ᐅᑭᑫᑕᒨᔑᐌᐎᓐ ᒋᓴᔅ X ᑭᔐᒪᓂᑑᓐ ᑳᑮᒦᓂᑯᒡ ᒋᐙᐸᑕᐋᒡ ᐅᑕᓄᑮᐋᑲᓇᐞ ᐐᐸ ᑫᓂ ᐃᔑᐌᐸᓂᓂᒃ᙮ ᐅᑌᒐᓬᐃᒪᓐ ᐅᑮᐱᓈᔑᓂᔕᐙᓐ ᐁᑮᑭᑫᑕᒨᓈᓂᒡ ᐅᑕᓄᑮᐋᑲᓇᓐ ᒞᓇᓐ ᙮

ᔑᑾ ᒞᓐ ᐅᑮᑎᐹᑐᑖᓇᓐ ᑲᑭᓇ ᐃᓂ ᑳᑮᐙᐸᑕᕽ, ᒦ ᐅᐌᓂ ᐅᑎᑭᑐᐎᓂᓂ ᑭᔐᒪᓂᑑᓐ ᑲᔦ ᐅᑌᐺᐎᓂᓂ ᒋᓴᔅ Xᑕᓐ ᑳᑮᑭᑫᑕᒨᔑᐌᓂᒡ᙮

ᔕᐌᑖᑯᓯ ᐊᐊ ᑫᐊᓇᒥᑕᒫᑫᒡ ᐅᐅ ᒪᓯᓇᐃᑲᓐ ᑲᔦ ᑳᐱᓯᑕᒧᐙᒡ ᐅᓄ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ, ᐃᑭ ᑲᔦ ᑳᑲᓇᐌᑕᒧᐙᒡ ᐅᒫ ᑳᐅᔑᐲᐃᑳᑌᓂᑭᓐ᙮ ᐋᓃᔥ ᐯᔓ ᐋᔕ ᒋᐊᓂᐅᒋᒋᓭᓂᒃ᙮

ᓃᓐ ᒞᓐ ᓂᑑᔑᐲᐊᒪᐙᒃ ᐃᑭ ᐅᑌᐺᑕᒨᒃ ᐃᒫ ᑳᑕᔑᒫᒫᐗᒋᐃᑎᐙᒡ ᐁᓃᔣᒋᑭᓐ 7 ᐆᑌᓇᐗᓐ ᐁᔖᐗᑮᕽ ᙮ ᔕᐌᓂᒥᑰᐎᓐ ᑲᔦ ᐱᓵᓀᑕᒧᐎᓐ ᑭᑲᐅᒌᑕᒫᑯᐙ ᐊᐊ ᑭᔐᒪᓂᑑ ᐅᒫ ᓅᑯᒻ ᑳᐊᔮᒡ ᑲᔦ ᒣᐎᔕ ᑳᐱᐅᒋᐊᔮᒡ ᑲᔦ ᑳᐐᐱᐊᔮᒡ, ᑲᔦ ᐃᑭᐌᓂᐗᒃ ᓃᔣᓱ ᐊᒑᑾᒃ ᑳᐃᓈᓴᒥᑳᐸᐎᐙᒡ ᑭᔐᒪᓂᑑ ᐅᑭᑕᐱᐎᓂᕽ,

ᒋᓴᔅ X ᑲᔦ ᑳᑾᔭᑴᑖᑯᓯᒡ ᐅᑎᐹᒋᒧ, ᐊᐊᐌ ᓂᑕᒻ ᑳᓂᑖᐎᑭᒡ ᑭᔐᒪᓂᑑᓈᕽ, ᑳᑮᑮᐌᐱᒫᑎᓯᒡ, ᑳᑎᐯᓂᒫᒡ ᑭᒋᐅᑭᒫᐞ ᐊᑮᕽ ᑳᐊᔮᓂᒡ᙮ ᑭᓵᑭᐃᑯᓈᓐ ᓴ, ᐅᒥᔅᑸᒥᕽ ᑲᔦ ᑭᑮᐅᒋᐋᐸᐅᑯᓈᓐ ᒋᐴᓂᑎᐯᓂᒥᑯᔭᕽ ᑭᒪᒋᑑᑕᒧᐎᓂᓈᓂᓐ ᑳᑮᐱᑑᑕᒪᕽ᙮

ᑭᑮᐃᔑᐃᑯᓈᓐ ᐃᑕᔥ ᒋᑎᓄᐎᔭᕽ ᒋᑎᐯᓂᒥᐌᔭᕽ, ᒋᑕᔑᑭᒋᐊᓇᒥᐁᐎᑭᒫᐎᔭᕽ, ᒋᐊᓄᑮᑕᐎᒪᕽ ᐅᑭᔐᒪᓂᑑᒪᓐ ᑳᐅᔫᓯᒫᒡ᙮ ᐐᓐ ᐅᑲᐊᔮᓐ ᑭᒋ ᐃᓀᑖᑯᓯᐎᓐ ᑲᔦ ᑎᐯᒋᑫᐎᓐ ᐱᔑᔑᒃ ᐃᑯ ᐊᐸᓀ᙮ ᐁᒣᓐ᙮

ᐃᓇᔥᑫ ᑕᐱᓈᑯᓯ ᐗᑸᕽ! ᑲᑭᓇ ᑕᔥ ᐊᐎᔭ ᐅᑲᐙᐸᒫᐙᓐ, ᐃᐴᔥᑫ ᑲᔦ ᐃᑭ ᑳᑮᐸᔑᐸᐙᐙᒡ᙮ ᑲᑭᓇ ᑕᔥ ᑳᑕᓶᐙᓇᑭᓯᒡ ᐊᑮᕽ ᑕᐅᒋᒪᐎᐗᒃ ᐊᐲ ᐙᐸᒫᐙᒡ᙮ ᐊᒦ ᓴ ᑯ ᑕᐃᔑᐌᐸᓐ᙮ ᐁᒣᓐ᙮

ᓃᓐ ᐊᐊᐌ ᓂᑕᒻ ᑳᑮᐊᔮᒡ ᒦᓇᐙ ᐃᔥᒀᒡ ᑫᐊᔮᒡ, ᐃᑭᑐ ᑳᑎᐯᒋᑫᒡ ᑭᔐᒪᓂᑑ ᒫᐗᒡ ᑳᒪᔥᑲᐌᑖᑯᓯᒡ᙮ ᒦ ᐊᐊᐌ ᓅᑯᒻ ᑳᐊᔮᒡ ᑲᔦ ᐅᑖᓈᕽ ᑳᑮᐊᔮᒡ, ᑲᔦ ᑫᐱᐊᔮᒡ᙮

ᓃᓐ ᒞᓐ ᑮᒋᑭᐌᓯᐙ ᑫᓃᓐ ᐁᐐᒌᐗᒃ ᒋᓴᔅ, ᑭᐐᒌᐎᓂᓂᒻ ᐁᐃᔑᔕᔒᐯᑕᒣᒃ ᑭᒥᑯᔥᑳᒋᐃᑰᐎᓂᐙᕽ, ᐃᐃᐌ ᐅᒑᓂᒥᓯᐎᓐ ᐃᐃᒫ ᑳᐅᒌᒪᑲᒃ ᐁᐊᔮᒃ ᐅᑎᐯᒋᑫᐎᓂᕽ ᒋᓴᔅ᙮ ᓂᑮᓇᑲᓂᑰ ᐃᒫ ᒥᓂᓯᕽ ᐹᑎᒪᔅ ᑳᐃᔑᓂᑳᑌᒃ᙮ ᓂᑮᐅᒋᐊᓯᑰ ᐁᑮᐐᑕᒫᑫᔮᓐ ᑭᔐᒪᓂᑑ ᐅᑎᑭᑐᐎᓐ ᑲᔦ ᐅᑌᐺᐎᓐ ᒋᓴᔅ᙮

ᐊᐲ ᐁᑮᔑᑲᒃ ᑳᑎᐯᒋᑫᒡ ᐅᑮᔑᑳᒻ ᑳᐃᔑᐐᑌᒃ ᓂᑮᐐᒌᐎᒥᒃ ᐃᓂ ᑭᔐᒪᓂᑑ ᐅᑕᒑᑾᓐ᙮ ᓂᑮᓅᑖᓐ ᐃᑕᔥ ᐁᑭᒋᑭᔒᐌᒃ ᐃᓉᐎᓐ ᑖᐱᔥᑰ ᑭᒋᐴᑖᒋᑲᓂᕽ, ᐌᑎ ᓂᐱᑾᓂᕽ ᐊᐎᔭ ᐁᑲᓅᔑᒡ᙮

ᒦ ᐅᐌ ᐁᔑᒡ: ᐃᐃᐌ ᑳᐙᐸᑕᒪᓐ ᒦ ᐃᐌ ᐅᔑᐲᐊᓐ ᒪᓯᓇᐃᑲᓂᕽ᙮ ᒦ ᐃᒫ ᐃᔑᓂᔕᐊᒪᐤ ᐃᑭ ᐅᑌᐺᑕᒨᒃ ᐃᐃᒫ ᑳᑕᔑᒫᒫᐗᒋᐃᑎᐙᒡ ᐁᓃᔣᒋᑭᓐ 7 ᐆᑌᓇᐗᓐ᙮ ᒦᐗᓄᓄ ᐆᑌᓇᐗᓐ: ᐁᐱᓴᔅ, ᓯᒥᕒᓇ, ᐸᕒᑲᒪᒻ, ᑕᔭᑕᐃᕒᐊ, ᓵᕒᑎᔅ, ᐱᓬᐊᑌᓬᐱᔭ, ᓬᐁᔮᑎᓰᔭ ᙮

ᒦᑕᔥ ᓂᑮᑴᑭᑳᐸᐤ ᐁᐐᐙᐸᒪᒃ ᐊᐌᓀᓐ ᐅᑎᓉᐎᓐ ᑳᑲᓅᔑᒡ᙮ ᓂᑮᐙᐸᑖᓇᓐ ᐃᑕᔥ ᓃᔣᓱ ᐙᓴᑯᓀᒋᑲᓈᑎᑰᓐ ᐁᐅᓵᐎ ᔔᓂᔮᐗᑭᓐ᙮

ᒣᑴᔭᐄ ᐃᒫ ᐙᓴᑯᓀᒋᑲᓈᑎᑯᕽ ᐊᐎᔭ ᓂᑮᐙᐸᒫ ᑖᐱᔥᑰ ᐯᒫᑎᓯᒡ, ᐁᑭᑭᔥᑲᕽ ᑭᒋᒪᑰᑦ ᐅᓯᑎᕽ ᐁᐊᑴᑲᓂᓂᒃ, ᒦᓇᐙ ᐁᑭᒋᐱᓱᒡ ᐅᑳᑭᑲᓀᐱᓱᓐ ᐁᐅᓵᐎ ᔔᓂᔮᐎᓈᑾᓂᓂᒃ᙮

ᐅᑎᒀᓂᕽ ᐃᑕᔥ ᐐᓂᓯᓴᓐ ᑮᐙᐱᔥᑳᓂᐗᓐ ᑖᐱᔥᑰ ᒫᓇᒑᓂᔑᐲᐗᔨᕽ; ᑖᐱᔥᑰ ᑰᓐ ᑳᐙᐱᔥᑭᓯᒡ ᑮᐊᐲᒋᐙᐱᔥᑳᓂᐗᓐ᙮ ᑮᐙᓯᑌᓂᐗᓐ ᐃᑕᔥ ᐃᓂ ᐅᔥᑮᔑᑰᓐ ᑖᐱᔥᑰ ᑳᐊᐲᒋᐙᓯᑌᒃ ᐃᔥᑯᑌ᙮

ᐅᓯᑕᓐ ᐃᑕᔥ ᑲᔦ ᑖᐱᔥᑰ ᐅᓵᐙᐱᒃ ᐁᑮᐯᑳᐱᑭᑌᒃ ᑲᔦ ᐐᑫ ᐁᔔᔥᒀᐱᑲᒃ ᑮᐃᔑᓈᑾᓂᓂᐗᓐ᙮ ᒦ ᑲᔦ ᑳᐃᓂᑖᑯᓯᒡ ᑖᐱᔥᑰ ᑳᒪᑗᒋᐗᕽ ᑭᒋᐹᐎᑎᒃ᙮

ᐅᑭᒋᓂᑭᕽ ᐃᑕᔥ ᑮᐊᐱᐗᐞ ᓃᔣᓱ ᐗᓇᑯᔕᐞ᙮ ᐊᒦᔥ ᒦᓇᐙ ᐅᑑᓂᕽ ᑮᐅᒋᓭᓂ ᑳᐄᑕᐎᑳᔖᓂᒃ ᑭᒋᒨᑯᒫᓐ᙮ ᒦᔥ ᑲᔦ ᐁᔑᓈᑾᓂᓂᒃ ᐅᐗᑌᕽ ᑖᐱᔥᑰ ᑮᓯᔅ ᑳᐊᐲᒋᐙᓭᔮᓯᑫᒡ ᑮᐃᔑᓈᑾᓂᓂ᙮

ᐊᐲ ᐁᐙᐸᒪᒃ ᓂᑮᑲᐎᐸᓂᐅᐙᓐ ᐅᓯᑎᕽ᙮ ᑖᐱᔥᑰ ᐊᐎᔭ ᐁᓂᐳᒡ ᓂᑮᐃᔑᓈᑯᔅ᙮ ᓂᑮᑖᑭᓂᒃ ᐃᑕᔥ ᐅᑭᒋᓂᑭᕽ, ᐁᑮᐃᔑᒡ: ᑫᑯ ᓭᑭᓯᑫᓐ! ᓃᓐ ᐊᐊ ᓂᑕᒻ ᑳᑮᐊᔮᒡ ᑲᔦ ᐲᓂᔥ ᐃᔥᒀᒡ ᑫᐊᔮᒡ᙮

ᓃᓐ ᐊᐊ ᑳᐱᒫᑎᓯᒡ᙮ ᓂᑮᓂᑉ, ᒦᓇᐙᔥ ᓂᐱᒫᑎᔅ, ᑲᔦ ᓀᐱᒡ ᐱᔑᔑᒃ ᓂᑲᐱᒫᑎᔅ᙮ ᓃᓐ ᓂᑌᐃᓀᑖᑯᔅ ᒋᑎᐯᑕᒫᓐ ᓂᐳᐎᓐ ᑲᔦ ᐃᑭ ᐃᐃᒫ ᑳᓂᐳᐙᒡ ᑳᐃᔑᐊᔮᐙᒡ᙮

ᐅᔑᐲᐊᓐ ᐃᑕᔥ ᐃᓂ ᑳᐙᐸᑕᒪᓐ, ᒦᐗᓐ ᐃᓂᐌᓂᐗᓐ ᓅᑯᒻ ᑳᐊᔮᑭᓐ ᑲᔦ ᓃᑳᓐ ᐌᑎ ᑫᓂ ᐃᔑᓭᒃ᙮

ᑭᑭᑫᑕᒨᓂᓐ ᐃᐌ ᐁᓀᑖᑯᓯᐙᒡ ᐅᑯ ᓃᔣᓱ 7 ᐗᓇᑯᔕᒃ ᑳᑮᐙᐸᒪᑣ ᓂᑭᒋᓂᑭᕽ ᐁᐊᐱᐙᒡ, ᑲᔦ ᐃᓂ ᓃᔣᓱ ᐅᓵᐎ ᔔᓂᔮᐎ ᐙᓴᑯᓀᒋᑲᓈᑎᑰᓐ, ᐃᐃᐌ ᑳᑳᒋᑳᑌᒃ᙮ ᐅᑯ ᓃᔣᓱ ᐗᓇᑯᔕᒃ, ᒦᐗᐞ ᐅᑌᒐᓬᐃᒥᐙᐞ ᐅᑌᐺᑕᒨᒃ ᑳᑕᔑᒫᐗᒋᐊᓇᒥᐋᐙᒡ ᑳᓃᔣᒋᑭᓐ ᐆᑌᓇᐗᓐ᙮ ᐃᓂ ᑲᔦ ᓃᔣᓱ ᐙᓴᑯᓀᒋᑲᓈᑎᑰᓐ, ᒦᐗᑭᑭ ᐅᑌᐺᑕᒨᒃ ᐁᓃᔣᒋᑭᓐ ᐯᐸᑳᓐ ᑳᐃᔑᒫᒫᐗᒋᐃᑎᐙᒡ᙮

ᐅᔑᐲᐊᒪᐤ ᐃᓂ ᐅᑌᒐᓬᐃᒥᐙᓐ ᐅᑌᐺᑕᒨᒃ ᐁᐱᓴᔅ ᐆᑌᓈᕽ ᑳᑕᔑᐊᓇᒥᐋᐙᒡ᙮ ᒦ ᐅᐌ ᐃᔑᐲᐊᒪᐤ: ᐅᐅ ᑭᑎᑯᐙ ᐊᐊ ᑳᒥᒋᒥᓈᒡ ᐃᐃ ᓃᔣᓱ 7 ᐗᓇᑯᔕᐞ ᐅᑭᒋᓂᑭᕽ, ᐊᐊ ᒣᑴᔭᐄ ᑳᐱᒧᓭᒡ ᑳᐃᔑᓃᔣᒋᓂᓂᑭᓐ ᐅᓵᐎ ᔔᓂᔮᐎ ᐙᓴᑯᓀᒋᑲᓈᑎᑯᕽ᙮

ᓂᑭᑫᑖᓇᓐ ᑭᑎᔑᒋᑫᐎᓂᐙᓐ ᑲᔦ ᑭᑕᓄᑮᐎᓂᐙᓐ ᑲᔦ ᑭᔕᔒᐯᑕᒧᐎᓂᐙ᙮ ᑲᔦ ᑭᑭᑫᓂᒥᓂᓂᒻ ᐁᑳ ᐊᐙᒡ ᐁᐐᐅᑖᐱᓇᒪᐙᓯᐌᒀ ᐃᑭ ᒪᒋᐊᔨᐄᕽ ᑳᐃᔑᐱᒫᑎᓯᐙᒡ᙮ ᑭᑯᒋᐋᐙᒃ ᐃᑕᔥ ᐃᑭ ᑭᔐᒪᓂᑑ ᐅᑎᔑᓂᔕᐙᑲᓇᐞ ᑳᒥᒋ ᐃᔑᐃᑎᓱᐙᒡ, ᐁᑳ ᐁᑎᓄᑳᓂᐎᓯᒀ᙮ ᑭᑮᒥᑲᐙᐙᒃ ᑮᐗᓂᒧᐎᓐ ᐁᐋᐸᒋᑑᐙᒡ᙮

ᔑᑾ ᑫᔮᐱ ᑭᔕᔒᐯᑖᒻ ᑲᔦ ᓃᓐ ᐅᒋ ᑭᑮᐱᐅᒋᑲᒀᑕᑭᑑᒻ, ᑳᐐᓐ ᐃᑕᔥ ᑲᔦ ᑭᑮᐅᒋᐴᓂᒋᑫᓰᒻ᙮

ᐊᔮ ᑕᔥ ᐯᔑᒃ ᑫᑰᓐ ᐁᐃᓀᓂᒥᓇᑰᒃ: ᓂᑕᒻ ᑳᑮᐃᔑᓵᑭᐃᔦᒃ ᑳᐐᓐ ᓅᑯᒻ ᑭᑎᔑᓵᑭᐃᓰᒻ᙮

ᒫᒥᑴᑕᒧᒃ ᐃᑕᔥ ᐃᒫ ᑳᑮᐅᒋᐸᑭᔑᓀᒃ, ᑲᔦ ᐸᑭᑎᓇᒧᒃ ᑭᒪᒋᒋᑫᐎᓂᐙᓐ, ᒦᑕᔥ ᓂᑕᒻ ᑳᑮᑑᑕᒣᒃ ᒦᓇᐙ ᒦ ᐃ ᐃᔑᒋᑫᒃ᙮ ᑮᔥᐱᓐ ᐃᑕᔥ ᐅᒋᑴᑮᓯᐌᒃ, ᐱᒌᓇᒃ ᑭᑲᐅᑎᓯᓂᓂᒻ, ᓂᑲᐱᐅᒋᐅᑖᐱᓈᓐ ᐃᒫ ᑳᐃᔑᐊᑌᒃ ᑭᐙᓴᑯᓀᒋᑲᓈᑎᑯᐙ᙮

ᐯᔑᒃ ᐃᑕᔥ ᑫᑰᓐ ᑾᔭᒃ ᑭᑑᑖᒻ: ᑭᔒᑫᑖᒻ ᐅᑎᔑᒋᑫᐎᓂᐙ ᐃᑭ ᓂᑲᓬᐁᔭᑕᓇᒃ ᑲᔦ ᓃᓐ ᑕᔥ ᑳᐃᔑᔒᑫᑕᒫᓐ᙮

ᑮᓇᐙ ᑕᔥ ᑳᐅᓅᑕᒫᐎᓂᔦᒃ, ᐱᓯᑕᐎᒃ ᑭᔐᒪᓂᑑ ᐅᑕᒑᑾᓐ ᑳᐃᓈᓂᒡ ᐃᐃ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮ ᑫᔖᑰᒋᑣᐙᒡ ᒦᐗᒃ ᐃᑭᐌᓂᐗᒃ ᓂᑲᒦᓈᒃ ᒋᐊᒧᒥᓀᐙᒡ ᐃᒫ ᐱᒫᑎᓯᐎᓂ ᒥᑎᑯᕽ, ᑭᔐᒪᓂᑑ ᐅᑭᑎᑫᐎᓂᕽ ᑳᑕᔑᓂᑖᐎᑭᓂᒡ᙮

ᐃᓂ ᑕᔥ ᒦᓇᐙ ᐅᑌᒐᓬᐃᒥᐙᓐ ᐅᑌᐺᑕᒨᒃ ᓯᒥᕒᓈᕽ ᑳᐃᔑᒫᐗᒋᐃᑎᐙᒡ ᐅᔑᐲᐊᒪᐤ: ᐅᐌ ᐃᑭᑐ ᐊᐌ ᓂᑕᒻ ᑳᑮᐊᔮᒡ ᒦᓇᐙ ᐃᔥᒀᒡ ᑫᐊᔮᒡ, ᐊᐊᐌ ᑳᑮᓂᐳᒡ, ᒦᓇᐙ ᑕᔥ ᑳᑮᑮᐌᐱᒫᑎᓯᒡ:

ᑭᑭᑫᓂᒥᓂᓂᒻ ᐁᐅᒑᓂᒥᓯᔦᒃ ᑲᔦ ᐐᑫ ᐁᑭᑎᒫᑭᓯᔦᒃ᙮ ᑭᐌᓅᑎᓯᒻ ᐃᑕᔥ᙮ ᑲᔦ ᓂᑭᑫᑖᓐ ᐃᐃ ᐁᔑᒪᒋᑮᔣᓂᓀᒀ ᐃᑭ ᓂᒎᐎᒥᓐ ᑳᐃᑭᑐᐙᒡ, ᑳᐐᓐ ᐃᑕᔥ ᑌᐺ ᒎᐗᒃ ᑎᓄᐎᓰᐗᒃ, ᓭᑕᓐ ᐃᑕᔥ ᐅᒫᐗᒋᐃᑎᐎᓂᕽ ᐃᔑᐐᒋᑣᐗᒃ᙮

ᑫᑯ ᑯᑕᑫᒃ ᑳᐐᐊᓂ ᐃᔑᑯᑕᑭᐃᑰᔦᒃ᙮ ᐃᓇᔥᑫ ᐋᓂᑕ ᑳᑕᔑᔦᒃ ᑭᐐᑕᔑᑯᒋᐃᑯᐙ ᒪᒋᐊᔭᐋ ᑭᐸᐅᑏᐎᑲᒥᑯᕽ ᐁᐐᐃᔑᐌᐱᓂᑰᔦᒃ᙮ ᑭᑲᑕᔑᑲᒀᑕᑭᐃᑯᐙ ᒥᑖᓱᑮᔑᒃ ᒥᓂᒃ᙮ ᐊᔮᒀᒥᓯᒃ ᐃᑕᔥ, ᐃᐴᔥᑫ ᐲᓂᔥ ᐊᓂᐅᒋᓂᐳᔦᒃ, ᑭᑲᒦᓂᓂᓂᒻ ᐃᑕᔥ ᐱᒫᑎᓯᐎᓐ, ᒦ ᐃᐌ ᑭᑎᐸᐊᒫᑯᐎᓂᐙ ᐁᑮᔖᑰᒋᑣᔦᒃ᙮

ᐊᐌᓀᓐ ᑳᐅᓅᑕᒫᐎᓂᒡ ᒫᓄ ᐅᑲᐱᓯᑕᐙᓐ ᐃᓂ ᑭᔐᒪᓂᑑ ᐅᑕᒑᑾᓐ ᐃᐃᐌ ᑳᐃᓈᓂᒡ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮ ᐊᒦ ᐅᐌ ᐁᑭᑐᒡ ᐊᒑᒃ: ᐊᐊᐌ ᑫᔖᑰᒋᑣᒡ ᑳᐐᓐ ᐅᑲᐙᐸᑕᓰᓐ ᐃᐃ ᓃᔣ ᓂᐳᐎᓐ, ᑳᐐᓐ ᑲᔦ ᐅᑲᐐᓴᑭᔥᑳᑯᓰᓐ᙮

ᐃᓂ ᑲᔦ ᐅᑌᒐᓬᐃᒥᐙᓐ ᐅᑌᐺᑕᒨᒃ ᑳᒫᒪᐎᐊᓇᒥᐋᐙᒡ ᐃᒫ ᐸᕒᑲᒪᒦᕽ, ᐅᐅᐌ ᐅᔑᐲᐊᒪᐤ: ᐅᐅ ᐃᑭᑐ ᐊᐊ ᑳᐊᔮᒡ ᑳᐄᑕᐎᑳᔖᓂᒃ ᑭᒋᒨᑯᒫᓐ:

ᑭᑭᑫᓂᒥᓂᓂᒻ ᑳᐃᔑᐅᑕᔮᐎᓂᔦᒃ ᐃᐃᒫ ᑳᐃᔑᐊᔮᓂᒃ ᓭᑕᓐ ᐅᑭᒋᐊᐱᐎᓐ᙮ ᑫᔮᐱ ᑕᔥ ᐌᐌᓂ ᑭᐱᒥᓂᔕᐅᒻ, ᑳᐐᓐ ᑲᔦ ᑭᑮᐋᓇᐌᒋᑫᓰᒻ ᐁᑮᑌᐺᑕᐎᔦᒃ, ᐃᐴᔥᑫ ᒣᒀ ᐁᐱᒥᑲᑮᔑᑲᓂᓂᒃ ᐁᑮᓂᓯᓐᒡ ᓂᑎᐹᒋᒨᒻ ᐁᑎᐸᔅ ᑳᑮᐊᔮᒀᒥᓰᑕᒪᐎᒡ, ᐁᑮᑕᔑᓂᓯᓐᒡ ᐃᐃᒫ ᑳᐃᔑᐊᔮᓂᒃ ᓭᑕᓇᓐ ᐅᑕᔮᐎᓂᓂ᙮

ᐸᑮ ᑕᔥ ᐊᔮᒪᑲᓐ ᑫᑰᓇᓐ ᑳᒥᓉᑕᓯᐙᓐ ᑳᐃᔑᒋᑫᔦᒃ᙮ ᐋᓂᓐᑦ ᐃᐃᒫ ᑳᐊᔮᔦᒃ ᐅᐱᒥᓂᔕᐋᓈᐙ ᐅᑭᑭᓄᐊᒫᑫᐎᓂᓂ ᐃᓂ ᐯᓬᐊᒨᓐ ᙮ ᐐᓐ ᐅᑮᑭᑭᓄᐊᒪᐙᓐ ᐃᓂ ᐯᕒᐊᑾᓐ ᐋᓃᓐ ᑫᐅᒋᐸᑭᔑᒫᓂᒡ ᐃᔅᕒᐃᔭᓬ ᐃᓂᓂᐗᐞ᙮ ᐊᐌᔥ ᐯᕒᐊᒃ ᐅᑮᑲᔥᑭᐋᐞ ᒋᒦᒋᓂᒡ ᐃᐃᐌ ᒪᓂᑑᑳᓂᕽ ᑳᑮᐸᑭᑎᓂᑳᑳᓂᐗᓂᓂᒃ, ᑲᔦ ᒋᑑᑕᒥᓂᒡ ᐱᔑᒀᑎᓯᐎᓐ᙮

ᒦᔥ ᐯᔑᑾᓐ ᐃᑯ ᐊᔮᐗᒃ ᐃᐃᒫ ᑳᑕᔑᔦᒃ ᑳᐱᒥᓂᔕᐊᒧᐙᒡ ᐅᑭᑭᓄᐊᒫᑫᐎᓂᓂ ᐃᓂ ᓂᑲᓬᐁᔭᑕᓇᐞ ᙮

ᐅᒋᑴᑮᒃ ᐃᑕᔥ! ᑮᔥᐱᓐ ᑴᑮᓯᐌᒃ, ᐌᔩᐱᑯ ᑭᑲᐱᐅᑎᓯᓂᓂᒻ, ᓂᑲᒦᑳᓈᒃ ᐃᑕᔥ ᐃᑭ ᑳᒪᒋᒋᑫᐙᒡ, ᓂᑲᐋᐸᒋᑑᓐ ᓂᑭᒋᒨᑯᒫᓐ ᓂᑑᓂᕽ ᑳᐅᒋᓭᒃ᙮

ᑳᐅᓅᑕᒫᐎᓂᒡ ᒫᓄ ᐅᑲᐱᓯᑕᐙᓐ ᐃᓂ ᑭᔐᒪᓂᑑ ᐅᑕᒑᑾᓐ ᑳᐃᓈᓂᒡ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮ ᐊᐊᐌᔥ ᑫᔖᑰᒋᑣᒡ ᐃᒫ ᓂᑲᐅᒋᒦᓈ ᒪᔑ ᑳᓈᑯᓯᓯᓂᒃ ᐸᑴᔑᑲᓇᓐ ᒣᓇ ᑳᐃᓂᒥᓐᒡ᙮ ᑲᔦ ᓂᑲᒦᓈ ᐙᐱᔥᑭᐊᓯᓃᓐ, ᐅᑑᔥᑭᐐᓱᐎᓐ ᑳᐃᔑᐅᔑᐲᐃᑳᑌᓂᒃ, ᐁᑳ ᐊᐎᔭ ᐁᑭᑫᑕᓯᒃ, ᐱᑯ ᐁᑕ ᑫᒦᓂᓐᒡ ᐅᑲᑭᑫᑖᓐ᙮

ᒦ ᐅᐌᔥ ᑲᔦ ᐅᔑᐲᐊᒪᐤ ᐃᓂ ᐅᑌᒐᓬᐃᒥᐙᓐ ᐃᑭ ᐅᑌᐺᑕᒨᒃ ᐃᒫ ᑕᔭᑕᐃᕒᐊ ᑳᑕᔑᒫᐗᒋᐊᓇᒥᐋᐙᒡ᙮ ᐅᐅ ᐃᔑᐐᑕᒪᐤ: ᐅᐌ ᑭᑎᑯᐙ ᑭᔐᒪᓂᑑ ᐅᑯᓯᓴᓐ, ᑳᐃᔑᓈᑾᓂᓂᒃ ᐅᔥᑮᔑᑰᓐ ᐱᓵᓂᑯ ᐁᐙᓯᑌᒃ ᐃᔥᑯᑌ, ᑲᔦ ᐅᓯᑕᓐ ᐱᓵᓂᑯ ᐁᑮᔔᔥᒀᐱᑲᐃᑳᑌᒃ ᐅᓵᐙᐱᒃ:

ᓂᑭᑫᑖᓇᓐ ᑭᑎᔑᒋᑫᐎᓂᐙᓐ, ᒦ ᐃᐌ ᑳᐃᔑᓵᑭᐃᐌᔦᒃ ᑲᔦ ᑳᐃᔑᑌᐺᑕᒣᒃ ᑲᔦ ᑳᐃᔑᐸᒥᐃᐌᔦᒃ ᑲᔦ ᑳᐃᔑᔕᔒᐯᑕᒣᒃ᙮ ᐊᒦᑕᔥ ᓅᑯᒻ ᐃᔥᒀᒡ ᑳᐃᔑᒋᑫᔦᒃ ᓇᐗᒡ ᐊᐗᔑᒣ ᐹᑏᓇᑎᓐ ᐊᐲᒡ ᐐᓐ ᐃᐃ ᓂᑕᒻ ᑳᑮᐃᔑᒋᑫᔦᒃ᙮

ᐊᔮ ᑕᔥ ᐃᐃᐌ ᐁᑳ ᑳᒥᓉᑕᓯᐙᓐ ᑳᐃᔑᒋᑫᔦᒃ, ᐁᐸᑭᑎᓀᒃ ᐊᐌ ᐃᑴ ᒉᓴᐯᓬ ᐱᓵᓂᑯ ᐁᐃᔑᒋᑫᒡ ᐙᐃᔑᒋᑫᒡ᙮ ᑖᐱᔥᑰ ᐐᓐ ᑌᐺ ᐁᑲᓅᑕᒪᐙᒡ ᑭᔐᒪᓂᑑᓐ ᐃᓍᓂᑎᓱ᙮ ᐐᓐ ᐃᑕᔥ ᐅᑭᑭᓄᐊᒫᑫᐎᓂᕽ ᐅᑎᔑᐗᓂᔑᒫᐞ ᐃᓂᐌᓂᐗᐞ ᑳᐸᒥᐃᒥᒡ, ᒋᑑᑕᒥᓂᒡ ᐱᔑᒀᑎᓯᐎᓐ ᒦᓇᐙ ᒋᒦᒋᓂᒡ ᐃᐃᐌᓂ ᑳᐸᑭᑎᓇᒪᐎᒥᓐᒡ ᐃᓂ ᒪᓂᑑᑳᓇᐞ᙮

ᓂᑖᓇᑮᑕᐎᓇᒪᐙ ᐊᐌ ᐃᑴ ᒋᑴᑮᒡ, ᒋᐴᓂᑑᒡ ᐅᒪᒋᒋᑫᐎᓐ᙮ ᑳᐐᓐ ᐃᑕᔥ ᐃᓀᑕᓰ ᒋᐴᓂᑑᒡ ᐅᐱᔑᒀᑎᓯᐎᓐ᙮

ᒦᑕᔥ ᐃᐃᒫ ᓂᑲᐊᐸᑭᓈ ᓂᐯᐎᓂᕽ ᐊᐊ ᐃᑴ ᐃᐃ ᑲᔦ ᑳᑮᐐᒋᐱᔑᒀᑎᓰᒥᑯᒡ ᒋᑕᔑᐐᓴᑳᐱᓀᐙᒡ ᐃᐃᒫ᙮ ᒦ ᐃᐌ ᑫᑑᑕᒫᓐ ᑮᔥᐱᓐ ᐅᒋᑴᑮᓯᒀ ᐃᐃᒫ ᑳᑑᑕᒧᐙᒡ ᐁᑮᐐᒋᐃᐌᐙᒡ ᑳᐃᔑᒪᒋ ᐃᔑᒋᑫᒡ ᐊᐊ ᐃᑴ᙮

ᐃᐃᐌ ᑕᔥ ᑳᓂᔑᐗᓈᒋᐃᐌᒪᑲᒃ ᓂᑲᐃᔑᓂᓯᒫᐞ ᐅᑭᑭᓄᐊᒪᐙᑲᓇᐞ ᐊᐊ ᐃᑴ᙮ ᐃᑭ ᑕᔥ ᑲᑭᓇ ᐅᑌᐺᑕᒨᒃ ᑳᐃᔑᒫᒫᐗᒋᐃᑎᐙᒡ ᓂᑲᑭᑫᓂᒥᑰᒃ ᓃᓐ ᐁᐙᐸᑕᒫᓐ ᑲᑭᓇ ᐊᐎᔭ ᑳᐃᓀᑕᒧᐙᒡ ᑲᔦ ᑳᐃᔑᒥᓴᐌᑕᒧᐙᒡ᙮ ᑫᐃᔑᐙᐸᑕᒫᓐ ᐃᑕᔥ ᐃᑯ ᑳᑕᔑᔦᒃ ᒦ ᑯ ᐃ ᑫᔑᑎᐸᐊᒪᐎᓇᑰᒃ ᑳᐃᓇᑌᒃ ᑭᑎᔑᒋᑫᐎᓂᐙ᙮

ᑮᓇᐙ ᑕᔥ ᑭᑎᔑᑲᓅᓂᓂᓂᒻ ᑳᐸᑳᓂᓯᔦᒃ ᐃᐃᒫ ᑳᐊᔮᔦᒃ ᑕᔭᑕᐃᕒᐊ᙮ ᑳᐐᓐ ᑭᑮᐅᑖᐱᓇᓰᒻ ᐃᐃᐌ ᒪᒋᑭᑭᓄᐊᒫᑫᐎᓐ᙮ ᑳᐐᓐ ᑭᑮᐱᑭᑫᑕᓰᒻ ᐅᑎᔑᒋᑫᐎᓇᓐ ᓭᑕᓐ ᑳᐃᔥᐹᓂᑭᓐ ᐐᓇᐙ ᑳᐃᑕᒧᐙᒡ᙮ ᒦᑕᔥ ᐅᐌ ᐁᓂᓇᑰᒃ: ᑳᐐᓐ ᒦᓇᐙ ᑫᑰᓐ ᑭᒦᓂᓯᓅᓂᓂᒻ ᒋᐱᒥᐎᑑᔦᒃ᙮

ᐃᐃᐌ ᑳᐊᔮᔦᒃ ᒦ ᐱᑯ ᐃᐌ ᒥᒋᒥᓇᒧᒃ ᐲᓂᔥ ᒦᓇᐙ ᒋᐱᑕᑯᔑᓈᓐ᙮

ᐊᐊᐌ ᑕᔥ ᑫᔖᑰᒋᑣᒡ ᑲᔦ ᑳᑲᓇᐌᑕᕽ ᒥᓯᐌ ᓂᑎᔑᒋᑫᐎᓇᓐ, ᒦᑕᔥ ᐊᐌ ᓂᑲᒦᓈ ᒋᐅᓈᑯᓂᐌᒡ ᑖᐱᔥᑰ ᓂᑌᑌ ᑳᑮᐃᔑᒦᔑᒡ ᑫᓃᓐ᙮ ᒦ ᐃᐌ ᑫᐃᓈᑯᓈᒡ ᑳᑕᓱᐯᐸᑳᓂᓯᓂᒡ ᐯᒫᑎᓯᓂᒡ, ᐅᑲᔑᐅᓈᑯᓈᐞ ᐲᐙᐱᑯᐸᑲᒫᑲᓐ ᐁᑕᑯᓇᕽ᙮ ᑲᔦ ᑖᐱᔥᑰ ᐙᐱᑲᓂᓈᑲᓐ ᑳᐃᔑᐱᑭᔥᑭᐌᐸᐃᑳᑌᒃ, ᐅᑲᐃᔑᐲᓯᐌᐸᐙᐞ᙮

ᑲᔦᔥ ᐙᐸᓂᐗᓇᑯᔕᓐ ᓂᑲᒦᓈ᙮

ᑮᓇᐙ ᑕᔥ ᑳᐅᓅᑕᒫᐎᓂᔦᒃ, ᐱᓯᑕᐎᒃ ᑭᔐᒪᓂᑑ ᐅᑕᒑᑾᓐ ᐃᐃᐌ ᑳᐃᓈᓂᒡ ᐃᐃ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮

ᐃᓂ ᐅᑌᒐᓬᐃᒪᓐ ᐅᑌᐺᑕᒨᒃ ᑳᑕᔑᒫᒪᐎᐊᓇᒥᐋᐙᒡ ᐃᐃᒫ ᓵᕒᑎᔅ, ᐅᐌ ᐅᔑᐲᐊᒪᐤ: ᐅᐅᐌ ᐃᑭᑐ ᐊᐊ ᑳᐊᔮᐙᒡ ᓃᔣᓱ 7 ᑭᔐᒪᓂᑑᓐ ᐅᑕᒑᑯᓂ ᑲᔦ ᐃᐃ ᓃᔣᓱ ᐗᓇᑯᔕᐞ: ᓂᑭᑫᑖᓐ ᐁᔑᒋᑫᔦᒃ᙮ ᐋᓇᐐᓐ ᐁᐱᒫᑎᓯᔦᒃ ᐁᐃᓇᑭᓱᔦᒃ, ᑭᓂᐳᒻ ᐃᑕᔥ᙮

ᑯᔥᑯᓯᒃ, ᒪᔥᑲᐎᓰᑑᒃ ᑫᔮᐱ ᑳᐊᔮᔦᒃ ᑫᑳ ᑳᓂᐴᒪᑲᑭᓐ᙮ ᑳᐐᓐ ᓂᑑᒋᒥᑲᓰᓐ ᒋᑮᔑᑑᔦᒃ ᑳᑮᐃᓀᓂᒥᓀᒃ ᓂᑭᔐᒪᓂᑑᒻ; ᐅᑎᔑᐙᐸᑖᓐ ᐃᑕᔥ ᐁᑮᔑᑖᐙᓯᐌᒃ᙮

ᒫᒥᑲᐎᒃ ᐃᐃᐌ ᑳᑮᐃᔑᒦᓂᑰᔦᒃ ᑲᔦ ᑳᑮᐃᔑᓅᑕᒣᒃ᙮ ᒦ ᐃᐌ ᑭᒋᐎᓇᒧᒃ, ᑲᔦ ᐸᑭᑎᓇᒧᒃ ᐃᐃᐌ ᑳᐃᔑᒪᒋᑑᑕᒣᒃ᙮ ᑮᔥᐱᓐ ᐃᑕᔥ ᐁᑳ ᑯᔥᑯᓯᓯᐌᒃ, ᑖᐱᔥᑰ ᐅᑭᒨᑎᔥᒃ ᑳᐃᔑᑯᔥᑯᐎᔑᐌᒡ ᑕᑶᔑᕽ ᒦ ᐃᐌ ᑫᐃᓀᑖᑯᓯᔮᓐ: ᑳᐐᓐ ᑭᑲᑭᑫᑕᓰᒻ ᐊᐲ ᒪᔮ ᑫᐱᐅᑎᓯᓇᑰᒃ᙮

ᐸᑮ ᐱᑯ ᑭᑕᔑᒻ ᐃᒫ ᓵᕒᑎᓯᕽ ᑳᐊᔮᔦᒃ ᒨᔕᒃ ᐁᐯᑭᑑᔦᒃ ᑭᑭᑭᔥᑭᑲᓂᐙᓐ᙮ ᑮᓇᐙ ᑯ ᑭᑲᐙᐱᔥᑭᑯᓇᔦᒻ ᒋᐐᒋᐱᒧᓭᒥᔦᒃ, ᐋᓃᔥ ᑭᑌᐊᐲᑌᑖᑯᓯᒻ᙮

ᐊᐌᓀᓐ ᐃᑯ ᑫᐸᑭᓈᑫᒡ ᒦ ᐃᐌ ᑫᐃᔑᑯᓇᔦᒡ: ᑕᐙᐱᔥᑳᓂᐗᓐ ᐅᑭᑭᔥᑭᑲᓇᓐ᙮ ᑳᐐᓐ ᑲᔦ ᓂᑲᑳᓯᐊᒪᐙᓰᓐ ᐃᒫ ᒪᓯᓇᐃᑲᓂᕽ ᑳᐅᔑᐲᐃᑳᓱᐙᒡ ᐅᑯ ᑌᐺ ᑳᐱᒫᑎᓯᐙᒡ᙮ ᒦᐗᒃ ᐃᑕᔥ ᐅᑯ ᑫᐙᐐᓇᒀ ᐁᑎᐯᓂᒪᒀ, ᐃᐃᒫ ᐁᓈᓴᒦᓂᒡ ᓂᑌᑌᓐ, ᐃᐃ ᑲᔦ ᑳᐃᔑᐊᔮᓂᒡ ᓂᑌᑌᓐ ᐅᑌᒐᓬᐃᒥᓂ ᓂᑲᐙᐐᓈᒃ᙮

ᐊᐊᐌ ᑕᔥ ᑳᐅᓅᑕᒫᐎᓂᒡ ᒫᓄ ᐅᑲᐱᓯᑕᐙᓐ ᑭᔐᒪᓂᑑᓐ ᐅᑕᒑᑯᓂ ᑳᐃᓈᓂᒡ ᐃᐃ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮

ᑲᔦ ᐃᓂ ᐅᑌᒐᓬᐃᒥᐙᓐ ᐅᑌᐺᑕᒨᒃ ᐃᐃᒫ ᐱᓬᐊᑌᓬᐱᔮᕽ ᑳᑕᔑᒫᐗᒋᐃᑎᐙᒡ, ᐅᐌ ᐃᔑᐲᐊᒪᐤ: ᐅᐅ ᑭᑎᑯᐙ ᐊᐌ ᒥᓯᐌ ᑳᑾᔭᒀᑎᓯᒡ ᑲᔦ ᑳᑌᐺᐎᓂᐎᒡ, ᐊᐊ ᑳᐊᔮᒡ ᐋᐹᐱᑲᐃᑲᓐ ᑌᐱᑦ ᑳᑮᐊᔮᐸᓐ᙮ ᐗᐊ ᑕᔥ ᐃᓂᓂ ᐊᐲ ᐹᑭᓇᕽ ᐃᔥᒀᑌᒻ, ᑳᐐᓐ ᒦᓇᐙ ᐊᐎᔭ ᐅᑲᑲᔥᑭᑑᓰᓐ ᒋᑭᐸᐊᕽ, ᑲᔦ ᐊᐲ ᑭᐸᐊᕽ ᑳᐐᓐ ᒦᓇᐙ ᐊᐎᔭ ᐅᑲᑲᔥᑭᑑᓰᓐ ᒋᐹᑭᓇᕽ᙮

ᐐᓐ ᐃᑭᑐ: ᓂᑭᑫᑖᓐ ᐁᔑᒋᑫᔦᒃ᙮ ᐋᓇᐐᓐ ᐸᑮ ᐁᒪᔥᑲᐎᓰᔦᒃ, ᒥᓅᒡ ᑭᑮᑲᓇᐌᑖᒻ ᑳᑮᐃᑭᑐᔮᓐ᙮ ᑳᐐᓐ ᑲᔦ ᑭᑮᐋᓇᐌᓂᒥᓰᒻ ᒋᐴᓂᐱᒥᓂᔕᐅᔦᒃ᙮ ᓇᔥᑫ ᑭᑮᐹᑭᑌᓇᒪᐎᓂᓂᒻ ᒦᓇᐙ ᐊᐎᔭ ᑫᑭᐸᐊᓯᒃ᙮

ᐃᓇᔥᑫ ᒦ ᐅᐌ ᑫᑑᑕᐗᒀ ᐃᑭᐌᓂᐗᒃ ᑳᐐᒋᐃᐌᐙᒡ ᐃᐃᒫ ᓭᑕᓐ ᐅᒫᐗᒋᐃᐌᐎᓂᕽ᙮ ᒦᐗᑭᑭ ᐅᑮᐗᓂᒨᒃ, ᒎᐗᒃ ᓂᑎᓄᐎᒥᓐ ᑳᐃᑭᑐᐙᒡ, ᑳᐐᓐ ᑌᐺ ᑎᓄᐎᓰᐗᒃ᙮ ᓇᔥᑫ ᓂᑲᐃᔑᐋᒃ ᒋᐱᐅᒋᒌᑾᓇᐱᐙᒡ ᐃᒫ ᐁᔑᓯᑌᑳᐸᐎᔦᒃ᙮ ᐅᑲᑭᑫᑖᓈᐙ ᑕᔥ ᐁᓵᑭᐃᓇᑰᒃ᙮

ᑭᑮᑲᓇᐌᑖᒻ ᑳᑮᐃᓂᓇᑰᒃ ᒋᔕᔒᐯᑕᒣᒃ᙮ ᑲᔦ ᓃᓐ ᑭᑲᑲᓇᐌᓂᒥᓂᓂᒻ ᐊᐲ ᐸᑲᒥᔥᑳᒪᑲᒃ ᑲᑴᒋᐃᐌᐎᓐ, ᐊᒦᑕᔥ ᐅᐅ ᑫᑲᑴᒋᐃᑯᐙᒡ ᐅᒫ ᐊᑮᕽ ᑲᑭᓇ ᑳᐅᑖᐎᓂᐙᒡ᙮

ᐌᔩᑉ ᓂᑲᐲᔖ᙮ ᒥᒋᒥᓇᒧᒃ ᐃᑕᔥ ᐃᐃᐌ ᑳᐊᔮᔦᒃ, ᐁᑳ ᐊᐎᔭ ᒋᒪᑲᒥᓯᓄᐌᒃ ᑭᑎᐸᐊᒫᑰᐎᓂᐙ ᑳᐐᒦᓂᑰᔦᒃ ᐸᑭᓈᑫᔦᒃ᙮

ᐊᐊᐌ ᑕᔥ ᑫᐸᑭᓈᑫᒡ ᓂᑲᐃᔑᐋ ᐯᔑᒃ ᒋᑎᓄᐎᒡ ᐃᓂ ᑳᔑᐸᑕᑭᑌᑭᓐ ᑳᐋᔂᑾᐃᑳᑳᓂᐗᑭᓐ ᐃᐃᒫ ᐅᑭᒋᐊᓇᒥᐁᐎᑲᒥᑯᕽ ᓂᑭᔐᒪᓂᑑᒻ᙮ ᑳᐐᓐ ᒦᓇᐙ ᐐᑳ ᑕᓵᑲᐊᓰ᙮ ᒦᑕᔥ ᐅᐅ ᑫᐃᔑᐲᐗᒃ: ᓂᑲᐅᔑᐲᐊᒧᐙᓐ ᐅᐐᓱᐎᓂᓂ ᓂᑭᔐᒪᓂᑑᒪᓐ, ᐃᐃᐌᔥ ᑲᔦ ᓂᑭᔐᒪᓂᑑᒪᓐ ᐅᑑᑌᓈᒥᓂ ᑳᐃᔑᓂᑳᑌᓂᒃ, ᒦ ᐃᐌ ᐅᔥᑭ ᒉᕒᐆᓴᓬᐊᒻ, ᐃᐃᒫ ᑭᒋᑮᔑᑯᕽ ᑫᐱᐅᒋᓈᔑᔥᑳᓂᒃ, ᐃᐃᒫ ᓂᑭᔐᒪᓂᑑᒥᕽ ᑫᐱᐅᒌᓂᒃ᙮ ᓂᑑᔥᑭᐐᓱᐎᓐ ᑲᔦ ᓂᑲᐅᔑᐲᐊᒧᐙᓐ ᐅᐱᒫᑎᓯᐎᓂᕽ ᐊᐊ ᑫᐸᑭᓈᑫᒡ᙮

ᐊᐊ ᑳᐅᓅᑕᒫᐎᓂᒡ ᒫᓄ ᐅᑲᐱᓯᑕᐙᓐ ᐃᓂ ᑭᔐᒪᓂᑑᓐ ᐅᑕᒑᑯᓂ ᐃᐃ ᑳᐃᓈᓂᒡ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮

ᐃᓂ ᐅᑌᒐᓬᐃᒥᐙᓐ ᐅᑌᐺᑕᒨᒃ ᑳᒫᒪᐎᐊᓇᒥᐋᐙᒡ ᓬᐁᔮᑎᓰᔭ ᐆᑌᓈᕽ, ᐅᐅᐌ ᐃᔑᐲᐊᒪᐤ: ᐅᐅ ᑭᑎᑯᐙ ᐊᐊ ᐁᒣᓐ ᑳᐃᔑᓂᑳᓱᒡ, ᑳᐊᔮᑾᒥᓯᒡ ᑲᔦ ᑳᑌᐺᒡ ᐅᑎᐹᒋᒧ᙮ ᒦ ᐊᐌ ᑳᑮᐅᒋᒫᒋᓯᓂᓂᒃ ᒥᓂᒃ ᑫᑰᓐ ᑭᔐᒪᓂᑑ ᑳᑮᐅᔑᑑᒡ᙮

ᐅᐅᐌ ᐃᑭᑐ: ᓂᑭᑫᑖᓐ ᑳᑮᐱᒥ ᐃᔑᒋᑫᔦᒃ᙮ ᒦᔥ ᐃᐌ ᑭᑎᓀᓂᒥᓂᓂᒻ ᐃᐃ ᒦᒋᒻ ᐁᑳ ᐁᒥᓄᐳᑾᓯᓄᒃ ᐁᑳ ᐁᑌᑭᔑᑌᓯᓄᒃ ᐁᑳᔥ ᑲᔦ ᐁᑌᑕᑳᓯᓄᒃ᙮ ᐊᐯᔥ ᑲᓇᑫ ᐯᔑᒃ ᐅᐅ ᐃᔑᐊᔮᔦᒃ ᑳᑭᔑᑌᒃ ᑫᒫ ᑲᔦ ᑳᑕᑳᒃ ᑫᑰᓐ᙮

ᓂᒫᔑᐱᑖᓐ ᐃᑕᔥ ᐃᐃ ᑳᐃᓀᑖᑯᓯᔦᒃ ᐁᑳ ᐁᑭᔑᑌᓯᓄᒃ ᑭᑎᔑᐊᔮᐎᓂᐙ ᑲᔦ ᐁᑳ ᐗᐐᑫ ᐁᑕᑳᓯᓄᒃ, ᑭᑲᑭᑕᓀᐌᐸᒥᓂᓂᒻ ᐃᑕᔥ᙮

ᐋᓃᔥ ᒦ ᐃᐌ ᐁᑭᑐᔦᒃ: ᓂᐌᓅᑎᓯᒥᓐ, ᓂᑮᐊᓂᒫᐗᒋᒋᑫᒥᓐ, ᑳᐐᓐ ᑲᔦ ᑫᑰᓐ ᓂᓅᑌᓭᓰᒥᓐ᙮ ᑳᐐᓐ ᐃᑕᔥ ᑭᑭᑫᑕᓰᒻ ᐁᔑᐊᔮᔦᒃ, ᐁᑲᒀᑕᑭᐱᒫᑎᓯᔦᒃ ᑲᔦ ᐁᑰᐹᓯᓈᑯᓯᔦᒃ᙮ ᑭᑭᑎᒫᑭᓯᒻ ᐃᑕᔥ, ᑭᐙᓵᑯᓇᐌᒻ ᑲᔦ, ᑳᐐᓐ ᑲᔦ ᑭᐙᐱᓰᒻ᙮

ᐅᐅᐌ ᑕᔥ ᑭᑎᔑᑭᑭᓄᐊᒪᐎᓂᓂᒻ ᑫᔑᒋᑫᔦᒃ: ᓃᓐ ᐊᑖᒥᔑᒃ ᐅᓵᐎ ᔔᓂᔮ ᑳᑮᐯᑳᐱᑳᑭᓱᒡ ᒋᐌᓅᑎᓯᔦᒃ ᐃᑕᔥ᙮ ᑲᔦ ᐊᑖᒥᔑᒃ ᐙᐱᔥᑭ ᑭᑭᔥᑭᑲᓇᓐ ᒋᑭᑭᔥᑭᑫᔦᒃ, ᐋᑾᓇᐗᐱᓱᒃ ᐃᐌ ᑳᐃᔑᐙᓵᑯᓇᐌᔦᒃ ᐁᑳ ᒋᐊᑲᓯᓈᑯᓯᓯᐌᒃ᙮ ᐊᑖᒥᔑᒃ ᑲᔦ ᐴᓯᓂᑲᓐ ᒋᐴᓯᓇᒣᒃ ᑭᔥᑮᔑᑯᐙᓐ ᒋᐙᐸᑕᒫᔦᒃ᙮

ᓃᓐ ᐃᑕᔥ ᒥᓂᒃ ᓴ ᑯ ᑳᓵᑭᐊᒀ ᓂᒫᒦᓄᑭᑭᓄᐊᒪᐙᒃ, ᓂᐸᔕᔐᐙᒃ ᑲᔦ᙮ ᐊᔮᒀᒥᓯᒃ, ᐸᑭᑎᓇᒧᒃ ᐃᑕᔥ ᑳᐃᔑᒪᒋᑑᑕᒣᒃ᙮

ᐃᓇᔥᑫ ᐱᓯᑕᒧᒃ! ᓂᓃᐸᐤ ᐊᑾᒌᕽ ᐃᐃᒫ ᐃᔥᒀᑌᕽ, ᓂᐹᐹᐗᐃᑫ᙮ ᐊᐎᔭ ᑕᔥ ᓅᑕᐎᒡ ᐁᑮᑭᑐᔮᓐ, ᐹᑭᑌᓇᒪᐎᒡ, ᓂᑲᐲᑎᑲᐙ ᑕᔥ, ᓂᑲᐐᒋᐐᓯᓃᒥᒃ, ᑲᔦ ᐐᓐ ᑕᔥ ᓂᑲᐐᒋᐐᓯᓃᒫ᙮

ᐊᐊᐌ ᑫᔖᑰᒋᑣᒡ ᓂᑲᔑᒦᓈ ᒋᐐᑕᐱᒥᒡ ᓂᑭᒋᐊᐱᐎᓂᕽ ᑖᐱᔥᑰ ᓃᓂᑕᒻ ᑳᑮᐃᔑᔖᑰᒋᑣᔮᓐ ᑲᔦ ᓅᑯᒻ ᐁᐐᑕᐱᒪᒃ ᓂᑌᑌ ᐅᑭᒋᐊᐱᐎᓂᕽ᙮

ᐊᐊ ᑳᐅᓅᑕᒫᐎᓂᒡ ᐅᑲᐱᓯᑕᐙᓐ ᑭᔐᒪᓂᑑᓐ ᐅᑕᒑᑯᓂ ᐃᓂ ᑳᐃᓈᓂᒡ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮

ᐃᔥᒀᓭᑭᓐ ᐃᓂ ᑳᑮᐱᐙᐸᑕᒫᓐ, ᒦᑕᔥ ᒦᓇᐙ ᑫᑰᓐ ᓂᐙᐸᑖᓐ᙮ ᐊᔮ ᐃᐌᑎ ᐁᐹᑭᓯᕽ ᐃᔥᒀᑌᒻ ᑭᒋᑮᔑᑯᕽ᙮ ᐃᐌᑎ ᓂᑕᒻ ᑳᑮᓅᑕᐗᒃ ᑭᒋᐴᑖᒋᑲᓂᕽ ᑳᑮᐃᓉᒡ ᑳᑮᑲᓅᔑᒡ, ᒦᓇᐙ ᑮᐃᑭᑐ: ᐲᔖᓐ ᐅᐅᒫ ᐃᔥᐱᒥᕽ, ᒦᔥ ᐃᐌ ᑭᐐᐙᐸᑕᐃᓐ ᐃᓂ ᑫᑰᓇᓐ ᑫᒋᓈᒡ ᐃᑯ ᒋᐊᓂ ᐃᔑᐌᐸᑭᐸᓐ, ᓂᑎᒃ᙮

ᔐᒫᒃ ᐃᑕᔥ ᓂᑮᐐᒋ ᐃᓀᑕᒧᔥᑳᑯᐙᓐ ᑭᔐᒪᓂᑑ ᐅᑕᒑᑾᓐ᙮ ᓂᐙᐸᑖᓐ ᐁᐅᓇᑌᒃ ᑭᒋᑮᔑᑯᕽ ᑭᒋᐊᐱᐎᓐ, ᑲᔦ ᐊᐎᔭ ᓂᐙᐸᒫ ᐁᓇᒪᑕᐱᒡ ᐃᐃᒫ,

ᐁᐙᓰᑴᓱᒡ; ᑖᐱᔥᑰ ᑳᐃᔑᓈᑯᓯᐙᒡ ᐅᑯ ᑎᓄ ᓃᔑᓐ ᐊᓯᓃᒃ ᑳᐊᐲᒋᐅᓂᔑᔑᐙᒡ, ᒑᔅᐸᕒ ᐁᔑᐅᔖᐗᔥᒀᐱᑭᓯᒡ, ᑳᕒᓃᓬᐃᔭᓐ ᑲᔦ ᐁᔑᒥᔅᒀᐱᑭᓯᒡ, ᒦ ᐃ ᐁᔑᓈᑯᓯᒡ ᐁᐙᓰᑴᓱᒡ᙮ ᑮᓯᓶᔮᑉ ᑲᔦ ᐃᐃᒫ ᑮᐊᔮ ᐙᑳᔭᐄ ᑭᒋᐊᐱᐎᓂᕽ, ᑖᐱᔥᑰ ᐁᐃᓈᓴᑯᓀᒃ ᑳᐃᔑᓈᑯᓯᒡ ᐊᐊ ᐁᒪᕒᐊᓬᑦ ᐊᓯᓐ, ᔑᑯᐲᕽ ᐁᔑᔖᑆᑌᓈᑯᓯᒡ᙮

ᐃᒫᔥ ᑳᔑᐊᑌᒃ ᑭᒋᐊᐱᐎᓐ ᑮᐙᑳᑌᐗᓐ ᑭᒋᐊᐱᐎᓇᓐ ᓃᔥᑕᓇᔑᓃᐎᓐ 24 ᐁᑕᓯᑭᓐ᙮ ᓃᔥᑕᓇᔑᓃᐎᓐ ᐃᑕᔥ ᐃᐃᒫ ᐅᓃᑳᓂᓰᒃ ᑮᓇᒪᑕᐱᐗᒃ ᐁᑮᐙᐱᔥᑳᓂᑭᓐ ᐅᑭᑭᔥᑭᑲᓂᐙᓐ ᑲᔦ ᐁᑮᐅᓵᐎ ᔔᓂᔮᐎᐗᓂᓂᑭᓐ ᐃᓂ ᐅᑑᑭᒫᐙᓄᒀᓂᐙᓐ ᑳᑭᑭᔥᑲᒧᐙᒡ ᐅᑎᒀᓂᐙᕽ᙮

ᐃᒫ ᑕᔥ ᑭᒋᐊᐱᐎᓂᕽ ᑮᐅᒋᐙᐙᑌᓭ ᑲᔦ ᑮᐅᒋᒪᑗᐌᑖᑾᓐ ᐃᓂᑖᑯᓯᐎᓐ ᑲᔦ ᐁᐱᓀᓯᐗᕽ ᑳᐃᓂᑖᑾᒃ᙮ ᓃᔣᓱ 7 ᑕᔥ ᐃᒫ ᐙᓴᑯᓀᒋᑲᓇᓐ ᑮᑕᓇᑯᓀᐗᓐ ᐅᒋᔥᑲᐤ ᐃᓇᑫ ᑭᒋᐊᐱᐎᓂᕽ᙮ ᐊᒦᐗᐞ ᐃᓂ ᑳᓃᔣᒋᓂᒡ ᐅᑕᒑᑾᐞ ᑭᔐᒪᓂᑑ᙮

ᑲᔦ ᐁᐃᓈᓴᒪᑌᒃ ᑭᒋᐊᐱᐎᓐ ᒦ ᐃᒫ ᑳᐊᔮᒃ ᓵᑲᐃᑲᓃᕽ ᑳᐃᔑᓈᑾᒃ, ᑖᐱᔥᑰ ᐙᓭᒋᑲᓈᐱᒃ ᐁᑎᓄᐗᕽ, ᑖᐱᔥᑰ ᒥᑾᒦᕽ ᑳᐃᔑᔖᐳᓈᑯᓯᒡ ᒦᔥ ᐁᔑᓈᑾᒃ ᑳᐊᑌᒃ᙮ ᑲᔦ ᒣᑾᔭᐄ ᑲᔦ ᐙᑳᔭᐄ ᑭᒋᐊᐱᐎᓂᕽ ᓃᐎᓐ ᐊᐎᔭᒃ ᐅᐱᒫᑎᓰᒃ ᑮᐊᔮᐗᒃ, ᒥᓯᐌ ᐁᐅᔥᑮᔑᑯᐙᒡ, ᓃᑳᓇᔭᐄ ᑲᔦ ᐅᑖᓈᕽ ᑮᐅᔥᑮᔑᑯᐗᒃ᙮

ᐊᐌ ᑕᔥ ᓂᑕᒻ ᐅᐱᒫᑎᓰ ᑖᐱᔥᑰ ᒥᓯᐱᔑᐤ ᐃᔑᓈᑯᓯ᙮ ᐊᐌ ᑕᔥ ᑯᑕᒃ ᑖᐱᔥᑰ ᓈᐯᐱᔑᑭ᙮ ᔑᑾ ᒦᓇᐙ ᐊ ᑯᑕᒃ ᑮᐃᓇᑌᑴ ᐃᓂᓃᕽ᙮ ᒦᓇᐙᔥ ᐊᐊ ᑯᑕᒃ ᒥᑭᓯ ᐁᐱᒥᓭᒡ ᐃᔑᓈᑯᓯ᙮

ᒦ ᐁᑕᔑᐙᒡ ᐅᐱᒫᑎᓰᒃ ᑳᓃᐎᐙᒡ ᓂᑯᑡᒋᓂᓂᐗᓐ ᐅᓂᑸᑲᓂᐙᓐ᙮ ᒥᓯᐌᔥ ᐅᔥᑮᔑᑯᐗᒃ ᐙᑳᔭᐄ ᑲᔦ ᐲᒐᔭᐄ᙮ ᑳᐐᓐ ᐐᑳ ᐋᑌᓂᑲᒧᓰᐗᒃ, ᐁᑮᔑᑲᓂᓂᒃ ᓂᑲᒧᐗᒃ ᑲᔦ ᐁᑎᐱᑲᓂᓂᒃ, ᐅᐅᐌ ᐁᐃᓇᐊᒧᐙᒡ: ᐗᐐᑫ ᑾᔭᒀᑎᓯ! ᐗᐐᑫ ᑾᔭᒀᑎᓯ! ᐗᐐᑫ ᑾᔭᒀᑎᓯ ᑳᑎᐯᒋᑫᒡ ᑭᔐᒪᓂᑑ ᐗᐐᑫ ᑳᒪᔥᑲᐙᑎᓯᒡ! ᐊᐌᑎ ᑳᑮᐊᔮᒡ, ᐅᒫᔥ ᓅᑯᒻ ᑳᐊᔮᒡ, ᒦᓇᐙᔥ ᒋᐱᐊᔮᒡ! ᐃᓇᐊᒨᒃ᙮

ᐅᑎᐹᒋᒫᐙᓐ ᐁᔑ ᐊᐲᒋ ᐅᓂᔑᔑᐌᒋᑲᓂᐎᓂᒡ, ᑲᔦ ᐅᑭᑕᑭᒫᐙᓐ ᑲᔦ ᐅᓇᓈᑯᒫᐙᓐ ᐃᓂ ᑭᒋᐊᐱᐎᓂᕽ ᑳᓇᒪᑕᐱᓂᒡ ᐊᐸᓀ ᐱᔑᔑᒃ ᑳᐱᒫᑎᓯᓂᒡ᙮

ᐊᐲ ᑾ ᐁᔑᒋᑫᐙᒡ ᐅᐱᒫᑎᓰᒃ, ᑲᔦ ᐐᓇᐙ ᑳᓃᔥᑕᓇᔑᓃᐎᐙᒡ 24 ᐅᓃᑳᓂᓰᒃ ᐅᑑᒋᒌᑾᓇᐲᑕᐙᐙᓐ ᐃᓂ ᑭᒋᐊᐱᐎᓂᕽ ᑳᓇᒪᑕᐱᓂᒡ ᐊᐸᓀ ᐱᔑᔑᒃ ᑳᐱᒫᑎᓯᓂᒡ, ᑲᔦ ᐅᑕᐸᑭᑑᓈᐙᓐ ᐅᑭᒋᐅᑭᒫᐙᓄᒀᓂᐙᓐ ᐃᐃᒫ ᐁᓈᓴᒪᑌᒃ ᐃᐃ ᑭᒋᐊᐱᐎᓐ ᐁᐃᔥᐯᓂᒫᐙᒡ᙮ ᒦ ᐅᐌ ᐁᑭᑐᐙᒡ:

ᑮᓐ ᑳᑎᐯᓂᒥᔮᕽ ᓂᑭᔐᒪᓂᑑᒥᓈᓐ! ᑮᓐ ᑭᑌᐸᑫᑖᑯᔅ ᒋᐐᒋᑳᑌᒃ ᒋᐊᐲᒋ ᐅᓂᔑᔑᐌᒋᑲᓂᐎᔭᓐ, ᑲᔦ ᒋᐊᐲᒋ ᐃᔥᐯᓂᒥᑰᔭᓐ, ᑲᔦ ᒋᐊᐲᒋ ᑭᒋᒪᔥᑲᐌᑖᑯᓯᔭᓐ, ᐋᓃᔥ ᑲᑭᓇ ᑫᑰᓐ ᑭᑮᐅᔑᑑᓐ᙮ ᑮᓐ ᐃᑯ ᐁᑮᐃᓀᑕᒪᓐ ᑮᐅᒋᐊᔮᐗᓐ ᑲᔦ ᑮᐅᔑᒋᑳᑌᐗᓐ, ᐊᒦ ᐃᐌ ᐅᑎᓈᐙᓐ᙮

ᑫᔮᐱ ᐃᒫ ᓂᐙᐸᒫ ᐊᐊᐌ ᑭᒋᐊᐱᐎᓂᕽ ᑳᓇᒪᑕᐱᒡ ᐅᑭᒋᓂᑭᕽ ᐁᐊᑌᓂᒃ ᑎᑎᐲᑭᓂᑲᓂ ᒪᓯᓇᐃᑲᓐ, ᐊᓈᒥᕽ ᑲᔦ ᐗᑭᒐᔭᐄ ᐁᐅᔑᐲᐃᑳᑌᓂᒃ, ᑲᔦ ᐁᑭᐱᔥᑭᐗᓯᑳᑌᒃ ᓃᔣᒋᕽ 7᙮

ᓂᐙᐸᒫ ᑕᔥ ᑲᔦ ᐁᒪᔥᑲᐌᑖᑯᓯᒡ ᐁᒐᓬ ᐁᑭᔒᐌᒡ ᐁᐃᑭᑐᒡ: ᐊᐌᓀᓐ ᑫᑌᐃᓀᑖᑯᓯᒡ ᒋᐸᐹᑾᒋᐱᑑᒡ ᐃᓂ ᑭᐱᔥᑭᐗᓯᑲᓇᓐ? ᐊᐌᓀᔥ ᑫᐹᑮᑭᓇᕽ ᐃᐌ ᒪᓯᓇᐃᑲᓐ?

ᑳᐐᓐ ᐃᑕᔥ ᐊᐎᔭ ᑮᒥᑭᑲᓂᐎᓰ ᑭᒋᑮᔑᑯᕽ ᑲᔦ ᐊᑮᕽ ᑲᔦ ᐊᓈᒪᑲᒥᒃ ᑫᑲᔥᑭᑑᒡ ᒋᐹᑮᑭᓇᕽ ᐃᐌ ᒪᓯᓇᐃᑲᓐ ᑲᔦ ᒋᑲᓇᐙᐸᑕᕽ᙮

ᒦᑕᔥ ᓂᑮᑭᒋᒪᐤ ᐁᑳ ᐁᑮᒥᑲᐙᓯᐎᓐᒡ ᐁᑌᐃᓀᑖᑯᓯᒡ ᒋᐹᑮᑭᓇᕽ ᐃᐃ ᑎᑎᐲᑭᓂᑲᓂᒪᓯᓇᐃᑲᓐ ᑲᔦ ᒋᐙᐸᑕᕽ᙮

ᐯᔑᒃ ᐃᑕᔥ ᐊᐌ ᑳᓃᑳᓀᑖᑯᓯᒡ ᓂᑮᑲᓅᓂᒃ: ᑫᑯ ᒪᐎᑫᓐ᙮ ᐃᓇ ᐊᐌᑎ ᒥᔑᐱᔑᐤ, ᐐᓐ ᐊᐊᐌ ᐃᐃᒫ ᑳᑮᐅᒌᒡ ᐅᐯᔑᑴᐙᓇᑭᓯᐎᓂᕽ ᒎᑕ, ᑲᔦ ᑌᐱᑎᕽ ᐁᑮᐅᑕᑳᓀᓯᒡ, ᐐᓐ ᐁᐋᐎᒡ ᐊᐊ ᑳᔖᑰᒋᑣᒡ, ᐐᓐ ᐅᑲᔥᑭᑑᓐ ᐁᐸᐹᑾᒋᐱᑑᒡ ᑭᐱᔥᑭᐗᓯᑲᓇᓐ ᑲᔦ ᐁᐹᑮᑭᓇᕽ ᐃᐃ ᑎᑎᐲᑭᓂᑲᓂ ᒪᓯᓇᐃᑲᓐ, ᑮᐃᑭᑐ᙮

ᒦᑕᔥ ᐃᐃᒫ ᓂᑮᐙᐸᒫ ᒫᓇᒑᓂᔐᔅ ᐁᓃᐸᐎᒡ ᒣᑴᔭᐄ ᑭᒋᐊᐱᐎᓂᕽ, ᐁᐙᑳᑳᐸᐐᑖᑯᒡ ᐃᐃ ᓃᐎᓐ 4 ᐅᐱᒪᑎᓰᐞ ᑲᔦ ᐃᐃᐌᓂᐗᐞ ᑳᓃᔥᑕᓇᔑᓃᐎᓂᒡ 24 ᐅᓃᑳᓂᓰᐞ᙮ ᐱᓵᓂᑯ ᐁᑮᓂᒋᑲᓂᐎᑯᐸᓀᓐ ᑮᐃᔑᓂᓯᑕᐎᓈᑯᓯ ᐊᐊ ᒫᓇᒑᓂᔐᔅ᙮ ᑮᓃᔣᒋᐗᐞ 7 ᐅᑌᔥᑲᓇᐞ, ᑮᓃᔣᒋᓂᓂᐗᓐ 7 ᑲᔦ ᐅᔥᑮᔑᑰᓐ᙮ ᐅᓄ ᑕᔥ ᑳᓃᔣᒋᓂᓂᑭᓐ ᐅᔥᑮᔑᑰᓐ ᒦ ᐃ ᑳᐃᒋᑳᓱᓂᒡ ᑭᔐᒪᓂᑑ ᑳᓃᔣᒋᓂᒡ 7 ᐅᑕᒑᑾᐞ ᒥᓯᐌ ᐊᑮᕽ ᑳᐃᔑᓂᔕᐅᒥᓐᒡ᙮

ᑮᐃᔖ ᑕᔥ ᐊᐊ ᒫᓇᒑᓂᔐᔅ ᐁᑮᐅᑖᐱᓇᒪᐙᒡ ᐃᐃ ᑎᑎᐲᑭᓂᑲᓐ ᐃᐃᒫ ᐅᑭᒋᓂᑭᓃᕽ ᑳᐊᑌᓂᒃ ᐃᓂ ᑳᓇᒪᑕᐱᓂᒡ ᑭᒋᐊᐱᐎᓂᕽ᙮

ᐊᐲᔥ ᐁᑮᐅᑖᐱᓇᕽ ᐊᐊ ᒫᓇᒑᓂᔐᔅ, ᐅᑮᐅᒋᒌᑾᓃᑖᑰᐞ ᐃᐃ ᓃᐎᓐ 4 ᐅᐱᒫᑎᓰᐞ, ᐃᐃ ᑲᔦ ᓃᔥᑕᓇᔑᓃᐎᓐ 24 ᐅᓃᑳᓂᓰᐞ᙮ ᐅᓃᑳᓂᓰᒃ ᐃᑕᔥ ᐅᑮᐊᔮᐙᐙᐞ ᐯᐯᔑᒃ ᒪᑗᔮᐲᑭᐱᒋᑲᓇᐞ᙮ ᐅᑮᐊᔮᓈᐙᓐ ᐃᑕᔥ ᑲᔦ ᑳᐅᓵᐎ ᔔᓂᔮ ᐙᐱᑲᓂᓂᑭᓐ ᐅᓈᑲᓇᓐ ᐁᔑᒨᔥᑭᓀᓂᒃ ᐃᐃᐌ ᑳᒥᓄᒫᓯᑳᑌᓂᒃ᙮ ᒦ ᐅᐌᓂ ᐅᑕᓇᒥᐋᐎᓂᓂ ᑭᔐᒪᓂᑑ ᐅᐱᒫᑎᓰᒪᐞ᙮

ᑮᓂᑲᒧᐗᒃ ᐃᑕᔥ ᐅᔥᑭᓂᑲᒧᓐ ᐅᐅᐌ ᐁᐃᓇᐊᒧᐙᒡ: ᑮᓐ ᑭᑌᐊᐲᑌᑖᑯᔅ ᒋᐅᑖᐱᓇᒪᓐ ᐃᐃ ᑎᑎᐲᑭᓂᑲᓐ, ᑲᔦ ᒋᐸᐹᑾᒋᐱᑑᔭᓐ ᐃᓂ ᑭᐱᔥᑭᐗᓯᑲᓇᓐ᙮ ᐋᓃᔥ ᑭᑮᓂᓯᑰ, ᑭᒥᔅᑸᒻ ᐃᑕᔥ ᑭᑮᑎᐸᐃᑫᑕᒪᐙᒃ, ᐃᐃᒫ ᒥᓯᐌ ᑳᐅᒌᐙᒡ, ᑭᔐᒪᓂᑑᓐ ᒋᑎᐯᓂᒥᑯᐙᒡ᙮ ᑲᑭᓇ ᐯᐸᑳᓐ ᑕᓶᐙᓇᑭᓯᐎᓂᕽ ᐅᒌᐗᒃ, ᑲᑭᓇ ᑲᔦ ᐯᐸᑳᓂᑮᔗᐎᓂᕽ, ᑲᑭᓇ ᑲᔦ ᐁᔑᐙᐐᑌᑭᓐ ᐅᒌᐎᓂᕽ, ᑲᑭᓇ ᑲᔦ ᐯᐸᑳᓉᐙᓇᑭᓈᑯᓯᐎᓂᕽ᙮

ᒦᐗᒃ ᐃᑕᔥ ᐃᑭ ᑳᑮᐃᔑᐊᑣ ᒋᑎᓄᐎᐙᒡ ᑫᑎᐯᓂᒥᐌᐙᒡ ᒋᑕᔑᐊᓇᒥᐁᐎᑭᒫᐎᐙᒡ ᒋᐊᓄᑮᑕᐙᐙᒡ ᑭᑭᔐᒪᓂᑑᒥᓈᓇᓐ᙮ ᑲᔦ ᑕᔥ ᐅᒫ ᐗᑭᑕᑲᒥᒃ ᑕᑎᐯᒋᑫᐗᒃ, ᑮᐃᓇᐊᒨᒃ᙮

ᒦᓇᐙᔥ ᓂᑮᐃᓈᑉ, ᓂᑮᓅᑕᐙᒃ ᐃᑕᔥ ᐁᒐᓬᐊᒃ ᐁᐅᓵᒬᐎᑕᒧᐙᒡ, ᒫᐗᒡ ᐁᐹᑏᓄᐙᒡ, ᑳᐐᓐ ᐐᑳ ᑖᑌᐸᑭᒫᓰᐗᒃ ᐁᑕᔑᐙᒡ᙮ ᒦᔥ ᐃᐃᒫ ᑮᐙᑳᑳᐸᐎᐗᒃ ᐅᑯ ᑳᐅᓵᒦᓄᐙᒡ ᐁᒐᓬᐊᒃ ᐃᐃᒫ ᑭᒋᐊᐱᐎᓂᕽ ᑳᐊᑌᒃ ᑲᔦ ᐃᑭ ᓃᐎᓐ ᐅᐱᒫᑎᓰᒃ ᑲᔦ ᐃᑭ ᓃᔥᑕᓇᔑᓃᐎᓐ 24 ᐅᓃᑳᓂᓰᒃ ᑳᐃᔑᐊᔮᐙᒡ᙮

ᑮᑭᒋ ᐃᓉᐗᒃ ᐁᒐᓬᐊᒃ ᐁᐃᑭᑐᐙᒡ: ᐐᑫ ᒥᓯᐌ ᑌᐸᑫᑖᑯᓯ ᐊᐊ ᒫᓇᒑᓂᔐᔅ ᑳᑮᓂᓯᓐᒡ: ᑕᒦᓈ ᐌᓅᑎᓯᐎᓐ, ᑲᑮᑖᐌᑖᑯᓯᐎᓐ, ᒪᔥᑲᐌᑖᑯᓯᐎᓐ ᑲᔦ᙮ ᑕᑭᒋ ᐃᓀᓂᒫ, ᑕᐊᐲᒋᐅᓂᔑᔑᐌᒋᑲᓂᐎ, ᑲᔦ ᑕᓇᓈᑯᒫ᙮

ᑲᔦ ᑲᑭᓇ ᐊᐎᔭ ᑳᑮᐅᔑᐃᓐᒡ ᐃᒫ ᑭᒋᑮᔑᑯᕽ, ᐃᒫᔥ ᑲᔦ ᐊᑮᕽ, ᑲᔦ ᐊᓈᒪᑲᒥᒃ ᑲᔦ ᑭᒋᑲᒦᕽ ᑳᐊᔮᐙᒡ, ᑲᔦ ᑲᑭᓇ ᑫᑰᓐ ᒥᓯᐌᑲᒥᒃ ᑳᐱᒫᑕᑭᓐ, ᑲᑭᓇ ᓂᑮᓅᑕᐙᒃ ᐁᓂᑲᒧᐙᒡ: ᐊᐊᐌ ᑳᓇᒪᑕᐱᒡ ᐅᑭᒋᐊᐱᐎᓂᕽ ᐊᐊ ᑲᔦ ᒫᓇᒑᓂᔐᔅ ᑕᓇᓈᑯᒫᐗᒃ ᑲᔦ ᑕᑭᑕᑭᒫᐗᒃ, ᑲᔦ ᑕᐊᐲᒋᐅᓂᔑᔑᐌᒋᑲᓂᐎᐗᒃ, ᑕᐃᓇᑭᒫᐗᒃ ᒥᓯᐌ ᐁᒪᔥᑲᐌᑖᑯᓯᐙᒡ, ᒨᔕᒃ ᐃᑯ ᐊᐸᓀ ᐱᔑᔑᒃ, ᑮᐃᓇᐊᒨᒃ᙮

ᐃᑭᐌᓂᐗᒃ ᐃᑕᔥ ᓃᐎᓐ 4 ᐅᐱᒫᑎᓰᒃ ᑲᔦ ᐐᓇᐙ ᑮᐃᑭᑐᐗᒃ: ᐁᒣᓐ᙮ ᐃᑭ ᑲᔦ ᐅᓃᑳᓂᓰᒃ ᑮᐃᔑᐅᒋᒌᑾᓂᐸᓂᐅᐗᒃ ᐁᑭᒋ ᐃᓀᓂᒫᐙᒡ᙮

ᒦᑕᔥ ᐃᐃ ᐊᐲ ᓂᑮᐙᐸᒫ ᐊᐌ ᒫᓇᒑᓂᔐᔅ ᐯᔑᒃ ᐁᐸᑾᒋᐱᑑᒡ ᐃᐃ ᑭᐱᔥᑭᐗᓯᑲᓐ᙮ ᓂᑮᓅᑕᐙ ᑕᔥ ᐁᑲᑭᑐᒡ ᐯᔑᒃ ᐃᑭ ᑳᓃᐎᐙᒡ ᐅᐱᒫᑎᓰᒃ᙮ ᑖᐱᔥᑰ ᑭᒋᐱᓀᓯᐗᕽ ᑮᐃᓉ: ᐲᔖᓐ! ᐁᐃᑭᑐᒡ᙮

ᓂᑮᐃᓈᑉ ᐃᑕᔥ, ᐁᐙᐸᒪᒃ ᐁᐙᐱᔥᑭᓯᒡ ᒥᑕᑎᒻ, ᐁᐱᑌᓴᐱᒡ ᐊᐎᔭ ᒥᑎᒀᐲᓐ ᐁᑕᑯᓈᒡ᙮ ᑮᒦᓈ ᑕᔥ ᐃᐃ ᔖᑰᒋᐃᐌᐎ ᐋᓄᒀᓐ᙮ ᒦᑕᔥ ᐱᓵᓂᑯ ᑳᓂᑖᔖᑰᒋᐃᐌᒡ ᑮᐃᔑᓈᑯᓯ, ᐁᑮᐊᓂ ᐃᔑᑌᓴᐱᒡ ᑫᔮᐱ ᐁᐐᐊᓂᔖᑰᒋᑣᒡ᙮

ᒦᓇᐙ ᑕᔥ ᑯᑕᒃ ᑭᐱᔥᑭᐗᓯᑲᓐ ᐅᑮᐸᑾᒋᐱᑑᓐ ᐊᐊ ᒫᓇᒑᓂᔐᔅ᙮ ᒦᓇᐙ ᐯᔑᒃ ᓂᑮᓅᑕᐙ ᐅᐱᒫᑎᓯ, ᐲᔖᓐ! ᐁᐃᑭᑐᒡ᙮

ᒦᑕᔥ ᒦᓇᐙ ᐯᔑᒃ ᑮᐱᐅᒋᓵᑫᐌᔥᑳ ᒥᑕᑎᒻ ᐁᒥᔅᑯᓯᒡ᙮ ᐊᐊᐌ ᑳᑌᓴᐱᒡ ᑮᒦᓈ ᒋᒫᒌᑑᒡ ᒋᒪᒋᒦᑳᑎᓈᓂᐗᓂᓂᒃ ᐃᐃᒫ ᐊᑮᕽ, ᒦ ᐃ ᒋᓂᓯᑎᓈᓂᐗᕽ᙮ ᔑᑾ ᑮᒦᓈ ᐃ ᑳᒥᒑᐱᑲᓂᓂᒃ ᑭᒋᒨᑯᒫᓐ᙮

ᒦᓇᐙ ᑕᔥ ᑯᑕᒃ ᐅᑮᐸᑾᒋᐱᑑᓐ ᑭᐱᔥᑭᐗᓯᑲᓐ ᐊᐊ ᒫᓇᒑᓂᔐᔅ, ᒦ ᐃᐌ ᓂᓯᕽ 3᙮ ᒦᓇᐙᔥ ᐯᔑᒃ ᓂᑮᓅᑕᐙ ᐅᐱᒫᑎᓯ, ᐲᔖᓐ! ᐁᐃᑭᑐᒡ᙮ ᓂᑮᐃᓈᑉ ᐃᑕᔥ, ᐃᓇ ᐊᐌᑎ ᑳᒪᑲᑌᐎᓯᒡ ᒥᑕᑎᒻ᙮ ᐊᐊᐌ ᑕᔥ ᑳᑌᓴᐱᒡ ᐅᑕᑯᓈᓐ ᑎᐹᐱᔥᑰᒋᑲᓐ᙮

ᓂᑮᓅᑖᓐ ᐃᑕᔥ ᑖᐱᔥᑰ ᐃᓂᑖᑯᓯᐎᓐ ᐁᐃᓉᒪᑲᒃ᙮ ᒣᑴᔭᐄ ᐃᒫ ᑮᑕᓂᑖᑾᓐ ᐃᑭ ᓃᐎᓐ 4 ᐅᐱᒫᑎᓰᒃ ᑳᐊᔮᐙᒡ, ᒦ ᐅᐌ ᐁᐃᓉᒪᑲᒃ: ᐯᔑᑯᑮᔑᒃ ᐁᑲᔥᑭᐋᒡ ᐊᐎᔭ ᔔᓂᔮᓐ, ᐯᔑᑯᒀᐸᐃᑲᓐ ᐁᑕ ᑕᐊᑖᐌ ᐸᑴᔑᑲᓂᑭᑎᑳᓀᓴᓐ ᒋᒦᒋᒡ, ᔑᑾ ᓂᓱ 3 ᒀᐸᐃᑲᓐ ᐸᕒᓬᐄ ᒪᓅᒥᓐ ᐁᑕ ᑕᐊᑖᐌ ᐯᔑᑯᑮᔑᒃ ᐁᑲᔥᑭᐋᒡ ᔔᓂᔮᓐ᙮ ᑫᑯ ᑕᔥ ᐐᓐ ᓂᔑᐗᓈᒋᐋᑫᓐ ᐋᓬᐃᑉ ᑳᑎᓄᐎᐙᒡ ᑭᑎᑳᓈᑎᑰᒃ, ᑲᔦ ᐃᓂ ᔔᒥᓂᑭᑎᑫᐎᓇᓐ ᑳᐐᓐ ᑕᓂᔑᐗᓈᑕᓯᓅᓇᓐ, ᑮᐃᓉᒪᑲᓐ᙮

ᒦᑕᔥ ᒦᓇᐙ ᑯᑕᒃ ᐅᑮᐸᑾᒋᐱᑑᓐ ᐊᐊ ᒫᓇᒑᓂᔐᔅ ᑭᐱᔥᑭᐗᓯᑲᓐ, ᒦ ᐃ ᓃᐎᕽ᙮ ᒦᓇᐙ ᑕᔥ ᓂᑮᓅᑕᐙ ᐊᐊ ᐁᑯᓃᐎᒡ 4 ᐅᐱᒫᑎᓯ, ᐲᔖᓐ! ᐁᐃᑭᑐᒡ᙮

ᓂᑮᐃᓈᑉ ᐃᑕᔥ, ᐃᓇ ᐊᐌᑎ ᐁᐙᐸᒪᒃ ᐁᐙᐱᓇᐎᓈᑯᓯᒡ ᒥᑕᑎᒻ᙮ ᓂᐳᐎᓐ ᑮᐃᔑᓂᑳᓱ ᐊᐊ ᑳᑌᓴᐱᒡ᙮ ᐃᓂ ᑕᔥ ᐁᑏᔅ ᑳᐃᔑᐐᓱᓂᒡ ᐅᑖᓈᕽ ᐅᐱᐐᒌᐎᑰᓐ ᐁᐱᒥᑌᓴᐱᓂᒡ᙮ ᐅᑯ ᑕᔥ ᓃᔑᓐ ᑮᒦᓈᐗᒃ ᒋᑕᔑᓂᓵᐙᒡ ᐃᐃᐌᓂᐗᐞ ᐯᔑᒃ ᑳᑕᓱᓃᐎᓂᒡ (1/4) ᐊᐎᔭᐞ ᐃᒫ ᐊᑮᕽ ᑳᐊᔮᓂᒡ᙮ ᐅᑲᐋᐸᒋᑑᓈᐙ ᒦᑳᑎᐎᓐ, ᒪᑕᐐᐎᓐ, ᐅᒑᓂᒫᐱᓀᐎᓐ, ᑲᔦ ᑳᒪᒑᑎᓯᓂᒡ ᐊᔭᐋᐎᔕᐞ᙮

ᒦᑕᔥ ᒦᓇᐙ ᑯᑕᒃ ᑭᐱᔥᑭᐗᓯᑲᓐ ᐅᑮᐸᑾᒋᐱᑑᓐ ᐊᐊ ᒫᓇᒑᓂᔐᔅ, ᐊᒦ ᐃᐌ ᐋᔕ ᓈᓇᓐ᙮ ᔑᑾ ᓂᑮᐙᐸᒫᒃ ᐊᒑᑾᒃ ᔒᐹᔭᐄ ᐸᑭᑎᓈᓱᐎᓈᐱᑯᕽ ᐁᐊᔮᐙᒡ᙮ ᒦᐗᐃᐃ ᐅᑕᒑᑯᐙᐞ ᑳᑮᐅᒋᓂᓯᑣ ᐅᑎᑭᑐᐎᓂᓂ ᑭᔐᒪᓂᑑᓐ ᑲᔦ ᐅᑎᐹᒋᒧᐎᓂᐙ ᓀᐱᒡ ᐃᑯ ᑳᑮᐐᑕᒫᑫᐙᒡ᙮

ᑮᑭᒋ ᐃᓂᑖᑯᓯᐗᒃ ᐃᑕᔥ ᐅᐅᐌ: ᑮᓐ ᑌᐯᒋᑫᔭᓐ, ᑮᓐ ᒫᐗᒡ ᑳᒪᔥᑲᐌᑖᑯᓯᔭᓐ, ᒥᓯᐌ ᑳᑾᔭᒀᑎᓯᔭᓐ ᑲᔦ ᐁᑾᔭᑴᑖᑯᓯᔭᓐ! ᐋᓃᓐ ᒥᓂᒃ ᑫᓂ ᐃᔑᓭᒃ ᐊᐲ ᑫᑎᐹᑯᓇᑣ ᐃᑭ ᐊᑮᕽ ᑳᑮᓂᔑᔭᒥᑣ?

ᑲᑭᓇ ᑕᔥ ᐯᐯᔑᒃ ᑮᒦᓈᐗᒃ ᐙᐱᔥᑭ ᑭᑭᔥᑭᑲᓇᓐ ᒋᑭᓍᐲᑲᐊᔐᐙᒡ᙮ ᑮᐃᓈᐗᒃ ᐃᑕᔥ ᓇᑲᐌ ᐊᒋᓇ ᑫᔮᐱ ᒋᐊᓉᐱᐙᒡ, ᐲᓂᔥ ᐃᑕᔥ ᒋᐊᓂᑎᐱᓭᓂᒡ ᑳᑕᔑᓂᒡ ᐅᐐᒋᐊᓄᑮᒫᑲᓂᐙᐞ ᑲᔦ ᐅᐐᒋᐅᑌᐺᑕᒨᒥᐙᐞ ᑫᓂᓂᓯᒥᓐᒡ, ᐐᓇᐙ ᑯ ᑳᑮᐃᔑᓂᓯᑣ ᑲᔦ ᐃᓂᐌᓂᐗᐞ ᒋᓂᓯᒥᓐᒡ, ᒦ ᐃᐌ ᒋᑮᔕᑭᒋᑳᓱᐙᒡ ᐃᑭ ᑫᓂᓯᑣ᙮

ᒦᓇᐙ ᓂᑮᐙᐸᒫ ᑯᑕᒃ ᑭᐱᔥᑭᐗᓯᑲᓐ ᐁᑮᐸᑾᒋᐱᑑᒡ ᐊᐊ ᒫᓇᒑᓂᔐᔅ, ᒦ ᐋᔕ ᓂᑯᑣᓱ᙮ ᒦᔥ ᐃᐃ ᑮᑭᒋᓂᓂᑭᓭ ᐊᑭ᙮ ᑮᓯᔅ ᐃᑕᔥ ᑖᐱᔥᑰ ᐁᒪᑲᑌᐙᒃ ᐊᓴᐲᐌᑭᓉᐗᔥ ᑮᐃᔑᒪᑲᑌᐎᓯ᙮ ᔑᑾ ᒥᓯᐌ ᑮᒥᔅᑯᓈᑯᓯ ᑎᐱᑭᑮᓯᔅ ᑖᐱᔥᑰ ᒥᔅᑸᕽ᙮

ᐗᓇᑯᔕᒃ ᐃᑕᔥ ᑮᐅᒋᐸᑭᔑᓅᒃ ᑮᔑᑯᕽ, ᑖᐱᔥᑰ ᐁᑭᒋᐸᑭᔑᓄᐙᒡ ᐁᑳ ᐁᐊᑎᓱᓯᒀ ᐱᒃ ᑳᑎᓄᐎᐙᒡ ᑭᒋᔔᒥᓇᒃ ᐁᐗᐙᑲᐙᒀᔑᒡ ᐊᐊ ᑭᑎᑳᓈᑎᒃ᙮

ᑮᔑᒃ ᐃᑕᔥ ᑮᒫᒑᒪᑲᓐ ᑖᐱᔥᑰ ᐃ ᑎᑎᐯᔩᑭᓂᑲᓐ ᐁᐊᓂᑎᑎᐯᔩᑭᓂᑳᑌᒃ, ᐲᓂᔥ ᐁᑮᓈᑾᓯᓄᒃ᙮ ᐊᒦᔥ ᐃᓂ ᑲᑭᓇ ᐗᒋᐗᓐ ᑲᔦ ᒥᓂᓴᓐ ᑮᐋᒋᐊᔮᐗᓐ ᐃᐃᒫ ᑳᑮᐊᔮᑭᓐ᙮

ᒦ ᐊᐲ ᑭᒋᐅᑭᒫᒃ ᐊᑮᕽ, ᐃᑭᐌᓂᐗᒃ ᑲᔦ ᑳᐅᑭᒫᐌᑖᑯᓯᐙᒡ ᑲᔦ ᑭᒋᔑᒫᑲᓂᔒᐎᑭᒫᒃ ᑲᔦ ᑳᐌᓅᑎᓯᐙᒡ ᑲᔦ ᑳᒪᔥᑲᐌᑖᑯᓯᐙᒡ ᑲᔦ ᑲᑭᓇ ᑯᑕᒃ ᐯᒫᑎᓯᐙᒡ, ᑫᒫ ᑎᐯᓂᒫᑲᓇᒃ ᑫᒫ ᑲᔦ ᑳᑎᐯᓂᑎᓱᐙᒡ, ᑲᑭᓇ ᑮᑳᓱᐗᒃ, ᐃᒫ ᑳᐃᔑᐙᐐᐸᑲᒥᑳᒃ ᑲᔦ ᐊᓈᒪᓯᓐ ᑳᐃᔑᐸᐲᑾᑎᓈᒃ ᑮᐃᔑᑳᓱᐗᒃ᙮

ᐅᔖᑯᐙᑖᓈᐙᓐ ᐃᑕᔥ ᐃᓂ ᐗᒋᐗᓐ ᑲᔦ ᐊᓯᓃᐞ: ᐋᑲᐎᔥᑲᐎᔑᓈᒻ, ᑳᔑᔑᓈᒻ ᐁᑳ ᒋᐙᐸᒥᓯᔭᒥᓐᒡ ᐊᐊᐌ ᑭᒋᐅᑭᒫᐗᐱᐎᓂᕽ ᑳᓇᒪᑕᐱᒡ, ᐁᑳ ᑲᔦ ᒋᐸᑕᑯᔥᑳᑯᓯᐗᕽ ᐅᓂᔥᑳᑎᓯᐎᓐ ᐊᐊᐌ ᒫᓇᒑᓂᔐᔅ᙮

ᐋᔕ ᐅᒋᒋᓭᓂ ᐃᐌ ᐁᑮᔑᑲᓂᓂᒃ ᑳᐐᑯᑖᓀᑖᑾᒃ, ᐁᐐᓈᑾᓂᓂᒃ ᐅᓂᔥᑳᑎᓯᐎᓂᐙ᙮ ᑳᐐᓐ ᐊᐎᔭ ᐅᑲᑲᔥᑭᑑᓰᓐ ᐃᐃᒫ ᒋᔖᐾᐸᓐ᙮

ᑳᐃᔥᒀᓭᑭᓐ ᐅᓄ, ᓂᑮᐙᐸᒫᒃ ᓃᐎᓐ 4 ᐁᒐᓬᐊᒃ ᓃᐗᔭᒃ 4 ᐁᑯ ᑮᑭᑲᒥᑳᓂᒃ ᐁᓃᐸᐎᐙᒡ᙮ ᐯᐯᔑᒃ ᐅᑮᑭᒋᐎᓈᓈᐙ ᐃᐃᐌ ᐁᐅᑖᓂᒪᓂᓂᒃ, ᐁᑳ ᒋᓅᑎᓯᓄᒃ ᐊᑮᕽ ᑲᔦ ᑭᒋᑲᒦᕽ, ᐁᑳ ᑲᔦ ᒋᐸᑲᒥᓅᐌᓯᓄᒃ ᐃᒫ ᒥᑎᑯᕽ᙮

ᒦᓇᐙ ᑯᑕᒃ ᐯᔑᒃ ᓂᑮᐙᐸᒫ ᐁᒐᓬ ᐁᐱᐅᐱᔥᑳᒡ ᐙᐸᓄᕽ ᐁᐱᑭᑭᓯᒡ ᐃᐃ ᑫᐃᔑᑭᑭᓇᐙᒋᐋᒡ ᐃᐃᐌᓂᐗᐞ ᑳᐱᒫᑎᓯᓂᒡ ᑭᔐᒪᓂᑑᓐ ᑳᑎᐯᓂᒫᓂᒡ᙮ ᑮᑭᒋᓅᑖᑯᓯ ᐗᐊ ᐁᒐᓬ ᐁᔖᑯᐙᓈᒡ ᓃᐎᓐ 4 ᑯᑕᒃ ᐁᒐᓬᐊᐞ ᑳᑮᒦᓂᑣ ᑳᐐᒫᔑᑑᑕᒧᐙᒡ ᐃᐃ ᐊᑭ ᑲᔦ ᑭᒋᑲᒻ᙮

ᐊᒦ ᐅᐌ ᑳᐃᓈᒡ: ᑫᑯ ᑫᑰᓐ ᑑᑕᑫᒃ ᐃᐃ ᐊᑭ ᑲᔦ ᑭᒋᑲᒻ ᑲᔦ ᐃᑭ ᒥᑎᑰᒃ, ᐹᓂᒫ ᐁᑕ ᑭᑭᔐᒪᓂᑑᒥᓈᓐ ᐅᑕᓄᑮᐋᑲᓇᐞ ᑮᑭᑭᓇᐙᒋᐲᐗᑭᑣ ᐅᔅᑲᑎᑯᓃᕽ, ᒋᑭᑫᑖᑯᓯᐙᒡ ᐁᑎᓄᐎᐙᒡ᙮

ᓂᑮᓅᑖᓐ ᐃᑕᔥ ᐁᑕᔑᐙᒡ ᐃᑭ ᑳᑮᐃᔑᑭᑭᓇᐙᒋᐲᐅᑣ ᐅᔅᑲᑎᑯᐙᕽ: ᓂᑯᑣᒃ ᓃᒥᑕᓇᔑᓃᐎᕽ ᒥᑖᔂᒃ 144,000 ᒦ ᐃᐌ ᑳᑕᔑᐙᒡ ᑳᑮ ᑭᑭᓇᐙᒋᐲᐅᑣ, ᐃᐃᒫ ᐁᑮᐅᒌᐙᒡ ᒥᑖᔑᓃᔑᓐ 12 ᑳᑕᓶᐙᓇᑭᓯᐙᒡ ᐃᔅᕒᐃᔭᓬᐊᒃ ᙮

ᒥᑖᔑᓃᔑᕽ ᒥᑖᔂᒃ 12,000 ᑮᑕᔑᐗᒃ ᑳᑮ ᑭᑭᓇᐙᒋᐲᐅᑣ ᐃᒫ ᑳᑮᐅᒌᐙᒡ ᐁᑕᓱ ᐯᐯᔑᑴᐙᓇᑭᓯᐙᒡ᙮ ᒦᐗᓄᓄ ᐅᐐᓱᐎᓂᐙᓐ ᑳᐅᑕᑳᓀᓯᐙᒡ: ᒎᑕ, ᐅᕒᐆᐸᓐ, ᑫᑦ, ᐋᔕᕒ, ᓈᐱᑕᓬᐋᐃ, ᒪᓈᓴ, ᓯᒥᔭᓐ, ᓬᐄᐹᐃ, ᐃᓴᑳᕒ, ᓭᐱᔪᓬᐊᓐ, ᒎᓴᑉ, ᐯᒋᒪᓐ ᙮

ᒦᓇᐙ ᑕᔥ ᑳᐊᓂ ᐃᔑᓭᒃ, ᓂᑮᐃᓈᑉ, ᐃᓇᔥᑫ ᓂᑮᐙᐸᒫᒃ ᐁᐅᓵᒦᓄᐙᒡ ᐁᑳ ᐊᐎᔭ ᒋᑮᑮᔕᑭᒫᓯᒃ᙮ ᐃᐃᒫ ᑮᐅᒌᐗᒃ ᑲᑭᓇ ᑳᑕᓱᐯᐸᑳᓐ ᐃᔑᓈᑯᓯᐙᒡ ᑲᔦ ᑲᑭᓇ ᐯᐸᑳᓄᕽ ᑳᐅᑕᑳᓀᓯᐙᒡ ᑲᔦ ᑲᑭᓇ ᐁᔑᐙᐐᑌᑭᓐ ᑳᐅᒌᐙᒡ, ᑲᔦ ᐁᑕᓱᐯᐸᑳᓂᑮᔗᐙᒡ᙮ ᒦ ᐃᒫ ᑮᐃᓈᓴᒥᑳᐸᐎᐗᒃ ᑭᒋᐊᐱᐎᓂᕽ, ᐃᐃᒫ ᑲᔦ ᐁᔑᐊᔮᓂᒡ ᐃᓂ ᒫᓇᒑᓂᔐᓴᓐ᙮ ᐙᐱᔥᑮᑭᓄᕽ ᑮᑲᑳᓍᐲᑲᐊᔐᐗᒃ ᑲᔦ ᐅᑮᑕᑯᓈᓈᐙᓐ ᐗᑎᑾᓇᓐ ᐁᐊᓃᐲᔑᐗᓂᓂᑭᓐ ᐹᒻ ᐁᑎᓄᐙᑎᑯᐗᑭᓐ᙮

ᑮᑭᒋᔖᑯᐌᐗᒃ ᐃᑕᔥ: ᐱᒫᒋᐃᐌᐎᓐ ᐅᒌᒪᑲᓐ ᑭᑭᔐᒪᓂᑑᒥᓈᕽ, ᐊᐊᐌ ᑳᓇᒪᑕᐱᒡ ᑭᒋᐊᐱᐎᓂᕽ, ᐊᐊᐌ ᑲᔦ ᒫᓇᒑᓂᔐᔅ! ᐃᑭᑐᐗᒃ᙮

ᑲᑭᓇ ᑕᔥ ᐃᑭ ᐁᒐᓬᐊᒃ ᐅᑮᐙᑳᑳᐸᐐᑖᓈᐙ ᐃᐃ ᑭᒋᐊᐱᐎᓐ, ᑲᔦ ᐙᑳᔭᐄ ᐃᒫ ᐁᑮᐊᔮᓂᒡ ᐃᐃ ᑳᓃᑳᓀᑖᑯᓯᓂᒡ ᑲᔦ ᐅᐱᒫᑎᓰᐞ ᐁᓃᐎᓂᒡ᙮ ᑮᐊᓂᒥᑯᐸᓂᐅᐗᒃ ᐃᑭ ᐁᒐᓬᐊᒃ ᐁᑮᐅᒋᒌᑾᓇᐱᐸᓂᐅᐙᒡ ᐅᒋᔥᑲᐗᔭᐄ ᐃᒫ ᑭᒋᐊᐱᐎᓂᕽ ᐁᑭᒋ ᐃᓀᓂᒫᐙᒡ ᑭᔐᒪᓂᑑᓐ,

ᐁᑮᐃᑭᑐᐙᒡ ᐃᑕᔥ: ᐁᒣᓐ! ᑕᓇᓈᑯᒫ ᑭᔐᒪᓂᑑ, ᑕᐊᐲᒋᐅᓂᔑᔑᐌᒋᑲᓂᐎ, ᑕᐊᐲᒋᑲᑮᑖᐌᒋᑲᓂᐎ, ᑕᒦᑴᒋᐌᑖᑯᓯ! ᑕᑭᑕᑭᒫ ᑭᔐᒪᓂᑑ! ᑲᔥᑭᐁᐎᓯᐎᓐ, ᒪᔥᑲᐌᑖᑯᓯᐎᓐ ᑕᐃᓇᑭᒫ ᑭᑭᔐᒪᓂᑑᒥᓈᓐ ᒨᔕᒃ ᐊᐸᓐ ᐃᑯ ᐱᔑᔑᒃ! ᐁᒣᓐ! ᑮᐃᑭᑐᐗᒃ᙮

ᐯᔑᒃ ᐃᑕᔥ ᐊᐊ ᑳᓃᑳᓂᓯᒡ ᓂᑮᑲᑴᒋᒥᒃ ᐁᐃᔑᒡ: ᐅᑯ ᑳᐙᐱᔥᑭ ᑲᑳᓍᐲᑲᐊᔐᐙᒡ, ᐊᐌᓀᓇᒃ ᐅᑯ? ᐋᓃᑎ ᑕᔥ ᐌᒌᐙᒡ? ᓂᑮᐃᒃ᙮

ᒦᔥ ᐃᐃ ᐁᓇᒃ: ᓂᑑᑭᒫᒻ, ᑮᓐ ᑭᑭᑫᓂᒫᒃ᙮ ᒦᓇᐙᔥ ᓂᑮᐃᒃ: ᒦᐗᒃ ᐃᑭᐌᓂᐗᒃ ᑭᒋᐅᒑᓂᒥᓯᐎᓂᕽ ᐌᒋᔖᐾᐙᒡ᙮ ᐅᑮᑭᓰᓯᐸᑑᓈᐙᓐ ᐅᑭᑭᔥᑭᑲᓂᐙᓐ, ᐅᑮᐅᒋᐙᐱᔥᑳᐹᐗᑑᓈᐙᓐ ᐃᐃᒫ ᐅᒥᔅᑸᒥᓃᕽ ᐃᓂ ᒫᓇᒑᓂᔐᓴᓐ᙮

ᒦᔥ ᐃᐃᐌ ᑫᐅᒋᐊᔮᐙᒡ ᐃᐃᒫ ᐅᒋᔥᑲᐗᔭᐄ ᐅᑭᒋᐊᐱᐎᓂᓃᕽ ᑭᔐᒪᓂᑑᓐ᙮ ᐅᑲᐊᓄᑮᑕᐙᐙᓐ ᐃᑕᔥ ᐁᑮᔑᑲᓂᓂᒃ ᑲᔦ ᐁᑎᐱᑲᓂᓂᒃ ᐅᑭᒋᐊᓇᒥᐁᐎᑲᒥᑯᓃᕽ᙮ ᐊᐊᐌ ᑕᔥ ᑳᓇᒪᑕᐱᒡ ᑭᒋᐊᐱᐎᓂᕽ ᐅᑲᐐᒋᐊᔮᒫᐞ ᒋᑲᓇᐌᓂᒫᒡ᙮

ᑳᐐᓐ ᒦᓇᐙ ᐐᑳ ᑕᓅᑌᒪᑕᐐᓰᐗᒃ, ᑳᐐᓐ ᑲᔦ ᑕᓅᑌᐐᒥᓂᑴᓰᐗᒃ᙮ ᑳᐐᓐ ᑲᔦ ᐐᑳ ᐅᑲᐅᓵᒫᑭᓱᑯᓰᐙᓐ ᑮᓯᓲᓐ, ᑲᔦ ᐁᑭᒋᑭᔑᑌᓂᒃ ᑳᐐᓐ ᐅᑲᑑᑖᑯᓰᓈᐙ᙮

ᐊᐊ ᐋᓃᔥ ᒫᓇᒑᓂᔐᔅ ᒦ ᐊᐌ ᐃᒫ ᒣᑴᔭᐄ ᑭᒋᐊᐱᐎᓂᕽ ᑳᐊᔮᒡ, ᐅᑲᓇᐎᒫᓇᒑᓂᔑᐌ ᐅᑲᐃᓈᑯᒥᑰᐞ᙮ ᒦᑕᔥ ᐅᑲᐃᔑᑭᑭᓄᐎᓈᐞ ᐃᐃᒫ ᑳᐃᔑᒨᑭᒋᐗᑭᓐ ᐁᐱᒫᑎᓰᔥᑳᑫᒪᑲᒃ ᐃᐃ ᓂᐱ᙮ ᑭᔐᒪᓂᑑ ᑲᔦ ᐅᑲᑭᓰᐊᒪᐙᐞ ᑲᑭᓇ ᐅᑑᒋᑲᐙᐱᐎᓂᓂ ᐅᔥᑮᔑᑯᓃᕽ᙮

ᒦᓇᐙ ᑳᐸᑾᒋᐱᑑᒡ ᑯᑕᒃ ᑭᐱᔥᑭᐗᓯᑲᓐ ᐊᐊ ᒫᓇᒑᓂᔐᔅ, ᒦ ᐃᐌ ᓃᔣᓱ 7 ᑳᑮᐹᑾᒋᐱᑑᒡ, ᒦ ᐃ ᐊᐲ ᑳᐐᓐ ᑫᑰᓐ ᑮᓇᐐᑖᑏᒪᑲᓯᓅᓐ ᑮᔑᑯᕽ ᐋᐱᑕ ᑎᐸᐃᑲᓐ ᒥᓂᒃ᙮

ᒦᔥ ᓂᑮᐙᐸᒫᒃ ᐃᑭᐌᓂᐗᒃ ᑳᓃᔣᒋᐙᒡ ᐁᒐᓬᐊᒃ ᒦᐗᑭᑭ ᑳᓂᑖ ᐃᓈᓴᒥᑳᐸᐐᑕᐙᐙᒡ ᑭᔐᒪᓂᑑᓐ᙮ ᑮᒦᓈᐗᒃ ᓃᔣᓱ ᐴᑖᒋᑲᓇᓐ᙮

ᒦᓇᐙ ᑕᔥ ᑯᑕᒃ ᐁᒐᓬ ᐅᑮᐱᑕᑯᓈᓐ ᒥᓈᓯᑲᓈᐱᒃ ᐁᐅᓵᐎ ᔔᓂᔮᐗᓂᓂᒃ, ᐁᐱᐊᑕᓃᐸᐎᒡ ᐃᐃᒫ ᐸᑭᑎᓈᓱᐎᓈᐱᑯᕽ᙮ ᓃᐱᐗᐞ ᑮᒦᓈ ᒥᓄᒥᓈᓯᑲᓐ ᒋᑭᑭᑕᑯᓇᕽ ᒋᐊᓂᑭᑭᐊᔮᓂᒃ ᐃᐃᒫ ᐅᑕᓇᒥᐋᐎᓂᓃᕽ ᑲᑭᓇ ᑭᔐᒪᓂᑑ ᐅᑾᔭᒀᑎᓰᒪᐞ, ᒦ ᐃᒫ ᒋᑭᑭᐸᑭᑎᓇᕽ ᒋᒑᑭᓴᕽ ᐃᐌ ᒥᓄᒫᓯᑲᓐ, ᐃᐃᐌ ᐅᓵᐎ ᔔᓂᔮᐎ ᐸᑭᑎᓈᓱᐎᓈᐱᑯᕽ ᑳᐊᔮᓂᒃ ᐃᐃᒫ ᐃᓈᓴᒪᔭᐄ ᐃ ᑭᒋᐊᐱᐎᓂᕽ᙮

ᒦᑕᔥ ᐁᐃᔥᐹᐸᑌᓂᒃ ᐃᐃᐌ ᒥᓄᒫᓯᑲᓐ, ᑮᐊᓂᑕᑯᑭᑭᐅᐱᔥᑳᓂ ᐅᑕᓇᒥᐋᐎᓂᓂ ᑭᔐᒪᓂᑑ ᐅᑾᔭᒀᑎᓰᒪᐞ᙮ ᒦ ᐃᒫ ᐅᓂᒌᕽ ᐊᐊ ᐁᒐᓬ ᑮᐊᓂᐅᒋ ᐃᔥᐱᔥᑳᓂᐗᓐ ᐃᐃᒫ ᐁᓈᓴᒥᐊᔮᒡ ᐊᐊ ᑭᔐᒪᓂᑑ᙮

ᒦᑕᔥ ᐊᐊ ᐁᒐᓬ ᑳᐃᔑᐅᑖᐱᓇᕽ ᒥᓄᒫᓯᑲᓈᐱᒃ, ᐅᑮᒨᔥᑭᓇᑑᓐ ᐃᑕᔥ ᐃᐃᐌ ᑳᐃᔥᑯᑌᐗᓂᓂᒃ ᐸᑭᑎᓈᓱᐎᓈᐱᑯᕽ ᑳᐅᑎᓇᕽ᙮ ᒦᔥ ᐃᐃᒫ ᐊᑮᕽ ᑳᑮᐃᔑᐌᐱᓇᕽ᙮ ᒦᑕᔥ ᐊᐲ ᑮᓅᑖᑾᓐ ᐁᐱᑎᑯᐌᒃ ᑲᔦ ᐁᓅᑖᑯᓯᐙᒡ ᐱᓀᓯᐗᒃ ᑲᔦ ᑮᐙᐙᑌᓭ ᑲᔦ ᑮᐙᐙᑲᐎᓭ ᐃ ᐊᑭ᙮

ᐃᑭ ᑕᔥ ᑳᓃᔣᒋᐙᒡ ᐁᒐᓬᐊᒃ ᑳᐊᔮᐙᒡ ᐃᓂ ᓃᔣᓱ 7 ᐴᑖᒋᑲᓇᓐ ᑮᐅᔑᑳᐸᐎᐃᑎᓱᐗᒃ ᐁᐐᐊᔓᓅᑖᑯᑑᐙᒡ᙮

ᒦᔥ ᐃᐌ ᓂᑕᒻ ᐊᐊ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ᙮ ᐃᒫ ᑕᔥ ᐊᑮᕽ ᑮᐊᐸᑭᒋᑳᑌ ᐃ ᓭᓭᑲᓐ ᑲᔦ ᐃᔥᑯᑌ ᑲᔦ ᒥᔅᑶ ᐁᑮᒫᒪᐎᑭᓂᑲᐎᓭᑭᓐ᙮ ᑫᑳ ᐋᐱᑕ ᑮᒑᑭᓯᑳᑌ ᐊᑭ, ᑲᔦ ᑫᑳ ᐋᐱᑕ ᐱᑯ ᒥᑎᑰᒃ ᑮᒑᑳᑭᓱᐗᒃ, ᑲᔦ ᑲᑭᓇ ᑮᒑᑳᑭᑌ ᑳᐅᔖᐗᔥᑾᔥᑯᓯᐗᑳᒃ᙮

ᒦᑕᔥ ᐊᐌ ᑯᑕᒃ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ, ᐊᒦ ᓃᔑᓐ 2 ᐁᓅᑖᑯᑑᐙᒡ᙮ ᑖᐱᔥᑰ ᑫᑰᓐ ᑳᐃᔑᓈᑾᒃ ᑭᒋᐗᒋᐤ ᐁᑭᒋ ᐃᔥᑯᑌᐗᕽ ᐃᐃᒫ ᑮᐊᐸᑭᒋᑳᑌ ᑭᒋᑲᒦᕽ᙮ ᒦᑕᔥ ᐃ ᑭᒋᑲᒻ ᒥᔅᑸᕽ ᑳᐃᔑ ᐃᓈᑲᒥᓭᒃ᙮

ᒦᔥ ᑫᑳ ᐋᐱᑕ ᐃᑭ ᑭᒋᑲᒦᕽ ᑳᐱᒫᑎᓯᐙᒡ ᑭᔐᒪᓂᑑᓐ ᑳᑮᐅᔑᐃᑯᐙᒡ ᑮᓂᐳᐗᒃ᙮ ᑲᔦ ᑫᑳ ᐋᐱᑕ ᓈᐱᒀᓇᓐ ᑮᓂᔑᐗᓈᑕᓅᓐ᙮

ᒦᑕᔥ ᑯᑕᒃ ᒦᓇᐙ ᑳᐃᔑᓅᑖᑯᑑᒡ ᐅᐴᑖᒋᑲᓐ ᐊᐊᐌ ᐁᒐᓬ, ᒦ ᓂᓯᓐ 3 ᐁᒐᓬᐊᒃ᙮ ᒦᑕᔥ ᑮᐅᒋᐸᑭᔑᓐ ᑭᒋᐗᓇᑯᔥ ᑮᔑᑯᕽ ᐁᐱᒫᑾᓀᒃ᙮ ᑮᐃᔑᐙᓴᑯᓀᑯᓀ ᑖᐱᔥᑰ ᐐᒀᔅ ᐁᐙᓴᑯᓀᒋᑳᑫᒡ ᐊᐎᔭ᙮ ᒦ ᐃᒫ ᑳᐃᔑᐸᑭᔑᕽ ᑫᑳ ᐋᐱᑕ ᐃᓂ ᓰᐲᓐ, ᐃᓂ ᑲᔦ ᑳᒨᑭᒋᐗᑭᓐ᙮

ᐐᓴᑳᐳ ᐃᔑᓂᑳᓱ ᐊ ᑭᒋᐗᓇᑯᔥ᙮ ᐊᒦ ᑮᐐᓴᑳᑲᒥᓭ ᐃᐌ ᓂᐱ, ᑫᑳ ᐋᐱᑕ ᐃ ᓂᐱ ᑮᐐᓴᑳᑲᒥᓐ᙮ ᓃᐱᐗᐞ ᐃᑕᔥ ᐃᑭ ᐯᒫᑎᓯᐙᒡ ᐅᑮᓂᓯᑯᓈᐙ ᐃᐃ ᓂᐲᓂ ᐁᑮᒥᓂᑴᐙᒡ ᑳᑮᐐᓴᑳᑲᒥᓭᓂᒃ᙮

ᔑᑾ ᒦᓇᐙ ᑯᑕᒃ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ, ᐊᒦ ᓃᐎᓐ 4 ᐁᒐᓬᐊᒃ᙮ ᐊᐊᔥ ᑮᓯᔅ ᑮᐸᑭᑌᐙ, ᑫᑳ ᐋᐱᑕ ᒥᓂᒃ ᑮᐸᑭᑌᐙ᙮ ᒦᓇᐙ ᑲᔦ ᑫᑳ ᐋᐱᑕ ᒥᓂᒃ ᐊᐊ ᑎᐱᑭᑮᓯᔅ ᑮᐸᑭᑌᐙ, ᐃᑭ ᑲᔦ ᐗᓇᑯᔕᒃ ᑫᑳ ᐋᐱᑕ ᒥᓂᒃ ᑮᐸᑭᑌᐙᐗᒃ᙮ ᒦᑕᔥ ᑫᑳ ᐋᐱᑕ ᒥᓂᒃ ᐁᑮᑎᐱᑭᓈᑯᓯᐙᒡ᙮ ᔑᑾ ᑮᓈᓅᑌ ᑎᐱᑲᓐ ᑫᑳ ᐋᐱᑕ ᐁᑮᔑᑲᒃ᙮ ᑳᐐᓐ ᑲᔦ ᑮᐙᓭᔮᓯᓅᓐ ᑫᑳ ᐋᐱᑕ ᐁᓂᐊᑯᑎᐱᑲᒃ᙮ ᐐᑫ ᓴ ᑮᑲᔥᑮᑎᐱᑲᓐ᙮

ᓂᑮᐃᓈᑉ, ᓂᑮᓅᑕᐙ ᑕᔥ ᐁᑌᐺᐎᑕᕽ ᒥᑭᓯ ᐁᓈᐎᓈᑯᓯᒡ ᐁᐱᒥᐊᔮᒡ ᓀᐗᒋᑮᔑᑯᕽ, ᐁᑭᔒᐌᒡ: ᑲᒀᓂᓴᑫᑖᑾᓐ! ᑲᒀᓂᓴᑫᑖᑾᓐ! ᑕᑲᑾᓂᓴᑭ ᐃᔑᐌᐱᓯᐗᒃ ᐃᑭ ᐊᑮᕽ ᑳᐱᒫᑎᓯᐙᒡ᙮ ᐊᐲ ᓅᑖᑾᓂᓂᑭᓐ ᐅᐴᑖᒋᑲᓂᐙᓐ ᐃᑭ ᓂᓯᓐ 3 ᐁᒐᓬᐊᒃ ᑫᔮᐱ ᑫᓅᑖᑯᒋᑫᐙᒡ, ᑮᐃᑭᑐ᙮

ᒦᓇᐙ ᑯᑕᒃ ᐁᒐᓬ ᐅᑮᓅᑖᑯᑑᓐ ᐴᑖᒋᑲᓐ, ᐊᒦᐃᐌ ᓈᓇᓐ ᐁᑮᓅᑖᑯᑑᐙᒡ᙮ ᓂᑮᐙᐸᒫ ᑕᔥ ᐗᓇᑯᔥ ᐋᔕ ᐁᑮᐅᒋᐸᑭᔑᕽ ᑭᒋᑮᔑᑯᕽ ᐃᒫ ᐊᑮᕽ ᐁᐊᐱᒡ᙮ ᒦᐊᐌ ᑮᒦᓈ ᐋᐹᐱᑲᐃᑲᓐ, ᒦᐃᐌ ᑎᓄ ᑳᑭᐹᐱᑲᐃᑳᑳᓂᐗᕽ ᐃᐃᒫ ᑳᐃᔑᐐᐸᑲᒥᑳᒃ ᐃᐃᐌ ᐁᑳ ᑳᒥᔕᑮᔮᓯᓄᒃ᙮

ᐅᑮᐹᑭᓈᓐ ᐃᑕᔥ ᐲᑖᐱᑳᓂᕽ ᑳᐃᔑᐐᐸᑲᒥᑳᓂᒃ᙮ ᐃᐃᒫ ᑕᔥ ᑮᐅᑖᐸᑌ ᑖᐱᔥᑰ ᑳᐃᔑᐹᔥᑭᓀᒃ ᐃᐃ ᓂᑭᓯᑲᓐ ᑳᐃᔑ ᐃᔥᐹᐸᑌᒃ᙮ ᑮᐊᓂᑎᐱᑭᓈᑯᓯ ᑕᔥ ᐊᐊ ᑮᓯᔅ ᐁᐊᒀᐸᓱᒡ, ᓀᐗᒋᑮᔑᒃ ᑲᔦ ᑮᒪᑲᑌᐙᐸᑌ᙮

ᐊᒦᔥ ᐃᒫ ᐊᒀᐸᑌᕽ ᑮᐅᒌᐗᒃ ᑭᒋᐸᐸᑭᓀᒃ, ᐁᑮᐴᓃᐙᒡ ᐊᑮᕽ᙮ ᑮᐃᔑᒦᓈᐗᒃ ᐃᑕᔥ ᑖᐱᔥᑰ ᑭᒋᒪᓂᒎᔕᒃ ᑳᐅᒌᓱᐌᐎᓂᐙᒡ ᒦᐃ ᒋᐃᔑᒋᑫᐙᒡ᙮

ᑫᑯ ᓂᔑᐗᓈᒋᑑᑫᒃ ᒪᔥᑯᓯᐗᓐ, ᑮᐃᓈᐗᒃ, ᑲᔦ ᒥᑎᑰᒃ ᑲᔦ ᑲᑭᓇ ᓴ ᑫᑰᓐ ᑳᓂᑖᐎᑭᑭᓐ, ᒦ ᐱᑯ ᑕᓰᓐ ᐊᐎᔭ ᐁᑳ ᐅᔅᑲᑎᑯᐙᕽ ᐁᑭᑭᓇᐙᒋᐲᐙᓯᐎᑣ ᐁᑎᐯᓂᒥᑯᓯᒀ ᑭᔐᒪᓂᑑᓐ, ᒦᐗᑭᑭ ᑫᒌᔂᑲᓂᐎᐙᒡ᙮

ᑳᐐᓐ ᐃᑕᔥ ᑮᐃᔑᒦᓈᓰᐗᒃ ᐅᑯ ᐸᐸᑭᓀᒃ ᒋᓂᓵᐙᒡ ᐃᐃ ᐃᓂᓂᐗᐞ, ᒋᒥᒋᑲᒀᑕᑭᐋᐙᒡ ᐃᑕᔥ ᓈᓄᑮᓯᔅ ᒥᓂᒃ᙮ ᑕᐃᔑᑲᒀᑕᑫᑕᒨᒃ ᐃᑭ ᐃᓂᓂᐗᒃ ᑖᐱᔥᑰ ᐁᔑᑲᒀᑕᑭᐃᑯᒡ ᐊᐎᔭ ᑭᒋᒪᓂᒎᔕᓐ ᑳᐅᒌᓱᐌᐎᓂᓂᒡ ᐁᒌᓱᑯᒡ᙮

ᒦᐃᐌ ᐁᑲᑮᔑᑲᓂᓂᒃ ᐅᑲᓇᓈᑐᓈᓈᐙ ᑫᔑᓂᐳᐙᒡ, ᑳᐐᓐ ᐃᑕᔥ ᐅᑲᒥᑲᓰᓈᐙ᙮ ᐊᐯᔥ ᓂᐳᔮᓐ, ᑕᐃᓀᑕᒨᒃ, ᐅᑲᑕᐸᓰᐃᑯᓈᐙ ᑕᔥ ᐃᐌ ᓂᐳᐎᓐ᙮

ᑮᐃᔑᓈᑯᓯᐗᒃ ᐃᑕᔥ ᐃᑭ ᐸᐸᑭᓀᒃ ᑖᐱᔥᑰ ᒥᑕᑎᒨᒃ ᐁᐅᔒᑖᐃᑣ ᐁᐐᐊᑕᔮᐸᑎᓯᐙᒡ ᒦᑳᑎᐎᓂᕽ᙮ ᐅᑎᒀᓂᐙᕽ ᑮᐃᔑᓈᑯᓯᐗᒃ ᑖᐱᔥᑰ ᐅᓵᐎ ᔔᓂᔮᐎ ᐸᓯᑴᐱᓱᓇᓐ ᐁᐊᔮᓂᑭᓐ᙮ ᐃᓂᓃᕽ ᐃᑕᔥ ᑲᔦ ᑮᐃᓇᑌᑴᐗᒃ᙮

ᑮᐃᔑᐅᐐᓂᓯᓯᐗᒃ ᑖᐱᔥᑰ ᐃᑴᐗᐞ ᑳᐃᔑᑲᑳᓍᓂᑴᓂᒡ, ᔑᑾ ᒥᔑᐱᔑᐙᐱᑎᕽ ᑮᐃᓈᐱᑌᐗᒃ᙮

ᐅᑳᑭᑲᓂᐙᕽ ᑮᐃᓇᐊᑲᔦᐗᒃ ᑖᐱᔥᑰ ᐃᐃ ᐲᐙᐱᒃ ᔑᒫᑲᓂᔕᒃ ᑳᐱᓯᑲᒧᐙᒡ ᐅᑳᑭᑲᓂᐙᕽ᙮ ᔑᑾ ᐱᓵᓂᑯ ᑮᐃᓂᑖᑯᓯᐗᒃ ᒥᑕᑎᒨᒃ ᐁᐱᒬᐌᑖᐲᐸᐋᐙᒡ ᐅᑑᑖᐹᓈᑯᐙᐞ ᐁᐐᒨᑮᑖᑎᐙᒡ ᒦᑳᑎᐎᓂᕽ, ᒦᐃ ᑳᐃᔑᐱᒬᐌᔮᑫᐙᒡ ᐅᑯ ᐸᐸᑭᓀᒃ᙮

ᑭᒋᒪᓂᒎᔑᕽ ᑳᐅᒌᓱᐌᐎᓂᓂᒡ, ᒦᐃ ᑳᐃᓈᓄᐌᐙᒡ ᐃᑭ ᑭᒋᐸᐸᑭᓀᒃ᙮ ᐅᑮᒌᔂᑫᓈᐙᓐ ᐅᓲᐎᓂᐙᓐ᙮ ᒦᔥ ᐃᐃᒫ ᐌᒋᑲᔥᑭᑑᐙᒡ ᒋᑲᒀᑕᑭᐋᐙᒡ ᐃᐃ ᐯᒫᑎᓯᓂᒡ ᓈᓄᑮᓯᔅ ᒥᓂᒃ᙮

ᐅᑕᔮᐙᐙᓐ ᑳᐅᑭᒋᐅᑭᒫᒥᐙᒡ, ᒦᐗᓂᓂ ᐁᒐᓬᐊᓐ ᑳᑕᔑᐅᑭᒫᑲᑕᒥᓂᒡ ᑳᐃᔑᐐᐸᑲᒥᑳᓂᒃ, ᐃᐌ ᐁᑳ ᑳᒥᔕᑮᔮᓯᓂᓂᒃ᙮ ᒦ ᐁᔑᓂᑳᓱᒡ ᐊᐊᐌ ᐁᒐᓬ, ᐊᐹᑕᓐ ᐁᐃᔑᑮᔗᕽ ᐄᐸᕒᐆ ᙮ ᐊᑆᓬᐃᔭᓐ ᐃᑕᔥ ᑲᔦ ᐃᔑᓂᑳᓱ ᑲᕒᐄᒃ ᐁᐃᔑᑮᔗᕽ᙮ ᒦᐃᐌ ᐁᒋᑲᓂᐎᒡ ᐅᓂᔑᐗᓈᒋᐃᐌ᙮

ᓂᑕᒻ ᐃᐃᐌ ᑳᑲᒀᓂᓴᑫᑖᑾᒃ ᐋᔕ ᐊᐸᓐ ᑮᐃᔥᒀᓭ᙮ ᐃᓇᔥᑫ ᑫᔮᐱ ᓃᔑᓐ ᑕᐊᔮᐗᓐ ᑫᑲᒀᓂᓴᑫᑖᑾᑭᓐ᙮

ᒦᓇᐙ ᑕᔥ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ, ᒦ ᐋᔕ ᓂᑯᑣᓱ ᐁᒐᓬᐊᒃ ᐁᑮᐴᑖᒋᑫᐙᒡ᙮ ᓂᑮᓅᑖᓐ ᐃᓉᐎᓐ ᐃᐃᒫ ᐁᐅᒋᓭᒃ ᑳᐃᔑᐅᑌᔥᑲᓂᐗᕽ ᑳᐃᔑᓃᔪᑮᑫᔮᒃ ᐃᐃ ᑳᐅᓵᐎ ᔔᓂᔮᐗᕽ ᐸᑭᑎᓈᓱᐎᓈᐱᒃ, ᒦᐃᐌᓂ ᑳᐅᒋᔥᑲᐎᔥᑳᑯᒡ ᑭᔐᒪᓂᑑ᙮

ᑮᑲᓅᓈ ᑕᔥ ᐊᐊᐌ ᐃᔥᒀᒡ ᐁᒐᓬ ᑳᐅᐴᑖᒋᑲᓂᒡ, ᐊᒦᐊᐌ ᓂᑯᑣᓱ ᑳᐃᓇᑭᒋᑳᓱᒡ: ᐊᐤ, ᐋᐱᔅᑯᓐ ᐃᑭ ᓃᐎᓐ ᐁᒐᓬᐊᒃ ᑳᒪᒫᒋᑾᐱᓱᐙᒡ ᐃᐃᒫ ᑭᒋᓰᐲᕽ ᐃᔫᐸᕒᐁᑏᔅ ᑳᐃᔑᓂᑳᑌᒃ, ᐅᑮᐃᑯᓐ ᐃᐃ ᐃᓉᐎᓐ᙮

ᒦᔥ ᑳᐃᔑᐋᐱᔅᑯᓂᑣ ᐃᑭ ᓃᐎᓐ ᐁᒐᓬᐊᒃ ᒋᐊᐎᓂᓵᐙᒡ ᑫᑳ ᐋᐱᑕ ᑳᑕᔑᓂᒡ ᐃᐃ ᐯᒫᑎᓯᓂᒡ ᐊᑮᕽ᙮ ᐋᓃᔥ ᓃᔮᒃ ᐃᑯ ᑮᐅᔒᑖᐋᐎᑣᐸᓐ ᐃᐃ ᒋ ᐃᔑᒋᑫᐙᒡ, ᒪᔮ ᐅᒋᒋᓭᓂᒃ ᑭᑭᓅᓄᐎᓐ, ᒪᔮ ᑲᔦ ᑮᓯᓲᓐ ᐱᒪᑭᓱᓂᒡ, ᒪᔮ ᑲᔦ ᐁᑮᔑᑲᓂᓂᒃ, ᒪᔮ ᑲᔦ ᐊᐲ ᑮᔑᑲᓂᓂᒃ, ᐲᓂᔥ ᑲᔦ ᒪᔮ ᑎᐸᐃᑲᓐ ᒋᓂᐅᒋᒋᓭᓂᒃ᙮

ᓂᑮᐐᑕᒫᑰ ᐁᑕᔑᐙᒡ ᐃᑭ ᐅᒦᑳᓲᒃ ᑳᑌᓴᐱᐙᒡ ᒥᑕᑎᒨᐞ᙮ ᓃᔣᒃ ᒥᓂᒃ ᑭᒋᒥᑖᔂᒃ ᑕᓯᕽ ᑭᒋᒥᑖᔂᒃ 200,000,000 ᑮᑕᔑᐗᒃ᙮

ᓂᑮᐃᔑᐙᐸᒫᒃ ᓂᑎᓈᐸᑕᒧᐎᓂᕽ ᑳᐃᔑᓈᑯᓯᐙᒡ ᐃᑭ ᒥᑕᑎᒨᒃ ᑲᔦ ᐃᑭ ᑳᐱᒥᐗᓀᐸᐃᑯᐙᒡ᙮ ᑖᐱᔥᑰ ᐃᔥᑯᑌ ᑳᐃᔑᒥᔅᑾᑯᓀᒃ ᑮᐃᔑᓈᑾᓂᓂᐗᓐ ᐅᑑᑳᑭᑲᓂᐋᑲᐗᐱᓱᓂᐙᓐ, ᐁᒪᑲᑌᐅᔖᐗᔥᒀᓂᑭᓐ ᑲᔦ ᐁᐋᑯ ᐅᓵᐙᓂᑭᓐ ᑲᔦ᙮ ᒥᔑᐱᔑᐎᑎᒀᓂᕽ ᑮᐃᔑᓈᑾᓂᓂᐗᓐ ᐅᑎᒀᓂᐙᓐ ᐃᑭ ᒥᑕᑎᒨᒃ᙮ ᑮᐅᒌᒪᑲᓂᓂ ᐅᑑᓂᐙᕽ ᐃᔥᑯᑌ, ᑭᑆᐸᑌ ᑲᔦ, ᐃᐃᐌᓂ ᑲᔦ ᑳᐐᓴᑳᐸᓱᐌᒡ ᑳᒑᑭᓱᒡ ᑎᓄ ᐅᓵᐎᐊᓯᓐ᙮

ᑫᑳ ᑕᔥ ᐋᐱᑕ ᐃᑭ ᐯᒫᑎᓯᐙᒡ ᐅᑮᓂᓯᑯᓈᐙ ᐅᓄ ᓂᓯᓐ 3 ᒪᒋᓭᐎᓇᓐ ᑳᐱᒥᐊᔮᒪᑲᓂᓂᑭᓐ, ᒦᐗᓄᓄ ᐃᔥᑯᑌ, ᑭᑆᐸᑌ, ᑳᐐᓴᑳᐸᓱᐌᒪᑲᓂᓂᒃ ᑲᔦ᙮

ᐅᒪᔥᑲᐎᓰᐎᓂᐙ ᐃᑭ ᒥᑕᑎᒨᒃ ᐃᐃᒫ ᑕᑯᔭᔮᓂ ᐅᑑᓂᐙᕽ ᑲᔦ ᐃᒫ ᐅᓲᐎᐙᕽ᙮ ᑭᓀᐱᑯᕽ ᑮᐃᔑᓈᑾᓂᓂᐗᓐ ᐅᓲᐎᐙᓐ, ᑲᔦ ᑮᐅᑎᒀᓂᐗᓂᓂᐗᓐ᙮ ᒦᑕᔥ ᐃᓂ ᐃᔮᐸᒋᑑᐙᒡ ᒋᐐᓴᑳᐱᓀᐋᐙᒡ ᐃᐃ ᐯᒫᑎᓯᓂᒡ᙮

ᐃᑭ ᑕᔥ ᐯᒫᑎᓯᐙᒡ ᑳᑮᐃᔥᑯᐃᑣ ᑳᑮᓂᓯᑯᓯᒀ ᐅᓄ ᒪᒋᓭᐎᓇᓐ, ᑳᐐᓐ ᑮᐅᒋᑭᐱᒌᓰᐗᒃ ᐁᔑᐊᓇᒥᐁᑕᒧᐙᒡ ᐐᓇᐙ ᐅᓂᒌᐙᕽ ᑳᑮᐅᒋᐅᔑᑑᐙᒡ᙮ ᐋᒋᑯ ᑳᐐᓐ ᐅᑮᐅᒋ ᐴᓂᑲᓅᓈᓯᐙᐙᐞ ᒪᒋᐊᒑᑾᐞ, ᐃᐃ ᑲᔦ ᐅᒪᓯᓂᑰᒋᑲᓂᐙᐞ ᐅᓵᐎ ᔔᓂᔮ ᐙᐱᑯᕽ ᑳᐅᒋᐅᔑᐋᐙᒡ, ᐙᐹᐱᑯᕽ ᑲᔦ, ᐅᓵᐙᐱᑯᕽ ᑲᔦ, ᐊᓯᓃᕽ ᑲᔦ, ᒥᑎᑯᕽ ᑲᔦ ᑳᑮᐅᒋᐅᔑᐋᐙᒡ᙮ ᑳᐐᓐ ᑕᔥ ᐙᐱᓰᐗᐞ, ᑳᐐᓐ ᑲᔦ ᓅᑕᒫᓰᐗᐞ, ᑳᐐᓐ ᑲᔦ ᐱᒧᓭᓰᐗᐞ᙮

ᑳᐐᓐ ᑲᔦ ᑮᐅᒋᑭᐱᒌᓰᐗᒃ ᐃᐃᐌ ᐅᒋ ᑳᑮᐃᔑ ᓂᑖ ᓂᔑᐌᐙᒡ, ᑳᑮᐃᔑ ᒪᒋᒪᔥᑭᑮᑫᐙᒡ ᑲᔦ᙮ ᑳᐐᓐ ᑲᔦ ᐅᑮᐐᐴᓂᑑᓰᓈᐙ ᐃᐃᐌᓂ ᐅᐱᔑᒀᑎᓯᐎᓂᐙ, ᐃᐌ ᑲᔦ ᐅᑭᒨᑎᐎᓂᐙ᙮

ᓂᑮᐙᐸᒫ ᑯᑕᒃ ᐁᑭᒋᒪᔥᑲᐎᓰᒡ ᐁᒐᓬ, ᑭᒋᑮᔑᑯᕽ ᐁᑮᐱᐅᒋᓈᔒᒡ, ᐁᑮ ᑭᑭᑯᓇᔮᑕᕽ ᐗᑶ᙮ ᑮᓯᓶᔮᑉ ᐃᑕᔥ ᑮᑭᔑᐹᓈᑾᓂᓂ ᐅᑎᒀᓂᕽ, ᑲᔦ ᐅᐗᑌᑯᕽ ᐱᓵᓂᑯ ᑮᓯᓱᕽ ᑮᐃᔑᓈᑯᓯ, ᐃᓂ ᑲᔦ ᐅᑳᑕᓐ ᐱᓵᓂᑯ ᐃᔥᑯᑌ ᐁᐸᑕᑲᑯᓀᒃ ᑮᐃᔑᓈᑾᓂᓂᐗᓐ᙮

ᑲᔦ ᐁᐱᑕᑯᓇᕽ ᑎᑎᐲᑭᓂᑲᓂ ᒪᓯᓇᐃᑲᓀᔅ ᐁᑮ ᐹᑮᑭᓂᑳᑌᓂᒃ, ᐅᓂᒌᕽ ᐁᐊᑌᓂᒃ᙮ ᐅᑭᒋᓂᑭᕽ ᐃᓇᑫ ᑮᐃᔑᑕᑯᑮ ᑭᒋᑲᒦᕽ, ᐅᓇᒪᑎᓂᑭᕽ ᐃᑕᔥ ᐃᓇᑫ ᐊᑮᕽ ᑮᐃᔑᑕᑯᑮ᙮

ᒦᑕᔥ ᑮᓲᑭᑖᑯᓯ ᐁᑮᑭᒋᔖᑯᐌᒡ ᑖᐱᔥᑰ ᒥᔑᐱᔑᐤ ᐁᐱᑎᑯᐌᓅᑖᑯᓯᒡ᙮ ᑳᐃᔥᒀᓅᑖᑯᓯᒡ ᐃᑕᔥ ᐊᐊ ᐁᒐᓬ, ᐅᑮᓇᑴᐌᒥᑰᐞ ᐅᓄ ᓃᔣᓱ 7 ᐱᓀᓯᐗᐞ ᐁᑮᐱᑎᑯᐌᓅᑖᑯᓯᓂᒡ᙮

ᐌᔩᑉ ᐃᑯ ᑳᑮᐱᑎᑯᐌᐙᒡ ᐃᑭ ᓃᔣᓱ ᐱᓀᓯᐗᒃ ᓂᑖᓇᐐᐞ ᐅᔑᐲᐋᓈᐸᓐ ᑳᑮᐃᓂᑕᒫᓐ᙮ ᓂᑮᓅᑖᓐ ᐃᑕᔥ ᐃᓉᐎᓐ ᑭᒋᑮᔑᑯᕽ ᐁᐅᒋᑲᓅᓂᑯᔮᓐ: ᑫᑯ! ᓂᑮᐃᑯᓐ᙮ ᑳᑮᐃᑭᑐᐙᒡ ᐃᑭ ᑳᓃᔣᒋᐙᒡ ᐱᓀᓯᐗᒃ ᑫᑯ ᐅᔑᐲᐊᑫᓐ᙮ ᒪᓈᑎᐹᒋᒧᓐ ᐊᐎᔭ ᒋᑭᑫᑕᓯᒃ, ᓂᑮᐃᑰ᙮

ᐊᐊᔥ ᑳᑮᐙᐸᒪᒃ ᐁᒐᓬ ᐁᓃᐸᐎᒡ ᑭᒋᑲᒦᕽ ᑲᔦ ᐊᑮᕽ, ᑭᒋᑮᔑᑯᕽ ᐃᓇᑫ ᑮᐃᔑ ᐃᔥᐱᓂᑫᓂ ᐅᑭᒋᓂᒃ,

ᐁᑮᐃᑭᑐᒡ, ᐁᑮᐊᐱᒧᒡ ᐃᓂ ᑭᔐᒪᓂᑑᓐ ᐊᐸᓂᑯ ᐱᔑᔑᒃ ᑳᐱᒫᑎᓯᓂᒡ, ᒦᐗᓂᓂ ᑳᑮᐅᔑᑑᓂᒡ ᑭᒋᑮᔑᒃ ᑲᔦ ᒥᓂᒃ ᑫᑰᓐ ᐌᑎ ᑳ ᐊᔮᓂᒃ, ᐊᑭ ᑲᔦ ᐁᑮᐅᔑᑑᓂᒡ ᑲᔦ ᒥᓂᒃ ᑫᑰᓐ ᐃᐃᒫ ᑳ ᐊᔮᓂᒃ, ᑲᔦ ᑭᒋᑲᒻ ᐁᑮᐅᔑᑑᓂᒡ ᑲᔦ ᑲᑭᓇ ᑫᑰᓐ ᐃᐃᒫ ᑳ ᐊᔮᓂᒃ᙮ ᑮᐃᑭᑐ ᐊ ᐁᒐᓬ: ᑳᐐᓐ ᐊᑲᐌ ᑕᐲᐆᒪᑲᓯᓅᓐ ᑫᑰᓐ᙮

ᐊᐲ ᑕᔥ ᐊᓂᑲᑮᔑᑲᓂᓂᒃ ᒋᒫᒌᐴᑖᒋᑫᒡ ᐊᐊ ᐁᒐᓬ, ᐊᐊᐌ ᐃᔥᒀᒡ ᐃᑭ ᑳᓃᔣᒋᐙᒡ 7 ᐁᒐᓬᐊᒃ, ᒦ ᐊᐲ ᑭᔐᒪᓂᑑ ᐅᑲᑎᐱᓭᑑᓐ ᐃᐌᓂ ᑳᑮᐃᓀᑕᕽ, ᐃᐌ ᒪᔑ ᐊᐎᔭ ᑳᑮ ᑭᑫᑕᓯᒃ, ᒦᐃᐌ ᑳᑮᐐᑕᒪᐙᒡ ᐊᐊ ᑭᔐᒪᓂᑑ ᐅᑕᓄᑮᐋᑲᓇᐞ ᐅᑎᐹᒋᒧᐎᓂᓃᒪᐞ ᑳᑮᑲᓅᑕᒫᑯᒡ, ᑮᐃᑭᑐ᙮

ᒦᓇᐙ ᑕᔥ ᓂᑮᑲᓅᓂᑯᓐ ᐃᐃᐌ ᐃᓉᐎᓐ, ᐃᐌ ᓂᑕᒻ ᑭᒋᑮᔑᑯᕽ ᑳᑮᐅᒋᓅᑕᒫᓐ, ᒦᐃᐌ ᐁᑮᐃᑯᔮᓐ: ᐊᐎᐅᑖᐱᓇᓐ ᐃᐌ ᑎᑎᐲᑭᓂᑲᓂ ᒪᓯᓇᐃᑲᓀᔅ ᑳᐹᑮᑭᓂᑳᑌᒃ ᐃᒫ ᐅᓂᒌᕽ ᑳ ᐊᑌᓂᒃ ᐊᐌ ᐁᒐᓬ ᐃᒫ ᑳᓃᐸᐎᒡ ᑭᒋᑲᒦᕽ ᑲᔦ ᐊᑮᕽ, ᓂᑮᐃᑰ᙮

ᓂᑮᐊᐎᑲᑴᒋᒫ ᐊᐌ ᐁᒐᓬ: ᒦᔑᔑᓐ ᐃᐃᐌ ᑎᑎᐲᑭᓂᑲᓂ ᒪᓯᓇᐃᑲᓀᔅ, ᐁᐃᓇᒃ᙮ ᓂᑮᐃᒃ ᐃᑕᔥ: ᐊᐤ ᐅᑖᐱᓇᓐ, ᒦᒋᓐ! ᑭᒥᓴᑖᕽ ᑭᑲ ᑭᔑᐗᔥᑲᑌᔥᑳᑯᓐ, ᑭᑑᓂᕽ ᐃᑕᔥ ᑖᐱᔥᑰ ᐋᒨᐎ ᓰᓯᐹᑾᑐᕽ ᑕᐃᔑ ᔒᐗᓐ᙮

ᓂᑮᐅᑖᐱᓇᒧᐙᓐ ᐃᐃ ᑎᑎᐲᑭᓂᑲᓂ ᒪᓯᓇᐃᑲᓀᔅ ᐅᓂᒌᕽ ᑳ ᐊᑌᓂᒃ ᐊᐌ ᐁᒐᓬ, ᑲᔦ ᓂᑮᒦᒋᓐ᙮ ᑖᐱᔥᑰ ᐋᒨᐎ ᓰᓯᐹᑾᑐᕽ ᑮᐃᐳᑾᓐ᙮ ᐊᐲᔥ ᑳᑯᑕᒫᓐ ᓂᑮᐐᓴᑭ ᑭᔑᐗᔥᑲᑌᔥᑳᑯᓐ᙮

ᐅᐅᐌᔥ ᓂᑮᐃᒃ: ᑭᓇᑕᐌᑖᑯᔅ ᒦᓇᐙ ᒋᑲᓅᑕᒪᐗᒡ ᑭᔐᒪᓂᑑ ᑫᐃᓈᒋᒥᑣ ᓃᐱᐗᐞ ᐊᐎᔭᐞ ᐯᐸᑳᓐ ᐊᑮᕽ ᑳᐅᒋᑎᐯᑖᑯᓯᐙᒡ, ᐯᐸᑳᓐ ᑲᔦ ᑳᑕᓶᐙᓇᑭᓈᑯᓯᐙᒡ, ᑳᑕᓱ ᐊᔨᔑᑮᔗᐙᒡ ᑲᔦ, ᓃᐱᐗᐞ ᑲᔦ ᑭᒋᐅᑭᒫᒃ ᑫᐃᓈᒋᒥᑣ᙮ ᒦ ᐃ ᑳᐃᔑᒡ ᐊᐊ ᐁᒐᓬ᙮

ᒦᑕᔥ ᓂᑮᒦᓂᑰ ᐃ ᑎᐸᐃᑲᓈᑎᒃ, ᑖᐱᔥᑰ ᓴᑲᐅᓈᑎᒃ ᐁᐃᔑᓈᑾᒃ᙮ ᔑᑾᔥ ᓂᑮᑲᓅᓂᑰ: ᐸᓯᑸᓐ, ᐊᐎᑎᐸᐊᓐ ᐅᑭᒋᐊᓇᒥᐁᐎᑲᒥᒃ ᐊᐊ ᑭᔐᒪᓂᑑ ᑲᔦ ᐃ ᐸᑭᑎᓈᓱᐎᓈᐱᒃ ᐃᐃᒫ ᑳᐊᔮᒃ᙮ ᐃᑭᐌᓂᐗᒃ ᐃᑕᔥ ᐃᒫ ᐲᑎᒃ ᑳᐊᓇᒥᐋᐙᒡ ᐊᑭᒻ᙮

ᐃᓂᐌ ᑕᔥ ᑳᐙᑳᐃᑳᑌᑭᓐ ᐃᒫ ᐊᑾᒋᔭᐄ ᑭᒋᐊᓇᒥᐁᐎᑲᒥᑯᕽ, ᑫᑯ ᐐᓐ ᐃᓂᐌ ᐱᒣᑕᑫᓐ, ᑫᑯ ᑎᐸᐊᑫᓐ᙮ ᑮᒦᓈᐗᒃ ᐃᑭ ᑎᓄ ᐸᑳᓐ ᑳᐊᔫᒌᐙᒡ ᐁᑳ ᑳᐊᓇᒥᐋᓯᒀ᙮ ᐅᐌ ᐆᑌᓇ ᑭᔐᒪᓂᑑ ᑳᑎᐯᑕᕽ ᐅᑲᑕᑖᑯᑳᑖᓈᐙ ᓃᒥᑕᓇᔑᓃᔑᓐ 42 ᑕᓱ ᑮᓯᔅ ᒥᓂᒃ᙮

ᓂᑲᒫᒋᓂᔕᐙᒃ ᐃᑕᔥ ᐃᑭ ᑳᓃᔑᐙᒡ ᑫᑎᐹᒋᒥᐙᒡ᙮ ᐊᓴᐲᐌᑭᓐ ᐅᑲᐱᑭᑭᔥᑳᓈᐙ᙮ ᒥᑖᔂᒃ ᑲᔦ ᓃᔣᒃ ᓂᑯᑣᓯᒥᑕᓇ 1,260 ᑕᓱ ᑮᔑᒃ ᒥᓂᒃ ᐅᑲᑲᓅᑕᒪᐙᐙᓐ ᑭᔐᒪᓂᑑᓐ, ᑮᐃᑭᑐ᙮

ᐅᑯ ᑳᓃᔑᐙᒡ ᑎᐹᒋᒧᐎᓂᓂᐗᒃ, ᐊᒦᐗᑯᑯ ᐁᒋᑳᓱᐙᒡ ᐃᑭ ᓃᔑᓐ ᐋᓬᐃᑉ ᔔᒥᓈᑎᑰᒃ, ᐃᑭ ᑲᔦ ᓃᔑᓐ ᐙᓴᑯᓀᒋᑲᓈᑎᑰᒃ ᐃᒫ ᑳᐸᑕᑭᓱᐙᒡ ᐃᒫ ᐁᓈᓴᒥᐊᔮᓂᒡ ᐃᓂ ᑳᑎᐯᑕᒥᓂᒡ ᐃᐌᓂ ᐊᑮᓂ᙮

ᑮᔥᐱᓐ ᐊᐎᔭᓐ ᑫᑰᓐ ᐐᑑᑖᑯᐙᒡ, ᐃᔥᑯᑌ ᑕᐅᒌᓂ ᐅᑑᓂᐙᕽ ᒋᑕᔑ ᓂᔑᐗᓈᑎᓯᓂᒡ ᐃᓂ ᑳᔒᑫᓂᒥᑯᐙᒡ᙮ ᐊᒦ ᐅᐌ ᓇᑫ ᑕᐃᔑᓂᓯᒫᐗᐞ ᐊᐌᓀᓇᐞ ᐃᑯ ᑳᐐᒪᒋᑑᑖᑯᐙᒡ᙮

ᐅᑕᔮᓈᐙ ᐅᑲᔥᑭᐁᐎᓯᐎᓂᐙ ᒋᑭᐸᐊᒧᐙᒡ ᐃᐃ ᑮᔑᒃ ᐁᑳ ᒋᑭᒥᐗᓯᓂᓂᒃ ᒣᒀ ᐁᐊᓂᑲᓅᑕᒪᐙᐙᒡ ᑭᔐᒪᓂᑑᓐ᙮ ᐅᑲᔥᑭᑑᓈᐙ ᑲᔦ ᓂᐲᓐ ᒋᑴᑭᑑᐙᒡ ᑳᒨᑭᒋᐗᓂᐲᑯᐗᓂᓂᑭᓐ, ᒥᔅᑸᕽ ᒋᐃᓈᑲᒥᓂᓂᑭᓐ᙮ ᐅᑲᔥᑭᑑᓈᐙᓐ ᑲᔦ ᑲᑭᓇ ᒋᐅᑎᔑᐌᒪᑲᓂᓂᑭᓐ ᑫᑲᒀᑕᑭᐃᐌᒪᑲᓂᓂᑭᓐ ᐅᐅᒫ ᐊᑮᕽ, ᑕᔂ ᐱᑯ ᑫᐃᓀᑕᒧᐙᑴᓐ ᑕᐃᔑᒋᑫᐗᒃ᙮

ᒦᔥ ᐃᐌ ᐊᐲ ᑫᑮᔑᑑᐙᒡ ᐅᑎᐹᒋᒧᐎᓂᐙ, ᒦ ᐊᐲ ᑫᒦᑳᓂᑯᐙᒡ ᐃᓂ ᐱᑾᒋᐊᔭᐋᐎᔕᓐ ᑳᐱᐅᒋᒨᑮᓂᒡ ᐃᐃᒫ ᑳᐃᔑᐐᐸᑲᒥᑳᒃ ᐃᐃᐌ ᑳᒥᔕᑮᔮᓯᓄᒃ᙮ ᐅᑲᔖᑰᒋᐃᑯᐙᓐ ᑲᔦ ᐅᑲᓂᓯᑯᐙᓐ᙮

ᐃᓂ ᑕᔥ ᐐᔭᐎᐙᓐ ᑳᑮᓂᐳᐙᒡ ᑕᐊᑌᓂᐗᓐ ᒪᔮᐎᑲᓇ ᐃᐃᒫ ᑭᒋᐆᑌᓈᕽ, ᐃᐃᒫ ᑲᔦ ᑳᑮᑕᔑ ᐊᒀᑯᓴᑲᐃᑲᓂᐎᓂᒡ ᐃᓂ ᑳᑎᐯᓂᒥᑯᐙᒡ᙮ ᒦ ᐅᐌ ᐁᔑᑭᑭᓇᐙᒋᐐᑌᒃ ᐃᐃ ᐆᑌᓇ, ᔂᑕᒻ ᑲᔦ ᐄᒋᑉ ᙮

ᒦ ᐃᒫ ᓂᓱᑮᔑᒃ ᐋᐱᑕ ᑲᑭᓇ ᐊᐎᔭᒃ ᐅᑲᔑᑲᓇᐙᐸᑕᒪᐙᐙᐞ ᑳᑮᓂᐳᓂᒡ ᐐᔭᐎᓂ, ᒥᓯᐌ ᑳᐅᒌᐙᒡ ᐯᐸᑳᓐ ᑳᐃᔑᐐᓱᐙᒡ, ᑲᑭᓇ ᑲᔦ ᑳᑕᓶᐙᓇᑭᓈᑯᓯᐙᒡ, ᐯᐸᑳᓐ ᑲᔦ ᑳᐃᔑᑮᔗᐙᒡ, ᒦ ᐅᑯ ᑲᑭᓇ ᐅᑲᑲᓇᐙᐸᑖᓈᐙᓐ ᐃᓂ ᐐᔭᐎᒫᓐ᙮ ᑳᐐᓐ ᑲᔦ ᐅᑲᐸᑭᑎᓇᓰᓈᐙ ᒋᓇᐊᒋᑳᑌᓂᑭᓐ ᐐᔭᐎᓂ᙮

ᐃᑭ ᐃᒫ ᐊᑮᕽ ᑳᐊᔮᐙᒡ ᑕᒨᒋᑫᑕᒨᒃ ᐁᑮᓂᐳᓂᒡ ᐅᐅ ᓃᔑᓐ ᐅᑎᐹᒋᒨᐞ᙮ ᑕᒨᒋᑲᑲᒥᑭᓯᐗᒃ, ᑕᒣᒣᔥᑾᒋᒦᓂᑎᐗᒃ ᑲᔦ᙮ ᐅᐅᐌ ᑕᐅᒋ ᐃᔑᒋᑫᐗᒃ, ᐋᓃᔥ ᑮᓂᐳᐗᐞ ᐅᐅ ᐅᑎᐹᒋᒨᐞ ᑳᑮᑭᒋ ᑲᒀᑕᑭᐃᑯᐙᐸᓐ᙮

ᓂᓱᑮᔑᒃ ᐋᐱᑕ ᑕᔥ ᐁᐃᔑᓭᓂᒃ, ᑳᑮᓂᓯᑣ ᐅᑯ ᐅᑎᐹᒋᒨᒃ, ᐅᑮᐲᒋᔥᑳᑯᓈᐙ ᐸᑭᑕᓈᒧᐎᓐ ᑭᔐᒪᓂᑑᕽ ᑳᐅᒌᓂᒃ ᐁᑮᑮᐌᐱᒫᑎᓯᐃᑯᐙᒡ; ᑮᐸᓯᑸᐗᒃ ᐃᑕᔥ᙮ ᒦᑕᔥ ᑮᑭᒋᓭᑭᓯᐗᐞ ᑲᑭᓇ ᑳᐙᐸᒥᑯᐙᒡ᙮

ᐅᑮᓅᑖᓈᐙ ᑕᔥ ᐃᑭ ᐅᑎᐹᒋᒨᒃ ᐁᑭᒋᑭᔒᐌᒃ ᐃᓉᐎᓐ ᑭᒋᑮᔑᑯᕽ ᐃᓇᑫ ᐁᑲᓅᓂᑯᐙᒡ: ᐅᐅᒫ ᐲᔖᒃ! ᒦᔥ ᐃᐃ ᑮᐊᓂᒫᒑᐗᒃ ᑭᒋᑮᔑᑯᕽ ᐗᑸᕽ, ᒣᒀ ᐁᑲᓇᐙᐸᒥᑯᐙᒡ ᐃᐃ ᑳᔒᑫᓂᒥᑯᐙᒡ᙮

ᒦᑕᔥ ᐃᐌ ᐊᐲ ᐁᐃᔑᓭᒃ, ᐐᑫ ᑮᑭᒋᓂᓂᑭᓭᓂ ᐊᑭ᙮ ᒦᔥ ᐃᐃ ᐊᐲ ᐁᑕᓱᒥᑖᒋᑭᓐ ᐙᑳᐃᑲᓇᓐ ᐃᐃᒫ ᐁᑭᒋᐆᑌᓇᐗᕽ ᐯᔑᒃ ᑮᓂᔑᐗᓈᑕᓐ᙮ ᓃᔣᒋᕽ ᒥᑖᔂᒃ 7,000 ᐃᑕᔥ ᑮᑕᔑᐗᒃ ᑳᑮᓂᔑᐗᓈᑎᓯᐙᒡ ᐁᑭᒋᓂᓂᑭᓭᓂᒃ ᐊᑭ᙮ ᑯᑕᒃ ᐃᑕᔥ ᑳᐃᔥᑯᐃᑣ ᑮᑭᒋᓭᑭᓯᐗᒃ ᑲᔦ ᐅᑮᑭᑕᑭᒫᐙᓐ ᑭᔐᒪᓂᑑᓐ ᑭᒋᑮᔑᑯᕽ ᑳᐊᔮᓂᒡ᙮

ᒦᐃᐌ ᓃᔑᕽ ᐋᔕ ᐅᐌ ᐁᑮᐴᓂᓭᒃ ᐅᒑᓂᒥᓯᐎᓐ ᑳᑲᒀᓂᓴᑫᑖᑾᒃ᙮ ᓇᔥᑫ ᓴ! ᑫᔮᐱ ᐯᔑᒃ ᑫᑲᒀᓂᓴᑫᑖᑾᒃ ᐅᒑᓂᒥᓯᐎᓐ ᑭᑖᑕᐱᑯ ᑕᐃᔑᓭ, ᒦᐃ ᓂᓯᕽ 3 ᒋᐃᔑᓭᒃ᙮

ᒦᓇᐙ ᑯᑕᒃ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ, ᒦ ᓃᔣᓱ ᐁᒐᓬᐊᒃ ᐁᑮᐴᑖᒋᑫᐙᒡ᙮ ᒦᔥ ᐁᑭᒋ ᐃᓂᑖᑾᑭᓐ ᐃᓉᐎᓇᓐ ᑭᒋᑮᔑᑯᕽ, ᐅᐅᐌ ᐁᐃᑭᑐᐙᒡ ᐁᒫᒪᐎᑖᑯᓯᐙᒡ: ᑮᒦᓈ ᐃᐃ ᐊᑭ ᒋᐅᑭᒫᑲᑕᕽ ᐊᐊ ᑳᑎᐯᓂᒥᓇᕽ ᑲᔦ ᐃᓂ ᑳᑮᐅᓈᐸᒫᒡ ᒋᐱᒫᒋᐃᐌᓂᒡ᙮ ᐐᓐ ᐃᑯ ᐊᐸᓂᑯ ᒨᔕᒃ ᐱᔑᔑᒃ ᑕᑎᐯᒋᑫ᙮

ᐃᑭᐌᓂᐗᒃ ᓃᔥᑕᓇᔑᓃᐎᓐ 24 ᐅᓃᑳᓂᓰᒃ, ᒦᐗᑭᑭ ᐅᑭᒋᐊᐱᐎᓂᐙᕽ ᑳᐃᓈᓴᒪᐲᑕᐙᐙᒡ ᑭᔐᒪᓂᑑᓐ, ᑮᐊᓂᒥᑯᐸᓂᐅᐗᒃ ᐁᓈᓴᒪᐱᓂᒡ, ᐁᑭᒋ ᐃᓀᓂᒫᐙᒡ ᑭᔐᒪᓂᑑᓐ,

ᐅᐅᐌ ᐁᐃᓈᐙᒡ: ᒦᑴᒡ ᑭᑎᑰ ᑮᓐ ᑌᐯᒋᑫᔭᓐ, ᑭᔐᒪᓂᑑ ᒥᔮᒪᐎ ᒪᔥᑲᐎᓰᔭᓐ, ᑮᓐ ᐅᐅᒫ ᓅᑯᒻ ᑳᐊᔮᔭᓐ, ᒣᐎᔕ ᑯ ᑲᔦ ᑳᐱᐅᒋᐊᔮᔭᓐ, ᒦᑴᒡ ᐁᒫᒌᐋᐸᒋᑑᔭᓐ ᑭᑭᒋᒪᔥᑲᐎᓰᐎᓐ ᐁᒫᒌᑎᐯᒋᑫᔭᓐ!

ᑳᑕᓶᐙᓇᑭᓯᐙᒡ ᐃᑭᐌᓂᐗᒃ ᑳᑭᑫᓂᒥᓯᓄᒀ ᑮᐅᒋᑭᒋᓂᔥᑳᑎᓯᐗᒃ, ᐁᐅᒋᒋᓭᒃ ᑭᓂᔥᑳᑎᓯᐎᓐ ᒋᐱᑕᑯᔑᓅᒪᑲᒃ, ᐃᑭ ᑕᔥ ᑲᔦ ᑳᓂᐳᐙᒡ ᒋᑎᐹᑯᓂᑣ᙮ ᐋᔕ ᐅᒋᒋᓭ ᒋᑎᐸᐊᒪᐗᑣ ᑭᑕᓄᑮᐋᑲᓇᒃ ᑳᑮᑲᓅᑕᒪᐎᒀ, ᐃᑭ ᑲᔦ ᑲᑭᓇ ᑳᑾᔭᑯᐱᒫᑎᓯᐙᒡ ᑳᑎᐯᓂᒪᑣ, ᐃᑭ ᑲᔦ ᑳᑭᒋ ᐃᓀᑕᒧᐙᒡ ᑭᐐᓱᐎᓐ, ᑳᑭᒋ ᐃᓀᑖᑯᓯᐙᒡ, ᐃᑭ ᑲᔦ ᐸᑮ ᐁᓀᑖᑯᓯᐙᒡ, ᑲᑭᓇ ᑕᒦᓈᐗᒃ᙮ ᒦ ᐅ ᐊᐲ ᐁᐅᒋᒋᓭᒃ ᒋᓂᔑᐗᓈᒋᐃᑣ ᐃᑭ ᑳᓂᔑᐗᓈᒋᑑᐙᒡ ᐃᐃ ᐊᑭ, ᐃᑭᑐᐗᒃ ᐅᓃᑳᓂᓰᒃ᙮

ᑮᐹᑭᓂᑳᑌᓂ ᑕᔥ ᑭᔐᒪᓂᑑ ᐅᑭᒋᐊᓇᒥᐁᐎᑲᒥᒃ ᑭᒋᑮᔑᑯᕽ ᑳᐊᔮᓂᒃ᙮ ᐃᐃᒫᔥ ᑮᓈᑾᓂᓂ ᐊᓇᒥᐁᒪᑲᒃ ᑳᐃᔑᐲᑌᓂᒃ ᐊᔓᑕᒫᑎᐎᓐ ᑭᔐᒪᓂᑑ ᑳᑮᒦᓈᒡ ᐅᐱᒫᑎᓰᒪᐞ᙮ ᑮᐅᒌ ᐃᒫ ᐁᐙᐙᑌᓭᒃ, ᑮᐸᐲᑎᑯᐌ ᑕᔥ ᑲᔦ, ᐱᓀᓯᐗᒃ ᑲᔦ ᑮᓅᑖᑯᓯᐗᒃ᙮ ᐊᑭ ᑲᔦ ᑮᓂᓂᑭᓭ, ᐐᑫ ᑲᔦ ᑮᑭᒋᓭᓭᑲᓐ᙮

ᒦᑕᔥ ᑭᒋᒫᒪᑳᓯᓇᒧᐎᓐ ᑮᓈᑾᓐ ᑭᒋᑮᔑᑯᕽ᙮ ᑮᓈᑯᓯ ᐯᔑᒃ ᐃᑴ ᑳᐃᔑᑯᓇᔦᒡ ᐃᓂ ᑮᓯᓲᓐ ᐁᑭᑭᔥᑲᐙᒡ, ᑲᔦ ᐊᓈᒥᕽ ᐅᓯᑎᕽ ᑮᐊᔮᐗᓐ ᑎᐱᑭᑮᓯᓲᓐ, ᐅᑎᒀᓂᕽ ᑲᔦ ᐁᐸᓯᑴᐱᓱᒡ ᒥᑖᔑᓃᔑᓐ 12 ᐗᓇᑯᔕᐞ᙮

ᐊᐱᓅᒌᔕᓐ ᐅᑮᑭᑭᔥᑲᐙᓐ, ᐁᒨᒀᐱᓀᒡ ᐁᐐᐙᐸᒫᐗᓱᒡ᙮

ᐸᑳᓐ ᒦᓇᐙ ᑫᑰᓐ ᑮᑭᑭᓇᐙᓯᓈᑾᓐ ᑭᒋᑮᔑᑯᕽ᙮ ᐃᐃᒫ ᑮᐊᔮ ᒫᐗᒡ ᐁᒥᑎᑐᒡ ᐅᑳᑏᑭᓀᐱᒃ ᐁᒥᔅᑯᓯᒡ, ᐁᓃᔣᒋᓂᓂᑭᓐ 7 ᐅᑎᒀᓇᓐ ᑲᔦ ᐁᒥᑖᒋᓂᒡ ᐅᑌᔥᑲᓇᐞ᙮ ᔑᑾ ᑳᑕᓯᓂᓂᑭᓐ ᐅᑎᒀᓇᓐ ᐅᑮᑭᑭᔥᑳᓇᓐ ᐃᓂ ᐸᓯᑴᐱᓱᓇᓐ᙮

ᒦᔥ ᐅᓲᐎᕽ ᐅᑮᓃᓵᑳᐲᑭᓈᐞ ᐃᓂ ᐗᓇᑯᔕᐞ, ᑫᑳ ᐋᐱᑕ ᑳᑕᔑᓂᒡ ᑳᐊᑰᒋᓂᓂᒡ ᑮᔑᑯᕽ ᐅᑮᐅᒋᓃᓯᐌᐱᓈᐞ ᐊᑮᕽ᙮ ᑮᐃᓈᓴᒥᑳᐸᐎ ᑕᔥ ᐃᓂ ᐃᑴᐗᓐ ᐁᐐᐙᐸᒫᐗᓱᓂᒡ, ᐊᐲᔥ ᓈᑯᓯᓂᒡ ᐁᐐᐊᒸᒡ ᐃᓂ ᐊᐱᓅᒌᔕᓐ᙮

ᑮᓈᑯᓯᐗᓐ ᐃᑕᔥ ᐁᑮᐅᑯᓯᓯᒡ ᐊᐊ ᐃᑴ, ᐊᒦᐗᓐ ᐃᓂ ᐲᐙᐱᑯᓴᑲᐅᓐ ᑫᑕᑯᓇᒥᓂᑦ ᑫᐅᓈᑯᓈᓂᒡ ᑲᑭᓇ ᑳᑕᓶᐙᓇᑭᓯᓂᒡ ᐃᐃ ᐯᒫᑎᓯᓂᒡ᙮ ᑮᑫᓯᑯᒪᓂᐱᓈ ᑕᔥ ᐊᐊᐌ ᐊᐱᓅᒌᔥ, ᐁᑮᐃᔑᐎᓂᓐᒡ ᐃᐃᒫ ᑭᔐᒪᓂᑑᓐ ᑳᐃᔑᐊᔮᓂᒡ, ᐃᒫᔥ ᑲᔦ ᑳᐃᔑᐊᔮᓂᒃ ᐅᑭᒋᐊᐱᐎᓂᓂ᙮

ᐊᐊᐌᔥ ᐃᑴ ᐱᑾᑕᑲᒥᒃ ᑮᐊᐸᐃᐌ, ᐌᑎ ᑳᑮᐃᔑ ᑮᔖᒋ ᐅᔑᑕᒫᑯᒡ ᑭᔐᒪᓂᑑᓐ ᐃᐃᒫ ᒋᐊᔮᒡ ᒋᑕᔑᑲᓇᐌᓂᒥᓐᒡ, ᒥᑖᔂᒃ ᓃᔣᒃ ᓂᑯᑣᓱᒥᑕᓇ 1,260 ᑕᓱᑮᔑᒃ ᐃᒫ ᒋᐊᔮᒡ᙮

ᒦ ᐃ ᐊᐲ ᑮᒫᒌᒦᑳᑎᓈᓂᐗᓐ ᑭᒋᑮᔑᑯᕽ᙮ ᐊᐊ ᒪᔨᑲᓬ ᑲᔦ ᐅᐐᒋᐁᒐᓬᐃᒪᐞ ᐅᑮᐊᐎᒦᑳᓈᐙᓐ ᐃᓂ ᑭᒋᐅᑳᑏᑭᓀᐱᑰᓐ᙮ ᑲᔦ ᐐᓐ ᑭᒋᐅᑳᑏᑭᓀᐱᒃ ᑮᒦᑳᓱ ᐁᐐᒋᐃᑯᒡ ᐅᑌᒐᓬᐃᒪᐞ᙮

ᑮᔖᑰᒋᒋᑲᓂᐎ ᑕᔥ ᐊᐊᐌ ᑭᒋᐅᑳᑏᑭᓀᐱᒃ᙮ ᑳᐐᓐ ᒦᓇᐙ ᐐᑳ ᑮᑕᐎᓇᒪᐙᓰ ᑭᒋᑮᔑᑯᕽ ᒋᐊᔮᒡ, ᐃᓂᐌᓂᐗᐞ ᑲᔦ ᑳᐐᒋᐃᑯᒡ᙮

ᐗᐊ ᑳᒫᐗᒋᒥᑎᑐᒡ ᑭᒋᐅᑳᑏᑭᓀᐱᒃ ᐃᑯᒋ ᑮᐃᔑᐌᐱᓈ᙮ ᒦ ᐊᐌ ᑭᒋᒣᐎᔕ ᑳᐅᒌᒡ ᑫᑌᒪᒋᑭᓀᐱᑯᔥ, ᒪᒋᐊᔭᐋ, ᓭᑕᓐ ᑲᔦ ᑳᐃᔑᓂᑳᓂᓐᒡ᙮ ᒦ ᐊᐌ ᑳᑮᐗᔦᔑᒫᒡ ᐊᐎᔭᐞ ᒥᓯᐌᑲᒥᒃ ᑳᐊᔮᓂᒡ᙮ ᐊᑮᕽ ᐃᑕᔥ ᑮᐃᔑᐌᐱᓈ, ᑕᑯ ᑲᔦ ᐅᒪᒋᐁᒐᓬᐃᒪᐞ ᑳᑮᐐᒌᐎᑯᒡ᙮

ᒦᑕᔥ ᓂᑮᓅᑖᓐ ᐊᐎᔭ ᐁᑭᒋᑭᔒᐌᒡ ᑭᒋᑮᔑᑯᕽ ᐁᐃᑭᑐᒡ: ᓅᑯᒻ ᐅᒋᒋᓭ ᐅᐱᒫᒋᐃᐌᐎᓐ ᑭᑭᔐᒪᓂᑑᒥᓈᓐ ᑲᔦ ᐁᐱᓈᑾᓂᓂᒃ ᐅᒪᔥᑲᐎᓰᐎᓐ ᑲᔦ ᐅᑎᐯᒋᑫᐎᓐ᙮ ᐃᓂ ᑲᔦ ᑳᑮᐅᓈᐸᒫᒡ ᒋᐱᒫᒋᐃᐌᓂᒡ ᐋᔕ ᐅᓈᑯᑑᓂ ᐅᑲᔥᑭᐁᐎᓯᐎᓂᓂ᙮ ᐋᓃᔥ ᑮᓃᓯᐌᐱᓈ ᐊᐌ ᒪᒋᐊᔭᐋ ᑳᑮᒪᒥᔑᒫᒡ ᐃᓂ ᑭᐐᒋᐅᑌᐺᑕᒨᒥᓈᓂᐞ᙮ ᐊᒦ ᐊᐌ ᒪᒋᐊᔭᐋ ᑳᑮᐃᓈᓴᒥᑳᐸᐐᑕᐙᒡ ᑭᑭᔐᒪᓂᑑᒥᓈᓂᓐ, ᐁᑮᔑᑲᓂᓂᒃ, ᐁᑎᐱᑲᓂᓂᒃ ᑲᔦ ᐁᑮᑲᑴᒪᒥᔑᒥᐌᒡ᙮ ᐋᔕ ᑕᔥ ᑮᐅᒋᓃᓯᐌᐱᓈ ᑭᒋᑮᔑᑯᕽ᙮

ᐃᑭ ᑕᔥ ᑭᐐᒋᐅᑌᐺᑕᒨᒥᓈᓂᒃ ᐅᑮᔖᑰᒋᐋᐙᓐ ᐃᓂ ᒪᒋᐊᔭᐋᓐ᙮ ᐃᐃᐌ ᒫᓇᒑᓂᔐᔅ ᐅᒥᔅᑸᒻ ᑮᐅᒋᔖᑰᒋᑣᐗᒃ, ᐃᐃᐌᓂ ᑕᔥ ᑲᔦ ᑌᐺᐎᓐ ᑳᑮᐐᑕᒫᑫᐙᒡ᙮ ᑳᐐᓐ ᐋᓃᔥ ᐅᑮᐅᓵᒣᑕᓰᓈᐙᓐ ᐅᐱᒫᑎᓯᐎᓂᐙᓐ, ᑳᐐᓐ ᐃᑯᑕᓄ ᓂᐳᔮᕽ ᐁᑮᐃᓀᑕᒧᐙᒡ᙮

ᑕᒥᓉᑕᒨᒪᑲᓐ ᑭᒋᑮᔑᒃ, ᑲᔦ ᐃᐃᒫ ᑳᐊᔮᔦᒃ ᒥᓉᑕᒧᒃ! ᑕᑲᒀᑕᑫᑖᑾᓐ ᐃᑕᔥ ᐃᐃᒫ ᐊᑮᕽ ᑲᔦ ᑭᒋᑲᒦᕽ, ᐋᓃᔥ ᐊᐊ ᒪᒋᐊᔭᐋ ᑭᑮᓈᓯᑳᑯᐙ ᐃᒫ ᑳᐊᔮᔦᒃ, ᐁᐊᔮᒡ ᑭᒋᓂᔥᑳᑎᓯᐎᓐ ᐁᑭᑫᑕᕽ ᐊᒋᓇ ᐱᑯ ᐁᑕ ᒋᐊᔮᒡ, ᒦ ᑳᐃᑭᑐᒡ᙮

ᐊᐲ ᑕᔥ ᐊᐊᐌ ᑭᒋᐅᑳᑏᑭᓀᐱᒃ ᐁᐙᐸᑕᕽ ᐊᑮᕽ ᐁᑮᓃᓯᐌᐱᓂᓐᒡ, ᐃᓂᐌᓂᔥ ᐃᑕᔥ ᐃᓂ ᐃᑴᐗᓐ ᐅᑮᒨᑮᑕᐙᓐ ᑳᑮᓂᑖᐎᑭᐋᓂᒡ ᐃᓂ ᑸᐎᓭᓴᓐ᙮

ᑮᒦᓈ ᑕᔥ ᐊᐊ ᐃᑴ ᓃᔑᓐ ᐃᓂ ᒥᓂᑸᑲᓇᓐ ᑭᒋᒥᑭᓯ ᑳᐃᔑᐅᓂᑸᑲᓂᒡ, ᒋᐃᔑᓭᐙᑫᒡ ᐱᑾᒋᐊᑮᕽ ᑳᑮᐃᔑ ᑾᔮᒋᑕᒪᐎᓐᒡ, ᐃᐃᒫ ᒋᐊᐎᐊᔮᒡ ᓂᓱᔭᑭ ᐋᐱᑕ, ᒦᔥ ᐌᑎ ᒋᐃᔑᑲᓇᐌᑖᑯᓯᒡ ᒋᑌᐱᓂᑯᓯᒃ ᒪᒋᑭᓀᐱᑯᔕᓐ᙮

ᐅᑯᓀᐎᕽ ᐃᑕᔥ ᐊᐊ ᒪᒋᑭᓀᐱᑯᔥ ᐅᑮᓅᓴᐎᓰᓱᐹᓈᓐ ᓂᐱ ᐱᓵᓂᑯ ᓰᐱ ᑳᐃᔑᐱᒥᒋᐗᕽ, ᒋᐅᒋᒫᒌᔮᐳᑯᓂᐸᓐ ᐃᓂ ᐃᑴᐗᓐ᙮

ᒦᔥ ᐃᐌᓂ ᐊᑮᓂ ᐅᑮᐐᒋᐃᑯᓐ ᐊᐊ ᐃᑴ᙮ ᐁᑕᐗᓃᒪᑲᒃ ᐅᑮᐃᔅᑲᑖᓐ ᐃᐌ ᓂᐲᓂ ᒪᒋᑭᓀᐱᑯᔥ ᐅᑯᓀᐎᕽ ᑳᑮᐅᒋᒋᐗᓂᓂᒃ᙮

ᐊᐊ ᑕᔥ ᑭᒋᐅᑳᑏᑭᓀᐱᒃ ᐅᑮᑭᒋᓂᔥᑫᓂᒫᓐ ᐃᓂ ᐃᑴᐗᓐ᙮ ᒦᔥ ᑳᐃᔑ ᐃᔖᒡ ᐁᐊᑕᒦᑳᓈᒡ ᐃᐃ ᑯᑕᒃ ᑳᐅᑕᑳᓀᓯᓂᒡ ᐃᐃᒫ ᐃᑴᕽ, ᐃᓂᐌᓂᐗᐞ ᑳᑲᓇᐌᑕᒥᓂᒡ ᑭᔐᒪᓂᑑᓐ ᐅᑑᓇᔓᐌᐎᓂᓂ ᑲᔦ ᑳᑭᒋᐎᓇᒥᓂᒡ ᑳᐃᔑᑎᐹᒋᒥᒥᓐᒡ ᒋᓴᓲᓐ᙮

ᐊᐊᐌ ᑕᔥ ᑭᒋᐅᑳᑏᑭᓀᐱᒃ ᐃᐃᒫ ᑮᓃᐸᐎ ᒌᑫᐤ ᒥᑖᐗᑳᕽ ᑭᒋᑲᒦᕽ᙮ ᓂᑮᐙᐸᒫ ᑕᔥ ᐯᔑᒃ ᐱᑾᒋᐊᔭᐋᐎᔥ ᐁᐱᐊᒀᓰᒡ ᑭᒋᑲᒦᕽ, ᐁᒥᑖᒋᓂᒡ ᐅᑌᔥᑲᓇᐞ ᑲᔦ ᐁᓃᔣᒋᓂᓂᑭᓐ ᐅᑎᒀᓇᓐ᙮ ᐁᑕᓱᐯᔑᑯᓂᒡ ᐃᑕᔥ ᐅᑌᔥᑲᓇᐞ ᒦ ᐃᒫ ᐯᔑᒃ ᐁᔮᓂᒃ ᐅᑭᒫᐎ ᐸᓯᑴᐱᓱᓐ᙮ ᒦᑕᔥ ᑳᑕᓯᓂᓂᑭᓐ ᐅᑎᒀᓇᓐ ᒪᒋᐐᓱᐎᓐ ᐁᒪᒋᐹᐱᓀᒥᓐᒡ ᑭᔐᒪᓂᑑ ᑮᐃᔑᐲᐃᑳᑌ᙮

ᐊᐊ ᑕᔥ ᐱᑾᒋᐊᔭᐋᐎᔥ ᑳᐙᐸᒪᒃ ᑭᒋᐴᔐᓯᕽ ᑮᐃᔑᓈᑯᓯ, ᐅᓯᑎᕽ ᑲᔦ ᑖᐱᔥᑰ ᒪᑯᓯᑖᓐ, ᐅᑑᓐ ᑲᔦ ᑖᐱᔥᑰ ᒥᔑᐱᔑᐎᑑᓐ ᑮᐃᔑᓈᑾᓂᓂ᙮ ᐃᓂ ᑕᔥ ᑭᒋᐅᑳᑏᑭᓀᐱᑰᓐ ᐅᑮᒦᓂᑰᓐ ᑎᐱᓇᐌ ᐅᒪᔥᑲᐎᓰᐎᓂᓂ, ᐅᑭᑕᐱᐎᓂᓂ ᑲᔦ ᐅᑭᒋᑎᐯᒋᑫᐎᓂᓂ ᑲᔦ᙮

ᐯᔑᒃ ᐃᑕᔥ ᐃᐃᐌᓂ ᐅᑎᒀᓐ ᐊᐊ ᐱᑾᒋᐊᔭᐋᐎᔥ ᐱᓵᓂᑯ ᑮᐃᔑᓈᑾᓂᓂ ᐁᑮᒫᑭᒋᑳᑌᓂᒃ ᒋᐅᒋᓂᐳᒡ᙮ ᒦᓇᐙ ᑕᔥ ᑮᒥᓄᔭᔮᒋᑳᑌᓂ ᑫᑮᓂᓯᑯᐸᓐ ᑳᑮᐃᔑᒫᑭᒋᑲᓂᐎᒡ ᐅᑎᒀᓂᕽ᙮ ᑲᑭᓇ ᑕᔥ ᒥᓯᐌᑲᒥᒃ ᑳᐊᔮᐙᒡ ᐅᑮᒫᒪᑳᑌᓂᒫᐙᓐ ᐃᓂ ᐱᑾᒋᐊᔭᐋᐎᔕᓐ ᐁᐱᒥᓂᔕᐙᐙᒡ᙮

ᑲᑭᓇ ᐃᑭ ᐯᒫᑎᓯᐙᒡ ᐅᑮᐅᒋᒌᑾᓃᑕᐙᐙᓐ ᐃᓂ ᑭᒋᐅᑳᑏᑭᓀᐱᑰᓐ ᐁᑭᒋ ᐃᓀᓂᒫᐙᒡ, ᐋᓃᔥ ᐅᑎᐯᒋᑫᐎᓂᓂ ᐁᑮᒦᓈᓂᒡ ᐃᓂ ᐱᑾᒋᐊᔭᐋᐎᔕᓐ᙮ ᑲᔦ ᐐᓐ ᐃᓂ ᐱᑾᒋᐊᔭᐋᐎᔕᓐ ᐅᑮᐅᒋᒌᑾᓃᑕᐙᐙᓐ ᐁᐃᑭᑐᐙᒡ: ᐊᐌᓀᓐ ᐁᔑᐊᔮᒡ ᑖᐱᔥᑰ ᐊᐌ ᐱᑾᒋᐊᔭᐋᐎᔥ? ᐊᐌᓀᔥ ᑫᑲᔥᑭᑑᐸᓐ ᒋᒦᑳᓈᒡ?

ᑮᐃᔑᒦᓈ ᒋᑲᑭᒋᒧᒡ ᒋᒪᒋᐹᐱᓀᒫᒡ ᐃᓂ ᑭᔐᒪᓂᑑᓐ᙮ ᑮᐃᔑᒦᓈ ᑲᔦ ᑎᐯᒋᑫᐎᓐ ᒋᐊᔮᒡ ᓃᒥᑕᓇᔑᓃᔑᓐ 42 ᑕᓱᑮᓯᔅ᙮

ᒦᑕᔥ ᐁᒫᒌᑲᑭᑐᒡ ᐅᑮᒪᒪᒋᑕᔑᒫᓐ ᑭᔐᒪᓂᑑᓐ, ᑲᔦ ᐅᑮᒪᒪᒋᑕᔑᑕᒪᐙᓐ ᐅᐐᓱᐎᓂᓂ ᑲᔦ ᐅᑕᔮᐎᓂᓂ, ᐌᑎ ᑲᔦ ᑲᑭᓇ ᑭᒋᑮᔑᑯᕽ ᑳᐅᑖᐎᓂᓂᒡ᙮

ᑮᒦᓈ ᑲᔦ ᒋᐊᐎᒦᑳᑕᒪᐙᒡ ᑭᔐᒪᓂᑑᓐ ᐅᐱᒫᑎᓰᒥᓂ ᑲᔦ ᒋᔖᑰᒋᐋᒡ᙮ ᑮᒦᓈ ᑲᔦ ᒋᑎᐯᓂᒫᒡ ᑲᑭᓇ ᐯᐸᑳᓐ ᑳᐋᔫᒌᓂᒡ ᑲᔦ ᑲᑭᓇ ᐯᐸᑳᓐ ᑳᐋᔫᒋᑎᐯᑖᑯᓯᓂᒡ ᑲᔦ ᐁᑕᓱᐯᐸᑳᓂᑮᔗᓂᒡ ᑲᔦ ᑲᑭᓇ ᑳᑕᓶᐙᓇᑭᓈᑯᓯᓂᒡ᙮

ᑲᑭᓇ ᐃᒫ ᐊᑮᕽ ᑳᐊᔮᐙᒡ ᐅᑲᐅᒋᒌᑾᓃᑕᐙᐙᓐ ᐃᓂ ᐱᑾᒋᐊᔭᐋᐎᔕᓐ᙮ ᐃᑭᐌᓂᐗᒃ ᐁᑕ ᑳᐅᔑᐲᐃᑳᓱᐙᒡ ᐱᒪᑎᓯᐎᓂᒪᓯᓇᐃᑲᓂᕽ, ᑳᐐᓐ ᑕᐃᔑᒋᑫᓰᐗᒃ᙮ ᐊᐌ ᐋᓃᔥ ᒫᓇᒑᓂᔐᔅ ᑳᑮᓂᓯᓐᒡ ᐅᑎᐯᑖᓐ ᒪᓯᓇᐃᑲᓐ ᐃᐃᒫ ᑳᐃᔑᐅᔑᐲᐃᑳᓱᐙᒡ ᐊᐌᓀᓇᐞ ᐱᔑᔑᒃ ᑫᐱᒫᑎᓯᐙᒡ᙮ ᐋᔕ ᑮᐅᔑᐲᐙᐗᒃ ᒋᑆ ᐅᔑᒋᑳᑌᒃ ᐊᑭ᙮ ᐊᒦᐗᒃ ᐁᑕ ᐅᑯ ᑳᐐᓐ ᐅᑲᐅᒋᒌᓋᓃᑕᐙᓰᐙᐙᓐ ᐃᓂ ᐱᑾᒋᐊᔭᐋᐎᓴᓐ᙮

ᑮᔥᐱᓐ ᐊᐎᔭ ᐌᓅᑕᒫᐎᓂᑴᓐ ᒫᓄ ᐅᑲᐱᓯᑖᓐ!

ᐊᐌᓀᓂᑯ ᐁᓀᑖᑯᓯᒡ ᒋᑳᒋᑎᓂᒡ ᑫᒋᓈᒡ ᑕᑳᒋᑎᓈ ᒋᒫᒌᓂᓐᒡ᙮ ᐊᐌᓀᓂᑯ ᐁᓀᑖᑯᓯᒡ ᒨᑯᒫᓂᕽ ᒋᐅᒋᓂᓯᓐᒡ, ᑕᐅᒋᓂᓵ ᒨᑯᒫᓂᕽ᙮ ᒦᔥ ᐃ ᐁᔑᐊᑕᐌᑖᑯᓯᓂᒡ ᑭᔐᒪᓂᑑ ᐅᑾᔭᒀᑎᓰᒪᐞ ᒋᒪᔥᑲᐌᑕᒥᓂᒡ ᑲᔦ ᒋᑲᐯᑌᐺᑕᒥᓂᒡ᙮

ᓂᐙᐸᒫ ᑕᔥ ᑯᑕᒃ ᐱᑾᒋᐊᔭᐋᐎᔥ ᐊᑮᕽ ᐁᐱᐅᒋᒨᑮᒡ, ᐁᓃᔑᓂᒡ ᐅᑌᔥᑲᓇᐞ ᑖᐱᔥᑰ ᑳᐃᔑᑌᔥᑲᓀᓂᒡ ᒫᓇᒑᓂᔐᓴᓐ᙮ ᑭᒋᐅᑳᑏᑭᓀᐱᑯᕽ ᐃᑕᔥ ᑮᐃᓂᑖᑯᓯ ᐁᑮᑭᑐᒡ᙮

ᐗᐊ ᑯᑕᒃ ᐊᔭᐋᐎᔥ ᐅᑮᐋᐸᒋᑕᒪᐙᓐ ᐅᑭᒋᑎᐯᒋᑫᐎᓂᓂ ᐃᓂ ᓂᑕᒻ ᐊᔭᐋᐎᔕᓐ ᒣᒀ ᐁᑲᓇᐙᐸᒥᑯᒡ᙮ ᐅᑮᑲᔥᑭᑑᓐ ᐊᑮᓂ ᑲᔦ ᐃᑭ ᐊᑮᕽ ᑳᐊᔮᐙᒡ ᒋᐅᒋᒌᑾᓃᑕᐙᓂᒡ ᐃᓂ ᓂᑕᒻ ᐱᑾᒋᐊᔭᐋᐎᔕᓐ ᐃᓂ ᑳᑮᒥᓄᔮᔮᒋᑳᑌᓂᒃ ᐅᓂᓯᑰᐎᓐ ᑳᐃᔑᒫᑭᒋᑲᓂᐎᒡ᙮

ᐊᐊ ᑕᔥ ᑯᑕᒃ ᐱᑾᒋᐊᔭᐋᐎᔥ ᐅᑮᑑᑖᓇᓐ ᑭᒋᒫᒪᑳᒋᒋᑫᐎᓇᓐ, ᐴᔥᑫ ᐊᐙᒡ ᒋᐱᓈᔕᑮᓭᓂᒃ ᐃᔥᑯᑌ ᐊᑮᕽ, ᑮᔑᑯᕽ ᒋᐅᒋᓭᓂᒃ, ᐁᐙᐸᒥᑯᒡ ᑲᑭᓇ ᐯᒫᑎᓯᓂᒡ᙮

ᒦᔥ ᐃᐃ ᐅᑮᐅᒋᐗᔦᔑᐋᐞ ᐃᓂ ᐊᑮᕽ ᑳᐊᔮᓂᒡ ᐃᓂ ᐅᒫᒪᑳᒋᒋᑫᐎᓇᓐ ᐁᑮᐋᐸᒋᑑᒡ ᑳᑮᒦᓂᓐᒡ ᒋᑑᑕᕽ ᐁᐙᐸᒥᑯᒡ ᐃᓂ ᓂᑕᒻ ᐱᑾᒋᐊᔭᐋᐎᔕᓐ᙮ ᐅᑮᐐᑕᒪᐙᐞ: ᐅᔑᐃᒃ ᒪᓂᑑᑳᓂᐎᑰᒋᑲᓐ, ᒋᑭᒋ ᐃᓀᒋᑲᓂᐎᒡ ᐊᐊ ᐯᔑᒃ ᐱᑾᒋᐊᔭᐋᐎᔥ ᑭᒋᒨᑯᒫᓂᕽ ᑳᑮᐅᒋᒫᑲᑲᓈᓱᒡ, ᒦᓇᐙ ᑕᔥ ᐁᐱᒫᑎᓯᒡ, ᑮᐃᑭᑐ᙮

ᐊᐊ ᑕᔥ ᑯᑕᒃ ᐊᔭᐋᐎᔥ ᑮᒦᓈ ᐁᑮᐸᑭᑕᓈᒧᓄᑕᐙᒡ ᐃᓂ ᐅᔑᑰᒋᑲᓇᓐ ᒋᐱᒫᑎᓯᓂᒡ, ᒦᐗᓂᓂ ᓂᑕᒻ ᐊᔭᐋᐎᔕᓐ ᑳᐃᔑᓈᑯᓯᓂᒡ ᐅᔑᑰᒋᑲᓇᓐ᙮ ᐗᐊᔥ ᐅᔑᑰᒋᑲᓐ ᐅᑮᑲᔥᑭᑑᓐ ᒋᑲᑭᑐᒡ ᑲᔦ ᒋᓂᓯᒥᓐᒡ ᐊᐌᓀᓇᓐ ᐃᑯ ᑳᐐᐅᒋᒌᑾᓃᑖᑯᓯᒃ᙮

ᐊᐊᐌ ᑕᔥ ᐊᔭᐋᐎᔥ ᐅᑮᑲᔥᑭᐋᐞ ᑲᑭᓇ ᐊᐎᔭᐞ ᒋᑭᑭᓇᐙᒋᒋᑲᓂᐎᓂᒡ ᐅᑭᒋᓂᑭᓃᕽ ᑫᒫ ᐅᔅᑲᑎᑯᓃᕽ᙮ ᑲᑭᓇ ᐊᐎᔭ ᑮᑭᑭᓇᐙᒋᐋ, ᑳᐊᑳᓭᑖᑯᓯᐙᒡ ᑲᔦ ᑳᑭᒋ ᐃᓀᑖᑯᓯᐙᒡ, ᑳᐌᓅᑎᓯᐙᒡ ᑲᔦ ᑳᑭᑎᒫᑭᓯᐙᒡ, ᑳᑎᐯᓂᑎᓱᐙᒡ ᑲᔦ ᑳᑎᐯᑖᑯᓯᐙᒡ᙮

ᑮᔥᐱᓐ ᐊᐎᔭ ᒦᓈᓯᐎᓐᒡ ᐃᐃᐌ ᑭᑭᓇᐙᒋᐲᐅᑰᐎᓐ, ᑳᐐᓐ ᑕᐊᑖᐌᓰ, ᑳᐐᓐ ᑲᔦ ᑫᑰᓐ ᑕᐊᑖᐙᑫᓰ, ᒦ ᐁᑕ ᐊᐎᔭ ᐃᔑᐅᔑᐲᐅᓐᒡ ᐅᐐᓱᐎᓂᓂ ᐃᓂ ᐱᑾᒋᐊᔭᐋᐎᔕᓐ ᑫᒫ ᐃᐌᓂ ᐅᑕᑭᑖᓱᐎᓂᓂ, ᒦ ᐅᐌ ᐅᐐᓱᐎᓂᓂ ᑳᐃᒋᑳᑌᓂᒃ᙮

ᐊᑕᐌᑖᑯᓯ ᐊᐎᔭ ᒋᑭᑫᑕᒫᐎᓯᒡ: ᐊᐌᓀᓂᑯ ᐊᐊ ᑳᑭᑫᑖᓱᒡ ᐅᑲᓂᐅᒋᒫᒥᑴᑖᓐ ᐋᓃᓐ ᑳᐃᒋᑳᑌᓂᒃ ᐃᐌ ᐅᑕᑭᑖᓱᐎᓂᓂ ᐃᓂ ᐱᑾᒋᐊᔭᐋᐎᔕᓐ᙮ ᐋᓃᔥ ᒦ ᐁᒋᑳᑌᒃ ᐃᓂᓃᐎ ᐐᓱᐎᓐ, ᐊᒦ ᐅᐌ ᐁᐃᓇᑭᑌᒃ ᐃᐃ ᐐᓱᐎᓐ: ᓂᑯᑣᔂᒃ ᓂᑯᑣᓯᒥᑕᓇᔑᓂᑯᑣᓱ 666.

ᒦᑕᔥ ᓂᑮᐃᓈᑉ᙮ ᐊᐊᐌᔥ ᒫᓇᒑᓂᔐᔅ ᑮᓃᐸᐎ ᐃᔥᐸᑎᓈᕽ, ᓵᔭᓐ ᐗᒋᐤ ᑳᐃᒋᑳᑌᒃ᙮ ᐅᑮᐐᒌᐎᑰᐞ ᐊᐎᔭᐞ ᓂᑯᑣᒃ ᓃᒥᑕᓇᔑᓃᐎᕽ ᒥᑖᔂᒃ 144,000 ᐁᑮᑕᔑᓂᒡ᙮ ᐃᐃᒫ ᑕᔥ ᐅᔅᑲᑎᑯᓃᕽ ᑮᐅᔑᐲᐃᑳᑌᓂᐗᓐ ᐅᐐᓱᐎᓐ, ᐅᑌᑌᓐ ᑲᔦ ᐅᐐᓱᐎᓂᓂ᙮

ᒦᔥ ᐃᐌ ᓂᑮᓅᑖᓐ ᐃᓂᑖᑯᓯᐎᓐ ᑭᒋᑮᔑᑯᕽ ᑳᐅᓯᑖᑾᒃ᙮ ᑖᐱᔥᑰ ᑭᒋᐹᐎᑎᒃ ᐁᒪᑗᒋᐗᕽ ᑮᐃᓂᑖᑾᓐ, ᑲᔦ ᑖᐱᔥᑰ ᐱᓀᓯᐗᒃ ᑳᐊᐲᒋᓲᑭᑖᑯᓯᐙᒡ᙮ ᔑᑾ ᐱᓵᓂᑯ ᐅᑭᑐᒋᑫᒃ ᐁᒪᑗᔮᐲᑭᐱᒋᑫᐙᒡ ᑮᐃᓂᑖᑾᓐ᙮

ᐃᑭ ᑕᔥ ᓂᑯᑣᒃ ᓃᒥᑕᓇᔑᓃᐎᕽ ᒥᑖᔂᒃ 144,000 ᑳᑕᔑᐙᒡ ᐃᐃᒫ ᑮᐅᒋᔥᑲᐎᑳᐸᐎᐗᒃ ᑭᒋᐊᐱᐎᓐ ᑳᐃᔑᐊᑌᓂᒃ ᑲᔦ ᑳᐃᔑᐊᔮᓂᒡ ᐃᐃ ᓃᐎᓐ ᐅᐱᒫᑎᓰᐞ ᑲᔦ ᐅᓃᑳᓂᓰᐞ᙮ ᐅᔥᑭᓂᑲᒧᐎᓐ ᐅᑮᓂᑲᒧᓈᑫᓈᐙ᙮ ᐐᓀᑕᐙ ᓴ ᑯ ᐅᑲᑭᑫᑖᓈᐙ ᐃ ᓂᑲᒧᓐ᙮ ᑳᐐᓐ ᐸᑳᓐ ᐊᐎᔭ ᐅᑖᑲᔥᑭᑑᓰᓐ, ᒦ ᐁᑕ ᐃᑭᐌᓂᐗᒃ ᐅᒋ ᐃᒫ ᒥᓯᐌ ᐊᑮᕽ ᑳᑮᐅᒋᑎᐸᐅᑣ ᑭᔐᒪᓂᑑᕽ ᒋᑎᐯᑖᑯᓯᐙᒡ᙮

ᒦᐗᒃ ᐅᑯᐌᓂᐗᒃ ᑲᔦ ᒥᓯᐌ ᑳᑲᓇᐌᓂᑎᓱᐙᒡ ᐁᑳ ᑳᑮᐅᒋᐐᒌᐙᓯᒀ ᐃᑴᐗᐞ ᑲᔦ ᐁᐯᑭᐱᒫᑎᓯᐙᒡ᙮ ᒦᐗᑯᑯ ᐯᐹᒥᓂᔕᐙᐙᒡ ᐃᓂ ᒫᓇᒑᓂᔐᓴᓐ ᒥᓯᐌ ᑯ ᐱᑯ ᐋᑎ ᑳᐸᐹᐃᔖᓂᒡ᙮ ᐃᐃᒫ ᐅᒋ ᑯᑕᒃ ᑳᐱᒫᑎᓯᓂᒡ ᑮᐅᒋᑎᐸᐙᐗᒃ ᐅᑯ᙮ ᓂᑕᒻ ᐸᑭᑎᓂᑫᐎᓂᕽ ᑮᐃᓀᑖᑯᓯᐗᒃ ᐁᑮᒦᓂᓐᒡ ᑭᔐᒪᓂᑑ ᑲᔦ ᒫᓇᒑᓂᔐᔅ᙮

ᒦᐗᑯᑯ ᒨᔕᒃ ᑳᑌᐺᐙᒡ; ᑳᐐᓐ ᐐᑳ ᑮᑭᑫᒋᑲᓂᐎᓰᐗᒃ ᒋᑮᐗᓂᒧᐙᒡ, ᑳᐐᓐ ᑲᔦ ᑫᑰᓐ ᐃᔑᐊᔮᓰᐗᒃ᙮

ᓂᑮᐙᐸᒫ ᑕᔥ ᒦᓇᐙ ᐯᔑᒃ ᐁᒐᓬ ᐙᓴ ᐃᔥᐱᒥᕽ ᐁᐱᒥᐊᔮᒡ ᐁᐊᔮᒡ ᐱᔑᔑᒃ ᑫᐊᔮᓂᒃ ᒥᓄᑎᐹᒋᒧᐎᓐ ᑲᑭᓇ ᒋᐐᑕᒪᐎᑣ ᐃᑭ ᐯᒫᑎᓯᐙᒡ ᐊᑮᕽ᙮ ᑲᑭᓇ ᑳᑕᓶᐙᓇᑭᓈᑯᓯᐙᒡ, ᒥᓯᐌ ᑲᔦ ᑳᐅᑕᑳᓀᓯᐙᒡ, ᑲᑭᓇ ᑲᔦ ᑳᑕᓱᐯᐸᑳᓂᑮᔗᐙᒡ, ᑲᑭᓇ ᑲᔦ ᐯᐸᑳᓐ ᑳᐅᒋᑎᐯᑖᑯᓯᐙᒡ ᑕᐐᑕᒪᐙᐗᒃ᙮

ᒦᔥ ᐃᐌ ᐁᑭᔒᐌᒡ: ᑯᑖᓀᓂᒥᒃ ᑭᔐᒪᓂᑑ, ᑭᒋ ᐃᓇᑭᒥᒃ! ᐋᔕ ᐅᒋᒋᓭᓂ ᑳᐐᑎᐹᑯᓂᐌᒡ᙮ ᐅᒋᒌᑾᓃᑕᐎᒃ ᐊᐊᐌ ᑳᑮᐅᔑᑑᒡ ᑮᔑᒃ, ᐊᑭ ᑲᔦ, ᑭᒋᑲᒻ ᑲᔦ, ᑳᐃᔑᒨᑭᒋᐗᓂᓂᑭᓐ ᑲᔦ, ᑮᐃᑭᑐ᙮

ᑯᑕᒃ ᒦᓇᐙ ᐯᔑᒃ ᐁᒐᓬ ᓈᐗᓐ ᑮᐱᒥᐊᔮ ᐁᒪᑗᐃᑭᑐᒡ: ᓂᔑᐗᓈᑕᓐ ᐃᐌ ᐹᐱᓬᐊᓐ ! ᐊᒦ ᐃ ᐐᑫ ᑮᓂᔑᐗᓈᑕᒃ ᐃᐌ ᑳᑭᒋ ᐃᓀᑖᑾᑭᐸᓐ ᐆᑌᓇ! ᐋᓃᔥ ᐅᐅᐌ ᐃᓀᑖᑾᓐ ᐃᐃ ᐆᑌᓇ, ᐁᐱᔑᒀᑎᓯᒡ ᐃᑴ ᐁᑮᒦᓈᒡ ᑲᑭᓇ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ ᐅᔔᒥᓈᐴᒻ ᒋᒥᓂᑴᓂᒡ᙮ ᒦ ᐃᐌ ᐁᑮᑲᔥᑭᐋᒡ ᐅᒪᒋᒥᓴᐌᑖᓱᐎᓐ ᒋᑑᑕᒥᓂᒡ, ᑮᐃᑭᑐ ᐊᐊ ᐁᒐᓬ᙮

ᑫᔮᐱ ᑕᔥ ᑯᑕᒃ ᐁᒐᓬ ᐅᑮᓈᐗᓅᓂᔕᐙᐞ ᐃᐃ ᓃᔑᓐ ᑳᑮᐱᐱᒥᐊᔮᓂᒡ, ᐁᑮᑭᔒᐌᒡ: ᑮᔥᐱᓐ ᐊᐎᔭ ᐅᒋᒌᑾᓃᑕᐙᒡ ᐃᓂ ᐱᑾᒋᐊᔭᐋᐎᔕᓐ ᑲᔦ ᐅᒪᓂᑑᑫᐎᑰᒋᑲᓂᓂ, ᑲᔦ ᐅᒋᑭᑭᓇᐙᒋᐃᓐᒡ ᐃᐃ ᐅᔅᑲᑎᑯᕽ ᑯᒫ ᐅᓂᒌᕽ,

ᐅᑯ ᑳᐃᔑᒋᑫᐙᒡ ᒦᐗᑯᑯ ᑫᐃᔑᒥᓂᑴᐙᒡ ᑭᔐᒪᓂᑑᓐ ᐅᔔᒥᓈᐴᒥᓂ ᒫᐗᒡ ᐁᒪᔥᑲᐙᑲᒥᓂᓂᒃ, ᑳᑮᒨᔥᑭᓀᐸᑑᓂᒡ ᐅᒥᓇᐃᐌᐎ ᒥᓂᒀᑲᓂᓃᕽ᙮ ᒦᐗᑯᑯ ᑫᐙᐸᑕᒧᐙᒡ ᑭᔐᒪᓂᑑᓐ ᐅᓂᔥᑳᑎᓯᐎᓂᓂ ᒫᐗᒡ ᐁᒪᔥᑲᐌᑖᑾᓂᓂᒃ, ᐗᐐᑫ ᐁᐐᐸᑕᑯᔥᑳᑯᐙᒡ, ᐁᐐᐃᔑᑎᐸᐊᒫᑯᐙᒡ ᐅᑎᔑᒋᑫᐎᓂᐙᓐ᙮ ᒦ ᐃᒫ ᑕᐃᔑᑲᒀᑕᑭᐋᐗᒃ ᐃᐃᒫ ᐃᔥᑯᑌᕽ ᑲᔦ ᑳᑕᔑᓂᑭᓱᒡ ᑎᓄ ᐊ ᐊᓯᓐ ᑳᐐᓴᑳᐸᓱᐌᒡ ᑮᒑᑭᓱᒡ᙮ ᑕᐃᔑᑲᒀᑕᑭᐋᐗᒃ ᐃᐃᒫ ᐁᐙᐸᒥᑯᐙᒡ ᑳᑾᔭᒀᑎᓯᓂᒡ ᐁᒐᓬᐊᐞ, ᐃᓂ ᑲᔦ ᒫᓇᒑᓂᔐᓴᓐ᙮

ᒨᔕᒃ ᐊᐸᓀ ᐱᔑᔑᒃ ᑕᐅᒋᐊᒀᐸᑌ ᐃᐃᒫ ᑳᑕᔑᑲᒀᑕᑭᐃᑣ᙮ ᑳᐐᓐ ᐐᑳ ᑕᐋᑌᐊᔮᓰᐗᒃ᙮ ᐁᑮᔑᑲᓂᓂᒃ ᑲᔦ ᐁᑎᐱᑲᓂᓂᒃ ᑕᑲᒀᑕᑭᐋᐗᒃ ᐊᐌᓀᓐ ᓴ ᑯ ᑫᐅᒋᒌᑾᓃᑕᐙᐙᒡ ᐃᓂ ᐱᑾᒋᐊᔭᐋᐎᔕᓐ, ᐃᓂ ᑲᔦ ᐅᒪᓂᑑᑳᓂᑰᒋᑲᓂᓂ, ᐊᐎᔭ ᑲᔦ ᐃᔑᑭᑭᓇᐙᒋᐃᓐᒡ ᐅᐐᓱᐎᓂᓂ᙮

ᒦ ᐅᐌ ᐁᔑᐊᑕᐌᑖᑾᒃ ᒋᒪᔥᑲᐌᑕᒥᓂᒡ ᑭᔐᒪᓂᑑ ᐅᑾᔭᒀᑎᓰᒪᐞ, ᐊᐌᓀᓇᒃ ᓴ ᑯ ᑳᑲᓇᐌᑕᒧᐙᒡ ᑭᔐᒪᓂᑑᓐ ᐅᑑᓇᔓᐌᐎᓂᓂ ᑲᔦ ᑳᑲᐯᑌᐺᑕᐙᐙᒡ ᐃᓂ ᒋᓴᓲᓐ᙮

ᓂᑮᓅᑖᓐ ᐃᓉᐎᓐ ᑭᒋᑮᔑᑯᕽ ᐅᒋ ᐁᑲᓅᓂᑯᔮᓐ: ᐅᔑᐲᐊᓐ ᐅᐅ: ᓅᑯᒻ ᐅᒫ ᐊᑯᓈᒃ ᑕᔕᐌᑖᑯᓯᐗᒃ ᐃᑭ ᑫᓂᐳᐙᒡ ᒣᒀ ᐁᐱᒥᐐᒌᐙᐙᒡ ᐃᓂ ᑳᑎᐯᒋᑫᓂᒡ, ᓂᑮᐃᑯᓐ᙮ ᐁᐊᐞ, ᒦᓇᑫ, ᐃᔑᓇᑯᑕᒨᓐ ᑭᔐᒪᓂᑑ ᐅᑕᒑᑾᓐ᙮ ᐅᑲᒀᑕᑲᓄᑮᐎᓂᐙᕽ ᑕᐅᒋᐊᓉᐱᐗᒃ᙮ ᐅᑲᒥᓄᐐᒌᐎᑯᓈᐙᓐ ᑕᔥ ᐃᐃᐌᓂ ᑳᐅᒋᑲᔥᑭᑑᐙᒡ ᐅᑕᓄᑮᐎᓂᐙᕽ, ᐃᑭᑐᐗᓐ᙮

ᒦᑕᔥ ᓂᑮᐃᓈᑉ, ᓂᑮᐙᐸᑖᓐ ᐃᑕᔥ ᐁᐙᓯᑌᒃ ᐗᑶ, ᐃᒫᔥ ᐗᑭᒋᐗᑶ ᐊᐎᔭ ᐁᓇᒪᑕᐱᒡ ᐃᓂᓃᕽ ᑳᐃᔑᓈᑯᓯᒡ, ᐅᓵᐎ ᔔᓂᔮᐎ ᐸᓯᑴᐱᓱᓐ ᐁᑭᑭᔥᑲᕽ, ᑲᔦ ᐁᑕᑯᓇᕽ ᐁᑳᔖᓂᒃ ᑮᔥᑭᔑᑲᓐ᙮

ᒦᓇᐙ ᑯᑕᒃ ᐁᒐᓬ ᑮᐱᐅᒋᓵᑲᐊᒻ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐅᒋ ᐁᑮᑭᔒᐌᔖᑯᐙᓈᒡ ᐃᓂ ᐗᑸᕽ ᑳᓇᒪᑕᐱᓂᒡ: ᐊᐤ ᐋᐸᒋᑑᓐ ᑭᑮᔥᑭᔑᑲᓐ, ᐊᐎᒪᓂᔑᑫᓐ! ᐋᔕ ᐅᒋᒋᓭ ᒋᒪᓂᔑᑫᕽ, ᐋᔕ ᑮᔑᑭᓐ ᐃᐃᒫ ᑳᐅᒋᓂᑖᐎᑭᒃ ᐊᑮᕽ!

ᒦᑕᔥ ᐊᐊᐌ ᐗᑸᕽ ᑳᓇᒪᑕᐱᒡ ᐅᑮᐃᔑᐌᐱᓈᓐ ᐅᑮᔥᑭᔑᑲᓐ, ᐁᑮᒪᓂᔑᑫᒡ ᐊᑮᕽ᙮ ᒦ ᐃᐌ ᐁᑮᑮᔑᒪᓂᔑᑳᑌᒃ ᐃᐌᓂ ᐊᑮᕽ ᑳᑭᑎᑳᒋᑳᑌᓂᒃ᙮

ᒦᓇᐙ ᑯᑕᒃ ᐁᒐᓬ ᑮᐱᐅᒋᓵᑲᐊᒻ ᐃᒫ ᑭᒋᐊᓇᒥᐁᐎᑲᒥᑯᕽ ᑭᒋᑮᔑᑯᕽ ᑳᐊᔮᓂᒃ, ᒦ ᐊᐌ ᑲᔦ ᐐᓐ ᐁᐊᔮᒡ ᑳᑳᔖᐱᑲᓂᓂᒃ ᑮᔥᑭᔑᑲᓐ᙮

ᒦᓇᐙ ᑕᔥ ᐯᔑᒃ ᐁᒐᓬ ᑮᐱᐅᒌ ᐃᐃᒫ ᐸᑭᑎᓈᓱᐎᓈᐱᑯᕽ ᑳᑕᔑᑎᐯᑕᕽ ᐃᐃ ᐃᔥᑯᑌᓂ, ᐁᑮᑭᔒᐌᔖᑯᐙᓈᒡ ᐃᓂ ᑳᑳᔖᓂᒃ ᐅᑮᔥᑭᔑᑲᓂᓂ: ᐃᔑᐌᐱᓇᓐ ᑭᑮᔥᑭᔑᑲᓐ, ᒪᓂᔓ ᐃᑭ ᔔᒥᓇᒃ ᑳᑕᔑᓂᑖᐎᑭᐙᒡ ᔔᒥᓂᑭᑎᑫᐎᓂᕽ ᐊᑮᕽ, ᐋᔕ ᑮᔑᐊᑎᓱᐗᒃ!

ᐊᒦ ᐃᐌ ᑳᐃᔑᐌᐱᓇᕽ ᐅᑮᔥᑭᔑᑲᓐ ᐊᑮᕽ ᐁᒪᓂᔣᒡ ᐃᐃ ᔔᒥᓇᐞ, ᒦᔥ ᐁᑮᐃᔑᐌᐱᓇᒡ ᐃᐃᒫ ᐃᐃ ᔔᒥᓇᐞ ᒋᒫᒫᑯᔥᑭᑲᓂᐎᓂᒡ ᐁᔔᒥᓈᐳᑳᑳᓂᐗᓂᓂᒃ, ᒦ ᐃᐌᓂ ᐁᓀᑖᑾᓂᓂᒃ ᑭᔐᒪᓂᑑ ᐅᑭᒋᓂᔥᑳᑎᓯᐎᓐ᙮

ᒦ ᐃᒫ ᐊᑾᒌᕽ ᐆᑌᓈᕽ ᑳᐃᔑᐊᔮᒡ ᔔᒥᓈᐴᑳᓐ ᑮᑕᔑᒫᒫᑯᔥᑭᑲᓂᐎᐗᒃ ᐃᑭ ᔔᒥᓇᒃ᙮ ᐊᒦ ᐃᒫ ᒫᑯᔥᑭᑲᓂᕽ ᑮᐅᒌ ᒥᔅᑶ ᐁᑭᒋᐅᒋᒋᐗᕽ, ᓃᔣᒃ 200 ᑕᓱᑎᐸᐃᑲᓐ ᐁᑮᐃᔑᒋᐗᕽ, ᓈᓄᒥᓯᑦ ᐁᑮᐊᐲᑖᔭᐙᒃ ᒥᔅᑶ᙮

ᒦᓇᐙ ᐯᔑᒃ ᓂᑮᐙᐸᑖᓐ ᐃᐃᐌ ᐁᐃᔑᒫᒪᑳᓯᓈᑾᒃ ᑭᒋᑮᔑᑯᕽ ᐁᐃᔑᑭᒋ ᐃᓀᑖᑾᒃ ᑲᔦ ᐁᐃᔑᒫᒪᑳᑌᑖᑾᒃ, ᓃᔣᓱ 7 ᐃᑭ ᐁᒐᓬᐊᒃ ᐁᐊᔮᐙᒡ ᐁᓃᔣᒋᓂᓂᑭᓐ ᑲᒀᑕᑭᐃᐌᐎᓇᓐ, ᐊᒦᐗᓄᓄ ᐃᔥᒀᒡ ᑫᓂᐊᔮᑭᓐ᙮ ᐋᓃᔥ ᐊᒦ ᐃᐌ ᑫᐃᔑ ᐃᔥᒀᐙᐸᑕᐃᐌᒡ ᑭᔐᒪᓂᑑ ᐅᓂᔥᑳᑎᓯᐎᓐ᙮

ᓂᑮᐙᐸᑖᓐ ᐱᓵᓂᑯ ᐁᐙᓭᒋᑲᓈᐱᑯᐗᕽ ᓵᑲᐃᑲᓐ ᐁᐊᔮᒃ ᐁᑭᓂᑲᐎᓈᑾᒃ ᐃᔥᑯᑌ᙮ ᐊᐎᔭᒃ ᐃᑕᔥ ᓂᑮᐙᐸᒫᒃ ᒌᑲᔭᐄ ᐙᓭᒋᑲᓈᐱᑯᓵᑲᐃᑲᓃᕽ ᐁᓃᐸᐎᐙᒡ᙮ ᒦᐗᑯᑯ ᑳᑮᔖᑰᒋᐋᐙᒡ ᐃᓂ ᐱᑾᒋᐊᔭᐋᐎᔕᓐ, ᐅᒪᓂᑑᑳᓂᑰᒋᑲᓂᓂ ᑲᔦ, ᐁᑮᔖᑰᒋᑕᒪᐙᐙᒡ ᑲᔦ ᐅᑕᑭᑖᓱᐎᓂᓂ ᑳᐅᒋᑭᑫᑖᑾᓂᓂᒃ ᐅᐐᓱᐎᓂᓂ᙮ ᐅᑯ ᐃᒫ ᑳᓃᐸᐎᐙᒡ ᐅᑮᑕᑯᓈᐙᐞ ᒪᑗᔮᐲᑭᐱᒋᑲᓇᐞ ᑭᔐᒪᓂᑑᓐ ᑳᑮᒦᓂᑯᐙᒡ᙮

ᑮᐃᔑᓂᑲᒧᐗᒃ ᐃᑕᔥ ᑳᑮᐃᔑᓂᑲᒧᓂᒡ ᒨᓯᓲᓐ ᑭᔐᒪᓂᑑ ᐅᑕᓄᑮᐋᑲᓇᓐ, ᐅᓂᑲᒧᓂᓂ ᑲᔦ ᐃᓂ ᒫᓇᒑᓂᔐᓴᓐ᙮ ᒦ ᐅᐌ ᑳᐃᔑᓂᑲᒧᐙᒡ: ᑮᓐ ᑳᑎᐯᒋᑫᔭᓐ ᑫᔐᒪᓂᑑᐎᔭᓐ, ᑮᓐ ᒥᔮᒪᐎᒪᔥᑲᐌᑖᑯᓯᔭᓐ! ᑭᒋ ᐃᓀᑖᑾᓅᓐ ᒫᒪᑳᑌᑖᑾᓅᓐ ᑲᔦ ᑭᑎᔑᒋᑫᐎᓇᓐ! ᑾᔭᑾᓐ ᑲᔦ ᑌᐺᐎᓂᐗᓐ ᑭᑎᔑᐱᒫᑎᓯᐎᓐ, ᑮᓐ ᑳᑭᒋᐅᑑᑭᒫᒥᐙᒡ ᐃᑭ ᒥᓯᐌᑲᒥᒃ ᑳᐋᔫᒋᑎᐯᑖᑯᓯᐙᒡ᙮

ᐊᐌᓀᔥ ᐁᑳ ᑫᑯᑖᓀᓂᒥᓯᓄᒃ, ᑮᓐ ᑌᐯᒋᑫᔭᓐ? ᐊᐌᓀᓐ ᑫᑭᒋ ᐃᓇᑭᑕᓯᒃ ᑭᐐᓱᐎᓐ? ᐋᓃᔥ ᑮᓐ ᐁᑕ ᒥᓯᐌ ᑭᑾᔭᒀᑎᓯᐗᑫᑖᑯᔅ᙮ ᑲᑭᓇ ᐱᑯ ᐊᐎᔭᒃ ᐁᑕᓶᐙᓇᑭᓯᐙᒡ ᑭᑲᐱᐊᑕᐅᒋᒌᑾᓇᐲᑖᑰᒃ, ᐋᓃᔥ ᑳᑾᔭᑾᑭᓐ ᑭᑎᔑᒋᑫᐎᓇᓐ ᒥᓯᐌ ᐙᐸᒋᑳᑌᐗᓐ, ᑮᐃᓇᐊᒨᒃ᙮

ᒦᓇᐙ ᑕᔥ ᓈᑫ ᓂᑮᐙᐸᑖᓐ ᐁᐹᑭᓯᕽ ᑭᒋᐊᓇᒥᐁᐎᑲᒥᒃ ᑭᒋᑮᔑᑯᕽ, ᒦ ᐃᐌ ᑭᒋᐸᒀᓀᑲᒥᒃ ᑭᔐᒪᓂᑑ ᑫᐅᒋᒫᒥᑲᐎᓄᑖᑯᒡ ᐁᐐᒌᐙᒡ ᐅᐱᒫᑎᓰᒪᐞ᙮

ᒦᑕᔥ ᐃᒫ ᑭᒋᐊᓇᒥᐁᐎᑲᒥᑯᕽ ᐁᐱᓵᑲᐊᒧᐙᒡ ᐃᑭ ᓃᔣᓱ 7 ᐁᒐᓬᐊᒃ, ᒦᐗᑯᑯ ᓃᔣᓱ ᑲᒀᑕᑭᐃᐌᐎᓇᓐ ᑳᐊᔮᐙᒡ᙮ ᑮᐙᐱᔥᑳᓂᐗᓐ ᐅᑭᑭᔥᑭᑲᓂᐙᓐ ᑲᔦ ᑮᐙᓯᑌᓂᐗᓐ᙮ ᔑᑾ ᑮᑭᒋᐱᓱᐗᒃ ᐅᑳᑭᑲᓂᐙᕽ ᐁᐅᓵᐎ ᔔᓂᔮᐎᓈᑾᓂᓂᑭᓐ ᐅᑳᑭᑲᓀᐱᓱᓇᓐ᙮

ᐯᔑᒃ ᐃᑕᔥ ᐃᑭ ᓃᐎᓐ ᐅᐱᒫᑎᓰᒃ ᐯᐯᔑᒃ ᐅᑮᒦᓈᐞ ᐃᓂ ᑳᓃᔣᒋᓂᒡ ᐁᒐᓬᐊᐞ, ᐃᓂ ᓃᔣᓱ ᐅᓵᐎ ᔔᓂᔮᐎ ᑭᒋᐅᓈᑲᓇᓐ ᐁᒨᔥᑭᓀᓂᒃ ᐅᓂᔥᑳᑎᓯᐎᓐ ᑭᔐᒪᓂᑑ, ᐊᐊ ᑳᐱᒫᑎᓯᒡ ᐱᔑᔑᒃ ᐊᐸᓀ ᐱᑯ᙮

ᐃᐃᒫ ᑭᒋᐊᓇᒥᐁᐎᑲᒥᑯᕽ ᑮᑕᔑᒨᔥᑭᓀᔮᐸᑌ᙮ ᑮᐅᒌ ᐃᒫ ᐊᒀᐸᑌ ᐅᐙᓭᔮᐎᓂᕽ ᑲᔦ ᐅᑭᒋᒪᔥᑲᐎᓰᐎᓂᕽ ᑭᔐᒪᓂᑑ ᐃᐃᒫ ᑳᐊᔮᓂᒃ᙮ ᑳᐐᓐ ᐃᑕᔥ ᐊᐎᔭ ᐅᑮᑲᔥᑭᑑᓰᓐ ᒋᐲᑎᑫᒡ ᑭᒋᐊᓇᒥᐁᐎᑲᒥᑯᕽ, ᐹᓂᒫ ᑯ ᑮᐴᓂᓭᓂᑭᓐ ᐃᓂ ᓃᔣᓱ ᑲᒀᑕᑭᐃᐌᐎᓇᓐ ᑳᐱᑕᑯᓇᒧᐙᒡ ᐃᑭ ᑳᓃᔣᒋᐙᒡ ᐁᒐᓬᐊᒃ᙮

ᓂᑮᓅᑕᐙ ᑕᔥ ᐊᐎᔭ ᐁᑭᒋᓅᑖᑯᓯᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐁᐅᒋᑮᑭᑐᒡ, ᐁᑲᓅᓈᒡ ᐅᓄ ᓃᔣᓱ 7 ᐁᒐᓬᐊᐞ: ᐊᓂᒫᒑᒃ, ᐊᐎᓰᑭᓇᒧᒃ ᐊᑮᕽ ᐃᐌ ᑭᔐᒪᓂᑑ ᐅᓂᔥᑳᑎᓯᐎᓐ ᐃᒫ ᑳᐃᔑᐊᑌᓂᒃ ᑳᓃᔡᒋᑭᓐ ᑭᒋᐅᓈᑲᓂᕽ, ᐃᓈᐗᐞ᙮

ᐊᒦᑕᔥ ᑳᐃᔑᒫᒑᒡ ᐊᐊ ᓂᑕᒻ ᐁᒐᓬ ᐁᑮᐊᐎᓰᑭᓇᕽ ᐅᑭᒋᐅᓈᑲᓂᕽ ᑳᐊᑌᓂᒃ, ᐁᑮᐃᔑᐸᑲᒥᓭᓂᒃ ᐊᑮᕽ᙮ ᒦᑕᔥ ᐃᐃᒫ ᑳᐅᒋᑭᒋᐅᒥᑮᐎᓈᓂᐗᕽ ᐊᑮᕽ ᐁᒫᓈᑕᓂᓂᒃ, ᐁᐐᓴᑫᑖᑾᓂᓂᒃ ᑲᔦ᙮ ᑕᓯᓐ ᐃᑯ ᐊᐎᔭᒃ ᑮᐃᔑᒫᑖᐱᓀᐗᒃ ᑳᑮᐅᒋᑭᑭᓇᐙᒋᐲᐃᑳᓱᐙᒡ ᐱᑾᒋᐊᔭᐋᐎᔕᓐ ᒋᑎᐯᓂᒥᑯᐙᒡ, ᑲᔦ ᑳᑮᐅᒋᒌᑾᓃᑕᒪᐙᐙᒡ ᐅᒪᓂᑑᑳᓂᑰᒋᑲᓂᓂ᙮

ᒦᓇᐙ ᐊ ᑯᑕᒃ ᐁᒐᓬ ᐅᑮᐊᓂᓰᑭᓈᓐ ᐃᐃᒫ ᑳᑮᐊᑌᓂᒃ ᐅᑭᒋᐅᓈᑲᓂᕽ ᐁᑮᐃᔑᓰᑭᓭᓂᒃ ᑭᒋᑲᒦᕽ᙮ ᒥᔅᑸᕽ ᐃᑕᔥ ᑮᐃᓈᑲᒥᓭ ᐃ ᓂᐱ᙮ ᑖᐱᔥᑰ ᐊᐎᔭ ᑳᓂᐳᒡ ᑳᐃᔑᓈᑾᓂᓂᒃ ᐅᒥᔅᑶ ᑮᐃᓈᑲᒥᓭ᙮ ᑲᑭᓇ ᑫᑰᓐ ᐃᐃᒫ ᑭᒋᑲᒦᕽ ᑳᐊᔮᒃ ᑮᓂᐴᒪᑲᓐ᙮

ᒦᓇᐙ ᐊ ᑯᑕᒃ ᐁᒐᓬ ᑮᒫᒑ, ᒦ ᐊᐌ ᓂᓯᓐ 3 ᑳᐃᓇᑭᒋᑳᓱᒡ᙮ ᐅᑮᓰᑭᓈᓐ ᐃᑕᔥ ᒦᓇᐙ ᐅᑭᒋᐅᓈᑲᓂᕽ ᑳᐊᑌᓂᒃ, ᐃᐃᒫ ᑕᔥ ᐁᑮᓰᑭᓭᓂᒃ ᑲᑭᓇ ᓰᐲᕽ ᑲᔦ ᑳᐃᔑᒨᑭᒋᐗᓂᓂᑭᓐ᙮ ᑮᒥᔅᑸᐙᑲᒥᓭᐗᓐ ᐃᑕᔥ᙮

ᓂᑮᓅᑕᐙ ᐊᐌ ᐁᒐᓬ ᑳᑎᐯᑕᕽ ᐃᐃᐌ ᑲᑭᓇ ᓂᐱ ᐁᑲᑭᑐᒡ: ᑮᓐ ᒥᓯᐌ ᑳᑾᔭᒀᑎᓰᐌᑖᑯᓯᔭᓐ! ᑮᐃᑭᑐ᙮ ᑮᓐ ᐅᐅᒫ ᓅᑯᒻ ᑳᐊᔮᔭᓐ ᑲᔦ ᒣᐎᔕ ᐃᑯ ᑳᐱᐅᒋᐊᔮᔭᓐ! ᑾᔭᑾᓅᓐ ᐅᓄ ᑳᐱᐊᔨᓈᑯᓂᑫᔭᓐ!

ᐅᑯ ᐯᒫᑎᓯᐙᒡ ᐅᑮᓰᑭᓇᒪᐙᐙᐞ ᐅᒥᔅᑸᒥᓂ ᑭᐱᒫᑎᓰᒪᐞ ᑲᔦ ᐅᑎᐹᒋᒨᐞ ᑳᑮᑲᓅᑕᒪᐎᒀ᙮ ᑮᓐ ᐃᑕᔥ ᑭᑮᒥᓇᐋᒃ ᒥᔅᑶ᙮ ᒦᔥ ᐃᐃᐌᓂ ᑫᔥᑭᑕᒫᓱᐙᒡ, ᑮᐃᑭᑐ᙮

ᓂᑮᓅᑖᓐ ᐃᑕᔥ ᐸᑭᑎᓈᓱᐎᓈᐱᑯᕽ ᐃᓉᐎᓐ ᐁᐃᑭᑑᒪᑲᒃ: ᐁᐊᐞ ᒦ ᓇᑫ, ᑌᐯᒋᑫᔭᓐ ᑭᔐᒪᓂᑑ ᑳᒫᒪᐌᑖᑯᓯᔭᓐ! ᑌᐺᐎᓂᐗᓅᓐ ᑲᔦ ᑾᔭᑾᓅᓐ ᑭᑎᓈᑯᓂᑫᐎᓇᓐ᙮

ᒦᔥ ᐊᐌ ᒦᓇᐙ ᑯᑕᒃ ᐁᒐᓬ ᑮᐊᓂᒫᒑ, ᒦ ᐊᐌ ᓃᐎᓐ ᐁᐃᓇᑭᒋᑳᓱᒡ᙮ ᐃᐃᒫᔥ ᑮᓯᓱᕽ ᐅᑮᓰᑭᓈᓐ ᐃᐌ ᐅᑭᒋᐅᓈᑲᓂᕽ ᑳᐊᑌᓂᒃ᙮ ᑮᐃᔑᒦᓂᑰᐎᓯ ᑕᔥ ᐊᐌ ᑮᓯᔅ ᐅᑎᔥᑯᑌᒥᕽ ᒋᐅᒋᒑᑭᔂᒡ ᐃᐃ ᐯᒫᑎᓯᓂᒡ᙮

ᐊᒦᑕᔥ ᑮᐅᒋᒑᑭᓱᐗᒃ ᒫᐗᒡ ᐁᑮᑭᒋᑭᔑᑌᒃ᙮ ᐅᑮᒪᒪᒋᑮᔣᓄᑕᒪᐙᐙᓐ ᐅᐐᓱᐎᓂᓂ ᑭᔐᒪᓂᑑᓐ ᑳᑎᐯᑕᒥᓂᒡ ᐅᓄ ᑲᒀᑕᑭᐃᐌᐎᓇᓐ, ᑲᔦ ᐋᒋᑯ ᑳᐐᓐ ᐅᑮᐐᐴᓂᑑᓰᓈᐙ ᐅᒪᒋᑑᑕᒧᐎᓂᐙᓐ᙮ ᑳᐐᓐ ᑲᔦ ᐅᑮᐐᑭᒋ ᐃᓀᓂᒫᓯᐙᐙᓐ ᑭᔐᒪᓂᑑᓐ᙮

ᒦᑕᔥ ᒦᓇᐙ ᑯᑕᒃ ᐁᒐᓬ ᑮᐊᓂᒫᒑ, ᒦ ᐊᐌ ᓈᓇᓐ ᑳᐃᓇᑭᒋᑳᓱᒡ᙮ ᐅᑮᓰᑭᓈᓐ ᐃᐃᐌᓂ ᐅᑭᒋᐅᓈᑲᓂᕽ ᑳᐊᑌᓂᒃ, ᐁᑮᐃᔑᐸᑲᒥᓭᓂᒃ ᐅᑭᒋᐊᐱᐎᓂᓃᕽ ᐃᓂ ᐱᑾᒋᐊᔭᐋᐎᔕᓐ᙮ ᐃᐃᒫ ᑕᔥ ᑮᐗᓂᑎᐱᑭᓭᓂ ᐅᑎᐯᒋᑫᐎᓂᓃᕽ᙮ ᐃᑭᐌᓂᐗᒃ ᐃᑕᔥ ᐃᐃᒫ ᑳᐊᔮᐙᒡ ᐅᑮᒫᒫᑾᑖᓈᐙᓐ ᐅᑌᓇᓂᐎᐙᓐ ᐁᐊᐲᒋᐐᓴᑫᑕᒧᐙᒡ᙮

ᐅᑮᒪᒋᑮᔣᓈᐙᓐ ᐃᑕᔥ ᑭᔐᒪᓂᑑᓐ ᑭᒋᑮᔑᑯᕽ ᑳᐊᔮᓂᒡ ᐅᐐᓴᑫᑕᒧᐎᓂᐙᓐ ᐅᒋ, ᐃᐌ ᑲᔦ ᐅᑑᒥᑮᐙᐱᓀᐎᓂᐙᓐ ᑳᑮᐊᔮᐙᒡ᙮ ᔖᑰᒡ ᑫᔮᐱ ᑳᐐᓐ ᐅᑮᐐᐴᓂᑑᓰᓈᐙᓐ ᐅᒪᒋᑑᑕᒧᐎᓂᐙᓐ᙮

ᒦᑕᔥ ᑮᐊᓂᒫᒑ ᐁᒐᓬ ᐃᑯᑣᓱ ᑳᐃᓇᑭᒋᑳᓱᒡ᙮ ᐃᐃ ᑕᔥ ᐅᑐᓈᑲᓂᕽ ᑳᐊᑌᓂᒃ ᐅᑮᓰᑭᓈᓐ ᐃᐃᒫ ᑭᒋᓰᐲᕽ ᐃᔫᐸᕒᐁᑏᔅ ᑳᐃᒋᑳᑌᒃ᙮ ᒦᑕᔥ ᑳᐃᔑᐹᑯᓭᒃ ᐃᐃ ᓰᐱ, ᐁᑮᐃᔑᑾᔮᒋᒋᑳᑌᒃ ᑫᐃᔑᐋᔕᐎᔥᑳᐙᒡ ᐃᑭ ᑭᒋᐅᑭᒫᒃ ᐙᐸᓄᕽ ᑫᐱᐅᒌᐙᒡ᙮

ᓂᑮᐙᐸᒫᒃ ᐃᑕᔥ ᓂᓯᓐ 3 ᑳᐐᓈᑎᓯᐙᒡ ᐊᒑᑾᒃ ᑖᐱᔥᑰ ᐅᒪᑲᑮᕽ ᑳᐃᔑᓈᑯᓯᐙᒡ᙮ ᐃᐃᒫ ᐅᑑᓂᓃᕽ ᐅᒋᓵᑲᐊᒨᒃ ᑭᒋᐅᑳᑏᑭᓀᐱᑰᓐ, ᐃᓂ ᑲᔦ ᐱᑾᒋᐊᔭᐋᐎᔕᓐ, ᐃᓂ ᑕᔥ ᑲᔦ ᑳᑲᓅᑕᒫᑯᓂᒡ ᑳᐗᔦᔑᑫᓂᒡ᙮

ᒦᐗᑯᑯ ᒪᒋᐊᒑᑾᒃ ᑎᓄ ᑳᓂᑖᒫᒪᑳᒋᒋᑫᐙᒡ᙮ ᐅᑯᐌᓂᐗᒃ ᐃᑕᔥ ᐊᓂᒫᒑᐗᒃ ᐁᓈᓯᑲᐙᐙᒡ ᑲᑭᓇ ᑭᒋᐅᑭᒫᐞ ᐊᑮᕽ ᒥᓯᐌᑲᒥᒃ ᑳᐊᔮᓂᒡ, ᐁᐊᑕᒫᐗᑑᓈᐙᒡ ᒋᐃᔖᓂᒡ ᑫᐃᔑᒦᑳᑎᓈᓂᐗᓂᓂᒃ ᐊᐲ ᑫᐅᑭᒋᑮᔑᑳᒥᒡ ᐊᐊᐌ ᒫᐗᒡ ᒣᔥᑲᐌᑖᑯᓯᒡ ᑭᔐᒪᓂᑑ᙮

ᐃᓇᔥᑫ ᐱᓯᑕᓐ! ᓂᑲᐱᑯᔥᑯᑕᑯᔑᓐ ᑖᐱᔥᑰ ᑭᒨᑎᔥᒃ ᐁᑭᑫᑖᑯᓯᓯᒃ ᐁᐐᐱᒥᑕᑶᔑᕽ᙮ ᑕᒥᓉᑕᒻ ᐊᐊᐌ ᑳᐊᔕᐙᐱᒡ, ᐌᐌᓂ ᑲᔦ ᑳᑲᓇᐌᑕᕽ ᐅᑭᑭᔥᑭᑲᓇᓐ ᐁᑳ ᒋᐙᓵᑯᓇᐌ ᐸᐹᒧᓭᓯᒃ, ᑳᐐᓐ ᑕᐊᑲᒋᓰ ᐁᐙᐸᒋᑲᓂᐎᒡ, ᐃᑭᑐ ᑳᑎᐯᒋᑫᒡ᙮

ᐃᑭ ᑕᔥ ᓂᓯᓐ 3 ᒪᒋᐊᒑᑾᒃ ᐆᑮᒫᐗᒋᐋᐙᐞ ᐃᓂ ᑭᒋᐅᑭᒫᐞ ᐃᐃᒫ ᐊᔮᐎᓂᕽ ᐋᕒᒪᑫᑕᓐ ᑳᐃᔑᓂᑳᑌᒃ ᐄᐸᕒᐆ ᐁᐃᔑᑮᔗᕽ᙮

ᒦᑕᔥ ᑮᐊᓂᒫᒑ ᐊᐌ ᐁᒐᓬ ᓃᔣᓱ 7 ᐁᑮᐃᓇᑭᒋᑳᓱᒡ᙮ ᐅᑮᓰᑭᓈᓐ ᐃᐃᐌ ᐅᑑᓈᑲᓂᕽ ᑳᐊᑌᓂᒃ, ᓀᐗᒋᑮᔑᑯᕽ ᐅᑮᐃᔑᓰᑭᓈᓐ᙮ ᑭᒋ ᐃᓉᐎᓐ ᐃᑕᔥ ᐃᐃᒫ ᑮᐅᒋᓅᑖᑾᓐ ᑭᒋᐊᐱᐎᓂᕽ ᑭᒋᐊᓇᒥᐁᐎᑲᒥᑯᕽ ᑳᐊᔮᒃ᙮ ᒦ ᐅᐌ ᑳᐃᑭᑑᒪᑲᒃ: ᐋᔕ ᑮᑮᔑᒋᑳᑌ!

ᑮᐙᐙᑌᓭ, ᑮᐱᑎᑯᓅᑖᑾᓐ, ᐱᓀᓯᐗᒃ ᑲᔦ ᑮᓅᑖᑯᓯᐗᒃ᙮ ᑲᔦ ᑮᐗᐙᑲᐎᓭ ᐃ ᐊᑭ, ᒦ ᐃᐌ ᑳᐊᐲᒋᐗᐙᑲᐎᓭᒃ ᐁᑳ ᐐᑳ ᐁᐱᒥ ᐃᔑᐌᐸᓯᓄᒃ ᐊᐸᓂᑯ ᑳᐅᔑᐃᑣ ᐯᒫᑎᓯᐙᒡ᙮ ᒦ ᐅᐌ ᒫᐗᒡ ᐁᑮᑭᒋᒪᔥᑲᐌᑖᑾᒃ᙮

ᓃᔣ 3 ᐃᐌ ᑮᐃᔑᑖᑖᔥᑭᓭ ᐃ ᑭᒋᐆᑌᓇ, ᑮᓂᔑᐗᓈᑕᓅᓐ ᐃᑕᔥ ᑲᑭᓇ ᐆᑌᓇᐗᓐ ᑲᑭᓇ ᑳᐊᔭᔮᑭᓐ ᑎᐯᒋᑫᐎᓂᕽ ᐊᑮᕽ᙮ ᔑᑾ ᑭᔐᒪᓂᑑ ᐅᑮᒫᒥᑲᐎᓄᑖᓐ ᐹᐱᓬᐊᓐ, ᐃᐃᐌ ᑳᑭᒋ ᐃᓀᑖᑾᓂᓂᒃ ᐆᑌᓇ᙮ ᒫᓄ ᐅᑮᒥᓇᐋᓐ ᐃᐃᐌᓂ ᔔᒥᓈᐳ ᐅᒥᓂᒀᑲᓂᕽ ᒋᐅᒋᒥᓂᑴᓂᒡ, ᒦᐃᐌ ᐁᔑᑎᐸᐊᒪᐙᒡ ᐅᑭᒋᓂᔥᑳᑎᓯᐎᓐ ᐁᐋᐸᒋᑑᒡ᙮

ᑲᑭᓇ ᒥᓂᓴᓐ ᐃᑯᒋ ᐌᑎ ᑮᐃᔖᒪᑲᓅᓐ, ᑳᐐᓐ ᐃᑯᒋ ᐗᒌᓐ ᑮᓈᑾᓯᓅᓇᓐ᙮

ᑲᔦ ᐁᓭᓭᑲᒃ ᑮᐃᔑᐸᐹ ᐸᑭᔑᓅᒃ ᑭᒋᒥᑾᒦᒃ ᐁᒪᒫᑎᑐᐙᒡ, ᐋᓂᑕ ᐲᓂᔥ ᓂᑯᑣᒃ ᑮᐊᐲᑎᓂᑾᓂᐗᒃ ᐯᐯᔑᒃ ᑮᔑᑯᕽ ᐁᐱᐅᒋ ᐸᑭᔑᓄᐙᒡ ᐁᑮᒦᑯᔥᑲᐙᐙᒡ ᐃᐃ ᐯᒫᑎᓯᓂᒡ᙮ ᐋᒋᑯ ᐅᑮᒪᒪᒋᑮᔣᓈᐙᓐ ᑭᔐᒪᓂᑑᓐ ᐃᓂ ᐅᒋ ᐁᓭᓭᑲᓂᓂᒃ, ᐋᓃᔥ ᐐᑫ ᑮᑭᒋᐅᒑᓂᒣᑖᑾᓐ ᐅᐅ ᑲᒀᑕᑭᑑᐎᓐ᙮

ᑮᐱᑕᑯᔑᓐ ᐯᔑᒃ ᐃᑭᐌᓂᐗᒃ ᑳᓃᔣᒋᐙᒡ 7 ᐁᒐᓬᐊᒃ ᑳᐊᔮᐙᒡ ᑭᒋᐅᓈᑲᓇᓐ ᓃᔣᓱ, ᐁᐱᑲᓅᔑᒡ ᐊᐊ ᐁᒐᓬ: ᐲᔖᓐ ᐅᐅᒫ, ᑭᐐᐙᐸᑕᐃᓐ ᑫᐃᔑᑎᐹᑯᓂᑲᓂᐎᒡ ᐊᐊ ᐱᔑᒀᒋᑴ ᒥᓯᐌ ᑫᑫᒋᑲᓂᐎᒡ, ᐊᒦ ᐊᐌ ᐆᑌᓇ ᐯᔓ ᑳᐃᔑᐊᔮᒃ ᓃᐱᐗᐞ ᑳᐃᔑᓴᓰᐲᐗᕽ᙮

ᐃᑭ ᑭᒋᐅᑭᒫᒃ ᐊᑮᓂ ᑳᑎᐯᑕᒧᐙᒡ ᐅᑮᐐᒋᐱᔑᒀᑎᓰᒫᐙᓐ ᐃᓂ ᐃᑴᐗᓐ᙮ ᐃᑭᐌᓂᐗᒃ ᐃᑕᔥ ᐊᑮᕽ ᑳᐱᒫᑎᓯᐙᒡ ᐅᑮᑮᐗᔥᑴᐲᔥᑳᑯᓈᐙ ᐅᐱᔑᒀᑎᓯᐎᓂᓂ, ᐁᑮᒥᓂᒀᑕᒧᐙᒡ, ᒦ ᐃᐌ ᐁᐃᓀᑖᑾᓂᓂᒃ ᐅᐱᔑᒀᑎᓯᐎᓂᓂ ᐃᓂ ᐃᑴᐗᓐ ᐁᔔᒥᓈᐳᐗᓂᓂᒃ᙮

ᓂᑮᐐᒌᐎᒥᒃ ᐃᑕᔥ ᐃᓂ ᑭᔐᒪᓂᑑ ᐅᑕᒑᑾᓐ, ᐱᑾᑕᑲᒥᒃ ᐃᑕᔥ ᐁᑮᐃᔑᐎᔑᒡ ᐊᐊ ᐁᒐᓬ᙮ ᒦ ᐃᒫ ᓂᑮᐙᐸᒫ ᐃᑴ ᐁᑌᓴᐹᓈᒡ ᐁᒥᔅᑾᑐᐌᓂᒡ ᐱᑾᒋᐊᔭᐋᐎᔕᓐ, ᒥᓯᐌ ᐐᔭᐎᓃᕽ ᐁᐊᔮᓂᒃ ᒪᒋᐐᓱᐎᓇᓐ ᐁᔑᓂᔑᐹᐱᓄᑕᐎᓐᒡ ᑭᔐᒪᓂᑑ᙮ ᐊᐊ ᑕᔥ ᐱᑾᒋᐊᔭᐋᐎᔥ ᑮᓃᔣᒋᓂᓂᐗᓐ 7 ᐅᑎᒀᓇᓐ, ᑮᒥᑖᒋᐗᐞ ᑲᔦ ᐅᑌᔥᑲᓇᐞ᙮

ᐊᐊ ᑕᔥ ᐃᑴ ᐅᑮᑭᑭᔥᑳᓐ ᐁᒪᑲᑌᒥᔅᑴᑲᓂᓂᒃ, ᑲᔦ ᐐᑫ ᐁᒥᔅᑴᑲᓂᓂᒃ᙮ ᐅᑮᐙᐌᔑᐅᐙᑫᓐ ᑲᔦ ᐅᓵᐎ ᔔᓂᔮᓐ ᑲᔦ ᑳᐋᑾᑭᓱᓂᒡ ᐊᓯᓃᐞ ᑲᔦ ᒦᑭᓴᐞ᙮ ᐅᑮᑕᑯᓈᓐ ᐃᑕᔥ ᐃᐃ ᐅᓵᐎ ᔔᓂᔮᐎ ᒥᓂᒀᑲᓐ, ᑲᑭᓇ ᐁᒨᔥᑭᓀᒃ ᑳᑲᒀᓂᓴᑫᑖᑾᓂᓂᑭᓐ ᑲᔦ ᑳᐐᓀᑖᑾᓂᓂᑭᓐ᙮ ᐊᒦᐗᓂᓂ ᐅᐱᔑᒀᒋᒋᑫᐎᓂᕽ ᑳᐅᒌᒪᑲᑭᓐ᙮

ᐅᔅᑲᑎᑯᕽ ᐃᑕᔥ ᐐᓱᐎᓐ ᑮᐅᔑᐲᐃᑳᑌᓂ, ᑳᑮᑳᒋᑳᑌᓂᒃ ᒋᒪᓈᑭᑫᒋᑳᑌᓂᒃ, ᒦᐅᐌ ᑳᐃᔑᓯᓂᓂᒃ: ᐹᐱᓬᐊᓐ ᑳᑭᒋ ᐃᓀᑖᑾᒃ ᐆᑌᓇ, ᒦ ᐊᐌ ᑲᑭᓇ ᑳᐅᒫᒫᒥᑯᒡ ᐃᓂ ᐱᔑᒀᒋᑴᐞ ᑲᔦ ᑳᑲᒀᓂᓴᑭᒋᑫᓂᒡ ᐊᑮᕽ᙮

ᔑᑾ ᓂᑮᐙᐸᒫ ᐊ ᐃᑴ ᐁᑮᐗᔥᑴᐲᔥᑳᑯᒡ ᐅᒥᔅᑸᓂ ᐃᓂ ᐅᑾᔭᒀᑎᓰᒪᐞ ᑭᔐᒪᓂᑑ ᑲᔦ ᐅᒥᔅᑸᓂ ᐃᓂᐌᓂᐗᐞ ᑳᑮᐅᒋᓂᓯᒥᓐᒡ ᐁᑮᑲᐯᐐᒌᐙᐙᒡ ᒋᓴᓲᓐ᙮ ᐐᑫ ᓂᑮᑭᒋᒫᒪᑳᑌᑕᒻ ᐊᐲ ᑳᐙᐸᒪᒃ᙮

ᓂᑮᑲᓅᓂᒃ ᐃᑕᔥ ᐊᐊ ᐁᒐᓬ: ᐋᓃᔛᓐ ᐌᒋᑭᒋᒫᒪᑳᑌᑕᒪᓐ? ᓂᑮᐃᒃ᙮ ᑭᑲᐐᑕᒪᐎᓐ ᐁᓀᑖᑯᓯᒡ ᐊᐊ ᐃᑴ, ᐃᓂ ᑲᔦ ᑳᐱᒥᐗᓈᓂᑯᒡ ᐱᑾᒋᐊᔭᐋᐎᔕᓐ, ᒦᐗᓂᓂ ᑳᓃᔣᒋᓂᓂᑭᓐ 7 ᐅᑎᒀᓂᓂ ᑲᔦ ᑳᒥᑖᒋᓂᒡ ᐅᑌᔥᑲᓇᐞ᙮ ᑮᑳᒋᑳᑌ ᐃᐌ ᒋᓂᓯᑐᑖᑾᓯᓄᒃ, ᐸᔦᔥ ᐁᐐᑌᒃ ᒋᑭᑫᒋᑳᑌᒃ᙮

ᐊᐌ ᐊᔭᐋᐎᔥ ᑳᑮᐙᐸᒪᒡ, ᐋᐱᑎᕽ ᑮᐊᔮ, ᑳᐐᓐ ᑕᔥ ᓅᑯᒻ ᐊᔮᓰ᙮ ᒦᓇᐙ ᐃᒫ ᑕᐱᐅᒋᒨᑭᔥᑳ ᑳᐃᔑᐐᐸᑲᒥᑳᓂᒃ ᐃᐃᐌ ᑳᒥᔕᑮᔮᓯᓄᒃ᙮ ᑕᓂ ᐃᔖ ᑕᔥ ᐃᐃᒫ ᑫᔑᓂᔑᐗᓈᒋᐃᓐᒡ᙮ ᐃᑭ ᑕᔥ ᐃᒫ ᐊᑮᕽ ᑳᐊᔮᐙᒡ ᐅᑲᒫᒪᑳᓯᓇᐙᐙᓐ ᐃᓂ ᐊᔭᐋᐎᔕᓐ᙮ ᐊᒦᐗᒃ ᐃᓴ ᐃᑭ ᐅᐐᓱᐎᓂᐙᓐ ᑳᑮᐅᔑᐲᐃᑳᑌᓯᓂᓂᑭᓐ ᐃᐃᒫ ᒪᓯᓇᐃᑲᓂᕽ ᑳᐃᔑᐅᔑᐲᐅᑣ ᐃᑭᐌᓂᐗᒃ ᑌᐺ ᑳᐊᔮᐙᒡ ᐱᒫᑎᓯᐎᓐ, ᒋᑆ ᐅᓇᒋᑳᑌᒃ ᐅᐅ ᐊᑭ ᐁᑮᐅᔑᐲᐃᑳᑌᒃ ᐃᐃ ᒪᓯᓇᐃᑲᓐ᙮ ᐊᐊᐌ ᑕᔥ ᐱᑾᒋᐊᔭᐋᐎᔥ ᐋᐱᑎᕽ ᑮᐊᔮ᙮ ᑳᐐᓐ ᓅᑯᒻ ᑫᔮᐱ ᐊᔮᓰ᙮ ᒦᓇᐙ ᑕᔥ ᐃᑯᑎᕽ ᑕᐅᒋᓈᑯᓯ᙮

ᐊᑕᐌᑖᑯᓯ ᐊᐎᔭ ᒋᐊᔮᒡ ᑭᑫᑕᒫᐎᓐ ᑲᔦ ᓂᓯᑐᑕᒧᐎᓐ᙮ ᐃᓂ ᓃᔣᓱ 7 ᐅᑎᒀᓇᓐ ᐊᐊ ᐱᑾᒋᐊᔭᐋᐎᔥ, ᐊᒦᐗᓂᓂ ᑳᓃᔣᒋᑭᓐ ᑳᐱᑾᑎᓈᑭᓐ ᒦ ᐃᒫ ᐃᑴ ᐁᔑᑌᓴᐱᒡ᙮ ᐃᓀᑖᑾᓂᓂᐗᓐ ᑲᔦ ᑳᓃᔣᒋᐙᒡ ᑭᒋᐅᑭᒫᒃ᙮

ᓈᓇᓐ ᐅᑯ ᑭᒋᐅᑭᒫᒃ ᐋᔕ ᑮᓂᔑᐗᓈᑎᓯᐗᒃ᙮ ᐊᐊᔥ ᐯᔑᒃ ᑯᑕᒃ ᓅᑯᒻ ᐅᑭᒫᐎ, ᒦᓇᐙ ᑕᔥ ᐊᐊ ᐯᔑᒃ ᑳ ᒪᔑ ᐱᐊᔮᓰ᙮ ᒦᔥ ᐊᐲ ᓈᑯᓯᒡ ᐊᒋᓇ ᐱᑯ ᑕᐊuᔮ᙮

ᐊᐊᐌᔥ ᐱᑾᒋᐊᔭᐋᐎᔥ ᐋᐱᑎᕽ ᑳᑮᐊᔮᒡ, ᓅᑯᒻ ᐃᑕᔥ ᐁᐱᒫᑎᓯᓯᒃ, ᒦ ᐊᐌ ᓂᔣᓱ 8 ᑳᐃᓇᑭᒋᑳᓱᒡ ᑭᒋᐅᑭᒫ᙮ ᐅᐐᒌᐎᑰᐞ ᐃᓂ ᑳᓃᔣᒋᓂᒡ 7 ᑭᒋᐅᑭᒫᐞ, ᒦᑕᔥ ᐃᐃᒫ ᓂᔑᐗᓈᑎᓯᐎᓂᕽ ᒋᐃᔖᒡ᙮

ᐃᓂ ᑕᔥ ᑳᒥᑖᒋᓂᒡ ᐅᑌᔥᑲᓇᐞ ᑳᑮᐙᐸᒥᒪᒡ, ᒦᐗᒃ ᒥᑖᓱ ᑭᒋᐅᑭᒫᒃ ᐁᑳ ᒪᔑ ᐁᒫᒌᐅᑭᒫᐎᓯᒀ᙮ ᐹᓂᒫ ᑕᔥ ᑕᒦᓈᐗᒃ ᑲᔥᑭᐁᐎᓯᐎᓐ ᐯᔑᑯ ᑎᐸᐃᑲᓐ ᒋᐐᒋᐅᑭᒫᐎᒫᐙᒡ ᐃᓂ ᐱᑾᒋᐊᔭᐋᐎᔕᓐ᙮

ᐯᔑᒃ ᐁᑕ ᐃᓀᑕᒧᐎᓐ ᐅᑕᔮᓈᐙ᙮ ᐅᑲᔥᑭᐁᐎᓯᐎᓂᐙ ᑲᔦ ᐅᒪᔥᑲᐌᑖᑯᓯᐎᓂᐙᓐ ᑲᑭᓇ ᐅᐸᑭᑎᓇᒪᐙᐙᓐ ᒋᑎᐯᑕᒥᓂᒡ ᐃᓂ ᐱᑾᒋᐊᔭᐋᐎᔕᓐ᙮

ᒫᒪᐤ ᐅᑲᒦᑳᓈᐙᓐ ᐃᓂ ᒫᓇᒑᓂᔐᓴᓐ᙮ ᐊᐌ ᑕᔥ ᒫᓇᒑᓂᔐᔅ ᐅᑲᔖᑰᒋᐋᐞ ᐅᐅ ᑭᒋᐅᑭᒫᐞ᙮ ᐋᓃᔥ ᐐᓐ ᐅᑎᐯᓂᒫᐞ ᑲᑭᓇ ᑳᑎᐯᒋᑫᓂᒡ, ᑲᑭᓇ ᑲᔦ ᐅᑑᑭᒫᑲᑕᐙᐞ ᑭᒋᐅᑭᒫᐞ᙮ ᐃᓂ ᑕᔥ ᐅᔖᑰᒋᑣᐎᓂᕽ ᑫᐐᒌᐎᑯᒡ, ᒦᓴ ᐃᐌᓂᐗᐞ ᑳᑮᐊᑐᒫᒡ, ᑳᐅᓈᐸᒫᒡ, ᑳᑲᐯᐐᒌᐎᑯᒡ ᑲᔦ᙮

ᒦᓇᐙ ᑕᔥ ᐅᐌ ᓂᑮᐃᒃ ᐊᐊ ᐁᒐᓬ: ᐃᓂ ᓰᐲᐗᓐ ᑳᑮᐙᐸᑕᒪᓐ ᐃᐃᒫ ᑳᐊᐲᑕᕽ ᐱᔑᒀᒋᑴ, ᒦᐗᑭᑭ ᐯᒫᑎᓯᐙᒡ ᐯᐸᑳᓐ ᑳᐅᒌᐙᒡ ᑲᔦ ᑳᐅᒋᑎᐯᑖᑯᓯᐙᒡ, ᐯᐸᑳᓐ ᑲᔦ ᑳᑕᓶᐙᓇᑭᓈᑯᓯᐙᒡ, ᐯᐸᑳᓐ ᑲᔦ ᑳᐃᔑᑮᔗᐙᒡ᙮

ᐊᐊ ᑕᔥ ᐱᑾᒋᐊᔭᐋᐎᔥ ᑳᑮᐙᐸᒪᒡ, ᐃᐃ ᑲᔦ ᑳᒥᑖᒋᓂᒡ ᐅᑌᔥᑲᓇᐞ, ᐅᑯ ᑲᑭᓇ ᐅᑲᔒᑫᓂᒫᐙᓐ ᐃᓂ ᐱᔑᒀᒋᑴᐗᓐ᙮ ᐅᐐᒑᑭᐅᑖᐱᓇᒪᐙᐙᓐ ᑲᑭᓇ ᐃᓂ ᑳᐊᔮᓂᒡ, ᒦᑕᔥ ᑲᔦ ᐅᑲᓇᑲᓈᐙᓐ ᑫᑰᓐ ᐁᑭᑭᔥᑲᓯᓂᒃ᙮ ᐅᑲᒦᒋᓈᐙ ᑕᔥ ᑲᔦ ᐅᐐᔮᓯᓂ᙮ ᐐᑫ ᓴ ᑯ ᐅᑲᒑᑭᔂᐙᓐ ᐃᔥᑯᑌᕽ᙮

ᑭᔐᒪᓂᑑ ᐋᓃᔥ ᐅᑮᒦᓈᐞ ᐃᐌ ᒋᐃᔑᑌᐁᓂᒡ, ᒪᔮ ᐱᑯ ᑳᐃᓀᑕᕽ ᒋᑑᑕᒥᓂᒡ, ᒋᐯᔑᑯᑑᓂᒡ᙮ ᔑᑾ ᐅᑯ ᑳᒥᑖᒋᐙᒡ ᐅᑲᒦᓈᐙᓐ ᐅᑲᔥᑭᐁᐎᓯᐎᓂᐙᓐ ᐃᓂ ᐱᑾᒋᐊᔭᐋᐎᔕᓐ, ᒦ ᐲᓂᔥ ᐗᐐᑫ ᒋᓈᑾᓂᓂᒃ ᐁᑌᐺᒪᑲᓂᓂᑭᓐ ᐃᓂ ᑭᔐᒪᓂᑑ ᐅᑎᑭᑐᐎᓇᓐ᙮

ᐊᐊᐌ ᐃᑴ ᑳᑮᐙᐸᒪᒡ, ᒦ ᐃᐌᓂ ᑭᒋᐆᑌᓇ ᑳᑎᐯᓂᒥᑯᐙᒡ ᑭᒋᐅᑭᒫᒃ ᐃᐃᒫ ᐊᑮᕽ ᑳᐊᔮᐙᒡ᙮

ᒦᑕᔥ ᒦᓇᐙ ᑯᑕᒃ ᓂᑮᐙᐸᒫ ᐁᒐᓬ ᐁᐱᐅᒋᓈᔑᔥᑳᒡ ᑭᒋᑮᔑᑯᕽ, ᑌᐺ ᐁᐊᔮᒡ ᑎᐯᒋᑫᐎᓐ᙮ ᒦᑕᔥ ᑳᐊᐲᒋᐙᓭᓯᒡ ᐊᐊ ᐁᒐᓬ ᑮᐅᒋᐙᓭᔮ ᐃᒫ ᐊᑮᕽ᙮

ᒦᑕᔥ ᐁᓂᑯᒃ ᑮᔖᑯᐌ ᐁᑮᐃᑭᑐᒡ: ᐋᔕ ᓂᔑᐗᓈᑕᓐ! ᓂᔑᐗᓈᑕᓐ ᑳᑭᒋ ᐃᓀᑖᑾᒃ ᐆᑌᓇ ᐹᐱᓬᐊᓐ ᙮ ᒦᔥ ᐃᐃᒫ ᐃᔑᐅᑖᐎᓂᐗᒃ ᒪᒋᐊᒑᑾᒃ ᑲᔦ ᑳᐐᓂᓯᐙᒡ ᐊᒑᑾᒃ, ᑲᔦ ᑲᑭᓇ ᐱᓀᔒᔕᒃ ᐃᐃᒫ ᐊᔮᐗᒃ ᑎᓄ ᑳᐐᓀᑖᑯᓯᐙᒡ ᑲᔦ ᑳᒥᓉᑖᑯᓯᓯᒀ᙮

ᑲᑭᓇ ᐯᒫᑎᓯᐙᒡ ᐯᐸᑳᓄᕽ ᑳᐅᒌᐙᒡ ᐅᑮᒥᓂᒀᑖᓈᐙ ᑳᒪᔥᑲᐙᑲᒥᓂᓂᒃ ᐅᔔᒥᓈᐴᒥᓂ, ᒦᓴ ᐃᐌᓂ ᐅᐱᔑᒀᒋ ᒥᓴᐌᑕᒧᐎᓂᓂ᙮ ᐃᑭ ᑭᒋᐅᑭᒫᒃ ᐃᐃᒫ ᐊᑮᕽ ᑳᐊᔮᐙᒡ ᐅᑮᐐᒋ ᐱᔑᒀᑎᓰᑖᓈᐙ ᐃᐌ ᑭᒋᐆᑌᓇ᙮ ᐅᑕᑖᐌᒃ ᐃᑕᔥ ᑮᐅᒋᐌᓅᑎᓯᐗᒃ, ᐋᓃᔥ ᑮᐅᓵᒦᓇᑎᓂᓂ ᑳᐅᒋᓇᐁᑕᒧᐃᑎᓱᓈᓂᐗᕽ ᐃᐃᒫ ᐆᑌᓈᕽ᙮

ᓂᑮᓅᑖᓐ ᐃᑕᔥ ᒦᓇᐙ ᑯᑕᒃ ᐃᓉᐎᓐ ᑭᒋᑮᔑᑯᕽ ᐁᐅᒋᓅᑖᑾᒃ: ᐱᐅᒋᒫᒑᒃ, ᓂᐱᒫᑎᓰᒪᒃ! ᐱᐅᒋᒫᒑᒃ ᐃᐃᒫ ᑭᒋᐆᑌᓈᕽ! ᑫᑯ ᐅᒪᒋᒋᑫᐎᓂᕽ ᐃᔑᐐᑑᑳᓱᑫᒃ, ᒋᑲᒀᑕᑭᑑᓯᐌᒃ ᐁᑲᒀᑕᑭᐃᑯᒡ!

ᐋᓃᔥ ᑮᐊᓂ ᐃᔥᐸᑌᓂᐗᓐ ᐃᓂ ᐅᒪᒋᒋᑫᐎᓇᓐ ᐲᓂᔥ ᐁᐊᓂᐅᒋᒋᓯᓂᓂᑭᓐ ᑭᒋᑮᔑᑯᕽ᙮ ᑭᔐᒪᓂᑑ ᐅᒥᑲᐎᓄᑖᓇᓐ ᑲᑭᓇ ᑫᑰᓐ ᑳᑮᐱ ᐃᔑᐗᓂᑑᑕᒥᓂᒡ᙮

ᒪᔮ ᑳᑑᑕᐎᓀᒃ ᐊᐊ ᐆᑌᓇ ᑭᑲᑮᐌᑎᐸᐊᒪᐙᐙ᙮ ᓃᔣ 2 ᒥᓂᒃ ᑑᑕᐎᒃ ᑲᑭᓇ ᑫᑰᓐ ᐃᐌ ᑳᑮᐃᔑᒋᑫᒡ᙮ ᐃᐃᐌ ᒥᓂᒀᑲᓐ ᑳᑮᐃᔑᒥᓇᐃᓀᒃ, ᑫᑮᓇᐙ ᓃᔣ ᑭᑲᑮᐌᒥᓇᐋᐙ ᒋᒥᓂᑴᒡ ᑲᒀᑕᑭᐃᑰᐎᓐ᙮

ᐃᐃᐌ ᒥᓂᒃ ᑳᑭᒋ ᐃᓇᑭᑎᓱᒡ ᐁᑲᔥᑭᑕᒫᓱᒡ ᐌᓅᑎᓯᐎᓐ ᑳᑮᒥᒋ ᓇᐁᑕᒥᐃᑎᓱᒡ, ᒦ ᐃ ᒥᓂᒃ ᑭᒋᑲᒀᑕᑭᑑᐎᓐ, ᐲᑴᑕᒧᐎᓐ ᑲᔦ, ᑎᐸᐊᒪᐎᒃ! ᐋᓃᔥ ᒦ ᐃᐌ ᐃᓀᓂᑎᓱ: ᐅᑭᒫᑴᕽ ᓂᑎᓇᑉ᙮ ᑳᐐᓐ ᓃᓐ ᓂᑮᐙᒋᑴᐎᓰ᙮ ᑳᐐᓐ ᐐᑳ ᓂᑲᐙᐸᑕᓰᓐ ᐲᑴᑕᒧᐎᓐ᙮

ᒦ ᐃᐌ ᐅᒋ ᑳᐃᑭᑐᒡ, ᐯᔑᑯ ᑮᔑᒃ ᐁᑕ ᐃᔑᓭᒃ ᑲᑭᓇ ᐅᑲᐅᑎᓯᑯᓇᓐ ᐅᓄ ᑲᒀᑕᑭᑑᐎᓇᓐ: ᓂᐳᐎᓐ, ᐲᑴᑕᒧᐎᓐ, ᐁᑲᐗᔅᑲᑌᓈᓂᐗᕽ᙮ ᐗᐐᑫᔥ ᑕᐅᒋᒑᑭᓱ ᐃᔥᑯᑌᕽ, ᐋᓃᔥ ᒪᔥᑲᐎᓰ ᑳᑎᐯᒋᑫᒡ ᑭᔐᒪᓂᑑ ᑳᐅᓈᑯᓈᒡ ᐃᓂ ᐃᑴᐗᓐ᙮

ᐃᑭ ᑕᔥ ᑭᒋᐅᑭᒫᒃ ᐊᑮᕽ ᑳᐊᔮᐙᒡ, ᑳᑮᐐᒌᐙᐙᒡ ᐅᐱᔑᒀᑎᓯᐎᓂᓃᕽ ᑲᔦ ᐅᓇᐁᑕᒥᐃᑎᓱᐎᓂᓃᕽ, ᑕᒪᐎᐗᒃ, ᑕᒨᑴᑕᒨᒃ, ᐊᐲ ᐙᐸᑕᒧᐙᒡ ᐁᐊᒀᐸᑌᒃ ᐁᓴᑭᑌᒃ ᐃᐃ ᑭᒋᐆᑌᓇ᙮

ᐙᓴ ᑯ ᐁᑯᑌᐱᓈᑾᒃ ᑕᓃᐸᐎᐗᒃ ᐁᑯᑕᒧᐙᒡ ᐅᑲᒀᑕᑭᑑᐎᓂᓂ ᑫᐐᓇᐙ ᒋᑑᑕᐎᑣ᙮ ᒦᔥ ᐁᑭᑐᐙᒡ: ᐆᔾ! ᑲᒀᓂᓴᑫᑖᑾᓐ! ᐅᐅ ᑳᒪᔥᑲᐌᑖᑾᒃ ᑭᒋᐆᑌᓇ ᐹᐱᓬᐊᓐ! ᐯᔑᑯᑎᐸᐃᑲᓐ ᐁᑕ ᐃᔑᓭ, ᒦ ᐋᔕ ᑲᒀᑕᑭᑑᐎᓐ ᐁᑎᐸᐊᒫᑰᔭᓐ! ᐅᑎᑖᓈᐙ ᐃ ᐆᑌᓇ᙮

ᑫᐐᓇᐙ ᑕᒪᐎᐗᒃ ᐅᑕᑖᐌᒃ ᐊᑮᕽ ᑳᐊᔮᐙᒡ, ᑕᒨᑴᑕᒨᒃ᙮ ᑳᐐᓐ ᐋᓃᔥ ᐊᐎᔭᓐ ᑫᔮᐱ ᐊᔮᓰᐗᓐ ᒋᐊᑖᒥᑯᐙᒡ᙮

ᑳᐐᓐ ᐊᐎᔭᓐ ᑕᐊᑖᐌᓰᐗᓐ ᐅᓵᐎ ᔔᓂᔮᓐ, ᑲᔦ ᐙᐱᔥᑭᔔᓂᔮᓐ, ᑳᐋᑾᑭᓱᓂᒡ ᐊᓯᓃᐞ ᑲᔦ ᒦᑭᓴᐞ ᑲᔦ ᐁᐅᓂᔑᔑᓂᓂᒃ ᐙᐱᔥᑮᑭᓐ, ᑲᔦ ᐁᒪᑲᑌᒥᔅᒀᒃ ᐃᔒᑭᓐ ᑲᔦ ᓭᓂᐹᐌᑭᓐ, ᑲᔦ ᐸᑲᑭᒥᔅᑴᑭᓐ, ᑲᔦ ᑲᑭᓇ ᑳᐅᓂᔑᔑᑭᓐ ᒪᔭᑳᑎᑰᓐ ᑲᑭᓇ ᑲᔦ ᑫᑰᓐ ᒥᓯᐌᑲᓐ ᐐᐱᑎᕽ ᑳᐅᒋᐅᔑᒋᑳᑌᒃ, ᑲᔦ ᐁᐋᑾᑭᑌᒃ ᒥᑎᑯᕽ ᐁᐅᒋᐅᔑᒋᑳᑌᒃ, ᑲᔦ ᐁᐅᓵᐙᐱᑯᐗᑭᓐ ᑲᔦ ᐁᐲᐙᐱᑯᐗᑭᓐ ᑲᔦ ᔔᔥᑾᓯᓃᒃ,

ᑲᔦ ᐐᑫᔥ ᓯᓇᒪᓐ ᑳᐃᒋᑳᑌᒃ ᑕᑯᓂᑲᓐ, ᑲᔦ ᐊᐸᒋᑲᓇᓐ, ᑲᔦ ᐐᑭᒫᓯᑲᓐ, ᑲᔦ ᐱᑭᐤ ᒥᓈᑾᐅᓐ ᒪᕒ ᑳᐃᔑᓂᑳᑌᒃ, ᑲᔦ ᐃ ᒥᓈᓯᑲᓐ ᐸᕒᐁᑭᓭᔅ ᑳᐃᔑᓂᑳᑌᒃ᙮ ᑳᐐᓐ ᑲᔦ ᔔᒥᓈᐳ, ᑲᔦ ᐱᒥᑌ, ᑲᔦ ᐁᐲᓯᐴᓂᓐᒡ ᐸᑴᔑᑲᓐ, ᑲᔦ ᐸᑴᔑᑲᓂᑭᑎᑳᓐ, ᑲᔦ ᐊᐗᑳᓇᒃ, ᒫᓇᒑᓂᔕᒃ, ᒥᑕᑎᒨᒃ, ᑎᑎᐱᑖᐹᓈᑾᒃ, ᑲᔦ ᑳᐊᐗᑳᓱᐙᒡ ᐊᓄᑮᐋᑲᓇᒃ, ᐊᐴᔥᑫ ᑲᔦ ᐃᓂᓂᐗᒃ ᐅᐱᒫᑎᓯᐎᓂᐙᓐ᙮ ᐅᓄ ᑲᑭᓇ ᑳᐐᓐ ᑫᔮᐱ ᑕᑕᔑᐊᑖᐙᑳᓂᐗᓯᓅᓇᓐ᙮

ᒦᓇᐙᔥ ᐅᑕᑖᐌᒃ ᐅᑎᓈᐙᓐ ᐃᓂ ᑭᒋᐆᑌᓇᐗᓐ: ᐋᔕ ᐊᐸᓐ ᑭᑮᓇᑲᓂᑯᓇᓐ ᐃᓂ ᑳᐅᓂᔑᔑᑭᓐ ᑳᑮᒥᓴᐌᑕᒪᓐ ᑳᐐᒫᐗᒋᑑᔭᐸᓐ, ᑲᔦ ᑲᑭᓇ ᑫᑰᓇᓐ ᑳᐋᑾᑭᑌᑭᓐ ᑲᔦ ᑳᒥᓄᓈᑾᑭᓐ᙮ ᑳᐐᓐ ᒦᓇ ᐐᑳ ᑭᑲᒥᑲᓰᓇᓐ᙮

ᐃᑭ ᐅᑕᑖᐙᑫᒃ ᒦᐗᒃ ᐅᑯᐌᓂᐗᒃ ᐃᐃᒫ ᑳᑮᐅᒋᐌᓅᑎᓯᐙᒡ ᐃᐃ ᐆᑌᓇ, ᐙᓴ ᑕᓃᐸᐎᐗᒃ ᐁᐊᐲᒋᑯᑕᒧᐙᒡ ᐁᑳ ᑫᐐᓇᐙ ᒋᑕᑯᑲᒀᑕᑭᑑᓯᒀ᙮ ᑕᑲᒀᑕᑫᑕᒧᐗᒃ, ᑕᒨᑴᑕᒧᐗᒃ

ᐁᐃᑭᑐᐙᒡ: ᐆᔾ! ᑲᒀᓂᓴᑫᑖᑾᓐ ᐃᐃᐌ ᑳᐃᔑᐌᐱᓯᒡ ᐊᐊ ᑭᒋᐆᑌᓇ! ᐊᐌ ᑳᑮᐃᔑᑭᑭᔥᑭᑫᒡ ᐃᐃᐌ ᑳᐅᓂᔑᔑᕽ ᐙᐱᔥᑮᑭᓐ ᑲᔦ ᐁᒪᑲᑌᒥᔅᒀᓂᒃ ᐃᔒᑭᓐ ᑲᔦ ᐸᑲᑭᒥᔅᑴᑭᓐ, ᑳᑮᐗᐌᔑᐅᐙᑫᒡ ᐅᓵᐎ ᔔᓂᔮᓐ ᑲᔦ ᐁᐋᑾᑭᓱᓂᒡ ᐊᓯᓃᐞ ᑲᔦ ᒦᑭᓴᐞ᙮

ᐯᔑᑯᑎᐸᐃᑲᓐ ᐁᑕ ᐃᔑᓭ ᐁᓂᔑᐗᓈᑕᓂᓂᒃ ᑲᑭᓇ ᐅᐌᓅᑎᓯᐎᓐ᙮ ᑲᑭᓇ ᑕᔥ ᓈᐱᒀᓂᐅᑭᒫᒃ ᑲᔦ ᑳᐴᓯᐙᒡ, ᑲᔦ ᐱᒫᔑᐎᓂᓂᐗᒃ, ᑲᔦ ᒥᓂᒃ ᐃᐃᒫ ᑳᑮᑲᔥᑭᒋᑫᐙᒡ ᑭᒋᑲᒦᕽ, ᐙᓴ ᑮᓃᐸᐎᐗᒃ ᐁᑲᓇᐙᐸᑕᒧᐙᒡ ᐃᐃᐌ ᐁᐊᒀᐸᑌᒃ ᐁᓴᑭᑌᒃ ᐃᐃ ᐆᑌᓇ, ᑲᔦ ᐁᔖᑯᐌᐙᒡ: ᑳᐐᓐ ᐐᑳ ᑮᐃᔑᓈᑾᓯᓅᓐ ᐆᑌᓇ ᑳᑮᐊᐲᒋ ᐅᓂᔑᔑᕽ ᐅᐅᐌ ᐆᑌᓇ!

ᑮᐱᑖᓄᒀᓀᐅᑎᓱᐗᒃ ᐃᐃ ᒥᑖᐗᕽ ᑳᐊᐲᒋᒫᓀᑕᒧᐙᒡ, ᐁᑮᑭᒋᒪᐎᐙᒡ ᐁᑮᑲᒀᑕᑭᑖᑯᓯᐙᒡ᙮ ᐆᔾ! ᐃᑭᑐᐗᒃ, ᑲᒀᓂᓴᑫᑖᑾᓐ ᐃᐃ ᑭᒋᐆᑌᓇ ᑳᐃᔑᐌᐸᒃ᙮ ᑲᑭᓇ ᑭᒋᑲᒦᕽ ᐁᐱᒥᐊᔮᓂᑭᓐ ᐅᓈᐱᒀᓂᐙᓐ ᑮᐅᒋᐌᓅᑎᓯᐗᒃ ᐃᐃᒫ ᐁᐲᒋᐌᓅᑕᒃ ᐃᐃ ᐆᑌᓇ᙮ ᐯᔑᑯᑎᐸᐃᑲᓐ ᐁᑕ ᑮᐃᔑᓭ ᑲᑭᓇ ᑫᑰᓐ ᐁᑮᓂᔑᐗᓈᒋᒋᑳᑌᒃ ᑳᑮᐊᔮᒃ ᐃᐃᒫ ᐆᑌᓈᕽ᙮

ᒥᓉᑕᓐ ᑮᓐ ᑭᒋᑮᔑᒃ! ᑲᔦ ᑮᓇᐙ ᑭᔐᒪᓂᑑ ᑳᑎᐯᓂᒥᓀᒃ ᑲᔦ ᐅᑎᔑᓂᔕᐙᑲᓇᐞ ᑲᔦ ᐅᑎᐹᒋᒨᒃ ᑳᑲᓅᑕᒪᐌᒃ, ᐋᓃᔥ ᐋᔕ ᑭᔐᒪᓂᑑ ᐅᑮᑮᐌᑎᐸᐊᒪᐙᑖᓐ ᐃᐃᐌ ᐆᑌᓇ ᑳᑮᑑᑖᑯᔦᒃ!

ᒦᑕᔥ ᐯᔑᒃ ᑳᒪᔥᑲᐌᑖᑯᓯᒡ ᐁᒐᓬ ᐅᑮᐅᑖᐱᓈᓐ ᐊᓯᓃᓐ ᑖᐱᔥᑰ ᐲᓯᐴᒋᑲᓇᓯᓃᓐ ᐁᓂᑯᒀᐱᑭᓯᓂᒡ, ᑭᒋᑲᒦᕽ ᐃᑕᔥ ᐅᐸᑯᐲᐌᐱᓈᓐ, ᐅᐅᐌ ᐁᐃᑭᑐᒡ: ᒦ ᐃᐌ ᑫᐃᔑᐌᐱᓂᑳᑌᒃ ᐃᐃ ᑭᒋᐆᑌᓇ ᐹᐱᓬᐊᓐ᙮ ᑳᐐᓐ ᒦᓇᐙ ᐐᑳ ᑕᒥᑭᑳᑌᓯᓅᓐ᙮

ᑮᓐ ᑭᒋᐆᑌᓇ! ᐃᐃᒫ ᑳᐃᔑᐊᔮᔭᓐ ᑳᐐᓐ ᒦᓇ ᐐᑳ ᑕᓅᑖᑯᓯᓰᐗᒃ ᐃᑭ ᑳᒪᑗᔮᐲᑭᐱᒋᑫᐙᒡ ᑲᔦ ᐅᓂᑲᒨᒃ᙮ ᐴᑖᒋᑲᓀᔅ ᑲᔦ ᑭᒋᐴᑖᒋᑲᓐ ᑳᓅᑖᑯᑑᐙᒡ ᑳᐐᓐ ᒦᓇᐙ ᐐᑳ ᑕᓅᑖᑯᓯᓰᐗᒃ᙮ ᑳᐐᓐ ᒦᓇᐙ ᐐᑳ ᑕᒥᑲᐙᓰᐗᒃ ᑳᓂᑖᐅᔑᒋᑫᐙᒡ, ᐋᓃᓐ ᐃᑯ ᑫᑰᓐ ᑳᑮᐱᐊᓄᑳᑕᒧᐙᒡ᙮ ᑳᐐᓐ ᒦᓇᐙ ᐐᑳ ᐅᑲᑕᔑᓅᑕᓰᓈᐙ ᐁᓂᑖᑾᓂᓂᒃ ᐁᑭᔑᐹᔥᑳᓂᒡ ᐲᓯᐴᒋᑲᓇᓯᓃᓐ᙮

ᑳᐐᓐ ᑲᔦ ᐐᑳ ᑕᓈᑾᓯᓅᓐ ᐙᓴᑯᓀᒋᑲᓐ ᒋᐙᓭᔮᒃ ᐃᐃᒫ ᑳᐃᔑᐊᔮᔭᓐ᙮ ᑳᐐᓐ ᒦᓇᐙ ᑕᓅᑖᑾᓯᓅᓐ ᒋᒌᑲᑲᒥᑭᓯᐙᒡ ᐁᐐᑭᑑᐙᒡ ᐃᓂᓂ ᑲᔦ ᐃᑴ᙮ ᑭᑕᑖᐌᐎᓂᓃᒪᒃ ᓇᐗᒡ ᑮᓃᑳᓂ ᑭᒋᐅᑭᒫᐎᐗᒃ ᐊᐲᒡ ᑲᑭᓇ ᐅᑕᑖᐌᒃ ᐊᑮᕽ ᑳᐊᔮᐙᒡ᙮ ᑲᔦ ᑭᒪᒋᒪᒫᑖᐎᒋᑫᐎᓐ ᑭᑮᐅᒋ ᐗᔦᔑᐋᒃ ᑲᑭᓇ ᑳᑕᓶᐙᓇᑭᓯᐙᒡ ᐃᓂᓂᐗᒃ ᐅᒫ ᐊᑮᕽ! ᑮᐃᑭᑐ ᐊᐊ ᐁᒐᓬ᙮

ᒦ ᐃᐌ ᑮᐃᔑᓂᔑᐗᓈᑕᓐ ᑭᒋᐆᑌᓇ ᐹᐱᓬᐊᓐ ᐅᒋ ᐃᐌ ᐁᑮᒥᑭᑳᑌᒃ ᐃᐃᒫ ᐅᒥᔅᑸᓂ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ ᑲᔦ ᐅᑾᔭᒀᑎᓰᒪᐞ, ᑲᔦ ᐅᒥᔅᑸᓂ ᑲᑭᓇ ᐊᐎᔭ ᑳᑮᐱᓂᓯᓐᒡ ᐊᑮᕽ᙮

ᐅᓄᐌᓂᐗᓐ ᐃᑕᔥ ᑳᐃᔥᒀᓭᑭᓐ, ᓂᑮᓅᑖᓐ ᑖᐱᔥᑰ ᐁᑭᔒᐌᐙᒡ ᐁᐹᑏᓄᐙᒡ ᐯᒫᑎᓯᐙᒡ ᐁᑕᓂᑖᑯᓯᐙᒡ ᑭᒋᑮᔑᑯᕽ: ᐋᓬᐃᓬᐆᔭ! ᐱᒫᒋᐃᐌᐎᓐ, ᑭᒋ ᐃᓀᑖᑯᓯᐎᓐ, ᑲᔥᑭᐁᐎᓯᐎᓐ ᐅᑕᔮᓐ ᑭᑭᔐᒪᓂᑑᒥᓈᓐ!

ᑌᐺᐗᓂᓂᐗᓐ ᑲᔦ ᑾᔭᑾᓂᓂᐗᓐ ᐃᓂ ᐅᑎᓈᑯᓂᑫᐎᓇᓐ᙮ ᐋᓃᔥ ᐅᑮᐃᔑᐅᓈᑯᓈᓐ ᐃᓂ ᑭᒋᐱᔑᒀᒋᑴᐗᓐ, ᐅᐱᔑᒀᑎᓯᐎᓂᓃᕽ ᑳᑮᐃᔑᓂᔑᐗᓈᒋᐋᓂᒡ ᐊᑮᕽ ᑳᐊᔮᓂᒡ᙮ ᑭᔐᒪᓂᑑ ᐅᑮᑎᐸᐊᒪᐙᓐ ᐃᓂ ᐱᔑᒀᒋᑴᐗᓐ ᐁᑮᓂᓵᓂᒡ ᐃᓂ ᐅᑕᓄᑮᐋᑲᓇᐞ᙮

ᒦᓇᐙ ᑕᔥ ᑮᑭᒋᔖᑯᐌᐗᒃ ᐌᑎ ᑭᒋᑮᔑᑯᕽ: ᐋᓬᐃᓬᐆᔭ! ᒨᔕᒃ ᐊᐸᓀ ᑕᐃᔥᐹᐸᑌ ᐁᒑᑭᑌᒃ ᑭᒋᐆᑌᓇ! ᐁᐃᑭᑐᐙᒡ᙮

ᑮᐊᒋᒋᐸᓂᐅᐗᒃ ᐃᑕᔥ ᐃᑭᐌᓂᐗᒃ ᓃᔥᑕᓇᔑᓃᐎᓐ 24 ᑳᓃᑳᓇᑭᓱᐙᒡ ᑲᔦ ᐃᑭ ᓃᐎᓐ ᐅᐱᒫᑎᓰᒃ, ᐁᐃᔥᐯᓂᒫᐙᒡ ᑭᔐᒪᓂᑑᓐ ᐃᐃᒫ ᑳᓇᒪᑕᐱᓂᒡ ᑭᒋᐊᐱᐎᓂᕽ᙮ ᔑᑾ ᑮᐃᑭᑐᐗᒃ: ᐁᒣᓐ! ᐋᓬᐃᓬᐆᔭ!

ᐃᓉᐎᓐ ᐃᑕᔥ ᑭᒋᐊᐱᐎᓂᕽ ᑮᐅᒋᓅᑖᑾᓐ ᐁᐃᑭᑑᒪᑲᒃ: ᓇᓈᑯᒥᒃ ᑭᑭᔐᒪᓂᑑᒥᓈᓐ, ᑲᑭᓇ ᑮᓇᐙ ᐅᑕᓄᑮᐋᑲᓇᐞ ᑲᔦ ᑲᑭᓇ ᐊᐎᔭ ᑳᑯᑖᓀᓂᒣᒃ, ᑳᐊᑳᓭᑖᑯᓯᔦᒃ ᑲᔦ ᑳᑭᒋ ᐃᓀᑖᑯᓯᔦᒃ, ᓇᓈᑯᒥᒃ!

ᒦᑕᔥ ᓂᑮᓅᑕᐙᒃ ᑖᐱᔥᑰ ᐁᐅᓵᒦᓄᐙᒡ ᐊᐎᔭᒃ, ᑲᔦ ᑖᐱᔥᑰ ᐁᒪᑗᒋᐗᕽ ᑭᒋᐹᐎᑎᒃ, ᑲᔦ ᑖᐱᔥᑰ ᑳᑭᒋᐱᓀᓯᐗᕽ ᐁᐃᓉᒃ, ᒫᒪᐤ ᐁᐃᑭᑐᐙᒡ: ᐋᓬᐃᓬᐆᔭ! ᐋᔕ ᓅᑯᒻ ᒫᒌᑭᒋᐅᑭᒫᐎ ᐊᐌ ᑳᑎᐯᒋᑫᒡ, ᑭᑭᔐᒪᓂᑑᒥᓈᓐ ᑳᒫᒪᐎᒪᔥᑲᐌᑖᑯᓯᒡ!

ᒥᓉᑕᑖ! ᑭᒋᒥᓉᑕᑖ! ᑭᒋ ᐃᓇᑭᒫᑖ! ᐋᔕ ᑎᐱᓭ ᒋᑭᒋᐐᑭᑑᒡ ᐊᐊ ᒫᓇᒑᓂᔐᔅ᙮ ᐋᔕ ᑮᐗᐌᔑᐃᑎᓱᐗᓐ ᐃᓂ ᑳᐐᐐᑎᑫᒫᒡ᙮

ᐊᐌ ᐃᑴ ᑮᒦᓈ ᒋᑭᑭᔥᑲᕽ ᐁᐅᓂᔑᔑᕽ ᐙᐱᔥᑮᑭᓐ ᐁᐙᓯᑌᒃ, ᐁᐯᑲᒃ᙮ ᐃᐌ ᑳᐅᓂᔑᔑᕽ ᐙᐱᔥᑮᑭᓐ ᒦ ᐅᐌᓂ ᑳᐃᒋᑳᑌᓂᒃ ᐅᑾᔭᑯᒋᑫᐎᓂᓂ ᑭᔐᒪᓂᑑ ᐅᑾᔭᒀᑎᓰᒪᐞ᙮

ᐅᐅᔥ ᓂᑮᐃᒃ ᐊᐊ ᐁᒐᓬ: ᐅᔑᐲᐊᓐ: ᔕᐌᑖᑯᓯᐗᒃ ᐃᑭ ᑳᐐᑾᒥᑣ ᐃᒫ ᐅᐐᑭᑑᐎ ᐐᑾᑎᐎᓂᕽ ᐊᐊ ᒫᓇᒑᓂᔐᔅ᙮ ᒦᔥ ᐅᐌ ᒦᓇᐙ ᓂᑮᐃᒃ: ᒦᐗᓄᓄ ᐅᑎᑭᑐᐎᓇᓐ ᑭᔐᒪᓂᑑ ᑳᑌᐺᒪᑲᓂᓂᑭᓐ᙮

ᒦᑕᔥ ᓂᑮᐊᒋᒋᐸᓂᐅᐙᓐ ᐅᓯᑎᕽ ᐊᐊ ᐁᒐᓬ ᐁᐐᐃᔥᐯᓂᒪᒃ᙮ ᒦᔥ ᐃᐃ ᓂᑮᑲᓅᓂᒃ: ᑫᑯ ᐃ ᑑᑕᑫᓐ! ᓃᓐ ᑭᐐᑕᓄᑮᒫᑲᓐ ᑲᔦ ᐅᐐᑕᓄᑮᒫᑲᓂᐙᓐ ᑭᐐᒋᐅᑌᐺᑕᒨᒃ, ᒦᐗᑯᑯ ᑳᑭᒋᐎᓇᒧᐙᒡ ᒋᓴᔅ ᐅᑌᐺᐎ ᑎᐹᒋᒧᐎᓐ᙮ ᑭᔐᒪᓂᑑ ᐁᑕ ᐃᔥᐯᓂᒻ! ᐋᓃᔥ ᐅᑎᐹᒋᒧᐎᓐ ᒋᓴᔅ ᒦ ᐃᐌ ᐁᔑᑮᑭᑐᐙᒡ ᑲᑭᓇ ᑳᑲᓅᑕᒪᐙᐙᒡ ᑭᔐᒪᓂᑑᓐ᙮

ᓂᑮᐙᐸᑖᓐ ᐃᑕᔥ ᑭᒋᑮᔑᒃ ᐁᑮᐹᑭᑌᓂᑳᑌᒃ᙮ ᒦ ᐌᑎ ᑳᐊᔮᒡ ᑳᐙᐱᔥᑭᓯᒡ ᒥᑕᑎᒻ᙮ ᐊᐊᐌᔥ ᑳᑌᓴᐱᒡ ᐅᑾᔭᑴᑖᑯᓰ ᑲᔦ ᑳᑌᐺᒡ ᐃᔑᓂᑳᓈ᙮ ᑾᔭᒀᑎᓯᐎᓂᕽ ᐃᔑᐅᓇᔓᐌ ᑲᔦ ᐃᔑᐊᑕᒦᑳᓱ᙮

ᐅᔥᑮᔑᑰᓐ ᑖᐱᔥᑰ ᑮᐙᓯᑌᓂᐗᓐ ᑳᐊᐲᒋᐙᓴᑯᓀᒃ ᐃᔥᑯᑌ, ᑲᔦ ᐅᑎᒀᓂᕽ ᐁᑮᐊᔮᓂᑭᓐ ᓃᐱᐗᐞ ᑭᒋᐅᑭᒫᐙᓄᒀᓇᓐ, ᐁᑮᐃᔑᐲᐃᑳᑌᓂᒃ ᐅᐐᓱᐎᓐ ᐸᑳᓐ ᐊᐎᔭ ᑳᑭᑫᑕᓯᒃ, ᐱᑯ ᐐᓀᑕ᙮

ᐃᐃᐌᓂ ᑳᑮᑭᑭᔥᑲᕽ ᒥᔅᑸᕽ ᑮᑭᑖᓂᑳᑌᓂ᙮ ᒦᔥ ᐃᐃ ᐃᔑᓂᑳᓈ: ᐅᑎᑭᑐᐎᓐ ᑭᔐᒪᓂᑑ᙮

ᐃᑭ ᑕᔥ ᑭᒋᑮᔑᑯᕽ ᑳᐊᔮᐙᒡ ᔑᒫᑲᓂᔕᒃ ᐅᑮᐊᔫᑯ ᐐᒌᐙᐙᓐ ᐁᑮᐱᒥᓂᔕᐙᐙᒡ, ᐁᐱᑌᓴᐱᐙᒡ ᐁᐙᐱᔥᑭᓯᓂᒡ ᒥᑕᑎᒨᐞ᙮ ᐅᑭᑭᔥᑳᓈᐙ ᐙᐱᔥᑮᑭᓐ ᐁᐙᐱᔥᑳᒃ ᐁᐯᑲᒃ᙮

ᐃᐃᒫᔥ ᐅᑑᓂᕽ ᐊᐊᐌ ᑳᐱᒥᓂᔕᐅᓐᒡ ᑮᐅᒌᒪᑲᓂᓂ ᐁᑳᔖᓂᒃ ᑭᒋᒨᑯᒫᓐ, ᒦ ᐃᐌ ᑳᐐᐅᒋᔖᑰᒋᐋᒡ ᑲᑭᓇ ᐯᒫᑎᓯᓂᒡ ᑳᑕᓶᐙᓇᑭᓯᓂᒡ᙮ ᐅᑲᐃᔑᑎᐯᓂᒫᐞ ᐃᑕᔥ ᐁᐲᐙᐱᑯᐗᓂᓂᒃ ᐅᓴᑲᐅᓈᑎᒃ ᑫᑕᑯᓇᕽ᙮ ᐅᑲᑕᔑ ᓰᔅᑯᐲᑭᔥᑲᐙᐞ ᐃᐃ ᔔᒥᓇᐞ ᐁᑕᔑ ᔔᒥᓈᐳᑳᑳᓂᐎᓂᒡ, ᒦ ᐃᐌ ᐁᓀᑖᑾᓂᓂᒃ ᐅᑭᒋᓂᔥᑳᑎᓯᐎᓐ ᐊᐊ ᑭᔐᒪᓂᑑ ᑳᒫᒪᐎᒪᔥᑲᐌᑖᑯᓯᒡ᙮

ᐊᐌ ᑕᔥ ᑳᑌᓴᐱᒡ ᐅᑭᑭᔥᑭᑲᓂᕽ ᑲᔦ ᐅᑆᒥᕽ ᑮᐅᔑᐲᐃᑳᑌᓂ ᐅᐌ ᐐᓱᐎᓐ: ᐅᑭᒋᐅᑭᒫᒥᐙᓐ ᑭᒋᐅᑭᒫᒃ ᑲᔦ ᑳᑎᐯᓂᒫᒡ ᐅᑎᐯᒋᑫᐞ᙮

ᓂᑮᐙᐸᒫ ᑕᔥ ᐁᒐᓬ ᐁᓃᐸᐎᒡ ᑮᓯᓱᕽ᙮ ᐁᓂᑯᒃ ᐁᑭᔒᐌᒡ ᐅᔖᑯᐙᓈᐞ ᑲᑭᓇ ᐱᓀᔒᔕᐞ ᑳᐸᐹᒥᓭᓂᒡ ᓀᐗᒋᑮᔑᑯᕽ: ᐱᐊᑕᒫᒪᐎᐃᑎᒃ, ᑭᔐᒪᓂᑑ ᑕᑭᒋᐐᑾᑫ! ᐅᑮᐃᓈᐞ᙮

ᐱᐊᑕᒦᒋᒃ ᐅᐐᔮᓯᐙᓐ ᑭᒋᐅᑭᒫᒃ, ᔑᒫᑲᓂᔒᐎᑭᒫᒃ, ᔑᒫᑲᓂᔕᒃ᙮ ᑲᔦ ᐅᐐᔮᓯᐙᓐ ᒥᑕᑎᒨᒃ, ᐃᑭ ᑲᔦ ᑳᑌᓴᐱᐙᒡ, ᑲᔦ ᑲᑭᓇ ᐯᒫᑎᓯᐙᒡ, ᐃᑭ ᑳᑎᐯᓂᒥᑣ ᑲᔦ ᑳᑎᐯᓂᑎᓱᐙᒡ, ᐃᑭ ᑳᑭᒋ ᐃᓀᑖᑯᓯᐙᒡ ᑲᔦ ᑳᐊᑳᓭᑖᑯᓯᐙᒡ, ᐅᐐᔮᓯᐙᓐ ᑲᑭᓇ ᐱᐊᑕᒦᒋᒃ! ᐅᑮᐃᓈᐞ᙮

ᓂᑮᐙᐸᒫᒃ ᐊᐊ ᐱᑾᒋᐊᔭᐋᐎᔥ ᑲᔦ ᑳᑭᒋᐅᑭᒫᐎᐙᒡ ᐊᑮᕽ ᑲᔦ ᐅᔒᒫᑲᓂᔒᒥᐙᐞ ᑲᑭᓇ ᐁᒫᐗᒋᐃᑎᓂᒡ, ᐁᐐᐊᑕᒦᑳᓈᐙᒡ ᐃᓂ ᑳᐱᒥᑌᓴᐱᓂᒡ ᑲᔦ ᐅᔒᒪᑲᓂᔒᒥᓂ ᑳᐆᑯᐐᒌᐎᑯᓂᒡ᙮

ᐊᐊᔥ ᐱᑾᒋᐊᔭᐋᐎᔥ ᑮᐅᑖᐱᓈ ᐊᔑᒡ ᑲᔦ ᐃᓂ ᐊᔭᐋᓐ ᑳᑮᑲᓅᑕᒫᑯᒡ ᑳᑮᐗᓂᒧᓂᒡ, ᒦᐗᓂᓂ ᑳᑮᒪᒫᑕᐎᒋᑫᓂᒡ ᐁᐙᐸᑕᕽ᙮ ᒦ ᐗᐊ ᐅᒪᒫᑕᐎᒋᑫᐎᓂᕽ ᐁᑮᐅᒋᐗᔦᔑᐋᒡ ᐃᐃᐌᓂᐗᐞ ᑳᑮᐅᒋᑭᑭᓇᐙᒋᐲᐃᑲᓂᐎᓂᒡ ᐱᑾᒋᐊᔭᐋᐎᔥ ᐅᑭᑭᓇᐙᒋᒋᑲᓐ, ᐃᓂᐌᓂᐗᐞ ᐅᒪᓯᓂᑰᒋᑲᓐ ᑳᑮᐅᒋᒌᑾᓇᐲᑕᒥᓂᒡ᙮ ᐊᐊ ᑕᔥ ᐱᑾᒋᐊᔭᐋᐎᔥ ᑲᔦ ᐃᓂ ᑳᑭᑲᓅᑕᒫᑯᒡ, ᒥᒋᓃᔥ ᐁᐱᒫᑎᓯᐙᒡ ᐃᐃᒫ ᑮᐊᐸᑭᓈᐗᒃ ᐃᔥᑯᑌᐎᓵᑲᐃᑲᓃᕽ, ᐃᐃᒫ ᐁᑕᑯᒑᑭᓱᒡ ᐊᐊ ᐊᓯᓐ ᑳᓂᑭᓱᒡ ᐁᐐᓴᑳᐸᓱᐌᒡ᙮

ᐅᔑᒫᑲᓂᔒᒥᐙᐞ ᐃᑕᔥ ᐅᑮᓂᓯᑯᓂ ᐃᐌ ᐅᒨᑯᒫᓐ ᐅᑑᓂᕽ ᑳᐅᒌᒪᑲᓂᓂᒃ ᐊᐊᐌ ᑳᑌᓴᐱᒡ ᒥᑕᑎᒧᕽ᙮ ᒦᔥ ᑲᑭᓇ ᐱᓀᔒᔕᒃ ᐗᐐᑫ ᑮᑌᐐᓯᓂᐗᒃ ᐁᒦᒋᐙᒡ ᐅᐐᔮᓯᓂ᙮

ᒦᑕᔥ ᓂᑮᐙᐸᒫ ᐁᒐᓬ ᑭᒋᑮᔑᑯᕽ ᐁᐱᐅᒋᓈᔕᑮᒡ, ᐁᑕᑯᓇᕽ ᐋᐹᐱᑲᐃᑲᓐ ᐃᐃᐌ ᑳᐃᔑᐐᐸᑲᒥᑳᒃ ᑳᒥᔕᑮᔮᓯᓄᒃ ᑫᑭᐸᐃᑳᑳᓂᐗᕽ, ᑲᔦ ᑭᒋᓴᑳᐹᓐ ᐁᑕᑯᓇᕽ᙮

ᐅᑮᐅᑎᑎᓈᓐ ᐃᓂ ᑭᒋᐅᑳᑏᑭᓀᐱᑰᓐ, ᒦᐗᓂᓂ ᒣᐎᔕ ᑳᑮᐅᒌᓂᒡ ᒪᒋᑭᓀᐱᑯᔕᓐ, ᒦᐊᐌ ᒪᒋᐊᔭᐋ ᑲᔦ ᓭᑕᓐ ᑳᑎᓄᐎᒡ᙮ ᒦᐗᓂᓂ ᐅᑮᒪᒫᒋᑾᐱᓈᓐ ᐊᐌ ᐁᒐᓬ, ᒥᑖᔂᒃ ᑕᓱ ᐊᑭ ᒥᓂᒃ ᒋᒪᒫᒋᑾᐱᓱᓂᒡ᙮

ᐅᑮᐲᒋᐌᐱᓈᓐ ᐃᐃᒫ ᑳᐃᔑᐐᐸᑲᒥᑳᒃ᙮ ᐊᒦᔥ ᐃᐃ ᐅᑮᑭᐸᐋᓐ, ᐅᑮᑭᐱᐊᑯᔥᑭᐗᓵᓐ, ᐁᑳ ᒦᓇᐙ ᐐᑳ ᒋᑲᔥᑭᐅᓯᓂᒃ ᒋᓵᑲᐊᓯᓂᒃ, ᒋᐗᔦᔑᐋᓯᓂᒃ ᐃᓂ ᑳᐯᐸᑳᓉᐙᓇᑭᓯᓂᒡ ᐊᑮᕽ, ᐹᓂᒫ ᒥᑖᔂᒃ ᑕᓱ ᐊᑭ ᑮᑭᔑᐱᐊᔮᒃ᙮ ᒦᑕᔥ ᐃᐃ ᐊᐲ ᒋᐋᐸᐅᓐᒡ ᐊᒋᓇ᙮

ᒦᑕᔥ ᓂᑮᐙᐸᑖᓇᓐ ᑭᒋᐊᐱᐎᓇᓐ᙮ ᐃᑭ ᑕᔥ ᑳᑌᓴᐱᐙᒡ ᑮᒦᓈᐗᒃ ᒋᐅᓈᑯᓂᑫᐙᒡ᙮ ᒦᓇᐙ ᑲᔦ ᓂᑮᐙᐸᒥᒫᐞ ᐅᑕᒑᑯᐙᐞ ᐃᑭᐌᓂᐗᒃ ᑳᑮᑮᔥᑭᑴᑕᐅᑣ, ᐅᑯ ᑳᑮᐅᒋᓂᓯᑣ ᐁᑮᑎᐹᒋᒫᐙᒡ ᒋᓴᓲᓐ, ᐁᑮᐐᑕᒫᑫᐙᒡ ᑲᔦ ᑭᔐᒪᓂᑑᓐ ᐅᑎᑭᑐᐎᓂᓂ᙮ ᑳᐐᓐ ᐅᑮᐅᒋᒌᑾᓃᑕᐙᓯᐙᐙᓐ ᐃᓂ ᐱᑾᒋᐊᔭᐋᐎᔕᓐ ᑲᔦ ᐅᒪᓂᑑᑫᐎᑰᒋᑲᓂᓂ᙮ ᑳᐐᓐ ᑲᔦ ᐃᐃᒫ ᑮᐅᒋᑭᑭᓇᐙᒋᐲᐙᓰᐗᒃ ᐅᔅᑲᑎᑯᐙᕽ ᑲᔦ ᐅᓂᒌᐙᕽ ᒋᑎᐯᓂᒥᑯᐙᐸᓐ᙮ ᐅᑯᐌᓂᐗᒃ ᒦᓇᐙ ᑮᐱᒫᑎᓯᐗᒃ, ᑲᔦ ᒥᑖᔂᒃ ᑕᓱ ᐊᑭ ᐅᑮᐐᒋᑎᐯᒋᑫᒫᐙᓐ ᐃᓂ Xᑕᓐ᙮

ᐃᑭᔥ ᐐᓐ ᑯᑕᒃ ᑳᓂᐳᐙᒡ, ᑳ ᒪᔑ ᑮᑮᐌᐱᒫᑎᓯᓰᐗᒃ, ᐹᓂᒫ ᑯ ᑮᐃᔥᒀᓭᒃ ᒥᑖᔂᒃ ᑕᓱ ᐊᑭ᙮ ᐅᑯᐌᓂᐗᒃ ᐃᑕᔥ ᐋᔕ ᑳᑮᐌᐱᒫᑎᓯᐙᒡ, ᒦᐅᐌ ᓂᑕᒻ ᒋᑮᐌᐱᒫᑎᓯᓈᓂᐗᕽ᙮

ᔕᐌᑖᑯᓯᐗᒃ ᐅᑯ ᐃᐃᒫ ᑳᐊᔑᑕᑭᒥᑣ ᓂᑕᒻ ᑮᐌᐱᒫᑎᓯᐎᓂᕽ᙮ ᐃᓇᑭᒫᐗᒃ ᐁᑎᐯᓂᒥᑯᐙᒡ ᑭᔐᒪᓂᑑᓐ᙮ ᐊᒦᐗᑯᑯ ᓃᔣ ᓂᐳᐎᓐ ᑳᐐᓐ ᐅᑲᑎᐯᓂᒥᑯᓰᓈᐙ᙮ ᑭᒋᐊᓇᒥᐁᐎᑭᒫᒃ ᐃᑕᔥ ᐅᑲᐃᓇᓄᑮᐃᑯᐙᓐ ᑭᔐᒪᓂᑑᓐ ᑲᔦ Xᑕᓐ᙮ ᒥᑖᔂᒃ ᑕᓱ ᐊᑭ ᐅᑲᐐᒋᑎᐯᒋᑫᒫᐙᓐ Xᑕᓐ᙮

ᐊᐲ ᑕᔥ ᒥᑖᔂᒃ ᑕᓱ ᐊᑭ ᑫᐴᓂᓭᓂᒃ, ᒦᑕᔥ ᐃᐃ ᓭᑕᓐ ᑕᔮᐸᐃᑲᓂᐎ ᐅᑭᐸᐅᑰᐎᓂᕽ ᐅᒋ᙮

ᑕᐱᓵᑲᐊᒻ, ᑕᒫᒑ ᒋᐗᔦᔑᐋᒡ ᐃᓂ ᐯᒫᑎᓯᓂᒡ ᑲᑭᓇ ᑳᑕᓶᐙᓇᑭᓯᓂᒡ ᒥᓯᐌ ᐊᑮᕽ ᑳᐊᔮᓂᒡ, ᒦᐗᐃᐃ ᒀᒃ, ᒣᒀᒃ ᑳᐃᓂᒥᓐᒡ᙮ ᐊᐊᐌ ᓭᑕᓐ ᐅᑲᒫᒪᐎᐋᐞ ᑲᑭᓇ ᒋᒦᑳᓱᓂᒡ ᐁᑕᔑᓂᒡ ᐅᓄᐌᓂᐗᐞ, ᑖᐱᔥᑰ ᐁᑕᔂᐗᑳᒃ ᒌᑫᐤ ᒥᑖᐗᕽ ᑳᐃᔑᓈᑾᒃ, ᒦᐃᐌ ᑫᐃᔑᓈᑯᓯᐙᒡ᙮

ᑮᐊᓂᒨᔥᑭᓀᓈᑯᓯᐗᒃ ᒥᓯᐌᑲᒥᒃ, ᑲᔦ ᐅᑮᐙᑳᔥᑳᓈᐙ ᑳᐃᔑᑲᐯᔑᓂᒡ ᐃᐃ ᑭᔐᒪᓂᑑᓐ ᐅᐱᒫᑎᓰᒥᓂ, ᐃᐌᓂ ᑕᔥ ᑲᔦ ᐆᑌᓇ ᑳᓵᑭᑑᓂᒡ᙮ ᐃᔥᑯᑌ ᑕᔥ ᑭᒋᑮᔑᑯᕽ ᑮᐱᐅᒋᓭ, ᐊᒦᑕᔥ ᓭᑕᓐ ᐅᒦᑳᓱᐎᓂᓃᒪᐞ ᐅᑮᒑᑳᑭᓱᑯᓈᐙ᙮

ᒦᑕᔥ ᐗᐊ ᒪᒋᐊᔭᐋ ᑳᑮᐗᔦᔑᐋᒡ ᐃᒫ ᑮᐃᔑᐌᐱᓈ ᓵᑲᐃᑲᓃᕽ, ᐃᔥᑯᑌ ᐁᔑᐊᔮᓂᒃ ᑲᔦ ᑳᐱᔅᑲᓀᓂᒡ ᐊᓯᓃᓐ ᑳᐐᓴᑳᐸᓱᐌᓂᒡ᙮ ᒦᐃᒫ ᐋᔕ ᑳᑮᐲᒋᐌᐱᓂᑣ ᐱᑾᒋᐊᔭᐋᐎᔥ ᑲᔦ ᐃᓂ ᑳᑮᑲᓅᑕᒫᑯᒡ ᑳᑮᐗᔦᔑᐃᐌᔥᑭᓂᒡ᙮ ᒦᐃᒫ ᑕᑲᒀᑕᑭᐋᐗᒃ ᐁᑮᔑᑲᓂᓂᒃ ᑲᔦ ᐁᑎᐱᑲᓂᓂᒃ, ᒦ ᑯ ᐊᐸᓂᑯ ᐱᔑᔑᒃ᙮

ᒦᓇᐙ ᑕᔥ ᓂᑮᐙᐸᑖᓐ ᐁᐙᐱᔥᑳᒃ ᑭᒋᐊᐱᐎᓐ ᐁᒥᔖᒃ᙮ ᑲᔦ ᓂᑮᐙᐸᒫ ᐊᐌ ᑳᑌᓴᐱᒡ᙮ ᐅᓈᑯᓯᐎᓂᕽ ᐃᑕᔥ ᑮᐅᒋ ᐅᔑᒨᒪᑲᓐ ᐊᑭ, ᐃᐃ ᑲᔦ ᑮᔑᒃ᙮ ᑳᐐᔥ ᒦᓇᐙ ᐐᑳ ᑮᓈᑾᓯᓅᓇᓐ᙮

ᓂᑮᐙᐸᒫᒃ ᐅᓂᐴᒃ ᑲᑭᓇ ᐁᓃᐸᐎᐙᒡ᙮ ᑳᑭᒋ ᐃᓀᑖᑯᓯᐙᒡ ᑲᔦ ᑳᐊᑳᓭᑖᑯᓯᐙᒡ ᑲᑭᓇ ᐅᑮᐅᒋᔥᑲᐎᑳᐸᐐᑖᓈᐙ ᐃ ᑭᒋᐊᐱᐎᓐ᙮ ᑮᐹᑮᑭᓂᑳᑌᐗᓐ ᑕᔥ ᒪᓯᓇᐃᑲᓇᓐ᙮ ᑲᔦ ᑯᑕᒃ ᒦᓇᐙ ᒪᓯᓇᐃᑲᓐ ᑮᐹᑮᑭᓂᑳᑌ᙮ ᒦᐅᐌ ᒪᓯᓇᐃᑲᓐ ᑳᐃᔑᐅᔑᐲᐅᑣ ᑌᐺ ᑳᐊᔮᐙᒡ ᐱᒫᑎᓯᐎᓐ᙮ ᐅᓂᐴᒃ ᐃᑕᔥ ᑮᐅᒋ ᑎᐹᑯᓈᐗᒃ ᐃᐃᐌ ᐅᒋ ᑳᐅᔑᐲᐃᑳᑌᓂᑭᓐ ᒪᓯᓇᐃᑲᓂᑳᕽ, ᒦᐃᒫ ᐁᔑᐊᑌᓂᑭᓐ ᐅᑎᔑᒋᑫᐎᓂᐙᓐ᙮

ᐊᐊ ᑭᒋᑲᒻ ᐅᑮᐸᑭᑎᓈᐞ ᐃᐃ ᑳᓂᐳᓂᒡ ᐃᐃᒫ ᑳᐊᔮᓂᒡ ᒦᓇᐙ ᒋᓈᑯᓯᓂᒡ᙮ ᑲᔦ ᓂᐳᐎᓐ ᑲᔦ ᐁᑏᔅ ᐅᑮᐸᑭᑎᓈᐙᐞ ᐃᐃ ᐅᓂᐴᐞ ᐃᒫ ᑳᐊᔮᓂᒡ᙮ ᒦᑕᔥ ᑲᑭᓇ ᑳᐃᔑᐅᓇᔓᐙᓂᑣ ᑳᐃᔑᓈᑾᓂᓂᑭᓐ ᐅᑎᔑᒋᑫᐎᓂᐙᓐ᙮

ᒦᔥ ᐅᐅᐌ ᓂᐳᐎᓐ ᐃᐃ ᑲᔦ ᐁᑏᔅ ᑮᐃᔑᐌᐱᓂᑳᑌᐗᓐ ᑳᐃᔥᑯᑌᐗᕽ ᓵᑲᐃᑲᓃᕽ᙮ ᐊᒦᐅᐌ ᑕᔥ ᓃᔣ 2 ᓂᐳᐎᓐ, ᑳᐃᔥᑯᑌᐗᕽ ᓵᑲᐃᑲᓐ᙮

ᐊᐌᓀᓐ ᐃᑕᔥ ᐃᑯ ᐁᑳ ᐁᐅᔑᐲᐙᓯᐎᓐᒡ ᐃᒫ ᒪᓯᓇᐃᑲᓂᕽ ᐃᑭ ᑌᐺ ᑳᐱᒫᑎᓯᐙᒡ ᑳᐃᔑᐲᐅᑣ, ᒦ ᐃᒫ ᑮᐃᔑᐌᐱᓈ ᐃᔥᑯᑌᐎᓵᑲᐃᑲᓃᕽ᙮

ᒦᓇᐙ ᑕᔥ ᓂᑮᐙᐸᑖᓐ ᐅᔥᑭᑭᒋᑮᔑᒃ ᐃᐃ ᑲᔦ ᐅᔥᑭᐊᑭ᙮ ᐃᐃ ᑕᔥ ᓂᑕᒻ ᑭᒋᑮᔑᒃ ᐃᐃ ᑲᔦ ᓂᑕᒻ ᐊᑭ ᑮᐃᔥᒀᓭᐗᓐ, ᑭᒋᑲᒻ ᑲᔦ ᑳᐐᓐ ᑫᔮᐱ ᑮᐊᔮᓯᓅᓐ᙮

ᓂᑮᐙᐸᑖᓐ ᑕᔥ ᐃᐃ ᐆᑌᓇ ᑭᔐᒪᓂᑑ ᑳᐃᔑᐊᔮᒡ, ᒦ ᐃᐌ ᐅᔥᑭ ᒉᕒᐆᓴᓬᐊᒻ, ᐁᐱᐅᒋᓈᔑᔥᑳᒃ ᑭᒋᑮᔑᑯᕽ, ᑭᔐᒪᓂᑑᕽ ᐁᐅᒌᒃ᙮ ᑮᐗᐌᔑᒋᑳᑌ ᑖᐱᔥᑰ ᐃᑴ ᐁᔑᐗᐌᔑᐅᑕᐙᒡ ᐅᓈᐯᒪᓐ ᐁᐐᑭᒋᐐᑎᑫᒫᒡ᙮

ᓂᑮᓅᑖᓐ ᐃᑕᔥ ᐁᑭᒋ ᐃᓂᑖᑾᒃ ᑭᒋᐊᐱᐎᓂᕽ ᐁᑮᐅᒋᑮᑭᑐᒡ ᐊᐎᔭ ᐅᐅᐌ ᐁᐃᑭᑐᒡ: ᐅᑖᐎᓐ ᑭᔐᒪᓂᑑ ᐃᓂᓃᓈᕽ ᐊᔮᓂ᙮ ᐊᒦᑕᔥ ᐅᑲᐐᒋᑖᒫᐞ, ᑲᔦ ᐐᓐ ᐃᑯ ᐅᑲᑎᐯᓂᒫᐞ ᒋᐅᑎᓂᓃᒥᒡ᙮ ᐐᓐ ᐃᑯ ᑎᐱᓇᐌ ᑭᔐᒪᓂᑑ ᐅᑲᐐᒋᐊᔮᒫᐞ, ᒋᐅᑭᔐᒪᓂᑑᒥᑯᒡ᙮

ᐅᑲᑳᓯᐊᒪᐙᐞ ᑲᑭᓇ ᐅᒋᑲᐙᐱᐎᓐ ᐅᔥᑮᔑᑯᓃᕽ ᐅᒋ᙮ ᑲᔦ ᓂᐳᐎᓐ ᑳᐐᓐ ᑫᑰᓐ ᑕᑭᑫᑖᑾᓯᓅᓐ, ᑳᐐᓐ ᑲᔦ ᑕᑭᑫᑖᑾᓯᓅᓐ ᐲᑴᑕᒧᐎᓐ᙮ ᐊᐴᔥᑫ ᒪᐎᐎᓐ, ᐐᓴᑫᑕᒧᐎᓐ ᑳᐐᓐ ᑕᐊᔮᒪᑲᓯᓅᓇᓐ᙮ ᐋᓃᔥ ᐃᓂ ᓂᑕᒻ ᑳᑮᐱᒥᐊᔮᑭᓐ ᐋᔕ ᑮᐴᓂᓭᐗᓐ᙮

ᐊᐊ ᑕᔥ ᑳᓇᒪᑕᐱᒡ ᑭᒋᐊᐱᐎᓂᕽ ᑮᐃᑭᑐ: ᐃᓇᔥᑫ ᑲᑭᓇ ᑫᑰᓐ ᓂᑑᔑᑑᓐ ᒋᐅᔥᑲᔭᐄᐗᕽ᙮ ᒦᑕᔥ ᐃᐃᐌ ᑳᐃᔑᒡ: ᐅᔑᐲᐊᓐ ᐅᓄᐌᓂᐗᓐ᙮ ᐋᓃᔥ ᑌᐺᒪᑲᓅᓐ ᐅᓄ ᐃᑭᑐᐎᓇᓐ, ᑌᐺᔦᑖᑾᓅᓐ ᑲᔦ᙮

ᒦᓇᐙ ᑕᔥ ᓂᑮᐃᒃ: ᑎᐱᓭ! ᓃᓐ ᐊᐊᐌ ᓂᑕᒻ ᑳᑮᐊᔮᒡ ᑲᔦ ᐃᔥᒀᒡ ᑫᐊᔮᒡ᙮ ᓃᓐ ᑳᒫᒋᓭᒃ ᒦᓇᐙᔥ ᑫᑮᔑᓭᒃ᙮ ᓂᑲᒥᒋᒦᓈ ᑳᓅᑌᐐᒥᓂᑴᒡ ᒋᐅᒋᒥᓂᑴᒡ ᐃᐃᒫ ᐁᒨᑭᒋᐗᓂᐲᑯᐗᕽ ᐁᐱᒫᑎᓰᔥᑳᑫᒪᑲᒃ ᐃᐃ ᓂᐱ᙮

ᐊᐎᔭ ᐱᑯ ᑫᔖᑰᒋᐃᐌᒡ ᐅᑲᑎᐯᑖᓇᓐ ᐅᓄ ᑳᐐᒦᓇᒃ: ᓂᑲᐅᑭᔐᒪᓂᑑᒥᒃ, ᐐᓐ ᑕᔥ ᑲᔦ ᓂᑲᐅᑯᓯᓯᒫ᙮

ᐃᑭᐌᓂᐗᒃ ᐃᑕᔥ ᐐᓐ ᑳᔖᑯᑌᐁᐙᒡ, ᑳᑌᐺᔦᑖᑯᓯᓯᒀ, ᑳᓂᑖ ᑲᒀᓂᓴᑭᒋᑫᐙᒡ, ᐃᑭ ᑲᔦ ᐅᓂᔑᐌᒃ, ᐅᐱᔑᒀᑎᓰᒃ, ᐅᑯᓵᐸᒋᑫᒃ, ᐅᒪᓂᑑᑫᔥᑲᒃ, ᑲᔦ ᑲᑭᓇ ᑳᑲᑮᓇᐎᔥᑭᐙᒡ, ᒦ ᐃᒫ ᐐᓇᐙ ᑫᐊᔮᐙᒡ, ᐃᐃᒫ ᓵᑲᐃᑲᓃᕽ ᑳᔑᒑᑭᑌᒃ ᐃᐃᐌ ᐃᔥᑯᑌ ᑲᔦ ᐊᐌ ᐊᓯᓐ ᑳᐱᔅᑲᓀᒡ ᐁᐐᓴᑳᐸᓱᐌᒡ᙮ ᒦ ᐅᐌ ᐃᔥᒀᒡ ᓃᔣ ᓂᐳᐎᓐ᙮

ᐯᔑᒃ ᐃᑕᔥ ᓂᑮᐱᓈᓯᑳᒃ ᑳᓃᔣᒋᐙᒡ 7 ᐁᒐᓬᐊᒃ ᓃᔣᓱ ᑳᐊᔮᐙᒡ ᐅᓈᑲᓇᓐ, ᓃᔣᓱ 7 ᐁᒨᔥᑭᓀᓂᑭᓐ ᑲᒀᑕᑭᑑᐎᓇᓐ, ᐊᒦᐗᓄᓄ ᐃᔥᒀᒡ ᑫᓂᐊᔮᓂᑭᓐ᙮ ᓂᑮᑲᓅᓂᒃ ᐊᐌ ᐁᒐᓬ: ᐲᔖᓐ ᐅᐅᒫ, ᐁᐃᔑᒡ, ᑭᑲᐙᐸᑕᐃᓐ ᐊᐊ ᑳᐅᔥᑭᐐᑎᑫᒥᓐᒡ ᐃᑴ, ᑳᐐᐐᑎᑫᒥᑯᒡ ᐃᓂ ᒫᓇᒑᓂᔐᓴᓐ, ᑮᐃᑭᑐ᙮

ᓂᑮᐐᒌᐎᒃ ᑭᔐᒪᓂᑑ ᐅᑕᒑᑾᓐ, ᐃᐃᒫ ᐁᐃᔑᐎᔑᒡ ᐊᐊ ᐁᒐᓬ ᐗᑭᒋ ᐱᑾᑎᓈᕽ ᐁᑭᒋ ᐃᔥᐸᑎᓈᒃ᙮ ᓂᑮᐙᐸᑕᐃᒃ ᑭᔐᒪᓂᑑ ᐅᑑᑌᓈᒻ ᒉᕒᐆᓴᓬᐊᒻ ᐃᒫ ᐁᐱᓈᔒᔥᑳᒃ ᑭᒋᑮᔑᑯᕽ ᑭᔐᒪᓂᑑᕽ ᐁᐅᒌᒃ,

ᑭᔐᒪᓂᑑ ᐅᐙᓭᓯᐎᓂᕽ ᐁᐅᒋᐙᓯᑌᓂᒃ᙮ ᑮᐃᔑᐙᓵᐱᑭᑌ ᑖᐱᔥᑰ ᐊᓯᓐ ᑳᐋᑾᑭᓱᒡ, ᑖᐱᔥᑰ ᒑᔅᐸᕒ ᐊᓯᓐ ᐐᑫ ᑳᔖᐳᓇᐃᓈᑯᓯᒡ᙮

ᑮᐙᑳᒣᓂᑲᓂᑲᑌ ᐃ ᐆᑌᓇ, ᐐᑫ ᐁᒥᔖᒃ ᑲᔦ ᐁᐃᔥᐹᒃ ᐊᓯᓃᐎ ᒣᓂᑲᓈᐱᒃ, ᒥᑖᔑᓃᔑᓐ 12 ᐁᐊᔮᒪᑲᑭᓐ ᑭᒋ ᐃᔥᒀᑌᒪᓐ᙮ ᐯᐯᔑᒃ ᐃᐃᒫ ᐃᔥᒀᑌᒥᕽ ᑮᐊᔮᐗᒃ ᐁᒐᓬᐊᒃ ᐁᒥᑖᔑᓃᔑᐙᒡ᙮ ᐯᐯᔑᒃ ᐐᓱᐎᓇᓐ ᑮᐅᔑᐲᐃᑳᑌᐗᓐ ᐃᐃᒫ ᐃᔥᒀᑌᒥᕽ, ᒦᐗᓄᓄ ᐅᐐᓱᐎᓂᐙᓐ ᒥᑖᔑᓃᔑᓐ ᑳᐯᐸᑳᓉᐙᓇᑭᓯᐙᒡ ᐃᔅᕒᐃᔭᓬ ᐃᓂᓂᐗᒃ᙮

ᐃᓂ ᑕᔥ ᑭᒋ ᐃᔥᒀᑌᒪᓐ ᑮᓀᓂᓯᓅᓐ 3 ᐙᐸᓄᕽ ᐃᓇᑫ ᐃᐌ ᐊᓯᓃᐎ ᒣᓂᑲᓈᐱᒃ ᑮᓂᓯᓅᓐ ᑭᒋ ᐃᔥᒀᑌᒪᓐ, ᒦᓇᐙ ᔖᐗᓄᕽ ᑮᓂᓯᓅᓐ, ᒦᓇᐙ ᑲᔦ ᑮᐌᑎᓄᕽ ᑮᓂᓯᓅᓐ, ᒦᓇᐙ ᓂᑳᐲᐊᓄᕽ ᐃᓇᑫ ᑮᓂᓯᓅᓐ᙮

ᔑᑾ ᑮᒥᑖᔑᓃᔑᐗᒃ ᐊᓯᓃᒃ ᐃᒫ ᑳᑮᐃᔑᐸᑕᑭᑌᒃ ᐃᐃ ᐊᓯᓃᐎ ᒣᓂᑲᓈᐱᒃ᙮ ᐯᐯᔑᒃ ᐃᑕᔥ ᐃᐃᒫ ᑮᐅᔑᐲᐃᑳᑌᓂᐗᓐ ᐅᐐᓱᐎᓂᐙᓐ ᑳᒥᑖᔑᓃᔑᓂᒡ ᐅᑎᔑᓂᔕᐙᑲᓇᐞ ᐊᐌ ᒫᓇᒑᓂᔐᔅ᙮

ᐊᐌ ᑕᔥ ᐁᒐᓬ ᑳᐐᒋᑲᑭᑑᒥᒡ ᐅᑮᐊᔮᓐ ᐁᐅᓵᐎ ᔔᓂᔮᐗᓂᓂᒃ ᑎᐸᐃᑲᓈᑎᒃ, ᒋᑎᐸᐊᕽ ᐃᐃ ᐆᑌᓇ, ᑲᔦ ᐁᐃᔥᒀᑌᒥᐗᓂᓂᒃ ᑲᔦ ᐁᐙᑳᐊᔮᓂᒃ ᐊᓯᓃᐎ ᒣᓂᑲᓈᐱᒃ᙮

ᓃᐎᕽ ᐁᑲᑲᑫᔮᒃ ᑮᐃᓇᑭᑌ ᐃᐌ ᐆᑌᓇ, ᐯᔑᑾᓐ ᐁᐊᒀᒃ ᑲᔦ ᐯᔑᑾᓐ ᐁᐊᐲᑕᑌᔮᒃ᙮ ᐅᑎᐸᐃᑲᓈᒃ ᐅᑮᐃᔑᑎᐸᐋᓐ ᐊᐌ ᐁᒐᓬ ᐃᐌ ᐆᑌᓇ, ᒥᑖᔑᓃᔑᓐ ᑕᓱ ᒥᑖᔂᒃ 12,000 ᐃᔅᑌᑎᔭ ᑮᐊᐲᒑ ᐁᐊᒀᒃ ᐃ ᐆᑌᓇ᙮ ᐯᔑᑾᓐ ᑮᐊᒀ ᑲᔦ ᐯᔑᑾᓐ ᑮᐊᐲᑕᑌᔮ ᑲᔦ ᐯᔑᑾᓐ ᑮᐊᐲᑖ᙮

ᒦᓇᐙ ᐅᑮᑎᐸᐋᓐ ᐃᐃ ᐊᓯᓃᐎ ᒣᓂᑲᓈᐱᒃ᙮ ᒦᔥ ᐃᐃᐌ ᓂᑯᑣᒃ ᓃᒥᑕᓇᔑᓃᐎᓐ 144 ᑕᓱ ᐯᒥᓂᒃ ᑮᐊᐲᑖ᙮ ᐯᔑᑾᓐ ᐃᓂᓂ ᑳᐃᔑᓂᑖᑎᐸᐃᑫᒡ ᑮᐃᔑᑎᐸᐃᑫ ᐊᐊ ᐁᒐᓬ᙮

ᑮᐅᒋᐅᔑᒋᑳᑌ ᐃᐃ ᐊᓯᓃᐎ ᒣᓂᑲᓈᐱᒃ ᐊᐊ ᒑᔅᐸᕒ ᐊᓯᓐ᙮ ᐃᐃᐌᔥ ᐆᑌᓇ ᐐᑫ ᒪᔮ ᐅᓵᐎ ᔔᓂᔮᐗᓯᓃᕽ ᑮᐅᒋᐅᔑᒋᑳᑌ᙮ ᑖᐱᔥᑰ ᐐᑫ ᑯ ᐁᔖᐳᓈᑾᒃ ᐙᓭᒋᑲᓈᐱᒃ ᐃᓈᐱᑭᓯ ᐅᓵᐎ ᔔᓂᔮ᙮

ᐃᑭ ᑕᔥ ᐊᓯᓃᒃ ᑳᐃᔑᐅᓈᐱᑭᓯᕽ ᐃᐃ ᐊᓯᓃᐎ ᒣᓂᑲᓈᐱᒃ, ᑮᐃᔑ ᐗᐌᔑᒋᑲᓂᐎᐗᒃ ᒑᑲᔭᒃ ᑎᓄ ᑳᐅᓂᔑᔑᐙᒡ ᐊᓯᓃᓴᒃ᙮ ᐊᐊᐌ ᑕᔥ ᓂᑕᒻ ᑭᒋᐊᓯᓐ ᒑᔅᐸᕒ ᑮᑎᓄᐎ, ᒦᓇᐙ ᐊ ᐯᔑᒃ ᐁᔖᐳ ᐅᔖᐗᔥᑯᓈᑯᓯᒡ ᓵᐸᔭᕒ ᐊᓯᓐ ᑮᑎᓄᐎ᙮ ᒦᓇᐙᔥ ᐯᔑᒃ ᐁᐯᐸᑳᓂ ᐯᐯᔖᐱᑭᓯᒡ ᐊᓯᓐ ᐁᑭᑦ ᐁᑎᓄᐎᒡ, ᒦ ᓂᓯᓐ 3. ᒦᓇᐙ ᐊ ᓃᐎᓐ ᑳᐃᓇᑭᒋᑳᓱᒡ ᔒᑯᐲᕽ ᐁᐃᔑᔖᑆᑌᓈᑯᓯᒡ ᐊᓯᓐ, ᐁᒪᕒᐊᓬᑦ ᑮᑎᓄᐎ᙮

ᒦᓇᐙᔥ ᐊᐊ ᓈᓂᕽ ᐁᓇᑭᒋᑳᓱᒡ ᐋᓂᑭᔅ ᑮᑎᓄᐎ ᐊᓯᓐ, ᐁᐃᔑᐯᐯᔖᐱᑭᓯᒡ ᐁᒥᔅᑯᓯᒡ, ᐁᐙᐱᔥᑭᓯᒡ ᑲᔦ᙮ ᒦᓇᐙ ᓂᑯᑣᓱ ᐁᐃᓇᑭᒋᑳᓱᒡ ᑳᕒᓃᓬᐃᔭᓐ ᑮᑎᓄᐎ ᐊᓯᓐ ᐁᒥᔅᒀᐱᑭᓯᒡ᙮ ᒦᓇᐙ ᓃᔣᓱ ᐁᐃᓇᑭᒋᑳᓱᒡ ᑲᕒᐃᓴᓬᐊᐃᑦ ᑮᑎᓄᐎ ᐊᓯᓐ ᐁᐅᓵᐎᓈᑯᓯᒡ ᐁᔖᐳᓈᑯᓯᒡ᙮ ᒦᓇᐙ ᓂᔣᓱ 8 ᐁᐃᓇᑭᒋᑲᓂᐎᒡ ᐯᕒᐊᓬ ᑮᑎᓄᐎ ᐊᓯᓐ ᐁᐅᔖᐗᔥᒀᐱᑭᓯᒡ᙮ ᒦᓇᐙ ᔖᑲᓱ ᐁᐃᓇᑭᒋᑳᓱᒡ ᑑᐹᔅ ᑮᑎᓄᐎ ᐁᔖᐳ ᐅᓵᐎᓈᑯᓯᒡ ᐊᓯᓐ᙮ ᒦᓇᐙᔥ ᒥᑖᓱ ᐁᐃᓇᑭᒋᑳᓱᒡ ᑲᕒᐃᓴᐸᕒᐁᔅ ᐁᑎᓄᐎᒡ ᐁᔒᑯᐲ ᐅᔕᐗᔥᑯᓯᒡ ᐊᐊ ᐊᓯᓐ᙮ ᒦᓇᐙᔥ ᒥᑖᔑᐯᔑᒃ ᐁᐃᓇᑭᒋᑳᓱᒡ ᐊ ᑭᒋᐊᓯᓐ, ᐅᔖᐗᔥᑾᓯᓐ ᑐᕒᑯᔨᔅ ᑮᑎᓄᐎ᙮ ᒦᓇᐙ ᒥᑖᔑᓃᔑᓐ ᑳᐃᓇᑭᒋᑳᓱᒡ ᑭᒋᐊᓯᓐ ᐋᒪᑎᔅᑦ ᑮᑎᓄᐎ ᔔᒥᓈᐳᕽ ᐁᐃᔑᓈᑯᓯᒡ ᐊᐊ ᐊᓯᓐ᙮

ᐃᓂ ᑕᔥ ᑳᒥᑖᔑᓃᔑᑭᓐ 12 ᑭᒋ ᐃᔥᒀᑌᒪᓐ, ᒥᑖᔀᔑᓃᔑᓐ ᒦᑭᓴᒃ ᑮᑎᓄᐗᓅᓐ᙮ ᐯᐯᔑᒃ ᐃᐃ ᐃᔥᒀᑌᒻ ᐯᔑᒃ ᒦᑭᓯᕽ ᑮᐅᒋᐅᔑᒋᑳᑌ᙮ ᔑᑾ ᐃᐌ ᒦᑲᓇ ᐃᒫ ᑳᐱᒪᒧᒃ ᐆᑌᓈᕽ, ᐐᑫ ᒪᔮ ᐅᓵᐎ ᔔᓂᔮᐗᓯᓐ ᑮᐅᒋᐅᔑᒋᑳᑌ ᒦᑲᓇ, ᑖᐱᔥᑰ ᐁᔖᐳᓈᑾᒃ ᐙᓭᓂᑲᓈᐱᒃ ᑮᐃᓈᐱᑭᓯ ᐅᓵᐎ ᔔᓂᔮ᙮

ᑳᐐᓐ ᑕᔥ ᓂᑮᐙᐸᑕᓰᓐ ᐃᐌᑎ ᑭᒋᐊᓇᒥᐁᐎᑲᒥᒃ ᒋᐊᔮᒪᑲᒃ᙮ ᑳᑎᐯᒋᑫᒡ ᑭᔐᒪᓂᑑ ᒫᒪᐤ ᐁᑭᒋᒪᔥᑲᐌᑖᑯᓯᒡ, ᑲᔦ ᐊ ᒫᓇᒑᓂᔐᔅ, ᒦᐗᒃ ᐅᑯ ᐋᐎᐗᒃ ᐁᑭᒋᐊᓇᒥᐁᐎᑲᒥᑯᐗᕽ ᐃᐃ ᐆᑌᓇ᙮

ᑳᐐᓐ ᒣᒬᒡ ᐃᐃᒫ ᐆᑌᓇ ᑕᓇᑕᐌᑖᑯᓯᓰ ᑮᓯᔅ ᑲᔦ ᑎᐱᑭᑮᓯᔅ ᐃᒫ ᒋᐙᓭᔮᒃ᙮ ᒦ ᐁᑕ ᐃᒫ ᑕᐅᒋᐙᓭᔮ ᑭᔐᒪᓂᑑ ᐅᐗᓭᔮᐎᓂᕽ, ᑲᔦ ᒦ ᐊᐌ ᐎᔮᓴᑯᓀᒋᑲᓂᐎᒡ ᐊᐊ ᒫᓇᒑᓂᔐᔅ ᐃᒫ ᐆᑌᓇ᙮

ᑳᑕᓶᐙᓇᑭᓯᐙᒡ ᐊᑮᕽ ᑕᐱᒧᓭᐗᒃ ᐃᒫ ᐁᔑᐙᓭᔮᒃ ᐃᐃ ᐆᑌᓇ᙮ ᑲᔦ ᑭᒋᐅᑭᒫᒃ ᐊᑮᕽ ᑳᐊᔮᐙᒡ ᐅᑲᐲᑎᑲᑑᓈᐙ ᐃᐃᒫ ᐅᑑᓂᔑᔑᐌᑖᑯᓯᐎᓂᐙ᙮

ᐃᓂ ᑕᔥ ᑭᒋ ᐃᔥᒀᑌᒪᓐ ᒨᔕᒃ ᑕᐹᑭᓯᓅᓐ ᑲᐯᑮᔑᒃ᙮ ᑳᐐᓐ ᐐᑳ ᒋᑭᐸᐃᑳᑌᓯᓄᑭᓐ᙮ ᑳᐐᓐ ᐋᓃᔥ ᐐᑳ ᐃᐃᒫ ᑕᑎᐱᑲᓯᓅᓐ᙮

ᑕᐲᑎᑲᒋᑳᑌᓂᐗᓐ ᐃᐃᒫ ᐆᑌᓈᕽ ᐅᑑᓂᔑᔑᐌᑖᑯᓯᐎᓂᐙ ᐃᑭ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᑲᔦ ᐅᐌᓅᑎᓯᐎᓂᐙᓐ᙮

ᑳᐐᓐ ᑕᔥ ᑫᑰᓐ ᑕᐲᑎᑲᒋᑳᑌᓯᓅᓐ ᐃᐌ ᑳᐐᓀᑖᑾᒃ, ᑳᐐᓐ ᑲᔦ ᑕᐲᑎᑫᓰ ᑳᑑᑕᕽ ᐃᐃ ᑳᔒᑫᑖᑾᒃ ᑲᔦ ᑳᑮᐗᓂᒧᒡ᙮ ᐃᑭ ᐁᑕ ᑳᐅᔑᐲᐃᑳᓱᐙᒡ ᐃᐃᒫ ᐅᒪᓯᓇᐃᑲᓂᕽ ᐊᐊ ᒫᓇᒑᓂᔐᔅ ᑳᐃᔑᐅᔑᐲᐅᑣ ᐊᐸᓀ ᐱᑯ ᑫᐱᒫᑎᓯᐙᒡ, ᒦᐗᒃ ᐁᑕ ᑫᐲᑎᑫᐙᒡ ᐃᐃᒫ ᐆᑌᓈᕽ᙮

ᒦᓇᐙ ᓂᑮᐙᐸᑕᐃᒃ ᐊᐊ ᐁᒐᓬ ᐃᐃ ᓰᐱ ᑳᐱᒫᑎᓰᔥᑳᑫᒪᑲᒃ ᐃᐃ ᓂᐱ ᐁᐲᒋᐙᔐᑲᒥᒃ ᑖᐱᔥᑰ ᐙᓭᒋᑲᓈᐱᒃ ᐁᔖᐳᓇᐃᓈᑾᒃ ᐃᔑᓈᑾᓐ ᐃ ᓰᐱ, ᐁᐱᐅᒋᒋᐗᕽ ᐃᐃᒫ ᐅᑭᒋᐊᐱᐎᓂᕽ ᑭᔐᒪᓂᑑ ᑲᔦ ᐊ ᒫᓇᒑᓂᔐᔅ᙮

ᓈᐗᔭᐄ ᐃᐃᒫ ᐃᔑᒋᐗᓐ ᐁᐱᒪᒧᒃ ᒦᑲᓇ ᐃᒫ ᐆᑌᓈᕽ᙮ ᐁᔩᑕᐗᑳᒻ ᑮᐃᔑᐸᑕᑭᓱ ᐱᒫᑎᓯᐎᓂ ᒥᑎᒃ᙮ ᐊᐊᔥ ᒥᑎᒃ ᑮᑮᔑᔔᒥᓂᐎ ᐁᑕᓱᑮᓯᔅ, ᒥᑖᔀᔑᓃᔑᕽ ᐁᑕᓱᐊᑭ᙮ ᐃᓂ ᐊᓃᐲᔕᓐ ᐁᐊᓃᐲᔑᐎᒡ ᐊᐊ ᔔᒥᓈᑎᒃ ᐃᓈᐸᑕᓅᓇᓐ ᒋᐅᒋᒥᓄᐊᔮᐃᑣ ᑲᑭᓇ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ᙮

ᔑᑾ ᑲᑭᓇ ᑫᑰᓐ ᑳᒪᒐᑭᑕᕽ ᑭᔐᒪᓂᑑ ᑳᐐᓐ ᐐᑳ ᐃᒫ ᑕᒥᑭᑳᑌᓯᓅᓐ ᐆᑌᓈᕽ᙮ ᐅᑭᒋᐊᐱᐎᓂᐙ ᑭᔐᒪᓂᑑ ᑲᔦ ᐊ ᒫᓇᒑᓂᔐᔅ ᐃᐃᒫ ᑕᐊᔮᓂ ᐆᑌᓈᕽ᙮ ᑲᔦ ᐅᑕᓄᑮᐋᑲᓇᐞ ᐅᑲᑭᒋ ᐃᓀᓂᒥᑰᐞ᙮

ᐅᑲᐙᐸᒥᑰᐞ ᐅᐗᑌᑯᕽ, ᑲᔦ ᐅᐐᓱᐎᓐ ᑭᔐᒪᓂᑑ ᑕᐅᔑᐲᐃᑳᑌᓂ ᐅᔅᑲᑎᑯᓃᕽ ᐅᑕᓄᑮᐋᑲᓇᐞ᙮

ᑳᐐᓐ ᒦᓇᐙ ᐐᑳ ᑕᑎᐱᑲᓯᓅᓐ᙮ ᑳᐐᓐ ᑲᔦ ᐅᑲᐊᑕᐌᑕᓰᓈᐙ ᐙᓴᑯᓀᒋᑲᓐ ᒋᐅᒋᐙᓭᔮᒃ, ᑳᐐᓐ ᑲᔦ ᑮᓯᔅ ᐅᐙᓭᓯᐎᓐ᙮ ᐋᓃᔥ ᑳᑎᐯᒋᑫᓂᒡ ᑭᔐᒪᓂᑑᓐ ᐅᑲᐙᓭᔥᑳᑯᐙᓐ᙮ ᒦᑕᔥ ᐃᐌ ᑕᑭᒋᐅᑭᒫᐎᐗᒃ ᐊᐸᓀ ᐱᑯ ᐱᔑᔑᒃ ᒋᑎᐯᒋᑫᐙᒡ᙮

ᓂᑮᐃᒃ ᐃᑕᔥ ᐊᐊ ᐁᒐᓬ: ᐊᔮᒀᒣᑖᑾᓅᓐ ᑲᔦ ᑌᐺᐎᓂᐗᓅᓐ ᐅᓄ ᐃᑭᑐᐎᓇᓐ᙮ ᑳᑎᐯᒋᑫᒡ ᑭᔐᒪᓂᑑ ᑳᒦᓈᒡ ᐅᑕᒑᑾᓐ ᐃᓂ ᐅᑎᐹᒋᒧᐎᓂᓃᒪᐞ ᑳᑲᓅᑕᒫᑯᒡ, ᒦ ᐊᐌ ᑳᐱ ᐃᔑᓂᔕᐙᒡ ᐅᑌᒐᓬᐃᒪᓐ ᒋᐙᐸᑕᐋᓂᒡ ᐅᑕᓄᑮᐋᑲᓇᐞ ᐃᐌ ᐌᔩᑉ ᑫᓂ ᐃᔑᓭᓂᒃ᙮

ᐱᓯᑕᓐ! ᐃᑭᑐ ᐊ ᒋᓴᔅ᙮ ᐌᔩᑉ ᓂᑲᐲᔖ! ᑕᔕᐌᑖᑯᓯ ᐊᐊ ᑳᑲᓇᐌᑕᕽ ᐅᓄ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ ᐅᐅᒫ ᒪᓯᓇᐃᑲᓂᕽ ᑳᐃᔑᐲᐃᑳᑌᓂᑭᓐ, ᐃᑭᑐ᙮

ᓃᓐ ᒞᓐ ᓂᑮᓅᑖᓇᓐ ᑲᔦ ᓂᑮᐙᐸᑖᓇᓐ ᑲᑭᓇ ᐅᓄ᙮ ᐊᐲ ᑳᐃᔥᒀᓅᑕᒫᓐ ᑲᔦ ᑳᐃᔥᒀᐙᐸᑕᒫᓐ ᓂᑮᐸᑕᐱᐸᓂᐞ ᐃᒫ ᐁᔑᓯᑌᑳᐸᐎᒡ ᐁᐐᑭᒋ ᐃᓀᓂᒪᒃ ᐊᐊ ᐁᒐᓬ ᑳᑮᐙᐸᑕᐃᒡ ᐅᓄ᙮

ᓂᑮᐃᒃ ᐃᑕᔥ: ᑫᑯ ᐃ ᑑᑕᑫᓐ! ᓃᓐ ᐊ ᐯᔑᒃ ᑭᐐᒋᐊᓄᑮᒫᑲᓐ ᑲᔦ ᐅᐐᑕᓄᑮᒫᑲᓂᐙᓐ ᐃᑭ ᑮᒋᑭᐌᔭᒃ, ᒦᐗᒃ ᐃᑭ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ ᑳᑲᓅᑕᒫᑯᒡ, ᑲᔦ ᑲᑭᓇ ᐊᐎᔭ ᑳᑲᓇᐌᑕᕽ ᐃᓂ ᐃᑭᑐᐎᓇᓐ ᐅᐅᒫ ᒪᓯᓇᐃᑲᓂᕽ ᑳᐊᔮᑭᓐ᙮ ᑭᒋ ᐃᓀᓂᒻ ᑭᔐᒪᓂᑑ, ᒦ ᐁᑕ ᐊᐌ᙮

ᑲᔦᔥ ᓂᑮᐃᒃ ᐊᐊ ᐁᒐᓬ: ᑫᑯ ᑭᐸᐊᑫᓐ ᐃᓂ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ ᐅᐅᒫ ᒪᓯᓇᐃᑲᓂᕽ ᑳᐊᔮᑭᓐ᙮ ᐋᓃᔥ ᐯᔓᓈᑾᓐ ᐅᓄ ᑲᑭᓇ ᒋᑎᐱᓭᑭᓐ᙮

ᐊᐌ ᑳᐐᑾᔭᑯᐱᒫᑎᓯᓯᒃ, ᒫᓄ ᑫᔮᐱ ᑕᑕᔑᒪᒋ ᐃᔑᐌᐱᓯ᙮ ᐊᐊᔥ ᑲᔦ ᑳᐐᓀᑖᑯᓯᒡ ᒫᓄ ᑫᔮᐱ ᑕᑕᔑᐐᓈᑎᓯ᙮ ᐊᐊᔥ ᑳᑾᔭᑯᐱᒫᑎᓯᒡ ᑕᑲ ᑳᐐᓐ ᐅᑲᐴᓂᑑᓰᓐ ᒋᑾᔭᑯᐱᒫᑎᓯᒡ᙮ ᐊᐌᔥ ᒦᓇ ᑳᐃᓇᑭᑎᓱᒡ ᒋᑎᐯᓂᒥᑯᒡ ᑭᔐᒪᓂᑑᓐ, ᑕᑲ ᒦ ᐃ ᑫᐃᓇᑭᑎᓱᒡ, ᓂᑮᐃᒃ ᐊᐊ ᐁᒐᓬ᙮

ᓇᔥᑫ ᐱᓯᑕᓐ! ᐃᑭᑐ ᒋᓴᔅ᙮ ᐌᔩᑉ ᓂᑲᑕᑯᔑᓐ, ᐃᑭᑐ᙮ ᓂᑲᐱᑭᑭᑕᑯᔑᓐ ᓂᑎᐸᐊᒫᑫᐎᓇᓐ᙮ ᐁᑕᓱᐯᔑᑯᐙᒡ ᓂᑲᒦᓈᒃ ᑳᐃᔑᓈᑾᓂᓂᒃ ᐅᑎᔑᒋᑫᐎᓐ᙮

ᓃᓐ ᐊᐊ ᓂᑕᒻ ᑳᑮᐊᔮᒡ, ᑲᔦ ᐲᓂᔥ ᐃᔥᒀᒡ ᑫᐊᔮᒡ᙮ ᓃᓐ ᐊᐊ ᑳᑮᒫᒋᓭᒃ ᑲᑭᓇ ᒦᓇᐙ ᑫᑮᔑᓭᒃ, ᐃᑭᑐ᙮

ᑕᔕᐌᑖᑯᓯᐗᒃ ᐃᑭ ᑳᑭᓰᐲᑭᓇᒧᐙᒡ ᐅᑭᑭᔥᑭᑲᓂᐙᓐ᙮ ᑕᑌᐸᑫᑖᑯᓯᐗᒃ ᐃᑕᔥ ᐃᑭ ᒋᓈᓯᑲᐙᐙᒡ ᐃᓂ ᐱᒫᑎᓯᐎᓂ ᒥᑎᑰᓐ ᒋᐅᒋᐐᓯᓂᐙᒡ, ᑲᔦ ᐃᐃᒫ ᑳᐃᔑ ᐃᔥᒀᑌᒥᐗᓂᓂᒃ ᒋᐅᒋᐲᑎᑫᐙᒡ ᐃᐃᒫ ᐆᑌᓈᕽ᙮

ᐊᑾᒌᕽ ᐃᑕᔥ ᑕᐊᔮᐗᒃ ᐃᑭ ᐊᓅᒋᑯ ᐁᔑᐌᐱᓯᐙᒡ, ᑲᔦ ᑳᑯᓵᐸᑕᒧᐙᒡ, ᑳᐱᔑᒀᑎᓯᐙᒡ, ᑳᓂᔑᐌᐙᒡ, ᑲᔦ ᑳᒪᓂᑑᑫᐙᒡ ᑫᑰᓐ, ᑲᔦ ᐊᐌᓀᓐ ᐃᑯ ᑳᓵᑭᑑᒡ ᐁᑮᐗᓂᒧᒡ ᑲᔦ ᐁᑲᑮᓇᐎᔥᑭᐊᔨᔑᒋᑫᒡ᙮

ᓃᓐ ᒋᓴᔅ ᓂᑮᐃᔑᓂᔕᐙ ᓂᑌᒐᓬᐃᒻ ᒋᑎᐹᒋᒧᑕᐎᓀᒃ ᐅᓄ ᐋᑎ ᐱᑯ ᑳᒫᐗᒋᐃᑎᐙᒡ ᐅᑌᐺᑕᒨᒃ᙮ ᓃᓐ ᐃᒫ ᐅᓂᑖᐎᑭᐋᑲᓂᕽ ᑌᐱᑦ ᓂᑑᑕᑳᓀᔅ᙮ ᓃᓐ ᐊᐊ ᑳᑮᑳᔮᓯᑫᒡ ᐙᐸᓇᕽ, ᐃᑭᑐ᙮

ᐱᑕᑶᔑᓂᓐ! ᐃᑭᑐᐗᒃ ᑭᔐᒪᓂᑑ ᐅᑕᒑᑾᓐ ᑲᔦ ᐊ ᐐᑭᑑᐎᑴ᙮ ᑲᔦ ᑲᑭᓇ ᑳᓅᑕᕽ ᐊᐊ ᒫᓄ ᑕᐃᑭᑐ: ᐱᑕᑶᔑᓂᓐ! ᑲᔦ ᑮᓐ ᐊᐌᓀᓂᐎᔭᓐ ᐃᑯ ᑳᓅᑖᔮᐹᑴᔭᓐ, ᐊᐯ ᐲᔖᓐ᙮ ᐱᑯ ᐊᐎᔭ ᐃᓀᑕᕽ ᐱᓵᓐ ᐃᑯ ᐅᑲᐅᑖᐱᓈᓐ ᑳᐱᒫᑎᓰᔥᑳᑫᒪᑲᒃ ᓂᐱ᙮

ᓃᓐ ᒞᓐ ᓂᑕᔮᒀᒥᒫᒃ ᑲᑭᓇ ᑳᓅᑕᒧᐙᒡ ᐅᓄ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ, ᐅᐅᒫ ᒪᓯᓇᐃᑲᓂᕽ ᑳᐊᔮᓂᑭᓐ: ᑮᔥᐱᓐ ᓇᑭᑑᒡ ᐊᐎᔭ ᑫᑰᓐ ᐅᓄ ᐃᑭᑐᐎᓇᓐ, ᑫᐐᓐ ᑭᔐᒪᓂᑑ ᐅᑲᓇᑭᑕᒫᑰᓐ ᐅᑎᐸᐊᒫᑰᐎᓂᕽ ᐃᓂ ᑯᑕᑭᑑᐎᓇᓐ ᐅᒫ ᑳᐅᔑᐲᐃᑳᑌᑭᓐ ᒪᓯᓇᐃᑲᓂᕽ᙮

ᑮᔥᐱᓐ ᑲᔦ ᐊᐎᔭ ᐱᑯ ᑫᐊᒋᐎᓇᒧᑴᓐ ᐅᓄ ᐃᑭᑐᐎᓇᓐ ᐁᑳ ᒋᒥᓯᐌᔮᓯᓂᓂᒃ ᑭᔐᒪᓂᑑ ᐅᑲᓅᑕᒫᑰᐎᓐ ᐅᒫ ᒪᓯᓇᐃᑲᓂᕽ ᑳᐊᔮᓂᒃ, ᐅᑲᐅᑖᐱᓇᒫᑰᓐ ᑭᔐᒪᓂᑑᓐ ᑫᐐᓐ ᑫᐐᒋᐃᐌᐸᓐ ᐃᒫ ᐱᒫᑎᓯᐎᓂ ᒥᑎᑯᕽ ᒋᐅᒋᐊᒧᒥᓀᓯᒃ, ᑲᔦ ᑫᐐᒋᐃᐌᐸᓐ ᑭᔐᒪᓂᑑ ᐅᑑᑌᓈᒥᕽ, ᐅᒫ ᑳᑕᓈᑐᑌᑭᓐ ᒪᓯᓇᐃᑲᓂᕽ᙮

ᐊᐌ ᑳᑎᐹᑐᑕᕽ ᐁᑌᐺᒪᑲᑭᓐ ᐅᓄᐌᓂᐗᓐ ᑲᔦ ᐐᓐ ᐃᑭᑐ: ᑌᐺ! ᐐᐸ ᓂᑲᐱᑕᑯᔑᓐ! ᐊᐤ, ᒦ ᐃᐌ ᑫᐃᔑᐌᐸᒃ! ᐱᑕᑶᔑᓂᓐ, ᒋᓴᔅ ᑳᑎᐯᒋᑫᔭᓐ!

ᐅᔕᐌᒋᑫᐎᓐ ᑳᑎᐯᒋᑫᒡ ᒋᓴᔅ ᐅᑲᐐᐐᒌᐎᑯᓈᐙ ᑲᑭᓇ ᐊᐎᔭ᙮ ᐁᒣᓐ᙮