ᓃᓐ ᑆᓬ ᑭᔐᒪᓂᑑ ᐐᓐ ᓂᑮᐅᓀᓂᒥᒃ X ᒋᓴᔅ ᐅᑎᔑᓂᔕᐙᑲᓇᓐ ᒋᑎᓄᐎᔮᓐ᙮ ᑎᒪᑎ ᑮᒋᑌᐺᑕᒨᓈᓐ ᑕᔥ ᑲᔦ ᑳᐐᒌᐗᒃ, ᑭᐴᔔᐃᑯᐙ᙮

ᑭᑑᔑᐲᐊᒫᑰᒻ ᑮᓇᐙ ᑭᔐᒪᓂᑑ ᑳᑎᐯᓂᒥᓀᒃ ᐌᑎ ᑲᓬᐋᓰᕽ ᑳᐊᔮᔦᒃ, ᐋᓃᔥ ᑳᐐᑕᓇᒥᐋᒥᑰᔦᒃ ᑭᑌᐺᔦᑖᑯᓯᒻ ᐁᐐᒌᐌᒃ X᙮ ᑕᑲ ᑭᔐᒪᓂᑑ ᑳᐅᔫᓯᔭᕽ ᑭᑲᒥᓄᑑᑖᑯᐙ, ᐱᓵᓂᓯᐎᓐ ᑲᔦ ᑭᑲᒦᓂᑯᐙ᙮

ᒨᔕᒃ ᐃᑕᔥ ᓂᒦᑴᒋᐌᓂᒫᓈᓐ ᑭᔐᒪᓂᑑ ᑳᑎᐯᓂᒥᓇᕽ ᒋᓴᔅ X ᑳᐅᔫᓯᒡ, ᐊᐲ ᑮᐊᓇᒥᐁᑕᒫᑰᔦᒃ,

ᐋᓃᔥ ᓂᑮᓅᑖᒥᓐ ᐁᑌᐺᑕᐌᒃ X ᒋᓴᔅ, ᑲᔦ ᐁᓵᑭᐁᒀ ᑲᑭᓇ ᑭᔐᒪᓂᑑ ᑳᑎᐯᓂᒫᒡ ᐯᒫᑎᓯᓂᒡ᙮

ᐃᐃ ᑕᔥ ᑎᐹᒋᒧᐎᓐ ᑳᑌᐺᔦᑖᑾᒃ, ᐃᐃ ᒥᓍᒋᒧᐎᓐ ᓂᑕᒻ ᑮᐅᑎᓯᑯᔦᒃ, ᒦ ᓴ ᐃᐃᒫ ᑳᐅᒋᐊᐯᓂᒧᔦᒃ ᐁᑮᓅᑕᒣᒃ᙮ ᒦᑕᔥ ᐃᐃᒫ ᑭᑌᐺᑕᒧᐎᓂᐙ, ᑭᓵᑭᐃᐌᐎᓂᐙ ᑲᔦ ᐁᔑᓃᐸᐐᒪᑲᑭᓐ, ᐋᓃᔥ ᑭᐲᑑᒻ ᑳᑲᓇᐌᑕᒫᑰᔦᒃ ᐁᐐᒦᓂᑰᔦᒃ ᐌᑎ ᑭᒋᑮᔑᑯᕽ᙮

ᐃᐃ ᑕᔥ ᒥᓍᒋᒧᐎᓐ ᑳᑮᐅᑎᓯᑯᔦᒃ, ᒨᔕᒃ ᐊᓂᒥᓄᑑᑖᑫᒪᑲᓐ, ᒥᓯᐌ ᑲᔦ ᐊᓂ ᐃᔑᒥᓯᑌᔥᑳᒪᑲᓐ ᐅᐅᒫ ᐊᑮᕽ, ᑖᐱᔥᑰ ᑳᑮᑑᑖᑯᔦᒃ ᒥᓍᒋᒧᐎᓐ ᓂᑕᒻ ᐁᑮᔑᑲᒃ ᑳᑮᓅᑕᒣᒃ, ᐁᑮᑭᑫᑕᒧᐌᒃ ᑲᔦ ᐋᓃᓐ ᒪᔮ ᐁᓀᑖᑾᓂᓂᒃ ᑭᔐᒪᓂᑑ ᐅᑭᔐᐙᑎᓯᐎᓐ᙮

ᐊᐊ ᑕᔥ ᑳᔕᐌᓂᒪᑭᒡ ᓂᐐᑕᓄᑮᒫᑲᓂᓈᓐ ᐁᐸᐸᕒᐊᔅ ᑭᑮᑭᑭᓄᐊᒫᑯᐙ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ᙮ ᐋᐱᒋ ᑕᔥ ᐌᐌᓂ ᑌᐺᔦᑖᑯᓯ ᐁᐊᓄᑮᑕᐙᒡ Xᑕᓐ ᑮᓇᐙ ᐅᒋ᙮

ᓂᑮᑕᔑᑕᒫᑯᓈᓐ ᐃᐃ ᑭᓵᑭᐃᐌᐎᓂᐙ ᑭᔐᒪᓂᑑ ᐅᑕᒑᑾᓐ ᑳᒦᓂᒥᓀᒃ᙮

ᒦ ᓴ ᑕᔥ ᒨᔕᒃ ᑳᐅᒋᐊᓇᒥᐁᑕᒫᑰᔦᒃ ᐊᐲ ᐁᑮᓅᑕᒫᕽ ᐁᓈᒋᒥᑰᔦᒃ᙮ ᓂᑲᑴᒋᒫᓈᓐ ᑭᔐᒪᓂᑑ ᒋᒨᔥᑭᓀᑭᑫᑕᒧᐌᒃ ᐋᓃᓐ ᐁᔑᒥᓴᐌᑕᕽ, ᒋᑕᑯᐊᔮᔦᒃ ᑲᔦ ᑲᑮᑖᐌᑕᒧᐎᓐ, ᓂᓯᑐᑕᒧᐎᓐ ᑲᔦ ᐅᑕᒑᑾᓐ ᑳᒦᑭᐌᓂᒡ᙮

ᒦᑕᔥ ᐃᐃ ᒋᑲᔥᑭᑑᔦᒃ ᒋᐃᔑᐱᒫᑎᓯᐌᒃ ᑫᑮᐃᔑᐱᒫᑎᓯᐙᐸᓐ ᑳᑎᐯᓂᒥᑯᐙᒡ ᑳᑎᐯᒋᑫᓂᒡ, ᒨᔕᒃ ᑲᔦ ᒋᐃᔑᒋᑫᐌᒃ ᑳᐃᔑᒥᓉᑕᕽ᙮ ᐅᔥᑭᐱᒫᑎᓯᐎᓂᕽ ᐃᑕᔥ ᓅᑯᒻ ᐁᐃᔑᐱᒫᑎᓯᔦᒃ, ᒥᓄᒋᑫᐎᓇᓐ ᑭᑲᑑᑖᒻ, ᐲᓂᔥ ᑲᔦ ᐐᑫ ᑭᑲᑭᑫᓂᒫᐙ ᑭᔐᒪᓂᑑ᙮

ᒦ ᐃ ᑲᔦ ᒋᒪᔥᑲᐎᓰᔥᑳᑯᐌᒃ ᐃᐃ ᑳᑭᒋ ᐃᓀᑖᑾᓂᓂᒃ ᐅᒪᔥᑲᐎᓰᐎᓐ, ᒋᑲᔥᑭᑑᔦᒃ ᒋᔕᔒᐯᑕᒣᒃ ᑲᑭᓇ ᑫᑰᓐ ᑳᓇᑭᔥᑲᒣᒃ,

ᐁᒥᓉᑕᒣᒃ ᑲᔦ ᐁᒦᑴᒋᐌᓂᒣᒃ ᑳᐅᔫᓯᒥᓐᒡ᙮ ᐐᓐ ᐋᓃᔥ ᑭᑮᐃᔑᐃᑯᐙ ᒋᑌᐊᐲᑌᑖᑯᓯᔦᒃ ᑫᑮᓇᐙ ᒋᑕᑯᑌᐱᓇᒧᐌᒃ ᑭᔐᒪᓂᑑ ᑳᑮᑾᔮᒌᑕᒪᐙᒡ ᐯᒫᑎᓯᓂᒡ ᑳᑎᐯᓂᒫᒡ ᐁᐐᒦᓈᒡ ᐌᑎ ᐅᑑᑭᒫᐎᐎᓂᕽ ᐊᐊ ᑳᐙᓭᔦᑖᑯᓯᒡ᙮

ᐐᓐ ᐋᓃᔥ ᑲᔦ ᑭᑮᐐᒋᐃᑯᓈᓐ ᒋᐸᐲᐗᑭᒡ ᐃᐃᒫ ᑳᐃᔑᒪᔥᑲᐎᑎᐯᒋᑫᒪᑲᓂᓂᒃ ᑲᔥᑮᑎᐱᑭᓯᐎᓐ᙮ ᒦᑕᔥ ᑳᑮᐅᒋ ᐃᔑᐋᒋᐸᑭᑎᓂᓇᕽ ᐃᐃᒫ ᑳᑕᔑᑭᒋᐅᑭᒫᐎᓂᒡ ᐃᓂ ᑳᓵᑭᐋᒡ ᐅᑯᓯᓴᓐ᙮

ᒦ ᓴ ᑕᔥ ᐃᐃᒫ ᐅᑯᓯᓯᕽ ᑭᑮᐋᐸᐅᑯᓈᓐ ᑳᑮᐃᔑᐋᔩᑕᐱᓱᔭᕽ, ᐁᑮᐴᓀᑕᒫᑰᔭᕽ ᑭᒪᒋᑑᑕᒧᐎᓂᓈᓂᓐ᙮

X ᐃᑕᔥ ᐁᐙᐸᒥᓐᒡ ᒪᔮ ᐅᓈᑯᐋᓐ ᐋᓃᓐ ᐁᔑᓈᑯᓯᓂᒡ ᑳᓈᑯᓯᓯᓂᒃ ᑭᔐᒪᓂᑑᓐ᙮ X ᐃᑕᔥ ᐐᓐ ᒫᐗᒡ ᓃᑳᓐ ᑮᐅᑯᓯᓯᒫᐎ᙮ ᐐᓐ ᑲᔦ ᓇᐗᒡ ᐃᔥᐯᑖᑯᓯ ᐊᐲᒡ ᐐᓐ ᑲᑭᓇ ᑫᑰᓂᓂ ᑳᑮᐅᔑᒋᑳᑌᓂᒃ᙮

ᐐᓐ ᐃᑕᔥ ᐅᒋ X ᑭᔐᒪᓂᑑ ᐅᑮᐅᔑᑑᓐ ᑲᑭᓇ ᑫᑰᓂᓂ ᑮᔑᑯᕽ ᑳᐊᔮᓂᒃ, ᐊᑮᕽ ᑲᔦ ᑳᐊᔮᓂᑭᓐ, ᑫᑰᓇᓐ ᑳᓈᑾᓂᓂᑭᓐ, ᑳᓈᑾᓯᓂᓂᑭᓐ ᑲᔦ᙮ ᐅᑮᑕᑯ ᐅᔑᐋᐞ ᑲᔦ ᑳᐊᒑᑯᐌᑖᑯᓯᓂᒡ ᑳᐅᑭᒫᐗᐱᓂᒡ ᑳᐃᓂᒥᓐᒡ, ᑳᑎᐯᓂᒥᐌᓂᒡ ᑲᔦ, ᑳᐅᑭᒫᑲᑖᑫᓂᒡ ᑲᔦ, ᑳᑲᔥᑭᐁᐎᓯᓂᒡ ᑲᔦ – ᑲᑭᓇ ᑕᔥ ᑫᑰᓂᓂ ᑮᐅᔑᒋᑳᑌᓂ ᐐᓐ ᐅᒋ, ᐐᓐ ᑲᔦ ᑲᑭᓇ ᑫᑰᓂᓂ ᑮᐅᔑᑕᒪᐙ᙮

X ᐃᑕᔥ ᐋᔕ ᑮᐊᔮ ᑲᑭᓇ ᑫᑰᓂᓂ ᒋᑆ ᐊᔮᓂᒃ, ᐐᓐ ᐃᑕᔥ ᑲᔦ ᑲᑭᓇ ᑫᑰᓂᓂ ᑳᐅᒋᒥᒋᒥᔥᑳᓂᒃ᙮

ᐐᓐ ᐃᑕᔥ ᐅᓃᑳᓂᔥᑲᐙᐞ ᐅᑌᐺᑕᒨᐞ ᑳᒫᒪᔦᓄᓂᒡ, ᒦ ᓴ ᐃᐃᐌᓂ ᐅᐐᔭᐤ᙮ ᐐᓐ ᑲᔦ ᑳᐅᒋᐱᒫᑎᓰᒪᑲᓂᓂᒃ ᐃᐃ ᐅᐐᔭᐤ᙮ ᐐᓐ ᐃᑕᔥ ᑲᔦ ᒫᐗᒡ ᐃᑯ ᓂᑕᒻ ᑳᑮᐅᑯᓯᓯᒫᐎᒡ, ᑮᑮᐌᐱᒪᑎᓯ ᐋᔕ ᐁᑮᓂᐳᒡ, ᐐᓐ ᐃᑯ ᒋᓃᑳᓂᑭᒫᐎᒡ ᒋᑎᐯᑕᕽ ᑲᑭᓇ ᑫᑰᓐ ᑳᑕᓯᓂᓂᒃ᙮

ᑭᔐᒪᓂᑑ ᑕᔥ ᐐᓐ ᐃᑯ ᑮᐃᓀᑕᒻ ᐅᑯᓯᓴᓐ ᒋᑭᑭᔥᑲᒥᓂᒡ ᐃᐃ ᑲᑭᓇ ᐅᑭᔐᒪᓂᑑᐙᑎᓯᐎᓐ ᑳᔑᐌᓅᑕᓂᓂᒃ᙮

ᒦᑕᔥ ᑲᔦ ᐃᐃᒫ ᐅᑯᓯᓯᕽ ᑭᔐᒪᓂᑑ ᑮᐃᓀᑕᒻ ᑲᑭᓇ ᑫᑰᓂᓂ ᒋᑮᐌᓈᓯᑳᑯᒡ, ᐅᑯᓯᓴᓐ ᑕᔥ ᐁᑮᐃᔑᓰᑭᓇᒥᓂᒡ ᐅᒥᔅᑸᒥᓂ ᐃᐃᒫ ᐋᔑᑌᔮᑎᑯᕽ᙮ ᒦ ᓴ ᑕᔥ ᑳᑮᐅᒋᓈᒋᐐᑯᐱᑕᒫᓱᒡ ᑲᑭᓇ ᑫᑰᓂᓂ ᒋᒥᓄᐐᒌᐎᑯᒡ, ᑲᑭᓇ ᐊᑮᕽ ᑫᑰᓇᓐ ᑳᐊᔮᓂᑭᓐ, ᑮᔑᑯᕽ ᑲᔦ᙮

ᐅᑖᓈᕽ ᐃᑕᔥ ᑮᓇᐙ ᑭᑮᓈᐙᐸᒫᐙ ᑭᔐᒪᓂᑑ ᐁᑮᐃᔑᓈᑯᓯᔦᒃ ᑖᐱᔥᑰ ᐁᒦᑳᓀᒃ, ᐋᓃᔥ ᓅᒋᑯ ᑭᑮᐃᔑᒋᑫᒻ, ᓅᒋᑯ ᑲᔦ ᑭᑮᐃᓀᑖᒻ᙮

ᐃᓇᔥᑫ ᑕᔥ ᐁᑮᓂᐳᓂᒡ ᐃᓂ ᐅᑯᓯᓴᓐ ᐁᑮᑭᑭᔥᑳᑯᒡ ᐅᑕᑮᐎᐐᔭᐎᓂ, ᑭᔐᒪᓂᑑ ᑕᔥ ᑭᑮᐃᔑᓈᒋᐐᑯᐱᓂᑯᐙ ᒋᒥᓄᐐᒌᐌᒃ, ᐁᐐᐲᓂᓀᒃ ᐃᐃᒫ ᑳᐃᔑᐊᔮᒡ, ᒦ ᐃ ᒋᐃᓀᑖᑯᓯᔦᒃ ᐁᑎᐯᓂᒥᓀᒃ, ᐐᑫ ᐁᐯᑳᑎᓯᐌᒃ, ᐋᐲᒋᑯ ᑲᔦ ᐁᐊᓈᒣᑖᑯᓯᓯᐌᒃ᙮

ᑮᓇᐙ ᑕᔥ ᒦ ᐃ ᐁᔑᓈᑾᒃ ᑮᔥᐱᓐ ᒫᓄ ᐊᓂᒫᒑᔦᒃ ᐃᐃᒫ ᑭᑌᐺᑕᒧᐎᓂᐙᕽ, ᒪᔥᑲᐎᑳᐸᐎᔦᒃ ᑳᑮᐃᔑᐅᓇᓯᑰᔦᒃ᙮ ᑫᑯ ᑕᔥ ᐸᑭᑎᓂᑎᓱᑫᒃ ᒋᐸᑫᓄᑕᒣᒃ ᐃᐃ ᐊᐯᓂᒧᐎᓐ ᑳᑮᑌᐱᓇᒣᒃ ᐊᐲ ᑮᓅᑕᒣᒃ ᒥᓍᒋᒧᐎᓐ᙮ ᐃᐃ ᑕᔥ ᒥᓍᒋᒧᐎᓐ ᐋᔕ ᑲᑭᓇ ᐊᐎᔭ ᐁᑕᓱᐯᔑᑯᒡ ᑮᐐᑕᒪᐙ ᒥᓯᐌ ᐅᐅᒫ ᐊᑮᕽ᙮ ᓃᓐ ᑕᔥ ᑆᓬ ᒦ ᐃᐌ ᑳᐊᓄᑮᑕᒫᓐ᙮

ᓅᑯᒻ ᐃᑕᔥ ᐐᑫ ᓂᒥᓉᑕᒻ ᐃᐃ ᑳᐃᔑᑲᒀᑕᑭᑑᔮᓐ ᑮᓇᐙ ᐅᒋ᙮ ᐅᐅ ᐋᓃᔥ ᑳᐃᔑᑲᒀᑕᑭᑑᔮᓐ ᓂᐐᔭᐎᕽ, ᑫᓃᓐ ᓂᐐᒋᑣ ᒋᑮᔑᒋᑳᑌᒃ ᐃᐃ ᑲᒀᑕᑭᑑᐎᓐ ᑫᔮᐱ ᑳᐐᑲᒀᑕᑭᑑᓈᓂᐗᕽ, ᐃᓇᑫ X ᑳᑮᐃᔑᑲᒀᑕᑭᑑᒡ᙮ ᒦᑕᔥ ᑳᐅᒋ ᐃᔑᒋᑫᔮᓐ ᒋᐅᒋᐐᒋᐃᑣ ᐃᑭ ᑲᑭᓇ ᐅᑌᐺᑕᒨᒃ, ᒦ ᐋᓃᔥ ᐃᐃ X ᐅᐐᔭᐤ᙮

ᑭᔐᒪᓂᑑ ᑕᔥ ᐅᑎᔑᒋᑫᐎᓂᕽ ᓂᑮᐅᒋᐅᓀᓂᒥᒃ ᒋᐐᒋᐃᒪᒃ ᐅᑕᓇᒥᐋᐞ ᑳᒫᒪᐎᑎᐯᓂᒫᒡ, ᐐᓐ ᓂᑮᒦᓂᒃ ᐅᐅ ᐊᓄᑮᐎᓐ ᒋᑑᑕᒧᐗᒃ ᑮᓇᐙ ᒋᒥᓄᓭᔦᒃ, ᒋᐐᑕᒪᐎᓇᑰᒃ ᐋᓃᓐ ᒪᔮ ᐁᑭᑑᒪᑲᓂᓂᒃ ᑭᔐᒪᓂᑑ ᐅᑎᑭᑐᐎᓐ᙮

ᒦ ᓴ ᑕᔥ ᐃᐃ ᑳᑮᑭᑫᒋᑳᑌᓯᓂᓂᒃ ᐅᑎᓀᑕᒧᐎᓐ, ᑳᑮᑳᑑᒡ ᐅᑖᓈᕽ ᑳᑮᐱᐊᑮᐗᓂᓂᒃ, ᑳᑮᑳᑕᒪᐙᒡ ᑲᔦ ᐃᓂᓂᐗᐞ ᐅᑖᓈᕽ ᑳᑮᐊᔮᓂᒡ᙮ ᓅᑯᒻ ᐃᑕᔥ ᐋᔕ ᑲᑭᓇ ᐅᑮᐙᐸᑕᐋᐞ ᐃᐃ ᐅᑎᔑᒋᑫᐎᓐ ᑲᑭᓇ ᑳᑎᐯᓂᒫᒡ ᐯᒫᑎᓯᓂᒡ᙮

ᒦᐗᐞ ᐃᑕᔥ ᐃᐃ ᑭᔐᒪᓂᑑ ᑳᑮᐃᓀᓂᒫᒡ ᒋᑭᑫᑕᒥᓂᒡ ᐅᑎᓀᑕᒧᐎᓐ ᑳᑮᑭᑫᒋᑳᑌᓯᓂᓂᒃ᙮ ᐋᐱᒋ ᑕᔥ ᐌᓅᑕᓂᓂ, ᑭᒋ ᐃᓀᑖᑾᓂᓂ ᑲᔦ ᐅᑎᓀᑕᒧᐎᓐ ᑳᐐᑭᑫᑕᒨᓂᑣ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ᙮ ᒦᑕᔥ ᐅᐅ ᑳᑕᔑᑕᒫᕽ, X ᐁᐊᔮᒡ ᑭᐱᒫᑎᓯᐎᓂᐙᕽ, ᐐᓐ ᐋᓃᔥ ᑳᐅᒋᑫᒋᓈᐅᔦᒃ ᒋᑌᐱᓇᒧᐌᒃ ᑭᔐᒪᓂᑑ ᐅᑭᒋ ᐃᓀᑖᑯᓯᐎᓐ᙮

X ᐃᑕᔥ ᓃᓇᐎᓐᑦ ᑳᑕᔑᒪᑭᒡ ᑲᑭᓇ ᐊᐎᔭ ᐁᐐᑕᒪᐗᑭᒡ᙮ ᑲᑮᑖᐌᑕᒧᐎᓂᕽ ᐃᑕᔥ ᓂᑕᔑᐊᔮᒀᒥᒫᓈᓂᒃ, ᓂᑭᑭᓄᐊᒪᐙᓈᓂᒃ ᑲᔦ, ᑳᑕᔑᐙᒡ ᓴ ᒋᐲᓇᑭᑣ ᑭᔐᒪᓂᑑᓐ ᑳᐃᔑᐊᔮᓂᒡ, ᒋᑎᓄᐎᐙᒡ ᐋᔕ ᐁᑮᑮᔖᐯᐎᐙᒡ ᐃᐃᒫ Xᐃᕽ᙮

ᐅᐅ ᑕᔥ ᐁᑲᑴᑮᔑᑑᔮᓐ ᐋᐱᒋ ᓂᑭᒋᐊᓄᑮ, ᐁᑲᒀᑕᑲᓄᑮᔮᓐ ᑲᔦ ᐁᐋᐸᒋᑖᐗᒃ X ᐅᒪᔥᑲᐎᓰᐎᓐ ᑳᒦᔑᒡ, ᐁᒪᔥᑲᐗᓄᑮᒪᑲᓂᓂᒃ ᑲᔦ ᐃᐃᒫ ᓂᐱᒫᑎᓯᐎᓂᕽ᙮

ᑕᑲ ᑭᐐᐐᑕᒪᐎᓂᓂᒻ ᐋᓃᓐ ᐁᐲᒋᑭᒋᐊᓄᑮᔮᓐ ᑮᓇᐙ ᐅᒋ, ᐃᑭ ᑲᔦ ᐅᑌᐺᑕᒨᒃ ᓬᐁᔮᑎᓰᔮᕽ ᑳᐊᔮᐙᒡ, ᐃᑭ ᑲᔦ ᑲᑭᓇ ᑎᐱᓇᐌ ᒪᔑ ᑳᐙᐸᒥᓯᒀ᙮

ᒦᑕᔥ ᐅᐅ ᑳᐅᒋ ᐃᔑᒋᑫᔮᓐ ᑫᐐᓇᐙ ᑕᔥ ᒋᒪᔥᑲᐌᑕᒧᐙᒡ ᐅᑌᐃᐙᕽ, ᒫᓄ ᑲᔦ ᑲᑭᓇ ᒋᒫᒪᐎᐐᒋᐃᑎᐙᒡ ᐁᓵᑭᐃᑎᐙᒡ᙮ ᒦᑕᔥ ᑲᔦ ᐐᑫ ᓂᓯᑐᑕᒧᐙᒡ ᒋᐅᒋᐌᓅᒋᑑᐙᒡ ᑫᒋᓈᐅᐎᓐ᙮ ᒦᑕᔥ ᑫᐐᓇᐙ ᒋᐅᒋᑭᑫᑕᒧᐙᒡ ᑭᔐᒪᓂᑑᓐ ᐅᑎᓀᑕᒧᐎᓂᓂ ᐅᑖᓈᕽ ᑳᑭᑫᒋᑳᑌᓯᓂᓂᒃ, ᒦ ᓴ ᐄᑐᒃ ᐊᐊ X ᐐᓐ ᐃᑯ ᑳᑕᔑᒥᓐᒡ᙮

ᐐᓐ ᐄᑐᒃ X ᑳᐱᓂᔅᑯᓇᕽ ᒋᑭᑫᒋᑳᑌᓂᒃ ᑭᔐᒪᓂᑑᓐ ᑳᐌᓅᑕᓂᓂᒃ ᐅᑲᑮᑖᐌᑕᒧᐎᓂᓂ, ᐅᑭᑫᑕᒫᐎᓂᓂ ᑲᔦ᙮

ᑭᐐᑕᒪᐎᓂᓂᒻ ᐃᑕᔥ, ᑫᑯ ᐸᑭᑎᓈᑫᒃ ᐊᐎᔭ ᒋᐗᓂᒥᓀᒃ ᐊᐲ ᑲᑴᔖᑰᓱᒥᓀᒃ, ᐋᓇᐐᓐ ᐐᑫ ᒪᒥᓄᑮᔗᒡ᙮

ᐋᓇᐐᓐ ᐁᐐᒌᐎᓯᓄᐎᓇᑰᒃ ᓂᐐᔭᐎᕽ ᐌᑎ ᑳᐃᔑᐊᔮᔦᒃ, ᔖᑰᒡ ᐃᑕᔥ ᑭᐐᒌᐎᓂᓂᒻ ᓂᑎᓀᑕᒧᐎᓂᕽ᙮ ᐋᐱᒋ ᑲᔦ ᓂᒥᓉᑕᒻ ᐁᐙᐸᑕᒫᓐ ᐁᒪᔥᑲᐎᑳᐸᐎᔦᒃ ᐁᑌᐺᑕᐌᒃ X᙮

ᐋᔕ ᑕᔥ ᐁᑮᐅᑖᐱᓀᒃ X ᒋᓴᔅ ᒋᑎᐯᓂᒥᓀᒃ, ᐃᔑᐱᒧᓭᐙᒃ ᐃᑕᔥ X ᐅᑎᓈᑎᓯᐎᓂᕽ, ᐋᓃᔥ ᑭᐐᒌᐙᐙ᙮

ᑖᐱᔥᑰ ᑕᔥ ᐗᑕᐲᓐ ᐙᓴ ᑳᑯᑖᐎᑭᑭᓐ ᐊᑮᕽ, ᒦ ᓴ ᑕᔥ ᑫᑮᓇᐙ ᐯᔑᑾᓐ ᐃᔑᑯᑖᐎᑭᒃ ᐃᐃᒫ X ᐅᐱᒫᑎᓯᐎᓂᕽ᙮ ᑖᐱᔥᑰ ᑲᔦ ᐙᑳᐃᑲᓐ ᑳᐅᐸᑭᒋᑳᑌᒃ, ᒦ ᑲᔦ ᐃᔑᐅᐸᑭᑑᒃ ᑭᐱᒫᑎᓯᐎᓂᐙᓐ ᐃᐃᒫ Xᐃᕽ, ᒋᓂᒪᔥᑲᐙᑭᓐ ᑲᔦ ᑭᑌᐺᑕᒧᐎᓂᐙᓐ, ᑳᑮᐃᔑᑭᑭᓄᐊᒫᑰᔦᒃ᙮ ᒋᒨᔥᑭᓀᔥᑳᑯᔦᒃ ᑲᔦ ᒦᑴᒋᐌᑕᒧᐎᓐ᙮

ᐊᔮᒀᒥᓯᒃ ᐃᑯᒋ ᒋᐃᔑᐎᓂᓯᓄᐎᓀᒃ ᒋᒪᒫᒋᑾᐱᓂᑯᓯᐌᒃ ᐁᐐᑎᐯᓂᒥᓀᒃ ᐊᐎᔭ᙮ ᐋᓃᔥ ᐊᔮᐗᒃ ᐃᓂᓂᐗᒃ ᑫᑭᓄᐃᑫᐙᒡ ᐃᓂᓃᐎᑭᑭᓄᐃᑫᐎᓇᓐ ᑫᑰᓐ ᑳᐊᐲᑌᑖᑾᓯᓂᓂᑭᓐ᙮ ᐌᑎ ᑕᔥ ᐙᓴ ᐅᑖᓈᕽ ᐅᑑᑎᓈᓈᐙᓐ ᐃᓂᓃᓈᕽ ᑳᐱᑭᑭᓄᐃᑳᑌᓂᑭᓐ ᐁᐃᔑᑭᑭᓄᐃᑫᐙᒡ, ᐁᐅᑎᓇᒧᐙᒡ ᑲᔦ ᐊᒑᑾᐞ ᐅᐅᒫ ᐊᑮᕽ ᑳᐃᔑᑎᐯᒋᑫᓂᒡ, ᑳᐐᓐ ᑕᔥ ᐐᓐ Xᑕᓐ ᑳᐃᔑᑭᑭᓄᐃᑫᓂᒡ᙮

X ᑕᔥ ᐁᐃᓂᓃᐙᑎᓯᒡ ᐅᐐᔭᐎ, ᑲᑭᓇ ᓴ ᑭᔐᒪᓂᑑᓐ ᐅᑎᓈᑎᓯᐎᓂᓂ ᐅᑫᒋᔥᑭᑭᑭᔥᑳᑯᓐ᙮

ᑮᓇᐙ ᑕᔥ ᐁᐐᒌᐌᒃ X, ᒦ ᓴ ᐃᐃᒫ ᑳᐅᒋᒨᔥᑭᓀᔥᑳᑯᐌᒃ ᐌᓅᒋᐱᒫᑎᓯᐎᓐ; ᐐᓐ ᐋᓃᔥ ᑲᑭᓇ ᐅᓃᑳᓂᔥᑲᐙᐞ ᑲᑭᓇ ᑳᐊᒑᑴᑖᑯᓯᓂᒡ ᑳᐅᑭᒫᐎᓂᒡ, ᑳᑲᔥᑭᐁᐎᓯᓂᒡ ᑲᔦ᙮

ᐁᐐᒌᐌᒃ ᑕᔥ X, ᒦ ᐃ ᑳᐃᔑᓈᑯᓯᔦᒃ ᐁᐊᔮᔦᒃ ᑭᑭᓇᐙᑕᔕᑫᔓᑰᐎᓐ, ᑳᐐᓐ ᐐᓐ ᐃᓂᓂ ᑳᐃᔑᑭᑭᓇᐙᑕᔕᑫᔓᐌᒡ, ᐃᐃ ᓴ X ᑳᐃᔑᑭᑭᓇᐙᒋᐃᐌᒡ᙮ ᒦ ᓴ ᐁᔑᓭᔦᒃ ᐁᑮᔒᑯᔥᑲᒣᒃ ᑳᑮᓂᑖᒪᒋ ᐃᔑᒋᑫᒪᑲᒃ ᑫᑌᐃᓈᑎᓯᐎᓐ᙮

ᐊᐲ ᓴ ᑮᓰᑲᐊᑖᑰᔦᒃ ᒦ ᐃ ᑮᐐᒋᓂᑾᐅᑰᒣᒃ X, ᒦ ᐃᒫ ᑲᔦ ᑳᐃᔑᐐᒋᑮᐌᐱᒫᑎᓰᒣᒃ᙮ ᐋᓃᔥ ᑭᑮᑌᐺᑕᒧᐙᒻ ᑭᔐᒪᓂᑑ ᐅᒪᔥᑲᐎᓰᐎᓐ ᐁᑮᑮᐌᐱᒫᑎᓯᐋᒡ Xᑕᓐ ᑳᑮᓂᐳᓂᒡ᙮

ᑮᓇᐙ ᑕᔥ ᐋᐱᑎᕽ ᑭᑮᓂᐳᐗᑭᓱᒻ, ᐋᓃᔥ ᒪᒋᑑᑕᒧᐎᓐ ᑭᑮᑭᑭᔥᑳᑯᒻ, ᑭᑮᑎᓄᐎᒻ ᑲᔦ ᑳᑭᑭᓇᐙᑕᔕᑫᔣᓯᐎᑣ ᐁᑮᐊᔮᓯᐌᒃ ᑭᔐᒪᓂᑑ ᐅᑑᓇᔓᐌᐎᓐ᙮ ᓅᑯᒻ ᐃᑕᔥ ᑭᔐᒪᓂᑑ ᑭᑮᑕᑯᐱᒫᑎᓯᐃᑯᐙ ᑳᐃᔑᐱᒫᑎᓯᓂᒡ Xᑕᓐ, ᐁᑮᐴᓀᑕᒪᐎᓇᕽ ᑲᑭᓇ ᑭᒪᒋᑑᑕᒧᐎᓂᓈᓂᓐ᙮

ᑭᔐᒪᓂᑑ ᑕᔥ ᑲᔦ ᑭᑮᑳᓰᐊᒫᑯᓈᓐ ᑲᑭᓇ ᑳᐃᔑᐅᔑᐲᐃᑳᑌᑭᓐ ᐃᓂ ᑳᑮᑆᓇᐎᑑᔭᕽ ᐅᓇᔓᐌᐎᓐ ᑫᑮᑲᓇᐌᑕᒪᑭᐸᓐ, ᒦ ᐃᐌᓂ ᑳᑮᐊᑯᓴᑲᐊᕽ ᐃᐃᒫ ᐋᔑᑌᔮᑎᑯᕽ᙮

X ᐃᑕᔥ ᑮᓂᐳᒡ ᐃᐃᒫ ᐋᔑᑌᔮᑎᑯᕽ, ᑲᑭᓇ ᐅᑮᒪᔕᔥᑯᓇᒪᐙᐞ ᐃᐃ ᐅᒪᔥᑲᐎᓰᐎᓂᓂ ᑳᐊᒑᑴᑖᑯᓯᓂᑦ ᑳᐅᑭᒫᐎᓂᒡ ᐃᓂ ᑲᔦ ᑳᑲᔥᑭᐁᐎᓯᓂᒡ᙮ ᒦᑕᔥ ᑳᐃᔑᒋᑫᒡ, ᐁᑮᐱᒥᐎᓈᒡ ᐃᐃ ᑳᑮᔖᑰᒋᐋᒡ ᐱᓂᔅᑴ ᐱᑯ ᒋᐙᐸᒋᑲᓂᐎᓂᒡ᙮

ᑫᑯ ᑕᔥ ᐸᑭᑎᓈᑫᒃ ᐊᐎᔭ ᒋᐅᓀᑕᒪᐎᓀᒃ ᐌᑯᓀᓐ ᐃᓂ ᑎᓄ ᒦᒋᒻ ᑫᒦᒋᔦᒃ, ᐌᑯᓀᓐ ᐃᓂ ᑲᔦ ᑫᒥᓂᑴᔦᒃ, ᐋᓃᓐ ᑲᔦ ᑫᐃᔑᒋᑫᐌᒃ ᐊᐲ ᐊᓇᒥᐁᑲᒥᑲᓂᓂᒃ᙮ ᑫᑯ ᑲᔦ ᐸᑭᑎᓈᑫᒃ ᐊᐎᔭ ᒋᐅᓀᑕᒪᐎᓀᒃ ᐋᓃᓐ ᑫᐃᔑᒋᑫᐌᒃ ᑳᓂᑖᐃᓇᑲᒥᑭᓯᔦᒃ ᑮᐅᔥᑭᐊᑰᒋᕽ ᑎᐱᑭᑮᓯᔅ, ᑮᐊᓉᐲᐎ ᑮᔑᑲᓂᓂᑭᓐ ᑲᔦ᙮

ᐃᓂ ᓴ ᐃᓈᑯᓂᑫᐎᓇᓐ, ᒦ ᓴ ᐁᑕ ᓃᔮᒃ ᐁᑲᑴᓈᐱᓈᑾᑭᓐ ᐋᓃᓐ ᐱᒌᓇᒃ ᒪᔮ ᑳᐐᓈᑾᑭᓐ᙮ X ᐃᑕᔥ ᐐᓐ ᐊᐊ ᒪᔮ ᑳᐋᐎᒡ᙮

ᑫᑯ ᑕᔥ ᐸᑭᑎᓈᑫᒃ ᐊᐎᔭ ᒋᐅᑕᐱᓇᒪᐎᓀᒃ ᐃᐃ ᑳᐐᑎᐸᐊᒫᑰᔦᒃ᙮ ᐋᓃᔥ ᐊᔮᐗᒃ ᐃᓂᓂᐗᒃ ᑫᐅᒋᓇᐁᓂᑎᓱᐙᒡ ᐁᑲᒀᑕᑭᐃᑎᓱᐙᒡ ᒋᑕᐸᓯᓈᑯᓯᐙᒡ, ᐁᐊᓇᒥᐁᑕᐙᐙᒡ ᑲᔦ ᐁᒐᓬᐊᐞ᙮ ᐗᐊ ᑎᓄ ᐅᑕᐯᓂᒧᓄᑖᓐ ᑲᔦ ᐅᑎᔑᓇᒧᐎᓇᓐ, ᐊᓂᔖ ᐃᐃ ᑳᐅᒋᑭᑌᓂᒧᒡ ᐃᐃ ᓇᑫ ᐃᓂᓃᓈᕽ ᐁᐃᔑᓈᓈᑲᑕᐌᑕᒧᐙᒡ᙮

ᐊᐊ ᑎᓄ ᐃᓂᓂ ᑳᐐᓐ ᑲᔦ ᑫᔮᐱ ᐅᒥᒋᒣᓂᒫᓰᓐ Xᑕᓐ, ᑳᐅᑎᒀᓂᔥᑲᒥᓂᒡ ᐐᔭᐎᒫ, ᐅᑌᐺᑕᒨᒃ ᑳᐃᓂᑣ᙮ X ᑕᔥ ᐁᑎᐯᑕᕽ ᐅᒋᐱᒫᑎᓰᒪᑲᓂᓂ ᐃᐃ ᐐᔭᐎᒫ, ᒦᑕᔥ ᐃᐃᒫ ᑳᐃᔑᐊᔮᓂᑲᐎᑲᓀᕽ, ᑳᐃᔑᐅᒌᑕᑌᔮᐲᕽ ᑲᔦ ᐌᒋᒥᒋᒥᔥᑳᒃ, ᐁᐅᒋᒫᒌᑭᓂᓂᒃ ᑭᔐᒪᓂᑑᓐ ᑳᐃᔑᐊᑕᐌᑕᒥᓂᒡ᙮

ᑮᓇᐙ ᐃᑕᔥ ᐐᓐ, ᑭᑮᐐᒋᓂᐴᒫᐙ X, ᑳᐅᒋᑎᐯᓂᒥᓯᓄᐎᓀᒀ ᐃᑭ ᐊᒑᑾᒃ ᑳᐅᑭᒫᑲᑕᒧᐙᒡ ᑫᑰᓇᓐ ᑳᐅᔑᒋᑳᑌᓂᑭᓐ ᑮᔑᑯᕽ ᐅᒫ ᑲᔦ ᐊᑮᕽ᙮ ᐌᑯᓀᓐ ᐃᑕᔥ ᐌᒋ ᐃᔑᐱᒫᑎᓯᔦᒃ ᑖᐱᔥᑰ ᐅᐅᒫ ᐊᑮᕽ ᑫᔮᐱ ᐁᐅᒋᑎᐯᑖᑯᓯᔦᒃ? ᐌᑯᓀᓐ ᑲᔦ ᑫᔮᐱ ᐌᒋᓇᐃᑕᒣᒃ ᐅᓄ ᑎᓄ ᐃᓈᑯᓂᑫᐎᓇᓐ:

ᑫᑯ ᐸᐹᒣᑕᑫᓐ ᐅᐅ, ᑫᑯ ᑯᒋᐱᑕᑫᓐ ᐃᐃ, ᑫᑯ ᑲᔦ ᐃ ᐸᑳᓐ ᑫᑰᓐ ᓵᒥᓇᑫᓐ! ᑳᐃᑭᑑᒪᑲᑭᓐ᙮

ᐅᓄ ᑕᔥ ᑲᑭᓇ ᑳᑕᔑᑌᑭᓐ ᐃᐃᒫ ᐃᓈᑯᓂᑫᐎᓂᕽ, ᑳᐅᒋᐃᑰᔦᒃ ᒋᐱᒣᑕᓯᐌᒃ, ᐋᐱᑎᕽ ᐃᑯ ᑮᐋᐸᒋᒋᑳᑌᑭᓐ, ᒦ ᐃ ᐁᔑᐴᓂᓭᑭᓐ᙮ ᐅᓄ ᑕᔥ ᐃᓈᑯᓂᑫᐎᓇᓐ, ᑭᑭᓄᐃᑫᐎᓇᓐ ᑲᔦ, ᐃᓂᓃᓈᕽ ᐅᒌᒪᑲᓅᓐ᙮

ᐋᐱᒋ ᑕᔥ ᐃᓂ ᐅᑭᑭᓄᐃᑫᐎᓂᐙᓐ ᑲᑮᑖᐎᓈᑾᓂᓂᐗᓐ, ᒦᑕᔥ ᐁᑲᑳᓱᒥᐌᐙᒡ ᐁᒐᓬᐊᐞ ᒋᐊᓇᒥᐁᑕᐎᒥᓐᒡ, ᐁᑲᑴᑕᐸᓯᓈᑯᓯᐙᒡ, ᐁᑲᒀᑕᑭᐃᑎᓱᐙᒡ ᑲᔦ ᐅᐐᔭᐎᐙᕽ᙮ ᑳᐐᓐ ᐃᑕᔥ ᐐᓐ ᐅᓄ ᐃᓈᑯᓂᑫᐎᓇᓐ ᐅᑲᐅᒋᑲᔥᑭᑑᓰᓐ ᐊᐎᔭ ᒋᐴᓂᑑᒡ ᐅᒪᒋᒥᓴᐌᒋᑫᐎᓇᓐ᙮

ᐋᔕ ᑕᔥ ᑭᑮᑮᐌᐱᒫᑎᓰᐃᑰᒻ ᑮᑮᐌᐱᒫᑎᓯᐃᓐᒡ X᙮ ᒦ ᓴ ᐱᑯ ᐃ ᒨᔕᒃ ᐃᑯ ᐃᔑᐊᑐᓀᐊᒧᒃ ᐃᔥᐱᒥᕽ ᑳᐊᔮᑭᓐ, ᐋᓃᔥ ᒦ ᐃ ᐌᑎ X ᐁᔮᒡ, ᐁᐃᔑᐅᑭᒫᐗᐱᒡ ᐅᑭᒋᓂᑭᓃᕽ ᐃᓇᑫ ᑭᔐᒪᓂᑑᓐ᙮

ᓈᓈᑲᑕᐌᑕᒧᒃ ᑲᔦ ᐃᔥᐱᒥᕽ ᑳᐊᔮᑭᓐ, ᑳᐐᓐ ᐐᓐ ᑫᑰᓇᓐ ᐊᑮᕽ ᑳᐊᔮᑭᓐ᙮

ᐋᔕ ᐄᑐᒃ ᑭᑮᓂᐳᒻ᙮ ᑳᐐᓐ ᐃᑕᔥ ᒪᔑ ᓈᑾᓯᓅᓐ ᐋᓃᓐ ᑫᐃᔑᓈᑾᒃ ᑭᐱᒫᑎᓯᐎᓂᐙ, ᐁᐃᔑᐊᔮᒃ ᐃᐃᒫ X ᑳᐃᔑᐊᔮᒡ ᑭᔐᒪᓂᑑᓈᕽ᙮

ᐊᐲ ᑕᔥ X ᑳᐅᐱᒫᑎᓯᐎᓂᔦᒃ ᓈᑯᓯᒡ, ᒦ ᓴ ᑕᔥ ᑫᑮᓇᐙ ᒋᓈᑯᓯᔦᒃ ᐃᐃᒫ ᐅᑭᒋ ᐃᓀᑖᑯᓯᐎᓂᕽ᙮

ᒦ ᓴ ᑕᔥ ᐁᔑᓈᑾᒃ ᒋᓂᑑᔦᒃ ᐃᐃ ᑭᑫᑌᐱᒫᑎᓯᐎᓂᐙ ᑳᓂᑖᐃᔑᒋᑫᒪᑲᒃ ᐅᐅᒫ ᐊᑮᕽ᙮ ᐊᒦᐗᓐ ᑕᔥ ᐅᓄ ᑫᓂᑑᔦᒃ: ᐱᔑᒀᑎᓯᐎᓐ, ᐐᓂᓈᑯᓯᐎᓐ, ᐱᔑᒀᒋᒥᓴᐌᒋᑫᐎᓐ, ᒪᒋᒥᓴᐌᒋᑫᒨᔑᐅᐎᓐ, ᐊᔫᓵᒥᓯᐎᓐ ᑲᔦ; ᐋᓃᔥ ᐊᐎᔭ ᑳᐅᓵᒥᓯᒡ ᒦ ᐃ ᐁᔑᒋᑫᒡ ᑖᐱᔥᑰ ᐁᒪᓂᑑᑫᒡ᙮

ᐊᒦ ᐋᓃᔥ ᐅᓄ ᑎᓄ ᐃᔑᒋᑫᐎᓇᓐ ᐙᐅᒋᐸᑲᒥᔥᑳᒪᑲᓂᓂᒃ ᑭᔐᒪᓂᑑ ᐅᓂᔥᑳᑎᓯᐎᓐ ᒋᑲᒀᑕᑭᐋᒡ ᑲᑭᓇ ᐊᐎᔭᐞ ᑳᓇᐃᑖᑯᓯᒃ᙮

ᑫᑮᓇᐙ ᑕᔥ ᐋᐱᑎᕽ ᑭᑮᐃᔑᐱᒫᑎᓯᒻ ᐊᐲ ᑮᑎᐯᓂᒥᑯᔦᒃ ᐃᓂ ᐃᔑᒋᑫᐎᓇᓐ ᑳᑕᔑᑕᒫᑰᔦᒃ᙮

ᓅᑯᒻ ᐃᑕᔥ ᒦ ᐃ ᐅᒋᑕ ᐱᑯ ᐁᔑᓈᑾᒃ ᒋᐌᐱᓇᒣᒃ: ᓂᔥᑳᑎᓯᐎᓐ, ᐋᑯᑭᑖᓱᐎᓐ, ᔒᑫᒋᑫᐎ ᐃᓇᒪᒋᐅᐎᓇᓐ, ᒪᒋᑕᔑᑫᐎᓐ᙮ ᑫᑯ ᑲᔦ ᐐᑳ ᐐᓂᑮᔗᐎᓐ ᑕᐅᒋᓅᒋᑳᑌᓯᓅᓐ ᐃᐃᒫ ᑭᑑᓂᐙᕽ᙮

ᑫᑯ ᑲᔦ ᑮᐗᓂᒧᑖᑎᑫᒃ, ᐋᓃᔥ ᐋᔕ ᑭᑮᑮᒋᑯᔥᑳᒻ ᐃᐃ ᑭᑫᑌᐱᒫᑎᓯᐎᓂᐙ, ᑕᑯ ᑲᔦ ᑳᓂᑖᐃᔑᒋᑫᒪᑲᒃ᙮

ᐅᔥᑭᐱᒫᑎᓯᐎᓐ ᐋᓃᔥ ᑭᑮᐱᓯᑳᒻ, ᑭᔐᒪᓂᑑ ᒣᒀ ᐁᑕᔒᑲᕽ ᒋᐅᔥᑲᔭᐄᐗᓂᓂᒃ, ᐐᑫ ᐱᑯ ᒋᑖᐱᑕᐎᑭᑫᓂᒥᓐᒡ ᑳᐃᔑᓈᑯᓯᒡ᙮

ᐃᓇᔥᑫ ᑕᔥ ᓅᑯᒻ ᑳᐐᓐ ᐸᑳᓐ ᐁᑳ ᑳᒎᐎᐎᓯᒀ, ᒎᐗᒃ ᑲᔦ ᐃᓀᑖᑯᓯᓰᐗᒃ᙮ ᑳᑭᑭᓇᐙᑕᔕᑫᔑᑲᓂᐎᐙᒡ, ᐃᑭ ᑕᔥ ᑲᔦ ᑳᑭᑭᓇᐙᑕᔕᑫᔑᑲᓂᐎᓯᒀ ᑳᐐᓐ ᑫᐐᓇᐙ ᐯᐸᑳᓐ ᐃᓀᑖᑯᓯᓰᐗᒃ᙮ ᑳᐐᓐ ᑲᔦ ᐯᐸᑳᓐ ᐃᓀᑖᑯᓯᓰᐗᒃ ᐃᑭ ᑳᒪᔭᑭᓯᐙᒡ ᐙᓴ ᑳᐱᐅᒌᐙᒡ, ᐃᑭ ᑲᔦ ᑳᑭᑫᑕᓯᒀ ᐆᑌᓈᐙᑎᓯᐎᓐ, ᑳᑎᐯᓂᒥᑣ ᑲᔦ, ᐃᑭ ᑲᔦ ᐃᓂᓂᐗᒃ ᑳᑎᐯᓂᒫᓯᐎᑣ᙮ X ᐃᑕᔥ ᐐᓐ ᒫᐗᒡ ᑳᓃᑳᓀᑖᑯᓯᒡ, X ᑲᔦ ᑲᑭᓇ ᑭᑭᑭᔥᑲᐙᐙ᙮

ᑮᓇᐙ ᐯᒫᑎᓯᔦᒃ ᑭᔐᒪᓂᑑ ᑭᑎᐯᓂᒥᑯᐙ; ᐐᓐ ᑲᔦ ᑭᓵᑭᐃᑯᐙ, ᑭᑮᐅᓀᓂᒥᑯᐙ ᑲᔦ ᐐᓐ ᐃᑯ ᐁᐐᑎᐯᓂᒥᓀᒃ᙮ ᒦ ᓴ ᑕᔥ ᐁᔑᓈᑾᒃ ᒋᐱᓯᑲᒣᒃ ᑰᐹᑌᒋᑫᐎᓐ, ᒥᓄᑑᑖᑫᐎᓐ, ᑕᐸᓭᓂᒧᐎᓐ, ᓅᑳᑎᓯᐎᓐ ᑲᔦ, ᔕᔒᐯᓂᑎᐎᓐ ᑲᔦ᙮

ᑲᑴᔕᔒᐯᓂᑎᒃ ᑲᔦ, ᐴᓀᑕᒫᑎᒃ ᑲᔦ, ᑮᔥᐱᓐ ᒥᑴᑕᒧᐗᒡ ᐋᓃᓐ ᐁᔑᒫᓈᐸᒪᒡ ᐊᐎᔭ᙮ ᑖᐱᔥᑰ ᓴ ᑳᑎᐯᒋᑫᒡ ᑳᑮᐴᓀᑕᒪᐎᓀᒃ, ᒦ ᓴ ᑫᑮᓇᐙ ᐃᔑᐴᓀᑕᒫᑎᒃ᙮

ᐅᓄ ᑕᔥ ᑳᐐᑕᒫᓐ, ᐊᐗᔑᒣ ᓇᐗᒡ ᐱᓯᑲᒧᒃ ᓵᑭᐃᑎᐎᓐ, ᒦ ᐃᒫ ᑲᑭᓇ ᑫᑰᓇᓐ ᑳᐅᒋᒥᒋᒥᔥᑳᑭᓐ, ᑳᐅᒋᒫᒪᐎᑮᔑᓈᑾᑭᓐ ᑲᔦ᙮

ᑕᑲ ᐱᓵᓂᐐᒌᑎᐎᓐ X ᑳᒦᓂᓀᒃ ᑭᑲᑭᑭᓄᐎᓂᑯᐙᒻ ᐃᐃᒫ ᑭᑌᐃᐙᕽ; ᒦᑕᔥ ᐅᐅᒫ ᑫᐅᒋᐅᓀᑕᒣᒃ ᐋᓃᓐ ᐙᐃᔑᒋᑫᔦᒃ᙮ ᐋᓃᔥ ᑲᑭᓇ ᑭᑮᐊᑐᒥᑯᐙ ᑭᔐᒪᓂᑑ ᒋᐯᔑᑴᑖᑯᓯᔦᒃ ᐃᐃᒫ ᐐᔭᐎᒫᕽ ᒋᐱᓵᓂᐐᒌᑎᔦᒃ᙮ ᒨᔕᒃ ᐃᑕᔥ ᐃᑯ ᒦᑴᒋᐌᑕᒧᒃ!

ᐸᑭᑎᓇᒧᐙᒃ ᐃᑕᔥ X ᐅᑎᑭᑐᐎᓐ ᒋᐌᓅᑕᓂᓂᒃ ᐃᐃᒫ ᑭᑌᐃᐙᕽ, ᒋᐃᔑᑖᒪᑲᓂᓂᒃ᙮ ᑲᑮᑖᐌᑕᒧᐎᓐ ᑲᔦ ᒋᐋᐸᒋᑑᔦᒃ ᑭᑭᓄᐊᒫᑎᔦᒃ, ᐙᐐᑕᒫᑎᔦᒃ ᑲᔦ ᐋᓃᓐ ᑫᐃᔑᒋᑫᔦᒃ᙮ ᑭᒋᒪᓯᓇᐃᑲᓂ ᓂᑲᒧᓇᓐ ᐃᓇᐊᒧᒃ, ᐊᓇᒥᐁᓂᑲᒧᓇᓐ ᑲᔦ, ᒋᐃᓇᐊᒧᐌᒃ ᑲᔦ ᑭᔐᒪᓂᑑ ᐅᑕᒑᑾᓐ ᑳᒦᓂᓀᒃ ᓂᑲᒧᓇᓐ, ᐁᒦᑴᒋᐌᑕᒣᒃ ᐃᐃᒫ ᑭᑌᐃᐙᕽ᙮

ᑲᑭᓇ ᑫᑰᓐ ᑳᐃᔑᒋᑫᔦᒃ, ᑫᑰᓐ ᑲᔦ ᑳᐃᑭᑐᔦᒃ, ᑲᑭᓇ ᑫᑰᓐ ᐅᒋ ᐃᔑᒋᑫᒃ ᑳᑎᐯᒋᑫᒡ ᒋᓴᔅ ᐅᐐᓱᐎᓂᕽ, ᐐᓐ ᐅᒋ X ᐁᒦᑴᒋᐌᓂᒣᒃ ᑭᔐᒪᓂᑑ ᑳᐅᔫᓯᒥᓐᒡ᙮

ᑮᓇᐙ ᐐᐎᒫᒃ ᐸᑭᑎᓂᑎᓱᒃ ᒋᓇᐃᑕᐌᒀ ᑭᓈᐯᒥᐙᒃ᙮ ᒦᑕᔥ ᐅᐅ ᐁᔑᓈᑾᒃ ᒋᐃᔑᒋᑫᔦᒃ, ᐋᓃᔥ ᑭᐱᒥᓂᔕᐙᐙ ᑳᑎᐯᒋᑫᒡ᙮

ᑮᓇᐙ ᐅᓈᐯᒥᒫᒃ ᓵᑭᐃᑾᒃ ᑭᐐᐎᐙᒃ, ᑫᑯ ᑲᔦ ᓴᓇᑭᐋᑫᒀᓂᒃ᙮

ᑮᓇᐙ ᐊᐱᓅᒌᔕᒃ, ᒨᔕᒃ ᐃᑯ ᐃᔑᓇᐃᑕᐎᑾᒃ ᑭᓃᑭᐃᑯᐙᒃ; ᐋᐱᒋ ᐅᐌᓂ ᑳᑎᐯᒋᑫᒡ ᐅᒥᓍᐸᑖᓐ᙮

ᑮᓇᐙ ᐅᑌᑌᒫᒃ, ᑫᑯ ᐅᓵᒻ ᑲᑳᓱᒫᑫᒀᓂᒃ ᑭᓃᒑᓂᓯᐙᒃ, ᒫᑭᔖ ᑭᑲᓂᔥᑭᐋᐙᒃ, ᐋᓃᔥ ᐲᓂᔥ ᑕᓂᐸᑭᑌᑕᒨᒃ ᐃᐃ ᑑᑕᐌᒀ᙮

ᑮᓇᐙ ᐅᐸᒦᑖᑫᒃ ᑳᑎᐯᓂᒥᑰᔦᒃ, ᒥᓯᐌ ᐱᑯ ᐃᔑᓇᐃᑕᐎᑾᒃ ᐃᑭ ᑳᐅᑑᑭᒫᒥᔦᒃ ᐅᐅᒫ ᐊᑮᕽ᙮ ᑳᐐᓐ ᐐᓐ ᐁᑕ ᑮᑲᓇᐙᐸᒥᓀᒀ ᒋᐅᒋᓇᐁᑕᒧᐁᒀ᙮ ᐃᐃᒫ ᓴ ᑭᑌᐃᐙᕽ ᐅᒋ ᓇᐃᑕᒧᒃ, ᐁᑯᑖᓀᓂᒣᒃ ᑳᑎᐯᒋᑫᒡ᙮

ᐋᓃᓐ ᐃᑯ ᐁᔑᒋᑫᔦᒃ, ᐁᑯᑲᔥᑭᑑᔦᒃ ᐃᑯ ᑭᑌᐃᐙᕽ ᐅᒋ ᐃᓇᓄᑮᒃ, ᒋᐃᔑᒋᑫᔦᒃ ᑖᐱᔥᑰ ᑳᑎᐯᒋᑫᒡ ᐐᓐ ᐁᐊᓄᑮᑕᐌᒃ, ᑳᐐᓐ ᐐᓐ ᐃᓂᓂ᙮

ᒫᒥᑲᐎᓄᑕᐎᒃ ᑳᑎᐯᒋᑫᒡ ᑭᑲᒦᓂᑯᐙ ᐃᐃ ᐅᑎᐸᐊᒫᑫᐎᓐ ᑳᑲᓇᐌᑕᒪᐙᒡ ᐅᐱᒫᑎᓰᒪᐞ ᐁᐐᑎᐸᐊᒪᐙᒡ᙮ ᑳᑎᐯᒋᑫᒡ X ᐅᔕ ᑳᐊᓄᑮᑕᐌᒃ᙮

ᑲᑭᓇ ᑕᔥ ᐊᐎᔭ ᒫᓄ ᑳᒪᒋᑑᑕᕽ, ᒦ ᓴ ᐃ ᑫᔑᑮᐌᑎᐸᐊᒪᐎᓐᒡ ᑲᑭᓇ ᑫᑰᓂᓂ ᑳᐃᔑᒪᒋᑑᑕᕽ, ᐋᓃᔥ ᐯᔑᑾᔭᐄ ᐃᓇᑫ ᑲᑭᓇ ᐊᐎᔭᓐ ᑭᔐᒪᓂᑑ ᐅᑎᔑᑎᐹᑯᓈᓐ᙮

ᑮᓇᐙ ᑳᐅᑭᒫᐎᔦᒃ, ᑾᔭᒃ ᑑᑕᐎᑾᒃ, ᐌᐌᓂ ᑯ ᑲᔦ ᑑᑕᐎᑾᒃ ᐃᑭ ᑳᐸᒦᑕᐎᓀᒀ ᑳᑎᐯᓂᒣᒀ᙮ ᐃᔑᒫᒥᑲᐎᒃ ᑫᑮᓇᐙ ᐁᐊᔮᒡ ᑭᑑᑭᒫᒥᐙ ᑭᒋᑮᔑᑯᕽ᙮

ᑫᑯ ᐸᑭᒌᑫᒃ ᒋᐊᓇᒥᐁᑕᐌᒃ ᑭᔐᒪᓂᑑ, ᓇᐋᓯᒃ ᑲᔦ ᒣᒀ ᐁᐊᓇᒥᐋᔦᒃ, ᐁᒦᑴᒋᐌᓂᒣᒃ ᑲᔦ ᑭᔐᒪᓂᑑ᙮

ᒣᒀ ᑕᔥ ᐁᐊᓇᒥᐋᔦᒃ, ᐊᓇᒥᐁᑕᒪᐎᔑᓈᒻ ᑫᓃᓇᐎᓐᑦ, ᑭᔐᒪᓂᑑ ᒋᑕᐎᓇᒪᐎᓇᑭᒡ ᒋᐙᐐᑕᒫᑫᔮᕽ ᐅᑎᐹᒋᒧᐎᓐ ᑳᐃᔑᑕᔑᒥᒥᓐᒡ Xᑕᓐ, ᑳᑮᑭᑫᒋᑳᑌᓯᓂᓂᒃ ᐅᑖᓈᕽ᙮ ᒦᑕᔥ ᓃᓐ ᓅᑯᒻ ᑳᐅᒋᑭᐸᐅᑰᔮᓐ ᐁᐐᑕᒫᑫᔮᓐ᙮

ᒦᑕᔥ ᑲᔦ ᐃᔑᐊᓇᒥᐁᑕᒪᐎᔑᒃ ᓃᓐ ᐌᐌᓂ ᒋᓂᓯᑐᑖᑰᔮᓐ ᐋᓃᓐ ᐁᑭᑐᔮᓐ, ᐋᓃᔥ ᒦ ᐃᐌ ᐁᔑᒦᓂᑰᔮᓐ ᒋᐃᔑᒋᑫᔮᓐ᙮

ᑲᑮᑖᐐᒃ ᑲᔦ ᐋᓃᓐ ᐁᑑᑕᐌᒀ ᐃᑭ ᑳᑌᐺᑕᓯᒀ, ᐋᐱᒋ ᓴ ᑾᔭᒃ ᐃᓈᐸᒋᑑᒃ ᐃᐃ ᑳᔑᑕᐎᓇᒫᑰᔦᒃ᙮

ᑕᑲ ᑲᔦ ᑭᑎᑭᑐᐎᓂᐙᓐ ᑕᒥᓄᑖᑾᓅᓐ, ᒋᐃᓂᑖᑾᑭᓐ ᐊᐎᔭ ᒋᐐᓅᑕᕽ, ᒦᑕᔥ ᑲᔦ ᐁᔑᓈᑾᒃ ᒋᑭᑫᑕᒣᒃ ᑾᔭᒃ ᒋᐃᔑᓇᑴᑕᐌᒃ ᑲᑭᓇ ᐊᐎᔭ᙮

ᐊᐊ ᑕᔥ ᑳᔕᐌᓂᒪᑭᒡ ᓃᑕᓇᒥᐋᓈᓐ ᑎᑭᑲᔅ ᐋᐱᒋ ᑌᐺ ᐊᓄᑮ, ᑳᐐᑕᓄᑮᒥᒡ ᐃᐃᒫ ᑳᑎᐯᒋᑫᓂᒡ ᐅᑕᓄᑮᐎᓂᓃᕽ᙮ ᑭᑲᐐᑕᒫᑯᐙ ᐋᓃᓐ ᐁᔑᐊᔮᔮᓐ᙮

ᒦᑕᔥ ᐅᐅᐌᓂ ᑳᐅᒋ ᐃᔑᓂᔕᐗᒃ ᐌᑎ ᑳᐃᔑᐊᔮᔦᒃ, ᒋᐐᑕᒪᐎᓀᒃ ᐋᓃᓐ ᑲᑭᓇ ᐁᔑᓭᔮᕽ ᐅᐅᒫ ᑳᐃᔑᐊᔮᔮᕽ, ᑮᓇᐙ ᒋᐅᒋᒪᔥᑲᐌᑕᒣᒃ᙮

ᐃᓂ ᑕᔥ ᑮᒋᐅᑌᐺᑕᒨᓈᓂᓐ ᐅᓀᓯᒪᓴᓐ ᑳᑌᐺᔦᑖᑯᓯᓂᒡ ᑳᓵᑭᐃᒥᓐᒡ ᑲᔦ, ᐅᑲᐱᐐᒌᐙᓐ ᐊᐲ ᐅᑎᓯᓀᒃ᙮ ᐋᓃᔥ ᐅᓀᓯᒪᔅ ᐌᑎ ᑳᐃᔑᒫᐗᒋᐃᑎᔦᒃ ᐅᒋᑎᐯᑖᑯᓯ᙮ ᑭᑲᐐᑕᒫᑯᐙᒃ ᐃᑕᔥ ᐋᓃᓐ ᐁᔑᐌᐸᓂᓂᒃ ᐅᐅᒫ ᑳᐃᔑᐊᔮᐗᑭᒡ᙮

ᐁᕒᐃᔅᑖᕒᑲᔅ ᑳᐐᒋᑭᐸᐅᑰᒪᒃ ᑫᐐᓐ ᑭᐴᔔᐃᑯᐙ᙮ ᒫᕒᒃ, ᐹᕒᓇᐸᔅ ᐐᒋᑭᐌᓯᐗᓐ ᑲᔦ ᑭᐴᔔᐃᑯᐙ᙮ ᐋᔕ ᑭᑮᐐᑕᒫᑰᒻ ᐌᐌᓂ ᒋᐅᑖᐱᓀᒃ ᑮᔥᐱᓐ ᐅᑎᓯᓀᒃ᙮

ᒑᔓᐙ, ᒐᔅᑕᔅ ᑳᐃᔑᓂᑳᒋᑲᓂᐎᒡ ᑫᐐᓐ ᑭᐴᔔᐃᑯᐙ᙮ ᐅᑯ ᑕᔥ ᓂᓯᓐ ᑳᐐᓇᒀ, ᒦ ᓴ ᐃᑭ ᐁᑕ ᓂᓯᓐ ᐅᑴᑳᑎᓰᒃ ᑳᒎᐎᐎᐙᒡ ᑳᐐᑕᓄᑮᒪᒀ ᐅᐅ ᑳᐊᓄᑮᑕᒧᐗᒃ ᑭᔐᒪᓂᑑ ᐅᑑᑭᒫᐎᐎᓐ᙮ ᐋᐱᒋ ᑲᔦ ᓃᐱᐗᐞ ᓂᑎᔑᐐᒋᐃᑰᒃ ᒋᒪᔥᑲᐎᑌᐁᔮᓐ᙮

ᐁᐸᐸᕒᐊᔅ ᐃᑕᔥ ᑫᐐᓐ ᑭᐴᔔᐃᑯᐙ, ᐋᓃᔥ ᑫᐐᓐ ᒦ ᐌᑎ ᑳᐃᔑᒫᐗᒋᐃᑎᔦᒃ ᐌᒋᑎᐯᑖᑯᓯᒡ, X ᒋᓴᓲᓐ ᐃᑕᔥ ᑲᔦ ᐁᐊᓄᑮᑕᐙᒡ᙮ ᒨᔕᒃ ᐃᑕᔥ ᑫᐐᓐ ᐅᒋᑲᒀᑕᑲᓄᑮᐃᑎᓱ ᐁᐊᓇᒥᐁᑕᒪᐎᓀᒃ ᒋᒪᔥᑲᐎᑳᐸᐎᔦᒃ, ᒋᑮᔖᐯᐎᐌᒃ, ᑫᒋᓈᒡ ᒋᑫᒋᓈᐅᐌᒃ ᑳᐃᔑᑌᐺᑕᒧᐌᒃ, ᐐᑫ ᐱᑯ ᒋᓇᐃᑕᒧᐌᒃ ᑭᔐᒪᓂᑑ ᑳᐃᔑᒥᓴᐌᑕᕽ᙮

ᑫᓃᓐ ᐃᑕᔥ ᐃᑯ ᓂᐐᑕᒧᐙᓐ ᐋᐱᒋ ᐁᑭᒋᐊᓄᑮᒡ ᑮᓇᐙ ᐅᒋ, ᐃᐃ ᑲᔦ ᐌᑎ ᓬᐁᔮᑎᓰᔮᑳᕽ ᐌᑎ ᑲᔦ ᐋᔭᕒᐋᐸᓬᐃᓯᑳᕽ ᑳᐊᔮᓂᒡ᙮

ᓬᐅᒃ ᑲᔦ ᑳᓵᑭᒋᑲᓂᐎᒡ ᒪᔥᑭᑮᐎᓂᓂ ᑭᐴᔔᐃᑯᐙ᙮ ᑏᒪᔅ ᑫᐐᓐ ᑭᐴᔔᐃᑯᐙ᙮

ᐴᔔ ᑲᔦ ᓂᑎᓈᓈᓂᒃ ᓃᑕᓇᒥᐋᓈᓂᒃ ᐌᑎ ᓬᐁᔮᑎᓰᔮᑳᕽ ᑳᐊᔮᐙᒡ, ᐊᐊ ᑲᔦ ᓂᐴᔔᐋᓈᓐ ᓂᐸ, ᐅᑖᐎᓂᕽ ᑳᐃᔑᐲᑎᑫᓈᓂᐗᓂᓂᒃ᙮

ᐊᐲ ᑕᔥ ᑮᐃᔥᒀᐊᓇᒥᒋᑳᑌᒃ ᐅᐅ ᐅᔑᐲᐃᑲᓐ ᐌᑎ ᑳᐃᔑᐊᔮᔦᒃ, ᑫᒋᓈᒡ ᑲᔦ ᐌᑎ ᑳᐃᔑᐲᑎᑫᐙᒡ ᐃᑭ ᓬᐁᔮᑎᓰᔮᐎᓂᓂᐗᒃ ᑕᐊᓇᒥᒋᑳᑌ᙮ ᑫᑮᓇᐙ ᑕᔥ ᑭᑲᐊᓇᒥᑑᒻ ᐃᐃ ᐅᔑᐲᐃᑲᓐ ᓬᐁᔮᑎᓰᔮᐎᓂᓂᐗᒃ ᑳᑮᐅᔑᐲᐊᒪᐗᒀ᙮

ᐅᐅ ᑕᔥ ᐃᓂᒃ ᐊᐊ ᐃᓂᓂ ᐋᕒᑭᐸᔅ : ᑫᒋᓈᒡ ᐃᑯ ᑮᔑᑑᓐ ᐃᐃ ᐊᓄᑮᐎᓐ ᑳᑮᒦᓂᑰᔭᓐ ᑳᑎᐯᒋᑫᒡ ᐁᐊᓄᑮᑕᐗᒡ᙮

ᓃᓐ ᐃᑕᔥ ᐃᑯ ᓂᓂᓐᒡ ᓂᑖᐸᒋᑑᓐ ᐅᓄ ᐃᔥᒀᒡ ᐃᑭᑐᐎᓀᓴᓐ ᑳᐅᔑᐲᐊᒪᐎᓇᑰᒃ, ᓃᓐ ᑆᓬ ᐁᐴᔔᐃᓇᑰᒃ᙮ ᑫᑯ ᐗᓃᑫᑫᒃ ᐁᑭᐸᐅᑰᔮᓐ᙮ ᑕᑲ ᑭᔐᒪᓂᑑ ᐅᑭᔐᐙᑎᓯᐎᓐ ᑭᑲᐐᒌᐎᑯᒻ᙮