ᓃᓐ ᒌᒥᔅ ᑭᔐᒪᓂᑑ ᐅᑕᓄᑮᐋᑲᓇᓐ, ᐊᐊ ᑲᔦ ᑳᑎᐯᒋᑫᒡ ᒋᓴᔅ X᙮ ᑲᑭᓇ ᑭᐴᔔᐃᓂᓂᒻ ᑳᒥᑖᔑ ᓃᔗᐙᓇᑭᓯᔦᒃ ᐃᔅᕒᐃᔭᓬᐊᒃ ᐁᔮᔦᒃ ᒥᓯᐌ ᐯᐸᑳᓐ ᐊᑮᕽ᙮

ᓃᒋ ᐅᑌᐺᑕᒨᒃ, ᑌᐱᓇᐌᐗᑫᑕᒧᒃ ᑮᓇᑭᔥᑲᒣᒃ ᑳᐯᐸᑳᓇᑎᑭᓐ ᑲᑭᓇ ᑯᒋᐃᑰᐎᓰᐎᓇᓐ᙮

ᑭᑫᑕᒧᒃ ᐊᐲ ᑯᒋᐃᑰᐎᓰᒪᑲᒃ ᑭᑌᐺᑕᒧᐎᓂᐙ, ᒦ ᐃᒫ ᑫᐅᒌᒪᑲᒃ ᔕᔒᐯᑕᒧᐎᓐ᙮

ᒦᑕᔥ ᐃᔑᑲᐯ ᔕᔒᐯᑕᒧᒃ ᒥᓯᐌ ᐱᑯ ᒋᐸᑭᒌᓯᐌᒃ, ᒦᔥ ᒋᑮᔑᐃᑰᐎᓯᔦᒃ, ᒋᑮᔑᓈᑯᓯᔦᒃ ᐃᑕᔥ ᑲᔦ ᑫᑰᓐ ᒋᓅᑌᓭᓯᐌᒃ᙮

ᑮᔥᐱᓐ ᑳᑕᔑᔦᒃ ᐯᔑᒃ ᓅᑌᓭᒡ ᑲᑮᑖᐌᑕᒧᐎᓐ, ᐅᑲᐊᑐᑕᒪᐙᓐ ᑭᔐᒪᓂᑑᓐ, ᒦᔥ ᒋᒦᓂᓐᒡ ᐁᔑ ᑲᑴᑗᒡ᙮ ᐐᑫ ᐄᑐᒃ ᑭᔐᒪᓂᑑ ᐌᓅᒋ ᒦᑭᐌ, ᑳᐐᓐ ᑲᔦ ᐅᑲᑴ ᒥᑲᓰᓐ ᑫᔑ ᐊᓈᒥᒥᐌᒡ᙮

ᐊᐲ ᑕᔥ ᐊᓇᒥᐋᒡ ᑕᑌᐺᔦᑕᒻ, ᑳᐐᓐ ᑕᔮᓉᑕᓰ᙮ ᐊᐎᔭ ᑳᑌᐺᑕᓯᒃ ᒦ ᐃ ᐁᔑᓈᑯᓯᒡ ᑖᐱᔥᑰ ᑳᐱᒫᔥᑳᒃ ᑭᒋᑲᒦᕽ, ᐋᑎ ᐱᑯ ᐌᑖᓂᒪᓂᓂᒃ ᐁᐃᔑᐌᐹᔑᒡ᙮

ᐊᐊ ᑎᓄ ᑳᐐᓐ ᑕᐃᓀᑕᓰ ᑫᑰᓐ ᒋᒦᓂᑯᒡ ᑳᑎᐯᒋᑫᓂᒡ;

ᐅᓵᒻ ᐁᓃᔑᓂᓂᑭᓐ ᐅᑎᓀᑕᒧᐎᓇᓐ, ᐁᑌᐺᐌᑖᑾᓯᓂᓂᒃ ᑲᑭᓇ ᑳᐃᔑᒋᑫᒡ᙮

ᐊᐊᐌ ᓴ ᐐᓐ ᐅᑌᐺᑕᒨ ᑳᐌᓅᒋᑑᓯᒃ ᑫᑰᓂᓂ, ᑕᒥᓉᑕᒻ ᐁᐃᔥᐸᑭᒥᑯᒡ ᑭᔐᒪᓂᑑᓐ᙮

ᐊᐊ ᑕᔥ ᐐᓐ ᑳᐌᓅᑎᓯᒡ ᑕᒥᓉᑕᒻ ᐁᓃᓴᑭᒥᑯᒡ ᑭᔐᒪᓂᑑᓐ ᑖᐱᔥᑰ ᑕᐃᓀᑖᑯᓯ ᐱᑾᒋᐙᐱᑾᓐ ᑳᓂ ᑭᑫᑖᑾᓯᓄᒃ᙮

ᐊᐲ ᐁᐊᓂ ᐃᔥᐸᑰᒋᕽ ᑮᓯᔅ ᐁᐊᓂ ᑭᔖᓯᑫᒡ ᒦ ᐃ ᐁᓂᔑ ᐹᑌᒃ ᐃᐃ ᐙᐱᑾᓂᑭᑎᑳᓐ᙮ ᒦ ᐃ ᐁᓂᔑ ᐸᑭᓯᕽ ᐋᓇᐐᓐ ᐁᒥᓄ ᓈᑾᑭᐸᓐ ᐁᓂᔑᐗᓈᑕᒃ᙮ ᒦᑕᔥ ᐯᔑᑾᓐ ᑳᐌᓅᑎᓯᒡ ᐁᓂᐃᔑ ᓂᔑᐗᓈᑎᓯᒡ ᒣᒀ ᐱᑯ ᐁᐱᒪᓄᑮᒡ᙮

ᔕᐌᑖᑯᓯ ᐊᐎᔭ ᑳᐸᑭᒌᓯᒃ ᑮᓇᑭᔥᑲᕽ ᐗᓯᑖᐎᓭᐎᓐ᙮ ᑮᔥᐱᓐ ᐋᓃᔥ ᑲᔥᑭᑑᒡ ᒋᔖᐾᑕᕽ ᑳᔑ ᑯᒋᐃᑰᐎᓯᒡ, ᐅᑲᑌᐱᓈᓐ ᐱᒫᑎᓯᐎ ᐅᑭᒫᐙᓄᒀᓐ ᑭᔐᒪᓂᑑᓐ ᑳᑮᐊᔓᑕᒫᑫᓂᒡ ᐁᐐᒦᓈᓂᒡ ᐃᐃ ᑳᓵᑭᐃᑯᓂᒡ᙮

ᐊᐲ ᐊᐎᔭ ᑯᑌᓂᒥᓐᒡ ᒋᒪᒋᑑᑕᕽ ᑳᐐᓐ ᑖᐃᑭᑐᓰ: ᑭᔐᒪᓂᑑ ᓂᑯᑌᓂᒥᒃ᙮ ᑳᐐᓐ ᐄᑐᒃ ᑖᑯᑌᓂᒫᓰ ᑭᔐᒪᓂᑑ ᒋᒪᒋᑑᑕᕽ, ᑳᐐᓐ ᑲᔦ ᐊᐎᔭᓐ ᐅᑯᑌᓂᒫᓰᓐ ᒋᒪᒋᑑᑕᒥᓂᒡ᙮

ᐊᐎᔭ ᐅᔕ ᐅᒋ ᑯᑌᓂᒫ ᐁᔑᒪᒋ ᒥᓴᐌᑕᕽ, ᒦᔥ ᐃᐃᒫ ᐌᒋ ᑳᒋᑎᓂᓐᒡ ᑲᔦ ᑕᔥ ᐌᒋ ᑕᑯᓂᓐᒡ᙮

ᒪᒋ ᒥᓴᐌᑕᒧᐎᓂᕽ ᐅᔕ ᐅᒌᒪᑲᓐ ᒪᒋᑑᑕᒧᐎᓐ᙮ ᐊᐲ ᑕᔥ ᒪᒋᑑᑕᒧᐎᓐ ᑮᑮᔕᓄᑮᒪᑲᒃ, ᒦ ᐃᒫ ᐌᒌᒃ ᓂᐳᐎᓐ᙮

ᑫᑯ ᑭᑲ ᐗᓂᒥᑰᓰᒻ, ᑳᓵᑭᐃᓇᑰᒃ ᓃᒋ ᐅᑌᐺᑕᒨᒃ᙮

ᑲᑭᓇ ᒦᑭᐙᓇᓐ ᐌᓂᔑᔑᑭᓐ, ᑳᑮᔑ ᓈᑾᑭᓐ ᑲᔦ ᐃᔥᐱᒥᕽ ᐅᒌᒪᑲᓅᓐ᙮ ᐁᐅᒌᒪᑲᑭᓐ ᑭᔐᒪᓂᑑᕽ ᑳᑮᐅᔑᑑᒡ ᑳᐙᓭᔮᓂᑭᓐ ᑮᔑᑯᕽ᙮ ᑳᐐᓐ ᐐᑳ ᐸᑳᓐ ᑕᐃᔑ ᐊᔮᓰ ᑖᐱᔥᑰ ᑳᔑ ᐊᔮᒋᔥᑳᒪᑲᒃ ᑳᐊᑲᐙᑌᒃ᙮

ᒦᑕᔥ ᐐᓐ ᐁᔑ ᒥᓉᑕᕽ ᑭᔐᒪᓂᑑ ᐁᑮ ᒦᓂᓇᕽ ᐅᔥᑭ ᐱᒫᑎᓯᐎᓐ ᐃᐃᒫ ᐅᒋ ᑳᑌᐺᒪᑲᓂᓂᒃ ᐅᑎᑭᑐᐎᓐ᙮ ᒦᑕᔥ ᑫᐃᔑᓈᑯᓯᔭᕽ ᑖᐱᔥᑰ ᐁᐅᔥᑭ ᐅᑕᐱᓅᒌᔑᒥᓇᕽ ᒫᐗᒡ ᐁᓃᑳᓀᓂᒥᓇᕽ ᐊᐲᒡ ᐐᓐ ᑲᑭᓇ ᑫᑰᓐ ᑳᑮ ᐅᔑᑑᒡ᙮

ᓃᒋ ᐅᑌᐺᑕᒨᒃ, ᓇᐗᒡ ᐅᓂᔑᔑᓐ ᒋᓂᑖ ᐱᓯᑕᒣᑭᐸᓐ ᐊᐲᒡ ᐐᓐ ᒋᑳᑮᑭᑐᔦᑭᐸᓐ, ᑫᑯ ᑲᔦ ᐗᑫᐗᑭᑖᓱᑫᒃ᙮

ᓂᔥᑳᑎᓯᐎᓂᕽ ᑳᐐᓐ ᐅᒌᒪᑲᓯᓅᓐ ᑭᑾᔭᒀᑎᓯᐎᓐ ᑭᔐᒪᓂᑑ ᑳᐊᑕᐌᑕᕽ᙮

ᐌᐱᓇᒧᒃ ᑕᔥ ᑲᑭᓇ ᑫᑰᓐ ᑳᐐᓀᑖᑾᒃ, ᐃᐃ ᑲᔦ ᑲᑭᓇ ᒪᒋᑑᑕᒧᐎᓐ᙮ ᑕᐸᓭᓂᑎᓱᒃ ᒋᐅᑖᐱᓇᒧᐌᒃ ᐅᑎᑭᑐᐎᓐ ᑳᑭᑎᑳᑌᒃ ᑭᐱᒫᑎᓯᐎᓂᐙᕽ, ᒦ ᐄᑐᒃ ᐃᐃ ᑫᐱᒫᒋᐃᑯᔦᒃ᙮

ᑫᑯ ᐐᓐ ᐗᓂᐎᓂᑎᓱᑫᒃ, ᑫᑯ ᒥᒋ ᐱᓯᑕᑫᒃ ᐃᐃ ᐃᑭᑐᐎᓐ, ᑑᑕᒧᒃ ᐋᓃᓐ ᐁᑭᑑᒪᑲᒃ᙮

ᐊᐎᔭ ᑳᒥᒋ ᓅᑕᕽ ᐃᐃ ᐃᑭᑐᐎᓐ, ᐃᔑᒋᑫᓯᒃ ᑕᔥ ᑳᐃᑭᑑᒪᑲᓂᓂᒃ, ᒦ ᐃ ᐁᔑᓈᑯᓯᒡ ᐊᐎᔭ ᑳᐙᐸᑎᓱᒡ ᐙᐸᒧᓂᕽ᙮

ᑳᐃᔥᒀ ᐙᐸᒧᒡ ᐃᑕᔥ ᐁᐊᓂᒫᒑᒡ, ᒦ ᐃ ᔐᒫᒃ ᐁᔑ ᐗᓃᑫᒡ ᐋᓃᓐ ᐁᔑᓈᑯᓯᒡ᙮

ᐃᐃᐌ ᐃᔑᐱᒫᑎᓯᐎᓐ ᑳᐅᓇᑑᒡ ᑭᔐᒪᓂᑑ ᒥᓯᐌ ᒥᓍᔑᓐ᙮ ᑳᐐᓐ ᐃᐃᒫ ᐊᐎᔭ ᑫᑰᓂᓂ ᐅᑑᒋ ᑭᐱᑎᓂᑰᓰᓐ ᑾᔭᒃ ᒋᐃᔑ ᐱᒫᑎᓯᒡ᙮ ᐊᐌᓀᓐ ᐃᑕᔥ ᐯᔭᑕᒃ ᐁᑲᓇᐙᐸᑕᕽ, ᐗᓃᑫᓯᒃ ᐃᐃ ᑳᓅᑕᕽ, ᑭᔐᒪᓂᑑᓐ ᐃᑕᔥ ᐅᑲᔕᐌᓂᒥᑰᓐ ᐋᓃᓐ ᐱᑯ ᑳᐃᔑᒋᑫᒡ᙮

ᑮᔥᐱᓐ ᓴ ᐊᐎᔭ ᐃᓀᓂᑎᓱᒡ ᐁᐊᓇᒥᐁᐙᑎᓯᒡ, ᑲᔥᑭᑑᓯᒃ ᐃᑕᔥ ᒋᒥᒋᒥᓇᕽ ᐅᑌᓇᓂᐤ, ᒦ ᐃ ᐄᓴᓐ ᐁᐗᔦᔑᑎᓱᒡ, ᐅᑕᓇᒥᐋᐎᓐ ᑳᐐᓐ ᑫᑰᓐ ᐃᓈᐸᑕᓯᓂᓂ᙮

ᑭᔐᒪᓂᑑ ᑰᓯᓈᓐ ᓴ ᐅᒥᓍᐸᑖᓐ ᐃᐃ ᑎᓄ ᐊᓇᒥᐋᐎᓐ ᑳᐯᑲᓂᓂᒃ, ᑲᔦ ᑕᔥ ᑳᑌᐺᐗᓂᓂᒃ᙮ ᒋᓈᓈᑲᒋᐃᑣ ᑸᐗᔑᔖᓇᒃ, ᐃᑭ ᑲᔦ ᑮᐙᒋᑴᐗᒃ ᑳᑲᒀᑕᑭᑑᐙᒡ, ᐊᐎᔭ ᑲᔦ ᑳᑲᓇᐌᓂᑎᓱᒡ ᒋᐐᓂᔥᑳᑯᓯᒃ ᐊᑮᐎ ᐱᒫᑎᓯᐎᓐ᙮

ᓃᒋ ᐅᑌᐺᑕᒨᒃ, ᐁᑌᐺᔦᓂᒪᕽ ᑳᑎᐯᓂᒥᓇᕽ ᒋᓴᔅ X ᑳᑭᒋ ᐃᓀᑖᑯᓯᒡ, ᑫᑯ ᐸᑳᓀᓂᒫᑫᓐ ᐊᐎᔭ ᐅᑎᔑᓈᑯᓯᐎᓂᕽ ᐅᒋ᙮

ᑮᔥᐱᓐ ᐊᐎᔭ ᐅᑎᓯᓀᒃ ᑳᑕᔑᒫᐗᒋᐃᑎᔦᒃ ᑭᑭᔥᑲᐙᒡ ᐅᓵᐎ ᔔᓂᔮ ᐙᐱᑯ ᓈᐱᓂᒌᐱᓱᓇᓐ, ᐐᑫ ᑲᔦ ᒥᓄᑯᓇᔦᒡ, ᐅᒋ ᐲᑎᑫᒡ ᐃᑕᔥ ᐊᐎᔭ ᐁᑭᑎᒫᑭᓯᒡ ᐁᑰᐹᒋᑯᓇᔦᒡ᙮

ᑮᔥᐱᓐ ᑕᔥ ᓇᐗᒡ ᑭᑌᓂᒣᒃ ᐊᐊ ᑳᒥᓄᑯᓇᔦᒡ ᐅᐅ ᐃᓀᒃ: ᐅᐅᒫ ᐃᔑᐊᐱᓐ ᒥᓋᐱᐎᓂᕽ᙮ ᐅᐅ ᑕᔥ ᐐᓐ ᐃᓀᒃ ᑳᑭᑎᒫᑭᓯᒡ: ᐌᑎ ᐊᐎ ᐃᔑ ᓃᐸᐎᓐ, ᑯᒫ ᑲᔦ ᐃᓀᒃ: ᐁᔑᓯᑌᐱᔮᓐ ᒥᒋᓴᒃ ᐃᔑᐊᐱᓐ᙮

ᒦᑕᔥ ᐁᔑᒋᑫᔦᒃ ᐁᐸᑳᓀᓂᒣᒀ ᐊᐎᔭᒃ, ᐁᐅᒋ ᐅᓇᔓᐙᓀᒀ ᑭᒪᒋ ᐃᓀᑕᒧᐎᓂᐙᕽ᙮

ᐱᓯᑕᐎᔑᒃ, ᑳᓵᑭᐃᓇᑰᒃ ᓃᒋ ᐅᑌᐺᑕᒨᒃ, ᑭᔐᒪᓂᑑ ᐅᔕ ᐅᑮᐅᓈᐸᒫᐞ ᑫᑎᒫᑭᓯᓂᒡ ᐅᐅᒫ ᐊᑮᕽ ᒋᐌᓅᒋᑑᓂᒡ ᑌᐺᔦᑕᒧᐎᓐ, ᒋᑎᐱᓇᐌᐎᓯᓂᒡ ᑲᔦ ᐅᑎᐯᒋᑫᐎᓐ᙮ ᐋᓃᔥ ᒦ ᐃᐌᓂ ᑳᑮᐊᔓᑕᒪᐙᒡ ᑳᓵᑭᐃᑯᒡ᙮

ᑳᐐᓐ ᑕᔥ ᑭᑮ ᑭᑌᓂᒫᓯᐙᐙ ᑳᑭᑎᒫᑭᓯᒡ᙮ ᑳᐌᓅᑎᓯᐙᒡ ᐄᑐᒃ ᑳᑲᒀᑕᑭᐃᓀᒀ, ᒦᐗᒃ ᑲᔦ ᐃᑭ ᑳᐃᔑᐎᓂᓀᒀ ᐁᔑ ᐊᔮᓂᒡ ᐅᑎᐹᑯᐌᐞ᙮

ᒦᐗᒃ ᐄᑐᒃ ᐃᑭ ᑳᒪᒋᐃᑕᒧᐙᒡ ᐃᐃᐌᓂ ᑫᒋ ᐃᓀᑖᑾᓂᓂᒃ ᐐᓱᐎᓐ ᑳᑮᒦᓂᑰᐎᓯᔦᒃ᙮

ᑾᔭᒃ ᑭᑲ ᐃᔑᒋᑫᒻ ᑮᔥᐱᓐ ᓇᐃᑕᒣᒃ ᑫᒋ ᐃᓀᑖᑾᒃ ᐅᓇᔓᐌᐎᓐ ᑳᐃᔑᐲᐃᑳᑌᒃ: ᑭᑲᓵᑭᐋ ᑭᐐᒋᑖᒫᑲᓐ ᑖᐱᔥᑰ ᑳᔑ ᓵᑭᐃᑎᓱᔭᓐ᙮

ᒦᑕᔥ ᐐᓐ ᐁᔑᓈᑾᒃ ᐁᐲᑯᓇᒣᒃ ᑭᔐᒪᓂᑑ ᐅᑐᓇᔓᐌᐎᓐ ᑮᔥᐱᓐ ᐊᐎᔭᒃ ᐅᑎᔑᓈᑯᓯᐎᓂᐙᕽ ᐃᔑ ᑲᑮᑭᓀᒀ, ᒦ ᐃ ᐁᒪᒋᑑᑕᒣᒃ᙮

ᐊᐌᓀᓐ ᑕᔥ ᐃᑯ ᑮᐲᑯᓇᕽ ᐯᔑᒃ ᐃᓈᑯᓂᑫᐎᓐ, ᒦ ᐃ ᐄᓴᓐ ᐁᐲᑯᓇᕽ ᑲᑭᓇ ᐃᓈᑯᓂᑫᐎᓇᓐ, ᒦ ᐃ ᐁᒪᒋᑑᑕᕽ᙮

ᑭᔐᒪᓂᑑ ᑕᔥ ᒦᓇᐙ ᑮᐃᑭᑐ: ᑫᑯ ᐱᔑᒀᒋᐋᑫᓐ ᐃᑴ ᑳᐐᑎᑫᒡ, ᒦᔥ ᑲᔦ ᐁᑭᑐᒡ: ᑫᑯ ᓂᔑᐌᑫᓐ᙮ ᐋᓇᐐᓐ ᐁᐱᔑᒀᑎᓯᓯᐗᓐ, ᓂᔑᐌᔭᓐ ᐃᑕᔥ, ᒦ ᐃ ᐁᐲᑯᓇᒪᓐ ᐃᐃ ᐃᓈᑯᓂᑫᐎᓐ᙮

ᐃᔑ ᑳᑮᑭᑐᒃ ᐃᑕᔥ, ᐃᔑ ᐱᒫᑎᓯᒃ ᑲᔦ ᑖᐱᔥᑰ ᐃᑭ ᑎᓄ ᐯᒫᑎᓯᐙᒡ ᑳᐐᐅᒋ ᐅᓈᑯᓂᑣ ᐅᓇᔓᐌᐎᓂᕽ ᐊᐎᔭ ᑳᐅᒋ ᐸᑭᑎᓂᑰᐎᓯᒡ᙮

ᑳᐐᓐ ᐅᔕ ᑭᔐᒪᓂᑑ ᐅᑲᑰᐹᑌᓂᒫᓰᓐ ᐊᐎᔭᓐ ᐊᐲ ᐅᓈᑯᓈᒡ ᐃᓂ ᑳᑰᐹᑌᓂᑫᓯᓂᒃ᙮ ᑰᐹᓯᓈᑫᐎᓐ ᓇᐗᒡ ᒪᔥᑲᐌᑖᑾᓐ ᐊᐲᒡ ᐐᓐ ᐅᓇᔓᐙᓂᑰᐎᓐ᙮

ᓃᒋ ᐅᑌᐺᑕᒨᒃ, ᐋᓃᓐ ᑕᔥ ᐃᓇ ᑫᐃᓍᑕᑭᐸᓐ ᐊᐎᔭ ᑮᐃᑭᑐᒡ: ᓂᑕᔮᓐ ᑌᐺᐗᑫᑕᒧᐎᓐ, ᑮᔥᐱᓐ ᑕᔥ ᐃᔑᒋᑫᓯᒃ ᐋᓃᓐ ᑫᑮᐃᔑ ᐱᒫᑎᓯᐸᓐ? ᐅᑖ ᐱᒫᒋᐃᑯᓐ ᐃᓇ ᐅᑌᐺᔦᑕᒧᐎᓐ?

ᑮᔥᐱᓐ ᑕᔥ ᑮᐐᒋ ᐅᑌᐺᑕᒨ ᑳᐃᓂᓃᐎᒡ ᑯᒫ ᑲᔦ ᐃᑴᐎᒡ ᓅᑌᓭᒡ ᑭᑭᔥᑭᑲᓇᓐ, ᑌᐱᓭᓯᒃ ᑲᔦ ᒦᒋᒻ ᐁᑕᓱᑮᔑᒃ,

ᐋᓃᓐ ᑕᔥ ᐃᓈ ᑫᐃᓈᐸᑕᑭᐸᓐ ᑮᔥᐱᓐ ᐅᐅ ᐃᓀᒀ: ᐱᓵᓐ ᐊᓂᒫᒑᓐ, ᓂᐸᑯᓭᑖᓐ ᒋᒥᓄᓭᔭᓐ᙮ ᑾᔭᒃ ᑮᔔᓯᓐ, ᐌᐌᓂ ᑲᔦ ᐐᓯᓂᓐ᙮ ᑮᔥᐱᓐ ᑕᔥ ᐐᒋᐋᓯᐌᒃ ᐋᓃᓐ ᐁᔑ ᓅᑌᓭᒡ, ᑳᐐᓐ ᑫᑰᓐ ᑕᐃᓈᐸᑕᓯᓅᓐ᙮

ᒦᑕᔥ ᒪᔮ ᐁᔑᓈᑾᒃ ᑌᐺᑕᒧᐎᓐ᙮ ᑮᔥᐱᓐ ᐊᐎᔭ ᑮᒥᒋ ᐃᑭᑐᒡ ᐁᑌᐺᑕᕽ ᐁᔑᒋᑫᓯᒃ ᑕᔥ ᐁᑭᑐᒡ, ᓂᐴᒪᑲᓐ ᐃᐃ ᑎᓄ ᑌᐺᑕᒧᐎᓐ᙮

ᐯᔑᒃ ᒫᐐᓐ ᐊᐎᔭ ᑕᐃᑭᑐ: ᑮᓐ ᓴ ᑭᑕᔮᓐ ᑌᐺᑕᒧᐎᓐ ᓃᓐ ᑕᔥ ᐐᓐ ᓂᑕᔮᓐ ᐃᔑᒋᑫᐎᓐ᙮ ᐅᐅ ᒫᐐᓐ ᑕᐃᒋᑲᓂᐎ: ᐙᐸᑕᐃᔑᓐ ᑕᔥ ᐋᑎ ᐌᒋ ᐊᔮᔭᓐ ᑌᐺᑕᒧᐎᓐ ᑫᑰᓐ ᑕᔥ ᐃᔑᒋᑫᓯᐗᓐ᙮ ᓃᓐ ᑕᔥ ᐐᓐ ᓂᑎᔑᒋᑫᐎᓂᕽ ᑭᑲᐅᒋ ᐙᐸᑕᐃᓐ ᐁᐊᔮᔮᓐ ᑌᐺᑕᒧᐎᓐ᙮

ᑭᑌᐺᑕᒻ ᐁᐯᔑᑯᒡ ᑭᔐᒪᓂᑑ᙮ ᒦ ᐃ ᑾᔭᒃ! ᒪᒋᐊᒑᑾᒃ ᑫᐐᓇᐙ ᐃᐃ ᐃᔑ ᑌᐺᑕᒨᒃ, ᒦᔥ ᑳᐅᒋ ᓂᓂᑭᔥᑳᐙᒡ ᐁᓭᑭᓯᐙᒡ᙮

ᑮᓐ ᑳᑲᑮᐹᑎᓯᔭᓐ! ᑭᑭᑫᑖᓐ ᐃᓇ ᐃᐃ ᑌᐺᑕᒧᐎᓐ ᑫᑰᓐ ᐁᐃᓈᐸᑕᓯᓄᒃ ᑮᔥᐱᓐ ᑫᑰᓐ ᐃᔑᒋᑫᒪᑲᓯᓄᒃ?

ᐋᓃᓐ ᑕᔥ ᑭᑫᑌ ᐊᔭᐋᒥᓈᐸᓐ ᐁᐸᕒᐊᐋᒻ ᑳᐅᒋ ᒥᓋᑭᒥᑯᒡ ᑭᔐᒪᓂᑑᓐ? ᐅᑎᔑᒋᑫᐎᓂᕽ ᐅᑮᐅᒋ ᒥᓋᑭᒥᑰᓐ ᐊᐲ ᑮᐸᑭᑎᓈᒡ ᐅᑯᓯᓴᓐ ᐋᐃᓯᑰᓐ ᐃᐃᒫ ᐸᑭᑎᓈᓱᐎᓂᕽ᙮

ᑭᐙᐸᑕᒻ ᐃᓇ ᑕᔥ ᐃᐃ ᐅᑌᐺᑕᒧᐎᓐ, ᐃᐃ ᐅᑎᔑᒋᑫᐎᓐ ᑲᔦ ᐁᑮᓃᔓᐅ ᐊᓄᑮᒪᑲᓂᓂᑭᓐ? ᒦᑕᔥ ᐃᐃᒫ ᐅᑎᔑᒋᑫᐎᓂᕽ ᑳᑮᐅᒋ ᑮᔑᓈᑾᓂᓂᒃ ᐅᑌᐺᑕᒧᐎᓐ᙮

ᒦᑕᔥ ᑭᒋᒪᓯᓇᐃᑲᓐ ᐁᑌᐺᒪᑲᒃ ᐅᐅ ᑳᐃᔑᐲᐃᑳᑌᒃ: ᐁᐸᕒᐊᐋᒻ ᐅᑮᑌᐺᑕᐙᓐ ᑭᔐᒪᓂᑑᓐ, ᒦᔥ ᑳᑮᐅᒋ ᐃᓇᑭᒥᑯᒡ ᐁᑾᔭᒀᑎᓯᒡ, ᑳᓵᑭᐐᒌᐗᒃ ᑲᔦ ᐅᑮᐃᔑᓂᑳᓂᑰᓐ᙮

ᒦᑕᔥ ᐃᐃᒫ ᐁᔑ ᐙᐸᑕᒪᕽ ᑭᑎᔑᒋᑫᐎᓂᓈᓂᕽ ᐁᐅᒋ ᒥᓋᑭᒥᓇᕽ ᑭᔐᒪᓂᑑ, ᑳᐐᓐ ᐐᓐ ᐁᑕ ᑭᑌᐺᑕᒧᐎᓂᓈᓂᕽ᙮

ᐃᓇᔥᑫ ᒦ ᐯᔑᑾᓐ ᐊᐊ ᐅᕒᐁᐋᑉ ᐱᔑᒀᒋᑴ᙮ ᐅᑮᐅᒋ ᒥᓋᑭᒥᑰᓐ ᑭᔐᒪᓂᑑᓐ ᐋᓃᓐ ᑳᑮᐃᔑᒋᑫᒡ ᐁᑮ ᐲᑎᑲᓈᒡ ᐃᐃ ᐅᑮᒨᓵᐲᐞ ᐅᐙᑳᐃᑲᓂᕽ, ᐸᑳᓐ ᐃᓇᑫ ᐁᑮᐊᓂᐃᓈᒡ ᒋᐊᓂᐃᔑ ᑮᐌᓂᒡ᙮

ᒦᑕᔥ ᑖᐱᔥᑰ ᒦᔭᐤ ᑳᐊᒑᑯᐗᓯᓄᒃ, ᓂᐴᒪᑲᓐ, ᒦᔥ ᑲᔦ ᑌᐺᑕᒧᐎᓐ ᑫᑰᓐ ᑳᐃᔑᒋᑫᒪᑲᓯᓄᒃ ᓂᐴᒪᑲᓐ᙮

ᓃᒋ ᐅᑌᐺᑕᒨᒃ! ᑫᑯ ᐐᓐ ᑲᑴ ᐹᑏᓄᑫᒃ ᒋᐐ ᑭᑭᓄᐊᒫᑫᔦᒃ᙮ ᑭᑭᑫᑖᒻ ᐄᑐᒃ ᑮᓇᐎᓐᑦ ᑳᑭᑭᓄᐊᒫᑫᔭᕽ ᓇᐗᒡ ᑕᐋᑴᑖᑾᓐ ᐊᐲ ᐅᓈᑯᓂᑰᔭᕽ ᐊᐲᒡ ᐐᓐ ᐃᑭ ᑯᑕᒃ ᐊᐎᔭᒃ᙮

ᑮᓇᐎᓐᑦ ᑕᔥ ᑳᐱᒫᑎᓯᔭᕽ ᒨᔕᒃ ᑭᐗᓂᑑᑖᒥᓐ᙮ ᑮᔥᐱᓐ ᑕᔥ ᐐᓐ ᐊᐎᔭ ᐐᑳ ᐗᐗᓃᓯᒃ ᐋᓃᓐ ᐁᑭᑐᒡ, ᒦ ᐊᐌ ᑳᑮᔑᓈᑾᓂᓂᒃ ᐅᐱᒫᑎᓯᐎᓐ, ᐁᑌᑕᑯ ᐁᑲᔥᑭᑑᒡ ᒋᑎᐯᓂᑎᓱᒡ ᒥᓯᐌ ᐅᐱᒫᑎᓯᐎᓂᕽ᙮

ᐃᓇᔥᑫ ᐱᐙᐱᑰᔅ ᑭᑕᑖᐙᒥᓐ ᒥᑕᑎᒻ ᐅᑯᓀᐎᕽ ᑫᐅᒋ ᓇᐃᑕᐎᓇᕽ᙮ ᒦᔥ ᐃᐃᒫ ᐌᒋ ᑲᔥᑭᐊᕽ ᐊᐊ ᒥᑕᑎᒻ ᒋᐃᔖᒡ ᐁᔑ ᐊᑕᐌᓂᒪᕽ᙮

ᐃᓇᔥᑫ ᑭᒋ ᒌᒫᓐ ᐋᓇᒥᒑᒃ, ᑭᒋ ᓅᑎᓄᕽ ᐅᒋ ᒫᒌᔮᓯᓐ᙮ ᐋᐱᒋ ᑕᔥ ᐊᑳᓯᓐ ᐃᐃ ᑕᑾᐃᑲᓐ, ᒦᔥ ᐃᐃᒫ ᒌᒫᓃᐎᑭᒫ ᐅᑖᑫᐎᓂᓂ ᐌᒋ ᑴᑴᑳᓯᑑᒡ ᐃᐃ ᒌᒫᓐ ᐋᑎ ᐱᑯ ᐙᐃᓈᔑᒡ᙮

ᒦᑕᔥ ᒪᔮ ᐁᔑᓈᑾᒃ ᒥᑌᓇᓂᐤ ᐋᓇᐐᓐ ᐁᐊᑳᓯᕽ ᐃᐃᒫ ᐐᔭᐎᒫᕽ, ᔖᑰᒡ ᑭᒋ ᒫᒦᒀᓂᑎᓲᒪᑲᓐ᙮ ᐃᓇᔥᑫ ᐋᐱᑎᕽ ᑮᐸᑭᓀᒃ, ᒦ ᐃᒫ ᐌᒋᑭᒋ ᓴᑭᑌᒃ᙮

ᒥᑌᓇᓂᐤ ᒪᔮ ᐃᔑᓈᑾᓐ ᑳᐸᑭᓀᒃ, ᐁᐅᒋ ᒫᒌᔥᑳᒪᑲᒃ ᐁᒥᓯᐌᔥᑳᒪᑲᒃ ᒪᒋ ᐃᔑᒋᑫᐎᓐ ᐃᐃᒫ ᑮᔭᐎᓈᕽ᙮ ᒦᑕᔥ ᐁᔑ ᒫᒌᑯᓀᒃ ᒥᓯᐌ ᑭᐱᒫᑎᓯᐎᓂᓈᕽ ᐃᐃᐌ ᐃᔥᑯᑌ ᑳᐅᒌᒪᑲᒃ ᒪᒋ ᐃᔥᑯᑌᕽ᙮

ᑲᑭᓇ ᐊᔭᐋᐎᔕᐞ, ᐱᓀᔒᔕᐞ, ᑭᓀᐱᑯᐎ ᐊᔭᐋᐎᔕᐞ, ᐃᐃ ᑲᔦ ᐊᔭᐋᐎᔕᐞ ᐁᔮᓂᒡ ᑭᒋᑲᒦᕽ ᑲᔥᑭᐋᐗᒃ ᒋᐙᑲᐎᐃᑣ, ᐃᓂᓂ ᑲᔦ ᐁᐙᑲᐎᐋᒡ᙮

ᑳᐐᓐ ᑕᔥ ᐊᐎᔭ ᐅᑲᔥᑭᑑᓰᓐ ᒋᐙᑲᐎᑑᒡ ᒥᑌᓇᓂᐤ᙮ ᒪᒉᑖᑾᓐ, ᐁᑲᔥᑭᒋᑳᑌᓯᓄᒃ ᒋᑎᐯᒋᑳᑌᒃ, ᒦ ᐃᒫ ᐁᔑ ᒨᔥᑭᓀᒃ ᑳᓂᔑᐌᒪᑲᒃ ᐱᒋᐳᐎᓐ᙮

ᒦᑕᔥ ᐃᐃᒫ ᒥᑌᓇᓂᐎᕽ ᐌᒋ ᓇᓈᑯᒪᕽ ᑭᔐᒪᓂᑑᓐ ᑰᓯᓈᓐ᙮ ᒦ ᑲᔦ ᐃᒫ ᐌᒋ ᒪᒋᐃᓇᒀ ᐊᐎᔭᒃ ᑳᑮᐃᔑᐃᑯᐙᒡ ᑭᔐᒪᓂᑑᓐ ᒋᐃᔑᓈᑯᓯᐙᒡ ᐅᑎᔑᓈᑯᓯᐎᓂᓃᕽ᙮

ᒦ ᐃᒫ ᐯᔑᑾᓐ ᐅᑑᓂᒫᕽ ᐌᒋᓭᒃ ᒥᓄ ᔕᐌᓂᒥᐌᐎᓐ, ᒦᔥ ᑲᔦ ᐃᒫ ᐌᒋᓭᒃ ᑮᑳᑎᐎᓐ᙮ ᓃᒋ ᐅᑌᐺᑕᒨᒃ, ᑳᐐᓐ ᐃᐃ ᑕᑮ ᐃᔑᓭᓯᓅᐸᓐ᙮

ᑖᐃᔑᓭ ᓇ ᓂᐱ ᑳᐯᑳᑲᒥᒃ, ᐃᐃ ᑲᔦ ᓂᐱ ᑳᔒᐎᑖᑲᓈᑲᒥᒃ ᐯᔑᑾᓐ ᒋᐅᒋ ᒨᑭᒋᐗᑭᓐ?

ᑳᐐᓐ ᐄᑐᒃ ᐱᒃ ᑎᓄᐙᑎᒃ ᐅᓂᑖᐎᑭᑑᓰᓇᓐ ᐋᓬᐃᑉ ᑎᓄᐎᒥᓇᓐ᙮ ᑳᐐᓐ ᑲᔦ ᔔᒥᓈᑎᒃ ᐅᓂᑖᐎᑭᑑᓰᓇᓐ ᐱᒃ ᑎᓄᐎᒥᓇᓐ᙮ ᑳᐐᓐ ᓂᐱ ᑳᐯᑳᑲᒥᒃ ᑖᐅᒌᓯᓅᓐ ᔒᐎᑖᑲᓂᐎᓂᐱ ᑳᐅᒋᒋᐗᕽ᙮

ᐊᐌᓀᓐ ᑕᔥ ᑳᑕᔑᔦᒃ ᑫᑮᑖᐌᑕᕽ, ᐊᐌᓀᓐ ᑲᔦ ᐌᓂᓯᑐᑕᒧᐎᓂᒡ? ᐃᐃᒫ ᐅᑲᔑᓈᑯᑑᓐ ᐅᑾᔭᒀᑎᓯᐎᓂᕽ ᐁᑕᐸᓭᓂᒧᒡ ᑲᔦ ᑕᔥ ᐁᑲᑮᑖᐌᑕᕽ ᐋᓃᓐ ᐁᔑ ᐱᒫᑎᓯᒡ᙮

ᑮᔥᐱᓐ ᑕᔥ ᐅᑌᑕᒣᒃ, ᓂᔥᑫᑕᒣᒃ ᑲᔦ, ᓃᑳᓀᓂᑎᓱᔦᒃ ᑲᔦ ᑭᑌᐃᐙᕽ, ᑫᑯ ᑕᔥ ᐐᓐ ᑭᒋ ᒫᒦᒀᓂᑎᓱᑫᒃ ᑫᐅᒋ ᐲᑯᓇᒣᒃ ᐃᐃ ᑌᐺᐎᓐ᙮

ᐃᐃ ᓴ ᑎᓄ ᑲᑮᑖᐌᑕᒧᐎᓐ ᑳᐐᓐ ᐃᔥᐱᒥᕽ ᐅᒌᒪᑲᓯᓅᓐ, ᐅᐅᒫ ᐊᑮᕽ ᐅᒌᒪᑲᓐ᙮ ᑳᐐᓐ ᑲᔦ ᐊᒑᑯᐗᓯᓅᓐ, ᒪᒋᐊᒑᑯᕽ ᐅᒌᒪᑲᓐ᙮

ᐋᑎ ᓴ ᐱᑯ ᐁᔮᑴᓐ ᐅᑌᑕᒧᐎᓐ, ᓃᑳᓀᓂᑎᓱᐎᓐ ᑲᔦ, ᒦ ᐃᒫ ᑲᔦ ᑫᐊᔮᒪᑲᒃ ᐲᑾᑲᒥᑭᓯᐎᓐ ᑲᑭᓇ ᑲᔦ ᑳᑕᓯᕽ ᒪᒋᑑᑕᒧᐎᓐ᙮

ᐃᐃ ᑕᔥ ᑲᑮᑖᐌᑕᒧᐎᓐ ᐃᔥᐱᒥᕽ ᑳᐅᒌᒃ ᒫᐗᒡ ᐯᑫᑖᑾᓐ᙮ ᒦ ᐃᒫ ᐌᒌᒃ ᐱᓵᓀᑕᒧᐎᓐ, ᓵᑭ ᐐᒌᑎᐎᓐ, ᑰᐹᑌᓂᒥᐌᐎᓐ, ᒥᓋᓄᑮᐎᓇᓐ, ᑌᐺᐎᓐ ᑲᔦ, ᑳᐐᓐ ᑲᔦ ᐊᐎᔭ ᐅᒋ ᐸᑳᓀᓂᒫᓰ᙮

ᐃᑭ ᓴ ᑳᐐᒋᑣᐙᒡ ᒋᒥᓄ ᐐᒌᑎᓈᓂᐗᓂᓂᒃ ᐊᐲ ᑭᑎᑳᑕᒧᐙᒡ ᐱᓵᓀᑕᒧᐎᓐ, ᐅᑲᓂᑖᐎᑭᑑᓈᐙ ᑾᔭᒀᑎᓯᐎᓐ᙮

ᐋᑎ ᑕᔥ ᐌᒌᑭᓐ ᒦᑳᑎᐎᓇᓐ, ᑮᑳᑎᐎᓇᓐ ᑲᔦ? ᐃᐃᒫ ᓴ ᐅᒌᒪᑲᓅᓐ ᑳᔑ ᒥᓴᐌᑕᒣᒃ ᐁᐐᒥᓉᑕᒥᐃᑎᓱᔦᒃ᙮ ᒦᐗᓐ ᑕᔥ ᐃᓂ ᑳᒫᒦᑳᑏᒪᑲᑭᓐ ᑭᐱᒫᑎᓯᐎᓂᐗᕽ᙮

ᑫᑰᓐ ᓴ ᑭᓇᑕᐌᑖᓈᐙ, ᑳᐐᓐ ᑕᔥ ᑭᑌᐱᓇᓰᒻ᙮ ᑭᓂᔑᐌᒻ, ᑭᒥᓴᐌᒋᑫᒻ ᑲᔦ, ᑳᐐᓐ ᑕᔥ ᑭᑌᐱᓇᓰᒻ ᐁᑕᐌᑕᒣᒃ᙮ ᑭᑮᑳᑎᒻ, ᑭᒦᑳᑎᒻ ᑲᔦ, ᑳᐐᓐ ᑕᔥ ᑭᑌᐱᓇᓰᒻ ᐁᑕᐌᑕᒣᒃ ᐋᓃᔥ ᑳᐐᓐ ᑭᑲᑴᒋᒫᓯᐙᐙ ᑭᔐᒪᓂᑑ᙮

ᐋᐲ ᑕᔥ ᑮᑲᑴᑗᔦᒃ ᑳᐐᓐ ᑭᒦᓂᑰᓰᒻ ᐅᓵᒻ ᐋᓃᔥ ᑳᐐᓐ ᓭᓯᒃ ᑭᑎᓀᑕᓰᒻ᙮ ᐃᐃᐌ ᑳᑲᑴᑗᔦᒃ ᑭᐐᐃᓈᐸᒋᑑᒻ ᑮᓇᐙ ᐱᑯ ᐁᐐᒥᓉᑕᒥᐃᑎᓱᔦᒃ᙮

ᑳᐐᓐ ᑭᑌᐺᔦᑖᑯᓯᓰᒻ ᑖᐱᔥᑰ ᐃᑴ ᑳᒥᓄ ᐐᒌᐙᓯᒃ ᐅᓈᐯᒪᓐ᙮ ᑳᐐᓐ ᐃᓇ ᑭᑭᑫᑕᓰᒻ ᐊᐎᔭ ᑮᓵᑭᑑᒡ ᐅᐅ ᐊᑮᓂ ᒦ ᐃ ᐄᓴᓐ ᐁᔒᑫᓂᒫᒡ ᑭᔐᒪᓂᑑᓐ? ᐊᐌᓀᓐ ᓴ ᐱᑯ ᑳᔑ ᐅᓀᑕᕽ ᐁᐐ ᓵᑭᑑᒡ ᐊᑮᓂ ᒦ ᐃ ᐁᐊᓂ ᑎᓄᐎᒡ ᑳᔒᑫᓂᒫᒡ ᑭᔐᒪᓂᑑᓐ᙮

ᑫᑯ ᑕᔥ ᐋᓉᑕᑫᒃ ᑭᒋᒪᓯᓇᐃᑲᓐ ᑮᐃᔑᐲᐃᑳᑌᒃ: ᐋᐱᒋ ᐐᓐ ᐅᓇᑕᐌᓂᒫᓐ ᒋᑎᐱᓇᐌᐎᓯᒡ ᐃᓂᐌᓂᐗᓐ ᐊᒑᑾᓐ ᑳᑭᑭᔥᑲᒨᓂᓇᑭᒡ᙮

ᐃᐃ ᓴ ᑭᔐᒪᓂᑑ ᑳᔑ ᔕᐌᓂᒥᓇᕽ ᒫᐗᒡ ᒪᔥᑲᐌᑖᑾᓂᓂ᙮ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑭᔐᒪᓂᑑ ᐅᓇᑳᔥᑲᐙᓐ ᑫᒋ ᐃᓀᓂᑎᓱᓂᒡ, ᐅᔕᐌᓂᒫᓐ ᑕᔥ ᐐᓐ ᐃᓂ ᑌᐸᓭᓂᒧᓂᒡ᙮

ᐸᑭᑎᓂᑎᓱᑕᐎᒃ ᑭᔐᒪᓂᑑ᙮ ᓇᑳᔥᑲᐎᒃ ᒪᒋᐊᔭᐋ, ᒦᔥ ᒋᑕᐸᓰᑲᑕᐎᓀᒃ᙮

ᐯᔓ ᐱᓈᓯᑲᐎᒃ ᑭᔐᒪᓂᑑ, ᑫᐐᓐ ᑕᔥ ᐯᔓ ᑭᑲ ᓈᓯᑳᒃ᙮ ᑭᓰᓂᒌᒃ ᑮᓇᐙ ᑳᒪᒋᑑᑕᒣᒃ᙮ ᐯᑭᑑᒃ ᑭᑌᐃᐙᓐ ᑮᓇᐙ ᓃᔡᔦᒃ ᑳᐃᓀᑕᒣᒃ᙮

ᑲᒀᑕᑫᑕᒧᒃ, ᒫᓀᑕᒧᒃ ᑲᔦ ᒋᒪᐎᔦᒃ᙮ ᑭᐹᐱᐎᓂᐙ ᑕᔑ ᑴᑭᓂᑳᑌ ᒋᒫᓀᑕᒣᒃ ᑲᔦ ᑕᔥ ᑭᒥᓉᑕᒧᐎᓂᐙ ᑕᔑ ᑴᑭᓂᑳᑌ ᒋᓰᐱᔅᑳᑌᑕᒣᒃ᙮

ᑕᐸᓭᓂᑎᓱᒃ ᐁᓈᓴᒦᒡ ᑳᑎᐯᒋᑫᒡ, ᒦᔥ ᒋᐅᐱᓂᓀᒃ᙮

ᓃᒋ ᐅᑌᐺᑕᒨᒃ, ᑫᑯ ᐊᐎᔭ ᒪᒋᐃᓈᑫᒃ᙮ ᑮᔥᐱᓐ ᒪᒋ ᑕᔑᒪᒡ ᑯᒫ ᑲᔦ ᐅᓈᑯᓇᒡ ᑮᑕᓇᒥᐋ ᒦ ᐃ ᐁᒪᒋᐃᑕᒪᓐ ᐁᐅᓈᑯᓇᒪᓐ ᑲᔦ ᐅᓇᔓᐌᐎᓐ᙮ ᑮᔥᐱᓐ ᑕᔥ ᐅᓈᑯᓇᒪᓐ ᐅᓇᔓᐌᐎᓐ ᑳᐐᓐ ᑮᓐ ᑭᓇᐃᑕᓰᓐ ᐅᓇᔓᐌᐎᓐ, ᒦᔥ ᑮᓐ ᐄᓴᓐ ᐁᐅᓈᑯᓂᐌᔭᓐ᙮

ᐯᔑᑯ ᐅᔐᑕ ᑳᒦᑭᐌᒡ ᐅᓇᔓᐌᐎᓐ, ᐅᓈᑯᓂᐌᒡ ᑲᔦ᙮ ᒦ ᓴ ᐊᐌ ᑳᑲᔥᑭᑑᒡ ᒋᐱᒫᒋᐃᐌᒡ, ᑳᑲᔥᑭᑑᒡ ᑲᔦ ᒋᓂᔑᐗᓈᒋᐃᐌᒡ᙮ ᐊᐌᓀᓐ ᑕᔥ ᑮᓐ ᐁᓀᓂᑎᓱᔭᓐ ᐁᐅᓈᑯᓇᒡ ᑮᒋᐱᒫᑎᔅ?

ᐱᓯᑕᒧᒃ ᑮᓇᐙ ᑳᐃᑭᑐᔦᒃ: ᓅᑯᒻ ᑳᑮᔑᑲᒃ ᑯᒫ ᑲᔦ ᐙᐸᕽ ᑭᑲ ᐃᔖᒥᓐ ᐌᑎ ᑭᒋ ᐆᑌᓈᕽ ᒋᐊᐎ ᐊᔮᔭᕽ ᐯᔑᑯᐱᐴᓐ ᒋᐊᐎ ᐊᓄᑮᔭᕽ ᑲᔦ ᑕᔥ ᒋᔔᓂᔮᑫᔭᕽ᙮

ᑳᐐᓐ ᐄᑐᒃ ᑭᑭᑫᑕᓰᒻ ᐋᓃᓐ ᑫᐃᔑᐌᐸᒃ ᐙᐸᕽ᙮ ᒦ ᓴ ᐃ ᐁᔑᓈᑯᓯᔦᒃ ᑖᐱᔥᑰ ᑳᐹᔥᑭᓀᒃ, ᐊᒋᓇ ᐁᑕ ᐁᐊᔮᒪᑲᒃ, ᒦᔥ ᐁᔑ ᐊᑯᓈᑾᒃ᙮

ᐅᐅᐌ ᐅᔕ ᑭᑖᐃᑭᑐᒻ: ᑮᔥᐱᓐ ᑳᑎᐯᒋᑫᒡ ᐃᓀᑕᕽ, ᑭᑲ ᐱᒫᑎᓯᒥᓐ, ᐅᐅ ᑭᑲ ᐃᔑᒋᑫᒥᓐ, ᐃᐃ ᑲᔦ ᑭᑲ ᐃᔑᒋᑫᒥᓐ᙮

ᒦᑕᔥ ᐁᔑᒋᑫᔦᒃ ᐁᑭᒋ ᐃᓀᓂᑎᓱᔦᒃ, ᑲᔦ ᑕᔥ ᐁᑭᒋ ᑳᑮᑭᑐᔦᒃ᙮ ᐃᐃ ᑎᓄ ᑭᒋ ᑳᑮᑭᑐᐎᓐ ᒪᒋᑑᑕᒧᐎᓂᐗᓐ᙮

ᑮᔥᐱᓐ ᑕᔥ ᑭᑫᑕᒣᒃ ᒋᒥᓄᑑᑕᒣᑭᐸᓐ, ᐃᔑᒋᑫᓯᐌᒃ ᐃᑕᔥ, ᒦ ᐃ ᐎᓂᐗᓐ᙮

ᑮᓇᐙ ᑳᐌᓅᑎᓯᔦᒃ, ᒪᐎᒃ ᒋᑲᒀᑕᑫᑕᒣᒃ᙮ ᑲᒀᑕᑭᓭᐎᓇᓐ ᐅᔕ ᑭᐐᐅᑎᓯᑯᒻ᙮

ᑭᐌᓅᑎᓯᐎᓂᐙᓐ ᐅᔕ ᐗᓈᑕᓅᓐ, ᐃᑭ ᑲᔦ ᐱᓀᓯᐎᐅᑎᑯᒪᒃ ᐅᑮᑭᑖᓈᐙᓐ ᑭᑭᑭᔥᑭᑲᓂᐙᓐ᙮

ᑭᑑᓵᐙᐱᑯ ᔔᓂᔮᒥᐙ, ᐊᐊ ᑲᔦ ᑭᐙᐹᐱᑯ ᔔᓂᔮᒥᐙ ᐐᑫ ᐊᒀᒀᐱᑭᔑᓅᒃ᙮ ᐃᐃᐌᓂ ᑕᔥ ᑳᔑ ᐊᒀᒀᐱᑭᔑᓄᐙᒡ ᑭᑎᐹᒋᒥᑯᐙᒻ ᐋᓃᓐ ᐁᔑ ᐊᔮᔦᒃ, ᒦᔥ ᑲᔦ ᐃᐌ ᑫᓂᔑᐗᓈᒋᐃᑯᔦᒃ ᑖᐱᔥᑰ ᐃᔥᑯᑌ ᑳᔑ ᒑᑳᑭᓱᐌᒪᑲᒃ᙮

ᑳᐐᓐ ᐄᑐᒃ ᑭᑮ ᑎᐸᐊᒪᐙᓯᐙᐙᒃ ᑳᑮᐊᓄᑮᑕᐎᓀᒀ ᑭᑭᑎᑫᐗᑲᒥᑯᐙᕽ ᑮᒪᓂᔑᑫᐙᒡ᙮ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᐅᔕ ᐅᓅᑕᐙᐞ ᐁᔖᑯᐌᓂᒡ ᐃᐃ ᑳᑮᒪᓂᔑᑫᓂᒡ ᑭᑭᑎᑫᐗᑲᒥᑯᐙᕽ᙮

ᒋᑭᒋ ᐌᓅᑎᓯᔦᒃ, ᒋᒥᓉᑕᒥᐃᑎᓱᔦᒃ ᐁᑕ ᑭᑎᔑ ᐱᒫᑎᓯᒻ ᐅᐅᒫ ᐊᑮᕽ᙮ ᐁᐋᒋᐴᓂᑎᓱᔦᒃ ᑖᐱᔥᑰ ᐱᔑᑭ ᑳᐋᒋᐴᓂᓐᒡ ᑳᔑᐎᓂᓐᒡ ᑕᔥ ᑫᑕᔑᓂᓯᓐᒡ ᒋᓇᓇᐎᔓᓐᒡ᙮

ᑭᑮ ᑌᐱᒫᐙᒃ ᒋᓂᓯᑣ ᑲᔦ ᑕᔥ ᑭᑮᓂᓵᐙᒃ ᐃᓂᓂᐗᒃ ᑫᑰᓐ ᐁᔑ ᐊᓈᒣᑖᑯᓯᓯᒀ, ᑳᐐᓐ ᑲᔦ ᑭᑮᓇᓈᑯᓂᑯᓰᐙᒃ᙮

ᓃᒋ ᐅᑌᐺᑕᒨᒃ, ᔕᔒᐯᑕᒧᒃ ᐲᓂᔥ ᒋᐱᑕᑯᔑᕽ ᑳᑎᐯᒋᑫᒡ᙮ ᐃᓇᔥᑫ ᑭᑎᑫᐎᓂᓂᐗᒃ ᐅᐲᑑᓈᐙᓐ ᐅᑭᑎᑳᓂᐙᓐ ᒋᐅᒋ ᓂᑖᐎᑭᓂᓂᑭᓐ ᐅᑭᑎᑫᐗᑲᒥᑯᐙᕽ᙮ ᔕᔒᐯᑕᒧᒃ ᐁᐲᑑᐙᒡ ᒋᑭᒥᐗᓂᓂᒃ ᐁᑕᒀᑭᓂᓂᒃ ᑲᔦ ᑕᔥ ᐁᓰᑾᓂᓂᒃ᙮

ᒦᑕᔥ ᑫᑮᓇᐙ ᐃᔑ ᔕᔒᐯᑕᒧᒃ᙮ ᑫᑯ ᐸᑭᒌᑫᒃ ᐁᔑ ᐊᐯᓂᒧᔦᒃ, ᐋᔕ ᐅᔕ ᐯᔓᓈᑾᓂᓂ ᑳᑎᐯᒋᑫᒡ ᑳᐐ ᐱᑕᑯᔑᕽ᙮

ᑫᑯ ᐅᒋ ᒫᔑᑲᑲᓅᓂᑎᑫᒃ ᑮᓇᐙ ᐅᒋ, ᑳᐐᓐ ᑕᔥ ᑭᑲ ᐅᓈᑯᓂᑰᓰᒻ᙮ ᐃᐃᒫ ᐅᔕ ᐃᔥᒀᑌᕽ ᓃᐸᐎ ᐅᑎᐹᑯᓂᐌ᙮

ᓃᒋ ᐅᑌᐺᑕᒨᒃ, ᑭᑭᓇᐙᐸᒥᑾᒃ ᐃᑭ ᑫᑲᓅᑕᒪᐙᐙᒡ ᑭᔐᒪᓂᑑᓐ ᑳᑮᐋᐸᒋᑑᐙᒡ ᑳᑎᐯᒋᑫᓂᒡ ᐅᐐᓱᐎᓂᓂ ᐋᓃᓐ ᑳᑮ ᔕᔒᐯᑕᒧᐙᒡ ᐋᓇᐐᓐ ᐁᑮ ᑲᒀᑕᑭᑑᐙᒡ᙮

ᔕᐌᑖᑯᓯᐗᒃ ᑭᑎᓈᓈᓂᒃ ᐃᑭ ᑳᐱ ᔕᔒᐯᑕᒧᐙᒡ᙮ ᑭᐱ ᓅᑖᒻ ᑲᔦ ᐋᓃᓐ ᒎᑉ ᑳᐃᔑ ᔕᔒᐯᑕᕽ, ᐋᓃᓐ ᑲᔦ ᑳᑎᐯᒋᑫᓂᒡ ᑳᐃᔑ ᐐᒋᐃᑯᒡ ᐌᑎ ᐃᔥᒀᒡ᙮ ᑳᑎᐯᒋᑫᒡ ᐅᔕ ᐅᐌᓅᒋᑑᓐ ᑰᐹᓯᓈᑫᐎᓐ, ᒥᓄᑑᑖᑫᐎᓐ ᑲᔦ᙮

ᓃᒋ ᐅᑌᐺᑕᒨᒃ, ᒦ ᐃᐌ ᒫᐗᒡ ᐃᑯ ᐃᔑᒋᑫᒃ᙮ ᑫᑯ ᑫᑰᓐ ᐊᐱᒧᑫᒃ ᐊᐲ ᐊᔓᑕᒫᑫᔦᒃ᙮ ᑫᑯ ᐊᐱᒧᑫᒃ ᑮᔑᒃ, ᐊᑭ, ᑫᑰᓐ ᐃᓴ ᐱᑯ᙮ ᐁᐊᐞ ᑮᐃᑭᑐᔭᓐ, ᒦ ᐱᑯ ᐃ ᐁᐊᐞ; ᑳᐐᓐ ᐃᑭᑐᔭᓐ, ᒦ ᐱᑯ ᐅ ᑳᐐᓐ᙮ ᑳᐐᓐ ᑕᔥ ᑭᑲ ᑎᐹᑯᓂᑰᓰ᙮

ᒫᔑᓭ ᓇ ᐊᐎᔭ ᑳᑕᔑᔦᒃ? ᑕᑲ ᑕᐊᓇᒥᐋ᙮ ᐊᐎᔭ ᓇ ᒥᓉᑕᒻ? ᑕᓂᑲᒧ ᑎᓄ ᒦᑴᒋᐎᓂᑲᒧᓇᓐ᙮

ᐊᐎᔭ ᓇ ᐋᑯᓯ ᑳᑕᔑᔦᒃ? ᐅᑲᐊᑐᒫᐞ ᑳᓃᑳᓂᓯᓂᒡ ᐊᓇᒥᐁᐎᑲᒥᑯᕽ ᒋᐱ ᐊᓇᒥᐁᑖᑯᒡ ᑕᑯ ᑲᔦ ᒋᐴᓯᓂᑯᒡ ᐱᒥᑌᓂ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ᙮

ᑌᐺᔦᑕᒧᓈᓂᐗᕽ ᐃᑕᔥ ᐊᐲ ᐊᓇᒥᐋᓂᐗᕽ, ᒦᔥ ᒋᒥᓄᐊᔮᒡ ᐊᐊ ᑳᐋᑯᓯᒡ᙮ ᑳᑎᐯᒋᑫᓂᒡ ᐅᑮ ᒥᓄᐊᔮᐃᑰᓐ᙮ ᑮᔥᐱᓐ ᑕᔥ ᑮᒪᒋᑑᑕᕽ, ᑕᐴᓀᑕᒪᐙᑲᓂᐎ᙮

ᐙᐐᑕᒫᑎᒃ ᐃᑕᔥ ᐁᔑᒪᒪᒋᑑᑖᑎᔦᒃ, ᐊᓇᒥᐁᑕᒫᑎᒃ ᑲᔦ, ᒦᑕᔥ ᒋᐊᑕᐎᐃᑰᐎᓯᔦᒃ᙮ ᐁᔑ ᐊᓇᒥᐋᒡ ᐅᑾᔭᒀᑎᔅ ᒪᔥᑲᐙᓂ, ᐊᓄᑮᒪᑲᓂᓂ ᑲᔦ᙮

ᐃᓬᐋᐃᒐ ᓴ ᐐᓐ ᑮᐃᔑ ᐃᓂᓃᐎ ᑖᐱᔥᑰ ᑮᓇᐎᓐᑦ᙮ ᐌᐌᓂ ᑕᔥ ᑮᐊᓇᒥᐋ ᒋᐅᒋ ᑭᒥᐗᓯᓂᓂᒃ᙮ ᓂᓱᐱᐴᓐ ᐃᔑ ᐋᐱᑕ ᑕᔥ ᑳᐐᓐ ᑮᐅᒋ ᑭᒥᐗᓯᓂᓂ᙮

ᒦᓇᐙ ᑕᔥ ᑮᐊᓇᒥᐋ, ᒦᔥ ᑮᔑᑯᕽ ᑳᑮᐅᒋ ᑭᒥᐗᓂᓂᒃ᙮ ᑮᓂᑖᐎᑭᓅᓐ ᑕᔥ ᐅᐅᒫ ᐊᑮᕽ ᑭᑎᑫᐎᓇᓐ᙮

ᓃᒋ ᐅᑌᐺᑕᒨᒃ, ᑮᔥᐱᓐ ᐊᐎᔭ ᑳᑌᐺᑕᕽ ᐸᑫᓄᑕᕽ ᑌᐺᐎᓐ, ᐊᐎᔭᓐ ᐅᔕ ᐅᑕᑲᑴ ᐱᑮᐌᐎᓂᑰᓐ᙮

ᐅᐅ ᑕᔥ ᒫᒥᑲᐎᒃ; ᐊᐌᓀᓐ ᐃᑯ ᑫᑴᑭᓈᒡ ᐅᒪᒋᑑᑕᒨᓐ ᐁᔑ ᐗᓂᔑᓂᓂᒡ ᐅᑲᐱᒫᒋᐋᓐ ᒋᓂᐳᓯᓂᒃ, ᒦᔥ ᑲᔦ ᓃᐱᐗᐞ ᒪᒋᑑᑕᒧᐎᓇᓐ ᒋᐴᓀᒋᑳᑌᓂᑭᓐ᙮