinnium chumpiatarum. Wasúrnákain."

Niisha senku (5) tantanmaya ampirman Júukar tuse (12) chankinnium aimkiarmiayi.

Nu shuarsha Jesus Túramun iisar tiarmiayi "Ju nekas Yúsnan etserin Tátinia Núchakait."

Shuar Jesusan uunt akupin awajsataj tutai Jesus Nekáa Ninki Náinnium wémiayi.

Kíakui Jesusa unuiniamuri antumiannum wearmiayi.

Káshisha Jesus tuke Táchamtai uunt kanunam Enkemáwar Kapernáum péprunam wéenak Jíinkiarmiayi.

Tura nase ti Umpúakui Chíchimi ti wajaimiayi.

Ajapén ajasar Jesus Entsá Pátatek nanamas Tíjiuch winian Wáinkiar ashamkarmiayi.

Tura Jesus "Wiitjai. Ashamprukairap" Tímiayi.

Nújainkia ti shiir warasar kanunam itiaawarmiayi. Tura nu chichamtaik ni wéamunam jeawarmiayi.

Kashincha Chíkich shuar amain ayuramunam kanararu nekaawarmai. Jesusa unuiniamuri Jesusjainchu chikichik kanu amia nujai wéarun nekaawarmai.

Nui chichak matsatai Tipirias péprunmaya Chíkich kanu Táarmiayi. Yau Jesus Yúsan yuminkias tantan ayuramunam Tíjiuch Táarmatai

nu shuar, Jesussha ni unuiniamurisha nui atsuiniakui, nu kanunam Enkemáwar Kapernáum péprunam Jesusan Eáktajtsa wearmiayi.

Entsa amain Jesusan Wáinkiar aniasarmiayi "Uunta, ṡUrutía juisha Támam?"

Jesussha Tímiayi "Ti nekas Tájarme. Aents tujintiamu Nekáa asarum éatsurme. Antsu tanta yuarum jémaru asarum éatrume.

Juyá yurumak amuukatin asamtai ti pachisairap. Antsu amuukashtin yurumak tuke iwiaaku pujustinian amaana nu takarsatniuiti. Nú yurumkanka Wi, Aents Ajasu asan, susattajrume. Yus Apa nuna Túratniun surus "Juka Shuáran Yáinkiartiniaiti" Túrutui" Tímiayi.

Tutai inintrusarmiayi "ṡWarí Túratniuitiaj~i Yus wakerana nu umiktin?"

Jesussha Tímiayi "Yus akupta asa Winia Enentáimtursarat tusa wakerawai."

Tutai aniasarmiayi "ṡAentsti tujintiamuka Warí Túrattam ii iisar Amin nekas Enentáimtustin? Chikichcha Túratá.

Yaunchu ii uuntri aents atsamunam Maná yurumkan nayaimpinmaya susamun Yurumáwarmiayi. Yus-Chichamnum Núnik aarmaiti: "Nayaimpinmaya yurumkan Yus susamiayi." Tu aarmaiti" tiarmiayi.

Jesussha Tímiayi "Wi Tájana nu nekasaiti. Muisais Atumí uuntrin nayaimpinmaya yurumkan Súsachmiayi. Antsu winia Apar Yamái nekas apatkun nayaimpinmaya Súramui.

Iis, Yusaiya apatkunka, nayaimpinmaya Tára nu Súramui tura nekas apatuk asa Ashí shuaran nekas iwiaakman Súawai."

Tutai "Uunta, nu apatuk tuke amasta" tiarmiayi.

Tura Jesussha Tímiayi "Wiitjai nu apatuk nekas iwiaakman Súana nu. Winí winiana Nú shuar penké tsukamashtatui, tura Winia Enentáimturna nusha tuke kitiaarchattawai.

Túrasha wi Túramu Wáinkiurmesha winia chichamur Enentáimtatsrume.

Ashí shuaran winia Apar tsankatrukarmiania nu, Wíi shuar ajasartatui. Winin winiana Núnaka penké nakitrashtatjai.

Wi wakeraj nuna Túratniun Táchaitjai antsu Winia akuptukmia nuna umirkatniun Táwitjai.

Winia Apar akuptukuiti tura juna wakerawai. Ashí winia tsankatrukman Emenkátsuk amuukatin tsawantai iniantkiarat tusa wakerawai.

Yus Apa wakerana nu Júiti. Ashí shuar Winia "Yusa Uchirinti" tu Enentáimturkui yamaram iwiaakman tuke takusat tusa wakerawai. Nú shuarnaka amuukatin tsawantai iniantkittiajai" Tímiayi Jesus.

Tura Jesus "Wiitjai, nayaimpinmaya apatuk akupkamu" takui Israer-shuar Jesusan áujmatiarmiayi.

Tura tiarmiayi "Ju Jesuschakait, Jusé Uchiríya nu. Iikia ni Aparísha Nukurísha nékatsjik. ṡItiurak "Nayaimpinmaya Táraitjai" ta?" tiarmiayi.

Jesussha Tímiayi "Tu áujmatrukairap.

Shuáran winia Apar Akúpturkachuitkiuinkia penké weanturkachainti. Tura Winia akupturna nuna amuukatin tsawantai Iniántkíttiajai.

Yúsnan etserniu aarmarin tawai "Ashí Yus jintintiamu ártatui". Núnisan Ashí Yusa chichamen antukar unuimiatainiakka Winí Táiniawai' Tímiayi.

`Aya Wiki Yúsaiya tau asan Yúsan Wáinkiaitjai. Chíkichka penké Wáinkiachuiti.

Ti nekas Tájarme. Winia Enentáimturna Nú shuarka yamaram iwiaakman amuukashtinian takakui.

Wikia iwiaakman Súana Nú apatkuitjai.

Iis, Atumí uuntri aents atsamunam Maná yurumkan Yúawariatcha Ashí Jákarmiayi.

Antsu Wi Tájana Nú apatkun shuar Yúakka Jákachartatui.

Wikia nayaimpinmaya iwiaaku apatkuitjai. Nu apatkun shuar yuakka tuke iwiaaku átiniaiti. Nu apatkun Wi susattaj nusha winia ayashruiti. Ashí shuar Yusai iwiaaku pujusarti tusan winia ayashrun susattajai" Tímiayi Jesus.

Nuyá Nuámtak áujmattsar tiarmiayi "ṡItiurak ni ayashinkesha ayurtamattaj~i?" tiarmiayi.

Jesussha Tímiayi "Ti nekas Tájarme, Wi Aents Ajasu asamtai winia ayashur Yúatniuitrume. Winia ayashur Yúachmeka tura winia numpar umarchamka nekas iwiaaku pujatsrume.

Winia ayashrun Yúana nuka tura winia numparun úmakka yamaram iwiaakman amuukashtinian takakui. Tura nu shuaran amuukatin tsawantai Iniántkíttiajai.

Winia ayashruka nekas yurumkaiti tura winia numparsha nekas umutainti.

Winia ayashruncha Yúaka tura winia numparnasha úmaka Wijiai tsanin pujawai tura Wisha nu shuarjai tsaninkian pujajai.

Yus Apa, Winia akuptukuka, nu iwiaakma nérenniuiti. Tuma asamtai ni iwiaakmariin iwiaaku pujajai. Núnisan Winia yurakka winia iwiaakmarui iwiaaku pujustatui.

Nayaimpinmaya apatkun tajai. Ju apatuk Maná yurumka aintsachuiti. Atumí uuntri Maná yurumkan yuawarsha Ashí Jákarmiayi. Antsu ju apatkun shuar Yúakka tuke iwiaaku pujustatui" Tímiayi Jesus.

Núnaka Jesus Israer-shuar iruntainiam unuiniarmiayi.

Nu chichaman antukar Jesusa unuiniamuri chicharainiak "Nii tana nu ti itiurchat asamtai ṡyaki antukminiait?" tiarmiayi.

Jesussha ni áujmatman Nekáa Tímiayi "Atum "ju chicham itiurchataiti" Tárumek.

Wátsek, Wi nayaimpiniam pujumiaj nui waketkimtaisha ṡurukawaintrumek?

Warí, aya wakanik iwiaakman Súwaiti. Ayashkia penké aantraiti nekas iwiaaku awajsatniun. Wi Tájana nujai Imiá nekas wakankia iwiaaku awajsamniaiti" Tímiayi Jesus.

Tura Jesus Niin Enentáimtachun tura Niin suruktatna nunasha yaunchu neka asa ni unuiniamurin Tímiayi "Atumíincha winia chichamprun Enentáimtachu tuke awai.

Nu asamtai Tímiajrume "Shuáran winia Apar akupturkachmaitkiuinkia penké weanturkachainti" Tímiajai" Tímiayi Jesus.

Nuyasha ni nemarniuri Untsurí armia nu Jesusan ikiukiar atakka Niijiai wekasacharmiayi.

Nuyá Jesus ni tuse (12) unuiniamurin chicharainiak "ṡAtumsha wétin wakerarmek?" Tímiayi.

Semun Pítrusha áikmiayi "Uunta, ṡYáinin wetaj~i? Ame chichammijiain nekas iwiaaku áminiaiti.

Ame Kristu asam nekas iwiaaku Yusa Uchirínme. Nuka Enentáimtusar ti paant nékaji" Tímiayi.

Jesussha Tímiayi "Ashí tuse (12) árumna nu achikiuitjiarme nekas Wíi shuar ajastin. Tuma ain Atumíin chikichik iwianchiiti" Tímiayi.

Nuna taku Jútas Iskariútin, Semunka Uchirín, Enentáimtus Tímiayi. Jútassha ni unuiniamurintiat Jesusan ukunam surukmiayi.

Nu nankaamasmatai Jesus Kariréa nunkanam wekaimiayi. Jutía nunkanam wéchamiayi Israer-shuara uuntri nui Máataj tutai.

Tura Israer-shuar aak aakmatai namperi jeatemamtai

Jesusa yachi wishikiainiak tiarmiayi "ṡUrukamtai juisha pujam? Jutía nunkanam Wetá, aisha ame unuiniamuram Túram nuna iisarat.

Ashí shuar nekaawarat Tákumka úukam Túrawaip. Ti tujintiamu Túriniaitkiumka Ashí shuar iimmianum Túratá" tiarmiayi.

Ni yachisha ishichkisha Niin Enentáimtachu ásar tiarmiayi.

Tura Jesus Tímiayi "Winia tsawantur nampernum wétin jeatsui. Atumjainkia Nánkamas tsawant wétin pénkeraiti.

Ju nunkanmaya aents atumniaka kajertamatsrume. Antsu ni tunaarin etsertin asamtai Wíniaka kajertuiniawai.

Atumka nampernum wetarum. Wikia tsawantur jeachkui wéatsjai."

Juna tinia Jesuska Kariréa nunkanam Juákmiayi.

Ni yachi wearmatai Jesussha nampernum wémiayi. Tura nekarawarain tusa úumak wémiayi.

Israer-shuara uuntrisha Námper irunturmanum eakar "Nu aishmansha ṡtuin Pujá?" tiarmiayi.

Ashí shuarsha Niin áujmatiarmiayi. Chíkich "pénkeraiti" tiarmiayi. Tura chikichcha "Pénkerchaiti. Aya anankartawai" tiarmiayi.

Tura Israer-shuara uuntrin ashamainiak uuk áujmatiarmiayi.

Nampersha ajapén ajasmatai Jesus Yusa Uunt Jeen Wayá Shuáran unuiniamiayi.

Israer-shuara uuntrisha nuna iisar ti Enentáimsar chichaak "Jusha Unuimiátrachiatcha ṡitiurak Imiá neka?" tiarmiayi.

Jesussha Tímiayi "Wi unuiniajna nu winia chichampruchuiti antsu Winia akuptukua Núnan unuiniajai.

Yus wakerana nuna shuar nekas umiktinian wakerakka winia chichamprun nekaattawai. Nekas Yúsnaitkiuinkia, nuna nekaattawai. Aya wi Enentáimmiajain chichaakuisha, nuna nekaattawai.

Ni Enentáimmiajai chichaana nuka Ashí shiir Enentáimtursarti tusa chichaawai. Antsu niin akupka nuna shiir awajsarti tusa wakerak, nekas Wáitratsuk tawai.

Muisais Yusa akupkamurin Atumí uuntrin amaschamka. Tuma ain nu umitsuk mantuatin wakerutarme" Tímiayi Jesus.

Nu shuarsha tiarmiayi "Wáurtsumek. ṡYa mantamataj tusa wakera?"

Jesussha Tímiayi "Ayampratin tsawantai Chikichkí Túramtai ti Enentáimtsurmek.

Muisais Ashí tsupirnaktinian akupkachmiayi. Antsu ni uuntrinkia nuna akupka ainiawai. Tuma ain átumka Muisais akupkamu umiktai tusarum ayampratin tsawantaisha uchi aishman Tsúpirnaitrume.

Wátsek, Muisais akupkamu uminkiati tusarum ayampratin tsawantaisha uchi aishman Tsúpirkurmekaka ṡurukamtai Wi ayampratin tsawantai aishmanka Ayashí takamtsuk Tsuármatai kajertarum?

Shuar Túrana nu iisam Wárik Súmamtikiawaip. Antsu Inintrúsam paant nekaam, nekasa nu Enentáimtusta" Tímiayi Jesus.

Nuyá Jerusarénnumia shuar tiarmiayi "Maatai tuinia Núchakait.

Tura nui Ashí ántamunam étserui tura suntar Páchiniatsui. ṡIi uuntrisha "Nekas Krístuiti" tu Enentáimtuiniawash?

Antsu nekas Kristu taa tuyan Winiá nekanashtatui tura ju pujamuka Ashí nékaji" tiarmiayi.

Jesus nuna antuk, Yusa Uunt Jeen Wajá kakaram chichaak Tímiayi "Winia nekararum Tuyá winiaj nu nékarme. Kame Núnisrum Enentáimprume. Tura winia Enentáirjai Táchaitjai antsu winia Apar akuptukuiti. Niisha ti nekas akupniusha átumka nékatsrume.

Antsu Winia akuptukuitkiui aiya tau asan Wikia nékajai" Tímiayi.

Nuyá sepunam enkeataj Táyat achikcharmiayi ni tsawantri jeachu asamtai.

Tura Untsurí shuar Niin Enentáimtusar "Kristu ta ṡnuna nankaamas aentsti tujintiamun Túratpiash?" tiarmiayi.

Pariséusha Israer-patri uuntrisha Jesusnan timian antukar suntaran akupkarmiayi Jesusan achikiar sepunam enkeawarat tusar.

Nuyá Jesussha Tímiayi "Aya ishichik tsawant atumjai pujustatjai. Nuyá ataksha Winia akuptuku pujana nui waketkittiajai.

Atumka Eátkáttarme tura Wi wéajna nui wéchamniaitkiuram Wáitkiashtatrume."

Israer-shuarsha nuamtak aniniaisarmiayi "ṡJusha tui wéakuin iisha Wáinkiashtataj~i. Israer-shuar apachnium pujuinia nui we apachin unuiniartatuak.

Nii timia nu itiurkit. "Atumka Eátkáttarme tura Wi wéajna nui wéchamniaitkiuram Wáitkiashtatrume" tana nu itiurkit?" tiarmiayi.

Jista Amúamunam ti shiir najanawarmia nu tsawantai Jesus wajaki kakaram chichaak Tímiayi "Shuar ni Enentáin kitiamakka Winin taa umar kitiakén Imíkráti.

Winia Enentáimturna nuka ni Enentáiya entsa wa aintsan yamaram iwiaakman Súana Nú entsa jiinkittiawai."

Nuna taku Jesus "Ashí Yúsan Enentáimtusarun Yusa Shiir Wakaní Súsatniuiti" Tímiayi. Tura Núnisan Yus-Papiniumsha aarmaiti. Antsu Jesus tuke nayaimpiniam wéatsain Yusa Wakaní shuar Súsachmauyayi.

Chíkich shuarsha nuna antukar "Ju nekas Yúsnan etserin Tátinia Núiti" tiarmiayi.

Chikichcha "Juka nekas Krístuiti" tiarmiayi. Tura Chíkichkia Jesus Kariréanmayaiti tu Enentáimiainiak tiarmiayi "Warí, ṡKariréa nunkanmaya Kristu áminkiait?

Yus-Papinium paant tawai "Krístuka yaunchu uunt akupin Tawit weeanmaya akiiniatniuiti, tawai. Tura Tawitia pépruriya Pirinnumia átiniaiti" tawai" tiarmiayi.

Tuma asamtai shuar Niisháa Niisháa Enentáimprar kanakiarmiayi.

Chíkich aiya nuka "sepunam enkeatai" tiarmiayi Túrasha Túracharmiayi.

Suntarsha waketkiarmiayi. Tura Pariséusha Israer-patri uuntrisha "ṡUrukamtai itiachuram?" tiarmiayi.

Suntarsha tiarmiayi "Chikichkisha ju aishman chichaa aanis chichaschaiti" tiarmiayi.

Nuyá Pariséu tiarmiayi "Atumsha anannarume.

Pariséutisha uuntcha nuna Enentáimtuiniawash.

Penké shuarka yaunchu akupkamun nékachua nuka yajauchiniam yuminkramu ainiawai" tiarmiayi.

Nikiutémusha, kashi Jesusan tarimia nu, Pariséuitiat Tímiayi

"Ii shuartikia, shuar ni Túramun etserkamu ántutsuk Súmamtikiachminiaiti" Tímiayi.

Nuinkia niisha tiarmiayi "Wats, amesha Kariréanmayanchuashitiam. Yus-Chicham áujsam nekaattame. Kariréanmaya Yúsnan etserin penké Táiniatsui" tiarmiayi.

Nuyá Ashí ni jeen waketkiarmiayi.

Tura Jesuska Uriwiu Náinnium wémiayi.

Tura kashin tsawar Yusa Uunt Jeen atak Támatai Ashí shuar Niin Káutkarmiayi. Túrawarmatai Jesus pujus unuiniarmiayi.

Nuyá Israer-shuara jintinniurisha Pariséusha nuwan Wáinmakman Jesusan itiariarmiayi. Tura Ashí iruntramunam ajapén awajsarmiayi.

Tura Jesusan tiarmiayi "Uunta, ju nuwa tsanirma Pujá achinkiayi.

Muisais akupkamunmasha nuna Túraka "kayajai tukurar Máatniuiti" tawai. ṡAmesha warintmea?" tiarmiayi.

Aya mamikmar nekapsatai tusar tiarmiayi. Niin sumamtikiatniun wakeriarmiayi. Nuyá Jesus Tsuntsumá ni uwejéjai Nunká aarmiayi.

Tura tuke Iníam wajaki Tímiayi "Ayu, atumiiya Tunáa Túrichu ákunka kayan achik niin emka tukuti" Tímiayi.

Tura nuna ti, ataksha Tsuntsumá Nunká aimiayi.

Tura ni chichamen antukar ni Enentáin sumamawar uuntnumia Jukí chikichik chikichik jiinki wéarmiayi. Ashí wéarmatai Jesus Ninki Nuwájai Juákmiayi.

Jesussha wajaki aya nuwanak Wáiniak Tímiayi "ṡAmin Súmamtikramainia nusha tuin pujuinia. Chikichkisha áwak?" Tímiayi.

Niisha "Atsá, Uunta. Chikichkisha atsawai" Tímiayi. Nuyá Jesus Tímiayi. "Ayu. Wisha Súmamtikiatsjame. Yamaikia weme atakka Tunáa Túrawaip" Tímiayi.

Ataksha Jesus Yusa Uunt Jeen iruntrarun Tímiayi "Ju nunkanam Wi Tsáapninia aintsan shuara Enentáin Tsáapniajai. Ashí Wijiai tsanin wekaana Nú shuar ni Enentáin kiritniunam wekasashtatui antsu Tsáapnin yamaram iwiaakman Súana nujai wekasattawai."

Pariséu nuikia tiarmiayi "Ame pénkerum tau asam Támena nu aantraiti."

Jesus Tímiayi "Tuyá winiaj tura tui weaj nu nékatsrume, tura Wikia nékajai. Tuma asan winia pénkerun Táyatnak Tájana nu pénkeraiti.

Ju nunkanmaya aents Enentáimmiajai Enentáimtakrum ti Súmamtikrume. Tura Wikia chikichkinkesha Súmamtiktsujai.

Tura Súmamtikkiunka awajitsuk Túrajai. Iis, Wiki shuar Túramun pénkerashit tusan Enentáimtsujai antsu winia Apar Winia akuptukua nusha Wijiai métek shuar Túramun nékawai.

Atumí akupkamuriin aarmaiti: "Jimiará shuar mai Nú chichamnak Tákuinkia nu chicham nekasaiti."

Wátsek Wisha winia Aparsha mai métek taji. Winia Aparsha akuptukuiti" Tímiayi.

Tutai "ṡAme apasha tui Pujá?" tiarmiayi. Jesussha Tímiayi "Atumka Winiasha winia Aparsha nékatsrume. Winia nékarkurmeka winia Aparsha nekaawaintrume."

Nuna Yusa Uunt Jeen Yusa Kuítrin suinia nui Tímiayi. Tuma ain sepunam enkeatniun achikcharmiayi ni tsawantri jeachu asamtai.

Jesus ataksha Tímiayi "Wikia wéajai. Atumsha Eátkáttarme tura wi wéamunam wéchamniaitkiuram Atumí tunaarijiain jakattarme."

Israer-shuarsha tiarmiayi "Wi wéamunam wéchamniaitrume" tutai, nuinkia Máamatpiash" tiarmiayi.

Nuinkia Jesus Tímiayi "Atumka nunkayaitrume antsu Wikia nayaimpinmayaitjai. Ju nunkayaitrume tura Wikia juyanchuitjai.

Tuma asamtai Tájarme "Atumi tunaarijiai jakattarme." Nekas Wi Tájana Núitjai. Tura nu Enentáimtachkurmeka atumi tunaarijiai jakattarme" Tímiayi.

Niisha aniasarmiayi "ṡAmesha Yáitiam?" Jesussha Tímiayi "Yaunchu Tájarme.

Nu arantcha atumin Súmamtikiatjarum tusan ti Tíminiaitjai. Winia Apar akuptukua nuka tuke nekasa nuna tawai. Tura aya ni taman antukan Ashí shuaran nunak tajai" Tímiayi.

Tuma ain ni Aparin áujmatman penké nekaacharmiayi.

Tuma asamtai Tímiayi "Aents Ajasuitjiana ju, numiniam ajintruarum Yakí takuriakrumin Nújainkia nekarattarme. Wi Tájana Núitjai tura winia Enentáirjain takatsuk aya winia Apar unuitiurmanak Tájai.

Winia akuptukua nuka tuke Wíjiain pujawai. Winia Apar wakeramun tuke shiir Túrakui ikiurkichuiti" Tímiayi.

Tutai Untsurí shuar Niin nekas Enentáimtusarmiayi.

Israer-shuaran Niin shiir Enentáimtusarmia nuna Jesus Tímiayi "Wi Tájarmena nu yawetsuk Túrakrumka nekas winia unuiniamur átatrume.

Nújaisha Timiá nekas ana nu nekaattarme tura nekas ankant ajastatrume" Tímiayi.

Niisha tiarmiayi "Iisha Apraám weeaitji. Chikicha takarniur átai tusar penké emetachmaitji. ṡUrukamtai "Ankant ajastatrume" tame?" tiarmiayi.

Jesus Tímiayi "Timiá nekasaiti, Ashí shuar tunaan Túruinia nuka nu tunaajai emetamuiti. Tuma asa takarniua Núnisan ajasuiti.

Takarniusha ajapnamnia asamtai Yus atumin ajapramamniaitrume. Tura Akupniu Uchirínkia ni Aparíjiai tuke pujawai.

Tuma asamtai Akupniu Uchirí ankant awajtamsamtainkia Imiá nekas ankant pujustatrume.

Atum Apraám weeaitrume nékajai. Túmaitiatrum winia chichamur ántachu asarum mantuataj Tárume.

Winia Apar iniaktursamun áujmatjai. Atumka Atumí uuntri timia Túrarme" Tímiayi.

Tutai niisha tiarmiayi "Iikia Israer-shuar asakrin ii uuntrinkia Apraámaiti" tiarmiayi. Tura Jesus Tímiayi "Nekas Enentáimin Apraám weeaitkiurmeka Níiya Núnis Túrawaintrume.

Nekas ana nuna Yus iniaktursamtai nuna ujakjarme, tuma ain mantuataj tarume. Apraámka Nuní Túrachmiayi.

Antsu Atumí uuntri Túrana aintsarum Túrarme" Tímiayi. Tutai niisha tiarmiayi "Warí, tsanirnumia akiiniachuitji. Ii uuntri Yúskete. Niisha ii Aparínti."

Tura Jesus Tímiayi "Yus nekas atumi Aparíntkiuinkia Winiasha Anentíntrume Yúsnumia tau asamtai. Wisha winia Enentáimmiarjai jui Táchaitjai antsu Yus akuptukuiti.

ṡUrukamtai Wi Tájana nu Imiá nékatsrum? Wi Tájana nu nakitia asarum winia chichamur ántatsrume.

Atumí Aparínkia uunt iwianchiiti. Tura niiniu asarum nii wakera nu Túrarme. Yámankamtaiksha uunt iwianchkia tuke mankartiniaiti. Nekas ana nunasha nakitiawai tuke Wáitrin asa. Wáitraksha Níiniunak chichaawai. Iis, waitia uuntri asa tuke Wáitriniaiti.

Tura Wikia nekas takui átum Enentáimturtsurme.

ṡYaki Chikichkí tunaajai Súmamtikruamniait? Nuikia Wi nekasa nuna tau aisha ṡurukamtai Enentáimturtsuram?

Yús-shuarka Yus timian ántawai tura átum Yúsnachu asarum Wi Tájana nu nakitiarme" Tímiayi.

Nuikia Israer-shuar tiarmiayi "Maa, ti nekas Tátsujik "Ame Samarianmaya Shuáraitme. Tuke yajauch ainiawai nusha. Nu arantcha iwianchrukuitme amesha" nekas taji" tiarmiayi.

Jesussha Tímiayi "Iwianchrukchaitjai. Ayatik winia Aparun shiir Enentáimtikiajai. Tura átumka yajauch chichartarme.

Wikia "shiir Enentáimturarti" Tátsujai Túrasha Yuska Ashí shuar Winia shiir Enentáimturat tusa wakerawai. Niisha Yus asa Ashí shuar Túramun pénkerashit tusa nekaattawai.

Ti nekasaiti. Wi Tájana nuna Enentáimta Nú shuarka penké Jákashtiniaiti" Tímiayi.

Nuinkia Israer-shuar tiarmiayi "Pai, yamaikia ti paant íwianch takakme. Apraámsha Ashí Yúsnan etserniusha Jákaruiti tura Ame "Wi Tájana nuna Enentáimtaka penké Jákashtiniaiti" Tátsumek tiarmiayi.

ṡNuinkia ii uuntri Apraám nankaamaskaitiam. Niisha tura Yúsnan etserniusha Jákacharuk ainia. Itiurak Imiá nankaamantu Enentáimtumam?" tiarmiayi.

Jesussha Tímiayi "Wiki shiir Enentáimtumaknaka penké aantraiti. Antsu Winia shiir Enentáimturna nu winia Aparuiti. Nusha átumka "winia Yúsruiti" Tárumna Núiti.

Nusha Táyatrum Niin nékatsrume. Wikia Niin nékajai. "Niin nékatsjai" Tákunka atumjai métek Wáitrin aintjai. Tura Niin neka asan Nii tana nuna tuke Túriniaitjai.

Apraámka, Atumí uuntri, Imiá yaunchu Jákaitiat Wi ju nunkanam Tátinian wararas Nákasmiayi. Tura Wáitiak ti shiir warartusmiayi" Tímiayi.

Nuyá Israer-shuar Jesusan tiarmiayi "Warí, senkuenta (50) Uwí takaktsume Túmaitiatam Apraáman Wáinkiámjai tame."

Jesussha Tímiayi "Ti nekas Tájarme, Apraámka pujatsain Wikia pujajai" Tímiayi Jesus.

Nuna takui kayan achikiar "Jesusan tukutai" tiarmiayi. Tura Jesus úumak ni matsatmanum ajapénin weak Yusa Uunt Jeenia jiinki wémiayi.

Jesus ni unuiniamurijiai wesa aishmankan kusuru akiinian Wáinkiamiayi.

Ni unuiniamurisha aniasarmiayi "Uunta, jusha ṡurukamtai kusuru akiiniawit. Yana tunaarijiain kusuru akiiniait. Niiniujaimpiash, Aparíniujaimpiash Túrunawit?" tiarmiayi.

Jesus Tímiayi "Ni tunaarijiainchusha ni Aparíniujainchusha Túrunaiti. Antsu Yus ni Ayashín Túratniua nu paant Atí tusa Túrunaiti.

Tsawaikia takastiniaiti. Yamaikia Winia akuptukua nuna Takatrín Túratniuitjai. Kashi ajasmatai takastin atsuttawai.

Jú nunkanam pujakun shuara Enentáin Tsáapnimtikratniuitjai" Tímiayi.

Nuna chichas Nunká usukmi nunkajai pachimiar kusuru jiin yakarmiayi.

Nuyá chichaak "Siruí pajamtai entsanam nijiamauta" Tímiayi. Siruísha nu chichamnum "akupkamu" tawai. Kusurusha we nijiamar pénker iimiar Támiayi.

Nuyá ni írutkamurisha nuik Wáinin ármia nusha tiarmiayi "Juka pujus tuke Kuítian seamniuya Núchakait."

Chíkich "Ee, Núkete" tiarmiayi. Chikichcha "Atsá, Núchaiti; kame nuash tumainti" tiarmiayi. Tura ninki "Ee, wiitjai" Tímiayi.

Tutai aniiniak "ṡItiurak yamaikia iimiam?" tiarmiayi.

Niisha Tímiayi "Aishman Jesusa nu tsakusan Jíirun yakartur "Siruí pajamtai entsanam nijiamauta" turutmiai. Takui wena nijiamaran paant iimpramjai" Tímiayi.

Tutai "Nu aishmansha tuin Pujá" tiarmiayi. Niisha "Cha, nékatsjai" Tímiayi.

Nuyá kusuru Tsuárman Pariséunam Júkiarmiayi.

Kame Jesus kusurun tsuarmia nui ayampratin tsawantauyayi.

Tuma asamtai Pariséusha itiurak iimnium tusar aniasarmiayi. Niisha Tímiayi "Jiiruin tsakusan Yakaarámtai, nijiamaran paant iimjiai."

Nuyá Chíkich Pariséu shuarnumia nuamtak tunaiyar "Juna Tsuáruka Yúsaiyanchuiti. Kame ayampratin tsawantai Túraiti" tiarmiayi. Tura chikichcha "Tunáa shuaraitkiuinkia Júnisan Túratniun tujinkiaayi" tiarmiayi. Nujai akannaikiarmiayi.

Tsuármancha ataksha aniasarmiayi "Amin Tsuármarua nu ṡWarí Enentáimtam?" tiarmiayi. Tutai "Wikia "Yúsnan etserniuiti" tajai" Tímiayi.

Tura Israer-shuar nekas kusuruitiat Yamái iimiui tu Enentáimtuscharmiayi Pariseu. Tuma ásar ni Aparíncha untsukar

inintrusarmiayi "ṡAme uchiram kusuru akiinia Tárumna nukait. Itiurak yamaikia iimia?" tiarmiayi.

Ni Aparísha tiarmiayi "Ii Uchirínkia kusuru akiiniama nu nékaji.

Tura iisha nékatsji itiurak yamaikia iimia. ṡYátsuk pénker Tsuáruit? Niisha uuntchakait, nii aniastarum. Ninki ujatmakarti" tiarmiayi.

Sapijmiak tiarmiayi. Israer-shuara uuntrinkia "Jesus Yus akupkamu asa nekas Krístuiti" tuinia Núnaka Israer-shuara iruntainmaya jiiki akupnakti tiniu ásarmatai tsuarma Aparí ashamkarmiayi.

Nu asamtai ni Aparí "Niisha uuntchakait, nii aniastarum" tiarmiayi.

Nuinkia Israer-shuara uuntri kusuru Tsuárman ataksha untsuk tiarmiayi "Yus iimmianum nekasa nu Titiá, ju aishmankka tunaarinniuiti nékaji" tiarmiayi.

Tutai Tímiayi "Kame tunaarinchashit. Nékatsjai. Antsu junak nékajai. Yaunchu kusuruitiatan yamaikia iimjiai."

Ataksha aniiniak "ṡItiurtámkama. Itiur iimtikrammia?" tiarmiayi.

Niisha Tímiayi "Yaunchu Tájarme tura anturtatsrume. ṡUrukamtai ataksha titi tusa wakerarum. Niiniu ajastin Enentáimprurmek?" Tímiayi.

Nuinkia katsekkar "Ameka Ní shuarinme. Tura iikia Muisaisa Shuárintji, tiarmiayi.

Yus Muisaisan akupkaiti iikia nékaji antsu nu aishman nékatsji. ṡTuyantskait?" tiarmiayi.

Aishman tsuarma Tímiayi "ṡAusha itiurtsuk áminiait? Winia iimtikrurma nu átumka nékatsrume tuyankit.

Paant nékaji tunaarinniun Yus anturtsui. Tikishmatar ni wakeramun Túruinia nunak anturui.

Yáunchusha kusuru akiinian Tsuáruka tuke atsuwaiti.

Ju aishman Yúsaiyanchuitkiunka penké Túrachaayi" Tímiayi.

Nuinkia tiarmiayi "Ameka tunaarintin akiiniaitiatmesha ṡin jintintin átaj tamek?" Nuna tiar jiiki awemarmiayi.

Kusuru Tsuárman jiiki awemarma nuna Jesus nekaamiayi. Tura Wáiniak "Yusa Uchiría nu Enentáimtamek" Tímiayi.

Tsuarma Tímiayi "Uunta, turuttia wisha nekaan Enentáimtustaj."

Jesussha Tímiayi "Wainme. Wiitjai ámijiai chichaajna nu."

Tutai, tikishmatar "Uunta, Enentáimtajme" Jesusan Tímiayi.

Nuyá Jesus Tímiayi "Shuara Enentáin nekaan, akantratajtsan Táwitjai. Ni Enentáin kusuru ain iimtiktinian tura ananmamuk "Yusnan nekaan paant iimjiai" tana nuna ukusturtinian Táwitjai" Tímiayi.

Tutai Pariséu shuar nui pujuarmia nu nuna antukar "ṡNuinkia iikia kusurukaitiaj~i?" tiarmiayi.

Jesussha Tímiayi "Atum kusuruitkiurmeka Atumí tunaari Wáinchakrum sumamachu aintrume. Tura "paant iimjiai" tau asarum sumamaitrume" Tímiayi.

Jesus Tímiayi "Wi Tájana nu ti nekasaiti. Shuar murikiun takakna nu ni murikrin wenuimiunam kashi ikiuawai. Tura murik wenuimiunam pujuiniakui yajauch shuar murikiun kasamkatniun wakerakka Wáitiniam wayachmin asa tanishnum waruk Yajá wayawainti.

Antsu murikiu Wáinniuka Wáitiniam wayaawai.

Waiti Wáinniuka nekas murikiun Wáinniun Wáitin uratui. Muriksha ni Wáinniuri chichamen nékainiawai. Niisha Ashí ni murikrin chikichik chikichik Náarin anaitius Untsúawai. Tura tsawaikia ni murikrin jiiki ayurtainiam yarumui.

Tura Ashí ni murikrin jiir émtuki wéawai. Muriksha ni chichamen ántuiniak untsuam nemarainiawai.

Chíkich Shuárnaka nékachu ásar nemarainiatsui. Antsu ni chichamen nékainiachu ásar pisainiawai."

Nu métek-taku chichamnaka Jesus áujmatsamiayi tura shuar antukar nekaacharmiayi.

Nuyá Jesus Tímiayi "Ti nekasan Tájarme. Wenuimiu Wáitiri murik wainia nuka Wiitjai. Shuarsha murikiu aintsar Winí wayamin ainiawai.

Wi Táatsain Ashí Táaruka kasa ainiak winia shuarun kasamkatai tusa wakeriarmiayi. Tura winia murikiur Wíi shuar ainiak nu shuaran anturkacharmiayi.

Wikia Wáititjai. Ashí Winin wayaaka uwemprattawai. Tura murikiua aintsan wenuimiunmaya jiinki pénker Yurumáttawai tura atak Wayá ayamprattawai' Tímiayi.

`Kásaka aya kasamkatniuncha Máatniuncha emesratniuncha wakerawai. Antsu Wikia yamaram iwiaakman tuke shiir atsumtsuk takusarti tusan Táwitjai.

Wikia pénker Wáinniuitjai. Pénker Wáinniuka ni murikrin uwemtikrartaj tusa jakattawai.

Antsu aya kuitjai takauka ni murikrichu ainiakui tura nekas Wáinniuchu asa pénker Wáintsui. Kame uunt Yawá winiakui murikiun ikiuki pisaawai. Uunt yawasha murikiun achik tsakinmawai.

Nu shuarsha akikiam Takáa asa murikiun Enentáimtatsui. Nu asamtai aya pisaawai' Tímiayi.

`Wikia pénker Wáinniuitjai. Winia Aparsha nékarui. Wisha Aparun nékajai. Núnisnak murikrun nékajai tura winia murikrusha nékarui. Wisha murikiun uwemtikrataj tusan jakattajai.

Chíkich muriknasha takakjai. Nusha ju wenuimiunmayanchu ainiawai. Nunasha itiattajai. Nu muriksha Winia umirtukar Ashí métek matsamsar Chikichík wenuimiunmaya ajasartatui tura chikichik Wáinin átatui' Tímiayi.

`Winia murikrun uwemtikrataj tusan jakattajai turan atak nantaktiatjai. Nu asamtai winia Apar anentui.

Wi wakerakun jakattajai. Wi wakerachkuinkia Chíkichkia mantuachminiaiti. Jákatniuncha tura nantaktinniasha winia Apar surusuiti" Tímiayi Jesus.

Israer-shuarsha nuna antukar Niisháa Enentáimprar kanakiarmiayi.

Untsurí tiarmiayi "ṡUrukamtai ántarum Wáuruk tausha. Yajauch wakanin takaktsuk?"

Tura chikichcha tiarmiayi "ṡYajauch wakantrinniusha Núnisan chichasminkiait. Yajauch wakantrinniusha kusurun iimtikramniashit?" tiarmiayi.

Micha nantutin Israer-shuar Jerusarénnum namperan najanainiawai. Nu nampernumsha Yusa Uunt Jee atak jeamman Enentáimtuiniawai.

Jesussha Yusa Uunt Jee áachiniam wekasamiayi Sarumúnka Wáitiria nui.

Israer-shuarsha Niin téntakar tiarmiayi "ṡAme nekas Krístukaitiam? Ju chichamaik etserkata. ṡUrukamtia nekas paant Tátsum?" tiarmiayi.

Tutai Jesus Tímiayi "Yaunchu tiniu ain Enentáimturachmarme. Winia Apar akupkamun takaajna nu ti paant awajtawai.

Tura átumka winia murikruchu asarum Enentáimturtsurme.

Wisha winia murikrun untsuam anturtuiniak nemartuiniawai. Wisha Wínianak mash nékajai.

Tura yamaram iwiaakman tuke Jákashtinian Súajai. Nu asamtai niisha menkakachartatui antsu Wi wainkia asamtai ṡyaki jurutkit?

Winia Apar murikiun surusuiti. Niisha Ashí nankaamas kakaram asamtai ṡyaki uwejéyan atankit?

Wisha winia Aparjai iisha aya chikichkiitji" Tímiayi Jesus.

Tutai Israer-shuarsha atak kayan achikiar tukutaj tiarmiayi.

Jesussha Tímiayi "Winia Aparu kakarmarijiai ti untsuri pénkera nuna takasuitjai. ṡTújaimpia mantuattarum?"

Israer-shuarsha Niin tiarmiayi "Pénker Túra asakmin Máataj Tátsuji antsu Yus yajauch chicharkumin Túrattaji. Ameka Shuáraitiatam Yusa nuke Enentáimtumame" tiarmiayi.

Nuyá Jesussha Tímiayi "Atumí akupeamuriin Yus timia nu aarmaiti: "Atum Yúsaitrume" tawai.

Kame Yus-Papinium aarma nu tuke nekaschakait. Tuma asamtai ni chichamen antukarun Yuska "Yúsaitrume" takui nuikia ti nekaschakait.

Niisha Yúsaitkiuinkia nuikia Yus Apa anaikia ju nunkanam akupkamu asan ti nekas Yúschakaitiaj. Nújainkia wi "Yusa Uchiríntjai" takui ṡitiurak "Yusan yajauch chicharui" Túrutrum?

Winia Apar Túramu Túrachkuinkia Enentáimtursairap.

Tura nekas Túrakuinkia Enentáimtursatarum. Tura Winia nakitrakrumsha nuikia wi Túramu Enentáimtustarum. Nujainkia winia Apar Winin pujamu Ashí nekaattarme. Núnisnak Wisha Niin pujajai. Iisha chikichkiitji."

Tutai ataksha sepunam enkeatai tiarmiayi. Túrasha Jesus uwempramiayi.

Nuyá Jesus Jurtan entsa amain wé yaunchu Juan imiakrattainium pujusmiayi.

Ti Untsurí shuar iyuwar tiarmiayi "Nekas Juanka aentsti tujintiamun Túrachiat Ashí Jesusnan Tímia nu nekasaiti" tu tiarmiayi.

Nuisha Untsurí Jesusan Enentáimtusarmiayi.

Petania péprunam aishman, ni naari Rásaru, jaa pujumiayi. Nu péprunam Marí ni kaijiai Mártajai pujumiayi.

Niisha Rásaru umai ármiayi. Nu Marisha ukunmanka kunkuinian sumak Jesusan kuer ni Intiashíjiai japirmiayi.

Tura Rásaru jaakui ni umai Jesusan chichaman akuptuiniak tiarmiayi "Uunta, ame amikrum jaawai."

Jesussha nuna antuk Tímiayi "Tuke jakataj tusa jaatsui. Antsu Yusa kakarmarisha tura ni Uchirí kakarmarisha Jú sunkur Tsuármanum paant Atí tusa jaawai."

Jesus Mártancha ni kaincha tura ni umai Rásaruncha nekas aneemiayi.

Túmaitiat Rásaru jaawai taman antukiat ni pujamunam Jimiará tsawant pujusmiayi.

Nuyá ni unuiniamurin "Ataksha Jutía nunkanam Wetái" Tímiayi.

Tura ni unuiniamurisha tiarmiayi "Uunta, nuiksha Israer-shuar kayajai tukurmar mantamatai Tícharmaka. ṡNui ataksha wétai Támek?"

Jesussha ju métek-taku chichaman Tímiayi "Tsawaikia Páantchakait. Tsawai wekaana nu paant asamtai tukumkashtatui.

Tura kashi wekaana nusha kirit asamtai Tukumkáttawai. Núnisan Wíi tuke pujakun winia takatrun takastiniaitjai. Túraknasha itiurchatan Wáinkiashtatjai."

Nuyásha Jesus atak Tímiayi "Ii amikri Rásaru kanarai. Wi ishintiartatjai."

Tutai ni unuiniamuri tiarmiayi "Uunta, aya kanarka nuinkia pénker ajastatui."

Jesuska Rásaru jakamu nékayat "kanarai" Tímiayi. Tura ni unuiniamuri Rásaru kajinmakua aintsan kanarai Enentáimprarmiayi.

Jesus nuikia ti paant Tímiayi "Rásaru yamaikia jakayi.

Tura nui pujuscha asan Kúntuts pujatsjai. Jean Túrattajna nu iisrum ti nekas Enentáimtursattarme. Nuna nekaan shiir Enentáimjai. Wátsek, iyutai."

Nuyá Jimiampramu Tumas Chíkich unuiniamuri nui armia nuna "Iisha weri Niijiai métek jakatai" Tímiayi.

Nui taa, Rásarun kuatru tsawant ikiusman Wáinkiamiayi.

Petania pépruka Jerusarénnumia Menaintiú kirumitru ainis Tíjiuchiiti.

Tuma asamtai untsuri Israer-shuar Mártasha Marísha, ni umai jakamtai uutkui atsankrataj tusa weriarmiayi.

Mártasha Jesus Tíjiuch ajasun Nekáa inkiuntajtsa wémiayi. Antsu Marikia Jeá pujumiayi.

Tura Marta Jesusan inkiun Tímiayi "Uunta, Ame pujakminkia winia umar Jákachaayi.

Tura tuke nékajai Ashí Yus seamna nuna Súramui."

Jesussha Tímiayi "Ame umaimisha nantaktiatui."

Mártasha Tímiayi "Nekas, Ashí amuamunam Jákaru nantaktin tsawantai nantaktiatui. Nuna nékajai."

Nuyá Jesus Tímiayi "Iwiaaku átinia nérentin asan Wikia iniantkartiniaitjai. Winia Enentáimturna nuka jakasha nantaktiatui.

Tura Ashí iwiaaku pujana nusha Winia Enentáimturaka penke Jákashtatui. ṡNu nekasaiti tu Enentáimtamek?"

Niisha "Ee, Uunta, ame Yusa Uchirínme. Krístuitme, uwemtikkiartin Jú nunkanam Tátinia nu" Tímiayi.

Mártasha nuna ti, ni kai Marin untsuk úukan Tímiayi "Uunt jui taa untsurmawai."

Marisha nuna antuk Wárik wajaki Jesusa iyuttsa wémiayi.

Jesussha péprunam jeatsuk Marta inkiunmanum pujumiayi.

Marí wari wajaki wématai Israer-shuar nu jeanam atsankrattsa pujuiniasha nuna iisar weriarmiayi. Iwiarsamunam uuttiasa wéatsuash tusa weriarmiayi.

Marisha Jesus pujamunam Jeá tikishmatar Tímiayi "Uunta, Ame pujakminkia winia umar Jákachaayi."

Jesussha Marincha tura niijiai uutuncha Wáiniak Wáitnentaimta asa ti Kúntuts pujusmiayi.

Tura "Tui iwiarsamarum" Tímiayi. Niisha "Uunta, iitia" tiarmiayi.

Jesussha uutmiayi.

Israer-shuarsha "Ti aneatsuk" tiarmiayi.

Tura Chíkich "Kusuru Tsuáruchukait. Nii pujakuisha Rásaru Jákaampiash" tiarmiayi.

Jesussha ti kuntuts Enentáimiar iwiarsamunam Weankámiayi. Náinnium asa paka taurma áuyayi. Tura kaya atutkamuyayi.

Tura Jesus "Kaya jurustarum" Tímiayi. Rásaru umai Marta Tímiayi "Uunta, kuatru tsawant Jákaiti. Mejeatsuk' Tímiayi.

Tura Jesus Tímiayi "Yus Enentáimtakmeka Yusa kakarmari Wáinkiattame Tíchamkajam."

Nuikia kayarin uratiarmatai Jesus nayaimpin iis Tímiayi "Aparu, Winia anturtakmin yuminsajme.

Winiasha tuke anturtame tura ju shuaran pénker Enentáimtikrataj tusan tajai. Ame akuptukuitmena nuna nekarmawarti."

Nuna tinia kakaram untsuak "Rásaru Jíinkitia" Tímiayi.

Nujainkia penuarmartiuk jiinkimiayi. Yapinmasha jaanchjiai ijiamuyayi. Tura Jesus "Atirtarum. Wéti" Tímiayi.

Untsurí Israer-shuar Marin nemariaru Jesus Túramun iisar Enentáimtusarmiayi.

Tura Chíkichkia Pariséunam wear Jesus Túramun ujakarmiayi.

Nuna antukar Pariséusha Israer-patri uuntrisha Ashí naamka uunt armia nujai iruntrar tiarmiayi "ṡWarí itiurkamniait? Nu shuarka aentsti tujintiamun ti Túratsuk.

Aya Júnik iniaiyakrinkia Ashí shuar Niin Enentáimtuschartatuak. Nuyá Rúmanmaya apach taar mesetan najanawartatui tura iin amutmakar Yusa Uunt Jeencha emesrartatui."

Nu uwitin Kaipias Israer-patri uuntriyayi. Niisha Tímiayi "Atumka nékatsrume.

ṡAshí Israer-shuar mesertin pénkerkait. Antsu aya chikichik shuar Jákatin pénkerchakait?" Tímiayi.

Kaipiaska aya ni Enentáimmiajain Tíchamiayi. Antsu nu uwitin Israer-patri uuntri asamtai Yus nuna Enentáimtikramiayi. Nújainkia Israer-shuar Jesus jaruktinian ujakmiayi.

Tura aya Israer-shuarnakcha antsu niijiaisha Ashí nunkanam Yus-shuar ajasarun irurtajtsa Jákatniuyi.

Tuma asamtai nu tsawantinin Israer-shuara uuntri Jesus Máatai tusar áujmatsarmiayi.

Nu asamtai Jesus paant wantiniak Israer-shuarnum wekaichmiayi. Antsu Jutía nunkanmaya jiinki atsamu nunkanam Eprain pepru Tíjiuch wémiayi. Tura nui pujusmiayi ni unuiniamurijiai.

Israer-shuara namperi paskua ishichik jatemsamtai Untsurí shuar Yajá péprunmaya Jerusarénnum Káunkarmiayi. Kame paskua jeatsain Muisais timia Núnisan ni Ayashísha Enentáisha iwiarnarat tusa wakeriarmiayi.

Jesusnasha eak yujarmiayi. Tura Yusa Uunt Jeen pujusar nuamtak aniniaisar "ṡWarí Enentáimiam. Jístanam tatimpiash?" tiarmiayi.

Pariséusha Israer-patri uuntrisha akupainiak "Jesus Pujá nekaamka ujatkata" tiarmiayi. Jesusan sepunam enkeatai tusar tiarmiayi.

Paskua Jísat jeatin sais tsawant ajasmatai Jesus Petania péprunam wémiayi. Jesus jakamunmaya iniantkimia Nú Rásaru nuin pujumiayi.

Jesus jeamtai ayurawarmiayi. Rásarusha niijiai Yurumámiayi. Mártasha yurumkan iwiasmakmiayi.

Tura Marikia kunkuinian ti kuitjai ritru ajapén sumak itiamiayi. Tura Jesusa nawen kuer ni intiashijiai japirmiayi. Jeasha nu kunkuinjai ti shiir kunkunmiayi.

Jútas Iskariúti, Semunka Uchirí, nui pujumiayi. Niisha Jesusa unuiniamurintiat ukunam Jesusan surukmiayi Máawarat tusa. Niisha Tímiayi

"ṡUrukamtai nu kunkuinian ti kuitjai surukchama Kuítrinchan Súsatniun?"

Kame Kuítrinchan Enentáimtak Tíchamiayi. Antsu unuiniamu Kuítrin wainkia asa Yúpichuch kasamkamniuyayi. Tuma asa nuna Tímiayi.

Tura Jesus Tímiayi "Iniaisata. Wi iwiarnakui kuératniun sumak ikiurtusuiti.

Kuítrincha tuke atumjai íruntsuk. Antsu Wikia atumjai tuke pujuschattajai" Tímiayi.

Israer-shuarsha Jesus Petania péprunam pujan antukar Jesus iistaitsar weriarmiayi. Rásaruncha Jesus jakamunmaya iniantkimiua nusha iyutai tusar wearmiayi.

Túramtai Israer-patri uuntrinkia chichaman jurusarmiayi Rásaru maatai tusar.

Untsurí Israer-shuar Rásaru iniantkimiun nekaawar Israer-patrin ikiukiar Jesusan Enentáimtusarmiayi. Túrawarmatai Rásaruncha Máatniun wakerukarmiayi.

Paskua namperan pachiintiuktajtsa ti Untsurí shuar Jerusarénnum wearmiayi. Kashin tsawar Jesus Nú peprunam Tátinian nekaawarmiayi.

Niisha tintiuki nuké ainis nukan Júurar Jesusan inkiuntai tusar Jíinkiarmiayi. Túrawar untsumainiak "Shiir tati, tiarmiayi. Yusa kakarmarijiai winiana nu Tí pénkeraiti. Israer-shuara uuntri asa shiir Atí" tu untsumiarmiayi.

Jesussha umpuurun Wáiniak entsamkamai. Núnisan aarmaiti Yus-Chichamnum:

"Seun péprunmaya shuara, ashamkairap. Atumí Akupniuri umpuurunam entsamak winiawai."

Nu chichamaik Jesusa unuiniamuri nu Túrunamun nekaacharmiayi. Tura ukunam Jesus nayaimpiniam shiir waketkimtai Enentáimprarmiayi. Ashí Jesusna aarma Núnisan Túrunamiayi.

Jesus Rásarun iwiarsamunmaya iniantkimiun Wáinkiarua Nú shuar nuna áujmatiarmiayi.

Tuma asamtai shuar Jesus nu tujintiamun Túramtai nekaawar Jesusan inkiunktaj tusar Jíinkiarmiayi.

Tura Pariséusha nuamtak tiarmiayi "Iis, penké tujinkiaji. Maa iista, Ashí shuar Niin nemarainiatsuk."

Paskua nampernum Yus shiir awajsatniun Jerusarénnum weriaruka Untsurí nunkanmaya shuar ármiayi. Kriaku apachcha ármiayi.

Niisha Jiripin weantukarmiayi. Kame nu Jiripi Petsaitia péprunmayauyayi. Petsaitia péprusha Kariréa nunkanam awai. Nincha Kriaku apach seainiak "Uunta, Jesusjai chichastaitsar wakeraji" tiarmiayi.

Jiripisha Antresan Werí ujakmiayi. Nuyá niijiai métek tsaninkiar Jesusan weriar ujakarmiayi.

Jesussha Tímiayi "Wi Aents Ajasuitjiana ju tsawantur jeayi. Túramtai shiir Awájnástatjai.

Wi Tájana nu ti nekasaiti. Jinkiaia ántsanketjai. Araachmaka ninki pujatsuk. Antsu araamka tsapain jinkiaichiri kaushmariat nerek ti Untsurí ajatsuk. Núnisnak Wi jakamtai ti Untsurí shuar yamaram iwiaakman takusartatui.

Shuarsha jinkiaia nuke aya ju nunkanam pénker pujustinian Enentáimkiunka ántar pujak nekas iwiaakmarin emenkaktatui. Tura ju nunkanam pénker pujustinian Enentáimtsuk Jákatniuncha ashamchaa Nú shuarka nekas iwiaakman Wáiniak tuke iwiaaku átatui.

Shuar winia átaj takunka nemartusti. Túranka Wi pujajna nui Wíi shuar tuke átatui. Núnisan Wíi shuar winia takatrun Takáa nuna winia Aparsha shiir Enentáimtustatui' Tímiayi.

`Yamaikia Enentáirui ti itiurchat pujajai. ṡWarittiajak. "Aparu, ju Túrunatniunmaya uwemtikrurta" titiajash? Antsu Jú Túrunatniun Táwitjai.

Aparu, wi Túramujai Ashí shuar ame Náarmin shiir Enentáimturarti" Tímiayi Jesus. Tutai nayaimpinmaya chichaman antukarmiayi. "Winia Náarun shiir awajsaitjai tura ataksha shiir awajsattajai" Tímiayi.

Shuarsha nui pujuinia "ipiamtachuashit" tiarmiayi. Tura chikichcha "Nayaimpinmaya suntar Niin chichasai" tiarmiayi.

Jesussha Tímiayi "Wi antuktinian chichaschayi antsu átum nekaatarum tusa chichasai.

Yamaikia nunkanam makumatin jeayi. Tura íwianch ju nunkanam akupniua nu nupetnak ajapnattawai.

Tura numiniam awajnaintai Ashí nunkanmayanka shuar Enentáimturartatui" Tímiayi.

Juna taku Krúsnum Jákatniun ujakmiayi.

Shuarsha awajirar tiarmiayi "Yaunchu Yus akupkamu papiniumia áujsar nékaji. Kristu tutai tuke Jáatsuk iwiaaku pujustiniaiti. ṡItiurak nuikia "Aents Ajasu numiniam awajnaitniuiti" tame? Aents Ajasuka Krístuchukait, Yus anaikiamu. Núchaitkiuinkia Aents Ajasuka yait?" tiarmiayi.

Nuinkia Jesus Tímiayi "Wi Tsáapninia aintsanketjai. Tsáapnisha Atumíin aya ishichik tsawantin Tsáapniartatui. Tsáapin ana juik wekasatarum kirit ajatsain. Kame kiritniunam wekaana nusha nékatsui itiuranimpia wea.

Tsáapnin Wáinkiuram niin Enentáimtustarum. Túrakrum winia Tsáapnintrui wekasattarme." Jesussha nuna ti wémiayi uumak pujustaj tusa.

Jesus aentsti tujintiamun ti Untsurí Túramtaisha Niin Enentáimtuscharmiayi.

Yúsnan etserin Isayas yaunchu aarma uminkiatniuyi: "Uunta, ṡya ii ujam antukuit. Yusa kakarmarisha yana iniaktusuit?" tu aarmaiti.

Nuna uminiak Jesusan Enentáimtuscharmiayi. Tura nu arantcha Isayas aarmiayi:

"Yus niin kusuru awajsaiti tura ni Enentáincha Kátsuram awajsaiti. Ni jiijiai iimsain tusa tura ni Enentáijiai nekaawain tusa Túraiti. Kame ni tunaari iisar Enentáimtuiniakui Yus niin Tsuárainti" tu aarmaiti.

Isayas yaunchu Jesusan nayaimpiniam ti shiir pujan Wáiniak nuna Tímiayi.

Tuma ain Untsurí Israer-shuarsha tura ni uuntrinmayasha Jesusan nekas Enentáimtusarmiayi. Tura niisha Pariséun ashamainiak paant Tícharmiayi. Israer-shuara iruntairiya jiiki awetamaij tusa ashammiarmiayi.

Yus shiir Enentáimtursati tutsuk antsu shuar shiir Enentáimtursati tusar Túrawarmiayi.

Jesus kakantar untsumuk Tímiayi "Winia Enentáimturuk aya Winiak Enentáimturtsui antsu winia Aparun Winia akuptukua nunasha Enentáimtawai.

Winia Wáitkiusha Winia Aparnasha Wáinui.

Wikia Tsáapnin asan Winia Enentáimturainia nuka kiritniunam wekasain tusan ju nunkanam Táwitjai.

Shuáran sumamtikiatniun Táchaitjai antsu uwemtikratniun Táwitjai. Tuma asamtai shuar winia chichamprun antuk Umíachkunka sumamaiti. Tura Wikia sumamtikiachuitjai.

Winia nakitrur chichampruncha Enentáimtachuka sumamtikiamuiti. Wi timiaj nuka amuukatin tsawantai niin sumamtikiattawai.

Wi Enentáimmiajain chichaatsjai. Winia Apar akattur akuptukuiti. Tura chichastinia nuna surusuiti.

Wisha nékajai, Ashí winia Apar akupeamuka yamaram iwiaakman tuke amuukashtinian Súawai. Tuma asamtai winia Apar Túrutmia Núnisnak tajai" Tímiayi Jesus.

Paskua Jísat jeatin Chikichík tsawant ajasmatai Jesusa tsawantri jeatemayi. Túramtai ju nunkan ikiuki ni Aparíin wétiniuyi. Jesussha nuna nekaamiayi. Ashí Níiniun ju nunkanam pujuinian tuke anea asa Amúamunmasha yapajitsuk tuke aneemiayi.

Nu tsawantaisha murikiun Yúatin ármiayi. Tura Yurumátin jeatsain, uunt iwianch Semunka Uchirí Jútas Iskariúti Enentáin Jesusan surukat tusa Enentáimtikramiayi.

Tura Jesus Yusaiya tau asa waketkitniuyi. Tura Yus Apa Ashí mash susamiayi akupin Atí tusa. Jesussha nuna Nekáa

Chíkich yurumuk pujuiniai wajakmiayi. Tura pushirin aimiak awankéman emenmamamiayi.

Nuyá nijiaamatainium entsan Yará ni unuiniamuri nawen nijiatramiayi. Tura awankémjai japirmiayi.

Semun Pítrunam jeamtai Pítiur Tímiayi "Uunta, ṡWinia nawer nijiartaj tamek?"

Jesussha Tímiayi "Wi Túrajna nu Yamái nékatsme tura ukunam nekaattame."

Tura Pítiur Tímiayi "Penké winia nawer nijiarchattame." Jesussha Tímiayi "Wi nijiaachkuinkia Wijiai tsaninkia pujuschamniaitme."

Tutai Semun Pítiur Tímiayi "Nuinkia, Uunta, aya nawerkechu antsu uwejrusha tura muukarsha nijiatrurta."

Tura Jesus Tímiayi "Yamái mainkia Ayashí shiir asamtai aya nawenin Nijiamártiniaiti. Atumí Enentáin Ashí pénkeraitrume. Túrasha Ashí shuarcha" Tímiayi.

Kame Jútas Niin suruktinian Nekáa "Ashí shuarcha" Tímiayi.

Jesussha nijiar umik ni pushirin entsarmiayi. Tura atak pujus Tímiayi "ṡAtumsha Wi Túrajna nu nekaarmek?

Wi Atumí Uuntri asamtai nekas "Uunta" Túrutrume. Nusha pénkeraiti.

Tura Jintinniuitiatan tura Uuntaitiatan Atumí nawen nijiarchajak. Atumsha Núnisrumek nuamtak Náwem nijiatnairatarum.

Atumin nekapruatsan Túramjai. Atumsha Núnisrumek Túratarum.

Ti nekasan tajai. Takarniuka ni uuntri nankaamaschaiti. Akupkamusha akupea nuna nankaamaschaiti.

Nu nekaarum Túrakrumka shiir átatrume.'

`Tura Tájana nuna Ashí Tátsujrume. Anaikiaitiaj Núnaka Wi nékajai. Tura Yus-Chicham uminkiatniuiti, nékajai. Ju aarmaiti: "Wijiai yurumna nu winia nemasur ajasai."

Nuka Túmatsain ujaajrume. Nuyá Túrunamtai Yusa Uchiríntjai nusha paant nekaattarme.

Wi Tájana nu nekasaiti. Shuar Wi akupeaj nuna shiir itiaakka Winiasha shiir itiaarui. Tura Winia shiir itiaarna nusha Winia Akuptukuncha itiaawai" Tímiayi.

Nuna ti, Jesus ni Enentáin ti itiurchat Enentáimpramiayi. Tura paant Tímiayi "Nekas tajai, chikichik jui atumjai pujana nu Winia surutkattawai."

Tutai ni unuiniamuri nuamtak iiniaisar "ṡYanak ta?" tiarmiayi.

Chikichík unuiniamuri, Jesus ti aneamu, Niijiai tsanin yurumuk pujumiayi.

Tuma asamtai Semun Pítiur ni uwejéjai iniakmas "Aniasta, ṡyanak áujmata?" Tímiayi.

Tutai Jesusan áyanmatsan aniasmiayi. "ṡYait, Uunta?" Tímiayi.

Jesussha ayak "Tantan Túumnium ajunkan susattaj Núiti" Tímiayi. Nújain tantan Túumnium ajun Semunka Uchirín Jútas Iskariútin susamiayi.

Tura Wárik Jútas tantan achikmatai íwianch ni Enentáin wayamiayi. Nuyá Jesus Tímiayi "Túrattamna nu Wárik Túrata."

Tura Ashí nui yurumainiak pujuarmia nusha wariniak ta tusa nekaacharmiayi.

"Kuítrincha kuit Súsarta" Tátsuash tu Enentáimprarmiayi. Tura chikichcha "nampernum Yurumátin atsumajnia nu sumakta" Tátsuash, tu Enentáimprarmiayi. Jútas Kuítian Wáinin asamtai tu Enentáimprarmiayi.

Jútas tantan yua kashi ajasmanum Jíinkimiayi.

Jútas Jíinkimtai Jesus Tímiayi "Wi Aents Ajasu asamtai winia kakarmar yamaikia paant átatui. Tura wi Túramujai Yusa kakarmarisha ti paant átatui.

Wi Yusa kakarmarin paant awajeakui Wisha ni Uchirí asamtai winia kakarmarnasha Yuska Wárik paant awajsattawai.

Uchichiru, atumjai ti Untsurí tsawant pujuschattajai yamaikia. Wi Israer-shuaran Tímiaj Nútiksanak atumin Tájarme. Atumsha Winia Eátkáttarme tura wi wéamunam winishtatrume.

Ju yamaram akupeamun amaajai nuamtak mai anenai ajatarum tusan. Wi atumin aneajrumna Núnisrumek atumsha nuamtak mai anenai ajatniuitrume.

Anenaiyakrumninkia nujai Ashí shuar "Kristu unuiniamuri ainiawai" Túramartatui.

Semun Pítiur Jesusan aniasmiayi "Uunta, ṡtua wéam?" Jesussha Tímiayi "Wi wéajna nui yamaikia winichminiaitrume. Tura ukunam winittiarme."

Nuyá Pítiur Tímiayi "Uunta, ṡurukamtai yamaikia winichminiaitiaj? Amin Yáintajtsan jakataj tajai."

Jesussha Tímiayi "ṡNekasmek Táme? Ti nekas Tájame, atash shiniatsain Winia Menáintiú natsantrurtatme" Tímiayi.

"Kúntuts pujusairap. Yus Enentáimtustarum, Winiasha Enentáimtursatarum.

Winia Aparuí átum pujustin ti ankant awai. Tura nuna iwiarataj tusan Aparuí wéajai, nekasaiti. Nekaschaitkiuinkia ṡitiurak ujakaajrum?

Tura iwiaaran amukan ataksha Tátatjai. Tura tana yaruaktatjarme, wi pujamunam atumsha Pujusúk tusan.

Wi wéaj nu nékarme tura jintiasha nékarme" Tímiayi Jesus.

Tumas Tímiayi "Uunta, Ame weam nu nékatsji. ṡJintiasha itiurak nekaattaj~i?"

Jesussha Tímiayi "Wi nekas Jíntiaitjai. Wíjiainchu wekaana nuka winia Aparuí jeatniun penké tujintiawai. Tura Wisha tuke nekas tiniu asan nekas ana nuna Shuáran nékamtikiajai. Wisha Shuáran yamaram iwiaakman tuke amuukashtinian Súwitjai.

Winia nékarkurmeka winia Aparsha nekaawaintrume. Yamaisha Nii Wáinkia asarum nékarme" Tímiayi.

Nuinkia Jiripisha Tímiayi "Uunta, Apasha Wáinkiarka maak."

Jesussha Tímiayi "Jiripi, atumjai ti pujusu aisha ṡtuke nékartsumek? Winia Wáitkia nuka Winia Aparnasha Wáinkiaiti. ṡItiurak, nuikia, "Apasha Wáinkiarka maak" tame?

Winia Aparjai tsaninkian pujakun tura winia Aparsha Wijiai pujakui tuke chikichkiitji. ṡNu nékatsrumek? Wi Tájarmena nu Winia chichampruchuiti. Yus Apa Winí pujak ni wakeramun takaawai.

Nekaatarum. Wisha winia Aparjai tsaninkia pujakur nekas chikichkiitji. "Nu chicham itiurchataiti" Enentáimkiurmeka wi Túramu nuikia Enentáimpratarum. Wi Túramujai chikichik ájinia nu Páantchakait.

Wi Tájarmena nu ti nekasaiti. Winia Enentáimturna nu Wi Túrajna nuna Túrattawai. Tura winia Aparuí wéakui nuna nankaamas tujintiamun Túrattawai.

Ashí Winia Enentáimtursarum seatrumna nuna amastatjai. Nújainkia winia Apar shiir awajnastatui.

Winia Enentáimtursarum seakrumninkia Ashí Túrattajai' Tímiayi.

`Atumsha anentkurmeka winia chichamur umiktarum.

Tura wéakun winia Aparun chikichan akupturmakti tusan seattajai. Niisha atumjai tuke pujak atsantamprartatui.

Nusha Yusa Wakaníinti. Yus-shuarcha Niin nekaachmin ainiawai. Tuma asamtai ni Enentáin wayachminiaiti. Antsu átumka atumi Enentáin pujakui Nii nékarme. Niisha Atumí Enentáin tuke pujustatui.

Mitiaikia aitkiasnak ikiukchattajrume. Atumíin atak Tátatjai.

Ishichik tsawant nankaamasmatai Chíkich shuar irunna nu Wáitkiachartatui. Tura Wi iwiaaku asamtai átumka nu iwiaakmajai pujustatrume. Tuma asarum Wáitkiattarme.

Tura nu tsawantai ju nekaattarme. Wisha winia Aparjai tsaninkia pujakur chikichkiitji. Núnisnak Wisha atumjai tsaninkian pujajai. Tura atumsha Wijiai tsaninkia pujarme.

Shuar Winia anentuka wi akupkamun Nekáa Umíawai. Nú shuarnaka winia Aparsha aneawai. Wisha niin aneajai tura nekarati tusan iniaktustatjai." Jesus nuna Tímiayi.

Chíkich Jútas, Iskariútichu, Tímiayi "Uunta, ṡurukamtai Ashí shuarnum iniaktutskesha aya iin iniaktustatam?"

Jesus Tímiayi "Winia anentuka Tájana nuna Enentáimtawai. Winia Aparsha nu shuaran aneattawai. Tura Wisha winia Aparnum nu shuarjai tsaninkia pujustatji.

Antsu Winia anentchaka Tájana nuna Enentáimtatsui. Atum ántarmena Nú chichamka Wíniachuiti, antsu Yus Apa Winia akuptukua Núnaiti' Tímiayi.

`Atumjai tuke pujakun nuna Tájarme.

Yus Apa ni Shiir Wakanin atumin Yáinmak atsantamprarat tusa akupturmaktatrume. Wi seam Túrattawai. Nu Wakancha Ashí Wi ujakjarmena nuna atak Enentáimtikramprar Ashí unuitiamprartatui' Tímiayi.

`Imiatkinchanum pujustarum. Imiatkinchanum pujajna Núnisrumek pujustarum tusan amaajai. Jú nunkanmanka warastin Wáinkiashtatrume. Antsu itiurchatnum pujayatrumkesha Wijiai imiatkinchanum pujustatrume. Ashamtsuk pujustarum. Itiurchat Enentáimprairap.

Nuik timiaj nu antukmarme. Aparuí wena atak Atumiín Tátatjai. Winia Aparka Wijiai nankaamas uuntaiti. Tuma asamtai ti nekas anentkurmeka "Aparuí wéajai" takui Ashí warasaarme.

Nuka Túmatsain ujaajrume. Túrunamtai Nuyá Winia Enentáimtursattarme" Tímiayi.

`Jú nunkanmayan akupin winiakui atumjai Núkap chichaschattajai yamaikia. Wíniaka nupettukchamniaiti.

Tura Wikia winia Aparun aneajai tura Nii akupturkama nuna tuke Túrajai. Ashí shuar nuna nekaawarti tusa Ashí Túrunatniuiti. Wajaktiarum. Juyá Wetái' Tímiayi.

`Winia iwiaakmarun amaakun numi arakma aintsanketjai. Wikia kampuintjai atumsha kanawentrume. Winia Aparsha arakan Wáiniua Núnisaiti.

Winia kanawernasha nereatsna Núnaka tsupik ájapeawai. Tura nereana Núnaka Púruawai Nú nukap nerekat tusa.

Wi ujakjarmena nujai puruarmaitrume.

Numí kanawesha kampuin áchitkiachkunka ninki nerekchamniaiti. Núnisrumek atumsha Winí áchitkiachkurmeka nerekchamniaitrume. Wi atumjai áchitkiaj Núnisrumek atumsha Winí tuke áchitkia atarum' Tímiayi.

`Wikia kampuintjai atumsha kanawentrume. Kampuinkia kanawen áchitkia Núnisnak achiakjarme. Tura kanawe ni kampuinin áchitkia Núnisrum Winí áchitkia atarum. Túrakrumka Núkap nerektatrume. Antsu Wíjiainchuka pénker Túratin penké tujintiarme.

Winí áchitkiachuka ajapam kukartatui. Kanawesha kukarmatai shuar irumkar aesawartatui' Tímiayi.

`Tuke Winí áchitkiaitkiurmeka tura winia chichamprusha kajinmattsuk emetarmeka átum wakerarmena nu seakrumin amastatjai.

Atum Núkap nereakrumninkia Ashí shuar "Nekas Jesusa unuiniamurinti" Túramartatui tura winia Aparnasha shiir awajsartatui.

Winia Apar anenna Nútiksanak Wisha atumin aneajrume. Winia aneamur tuke atarum.

Winia Aparu akupkamurin umiakun tuke ni aneamurintjai. Núnisrumek winia akupkamur umiakrumka tuke winia aneamur átatrume' Tímiayi.

`Wi waraajna aintsarmek warastarum tusan nuna Tájarme. Tura ti shiir warastatrume.

Wi akupkamu Júiti: "Wi aneajrumna Nútiksarmek Ashí anenaitiarum."

Shuar ni amikrin Yáintaj tusa jakanka ti anenkartichukait.

Wi akupeamu takaakrumka atumsha winia amikruitrume.

Takarniuka ni uuntri takaana nuna nékatsui. Tuma asamtai "winia takarniuruitrume" Tátsujrume. Antsu Ashí winia Apar Táman ujaku asan "winia amikruitrume" Tájarme.

Aya Atumí Enentáimsamurijiain Wíi shuar ajaschamarme. Antsu akatramur ajastarum tusan atumniaka achikjarme Wi. Winia takatur takastiniaitrume. Túrarum pénker Túratniuitrume nerektinia aintsarmek. Tura nu nere amuutsuk tuke átiniaiti. Tuma asamtai winia Apar searmena nuna amastatui.

Júnaka akupeajrume: Nuamtak mai anenai ajatarum' Tímiayi.

`Ju nunkanmaya shuar Winia emka nakitrurar atumniasha nakitramarme.

Atumsha ju nunkanmaya shuaraitkiurminkia niiniua Nútiksan anenmaintrume. Antsu Wíi shuar ajastarum tusan ju nunkanmaya achikmajrume. Túramtai nekas ju nunkanmayanchuitrume yamaikia. Nu asamtai nu shuar nakitramainiawai.

"Takarniuka ni uuntri nankaamaschaiti" Tíchamkajrum. Shuar Winia yajauch awajtusaru ásar atumniasha yajauch awajtamsartatui. Chikichcha umirtukaru ásar atumniasha umirtamkartatui.

Winia Akuptukun nékachu ásar Winia Enentáimturkurmin yajauch awajtamsartatui' Tímiayi.

`Wi tana Yus-Chichaman niin ujakchamtainkia tunaanum sumamacharaayi. Antsu ujakma ásar "Nékachkun Túraitjai" Tíchamin ainiawai.

Winia nakitruinia nuka winia Aparnasha nakitiainiawai.

Aents penké Túrachman Túrachuitkiuinkia tunaanum sumamacharainti. Antsu wi Túramun Wáinkiaru ainiayat Winiasha tura winia Aparnasha nakitiainiawai.

Yaunchu Yus akupkamunam aarmaiti: "Penké ántar nakitrurarmai." Nu chicham uminkiati tusa Túrunaiti' Tímiayi.

`Tura atsantamprattsa Yáinmana nuna winia Aparuiya akuptuktatjarme. Niisha tuke nekas tiniu Wakaniiti. Niisha Yusaiya taa atumin nekamtikramprattarme.

Atumsha yaunchu Wijiai pujusu asarum nekamtikiattarme' Tímiayi.

`Atum kanartukairum tusan Júnaka Tájarme.

Israer-shuar iruntainiumia jiiki akuptamkattarme. Nu arantcha mantamainiaksha "Yúsan shiir awajsattsan Túrajai" Tiártatui.

Nu shuar Winiasha tura winia Aparnasha nékachu ásar Túrutmawartatui.

Núnaka Yamái Tájame. Tura Túrunamtai "Núnisan átiniaiti" timiaj nu nekaarum itiurchat Enentáimprairap' Tímiayi. `Atumjai tuke Pujá asan Núnaka yaunchu ujakchamajrume.

Antsu yamaikia Wáketjai winia Akuptukmia nujai pujustaj tusan. Tuma ain wéajna nu inintratsrume.

Antsu nuna takui ti kuntuts Enentáimprarme.

Tura Wi wématai atumjainkia nuna nankaamas pénker átatui. Iis, Wi wéaknaka atumin yainmaktinia nuna akupkattajai tura wéachkuinkia Táchattawai. Nuka ti nekasaiti.

Yusa Wakaní taa Ashí Jú nunkanmaya aentsun ju menaintiun nekamtikiattawai. Ni tunaari aan nekamtikiattawai. Pénker tunaajainchu wekasamniana nunasha nekamtikiattawai. Tura Yus tunaanum Súmamtikiamniana nunasha nekamtikiattawai.

Winia Enentáimturainiachu Tunáarintin ainiawai.

Winia Aparuí Wáketkui Wáitkiashtatrume. Tuma asamtai Ashí shuar wi pénker tunaajainchu wekaamun nekaawartatui.

Tura ju nunkanam akupniunka Yus tunaanum Súmamtikia asa shuarnasha Súmamtikiamniaiti. Nuna paant nekaawartatui' Tímiayi.

`Nu arantcha Núkap Tíintjiarme Túrasha átumka nekaachaintrume.

Yusa Wakaní Ashí nekas tiniu asa Ashí nekasa nuna unuitiamprattarme. Ni Enentáimmiajai Tíchattawai antsu winia Aparuí antukma nuna ujatmaktatui. Ukunam átatna nunasha ujatmaktatui.

Ashí Wínian ujatmak Winia shiir awajtustatui.

Ashí winia Apar takakna nusha Wíniaiti. Nu asamtai "Ashí Wínian ujatmaktatui" tajai' Tímiayi.

`Ishichik pujusrum Winia Wáitkiashtatrume. Nuyá ataksha ishichik pujusrum ataksha Wáitkiattarme. Wisha winia Aparuí wéajai" Tímiayi.

Nuyá ni unuiniamuri nuamtak aniniaisarmiayi "ṡJú chichamsha warimpait? "Ishichik pujusrum Wáitkiashtatrume tura ataksha ishichik pujusrum Wáitkiattarme tura Aparuí wéajai" Tátsuk.

"Ishichik pujusrum" tana nusha ṡwarimpait? Nii tana nu ántatsji" tiarmiayi.

Jesussha niin aniastai Táman Nekáa Tímiayi "Ishichik pujusrum Wáitkiashtatrume Nuyá ataksha ishichik pujusrum Wáitkiattarme" Tímiajai. ṡNúchakait átum inintrustin wakerarmena nu?

Ti nekas Tájarme: Atumka Kúntuts pujusrum uuttiatrume tura Yus-shuarcha Warásártatui. Tuma ain~ki átum Kúntuts pujayatrumek ukunam warastatrume.

Iis, nuwasha jurertin tsawant jeamtai najaimiak Wáitiatsuk. Tura uchin jurerka ti waraak Wáitsamunka Enentáimtsui.

Atumsha Núnisrumek yamaik Kúntuts pujarme. Tura atak iitjiarum tusan winiakui ti shiir Atumí Enentáin warastatrume. Nu warastinian jurutramkichminia ainiawai.'

`Nu tsawantinkia penké ininsashtatrume. Ti nekas Tájarme Winia Enentáimtursarum winia Apar searum nuna Ashí amastatui.

Yamaisha Winia Enentáimtursarum winia Apar seachurme. Seakrumninkia amastatui ti shiir warasaruk tusa' Tímiayi.

`Métek-taku chichamjai nakumkan nuna Tímiajai. Tura ukunmanka nujai chichatsuk winia Aparnan paant ujaktatjarme.

Nu tsawantai átumka Winia Enentáimtursarum winia Apar seattarme. Winia Aparsha atumin anea asamtai Wi Niin áujsatin atsumashtatrume. Winia anentu asarum tura winia Aparuíya taman Enentáimtakrumin Niisha anenmawai.

Winia Aparuíya Jíinkin Jú nunkanam Táwitjai. Yamaikia Jú nunkanmaya Jíinkin ataksha Aparuí Wáketjai" Tímiayi.

Nuyá ni unuiniamuri tiarmiayi "Yamaikia métek-taku chichamjainchu chichaame.

Mash nékaitme. Shuar Amin ininmatsain pénker aimkiatin nékame. Nu nekaar Ame nekas Yúsnumiaitme tu Enentáimtaji" tiarmiayi.

Tura Jesus Tímiayi "ṡNekasash Enentáimtarum?

Ti warik átumka ashamkarum Niisháa tsakinmaktatrume tura Winiak ikiurkittiarme. Antsu winia Apar pujakui Wiki pujatsjai.

Winia Enentáimturkuram imiatkinchanum pujusarat tusan Tájarme. Jú nunkanam ti Wáitsattarme. Tura Wi Jú nunkanmayan nupetka asamtai warastarum" Tímiayi Jesus.

Nuna ti Jesus nayaimpinmaani iimias Tímiayi "Aparu, Yamái jeayi ame Uchiram shiir awajsatin. Núnisan ame Uchirmisha pénker awajtamsattawai.

Ashí shuara Akupniuri najataitme. Nujainkia Winia surusumna Nú shuaran yamaram iwiaakman tuke amuukashtinian Súsaitjai.

Aparu, Chíkich atsawai. Amek nekas Yúsaitme. Wisha Jesuskrístuitjai Ame akuptukmamna nu. Nu asamtai Ashí shuar nuna Enentáimtak yamaram iwiaakman tuke amuukashtinian takakui.'

`Ashí Túratniun akuptukmamna nuna amukuitjai. Túran ju nunkanam shiir awajsaitjame.

Nuna Túramtai, Aparu, ti yaunchu Jú nunka atsaisha Amijiai pujakui shiir awajtusmamna Núnismek yamaisha shiir awajtusta.'

`Ashí Jú nunkanmaya surusmamna Nú shuaran Amin nekamtikiamjai. Aminiu ainiakui surusmame. Niisha ame chichammin Umirtámkaruiti.

Ashí Wi takaajna nu Amek surusuitme. Niisha nuna nékainiawai.

Ame chichamem surusmam nuna ujakam niisha Umirtámkaruiti. Ame akuptukakmin Amiiníya Táwitjai. Nu nekasaiti tu Enentáimtuiniawai.'

`Niin yainkiarta tusan seajme. Jú nunkanmaya shuaran Amin Enentáimturmainiatsna nuna seattsujai. Antsu Ame surusmam nuna, Aminiu ajasarmatai, Yáinkiarta tusan seajme.

Ashí Winia ainia nuka Aminiuiti. Tura Ashí Aminiu ainia nuka Winia ainiawai. Winia pénkerusha ni Túramunam paant awajsaiti.'

`Wikia yamaikia Jú nunkanam pujuschattajai. Tura nu shuarka jui pujuartatui. Antsu Amijiai pujustajtsan winiakui Ashí surusumna nuka, Aparu, ti shiir asam ame kakarmarmijiai Wáinkiata. Wisha Amijiai chikichik ájinia Núnisan niisha Ashí iruntrar chikichik ajasarti.

Jui niijiai pujakun ame kakarmarmijiai ti pénker Wáinkiamjai. Antsu Yus-Chichamnum aarma uminkiati tusa aya chikichik menkakaiti. Niisha tuke emesnartinia Núiti.'

`Yamaikia Amiini winiajai. Tura jui tuke pujakun juna Tájame. Niisha Wi waraajna Núnisar ti shiir warasarat tusan tajai.

Wi Jú nunkanmayanchuitjai. Niisha Núnisan Jú nunkanmayanchu ainiawai. Tuma asamtai ame chichammin Wi susamtai Jú nunkanmaya shuarka niin nakitiainiawai.

Jú nunkanmaya Jíiki tusan seatsjame. Antsu íwianch niin nupetkain tusan seajme.

Wi juyanchuitiaj aintsan niisha juyanchu ainiawai.

Ame chichammin ti nekasa nuna ántuiniakui pénker awajsata.

Juya shuarnum akuptukmam aintsan Wisha niin Chíkich shuarnum akupeajai.

Aya Aminiunak takastaj tusan Enentáimtimjai. Túra asamtai niisha aya Aminiunak takastinian Enentáimpratin ainiawai' áujtak Tímiayi.

`Aya Níiniunkeka seatsjame antsu Ashí ni chichamen antukar Winia Enentáimtursartatna nusha ame Yáinkiarta tusan seajme.

Ashí niisha chikichkiniak Enentáimtusarti tusan seajme. Wisha Amesha, Aparu, chikichik ájinia Núnisan niisha Iijiai iruntrar chikichik ajastai tusar seajme. Wíi shuar chikichik najanata tusan seajme. Nuyá ju nunkanmaya shuar akuptukuitmena nuna nekaawartatui.

Ame shiir awajtursamna Núnisnak Wisha niin shiir awajsaitjai. Iikia chikichik ájinia Núnisan niisha chikichik ajasarti tusan Túraitjai.

Wi ni Enentáin pujakui Amesha Winin pujakmin penké chikichik ajasarti. Túramtai Ashí shuar juna nekaawartatui: Ame akuptukuitme, tura Winia anenmena aintsam nu shuarsha aneame. Wíi shuar chikichik ajasmajai Ashí shuar nuna nekaawartatui.'

`Aparu, shuar surusmam nu, Wi pujustatjana nui pujusarti tusan seajme. Tura ti shiir awajtusmamna nuna iisarti tusan nuna seajme. Ju nunka najanchamunman tuke anentin asam ti shiir awajtusuitme.

Aparu, ti pénker áminin ju nunkanmaya shuar nekarmainiatsui. Antsu Wi nékajme. Ju shuarsha ame akuptukman nékainiawai.

Nú shuaran Amin nekarmawarti tusan jintintiaitjai. Tura nu arantcha jintintiattajai. Nújainkia Wisha ni Enentáin pujurkui Winia anenmena aintsan niisha anenkratin ajasartatui" áujtak Tímiayi Jesus.

Jesussha nuna tinia amuk ni unuiniamurijiai Setrun Entsá katin numi arakmanum wémiayi.

Jútassha Niin suruktajtsa pujumia nuka nu ajan nekaamiayi. Untsurí tsawant Jesus ni unuiniamurijiai nui iruntramtai Jútas Jesusan nui Wáinkiatniun Enentáimpramiayi.

Tura Untsurí suntarjaisha Jesusan tariarmiayi. Pariséusha Israer-shuar Patri uuntrisha suntarnasha Yusa Jeen Wáiniuncha Jesusan achikiarat tusa akupkarmiayi. Niisha machitniasha nankincha Rámparancha jiniasha Júkiar weriarmiayi.

Jesussha Ashí átinia nuna neka asa jiintiuki "ṡYa eaarum?" Tímiayi.

Niisha "Nasarétnumia Jesus" tiarmiayi. Jesussha "Wiitjai" Tímiayi. Jútassha Jesusan surukua nu niijiai pujuarmiayi.

Tura Jesus "Wiitjai" takui ti ashamkar úkumur waketainiak iniaararmiayi.

Ataksha Jesus "ṡYa eaarum?" Tímiayi. Niisha "Nasarétnumia Jesus" tiarmiayi.

Nuinkia Jesus Tímiayi "Wiitjai, Tájarme. Winia eatkurmeka Wíi shuar ainia juka waketkiarti" Tímiayi.

Jesus nuik aujuk "Winia Apar surusma nu menkakacharai" timia nu uminkiati tusa Jesus "waketkiarti" Tímiayi.

Nuyá Semun Pítiur machitian jusa Marku Kuíshin untsuurnumaani tsupirkamiayi. Markusha Israer-patri Uuntrí takarniuriyayi.

Túramtai Jesus Pítrun Tímiayi "Machitrumka awainki ikiusta. Winia Apar Wáitsatniun surakuinkia ṡWáitsashtinkaitiaj?"

Nuinkia apach suntarsha ni Kapitiántrisha Yusa Jeen wainniusha Jesusan achikiar jinkiawarmiayi.

Nuyá Anasa jeen Júkiarmiayi. Anassha Kaipiasa Wearíyayi. Tura Kaipias nu uwitin Israer-patri uuntriyayi.

Kaipiaska nuik "ṡAshí Israer-shuar mesertin pénkerkait. Antsu aya chikichik shuar Jákatin pénkerchakait?" timia Núiti.

Semun Pítiur Chíkich unuiniamujai Jesusa uku weriarmiayi. Israer-patri uuntri Nú unuiniamunka nékauyayi. Tuma asamtai ni jeen jeawar, suntar Jesusjai aa tanishnum Wáiniakui niisha wayamiayi.

Tura Pítiur aa Wáitiniam wajaamiayi. Túramtai Chíkich unuiniamu jiinki Wáitin Wáinia Nú nuwajai chichas Pítrun Awayámiayi. Nui nékanu asa Yúpichuch Awayámiayi.

Waiti Wáinniusha Pítrun aniasmiayi "ṡAmesha nuna unuiniamurinchukaitiam?" Pítrusha "Atsá, Núchaitjai" Tímiayi.

Tsetsek asamtai suntarsha tura nui takarniusha jinia Ikiapárar ni nawen anaak pujuarmiayi. Pítrusha nui pachiiniak anamuk pujumiayi.

Israer-patri uuntri Jesusan aniasmiayi "Ame unuiniamurmesha ṡya ainia. Tura Warí niin jintintiaitiam?"

Jesussha Tímiayi "Ashí iimiainiain tuke etserniuitjai. Israer-shuar iruntainmasha Yusa Uunt Jeencha Israer-shuar irunainia nui arantutsuk tuke etserkaitjai.

ṡUrukamtai Winia inintiam? Winia chichamprun antukua nu aniastarum. Wi timian nii ujatmakarti. Wi timiancha niisha nékainiatsuk."

Jesus nuna takui Yusa Jeen Wáiniua nu nui Pujá Jesusan yapiniam awati Tímiayi "ṡNúnisan nekas uuntnum chichastinkait?"

Jesussha Tímiayi "ṡWarinmampa yajauch aa? Turuttia. Tura Tájana nu pénkeraitkiuinkia ṡurukamtai awattiniam?"

Nuyá Anas Jesusan Jinkiá Kaipias takaamunam akupkamiayi Kaipias Patri uuntri asamtai.

Tuke Anasa jeen chichainiai Pítiur jinia anamuk Puján shuar aniak "ṡAmesha Jesusa unuiniamurinchukaitiam?" tiarmiayi. Pítrusha "Atsá, Wíchaitjai" Tímiayi.

Chíkich takarin, Marku shuari, nui pujumiayi. Pítiur Marku Kuíshin tsupirkamia nuna shuari asa Tímiayi "ṡAjanam Jesusjai wekaamin Wáinkiachmakajam?"

Pítrusha ataksha "Atsá" tain atash shiniukmiayi.

Nuyá Kaipiasaiya Jesusan Júkiar tsawant tsawaamunam apach Kapitián Piratu takatai jeanam ejeniarmiayi. Israer-shuarsha ni uuntri akupkamia nunisar wapik ajasaij tusar nu jeanam wayacharmiayi. Wayawarka paskua nampernum Yurumáchmin ármiayi.

Nu asamtai Piratu niijiai chichastaj tusa Jíinki Tímiayi "ṡJú aishmansha Warí Tunáa Túrait?"

Niisha "Tunaarinchaitkiuinkia amiini itiachaaji" tiarmiayi.

Tutai Piratu Tímiayi "Atumek Júkirum Atumí akuptammarijiai ni tunaari nekaatarum." Israer-shuarsha tiarmiayi "Antsu iikia Israer-shuartikia Tunáa shuarsha Máachminiaitji."

Yaunchu Jesus ni Jákatniurin Enentáimtus "Wi awajnaitniuitjai" Tímiayi. Niisha Krúsnum awajnain asamtai apach Máataijiai Nii timia nu uminkiammiayi.

Piratusha atak Jeá Wayá Jesusan untsuk "ṡAmeka Israera Uunt Akupniurinkaitiam?" Tímiayi.

Jesussha Tímiayi "ṡAmekek nu inintram. Kame Chíkich Túramainiatsuash?"

Piratusha Tímiayi "ṡWi Israer-shuarkaitiaj? Amee shuarak Israer-patri uuntrijiai winin itiarmarai. ṡWarí Tunáa Túraitiam?"

Nuinkia Jesus Tímiayi "Wi Jú nunkanam akupniuchuitjai. Juyaitkiuinkia Winia nemartuiniana nu Máanaikiaraayi. Túrawarmatai Israer-shuarnum surutkacharaayi. Antsu juyan akupniuchuitjai."

Piratusha "ṡNuikia ame nekas uunt akupniukaitiam?" Tímiayi. Jesussha Tímiayi "Ee, ame Támena nu nekasaiti. Jú nunkanam akiinian Ashí shuaran nekas ana nuna ujaktinian Táwitjai. Ashí shuar nekas ana nuna umirniuka Wi Táman ántawai."

Tura Piratu "ṡNekasa nusha warimpiait?" Tímiayi. Piratusha nuna ti, atak Israer-shuarjai chichastajtsa jiinki Tímiayi "Jú aishmanka tunaarin penké Wáittsujai.

Tura Ashí uwitin paskua nampernum sepunmaya shuar ankant akupkatniuiti. Núnisrum tuke searme. Tuma asamtai, ṡyamaikia Israera Uunt Akupniurin ankant akupkattajak?" Tímiayi.

Nuinkia Ashí kakantar untsumainiak "Ju akupkaip; antsu Parapás Akupkatá" tiarmiayi. Nu Parapássha Kásauyayi.

Nuyá Piratu suntaran akupkamiayi Jesusan Asutiáwarat tusa.

Suntarsha Jesusan wishikrar tawasap janki najanamun etsenkrumtikiarmiayi. Yamakai pushincha uunt akupniua aintsan aentsrarmiayi.

Nuyá "Israera Uuntria, kakaram ajasta" tiar yapiniam awatiarmiayi.

Nuyá Piratu atak jiinki Tímiayi "Atum Wáinkiarum nekaatarum tusan Jesusan Jíiktiatjai. Wikia tunaarinkia penké Wáittsujai."

Tímiatai Jesussha jankin etsenkruku tura pushin yamakairman entsaru Jíinkimiayi. Tura Piratu nui Káunkarun tiarmiayi "Pai juiti, iistarum."

Israer-patri uuntrisha suntarsha Jesusan iisar ataksha ataksha kakantar untsumainiak "Krúsnum jakati" tiarmiayi. Piratusha "Atum Júkiirum Máatarum. Ni tunaarin penké Wáittsujai" Tímiayi.

Tura Israer-shuar tiarmiayi "Nu shuar "Yusa Uchiríntjai" takui Jákatniuiti. Iiniu akupeamu aarma nui Núniskete" tiarmiayi.

Nuna antuk Piratusha nu nankaamas ashamkamiayi.

Ataksha init Wayá Jesusan aniasmiayi "ṡTuyampaitiam?" Tura Jesussha penké áikchamiayi.

Nuyá Piratu Tímiayi "ṡUrukamtia winia airtsum. Wi jeajna nu nékatsmek? Wakeraknaka Krúsnum Máatniuncha tura ankant akupkatniuncha jeajai."

Tutai Jesussha Tímiayi "Yus nuna amaschaitkiuinkia penké tujinkiaintme. Nu asamtai amiin surutka nu ámin nankaamas tunaarinniuiti."

Piratusha Nú chichamtaik Jesusan ankant akupkattsa wakerimiayi. Antsu Israer-shuar untsumainiak tiarmiayi "Ju ankant Iníakmeka ame uunt akupniu amikrinchuitme. Juka "úunt akupniuitjai" taku Atumí uunt Akupníuri nemasrinti" tu untsumkarmiayi.

Piratusha taman antuk akupin pujutainium pujus Jesusan untsukmiayi. Nui kaya ukatkamu asamtai Israer-shuara chichamen Kapata anaikiarmiayi.

Paskua jisat jeatsain nantu tutupin ajatsain Piratu Israer-shuaran Tímiayi "Uunt akupniuram iistarum."

Tura Ashí "Jakati, jakati, Krúsnum Máatá" tu untsumkarmiayi. Tura Piratu "ṡAtumí uunt akupniurin Krúsnum Máattajak?" Tímiayi. Tura Israer-patri uuntri tiarmiayi "Atumí uunt Kapitiántrumek iin akuptamji. Chíkichka atsawai."

Tutai Piratu Jesusan krusnum mantamnati tusa tsankatkarmiayi. Tutai niisha Jesusan Júkiar wearmiayi.

Jesussha ni krusri yanaki Kúrkuta Náinnium wémiayi. Kúrkuta naarisha Israer-shuara chichamen "muuka ukunch" tawai.

Nui Krúsnum ajintrurar awajainiarmiayi. Tura mai pae Jimiará shuaran chikichik chikichik awajainiarmiayi. Tura Jesus ajapén ámiayi.

Piratusha Jesusa Krúsrin uunt aarman anujkamiayi. NASARETNUMIA JESUS, ISRAERA UUNT AKUPNIURI Tu aarmauyayi.

Israer chichamjaisha Kriaku chichamjaisha Rúmanmaya chichamjaisha aarmauyayi. Menaintiu chichamnum aarma asamtai tura Jesusarén pepru Tíjiuch asamtai Israer-shuar ti Untsurí áujiarmiayi.

Nu asamtai Israer-patri uuntri Piratun jeariar "Israera Uunt Akupniuri" aaraip. Antsu "Israera Uunt Akupniurintjai tawai" tu aarta" tiarmiayi.

Tura Piratu nincha áikiar "Wi aaraj nuke átatui" Tímiayi.

Suntarsha Jesusan Krúsnum awajainiar ni entsarmarin Kuátru akankar ankant ankant Júkiarmiayi. Tura ni pushirin apatsuk najanamu asamtai Jáaktinian nakitrarmiayi. Kame Yakíya nunkaani apaiyiachma takamtsukuyi.

Tuma asamtai suntar tiarmiayi "Juka Jáakchatai. Antsu nakurakrin Yának ati nu jukiti." Nújainkia yaunchu Yus-Chichamnum aarma nu uminkiamiayi: "Winia entsarmarun akantrarmiayi tura nakurusar awakmakua nuna winia pushirun Súsarmiayi" aarmaiti.

Krúsnumsha Jesusa Nukurísha Kriúpasa Nuarí Marisha tura Máktaranmaya Marisha wajaarmiayi.

Jesus ni Nukuríncha tura ni ti aneamu unuiniamurincha nui wajan Wáiniak ni Nukurín Tímiayi "Nukuru, ju ame uchirmea aintsan Atí."

Nuyá ni unuiniamurincha Tímiayi "Ju ame nukua aintsan Atí." Nu tsawantaik nu unuiniamuri ni jeen Jukí Awayámiayi.

Nuyá Ashí uminkiamtai Jesus nuna Nekáa yaunchu Yus-Papinium aarma uminkiati tusa "kitiamajai" Tímiayi.

Nuisha pininnum Churuín ámiayi. Tura shuar nuna uruchjai ejampar sapapjai ijiu mukunaati tusa susamiayi.

Jesussha Churuínian najekaa "Ashí Túrunatniua nu mash uminkiai" Tímiayi. Nuna ti, muuken Nená jakamiayi.

Nu tsawantai, kashinkia paskua Námper uunt tsawantri asamtai tura ayampratin tsawant aa asamtai, Israer-shuar jaka Ayashí nui paant ain tusa nakitrarmiayi. Nu asamtai Piratun seainiak "Krúsnum ajintrurma ainia nuna kankajin suntar kupirkarti. Nuyá wari Jákarmatai Krúsnumia Júkiarti" tiarmiayi.

Nuyá suntarsha weriar emka Krúsnum amia nuna kankajin kupirkarmiayi. Nuyá chikichnasha Jesusjai atsankiar ajintrurma nuna kankajincha kupirkarmiayi.

Tura Jesusan weantuk yaunchu Jákaiti tusa kankajin kupirtsuk

suntar aya paenam ijiumiayi. Ijiumtaisha nu chichamtaik numpa yumijiai puarmiayi.

Wi, Juan, nuna wainkia asan nekas tajai. Atumsha Yus Enentáimtustarum tusan Tí nekas tajai. Wi aarajna nu nekasaiti nékajai.

Yaunchu Yus-Chichamnum aarma uminkiati tusa Túrunaiti: "Ni ukunchin kupirkachartatui" tu aarmaiti.

Tura chikichcha: "Ijiuarmiania nuna Wáinkiartatui" tu aarmaiti.

Nuyá Arimatéanmaya Jusé Jesusa Ayashín jukitiaj tusa Piratun seamiayi. Nu Jusé Jesusan Enentáimtaitiat Israer-shuara uuntrin ashamak paant nemarsachmiayi. Niisha seamtai Piratu "Jukitia" Tímiayi. Tutai Jusé Jesusa Ayashín jukimiayi.

Nikiutémusha Jesusjai chichastaj tusa kashi tarimia nu Jimiará kunkuin pachimpramun ti nukap sumak itiamiayi. Mira kunkuinniasha Aruí kunkuinniasha sumakmiayi.

Nuyá Jusé Nikiutémujai Jesusa Ayashín Júkiar kunkuinian kuérar jaanch esarmajai penuararmiayi. Israer-shuar tuke nunisar Ikiúu ármiayi.

Jesus Krúsnum maamua nui aja Tíjiuch ámiayi. Nu ajanmasha waa Náinnium paka taurma ámiayi. Nusha yama taurma asamtai jaka nui ikiuschamuyayi.

Nu waasha Tíjiuch asamtai tura Israer-shuara ayampratin tsawantri jeatemamtai Jesusa Ayashín nui iwiarsarmiayi.

Tumintincha Káshik kirit ain Máktaranmaya Marí Jesus iwiarsamunam iistajtsa wémiayi. Jesusan iwiarsar kaya uuntjai waan atutkarmiayi. Tura Marí nui Jeá nu kaya uraimiun Wáinkiamiayi.

Nuna Wáiniak Semun Pítiur pujamunam tsékenki wémiayi. Chíkich unuiniamuri Jesus ti anemia nusha nuisha pujumiayi. Tura Marí Tímiayi "Iwiarsamunmaya ii Uuntrin Júkiarai. Tura ṡTuíntsuk ikiusara?"

Pítrusha Chíkich unuiniamurijiai Jíinkiar iwiarsamunam iyuwarmiayi.

Mai métek tsékenkiar Pítiur jeatsain Chíkich unuiniamuri iwiarsamunam emka jeamiayi.

Niisha wayatsuk Tsuntsumá iis penuarmarinkia nui tepan Wáinkiamiayi.

Nuyá Semun Pítiur ukunam Jeá iwiarsamunam Wayá penuarmari nui tepan Wáinkiamiayi.

Chíkich jaanchcha Jesusa muuken penuarma nusha nanerma Niisháa tepan Wáinkiamiayi.

Nuyá Chíkich unuiniamuri emka tamia nusha iwiarsamunam wayamiayi. Niisha Túruna Wáiniak "Jesus nekas nantakni" tu Enentáimpramiayi.

Nuna Wáintsuk Yus-Chichamnum "Jesus jakamunmaya nantaktiniaiti" aarman áujsariat nekaacharmiayi.

Nuyá mai ni jeen waketkiarmiayi.

Tura Marikia iwiarsamunam juak uutu pujumiayi. Niisha uutiatan Tsuntsumá iwiarsamunam iimsamiayi.

Tura Jesusa Ayashí nuik tepesmanum nayaimpinmaya suntar puju entsaru Jímiar pujan Wáinkiamiayi. Chikichik Múuknumaani tura Chíkichka nawenmaani pujumiayi.

Nayaimpinmaya suntarsha "ṡUrukamtai uutam?" tiarmiayi. Marísha Tímiayi "Winia Uuntrun jurutkiarai tura ṡtuintsuk ikiusara?"

Nuna ti ayanmar Jesusan Wáiniak Niin nekaachmiayi.

Jesus aniak "ṡUrukamtai uutam. Ya eaam?" Tímiayi. Marisha ajan Wáinniua nuiti tusa Tímiayi "Uunta, ame ni ayashi jukimkia, tui ikiusmam ujatkata wi jurumkitiaj" Tímiayi.

Nuyá Jesus "Mariya" Tímiayi. Tutai niisha ayanmar "Rapuni" Tímiayi. Nusha Israer-chichamnum "Uuntá" tawai.

Jesussha Tímiayi "Emetruawaip. Winia Aparui Wáatsjai. Antsu weme Wíi shuar Titiá "Winia Aparuí nayaimpiniam wéajai. Niisha Atumí Aparínti. Winia Yúsruiti tura Atumí Yúsrinti" tawai Titiá" Tímiayi.

Nuyá Máktaranmaya Marisha Jesusa unuiniamurin Wáiniak "Wi Uuntan Wáinkiajai, Tímiayi. Niisha juna mash Túrutui" tu ujakarmiayi.

Nu tsawantai, tumintin, ni unuiniamuri Israer-shuara uuntrin ashamainiak kashi iruntrar waiti epeni pujuarmiayi. Túrasha Jesus áyatik wayamiayi. Tura ajapén wajas "shiir pujustarum" Tímiayi.

Nuna ti, Nuyá ni uwejen ajintruamuncha ni paen ijiumuncha iniakmasmiayi. Ni unuiniamurisha Uuntrin Wáinkiar shiir warasarmiayi.

Ataksha Jesus "Shiir pujustarum, Tímiayi. Winia Apar akatar akuptukma Núnisnak Wisha akatran akupeajrume" Tímiayi.

Nuyá ni matsatmanumaani Umpuí Tímiayi "Yusa Shiir Wakaní Atumí Enentáin wayati.

Shuara tunaarinkia átum "Asakártí" Tákurminkia tsankurnartatui. Tura nu shuar "sumamati" Tákurminkia tuke sumama pujawai" Tímiayi Jesus.

Tura chikichik unuiniamu, Jímiampramu Tumas, Jesus tamia nui pujuchmiayi.

Tura ukunam chikich unuiniamuri ujainiak "Ii Uuntri Wáinkiaji" tiarmiayi. Tura Tumas Tímiayi "Ajintruamuri Wáinkian uwejrun awaintiuatniuitjai. Tura paenumsha awaintiuatniuitjai. Penké jaka asamtai aya nujai iniantkimiun Enentáimtustatjai" Tímiayi.

Chíkich tumintin ataksha Jesusa unuiniamuri iruntrarmiayi. Nuinkia Tumassha niijiai pujuarmiayi. Tura waiti epenmianuman Jesus Wayá ajapén wajas "Shiir pujustarum" Tímiayi.

Nuyá Tumasan Tímiayi "Winia uwejur iisam ame uwejem awaintiuata. Núnismek winia paerui uwejem awaintiuam Iistá. Tura arantutsuk nekas Enentáimtursata."

Nuyá Tumas "Winia Uuntrua, nekas winia Yúsruitme" Tímiayi.

Jesussha Tímiayi "Winia Wáitkiam nuin Enentáimtursame. Antsu Winia Wáittsuk Enentáimturaru nekas shiir ainiawai" Tímiayi.

Aentsti tujintiamuncha Jesus Túramu ti Untsurí ju papinium aarchamu ainiawai. Tura ni unuiniamuri mash Wáinkiarmai.

Antsu Jesuska Kristu asa Yusa Uchirínti tu Enentáimtustarum tusan Júnaka aarmajai. Tura Enentáimtakmin Jesus ni iwiaakmarin yamarma nuna amastatui.

Tipirias antumianka Káanmatkariin Jesus ni Unuiniamurín wantintiukmiayi. Júnisan ámiayi.

Semun Pítrusha Jímiampramu Tumassha Kananmaya Natanaérsha Sepetéu Uchirísha tura Chíkich Jímiar unuiniamurisha métek iruntrar pujuarmiayi.

Semun Pítrusha "Namakan nekajai nankiattsan wéajai" Tímiayi. Chíkich mash "Iisha winittiaji" tiarmiayi. Wéar uunt kanunam enkemprar nu kashi achitsuk tsawararmiayi.

Káshik ain Jesus Entsá Káanmatkaríin wantinkiamiayi tura ni unuiniamurisha Jesusan nekaacharmiayi.

Jesussha Tímiayi "Uchiru, ṡnamak achikiurmek?" Niisha "Atsá" tiarmiayi.

Tutai Jesus Tímiayi "Neka untsuurnumaani ajunkatarum. Nui achiktatrume." Nii timia Núnisan Túrawar namakan ti achikiar nekan Júsatniun tujinkiarmiayi.

Nújainkia Jesusa unuiniamuri Jesus ti aneemia nu Pítrun Tímiayi "Ii Uuntrinti." Takui Pítrusha aimiaku asa ni pushirin entsar Entsá inianmiayi yukuak jeataj tusa.

Chíkich unuiniamurisha jeachat pujuiniachuk nekan japiki kanujai Káanmatkanam jeawarmiayi.

Káanmatkanam jeawar ji kaiir ámanum namakan Jiámun Wáinkiarmiayi. Tantancha Wáinkiarmiayi.

Jesussha "Atum achikiurmena Nuyá Jiátin itiatarum" Tímiayi.

Tutai Semun Pítiur kanunam we nekan nekartiuk Káanmatak japiki itiamiayi. Itiar namaknasha siantu senkuenta Nuyá tres (153) nekapmararmiayi. Ti Untsurí áyat nekasha Jáankachmiayi.

Nuyá Jesussha "Yurumáitiarum" Tímiayi. Ni unuiniamurisha "aya ii Uuntri áminiaiti" tusar inintrustinian natsantiarmiayi.

Nuyá Jesus wajaki tantan Jukí Súsarmiayi. Núnisan namaknasha Súsarmiayi.

Jesus jakamunmaya nantaki jujai menaintiu ni unuiniamurin wantintiukarmiayi.

Nuyá Yurumáwar Jesus Semun Pítrun aniasmiayi "Junasa Uchirí Semunka, ṡju shuar nankaamas anentmek?" Pítrusha Tímiayi "Ee, Uunta, wi wakerajam nu Ame nékame." Jesussha "Nuinkia winia murikiur ayuratniua aintsam Winia Enentáimturainia nu Yaintá" Tímiayi.

Ataksha aniasmiayi "Junasa Uchirí Semunka, ṡWinia anentmek?" Pítrusha "Ee, Uunta, wi wakerajam nu Ame nékame" Tímiayi. Jesussha "Winia murikiur Wáinkiatá" Tímiayi.

Nú ataksha aniasmiayi "Junasa Uchirí Semunka, ṡwinia wakerutamek?" Pítrusha menaintiu Iníam Kúntuts Enentáimiar Tímiayi "Uunta, Ashí nékame. Wi wakerajam nu Ame nékame." Jesussha Tímiayi "Winia murikiur ayurata.

Maa, nekas Tájame. Natsa asamka iwiarmampram ame wakeramunam wéuyame. Tura uuntach ajasmeka ame kunturam ayaparakmin Chíkich aentstamprattawai tura ame wétin nakitiam nui juramkiartatui."

Jesus Nújainkia Pítiur Máatniun ujakmiayi. Tura Núnisan jakamtai shuar Yúsan shiir awajsatniun ujakmiayi. Nuyá Pítrun "Nemartusta" Tímiayi.

Pítrusha ayanmar Chíkich unuiniamurin Jesus ti anea nuna némarun Wáinkiamiayi. Kame nu unuiniamuka nuik Jesus Jáatsain Yurumáiniakui "Uunta, ṡya surutmaktata?" timia Núiti.

Nincha Pítiur Wáiniak Jesusan aniasmiayi "Uunta, ṡjusha Warí urukatniuit?"

Jesussha ayak "Wi wakeraknaka iwiaaku pujain Tátatjai Tíminiaitjai. Nuna Tákuisha ṡWarí itiurtama? Ameka nemartusta" Tímiayi.

Nújainkia "Nu Unuiniamurí Jákashtatui' tusa Yus-shuarnum áujmatiarmiayi. Túrasha Jesus "Jákashtatui' Tíchamiayi antsu áyatik "Wi wakeraknaka iwiaaku pujain Tátatjai takuisha ṡWarí itiurtama?" Tímiayi.

Wikia Nú unuiniamurintjai. Ju papincha aaru asan "mash nekasaiti' tajai. Ashí shuarsha Núnisaran Tuíniawai.

Nu arantcha jui aarchamusha ti awai. Kame Ashí aamka ti Untsurí Papí asa Ashí nunkanam ikiuschamnia ainti. Nuke Atí.