ᓃᓐ ᐲᑕᕒ ᒋᓴᔅ X ᐅᑎᔑᓂᔕᐙᑲᓇᓐ᙮ ᑭᑑᔑᐲᐊᒪᐎᓂᓂᒻ ᑮᓇᐙ ᑭᔐᒪᓂᑑ ᑳᑮᐅᓈᐸᒥᓀᒃ, ᑳᐲᐎᑌᐌᑖᑯᓯᔦᒃ ᐅᒫ ᐊᑮᕽ, ᒥᓯᐌ ᑲᔦ ᐌᑎ ᑳᐃᔑᐊᔨᑖᔦᒃ, ᐹᑕᔅ ᐊᑮᕽ, ᑲᓬᐁᔑᔭ, ᑳᐸᑑᔕ, ᐁᔕ, ᐱᑎᓂᔭ ᑲᔦ᙮

ᑮᓇᐙ ᐄᑐᒃ ᑭᑮᐃᔑ ᑮᔖᒋ ᐅᓈᐸᒥᑯᐙ ᐅᑎᓀᑕᒧᐎᓂᕽ ᑭᔐᒪᓂᑑ ᑳᐅᔫᓯᒥᓐᒡ ᐁᐐᐋᐸᒋᐃᓀᒃ᙮ ᑭᔐᒪᓂᑑ ᐅᑕᒑᑾᓐ ᑲᔦ ᑭᑮᐃᔑᐃᑯᐙᒻ ᐁᐐᑎᐯᓂᒥᓀᒃ, ᑮᓇᐙ ᓴ ᒋᓇᐃᑕᐌᒃ ᒋᓴᔅ X, ᒋᐯᑭᐃᑯᐌᒃ ᑲᔦ ᐅᒥᔅᑸᒻ᙮ ᑕᑲ ᔕᐌᑖᑯᓯᐎᓐ, ᐱᓵᓂᓯᐎᓐ ᑲᔦ ᑭᑲᑎᐱᓇᐌᐎᓯᒻ ᑫᒨᔥᑭᓀᔥᑳᑯᔦᒃ᙮

ᑕᑲ ᑕᒥᑴᒋᐌᑖᑯᓯᐗᓐ ᑳᐅᑭᔐᒪᓂᑑᒥᒡ ᑳᐅᑌᑌᒡ ᑲᔦ ᑳᑎᐯᓂᒥᓇᕽ ᒋᓴᔅ X᙮ ᑭᔐᒪᓂᑑ ᐄᑐᒃ ᑭᑮᒦᓂᑯᓈᓐ ᐅᔥᑭᐱᒫᑎᓯᐎᓐ ᑫᐅᒋᐊᔮᐗᕽ ᐃᐃ ᐊᐯᓂᒧᐎᓐ ᑳᑫᒋᓈᐅᐌᑖᑾᓂᓂᒃ ᐃᐃᒫ ᑳᐅᒌᓂᒃ ᑳᑮᐃᔑᑮᐌᐱᒫᑎᓯᐋᒡ ᒋᓴᔅ Xᑕᓐ ᓂᐳᐎᓂᕽ ᐅᒋ᙮

ᒦᑕᔥ ᑳᐅᒋᐲᑖᐗᕽ ᒋᑎᐱᓇᐌᐎᓯᐗᕽ ᐃᐃᐌᓂ ᑭᔐᒪᓂᑑ ᑳᐐᒦᓂᓇᕽ ᐐᑳ ᑫᓂᔑᐗᓈᑕᓯᓂᓂᒃ, ᐐᑳ ᑲᔦ ᑫᓂᐊᑯᓈᑾᓯᓂᓂᒃ, ᑫᓀᐱᒋ ᐅᓂᔑᔑᓂᓂᒃ ᑲᔦ᙮ ᑮᓇᐙ ᓴ ᐅᓄ ᑳᑲᓇᐌᑕᒫᑰᐌᒃ ᑭᒋᑮᔑᑯᕽ᙮

ᑮᓇᐙ ᐄᑐᒃ ᑭᑑᒋᑲᓇᐌᓂᒥᑰᐎᓯᒻ ᑭᔐᒪᓂᑑ ᐅᒪᔥᑲᐎᓰᐎᓂᕽ ᐁᑌᐺᔦᑕᒣᒃ ᑭᐱᒫᒋᐃᑰᐎᓂᐙ ᐋᔕ ᐁᑮ ᑮᔑᓈᑾᒃ ᐁᐐᓈᑯᒋᑳᑌᒃ ᐃᔥᒀᒡ ᑮᔑᑲᒃ᙮

ᒦᑕᔥ ᐅᐅ ᐐᑫ ᐅᒋᒥᓉᑕᒧᒃ, ᐋᓇᐐᓐ ᓅᑯᒻ ᐊᒋᓇ ᐁᐅᒋᒫᓀᑕᒣᒃ ᐃᐃ ᑳᐃᔑᑲᒀᑕᑭᑑᔦᒃ, ᒥᓯᐌ ᐁᐃᔑᑯᒋᐃᑰᐎᓯᔦᒃ᙮

ᒦᑕᔥ ᐃᐃ ᑳᐅᒋ ᐃᔑᓭᔦᒃ ᒋᑭᑫᑖᑾᒃ ᑭᑌᐺᔦᑕᒧᐎᓂᐙ ᑌᐺ ᐁᐋᐗᕽ᙮ ᐃᓇᔥᑫ ᐅᓵᐙᐱᑯ ᔔᓂᔮᐗᓯᓐ ᐱᓵᓂᑯ ᑫᓂᔑᐗᓈᒋᒋᑲᓂᐎᐸᓐ, ᐃᔥᑯᑌᕽ ᐃᓴ ᐃᔑᑲᑴᒋᐋᑲᓂᐎ᙮ ᐃᓂ ᑕᔥ ᑭᑌᐺᔦᑕᒧᐎᓂᐙ ᓇᐗᒡ ᑳᑭᒋ ᐃᓀᑖᑾᒃ ᐊᐲᒡ ᐐᓐ ᐊᐊ ᐅᓵᐙᐱᑯ ᔔᓂᔮᐗᓯᓐ, ᒦᐯᔑᑾᓐ ᐁᔑᑲᑴᒋᒋᑳᑌᒃ, ᒫᓄ ᓴ ᒋᔕᔒᐱ ᐊᔮᔦᒃ᙮ ᑮᓇᐙ ᑕᔥ ᑭᑲᑌᐱᓈᒻ ᑫᐅᒋ ᒥᓍᐸᒥᑰᔦᒃ, ᑫᐅᒋᑭᒋ ᐃᓀᓂᒥᑰᔦᒃ, ᑫᐅᒋ ᑭᑌᓂᒥᑰᔦᒃ ᑲᔦ ᐊᐲ ᒋᓴᔅ X ᓈᑯᓯᒡ᙮

ᐋᓇᐐᓐ ᒪᔑ ᐁᑮᐙᐸᒫᓯᐌᒃ ᔖᑰᒡ ᐃᑕᔥ ᑭᓵᑭᐋᐙ᙮ ᐋᓇᐐᓐ ᑲᔦ ᓅᑯᒻ ᒪᔑ ᐁᐙᐸᒫᓯᐌᒃ, ᔖᑰᒡ ᑭᑌᐺᔦᓂᒫᐙ, ᑭᒨᔥᑭᓀᔥᑳᑯᐙᒻ ᑲᔦ ᐃᐃ ᑫᑌᐐᒋᑳᑌᓯᓄᑭᐸᓐ, ᑳᑭᒋ ᐃᓀᑖᑾᒃ ᒥᓉᑕᒧᐎᓐ᙮

ᐋᓃᔥ ᐋᔕ ᑭᑌᐱᓈᒻ ᐁᐱᒫᒋᐃᑰᐎᓯᔦᒃ, ᑭᑌᐺᔦᑕᒧᐎᓂᐙᕽ ᐁᐅᒌᒪᑲᒃ᙮

ᒦ ᓴ ᑕᔥ ᐅᐅᐌᓂ ᐱᒫᒋᐃᑰᐎᓯᐎᓂᓂ ᐃᑭ ᐅᑖᓈᕽ ᑳᑮᑮᑭᑑᑕᒪᐙᐙᒡ ᑭᔐᒪᓂᑑᓐ ᐌᐌᓂ ᑳᑮᐊᑑᓀᐊᒧᐙᒡ, ᑳᑮᑲᑴ ᑭᑫᑕᒧᐙᒡ ᑲᔦ ᐁᑮᓃᑳᓂᑕᔑᑕᒧᐙᒡ ᐅᐅ ᒦᑭᐌᐎᓂᓂ ᑭᔐᒪᓂᑑᓐ ᑫᒦᓂᒥᓀᒃ᙮

ᐅᑮᑲᑴ ᑭᑫᑖᓈᐙ ᑲᔦ ᐊᐌᓀᓇᓐ ᑫᐱᑕᑯᔑᓂᓂᒡ, ᐋᓃᓐ ᑲᔦ ᒪᔮ ᐊᐲ ᐃᔑᓭᓂᒃ ᐃᐃ ᑫᐃᔑᐌᐸᓂᓂᒃ᙮ ᐃᓂ ᓴ ᑳᑮ ᑭᑭᔥᑲᐙᐙᒡ Xᑕᓐ ᐅᑕᒑᑯᓂ ᐅᑮᐐᑕᒫᑯᐙᓐ ᐁᐐᐱ ᑲᒀᑕᑭᑑᓂᒡ Xᑕᓐ ᐲᓂᔥ ᑕᔥ ᒋᐊᓂᑭᒋ ᐃᓀᑖᑯᓯᓂᒡ᙮

ᑭᔐᒪᓂᑑᓐ ᑕᔥ ᐅᑮᐙᐸᑕᐃᑯᐙᓐ ᐅᑕᓄᑮᐎᓂᐙᓐ ᐐᓀᑕᐙ ᒋᐅᒋ ᒥᓄᓭᓯᒀ, ᑮᓇᐙ ᐅᔕ ᑲᔦ ᒋᐅᒋ ᒥᓄᓭᐌᒃ᙮ ᐅᑮᑕᔑᑖᓈᐙᓐ ᐃᓂᐌᓂᐗᓐ ᑮᓇᐙ ᓅᑯᒻ ᑳᐱᓅᑕᒣᒃ᙮ ᒦ ᓴ ᐃᐌ ᑳᑮᐅᒋᓅᑕᒣᒃ ᐃᑭᐌᓂᐗᒃ ᒥᓍᒋᒧᐎᓐ ᑳᑮᐐᑕᒪᐎᓀᒀ ᑳᐸᐹ ᑎᐹᒋᒧᐙᒡ ᑳᒪᔥᑲᐎᓰᔥᑳᑯᐙᒡ ᑭᔐᒪᓂᑑᓐ ᐅᑕᒑᑯᓂ ᑭᒋᑮᔑᑯᕽ ᑳᑮᐱᐅᒋ ᐲᒋᓂᔕᐅᒥᓐᒡ᙮ ᒦᐗᓐ ᑕᔥ ᐅᓄᐌᓂᐗᓐ ᐐᑫ ᑲᔦ ᐁᒐᓬᐊᒃ ᑳᒥᓴᐌᑕᒧᐙᒡ ᒋᓂᓯᑐᑕᒧᐙᒡ᙮

ᑕᑲ ᑕᔥ ᑭᓈᓈᑲᑕᐌᑕᒧᐎᓂᐙᕽ ᐃᔑᑮᔐᑕᒧᒃ ᐙᐃᔑᒋᑫᔦᒃ᙮ ᒨᔕᒃ ᐃᑯ ᐙᐹᑲᒣᑕᒧᒃ᙮ ᒥᓯᐌ ᐃᔑᐊᐯᓂᒧᓄᑕᒧᒃ ᔕᐌᑖᑯᓯᐎᓐ ᑳᐐᒦᓂᑰᔦᒃ ᐊᐲ ᒋᓴᔅ X ᓈᑯᐃᓐᒡ᙮

ᓇᐃᑕᐎᒃ ᓴ ᑭᔐᒪᓂᑑ, ᑫᑯ ᑲᔦ ᐸᑭᑎᓂᑎᓱᑫᒃ ᒋᐃᔑᓈᐱᓈᑯᓯᔦᒃ ᑳᑮᐃᔑ ᓂᑖ ᒥᓴᐌᒋᑫᔦᒃ ᒣᒀ ᑮᑲᑮᐹᑎᓯᔦᑭᐸᓐ ᒣᒀ ᑮᑭᑫᓂᒫᓯᐌᒃ X᙮

ᐊᐊ ᐄᑐᒃ ᑳᑮᑲᓅᓂᓀᒃ ᐋᐱᒋ ᐯᑳᑎᓯ, ᒦᑕᔥ ᑫᑮᓇᐙ ᐯᔑᑾᓐ ᑲᑭᓇ ᑫᑰᓐ ᑳᐃᔑᒋᒋᑫᔦᒃ ᐃᔑᐯᑳᑎᓯᒃ᙮

ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐯᑳᑎᓯᒃ ᐋᓃᔥ ᓃᓐ ᓂᐯᑳᑎᔅ᙮

ᐁᐃᔑᓂᑳᓀᒃ ᑕᔥ ᓂᑌᑌ ᑮᐊᓇᒥᐁᑕᐌᒃ ᐊᐊ ᐯᔑᑾᓐ ᑳᐃᔑᑲᓇᐙᐸᒫᒡ ᐁᑕᓱᐯᔑᑯᓂᒡ ᑲᑭᓇ ᐯᒫᑎᓯᓂᒡ ᐋᓃᓐ ᐁᔑᒋᑫᓂᒡ, ᑕᑲ ᑕᔥ ᒥᓂᒃ ᐃᑯ ᑫᐱᒫᑎᓯᔦᒃ ᐅᐅᒫ ᐊᑮᕽ ᑳᐃᔑᐲᐎᑌᐌᑖᑯᓯᔦᒃ, ᐃᔑᐱᒫᑎᓯᒃ ᐁᑯᑖᓀᓂᒣᒃ ᑭᔐᒪᓂᑑ᙮

ᐋᓃᔥ ᑳᑮᐃᔑᐱᒫᑎᓯᔦᒃ ᐅᑖᓈᕽ ᑳᑮᐃᓇᐌᒀ ᑭᑫᑌᔭᐋᒥᐙᒃ, ᑳᐐᓐ ᑫᑰᓐ ᑮᐃᓈᐸᑕᓯᓅᓐ᙮ ᑭᑭᑫᑖᒻ ᐄᑐᒃ ᐌᑯᓀᓐ ᑳᑎᐸᐃᑳᑳᓂᐗᕽ ᒋᑎᐯᓂᒥᑯᓯᐌᒃ ᑳᑮᓂᑖ ᐃᔑᐌᐱᓯᔦᒃ᙮ ᑳᐐᓐ ᐙᐹᐱᑯ ᔔᓂᔮ, ᐅᓵᐎ ᔔᓂᔮ ᑲᔦ ᑮᐋᐸᑎᓯᓰᐗᒃ᙮

ᐃᐃᐌᓂ ᐅᔕ X ᑳᐋᑾᑭᑌᓂᒃ ᐅᒥᔅᑸᒻ ᑮᐋᐸᑕᓂᓂ᙮ ᐐᓐ ᐄᑐᒃ ᑳᑮᒫᓇᒑᓂᔐᓯᐎᒡ ᑳᐲᑯᓈᑯᓯᓯᒃ, ᑳᒫᑭᓯᓯᒃ ᑲᔦ ᑳᑮᐸᑭᑎᓈᓱᐙᑳᓂᐎᒡ᙮

ᐐᓐ X ᑮᑮᔖᒋᐅᓈᐸᒫ ᒋᑆ ᐅᔑᒋᑳᑌᓂᒃ ᐅᐅ ᐊᑮᓂ, ᓅᑯᒻ ᑕᔥ ᑮᓈᑯᒋᑲᓂᐎ ᐋᔕ ᐁᐯᔓᓈᑾᓂᓂᒃ ᑳᐐᑮᔑᓈᑾᓂᓂᑭᓐ ᑲᑭᓇ ᑫᑰᓇᓐ᙮ ᑮᓇᐙ ᓴ ᑳᑮᐅᒋᓈᑯᒋᑲᓂᐎᒡ᙮

ᐐᓐ ᐃᑕᔥ ᐅᒋ ᑳᐅᒋᑌᐺᔦᓂᒥᒣᒃ ᑭᔐᒪᓂᑑᓐ ᐁᑮᑮᐌᐱᒫᑎᓯᐃᑯᒡ ᐃᐃᒫ ᓂᐳᐎᓂᕽ ᐅᒋ, ᐁᑮᐃᔑᐃᑯᒡ ᑲᔦ ᒋᑭᒋ ᐃᓀᑖᑯᓯᒡ᙮ ᐐᓐ ᓴ ᑳᐅᒋᑌᐺᔦᓂᒥᒣᒃ, ᑳᐅᒋᐊᐯᓂᒧᓄᑕᐎᒣᒃ ᑲᔦ ᑭᔐᒪᓂᑑᓐ᙮

ᐃᓇᔥᑫ ᑕᔥ ᓅᑯᒻ ᑭᑑᒋᐯᑭᐃᑎᓱᒻ ᐁᓇᐃᑕᒣᒃ ᐃᐃ ᑌᐺᐎᓐ, ᒦᑕᔥ ᐃᐃ ᐌᐌᓂ ᑳᐅᒋᓵᑭᐁᒀ ᑮᒋᐅᑌᐺᑕᒨᒥᐙᒃ᙮ ᐐᑫ ᓴ ᓵᑭᐃᑎᒃ, ᒥᓯᐌ ᐱᑯ ᑭᑌᐃᐙᕽ᙮

ᐋᔕ ᐄᑐᒃ ᑭᑮᐋᒋᓂᑖᐎᑭᒻ᙮ ᑳᐐᓐ ᑕᔥ ᑭᑮᐅᑎᓇᓰᒻ ᑭᓃᑭᐃᑯᐙᕽ ᑫᓂᔑᐗᓈᑕᒃ᙮ ᐃᐃᒫ ᐅᔕ ᑭᑮᐅᑎᓈᒻ ᑭᔐᒪᓂᑑ ᐅᑎᑭᑐᐎᓂᕽ ᑳᐱᒫᑕᓂᓂᒃ, ᐐᑳ ᑲᔦ ᑫᐴᓂᓭᓯᓂᓂᒃ᙮

ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑲᑭᓇ ᓴ ᐯᒫᑎᓯᐙᒡ ᒪᔥᑯᓰᕽ ᐃᔑᓈᑯᓯᐗᒃ; ᐃᐃ ᑕᔥ ᑳᐃᔑᑭᒋ ᐃᓀᑖᑯᓯᐙᒡ ᒦᐃ ᐁᓀᑖᑾᓂᓂᒃ ᑖᐱᔥᑰ ᐙᐱᑾᓐ ᐱᑾᑕᑲᒥᒃ ᑳᔭᔮᒃ᙮ ᐃᐃ ᑕᔥ ᒪᔥᑯᓯ ᐹᑌ, ᐃᐃ ᑲᔦ ᐙᐱᑾᓐ ᐸᑭᓯᓐ,

ᐃᐃᐌᓂ ᑕᔥ ᐐᓐ ᐅᑎᑭᑐᐎᓐ ᐊᐊ ᑳᑎᐯᒋᑫᒡ ᓀᐱᒡ ᑕᓂᔭᔮᓂ᙮ ᒦ ᓴ ᑕᔥ ᐅᐅ ᐃᑭᑐᐎᓐ ᑳᑮᒥᓍᒋᒧᑖᑰᔦᒃ᙮

ᑕᑲ ᓴ ᑕᔥ ᐌᐱᓇᒧᒃ ᑲᑭᓇ ᑳᒪᒋᓈᑾᑭᓐ, ᑲᑮᓇᐎᔥᑭᐎᓐ, ᐊᓇᒥᐁᑳᓱᐎᓐ, ᐋᔮᔐᓂᑎᐎᓐ, ᒪᒋᑕᔑᑎᐎᓐ ᑲᔦ᙮

ᑖᐱᔥᑰ ᐅᔥᑲᐱᓅᒌᔕᒃ ᑳᓂᑖᐎᑭᐙᒡ ᑳᐐᓅᑌᓅᓂᐙᒡ, ᒨᔕᒃ ᐃᑯ ᓅᑕᔮᐹᑴᓄᑕᒧᒃ ᐃᐃ ᐐᑫ ᑳᐯᑳᑲᒥᒃ ᒎᒎᔖᐳ ᑫᒥᓄᔥᑳᑯᐙᒡ ᑭᑕᒑᑯᐙᒃ, ᒥᓂᒀᑕᒧᒃ ᐃᐃᒫ ᒋᐅᒋᒫᒌᑭᔦᒃ ᒋᐱᒫᒋᐃᑰᐎᓯᔦᒃ᙮

ᐋᔕ ᐄᑐᒃ ᑮᓇᐙ ᑭᑮᒪᓯᐱᑕᒧᐙᒻ ᐅᒥᓄᑑᑖᑫᐎᓐ ᑳᑎᐯᒋᑫᒡ᙮

ᐱᓈᓯᑲᐎᒃ ᑳᑎᐯᒋᑫᒡ, ᑳᐱᒫᑎᓯᒡ ᐊᓯᓐ ᑳᑮᐋᓇᐌᓂᒥᑯᒡ ᐯᒫᑎᓯᓂᒡ, ᑭᔐᒪᓂᑑᓐ ᑕᔥ ᐐᓐ ᑳᑮᐅᓇᑭᒥᑯᒡ, ᐁᑮᑭᒋ ᐃᓀᓂᒥᑯᒡ ᑲᔦ᙮

ᒦᑕᔥ ᑫᑮᓇᐙ ᐯᔑᑾᓐ ᐁᑎᓄᐎᔦᒃ ᐊᓯᓃᒃ ᑳᐱᒫᑎᓯᐙᒡ, ᑭᑎᔑᐋᐸᑎᓯᒻ ᐃᐃ ᑳᐅᔑᒋᑳᑌᒃ ᐊᒑᑯᐙᑳᐃᑲᓐ᙮ ᒦᑕᔥ ᐃᐃᒫ ᑫᑕᔑ ᐃᓍᓱᔦᒃ ᐊᓇᒥᐁᐎᑭᒫᒃ ᑳᐋᐸᒋᐃᑯᐙᒡ ᑭᔐᒪᓂᑑᓐ, ᒋᐸᑭᑎᓇᒪᐌᒃ ᑳᐊᒑᑯᐌᑖᑾᓂᓂᑭᓐ ᐸᑭᑎᓈᓱᐎᓇᓐ, ᒦᐗᓐ ᐄᑐᒃ ᑳᒥᓍᐸᑕᕽ ᐅᒋ ᒋᓴᔅ Xᑕᓐ᙮

ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐃᓇᔥᑫ ᓂᑕᓵ ᐊᓯᓐ ᓵᔭᓃᕽ ᐁᑮᐅᓈᐸᒪᒃ ᑫᒋᐃᓇᑭᓱᒡ ᑳᓃᑳᓂᓂᑕᒫᐱᑭᔑᕽ᙮ ᐊᐌᓀᓐ ᑕᔥ ᐃᑯ ᑳᑌᐺᔦᓂᒫᒡ ᑳᐐᓐ ᑕᒥᒋᓇᐌᓯᓰ᙮

ᑮᓇᐙ ᑕᔥ ᑳᑌᐺᑕᒣᒃ ᐗᐊ ᐊᓯᓐ ᐋᐱᒋ ᑭᑭᒋ ᐃᓀᓂᒫᐙ᙮ ᐃᑭ ᑕᔥ ᐐᓐ ᑳᑌᐺᑕᓯᒀ ᐅᐅ ᐃᔑᑌᐱᒫᐗᒃ: ᐃᓂ ᓴ ᐊᓯᓃᓐ ᑳᐙᑲᐃᑫᐙᒡ ᑳᔮᓇᐌᓂᒫᐙᒡ, ᒦᐗᓐ ᐃᓴ ᐃᓂ ᒫᐗᒡ ᑳᓃᑳᓀᑖᑯᓯᓂᒡ ᐊᓯᓃᓐ᙮

ᑲᔦᔥ ᐁᐊᓂ ᐃᔑᐲᐃᑳᑌᒃ, ᒦᐗᓐ ᐃᓴ ᐃᓂ ᐊᓯᓃᓐ ᐯᒫᑎᓯᐙᒡ ᑫᐱᓱᑫᔥᑳᑯᐙᒡ, ᒦᐗᓐ ᑲᔦ ᐃᓂ ᑫᑲᐎᐌᐱᔥᑳᑯᐙᒡ᙮ ᒦᑕᔥ ᑳᑮᐅᒋᐱᓱᑫᔑᓄᐙᒡ, ᐋᓃᔥ ᑳᐐᓐ ᐅᑮᓇᐃᑕᓰᓈᐙ ᐃᐃ ᑳᑮᐃᑭᑐᓂᒡ ᑭᔐᒪᓂᑑᓐ᙮ ᒦ ᐄᑐᒃ ᐃᐃ ᑳᑮᐃᓀᓂᒥᑯᐙᑯᐸᓀᓐ ᑭᔐᒪᓂᑑᓐ ᒋᐃᔑᓭᐙᒡ᙮

ᑮᓇᐙ ᑕᔥ ᑳᐅᑯ ᐅᓀᑖᑯᓯᔦᒃ, ᐊᓇᒥᐁᐎᑭᒫᒃ ᐁᑎᓄᐎᔦᒃ ᑳᐊᓄᑮᑕᐌᒃ ᑭᔐᒪᓂᑑ ᑳᑭᒋᐅᑭᒫᐎᒡ, ᐸᑳᓐ ᑲᔦ ᑳᑮᐃᓇᓯᓀᒃ ᐁᐐᐃᓈᐸᒋᐃᓀᒃ, ᑭᔐᒪᓂᑑ ᑲᔦ ᑳᑎᐯᓂᒥᓀᒃ, ᑭᑮᐅᓈᐸᒥᑯᐙ ᒋᑎᐹᑐᑕᒧᐌᒃ ᐅᒥᓄᒋᑫᐎᓇᓐ᙮ ᑮᓇᐙ ᑲᔦ ᑳᑮᑲᓅᓂᓀᒃ ᒋᓵᑲᐊᒧᐌᒃ ᐃᐃᒫ ᑳᐃᔑᑲᔥᑮᑎᐱᑲᒃ ᑳᑮᐃᔑ ᐊᔮᔦᑭᐸᓐ, ᐃᐃᒫ ᑕᔥ ᒋᔑᐲᑎᑫᔥᑳᔦᒃ ᑳᐃᔑᐅᓂᔑᔑᓂᓂᒃ ᐅᐙᓭᔮᓯᐎᓐ᙮

ᐋᓃᔥ ᐅᑖᓈᕽ ᑳᐐᓐ ᑭᑮᑎᐯᓂᒥᑯᓰᐙ ᑭᔐᒪᓂᑑ; ᓅᑯᒻ ᐃᑕᔥ ᐐᓐ ᑭᑎᐯᓂᒥᑯᐙ᙮ ᑳᐐᓐ ᑲᔦ ᑭᑮᑌᐱᓇᒧᐙᓰᒻ ᐅᑰᐹᓯᓈᑫᐎᓐ; ᓅᑯᒻ ᑕᔥ ᐐᓐ ᐋᔕ ᑭᑮᑌᐱᓇᒧᐙᒻ᙮

ᑳᓵᑭᐃᓇᑰᒃ, ᑭᑎᔑᑳᓅᓂᓂᓂᒻ ᑳᐲᐎᑌᐌᑖᑯᓯᔦᒃ, ᐅᐅᒫ ᑲᔦ ᐊᑮᕽ ᑳᐅᒋᑎᐯᑖᑯᓯᓯᐌᒃ, ᒋᒦᑖᑴᓄᑕᒣᒃ ᑭᒪᒋᒥᓴᐌᒋᑫᐎᓂᐗᓐ, ᒦᐗᓐ ᐄᑐᒃ ᐃᓂ ᑳᑲᑴ ᔖᑰᒋᐃᑯᔦᒃ ᐃᐃᒫ ᑭᑕᒑᑯᐙᕽ᙮

ᐋᐱᒋ ᑕᔥ ᑾᔭᒃ ᐃᔑᐱᒫᑎᓯᒃ ᑳᐃᔑᐊᔮᐙᒡ ᐃᑭ ᑳᑌᐺᑕᓯᒀ, ᐋᓇᐐᓐ ᐁᐃᓂᓀᒀ ᐁᒪᒋ ᐃᔑᐌᐱᓯᔦᒃ᙮ ᐃᓇᔥᑫ ᓴ ᐅᑲᓂᓯᑕᐎᓈᓈᐙᓐ ᐃᓂ ᑭᑎᔑᒋᑫᐎᓂᐙᓐ ᑳᐅᓂᔑᔑᓂᓂᑭᓐ, ᒦᑕᔥ ᑫᔑᒦᑴᒋᐌᓂᒫᐙᒡ ᑭᔐᒪᓂᑑᓐ ᐊᐲ ᑮᔑᑲᓂᓂᒃ ᐐᐱ ᐊᑕ ᑎᐹᑯᓂᐌᓂᒡ᙮

ᑳᑎᐯᒋᑫᒡ ᑕᔥ ᐁᐐᒌᐌᒃ, ᓇᐃᑕᒧᒃ ᑲᑭᓇ ᐃᓂᓃᐎᐅᓇᑯᓂᑫᐎᓇᓐ; ᓇᐃᑕᐎᒃ ᑲᔦ ᐊᐊ ᑲᔦ ᒫᐗᒡ ᑳᑭᒋᐅᑭᒫᐎᒡ ᑲᑭᓇ ᑫᑰᓂᓂ ᑳᓈᑲᒋᑑᒡ᙮

ᓇᐃᑕᐎᑾᒃ ᑲᔦ ᑳᓂ ᐋᓂᑫ ᐅᑭᒫᐎᐙᒡ, ᐋᓃᔥ ᒫᐗᒋᑯ ᑳᑭᒋᐅᑭᒫᐎᓂᒡ ᐅᑮᐅᓇᑭᒥᑯᐙᓐ ᒋᓇᓇᐊᓵᓂᒡ ᑳᓂᑖ ᒪᒫᔒᓂᒡ, ᒋᒥᓍᐸᒫᓂᒡ ᑕᔥ ᐐᓐ ᐃᐃ ᑾᔭᒃ ᑳᐃᔑᒋᑫᓂᒡ᙮

ᑭᔐᒪᓂᑑ ᓴ ᐃᓀᑕᒻ ᐃᐃ ᑳᐃᔑᒥᓄᒋᑫᔦᒃ ᒋᐅᒋ ᐴᓂᑑᓂᒡ ᐃᐃ ᑳᑲᑮᐹᑎᓯᓂᒡ ᐯᒫᑎᓯᓂᒡ ᑳᐃᔑᓂᑖ ᑳᑮᑭᑐᓂᒡ, ᑫᑫᑕᓯᓂᒃ ᐁᑭᑐᓂᒡ᙮

ᐃᔑᐱᒫᑎᓯᒃ ᐃᑕᔥ ᑖᐱᔥᑰ ᐯᒫᑎᓯᐙᒡ ᑳᑎᐯᓂᒫᓯᐎᑣ, ᑫᑯ ᑕᔥ ᐐᓐ ᓇᐹᒡ ᐃᓈᐸᒋᑑᑫᒃ ᐃᐃ ᑳᐃᔑᑎᐯᓂᒥᑰᓯᐌᒃ ᒋᐅᒋᑳᑑᔦᒃ ᒪᒋᑫᑰᓐ᙮ ᐃᔑᐱᒫᑎᓯᒃ ᐃᑕᔥ ᐁᑎᓄᐎᐌᒃ ᑭᔐᒪᓂᑑ ᑳᑎᐯᓂᒫᒡ ᐅᑕᓄᑮᐋᑲᓇᐞ᙮

ᑭᑌᓂᒥᑾᒃ ᑲᑭᓇ ᐊᐎᔭᒃ, ᓵᑭᐃᑾᒃ ᑲᔦ ᑮᒋᐅᑌᐺᑕᒨᒥᐙᒃ, ᑯᑖᓀᓂᒥᒃ ᑲᔦ ᑭᔐᒪᓂᑑ᙮ ᑭᑌᓂᒥᒃ ᓴ ᐊ ᑲᔦ ᒫᐗᒡ ᐃᑯ ᑭᒋᐅᑭᒫ᙮

ᑮᓇᐙ ᑕᔥ ᐅᐸᒦᑖᑫᒃ ᐸᑭᑎᓂᑎᓱᒃ ᐱᓵᓂᑯ ᒋᑎᐯᓂᒥᓀᒀ ᑭᑑᑭᒫᒥᐙᒃ, ᑕᑯ ᑭᑌᓂᒥᑾᒃ ᑲᔦ᙮ ᑳᐐᓐ ᐐᓐ ᐁᑕ ᑳᒥᓄᑑᑕᐎᓀᒀ, ᑳᓈᓈᑲᑕᐌᓂᒥᓀᒀ ᑲᔦ; ᐃᑭ ᓴ ᑯ ᑲᔦ ᑳᑲᒀᓂᓴᑭᓰᑕᐎᓀᒀ᙮

ᑮᔥᐱᓐ ᐅᒋᑲᒀᑕᑭᑑᔦᒃ ᐁᓈᓈᑲᑕᐌᓂᒣᒃ ᑭᔐᒪᓂᑑ, ᔒᐱᓀᓄᑕᒣᒃ ᐃᑕᔥ ᐅᐅ ᑲᒀᑕᑭᑑᐎᓐ ᑳᑮ ᑲᔥᑭᑕᒫᓱᓯᐌᒃ, ᑭᔐᒪᓂᑑ ᓴ ᑭᑲᔕᐌᓂᒥᑯᐙ᙮

ᑳᐐᓐ ᐄᑐᒃ ᑫᑰᓐ ᑭᑖ ᐅᒋ ᒥᓋᑭᒥᑰᓰᒻ ᑮᔥᐱᓐ ᒥᓴᐙᑯ ᔕᔒᐯᑕᒣᒃ ᐃᐃ ᑳᐃᔑᐸᐸᑭᑌᐅᑰᔦᒃ ᑭᒪᒫᔒᐎᓂᐙᓐ ᐅᒋ, ᐋᓃᔥ ᑭᑲᔥᑭᑕᒫᓱᒻ᙮ ᑮᔥᐱᓐ ᐃᑕᔥ ᔕᔑᐯᑕᒣᒃ ᐃᐃ ᑳᐃᔑᑲᑾᑕᑭᐃᑰᔦᒃ ᑭᑾᔭᑯᒋᑫᐎᓂᐙᕽ ᐅᒋ, ᑭᔐᒪᓂᑑ ᓴ ᑭᑲᒥᓍᐸᒥᑯᐙ᙮

ᒦ ᓴ ᑕᔥ ᑳᑮᐅᒋ ᐃᔑᐊᑐᒥᑰᔦᒃ, ᐋᓃᔥ X ᑮᑲᒀᑕᑭᑑ ᑮᓇᐙ ᐅᒋ, ᐁᑮᓇᑲᑕᒪᐎᓀᒃ ᑫᓈᐹᐸᑕᒧᐌᒃ ᒋᐱᒥᓂᔕᐌᒃ ᐋᓃᓐ ᑳᐃᔑᐱᒫᑎᓯᒡ᙮

ᑳᐐᓐ ᐄᑐᒃ ᐐᑳ ᑮᒪᒋᑑᑕᓰ, ᑳᐐᓐ ᑲᔦ ᐐᑳ ᑮᓅᑕᐙᓰ ᒋᑮᐗᓂᒧᒡ᙮

ᐊᐲ ᓴ ᓅᒋᑯ ᑮᐃᒋᑲᓂᐎᒡ, ᑳᐐᓐ ᑮᐋᔑᑌ ᓅᒋᑯ ᐃᑭᑐᓰ᙮ ᐊᐲ ᑲᔦ ᑮᑲᒀᑕᑭᐃᓐᒡ, ᑳᐐᓐ ᐅᑮᐃᓈᓰᐞ ᑳᑮᑲᒀᑕᑭᐃᑯᒡ: ᐊᐤ ᒣᔥᑾᒡ ᑮᓇᐙ ᑭᑲᑲᒀᑕᑭᑑᒻ᙮ ᒦᐃ ᐄᑐᒃ ᑳᑮᐸᑭᑎᓂᑎᓱᒡ ᑫᔑᓈᑕᒫᑯᒡ ᑭᔐᒪᓂᑑᓐ ᑾᔭᒃ ᑳᐅᓈᑯᓂᐌᓂᒡ᙮

ᐐᓐ ᓴ ᐱᑯ ᑭᑮᐱᒥᐎᑕᒫᑯᓈᓐ ᑭᒪᒋᑑᑕᒧᐎᓂᓈᓂᓐ ᐃᐃᒫ ᐅᐐᔭᐎᕽ ᐊᐲ ᑮᓂᓯᓐᒡ ᐋᔑᑌᔮᑎᑯᕽ, ᑮᓇᐎᓐᑦ ᒋᐅᒋ ᐃᓀᑖᑯᓯᐗᕽ ᐁᑮᓂᐳᐗᕽ, ᒋᐸᐹᒣᑕᓯᐗᕽ ᐊᐗᔑᒣ ᒪᒋᑑᑕᒧᐎᓐ, ᒣᔥᑾᒡ ᐃᑕᔥ ᒋᐃᔑᐱᒫᑎᓯᐗᕽ ᒋᑾᔭᒀᑎᓯᔭᕽ᙮ ᐃᐃ ᓴ ᑕᔥ ᑳᑮᐃᔑ ᒫᑭᒋᑲᓂᐎᒡ ᑭᑑᒋ ᒥᓄᐊᔮᐃᑰᒥᓐ᙮

ᑖᐱᔥᑰ ᒫᓇᒑᓂᔕᒃ ᑳᑮᐗᓂᔑᓄᐙᒡ ᑭᑮᐃᔑᓈᑯᓯᒻ, ᐋᔕ ᑕᔥ ᓅᑯᒻ ᑭᑮᐱ ᐊᔐᑮᐌᐎᓂᑰᒻ ᒋᐱᒥᓂᔕᐌᒃ ᐅᑲᓇᐎᒫᓇᒑᓂᔑᐌ ᑳᐃᓂᓐᒡ, ᑳᑲᓇᐌᑕᕽ ᑭᐱᒫᑎᓯᐎᓂᐙᓐ᙮

ᑮᓇᐙ ᐐᐐᒫᒃ, ᒦᑕᔥ ᐯᔑᑾᓐ ᐃᔑᐸᑭᑎᓂᑎᓱᒃ ᒋᑎᐯᓂᒥᓀᒀ ᑭᓈᐯᒥᐙᒃ᙮ ᐃᓇᔥᑫ ᒥᓴᐙ ᑯ ᑌᐺᑕᓯᒀ ᑭᔐᒪᓂᑑᓐ ᐅᑎᑭᑐᐎᓂᓂ, ᑭᑎᔑᐱᒫᑎᓯᐎᓂᐙ ᐅᔕ ᐅᑲᑲᔥᑭᐃᑯᓈᐙ ᒋᑌᐺᑕᒧᐙᒡ, ᑳᐐᓐ ᐃᑕᔥ ᒣᒬᒡ ᑫᑰᓐ ᑭᑲᐃᑭᑐᓰᒻ᙮

ᐋᓃᔥ ᐅᑲᐙᐸᑖᓈᐙ ᐁᔑᐯᑳᑎᓯᔦᒃ, ᑌᐺ ᑲᔦ ᐁᑯᑖᓀᓂᒥᒣᒃ ᑭᔐᒪᓂᑑᓐ᙮

ᑕᑲ ᑲᔦ ᑭᒥᓄᓈᑯᓯᐎᓂᐙᓐ ᑳᐐᓐ ᑕᐅᒌᓯᓅᓇᓐ ᑳᐃᔑᐗᐌᔑᐃᑎᓱᔦᒃ ᓵᑭᒐᔭᐄ ᐋᓃᓐ ᐁᔑᑲᑴ ᒥᓄᓈᑯᑑᔦᒃ ᑮᓂᓯᓯᐙᓐ, ᐁᑭᑭᔥᑲᒣᒃ ᑲᔦ ᑳᐅᓵᐎ ᔔᓂᔮᐎᐗᑭᓐ ᓈᐱᔥᑭᑲᓇᓐ, ᐃᓂ ᑲᔦ ᑳᔮᑾᑭᑌᑭᓐ ᑭᑭᔥᑭᑲᓇᓐ᙮

ᑕᑲ ᓴ ᐃ ᑭᒥᓄᓈᑯᓯᐎᓂᐙᓐ ᑕᐅᒌᒪᑲᓅᓐ ᐲᒐᔭᐄ ᑭᑌᐃᐗᕽ, ᒦ ᓴ ᐃ ᑎᓄ ᒥᓄᓈᑯᓯᐎᓐ ᐐᑳ ᑫᐴᓂᓭᓯᓄᒃ ᑳᐅᒌᒃ ᑮᓅᑳᑎᓯᔦᒃ, ᑮᐱᓵᓈᑎᓯᔦᒃ ᑲᔦ᙮ ᒦ ᓴ ᐃᐌᓂ ᑭᔐᒪᓂᑑ ᒫᐗᒡ ᐃᑯ ᑳᑭᑕᑭᑕᕽ᙮

ᐃᓇᔥᑫ ᐃᑭ ᐅᑖᓈᕽ ᑳᑮᐱᒫᑎᓯᐙᒡ ᐃᑴᐗᒃ ᑳᑮᐊᓇᒥᐁᐙᑎᓯᐙᒡ ᑳᑮᐊᐯᓂᒧᓄᑕᐙᐙᒡ ᑭᔐᒪᓂᑑᓐ, ᑮᐃᔑ ᓂᑖ ᐗᐌᔑᐃᑎᓱᐗᒃ, ᐁᑮᐸᑭᑎᓂᑎᓱᐙᒡ ᐅᓈᐯᒥᐙᐞ ᒋᑎᐯᓂᒥᑯᐙᒡ᙮

ᓭᕒᐊ ᓴ ᐁᑮᓇᐃᑕᐙᒡ ᐁᐸᕒᐊᐋᒪᓐ ᑳᑮᐅᒋ ᐃᔑᓂᑳᓈᒡ ᓂᑑᑭᒫᒻ᙮ ᒦᑕᔥ ᐁᐅᑖᓂᓯᒥᓀᒃ ᓭᕒᐊ ᑮᔥᐱᓐ ᐃᔑᒋᑫᐌᒃ ᑳᑾᔭᑯᓈᑾᓂᓂᒃ, ᑮᔥᐱᓐ ᑲᔦ ᐸᑭᑎᓇᓯᐌᒃ ᑫᑰᓐ ᒋᓭᑭᐃᑯᔦᒃ ᐋᓃᓐ ᑫᑑᑕᐎᓀᒀ ᑭᓈᐯᒥᐙᒃ᙮

ᑫᑮᓇᐙ ᑕᔥ ᐅᓈᐯᒥᒫᒃ, ᒦ ᓴ ᐯᔑᑾᓐ ᐃᔑᐐᒋᐱᒫᑎᓰᒥᑾᒃ ᑭᐐᐎᐙᒃ ᐌᐌᓂ ᒋᓂᓯᑕᐌᓂᒣᒀ ᐐᓇᐙ ᓅᑕᐞ ᐁᐊᐲᒌᐙᒡ, ᐋᓃᔥ ᐃᑴᐎᐗᒃ᙮ ᓈᑯᑖᐤ ᑕᔥ ᐁᑭᑌᓂᒣᒀ ᐋᓃᓐ ᐁᑑᑕᐌᒀ᙮ ᑫᐐᓇᐙ ᐅᔕ ᑕᑎᐱᓇᐌᐎᓯᐗᒃ ᑳᐐᑎᐱᓇᐌᐎᓯᔦᒃ ᐃᐃᐌᓂ ᐱᒫᑎᓯᐎᓐ ᑭᔐᒪᓂᑑ ᑳᒥᒋᒦᑭᐌᒡ᙮ ᑮᔥᐱᓐ ᑕᔥ ᐃᐃ ᐃᔑᒋᑫᔦᒃ, ᑳᐐᓐ ᑫᑰᓐ ᑕᐗᓇᔥᑴᐃᐌᒪᑲᓯᓅᓐ ᐊᐲ ᐊᓇᒥᐁᑕᐌᒃ ᑭᔐᒪᓂᑑ᙮

ᐅᐅᐌ ᑕᔥ ᑭᑎᓂᓂᓂᒻ ᐃᔥᒀᒡ, ᑲᑭᓇ ᓴ ᑳᑕᔑᔦᒃ ᐯᔑᑾᓐ ᐃᔑᓈᓈᑲᑕᐌᑕᒧᒃ, ᒋᑰᐹᑌᓂᑎᔦᒃ᙮ ᐃᔑᓵᑭᐃᑎᒃ ᑲᔦ ᑳᐃᔑᓵᑭᐃᑎᐙᒡ ᑳᐅᐐᒋᑭᐌᑎᐙᒡ, ᒥᓄᑑᑖᑎᒃ ᑲᔦ, ᑕᐸᓭᓂᒧᒃ ᑲᔦ᙮

ᐊᐎᔭ ᑲᔦ ᒪᒋᑑᑕᐎᒃ, ᑫᑯ ᒪᒋᑫᑰᓐ ᑎᐸᐃᑳᑫᑫᓐ᙮ ᐊᐎᔭ ᑲᔦ ᒪᒋ ᐃᓂᒃ, ᑫᑯ ᐋᔑᑌ ᒪᒋ ᐃᓈᑫᓐ᙮ ᑕᑾᒡ ᓴ ᑮᓐ ᑲᑴᒋᒥᒻ ᑭᔐᒪᓂᑑᓐ ᒋᒥᓄᓭᐃᑯᒡ᙮ ᒋᑌᐱᓇᒧᐌᒃ ᐅᔕ ᑳᑮᐅᒋᐊᑐᒥᓀᒃ ᒋᒥᓄᓭᐃᓀᒃ ᑭᔐᒪᓂᑑ᙮

ᑭᒋᒪᓯᓇᐃᑲᓐ ᓴ ᐃᔑᐲᐃᑳᑌ: ᐊᐌᓀᓐ ᓴ ᑯ ᑫᐐᒥᓉᑕᕽ ᐁᐱᒫᑎᓯᒡ, ᑳᒥᓵᐌᑕᕽ ᑲᔦ ᒋᐙᐸᑕᕽ ᑳᒥᓄᓭᐎᑮᔑᑲᓂᓂᒃ, ᒦᓴᐃ ᐁᔑᓈᑾᓂᓂᒃ ᒋᒪᒋᑮᔗᓯᑭᐸᓐ, ᒋᐴᓂᑑᐸᓐ ᑲᔦ ᑳᐃᔑᓂᑖᑮᐗᓂᒧᒡ᙮

ᐃᔑᓈᑾᓂᓂ ᓴ ᒋᐴᓂᑑᐸᓐ ᒪᒋᑫᑰᓇᓐ, ᒣᔥᑾᒡ ᑕᔥ ᒋᑑᑕᑭᐸᓐ ᐃᐃ ᑳᐅᓂᔑᔑᓂᓂᒃ, ᒋᑲᑴ ᒥᓄ ᐐᒌᐎᐌᐸᓐ, ᒨᔕᒃ ᐃᑯ ᐃ ᒋᑲᑴ ᐃᔑᒋᑫᐸᓐ᙮

ᑳᑎᐯᒋᑫᒡ ᐅᔕ ᐅᑲᓇᐙᐸᒫᐞ ᑲᑾᔭᒀᑎᓯᓂᒡ, ᐅᐱᓯᑕᐙᐞ ᑲᔦ ᑮᐊᓇᒥᐁᑖᑯᒡ; ᑳᐐᓐ ᑕᔥ ᐐᓐ ᐅᒥᓍᐸᒫᓰᐞ ᐃᐃ ᑳᒪᒋᑑᑕᒥᓂᒡ᙮

ᐊᐌᓀᓐ ᑕᔥ ᑫᑲᔥᑭᑑᐸᓐ ᒋᒫᔑᑑᑕᐎᓀᒃ ᑮᔥᐱᓐ ᒥᓴᐌᑕᒣᒃ ᐁᐐᑑᑕᒣᒃ ᐃᐃ ᑳᐅᓂᔑᔑᒃ?

ᒥᓴᐙ ᓴ ᑯ ᐅᒋᑲᒀᑕᑭᐃᑰᔭᓐ ᐁᑑᑕᒪᓐ ᐃᐃ ᑳᑾᔭᑯᓈᑾᒃ, ᐁᑕᑕᐌ ᓴ ᑭᑭᒋᔕᐌᑖᑯᔅ᙮ ᑫᑯ ᑲᔦ ᑯᑕᒧᐙᑫᒃ ᐊᐎᔭ ᑳᐐᑑᑕᐎᓀᒃ; ᑫᑯ ᑲᔦ ᐅᒑᓂᒣᑕᑫᒃ᙮

ᐊᓇᒥᐁ ᑯᑖᓀᓂᒥᒃ ᐃᑕᔥ X ᑭᑌᐃᐙᕽ, ᐋᓃᔥ ᑌᐊᐲᑌᑖᑯᓯ ᒋᐃᔑᑭᑌᓂᒥᑎᐸᓐ ᐁᑎᐯᒋᑫᒡ᙮ ᐊᔛᓐ ᑕᔥ ᒨᔕᒃ ᐃᑯ ᒋᓇᑴᑕᐗᑎᐸᓐ ᐊᐎᔭ ᑳᑲᑴᒋᒥᒃ ᒋᐐᑕᒪᐗᒡ, ᐃᐃᐌᓂ ᑳᐊᐱᑌᐁᔑᒨᓄᐗᒡ᙮

ᐌᐌᓂ ᐅᒋᑲᓅᔥ ᑭᓅᑳᑎᓯᐎᓂᕽ᙮ ᐌᐌᓂ ᐃᔑᐱᒫᑎᓯᓐ ᐙᐐᑫ ᒋᐯᑭᐊᔮᒃ ᑳᐅᒋᓈᓈᑲᑕᐌᑕᒪᓐ᙮ ᐃᑭ ᓴ ᓅᒋᑯ ᑳᐃᑕᒧᐙᒡ ᐃᐃ ᑳᐃᔑᒥᓄᑑᑕᒧᐗᒡ ᐁᐐᒌᐎᒪᒡ Xᑕᓐ, ᑕᐅᒋᐊᑲᒋᐃᑎᓱᐗᒃ ᐃᐃ ᑳᔑᒪᒋᑕᔑᒥᒀ᙮

ᓇᐗᒡ ᐄᑐᒃ ᑕᐅᓂᔑᔑᓂᓂ ᑮᔥᐱᓐ ᑭᔐᒪᓂᑑᓐ ᐃᓀᑕᒥᓂᒡ, ᐊᐎᔭ ᒋᐅᒋᑲᒀᑕᑭᑑᐸᓐ ᐁᑑᑕᕽ ᑳᐅᓂᔑᔑᓂᓂᒃ, ᐊᐲᒡ ᐐᓐ ᐊᐎᔭ ᒋᐅᒋᑲᒀᑕᑭᑑᐸᓐ ᒪᒋᑫᑰᓂᕽ᙮

ᒦ ᓴ X ᑫᐐᓐ ᑳᐃᔑᐌᐱᓯᒡ: X ᓴ ᐋᐱᑎᕽ ᑮᐅᒋᓂᐳ, ᒋᐴᓀᒋᑳᑌᓂᑭᓐ ᒪᒋᑑᑕᒧᐎᓇᓐ, ᒦ ᐃ ᑮᑌᑎᐸᐊᕽ; ᐐᓐ ᑳᑾᔭᒀᑎᓯᒡ ᐁᑮᓂᐴᑕᒪᐙᒡ ᐃᐃ ᑳᑾᔭᑾᑎᓯᓯᓂᒃ, ᐁᐐᐃᔑᐲᓂᓀᒃ ᑭᔐᒪᓂᑑᓐ ᑳᔑᐊᔮᓂᒡ᙮ ᐐᔭᐎᒫᕽ ᓴ ᐃᓇᑫ ᑮᐃᔑᓂᒋᑲᓂᐎ, ᐊᒑᑯᕽ ᐃᑕᔥ ᐐᓐ ᐃᓇᑫ ᑮᐱᒫᑎᓯᐋ᙮

ᒦᑕᔥ ᐃᐃ ᓇᑫ ᑳᑮᐃᔑ ᐃᔖᒡ ᐁᑮᐊᐎ ᐐᑕᒪᐙᒡ ᐊᒑᑾᐞ ᐌᑎ ᑳᑮᑕᔑᑭᐸᐅᒥᓐᒡ᙮

ᒦᐗᐞ ᐃᓴ ᐃ ᐅᑕᒑᑯᐙᐞ ᐃᑭ ᐅᑖᓈᕽ ᑳᑮᓇᐃᑕᐙᓯᒀ ᑭᔐᒪᓂᑑᓐ ᐊᐲ ᑮᔕᔒᐱ ᐲᐅᓂᒡ ᒣᒀ ᓅᐗᐗᓐ ᑮᐅᔑᑑᓂᒡ ᑭᒋᒌᒫᓂᓂ᙮ ᐋᐱᒋ ᑕᔥ ᐸᑮ, ᓂᔣᓱ 8 ᐁᑕ ᐯᒫᑎᓯᐙᒡ ᑮᐅᒋᐱᒫᒋᐋᐗᒃ ᓂᐲᕽ᙮

ᐃᐃ ᑕᔥ ᓂᐱ, ᒦ ᐃ ᐁᔑᓈᑾᒃ ᓰᑲᐊᑖᓱᐎᓐ ᓅᑯᒻ ᑳᐱᒫᒋᐃᑯᔦᒃ᙮ ᑳᐐᓐ ᐐᓐ ᐁᑕ ᓅᒋᑯ ᑫᑰᓐ ᑳᑮᓰᔮᐹᐗᒋᑳᑌᒃ ᑭᐐᔭᐎᐙᕽ ᑭᑑᒋ ᐱᒫᒋᐃᑰᐎᓯᓰᒻ᙮ ᐃᐃᐌ ᐅᔕ ᐊᐎᔭ ᑳᐅᒋ ᐊᔓᑕᒪᐙᒡ ᑭᔐᒪᓂᑑᓐ ᑾᔭᒃ ᐁᐃᔑᓈᑾᓂᓂᒃ ᑳᐅᒋᓈᓈᑲᑕᐌᑕᕽ᙮ X ᓴ ᑳᑮᐃᔑ ᑮᐌᐱᒫᑎᓯᐃᓐᒡ ᓂᐳᐎᓂᕽ ᐅᒋ, ᒦ ᓴ ᐃᒫ ᐌᒋᐱᒫᒋᐃᑰᐎᓯᔦᒃ᙮

ᐐᓐ ᐄᑐᒃ X ᑳᑮᐃᔖᒡ ᑭᒋᑮᔑᑯᕽ ᐁᑮᐊᐎ ᐊᐱᒡ ᐅᑭᒋᓂᑭᓃᕽ ᐃᓇᑫ ᑭᔐᒪᓂᑑᓐ, ᐁᑮᒦᓂᓐᒡ ᒋᑎᐯᓂᒫᒡ ᐁᒐᓬᐊᐞ, ᐃᐃ ᑲᔦ ᑳᐊᒑᑴᑖᑯᓯᓂᒡ ᑳᑲᔥᑭᐁᐎᓯᓂᒡ, ᐃᐃ ᑲᔦ ᑳᒪᔥᑲᐌᑖᑯᓯᓂᒡ᙮

X ᐃᑕᔥ ᑫᐐᓐ ᐁᑮᑲᒀᑕᑭᑑᒡ ᐅᐐᔭᐐᕽ, ᒦᑕᔥ ᑫᑮᓇᐙ ᐁᔑᓈᑾᒃ ᒋᐃᔑᑮᔒᔦᑭᐸᓐ ᐯᔑᑾᓐ ᐃᐃ ᓇᑫ ᒋᐃᔑᓈᓈᑲᑕᐌᑕᒣᑭᐸᓐ᙮ ᐋᓃᔥ ᐊᐎᔭ ᑳᑲᑾᑕᑭᑑᒡ ᐅᐐᔭᐐᕽ ᐋᔕ ᐅᑮᐴᓂᑑᓐ ᒪᒋᑑᑕᒧᐎᓐ᙮

ᒦᑕᔥ ᐃᐃ ᐁᔑᓈᑾᒃ ᒥᓂᒃ ᐃᑯ ᑫᐱᒫᑎᓯᔦᒃ ᐅᐅᒫ ᐊᑮᕽ ᒋᐃᔑᐱᒫᑎᓯᓯᐌᑭᐸᓐ ᑳᐃᔑ ᓂᑖ ᒥᓴᐌᒋᑫᐙᒡ ᐯᒫᑎᓯᐙᒡ; ᐃᐃ ᓴ ᒋᐃᔑᐱᒫᑎᓯᔦᑭᐸᓐ ᑭᔐᒪᓂᑑ ᑳᐃᔑᐊᑕᐌᑕᕽ᙮

ᐋᔕ ᐄᑐᒃ ᑌᒥᓂᒃ ᐅᑖᓈᕽ ᑭᑮᐃᔑᐌᐱᓯᒻ ᑳᐃᔑᐌᐱᓯᐙᒡ ᑳᑌᐺᑕᓯᒀ᙮ ᒦᑕᔥ ᐅᐅ ᑳᐃᔑᐌᐱᓯᔦᒃ, ᐁᑮᐐᓈᑎᓯᔦᒃ, ᐁᑮᒪᒋᒥᓴᐌᒋᑫᔦᒃ, ᐁᑮᓂᑖ ᑮᐗᔥᑴᐲᔦᒃ, ᐁᑮᓇᓂᑖ ᐅᑸᓄᔦᒃ ᐁᑮᐹᐹ ᑮᐗᔥᑴᐲ ᓂᔑᐗᓈᑕᑲᒥᑭᓯᔦᒃ, ᐁᑮᐃᔑ ᓂᑖ ᐊᓇᒥᐁᑕᐌᒀ ᑲᔦ ᒪᓂᑑᑳᓇᒃ ᐁᑮᐃᔑᒋᑫᔦᒃ ᑫᑮ ᒪᓈ ᐃᔑᒋᑫᔦᑭᐸᓐ᙮

ᐐᑫ ᑕᔥ ᑭᒫᒪᑳᑌᓂᒥᑯᐙᒃ ᐃᑭ ᑳᑌᐺᑕᓯᒀ, ᐁᐐᒌᐙᓯᐌᒀ ᑳᓂᑖ ᐃᔑᒋᑫᐙᒡ ᑳᐃᔑᓂᑖ ᐅᓵᒥᒋᑫᐙᒡ, ᒦᑕᔥ ᐃᐃ ᓅᒋᑯ ᑳᐅᒋ ᐃᓂᓀᒀ᙮

ᐐᓇᐙ ᓴ ᐱᑯ ᐅᑲᓇᑴᑕᐙᐙᓐ ᑭᔐᒪᓂᑑᓐ ᐃᐃ ᑳᑮᐃᔑᒋᑫᐙᒡ, ᐋᔕ ᑳᑮᔒᑖᓂᒡ ᐁᐐᑎᐹᑯᓈᓂᒡ ᐃᐃ ᑳᐱᒫᑎᓯᓂᒡ, ᐃᐃ ᑲᔦ ᑳᓂᐳᓂᒡ᙮

ᒦ ᓴ ᑕᔥ ᑫᐐᓇᐙ ᑳᑮᐅᒋᐐᑕᒪᐎᑣ ᒥᓍᒋᒧᐎᓐ ᐃᑭ ᐋᔕ ᑳᑮᓂᐳᐙᒡ᙮ ᐋᓇᐐᓐ ᐃᓂᓃᓈᕽ ᐃᓇᑫ ᐁᑮᐃᔑᑎᐹᑯᓂᑣ ᐅᐐᔭᐎᐙᕽ, ᔖᑰᒡ ᐃᑕᔥ ᐅᑕᒑᑯᐙᕽ ᑕᐃᔑᐱᒫᑎᓯᐗᒃ ᑭᔐᒪᓂᑑᓈᕽ ᐃᓇᑫ᙮

ᐃᐃ ᓴ ᑲᑭᓇ ᑫᑰᓐ ᑳᐐᐃᔥᒀᓭᒃ ᐋᔕ ᐯᔓᓈᑾᓐ, ᑲᔥᑭᑑᒃ ᐃᑕᔥ ᑾᔭᒃ ᒋᐃᔑᑎᐯᓂᑎᓱᔦᒃ, ᐙᐹᑲᒣᑕᒧᒃ ᑲᔦ ᒋᑲᔥᑭᑑᔦᒃ ᒋᐊᓇᒥᐋᔦᒃ᙮

ᒫᐗᒡ ᐃᑕᔥ ᐃᑯ ᐅᐅ ᐃᔑᒋᑫᒃ, ᐋᐱᒋ ᓴ ᓵᑭᐐᒌᑎᒃ, ᐋᓃᔥ ᒦ ᐃᒫ ᓵᑭᐃᐌᐎᓂᕽ ᐁᔑᐊᑯᓈᑾᑭᓐ ᑳᐹᑎᓇᑎᑭᓐ ᒪᒋᑑᑕᒧᐎᓇᓐ᙮

ᐹᐹᑭᑌᓇᒫᑎᒃ ᑲᔦ ᑭᑖᐎᓂᐙᓐ; ᑫᑯ ᑕᔥ ᐃᐃ ᐅᒋᑭᒋᑳᑮᑭᑐᑫᒃ᙮

ᐁᑕᓱᐯᔑᑯᔦᒃ ᐃᑕᔥ ᑳᑮᐃᔑᒦᓂᑰᐎᓯᔦᒃ ᒦᑭᐌᐎᓇᓐ ᒋᓈᓈᑲᒋᑑᔦᒃ, ᒦᑕᔥ ᐁᔑᓈᑾᒃ ᒋᐃᓈᐸᒋᑑᔦᑭᐸᓐ ᑭᒦᓂᑰᐎᓂᐙᓐ ᑭᔐᒪᓂᑑ ᑳᑮᒦᓂᓀᒃ ᒋᐅᒋᒥᓄᓭᐃᑎᔦᒃ ᑳᑕᔑᔦᒃ᙮

ᐊᐌᓀᓐ ᑕᔥ ᐃᑯ ᑳᑮᑭᑐᒡ, ᐃᔑᓈᑾᓂᓂ ᒋᑕᔑᑕᑭᐸᓐ ᑭᔐᒪᓂᑑᓐ ᐁᑭᑐᓂᒡ᙮ ᐊᐌᓀᓐ ᑕᔥ ᐃᑯ ᑲᔦ ᑳᐸᒦᑖᑫᒡ ᐃᔑᓈᑾᓂᓂ ᒋᐋᐸᒋᑑᐸᓐ ᒪᔥᑲᐎᓰᐎᓐ ᑭᔐᒪᓂᑑᓐ ᑳᒦᓂᑯᒡ, ᑲᑭᓇ ᓴ ᐱᑯ ᑫᑰᓂᕽ ᑭᔐᒪᓂᑑ ᒋᒦᑴᒋᐌᑖᑯᓯᒡ ᐅᒋ ᐃᓂ ᒋᓴᔅ Xᑕᓐ᙮ ᐐᓐ ᐄᑐᒃ ᑳᑎᐯᑕᕽ ᑭᒋ ᐃᓀᑖᑯᓯᐎᓐ, ᒪᔥᑲᐎᓰᐎᓐ ᑲᔦ, ᓀᐱᒡ ᐃᑯ, ᐁᒣᓐ᙮

ᑳᓵᑭᐃᓇᑰᒃ, ᑫᑯ ᒫᒪᑳᑌᑕᑫᒃ ᐃᐃ ᑳᐅᑎᓯᑯᔦᒃ ᑳᐐᓴᑫᑖᑾᑭᓐ ᑯᒋᐃᑰᐎᓇᓐ ᑳᑲᒀᑕᑭᐃᑯᔦᒃ ᑖᐱᔥᑰ ᐁᐃᓀᑖᑾᒃ ᐁᐐᒪᔭᑭ ᐃᔑᐌᐱᓯᔦᒃ᙮

ᒣᔥᑾᒡ ᐅᔕ ᑭᑖᒌᑫᑖᒻ ᐁᐃᓀᑕᑾᒃ ᐁᐐᑑᑳᓱᔦᒃ ᐃᓇᑫ X ᑳᑮᐃᔑ ᑲᒀᑕᑭᑑᒡ, ᒋᐅᒋᒨᔥᑭᓀᔥᑳᑯᔦᒃ ᒥᓉᑕᒧᐎᓐ ᐊᐲ ᓈᑯᒋᑳᑌᓂᒃ ᐅᑭᒋ ᐃᓀᑖᑯᓯᐎᓐ᙮

ᑮᔥᐱᓐ ᐃᑕᔥ ᐅᒋᒪᒋ ᐃᑰᔦᒃ X ᐅᑎᔑᓂᑳᓱᐎᓂᕽ, ᒦᐃ ᒋᔕᐌᑖᑯᓯᔦᒃ, ᐋᓃᔥ ᐊᐊ ᐊᒑᒃ ᑳᑭᒋ ᐃᓀᑖᑯᓯᒡ ᑭᑭᑭᔥᑲᐙᐙ, ᐊᒦᐗᓐ ᐃᓴ ᐃᓂ ᑭᔐᒪᓂᑑ ᐅᑕᒑᑾᓐ᙮

ᑫᒋᓈᒡ ᒫᐐᓐ ᑭᑲ ᑲᒀᑕᑭᑑᒻ᙮ ᑫᑯ ᑕᔥ ᐐᓐ ᐅᒋᑲᒀᑕᑭᑑᑫᒃ ᑖᐱᔥᑰ ᑳᐅᒋᑲᒀᑕᑭᑑᒡ ᐊᐎᔭ ᑳᓂᔑᐌᒡ, ᐅᑮᒨᒋᔥᒃ, ᑳᓂᑖ ᒪᒫᔒᒡ, ᐊᐊ ᑲᔦ ᑳᐗᓇᔥᑴᑲᒥᑭᓯᒡ ᐁᔑᐅᐸᐹᒥᓯᐎᓂᓯᒃ᙮

ᐃᓇᔥᑫ ᓴ ᑮᔥᐱᓐ ᐊᐎᔭ ᐅᒋ ᑲᒀᑕᑭᑑᒡ ᐁᐊᓇᒥᐁᐙᑎᓯᒡ, ᑕᑲ ᑫᑯ ᑕᐊᑲᑌᑕᓰ, ᒣᔥᑾᒡ ᓴ ᐅᑲᒦᑴᒋᐌᓂᒫᓐ ᑭᔐᒪᓂᑑᓐ ᐁᐱᒥᐎᑑᒡ Xᑕᓐ ᐅᐐᓱᐎᓂᓂ᙮

ᒦ ᐅᔕ ᐃ ᐋᔕ ᑎᐸᐃᑲᓐ ᐁᐅᒋᒋᓭᒃ ᑎᐹᑯᓂᑫᐎᓐ ᒋᒫᒋᓭᒃ, ᐃᑭ ᑕᔥ ᑭᔐᒪᓂᑑᕽ ᑳᐅᒋᑎᐯᑖᑯᓯᐙᒡ ᓂᑕᒻ ᑕᑎᐹᑯᓈᐗᒃ᙮ ᑮᔥᐱᓐ ᑕᔥ ᑮᓂᑕᒪᐎᓐᑦ ᑎᐹᑯᓂᑰᔭᕽ, ᐋᓃᓐ ᐄᑐᒃ ᑫᐃᔑᓭᐙᑴᓐ ᐃᐃ ᑳᑮᓇᐃᑕᓯᒀ ᒥᓍᒋᒧᐎᓐ ᑭᔐᒪᓂᑑᕽ ᐌᒌᓂᒃ᙮

ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑮᔥᐱᓐ ᐅᑾᔭᒀᑎᔅ ᐊᑳᐙ ᐱᒫᒋᒋᑲᓂᐎᒡ, ᐋᓃᓐ ᑕᔥ ᑳᓇᑲ ᑫᐃᔑᓭᐙᑴᓐ ᑳᑭᑌᓂᒫᓯᒀ ᑭᔐᒪᓂᑑᓐ, ᑳᒪᒋ ᐃᔑᐌᐱᓯᐙᒡ ᑲᔦ᙮

ᑕᑲ ᑕᔥ ᐃᑭ ᑳᐅᒋ ᑲᒀᑕᑭᑑᐙᒡ ᐁᑑᑕᒧᐙᒡ ᑭᔐᒪᓂᑑᓐ ᑳᐃᔑᐊᑕᐌᑕᒥᓂᒡ, ᐅᑲᒦᓈᐙᓐ ᐅᐱᒫᑎᓯᐎᓂᐙᓐ ᑳᑌᐺᔦᑖᑯᓯᓂᒡ ᑳᑮᐅᔑᐃᑯᐙᒡ, ᐁᑑᑕᒧᐙᒡ ᐃᐃᐌᓂ ᑳᑾᔭᑯᓈᑾᓂᓂᒃ᙮

ᐃᑭ ᓴ ᑳᓃᑳᓀᑖᑯᓯᐙᒡ ᑳᐊᔮᐙᒡ ᐌᑎ ᑳᐃᔑᐊᔭᔦᒃ, ᒦᐗᒃ ᓴ ᐃᑭ ᑳᑲᓅᓇᒀ; ᑫᓃᓐ ᐄᑐᒃ ᓂᓃᑳᓀᑖᑯᔅ ᐁᑮᐙᐸᒪᒃ X ᐁᑲᒀᑕᑭᑑᒡ, ᓂᐐᐐᑑᑳᔅ ᑕᔥ ᐅᑭᒋ ᐃᓀᑖᑯᓯᐎᓐ ᑳᐐᓈᑯᒋᑳᑌᓂᒃ᙮

ᒦᑕᔥ ᐁᓇᒀ: ᓈᑲᒋᐃᑾᒃ ᑭᔐᒪᓂᑑ ᐅᒫᓇᒑᓂᔑᒪᐞ ᑳᒦᓂᓀᒃ ᒋᓈᑲᒋᐃᒣᒃ, ᑫᑯ ᐐᓐ ᐊᓂᓵᒡ ᐃᔑᒋᑫᑫᒃ, ᑮᓇᐙ ᓴ ᐱᑯ ᑭᑎᓀᑕᒧᐎᓂᐙᕽ ᒋᐅᒋ ᐃᔑᒋᑫᔦᒃ ᒋᑑᑕᒧᐌᒃ ᑭᔐᒪᓂᑑ ᐅᑎᓀᑕᒧᐎᓐ᙮ ᑫᑯ ᐐᓐ ᐁᑕ ᒋᒥᒋᐅᑎᓯᔦᒃ ᐅᒋ ᐃᔑᒋᑫᑫᒃ, ᒌᑫᑕᒧᒃ ᓴ ᐃ ᐁᐊᓄᑮᑕᐌᒃ ᐁᓈᓈᑲᒋᐃᐌᔦᒃ᙮

ᑫᑯ ᐐᓐ ᑲᔦ ᑲᑴᑎᐯᓂᒫᑫᒀᓂᒃ ᐃᑭ ᑳᒦᓂᑰᔦᒃ ᒋᓈᑲᒋᐁᒀ, ᐃᔑᐱᒫᑎᓯᒃ ᓴ ᑫᔑᑭᑭᓇᐙᐸᒥᓀᒀ᙮

ᐊᐲ ᑕᔥ ᓈᑯᓯᒡ ᐊᐊ ᑳᒫᐗᒋ ᓃᑳᓀᑖᑯᓯᒡ ᐅᑲᓇᐎᒫᓇᒑᓂᔑᐌ, ᑭᑲᑌᐱᓈᒻ ᑕᔥ ᐃᐃ ᒋᑭᑳᓄᒀᓈᑕᒣᒃ ᐃᐃ ᑭᒋ ᐃᓀᑖᑯᓯᐎᓐ ᐐᑳ ᑫᓂᐊᑯᓈᑾᓯᓄᒃ᙮

ᒦ ᓴ ᐯᔑᑾᓐ ᑫᑮᓇᐙ ᑳᐅᔥᑳᑎᓯᔦᒃ ᓇᐃᑕᐎᑾᒃ ᐃᑭ ᑳᑭᑖᑎᓯᐙᒡ᙮ ᑲᑭᓇ ᐱᑯ ᑳᑕᔑᔦᒃ ᐱᒋᑯᓇᔮᑕᒧᒃ ᑕᐸᓭᓂᒧᐎᓐ ᒋᐙᐐᑑᑯᑖᑎᔦᒃ, ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑭᔐᒪᓂᑑ ᐅᔕ ᐅᓇᑳᔥᑲᐙᐞ ᑳᑭᒋ ᐃᓀᓂᑎᓱᓂᒡ; ᐅᒥᓄᑑᑕᐙᐞ ᐃᑕᔥ ᐐᓐ ᐃᐃ ᑳᑕᐸᓭᓂᒧᓂᒡ᙮

ᑮᓇᐙ ᑕᔥ ᑕᐸᓭᓂᑎᓱᒃ ᐱᓵᓐ ᒋᑎᐯᓂᒥᓀᒃ ᑭᔐᒪᓂᑑ ᑳᐃᔑᒪᔥᑲᐎᓰᒡ, ᒋᐅᐱᓂᓀᒃ ᐐᓐ ᐃᑯ ᐊᐲ ᑫᔑᒥᓍᐸᑕᕽ᙮

ᐸᑭᒋᐗᓀᑕᒪᐎᒃ ᐐᓂᑕᒻ ᒋᐱᒥᐗᓀᑕᒪᐎᓀᒃ ᑲᑭᓇ ᑳᒥᑯᔥᑳᑌᑕᒧᐃᑯᔦᒃ, ᐋᓃᔥ ᐐᓐ ᑭᓈᓈᑲᒋᐃᑯᐙ᙮

ᐙᐹᑲᒣᑕᒧᒃ, ᐊᔕᐙᐱᒃ ᑲᔦ, ᐋᓃᔥ ᑳᔑᑫᓂᒥᓀᒃ ᒪᒋᐊᔭᐋ ᐸᐸᒥᐊᔮ ᑖᐱᔥᑰ ᒥᔑᐱᔑᐤ ᑳᐸᐹᓅᑖᑯᓯᒡ ᐁᓇᓈᑕᐙᐸᒫᒡ ᐊᐌᓀᓇᓐ ᐙᑭᑕᒸᒡ᙮

ᐋᔩᒋᑳᐸᐎᒃ ᐃᑕᔥ ᐃᐃᒫ ᑭᑌᐺᑕᒧᐎᓂᐙᕽ, ᒋᓇᑳᔥᑲᐌᒃ ᒪᒋᐊᔭᐋ᙮ ᑭᑭᑫᑖᒻ ᐄᑐᒃ ᑫᐐᓇᐙ ᑲᑭᓇ ᑭᐐᒋᐅᑌᐺᑕᒨᒫᑲᓂᐙᒃ ᒥᓯᐌ ᐊᑮᕽ ᒦ ᐯᔑᑾᓐ ᐁᐃᔑᐱᒧᓭᐙᒡ ᑲᒀᑕᑭᐃᑰᐎᓂᕽ᙮

ᐊᐲ ᑕᔥ ᐊᒋᓇ ᑮᑲᒀᑕᑭᑑᔦᒃ, ᑭᔐᒪᓂᑑ ᑳᐌᓅᒋ ᐐᒦᑭᐌᒡ ᑭᔐᐙᑎᓯᐎᓐ, ᑳᑮᐊᑑᒥᓀᒃ Xᐃᕽ ᒋᐃᔑᐐᑑᑳᓱᔦᒃ ᐃᐃᒫ ᑳᐃᔑᓀᐱᒋ ᑭᒋ ᐃᓀᑖᑯᓯᒡ, ᐐᓐ ᐃᑯ ᑭᑲᑮᔑᓈᑯᐃᑯᐙ, ᑭᑲᐃᔑᐃᑯᐙ ᑲᔦ ᒋᐋᔩᒋᑳᐸᐎᔦᒃ, ᒋᒪᔥᑲᐎᓰᔦᒃ, ᑭᑲᓀᐱᒋᐅᓇᓯᑯᐙ ᑲᔦ᙮

ᑕᑲ ᑭᔐᒪᓂᑑ ᑕᑎᐯᓂᒥᐌ ᓀᐱᒡ ᐃᑯ, ᐁᒣᓐ!

ᓵᐃᓬᐊᔅ ᓴ ᑳᑌᐺᔦᑖᑯᓯᒡ ᑮᑕᓇᒥᐋᓈᓐ ᑳᐃᓇᑭᒪᒃ, ᓂᐐᒋᐃᒃ ᐅᐅ ᐸᑮ ᑳᐅᔑᐲᐊᒪᐎᓇᑰᒃ, ᐁᐊᑕᐌᓂᒥᓇᑰᒃ ᒋᒪᔥᑲᐌᑕᒣᒃ, ᐁᐐᑕᒪᐎᓇᑰᒃ ᑲᔦ ᑭᔐᒪᓂᑑ ᐅᑭᔐᐙᑎᓯᐎᓐ ᐁᑌᐺᒪᑲᓂᓂᒃ᙮ ᐗᐐᑫ ᑕᔥ ᐃᐃᒫ ᐋᔩᒋᑳᐸᐎᒃ᙮

ᐃᑭ ᑕᔥ ᑲᔦ ᐅᑌᐺᑕᒨᒃ ᑳᐊᔮᐙᒡ ᐹᐱᓬᐊᓄᕽ ᑳᑮᐐᒋᐅᓀᑖᑯᓰᒥᓀᒀ, ᑭᐴᔔᐃᑯᐙᒃ᙮ ᑭᐴᔔᐃᑯᐙ ᑲᔦ ᓂᑯᓯᓯᕽ ᑳᐃᓀᓂᒪᒃ ᒫᕒᒃ ᙮

ᐅᒌᒥᑾᒃ ᑳᐴᔔᐁᒀ ᐅᑌᐺᑕᒨᒃ, ᒋᓈᑾᒃ ᐁᓵᑭᐃᑎᔦᒃ᙮ ᑕᑲ ᐱᓵᓀᑕᒧᐎᓐ ᑭᑲᐐᒌᐎᑯᒻ ᑲᑭᓇ ᑳᐐᒌᐌᒃ X᙮