Jui Jesukrístunu shiir chicham Nánkameawai. Jesukrístu Yusa Uchirínti.

Yuska imiakratin Juankan pachis ni etserniurin Isayasan ti yaunchu ni Papiriin juna aamtikramiayi: "Iisiana, ame wéamurmin emka Wetí tusan winia akatramurun akupeajai. Niisha ame jintimin iwiarattawai.

Niisha aents atsamunam untsumuk juna Títiatui: "Uunta jinti iwiarturtarum; naka awajsatarum." Nuke aarmaiti.

Wats, aents atsamunam imiakratin Juan imiaittsa pujus étseruk, ""tunaarun Yus asakatrurat" tusarum, Enentáim Yapajiárum imiantiarum" Tímiayi.

Anturkatai tusar Ashí Jutía nunkanmaya shuar tura Jerusarén peprunmaya shuarsha Niin tariarmiayi. Taar, ni tunaarin ujakarmatai, Juan Jurtan entsanam imiainiarmiayi.

Juansha kamiriu ure najantramun entsauyayi. Emenmamkesha nuapeyayi. Tura chinijiai yutai-Títikriatsnasha yuuyayi.

Niisha aentsun ujaak Tímiayi "Wíjiainkia nankaamas ana nu winia ukurui winittiawai. Niisha nekas ii Uuntri asamtai, wikia tsuntsumpruan ni sapatri jinkiamurinkisha atitrachminiaitjai.

Wikia entsajain aya ayashmin imiaajrume, antsu Ninkia imiantinia aanis Yusa Wakani atumi Enentáin enketramprattarme" Tímiayi.

Juan aentsun imiak pujurainiai, Jesuska Nasarét pepru Kariréa nunkanam ana Nuyá jiinki Juankan tarimiayi. Tura Juan Jurtan entsanam Jesusan imiaimiayi.

Nuin, Jesus entsaya jiiniuk, nayaimpin uranniun Wáinkiamiayi. Tura Yusa Wakanín Yámpitsa Núnin najanar Niin taarun Wáinkiamiayi.

Tura nayaimpinmaya chichaamun juna antukmiayi, "Ameka winia aneamu Uchiruitme. Amin shiir Enentáimtajme."

Nuyá Wárik Yusa Wakaní Jesusan atsamunam jukimiayi.

Tura nui, yajasma yujamunam, kuarenta tsawant pujumiayi. Nui pujai uunt iwianch Satanás naartin Jesusan nekapsataj tusa pujurmiayi. Túramtai Jesusan Wáinkiatai tusar nayaimpinmaya suntar tariarmiayi.

Ukunam, Juankan sepunam enkeawarmatai, Jesuska Kariréa nunkanam Yusa akupeamurin pachis shiir chichaman etserki Támiayi.

"Tsawant jeayi. Shuarnum Yusa akupeamuri jeatemai. Tuma asamtai, yaunchu Enentáimsamuram Yapajiárum, Uwempratin Chicham umirkatarum" tu etserkamiayi.

Jesus Kariréa antumianka Kánmatkariin wekas, namakan achinian Semunnasha ni yachi Antresnasha nekan ajuntuk pujuinian Wáinkiamiayi.

Wáiniak "Nemartustarum, Tímiayi. Namak achiarmena Nútiksanak aentsun-eau Yusna arti tusan awajsatjarme" Tímiayi.

Tura nuyanka ni nekarin ajapa ikiuiniak Jesusan nemarsarmiayi.

Nuyasha Jesus ishichik arantach wesa, Sepetéu Uchirín Jakupun ni yachin Juánnasha kanunam ni nekarin Apáa pujuinian Wáinkiarmiayi.

Wáiniak, nemartusta tusa untsukarmiayi. Tutai ni Aparíncha, ni apari takarniurincha kanunam ikiuiniak Jesusan nemarsarmiayi.

Nuyá Kapernáum péprunam jeawarmiayi. Nui Israer-shuara ayampratin tsawantri jeakui Jesus Israer-shuar iruntainiam Wayá Yus-Chichaman unuiniamiayi.

Tura ni jintinniuri jintintiarmia nuna iniankas uunt chichamjai Jesus Jintíakui ni chichamen anturkar ti Enentáimprarmiayi.

Nuisha nu iruntainiam aishman iwianchruku ámiayi. Niisha untsumuk

"ṡWarí itiurtamkattsamea incha taum, Nasarétnumia Jesusa? Wikia nékajme. Ametme Tunaartichu Yúsaiya winiamna nu. Iin emestamprataj tusam Táchamek" Tímiayi.

Tutai, Jesus kakantar chicharuk "Takamátsatá. Ni Enentáiya Jíinkitia, Tájame" Tímiayi.

Tutai íwianch aishmankan ukurak ajakninkiar untsumak kakaar aa Jíinkimiayi.

Nuna Wáinkiar, ashamkar Nuámtak aniniaisarmiayi. "ṡAusha warinkit. Yamaram chicham Warí chichamait? Ju Jesuska Timiá kakaram asa ímia iwianchin akupeatsuk. Iisiana umirainiatsuk" tiarmiayi.

Tura ti Wárik nu Túrunamu Ashí Kariréa nunkanam antunkamiayi.

Nuyá Israer-shuara iruntai jeenia jiinki Jesuska Jakupujai Juanjaisha we, Semun ni yachi Antresjai pujuarmia nui jeawarmiayi.

Semunka tsatsari tsuer peaknum jaa tepemiayi. Núnaka Wárik Jesusan ujakarmiayi.

Nuinkia Jesus Werí uwejnum achik iniantkimiayi. Tura nu chichamaik michatramiayi. Michatar, pénker ajas, Jesusnasha ni nemarniurincha ayurawarmiayi.

Nu tsawantai kiarai, Ashí Jáinian, iwianchrukuncha Jesusan itiariarmiayi.

Tura Ashí Nú péprunmaya shuar taar Wáitiniam Jesusan Káutkarmiayi.

Untsurí Shuáran Chíkich sunkuraim Jáinian Jesus tsuararmiayi. Tura iwianchruku armia nuna Enentáiyan iwianchin Jíirkiarmiayi. Jesuska íwianch nékamu asa, winia Náarun ántar pachisarain tusa suritkiarmiayi.

Nuyá kashin Káshik tsawaatsain Jesus nantaki Yúsan áujsataj tusa jiinki atsamunam wémiayi.

Tura Semun ni amikrijiai Jesus wemaanum wéarmiayi.

Niin Wáinkiar "Ashi shuar Amin eatmainiawai" tiarmiayi.

Tutai Jesus chichaak "Chíkich péprunmasha arantach wetai. Nui Yusa chichame etserkatai; nuna Túrattsan Táwitjai" Tímiayi.

Nuna ti Ashí Kariréa nunkanam Israer-shuar iruntai jeanam etseras wekaimiayi; tura Núnisan iwianchniasha jiiki akupkini wekaimiayi.

Túramtai, ti tunamaru shuar Jesusan seatajtsa tarimiayi. Taa tikishmatar Tímiayi "Wakerutakmeka tsuaratin tujintratsme."

Jesus niin waitnentak uwejejai antinmiayi. Antin "Wakerajme. Pénker ajasta" Tímiayi.

Nu chichamaik, Jesus chichakmatai, ni sunkuri menkakamiayi. Tura pénker ajasmiayi.

Túrunamtai Jesus kakantar chicharuk

akupeak "Wáinkiatá, Nánkamsam etseraip, Tímiayi. Antsu weme, Israer-patrirmin iniakmamsata. Túram Ashí aents ame pénker ajasmarumin nekaawarat tusam, Muisais aar akupkamiania nu umikiam Súsatin ana nu susata" Tímiayi.

Tura etserkaip Támaitiat, jiinki ni Túrunamurin mash etseramiayi. Tura nuna etserka asamtai, péprunam, aents írunmanum wétinian Jesus nakitramiayi, antsu aa atsamunam pujumiayi. Tura Ashí nunkanmaya Jesusan tariarmiayi.

Kapernáum péprunam Jesus ukunam ataksha wémiayi. Jeamtai, ni jeen pujan nekaawarmiayi.

Tuma asamtai shuar Wárik ti Untsurí Káutkarmiayi. Ti Untsurí asamtai, jea piakmiayi; Wáitinmasha ankantchauyayi. Jesuska Yus-Chichaman nu aentsun ujaak pujurmiayi.

Nuinkia ni amikrin emearun kuatru shuar tampumpruawar Júkiar Jesusan itiariarmiayi.

Tura jeawar, Untsurí shuar írunu ásamtai Jeá wayatniun tujinkiarmiayi. Tuma ásar, yakinini wakar jea urakar, aankawar, tampunam ni amikrin Jesus pujamunam awaintiuawar itiararmiayi.

Tura niisha Jesus nekas Tsuártatui tu Enentáimmiarin Jesus Nekáa emearun chicharuk, "Uchirú, ame tunaarumka tsankuramuiti" Tímiayi.

Israer-shuara jintinniurisha nuna Antúu pujuarmiayi. Tura ni Enentáijiai Enentáimsar,

"ṡJusha urukamtai emearun tu chichara? Yúsan Imiá yajauch chicharui. Warí, yaki tunaan asakarminiait; aya Yúsak tunaan asakarchamniakait" tu Enentáimsarmiayi.

Jesuska ni Enentáimmiarin nekarawar "ṡUrukamtia átum tu Enentáimprum? Tímiayi.

Emearu, tunaarum tsankuramuiti Títinjai, emearu, wajakim tampuram entsakim wekasata Títinjai ṡTuá Imiá Yúpichuchit?

Wats wi, Aents Ajasu asan Yusa kakarmarijiai shuara tunaari tsankuramniaitjiana nuna paant iwiaintiuktajrume" Tímiayi. Nuna tinia emearun chicharuk

"Wajaktia, Tájame; Túram tampuram jukim jéemiin Wetá" Tímiayi.

Nu chichamaik emearu wajaki, tampurin Jukí, Ashí íimiainiain Jíinkimiayi. Nuna Túrunamtai Ashí ashamkarmiayi. Tura "Jútikiamu penké Wáinchaitji" tiar Yusa Náarin uunt awajsarmiayi.

Nuyá ukunam Jesus antumiannum waketkimiayi. Tura Ashí shuar Káunkarmatai jintintiawarmiayi.

Tura jintintiawar amuk, akupin akitiai jeanam nankaamak, Arpeu uchirin Riwin pujan Wáinkiamiayi. Wáiniak "Nemartusta" Tímiayi. Tutai Riwí wajaki Jesusan nemarsamiayi.

Chíkich tsawant, Riwisha Jesusan ni jeen itiaamiayi. Tura Untsurí Kuítian-juu shuarsha, yajauch shuarsha Jesusjai ni unuiniamurijiaisha ashi nuim misanam pujuarmiai.

Tura Kuítian-juu shuarsha yajauch shuarsha Jesusjai irunar Yurumáinian Wáinkiar, Pariséu jintinniurisha Israer-shuara jintinniurisha Jesusa unuiniamurin aniasarmiayi. "ṡUrukamtai ame uuntrum Jesus, Kuítian-juu shuarjai tura yajauch shuarjaisha yuruma?" tiarmiayi.

Jesus nuna antuk Tímiayi "Jaachu shuar Tsuákratniun atsumainiatsui. Antsu jaa ana nu Tsuákratniun atsumainiawai. Wats, "pénkeraitjai" tuinia Nú shuaran untsuktajtsan Táchaitjai; antsu "tunaitjai" tuinia Nú shuaran Winia ajasat tusan untsuktajtsan Táwitjai" Tímiayi.

Juanka unuiniamurisha Pariséu unuiniamurisha yurumtsuk Yúsan áujiarmiayi. Túmakui Chíkich shuar Jesusan tariar chicharainiak, "Juanka unuiniamurisha, Pariséu unuiniamurisha yurumtsuk Yúsan áujainiatsuk; ṡame unuiniamurmeka urukamtai yurumtsuk áujainiatsu?" tiarmiayi.

Tutai Jesus chichaak, "ṡNuatma nampernum ipiaamu ainia nu ijiarmawartiniak ainia? Yama nuatu pujakui ni amikri warainiak ijiarmachartin ainiawai. Núnisan winia unuiniamur, Wi pujakui, warainiak yurumtsuk pujuschartin ainiawai.

Tura tsawant jeattawai, Winia jurukiartin. Nuinkia winia unuiniamur ijiarmawartatui' Tímiayi Jesus.

Tura Nuyá juna Tímiayi `Mamuru Pushí jaanakmatai yamaram tarach anujtukchatniuiti. Túramka nijiam yamaram tarach sumpeak mamushan Chinkiá nuna nankaamas Jáaktatui.

Nijiamanch Yamái nawar nuap najanamu arutnum yaraachminiaiti. Túramka wakaprua Karíak nuap najanamu ijiakratniuiti. Tura nijiamanch ukarattawai. Nuap najanamu yajauch ajastatui. Antsu yamaram nijiamanch yamaram nuap najanamunam yaraatniuiti" Tímiayi.

Chíkich ayampratin tsawantai Jesus ajanman ajapén nankaamarmiayi. Tura ni unuiniamuri trikiu neren majukiar wearmiayi.

Nuna Wáinkiar Pariséu Jesusan chicharainiak "ṡWarí, urukamtai ame unuiniamuram ayampratin tsawant takastin surimkiamu aisha takainia?" tiarmiayi.

Tutai Jesus Tímiayi "Ii uuntri Tawitia Túramuri Yús-Papinium áujsachukaitrum. Niisha ni nemarniurisha tsukamainiak, ni yurumkari atsakui, Túrawarmia nu áujsachukaitrum.

Apiatár Yusnan pujurniu uuntri pujai Uunt Tawit Yusa Jeen wayamiayi. Tura Tawitkia, patri nankaamas uunt asa, Pátrichuitiat, iniaktusma tantan, aya patri Yútainiak, yuamiayi; tura ni nemarniurincha ajamsamiayi. Nu áujsachukaitrum, Tímiayi.

Ayampratin tsawantai Túrashtinian umirkashtimpiash tusa Yuska aentsun najanachmiayi. Antsu aents ayamprarat tusa Yus ayampratin tsawantan tesamiayi.

Wisha, Aents Ajasu asan imia ayampratin tsawantan Nerenniurintjai" Tímiayi.

Ataksha Chíkich tsawantai Israer-shuar iruntainiam Jesus wayamiayi. Nui shuar ámiayi, ni uweje jaka.

Tura Tunáan Túrayi titiai tusar wakeruiniak "ayampratin tsawantai Tsuártimpiash" tusar, Pariséu shuarsha Jesusan ii pujuriarmiayi.

Nuinkia Jesus uweje jaka shuaran chicharuk "Ajapén wajasta" Tímiayi.

Nuinkia mamikmaun chicharuk "ṡAyampratin tsawantai pénker Túratin yajauch Túratniujai Tuá Imiá pénkerait. Shuar uwemtikratin Máatniujai Tuá Imiá pénkerait?" Tímiayi. Nuna takui niisha pachischarmiayi.

Tura Jesus kajek niin iiyarmiayi; tura ni Enentáin Kátsuram ásarmatai Kúntuts Enentáimsamiayi. Tura Shuáran chicharuk "Uwejem iniakmasta" Tímiayi. Iniakmasmatai ni uweje jaruku ataksha pénker ajatsamiayi.

Nuyá Pariséu shuar Jíinkiar, Jesus maami tusar Erutis shuarjai áujmatsarmiayi.

Nuyá Jesus ni unuiniamurijiai antumiannum wémiayi. Kariréa nunkanmaya Untsurí shuarsha Jesusan nemariarmiayi.

Untsurí nunkanmayasha Káunkarmiayi. Jutía nunkanmayasha, Jerusarén péprunmayasha, Itiumía nunkanmayasha, Jurtan entsa amainiasha, Tiru tura Setun pepru pujuinia Nú nunkanmayasha, Untsurí shuar ni Túramurin nekaawar, Jesusan Káutkarmiayi.

Untsurí Káunkar chanuntawarain tusa Jesus ni unuiniamurin kanuram Inianáastarum tusa seamiayi.

Kame Untsurí shuaran Jesus nuik tsuaru asamtai, jaa shuar nui Káunkarmiania nu Jesusan antintaj tusar shitianainiakui nuna seamiayi.

Tura iwianchrukusha Jesusan Wáinkiar tikishmatrarmiayi. Untsumainiak "Ame nekas Yusa Uchirínme" tiarmiayi.

Tura nuna etserkairap tusa Jesuska kakantramiayi.

Nuyá Jesus Náinnium wakamiayi. Tura anaikiatniun wakerimia Nú shuaran untsukmiayi. Tura niisha Jesusan weriarmiayi.

Tura Niijiai wekasar Yus-Chichaman unuiniartinian tuse Shuáran anaikiarmiayi.

Tura sunkur Tsuártinian, iwianchcha jiiki akupkatniun ni kakarmarin Súsarmiayi Nú shuaran.

Ju Shuáran anaikiamu ármiayi: Semun, Jesus Chíkich naarin Pítiur apujtusmiania nu;

Sepetéu uchiri Jakupu, ni patai Juánsha; ipiamtajai métek kakaram ásarmatai nuna mai "Puanérjis" naari susamiayi. Nusha shuar chichamjainkia "ipiamta nuke" tawai.

Nuyá Antressha, Jiripi, Parturumí, Mateu, Tumas, Arpeu Uchirí Jakupu, Tateu, ásump Semun,

Jútas Iskariúti. Jesusan ukunam surukmia Nú Jútasauyayi. Anaik amukmatai Jeá waketrarmiayi.

Waketkiarmatai, ti Untsurí shuar taarmatai takatri ti akui, Yurumátniun jeacharmiayi.

Jesusa Shuárisha nuna nekaawar Jesus ti itiurchat pujus Wáurtsuash tu Enentáimsar jukitiai tusar nu jeanam jeariarmiayi.

Nuyá Israer-shuara jintinniuri Jerusarénnumia Táarmiania nu, Jesusan áujmatainiak "Pirsepú enkea asa iwianchrukuiti. Tuma asa uunt iwianchi kakarmarijiai iwianchin jiiki akupeawai" tiarmiayi.

Tutai Jesus winitiarum tusa niin untsukmiayi. Tura Enentáimtikrataj tusa juna Tímiayi: "ṡIwianch Satanáskesha itiur ajapmamatin~ki?

Chikichik Nú nunkanmaya shuar Nuámtak kajernaiyakuinkia, nu nunka wari meserchattawak.

Nuámtak shuar ni shuarijiai kajernaiyakuinkia nu shuarsha amunaikchartatuak.

Núnisan ṡSatanáskesha ni suntarijiai Máaniakka itiurak tuke pujusarat? Amunaikiartatui.

Nánkamas shuar kakaram shuara jeen Wayá, nérenniun jinkiatsuk ni Kuítrin kasarkachminiaiti. Antsu nérenniun Jinkiá ni Kuítrin kasarkamniaiti.

Nekas Tájarme, shuar Tunáa Ashí Túruiniana nuka tsankuramniaiti. Winiasha winia Aparnasha yajauch áujmatusha tsankuramniaiti.

Antsu Yusa Wakanín yajauch áujmatna nuka tsankurachminiaiti; antsu nu shuar ninki tuke sumamattawai."

"Jesuska iwianchrukuiti" Tuíniakui Jesus Nuní Tímiayi.

Nuyá ni yachi ni Nukuríjiai taar aa wajasar, Jesusan untsukat tusa akupkarmiayi.

Shuar Jesusan téntak pujuarmia nu tiarmiayi "Iis, nukusha, yatsumsha aa wajasar untsurmainiawai."

Tutai Jesus chichaak "Ya ainia winia nukursha yatsursha" Tímiayi.

Niin téntakar pujuarmia nuna iis "Júiti winia nukurka, yatsurka, Tímiayi.

Shuar Yusa wakeramurin uminiana nu winia yatsuruiti, winia umaruiti, winia nukuruiti" Tímiayi.

Nuyá jiinki antumianka yantamen Jesus ataksha unuiniartinian juarkimiayi. Tura Untsurí shuar iruntrarmatai, kanunam enkempramiayi. Shuarsha antumianka Káanmatkarin pujuarmiayi.

Jesuska métek-taku chichamjai ti Jintintiármiayi. Jintintiuk juna Tímiayi:

"Antuktarum. Atsaamin atsaamprataj tusa Jíinkimiai.

Atsaamkui ni arakri Jintiá iniararmai. Chinki yakiya Káutkar yuawarmai.

Chikichcha kaya írunmanum iniararmai, nunka ishichik ámanum. Tura nunka ishichik asamtai Wárik tsapainiarmai.

Tura etsa etsantar Sukuám kankape Atsá asamtai Káararmai.

Chikichcha Jankí nupanam iniararmai. Jankisha tsapainiar kankar ajakrarmai; Túram nerekcharmai.

Chikichcha pénker nunkanam iniararmai. Tura tsapainiar nerekarmai, Chíkich trainta, Chíkich sesenta, Chíkich sian nerekarmai.

Kuíshim ákuinkia antuktarum" Tímiayi.

Untsurí wearmatai, ishichik Niijiai juakarmiania nu, ni tuse unuiniamurijiai aniasarmiayi "ṡAme jintintiamna nusha warimpiait?" tiarmiayi.

Tutai Jesus chichaak "Yuska ni akupeamurin atumin paant nekamtikramattsa wakerutmarme. Antsu Chíkich shuarka aya métek-taku chichamjai Jintintiáwartatui.

Iiniayatan Wáinkiacharat tusa, antukarsha nekaacharat tusa, umirtsuk ni tunaari tsankurnacharat tusa Túrattawai' Tímiayi.

Tura Tímiayi `Wi jintintiajrumna Nú métek-taku chicham nekaachurmek. Nu nékachkurmeka ṡitiurak Chíkich métek-taku chichamsha nekaatarum?

Atsaamniua nuka Yus-Chichaman étserna nuna nakumui.

Jinkiái Jintiá iniaarua nuna Chíkich shuar ántuiniamun nakumui. Nu shuar chichaman ántuiniawai. Tura antukarmatai Satanás Wárik Tarí ni Enentáin atsaampramun jurawai.

Chíkich shuar ántuiniamu kayanam atsaampramua Núniskete. Niisha chichaman antukar Wárik warainiak umiktasa wakeruiniawai.

Tura ni kankape atsakui, aya ishichik katsuiniawai. Tura ukunam, Yus-Chichaman wakeruiniakui shuar kajeram tura Chíkich itiurchatan Wáinkiar Yúsaiya kanainiawai.

Chíkich ántuiniamuka Jankí nupanam atsaampramua Núniskete. Nu shuar Yus-Chichaman ántuiniawai.

Antuiniayat ju nunkanam ana nuna ti Páchiniawai. Tuma ásar Kuítian tura shiirmachin ti takustinian wakeruiniawai. Nú wakeramu ni Enentáin Yus-Chicham ana nuna kankar emenkatui. Tuma asamtai nerektinian tujintiainiawai.

Tura Chíkich ántuiniamusha pénker Núnkanam atsaampramua Núniskete. Nú shuarsha Yus-Chichaman antukar umiiniawai. Tura nerenawai, Chíkich shuar trainta, Chíkich shuar sesenta Chíkich shuar siansha nerenawai.'

Nuyá Jesus juna Tímiayi `ṡShuar shiripkin ekeemak Itiá pitiaknum enkeattawak. Peaknum wakenam ikiustatuak? Atsá. Antsu misanam ekentsashtinkiait.

Núnisan Ashí uukma ana nu ukunam paant nekanattawai. Tura Núnisan Yamái ishishmasa chichasmasha ukunam paant nekanattawai.

Kuíshim ákuinkia antuktarum.'

Tura Nuyá Tímiayi `Antarmena nu esetrarum Enentáimsarum antuktarum. Urutá pénkerak Enentáimsatarum, Núnisan Yuska ámin nekaatniun suramsattarme, tura Nú Núkap patatramsattarme.

Tuma asamtai shuar Núkap takakna nu patatnastatui. Antsu Chíkich shuar ishichik takakuk jurunkittiawai.'

Nuyá Jesus chichaak juna Tímiayi `Yusa akupeamuri Júnisaiti. Shuar jinkiain atsaampratniua Núniskete.

Jinkiáin atsaamar, Untsurí kanar, tsawar, uruksanpi tusa Nákawai. Tura itiura tsapainia Núnaka nékatsui.

Kame Jinkiái nunkanam init aku ninki tsapaatsuk; emka nukareawai, Nuyá tuyureawai tura nujamar katsuawai.

Túruna Káakmatai Júuktin tsawant jeayi tusar Juíniawai.'

Ataksha Jesus Tímiayi `ṡYusa akupeamuri warijiaink~i nakumkataj. Warijiaink~i métek-takuit?

Mustasa Jinkiaí araamua nujai métek-takuiti. Nu jinkiaisha Ashí nankaamas ishitiupchichiti.

Tura araam Tsapái Ashí nankaamas uunt ajawai; tura tsenkeakmarisha Kámpuram asamtai nui mikintranam chinkisha shiir ayamainiawai."

Núnisan Jesus Untsurí métek-taku chichamjai Yus-Chichaman ujaamiayi. Nii nekaatniun jearmia nunak ujaamiayi.

Chíkich shuaran aya métek-taku chichamjai ujaamiayi; antsu ni unuiniamurijiai Ninki pujus Ashí paant jintintrarmiayi.

Nu tsawantai etsa akaikimtai Jesus ni unuiniamurin chicharainiak "Entsa amain katintai" Tímiayi.

Tutai kanunam enkemprarmiayi. Chíkich shuarnaka Káanmatkanam ikiukiar Jesusan kanunam pujan Júkiarmiayi. Chíkich kanunmayasha atampriarmiayi.

Tura nasesha ti nasenkatasa nankammiayi; Chíchimi kanunam Yaráná Piáktasa ajamiayi.

Jesuska Kanú senkarin atamprus Kanúu tepemiayi. Tura, ni unuiniamuri Jesusan ishintiak chicharuk "Uunta ii wayajnia juka pachitmatsmek" tiarmiayi.

Tutai Jesus nantaki nasen kakantramiayi. Entsancha chicharuk "Takamatsata. Miaku ajasta" Tímiayi. Tutai nasesha menkakamiayi, entsasha miaaku ajasmiayi.

Túrunamtai Jesus ni unuiniamurin chicharainiak "ṡUrukamtai ashamarum? Itiura Yus nekas Enentáimtatsrum" Tímiayi.

Tura Imiá ashamainiak "ṡMaa jusha yait? Nasesha entsasha niin umirainiatsuk" tunaiyarmiayi.

Nuyá antumian amaini Jatara nunkanam jeawarmiayi.

Jesus kanunmaya jiinkimtai aishman iwianchruku, shuar Jakáa iwiartainiumia Wárik taa Jesusan inkiunmiayi.

Nu shuar iwiartainium tuke pujuyayi. Tura jirujainkia niin jinkiaatniun tujinkiarmiayi.

Jirujai nawenmasha, uwejnumsha tuke jinkiau ármiayi. Túramaitiat jinkiaarman tsuriar tepet-tepet awajmiayi. Tura ti kakaram asamtai niin nupetkachminiuyayi.

Tuke tsawaisha Káshisha, iwiartainiumsha murasha kayajai ijiumak untsumuu wekainiuyayi.

Tura yajayan Wáiniak Jesusan tseke tarimiayi; tura tikishmatramiayi.

Túrunamtai Jesus chicharuk "Iwianchiá, ni Enentáiya jiinkitia, Tájame" Tímiayi. Takui íwianch kakantar chichaak "ṡWiniasha urukamtai tarutnium, Uunt Nankaamaku Yusa Uchiri Jesusá? Yus iirmanum Wáitkiarsaip, Tájame" Tímiayi.

Takui Jesus Tímiayi "ṡAme Náarmesha yait?" Tutai niisha ayak "Untsurí ásar wikia Untsurí-suntar tu anaikiamuitjai" Tímiayi.

Nuna ti amik, nu nunkanmaya akuptukain tusa Jesusan ti seamiayi.

Nuisha nainnium nuntumas Untsurí kuchi shushunmak matsamarmiayi.

Tuma asamtai, kuchiniam Enkemátin tsankatrukta tusar Jesusan seawarmiayi.

Tuiniakui Jesus "ayu" Tímiayi. Takui íwianch aishmankainia Jíinkiar kuchiniam Enkemáwarmiayi. Kuchisha ti Untsurí, Jimiará mir (2.000) áchiawash. Ashí mash Nánatanam iniaawar antumiannum iniankarmiayi. Nuisha Entsá kiakar jakerarmiayi.

Túrunamtai kuchin Wáinin pisarar péprunmasha shuarnumsha nuna etserarmiayi. Tuma asamtai iyutai tusar ashintiukarmiayi.

Túrawar Jesusai jeawarmiayi. Jeawar aishman yaunchu iwianchrukun yamaikia pénker ajasun pushirin entsar pujan Wáinkiarmiayi. Wáinkiar ashamkarmiayi.

Tura waketkiar kuchi Túrunamuncha iwianchruku pénker ajasmancha mash etserkarmiayi.

Tuma asamtai ni nunkeya jiinki Wetá tusa seawarmiayi. Jesus kanunam enkemamtai aishman nuik iwianchruku amia nu Jesusan chicharuk

"Wi Amijiai tuke tsaninkian wekasatjai" Tímiayi.

Tura Núnaka Jesus suritkiamiayi. "Antsu ame jeemiin, áminiurmiin weme, Ashí Uunt Yus Túrutma nu tura waitnentrampra nusha ujakarta" Tímiayi.

Tutai aishmansha wémiayi. Tura antsu Tekapuris nunkanam Jesus niin pénker awajsamia nuna Ashí shuaran ujakmiayi. Nu nunkanmaya shuarka nuna antukar ti Enentáimprarmiayi.

Ataksha Jesus kanujai katinmatai, aents Untsurí Niin irunturarmiayi. Jesuska antumianka Káanmatkari wajamiayi.

Tura Israer-shuar iruntai jea Náampruku, ni naari Jairu, Támiayi. Taa, Jesusan Wáiniak, piniakum tepersamiayi.

Piniakumar ti seak, "Winia nawantur jarutui. Winitiá, Túram pénker ajasat tusam uwejmijiai antintrukta. Nuinkia jarutkashtatui" Tímiayi.

Tu Tímiatai Jesus niijiai wémiayi. Tura Untsurí shuar wena ásar Niin Chánuarmiayi.

Nui pachitkia nuwa ti jaa wémiayi. Niisha tuse Uwí numpan ajapeak Wáitias pujuyayi.

Ti Untsurí tsuakratin nincha iisu armiayi. Tura iyamsha ti Wáitias pujuyayi. Tura ni Kuítrincha Ashí ajapaitiat Tsuámarchauyayi; antsu tsuamsha nu arant ajauyayi.

Nu nuwasha, Jesus Túramun antuku asa, ni ukuurini amainian ni pushirin antinmiayi.

"Wi aya ni pushirin antinnaka pénkerapi ajasaintjia" tu Enentáimiar Túramiayi.

Tura Jesusa pushirin antin Nú chichamaik numpa ájapman menkakamiayi. Pénker ajasman ayashiin nekapramiayi.

Tura nuin Jesuska, ni kakarmarijiai tsuarman nekapmampramiayi. Tura nuna Nekáa, ayantar chichaak "ṡYaki winia pushirun antintruka?" Tímiayi.

Tutai ni unuiniamuri tiarmiayi, "Untsurí Amin antinmainiasha ṡurukamtai "yaki winia antintkia" tame?"

Tura Jesus, yaki Túruta tusa ashi iimpramiayi.

Nuinkia nuwasha, ni ayashin Túruna nuna Nekáa, ti ashamak kuraimiayi. Tura Jesusan jeari tikishmatramiayi. Tura ni Túrunamurin Ashí paant ujakmiayi.

Takui Jesus niin chicharuk "Nawantru, Winia nekas Enentáimtursa asakmin, pénker awajtamsaitme. Shiir Wetá, tura tuke pénker pujusta" Tímiayi.

Tura Jesus nuna tuke chichas pujai, iruntai jea uuntri jeenia tariarmiayi. Tariar chicharainiak "Ame nawantrum jakayi. ṡUrukamtai Unuikiartin tuke itit awajsatam?" tiarmiayi.

Tura Jesuska, nii tiarmia nuna ántayat, Núnaka pachitsuk, iruntai jea uuntrin chicharuk "Ashamkaip; áyatik nekas Enentáimtursata' Tímiayi.

Tura Niijiai wétinian aya Pítruncha, Jakupuncha ni yachi Juanjai tsankatkarmiayi.

Iruntai jea uuntri jeen jeawar, aentsun charaatum ajainian, uutainian untsumuk ajainiancha Jesus Wáinkiamiayi.

Tura nuwach penké jakan nékayat, Wayá niin chicharuk "ṡUrukamtai Timiá uutrum, tura wa wa ajarum? Nuwach Jákachai, antsu kanarai" Tímiayi.

Nuna takui wishikrarmiayi. Tura Jesus Ashí jiir akupkarmiayi. Ayatik nuwachi Aparín, Nukuríncha tura Niijiai Táaruncha nuwachi tepamurin jukimiayi.

Tura wayawar Jesuska nuwachi uwejen achik Tímiayi "Taritia kumi." Nusha shuar chichamjainkia "Nawantrú Nantáktiá" tawai.

Nuwach tuse Uwí takakuya nu, Nú chichamaik nantaki wekasamiayi. Túramtai nui pujuarmiania nu ti Enentáimprarmiayi.

Jesuska chichaak "Atumsha penké etserkairap" Tímiayi. Tura "nuwach ayuratarum" Tímiayi.

Jesus Nuyá jiinki ni nunken waketkimiayi. Ni unuiniamurisha nemariarmiayi.

Nuisha ayampratin tsawant jeamtai Israer-shuar iruntainiam Wayá unuiniamiayi. Tura Jesusan anturkarmiania nu ti Enentáimsarmiayi. "ṡJusha tui unuimiaruit. Ni nekaatniurincha yaki susait. Tura aentsti tujintiajnia nuna Niisha itiurak tura?

Jusha Karpintíruchukait; Maríi Uchirínchukait. Ni yachisha Jakupusha, Jusesha, Jútassha, Semunsha nékatsjik. Tura ni umaisha jui iijiai pujuiniatsuk" tiarmiayi. Túrawar Niin nekas Enentáimtustinian tujinkiarmiayi.

Túrasha Jesus niin chicharuk "Yúsnan etserniun Chíkich nunkanmayanka shiir anturainiawai. Antsu Ní nunkeyanka, Ní shuarsha anturainiatsui" Tímiayi.

Tura nuisha, ni nunkenkikia aentsti tujintiamun Túratniun tujinkiamiayi. Antsu jaancha aya ishichik ni uwejejai antin Tsuármiayi.

Tura nekas Enentáimtacham "ṡurukamtai nusha?" tu Enentáimsamiayi. Nuyasha Chíkich péprunam Wayá, Chíkich péprunam Wayá Yus-Chichaman Unuíniakní wekaimiayi.

Tuse unuiniamurin untsuk Jímiarchik Jímiarchik werum Yus-Chicham etserkatarum tusa akupkarmiayi. Tura iwianchin nupetkarat tusa ni kakarmarin Súsarmiayi.

Tura chicharuk "Jintiá Yurumátniusha jukiirap, uyuntrumiincha kuitcha enkearum jukiirap. Antsu aya aanik mashtun jukiirum wetarum.

Sapat uwekatarum, tura entsartincha Jímiar jukiirap, Tímiayi.

Tura jea wayarmena nuin pujustarum; Pujá-pujakuarum Nuyá Chíkich peprunmasha wetarum.

Tura Nánkamas aents atumin awaintiamainiachkuisha, anturtamainiachkuisha, Nuyá Jíinkirum, nu shuar yajauch ainiawai tusarum, Atumí nawe nunka akakekrum ikiuktiarum. Kame Yus aentsun nekapsattana Nú tsawant jeamtai, nu shuarnaka asutiattawai. Sutuma péprunmaya shuarjai tura Kumura péprunmaya shuarjai nankaamas niin asutiattawai" Tímiayi Jesus.

Nuyá Jesusa unuiniamuri Jíinkiar Enentái yapajiar Yúsai Enentáimtumartinian etserkarmiayi.

Tura iwianchruku Enentáiya iwianchin jiirki akupkarmiayi, tura asuitijiai yakarar Untsurí Jáinian tsuararmiayi.

Jesusa Náarin tura ni Túramurin Ashí aents áujmatin ásarmatai, uunt akupin Erutis nuna antukmiayi. Erutiska "Imiakratin Juan jakamunmaya nantakni. Tuma asa ti kakaram takaawai" Tímiayi.

Tura Chíkich shuar "Eríasaiti" tiarmiayi. Chikichcha "Yúsnan etserniuiti, yaunchu etserniuya Núkete" tiarmiayi.

Erutis nuna antuk "Nekas Juánkaiti. Ni muuken tsupiktinian akupkamiaj nu, jakamunmaya nantakniuiti" Tímiayi.

Kame Uunt akupin Erutis, ni yachi Jiripi nuarin nuatkamiayi. Nu nuwa naari Jirutíasaiti. Juansha uunt akupniun Erutisan chicharuk "Yatsumi Nuarí akintrukchatniuitme" Tímiayi. Tutai nuwa Jirutías Juánkan ti kajerkamiayi. Tura Juánkan Máataj tusa wakerimiayi. Túrasha uunt akupin Erutis nuna surimkiamiayi. Antsu Juan achikrum sepunam enkeatarum tusa akupkamiayi.

Juansha tuke Enentáijiai Yusa jintin wekainiuyayi. Erutis, ni esetar Enentáimniun neka asa Juánkan ashamak Jirutías wakeramurin Túrawain tusa suritkiamiayi. Kame Erutis Juan étserman nékachuitiat antuktinian wakerimiayi.

Jirutías, itiurak Máawaj tu pujai, uunt akupin Erutis, ni akiiniamu tsawantri jeamtai, ni suntarincha, Kariréa nunkanmaya uuntrincha, Kuítrintin armia nunasha untsukar, namperan najanamiayi.

Nuisha Jirutíasa nawantri Wayá Jantsemámtai Erutis tura niijiai nampernum matsamarmia nusha shiir Enentáimsarmiayi. Túramtai uunt akupin nuwachin chicharuk "Ame wakeram nu seattia. Wi amastatjai.

Nekas Tájame, Ashí ame seatmena Núnaka amastatjai. Wats, seatkumninkia takakjana nuna Jímiapetek nakakan, amastatjai" Tímiayi.

Tutai nuwach jiinki ni Nukurín Jirutíasan chicharuk "ṡWariniak seattaj?" Tímiayi. Tutai "Imiakratin Juanka muuke seata" Tímiayi.

Nu chichamaik nuwach wari Wayá Erutisan chicharuk "Yamaikia uunt amamkunam Juanka muuken wakerajai" Tímiayi.

Nuna takui uunt akupin ti kuntuts Enentáimpramiayi. Tura nii tiniu asa ni amikri matsatainia nu antukaru ásarmatai surimkiatniun tujinkiamiayi.

Tuma asa uunt akupin Juanka muuke itiata tusa ni suntarin Wárikmas akupkamiayi.

Túramtai suntar wari we, sepunam Juanka muuken tsupikmiayi. Tsupik, amamkunam Itiá, nuwan susamiayi. Túram achik ni Nukurín susamiayi.

Juan maamun antukar ni unuiniamuri ni ayashin iwiarsatai tusar Júkiarmiayi.

Tura Jesusa unuiniamuri Nii akupkarma nu, ataksha waketki Káunak irunturarmiayi. Ashí nii Túrawarmia nuna, unuiniararmia nunasha ujakarmiayi.

Tura Untsurí shuar Táiniakui, niisha ankant ajastinniasha Yurumátniuncha tujinkiarmiayi. Tuma asamtai Jesus chichaak "Iijiai Wemí aents atsuiniamunam; nui ishichik ayamprarmi" Tímiayi.

Nuyá Jesus ni unuiniamurijiai kanunam enkemprar, aents atsuiniamunam jeatai tusar Jíinkiarmiayi.

Túrasha shuar ni wéenan Wáinkiarmiayi. Tura "Jesusaiti" tiarmiayi. Tuma ásar Ashí péprunmaya Untsurí shuar tseke ashintiukar, ni jeatniunam Nákakarmiayi.

Jesus kanunmaya jiinki ti Untsurí aents iruntrar matsatun Wáinkiamiayi. Murik pénker Wáinchataiya Núnisan matsatu ásarmatai Jesus niin Wáitnentrarmiayi. Tura Núkap unuiniararmiayi.

Nuyá kiakui ni unuiniamuri Jesusan tariar chicharainiak "Atsamunam pujatsjik; tura Yamái Kíatsuk.

Shuar wari akupkarta. Tíjiuch péprunmasha, shuarnumsha wearti, ni yurumkari sumarmakarat~i" tiarmiayi.

Tutai Jesus chichaak "Atumek ayuratarum" Tímiayi. Tutai "Iisha ju shuar ayuratai tusar, ṡJimiará sian kuitjai yurumak sumaktai tusar wétinkiaitiaj~i?" tiarmiayi.

Tura Jesus ni unuiniamurin chicharainiak "Tanta takakrum nu iistarum ṡurutmak aa?" Tímiayi. Tutai nekapmarar chichainiak "Tántaka sénkuchikiiti, tura namaksha Jímiarchikiiti" tiarmiayi.

Tutai Jesus Tímiayi "Ju shuar Chírichriniam pujusarti tusar akupkatarum."

Ankant ankant sian siansha, senkuenta senkuenta iruntrar matsamsarmiayi.

Jesuska senku tantancha, Jímiar namaknasha jusa, Yakí nayaimpinmaani iimias Yúsan yuminsamiayi. Tura yurumkan Púurmiayi. Puur ni unuiniamurin Súsarmiayi. Namaknasha puur Súsarmiayi, Ashí Shuáran ajamsarat tusa.

Ashí Yurumáwar ejemararmatai,

puunaruncha, namak ampirmancha achikiar, tuse chankinian aimkiar Júkiarmiayi.

Nu yurumkan ti Untsurí Yurumáwarmiayi. Aya aishmankak senku mir (5.000) ármiayi.

Nuyá Jesus ni unuiniamurin chicharainiak "Kanunam enkemprarum, katinkrum amain émaa ajatarum, Petsaitia péprunam. Wisha ju shuaran áujsan ikiuktiatjai" Tímiayi.

Shuáran áujas ikiuki Yusjai chichastaj tusa Náinnium wémiayi.

Tura kirit ajasmanum Kánuka antumiannum ajapén nanammiayi. Jesuska ninki juakmiayi.

Jesusa unuiniamurisha wia-wiantainiakua ti pimpikiarmiayi, nase tukumma ásar. Nuna Jesus Wáiniak tsawartin ishichik ajasmatai Entsá Pátatek wekas niin jeariarmiayi. Tura nankaamaktiasa wea Núnisan wémiayi.

Jesus Entsá wekaan ni unuiniamuri Wáinkiar, wakanchashit, tu Enentáimprarmiayi. Túrawar ti untsumkarmiayi.

Ashí Wáinkiar ti ashamkarmiayi. Tura Jesus Wárik niin chicharuk "Kakaram ajastarum, Wíitjai Jesus; ashamprukairap" Tímiayi.

Nuinkia entsaya kanunam waka enkempramiayi. Túramtai nasesha majaantmiayi. Ni unuiniamurinkia Enentái kiritia aintsan ásarmatai Jesus yurumkan Núkap awajsamia nuna paant nekaatniun tuke tujinkiarmiayi. Tuma ásar Yamái Túrunamu itiurak aankia tusar ti Enentáimprar sapijmiakarmiayi.

Nuyanka katinkiar, Jinisarít Núnkanam jeawarmiayi. Jeawar kanun ajuiniarmiayi.

Kanunmaya Jíintrarmatai, nu nunkanmaya shuar Jesusan nekaawarmiayi.

Tura "Jesus pujawai" Táman antukar, Ashí jeanmaya jaan ni peakrintiuk Jesus pujamunam itiaarmiayi.

Tura Jesus wekaak wémia nuisha, péprunmasha, shuar matsatmanumsha, ishichik matsatkamunmasha jaan itiariar Jintiá aeprusarmiayi. Túmainiak Jesusan pushirmin antintaj tusar seawarmiayi. Tura Ashí antinkiarmia nuka pénker ajasarmiayi.

Pariséusha, Israer-shuara jintinniurisha Jerusarénnumia Jesusan tariarmiayi.

Tura Jesusa unuiniamurin ikijmiatsuk yurumun Wáinkiar "Israer-shuara Túrutairin Túruiniatsui" tiarmiayi.

(Kame Pariséusha, tura Ashí Israer-shuarsha, ni uuntri jintintiamurin umikiar ti Núkap ikijmiarar yurumin ármiayi.

Péprunmaya tari "ikijmiatsuk Yurumáshtiniaiti" tiniu ármiayi. Tura ti Untsurí ni uuntri Túrutairi Núnisan ármiayi. "Tsapancha, ichinnasha, jiruncha, peaknasha nijiakartiniaiti" tiniu ármiayi.)

Tuma asamtai Pariséusha, Israer-shuara jintinniurisha Jesusan chicharainiak "ṡUrukamtai ame unuiniamuram ii uuntri jintintramniuitiaj nuna Túruiniatsu. Urukamtai ikijmiatskesha Yurumáinia?" tiarmiayi.

Tutai Jesus Tímiayi "Antar chichamtiniaitrume. Isayas yaunchu nekas atumin aartampramiayi juna: Ju aents ni wenejai Winia "ti pénkeraiti" turutainiawai, Tímiayi Yus, tura ni Enentáinkia jeachat pujuiniawai.

Tura tukeneas Winia shiir awajtuiniawai. Aentsu chichame jintiainiayat, "Yus-Chichamaiti" Tuíniawai." Tu aarmaiti.

Tura átum Yusa chichame iniaisarum, aentsu jintintiamuri umirkarum, ichinnasha, tsapancha nijiaktin, tura Chíkich Túrutaisha aintsarmek Untsurí Túrarme.

Túrákrum Yus-Chichamka tsukintiaani ikiusurme Atumí uuntri chichame umirkatai tusarum.

Kame Muisais yaunchu aar juna Tíchamka: Ame apa nukusha shiir Enentáimtustarum. Tura ataksha aarmiayi: Shuarsha ni Aparín, Nukuríncha yajauch chichareakka, nu shuar Jákatniuiti.

Túrasha átumka Pariséutirmeka, antsu ju Tárume: "Shuar ni Aparín ni Nukurín chicharuk "Wi Yáintinian takakjana nu Kurpanaiti" takuinkia, atumsha pénkeraiti, aparincha nukurincha Yáinchatí" tarume. (Kurpan tana nuka, Yus susamu, tawai.)

Nekaatarum, Pariséutiram. "Ií yaunchu uuntri chichame tuke umiki wétiniaitji" Tákurum, Yus-Chicham penké ántar chichama Núnin awajearme. Núnisrumek chikichcha Untsurí Túrarme." Tu timiayi Jesus.

Nuyá ataksha Jesus Ashí Shuáran untsukar "Mash anturtuktarum, Ashí nekaatarum, Tímiayi.

Aaya ayashnium wayaana nu, Shuáran yajauch awajsachminiaiti; tura antsu ni Enentáinia jiinia nu, yajauch awajsattawai.

Shuar nuna ántakka Enentáimprati" Tímiayi.

Nuyá aentsun ikuiak, jea wayamtai, ni unuiniamuri aniasarmiayi "ṡNu métek-taku chicham warintiua?" tiarmiayi.

Tutai Jesus Tímiayi "Atumsha nékatsrumek. Páantchakait; yurumak Yúajnia nu, Enentáiniam wayachu asa, Shuáran yajauch awajsachminiaiti.

Antsu wakenam Wayá, nankaamas menkaatsuk" Tímiayi. Nuna taku, Ashí yurumak Páchitsuk yuamniaiti, Tímiayi.

Nuyá Tímiayi "Shuara Enentáinia jiinia nu, yajauch awajsamniaiti.

Shuara Enentáinia, initia, yajauch Enentáimsatniusha, tsanirmatniusha, natsa tsanirmatniusha, shuar Máatniusha,

kasamkatniusha, chikichna wakeruktincha, pénkercha Túratniusha, anankatniusha, natsantain átincha, yajauch Enentáimtustincha, tsanumpratniusha, waantu Enentáimtumastincha, netse Túratniusha, Ashí nuka initia wininiatsuk.

Ashí nu Tunáa ainia nu, shuara Enentáinia Jíiniu asa, Shuáran yajauch awajainiawai" Tímiayi.

Tiru pepru, Setún péprusha Serupinísia nunkanam ámiayi. Nuka Israer-shuara nunkenchauyayi. Nu nunkanam Jesus wémiayi. Tura Jeá, Jeá Wayáa pujusmiayi. Tura nui pujamun nu nunkanmaya shuar nekarawarain tusa nakitmiayi; Túrasha uumkatniun tujinkiamiayi.

Wárik nu nunkanmaya nuwa Jesus pujan nekaamiayi. Nu Núwaka nawantri iwianchrukuyayi. Tuma asa Jesusan Tarí ni nawen piniakum tepersamiayi.

Nu nuwa Israer-shuarcha, Serupinísianmayauyayi. Túmaitiat, nawantru Enentáiya iwianchin jiirturkitia tusa Jesusan seamiayi.

Tutai Jesus nuwan chicharuk "Uchi emka Ejemarartí. Uchi apatkuri atankir yawach Súsatin pénkerchaiti" Tímiayi.

Tutai nuwa ayak "Nekas, Uunta, tame. Tura yawachisha misanam wakenam pujuinia nu, uchi apatkun yurumuk juyumak Kákeamun Yuíniatsuk" Tímiayi.

Tutai Jesus Tímiayi "Pénker tame. Tuma asam, shiir Wetá; ame nawantrumi Enentáiya iwianch Jíinkiyi" Tímiayi.

Takui niisha wémiayi. Tura ni jeen Jeá, ni nawantrin íwianch Jíinkimtai pénker ajas peaknum tepan Wáinkiamiayi.

Jesus Tirunmaya jiinki Setún péprunam nankaamarkutak, Tekapuris nunkanmaani nankaamaki, Kariréa antumiannum ataksha jeamiayi.

Nui chichachu ámiayi, kuishin empeku. Nu Shuáran Jesusan itiariar, ni uwejejai antinkiat tusar seawarmiayi.

Shuar matsatmanumia Jesus niin akanki Jukí kuishin tsara uwejejai tsutsukruamiayi. Tura usukia, nu shuara iniain antintkiamiayi.

Tura nayaimpinmaani iimias Súkaska mayati "Epata" Tímiayi. Nuka, shuar chichamnumka "Chinkiatí" tawai.

Nu chichamaik ni kuishisha chinkiamiayi, iniaisha séermiayi. Tura paant chichasmiayi.

Tura Jesus chicharainiak "Penké etserkairap" Tímiayi. Jesuska Surí-suritiamaitiat, nu nankaamas etseriarmiayi.

Tura ti Enentáimprarmiayi. Enentáimprar, "Ju Jesus aya pénkeran Túrawai. Empekuncha ántumtikniaiti, tura chichachun chichamtikniaiti" tiarmiayi.

Nu Tsawantái shuar Timiá Untsurí iruntrarmiayi. Yurumkari atsakui Jesus ni unuiniamurin untsukar juna Tímiayi:

"Ju Shuáran waitnentajai. Menaintiú tsawant Wijiai pujuinia ásarmatai ni yurumkari amuukachaik.

Tura ni jeen ayurtsuk akupeamka, tsukariin Jintiá pimpikiartatui, yajaya Káunkaru ásar" Tímiayi.

Tutai ni unuiniamuri chichainiak "Túrasha jui atsamunam, ju aents ejemararat tusar ṡTuyá yurumkak Wáinkiattaj~i?" tiarmiayi.

Tutai Jesus niin aniasmiayi "ṡUrutmá tanta aa?" Tutai "siati awai" tiarmiayi.

Nuinkia Ashí aentsun "Nunká pujustarum" tiarmiayi. Tura tantan achik, Yúsan yuminsamiayi. Tura puuk, aentsun ajamsatarum tusa ni unuiniamurin susamiayi.

Tura uchich namaksha ishichik aan achik, Yúsan yuminkias, ni unuiniamurin chicharuk "Jusha shuar ajamsatarum" Tímiayi.

Turam Ashí Yurumáwar ejemararmiayi. Ampirma Púunaruncha siati chankinnium aimkiarmiayi.

Kuatru mir (4.000) shuar Yurumáwarmiayi. Yurumáwar amikiarmatai, Jesus niin áujas akupkarmiayi.

Tura ni unuiniamurijiai kanunam enkemprar Tarmanúta nunkanam wearmiayi.

Pariséu Jesusjai áujmatsatai tusar tariarmiayi. Nekapsatai tusar wakeruiniak Niin chicharuk "Nayaimpinmaya kakaram iniakmasta" tiarmiayi.

Tuíniakui Jesus Kúntuts Enentáimias, Súkaska mayati "ṡUrukamtai, yamaiya aentstiram, nayaimpinmaya kakarman iniakmasat tusarum wakerarum? Nuka penké sunaschattarme, paant Tájarme" Tímiayi.

Nuyá niin ikiukiar ataksha kanunam enkemar amain katinmiayi.

Tura ni unuiniamuri yurumak jukitiai Tukamá kajinmatkiarmiayi. Kanunmanka aya chikichik tantanak takaku ármiayi.

Jesussha ni unuiniamurin Enentáimtikiuk Tímiayi "Wáinkiatarum; Pariséusha Erutissha wakaprutain takakainia Nújaisha aneartarum" Tímiayi.

Tutai ni unuiniamurisha tunaiyarmiayi "Tanta kajinmatkin asakrin nuna Túramtsujiash" tiarmiayi.

Tura Jesus nuna Nekáa chichaak "ṡUrukamtai aya yurumkak Enentáimtarum? Tuke nékatsrumek. Penké Enentáimtsurmek. Atumí Enentái tuke kiritkiait? Tímiayi.

Jimi aisha itiura Wáintsurmea. Kuíshim aisha itiura ántatsrum. Ashí kajinmatkintrumek.

Nekaatarum, nuik, senku tantan Púuran senku mir aishmankan ayurachmakaj. ṡTura ampirma Urutmá chankinnium chumpiamarum?" Tímiayi. Niisha tiarmiayi "Tuse chankinnium chumpiamji."

Ataksha Jesus Tímiayi "Tura siati tantajai kuatru mir shuaran ayuramtai, ṡampirmasha Urutmá chankinnium chumpiamarum?" Niisha "siati" tiarmiayi.

Tuma asamtai Jesus Tímiayi "ṡItiura Imiá nékatsrum?"

Nuyá Petsaitia péprunam jeawarmiayi. Jeawarmatai, aishman jii kusurun Jesusan itiariarmiayi. Túrawar antinta tusar seawarmiayi.

Tuma asamtai Jesus uwejnum achik péprunam aani enkeki Jukí jiin usukijiai kuérmiayi. Tura uwejéjai antin "ṡíimmek?" Tímiayi.

Tutai kusuru iimi Tímiayi "Aentsun iiyajai, Túrasha paantcha. Numi wekainian aaniun iiyajai" Tímiayi.

Nuyá ataksha Jesus ni uwejéjai kusuru jiin antinmiayi. Tura kusurusha úmamkes iis, pénker ajas, Ashí paant iimpramiayi.

Jesus chichaak "Jeemiin weakum péprunam wayawaip tura shuar ujakaip" Tímiayi.

Jesus ni unuiniamurijiai uunt pepru Sesaria-jiripiunam jeatsuk, Tíjiuch uchich péprunam irasarmiayi. Jintiá wésar Jesus ni unuiniamurin chicharainiak, "ṡYaiti turutainiawa Winia?" Tímiayi.

Tutai niisha aimkiarmiayi "Chíkich chichainiak, imiakratin Juankaiti, turamainiawai. Chíkichcha, Eríasaiti, tura Chíkichkia, yaunchu Yúsnan etserin nantakniua Núiti, turamainiawai" tiarmiayi.

Tutai Jesus Tímiayi "Atumsha, ṡwaritrume. Yáitiaj?" Tímiayi. Tutai Pítiur Tímiayi "Ameka Krístuitme; Yúsaiya akupkamuitme."

Tutai Jesus chichaak "Penké etserkairap" Tímiayi.

Unuiniak: "Wi Aents Ajasuitjiana ju ti Wáitsatniuitjai. Israer-shuarti ii uuntrisha, Patri uuntrisha, ii jintinniurisha Winia nakitrurar mantuawartatui. Túrasha menaintiu tsawant nankaamasmatai nantaktiniaitjai" Tímiayi.

Nunasha paant ujakmiayi. Tura Pítrusha Jesusan arantach Jukí kakantramiayi. "Tu chichasaip" Tímiayi.

Tutai Jesus ayantmatar, ni Unuiniamurín iis, Pítrun kakantar chicharuk "Satanása, werumta. Ameka Yusna ana nu Enentáimtatsme, antsu aya aentsnak Enentáimtame" Tímiayi.

Nuna tuasua amik tura nui matsamarmia nunasha, ni unuiniamurincha untsuk Tímiayi, "Shuar Winia nekas nemartustasa wakerakka ni wakeramurinkia iniaisati; tura ni krusri yanaki Nemartustí.

Kame shuar ju nunkanam aya ninki anenmamkunka nu shuar ni iwiaakmarin emenkaktatui. Antsu Winia anentu asa tura winia chichamprun anea asa, shuar aya pénker pujustinniak Enentáimtsuna nu, nekas iwiaakman Wáinkiattawai.

Nekaata, shuar Ashí ju nunkanam írunna nuna sumaksha Túrasha ni wakani jinium wéakuisha, ṡitiurak pénker pujusaint?

Shuarka wakanin uwemtikrataj tusa wakerak ṡurutmak akikmakaint?

Antuktarum. Yamaiya aents Yúsan nakitiar ajapawaru yajauch ainia nu iimiainiamunam shuar Winia natsantrakuinkia tura winia chichampruncha natsantakuinkia, wi, Aents Ajasuitjiana ju, winia Aparu kakarmarijiai tura nayaimpinmaya pénker suntarjai atak taakun, Nú shuaran natsantrattajai Wisha.' Tu Tímiayi Jesus.

Ataksha Jesus niin chicharuk, `Nekas Tájarme, shuar Játsuk Yus ni kakarmarijiai aentsu Enentáin akupkattana Nú tsawantan Wáinkiartatna nu jui iijiai pujuiniawai" Tímiayi.

Nuyá sais tsawant nankaamasmatai, Jesus Pítruncha, Jakupuncha, Juánnasha uunt Náinnium Júkiarmiayi. Nuisha Jesus Nushá iira ajasmiayi.

Ni pushirisha ti puju Jíitsumir ajattsarmiayi. Nujai métek puju awajsatin ju nunkanam atsawai.

Túruna nui Erías, Muisaisjai wantinkiar Jesusjai chichainian Wáinkiarmiayi.

Nuyasha Pítiur Jesusan chicharuk "Uuntá, ii jui pujustin ti pénkeraiti. Menaintiú aakmaktai, Aminiu chikichik, Muisaisna chikichik, Eríasnasha chikichik" Tímiayi.

Jesusa unuiniamuri sapijmainiak, Pítiur wariniak titi nekaachmiayi. Nékachu asa nuna Tímiayi.

Tura yurankim tara mikintiu awajsamiayi. Yuranminmaya chichaak "Júiti winia aneamu Uchir. Nii anturkatarum" Tímiayi.

Nuyanka ni unuiniamuri ayantmar iiyaj tukamar aya Jesusnak Wáinkiarmiayi. Chíkichkia atsuarmiayi.

Nuyá Náinniumia akainiak Jesus niin chicharuk "Wáinkiarumna nu etserkairap. Wi, Aents Ajasuitjiana ju jakamunmaya nantaatsain nu etserkairap" Tímiayi.

Tutai ni Tímian ímiatrusan úukarmiayi. Tura "jakamunmaya nantaatsain tana nu, ṡwariniak ta?" nuamtak tunainiarmiayi.

Tura Jesusan aniasarmiayi "ṡUrukamtai Israerti ii jintinniurisha, Erías emka Tátiniaiti, tuinia?" tiarmiayi.

Tutai Jesus Tímiayi "Nekas Erías Ashí iwiarattsa emka Tátiniaiti. ṡTura Aents Ajasunun Yus-Papinium warintiua? "Ti Wáitsattawai; Niin nakitrartatui." Tu aarmaiti.

Wi Tájarme, Erías nekas Táwiti. Támatai, shuar Ashí ni wakeriarmia nuna niin Túrawarmiayi. Yusa Papiriin Eríasa Túrunatniuri aarma amia Tímiatrusan Túrawarmiayi" Tímiayi Jesus.

Tura ni unuiniamuri matsatmanum atak Wáketuk, ti Untsurí aents Káutkar Israer-shuara jintinniurisha niijiai tunai pujuinian Wáinkiamiayi.

Tura aencha, Jesusan Wáinkiar warainiak, tsékenki weriar, áujsarmiayi.

Túrunawarmatai, Jesus chicharainiak, "Warí tunaiyarum?" Tímiayi.

Tutai chikichik ayak "Uuntá, winia uchirun Amin itiarjame. Iwianchruku asa chichachuiti.

Túmakui íwianch enkemtakun paat ajiar aepeawai; Túram uchisha saun kaput apak nain Kátetete awajeawai. Túram kakaakcha ame unuiniamurmin seamjai, Jíirtukti tusan, Túrasha tujintrutkarai" Tímiayi.

Tutai Jesus Tímiayi "Yúsan Enentáimtichutirmea Urutmá tsawantak pujustaj atumjai. Urutmá katsuntrataj! Uchi itiatarum" Tímiayi.

Takui uchin Jesusan itiariarmiayi. Tura íwianch uchin enkemta Jesusan Wáiniak uchin ajakramiayi. Uchisha chichiptur Nunká iniaan péper-péper ajakin wenunam saun apakmiayi.

Túrunamtai Jesus ni Aparín aniasmiayi "ṡUrutá yaunchu ainkiait?" Tutai ni apari Tímiayi "úchichik ainkiaiti.

Tuma asa tuke Jutikiú pujurniuiti; jiniumsha apeawai, Entsá maataj tusa ajuaawai. Yaintrukminiaitkiumka waitneasam yaintrukta" Tímiayi.

Tutai Jesus chicharuk "ṡUrukamtai, yaintrukminiaitkiumka, tame? Nekaata, shuar Winia nekas Enentáimturna nu Ashí Túramniaiti" Tímiayi.

Tutai uchi apari kakantar chichaak, "Uuntá, nekas Enentáimtajme. Nekas Enentáimtustinian Táasjana nu Yáintkiata" Tímiayi.

Tura shuar Untsurí Káunainian Jesus Wáiniak kakantuk "Empeku chichachu awajin iwianchi Jíinkitia, Tájame. Jíinkim ataksha wayawaipia" Tímiayi.

Tura íwianch jiiniuk untsumak uchin we-werkasa ajakar chichichiptu aepkimiayi. Túram uchi jaka ímianis tepemiayi. Túrunamtai Untsurí shuar "jakayi" tiarmiayi.

Támanak Jesus uwejen achik awajkimiayi, tura uchi nantaki wajakmiayi.

Tura Jesus Jeá wayamtai, ninki pujusar, ni unuiniamuri aniasar "ṡUrukamtai iisha Jíiktin tujinkiamaj~i?" tiarmiayi.

Tutai Jesus Tímiayi "Ju iwianchkia ijiarmar Yus áujkur jiikminiaiti" Tímiayi.

Nuyá Jíinkiar Kariréa nunkanmaani nankaamakarmiayi. Ni unuiniamurin unuinia asa nu nankaamamun nekaawarain tusa Jesus nakitmiayi.

Unuiniak juna Tímiayi: "Wi Aents Ajasuitiaj juna mantamnati tusar achirkar surutkartatui. Tura Máamuitiatnak, iwiarsamunmayan Menaintiú tsawantai nantaktiatjai" Tímiayi.

Tura nu chichaman nekaacharmiayi. Nékainiachiat, anintrustinian arantukarmiayi.

Nuyá Kapernáum péprunam jeawarmiayi. Tura Jesus Jeá pujus ni unuiniamurin aniniak, "ṡAtumsha Jintiá winisrum Warí áujmatmiarum?" Tímiayi.

Tura natsarar pachischarmiayi. Kame Jintiá wésar "iijiai ṡyaki Imiá nankaamantu ajasat?" tunainiarmiayi.

Ni unuiniamuri pachischarmatai, Jesus pujus Ashí tuse unuiniamurin irur chichaak "Shuar nekas nankaamantu ajastajtsa wakerakka, peejchachia nuke Enentáimtumar shuara Yáintri Atí" Tímiayi.

Tura uchin Itiáa miniakas chichaak:

"Shuar uchin winia naarui shiir awajeakka Winia shiir awajtawai. Tura Winia akuptukua nunasha shiir awajeawai" Tímiayi.

Nuyá Juan Jesusan chicharuk "Uuntá, shuar ame Náarmin pachis iwianchin akupea wainkiamji. Tura iijiai írutkachu asamtai nu Túratin suritkiamji" Tímiayi.

Tutai Jesus Tímiayi "Antsu suritkiairap. Shuar winia Náarun pachis tujinkiamun Túrakka, nu shuar wari tsanumprutratniun tujinkiattawai.

Shuar iin nakitramachkunka, iin Páchitkiawai, Tímiayi.

Winia nemarka asakrumin shuar yumiichinkesha ajampramkuka ántar Túratsui; akikma átatui' Tímiayi.

`Tura shuar ju uchin Winia umirtuinia nuna yajauchin Túrumtikiamtainkia, ti asutniattawai. Tuma asamtai uchin yajauchin Túrumtiktsain kuntujen kayajai jinkiar nayaantsanam ajunmaka maak ainti.

Ame uwejmek yajauchin Túrumtikkramamniaitkuinkia tsupikta. Mai uwejtuk Wáitsatniunam jeatniujainkia Chikichík uwejjai ju nunkanam pujusar tuke iwiaaku pujustinnium jeatin ti shiiraiti. Warí, Wáitsatniunmanka ji kajinkiashtin awai,

Jákaru akarisha Jáiniatsui tura jisha tuke kapaawai.

Nawemsha yajauchin Túrumtikkramamniaitkuinkia nusha tsupikta. Mai nawentuk Wáitsatniunam jeatniujainkia Chikichík nawejai ju nunkanam pujusar tuke iwiaaku pujustinnium jeatin ti shiiraiti. Wáitsatniunmanka ji kajinkiashtin awai,

Jákaru akarisha Jáiniatsui tura jisha tuke kapaawai.

Jimisha yajauchin Túrumtikkramamniaitkuinkia ukuinkiata. Mai jiintiuk Wáitsatniunam jeatniujainkia Chikichík jiijiai ju nunkanam pujusar Yus akupeana nui jeatin ti shiiraiti;

Wáitsatniunmanka Jákaru akarisha Jáiniatsui tura jisha tuke kapaawai.

Naman Yus susamu weaktinia aintsan aentstirmesha jijiai nekapnastatrume.

Weesha ti penkeraitiat michumarka, ṡitiurak jea-jeat átin~ki? Wats, wee jeakua aintsarmek atumek shiir Enentáimtunaistarum" Tímiayi Jesus.

Jesus Kapernáumnumia jiinki, Jutía nunkanam nankaamaki, Jurtan entsa amain jeamiayi. Nui pujai, aents ataksha Niin irunturarmiayi. Iruntrarmatai tuke Túrin asa ataksha unuiniamiayi.

Tura Pariséu Jesusan nekapsatai tusar wakeruiniak, Niin chicharainiak "ṡAishman ni Nuarí ajapatin tsankamkamukait?" tiarmiayi.

Tutai Jesus Tímiayi "ṡMuisais wariniak timia?"

Tutai "Papíjiai iin ajapatniun tsankatramkamiaji" tiarmiayi.

Tutai Jesus Tímiayi "Atumí enentai Kátsuram asamtai nu chichaman atumin tsankatramkamiarme.

Tura Yus Yámankamtaik Ashí najanamia nui, aishmannasha nuwancha najanamiayi.

Tuma asamtai aishman ni Aparíncha Nukuríncha kanaki ikiuki, ni nuarijiain~ki tsanintiniaiti.

Warí, aishman nuarijiai Jímiaraitiat chikichik ajasartatui. Tuma asamtai Yamái Jímiarchaiti, antsu chikichik ajasuiti.

Tuma asa, Yus atsankiania nuna, aents akankashtiniaiti" Tímiayi.

Tura urum Jeá wayawar, Jesusa unuiniamuri nu chichaman ataksha aniasarmiayi.

Tuiniakui Jesus Tímiayi "Shuar ni nuarin ajapa ikiuak chikichan Nuátkanka, emka nuarin yajauch awajas, ikiuak, tsanirmayi.

Nuwasha ni aishri ajapa ikiuak, chikichjai niiniurtukka, niisha tsanirmayi" Tímiayi.

Antinkiarat tusar uchin Jesusan itiariarmiayi. Túruiniakui Jesusa unuiniamuri "itiairap" tiarmiayi.

Tura Jesus nuna Wáiniak, kajek juna Tímiayi "Uchi Winí winitin tsankatruktarum. Suritkiairap. Iis, shuar ju uchia Núnisan peejchach Enentáimtumainia nu Yusa akupeamurin pachiinkiamniaiti.

Nuní asamtai Tájarme, uchi umiana Núnisan Yusa akupkamurin shuar Umíachkunka nuna pachiinkiachminiaiti.

Nuyá uchin miniakas, "Yus Yáinmakarti" Tímiayi.

Ukunam, Jesus Nuyá weai, shuar tseke Niin tarimiayi. Tarí tikishmatar chicharuk "ṡUuntá, Amesha ti pénkeraitme. Tuma asam, turuttia, ṡwarinia Túrakna tuke iwiaaku átataj?" Tímiayi.

Tutai Jesus Tímiayi, "ṡUrukamtai Winia, pénkeraitme, Túrutam? Shuarka chikichkisha pénkerka atsawai. Aya Yúsak pénkeraiti.

Yus akupkamu nékatsmek. Ju ainiawai: tsanirmawairap, mankartuawairap, kasamkairap, Chíkich shuar tsanumprurairap, anankartuawairap, apasha nukusha umirkatarum. Nu ainiawai" Tímiayi.

Tutai Kuítrintin chichaak "Uunta, Núnaka úchichik mash umiki tsakaruitjai" Tímiayi.

Tutai Jesus iis waitnenmai Tímiayi "Chikichik Táasume. Weme Ashí áminiu ana nu surukta. Túram nu kuit Kuítrincha susarta. Túrakum nayaimpiniam Kuítrum ikiaunkattme. Túram winitia, krus yanaktinia aintsamek itiurchatrum ain nemartusta" Tímiayi.

Tura Kuítrintin nu chichaman antuk, wake mesek, Kúntuts Enentáimiar wémiayi, ti kuitrintin asa.

Nii wématai, Jesus Ashí ni téntakmarin iis, ni unuiniamurin chicharuk, "Kuítrintin ainia nu Yusa akupeamurin pachiinkiatin ti itiurchataiti" Tímiayi.

Takui ni unuiniamuri nuna antukar Niisháa Enentáimprarmiayi. Túramtai Jesus Tímiayi "Uchiru antuktarum. Shuar Kuítriniak Enentáimtuinia nuka, Yusa akupeamurin pachiinkiatin penké itiurchataiti.

Uunt kamiriu auja jiin wayatin ana Nú nankaamas, Kuítrintin Yusa akupeamurin pachiinkiatin itiurchataiti" Tímiayi.

Nuna antukar Nú arant Niisháa Enentáimprarmiayi. "ṡNuinkia yaki uwempramniait?" tunaiyarmiayi.

Tura Jesus niin iisar chichainiak "Aents ninki Túrachminiaiti, antsu Yus Túramniaiti. Yuska Ashí Túramniaiti" Tímiayi.

Nuyá Pítiur Niin chicharuk "Iis, iikia Ashí ikiukir némartsujik" Tímiayi.

Tutai Jesussha Tímiayi, "Nekas Tájarme, shuar Winia nemartak Yus-Chichamnasha ipiampartasa wakerak ni jeencha, yachincha, umaincha, Aparíncha, Nukuríncha, nuarincha, Uchiríncha, nunkencha uyumatsuk ikiuakka,

nu shuar ju nunkanam sian patatnas jeencha, yachincha, umaincha, Nukuríncha, Uchiríncha, nunkencha, ju nunkanam Wáitiayat sunastatui. Tura ukunam, nunka amuukamtai, nu shuarsha Jáchatainium tuke pénker pujustatui.

Tura Untsurí shuar Yamái penkeri ainia nu, ukunam ukunmaani pujusartatui, tura iiksan Untsurí shuar Yamái ukunmaya ainia nu, ukunam eem pujusartatui" Tímiayi Jesus.

Nuyá arak Jerusarénnum wéenak, jintiak wearmiayi. Jesuska émak wémiayi. Ni unuiniamurisha Niisháa Enentáimprarmiayi. Ashamainiayatan Jesusan nemarsarmiayi. Túmainiai atak ni nekas unuiniamurin akankiar, ni Túrunatniurin ujakmiayi.

Ujaak Tímiayi "Antuktarum, arak Jerusarénnum wéaji. Nui Winia, Aents Ajasuitjiana juna, Patri uuntriincha, jintinniunmasha surutkartatui. Niisha apachnium mantamnati tusar surutkartatui.

Nusha Winia wishikrurar, katsumprukar, usukruawar mantuawartatui. Túramaitiatnak Menaintiú tsawantai nantaktiatjai" Tímiayi.

Sepetéu Uchirí Jakupusha Juansha Jesusan taruntarmiayi. Taruntar "Uuntá, ii seattajnia nu Túrak tusar wakeraji" tiarmiayi.

Tutai Jesus Tímiayi "ṡWarí itiurtukat tusam wakerutam?"

Tutai "Ame nupetmaktin tsawantrum jeamtai, iisha Amijiai pujustaitsar wakeraji, wi untsuurumini, winia yatsursha menaarmini. Nu tsankatrukta" Tíarmiayi.

Tura Jesus Tímiayi "Atum seatrumna nu nékatsrume. Wi umartatjana nu umarminkaitrum. Tura Wi imiantiatjana Núnisrum imianminkaitrum" Tímiayi.

Niisha tiarmiayi, "Túramniaitji, Páchitskea." Tuíniakui Jesus Tímiayi "Wats, Wi umartatjana nu umartatrume, tura Wi imiantiatjana Núnisrumek imiantiatrume.

Túrasha winia untsuuruini, menaruinisha átum pujustinian Wikia Súsashtiniaitjarme, antsu Yus wakerana nu nuin apujsattawai" Tímiayi.

Tura Chíkich tias unuiniamuri nuna anturkar Jakupuncha, Juánnasha ti kajerkarmiayi.

Tura Jesus ni unuiniamurin irur Tímiayi "Ju nékarme; Yus-shuarchanum akupniuitjai tuinia nu, waantu Enentáimtumas, ni Shuárin ti akupeawai; tura uunt ainia nusha Ashí shuar ti takamtikiainiawai.

Antsu atumjai Núnisan atsutniuiti. Atumka, wi unuiniamutiram, uunt ajastaj tusarum wakerakrumka, Ashí Yáimin ajastiniaitrume.

Shuar Atumí penkeri ajastajtsa wakerakka, takarniua nuke ajas, Umirtamkatí.

Wisha, Aents Ajasuitjiana ju, shuar takartusarat tusan Táchamjai, antsu Ashí Shuáran Yáintaj tusan Táwitjai. Wisha jarukan Shuáran uwemtikratajtsan Táwitjai" Tímiayi.

Jesus ni unuiniamurijiai, tura Chíkich Untsurí aentsjai Jirikiú péprunam jeawarmiayi. Nuyá Jirikiúnmayasha Jíinkiar weenai, Timiasa Uchirí Partimiás, kusuru amia nu, Jintiá yantam Kuítian seamu pujumiayi.

Niisha, Nasarétnumia Jesusaiti Táman antuk, untsumuk "Uunt Jesusa, amesha Uunt Akupin Tawit weeachukaitiam, Yus anaikiachmakaitiam. Winiaja waitnentrurta" Tímiayi.

Tura Untsurí nui matsamarmia nu niin chicharainiak "Takamatsata" tiarmiayi. Niisha Nú nankaamas untsummiayi "Tawit Weeá Jesusá, winia waitnentrurta."

Nuna antuk Jesus wajatas, chichaak "Untsuktarum" Tímiayi. Takui shuar kusurun untsuiniak "Kakaram ajasta. Wajaktia; untsurmawai" tiarmiayi.

Tuiniakui niisha esekmatairin ajapa ikiuak wajaki Jesusan tseke tarimiayi.

Tura Jesus niin chicharuk "ṡWinia itiurtukat tusamea wakerutam?" Tímiayi. Tutai kusuru chicharuk "Uunta, iimtiasan wakerajai" Tímiayi.

Tutai Jesus chichaak "Shiir Wetá. Winia nekas Enentáimtursa asam pénker ajasume" Tímiayi. Tura nu chichamaik iimpramiayi. Tura Jesusan nemarki wémiayi.

Wésar Jerusarénnum tura Petpajái péprusha Petania péprusha Uriwiu naint ínkiuasmak ámanum jeawar, Jesus Jimiará unuiniamurin ujuikimiayi.

Ujuiak Tímiayi "Aatunini pépruchiniam werum nuin umpuuru uchich jinkiamu Wáinkiattarme. Nu umpuuruka tuke entsamprukchamuiti. Nu atiarum utitiarum.

Tura "ṡUrukamtia aitkiarum?" turamainiakuisha, "ii Uuntri wakerawai" titiarum" Tímiayi.

Tutai wearmiayi. Tura umpuurun Wáitiniam aani jinkiamun, Jintiá yantamnum wajan Wáinkiar atiawarmiayi.

Nui pujuarmia nu "ṡWarí aitkiarum. Urukamtai umpuuru Atíarum?" tiarmiayi.

Takui, niisha Jesus timia nu ujakam suritkiacharmiayi.

Tura umpuurun Jesusan itiariar pushirin umpuurunam awantkarmiayi. Túram Jesus entsamkamiayi.

Tura Untsurí shuarsha pushirin jintianam ayapar ainkiarmiayi. Chíkichcha Jintiá yantamnumian nukan juuk jintianam aintrarmiayi.

Eem wearmia nusha, uku winiarmia nusha warainiak "Jusanna" untsumkarmiayi. "Yusa Náaríin winiana nu Imiá pénkeraiti.

Ii uuntri Tawitia akupeamuri Tátatna nu Imiá penker Atí. Ii Yusri naari shiir ati." Tu untsumki wearmiayi.

Tura Jesus Jerusarénnum jeamiayi. Jeá, Yusa Uunt Jeen wayamiayi. Tura Ashí iiyasua amik, kintiampraij tusa ni tuse unuiniamurijiai Tíjiuch Petania péprunam wearmiayi.

Kashin tsawar, Petanianmaya jintia wesa, Jesus tsukammiayi.

Tura arant wajan iikiu numirin Núkenniun Wáiniak, nereatsuash tusa iyumiayi. Tura nereshtairin asamtai neren penké Wáinkiachmiayi.

Nuyá iikiu numin yuminkeak: "Ame nerem penké yunaashti" Tímiayi. Ni unuiniamurisha nuna Táman antukarmiayi.

Nuyá atak Jerusarénnum jeawarmiayi. Nui Jesus Yusa Uunt Jeen Wayá suruktai tusar pujuarmia nuna jiiki akupkatasa nankammiayi. Kuítian yapajin armia nuna misarin tura yampitsan Súrin armia nuna kutankrincha ayanturmiayi.

Tura Káarak entsaki Yusa Uunt Jeen nankaamaktinian suritkiarmiayi.

Nuyá "Yus áujsatai tusar Ashí shuar Yusa jeen wayamnia átatui" Tú aarchamukait Yusa Papiriin. Antsu átumka Yusa jee kasa matsamtaiya Nútikiarme" Tímiayi.

Aents nui matsamarmia nu Jesusa chichamen antukar ti Enentáimprarmiayi. Tuma asamtai Israer-patri uuntrisha, Israer-shuara jintinniurisha, nuna nekaawar, Jesusan ashamainiak mantamnati tusar chichaman jurusarmiayi.

Nuyá kiakui Jesus Jerusarénnumia jiinkimiayi.

Kashin Káshik nankaamainiak iikiu numin kankaptuk jaka wajan Wáinkiarmiayi.

Tura Pítiur Enentáimias Jesusan Tímiayi "Uunta, iista, iikiu Ame yuminkramam nu kankaptuk Káarchaik."

Tutai Jesus Tímiayi "Yus nekas Enentáimtustarum.

Iis, nekas Tátsujrumek, shuar "Yus nekas Túratpiash" Tútsuk, tura "wi Tájana nuna Yus nekas Túrattawai" tu Enentáimsar, ju Náintian "jiinki nayaantsanam Iniántí" Tákuinkia, Páchitsuk iniantatui, Tímiayi.

Tuma asamtai Tájarme, Ashí Yus áujkuram searmena nuna suramsattarme. "Wi seajna nuna Yamái takakjai" tu Enentáimkiurmeka, Wáinkiáttarme.

Tura Yus áujkuram pujarmena nu, kajernaiyamuram ákuinkia Tsankurnáiratarum. Atumí Aparí nayaimpiniam pujana nu Atumí tunaarin tsankurturti tusarum Túratarum.

Atumsha Tsankurnáiyachkurminkia, Núnisan Atumí Aparí nayaimpiniam pujana nu Atumí tunaarin Tsankurtámprashtatrume" Tímiayi Jesus.

Ataksha Jerusarénnum waketkiarmiayi. Jesus Yusa Uunt Jeen wekai, Israer-patri uuntrisha, Israer-shuara jintinniurisha, Israer-shuara iruntai-jee uuntrisha Niin Káutkarmiayi.

Káutkar Jesusan tiarmiayi "ṡYana kakarmarijiai ju Túram. Ame Túramna nuna ya tsankatrama?" tiarmiayi.

Tuiniakui Jesus Tímiayi, "Chikichkiniak aniastatjarme. Airkatarum. Túrakrumninkia Wisha winia takastinian tsankatrukmia nuna ujaktatjarme.

Wats, turutiarum, ṡya Juan imiaitniun tsankatkama? ṡShuar tsankatkamka? ṡYus tsankatkamka? Airkatarum" Tímiayi.

Tura niisha Enentáimprar "Yus akupkaiti" Tákurninkia, "ṡurukamtia umirkachuram?" turamchattajik.

Antsu "shuar tsankatkaiti" Tákurkia, Ashí shuar ashamaji" tunainiarmiayi. Ashí aents Juan nekas Yúsnan etserniuiti, tu Enentáimainiakui ashammiarmiayi.

Nuyá Jesusan tiarmiayi "Iikia nékatsji." Tutai Jesus Tímiayi "Wisha Núnisnak yana kakarmarijiai takaaj nuna ujakchattajrume."

Jesus ju métek-taku chichaman unuiniamiayi: "Shuar uwa ajan ajam wenuimiai. Nuyá uwa nekeetain najanamai. Tura kumpin jean najanamai. Najana takartusti tusa Shuáran ikiuak ninkia jeachat wémai.

Neretai tsawant jeamtai, ni takarniurin Júukman akankat tusa akupkamai.

Tura ajanam takau arma nu, nu takarniun achik, katsumkar, áyatik awainkiarmai.

Ataksha Chíkich takarniun akupkamai, tura nunasha kayajai tukurar, Múuknum katsumkar, katsekar awainkiarmai.

Tuma ain ataksha Chíkichan akupkamai, tura nunasha Máawarmai. Ti Untsurín akupramai. Chikichnasha katsumkarmai, chikichan Máawarmai.

Tura niijiai chikichik tuke ámiayi, nuka ni aneamu uchiri. Nu uchincha ukunam akupkamai. Akupeak "Winia uchirnaka shiir awajsartatui" Tímiai.

Tura ni uchiri winian Wáinkiar, takau shuar Nuámtak chichainiak "Juka Ajá nérenniu Uchirínti. Wátsek, maatai; Túramka ájaka iiniu átatui" tiarmai.

Túsar achikiar Máawarmai. Ayashincha ajanmaya ajapawarmai" Tímiayi.

Tura Nuyá aniasmiayi, "ṡWats, Warí Enentáimsarum; Ajá nérenniuri itiurkattawa? Jeashtanmayá taa, Ajá takainia Nú shuaran amuktatui. Ni Ajaríncha chikichan ikiastatui.

Ju, Yus-Papinium aarma ana nu áujsachukaitrum: Kaya pénkernak, jeammin "yajauchiiti" tusar ajapawarmia nu Ashí kayajai nankaamas pénker apujsamuiti.

Nusha Yus Túramuiti. Iisha iisar ti Enentáimtaji. Nuke aarmaiti" Tímiayi.

Tura Nú metek-taku chichamjai niin áujmatma asa achiktai tusar chichaman jurusarmiayi. Túmainiayat Shuáran ashamainiak Jesusan ikiuiniak wearmiayi.

Tura wear, imiaamtikiar Yajá chichakmatai Nújai yajauch Títiai tusar Pariséu shuarnasha, Erutisa nemarin shuarnasha akatar Jesusan akuptukarmiayi.

Túram Niin jeariar chicharainiak: "Uuntá, aents nakitiainiain tuke nekas chicham Páchitsuk chichaame, nu nékaji. Aents Pátatek iiyatsme, antsu nekas Yusa jinti unuiniame. ṡWaritia Enentáimiam, ii kuitri uunt Sesar Súsatin pénkerkait. Susattajik. Suritkiattajik? Nu nekaatai tusar wakeraji" tiarmiayi.

Tura Jesus ni yajauch Enentáimmiarin nekara "ṡUrukamtai Winia yajauch titi tusarum wakerutarum? Kuit itiatarum, Wi iistaj" Tímiayi.

Tutai Kuítian itiariarmiayi. Jesus nuna iis Tímiayi, "ṡJuisha yana yapi tura yana naari aarmait?" Tímiayi. Tutai "Uunt Sésarna" tiarmiayi.

Nuyá Jesus Tímiayi "Uunt Sésarna ana nu susatarum; Túrarum Yúsnaka Yus susatarum" Tímiayi. Tura ni aimkiamurin antukar ti Enentáimprarmiayi.

Nuisha Satuséu aents, jakamunmaya nantaktin penké atsawai tiniu armia nu, Jesusan tariarmiayi. Taar Jesusan chicharainiak:

"Uuntá, Muisais juna aatrampramiaji: "Aishman ni nuari Júreatsain jakamtainkia, yachin yajutmatrattsa, ni yachi nu wajen Nuátkatniuiti."

Wats, siati yachi ármiayi. Iwiairi nuwan nuatak yajutmatsuk jakamiayi.

Ni yachi wajen akinkiamiayi. Nusha Núnisan yajutmatsuk jakamiayi. Nuna yachisha Núnisan tura nuna yachisha Núnisan Túramiayi.

Tura Ashí siati patainman, patainman nu nuwan Nuátkarmiayi. Yajutmatsuk, yajutmatsuk Jíiniawarmiayi. Tura ukunam nuwasha jakamiayi.

Nuinkia nantaktin tsawantai, nantakiarmatai, ṡyana nuarin ati? Ashí siati Nuátkacharmaka" tiarmiayi.

Tutai Jesus Tímiayi ""Jakamunmaya nantaktin atsawai" Tátsurmek. Yusa chichame tura Yusa kakarmari nékachu asarum awajiarme, Tímiayi.

Iimiatarum, aents jakamunmaya nantakiarmatai, nuatnaikiatin atsuttawai, antsu nayaimpinmaya suntara Núnisaran pujusartatui.

Tura jakamunmaya nantaktiniapitia tusarum nu nekaatin nekas wakerakrumka Muisais aarmia nu Enentáimtustarum. Yuska numichinmaya Muisaisan chicharuk "Wikia Apraáma Isaaka tura Jakupu Yúsrintjai" Yus Tímiayi.

Yaunchu Jákaru ain, Yus nuna taku, ayashnium jakayat iwiaaku pujuinia nuna Yusrintjai, tawai. Nekas jaka ainia nuna Yusrinchuiti. Nantaktin atsawai tau asarum awajirurme" Tímiayi Jesus.

Jesussha Satuséusha áujmatnainian Israer-shuara jintinniuri taa anturkamiayi. Anturak, Jesus ti penker aimkiui, niisha Jesusan juna aniasmiayi: "ṡYus akupkamu Tuá Imiá pénkerait?" Tímiayi.

Tutai Jesus Tímiayi "Júiti Yus akupkamu Imiá pénker: Antukta Israer Shuará. Ii Yusri uuntaiti, tura Ninki nekas Yúsaiti.

Tuma asamtai, tuke Enentáimjai ti Enentáimsam Uunt Yus aneeta. Túram ame iwiaakmarmesha, kakarmarmesha Yus iiktusta. Núiti nekas pénker akupkamu" Tímiayi.

Nuyasha chikichcha awai, "ame ayashim aneamna Tímiatrusmek ame írutramurmesha aneeta." Chíkich nu nankaamas pénker akupkamu atsawai' Tímiayi.

Tutai jintintin Tímiayi "Ee, pénkeraiti, Uunta. Nékasmek tame. Chikichík Yus awai, Chíkichkia atsawai.

Tura tuke Enentáijiai ti Enentáimsar, ii kakarmarisha Yus iiktusar Niin aneakrikia, ii ayashi aneajnia Núnik ii írutramurisha aneatniuitji. Nusha Ashí Yus sutai ana nujai nankaamas pénkeraiti' Tímiayi.

Nuna tiniu asamtai Jesus ni pénker aimkian Nekáa "Ameja Yus akupeamunam pachiinkiatin ishichik Táasume" Tímiayi. Tura Nuyá Chíkich shuar Jesusan aniastinian arantukarmiayi.

Jesus Yusa Uunt Jeen unuiniak pujumiayi. Tura chichaak "ṡUrukamtai ii jintinniuri "Yus anaikiamu Krístun Tawitia shuari" tuinia?"

Tawit, antsu, Yusa Wakaní aarta tutai, Yus-Papinium juna aarmiayi: Uunt winia uuntrun Tímiayi "Ame nemasrumin nupetkatin amuatsain winia untsuuruinini pujusta".

Kame Tawitkia, Krístun áujmatuk, "winia Uuntru" taisha, ṡitiura Ní shuarisha átin~ki?" Tímiayi Jesus. Tuma asamtai Untsurí shuar nui matsamarmia nu ti shiir antukarmiayi.

Jesus unuiniak Tímiayi, "Israer-shuara jintinniuri ainia nujai aneartarum. Niisha waantu Enentáimtumasar, esaram pushin entsarar wekasatajtsar wakeruiniawai. Péprunmasha shuar shiir áujtusarat tusa wakeruiniawai.

Israer-shuar iruntainiam penkeri pujutainium pujustinian wakeruiniawai. Nampernumsha penkeri pujutainium pujustinniasha wakeruiniawai.

Tura wajé jeencha atantainiawai. Túrawar aents nekaracharat tusar ti esaram chichamjai Yúsan áujainiawai. Nincha chikichjai nankaamas Yus asutiawartatui" Tímiayi.

Jesus Yusa Uunt Jeen kuit enketainiam naka pujus aents Kuítrin chumpian Wáinkiamiayi. Untsurí Kúitrintin Núkap enkeawarmiayi.

Nuyá waje Kuítrincha taa Jimiará uchich Kuítian, reara aantsan, enkeamiayi.

Jesuska unuiniamurin untsuk "Nekas Tájarme, ju waje Kuítrinchaitiat, Ashí enkeena Nú nankaamas Núkap enkeayi.

Iis, Kuítrinniusha nii ampirma nuna enkeenawai, tura antsu ju nuwa Kuítrinchaitiat, ampirmatsuk ni yurumatniurin takurmakman Ashí enkeayi" Tímiayi.

Yusa Uunt Jeenia Jesus jiinkimtai, unuiniamuri Niin Tímiayi "Iisia, Uunta, kayasha ti shiir ainiawai. Jeasha Imiá uuntchakait."

Tutai Jesus Tímiayi "Ju Imiá uunt jea Wáinmek. Kaya ekentramu au Ashí mash yumpuntrartatui" Tímiayi.

Nuyá Uriwiu Náinnium wakar, Yusa Uunt Jee naka pujusar, Pítrusha, Jakupusha, Juansha, Antressha, Nínkimias Jesusan aniiniak

"Uuntá, Tímiam nu, ṡUrutiá Túrunatta. Nu Túrunatin jeakuisha itiura nekaattajia? Paant ujatmakta" tiarmiayi.

Tutai Jesus Tímiayi "Aneartarum, anankramawairap.

Nekaatarum, Untsurí winia naarun pachisar winiartatui. Chíkich Chíkich "Wiitjai Kristu" taku, Untsurín anankawartatui.

Tura meset chicham ántakrumka, yajaya meset chicham ántakrumsha sapijmiakairap. Nekas Túrunashtinkiait. Nujaisha amuukatin tsawantka tuke jeatsui, Tímiayi.

Shuar Chíkich shuarjai mesetan najanawartatui; apachcha Chíkich apachjai Núnisaran mesetan najanawartatui. Untsurí nunkanam úurkattawai. Tsukasha ártatui, charaatum ajamusha Núnisan átatui. Tura nujai itiurchatka aya yama nankamui.'

`Túmaitkui atumsha aneartarum. Akupin iruntainiumsha surutmakartatrume, tura ii shuar iruntainmasha katsumpramkartatrume. Wíi shuar asakrumin, Kapitiánnium, akupniunmasha juramkittiarme. Nui jearum, Winia chichastatrume.

Nu Túruntsain Ashí aentsnum Yus-Chicham etsernaktiniaiti.

Atumin surutmaktasar juramainiakuisha, warintiajak tusarum ti Enentáimsairap. Chichastin jeamtai, Yusa Wakaní jintintramattarmena nu titiarum. Iis, Atumí Enentáijiai Tíchattarme, antsu Yusa Wakaní jintintiam Títiatrume.

Nu tsawantin shuarsha ni yachin mantamnati tusa suruktatui. Apasha ni Uchirín suruktatui. Uchisha Aparíncha Nukuríncha kajerak, jakati tusa suruktatui. Núnisan Untsurí shuar Túrawartatui.

Nuinkia Wíi shuar asakrumin Ashí nakitramprartatui. Tura shuar yawetsuk katsuntranka uwemprattawai" Tímiayi.

Nuyá Jesus Tímiayi "Shuar juna áujeana nu nekaati. Yúsnan etserin, ni naari Taniar, ti yajauch tuke emesin ana nuna yaunchu aar etserkamiayi. Nuka pujushtainiam pujan Wáinkiurmesha, Ashí Jutía nunkanam pujarmena nu, Náinnium pisartarum.

Jea yakiini pujana nu akaiki wariri achiktajtsa, jeen wayashti.

Ajanam pujana nusha ni pushirin jukitiajtsa waketkishti.

Tura ajamtin ainiana nusha, Kuírchin umuntsainia nusha, nu tsawantin Timiá itiurchatan Wáinkiartatui.

Tuma asamtai átum pisaarmena nui yumitin achati tusarum Yus seatarum.

Nu tsawantinkia ti Wáitsatin átatui. Yama nankamtaik Yus nunkan najanama nuisha, yamaisha ukunmasha timiu Wáitsatin penké atsuttawai.

Tura Uunt Yus Wáitsatin tsawantan ishichik awajsattajai Tíchaitkuinkia, uwempratin penké atsuinti. Tura ni shuarin anaikiamia nuna Yáintajtsa wakerak, nu tsawantan ishichik awajsattawai.

Nu tsawantai "Júiti Kristu" Túramkuinkia anturkairap.

Kame "Krístuitjai" ántar tuinia nu, tura "Yúsnan etserniuitjai" ántar tuinia nusha wantinkiartatui. Wantinkiar Yus anaikiamu Shuárnasha anankatai tusar wakeruiniak, ni kakarmarin iniakmainiak aentsti tujintiamun Túrartatui.

Tura átum aneartarum. Aetak, Túruntsain ujakchajrumek' Tímiayi Jesus.

Jesus tuke unuiniak juna Tímiayi: `Tura nu Wáitsatin nankaamasmatai, etsaasha nantusha etsantrashtatui.

Yaasha nayaimpinmaya kakekartatui, tura nayaimpiniam kakaram ainia nu muchitrartatui.

Nuyasha Ashí aents Winia Wáitkiartatui. Wi, Aents Ajasuitjiana ju, ti kakaran, ti wincha ajasan, yuranminiam Winiái Wáitkiartatui.

Nui nayaimpinmaya suntarun akupkattajai, Wíi shuaran Ashí nunkanmayan irurarat tusan. Arakaaniya, nunkaaniya, Ashí nunka Nánkatkamunmayan Wíi shuaran irurartatui.'

`Iikiu numi nakumea nu nekaatarum. Ni chinkimpri punkak nuke jeakui, "ju nunkanam esat jeatemai" Tátsurmek.

Núnisrumek Wi Tájarmena nu Wáinkiurmeka, ni tatintri jeatemai tu nekaattarme.

Nekas Tájarme, Yamaí aents pujuinia nu kajin amuiniatsain, Ashí Wi Tájana nu Túrunatniuiti.

Nayaimpisha nunkasha amuukatniuiti. Tura winia chichampruka amuukashtiniaiti.

Tura tsawantcha nekanachminiaiti. Nayaimpinmaya suntarsha nékainiatsui; Wisha Yusa Uchiríntiatan nékatsjai. Aya winia Aparuk nékawai.

Atumsha anearum Enentáimprarum Yus aujsa pujustarum, tsawant nékachu asarum.'

`Tura Wikia ju shuarjai méteketjai. Ju shuarsha jeachat weak, ni jeen ikiuawai. Ikiuak ni shuarin Wáitrukartí tusa apujas ikiuak Ashí shuaran takatrin Súawai. Tura Wáitin Wáinniun, "ameja pénker Wáinkiata" Tímiai.

Wikia nu jea nérenniua Núnisnak, urutai Tátataj nékachu asarum anearum pujustarum. Kíaraimpiash, tura ajapkeash, atash shiniukaimpiash, Káshikiash Tátatjai.

Nérentin aya aneachmak taa, Kanúu tepai Wáitkiai tusarum aneartarum.

Wi atumin Tájana nu, Ashí Shuáran tajai, anearum pujustarum" Tímiayi Jesus.

Jímiarchikí tsawant ajasmiayi paskua tutai Námper jeatin. Paskua Námpertincha wakapruachu tantan yuatin Námpernasha métek najanin ármiayi. Israer-patri uuntrisha, Israer-shuara jintinniurisha Jesusan anankar achikiar maatai tusar wakeriarmiayi.

Túrasha "Jista tsawantin Túrachmi, aents charaatum ajarain tusar" tiarmiayi.

Jesussha Petania péprunam tunamaru Semunka jeen misanam pujan, nuwa tarimiayi. Nartu kunkuinian Arapástru tutai kaya najanamunam piakun itiamiayi. Nu kunkuin ti kuitiaiti. Mutí chuchuke kupik Jesusa muuken kunkuinian ukatramiayi.

Tura nui pujuarmia nu, kajerar tunaiyarmiayi "ṡUrukamtai ju kunkuinian ántar wasurea?

Junasha Súrakka, Menaintiú sian Kuítnium surukminiuyi. Nu kuitcha Kuítrinchan Súsanka maak" tiarmiayi. Tusa nuwan kajerkarmiayi.

Antsu Jesus chicharainiak "Iniaisatarum. ṡUrukamtai au kajerarum? Winia shiir Túrutayi, Tímiayi.

Kuítrincha atumjai tuke íruntsuk. Wakerakrumka tuke pénker awajsatniuitrume. Antsu Wikia atumjai tuke pujushtatjai.

Ju nuwa Ashí nii Túramnia Núnaka umikiai. Wi Jákatin jeatsain, iwiarsatin kunkuinian shiir ukatrurai.

Nekas Tájarme, Ashí nunkanam Yus-Chicham etsernaktatna nui, ju nuwa Túramurisha etsernaktatui, niin kajinmatkiarain tusa" Tímiayi.

Nuyá Jútas Iskariúti, Jesusa unuiniamurintiat, Israer-patri uuntrin werimiayi, Jesusan suruktaj tusa.

Niisha nuna antukar, warasar "Kuit amastatji" tiarmiayi. Jútassha Jesusan itiurak Yúpichuch tsankamkattaj tusa Enentáimias wekaimiayi.

Wakapruachu tantan yuatin Jísat nankama tsawant tsawarmatai, paskua Námpertin Yúatin murik Máatin jeamtai, Jesusa unuiniamuri iniasarmiayi "Paskuatin murikiu Yúatin iwiaratai tusar ṡtui wétataj~i. Tui yurumattam?" tiarmiayi.

Tutai Niisha Jimiará unuiniamurin akatar akupeak "Péprunam wetarum. Nui aishman yumin Jukí wéa Wáinkiattarme. Nu aishman nemarsatarum.

Wayana nui Jeá nérenniuri Títiarum "Uunt Túramui, ṡwisha, unuiniamurjai tui Yurumáttaj?"

Nu nérentin, Yakí Písunam uunt tesamunam Ashí iwiaramun iniakturmastatrume. Nui Jísat ii najanatin iwiaratarum" Tímiayi.

Ni unuiniamuri wear, péprunam jeawar, Jesus timia Núnisan Wáinkiarmiayi. Tuma ásar paskua Námperan iwiararmiayi.

Nuyá Kíakui Jesus ni tuse unuiniamurijiai wayawarmiayi.

Niisha misanam pekaamak, Yurumáiniak pujusar, Jesus Tímiayi. "Nekas Tájarme, Chikichík shuar Wijiai yurumna nu, surutkattawai."

Nujai Kúntuts Enentáimprarmiayi. Chíkich Chíkich Jesusan aniasar "Wíashitiaj" tiarmiayi.

Jesus Tímiayi "Ju misanam tuse irunar yurumprum nu, chikichik surutkattawai. Wijiai pininnum yurumkan ayak yuana Núiti.

Nekas Wi, Aents Ajasuitjiana ju, Jákatniunam wéajai, aarturma aintsanak. Tura aishman Súrutna nu ti Wáitsattawai. Niisha akiinmainchu ajakuiti" Tímiayi.

Yurumainiak Jesus Yúsan yuminkias, yurumkan achik, puuk, chicharainiak "Achiktarum, jusha winia ayashruiti" Tímiayi.

Pininnasha achik, Yúsan yuminkias, ni unuiniamurin Súsarmiayi. Ashí umararmiayi.

Umararmatai Jesus Tímiayi "Júiti winia numpar, Untsurín Yáintajtsa Puártinia nu. Nujai Yamaram Chichaman Yus najanaiti.

Nekas Tájarme, uwa yumiri ataksha jui umarchattajai. Tura tsawant jeamtai, ukunmasha, Yus akupeana nui yamarman umartatjai" Tímiayi.

Yus-kantan Kantámawar, Jíinkiar, Uriwiu Náinnium wearmiayi.

Nuinkia Jesus niin Tíarmiayi "Ju kashi átum natsantrurtatrume. "Murikiu Wáinniun Máattajai, Túramtai murik tsakinmakartatui" tu aarchamukait.

Tura ukunam Wi nantakin atumin Kariréanam émtuktiajrume" Tímiayi.

Tutai Pítiur chicharuk "Amin Ashí natsantramainiakuisha, wikia natsantrashtatjame" Tímiayi.

Tutai Jesus Tímiayi "Nekas Tájame, ju kashi atash Jimiará shiniatsain, natsantrurtatme. "Núnaka nékatsjai" Menaintiú turuttiatme" Tímiayi.

Tutai Pítiur kakaram chichaak "Amijiai métek Máantuiniakuisha, Núnaka penké Tíchattajai" Tímiayi. Ashí ni unuiniamuri Núnisan tiarmiayi.

Nuyá Jitsemaní ajanam wearmiayi. Jeawar Jesus ni unuiniamurin Tímiayi "Jui pujustarum, Yúsan áujsatasa pujai".

Pítrun, Jakupuncha, Juánnasha jukimiayi. Tura Jesuska ti kuntuts Enentáimiar wake mesek nekapsatasa nankammiayi.

Tura niin chicharuk "Wi ti kuntuts Enentáimjai, tura jakamnia nekapeajai. Jui iimia pujutarum" Tímiayi.

Jesussha ishichik arantach we, Nunká piniakumar tepes Yúsan aujmiayi. "Ju Wáitsatin átatna nu, Túrutatniuitkuinkia iniaitiusta" tu seamiayi.

Tuke áujuk Tímiayi "Apawá, Ashí tujinchaitme. Pininnumia Ashí umartinia aantsan ti nekapsatajna Nú Wáitsatniun, jurutkitia. Antsu Wi wakeraj nucha, ame wakeramuram Túrunati."

Tura ni unuiniamurin tarin, Kanúu tepenan Wáinkiamiayi. Pítrun Tímiayi "ṡSemunka Kánamek. Kanutsuk ishichkisha iimia pujustin tujinkiamek?

Anearum Yus áujsatarum, tunaanum iniaaraij tusarum. Atumí wakaniin kakarmaitrume, antsu Atumí ayashiin kakarmachuitrume" Tímiayi.

Ataksha we, nuik Yúsan áujsama Núnisan áujsamiayi.

Ataksha waketruki, ni unuiniamurin Kanúu tepenan tarimiayi. Kari ti Pujá asamtai, Jesusan áujsatniun tujinkiarmiayi.

Jesus ataksha we, Tarí Tímiayi "Kanarum ayampratarum. Máakete. Jeayi. Wi, Aents Ajasuitjiana ju, Tunáa shuarnum surukmaitjai.

Nantáktiárum, Wemí. Iis, Winia Súrutna nu nuntumsai" Tímiayi Jesus.

Jesus nuna Chicháa Pujá unuiniamuri Jútas tarimiayi. Niijiai Untsurí aents Puniá takaku, tura numincha takaku Káutarmiayi. Israer-patri uuntri, Israer-shuara jintinniuri, tura Israer-shuara uuntri akupkarma asa Káutkarmiayi.

Káuntsain Jútas chicharainiak, "Wi mukunattaj áujkin Núiti Jesus. Achiirum, pénker emetarum jukitiarum" Tímiayi.

Tura Jesusan Tarí, mukunuk áujas "Uuntá, Uuntá" Tímiayi.

Túramtai aencha Jesusan achikiar emetawarmiayi.

Túruiniakui nui wajatusha puniari úkuitsan, patri uuntri takarniurin awati ni kuishin tsupirkamiayi.

Túram Jesus aentsun Tímiayi "Kasakaitiaj. Puniajai numijiai, Kasá Nútiksarmek achirkatai tusarum tarutniurme.

Ashí tsawant atumjai Yusa Uunt Jeen wayan unuiniakun pujuchmakaj. Túmai nui achirkachmarme. Tura Yus timia nu uminkiat tusa ju Túrunayi."

Nuinkia ni unuiniamuri Niniak ikiuiniak pisararmiayi.

Tura aishman Nátsaach aya tarachin penumas Jesusan atamprimiayi. Tura natsaach suntar achikiam

tarachrin ajapa ikiuak Misú tsékenkimiayi.

Patri uuntriin Jesusan ejeniarmiayi. Nui Patri uuntrisha, Israer-shuara jintinniurisha, Israer-shuara uuntrisha irunturarmiayi.

Tura Pítiur iikian nemarki Patri jeen aach Jeá, Patri suntarijiai jinia anamuk pujumiayi.

Patri uuntri Ashí naamka uunt armia nujai iruntrar maatai tusar wakeruiniak shuar Jesusan tsanumprurat tusar eatkarmiayi. Nu chichamjai mantamnati, tiarmiayi. Túrasha Wáinkiacharmiayi.

Túrasha Untsurí shuar Jesusan tsanumpruiniayatan Yapajiá Yapajiá chichainia ásarmatai Wáinkiacharmiayi.

Nuyá Chíkich wajakiar Wáitruiniak juna tiarmiayi

"Yusa Uunt Jeen, aents jeamarmia nuna yumpuntiatjai. Túran Menaintiú tsawantai, chikichan, aents jeamchamun jeamtatjai" tau antukmaji" tiarmiayi.

Tura tuke Yapajiáwar tiarmiayi.

Nuisha Patri uuntri ajapén wajaki Jesusan chicharuk "ṡAimsatin penké tujintiamek. Warinia turamainia?" Tímiayi.

Tura Jesus takamtak aimtsuk pujumiayi. Patri uuntri atak chicharuk "ṡAme nekas Yusa Anaikiamurinkaitiam. Ii Yusri Uunt tajinia nuna Uchirinkaitiam?"

Tutai Jesus Tímiayi "Ee, Núitjai. Winia, Aents Ajasu tutaintiajna nu Kakaram Yusa untsuurini pujai Wáitkiattarme. Tura nayaimpinmaya yuranminiam winiai Wáitkiattarme" Tímiayi.

Tutai Patri uuntri kajek, ni pushirin jaak Tímiayi "ṡChíkich Títincha Warí atsumaj~i?

Nii tana nujai Yúsan Kátsekeamu antukurme. ṡWarintia Enentáimprum?" Tímiayi. Takui "jakamniaiti" Ashí tiarmiayi.

Chíkich Chíkich Jesusan Usukiáwarmiayi. Jiin epetkar awatiar "ṡYa aitkiarma? etserkata" tiarmiayi. Patri suntarisha yapiniam awatiarmiayi.

Núnaka Túruiniai Pítru Nunká, jea aani pujan, nuwa Patri uuntri takarniuriya nu tarimiayi.

Niisha Pitrun jinia anamu pujan Wáinkiamiayi. Wáiniak, "Amesha Nasaretnumia Jesusjai wekaichukaitiam" Tímiayi.

Tutai Pítiur chicharuk, "Nékatsjai. Ame Támena nuna nékatsjai" Tímiayi. Tura aa Wáitiainiam jiinkimiayi. Tumai atash shiniukmiayi.

Nu Núwasha Pitrun ataksha Wáiniak, Shuáran nui pujuinian Tímiayi "Júiti ni shuari."

Tura Ataksha"atsá" Tímiayi. Ishichik árusan, shuar nui pujuarmia nu ataksha Pitrun chicharuk "Nekas ni shuarinme. Kariréanmaya Shuárchakaitiam. Auya shuara Nuní chichaame" tiarmiayi.

Tutai Pítrusha kakantar chichaak, "Ju aishmannaka átum Tárumna Núnaka nékatsjai. Wáitrakuinkia Yus iirsati" Tímiayi.

Nuya ataksha atash shiniukmiayi. Pítrusha, Jesus nuik timian Enentáimmiayi. Iis, Jesus nuik Tíchamka "Atash jimiar shiniatsain, ame, Núnaka nékatsjai, menaintiu turuttiatme" Tíchamka. Pítru nuna Enentáimias ti uutmiayi.

Tura kashin Káshik Patri uuntri, Israer-shuara uuntrijiai, Israer-shuara jintinniurijiai, Ashí naamka armia nujai irunturar, chichaman jurusarmiayi. Túrawar Jesusan jinkiamun apach Kapitián Piratuiin ejeniarmiayi.

Ejeniarmatai Piratu aniasmiayi "ṡAmesha Israer-shuara Uuntrinkáitiam?" Tutai Jesussha "Amek tame" Tímiayi.

Nuyá Patri uuntri ti tsanumprurarmiayi.

Ataksha Piratu aniasmiayi "ṡAimsatin penké tujintiamek? Ti Untsurí etserturmainiatsuk."

Tura Jesus nunasha aikchamiayi. Túmakui Piratu ti Enentáimpramiayi.

Shuar ámiayi, ni naari Parapás. Niisha ni shuarijiai meset ámanum, shuaran maa asamtai sepunam enkeamuyayi. Tura Námper tsawantai Piratu sepunmaya Chikichík shuarnak Jíiki akupniuyayi, aents seawarmia nuna.

Nuisha Untsurí shuar Piratun Káutkar tiarmiayi "Ame ju Námpertin tuke Túramna nu Túratá.

Patri uuntri Jesusan kajeraru ásar surukarmiayi. Piratusha, nuna Nekáa chicharainiak "Israer-shuartiram ṡAtumí akupniurin jiiki akupkattajak? ṡNu wakerarmek?" Tímiayi.

Tutai Patri uuntri aentsun chichainiak ""Antsu Parapás Jíikim Akúpkatá" titiarum" tiarmiayi.

Tutai Parapásan seawarmatai Piratu ataksha chicharainiak "Jesusnasha, átum ii akupniuri tarumna nuna, ṡitiurkattaja?" Tímiayi.

Ataksha ni kakantar tiarmiayi "Krúsnum mantamnati."

Piratusha niin tiarmiayi "ṡWarí tunaana Túriniait?" Tímiayi. Takui niisha Nú nankaamas kakantar Tíarmiayi "Krúsnum mantamnati."

Tuma asamtai, aents shiir Enentáimprartí tusa, Piratu Tunáa shuaran, Parapásan jiiki akupkamiayi. Tura Jesusnasha katsumkarum krusnum ajintrurtarum tusa suntaran tsankatkamiayi.

Tiniu asamtai suntar Jesusan jukiar, Kapitiáni jeen awayawarmiayi. Nu jea naari Piritiúriuiti. Túrawar Untsurí suntaran untsukarmiayi.

Ashí Káunkar, pushin kapaanniun Jesusan aentsrarmiayi. Tawasap janki najanamun etsenkrumtikiarmiayi.

Nuisha Jesusan áujsar "Shíiraitme, Jesusá, Israer-shuara akupniuriya" wishikiainiak tiarmiayi.

Muuknumsha sapapjai awatiarmiayi; Nuyá usukiawarmiayi, Túrawar ántar tikishmatrarmiayi.

Tura Jesusan wishikrar amukar, kapaantin pushin aitkiar, ni pushirin aentsrarmiayi. Túrawar Krúsnum ajintrurtai tusar Jíikiarmiayi.

Semun Serini Núnkanmaya Shuárauyayi. Arijantruncha, Rupuncha Aparíyayi. Semunkan takatnumia winian suntar emetawarmiayi, Jesusa krusrin yanaki jukiti tusar.

Jesusnasha Kúrkuta Náinnium Júkiarmiayi. Kúrkuta, shuar chichamjainkia, muuka ukunch naint, tutainti.

Jeawarmatai, Karía, mira kunkuinjai pachimprar aartaj tusa susarmiayi Jesusan. Túrasha umarchamiayi.

Nantu Yakí jatemsamtai Krúsnum ayapar ajintrurar ikiusarmiayi. Túrawar suntar yaki jukit tusar nakurutaijiai nakurusar Jesusa pushirin yaruakarmiayi.

Urukamtai Máamuit, Ashí aents nuna nekaawarat tusa, ni Krúsrin ju aarmauyayi: ISRAER SHUARA AKUPNIURI

Nu Náinnium Jimiará kasa shuaran Niijiai Máawarmiayi. Chikichik Jesusa untsuurini Krúsnum, chikichik ni menaarini Krúsnum Máawarmiayi.

Yus-Papinium aarma ana nujai uminkiauyayi. Nui "Tunáa shuarjai nekapmarmauyayi" tu aarmaiti.

Shuar nankaamainiak, muuke pearar, Jesusan katsekainiak tiarmiayi "Iisia, amesha, "Yusa Uunt Jeen yumpuntiatjai, tura Menaintiú tsawantai ataksha jeamkattajai" Tíchakaitiam, tiarmiayi.

Amek Krúsnumia akaikim uwemprata."

Núnisan Patri uuntrisha, Israer-shuara jintinniurisha Jesusan wishikrar chicharnaisarmiayi "Chikichan uwemtikraitiat, Ninki uwempratniun tujintiawai.

Yusa anaikiamuri Krístuashit, ii akupniuriniashit, tiarmiayi. Wats, Yamái Krúsnumia Akáikití, iisha nu iisar Yus-shuar ajastai" wishikiainiak ántar nuna tiarmiayi. Jesusjai Krúsnum ajintruamusha Niin wishikiarmiayi.

Tutupin jeamtai ti kiritin ajasmiayi Ashí nunkanam. Tura, nantu nunkaach ajasmatai ataksha tsaapnirmiayi.

Nuin Jesus kakantar untsumuk Tímiayi "Iruí, Iruí, rama sapaktani." Nuka shuar chichamjainkia, "Yusrú, Yusrú, ṡurukamtai ajapa ikiurkiniam?" tawai.

Shuar nui pujuarmia nu, nu chichaman nékachu ásar, nuna antukar "Eríasan Untsúawai" Tíarmiayi.

Chikichik shuar churuinian uruchjai ajamper, sapapjai Ijiú mukunati tusa susamiayi. Tura Tímiayi "Wajastarum, Erías Niin jukitiaj tusa winishtimpiash. Iistai" Tímiayi.

Nuinkia Jesus kakaram untsumak jakamiayi.

Túramtai Yusa Uunt Jeen ejamu ninki jaanakmiayi, Yakíya Nunká.

Suntara Kapitiántrisha Jesusan ayamtus wajamia nu, Jesus kakaram untsumak jaamun iis Tímiayi "Nuka ti nekas Yusa Uchiriyayi."

Nuwasha arant ii pujuarmiayi. Nu nuwajai Máktara péprunmaya Marí, Chíkich Marisha, Sarumáisha pujuarmiayi. Chíkich Marisha uchich Jakupuncha Jusencha Nukuríyayi.

Nu Núwaka, Kariréa nunkanam Jesus wekaimia nui, Niin nemarsar Yáintaitsar wekasarmiayi. Untsurí Chíkich nuwasha Jesusjai Jerusarénnum wear, nu nuwajai arant ii pujuarmiayi.

Kiatemamtai, ayampratin tsawant jeatsain, Námper iwiaratin tsawant asamtai,

Arimiatíanmaya Jusé arantutsuk, kakaram ajas, Piratuí Jeá Jesusa ayashin seatajtsa utuamiayi. Nu Jusencha Ashí irunin ainia nu anturin ármiayi. Niisha Yus ju nunkanam akupin ajasat tusa Nákasmiayi.

Tura Jesusa ayashin seam, Piratusha "Wárik jaka" Tímiayi. Tuma asa suntara Kapitiántrin untsurak "ṡNekas jakayik?" Tímiayi.

Tutai Kapitián "Ee" takui, Jesusa ayashin Jusen tsankatkamiayi.

Jusesha puju tarachin pénkeran sumarak, Jesusa ayashin itiar aepas penuarmiayi. Tura yamaram kaya Táurmanum ikiusmiayi. Ikius Wáitiniam kayan átutmiayi.

Tura Máktaranmaya Marí, Jusé Nukurí Marijiai ni ikiuamun ii wajarmiayi.

Tura ayampratin tsawant nankaamasmatai, Máktaranmaya Marisha, Jakupu Nukurí Marisha, Sarumáisha, kunkuinian Jesusa ayashin kuertai tusar sumakarmiayi.

Tura kashin Tumintin, ti Káshik, nantu Yáma jiiniai, iwiarsamunam jeariarmiayi.

Wésar chichainiak "Iwiarsamu Wáitiri kayancha ṡyaki akanketramkattaj~i?" tiarmiayi.

Jear uunt kaya akankekman Wáinkiarmiayi.

Iwiarsamunam wayawar, natsan esaram puju pushin entsar, untsuurnumaani pujan Wáinkiar ti ashamkarmiayi.

Túmainiakui natsa Tímiayi "Ashamkairap. Nasarétnumia Jesus Krúsnum jakama nu éarme. Iniantkimiuiti. Jui pujatsui. Wátsek, ju ikiusmanum iistarum.

Túrarum werum Pítrusha, Chíkich unuiniamurisha ju ujaktarum. Kariréanam atumin émkiyi. Turammarumna Núnisan Túruna Wáinkiattarme" Tímiayi.

Niisha ti ashamainiak purushniarar iwiarsamunmaya tseke wearmiayi. Ti ashamainia ásar, chikichkinkesha ujakcharmiayi.

émkaka Tumintin ti Káshik Jesus nantaki, Máktaranmaya Marin Wantintiúkmiayi. Nu María Enentáiya siati iwianchin Jesus yaunchu ajapruyayi.

Marisha Jesusa nemari Kúntuts uutu matsatainian Werí, "Jesus iwiaakui, imia wi wainkiajai" Tímiayi. Támaitiat anturkacharmiayi.

Tura urum jimiara shuar Jerusarénnumia tsanin weenan, Jesus Nusháa iira ajas tarimiayi.

Niisha Jesusan Wáinkiar waketkiar, unuiniamurin ujakarmiayi, tura ni chichamencha anturkacharmiayi.

Nuyasha Jesusa auntse unuiniamuri misanam pekaamkar pujuinian Jesus tarimiayi. "ṡAtumí Enentái urukamtai Kátsuram ainia, urukamtai Winia nekas Enentáimtursachuram?" Tímiayi. Ni nantakmiarin Wáinkiaru chichamen anturkacharu ásarmatai kakantramiayi.

Nuyá chichaak "Ashí nunkanam wetarum. Túrarum Ashí shuarnum Yusa shiir chichame etserkatarum.

Shuar anturak imiani uwemprartatui. Shuar antukcharka, tuke sumamawartatui.

Shuar winia Náarun pachis, Yúsan nekas Enentáimtakka, juna Túrawartatui, Yusa kakarmarin iniakmastaj tusa: iwianchin jiiki akupkartatui; Chíkich chichamjai chichasartatui;

napincha achiksha, tseasnasha úmaksha, jaa ajaschartatui. Jaa shuaran ni uwejejai antin, nu shuaran pénker awajsartatui." Tu Tímiayi.

Jesus chichas amukmatai, Yus nayaimpiniam jukimiayi. Túruna Yusa untsuurini pujusmiayi.

Ni unuiniamurisha Jíinkiar, Ashí nunkanam Yus-Chichaman etserkarmiayi. Tura Uunt Yus niin Yáinmiayi. Tura etserainiakui, Ashí aents ni kakarmarin nekaawarat tusa, aentsti tujintiamun Túratniun susamiayi. Nuke Atí.