ᓃᓐ ᑆᓬ X ᒋᓴᔅ ᐅᑕᓄᑮᐋᑲᓇᓐ᙮ ᑭᔐᒪᓂᑑ ᓂᑮᐅᓈᐸᒥᒃ ᐁᑮᐃᓇᓅᔑᒡ ᒋᐅᑎᔑᓂᔕᐙᑲᓂᒥᒡ ᒋᐐᑕᒫᑫᐗᒃ ᐅᒥᓍᒋᒧᐎᓐ᙮

ᐐᓐ ᑭᒋᒣᐎᔕ ᑭᔐᒪᓂᑑ ᑮᐃᓇᔓᑕᒫᑫ ᐅᐅ ᒥᓍᒋᒧᐎᓐ ᒋᐊᔮᒪᑲᓂᓂᒃ, ᐁᑮᐃᓇᓅᓈᒡ ᐅᑎᐹᒋᒧᐎᓂᓃᒪᐞ ᐃᐃᒫ ᒋᐃᔑᐅᔑᐲᐊᒥᓂᒡ ᑳᑭᑌᑖᑾᓂᓂᒃ ᑫᑌᒪᓯᓇᐃᑲᓂᕽ᙮

ᒦ ᐃᒫ ᒥᓍᒋᒧᐎᓂᕽ ᐁᔑᑕᔑᒥᒥᓐᒡ ᑭᔐᒪᓂᑑ ᐅᑯᓯᓴᓐ ᒋᓴᔅ Xᑕᓐ ᑳᑎᐯᓂᒥᒥᓇᕽ᙮ ᒦᑕᔥ ᐁᓈᒋᒥᓐᒡ X ᐅᐐᔭᐤ ᑌᐱᑎᕽ ᐁᑮᐅᑕᑳᓀᓰᒪᑲᓂᓂᒃ᙮

ᐊᒑᑯᒫᕽ ᑕᔥ ᐐᓐ ᐃᓇᑫ ᐃᓇᑭᒫ ᑭᔐᒪᓂᑑᕽ ᐁᐅᑕᑳᓀᓯᒡ᙮ ᐅᑭᒋᒪᔥᑲᐎᓰᐎᓂᓃᕽ ᐄᑐᒃ ᑮᐅᒋᑭᑫᒋᑲᓂᐎ ᐁᐅᑯᓯᓯᒥᑯᒡ ᑭᔐᒪᓂᑑᓐ, ᐋᓃᔥ ᐅᑮᑮᐌᐱᒫᑎᓯᐃᑰᓐ ᐊᐲ ᑮᓂᐳᒡ᙮

ᐐᓐ ᒋᓴᔅ X ᐁᑮᐃᔑᒋᑫᒡ, ᑭᔐᒪᓂᑑ ᓂᑮᒦᓂᒃ ᐃᔑᓂᔕᐙᑲᓂᕽ ᒋᐃᓇᓄᑮᐗᒃ, ᐊᐌ X ᒋᐃᓇᓄᑲᐗᒃ, ᑲᑭᓇ ᑳᐱᒫᑎᓯᐙᒡ ᑳᑕᓶᐙᓇᑭᓯᐙᒡ ᒋᐅᒋᑌᐺᑕᒧᐙᒡ ᑲᔦ ᒋᑑᑕᒧᐙᒡ ᐅᑎᑭᑐᐎᓂᓂ᙮

ᑲᔦ ᑮᓇᐙ ᐃᒫ ᑭᑕᑾᑭᓱᒻ ᑭᔐᒪᓂᑑ ᑳᑮᐊᑐᒥᓀᒃ, ᒋᓴᔅ Xᐃᕽ ᒋᐅᒋᑎᐯᑖᑯᓯᔦᒃ᙮

ᒦ ᓴ ᐅᐌ ᑭᑑᔑᐲᐊᒪᐎᓂᓂᒻ ᑮᓇᐙ ᑲᑭᓇ ᐃᐃᒫ ᐅᕒᐆᒥᕽ ᑳᐊᔮᔦᒃ, ᑭᔐᒪᓂᑑ ᑳᓵᑭᐃᓀᒃ, ᑳᑮᐊᑐᒥᓀᒃ ᐅᐱᒫᑎᓰᒪᐞ ᒋᐃᓇᑭᒥᑰᐎᓯᔦᒃ᙮ ᒫᓄ ᐅᑭᔐᐙᑎᓯᐎᓂᕽ ᑲᔦ ᐅᐱᓵᓀᑕᒧᐃᐌᐎᓐ ᑭᑲᒦᓂᑯᐙ ᑭᔐᒪᓂᑑ ᑭᑌᑌᓈᓐ, ᐊᐊ ᑲᔦ ᑳᑎᐯᓂᒥᓇᕽ ᒋᓴᔅ X᙮

ᓂᑕᒻ ᐃᑯ ᓂᒦᑴᒋᐎᐋ ᑭᔐᒪᓂᑑ, ᐐᓐ ᒋᓴᔅ X ᑳᑮᐅᒋ ᐃᔑᓭᓂᒃ, ᑲᑭᓇ ᑮᓇᐙ ᐁᒦᑴᒋᐌᑕᒪᐎᓂᓇᑰᒃ, ᒥᓯᐌ ᐊᑮᕽ ᐁᐊᓂᐅᒋᓅᑖᑳᓂᐗᕽ ᐃᐃᐌ ᐁᔑᑌᐺᑕᒣᒃ᙮

ᑭᔐᒪᓂᑑ ᓂᑖᑎᐹᒋᒥᒃ ᐁᑌᐺᐗᒃ᙮ ᒦ ᐊᐊᐌ ᐁᓂᑯᑯᑌᐁᔮᓐ ᑳᔑᐊᓄᑲᐗᒃ ᐁᐐᑕᒫᑫᔮᓐ ᐁᔑᒥᓍᒋᒥᒥᓐᒡ ᐅᑯᓯᓴᓐ᙮ ᑭᔐᒪᓂᑑ ᓂᑭᑫᓂᒥᒃ ᒨᔕᒃ ᐁᒫᒥᑴᓂᒥᓇᑰᒃ

ᑕᓯᕽ ᐁᐊᓇᒥᐋᔮᓐ᙮ ᓂᑎᔑᑲᑴᒋᒫ ᐐᓂᑯ ᒋᐃᓀᑕᒧᑴᓐ ᑫᑲᐲ ᒋᐃᔑᓭᓂᒃ ᒋᐊᓂᒪᐗᑎᓯᓇᑰᒃ᙮

ᐋᐱᒋ ᑯ ᑭᐐᓅᑌᐙᐸᒥᓂᓂᒻ᙮ ᑭᐐᐃᔑᐐᒋᐃᓂᓂᒻ ᐌᑯᓀᓐ ᓴ ᑯ ᔕᐌᓂᒥᑰᐎᓐ ᑭᔐᒪᓂᑑ ᐅᑕᒑᑾᓐ ᑫᔑᒦᓂᓀᒃ, ᒦᔥ ᐃᐃ ᑮᓇᐙ ᒋᐅᒋᓲᑭᑳᐸᐎᔦᒃ᙮

ᒦ ᐅᐌ ᑳᐃᑭᑐᔮᓐ, ᐯᔑᑾᓐ ᐃᑯ ᐃᒫ ᑭᑲᐅᒋᐐᒋᐃᑰᒥᓐ᙮ ᑮᓇᐙ ᐃᒫ ᓃᓐ ᐁᔑᑌᐺᔦᑕᒫᓐ ᒋᐅᒋᓲᑭᑌᐁᔥᑳᑰᔦᒃ ᑲᔦ ᓃᓐ ᐃᐃᒫ ᑮᓇᐙ ᑳᔑᑌᐺᔦᑕᒣᒃ ᓂᑲᐅᒋᓲᑭᑌᐁᔥᑳᑰ᙮

ᓃᒋᐅᑌᐺᑕᒨᒃ! ᑭᓇᑕᐌᓂᒥᓂᓂᒻ ᒋᑭᑫᑕᒣᒃ ᐅᐅ: ᐹᑏᓍ ᓂᑖᓇᑮᐃᓀᑕᒻ ᐁᐐᒪᐗᑎᓯᓇᑰᒃ᙮ ᒨᔕᒃ ᐃᑕᔥ ᑫᑰᓐ ᓂᑮᐗᓈᐃᑯᓐ᙮ ᓂᓇᑕᐌᑖᓐ ᑲᔦ ᑮᓇᐙ ᒋᐃᔑᑲᔥᑭᑑᔮᓐ ᒥᓄᐊᓄᑮᐎᓐ ᑳᔑᐊᔮᔦᒃ, ᑖᐱᔥᑰ ᑳᐱ ᐃᔑᑲᔥᑭᑑᔮᓐ ᐸᑳᓐ ᐊᔮᐎᓂᕽ ᑯᑕᒃ ᑳᒎᐎᐎᓯᒀ ᐁᑕᔑᐱᒫᑎᓯᐙᒡ᙮

ᓂᓇᑕᐌᑖᑯᔅ ᑲᑭᓇ ᒋᑲᑴᐐᒋᐊᒀ ᑳᑕᓶᐙᓇᑭᑎᓄᐎᐙᒡ᙮ ᐃᓀᑖᑾᓐ ᐁᒪᓯᓇᐊᒪᐗᒀ ᒋᐐᒋᐊᒀ, ᐃᑭᐌᓂᐗᒃ ᑳᐆᑌᓈᐙᑎᓯᐙᒡ ᑲᔦ ᑳᐱᑾᑖᑎᓯᐙᒡ, ᐃᑭᐌᓂᐗᒃ ᐃᑕᔥ ᑲᔦ ᑳᑭᑭᓄᐊᒪᐎᑣ ᑲᔦ ᑳᑭᑭᓄᐊᒪᐙᓯᐎᑣ᙮

ᒦ ᓴ ᐅᐌ ᐁᔑᐊᑕᐌᑕᒫᓐ, ᑲᔦ ᑮᓇᐙ ᐅᕒᐆᒥᕽ ᑳᔑᐊᔮᔦᒃ ᒋᑕᔑᐐᑕᒪᐎᓂᓇᑰᒃ ᐃᐃ ᒥᓍᒋᒧᐎᓐ᙮

ᒥᓯᐌ ᓂᑎᔑᐊᐯᓂᒧᓄᑖᓐ ᐅᐅ ᒥᓍᒋᒧᐎᓐ᙮ ᒦ ᐃᐌ ᐁᐋᐗᓂᓂᒃ ᑭᔐᒪᓂᑑ ᐅᒪᔥᑲᐎᓰᐎᓐ, ᐌᒋᐱᒫᒋᐃᑣ ᑲᑭᓇ ᐊᐎᔭᒃ ᑳᑌᐺᑕᒧᐙᒡ, ᐃᑭ ᒎᐗᒃ ᓂᑕᒻ ᐁᑮᐅᑎᓯᑯᐙᒡ, ᒦᔥ ᐃᑭ ᑲᔦ ᑲᑭᓇ ᐊᐎᔭᓐ ᐸᑳᓐ ᑳᑎᓄᐎᐙᒡ᙮

ᒦ ᐃᒫ ᒥᓍᒋᒧᐎᓂᕽ ᐅᒋᑭᑫᑖᑾᓐ ᐋᓃᓐ ᑭᔐᒪᓂᑑ ᑫᐃᔑᐋᒡ ᐊᐎᔭᓐ ᑾᔭᒃ ᒋᐐᒌᐎᑯᒡ᙮ ᐅᐅᐌᓂ ᑳᑑᑕᐙᒡ ᑭᔐᒪᓂᑑ, ᒦ ᐁᑕ ᐃᒫ ᐅᒌᒪᑲᓂᓂ ᐁᑌᐺᑖᑯᒡ᙮ ᒦ ᐃᒫ ᑌᐺᑕᒧᐎᓂᕽ ᐁᔑᒫᒋᓯᕽ ᑲᔦ ᐃᒫ ᑌᐺᑕᒧᐎᓂᕽ ᐁᑕᔑᑮᔑᓯᕽ᙮ ᒦ ᐃᐌ ᑳᐃᔑᓯᕽ ᐃᐃᐌ ᐅᔑᐲᐃᑫᐎᓐ: ᐊᐌᓀᓐ ᓴ ᑯ ᐅᑌᐺᑕᒧᐎᓂᕽ ᐌᒋᑾᔭᑾᑭᒥᑯᒡ ᑭᔐᒪᓂᑑᓐ ᒋᒥᓄᐐᒌᐙᒡ, ᒦ ᐊᐌ ᑌᐺ ᑫᐱᒫᑎᓯᒡ᙮

ᑭᔐᒪᓂᑑ ᑭᒋᑮᔑᑯᕽ ᑮᐅᒋᑭᑫᑕᒨᔑᐌ ᐅᓂᔥᑫᑕᒧᐎᓂᕽ ᑳᐐᐅᒋᑎᐸᐊᒪᐙᒡ ᐅᐅ ᐯᒫᑎᓯᓂᒡ ᑳᒪᒋ ᐃᓀᑕᒥᓂᒡ ᑲᔦ ᑳᒪᒋᒋᑫᓂᒡ᙮ ᐐᓇᐙ ᐅᒪᒋᒋᑫᐎᓂᐙᕽ ᐅᑮᐅᒋᑭᐸᐋᓈᐙ ᐃᐃ ᑌᐺᐎᓐ ᒋᑭᑫᒋᑳᑌᓯᓂᓂᒃ᙮

ᒦᑕᔥ ᐅᐅᐌᓂ ᑫᐅᒋᑎᐸᐊᒪᐙᒡ ᑭᔐᒪᓂᑑ ᐅᓄᐌᓂᐗᐞ, ᐋᓃᔥ ᐅᑮᑳᔮᐸᑕᒥᓂ ᑫᔑᑭᑫᓂᒥᑎᐸᓐ, ᐐᓐ ᐋᓃᔥ ᐅᑮᑮᑳᔮᐸᑕᐋᐞ᙮

ᐊᐸᓀ ᑯ ᑳᑮᐊᑯ ᐅᔑᑑᒡ ᐊᑭ ᑮᒧᔐᓈᑾᓂᓂᐗᓐ ᐅᑎᔑᐊᔮᐎᓇᓐ ᑎᓄ ᑳᓈᑾᓯᓂᓂᑭᓐ, ᒦ ᐃᐌᓂ ᐅᒪᔥᑲᐎᓰᐎᓐ ᑫᓂᓀᐱᒋᐊᔮᓂᒃ ᑲᔦ ᐅᑭᔐᒪᓂᑑᐙᑎᓯᐎᓐ᙮ ᐅᑯ ᐯᒫᑎᓯᐙᒡ ᐅᑎᔑᓂᓯᑕᐎᓇᒪᐙᐙᓐ ᐁᐙᐸᑕᒪᐙᐙᒡ ᑭᔐᒪᓂᑑᓐ ᐅᑑᔑᒋᑲᓂᓂ᙮ ᒦᔥ ᐃᐃ ᒋᑸᓇᐎ ᐃᑭᑐᐙᒡ ᐋᓃᓐ ᑳᐃᔑᒋᑫᐙᒡ᙮

ᐋᓇᐐᓐ ᐁᑭᑫᓂᒫᐙᒡ ᑭᔐᒪᓂᑑᓐ, ᑳᐐᓐ ᐅᑮᐃᓇᑭᒫᓯᐙᐙᓐ ᐁᑭᔐᒪᓂᑑᐎᓂᒡ᙮ ᑳᐐᓐ ᑲᔦ ᐅᒦᑴᒋᐌᓂᒫᓯᐙᐙᓐ᙮ ᒣᔥᑾᒡ ᐃᑕᔥ ᐐᑫ ᑲᑮᐹᑎᓰᒪᑲᓂᓂᐗᓐ ᐅᓈᑲᑕᐌᒋᑲᓂᐙᓐ, ᐐᑫ ᑮᑲᔥᑮᑎᐱᑫᑖᑾᓂᓂᐗᓐ ᑳᐱᔑᔑᒀᓂᑭᓐ ᐅᓈᑲᑕᐌᑕᒧᐎᓂᐙᓐ᙮

ᓂᑲᑮᑖᐌᑖᒥᓐ ᐋᓇ ᐃᓀᓂᑎᓱᐙᒡ, ᑲᑮᐹᑎᓯᐗᒃ ᐃᑕᔥ᙮

ᐃᐃᒫ ᑫᑮᑭᑕᑭᒫᐙᐸᓐ ᑭᔐᒪᓂᑑᓐ ᐅᑮᒣᔥᑯᑕᑭᒫᐙᐞ ᐅᔑᒋᑲᓇᐞ ᑳᐃᔑᓈᑯᓯᓂᒡ ᑖᐱᔥᑰ ᐃᓂᓂ ᑎᓄ ᑫᓂᐳᒡ, ᐱᓀᔒᔑᕽ ᑲᔦ ᑳᐃᔑᓈᑯᓯᓂᒡ, ᐊᔭᐋᐎᔑᕽ ᑲᔦ ᑳᐱᒧᓭᓂᒡ, ᑲᐸᐹᒨᑌᓂᒡ ᑲᔦ ᑳᐃᔑᓈᑯᓯᓂᒡ᙮

ᐃᐃᐌ ᐁᐃᓈᑎᓯᐙᒡ, ᐅᑮᐅᒋᐸᑭᒌᑲᑖᑯᐙᓐ ᑭᔐᒪᓂᑑᓐ, ᒫᓄ ᐐᓇᐙ ᐙᐃᔑᒋᑫᐙᒡ ᐐᓈᑎᓯᐎᓐ ᐁᐃᔑᒥᓴᐌᑕᒧᐙᒡ᙮ ᒦ ᐃᐌ ᐲᓂᔥ ᓇᐹᒡ ᑫᑰᓐ ᐁᑑᑖᑎᐙᒡ ᒦ ᐃᐌ ᐁᐊᑲᒋᐌᑖᑾᓂᓂᒃ᙮

ᑳᑌᐺᐎᓂᐗᓂᓂᒃ ᐃᑕᔥ ᐁᓈᒋᒥᓐᒡ ᑭᔐᒪᓂᑑ ᐅᑮᒣᔥᑯᑑᓈᓈᐙ ᓇᐗᒡ ᐃᐃᐌᓂ ᐁᑮᐅᑖᐱᓇᒧᐙᒡ ᐃᐃ ᑳᑌᐺᐎᓂᐗᓯᓂᓂᒃ᙮ ᑕᑾᒡ ᐅᑑᔑᒋᑲᓂᓂ ᑭᔐᒪᓂᑑᓐ ᐅᑲᑲᓅᑖᓈᐙᓐ ᐁᑭᑕᑭᑕᒧᐙᒡ᙮ ᑳᐐᓐ ᐐᓐ ᑭᔐᒪᓂᑑᓐ ᐅᑕᓇᒥᐁᑕᐙᓯᐙᐙᓐ ᑳᑮᐅᔑᑑᓂᒡ ᑲᑭᓇ ᑫᑰᓐ᙮ ᐐᓐ ᐊᐊᐌ ᒨᔕᒃ ᐊᐸᓀ ᑫᑭᑕᑭᒥᓐᒡ, ᒦ ᓴ ᐅᐌ ᐁᑌᐺᒪᑲᒃ᙮

ᐅᐅᐌ ᑕᔥ ᑳᐃᔑᒋᑫᐙᒡ ᐯᒫᑎᓯᐙᒡ, ᐅᑮᐅᒋᐸᑭᒌᑲᑖᑯᐙᓐ ᑭᔐᒪᓂᑑᓐ, ᐃᐃᐌᓂ ᑳᐊᑲᒋᐌᑖᑾᓂᓂᒃ ᐁᑑᑕᒧᐙᒡ ᐁᓇᐹᒋᒥᓴᐌᓂᑎᐙᒡ᙮ ᐊᐴᔥᑫ ᐃᑭ ᐃᑴᐗᒃ ᐅᑮᓇᐹᒋᓯᑑᓈᐙ ᐅᑎᑴᐎᐎᓂᐙ, ᐊᓅᒡ ᐁᐐᐃᔑᒋᑫᐃᑎᐙᒡ᙮

ᔑᑾ ᐯᔑᑾᓐ ᑫᐐᓇᐙ ᐃᔑᒋᑫᐗᒃ ᐃᑭ ᐃᓂᓂᐗᒃ᙮ ᐅᐴᓂᑑᓈᐙ ᑾᔭᒃ ᑫᔑᐐᒌᐎᒥᓐᒡ ᐃᑴᐗᐞ, ᒣᔥᑾᒡ ᐁᒪᒋᒥᓴᐌᓂᒫᐙᒡ ᐐᒋ ᐃᓂᓃᒥᐙᐞ, ᐃᐃᐌ ᑳᐊᑲᒋᐌᑖᑾᓂᓂᒃ ᐁᐃᔑᒋᑫᐃᑎᐙᒡ᙮ ᒦ ᐃᒫ ᐅᒪᒋᒋᑫᐎᓂᐙᕽ ᐅᒋᑎᐸᐊᒪᐙᐗᒃ ᑳᔑᑲᔥᑭᑕᒫᓱᐙᒡ᙮

ᐃᐃᐌ ᑕᔥ ᐁᐐᐸᐹᒣᑕᓯᑾ ᑾᔭᒃ ᐁᔑᑭᑫᓂᒥᒥᓐᒡ ᑭᔐᒪᓂᑑᓐ, ᐅᑮᐅᒋᐸᑭᒌᑲᑖᑯᐙᓐ ᐁᑳ ᒋᑾᔭᑯ ᓈᓈᑲᑕᐌᑕᓯᒀ, ᒦ ᐃ ᐁᔑᑑᑕᒧᐙᒡ ᐃᓂ ᑾᔭᒃ ᑳᐃᓀᑖᑾᓯᓂᓂᑭᓐ᙮

ᐅᒨᔥᑭᓀᔥᑳᑯᓈᐙᓐ ᑲᑭᓇ ᑳᑾᔭᑯᓈᑾᓯᓂᓂᑭᓐ – ᒪᒋ ᐃᔑᐌᐱᓯᐎᓐ, ᒥᓴᐎᓇᒫᑫᐎᓐ, ᒪᒋᒋᑫᐃᑎᐎᓐ᙮ ᒨᔕᒃ ᐋᔮᔐᓂᑎᐗᒃ, ᓂᓯᑎᐗᒃ, ᐋᔮᓅᑎᐗᒃ, ᑲᑴᒌᔑᐃᑎᐗᒃ᙮ ᒨᔕᒃ ᐃᑯ ᒪᒋᓈᑫᐗᒃ, ᐸᐹᑎᑕᒀᒋᒧᐗᒃ,

ᒪᒋᑕᔑᑎᐗᒃ᙮ ᐅᔒᑫᓂᒫᐙᓐ ᑲᔦ ᑭᔐᒪᓂᑑᓐ᙮ ᑲᑴᓂᔥᑭᒥᐌᐗᒃ, ᑭᑌᓂᒧᐗᒃ, ᒪᒦᒀᓂᑎᓱᐗᒃ᙮ ᐅᑲᑴᒥᑴᑖᓈᐙ ᑫᔑᒪᒋᒋᑫᐙᒡ᙮ ᑳᐐᓐ ᐅᐐᓇᐃᑕᐙᓯᐙᐙᐞ ᐅᓃᑭᐃᑯᐙᐞ᙮

ᑳᐐᓐ ᐃᑯᑕᓄ ᐃᓀᑕᓰᐗᒃ ᐁᒪᒋᒋᑫᐙᒡ᙮ ᐅᐲᑯᓈᓈᐙᓐ ᐅᑕᔓᑕᒪᑫᐎᓂᐙᓐ᙮ ᑳᐐᓐ ᓂᑖ ᓵᑭᐃᐌᓰᐗᒃ᙮ ᑳᐐᓐ ᑲᔦ ᑭᑎᒫᑭᓈᑫᓰᐗᒃ᙮

ᐋᓇᐐᓐ ᐁᑭᑫᑕᒧᐙᒡ ᐅᑎᓈᑯᓂᑫᐎᓂᓂ ᑭᔐᒪᓂᑑᓐ ᐁᐃᓇᑌᓂᒃ, ᓂᐳᐎᓐ ᒋᑲᔥᑭᑕᒫᓱᐙᒡ ᐊᐎᔭᒃ ᑳᑑᑕᒧᐙᒡ, ᒫᓄ ᑕᔥ ᐅᑕᓂᑑᑖᓈᐙᓐ ᐃᓂᐌᓂᐗᓐ, ᑲᔦ ᑕᔥ ᑭᑾᔭᑯᒋᑫᒻ ᐅᑎᓈᐙᐞ ᐃᓂᐌᓂᐗᐞ ᑳᓀᑳᒥ ᐃᔑᒋᑫᓂᒡ᙮

ᑮᓐ ᐃᑕᔥ ᓃᒋᐱᒫᑎᔅ, ᑭᓈᓈᑲᒋᐋ ᓇ ᑮᒋᐱᒫᑎᔅ? ᑳᐐᓐ ᑮᓐ ᑭᑲᑮᑭᑐᑕᒫᓱᓰ ᐃᔑᒋᑫᔭᓐ, ᐊᐌᓀᓐ ᑮᓐ ᑌᓄᐎᐗᓀᓐ᙮ ᐃᐃᒫ ᐁᔑᒪᒐᑭᒪᑣ ᐯᑳᓂᓯᐙᒡ, ᐯᔑᑾᓐ ᑕᔥ ᐃᔑᒋᑫᔭᓐ ᐐᓇᐙ ᑳᑑᑕᒧᐙᒡ, ᑲᔦ ᑮᓐ ᐄᑐᒃ ᐃᐃᒫ ᒋᑕᑾᑭᑎᓱᔭᓐ᙮

ᑭᑭᑫᑖᒥᓐ ᑾᔭᒃ ᐁᐃᔑᒋᑫᒡ ᑭᔐᒪᓂᑑ ᐁᑎᐹᑯᓈᒡ ᐃᓂᐌᓂᐗᐞ ᐃᐃ ᑳᑑᑕᒥᓂᒡ᙮

ᑮᓐ ᐃᑕᔥ ᐯᔑᑾᓐ ᑭᑕᔑ ᐃᔑᒋᑫ ᑳᔑᓈᓈᑲᒋᐊᑣ ᑮᒋᐱᒫᑎᓰᒃ᙮ ᑭᑎᓀᑕᒻ ᐃᓇ ᑕᔥ ᒋᐅᔑᑕᒪᓐ ᑫᐃᓈᑯᓂᒃ ᑭᔐᒪᓂᑑ?

ᑳᐐᓐ ᒫᐐᓐ ᐋᐱᒋ ᑭᓵᐯᑕᒧᐙᓯᐙᓈᑐᒃ ᐁᐲᒋᒥᓄᑑᑖᑫᒡ ᑭᔐᒪᓂᑑ ᐁᔕᔒᐱᑎᐹᑯᓂᐌᒡ, ᑭᓉᔥ ᐁᔕᔒᐯᓂᒥᒃ᙮ ᑫᒋᓈᒡ ᑭᑖᑭᑫᓂᒫ ᐋᓃᓐ ᐌᒋ ᒥᓄᑑᑕᐎᒃ ᐁᐐᑲᑴᐃᔑᐎᓂᒃ ᑴᑳᑎᓯᐎᓂᕽ᙮

ᑮᓐ ᐃᑕᔥ ᐗᐐᑫ ᑭᔕᔒᐱᑕᒻ᙮ ᑭᑎᔑᓇᑭᓇᒫᔅ ᐊᐗᔑᒣ ᒋᑯᓯᑾᒃ ᑭᑎᐸᐊᒫᑰᐎᓐ, ᒦ ᐃᐌ ᑫᐃᔑᓭᒃ ᐊᐲ ᐃᔑᑮᔑᑲᓂᓂᒃ ᑭᔐᒪᓂᑑ ᓈᑯᑑᒡ ᐁᔑᓂᔥᑫᑕᕽ ᒪᒋ ᐃᔑᐌᐱᓯᐎᓐ ᐃᐃ ᑲᔦ ᐊᐲ ᑳᐐᐃᔑᓈᑾᓂᓂᒃ ᑾᔭᒃ ᐃᑯ ᐁᐐᐃᔑᑎᐹᑯᓂᑫᒡ᙮

ᑲᑭᓇ ᐊᐎᔭᓐ ᑕᔥ ᑾᔭᒃ ᐅᐐᐃᔑᑎᐸᐊᒪᐙᓐ ᐋᓃᓐ ᑳᐃᔑᒋᑫᓂᒡ᙮

ᐋᓂᑕ ᔕᔒᐯᑕᒨᒃ ᐁᑲᑴᒥᓄᒋᑫᐙᒡ᙮ ᒦᐗᓐ ᐃᑕᔥ ᐅᓄ ᐁᑐᓀᐊᒧᐙᒡ ᒥᓋᑭᓱᐎᓐ, ᒋᑲᑴᒥᓍᒋᒥᑯᐙᒡ ᑭᔐᒪᓂᑑᓐ, ᑲᔦ ᑫᓂᔑᐗᓈᑕᓯᓂᓂᒃ ᐱᒫᑎᓯᐎᓐ ᒋᒦᓂᑯᐙᒡ᙮ ᐐᓇᐙ ᑯ ᑕᒦᓂᑰᐎᓯᐗᒃ ᐱᒫᑎᓯᐎᓐ ᐐᑳ ᑫᐴᓂᓭᓯᓂᓂᒃ᙮

ᐃᑭᐌᓂᐗᒃ ᐃᑕᔥ ᐯᑳᓂᓯᐙᒡ ᐐᓇᐙ ᑯ ᐁᑕ ᐐᑲᑴᒥᓄᑑᑖᓱᐗᒃ, ᐁᐅᑖᐱᓇᓯᒀ ᑳᑾᔭᑾᓂᓂᒃ, ᓇᐗᒡ ᐃᐃᐌ ᐁᐐᓅᒋᑑᐙᒡ ᑳᑾᔭᑯᓈᑾᓯᓂᓂᒃ᙮ ᒦᐗᑭᑭ ᑫᑭᒋᑎᐸᐊᒫᑯᐙᒡ ᑭᔐᒪᓂᑑᓐ ᐅᓂᔥᑫᑕᒧᐎᓂᓃᕽ᙮

ᑲᒀᑕᑭᐃᑰᐎᓐ, ᐐᓴᑫᑕᒧᐎᓐ ᑕᒦᓈᐗᒃ ᐊᐎᔭᒃ ᑳᓂᑖᒪᒋᑑᑕᒧᐙᒡ᙮ ᐃᑭ ᒎᐗᒃ ᓃᑳᓀᓂᒫᐗᒃ ᒋᑎᐹᑯᓂᑣ, ᐃᑭᐌᓂᐗᒃ ᐃᑕᔥ ᑲᔦ ᑳᒎᐎᐎᓯᒀ ᒦ ᐯᔑᑾᓐ ᑫᑑᑕᐎᑣ᙮

ᐃᑭᐌᓂᐗᒃ ᐃᑕᔥ ᑳᒥᓄᒋᑫᐙᒡ ᒥᓍᒋᒥᑰᐎᓐ, ᒥᓋᑭᓱᐎᓐ, ᐱᓵᓂᓯᐎᓐ ᐅᑲᒦᓂᑯᐙᓐ ᑭᔐᒪᓂᑑᓐ᙮ ᐃᑭ ᑕᔥ ᒎᐗᒃ ᓃᑳᓐ ᑕᒦᓈᐗᒃ, ᐃᑭᐌᓂᐗᒃ ᐃᑕᔥ ᑲᔦ ᑳᒎᐎᐎᓯᒀ ᑕᒦᓈᐗᒃ᙮

ᐋᓃᔥ ᒥᒋᐯᔑᑾᓂᓂ ᐃᐃ ᑳᐅᒋᑎᐹᑯᓈᒡ ᑭᔐᒪᓂᑑ ᑲᑭᓇ ᐊᐎᔭᓐ᙮

ᐃᑭ ᑳᒎᐎᐎᓯᒀ ᑳᐐᓐ ᐅᑕᔮᓰᓈᐙ ᐃᐃᐌ ᐃᓈᑯᓂᑫᐎᓐ ᒨᓯᓯᑳᕽ ᑳᑮᐅᒌᒪᑲᓂᓂᒃ᙮ ᐃᐃᒫ ᑕᔥ ᐁᑮᒪᒋᒋᑫᐙᒡ ᑕᐅᒋᓂᔑᐗᓈᑎᓯᐗᒃ ᐋᓇᐐᓐ ᐁᑮᐊᔮᓯᒀ ᐃᓈᑯᓂᑫᐎᓐ᙮ ᐃᑭᐌᓂᐗᒃ ᐃᑕᔥ ᒎᐗᒃ ᑳᐊᔮᐙᒡ ᐃᐃ ᐃᓈᑯᓂᑫᐎᓐ, ᐊᐲ ᐁᒪᒋᒋᑫᐙᒡ, ᐃᐃᒫ ᐃᓈᑯᓂᑫᐎᓂᕽ ᐅᑲᐃᔑ ᐊᐱ ᑎᐹᑯᓂᑯᐙᓐ ᑭᔐᒪᓂᑑᓐ᙮

ᑳᐐᓐ ᐋᓃᔥ ᐃᐃᒫ ᐁᒥᒋᓅᑕᒧᐙᒡ ᐃᓈᑯᓂᑫᐎᓐ ᑳᐃᓇᑌᓂᒃ ᐅᑑᒋ ᐃᓇᑭᒥᑯᓰᐙᓐ ᐁᒥᓄᐐᒌᐙᐙᒡ ᑭᔐᒪᓂᑑᓐ, ᐃᐃᒫ ᐁᑕ ᐁᑑᑕᒧᐙᒡ ᐃᐃ ᑳᐃᓇᑌᓂᒃ ᐅᑎᓈᑯᓂᑫᐎᓂᓂ᙮

ᐃᑭ ᑳᒎᐎᐎᓯᒀ ᑳᐐᓐ ᑮᐅᒋᒦᓈᓰᐗᒃ ᐃᐃ ᒨᓯᔅ ᐅᑎᓈᑯᓂᑫᐎᓐ᙮ ᐐᓇᐙ ᓴ ᑯ ᐊᐲ ᑯ ᐃᔑᐅᓀᑕᒫᓱᐙᒡ ᐁᐐᐃᔑᒋᑫᐙᒡ ᐃᐃ ᑳᐃᓇᑌᓂᒃ ᐃᓈᑯᓂᑫᐎᓐ, ᒦ ᐃᐌ ᐁᔑᓈᑯᓯᐙᒡ ᐐᓇᐙ ᐱᑯ ᐁᑮᐅᔑᑕᒫᓱᐙᒡ ᐃᓈᑯᓂᑫᐎᓐ, ᐋᓇᐐᓐ ᐁᑮᐅᒋᒦᓈᓯᐎᑣ ᐃᐃᐌᓂ ᐃᓈᑯᓂᑫᐎᓐ ᒨᓯᓯᑳᕽ ᑳᑮᐅᒌᒪᑲᓂᓂᒃ᙮

ᐅᑎᔑᒋᑫᐎᓂᐙᕽ ᓴ ᐃᔑᓈᑾᓂᓂ ᐅᑌᐃᐙᕽ ᐁᑕᔑᐊᔮᒪᑲᓂᓂᒃ ᐃᐃᐌᓂ ᑳᐃᓇᑌᓂᒃ ᐃᓈᑯᓂᑫᐎᓐ, ᑲᔦ ᐃᒫ ᐅᓈᓈᑲᑕᐌᓂᑎᓱᐎᓂᐙᕽ ᐅᒋᑭᑫᑖᑾᓂᓂ ᐅᐅᐌ ᐁᐃᔑᓭᒃ᙮ ᐃᑯᑎᕽ ᐋᓃᔥ ᑭᒫᔑᒋᑫ ᐅᑎᑯᓈᐙ ᐅᑎᓀᑕᒧᐎᓂᐙ, ᐃᑯᑎᕽ ᑲᔦ ᑭᒥᓄᒋᑫ ᐁᐃᓇᒪᒋᐅᔥᑳᑯᐙᒡ᙮

ᒦ ᐃᐌ ᑫᐃᔑᓭᒃ ᐊᐲ ᐃᐌ ᑮᔑᑲᒃ ᑎᐹᑯᓂᑫᒡ ᑭᔐᒪᓂᑑ᙮ ᒋᓴᔅ Xᑕᓐ ᐅᑲᐋᐸᒋᐋᓐ, ᐊᐲ ᐁᑎᐹᑯᓈᒡ ᐃᓂ ᐯᒫᑎᓯᓂᒡ ᑳᔑᑮᒨᒋ ᐃᓀᑕᒥᓂᒡ ᑲᑭᓇ᙮ ᒦ ᐅᐌ ᐁᓇᑌᒃ ᐃᐃᐌ ᒥᓍᒋᒧᐎᓐ ᑳᐐᑕᒫᑫᔮᓐ᙮

ᑮᓐ ᐃᑕᔥ, ᓃᓐ ᒎ ᓂᑎᓄᐤ ᐁᐃᑭᑐᔭᓐ, ᑭᑕᐯᓂᒧᓄᑖᓐ ᐃᐃᐌ ᒨᓯᔅ ᐅᑎᓈᑯᓂᑫᐎᓐ᙮ ᑲᔦ ᑭᑎᔑᒪᒦᒀᓂᑎᔅ, ᓃᓐ ᐯᔑᒃ ᐃᑭᐌᓂᐗᒃ ᐊᐗᔑᒣ ᑳᓵᑭᐃᑯᐙᒡ ᑭᔐᒪᓂᑑᓐ ᐁᐃᑭᑐᔭᓐ᙮

ᑭᑭᑫᓂᒫ ᑲᔦ ᑳᔑᐊᑕᐌᓂᒥᒃ ᑭᔐᒪᓂᑑ, ᑲᔦ ᑭᑮᐱ ᐃᔑᑭᑭᓄᐊᒫᑯᓐ ᐃᐃᐌ ᐃᓈᑯᓂᑫᐎᓐ ᐌᑯᓀᓐ ᐌᓂᔑᔑᕽ ᒋᐅᑖᐱᓂᑳᑌᒃ᙮

ᑲᔦ ᑭᑌᐃᓀᓂᑎᔅ ᑮᓐ ᒋᑭᑭᓄᐎᓇᑣ ᐃᑭᐌᓂᐗᒃ ᑳᐙᐱᓯᒀ, ᒋᐙᓭᔥᑲᒪᐗᑣ ᐃᑭᐌᓂᐗᒃ ᑲᔥᑮᑎᐱᑲᓄᕽ ᑳᐊᔮᐙᒡ᙮

ᑭᑌᐃᓀᓂᒻ ᐁᑲᔥᑭᑑᔭᓐ ᒋᑾᔭᑯᓇᑣ ᑳᑲᑮᐹᑎᓯᐙᒡ, ᑲᔦ ᐃᑭ ᒪᔑ ᑳᑮᔖᐯᐎᓯᒀ ᒋᑭᑭᓄᐊᒪᐗᑣ᙮ ᑭᑕᔮᓐ ᐃᐃ ᐃᓈᑯᓂᑫᐎᓐ᙮ ᒦᑕᔥ ᐃᐃᒫ ᑭᑎᓀᑕᒻ ᑲᑭᓇ ᑫᑰᓐ ᐁᐌᒀᑭᑫᑕᒪᓐ ᑲᔦ ᑲᑭᓇ ᐁᑭᑭᓯᔭᓐ ᐃᐃ ᑌᐺᐎᓐ᙮

ᐋᓇᐐᓐ ᑯᑕᒃ ᐊᐎᔭᒃ ᐁᑭᑭᓄᐊᒪᐗᑣ, ᑳᐐᓐ ᐃᓇ ᑮᓐ ᐃᐃᒫ ᑭᑕᔑᑭᑭᓄᐊᒫᓱᓰ? ᑲᔦ ᐃᐃᒫ ᑯᑕᒃ ᐊᐎᔭᒃ ᑫᑮᑭᒪᑣ ᐁᑳ ᒋᑭᒨᑎᓯᒀ, ᑲᔦ ᑮᓐ ᐃᓇᔥ ᑭᑭᒨᑦ?

ᑲᔦᔥ ᑫᑯ ᑑᑕᑫᓐ ᐱᔑᒀᑎᓯᐎᓐ ᐋᓇᐃᑭᑐᔭᓐ, ᑭᑑᑕᒻ ᐃᓇᔥ ᑮᓐ? ᑭᔒᑭᓇᐙᒃ ᒪᓂᑑᑳᓇᒃ; ᑭᑕᔑᑭᒨᑦ ᐃᓇ ᑕᔥ ᑳᔑᐲᑎᑲᓂᑣ ᑳᒪᓂᑑᑫᐙᒡ?

ᑮᓐ ᑭᒪᒥᓍᒋᑎᔅ ᐁᐊᔮᔭᓐ ᑭᔐᒪᓂᑑ ᐅᑎᓈᑯᓂᑫᐎᓐ – ᑕᐅᒋᐹᐱᓄᑕᐙ ᓇ ᑕᔥ ᑭᔐᒪᓂᑑ ᑮᓐ ᐁᐲᑯᓇᒧᐗᒡ ᐃᐃ ᐃᓈᑯᓂᑫᐎᓐ?

ᒦ ᐅᐌ ᑳᐃᓇᓯᓇᐃᑳᑌᒃ ᑭᒋᒪᓯᓇᐃᑲᓂᕽ: ᐃᐃᒫ ᑮᓇᐙ ᑳᐊᔨᑎᔦᒃ ᐃᑭᐌᓂᐗᒃ ᑳᒎᐎᐎᓯᒀ ᐅᑑᒋᒪᒐᑭᑕᒪᐙᐙᓐ ᑭᔐᒪᓂᑑᓐ ᐅᐐᓱᐎᓂᓂ᙮

ᑮᔥᐱᓐ ᑑᑕᒪᓐ ᐃᓈᑯᓂᑫᐎᓐ ᑳᐃᓇᑌᒃ, ᒦ ᐃᒫ ᐁᑕ ᑫᔑᑭᑖᐸᑕᒃ ᑭᑭᑭᓇᐙᑕᔕᑫᔓᑰᐎᓐ᙮ ᑮᔥᐱᓐ ᐃᑕᔥ ᐲᑯᓇᒪᓐ ᐃᐌ ᐃᓈᑯᓂᑫᐎᓐ, ᓇᐗᒡ ᐄᓴᓐ ᑭᑭᓇᐙᑕᔕᑫᔓᑰᓯᐗᐸᓐ ᑖᑮᐅᓂᔑᔑᓐ᙮

ᐊᐊᐌᔥ ᐐᓐ ᑳᒎᐎᐎᓯᒃ, ᐋᓇᐐᓐ ᐁᑳ ᐁᑮᑭᑭᓇᐙᑕᔕᑫᔣᓯᐎᓐᒡ, ᑮᔥᐱᓐ ᐃᑕᔥ ᑑᑕᕽ ᐃᐃ ᑳᐃᓇᑌᓂᒃ ᐃᓈᑯᓂᑫᐎᓐ, ᑳᐐᓐ ᐃᓇ ᐅᑖᐃᔑᓈᑯᓰᓐ ᑭᔐᒪᓂᑑᓐ ᑖᐱᔥᑰ ᐋᔕ ᑫᐐᓐ ᐁᑭᑭᓇᐙᑕᔕᑫᔑᑲᓂᐎᒡ?

ᑮᓇᐙ ᑕᔥ ᑳᒎᐎᐎᔦᒃ, ᐋᓇᐐᓐ ᐁᐊᔮᔦᒃ ᐃᐃᐌ ᑳᐅᔑᐲᐃᑳᑌᒃ ᐃᓈᑯᓂᑫᐎᓐ, ᑲᔦ ᐋᓇᐐᓐ ᐃᐃᒫ ᑭᐐᔭᐎᐙᕽ ᐁᑮᑭᑭᓇᐙᑕᔕᑫᔓᑰᔦᒃ, ᔖᑰᒡ ᑭᑕᓂᐲᑯᓈᓈᐙ ᐃᐃᐌ ᐃᓈᑯᓂᑫᐎᓐ᙮ ᐃᑭᔥ ᐐᓐ ᑳᒎᐎᐎᓯᒀ, ᐋᓇᐐᓐ ᐐᔭᐎᐙᕽ ᐁᑳ ᐁᑭᑭᓇᐙᑕᔕᑫᔣᓯᐎᑣ, ᐐᓇᐙ ᑯ ᐅᑑᑖᓈᐙ ᑳᐃᓇᑌᓂᒃ ᐃᓈᑯᓂᑫᐎᓐ᙮ ᒦᔥ ᐃᐃᐌ ᑮᓇᐙ ᑫᐅᒋᑎᐹᑯᓂᑰᔦᒃ᙮

ᐊᐌᓀᓐ ᑕᔥ ᐊᐊ ᑌᐺ ᑳᒎᐎᐎᒡ? ᑳᐐᓐ ᒣᒬᒡ ᐊᐎᔭ ᑖᑎᓄᐎᓰ ᐗᑭᒐᔭᐄ ᐁᑕ ᑳᐃᔑᓈᑯᓯᒡ, ᐃᐃᒫ ᐐᔭᐎᕽ ᐁᑕ ᑳᑕᔑᑭᑭᓇᐙᑕᔕᑫᔓᓐᒡ᙮

ᐊᐊᐌᔥ ᐐᓐ ᐲᒋᓇᐤ ᑳᒎᐎᐎᒡ, ᒦ ᐊᐌ ᑌᐺ ᑳᑎᓄᐎᒡ, ᐅᑌᐃᕽ ᐁᑭᑭᓇᐙᒋᐃᓐᒡ ᐁᑎᐯᓂᒥᑯᒡ ᑭᔐᒪᓂᑑᓐ, ᐅᑕᒑᑯᓂ ᐁᑮᐃᔑᐊᓄᑮᓂᒡ᙮ ᑳᐐᓐ ᑕᔥ ᐐᓐ ᐊᐎᔭ ᐃᐃᐌᓂ ᑳᐅᔑᐲᐃᑳᑌᓂᒃ ᐃᓈᑯᓂᑫᐎᓐ ᐅᑎᔑᐃᑯᓰᓐ᙮ ᐅᒥᓍᐸᒥᑰᐎᓐ ᐊᐊ ᑳᑎᓄᐎᒡ ᑳᐐᓐ ᐃᓂᓃᓈᕽ ᐅᒌᒪᑲᓯᓂᓂ, ᑭᔐᒪᓂᑑᓈᕽ ᐃᓴ ᐅᒌᓂ᙮

ᑫᑰᓐ ᐃᓇ ᑕᔥ ᐊᔮᒪᑲᓐ ᒋᐃᔑᓃᑳᓀᑖᑯᓯᐙᒡ ᐃᑭ ᒎᐗᒃ, ᐅᑖᓈᕽ ᐃᑕᔥ ᐐᓐ ᒋᐃᓀᑖᑯᓯᐙᒡ ᐃᑭ ᑳᒎᐎᐎᓯᒀ? ᐊᐙᒡ ᐃᓇ ᑫᑰᓐ ᐅᑎᓯ ᐊᐎᔭ ᐁᑭᑭᓇᐙᑕᔕᑫᔓᒡ?

ᑌᐺ ᒥᓯᐌ ᐅᑎᓯᐗᒃ ᐁᒎᐎᐙᒡ᙮ ᒦ ᐋᓃᔥ ᐅᐅᐌ ᓂᑕᒻ, ᐅᑮᑲᓇᐌᑕᐃᑯᐙᓐ ᑭᔐᒪᓂᑑᓐ ᒋᐸᒥᓇᒧᐙᒡ ᐅᑎᑭᑐᐎᓂᓂ᙮

ᐋᓃᓐ ᐃᑕᔥ ᑫᐃᔑᓭᐙᒡ ᐋᓂᑕ ᐁᑮᓅᑌᐋᓇᐌᒋᑫᐙᒡ? ᑲᔦ ᐐᓐ ᐃᓇ ᑭᔐᒪᓂᑑ ᑕᐃᔑᒋᑫᐃᑎᓱ ᒋᑌᐺᔦᑖᑯᓯᓯᒃ?

ᑳᐐᓐ ᑲᓇᑫ! ᒥᓴᐙ ᓴ ᑯ ᑕᑌᐺᐎᓂᐎ ᑭᔐᒪᓂᑑ, ᑲᑭᓇ ᐋᓇ ᑮᐗᓂᒧᐙᒡ ᐃᓂᓂᐗᒃ᙮ ᐊᒦ ᐅᐌ ᑳᐃᔑᓯᕽ ᐅᔑᐲᐃᑫᐎᓐ: ᐊᐲ ᑯ ᐁᑲᑭᑐᔭᓐ, ᑲᑭᓇ ᑭᑲᐃᔑᓈᑰᒃ ᐁᑾᔭᑯᑌᐺᔭᓐ᙮ ᐊᐲ ᐊᓈᒥᒥᑰᔭᓐ ᑭᑲᐸᑭᓈᑫ᙮

ᐋᓃᓐ ᐃᑕᔥ ᑫᐃᑭᑐᔭᕽ ᑮᔥᐱᓐ ᑳᔑᒪᒋᒋᑫᔭᕽ ᓇᐗᒡ ᐃᐃᒫ ᐅᒋᐸᔭᑌᓈᑾᓂᓂᒃ ᑭᔐᒪᓂᑑ ᐅᑾᔭᑯᒋᑫᐎᓐ? ᑭᑖᐃᑭᑐᒥᓐ ᐃᓇ ᐁᑾᔭᑯᒋᑫᓯᒃ ᐁᑎᐸᐊᒪᐎᓇᕽ? ᒦ ᐃᐌ ᐱᑯ ᐊᐌᓀᓐ ᑫᔑᑲᑴᑗᒡ᙮

ᑳᐐᓐ ᐃᑕᔥ ᑲᓇᑫ ᑖᐃᔑᓈᑾᓯᓅᓐ! ᑮᔥᐱᓐ ᑾᔭᑯᒋᑫᓯᑭᐸᓐ ᑭᔐᒪᓂᑑ, ᐋᓃᓐ ᑫᑮᐃᔑᑎᐹᑯᓈᐸᓐ ᑲᑭᓇ ᐊᑮᕽ ᑳᐊᔮᓂᒡ?

ᑯᒫ ᑲᔦ ᑭᑖᐃᑭᑐᒥᓐ: ᐃᓇᔥᑫ ᑌᐺᓯᐗᒃ, ᒦ ᐃᒫ ᐁᔑᐸᔭᑌᓈᑯᑖᐗᒃ ᑭᔐᒪᓂᑑ ᐁᑌᐺᒡ, ᒦᔥ ᐃᐃᒫ ᒋᐅᒋᑭᑌᓂᒥᓐᒡ᙮ ᑮᔥᐱᓐ ᐅᐅᐌᓂ ᐃᔑᓭᓂᒃ, ᐌᑯᓀᓐ ᑕᔥ ᓃᓐ ᐌᒋ ᐃᓇᑭᒥᑰᔮᓐ ᐅᒪᒑᑎᔅ?

ᐅᐅᐌ ᐃᔑᓭᒃ, ᑳᐐᓐ ᐃᓇ ᑭᑖᐃᑭᑐᓰᒥᓐ: ᐊᐤ, ᒪᒋᒋᑫᑖ, ᑳᐅᓂᔑᔑᒃ ᐃᐃᒫ ᑕᐅᒌᒪᑲᓐ᙮ ᐋᓃᔥ ᐊᐎᔭᒃ ᓂᑮᐃᔑᒪᒋ ᐃᑰᒃ ᐃᐃᐌ ᓇᑫ ᐁᑮᐃᑭᑐᐙᓀᓐ᙮ ᒦ ᐃᐌ ᑫᐃᔑᑎᐹᑯᓂᑣ ᐁᔑᑲᔥᑭᑕᒫᓱᐙᒡ᙮

ᓈᓵᑉ ᐃᑕᔥ ᒦᓇᐙ ᑳᑕᔑᑕᒫᓐ: ᑮᓇᐎᓐᑦ ᑳᒎᐎᐎᔭᕽ, ᐊᐗᔑᒣ ᓇ ᑭᒥᓋᑭᓱᒥᓐ ᐊᐲᒡ ᐐᓇᐙ ᑳᒎᐎᐎᓯᒀ? ᑳᐐᓐ ᑲᓇᑫ᙮ ᐋᔕ ᓂᑮᐐᑖᓐ ᐃᐃ ᑳᐃᔑᐌᐱᓯᐙᒡ ᒎᐗᒃ ᑲᔦ ᑳᒎᐎᐎᓯᒀ, ᑲᑭᓇ ᐯᔑᑾᓐ ᐃᑯ ᐁᐃᔑᑎᐯᓂᒥᑯᐙᒡ ᒪᒋᑑᑕᒧᐎᓐ᙮

ᒦ ᐅᐌ ᑳᐃᔑᓯᑭᓐ ᑭᒋᐅᔑᐲᐃᑫᐎᓇᓐ: ᑳᐐᓐ ᐊᐎᔭ ᐅᑾᔭᑯᓈᑯᓰᓐ ᑭᔐᒪᓂᑑᓐ, ᑳᐐᓐ ᐊᐙᒡ ᐯᔑᒃ᙮

ᑳᐐᓐ ᐊᐎᔭ ᐅᓂᓯᑕᐎᓇᓰᓐ ᑳᑾᔭᑯᓈᑾᓂᓂᒃ, ᑳᐐᓐ ᐊᐎᔭ ᐅᓇᑐᓀᐙᓰᓐ ᑭᔐᒪᓂᑑᓐ᙮

ᑲᑭᓇ ᑳᐐᓐ ᐅᐐᓈᓈᑲᑕᐌᓂᒫᓯᐙᐙᓐ ᑭᔐᒪᓂᑑᓐ᙮ ᑮᓂ ᐃᔑᓭᐗᒃ ᐲᓂᔥ ᑫᑰᓂᓂ ᐁᐃᓈᐸᑎᓯᓯᒀ᙮ ᑳᐐᓐ ᑾᔭᑯᒋᑫᓰᐗᒃ, ᑳᐐᓐ ᐊᐙᒡ ᐯᔑᒃ᙮

ᐅᑑᓂᐙᕽ ᐅᒋᓅᑖᑾᓂᓂ ᐃᐃ ᑳᓂᔑᐗᓈᒋᐃᐌᒪᑲᓂᓂᒃ, ᐅᑌᓇᓂᐙᕽ ᐅᒋᒫᒌᓭᓂ ᐗᔦᔑᒥᐌᐎᓐ᙮ ᑖᐱᔥᑰ ᑭᓀᐱᒃ ᑳᒌᓱᐌᒡ ᒦ ᐃᐌ ᐁᔑᐱᒋᐴᔑᐌᒪᑲᓂᓂᑭᓐ ᐅᑎᑭᑐᐎᓂᐙᓐ, ᐁᓂᔑᐌᒪᑲᓂᓂᑭᓐ᙮

ᒨᔕᒃ ᐃᑯ ᒫᔑᑲᓅᔑᐌᐗᒃ, ᐁᐐᓴᑲᓂᓂᑭᓐ ᐅᑎᑭᑐᐎᓂᐙᓐ᙮

ᐸᐹᔑᑯ ᐐᑲᑴᐐᓴᑫᑕᒧᐃᐌᐗᒃ, ᓂᑖᓂᔑᐌᐗᒃ᙮

ᓂᔑᐗᓈᒋᐃᐌᐎᓐ, ᑲᒀᑕᑭᐃᐌᐎᓐ ᐅᐱᒥᑲᐙᑖᓈᐙ ᐋᑎ ᐱᑯ ᑳᔑᐱᒥᐊᔮᐙᒡ᙮

ᑳᐐᓐ ᒥᓄᐐᒌᑎᐎᓐ ᐅᑕᑯᐱᒥᐎᑑᓰᓈᐙ᙮

ᑳᐐᓐ ᐅᑮᐱᑭᑫᑕᓰᓈᐙ ᒋᑯᑖᓀᓂᒫᐙᒡ ᑭᔐᒪᓂᑑᓐ, ᐁᐊᔨᔑᐲᐃᑳᑌᒃ᙮

ᑭᑭᑫᑖᒥᓐ ᑲᑭᓇ ᐅᓄ ᑫᑰᓇᓐ ᐃᓈᑯᓂᑫᐎᓇᓐ ᑳᐃᔑᐲᐃᑳᑌᑭᓐ, ᒦ ᐁᑯᐙᒡ ᐃᑭ ᑳᐃᓀᑖᑯᓯᐙᒡ ᐃᓈᑯᓂᑫᐎᓐ ᒋᑲᓇᐌᑕᒧᐙᒡ᙮ ᒦᑕᔥ ᐃᐃ ᐁᓍᑌᒃ ᐃᓈᑯᓂᑫᐎᓐ, ᐁᑳ ᐊᐎᔭ ᒋᒥᑲᓯᒃ ᑫᐅᒋᑲᓅᒋᑫᑕᒫᓱᐸᓐ᙮ ᒦᔥ ᐃᐃ ᑲᑭᓇ ᐯᒫᑎᓯᐙᒡ ᒋᐃᔑᓈᑯᓯᐙᒡ ᒋᑎᐹᑯᓂᑯᐙᒡ ᑭᔐᒪᓂᑑᓐ᙮

ᐋᓃᔥ ᐋᓇᑲᔥᑭᑑᒡ ᐊᐎᔭ ᒋᑑᑕᕽ ᐃᐃ ᐃᓈᑯᓂᑫᐎᓐ ᑳᐃᓇᑌᓂᒃ, ᑳᐐᓐ ᐃᐃᒫ ᐅᑲᐅᒋ ᐃᓇᑭᒥᑯᓰᓐ ᒋᒥᓄᐐᒌᐙᒡ ᑭᔐᒪᓂᑑᓐ᙮ ᐋᓃᔥ ᒦ ᐃᐃ ᐁᓈᐸᑕᒃ ᐃᓈᑯᓂᑫᐎᓐ ᐊᐎᔭ ᒋᐅᒋᑭᑫᓂᑎᓱᒡ ᐁᒪᒋᑑᑕᕽ᙮

ᐋᔕ ᑕᔥ ᓅᑯᒻ ᐅᑮᓈᑯᑑᓐ ᑭᔐᒪᓂᑑ ᐋᓃᓐ ᐁᑑᑕᐙᒡ ᐊᐎᔭᓐ ᑾᔭᒃ ᒋᒥᓄᐐᒌᐎᑯᒡ᙮ ᑳᐐᓐ ᐊᑲᐌ ᐃᐌ ᐅᑖᐸᒋᑑᓰᓐ ᐃᓈᑯᓂᑫᐎᓐ ᒋᐅᒋ ᐃᓇᓵᒡ ᐊᐎᔭᓐ ᒋᒥᓄᐐᒌᐎᑯᒡ᙮ ᒦ ᐋᓃᔥ ᐃᐃᐌ ᐁᔑᓯᓂᓂᒃ ᐃᓈᑯᓂᑫᐎᓐ ᑲᔦ ᑳᐃᔑᐲᐃᑫᓂᒡ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ᙮

ᐋᓃᔥ ᒦ ᐃᐃᒫ ᐁᑌᐺᑕᐎᒥᓐᒡ ᒋᓴᔅ Xᑕᓐ ᐌᒋᑾᔭᒀᑎᓰᐌᓂᒫᒡ ᐃᐃ ᐯᒫᑎᓯᓂᒡ᙮ ᑲᑭᓇ ᐊᐎᔭᓐ ᐅᑎᔑᒋᑫᐋᓐ ᑳᑌᐺᑕᒥᓂᒡ᙮ ᑳᐐᓐ ᐯᐸᑳᓀᑖᑯᓯᓰᐗᐞ᙮

ᑲᑭᓇ ᐊᐎᔭ ᑮᒪᒋᑑᑕᒻ᙮ ᑳᐐᓐ ᐊᐎᔭ ᐅᑮᑌᐱᔥᑲᓰᓐ ᑭᔐᒪᓂᑑᓐ ᐅᑭᒋ ᐃᓀᑖᑯᓯᐎᓂᓃᕽ ᒋᐃᔑᓈᑯᓯᒡ᙮

ᐐᓐ ᐃᑕᔥ ᐃᑯ ᐅᑭᔐᐙᑎᓯᐎᓂᕽ ᑭᔐᒪᓂᑑ ᐅᒥᒋᔕᐌᓂᒫᐞ ᑲᑭᓇ ᑾᔭᒃ ᐁᐃᓇᓵᒡ ᒋᒥᓄᐐᒌᐎᑯᒡ᙮ ᐐᓐ X ᒋᓴᔅ ᐅᑎᔑᒋᑫᐋᐞ ᒋᒥᒋᐸᑭᑎᓂᑲᓂᐎᓂᒡ ᐁᑳ ᒋᐅᓇᔓᐙᓂᒫᓯᐎᓐᒡ᙮

ᐐᓐ ᐃᑯ ᑭᔐᒪᓂᑑ ᑮᐅᑎᓇᒫᑫ ᒋᓴᓲᓐ ᒋᓂᓯᒥᓐᒡ ᐸᑭᑎᓈᓱᐎᓂᕽ ᒋᑎᓄᐎᓂᒡ, ᐃᐃᒫ ᑕᔥ ᐅᒥᔅᑸᒥᓃᕽ ᒋᐅᒋᐴᓀᒋᑳᑌᓂᑭᓐ ᐅᒪᒋᑑᑕᒧᐎᓂᐙᓐ ᐃᑭ ᐯᒫᑎᓯᐙᒡ ᐁᑌᐺᑕᐙᐙᒡ᙮ ᒦ ᐅᐌ ᑳᑑᑕᕽ ᑭᔐᒪᓂᑑ ᒋᐙᐸᒋᑳᑌᓂᒃ ᐁᔑᑾᔭᑯᒋᑫᒡ᙮ ᐅᑖᓈᕽ ᐃᑕᔥ ᒋᑆ ᓂᓯᒥᓐᒡ Xᑕᓐ ᐅᒋᑕ ᐅᑮᐋᓶᔮᐸᑕᒪᐙᐞ ᑳᑮᐃᔑᒪᒋᑑᑕᒥᓂᒡ, ᐋᓃᔥ ᐅᑮᔕᔒᐯᓂᒫᐞ᙮

ᓅᑯᒻ ᐃᑕᔥ ᐸᑳᓐ ᐃᔑᒋᑫ ᐁᑭᑫᑖᑯᑑᒡ ᐅᑾᔭᑯᒋᑫᐎᓐ᙮ ᒦ ᐅᐌ ᐁᔑᐙᐸᑕᐃᐌᒡ ᐐᓐ ᐃᑯ ᐁᑾᔭᒀᑎᓯᒡ, ᑾᔭᒃ ᑲᔦ ᐁᐃᓇᓵᒡ ᑲᑭᓇ ᐊᐎᔭᓐ ᒋᒥᓄᐐᒌᐎᑯᒡ ᑳᑌᐺᑕᐙᓂᒡ ᒋᓴᓲᓐ᙮

ᐌᑯᓀᓐ ᑕᔥ ᐊᐎᔭ ᑫᐅᒋᒪᒦᒀᓂᑎᓱᒡ? ᑳᐐᓐ ᑫᑰᓐ᙮ ᐋᓃᔛᓐ ᐃᐃ? ᑳᐐᓐ ᐃᓇ ᑭᑖᐃᑭᑐᓰᒥᓐ ᒋᐅᒋᑾᔭᑾᑭᒥᑰᔭᕽ ᐁᑲᓇᐌᑕᒪᕽ ᐃᓈᑯᓂᑫᐎᓐ? ᑳᐐᓐ ᑲᓇᑫ᙮ ᑳᐐᓐ ᐋᓃᔥ ᐅᒋᑾᔭᑾᑭᒫᓰ ᐊᐎᔭ ᐁᑲᓇᐌᑕᕽ ᐃᓈᑯᓂᑫᐎᓐ᙮ ᐅᑌᐺᑕᒧᐎᓂᕽ ᓴ ᐐᓐ ᐅᑲᐅᒋ ᐃᓇᓯᑰᓐ ᑭᔐᒪᓂᑑᓐ ᑾᔭᒃ ᒋᒥᓄᐐᒌᐙᒡ᙮

ᒦ ᐋᓃᔥ ᐅᐅᐌ ᑳᐅᒋᓂᑖᐃᑭᑐᔮᕽ, ᐱᑯ ᓴ ᑯ ᐁᐅᑌᐺᑕᒧᐎᓂᒡ ᐊᐎᔭ ᑾᔭᒃ ᐅᑲᐅᒋ ᐃᓇᓯᑰᓐ ᑭᔐᒪᓂᑑᓐ ᒋᒥᓄᐐᒌᐙᒡ᙮ ᑳᐐᓐ ᐐᓐ ᐁᑮᑲᓇᐌᑕᕽ ᐃᓈᑯᓂᑫᐎᓐ ᑕᐅᒋ ᐃᔑᒋᑲᓂᐎᓰ ᐊᐎᔭ᙮

ᐊᐊ ᑕᔥ ᑭᔐᒪᓂᑑ, ᐃᓀᓂᒫ ᓇ ᐁᑕ ᐃᓂ ᒎᐗᐞ ᒋᐅᑭᔐᒪᓂᑑᒥᑯᒡ? ᑳᐐᓐ ᐃᓇ ᑲᔦ ᐃᓂᐌᓂᐗᐞ ᑳᒎᐎᐎᓯᓂᒃ? ᑌᐺ ᓴ ᑲᔦ ᑳᒎᐎᐎᓯᓂᒃ ᐅᑲᐅᑭᔐᒪᓂᑑᒥᑰᐞ᙮

ᐊᔮ ᓴ ᐯᔑᒃ ᒋᐅᑭᔐᒪᓂᑑᒥᑯᒡ ᑲᑭᓇ ᐯᒫᑎᓯᓂᒡ, ᔑᑾ ᐐᓐ ᒎᐗᐞ ᐅᑌᐺᑕᒧᐎᓂᓃᕽ ᐅᑲᐅᒋ ᐃᓇᓵᐞ ᒋᒥᓄᐐᒌᐎᑯᒡ, ᐃᓂ ᑕᔥ ᑲᔦ ᑳᒎᐎᐎᓯᓂᒃ ᒦ ᐯᔑᑾᓐ ᑫᑑᑕᐙᒡ ᑌᐺᑕᒥᓂᒡ᙮

ᑳᐐᓐ ᑕᔥ ᐃᐃᒫ ᑌᐺᑕᒧᐎᓂᕽ ᑭᑑᒋᐋᓂᓭᑖᑯᑑᓰᒥᓐ ᐃᓈᑯᓂᑫᐎᓐ᙮ ᓇᐗᒡ ᐄᑐᒃ ᑭᑖᔩᒋᑑᒥᓐ ᐃᓈᑯᓂᑫᐎᓐ᙮

ᐋᓃᓐ ᑕᔥ ᑫᐃᓇᒃ ᐊᐊ ᑳᑮᐅᑫᑌᐊᔭᐋᒥᔮᕽ ᐁᐸᕒᐊᐋᒻ, ᓃᓇᐎᓐᑦ ᑳᒎᐎᐎᔮᕽ ᑳᐅᑕᑳᓀᓯᔮᕽ? ᐌᑯᓀᔥ ᐐᓐ ᑳᐊᓂᐅᑎᑖᐸᑕᕽ?

ᑮᔥᐱᓐ ᐐᓐ ᐅᑎᔑᒋᑫᐎᓂᕽ ᑳᑮᐅᒋ ᐃᓇᓯᑯᒡ ᒋᐅᒋᒥᓄᐐᒌᐙᒡ ᑭᔐᒪᓂᑑᓐ, ᐅᑖᑮᐅᑎᓈᓐ ᑫᑰᓐ ᒋᒥᓄᒫᒦᒀᑕᑭᐸᓐ᙮ ᐃᐃᒫ ᑕᔥ ᑳᔑᐙᐸᒋᑫᓂᒡ ᑭᔐᒪᓂᑑᓐ ᑳᐐᓐ ᑫᑰᓐ ᐅᑮᐊᔮᓰᓐ ᒋᒫᒦᒀᑕᕽ᙮

ᐅᐅᐌ ᐋᓃᔥ ᐃᑭᑑᒪᑲᓐ ᑭᒋᐅᔑᐲᐃᑫᐎᓐ: ᐁᐸᕒᐊᐋᒻ ᐅᑮᑌᐺᑕᐙᓐ ᑭᔐᒪᓂᑑᓐ, ᒦᑕᔥ ᐃᐃᒫ ᑳᑮᐅᒋ ᐃᓇᑭᒥᑯᒡ ᐁᑾᔭᒀᑎᓯᒡ᙮

ᐃᓇᔥᑫ, ᑳᐊᔭᓄᑮᒡ ᐊᐎᔭ, ᐅᑎᐸᐊᒫᑰᐎᓐ ᑳᐐᓐ ᒦᓂᑰᐎᓐ ᐃᓇᑭᑌᓯᓂᓂ, ᒦ ᓴ ᐁᓇᑭᑌᓂᒃ ᐁᑮᑲᔥᑭᑕᒫᓱᒡ᙮

ᐃᓇᔥᑫ ᑕᔥ ᐐᓐ ᐊᐎᔭ ᑳᑲᔥᑭᑕᒫᓱᓯᒃ ᒋᒥᓍᐸᒥᑯᒡ ᑭᔐᒪᓂᑑᓐ, ᐁᐊᐯᓂᒧᓄᑕᐙᒡ ᐃᑕᔥ, ᐅᐙᐸᒥᑰᓐ ᐁᑌᐺᑕᐙᒡ᙮ ᒦᑕᔥ ᐋᓇᐐᓐ ᐁᑮᐱᒪᒋ ᐃᔑᐌᐱᓯᒡ, ᒦ ᐅᐌ ᐅᑎᑰᓐ: ᑳᐐᓐ ᑫᑰᓐ ᑭᑎᓀᓂᒥᓯᓅᓐ, ᑭᑲᐃᓇᑭᒥᓐ ᐁᑾᔭᒀᑎᓯᔭᓐ, ᐁᐃᑯᒡ᙮ ᒦ ᐃᐌ ᐅᑌᐺᑕᒧᐎᓂᕽ ᐊᐊ ᐃᓂᓂ ᑳᐅᒋ ᐃᓇᓯᑯᒡ ᑾᔭᒃ ᒋᒥᓄᐐᒌᐙᒡ ᑭᔐᒪᓂᑑᓐ᙮

ᒦ ᐃᐌᓂ ᑳᐃᑕᕽ ᐊᐊ ᑌᐱᑦ ᐁᑮᑕᔑᑕᕽ ᑳᐃᔑᔕᐌᓂᒥᒥᓐᒡ ᐃᓂ ᐃᓂᓂᐗᓐ ᑾᔭᒀᑎᓯᐎᓂᕽ ᑳᐃᓀᓂᒥᑯᓂᒡ ᑭᔐᒪᓂᑑᓐ ᐋᓇᐐᓐ ᑫᑰᓐ ᐁᑮᐊᓄᑳᑕᓯᓂᒃ ᐃᓂ ᐃᓂᓂᐗᓐ ᒋᐅᒋᐅᑖᐱᓂᑯᓂᒡ ᑭᔐᒪᓂᑑᓐ᙮ ᒦ ᐅᐌ ᐁᑭᑐᒡ:

ᔕᐌᑖᑯᓯᐗᒃ ᐃᑭᐌᓂᐗᒃ ᐅᒪᒋᒋᑫᐎᓂᐙᓐ ᑳᐴᓀᑕᒪᐎᑣ, ᐅᒪᒋᑑᑕᒧᐎᓂᐙᓐ ᐐᑫ ᑳᑮᑳᓰᓇᒪᐎᑣ!

ᔕᐌᑖᑯᓯ ᐊᐊ ᐃᓂᓂ ᐅᒪᒋᑑᑕᒧᐎᓐ ᐁᑳ ᐐᑳ ᐁᐐᐊᑭᑕᒫᑯᓯᒃ ᑳᑎᐯᒋᑫᓂᒡ! ᑮᐃᑭᑐ ᑌᐱᑦ᙮

ᐅᐅᐌ ᑕᔥ ᔕᐌᑖᑯᓯᐎᓐ, ᐃᑭᐌᓂᐗᒃ ᐃᓇ ᐁᑕ ᑳᑭᑭᓇᐙᑕᔕᑫᔑᑲᓂᐎᐙᒡ ᐅᑲᐊᔮᓈᐙ? ᑳᐐᓐ᙮ ᑲᔦ ᓴ ᑯ ᑫᐐᓇᐙ ᑳᑮᑭᑭᓇᐙᒋᐋᓯᐎᑣ ᐅᑲᐊᔮᓈᐙ᙮ ᐋᓃᔥ ᓂᑮᑕᔑᒫᓈᓐ ᐊᐊᐌ ᐁᐸᕒᐊᐋᒻ ᐁᑮᑌᐺᑕᐙᒡ ᑭᔐᒪᓂᑑᓐ, ᒦᑕᔥ ᑳᑮᐅᒋ ᐃᓇᑭᒥᑯᒡ ᐁᑾᔭᒀᑎᓯᒡ᙮

ᐋᓃᓐ ᒪᔮ ᐊᐲ ᑳᒫᒋ ᐃᓇᑭᒥᑯᒡ ᐁᑾᔭᒀᑎᓯᒡ? ᒋᑆ ᑭᑭᓇᐙᑕᔕᑫᔑᑲᓂᐎᒡ ᐃᓇ? ᑳᐃᔥᒀ ᑭᑭᓇᐙᑕᔕᑫᔑᑲᓂᐎᒡ ᐃᓇ? ᑳᐐᓐ ᑳᐃᔥᒀᑑᑕᐎᓐᒡ, ᒋᑆ ᑑᑕᐎᓐᒡ ᐃᓴ ᑮᐃᓇᑭᒫ ᒋᑾᔭᒀᑎᓯᒡ᙮

ᓈᓈᑫ ᑕᔥ ᑮᑭᑭᓇᐙᑕᔕᑫᔑᑲᓂᐎ᙮ ᒦ ᐃᐌ ᑳᐃᔑᒋᑫᐃᓐᒡ, ᒨᔕᒃ ᐃᑯ ᒋᑭᑫᒋᑳᑌᒃ ᒦ ᐃᒫ ᐅᑌᐺᑕᒧᐎᓂᕽ ᐁᑮᐅᒋ ᐃᓇᑭᒥᓐᒡ ᐁᑾᔭᒀᑎᓯᒡ᙮ ᐋᓃᔥ ᒋᑆ ᑭᑭᓇᐙᒋᔓᓐᒡ ᐅᑮᐃᔑᐅᑖᐱᓂᑰᓐ ᑭᔐᒪᓂᑑᓐ᙮ ᒦᑕᔥ ᐃᐃᐌ ᐁᐃᓀᑖᑯᓯᒡ ᐁᐸᕒᐊᐋᒻ ᐁᐅᔫᓯᒥᑯᒡ ᑲᑭᓇ ᐊᐎᔭᐞ ᑳᑌᐺᑕᐙᓂᒡ ᑭᔐᒪᓂᑑᓐ᙮ ᑫᐐᓇᐙ ᓴ ᐅᑎᔑᐅᑖᐱᓂᑯᐙᓐ ᑭᔐᒪᓂᑑᓐ ᒋᑾᔭᒀᑎᓯᐙᒡ ᐋᓇᐐᓐ ᐐᑳ ᐁᑮᑭᑭᓇᐙᑕᔕᑫᔣᓯᐎᑣ᙮

ᔑᑾ ᐃᑭᐌᓂᐗᒃ ᑳᑮ ᑭᑭᓇᐙᑕᔕᑫᔑᑲᓂᐎᐙᒡ ᑲᔦ ᐐᓇᐙ ᐯᔑᑾᓐ ᐅᑑᔫᓯᒫᐙᓐ ᐁᐸᕒᐊᐋᒪᓐ᙮ ᑳᐐᓐ ᐁᑕ ᐅᑭᑭᓇᐙᒋᐃᑰᐎᓂᐙᕽ ᐅᒋ ᐅᔫᓯᓰᐗᒃ, ᐃᐃᐌ ᓴ ᐐᓐ ᐁᓈᐸᐊᒫᓈᐙᒡ ᐃᓂ ᐁᐸᕒᐊᐋᒪᓐ ᑳᑮᐃᔑ ᐅᑌᐺᑕᒧᐎᓂᓂᒡ, ᑳᑮᐃᔑᐱᒫᑎᓯᓂᒡ ᒋᑆ ᑭᑭᓇᐙᒋᐃᒥᓐᒡ᙮

ᐃᓇᔥᑫ ᑭᔐᒪᓂᑑ ᐅᑮᐲᑕᔓᑕᒪᐙᓐ ᐁᐸᕒᐊᐋᒪᓐ ᒦᓇᐙ ᐅᐲᐌᓰᒥᓂ ᐱᒌᓇᒃ ᒋᑎᐯᑕᒥᓂᒡ ᐅᐅ ᐊᑮᓂ᙮ ᐅᐅᐌ ᑕᔥ ᑳᑮᐃᓇᔓᑕᒪᐎᓐᒡ ᐁᐸᕒᐊᐋᒻ, ᑳᐐᓐ ᐃᐃᒫ ᐁᑮᑲᓇᐌᑕᕽ ᐃᓈᑯᓂᑫᐎᓐ ᑮᐅᒋᒦᓂᑯᐎᓯᓰ᙮ ᐃᐃᒫ ᓴ ᐐᓐ ᐁᑮᑌᐺᑕᐙᒡ ᑭᔐᒪᓂᑑᓐ ᑲᔦᔥ ᐁᑮᐅᒋ ᐃᓇᑭᒥᑯᒡ ᐁᑾᔭᒀᑎᓯᒡ, ᒦ ᓴ ᐐᓐ ᐃᐃᒫ ᑳᐅᒋᐊᔓᑕᒫᑯᒡ᙮

ᑕᑲ ᑕᔥ ᐅᐅᐌ ᐃᔑ ᐃᑭᑐᔭᑭᐸᓐ ᑭᔐᒪᓂᑑ ᐁᐊᔓᑕᒪᐙᒡ ᑫᑰᓐ ᒋᒦᓈᒡ ᐊᐎᔭᓐ ᐃᐃᒫ ᐁᑕ ᑳᔑᑲᓇᐌᑕᒥᓂᒡ ᐃᓈᑯᓂᑫᐎᓐ᙮ ᑮᔥᐱᓐ ᐃᐃᐌ ᐃᔑᓭᑭᐸᓐ, ᐊᓂᔖ ᐃᐌ ᑖᐃᔑᓈᑾᓐ ᐊᐎᔭ ᒋᐅᑌᐺᑕᒧᐎᓂᒡ᙮ ᔑᑾ ᐋᓇᐐᓐ ᑭᔐᒪᓂᑑ ᐁᐊᔓᑕᒪᐙᒡ ᑫᑰᓐ ᐃᓂ ᑳᑌᐺᑖᑯᒡ, ᑳᐐᓐ ᑫᑰᓐ ᑖᐃᓈᐸᑕᓯᓂᓂ ᐅᑕᔓᑕᒫᑫᐎᓐ᙮

ᐃᐃᒫ ᓴ ᐁᐊᔮᓂᒃ ᐃᐃ ᒨᓯᔅ ᐅᑎᓈᑯᓂᑫᐎᓐ, ᐊᐎᔭ ᐁᐲᑯᓇᕽ ᐁᒫᔑᒋᑫᒡ, ᐅᑲᐅᒋᑎᐸᐊᒫᑰᓐ ᑭᔐᒪᓂᑑᓐ ᐅᓂᔥᑳᑎᓯᐎᓂᓃᕽ᙮ ᐃᐃᒫ ᑕᔥ ᐊᔮᓯᓄᒃ ᐃᓈᑯᓂᑫᐎᓐ, ᑳᐐᓐ ᑖᑕᓀᒋᑳᑌᓯᓅᓐ ᒫᔑᒋᑫᐎᓐ᙮

ᒦᑕᔥ ᐐᓐ ᐃᐃᒫ ᐅᑌᐺᑕᒧᐎᓂᕽ ᐊᐊ ᐁᐸᕒᐊᐋᒻ ᑳᑮᐅᒋᐊᔓᑕᒪᐎᓐᒡ᙮ ᒦ ᐃᐌ ᒋᐅᒋᑫᒋᓈᐅᐌᑖᑾᓂᓂᒃ ᐃᐃᐌ ᑭᔐᒪᓂᑑ ᐅᑕᔓᑕᒫᑫᐎᓐ, ᐅᔕᐌᒋᑫᐎᓂᕽ ᐁᐐᐅᒋᒥᒋᒦᓈᒡ ᑲᑭᓇ ᐊᐎᔭᓐ ᐅᐲᐌᓰᒥᓂ ᐃᓂ ᐁᐸᕒᐊᐋᒪᓐ᙮ ᑳᐐᓐ ᐁᑕ ᑕᒦᓈᓰᐗᒃ ᐃᑭ ᑳᑲᓇᐌᑕᒧᐙᒡ ᒨᓯᓲᓐ ᐅᑎᓈᑯᓂᑫᐎᓂᓂ, ᐃᑭᐌᓂᐗᒃ ᐃᑕᔥ ᑲᔦ ᑳᓈᐱᑌᐺᑕᒧᐙᒡ ᐃᓂ ᐁᐸᕒᐊᐋᒪᓐ ᑳᑮᐃᔑᑌᐺᑕᒥᓂᒡ᙮ ᐋᓃᔥ ᐅᑌᐺᑕᒧᐎᓂᕽ ᐁᐸᕒᐊᐋᒻ ᑮᓇᐎᓐᑦ ᑲᑭᓇ ᑳᐅᒋᐅᔫᓯᒪᕽ᙮

ᒦ ᐋᓃᔥ ᐅᐅ ᐁᔑᐲᐃᑳᑌᓂᒃ ᑭᔐᒪᓂᑑ ᐅᑎᑭᑐᐎᓐ: ᐅᐅᐌ ᓴ ᑳᐃᔑᒋᑫᐃᓈᓐ, ᓃᐱᐗᐞ ᑫᑕᓶᐙᓇᑭᓯᐙᒡ ᐯᒫᑎᓯᐙᒡ ᑭᑲᐅᔫᓯᒥᑰᒃ, ᐁᑮᐃᓂᓐᒡ ᐁᐸᕒᐊᐋᒻ᙮ ᑌᐺ ᓴ ᑯ ᑮᓇᐎᓐᑦ ᑭᑑᔫᓯᒫᓈᓐ ᐁᐸᕒᐊᐋᒻ, ᐁᔑᐙᐸᒋᑫᓂᒡ ᑭᔐᒪᓂᑑᓐ ᑳᑮᑌᐺᑕᐙᒡ᙮ ᒦ ᐊᐌ ᑭᔐᒪᓂᑑ ᑳᐱᒫᑎᓰᔥᑲᐙᒡ ᐃᐃ ᑳᑮᓂᐳᓂᒡ, ᑲᔦ ᑳᐃᑭᑐᒡ: ᑕᑲ ᐃᐌ ᑕᓈᑾᓐ ᒪᔑ ᑳᐊᔮᓯᓄᒃ, ᒦᑕᔥ ᐃᐃ ᑳᐃᔑᓭᓂᒃ᙮

ᐊᐊ ᑕᔥ ᐁᐸᕒᐊᐋᒻ ᑮᑌᐺᑕᒻ, ᐅᑮᐊᔕᐙᐸᑖᓐ ᒪᔑ ᑫᑰᓐ ᐋᐲᓐᒡ ᐁᑮᓈᑾᓯᓂᓂᒃ ᒋᑮᐅᒋᒋᓭᓂᑭᐸᓐ ᐃᐃ ᑳᑮᐲᑑᒡ᙮ ᒦᔥ ᐃᐃ ᐲᓂᔥ ᑌᐺ ᐅᑮᐅᔫᓯᒥᑰᐞ ᓃᐱᐗᐞ ᑳᑕᓶᐙᓇᑭᓯᓂᒡ᙮ ᒦ ᓴ ᒪᔮ ᑳᐊᓂ ᐃᔑᓭᓂᒃ ᑳᑮᐃᓂᓐᒡ: ᒦ ᐃ ᑫᑕᔑᐙᒡ ᑭᐲᐌᓰᒪᒃ, ᐁᑮᐃᓂᓐᒡ᙮

ᐊᐲ ᑳᐊᔓᑕᒪᐎᓐᒡ, ᐋᔕ ᑫᑳ ᓂᑯᑣᒃ ᑮᑕᓱᐱᐴᓉ᙮ ᑳᐐᓐ ᐃᑕᔥ ᐐᓐ ᑮᐅᒋᒣᒋᓭᓯᓂᓂ ᐅᑌᐺᑕᒧᐎᓐ ᐁᑮᓈᑲᑕᐌᑕᕽ ᑎᐱᓇᐌ ᐅᐎᔭᐤ ᐋᔕ ᑖᐱᔥᑰ ᓂᐴᒪᑲᓐ ᐁᑮᐃᔑᓇᕽ, ᑲᔦ ᐃᓂ ᓭᕒᐊᐗᓐ ᐋᔕ ᒣᐎᔕ ᐁᑮᐃᔥᒀᓭᓂᒃ ᐅᐱᒨᔐᐎᓂᓂ᙮

ᑳᐐᓐ ᐊᐙᒡ ᐸᑮ ᑮᐅᒋᐴᓂᑌᐺᑕᓰ, ᑳᐐᓐ ᐅᑮᐋᓉᑕᓰᓐ ᐃᐃ ᑭᔐᒪᓂᑑᓐ ᑳᑮᐊᔓᑕᒫᑯᒡ᙮ ᐊᐗᔑᒣ ᓴ ᐐᓐ ᑮᐊᓂᓲᑭᑌᐺᑕᒻ, ᐅᑮᐊᓂᑭᑕᑭᒫᓐ ᑭᔐᒪᓂᑑᓐ᙮

ᐗᐐᑫ ᑮᑫᒋᓈᐅ, ᑌᐺ ᑭᔐᒪᓂᑑ ᓂᑲᑲᔥᑭᑕᒫᒃ ᐃᐃ ᑳᑮᐃᔑᐊᔓᑕᒪᐎᒡ, ᑮᐃᓀᑕᒻ ᐊᐊ ᐁᐸᕒᐊᐋᒻ᙮

ᒦ ᐅᐌ ᐅᑌᐺᑕᒧᐎᓂᕽ ᑳᑮᐅᒋᐅᑖᐱᓂᑯᒡ ᑭᔐᒪᓂᑑᓐ ᐁᑮᐃᓇᑭᒥᑯᒡ ᐁᑾᔭᒀᑎᓯᒡ᙮

ᐅᐅ ᑕᔥ ᑳᐃᑭᑑᒪᑲᒃ: ᑮᐃᔑ ᐃᓇᑭᒫ ᐁᑾᔭᒀᑎᓯᒡ, ᑳᐐᓐ ᐐᓐ ᐁᐸᕒᐊᐋᒻ ᐁᑕ ᑳᐅᒋᐅᔑᐲᐃᑳᑌᓂᒃ᙮

ᑮᓇᐎᓐᑦ ᐅᔕ ᑲᔦ ᑳᐅᒋ ᐃᔑᐲᐃᑳᑌᒃ, ᑫᐃᔑ ᐃᓇᑭᒥᓇᕽ ᑭᔐᒪᓂᑑ ᒋᑾᔭᒀᑎᓯᐗᕽ, ᐋᓃᔥ ᑭᑌᐺᑕᐙᓈᓐ ᑭᔐᒪᓂᑑ ᑳᑮᑮᐌᐱᒫᑎᓯᐋᒡ ᒋᓴᓲᓐ ᑳᑎᐯᓂᒥᒥᓇᕽ᙮

ᑭᔐᒪᓂᑑ ᐋᓃᔥ ᐅᑮᐸᑭᑎᓈᓐ Xᑕᓐ ᒋᐅᒋᓂᓯᒥᓐᒡ ᑭᒪᒋᒋᑫᐎᓂᓈᓂᕽ ᐅᒋ᙮ ᐅᑮᑮᐌᐱᒫᑎᓯᐋᓐ ᑕᔥ ᑮᓇᐎᓐᑦ ᐁᐐᐅᒋ ᐃᓇᓯᓇᕽ ᒋᒥᓄᐐᒌᐗᕽ ᑭᔐᒪᓂᑑ᙮

ᐅᐅᐌ ᑕᔥ ᐋᔕ ᑳᐃᔑᒋᑫᐃᓇᕽ ᑭᔐᒪᓂᑑ ᐁᑮᑌᐺᑕᐗᕽ ᐁᑮᐃᔑᐃᓇᕽ ᑾᔭᒃ ᒋᒥᓄᐐᒌᐗᕽ, ᓅᑯᒻ ᐱᓵᓀᑕᒧᐎᓂᕽ ᑭᑎᔑᐐᒌᐙᓈᓐ ᑭᔐᒪᓂᑑ, ᐊᐊᐌ ᑕᔥ ᑳᑎᐯᓂᒥᓇᕽ ᒋᓴᔅ X ᑳᑮᐃᔑᒋᑫᐃᓇᕽ᙮

ᒦᑕᔥ ᐊᐊᐌ ᐁᑮᑌᐺᑕᐗᕽ X, ᑭᑮᐃᔑᐲᑎᑲᓂᑯᓈᓐ ᐃᐃᒫ ᐁᔑᐙᐸᑕᒧᐗᕽ ᐅᑭᔐᐙᑎᓯᐎᓐ ᐊᐊ ᑭᔐᒪᓂᑑ, ᒦᑕᔥ ᐃᐃᒫ ᓅᑯᒻ ᐁᔑᐱᒫᑎᓯᐗᕽ᙮ ᑲᔦ ᑭᒨᒋᑫᑖᒥᓐ ᐁᐊᔕᐙᐸᑕᒪᕽ ᐁᐐᐐᒋᐃᐌᔭᕽ ᑭᔐᒪᓂᑑ ᐅᑭᒋ ᐃᓀᑖᑯᓯᐎᓂᕽ᙮

ᑲᔦᔥ ᑭᑑᒋᒨᒋᑫᑖᒥᓐ ᐁᑲᒀᑕᑫᑕᒪᕽ᙮ ᐋᓃᔥ ᑭᑭᑫᑖᒥᓐ ᐅᐅ, ᐊᐲ ᐁᑲᒀᑕᑫᑕᒪᕽ ᑭᑑᒋᑭᑭᓄᐊᒫᑰᒥᓐ ᒋᔕᔒᐯᑕᒪᕽ᙮

ᔕᔒᐯᑕᒧᐗᕽ ᐃᑕᔥ, ᒦ ᐃᒫ ᒋᐅᒋᑾᔭᑯᓇᐎᓇᕽ ᑭᔐᒪᓂᑑ᙮ ᐁᑭᑫᑕᒧᐗᕽ ᐃᑕᔥ ᐁᒥᓄᓇᐎᓇᕽ, ᒦ ᐃᒫ ᐌᑎᓇᒪᕽ ᑫᐅᒋᑫᒋᓈᐅᔭᕽ᙮

ᐅᐅᐌ ᑕᔥ ᐁᐃᔑᑫᒋᓈᐅᔭᕽ, ᑳᐐᓐ ᐐᑳ ᑭᑲᓃᓭᑕᓰᒥᓐ᙮ ᐋᓃᔥ ᑭᔐᒪᓂᑑ ᑭᑮᓰᑭᓇᒫᑯᓈᓐ ᐅᓵᑭᐃᐌᐎᓐ ᐃᐃᒫ ᑭᑌᐃᓈᓂᕽ, ᐅᑕᒑᑾᓐ ᐁᑮᐋᐸᒋᐋᒡ᙮ ᒦᐗᓐ ᐃᑕᔥ ᐃᓂ ᑳᑮᒦᓂᓇᕽ᙮

ᒣᒀ ᑕᔥ ᑫᔮᐱ ᐁᑮᑲᔥᑭᐃᑎᓱᓯᐗᕽ ᒋᐐᒋᐃᑎᓱᔭᑭᐸᓐ, ᐊᐊᐌ X ᑭᑮᓂᐳᑕᒫᑯᓈᓐ ᑳᒪᒋ ᐃᔑᐌᐱᓯᔭᕽ᙮ ᒪᔮ ᓴ ᐃᐃ ᐊᐲ ᑮᑑᑕᒻ ᑳᑮᐅᓇᑑᓂᒡ ᑭᔐᒪᓂᑑᓐ᙮

ᐃᓇᔥᑫ ᑖᓴᓇᑲᓂᓂ ᐊᐎᔭ ᒋᓂᐳᑕᒪᐙᒡ ᐊᐎᔭᓐ ᐋᓇᐐᓐ ᒪᔮ ᑳᐱᒥᓂᔕᐊᒥᓂᒡ ᐃᐃ ᐃᓈᑯᓂᑫᐎᓐ ᑳᐃᓇᑌᓂᒃ᙮ ᐃᑯᑎᕽ ᐃᑕᔥ ᐐᓐ ᒫᐐᓐ ᐊᐎᔭ ᑖᐊᔨᓀᑕᒻ ᒋᓂᐴᑕᒪᐙᐸᓐ ᐊᐎᔭᓐ ᑳᓂᑖᒥᓄᑑᑖᑫᓂᒡ᙮

ᐊᐊᐌ ᑕᔥ ᐐᓐ ᑭᔐᒪᓂᑑ ᑭᑮᐙᐸᑕᐃᑯᓈᓐ ᐋᓃᓐ ᐁᐲᒋᓵᑭᐃᓇᕽ᙮ ᐋᓃᔥ ᒣᒀ ᑫᔮᐱ ᐅᒪᒋ ᐃᔑᐌᐱᓰᒃ ᐁᑮᑎᓄᐎᐗᕽ, ᑭᑮᓂᐴᑕᒫᑯᓈᓐ ᐊᐊ X᙮

ᐋᔕ ᐐᓐ ᐅᒥᔅᑶ ᐁᑮᐃᔑ ᐃᓇᓯᑰᐗᕽ ᑾᔭᒃ ᒋᒥᓄᐐᒌᐎᒪᕽ ᑭᔐᒪᓂᑑᓐ, ᓇᐗᒡ ᓴ ᐐᓐ ᐄᑐᒃ X ᐁᐐᒌᐗᕽ ᑭᑲᐅᒋᐱᒫᒋᐃᑰᒥᓐ ᐁᑳ ᒋᐅᑎᓵᐸᑕᒧᐙᓯᐗᕽ ᑭᔐᒪᓂᑑᓐ ᐅᓂᔥᑳᑎᓯᐎᓂᓂ᙮

ᒣᒀ ᑕᔥ ᑮᓇᐎᓐᑦ ᑭᔐᒪᓂᑑ ᑳᔒᑫᓂᒥᑯᒡ ᑮᑎᓄᐎᐗᕽ, ᐐᓐ ᑕᔥ ᐐᓐ ᐅᓂᐳᐎᓂᓃᕽ ᐃᓂ ᐅᑯᓯᓴᓐ ᐋᒋᑯ ᑭᑮᐃᔑᑲᔥᑭᐃᑯᓈᓐ ᒋᓵᑭᐐᒌᐗᕽ᙮ ᓅᑯᒻ ᐃᑕᔥ ᐅᓵᑭᐋᑲᓇᐞ ᐁᑎᓄᐎᔭᕽ, ᓇᐗᒡ ᓴ ᐐᓐ ᐅᐱᒫᑎᓯᐎᓂᓃᕽ Xᑕᓐ ᑭᑲᐅᒋᐱᒫᒋᐃᑰᒥᓐ᙮

ᑫᔮᐱ ᑕᔥ ᑫᑰᓐ ᐊᐗᔑᒣ ᐊᓂᑕᑯᐊᔮᒪᑲᓐ ᑳᒦᓂᑰᔭᕽ᙮ ᑭᑑᒋ ᒥᓉᑕᒥᐃᑯᓈᓐ ᐊᐊ ᑭᔐᒪᓂᑑ ᐃᐃ ᑳᑮᐃᔑᒋᑫᐃᒥᓇᕽ ᑳᑎᐯᓂᒥᒥᓇᕽ ᒋᓴᔅ Xᑕᓐ᙮ ᒦᐗᓐ ᐃᓂ ᒋᓴᓲᓐ ᐋᔕ ᑳᑮᐅᒋᑌᐱᓇᒧᐗᕽ ᑭᔐᒪᓂᑑ ᐅᓵᑭᐐᒋᐙᑲᓇᐞ ᒋᑎᓄᐎᔭᕽ᙮

ᐃᐃᒫ ᐯᔑᒃ ᐃᓂᓂ ᑳᐊᔨᑎᑯᐸᓀᓐ, ᒦ ᐃᒫ ᑳᐅᒋᓈᑾᒃ ᒪᒋ ᐃᔑᐌᐱᓯᐎᓐ ᐊᑮᕽ᙮ ᒦᔥ ᐃᐃᒫ ᑲᑭᓇ ᐊᐎᔭᒃ ᑳᑮᐊᓂ ᐃᔑᐅᑎᓯᑯᐙᒡ ᓂᐳᐎᓐ, ᐋᓃᔥ ᑲᑭᓇ ᐊᐎᔭ ᑮᒪᒋᑑᑕᒻ᙮

ᑌᐺ ᒋᑆ ᒦᑭᐙᓂᐗᕽ ᐃᐃ ᐃᓈᑯᓂᑫᐎᓐ ᒨᓯᔅ ᑳᑮᐅᔑᐲᐊᕽ, ᐋᔕ ᑌᐺ ᑮᒪᒋ ᐃᔑᐌᐱᓯᐗᒃ ᑳᑮᐱᒫᑎᓯᐙᒡ ᐊᑮᕽ᙮ ᐃᐃᒫ ᑕᔥ ᒪᔑ ᐁᐊᔮᓯᓄᒃ ᐃᓈᑯᓂᑫᐎᓐ, ᑳᐐᓐ ᐃᓇᑭᒋᑳᑌᓯᓅᓐ ᐃᐃ ᒪᒋ ᐃᔑᒋᑫᐎᓐ ᐊᐎᔭ ᑳᑑᑕᕽ᙮

ᐃᐃᒫ ᑕᔥ ᐊᑯᓈᒃ ᑳᑮᐱᒫᑎᓯᒡ ᐋᑕᒻ ᑲᑭᓇ ᐊᐎᔭᒃ ᑳᐱᐊᑯᐱᒫᑎᓯᐙᒡ ᐲᓂᔥ ᐁᑮᐊᓂᐱᒫᑎᓯᒡ ᒨᓯᔅ, ᒥᒋᑲᑭᓇ ᑮᑖᐱᑕᐎᓂᐳᐗᒃ, ᐊᐴᔥᑫ ᐃᑕᐙ ᑫᐐᓇᐙ ᑮᓂᐳᐗᒃ ᐃᑭᐌᓂᐗᒃ ᐯᔑᑾᓐ ᑳᑮᐃᔑᒪᒋᑑᑕᓯᒀ, ᐋᑕᒻ ᑳᑮᐃᔑᒋᑫᒡ ᐁᑮᐱᓯᑕᓯᒃ ᐃᐃ ᑳᑮᐃᑯᒡ ᑭᔐᒪᓂᑑᓐ᙮ ᒦ ᐊᐌ ᐋᑕᒻ ᑮᑭᑭᓇᐙᓯᓈᑯᓯ ᑫᐃᓀᑖᑯᓯᓂᒡ ᐃᓂ ᐯᔑᒃ ᑫᐱᐊᔮᓂᒡ᙮

ᑳᐐᓐ ᑕᔥ ᒥᓯᐌ ᐯᔑᑴᑖᑯᓯᓰᐗᒃ ᐅᑯ ᑳᓃᔑᐙᒡ᙮ ᐋᓃᔥ ᑭᔐᒪᓂᑑ ᐅᒦᑭᐌᐎᓐ ᑳᐐᓐ ᐯᔑᑾᓐ ᐃᓀᑖᑾᓯᓅᓐ ᐋᑕᒻ ᐅᒪᒋᑑᑕᒧᐎᓐ ᑳᐃᓀᑖᑾᓂᓂᒃ᙮ ᑌᐺ ᓃᐱᐗᐞ ᐊᐎᔭᒃ ᑮᐅᒋᓂᐳᐗᒃ ᐃᐃᐌ ᑳᑮᐃᔑᒪᒋᑑᑕᕽ ᐊᐊ ᐯᔑᒃ ᐃᓂᓂ᙮ ᐃᐃ ᑕᔥ ᑭᔐᒪᓂᑑ ᐅᑭᔐᐙᑎᓰᑲᑖᑫᐎᓐ ᐗᐐᑫ ᐊᐗᔑᒣᐌᑖᑾᓂᓂ ᑳᐃᔑᒋᑫᒪᑲᓂᓂᒃ᙮ ᐅᒦᑭᐌᐎᓐ ᑲᔦ ᐊᐗᔑᒣᐌᑖᑾᓂᓂ, ᐋᐱᒋ ᓃᐱᐗᐞ ᐃᑭ ᐯᒫᑎᓯᐙᒡ ᐁᑮᑌᐱᓇᒧᐙᒡ, ᐁᐅᒋᒦᓂᑣ ᐅᑭᔐᐙᑎᓯᐎᓂᓃᕽ ᐃᓂ ᐯᔑᒃ ᐃᓂᓂᐗᓐ ᒋᓴᔅ Xᑕᓐ᙮

ᒦᓇᐙ ᐯᐸᑳᓀᑖᑾᓅᓐ ᑭᔐᒪᓂᑑ ᐅᒦᑭᐌᐎᓐ ᑲᔦ ᐅᒪᒋᑑᑕᒧᐎᓐ ᐊᐊ ᐯᔑᒃ ᐃᓂᓂ ᐋᑕᒻ᙮ ᐋᓃᔥ ᐋᐱᑎᕽ ᐃᑯ ᐁᑮᒪᒋᑑᑕᕽ ᐊᐊ ᐯᔑᒃ ᐃᓂᓂ, ᑭᑭᑭᔅ ᒪᒋᑑᑕᒧᐎᓐ, ᑮᐃᓈ ᐊᐊ ᐃᓂᓂ᙮ ᓅᑯᒻ ᐃᑕᔥ ᐐᓐ ᐃᐃ ᐁᑮᐊᐲᒋ ᐹᑏᓇᑎᓂᓂᑭᓐ ᐃᓂ ᐅᒪᒋᑑᑕᒧᐎᓂᐙᓐ ᐃᑭ ᐯᒫᑎᓯᐙᒡ, ᐋᓇᐐᓐ ᐃᑯ ᐁᑌᐃᓀᑖᑯᓯᓯᒀ ᔖᑰᒡ ᐃᑕᔥ ᐃᑯ ᐅᑮᔕᐌᓂᒥᑯᐙᓐ ᑭᔐᒪᓂᑑᓐ: ᑳᐐᓐ ᑫᑰᓐ ᑭᑎᓇᑭᒋᑳᓱᓰᒻ, ᐃᓈᐗᒃ᙮

ᑌᐺ ᓴ ᐊᐊᐌ ᐯᔑᒃ ᐃᓂᓂ ᑳᑮᒪᒋᑑᑕᕽ, ᒦ ᐃᒫ ᑳᐅᒋᑲᔥᑭᒋᑫᒪᑲᒃ ᓂᐳᐎᓐ, ᑲᑭᓇ ᐯᒫᑎᓯᐙᒡ ᐁᐅᒋᓂᐳᐙᒡ ᐊᐊ ᐯᔑᒃ ᑳᑮᑑᑕᕽ᙮ ᓇᐗᒡ ᐃᑕᔥ ᐐᓐ ᑕᑭᒋᑲᔥᑭᒋᑫᒪᑲᓂᓂ ᐃᐃ ᑳᑑᑕᕽ ᐊᐊ ᐯᔑᒃ ᐃᓂᓂ ᒋᓴᔅ X᙮ ᐋᓃᔥ ᑲᑭᓇ ᑳᒦᓂᑣ ᑭᔐᒪᓂᑑᓐ ᐅᔕᐌᒋᑫᐎᓂᓂ ᐁᔑᐌᓅᑕᓂᓂᒃ, ᑲᔦ ᑳᔑᒦᓂᑣ ᑾᔭᑾᑭᒥᑰᐎᓐ, ᐸᑭᓈᑫᐎᓂᕽ ᑕᐃᔑᐱᒫᑎᓯᐗᒃ, ᐋᓃᔥ ᐅᑲᔥᑭᑕᒫᑯᐙᓐ Xᑕᓐ ᑳᑎᐯᓂᒥᒥᓇᕽ᙮

ᒦ ᐅᐌ ᐁᔑᐐᑕᒫᓐ: ᐅᐅ ᐯᔑᒃ ᒪᒋᑑᑕᒧᐎᓐ ᐋᑕᒻ ᑳᑮᑑᑕᕽ, ᑮᐅᒋᓂᐳᐗᑭᒫᐗᒃ ᑲᑭᓇ ᐯᒫᑎᓯᐙᒡ᙮ ᐯᔑᑾᓐ ᐃᑕᔥ ᑲᔦ ᐃᐃ ᐯᔑᒃ ᑾᔭᑯᒋᑫᐎᓐ ᑳᑮᑑᑕᕽ ᐊᐊ ᐯᔑᒃ, ᑲᑭᓇ ᑭᐸᑭᑎᓂᑰᒻ ᐅᒋ ᐃᓈᐗᒃ, ᒦᓈᐗᒃ ᐃᑕᔥ ᒋᐱᒫᑎᓯᐙᒡ᙮

ᔑᑾ ᐊᐌ ᐯᔑᒃ ᐃᓂᓂ ᐁᑮᓇᐃᑕᓯᒃ ᐃᐃ ᑳᑮᐃᑯᒡ ᑭᔐᒪᓂᑑᓐ, ᓃᐱᐗᐞ ᐊᐎᔭᒃ ᐅᑮᐅᒋᑲᔥᑭᐃᑯᓈᐙ ᒋᒪᒋ ᐃᔑᐌᐱᓯᐙᒡ᙮ ᐊᐊᐌ ᑕᔥ ᒦᓇᐙ ᐯᔑᒃ ᐃᓂᓂ ᒋᓴᔅ X ᑮᓇᐃᑕᒻ, ᒦᑕᔥ ᐯᔑᑾᓐ ᓃᐱᐗᐞ ᐊᐎᔭᒃ ᑕᐅᒋ ᐃᓇᓵᐗᒃ ᒋᒥᓄᐐᒌᐙᐙᒡ ᑭᔐᒪᓂᑑᓐ᙮

ᑭᔐᒪᓂᑑ ᐅᑮᐸᑭᑎᓈᓐ ᐃᐃ ᐅᑎᓈᑯᓂᑫᐎᓐ ᒋᐊᓂᐊᐗᔑᒣᔥᑳᓂᒃ ᒪᒋᑑᑕᒧᐎᓐ᙮ ᐊᐲᔥ ᑳᐊᓂ ᐃᔑᓇᑭᔥᑳᒃ ᐃᐃ ᒪᒋᑑᑕᒧᐎᓐ, ᐊᐗᔑᒣ ᑮᐊᓂ ᐃᔑᓈᑾᓂᓂ ᑭᔐᒪᓂᑑ ᐅᔕᐌᒋᑫᐎᓐ᙮

ᒦ ᐋᓃᔥ ᐅᐅᐌ ᐃᔥᒀᒡ ᐁᔑᐐᑕᒫᓐ: ᒪᒋᑑᑕᒧᐎᓐ ᐋᐱᒋ ᑮᑲᔥᑭᒋᑫᒪᑲᓐ, ᐋᓃᔥ ᑲᑭᓇ ᐱᑯ ᐊᐎᔭᒃ ᑮᓂᐳᐗᒃ᙮ ᒦᑕᔥ ᑲᔦ ᐯᔑᑾᓐ ᓃᐱᐗᐞ ᑲᔥᑭᒋᑫᒪᑲᓂᓂ ᑭᔐᒪᓂᑑ ᐅᔕᐌᒋᑫᐎᓐ, ᐋᓃᔥ ᐅᑎᔑᐋᐞ ᐃᐃ ᐯᒫᑎᓯᓂᒡ ᑾᔭᒃ ᒋᒥᓄᐐᒌᐎᑯᒡ᙮ ᑭᑎᔑᐃᑯᓈᓐ ᐊᐸᓀ ᑯ ᒋᐱᒫᑎᓯᐗᕽ, ᐃᐃᐌ ᒋᓴᔅ Xᑕᓐ ᑳᑮᑑᑕᐎᒥᓇᕽ᙮

ᐋᓃᓐ ᐃᑕᔥ ᑫᐃᑭᑐᔭᑭᐸᓐ? ᑫᔮᐱ ᓇ ᑭᑲᓂ ᐃᔑᐱᒫᑎᓯᒥᓐ ᒪᒋᑑᑕᒧᐎᓂᕽ ᐊᐗᔑᒣ ᐱᑯ ᒋᐊᓂᐊᔮᒪᑲᓂᓂᒃ ᑭᔐᒪᓂᑑ ᐅᔖᐌᒋᑫᐎᓐ?

ᑳᐐᓐ ᑲᓇᑫ ᑕᐃᔑᓈᑾᓯᓅᓐ! ᑭᑎᓀᑖᑯᓯᒥᓐ ᐄᑐᒃ ᐁᑮᐃᔑᓂᐳᔭᕽ ᒪᒋᑑᑕᒧᐎᓐ ᒋᑎᐯᓂᒥᑯᓯᐗᕽ: ᑳᐐᓐ ᑕᔥ ᐃᔑᓈᑾᓯᓅᓐ ᑫᔮᐱ ᒋᐃᔑᐱᒫᑎᓯᔭᑭᐸᓐ ᐁᑎᐯᓂᒥᑯᔭᕽ ᒪᒋᑑᑕᒧᐎᓐ᙮

ᑫᒋᓈᒡ ᐋᔕ ᑭᑭᑫᑖᓈᐙᑐᒃ ᐅᐅ: ᑲᑭᓇ ᑳᑕᔑᔭᕽ ᑳᑮᐃᔑᓰᑲᐊᑖᑰᔭᕽ ᒋᐐᒌᐗᕽ ᐊᐊ X ᒋᓴᔅ, ᑕᑯ ᑲᔦ ᐃᐌ ᑭᑮᐃᔑᓰᑲᐊᑖᓱᒥᓐ ᒋᐐᒌᐎᑯᐗᕽ ᐅᓂᐳᐎᓐ᙮

ᐊᐲ ᑕᔥ ᑳᑮᓰᑲᐊᑖᓱᔭᕽ, ᑭᑮᐐᒋᓇᐃᓂᑰᒫᓈᓐ ᐊᐊ X ᐁᑮᐐᒋᐃᐌᔭᕽ ᐃᐃᒫ ᐅᓂᐳᐎᓂᕽ᙮ ᔑᑾ ᑕᔥ ᐯᔑᑾᓐ ᐊᐊᐌ ᐌᔫᓯᒥᓐᒡ ᐁᑮᐋᐸᒋᑑᒡ ᐃᐃᐌ ᒫᐗᒡ ᑳᑭᒋ ᐃᓀᑖᑾᓂᓂᒃ ᐅᒪᔥᑲᐎᓰᐎᓐ ᐁᑮᑮᐌᐱᒫᑎᓯᐋᒡ Xᑕᓐ ᑳᑮᓂᐳᓂᒡ, ᒦᑕᔥ ᐃᐃ ᑫᑮᓇᐎᓐᑦ ᐯᔑᑾᓐ ᐅᔥᑲᔭᐄᕽ ᒋᐃᔑᐱᒫᑎᓯᔭᕽ᙮

ᐃᓇᔥᑫ ᓴ ᐯᔑᑾᓐ ᑭᑲᔑᑕᑯᐐᒌᐙᓈᓐ, ᐯᔑᑾᓐ ᐁᑮᐃᔑᐅᓂᐳᐎᓂᔭᕽ ᐐᓐ ᑳᑮᐃᔑᓈᑾᓂᓂᒃ ᐅᓂᐳᐎᓐ X᙮ ᒦᔥ ᐃᐃ ᑖᐱᔥᑰ ᐯᔑᑾᓐ ᑭᑲᔑᑕᑯᐐᒌᐙᓈᓐ ᒋᐃᔑᑮᐌᐱᒫᑎᓯᐃᑰᔭᕽ ᐐᓐ ᐃᑯ ᑳᑮᐃᔑ ᑮᐌᐱᒫᑎᓯᐃᓐᒡ᙮

ᐋᓃᔥ ᑭᑭᑫᑖᒥᓐ ᐅᐅ: ᐃᐃᐌ ᐅᑖᓈᕽ ᑳᑮᐃᔑᐱᒫᑎᓯᔭᑭᐸᓐ ᑮᐐᑖᐱᓇᒋᑳᑌ ᐃᐃᒫ ᒋᓴᔅ ᑳᑮᐃᔑᐊᑯᓴᑲᐃᑲᓂᐎᒡ ᐋᔑᑌᔮᑎᑯᕽ᙮ ᒦ ᐃᐌ ᒋᐅᒋᐋᓂᓴᒃ ᐃᐃ ᑳᐐᓂᑖ ᒪᒋᒋᑫᒪᑲᒃ ᐱᒫᑎᓯᐎᓂᒫᕽ, ᒦᔥ ᐃᐃᐌ ᐁᑳ ᒦᓇᐙ ᑫᔮᐱ ᒋᐊᐗᑳᓂᑯᓯᐗᕽ ᐃᐃ ᒪᒋᑑᑕᒧᐎᓐ᙮

ᐋᓃᔥ ᐊᐎᔭ ᑳᓂᐳᒡ ᑳᐐᓐ ᐊᐎᔭᓐ ᐅᑎᐯᓂᒥᑯᓰᓐ, ᒪᒋᑑᑕᒧᐎᓐ ᑳᐐᓐ ᐅᑲᐊᐗᑳᓂᑯᓰᓐ᙮

ᑮᔥᐱᓐ ᐃᐃᐌ ᐃᔑᓈᑯᓯᔭᕽ ᐁᑮᐐᒋᓂᐴᒪᕽ ᐊᐊ X, ᒦᑕᔥ ᐃᐃ ᑭᑌᐺᑖᒥᓐ ᑲᔦ ᒋᐐᒋᐱᒫᑎᓰᒪᕽ᙮

ᑭᑭᑫᑖᒥᓐ ᐊᐊ X ᐁᑮᑮᐌᐱᒫᑎᓯᐃᓐᒡ ᓂᐳᐎᓂᕽ ᐅᒋ, ᒦᓇᐙ ᐐᑳ ᒋᓂᐳᓯᒃ᙮ ᑳᐐᓐ ᒦᓇᐙ ᐐᑳ ᐅᑲᑲᔥᑭᐃᑯᓰᓐ ᐃᐃ ᓂᐳᐎᓐ ᒋᑎᐯᓂᒥᑯᒡ᙮

ᐃᐃᐌᔥ ᐁᑮᓂᐳᒡ ᐊᐊ X, ᑮᐃᔑᓂᐳ ᐁᑳ ᒦᓇᐙ ᐐᑳ ᒋᑲᑴᑎᐯᓂᒥᑯᓯᒃ ᒪᒋᑑᑕᒧᐎᓐ᙮ ᐃᐃᐌᔥ ᓅᑯᒻ ᐁᔑᐱᒫᑎᓯᒡ ᐅᐱᒫᑎᓰᑕᐙᓐ ᑭᔐᒪᓂᑑᓐ᙮

ᒦᔥ ᐯᔑᑾᓐ ᑫᑮᓇᐙ ᑭᑖᐃᓀᓂᑎᓱᒻ, ᐁᑮᐃᔑᓂᐳᔦᒃ ᐐᑳ ᒦᓇᐙ ᒋᑲᔥᑭᐃᑯᓯᐌᒃ ᒪᒋᑑᑕᒧᐎᓐ, ᔑᑾ ᒣᔥᑾᒡ ᒋᐱᒫᑎᓰᑕᐌᒃ ᑭᔐᒪᓂᑑ, ᒦ ᐃᐌ ᐁᐐᒌᐎᓀᒃ X ᒋᓴᔅ᙮

ᑫᑯ ᒦᓇᐙ ᑫᔮᐱ ᒪᒋᑑᑕᒧᐎᓐ ᑕᑕᔑ ᐅᑭᒫᑲᑖᑫᒪᑲᓯᓅᓐ ᐃᐃᒫ ᑭᐐᔭᐎᐙᕽ ᑫᓂᐴᒪᑲᑭᓐ, ᒦᓇᐙ ᒋᓇᐃᑕᓯᐌᒃ ᐃᐃᐌ ᑭᑫᑌᐃᓈᑎᓯᐎᓂᐙ ᐙᑲᑴᐃᔑᒋᑫᒪᑲᒃ᙮

ᑳᐐᓐ ᑫᑰᓐ ᐁᔑᐸᑫᓯᐎᓀᔦᒃ ᑭᑲᒦᑭᐙᑕᒪᐙᑕᓰᒻ ᐃᐃ ᒪᒋᑑᑕᒧᐎᓐ ᒋᑕᔑᐋᐸᑕᒃ ᒪᒋᒋᑫᐎᓂᕽ ᐃᓇᑫ᙮ ᒣᔥᑾᒡ ᐃᑕᔥ ᑭᑲᒦᓈᐙ ᑭᔐᒪᓂᑑ ᑭᐐᔭᐎᐙᓐ ᐐᓂᑯ ᒋᑎᐯᑕᕽ᙮ ᑮᓇᐙ ᑭᑮᐃᓀᑖᑯᓯᒻ ᐁᑮᓂᐳᔦᒃ, ᓅᑯᒻ ᐃᑕᔥ ᑭᐱᒫᑎᓯᒻ᙮ ᒦ ᐃᐌ ᒥᓯᐌ ᐃᔑᐸᑭᑎᓂᑎᓱᑲᑕᐎᒃ ᑭᔐᒪᓂᑑ ᐃᐃᒫ ᒋᐃᓈᐸᑎᓯᔦᒃ ᑾᔭᑯᒋᑫᐎᓂᕽ᙮

ᑫᑯ ᐐᓐ ᒪᒋᑑᑕᒧᐎᓐ ᑭᑲᓂᐅᑭᒫᑲᑖᑯᓰᓈᐙ᙮ ᐋᓃᔥ ᑳᐐᓐ ᐃᓈᑯᓂᑫᐎᓂᕽ ᑭᑕᔑ ᑎᐯᑖᑯᓯᓰᒻ, ᐃᐃᒫ ᑕᔥ ᑭᔐᒪᓂᑑ ᐅᔕᐌᒋᑫᐎᓂᕽ᙮

ᐋᓃᓐ ᑕᔥ ᑫᐃᓀᑖᑾᒃ? ᒦ ᓇ ᐱᓵᓂᑯ ᒋᐊᓂᒪᒋᑑᑕᒪᕽ, ᐃᐃᐌ ᐁᑭᑫᑕᒪᕽ ᐁᑳ ᐃᓈᑯᓂᑫᐎᓂᕽ ᐁᐅᒋᑎᐯᑖᑯᓯᓯᐗᕽ, ᐃᐃᒫᔥ ᐁᑕ ᑭᔐᒪᓂᑑ ᐅᔕᐌᒋᑫᐎᓂᕽ ᐁᐃᔑᑎᐯᑖᑯᓯᔭᕽ? ᑳᐐᓐ ᑲᓇᑫ ᑖᐃᓀᑖᑾᓯᓅᓐ᙮

ᑳᐐᓐ ᐃᓇ ᑭᑭᑫᑕᓰᒻ? ᑮᔥᐱᓐ ᐸᑭᑎᓂᑎᓱᔦᒃ ᐸᑳᓐ ᐊᐎᔭ ᒋᐅᑕᐗᑳᓂᒥᓀᒃ ᑲᔦ ᒋᓇᐃᑕᐌᒃ ᐊᐎᔭ, ᒦᑕᔥ ᐃᐃ ᑌᐺ ᒋᐅᑕᓄᑮᐋᑲᓂᒥᓀᒃ ᐊᐊ ᑳᑎᐯᓂᒥᓀᒃ ᐁᓇᐃᑕᐌᒃ᙮ ᑯᒫ ᒪᒋᑑᑕᒧᐎᓐ ᑭᑲᓇᐃᑖᒻ, ᒦ ᐄᑐᒃ ᐃᐃᒫ ᐌᒌᒃ ᓂᐳᐎᓐ᙮ ᑯᒫ ᑲᔦ ᑭᔐᒪᓂᑑ ᑭᑲᓇᐃᑕᐙᐙ, ᒦᑕᔥ ᐃᐃᒫ ᒋᐅᒋ ᐃᓇᓯᑰᔦᒃ ᑾᔭᒃ ᒋᒥᓄᐐᒌᐌᒃ᙮

ᓅᑯᒻ ᐃᑕᔥ ᑭᔐᒪᓂᑑ ᑕᓇᓈᑯᒫ! ᐌᑎ ᐅᑖᓈᕽ ᑭᑮᐱᐊᔨᑎᒻ ᒪᒋᑑᑕᒧᐎᓐ ᐁᑮᐅᑕᐗᑳᓂᒥᑯᔦᒃ, ᐁᑮᑕᔑᑎᐯᓂᒥᑯᔦᑭᐸᓐ᙮ ᒦᓇᐙ ᑕᔥ ᐃᑯᑎᕽ ᐸᑳᓐ ᑭᑮᐃᔑᓇᓇᐃᑖᒻ, ᐁᓂᑯᑯᑌᐁᔦᒃ ᐁᑮᑑᑕᒣᒃ ᑳᐃᔑᐙᐸᑕᒣᒃ ᐃᐃ ᑭᑭᓄᐊᒫᑫᐎᓐ ᑳᑮᒦᓂᑰᔦᒃ᙮

ᑲᔦ ᐃᐌ ᐊᐲ ᑭᑮᐋᐱᔅᑯᓂᑯᐙ ᑭᔐᒪᓂᑑ ᒪᒋᑑᑕᒧᐎᓐ ᒋᑎᐯᓂᒥᑯᓯᐌᒃ᙮ ᒦᑕᔥ ᐁᑾᐞ ᑭᔐᒪᓂᑑ ᒋᐅᑕᓄᑮᐋᑲᓂᒥᓀᒃ ᑳᑾᔭᑾᒃ ᐃᑕᔥ ᒋᑑᑕᒣᒃ᙮

ᑕᑲ ᑕᔥ ᑳᓂᑖᐃᔑᑮᔗᓈᓂᐗᕽ ᓂᐐᐋᐸᒋᑑᓇᓐ ᐁᐗᑫᓂᓯᑐᑕᓯᐌᒃ ᐁᒥᒋ ᐃᓂᓃᐎ ᐱᒫᑎᓯᔦᒃ᙮ ᐃᑯᑎᕽ ᐃᑯ ᒥᓯᐌ ᑭᑮᐸᑭᑎᓂᑎᓱᒻ ᑳᐐᓀᑖᑾᒃ ᒋᐃᓈᐸᒋᐃᑯᔦᒃ ᐁᑮᐅᑕᐗᑳᓂᒥᑯᔦᒃ, ᑲᔦ ᑲᑭᓇ ᑫᑰᓐ ᒪᒋᒋᑫᐎᓐ ᐁᑮᐊᓂ ᐌᓅᒋ ᑑᑕᒣᒃ᙮ ᒦᑕᔥ ᐯᔑᑾᓐ ᓅᑯᒻ ᐃᔑᒥᓯᐌᐸᑭᑎᓂᑎᓱᒃ ᑾᔭᑯᒋᑫᐎᓂᕽ, ᒦ ᐃᒫ ᒋᐃᔑᐋᐸᑎᓯᔦᒃ, ᒋᐸᑳᓂᐊᐗᑳᓂᑰᔦᒃ, ᒥᓯᐌ ᐱᑯ ᑭᔐᒪᓂᑑ ᒋᑎᐯᓂᒥᓀᒃ᙮

ᐃᓇᔥᑫ ᒣᒀ ᐅᑖᓈᕽ ᐁᑮᐅᑕᐗᑳᓂᒥᑯᔦᒃ ᒪᒋᑑᑕᒧᐎᓐ, ᑳᐐᓐ ᐃᐌ ᐊᐲ ᑭᑮᑎᐯᓂᒥᑯᓰᐙᒻ ᑳᐃᔑᐊᑕᐌᑕᕽ ᑭᔐᒪᓂᑑ ᒋᑑᑕᒧᐌᒃ᙮

ᐌᑯᓀᓐ ᑕᔥ ᑳᑮᐅᑎᓇᒣᒃ ᐁᑮᓂᑖᑑᑕᒣᒃ ᐃᓂ ᑫᑰᓇᓐ ᓅᑯᒻ ᑳᐊᑲᑌᑕᒣᒃ? ᐃᓇᔥᑫ ᐃᓂᐌᓂᐗᓐ ᐁᑑᑕᕽ ᐊᐎᔭ, ᒦ ᐁᑕ ᓂᐳᐎᓐ ᒋᐅᑎᓇᕽ᙮

ᐋᔕ ᑕᔥ ᑭᔐᒪᓂᑑ ᑭᑮᐋᐸᐅᑯᐙ ᐃᐃᒫ ᑳᑮᐃᔑᑎᐯᓂᒥᑯᔦᑭᐸᓐ ᒪᒋᑑᑕᒧᐎᓐ, ᐐᓐ ᐃᑕᔥ ᒣᔥᑾᒡ ᐁᑎᐯᓂᒥᓀᒃ ᑖᐱᔥᑰ ᐁᐅᑕᓄᑮᐋᑲᓂᒡ᙮ ᓅᑯᒻ ᐃᑕᔥ ᒦ ᐅᐌ ᐁᔑᐅᑎᓯᔦᒃ, ᒥᓯᐌ ᑭᔐᒪᓂᑑ ᐁᑎᐯᑕᕽ ᑭᐱᒫᑎᓯᐎᓂᐙᓐ, ᐲᓂᔥ ᑲᔦ ᐁᐐᒦᓂᓀᒃ ᐃᐃ ᐱᒫᑎᓯᐎᓐ ᐁᑳ ᑫᐌᒀᐊᔮᓯᓄᒃ᙮

ᓇᔥᑫ ᒪᒋᑑᑕᒧᐎᓐ ᐊᐎᔭ ᐁᑑᑕᕽ ᓂᐳᐎᓂᓂ ᑕᐅᑎᓯ᙮ ᐃᐃᐌᓂ ᑕᔥ ᐐᓐ ᑭᔐᒪᓂᑑ ᑳᒥᒋᒦᑭᐌᒡ ᐱᒫᑎᓯᐎᓐ, ᑳᐐᓐ ᐐᑳ ᑕᐌᒀᓭᓯᓂᓂ᙮ ᒦ ᐃᐌ ᑭᑑᒋᒦᓂᑰᒥᓐ X ᒋᓴᔅ ᑳᑎᐯᓂᒥᓇᕽ ᐁᐐᒌᐎᓇᕽ᙮

ᓃᒋᐅᑌᐺᑕᒨᒃ! ᑫᒋᓈᒡ ᑭᑲᓂᓯᑐᑖᒻ ᐃᐃᐌ ᐙᐃᑭᑐᔮᓐ ᐋᓃᔥ ᑲᑭᓇ ᑭᑭᑫᑖᓈᐙ ᐃᓈᑯᓂᑫᐎᓐ ᐁᓀᑖᑾᒃ, ᒣᒀ ᐁᐱᒫᑎᓯᒡ ᐁᑕ ᐊᐊᐌ ᐃᓂᓂ, ᐅᐐᑕᒫᑯᓐ ᑫᐃᔑᒋᑫᒡ᙮

ᒦ ᐅᐌ ᐁᓀᑖᑾᒃ, ᐊᐊ ᐃᑴ ᑳᐅᓈᐯᒥᒡ, ᐃᓈᑯᓂᑳᓂᐗᓐ ᑖᐱᔥᑰ ᐁᒥᒋᒪᐱᓱᒡ ᐊᐊ ᐃᑴ ᐁᑳ ᐐᑳ ᒋᓇᑲᓈᓯᒃ ᐃᓂ ᐅᓈᐯᒪᓐ ᒣᒀ ᐁᐱᒫᑎᓯᓂᒡ᙮ ᑮᔥᐱᓐ ᑕᔥ ᓅᑌᐃᔥᒀᐱᒫᑎᓯᓂᒡ, ᒦᑕᔥ ᐃᐃ ᐁᓈᑯᓂᑲᓂᐎᒡ ᐊᐊ ᐃᑴ ᒋᐸᐱᓂᔅᑴᐊᔮᒡ ᐃᐃᒫ ᑳᑮᐃᔑᑎᐯᓂᒥᑯᐸᓐ ᐅᓈᐯᒪᓐ᙮

ᑮᔥᐱᓐ ᐃᑕᔥ ᑫᔮᐱ ᐁᐱᒫᑎᓯᓂᒡ ᐅᓈᐯᒪᓐ, ᐊᓂᑳᒋᐐᒌᐙᒡ ᐸᑳᓐ ᐃᓂᓂᐗᓐ, ᐊᓅᒋᑯ ᐃᓈᑎᓯ ᑕᐃᓈ ᐊ ᐃᑴ᙮ ᑮᔥᐱᓐ ᐃᑕᔥ ᐐᓐ ᓂᐳᓂᒡ ᐅᓈᐯᒪᓐ, ᒦᑕᔥ ᐃᐃ ᒋᐃᓈᑯᓂᑲᓂᐎᒡ ᑌᐺ ᐁᐱᓂᔅᑴᐊᔮᒡ ᐊᐊ ᐃᑴ᙮ ᒦᑕᔥ ᐊᓂᐐᑎᑫᒫᒡ ᐸᑳᓐ ᐃᓂᓂᐗᓐ, ᑳᐐᓐ ᐁᑾᐞ ᑫᑰᓐ ᑕᐃᓀᓂᒫᓰ᙮

ᓃᒋᐅᑌᐺᑕᒨᒃ, ᑫᑮᓇᐙ ᐯᔑᑾᓐ ᑭᑎᓀᑖᑯᓯᒻ ᑖᐱᔥᑰ ᐁᑮᓂᐳᔦᒃ, ᒋᐅᒋᑎᐯᓂᒥᑯᓯᐌᒃ ᐃᓈᑯᓂᑫᐎᓐ, ᐋᓃᔥ ᑭᑑᒋᓴᑫᑖᑯᓯᒻ ᐃᐃᒫ ᐅᐐᔭᐎᕽ X᙮ ᒦᔥ ᐃᐃᒫ ᐊᑯᓈᒃ ᐌᒋᑎᐯᓂᒥᓀᒃ ᐊᐊᐌ ᑳᑮᑮᐌᐱᒫᑎᓯᐃᓐᒡ ᓂᐳᐎᓂᕽ ᐅᒋ᙮ ᒦ ᓴ ᐅᐌ ᑳᐅᒋᑮᐌᐱᒫᑎᓯᐃᓐᒡ, ᒋᐅᒋᑭᑖᐸᒋᐃᓇᕽ ᑭᔐᒪᓂᑑ᙮

ᐌᑎ ᐅᑖᓈᕽ ᑳᐱ ᐃᔑᐱᒫᑎᓯᔭᕽ, ᐋᓃᓐ ᐃᑯ ᐙᐊᔨᑎᔭᕽ ᑭᑮᐊᔨᑎᒥᓐ᙮ ᒦ ᐃᐌ ᐊᐲ ᒪᒋᒥᓴᐌᑕᒧᐎᓇᓐ ᑮᒨᑮᒪᑲᓅᓐ, ᒦᑕᔥ ᐃᐃᐌ ᐃᓈᑯᓂᑫᐎᓐ ᑳᑑᑖᑯᔭᕽ᙮ ᑭᐐᔭᐎᓈᓂᕽ ᑲᔦ ᑮᐃᔑᐊᓄᑮᒪᑲᓅᓐ, ᐲᓂᔥ ᓂᐳᐎᓐ ᐁᑮᐊᓂᐅᒌᒪᑲᒃ ᐃᐃᒫ ᑭᑎᔑᒋᑫᐎᓂᓈᓂᕽ᙮

ᐋᔕ ᑕᔥ ᑭᑮᐋᐸᐅᑯᓈᓐ ᑭᔐᒪᓂᑑ, ᐁᑳ ᒦᓇᐙ ᒋᒥᒋᒪᐱᓂᑯᓯᐗᕽ ᐃᓈᑯᓂᑫᐎᓐ᙮ ᑭᑮᓂᐳᒥᓐ ᐃᓀᑖᑾᓐ, ᐁᑳ ᑫᔮᐱ ᒋᑎᐯᓂᒥᑯᓯᐗᕽ ᐃᐃᐌ ᑳᑮᒥᒋᒪᐱᓂᑯᔭᕽ᙮ ᑳᐐᓐ ᑫᔮᐱ ᑭᑎᔑᐊᓄᑲᐙᓯᐙᓈᓐ ᑭᔐᒪᓂᑑ ᑫᑌᐊᔭᐄᕽ ᐃᓇᑫ ᐃᓈᑯᓂᑫᐎᓐ ᑳᐃᔑᐲᐃᑳᑌᒃ᙮ ᐅᔥᑲᔭᐄᕽ ᐃᓇᑫ ᑭᑎᔑᐊᓄᑲᐙᓈᓐ, ᐅᔥᑲᔭᐄᕽ ᐁᐃᔑᐃᒥᓇᕽ ᑭᔐᒪᓂᑑ ᐅᑕᒑᑾᓐ᙮

ᐋᓃᓐ ᐃᑕᔥ ᑫᐃᑕᒪᕽ ᐃᓈᑯᓂᑫᐎᓐ? ᒦ ᓇᔥ ᐃᐃᐌ ᑎᐱᓇᐌ ᐁᒪᒋᐊᔭᐄᐗᕽ ᐃᓈᑯᓂᑫᐎᓐ? ᑳᐐᓐ ᑖᐃᓀᑖᑾᓯᓅᓐ᙮ ᒦ ᐄᑐᒃ ᐃᐃᒫ ᐃᓈᑯᓂᑫᐎᓂᕽ ᐌᒋᑭᑫᑕᒫᓐ ᐌᑯᓀᓐ ᐃᐃ ᒪᒋᑑᑕᒧᐎᓐ᙮ ᐃᓇᔥᑫ ᑳᐐᓐ ᓂᑖᑮᑭᑫᑕᓰᓐ ᐌᑯᓀᓐ ᐃᐃ ᒥᓴᐎᓇᒫᑫᐎᓐ, ᒦ ᐁᑕ ᐃᓈᑯᓂᑫᐎᓐ ᐁᑮᐃᑭᑑᒪᑲᒃ: ᑳᐐᓐ ᑭᑲᒥᓴᐎᓈᑫᓰ, ᐁᑮᐃᑯᔮᓐ᙮

ᐃᐃᐌ ᒪᒋᑑᑕᒧᐎᓐ ᑮᐃᔑᓭᒪᑲᓐ ᒋᐅᒋᑳᒋᒋᐃᑯᔮᓐ, ᐁᑮᐃᔑᒥᑲᐙᐃᑯᔮᓐ ᐃᐃᒫ ᐃᓈᑯᓂᑫᐎᓂᕽ ᑳᐃᑭᑑᒪᑲᒃ: ᑳᐐᓐ ᑭᑲᒥᓴᐎᓇᒫᑫᓰ, ᐁᑮᐃᑭᑑᒪᑲᒃ᙮ ᒦ ᐃᒫ ᑳᐃᔑᑲᔥᑭᐃᑯᔮᓐ ᑲᑭᓇ ᑫᑰᓐ ᒋᒥᓴᐎᓇᒫᓐ ᐁᑳ ᑫᐃᔑᒥᓴᐌᑕᓯᐙᐹᓐ᙮ ᐃᐃᒫ ᑕᔥ ᐃᓈᑯᓂᑫᐎᓐ ᐊᔮᓯᓄᒃ, ᒦ ᐃᒫ ᐁᔑᑆᐙᑕᒃ ᐃᐃ ᒪᒋᑑᑕᒧᐎᓐ᙮

ᓃᓐ ᐋᓃᔥ ᓂᑮᐱᒫᑎᔅ ᒋᑆ ᒫᒌᑭᑫᑕᒫᓐ ᐃᓈᑯᓂᑫᐎᓐ: ᑫᑯ ᒫᔑᒋᑫᑫᓐ, ᐁᐃᑯᔮᓐ᙮ ᐹᓂᒫᔥ ᐁᑮᑭᑫᑕᒫᓐ ᐃᐃ ᐃᓈᑯᓂᑫᐎᓐ: ᑫᑯ ᐐᓐ ᐃᔑᒋᑫᑫᓐ, ᐁᐃᑯᔮᓐ, ᒦ ᐸᔦᔥ ᐁᑮᒫᒌᒥᓴᐌᑕᒫᓐ ᐃᐃᐌ ᒋᑑᑕᒫᓐ ᑳᑮᐅᒋᐃᑯᔮᓐ᙮

ᐊᒦ ᐃ ᓂᑮᓂᑉ ᐁᐃᓀᑖᑾᒃ᙮ ᐃᐃᐌ ᑕᔥ ᐃᓈᑯᓂᑫᐎᓐ ᐱᒫᑎᓯᐎᓐ ᑫᑮᒦᓂᑯᔮᐹᓐ, ᓃᓐ ᐃᑕᔥ ᓂᑮᐃᓇᓯᑯᓐ ᒋᓂᐳᔮᓐ᙮

ᐃᐃᐌ ᒪᒋᑑᑕᒧᐎᓐ ᑮᐃᔑᓭᒪᑲᓐ ᐃᓈᑯᓂᑫᐎᓂᕽ ᐋᓃᓐ ᑫᔑᑲᔥᑭᐃᑯᔮᓐ ᐁᑮᐃᔑᐗᔦᔑᒥᑯᔮᓐ᙮ ᒦᑕᔥ ᐃᐃᒫ ᐁᑮᐃᔑᐊᓄᑮᒪᑲᒃ ᐃᓈᑯᓂᑫᐎᓂᕽ ᓂᑮᓂᓯᑯᓐ᙮

ᒦ ᐅᐌ ᐁᑭᑐᔮᓐ: ᐃᓂ ᐃᓈᑯᓂᑫᐎᓇᓐ ᒦ ᐃᒫ ᒫᒪᐤ ᐅᒌᒪᑲᓅᓐ ᑭᔐᒪᓂᑑᕽ᙮ ᐁᑕᓱᐯᔑᑾᑭᓐ ᑕᔥ ᐃᓈᑯᓂᑫᐎᓇᓐ ᐁᒫᒪᐗᑌᑭᓐ ᑲᔦ ᐅᒌᒪᑲᓅᓐ ᑭᔐᒪᓂᑑᕽ ᐁᑾᔭᑾᑭᓐ ᑲᔦ ᑕᔥ ᐁᐅᓂᔑᔑᑭᓐ᙮

ᒦ ᓇ ᑕᔥ ᒋᐃᑭᑐᔮᓐ, ᐃᐃᐌ ᑳᐅᓂᔑᔑᕽ ᐃᓈᑯᓂᑫᐎᓐ ᐁᑮᐃᓇᓄᑮᒪᑲᒃ ᒋᓂᐳᔮᓐ? ᑳᐐᓐ ᐐᓐ ᑖᐃᓀᑖᑾᓯᓅᓐ᙮ ᒪᒋᑑᑕᒧᐎᓐ ᑳᑭᑭᔥᑳᑯᔮᓐ ᐅᔕ ᑮᐃᔑᒋᑫᒪᑲᓐ᙮ ᐃᐃᒫ ᑮᐃᔑᐊᓄᑮᒪᑲᓐ ᑳᐅᓂᔑᔑᓂᓂᒃ ᐃᓈᑯᓂᑫᐎᓂᕽ ᐁᑮᐃᔑᑲᔥᑭᐃᑯᔮᓐ ᒋᓂᐳᔮᓐ᙮ ᒦ ᐅᐌ ᑮᐃᔑᒋᑳᑌ, ᐃᐃ ᒪᒋᑑᑕᒧᐎᓐ ᒋᑭᑫᒋᑳᑌᒃ ᐋᓃᓐ ᒪᔮ ᐁᑎᓄᐗᕽ᙮ ᐊᒦᑕᔥ ᐃᐃ ᐃᓈᑯᓂᑫᐎᓐ ᑮᐃᔑᐋᐸᑕᓐ ᓇᐗᒡ ᒋᑮᑳᔦᒋᑳᑌᒃ ᐋᓃᓐ ᐁᐲᒋᒪᒋᐊᔭᐄᐗᕽ ᐃᐃ ᒪᒋᑑᑕᒧᐎᓐ᙮

ᑭᑭᑫᑖᒥᓐ ᐃᐃ ᐃᓈᑯᓂᑫᐎᓐ ᐁᑮᐅᒌᒪᑲᒃ ᑭᔐᒪᓂᑑᕽ᙮ ᓃᓐ ᐃᑕᔥ ᐐᓐ ᐯᔑᒃ ᑫᓂᐳᒡ ᓂᑎᓄᐤ᙮ ᓂᑮᐱ ᐃᔑᓈᑯᔅ ᒪᒋᑑᑕᒧᐎᓐ ᐁᑮᐅᑕᐗᑳᓂᒥᑯᔮᓐ ᐁᑮᓇᐃᑕᒫᓐ᙮

ᑳᐐᓐ ᓂᑭᑫᑕᓰᓐ ᐅᐅ ᐌᒋᑑᑕᒫᓐ᙮ ᐃᐃ ᐋᓃᔥ ᑳᒥᓍᐸᑕᒫᓐ ᑳᐐᓐ ᓂᑑᑕᓰᓐ᙮ ᐃᐃ ᑕᔥ ᐐᓐ ᑳᔒᑭᓇᒫᓐ, ᒦ ᐃᐌ ᐁᑑᑕᒫᓐ᙮

ᐊᐲᔥ ᐁᑑᑕᒫᓐ ᐃᐃ ᑳᒥᓍᐸᑕᓯᐙᓐ, ᒦ ᐯᔑᑾᓐ ᐁᔑᓈᑾᒃ ᐁᐃᑭᑐᔮᓐ: ᐊᐤ, ᑾᔭᑾᓐ ᐃᐃ ᐃᓈᑯᓂᑫᐎᓐ᙮

ᒦᑕᔥ ᑳᐐᓐ ᓃᓐ ᑌᐺ ᑳᑑᑕᒫᓐ ᐃᐃᐌ ᐁᑳ ᑳᒥᓄᓇᓯᐙᓐ᙮ ᐃᐃᐌ ᑕᔥ ᒪᒋᑑᑕᒧᐎᓐ ᑫᑭᔥᑳᑯᔮᓐ, ᒦ ᐅᔕ ᐃᐌ ᑳᑑᑕᒨᒪᑲᒃ᙮

ᓂᑭᑫᓂᑎᔅ ᐁᑳ ᓃᓐ ᑲᓇᑫ ᐁᑭᑭᔥᑳᑯᓯᐙᓐ ᑫᐅᒋᑲᔥᑭᑑᔮᐹᓐ ᒥᓄᒋᑫᐎᓐ, ᓃᓐ ᑳᑮᐃᔑᓂᑖᐎᑭᐃᑰᔮᐹᓐ ᑳᐃᑕᒫᓐ᙮ ᐋᓇᐐᓐ ᓃᓐ ᐁᒥᓴᐌᑕᒫᓐ ᒥᓄᒋᑫᐎᓐ ᒋᑑᑕᒫᓐ, ᑳᐐᓐ ᐃᐃ ᓂᑎᔑᑲᔥᑭᑑᓰᓐ᙮

ᐃᐃᐌ ᐌᓂᔑᔑᕽ ᐋᓇᐐᑑᑕᒫᓐ, ᑳᐐᓐ ᑕᔥ ᓂᑑᑕᓰᓐ᙮ ᒣᔥᑾᒡ ᐃᑕᔥ ᐃᐃᐌ ᐁᑳ ᐌᓂᔑᔑᓯᓄᒃ ᐙᑑᑕᓯᐙᓐ, ᒦ ᐃᐌ ᒪᔮ ᐁᓂᑑᑕᒫᓐ᙮

ᑮᔥᐱᓐ ᐁᑑᑕᒫᓐ ᐃᐃᐌ ᐁᑕᐌᑕᓯᐙᓐ, ᑳᐐᓐ ᐄᑐᒃ ᓃᓐ ᑳᑑᑕᒫᓐ, ᐃᐃᐌ ᐅᔕ ᒪᒋᑑᑕᒧᐎᓐ ᑳᑑᒋᑫᒪᑲᒃ ᑳᑭᑭᔥᑳᑯᔮᓐ᙮

ᓂᐙᐸᑖᓐ ᐃᑕᔥ ᒨᔕᒃ ᐅᐅ ᐁᓂᑖ ᐃᔑᐊᔮᔮᓐ, ᐊᐲ ᓴ ᑯ ᐁᐊᑕᐌᑕᒫᓐ ᐃᐃᐌ ᐌᓂᔑᔑᕽ ᒋᐃᔑᒋᑫᔮᓐ, ᒦ ᐁᑕ ᐁᔑᑲᔥᑭᑑᔮᓐ ᒋᑑᑕᒫᓐ ᐁᑳ ᑳᐅᓂᔑᔑᓯᓄᒃ᙮

ᐲᒐᔭᐄ ᐁᔑᑎᓄᐎᔮᓐ, ᓂᒌᑫᑕᒧᔥᑳᑯᓐ ᑭᔐᒪᓂᑑ ᐅᑎᓈᑯᓂᑫᐎᓐ᙮

ᔖᑰᒡ ᐃᑕᔥ ᒦᓇᐙ ᑫᑰᓐ ᓂᐙᐸᑖᓐ ᐁᓂᑖᐃᔑᐊᔮᔮᓐ᙮ ᒦ ᐃᐌ ᐁᔑᐊᓄᑮᒪᑲᒃ ᓂᐐᔭᐎᕽ, ᐁᒦᑳᑕᒨᒪᑲᒃ ᐃᐃᐌ ᐃᓈᑯᓂᑫᐎᓐ ᑳᒥᓍᐸᑕᒫᓐ ᓂᑎᓀᑕᒧᐎᓂᕽ᙮ ᒦᑕᔥ ᐁᔑᒥᒋᒪᐱᓂᑯᔮᓐ ᐃᐃ ᐃᔑᐊᔮᐎᓐ ᑳᐃᔑᐊᓄᑮᒪᑲᒃ ᐃᐃᒫ ᓂᐐᔭᐎᕽ᙮ ᐊᒦ ᐅᐌ ᐃᔑᐊᔮᐎᓐ ᐌᒋᓂᑖᒪᒋᑑᑕᒫᓐ᙮

ᐃᔫᐆ ᓂᑭᑎᒫᑭᓈᑯᔅ! ᓂᐳᐎᓂᕽ ᓂᑎᔑᐎᓂᑯᓐ ᐅᐅ ᓂᐐᔭᐤ! ᐊᐌᓀᔥ ᑫᑲᔥᑭᐃᒡ?

ᐆ ᒦᑴᒡ ᓂᑎᓀᑕᒻ, ᑭᔐᒪᓂᑑ ᓂᑲᑲᔥᑭᐃᒃ᙮ ᑳᑎᐯᓂᒥᓇᕽ ᒋᓴᔅ X ᑕᐃᔑᒋᑫ᙮ ᒦᑕᔥ ᐅᐅᐌ ᐁᑭᑐᔮᓐ: ᐅᐅᐌ ᓂᑎᔑᐊᔮ, ᓃᓐ ᐃᑯ ᓂᑲᐃᓈᐸᑎᔅ ᑭᔐᒪᓂᑑ ᐅᑎᓈᑯᓂᑫᐎᓐ ᒋᑑᑕᒫᓐ᙮ ᓂᑎᓀᑕᒧᐎᓂᕽ ᐁᑕ ᓂᑑᒋᑲᔥᑭᑑᓐ᙮ ᐃᐃᒫ ᑕᔥ ᐁᔑᐐᒌᐎᑯᔮᓐ ᓂᑎᔑᐃᑰᐎᓐ ᑳᑮᐃᔑᓂᑖᐎᑭᐃᑰᐙᐹᓀᓐ ᓂᑑᑖᓐ ᐃᐃᐌ ᑳᐃᑯᔮᓐ ᓂᑎᔑᐊᔮᐎᓐ ᐃᐃᒫ ᐌᒌᒃ ᒪᒋᑑᑕᒧᐎᓐ᙮

ᒦᑕᔥ ᐅᑯᐌᓂᐗᒃ ᑳᑭᑭᐱᒫᑎᓯᐙᒡ ᒋᓴᔅ Xᑕᓐ ᑳᐐᓐ ᑭᔐᒪᓂᑑᓐ ᐅᑲᐃᑯᓰᐙᓐ: ᑭᑲᓂᔑᐗᓈᑎᓯᒻ᙮

ᐋᓃᔥ ᓂᑮᐋᐸᐅᑰ ᐁᑳ ᒦᓇᐙ ᒋᑎᐯᓂᒥᑯᓯᐙᓐ ᐃᐃᐌ ᑫᑌᐃᔑᐊᔮᐎᓐ, ᐃᐃᐌ ᒪᒋ ᐃᔑᐌᐱᓯᐎᓐ, ᓂᐳᐎᓐ ᑳᐅᒌᒪᑲᒃ᙮ ᒦ ᐅᐌ ᑳᐋᐸᐅᑯᔮᓐ ᐃᐃᐌ ᐅᔥᑭ ᐃᔑᐊᔮᐎᓐ ᑭᔐᒪᓂᑑ ᐅᑕᒑᑾᓐ ᑳᒦᓂᒥᓇᕽ, ᑳᐃᔑᐃᒥᓇᕽ ᐗᐐᑫ ᒋᐱᒫᑎᓯᔭᕽ ᐁᐐᒌᐎᒪᕽ X ᒋᓴᓲᓐ᙮

ᒦ ᐅᐌ ᑳᑮᑆᓇᐎᒋᑫᒪᑲᓂᓂᒃ ᒨᓯᔅ ᐅᑎᓈᑯᓂᑫᐎᓐ, ᐋᓃᔥ ᐅᓵᒻ ᑮᓃᓇᒪᓐ ᑭᑫᑌᐃᓈᑎᓯᐎᓂᓈᓐ᙮ ᑭᔐᒪᓂᑑ ᑕᔥ ᐐᓐ ᐅᑮᑲᔥᑭᑑᓐ ᑳᑮᐃᔑᐋᓇᐌᐎᓰᒪᑲᓂᓂᒃ ᐃᓈᑯᓂᑫᐎᓐ, ᐁᑮᐲᒋᓂᔕᐙᒡ ᐃᓂ ᑎᐱᓇᐌ ᐅᑯᓯᓴᓐ, ᑫᐐᓐ ᒋᐃᓀᑖᑯᓯᓂᒡ ᑳᐃᔑᐊᔮᓂᒡ ᐃᐃ ᐯᒫᑎᓯᓂᒡ ᑳᒪᒋ ᐃᔑᐌᐱᓯᓂᒡ, ᐅᐅᐌ ᐁᑮᑑᑕᒥᓂᒡ ᐁᑮᓇᓇᐃᓯᑕᒪᐙᓂᒡ ᐅᒪᒋᑑᑕᒧᐎᓂᓂ ᐃᐃ ᐯᒫᑎᓯᓂᒡ᙮

ᒦ ᐅᐌ ᑳᑑᑕᕽ ᑭᔐᒪᓂᑑ, ᑮᓇᐎᓐᑦ ᒋᐅᒋᑎᐱᑑᑕᒪᕽ ᐃᓂ ᑾᔭᑯᒋᑫᐎᓇᓐ ᐁᔑᐊᑕᐌᑖᑯᓯᔭᕽ ᐃᓈᑯᓂᑫᐎᓂᕽ ᑳᐃᔑᐐᑌᑭᓐ᙮ ᑮᓇᐎᓐᑦ ᑭᑎᓄᐎᒥᓐ ᑳᐃᔑᐱᒫᑎᓯᔭᕽ ᑭᔐᒪᓂᑑ ᐅᑕᒑᑾᓐ ᑳᐃᓂᓇᕽ᙮

ᐃᑭᐌᓂᐗᒃ ᐃᑕᔥ ᑳᓂᐊᔨᑎᐙᒡ ᐁᔑᐊᔮᒪᑲᒃ ᐃᐃ ᑫᑌᐃᓈᑎᓯᐎᓐ, ᒦ ᐁᑕ ᐃ ᐁᔑᓈᑾᓂᓂᒃ ᐅᓈᓈᑲᑕᐌᑕᒧᐎᓂᐙ ᑳᐃᔑᐊᑕᐌᑕᒨᒪᑲᓂᓂᒃ ᐃᐃ ᑫᑌᐃᓈᑎᓯᐎᓐ᙮ ᐃᑭᐌᓂᐗᒃ ᐃᑕᔥ ᐐᓐ ᑳᐄᔑᐱᒫᑎᓯᐙᒡ ᑭᔐᒪᓂᑑ ᐅᑕᒑᑾᓐ ᑳᐃᑯᐙᒡ, ᒦ ᑲᔦ ᐐᓇᐙ ᐁᔑᓈᑾᓂᓂᒃ ᐅᓈᑲᑕᐌᑕᒧᐎᓂᐙ ᑳᔑᐊᑕᐌᑕᒥᓂᒡ ᐃᓂ ᐊᒑᑾᓐ᙮

ᐊᐎᔭ ᐃᔑᐅᓈᑲᑕᐌᒋᑲᓂᒡ ᐃᐃ ᑫᑌᐃᓈᑎᓯᐎᓐ ᑳᐃᔑᐊᔮᒪᑲᒃ, ᒦᔥ ᐃᐃᐌ ᐱᒌᓇᒃ ᒋᓂᐳᐎᓂᐗᕽ᙮ ᐊᐎᔭ ᑕᔥ ᑳᐃᔑᐅᓈᑲᑕᐌᒋᑲᓂᒡ ᑭᔐᒪᓂᑑᓐ ᐅᑕᒑᑯᓂ ᑳᐃᔑᐊᑕᐌᑕᒥᓂᒡ, ᒦ ᐃᒫ ᑕᐅᒌᒪᑲᓐ ᐱᒫᑎᓯᐎᓐ, ᐱᓵᑌᑕᒧᐎᓐ ᑲᔦ᙮

ᑮᔥᐱᓐ ᐁᑕ ᐊᐎᔭ ᐃᔑᓈᑲᑕᐌᑕᕽ ᐁᔑᓈᓈᑲᑕᐌᑕᒨᒪᑲᓂᓂᒃ ᐃᐃ ᑫᑌᐃᓈᑎᓯᐎᓐ, ᐅᑲᔒᑫᓂᒫᓐ ᐃᓂ ᑭᔐᒪᓂᑑᓐ᙮ ᑳᐐᓐ ᐃᐃᐌ ᐅᑲᑑᑕᓰᓐ ᑭᔐᒪᓂᑑᓐ ᐅᑎᓈᑯᓂᑫᐎᓂᓂ ᑳᐃᑯᒡ, ᑳᐐᓐ ᐅᑖᑲᔥᑭᑑᓰᓐ ᐃᐃ ᒋᐃᔑᒋᑫᒡ᙮

ᐃᑭᐌᓂᐗᒃ ᐐᓇᐙ ᐱᑯ ᑳᐃᔑᒋᑫᐙᒡ ᑳᐃᔑᐊᑕᐌᑕᒧᐙᒡ ᐅᑫᑌᐃᓈᑎᓯᐎᓂᐙᕽ ᑳᐐᓐ ᐅᑲᑲᔥᑭᑑᓰᓈᐙ ᒋᐃᔑᒋᑫᐙᒡ ᑫᔑᒥᓍᐸᒥᑯᐙᐸᓐ ᑭᔐᒪᓂᑑᓐ᙮

ᑮᔥᐱᓐ ᑕᔥ ᑌᐺ ᐁᑭᑭᔥᑲᐎᒣᒃ ᑭᔐᒪᓂᑑ ᐅᑕᒑᑾᓐ, ᑳᐐᓐ ᐃᐃᐌ ᑭᑲᔑᐱᒫᑎᓯᓰᒻ ᑮᓇᐙ ᑭᑫᑌᐱᒫᑎᓯᐎᓂᐙ ᑳᐃᔑᐊᑕᐌᑕᒨᒪᑲᒃ, ᐊᐊᐌ ᐐᓐ X ᐅᑕᒑᑾᓐ ᑳᐃᔑᐊᑕᐌᑕᒥᓂᒡ ᑭᑲᔑᐱᒫᑎᓯᒻ᙮ ᑮᔥᐱᓐ ᑕᔥ ᐊᐎᔭ ᑭᑭᔥᑳᑯᓯᒃ Xᑕᓐ ᐅᑕᒑᑯᓂ, ᒦ ᑳᐐᓐ ᑲᓇᑫ ᑭᑎᐯᓂᒥᑯᓰᐙ᙮

ᑮᔥᐱᓐ ᐃᑕᔥ ᐅᐅᐌ ᐃᔑᑭᑭᔥᑲᐎᓀᒃ X, ᐋᓇᐐᓐ ᐃᑕᔥ ᑭᐐᔭᐎᐙᓐ ᐁᐐᐅᒋᓂᐴᒪᑲᑭᓐ ᒪᒋᑑᑕᒧᐎᓂᕽ ᐅᒋ, ᔖᑰᒡ ᐃᑕᔥ ᑭᔐᒪᓂᑑ ᐅᑕᒑᑾᓐ ᑭᐱᒫᑎᓰᔥᑳᑯᐙ᙮ ᐋᓃᔥ ᐋᔕ ᑾᔭᒃ ᑭᑮᐃᓇᓯᑯᐙ ᑭᔐᒪᓂᑑ ᒋᒥᓄᐐᒌᐌᒃ᙮

ᑭᔐᒪᓂᑑ ᐋᓃᔥ ᑳᑮᑮᐌᐱᒫᑎᓯᐋᒡ ᒋᓴᓲᓐ ᓂᐳᐎᓂᓃᕽ ᐅᒋ, ᑮᔥᐱᓐ ᐅᑕᒑᑾᓐ ᑭᐐᔭᐎᐙᕽ ᐁᐃᔑᑖᓂᒡ, ᐊᐊᐌ ᑕᔥ ᑳᑮᑮᐌᐱᒫᑎᓯᐋᒡ Xᑕᓐ ᓂᐳᐎᓂᓃᕽ ᐅᒋ ᒦ ᐊᐌ ᑫᑮᓇᐙ ᐅᑲᐱᒫᑎᓰᔥᑳᓇᓐ ᐃᓂ ᑭᐐᔭᐎᐙᓐ ᑳᐐᓂᐴᒪᑲᓂᓂᑭᓐ, ᐃᓂ ᐋᓃᔥ ᐅᑕᒑᑾᓐ ᑳᑭᑭᔥᑲᐎᒥᓀᒃ ᑭᑲᐃᔑᒋᑫᐃᑯᐙᒻ᙮

ᒦᑕᔥ ᐅᐅᐌ ᐁᑭᑐᕽ, ᓃᒋᐅᑌᐺᑕᒨᒃ, ᑭᓇᑕᐌᑖᑯᓯᒥᓐ ᒋᓇᐃᑕᐎᒪᕽ ᑭᔐᒪᓂᑑ ᐅᑕᒑᑾᓐ, ᑳᐐᓐ ᐐᓐ ᒋᐃᔑᐱᒫᑎᓯᔭᕽ ᑳᐃᔑᓯᕽ ᑫᑌᐃᓈᑎᓯᐎᓐ᙮

ᐋᓃᔥ ᐃᔑᐱᒫᑎᓯᔦᒃ ᑫᑌᐃᓈᑎᓯᐎᓐ ᑳᐃᔑᓯᕽ, ᑫᒋᓈᒡ ᑭᑲᓂᐳᒻ᙮ ᑮᔥᐱᓐ ᑕᔥ ᑭᔐᒪᓂᑑ ᐅᑕᒑᑾᓐ ᐁᐐᒋᐃᒥᓀᒃ, ᐃᔑᓂᑑᔦᒃ ᑭᒪᒋ ᐃᔑᐌᐱᓯᐎᓂᐙᓐ ᑭᐐᔭᐎᐙᕽ ᑳᓂᑖᑑᑕᒣᒃ, ᑭᑲᐱᒫᑎᓯᒻ᙮

ᐋᓃᔥ ᒦᐗᒃ ᐃᑭᐌᓂᐗᒃ ᑭᔐᒪᓂᑑ ᐅᑯᓯᓴᐞ, ᑳᐱᒥᓂᔕᐙᐙᒡ ᑭᔐᒪᓂᑑᓐ ᐅᑕᒑᑯᓂ ᐋᓃᓐ ᐁᑯᐙᒡ᙮

ᐃᓂ ᐋᓃᔥ ᐊᒑᑾᓐ ᑳᒦᓂᓀᒃ ᑭᔐᒪᓂᑑ, ᑳᐐᓐ ᒦᓇᐙ ᑭᑎᔑᐃᑯᓰᐙ ᒋᑮᐌᓄᑕᒧᐌᒃ ᑯᑖᒋᐎᓐ ᒋᑮᐌᑎᐯᓂᒥᑯᐌᒃ᙮ ᐊᐊᐌ ᐊᒑᒃ ᑳᒦᓂᑰᔦᒃ ᑭᑮᐃᔑᐃᑯᐙ ᑭᔐᒪᓂᑑ ᐅᑯᓯᓴᐞ ᒋᑎᓄᐎᔦᒃ᙮ ᐊᒦᑕᔥ ᐊᐊᐌ ᐊᒑᒃ ᑭᑎᔑᑮᔗᐃᑯᓈᓐ, ᓅᔅ! ᓂᑌᑌ! ᒋᐃᓂᒪᕽ ᑭᔐᒪᓂᑑᓐ᙮

ᐃᓂ ᐋᓃᔥ ᑭᔐᒪᓂᑑ ᐅᑕᒑᑾᓐ ᐅᐐᒋᑮᔗᒫᐞ ᑭᑕᒑᑯᓈᓂᐞ, ᑌᐺ ᑭᔐᒪᓂᑑ ᐁᐅᓃᒑᓂᓯᒥᓇᕽ ᐁᐃᓂᓇᕽ᙮

ᒦᔥ ᐃᐃ ᑌᐺ ᐋᔕ ᐁᐅᓃᒑᓂᓯᒥᓇᕽ, ᑭᑲᒦᓂᑰᒥᓐ ᒋᑎᐱᓇᐌᐎᓯᐗᕽ ᐃᓂ ᑫᑰᓇᓐ ᑭᔐᒪᓂᑑ ᐙᐃᔑᔕᐌᓂᒫᒡ ᐅᐱᒫᑎᓰᒪᐞ, ᑲᔦ ᑭᑲᑕᑯᒦᓂᑰᒥᓐ ᑲᔦ ᐐᓐ X ᐙᐃᔑᒦᓂᑯᒡ ᑭᔐᒪᓂᑑᓐ᙮ ᑮᔥᐱᓐ ᐋᓃᔥ ᐅᒋᐐᒌᐗᕽ X ᐅᑲᒀᑕᑭᐃᑰᐎᓂᕽ, ᑭᑲᑕᔑᐐᒌᐙᓈᓐ ᑲᔦ ᐅᑭᒋ ᐃᓀᑖᑯᓯᐎᓂᕽ ᑳᐐᒦᓂᓐᒡ᙮

ᓂᑎᓀᑕᒻ ᐃᑕᔥ ᐅᐅᐌ ᓅᑯᒻ ᑳᐃᔑᑲᒀᑕᑭᑑᔭᕽ, ᐗᐐᑫ ᑕᐸᑳᓀᑖᑾᓐ ᐃᐃᐌ ᑫᐃᔑᓭᒃ ᑭᒋ ᐃᓀᑖᑯᓯᐎᓐ ᑭᔐᒪᓂᑑ ᑫᓈᑯᑕᒪᐎᓇᕽ᙮

ᑲᑭᓇ ᑫᑰᓐ ᑳᐅᔑᒋᑳᑌᒃ ᐋᑯᐲᐆᒪᑲᓐ ᒋᐅᒋᒋᓭᒃ ᐃᐃ ᐊᐲ ᑭᔐᒪᓂᑑ ᑫᓈᑯᐋᒡ ᑲᑭᓇ ᐅᑯᓯᓴᐞ᙮

ᐐᓐ ᑭᔐᒪᓂᑑ ᐅᑮᐃᓇᔓᐙᑖᓐ ᑲᑭᓇ ᑳᐅᔑᒋᑳᑌᓂᒃ ᐁᑳ ᑫᑰᓐ ᒋᐃᓀᑖᑾᓯᓂᓂᒃ᙮ ᑳᐐᓐ ᐐᓐ ᑳᐅᔑᒋᑳᑌᒃ ᑮᐐᑑᑕᒫᓲᒪᑲᓯᓅᓐ᙮ ᑭᔐᒪᓂᑑ ᐐᓐ ᐅᑮᐃᔑᓯᑑᓐ ᒋᐃᔑᓭᓂᒃ᙮

ᔖᑰᒡ ᑕᔥ ᐅᑮᐊᔕᐙᐸᑖᓐ ᐃᐃᐌ ᐃᑯᑎᕽ ᑫᐃᔑᓭᓂᒃ ᑳᑮᐅᔑᑑᒡ᙮ ᓅᑯᒻ ᐃᔑᓈᑾᓐ ᑲᑭᓇ ᑫᑰᓐ ᐅᒋᑕᑯ ᒋᓂᔑᐗᓈᑕᒃ᙮ ᐃᑯᑎᕽ ᐃᑕᔥ ᑭᔐᒪᓂᑑ ᐅᑲᐃᔑᓯᑑᓐ ᐁᑳ ᒦᓇᐙ ᑫᑰᓐ ᒋᓂᔑᐗᓈᑕᓯᓂᓂᒃ᙮ ᒦ ᐃ ᐊᐲ ᑲᑭᓇ ᑳᐅᔑᒋᑳᑌᒃ ᑲᔦ ᑕᐃᔑᓈᑾᓐ ᑭᔐᒪᓂᑑ ᐅᓃᒑᓂᓴᐞ ᑫᐃᔑᓈᑯᓯᓂᒡ᙮ ᐋᓃᔥ ᐃᐃ ᐊᐲ ᑳᐐᓐ ᑫᑰᓂᓂ ᐅᑲᑎᐯᓂᒥᑯᓰᓂ, ᐋᐱᒋ ᑲᔦ ᑕᑭᒋᐅᓂᔑᔑᐌᑖᑾᓐ ᑫᐃᓇᑲᒥᑲᒃ᙮

ᑭᑭᑫᑖᒥᓐ ᑕᔥ ᑲᑭᓇ ᑳᐅᔑᒋᑳᑌᒃ ᐁᒨᒀᐱᓀᒪᑲᒃ ᑖᐱᔥᑰ ᐃᑴ ᑳᐃᔑᒨᒀᐱᓀᒡ ᐁᐐᓂᑖᐎᑭᓈᐗᓱᒡ᙮

ᑳᐐᓐ ᑕᔥ ᐁᑕ ᑳᐅᔑᒋᑳᑌᑭᓐ ᐃᔑᒨᒀᐱᓀᒪᑲᓯᓅᓇᓐ᙮ ᑫᑮᓇᐎᓐᑦ ᐄᑐᒃ ᐋᔕ ᑭᑭᑭᔥᑲᐎᒫᓈᓐ ᑭᔐᒪᓂᑑ ᐅᑕᒑᑾᓐ᙮ ᐐᓐ ᐄᑐᒃ ᓂᑕᒻ ᑳᒦᓂᑰᔭᕽ ᑫᐅᒋᒦᓂᓇᕽ ᑫᑰᓇᓐ ᑭᔐᒪᓂᑑ᙮ ᑫᑮᓇᐎᓐᑦ ᐊᓈᒥᕽ ᑭᒨᒀᐱᓀᒥᓐ ᐁᐲᑑᔭᕽ ᑌᐺ ᒋᐃᓇᓯᓇᕽ ᑭᔐᒪᓂᑑ ᐁᐅᑯᓯᓯᒥᓇᕽ᙮ ᐃᐃᐌ ᐊᐲ ᒥᓯᐌ ᑭᐐᔭᐎᓈᓂᕽ ᑭᑲᐱᓂᔅᑴᐃᑯᓈᓐ ᐁᑳ ᑫᑰᓐ ᒋᑎᐯᓂᒥᑯᓯᐗᕽ᙮

ᒦ ᐅᐌ ᑳᑮᐅᒋᐱᒫᒋᐃᑰᔭᕽ, ᐁᑮᐊᔕᐙᐸᑕᒧᐗᕽ ᑫᐃᔑᒋᑫᐃᓇᕽ᙮ ᑫᑰᓐ ᐃᑕᔥ ᑮᐊᔕᐙᐸᑕᒪᕽ, ᑮᔥᐱᓐ ᐋᔕ ᑮᐙᐸᑕᒪᕽ, ᑳᐐᓐ ᑫᔮᐱ ᑭᑕᔕᐙᐸᑕᓰᒥᓐ᙮ ᐃᓇᔥᑫ ᐊᐎᔭ ᐋᔕ ᑮᐙᐸᑕᕽ ᑫᑰᓐ ᑳᐐᓐ ᑫᔮᐱ ᐅᑲᐊᔕᐙᐸᑕᓰᓐ, ᐋᓃᔥ ᐋᔕ ᐅᐙᐸᑖᓐ᙮

ᑮᔥᐱᓐ ᑕᔥ ᐊᔕᐙᐸᑕᒪᕽ ᐃᐃᐌ ᒪᔑ ᑳᐙᐸᑕᓯᐗᕽ, ᔕᔒᐯᑕᒧᐎᓂᕽ ᑭᑲᐃᔑᐊᔕᐙᐸᑖᒥᓐ᙮

ᒦᑕᔥ ᐯᔑᑾᓐ ᐊᐊᐌ ᐊᒑᒃ ᑭᑲᐱᓈᑕᒫᑯᓈᓐ ᑳᐃᔑᓃᓇᒥᓯᔭᕽ᙮ ᑳᐐᓐ ᐋᓃᔥ ᑾᔭᒃ ᑭᑭᑫᑕᓰᒥᓐ ᐋᓃᓐ ᑫᔑᐊᓇᒥᐋᔭᕽ᙮ ᑎᐱᓇᐌ ᑕᔥ ᐊᐊ ᐊᒑᒃ ᑭᑲᓅᒋᑫᑕᒫᑯᓈᓐ ᐁᐸᑯᓭᓂᒫᒡ ᑭᔐᒪᓂᑑᓐ᙮ ᐃᐃ ᐁᐃᔑᒨᑯᓀᒧᒡ ᑳᐐᓐ ᑖᑲᔥᑭᒋᑳᑌᓯᓂᓂ ᒋᐐᒋᑳᑌᓂᒃ᙮

ᐊᐊ ᑕᔥ ᑭᔐᒪᓂᑑ ᑳᑭᑫᓂᒫᒡ ᐁᔑᓈᓈᑲᑕᐌᒋᑫᓂᒡ ᐃᐃ ᐯᒫᑎᓯᓂᒡ, ᐅᑭᑫᓂᒫᓐ ᑲᔦ ᐃᓂ ᑎᐱᓇᐌ ᐅᑕᒑᑾᓐ ᐋᓃᓐ ᐁᓀᑕᒥᓂᒡ᙮ ᐋᓃᔥ ᐊᐊ ᐊᒑᒃ ᐅᑲᓅᒋᑫᑕᒪᐙᐞ ᑭᔐᒪᓂᑑᓐ ᐅᐱᒫᑎᓰᒪᐞ, ᒪᔮ ᐁᐸᑯᓭᓂᒫᒡ ᐁᔑᐊᑕᐌᑕᒥᓂᒡ ᑭᔐᒪᓂᑑᓐ᙮

ᑭᑭᑫᑖᒥᓐ ᑕᔥ ᐋᓃᓂᑯ ᑫᐃᔑᐌᐱᓯᐗᑴᓐ, ᑭᔐᒪᓂᑑ ᒣᑴᔭᐄ ᑭᑕᓄᑳᑕᒫᑯᓈᓐ ᑫᔑᒥᓄᔮᐸᒋᐃᑯᔭᕽ, ᑮᓇᐎᓐᑦ ᓴ ᑳᑮᐊᑐᒥᓇᕽ ᓃᔮᒃ ᑳᑮᐃᔑᐅᓀᑕᒧᑯᐸᓀᓐ᙮

ᐃᓂᐌᓂᐗᐞ ᐋᓃᔥ ᓃᔮᒃ ᑳᑮᐅᓀᓂᒫᒡ ᑭᔐᒪᓂᑑ, ᓃᔮᑭᑯ ᐅᑮᐃᓇᓵᐞ ᐁᐃᓀᓂᒫᒡ ᐃᑯᑎᕽ ᒋᐃᔑᓈᑯᓯᓂᒡ ᐅᑯᓯᓴᓐ ᑳᐃᔑᓈᑯᓯᓂᒡ, ᐐᓐ ᒫᐗᒡ ᒋᓃᑳᓀᑖᑯᓯᓂᒡ ᐃᐃᒫ ᑫᔑᐹᑏᓄᓂᒡ ᑳᐐᐅᐐᒋᑭᐌᔨᑎᓂᒡ᙮

ᒦᑕᔥ ᐃᓂᐌᓂᐗᐞ ᓃᔮᑭᑯ ᑳᑮᐅᓈᐸᒫᒡ, ᒦᐗᐅᓄ ᑳᑮᐊᑐᒫᒡ᙮ ᐅᓄᐌᓂᐗᐞ ᐃᑕᔥ ᑳᑮᐊᑐᒫᒡ ᐅᑮᐃᓇᓵᐞ ᑾᔭᒃ ᒋᐐᒌᐎᑯᒡ᙮ ᐅᓄᐌᓂᐗᐞ ᐃᑕᔥ ᑳᑮᐃᓇᓵᒡ ᑾᔭᒃ ᒋᐐᒌᐎᑯᒡ, ᒦᐗᐃᐃ ᑲᔦ ᑳᑮᒦᓈᒡ ᒋᐐᒋᐃᐌᓂᒡ ᐅᑭᒋ ᐃᓀᑖᑯᓯᐎᓂᕽ᙮

ᐋᔕ ᐅᓄᐌᓂᐗᓐ ᐁᑭᑫᑕᒪᕽ, ᒦ ᐅᐌ ᑫᐃᑭᑐᔭᕽ: ᑭᔐᒪᓂᑑ ᐃᔑᐐᒋᐃᓇᕽ, ᐊᐌᓀᓐ ᑫᔖᑰᒋᐃᓇᑭᐸᓐ? ᑳᐐᓐ ᐊᐎᔭ!

ᑭᔐᒪᓂᑑ ᑳᐐᓐ ᐊᐴᔥᑫ ᐅᑮᒪᓈᒋᐋᓰᓐ ᑎᐱᓇᐌ ᐃᓂ ᐅᑯᓯᓴᓐ, ᐁᑮᐸᑭᑎᓈᒡ ᐃᑕᔥ, ᑮᓇᐎᓐᑦ ᐁᑮᐃᔑᒋᑫᑕᒪᐎᓇᕽ᙮ ᑕᑯ ᑲᔦ ᑌᐺ ᑭᑲᔑᔕᐌᓂᒥᑯᓈᓐ ᑲᑭᓇ ᑫᑰᓐ ᒋᒦᓂᓇᕽ᙮

ᐊᐌᓀᓐ ᑫᑰᓐ ᑫᒪᒋ ᐃᓈᒡ ᐃᓂᐌᓂᐗᐞ ᑭᔐᒪᓂᑑᓐ ᑳᑮᐅᓈᐸᒫᓂᒡ? ᑭᔐᒪᓂᑑ ᐋᓃᔥ ᑳᐐᓐ ᐃᑯᑕᓄ ᐅᑎᓇᑭᑕᒪᐙᓰᐞ᙮

ᐅᐌ ᑕᔥ ᐃᔑᓭᒃ, ᐊᐎᔭ ᓇ ᐅᑲᐃᓈᐞ ᒋᑎᐹᑯᓂᑲᓂᐎᓂᒡ? ᑳᐐᓐ ᐃᐃᐌ ᑕᐃᑭᑐᓰ ᐊᐎᔭ᙮ X ᒋᓴᔅ ᐃᓇ ᐃᑯᑕᓄ ᐅᑲᐃᓇᑭᑕᒪᐙᐞ? ᑳᐐᓐ᙮ ᒦ ᐋᓃᔥ ᐊᐊᐌ X ᒋᓴᔅ ᑳᑮᓂᐳᒡ᙮ ᓇᐗᒡ ᐃᑕᔥ ᐐᓐ ᓂᑖᑮᐃᑭᑦ: ᒦ ᐊᐌ ᑳᑮᑮᐌᐱᒫᑎᓯᐃᓐᒡ, ᓅᑯᒻ ᐃ ᑕᔥ ᐃᐃᒫ ᐅᑭᒋᓂᑭᓃᕽ ᑭᔐᒪᓂᑑᓐ ᐁᐃᔑᐊᐱᒡ, ᐁᑕᔑᑲᓅᒋᑫᑕᒪᐎᓇᕽ᙮

ᑫᑰᓐ ᐃᓇ ᑭᑖᐸᑫᐎᓂᑯᒥᓐ ᐁᑳ ᒋᐐᒌᐎᑯᓯᐗᕽ X ᑳᔑᔕᐌᓂᒥᓇᕽ? ᑮᔥᐱᓐ ᐗᓯᑖᐎᓭᔭᕽ, ᐅᒑᓂᒥᓭᔭᕽ, ᑮᔥᐱᓐ ᑲᒀᑕᑭᐃᓇᕽ ᐊᐎᔭ, ᑮᔥᐱᓐ ᐁᑳ ᐅᒦᒋᒥᒥᓯᐗᕽ, ᓅᑌᑯᓇᔦᔭᕽ ᑲᔦ, ᓇᓃᓵᓂᓯᔭᕽ ᑲᔦ, ᐊᐴᔥᑫ ᑲᔦ ᓂᓯᑰᔭᕽ, ᒦ ᓇ ᐃ ᐁᔑᓈᑾᓂᓂᒃ ᒋᒥᒋᒥᓂᑯᓯᐗᕽ ᑳᐃᔑᔕᐌᓂᒥᓇᕽ? ᑳᐐᓐ!

ᐃᓇᔥᑫ ᐃᔑᐲᐃᑳᑌ ᑫᑌᒪᓯᓇᐃᑲᓂᕽ: ᐁᑕᓱᑮᔑᒃ ᓂᓇᓃᓵᓂᓈᑯᓯᒥᓐ ᑮᓐ ᐁᐐᐅᒋᓂᓯᑰᔮᕽ; ᒦ ᐃᐌ ᐁᑑᑖᑰᔮᕽ ᑖᐱᔥᑰ ᒫᓇᒑᓂᔕᒃ ᑳᐐᓂᓯᑣ, ᐃᑭᑑᒪᑲᓐ᙮

ᐅᓄ ᑕᔥ ᑲᑭᓇ ᐋᓇᐃᔑᐌᐱᓯᔭᕽ, ᔖᑰᒡ ᐗᐐᑫ ᑭᑑᒋᐸᑭᓈᑫᒥᓐ ᐐᓐ ᐅᒋ ᐁᐐᒋᐃᓇᕽ ᑳᑮᔕᐌᓂᒥᓇᕽ᙮

ᐗᐐᑫ ᐋᓃᔥ ᓂᑫᒋᓈᐁᑖᓐ: ᑳᐐᓐ ᑫᑰᓐ ᑭᑖᐸᑫᐎᓂᑯᓰᒥᓐ ᒋᐐᒌᐎᑯᓯᐗᕽ X ᑳᐃᔑᔕᐌᓂᒥᓇᕽ᙮ ᑳᐐᓐ ᓂᐳᐎᓐ ᑖᐃᔑᒋᑫᒪᑲᓯᓅᓐ, ᑳᐐᓐ ᑲᔦ ᐱᒫᑎᓯᐎᓐ, ᑳᐐᓐ ᑲᔦ ᐁᒐᓬᐊᒃ, ᐃᔥᐱᒥᕽ ᑲᔦ ᑳᑕᔑᑎᐯᒋᑫᐙᒡ, ᑳᑕᔑᒪᔥᑲᐌᑖᑯᓯᐙᒡ ᑲᔦ, ᑳᐐᓐ ᑖᑲᔥᑭᒋᑫᓰᐗᒃ᙮ ᑳᐐᓐ ᑲᔦ ᓅᑯᒻ ᑳᐱ ᐃᔑᓭᒃ, ᓃᑳᓇᔭᐄ ᑲᔦ ᑖᐃᔑᒋᑫᒪᑲᓯᓅᓐ᙮

ᑳᐐᓐ ᑕᔥ ᑲᔦ ᐃᔥᐱᒥᕽ ᑳᐊᔮᑭᓐ, ᐌᑎ ᑲᔦ ᓃᓴᔭᐄ ᑳᐃᔑᐊᔮᑭᓐ, ᑳᑕᓯᑭᓐ ᐃᑯ ᑲᔦ ᐋᑎ ᓴ ᑯ ᑳᐅᔑᒋᑳᑌᑭᓐ᙮ ᑳᐐᓐ ᑲᓇᑫ ᐐᑳ ᑫᑰᓐ ᑭᑖᐸᑫᐎᓂᑯᓰᒥᓐ ᐁᑳ ᒋᐐᒌᐎᑯᓯᐗᕽ ᑭᔐᒪᓂᑑ ᐅᔕᐌᓂᒥᐌᐎᓐ ᐃᐃᒫ ᑳᐅᒋᒦᓂᑰᔭᕽ X ᒋᓴᔅ ᑳᑎᐯᓂᒥᓇᕽ᙮

ᓂᑌᐺ ᑕᔥ ᐅᐅ ᑳᐃᑭᑐᔮᓐ, Xᐃᕽ ᐋᓃᔥ ᓂᑑᒋᑎᐯᑖᑯᔅ, ᑳᐐᓐ ᑕᔥ ᓂᑮᐗᓂᒧᓰ᙮ ᓂᑎᔑᑲᔥᑭᒥᑯᓐ ᑲᔦ ᑳᐅᒋᓈᓈᑲᑕᐌᑕᒫᓐ, ᑭᔐᒪᓂᑑ ᐅᑕᒑᑾᓐ ᐁᐐᒋᐃᒥᒡ ᒋᐃᓀᑕᒫᓐ᙮

ᐋᐱᒋ ᑕᔥ ᐐᑫ ᓂᑑᒋᒫᓀᑕᒻ, ᒨᔕᒃ ᑲᔦ ᐐᓴᑫᑕᒧᐎᓐ ᐁᐊᔮᒃ ᐃᐃᒫ ᓂᑌᐃᕽ᙮

ᒦᑕᔥ ᐐᓇᐙ ᐅᒋ ᑫᔑᒥᓴᐌᑕᒫᐹᓐ ᓇᐗᒡ ᓃᓐ ᑭᔐᒪᓂᑑ ᒋᐃᔑᐸᓐ ᒋᓂᔑᐗᓈᑎᓯᔮᓐ, ᒋᑮᐸᑫᓭᔮᐹᓐ ᑲᔦ ᑳᔑᐐᒌᐎᓐᒡ X, ᐅᒋ ᐃᑭ ᓃᒋᑭᐌᔭᒃ ᑳᐃᓇᐌᒪᒀ ᑳᐐᒋᐅᑕᑳᓀᓰᒪᒀ᙮

ᐋᓃᔥ ᑭᔐᒪᓂᑑᓐ ᐅᑮᐅᓀᓂᒥᑯᐙᓐ ᐃᔅᕒᐃᔭᓬᐊᒃ, ᐅᑮᐃᓀᓂᒥᑯᐙᓐ ᑲᔦ ᐁᐐᐅᑯᓯᓯᒥᑯᐙᒡ, ᐅᑮᐃᔑᐃᑯᐙᓐ ᑲᔦ ᒋᐐᑑᑳᓱᐙᒡ ᐁᔑᑭᒋ ᐃᓀᑖᑯᓯᓂᒡ᙮ ᑳᐐᓐ ᐐᓐ ᐋᐱᑎᕽ ᐁᑕ ᐅᑮᐊᔓᑕᒪᑯᓰᐙᓐ ᐁᐐᐐᒌᐎᑯᐙᒡ᙮ ᑮᒦᓈᐗᒃ ᑲᔦ ᒨᓯᓲᓐ ᐅᑑᓇᔓᐌᐎᓂᓂ, ᑌᐺ ᑲᔦ ᑫᐃᔑᐊᓇᒥᐋᐙᒡ ᑭᒋᐊᓇᒥᐁᐎᑲᒥᑯᕽ᙮ ᑮᐃᓀᑖᑯᓯᐗᒃ ᑲᔦ ᒋᑌᐱᓇᒧᐙᒡ ᑭᔐᒪᓂᑑᓐ ᑳᑮᐃᔑᐊᔓᑕᒫᑫᓂᒡ᙮

ᒦᐗᒃ ᐃᑕᔥ ᐃᑭ ᐃᔅᕒᐃᔭᓬᐊᒃ ᑳᑕᔑᒥᑣ, ᒦ ᐃᒫ ᑳᑮᐱᐅᒌᐙᒡ ᑳᑮᓃᑳᓀᑖᑯᓯᓂᒡ ᑭᑫᑌᔭᐋᒥᓈᓂᐞ᙮ ᐃᐃᒫ ᑕᔥ ᐐᓐ X ᑮᐅᑕᑳᓀᓯ ᐃᔅᕒᐃᔭᓬᐃᑳᕽ, ᐃᓂᓃᕽ ᐃᑯ ᑮᐃᓀᑖᑯᓯᒡ᙮ ᑕᑲ ᑕᔥ ᑭᔐᒪᓂᑑ ᑲᑭᓇ ᑫᑰᓂᓂ ᑳᑎᐯᑕᕽ ᒨᔕᒃ ᐃᑯ ᑕᒦᑴᒋᐌᓂᒫ᙮ ᐁᒣᓐ᙮

ᑳᐐᓐ ᐐᓐ ᓂᑎᑭᑐᓰ ᑭᔐᒪᓂᑑ ᐁᑮᑆᓇᐎᒋᑫᒪᑲᓂᓂᒃ ᐅᑕᔓᑕᒫᑫᐎᓐ᙮ ᐋᓃᔥ ᐃᑭ ᐯᒫᑎᓯᐙᒡ ᐃᔅᕒᐃᔭᓬᐃᑳᕽ ᑳᐅᑕᑳᓀᓯᐙᒡ, ᑳᐐᓐ ᐄᑐᒃ ᐋᓂᑕ ᑌᐺ ᐃᔅᕒᐃᔭᓬᐃᐎᓰᐗᒃ ᒋᑎᓄᐎᐙᐸᓐ ᑳᑳᑮᑭᓂᑯᐙᒡ ᑭᔐᒪᓂᑑᓐ᙮

ᑳᐐᓐ ᑲᔦ ᑲᑭᓇ ᐁᐸᕒᐊᐋᒥᕽ ᑳᐅᑕᑳᓀᓯᐙᒡ, ᐅᑑᓃᒑᓂᓯᒥᑯᓰᐙᓐ ᑭᔐᒪᓂᑑᓐ᙮ ᐋᓃᔥ ᑭᔐᒪᓂᑑ ᐅᑮᐃᓈᓐ ᐁᐸᕒᐊᐋᒪᓐ: ᐃᐃᒫ ᓴ ᐋᐃᓯᑯᕽ ᑫᓂᐅᒌᐙᒡ, ᒦᐗᒃ ᐃᓴ ᐃᑭ ᒪᔮ, ᑭᐲᐌᓰᒪᒃ ᑫᐃᓂᑣ᙮

ᐃᑭ ᑕᔥ ᐅᓃᒑᓂᓯᒫᒃ ᐁᐸᕒᐊᐋᒥᕽ ᑳᓂᐅᒋ ᓂᑖᐎᑭᐙᒡ ᑳᐐᓐ ᑲᑭᓇ ᐃᓇᑭᒫᓰᐗᒃ ᑭᔐᒪᓂᑑᓐ ᐁᐅᓃᒑᓂᓯᒥᑯᐙᒡ᙮ ᐃᑭ ᑕᔥ ᐐᓐ ᐅᓃᒑᓂᓯᒫᒃ ᑳᐅᒋ ᓂᑖᐎᑭᐙᒡ ᐃᐃᒫ ᑭᔐᒪᓂᑑᓐ ᑳᑮᐃᔑᐊᔓᑕᒪᐙᓂᒡ ᐁᐸᕒᐊᐋᒪᓐ, ᒦ ᓴ ᐃᑭ ᒪᔮ ᐅᓃᒑᓂᓯᒫᒃ᙮

ᒦᑕᔥ ᐅᐅ ᑭᔐᒪᓂᑑ ᐅᑕᔓᑕᒫᑫᐎᓐ ᑳᐃᑭᑑᒪᑲᓂᓂᒃ: ᐅᐅ ᑕᔥ ᐊᐲ ᒦᓇᐙ ᐅᒋᒋᓭᒃ, ᓂᑲᐱᑮᐌ, ᓭᕒᐊ ᑕᔥ ᐅᑲᐊᔮᐙᓐ ᑸᐎᓭᓴᓐ᙮

ᐃᓇᔥᑫ ᑕᔥ ᐐᓐ ᐅᕒᐃᐯᑲ ᑳᑮᓃᔑᓂᒡ 2 ᐅᑯᓯᓴᐞ, ᐅᑮᐯᔑᑯᐋᓂ ᐅᑌᑌᓂ, ᒦᓴ ᐃᓂ ᐋᐃᓯᑰᓐ, ᓃᓇᐎᓐᑦ ᑕᔥ ᐐᓐ ᑳᒎᐎᐎᔮᕽ ᑳᐅᑫᑌᔭᐋᒥᔮᕽ᙮

ᑭᔐᒪᓂᑑ ᑕᔥ ᒪᔮ ᐱᑯ ᒋᐊᓄᑮᒪᑲᓂᓂᒃ ᐃᐃ ᐅᑎᓀᑕᒧᐎᓐ ᐃᐃᒫ ᐯᔑᒃ ᐅᑯᓯᓯᒫᕽ, ᒦᑕᔥ ᐅᐅ ᑭᔐᒪᓂᑑ ᑳᑮᐅᒋ ᐃᓈᒡ ᐃᓂ ᐃᑴᐗᓐ: ᐊᐊ ᓴ ᑫᓴᓰᑭᓯᒡ ᑭᑯᓯᔅ, ᐅᑲᐸᒦᑕᐙᓐ ᐃᓂ ᑫᐅᔒᒣᔑᒫᐎᓂᒡ᙮ ᒦᑕᔥ ᐅᐅ ᑳᑮᐃᑭᑐᒡ ᒋᑆ ᓂᑖᐎᑭᓂᒡ ᐃᐃ ᑸᐎᓭᓴᐞ, ᒋᑆ ᑲᔦ ᓅᒋᑯ ᐃᔑᒋᑫᓂᒡ, ᒋᑆ ᑲᔦ ᑾᔭᒃ ᐃᔑᒋᑫᓂᒡ᙮ ᒦᑕᔥ ᐅᐅᒫ ᐁᔑᓈᑾᓂᓂᒃ ᑭᔐᒪᓂᑑ ᐁᑮᐃᔑᒋᑫᒡ ᐋᓃᓐ ᓃᔮᒃ ᑳᑮᐃᓀᑕᒧᑯᐸᓀᓐ ᐁᐐᑲᓅᓈᒡ ᐯᔑᒃ ᐅᑯᓯᓯᒫᓐ, ᑳᐐᓐ ᐐᓐ ᑮᐅᒋ ᐃᓀᑕᓰ ᐅᑎᔑᒋᑫᐎᓂᓃᕽ ᐃᐃ ᑸᐎᓭᓴᐞ᙮

ᒦᑕᔥ ᐅᐅ ᑭᒋᒪᓯᓇᐃᑲᓐ ᐁᔑᐲᐃᑳᑌᒃ, ᒉᑲᑉ ᓴ ᓂᑮᐅᓀᓂᒫ, ᐄᔂ ᑕᔥ ᐐᓐ ᓂᑮᐋᓇᐌᓂᒫ᙮

ᒦ ᓇ ᑕᔥ ᑫᐃᑭᑐᔭᕽ ᑭᔐᒪᓂᑑ ᑾᔭᒃ ᐁᐃᔑᒋᑫᓯᒃ? ᑫᑯ ᐃᓇᑫ ᐃᓀᓂᒫᑫᒃ ᑭᔐᒪᓂᑑ᙮

ᒦᑕᔥ ᐅᐅ ᑭᔐᒪᓂᑑ ᑳᐃᓈᒡ ᒨᓯᓲᓐ: ᓂᑲᔕᐌᓂᒫ ᓴ ᐊᐌᓀᓂᑯ ᑳᒥᓴᐌᓂᒪᒃ ᐁᐐᔕᐌᓂᒪᒃ, ᓂᑲᑰᐹᑌᓂᒫ ᑲᔦ ᐊᐌᓀᓂᑯ ᑫᒥᓴᐌᓂᒪᒃ᙮

ᒦᑕᔥ ᐃᐃᒫ ᐁᔑᐙᐸᑕᒪᕽ, ᑭᔐᒪᓂᑑ ᐅᑑᓀᒋᑫᐎᓐ ᐁᐃᔑᐊᓄᑮᒪᑲᓂᓂᒃ ᐃᐃᒫ ᐅᔕᐌᒋᑫᐎᓂᕽ, ᑳᐐᓐ ᐐᓐ ᐃᓂᓂᐗᓐ ᐁᔑᒥᓴᐌᒋᑫᓂᒡ, ᑳᐐᓐ ᑲᔦ ᐃᓂᓂᐗᓐ ᐅᑎᔑᒋᑫᐎᓂᓃᕽ ᐃᔑᐊᓄᑮᒪᑲᓯᓂᓂ᙮

ᐋᓃᔥ ᑭᒋᒪᓯᓇᐃᑲᓐ ᐃᑭᑑᒪᑲᓐ ᑭᔐᒪᓂᑑ ᐁᑮᐃᓈᒡ ᐃᓂ ᑳᑮᑭᒋᐅᑭᒫᐎᓂᒡ ᐄᒋᐸᑮᕽ : ᓃᓐ ᐄᑐᒃ ᑭᑮᑭᒋᐅᑭᒫᐎᐃᓐ ᐁᐐᐅᒋ ᐙᐸᑕᐃᐌᔭᓐ ᐃᐃ ᓂᒪᔥᑲᐎᓰᐎᓐ, ᒥᓯᐌ ᑲᔦ ᒋᑭᑫᒋᑳᑌᒃ ᓂᑎᔑᓂᑳᓱᐎᓐ ᐅᐅ ᑳᐃᓂᑯᒀᒃ ᐊᑭ᙮

ᒦᑕᔥ ᐅᐅᒫ ᐁᔑᐙᐸᑕᒧᐗᕽ ᑭᔐᒪᓂᑑ ᐁᔕᐌᓂᒫᒡ ᐊᐌᓀᓇᓐ ᐃᑯ ᑳᐐᔕᐌᓂᒫᒡ, ᐅᑎᔑᐋᓐ ᑲᔦ ᐊᐌᓀᓇᓐ ᐃᑯ ᒋᔕᔒᐱᑕᒥᓂᒡ᙮

ᑮᓇᐙ ᑕᔥ ᐅᒋᑕ ᐱᑯ ᐊᐎᔭ ᐯᔑᒃ ᓂᑲᑲᑴᒋᒥᒃ ᐅᐅ ᒋᐃᑭᑐᒡ: ᑮᔥᐱᓐ ᑕᔥ ᐃᐃ ᐃᔑᓭᒃ ᑳᐃᑭᑐᔭᓐ, ᐌᑯᓀᓂᓂ ᑕᔥ ᑭᔐᒪᓂᑑ ᑫᔮᐱ ᐌᒋᐋᓍᐸᒫᒡ ᐊᐎᔭᓐ ᐋᓃᓐ ᐊᐎᔭᓐ ᐁᔑᒋᑫᓂᒡ? ᐊᐌᓀᓐ ᑕᔥ ᑲᔦ ᑫᑲᔥᑭᑑᐸᓐ ᒋᓇᑳᓇᑭᐸᓐ ᑭᔐᒪᓂᑑᓐ ᐅᑎᓀᑕᒧᐎᓂᓂ?

ᓃᒌ, ᐊᐌᓀᓐ ᑕᔥ ᑮᓐ ᐁᑎᓄᐎᔭᓐ ᒋᓇᓈᑴᑕᐗᑎᐸᓐ ᑭᔐᒪᓂᑑ? ᐃᓇᔥᑫ ᐊᐊ ᐊᑭᒃ ᐙᐱᑲᓂᕽ ᑳᑮᐅᒋᐅᔑᒋᑲᓂᐎᒡ ᑳᐐᓐ ᐅᑎᓈᓰᓐ ᐃᓂ ᑳᑮᐅᔑᐃᑯᒡ: ᐌᑯᓀᓐ ᐅᐅ ᑳᐅᒋ ᐃᔑᐃᔭᓐ ᑳᐃᔑᓈᑯᓯᔮᓐ?

ᐋᓃᔥ ᐊᐊ ᐃᓂᓂ ᑳᐅᔑᐋᒡ ᐊᑭᑾᐞ ᐁᔑᒥᓴᐌᑕᕽ ᐃᑯ ᐅᑎᓈᐸᒋᐋᓐ ᐃᓂ ᐙᐱᑲᓇᓐ᙮ ᐐᓐ ᐃᑯ ᑲᔦ ᐅᑑᓀᑖᓐ ᑮᔥᐱᓐ ᓃᔑᓐ 2 ᐊᑭᑾᐞ ᐐᐅᒋᐅᔑᐋᒡ ᐃᐃᒫ ᐯᔑᑾᓐ ᐙᐱᑲᓂᕽ, ᑯᒫ ᑲᔦ ᐯᔑᒃ ᐐᐅᔑᐋᒡ ᒋᑭᒋ ᐃᓀᑖᑯᓯᓂᒡ, ᑯᑕᒃ ᑕᔥ ᒋᒥᒋᐊᔮᐸᑎᓯᓂᒡ᙮

ᒦᑕᔥ ᐯᔑᑾᓐ ᐁᔑᓈᑾᓂᓂᒃ ᑫᐐᓐ ᑭᔐᒪᓂᑑ ᑳᑮᐃᔑᒋᑫᒡ᙮ ᐅᑮᐊᑕᐌᑖᓐ ᐅᓂᔥᑳᑎᓯᐎᓐ ᒋᓈᑾᓂᓂᒃ, ᐅᒪᔥᑲᐎᓰᐎᓐ ᑲᔦ, ᐋᐱᒋ ᑕᔥ ᐅᑮᔕᔒᐯᓂᒫᐞ ᐃᐃ ᑳᑮᓂᔥᑭᐃᑯᒡ ᑳᐐᑎᐹᑯᓈᒡ᙮

ᐅᑮᐊᑕᐌᑖᓐ ᑕᔥ ᑲᔦ ᒋᓈᑾᓂᓂᒃ ᑳᐌᓅᑕᓂᓂᒃ ᐅᑭᒋ ᐃᓀᑖᑯᓯᐎᓐ, ᐃᐃ ᑳᑮᒦᓂᓇᕽ᙮ ᐋᓃᔥ ᑭᔕᐌᓂᒥᑯᓈᓐ, ᑭᑮᑾᔮᒋᐃᑯᓈᓐ ᑲᔦ ᒋᑌᐱᓇᒧᐗᕽ ᐃᐃ ᐅᑭᒋ ᐃᓀᑖᑯᓯᐎᓐ᙮

ᑮᓇᐎᓐᑦ ᐋᓃᔥ ᑳᐱᒫᑎᓯᔭᕽ ᑭᑮᑲᓅᓂᑯᓈᓐ᙮ ᑳᐐᓐ ᐁᑕ ᒎᐗᐞ ᐅᑮᑲᓅᓈᓰᐞ, ᐃᐃ ᓴ ᑲᔦ ᑳᑎᓄᐎᓯᓂᒃ ᐅᑮᑲᓅᓈᐞ᙮

ᒦᑕᔥ ᐅᐅᐌᓂ ᑭᔐᒪᓂᑑ ᑳᑮᐃᑭᑐᒡ ᐃᐃᒫ ᒪᓯᓇᐃᑲᓂᕽ ᐆᓭᔭᐗᓐ ᑳᑮᐅᔑᐲᐊᒥᓂᒡ: ᐃᑭ ᓴ ᐯᒫᑎᓯᐙᒡ ᑳᑮᑎᐯᓂᒫᓯᐗᒀ ᒦᐗᑭᑭ ᑫᐃᔑᓂᑳᓇᒀ, ᓂᐱᒫᑎᓰᒪᒃ᙮ ᐃᑭ ᑲᔦ ᑯᑕᒃ ᐯᒫᑎᓯᐙᒡ ᑳᑮᔕᐌᓂᒫᓯᐗᒀ, ᓂᑲᐃᔑᓂᑳᓈᒃ, ᐐᑫ ᑳᔕᐌᓂᒪᒀ᙮

ᐃᐃᒫ ᑕᔥ ᒪᔮ ᑳᔑᐊᔮᐙᒡ ᐃᑭ ᑳᐃᓇᒀ, ᑳᐐᓐ ᑮᓇᐙ ᑭᑎᐯᓂᒥᓯᓅᓂᓂᒻ, ᒦᓴ ᐃᐃᒫ ᑫᔑ ᐃᔑᓂᑳᒋᑲᓂᐎᐙᒡ ᑭᔐᒪᓂᑑ ᑳᐱᒫᑎᓯᒡ ᓴ ᐃᐃ ᐅᑯᓯᓴᐞ᙮

ᐅᐅ ᑕᔥ ᐋᐃᓭᔭ ᑮᐃᑭᑐ ᐁᑮᑕᔑᒫᒡ ᐃᔅᕒᐃᔭᓬᐊᐞ : ᐋᓇᐐᓐ ᐯᒫᑎᓯᐙᒡ ᐃᔅᕒᐃᔭᓬ ᐁᐊᐲᒋᐹᑏᓄᐙᒡ ᑖᐱᔥᑰ ᑳᐊᐲᒋᐹᑏᓇᑎᕽ ᓀᐗᕽ ᑳᔑᓈᓈᓀᐙᒧᒃ ᑭᒋᑲᒦᕽ, ᐋᐱᒋ ᑕᔥ ᑕᐊᑳᓰᓄᐗᒃ ᑫᐃᔥᑯᓭᐙᒡ ᑫᐱᒫᒋᐃᑣ᙮

ᑳᑎᐯᒋᑫᒡ ᑳᐐᓐ ᑕᑆᑕᐐᓰ ᒋᐱᓇᓇᐊᓵᒡ ᐋᓃᓐ ᐁᔑᒋᑫᓂᒡ ᐯᒫᑎᓯᓂᒡ ᐅᐅᒫ ᐊᑮᕽ᙮

ᒦᑕᔥ ᐅᐅᐌ ᐋᔕ ᐋᐃᓭᔭ ᑳᑮᐃᔑᓃᑳᓈᒋᒧᑯᐸᓀᓐ: ᑮᔥᐱᓐ ᑕᔥ ᑳᑎᐯᒋᑫᒡ ᑳᑭᒋᒪᔥᑲᐌᑖᑯᓯᒡ ᐃᔥᑯᓈᓯᑭᐸᓐ ᐊᐎᔭᐞ ᑳᐐᒋᐅᑕᑳᓀᓰᒥᒪᕽ, ᐋᔕ ᑳᑮᐃᔑᓭᑭᓐ ᐃᓂ ᐆᑌᓇᐗᓐ ᔂᑕᒻ ᑯᒸᕒᐊ ᑲᔦ, ᑫᑮᓇᐎᓐᑦ ᐄᑐᒃ ᐋᔕ ᐃᐃᐌ ᑭᑖᑮᐃᔑᓂᔑᐗᓈᒋᐃᑰᒥᓐ᙮

ᒦᑕᔥ ᐅᐅ ᑫᐃᑭᑐᔭᕽ, ᐃᑭ ᓴ ᑳᒎᐎᐎᓯᒀ ᑳᐐᓐ ᐅᑮᑲᑴᒋᑑᓰᓈᐙ ᒋᒥᓄᐐᒌᐎᑯᐙᒡ ᑭᔐᒪᓂᑑᓐ, ᑭᔐᒪᓂᑑ ᑕᔥ ᐐᓐ ᐅᑮᐃᓇᓵᐞ ᑾᔭᒃ ᒋᒥᓄᐐᒌᐎᑯᒡ ᐋᓃᔥ ᐅᑮᑌᐺᔦᓂᒥᑰᐞ᙮

ᐃᑭ ᑕᔥ ᐐᓐ ᑭᔐᒪᓂᑑᓐ ᑳᑮᑎᐯᓂᒥᑯᐙᒡ ᐯᒫᑎᓯᐙᒡ ᐃᔅᕒᐃᔭᓬᐊᒃ ᐅᑮᑲᑴᒥᑳᓈᐙᓐ ᐅᓇᔓᐌᐎᓇᓐ ᐋᓃᓐ ᑫᑮᐃᔑᒥᓄᐐᒌᐎᑯᐙᐸᓐ ᑭᔐᒪᓂᑑᓐ, ᑳᐐᓐ ᑕᔥ ᐅᑮᒥᑲᓰᓈᐙ᙮

ᐌᑯᓀᓂᓂ ᑕᔥ ᑳᐅᒋᒥᑲᓯᒀ? ᐋᓃᔥ ᐅᑕᓄᑮᐎᓂᐙᓐ ᐊᐗᔑᒣ ᐅᑮᐊᐯᓂᒧᓄᑖᓈᐙᓐ, ᑳᐐᓐ ᐐᓐ ᐅᑌᐺᑕᒧᐎᓂᐙᓐ᙮ ᒦᑕᔥ ᐃᐃ ᑳᑮᐅᒋᐱᓱᑫᔥᑳᑯᐙᒡ ᐃᓂ ᐊᓯᓃᓐ ᑳᐱᓱᑫᔑᒥᐌᓂᒡ᙮

ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐃᓇᔥᑫ ᓂᑕᓯᒫᓐ ᐃᓂ ᐊᓯᓃᓐ ᐃᐃᒫ ᓵᔭᓂᕽ ᑫᐱᓱᑫᔥᑳᑯᐙᒡ ᐯᒫᑎᓯᐙᒡ, ᐊᓯᓃᓐ ᑫᑲᐎᐌᐱᔥᑳᑯᐙᒡ᙮ ᐊᐊ ᑕᔥ ᐐᓐ ᑫᑌᐺᑕᐙᒡ ᑳᐐᓐ ᑕᒥᒋᓇᐌᓯᓰ᙮

ᓃᒋᐅᑌᐺᑕᒨᒃ! ᒦᑕᔥ ᒫᐗᒡ ᐁᔑᒥᓴᐌᑕᒫᓐ ᓂᑌᐃᕽ ᐃᑭ ᐯᒫᑎᓯᐙᒡ ᑳᐐᒋᑎᓄᐐᒪᒀ ᒋᐱᒫᒋᐃᑰᐎᓯᐙᐸᓐ, ᒦᑕᔥ ᐃᐃ ᐁᔑᐊᓇᒥᐁᑕᒪᐗᒀ᙮

ᓂᑖᑎᐹᒋᒫᒃ ᓴ ᐐᑫ ᐁᑲᑴᐃᔑᒋᑫᐙᒡ ᑫᔑᒥᓍᐸᒥᑯᐙᒡ ᑭᔐᒪᓂᑑᓐ, ᑳᐐᓐ ᑕᔥ ᑌᐺ ᐌᐌᓂ ᐅᑭᑫᑕᓰᓈᐙ ᐋᓃᓐ ᑫᐃᔑᒋᑫᐙᐸᓐ᙮

ᑳᐐᓐ ᑕᔥ ᒪᔮ ᐅᑭᑫᑕᓰᓈᐙ ᑫᐃᔑᒋᑫᐙᒡ ᐋᓃᓐ ᑫᔑᒥᓄᐐᒌᐎᑯᐙᐸᓐ ᑭᔐᒪᓂᑑᓐ, ᒦᑕᔥ ᐁᔑᒋᑫᐙᒡ ᐐᓇᐙ ᐱᑯ ᐁᑲᑴᑲᔥᑭᑑᐙᒡ ᐋᓃᓐ ᑫᐅᒋᒥᓄᐐᒌᐎᑯᐙᒡ᙮ ᑳᐐᓐ ᑕᔥ ᐃᐃᒫ ᑮᐃᔑᐸᑭᑎᓂᑎᓱᓰᐗᒃ ᑭᔐᒪᓂᑑᓐ ᑳᐃᔑᐅᓇᓵᓂᒡ ᐊᐎᔭᓐ ᑫᐅᒋᒥᓄᐐᒌᐎᑯᓂᒡ᙮

X ᑕᔥ ᐅᑮᐃᔑᓯᑑᓐ ᐃᐃ ᐅᓇᔓᐌᐎᓂᓂ ᒋᐴᓂᐋᐸᑕᓂᓂᒃ᙮ ᐊᐌᓀᓐ ᑕᔥ ᐃᑯ ᑫᑌᐺᑕᕽ ᑕᐃᓇᓵ ᒋᒥᓄᐐᒌᐙᒡ ᑭᔐᒪᓂᑑᓐ᙮

ᒨᓯᔅ ᑕᔥ ᐅᑮᑕᔑᑖᓐ ᐃᐃ ᐊᐎᔭᓐ ᑫᐅᒋᒥᓄᐐᒌᐙᓂᐸᓐ ᑭᔐᒪᓂᑑᓐ ᓇᐃᑕᕽ ᐃᐃ ᐅᓇᔓᐌᐎᓂᓂ, ᒦᑕᔥ ᐅᐅ ᑳᐃᑭᑐᒡ: ᐊᐌᓀᓐ ᓴ ᐱᑯ ᑳᓇᐃᑕᕽ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ ᒦ ᐃᒫ ᑫᐅᑎᓇᕽ ᐱᒫᑎᓯᐎᓐ᙮

ᐃᐃ ᑕᔥ ᑾᔭᑾᑭᒥᑰᐎᓐ ᑌᐺᑕᒧᐎᓂᕽ ᑳᐅᒌᒃ ᒦ ᐅᐅ ᐃᔑᑕᔑᑌ: ᑫᑯ ᐅᐅ ᐃᑭᑐᑫᒃ ᑭᑌᐃᐙᕽ: ᐊᐌᓀᓐ ᑕᔥ ᑫᐃᔖᐸᓐ ᑭᒋᑮᔑᑯᕽ? ᒦᑕᔥ ᐅᐅ ᑳᐃᒋᑳᑌᒃ, ᒋᓈᓯᑲᐙᒡ Xᑕᓐ ᒋᐲᓈᒡ ᐅᐅᒫ ᐊᑮᕽ᙮

ᑫᑯ ᑲᔦ ᐃᑭᑐᑫᒃ: ᐊᐌᓀᓐ ᑕᔥ ᑫᔑᓈᔒᐸᓐ ᐌᑎ ᐅᓂᐴᐞ ᑳᔑᐊᔮᓂᒡ? ᒦᑕᔥ ᐅᐅ ᑳᐃᒋᑳᑌᒃ, ᒋᐅᒋᐲᓈᒡ Xᑕᓐ ᐃᐃᒫ ᐅᓂᐴᐞ ᑳᐃᔑᐊᔮᓂᒡ᙮

ᐅᐅ ᑕᔥ ᐐᓐ ᑭᒋᒪᓯᓇᐃᑲᓐ ᐃᑭᑑᒪᑲᓐ: ᐃᐃ ᓴ ᑭᔐᒪᓂᑑ ᐅᑎᐹᒋᒧᐎᓐ ᐋᐱᒋ ᑭᐯᔣᐸᑕᒧᐙᒻ, ᑭᑑᓂᐙᕽ ᐄᑐᒃ ᑭᑕᔮᒻ, ᑭᑌᐃᐙᕽ ᑲᔦ, ᒦᑕᔥ ᐃᐃ ᒥᓍᒋᒧᐎᓐ ᑌᐺᑕᒧᐎᓐ ᑳᔑᑕᔑᑌᒃ ᑳᑕᔑᑕᒫᕽ᙮

ᑮᔥᐱᓐ ᒧᔐᐐᓇᒡ ᒋᓴᔅ ᐁᑎᐯᒋᑫᒡ, ᐐᑫ ᑲᔦ ᑌᐺᑕᒪᓐ ᑲᔦ ᑭᔐᒪᓂᑑ ᐁᑮᑮᐌᐱᒫᑎᓯᐋᒡ Xᑕᓐ ᐃᐃᒫ ᓂᐳᐎᓂᕽ, ᒦ ᓴ ᐃ ᒋᐱᒫᒋᐃᑰᔭᓐ᙮

ᐋᓃᔥ ᐐᑫ ᑌᐺᑕᒪᕽ ᒦᐃᒫ ᐌᒋᑾᔭᒀᒋᐃᓇᕽ ᒋᒥᓄᐐᒌᐎᓇᕽ ᑭᔐᒪᓂᑑ; ᐁᒧᔐᐐᑕᒫᑫᔭᕽ ᑕᔥ ᑲᔦ ᑭᑑᒋᐱᒫᒋᐃᑰᒥᓐ᙮

ᐋᓃᔥ ᑭᒋᒪᓯᓇᐃᑲᓐ ᐃᑭᑑᒪᑲᓐ: ᐊᐌᓀᓐ ᓴ ᐱᑯ ᑳᑌᐺᑕᐙᒡ, ᑳᐐᓐ ᑕᒥᒋᓇᐌᓯᓰ᙮

ᑳᐐᓐ ᑕᔥ ᐯᐸᑳᓐ ᐃᓀᑖᑯᓯᓰᐗᒃ ᐃᑭ ᒎᐗᒃ ᐃᑭ ᑲᔦ ᑳᒎᐎᐎᓯᒀ᙮ ᑭᔐᒪᓂᑑ ᓴ ᐯᔑᑾᓐ ᑲᑭᓇ ᐊᐎᔭᐞ ᐅᑎᔑᑎᐯᓂᒫᐞ, ᐋᐱᒋ ᑲᔦ ᐅᐌᓅᒋᔕᐌᓂᒫᐞ ᐃᐃ ᑲᑭᓇ ᑳᑲᓅᓂᑯᒡ᙮

ᑭᒋᒪᓯᓇᐃᑲᓐ ᓴ ᐃᑭᑑᒪᑲᓐ: ᐊᐌᓀᓐ ᓴ ᐱᑯ ᐊᐎᔭ ᑫᑲᓅᓈᒡ ᑳᑎᐯᒋᑫᓂᒡ ᒋᓈᑕᒫᑯᒡ ᑕᐱᒫᒋᐋ᙮

ᐋᓃᓐ ᑕᔥ ᑫᐅᒋᑲᓅᓈᐙᐸᓐ ᒋᐐᒋᐃᑯᐙᒡ ᒪᔑ ᐁᑌᐺᑕᐙᓯᒀ? ᐋᓃᓐ ᑕᔥ ᑫᐅᒋᑌᐺᑕᐙᐙᐸᓐ ᒪᔑ ᑳᓅᑕᓯᒀ ᐁᑎᐹᒋᒥᒥᓐᒡ? ᐋᓃᓐ ᑕᔥ ᑫᐅᒋᓅᑕᒧᐙᐸᓐ ᐃᐃ ᒥᓍᒋᒧᐎᓐ ᒪᔑ ᐁᐐᑕᒪᐙᓯᐎᑣ?

ᐋᓃᓐ ᑕᔥ ᑫᐅᒋᐐᑕᒫᑫᐙᐸᓐ ᐃᐃ ᒥᓍᒋᒧᐎᓐ ᐃᑭ ᐅᒥᓍᒋᒨᒃ ᒪᔑ ᑳᒫᒋᓂᔕᐙᓯᐎᑣ? ᑭᒋᒪᓯᓇᐃᑲᓐ ᓴ ᐁᐃᔑᐲᐃᑳᑌᒃ: ᐋᐱᒋ ᓴ ᑕᒥᓄᓈᑯᓯᐗᒃ ᑳᐲᒋᒥᓍᒋᒧᐙᒡ!

ᑳᐐᓐ ᑕᔥ ᑲᑭᓇ ᐅᑮᐅᑖᐱᓇᓰᓈᐙ ᒥᓍᒋᒧᐎᓐ᙮ ᐅᐅᐌ ᐄᑐᒃ ᐋᐃᓭᔭ ᑮᐃᑭᑐ: ᐊᐌᓀᓐ ᑕᔥ ᑳᑌᐺᑕᕽ ᓂᑎᓈᒋᒧᐎᓂᓈᓐ?

ᓇᔥᑫ ᑕᔥ, ᐊᐎᔭ ᐁᓅᑕᕽ ᐃᐃ ᒥᓍᒋᒧᐎᓐ, ᒦ ᓴ ᐃᐃᒫ ᐌᒋᐅᔑᐆᒪᑲᓂᓂᒃ ᐅᑌᐺᔦᑕᒧᐎᓐ᙮ ᐃᐃᐌᓂ ᑕᔥ ᑎᐹᒋᒧᐎᓐ ᑳᓅᑕᒧᐙᒡ ᒦ ᐃᒫ Xᑕᓐ ᑳᐃᔑᑎᐹᒋᒥᒥᓐᒡ᙮

ᐅᐅ ᑕᔥ ᓂᑎᑭᑦ: ᑌᐺ ᓇ ᑳᐐᓐ ᐅᑮᓅᑕᓰᓈᐙ ᐃᐃ ᒥᓍᒋᒧᐎᓐ? ᐅᑮᓅᑖᓈᐙ ᐄᑐᒃ, ᐋᓃᔥ ᑭᒋᒪᓯᓇᐃᑲᓐ ᐃᑭᑑᒪᑲᓐ: ᐃᓂ ᐅᑮᑭᑐᐎᓂᐙᓐ ᒥᓯᐌ ᐊᑮᕽ ᑮᓅᑖᑾᓂᓂᐗᓐ, ᐃᓂ ᑲᔦ ᐅᑎᑭᑐᐎᓂᐙᓐ ᑮᐃᔖᒪᑲᓂᓂᐗᓐ ᑳᐊᑯᑕᓀᑖᑯᓯᓂᒡ ᐯᒫᑎᓯᓂᒡ᙮

ᑫᔮᐱ ᑕᔥ ᐅᐅ ᓂᑎᔑᑲᑴᑗ: ᑳᐐᓐ ᐃᓇ ᐯᒫᑎᓯᐙᒡ ᐃᐃᒫ ᐃᔅᕒᐃᔭᓬ ᐊᑮᕽ ᑮᓂᓯᑐᑕᓰᐗᒃ? ᒨᓯᔅ ᑕᔥ ᐐᓐ ᓂᑕᒻ ᑮᓇᑴᑕᒻ ᐁᑮᐃᑭᑐᒡ: ᓂᑲᐋᐸᒋᐋᒃ ᓴ ᑯᑕᒃ ᑳᐯᔑᑴᐙᓇᑭᓯᐙᒡ, ᑫᑰᓂᓂ ᑳᐃᓀᓂᒫᓯᐌᒀ, ᒋᐅᒋᐋᔮᔐᑕᒣᒃ ᑮᓇᐙ ᑳᑎᐯᓂᒥᓇᑰᒃ ᐯᒫᑎᓯᔦᒃ᙮ ᒦᐗᒃ ᐃᑕᔥ ᐃᑭ ᑳᑕᔑᒪᒀ ᑳ ᐊᔮᓯᒀ ᓂᓯᑐᑕᒧᐎᓐ ᓂᑲᐋᐸᒋᐋᒃ ᒋᓂᔥᑭᐃᓇᑰᒃ᙮

ᐊᐗᔑᒣ ᑕᔥ ᑭᔐᒪᓂᑑ ᑮᒪᔥᑲᐎᑮᔗ ᐅᐅ ᑮᐃᑭᑐᒡ ᐋᐃᓭᔭᐗᓐ ᑮᐋᐸᒋᐋᒡ: ᓂᑮᒥᑳᑰᒃ ᐃᑕᔥ ᐃᑭ ᑳᑮᓇᓈᑕᐙᐸᒥᓯᒀ, ᓂᑮᓈᑯᓰᑕᐙᒃ ᑕᔥ ᐃᑭ ᑳᑮᑲᑴᑗᓯᒀ ᓃᓐ ᐅᒋ᙮

ᐅᐅ ᑕᔥ ᐅᑎᓈᐞ ᐃᔅᕒᐃᔭᓬᐊᐞ: ᑲᐯᑮᔑᒃ ᓴ ᑭᔒᐱᓂᑫᑕᐎᓂᓂᒻ ᒋᓈᓯᑲᐎᔦᒃ ᑮᓇᐙ ᑳᔕᔒᐱᑕᒣᒃ, ᑮᓇᐙ ᑳᓇᓈᑴᑕᒣᒃ ᐯᒫᑎᓯᔦᒃ᙮

ᒦᑕᔥ ᐁᑭᑐᔮᓐ, ᑭᔐᒪᓂᑑ ᓇ ᑕᔥ ᐅᑮᐌᐱᓈᐞ ᐯᒫᑎᓯᓂᒡ ᑳᑎᐯᓂᒫᒡ ᐃᔅᕒᐃᔭᓬᐊᐞ ? ᑳᐐᓐ ᐄᑐᒃ ᐊᐙᒡ᙮ ᑫᓃᓐ ᐅᔕ ᐯᔑᒃ ᐃᔅᕒᐃᔭᓬ ᓂᑎᓄᐤ, ᐁᐸᕒᐊᐋᒥᕽ ᑲᔦ ᓂᑑᑕᑳᓀᔅ, ᐯᒋᒪᓐ ᑲᔦ ᑳᐃᔑᐅᐲᐌᓰᒥᒡ ᑲᔦ ᓃᓐ ᓂᑑᒋᑎᐯᑖᑯᔅ᙮

ᑳᐐᓐ ᑕᔥ ᑭᔐᒪᓂᑑ ᐅᑮᐌᐱᓈᓰᐞ ᐅᐱᒫᑎᓰᒪᐞ ᒣᐎᔕ ᑳᑮᑮᔖᒋᐅᓀᓂᒫᒡ᙮ ᑭᑭᑫᑖᒻ ᐄᑐᒃ ᑭᒋᒪᓯᓇᐃᑲᓐ ᐁᐃᔑᐲᐃᑳᑌᒃ, ᐋᓃᓐ ᐃᓬᐋᐃᒐ ᑳᑮᐃᓈᒡ ᑭᔐᒪᓂᑑᓐ ᐊᐲ ᐁᑕᔑᒫᒡ ᐃᐃ ᐃᔅᕒᐃᔭᓬᐊᐞ᙮

ᒦᑕᔥ ᐅᐅ ᑳᐃᑭᑐᒡ: ᑌᐯᒋᑫᔭᓐ, ᐅᑮᓂᓵᐙᐞ ᐃᓴ ᐃᐃ ᑭᑎᐹᒋᒧᐎᓂᓃᒪᐞ, ᐅᐲᑯᐱᑑᓈᐙᓐ ᑲᔦ ᑳᐃᔑᐸᑭᑎᓈᓱᓈᓂᐗᓂᓂᒃ ᑳᓂᑖᐃᔑᐊᓇᒥᐁᑖᑰᔭᓐ᙮ ᒦ ᓴ ᑕᔥ ᓃᓐ ᐁᑕ ᐁᒥᒋᐯᔑᑯᔮᓐ ᓂᑲᑴᓂᓯᑰᒃ ᐃᑕᔥ ᑫᓃᓐ᙮

ᐋᓃᓐ ᑕᔥ ᑭᔐᒪᓂᑑᓐ ᑳᐃᔑᓇᑴᑖᑯᒡ? ᑫᔮᐱ ᐅᔕ ᓃᔣᒋᕽ ᒥᑖᔂᒃ ᐃᓂᓂᐗᒃ ᓂᑲᓇᐌᑕᒫᔅ ᒪᔑ ᐁᓇᒥᐁᑕᐙᓯᒀ ᐃᓂ ᒪᓂᑑᑳᓇᓐ ᐯᔭᓬ ᑳᐃᔑᓂᑳᓂᒥᓐᒡ᙮

ᒦᑕᔥ ᐯᔑᑾᓐ ᓅᑯᒻ ᑫᔮᐱ, ᐋᐱᒋ ᐁᔑᐊᑳᓰᓄᐙᒡ ᐃᑭ ᑭᔐᒪᓂᑑᓐ ᑳᑮᐅᓀᓂᒥᑯᐙᒡ, ᐋᓃᔥ ᐅᑭᔐᐙᑎᓰᑲᑖᑯᐙᓐ᙮

ᑭᔐᒪᓂᑑ ᐅᑑᓀᑕᒧᐎᓐ ᐅᒋᐊᓄᑮᒪᑲᓂᓂ ᐅᑭᔐᐙᑎᓯᐎᓂᕽ, ᑳᐐᓐ ᐐᓐ ᐁᔑᒋᑫᓂᒡ ᐊᐎᔭᓐ᙮ ᑮᔥᐱᓐ ᓴ ᐅᑎᓀᑕᒧᐎᓐ ᐅᒋᐊᓄᑮᒪᑲᓂᓂᑭᐸᓐ ᐋᓃᓐ ᐁᔑᒋᑫᓂᒡ ᐊᐎᔭᓐ, ᑳᐐᓐ ᐄᓴᓐ ᐅᑭᔐᐙᑎᓯᐎᓐ ᑌᐺ ᑭᔐᐙᑎᓯᐎᓂᐗᓯᓂᓂ᙮

ᐋᓃᓐ ᑕᔥ ᑳᐃᔑᓭᒃ? ᐃᑭ ᓴ ᐯᒫᑎᓯᐙᒡ ᐃᔅᕒᐃᔭᓬᐊᒃ ᑳᐐᓐ ᐅᑮᑌᐱᓇᓰᓈᐙ ᐌᑯᓀᓐ ᐃᓂ ᑳᑮᑲᑴᒥᑲᒧᐙᒡ᙮ ᐃᑭ ᓴ ᑳᑮᐊᑳᓰᓄᐙᒡ ᑳᑮᐅᓈᐸᒥᑯᐙᒡ ᑭᔐᒪᓂᑑᓐ ᒦᐗᑭᑭ ᑳᑮᒥᑲᒧᐙᒡ᙮ ᐃᑭ ᑕᔥ ᐐᓐ ᑯᑕᒃ ᐊᐎᔭᒃ ᑮᔕᔒᐱᑕᒨᒃ᙮

ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑭᔐᒪᓂᑑ ᑕᔥ ᐅᑮᐃᔑᑕᒪᐙᐞ ᒋᓵᐱᑭᑫᑕᒫᐎᓯᓂᒃ᙮ ᐅᐅ ᑕᔥ ᐃᔑ ᐊᐲ ᑳᐐᓐ ᒪᔑ ᐙᐱᓰᐗᒃ, ᑳᐐᓐ ᑲᔦ ᐅᓅᑕᒫᐎᓂᓰᐗᒃ᙮

ᑌᐱᑦ ᐄᑐᒃ ᑲᔦ ᑮᐃᑭᑐ: ᑕᑲ ᐃᐃᒫ ᑳᐃᔑᓂᑖᐐᑾᑎᐙᒡ ᑕᔑᓇᒀᓱᐗᒃ, ᑕᔑᑕᓲᓱᐗᒃ ᑲᔦ, ᑕᔑᐱᓱᑫᔑᓅᒃ ᑲᔦ, ᑕᐅᒋᑲᒀᑕᑭᐋᐗᒃ ᑲᔦ ᐅᑎᔑᒋᑫᐎᓂᐙᓐ!

ᑕᑲ ᑲᔦ ᐅᔥᑮᔑᑯᐙᓐ ᑕᑭᐱᓂᑳᑌᓂᐗᓐ ᒋᐙᐱᓯᒀ, ᒨᔕᒃ ᑲᔦ ᑕᐙᑭᒌᔥᑰᓱᐗᒃ ᐁᑯᓯᑯᐗᓀᐙᒡ᙮

ᐅᐅ ᑕᔥ ᒦᓇᐙ ᓂᑎᔑᑲᑴᑗ: ᐊᐲ ᒎᐗᒃ ᑮᐱᓱᑫᔑᓄᐙᒡ, ᒦ ᓇ ᐃ ᐗᐐᑫ ᒋᓂᔑᐗᓈᑎᓯᐙᒡ? ᑫᑯ ᐃ ᓇᑫ ᐃᓀᑕᑫᒃ! ᐋᓃᔥ ᐃᑭ ᑳᒎᐎᐎᓯᒀ ᒣᔥᑾᒡ ᐅᑮᓈᓯᑳᑯᓈᐙ ᐱᒫᒋᐃᑰᐎᓐ ᐊᐲ ᒎᐗᐞ ᑮᒪᒋᑑᑕᒥᓂᒡ᙮ ᒦᑕᔥ ᐅᐅ ᑳᑮᐅᒋ ᐃᔑᓭᒃ ᒎᐗᒃ ᒋᐅᒋᐋᔮᔐᑕᒧᐙᒡ᙮

ᐊᐲ ᒎᐗᒃ ᑮᒪᒋᑑᑕᒧᐙᒡ, ᒣᔥᑾᒡ ᑲᑭᓇ ᓴ ᐯᒫᑎᓯᐙᒡ ᐅᐅᒫ ᐊᑮᕽ ᑮᐌᓅᒋ ᔕᐌᑖᑯᓯᐗᒃ᙮ ᐁᑮᑭᑎᒫᑭᓈᑯᓯᐙᒡ ᑲᔦ ᐅᑕᒑᑯᐙᕽ ᑳᑮᐅᒋᐌᓅᒋᔕᐌᑖᑯᓯᐙᒡ ᐁᑳ ᑳᒎᐎᐎᓯᒀ᙮ ᐋᐱᒋ ᓴ ᐊᐗᔑᒣ ᑕᐹᑏᓇᑎᓐ ᐃᐃ ᔕᐌᒋᑫᐎᓐ ᐊᐲ ᑕᑾᑭᒥᑣ ᑫᐐᓇᐙ ᑲᑭᓇ ᑳᑕᔑᐙᒡ ᒎᐗᒃ!

ᑮᓇᐙ ᑕᔥ ᑳᒎᐎᐎᓯᐌᒃ, ᓅᑯᒻ ᑭᑲᓅᓂᓂᓂᒻ: ᐅᐅ ᑕᔥ ᐁᐃᔑᓭᒃ ᓃᓐ ᐃᔑᓂᔕᐙᑲᓐ ᐁᑮᐃᔑᐅᓈᐸᒥᑰᔮᓐ ᒋᓈᓯᑲᐗᒀ ᑳᒎᐎᐎᓯᒀ, ᒦ ᐃ ᐙᐅᒋᑭᒋ ᐃᓀᑕᒫᓐ ᓂᑕᓄᑮᐎᓐ᙮

ᒫᑭᔖ ᐃᑭ ᐯᒫᑎᓯᐙᒡ ᓂᑖᑲᔥᑭᐋᒃ ᑳᐐᒋᐅᒌᒪᒀ ᒋᐋᔮᔐᑕᒧᐙᒡ, ᒦᑕᔥ ᐅᐅᒫ ᐅᐅ ᑳᐃᔑᒋᑫᐗᒃ, ᑫᐐᓇᐙ ᒋᐅᒋᐱᒫᒋᐃᑣ᙮

ᐊᐲ ᑕᔥ ᒎᐗᒃ ᑮᐋᓇᐌᓂᒥᑯᐙᒡ ᑭᔐᒪᓂᑑᓐ, ᒦ ᐃᒫ ᑯᑕᒃ ᐯᒫᑎᓯᐙᒡ ᑳᑮᔒᑫᓂᒫᐙᒡ ᑭᔐᒪᓂᑑᓐ ᓅᑯᒻ ᐌᒋᒥᓄᐐᒌᐙᐙᒡ᙮ ᐋᓃᓐ ᑕᔥ ᑫᐃᔑᓭᒃ ᐊᐲ ᑫᐐᓇᐙ ᑮᐌᐅᑖᐱᓂᑣ, ᒦ ᓴ ᑫᐃᔑᓈᑾᒃ ᑖᐱᔥᑰ ᑳᑮᓂᐳᐙᐸᓐ ᐁᑮᑮᐌᐱᒫᑎᓯᐙᒡ᙮

ᑮᔥᐱᓐ ᑕᔥ ᐊᐎᔭ ᐸᑮ ᐁᐸᑴᐱᓈᒡ ᐸᑴᔑᑲᓇᓐ ᐁᒦᓈᒡ ᑭᔐᒪᓂᑑᓐ, ᒦ ᓴ ᐱᑯ ᐁᓀᑖᑾᓂᓂᒃ ᑖᐱᔥᑰ ᐁᒥᓯᐌᒦᓈᒡ ᑲᑭᓇ ᐸᑴᔑᑲᓇᓐ᙮ ᑮᔥᐱᓐ ᑲᔦ ᑮᒦᓂᓐᒡ ᑭᔐᒪᓂᑑ ᑳᐃᔑᐅᒌᐱᑳᐎᓂᒡ ᒥᑎᑰᓐ ᒦ ᐃ ᐁᓀᑖᑾᓂᓂᒃ ᒥᓯᐌ ᐁᒦᓂᓐᒡ ᒋᓂᑎᐯᑕᕽ ᑲᑭᓇ ᐗᑎᑾᓇᓐ᙮

ᓇᔥᑫᔥ ᑲᔦ ᐃᑭ ᐃᔅᕒᐃᔭᓬᐊᒃ ᒦ ᐁᓀᑖᑯᓯᐙᒡ ᐊᐊ ᐋᓬᐃᑉ ᔔᒥᓈᑎᒃ ᑳᑭᑎᑳᓱᒡ ᐋᓂᑕ ᐁᑮᐴᑯᓂᑳᑌᑭᓐ ᐅᐗᑎᑾᓇᓐ᙮ ᐊᐊ ᑕᔥ ᐐᓐ ᑯᑕᒃ ᐱᑾᒐᔭᐄ ᔔᒥᓈᑎᒃ ᑳᑮᑭᑎᑳᓱᓯᒃ ᑮᓇᐙ ᑳᒎᐎᐎᓯᐌᒃ ᑳᐃᔑᓈᑯᓯᔦᒃ ᐅᐗᑎᑾᓇᓐ ᐲᒋᑭᑎᑳᑌᓂᐗᓐ ᐃᐃᒫ ᑳᑮᐅᒋᐴᑯᓂᑳᑌᑭᓐ ᐃᓂ ᐗᑎᑾᓇᓐ᙮ ᑫᑮᓇᐙ ᑕᔥ ᐃᐃᒫ ᐁᔑᐐᑑᑳᓱᔦᒃ ᑳᑮᐅᒋᒪᔥᑲᐙᑎᓯᐙᒡ ᒎᐗᒃ, ᑳᑮᐅᒋᐌᓅᑕᓂᓂᒃ ᐅᐱᒫᑎᓯᐎᓂᐙ᙮

ᑫᑯ ᑕᔥ ᐋᓇᐌᓂᒫᑫᒀᓂᒃ ᐃᑭ ᒎᐗᒃ ᑳᐃᔑᓈᑯᓯᐙᒡ ᑖᐱᔥᑰ ᑳᑮᐴᑯᓂᑳᑌᑭᓐ ᐗᑎᑾᓇᓐ᙮ ᑫᑯ ᑕᔥ ᑭᒋ ᐃᓀᓂᑎᓱᑫᒃ᙮ ᑭᒥᒋᐗᑎᑾᓂᐎᒻ ᐄᑐᒃ᙮ ᑳᐐᓐ ᐄᑐᒃ ᐅᒌᐱᒃ ᐗᑎᑾᓂᕽ ᐅᒋᐱᒫᑕᓯᓅᓐ, ᐃᐃ ᐗᑎᑾᓐ ᐅᒌᐱᑯᕽ ᐅᒋᐱᒫᑕᓐ᙮

ᔖᑰᒡ ᐃᑕᔥ ᐅᐅ ᑭᑎᑭᑐᒻ: ᑌᐺ ᑮᐴᑯᓂᑳᑌᐗᓐ ᓴ ᐃᓂ ᐗᑎᑾᓇᓐ ᓃᓇᐎᓐᑦ ᐃᐃᒫ ᒋᐅᒋᒫᒌᑭᔮᕽ᙮

ᑭᑖᑮᑌᐺᒻ ᐃᓴ ᐃᐃ ᐃᑭᑐᔦᑭᐸᓐ᙮ ᑖᐱᔥᑰ ᑳᑮᐃᔑᐴᑯᓂᑳᑌᑭᓐ ᐃᓂ ᐗᑎᑾᓇᓐ, ᒦ ᓴ ᑳᑮᐃᔑᐋᓇᐌᓂᒥᑣ ᒎᐗᒃ, ᐋᓃᔥ ᑳᐐᓐ ᑮᑌᐺᑕᓰᐗᒃ᙮ ᑮᓇᐙ ᑕᔥ ᐐᓐ ᐁᑌᐺᑕᒣᒃ ᑫᔮᐱ ᐃᐃᒫ ᑳᐅᒋᐊᔮᔦᒃ᙮ ᑫᑯ ᑕᔥ ᑭᒋ ᐃᓀᓂᑎᓱᑫᒃ, ᓇᐗᒡ ᐃᑯ ᑯᑖᓀᑕᒧᒃ᙮

ᑭᔐᒪᓂᑑ ᐄᑐᒃ ᑳᐐᓐ ᐅᑮᒪᓈᒋᐋᓰᐞ ᒎᐗᐞ ᑳᐃᔑᓈᑯᓯᐙᒡ ᐃᓂ ᒪᔮ ᑳᑮᐗᑎᑾᓂᐗᓂᓂᑭᓐ᙮ ᑭᑎᓀᑖᒻ ᐃᓇᔥ ᑫᑮᓇᐙ ᒋᒪᓈᒋᐃᓀᒃ?

ᒦᑕᔥ ᐅᐅᒫ ᐁᔑᐙᐸᑕᒪᕽ ᑭᔐᒪᓂᑑ ᐋᓃᓐ ᐁᔑᒥᓄᑑᑖᑫᒡ, ᐁᒪᓈᒋᐋᓯᒃ ᑲᔦ ᐊᐎᔭᐞ᙮ ᑳᐐᓐ ᓴ ᐅᒪᓈᒋᐋᓰᐞ ᑳᑮᒪᒋᑑᑕᒥᓂᒡ᙮ ᑮᓇᐙ ᑕᔥ ᐐᓐ ᑭᒥᓄᑑᑖᑯᐙ᙮ ᒦ ᐃ ᑫᑑᑕᐎᓀᒃ ᒨᔕᒃ ᐁᑕ ᐊᓂ ᐃᔑᐱᒧᓭᐌᒃ ᑫᐅᒋᒥᓄᑑᑕᐎᓀᒃ᙮ ᑮᔥᐱᓐ ᑕᔥ ᐃᐃ ᐃᔑᒋᑫᓯᐌᒃ, ᒦᑕᔥ ᐯᔑᑾᓐ ᑫᑮᓇᐙ ᑫᑑᑖᑰᔦᒃ ᑖᐱᔥᑰ ᑳᑮᐴᑯᓂᑳᑌᑭᓐ ᐗᑎᑾᓇᓐ᙮

ᑮᔥᐱᓐ ᑕᔥ ᒎᐗᒃ ᓇᑲᑕᒧᐙᒡ ᐅᔕᔒᐱᑕᒧᐎᓂᐙ, ᒦ ᓴ ᑕᔥ ᐃᐃ ᒋᑮᐌᐊᓯᑣ ᐋᑎ ᓂᑕᒻ ᑳᑮᐃᔑᐊᔮᐙᐸᓐ, ᐋᓃᔥ ᑭᔐᒪᓂᑑ ᐅᑲᔥᑭᑑᓐ ᐃᐃ ᒋᑮᐌᐊᓵᒡ᙮

ᑮᓇᐙ ᓴ ᑳᒎᐎᐎᓯᐌᒃ ᒦ ᐃ ᐁᔑᓈᑯᓯᔦᒃ ᑖᐱᔥᑰ ᐗᑎᑾᓐ ᐃᐃᒫ ᑳᐅᒋᐴᑯᓂᑳᑌᒃ ᔔᒥᓈᑎᑯᕽ ᑳᑮᑭᑎᑳᓱᓯᒃ, ᐃᐃᒫ ᑕᔥ ᐁᔑᐲᒋᑭᑎᑳᑌᒃ ᔔᒥᓈᑎᑯᕽ ᑳᑭᑎᑳᓱᒡ, ᐁᑮᒪᔭᑭᓭᔦᒃ᙮ ᐃᑭ ᑕᔥ ᐐᓐ ᒎᐗᒃ ᒦ ᐃ ᐁᔑᓈᑯᓯᐙᒡ ᑖᐱᔥᑰ ᐗᑎᑾᓇᓐ ᑳᐅᒋᑎᐯᑖᑾᑭᐸᓃᓐ ᐃᐃᒫ ᔔᒥᓈᑎᑯᕽ ᑳᑮᑭᑎᑳᓱᓂᒡ᙮ ᓇᐗᒡ ᐃᑕᔥ ᑖᐌᑕᓂᓂ ᑭᔐᒪᓂᑑ ᒋᑮᐌᑭᑎᑳᑕᑭᐸᓐ ᐃᓂ ᐗᑎᑾᓇᓐ ᔔᒥᓈᑎᑯᕽ ᑳᑮᑭᑎᑳᓱᓂᒡ ᑳᑮᐅᒌᓂᑭᓐ᙮

ᓃᒋᐅᑌᐺᑕᒨᒃ! ᑭᓇᑕᐌᓂᒥᓂᓂᒻ ᓴ ᒋᑭᑫᑕᒣᒃ ᐃᐃ ᑌᐺᐎᓐ ᐅᑖᓈᕽ ᑳᑮᑭᑫᒋᑳᑌᓯᓄᒃ᙮ ᑳᐐᓐ ᐄᑐᒃ ᑮᓇᐙ ᑭᑲᐅᒋᒪᒦᒀᓂᑎᓱᓰᒻ᙮ ᐃᐃ ᑕᔥ ᑳᐃᔑᔕᔒᐱᑕᒧᐙᒡ ᐃᑭ ᐃᔅᕒᐃᔭᓬᐊᒃ ᐯᒫᑎᓯᐙᒡ, ᑳᐐᓐ ᐃᐃ ᒨᔕᒃ ᑕᐃᔑᐊᔮᓰᐗᒃ᙮ ᐹᓂᒫ ᑕᔥ ᑕᐴᓂ ᐃᔑᐊᔮᐗᒃ ᐊᐲ ᑮᒨᔥᑭᓀᓭᓂᒡ ᐃᐃ ᑳᒎᐎᐎᓯᓂᒃ, ᑳᐱᓈᓯᑲᐙᓂᒡ ᑭᔐᒪᓂᑑᓐ᙮

ᒦᑕᔥ ᐃᐃ ᓇᑫ ᑲᑭᓇ ᐃᔅᕒᐃᔭᓬᐊᒃ ᑳᐐᐃᔑᐱᒫᒋᐃᑣ, ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐅᐱᒫᒋᐃᐌ ᓴ ᓵᔭᓂᕽ ᑕᐱᐅᒌ, ᒋᐅᑖᐱᓇᕽ ᐃᐃ ᒪᒋᑑᑕᒧᐎᓐ ᑳᑮᐃᔑᒪᒋᑑᑕᒥᓂᒡ ᒉᑲᐴᓐ ᐅᐲᐌᓰᒥᓂ᙮

ᓂᑲᐅᔑᑕᒪᐙᒃ ᐃᐃ ᐋᔩᒋ ᐊᔓᑕᒫᑎᐎᓐ ᐊᐲ ᐅᑖᐱᓇᒧᐗᒃ ᐃᓂ ᐅᒪᒋᑑᑕᒧᐎᓂᐙᓐ᙮

ᐁᑮᐋᓇᐌᑕᒧᐙᒡ ᑕᔥ ᒥᓍᒋᒧᐎᓐ, ᒦᑕᔥ ᐃᐃ ᒎᐗᒃ ᑳᐃᔑᓈᑯᓯᐙᒡ ᑖᐱᔥᑰ ᐁᑮᔒᑫᓂᒫᐙᒡ ᑭᔐᒪᓂᑑᓐ, ᑮᓇᐙ ᐁᑳ ᑳᒎᐎᐎᓯᐌᒃ ᒋᐅᒋᒥᓄᓭᔦᒃ᙮ ᔖᑰᒡ ᐃᑕᔥ ᑭᔐᒪᓂᑑ ᐅᑮᐅᓀᓂᒫᐞ ᐃᔅᕒᐃᔭᓬᐊᐞ ᒋᐅᐱᒫᑎᓰᒥᒡ, ᒦᑕᔥ ᐁᓀᑖᑯᓯᓂᒡ ᑳᓵᑭᐋᒡ ᐋᓃᔥ ᐅᑮᐃᔑᐊᔓᑕᒪᐙᐞ ᑳᑮᐅᑫᑌᔭᐋᒥᓂᒡ ᒋᐐᒌᐙᒡ᙮

ᐋᓃᔥ ᑳᐐᓐ ᑭᔐᒪᓂᑑ ᐋᑌᑕᓰ ᐊᐌᓀᓇᓐ ᐃᑯ ᑮᐐᐅᓀᓂᒫᒡ, ᑮᐐᔕᐌᓂᒫᒡ ᑲᔦ ᐊᐎᔭᓐ᙮

ᑮᓇᐙ ᑕᔥ ᑳᒎᐎᐎᓯᐌᒃ, ᑭᑮᔕᔒᐱᑕᐙᐙ ᑭᔐᒪᓂᑑ ᐅᑖᓈᕽ᙮ ᓅᑯᒻ ᐃᑕᔥ ᐋᔕ ᑭᑮᐅᒋᑌᐱᓇᒧᐙᒻ ᑭᔐᒪᓂᑑ ᐅᑰᐹᓯᓈᑫᐎᓐ, ᒎᐗᒃ ᐁᑮᔕᔒᐱᑕᒧᐙᒡ᙮

ᒦᑕᔥ ᐯᔑᑾᓐ ᑮᓇᐙ ᐁᑮᑌᐱᓇᒣᒃ ᐃᐃ ᑰᐹᓯᓈᑰᐎᓐ, ᓅᑯᒻ ᐃᑕᔥ ᐐᓐ ᒎᐗᒃ ᐁᔕᔒᐱᑕᒧᐙᒡ, ᒦ ᐃᐌ ᑳᐅᒋ ᐃᔑᓭᐙᒡ ᑫᐐᓇᐙ ᓅᑯᒻ ᒋᑌᐱᓇᒧᐙᒡ ᑭᔐᒪᓂᑑᓐ ᐅᑰᐹᓯᓈᑫᐎᓂᓂ᙮

ᒦᑕᔥ ᐃᐃ ᑭᔐᒪᓂᑑ ᑳᐅᒋ ᐃᓇᑭᒫᒡ ᑲᑭᓇ ᐊᐎᔭᐞ ᔕᔒᐱᑕᒧᐎᓂᓂ ᒋᑎᐯᓂᒥᑯᓂᒡ, ᐊᒦ ᐅᐌᓂ ᑳᐅᒋ ᐃᔑᒋᑫᒡ, ᑲᑭᓇ ᐊᐎᔭᓐ ᒪᔮ ᐯᔑᑾᓐ ᒋᐅᒋᑌᐱᓇᒥᓂᒡ ᐅᑰᐹᓯᓈᑫᐎᓐ᙮

ᐋᐱᒋ ᑭᒋ ᐃᔥᐯᑖᑾᓂᓂ ᑳᔑᐌᓅᑕᓂᓂᒃ ᑭᔐᒪᓂᑑ ᐅᑲᑮᑖᐌᑕᒧᐎᓐ, ᐅᑭᑫᑕᒫᐎᓐ ᑲᔦ᙮ ᑳᐐᓐ ᑕᔥ ᑲᔦ ᐊᐎᔭᓐ ᐅᑖᐐᑕᓰᓂ ᐋᓃᓐ ᐁᔑᐅᓀᑕᕽ, ᑳᐐᓐ ᑲᔦ ᐊᐎᔭᓐ ᐅᑖᓂᓯᑐᑕᓰᓂ ᐋᓃᓐ ᐁᔑᒋᑫᒡ!

ᑭᒋᒪᓯᓇᐃᑲᓐ ᓴ ᐃᔑᐲᐃᑳᑌ: ᑳᐐᓐ ᓴ ᐊᐎᔭᓐ ᐅᑭᑫᑕᓰᓂ ᑳᑎᐯᒋᑫᒡ ᐋᓃᓐ ᐁᓀᑕᕽ, ᑳᐐᓐ ᑲᔦ ᐊᐎᔭᓐ ᐐᑳ ᐅᑖᐐᑕᒫᑯᓰᓐ ᐋᓃᓐ ᑫᓂ ᐃᔑᒋᑫᒡ᙮

ᑳᐐᓐ ᑲᔦ ᐐᑳ ᐊᐎᔭᓐ ᑫᑰᓂᓂ ᐅᒦᓂᑯᓰᓐ, ᑫᐅᒋᒪᓯᓇᐊᒪᐙᐸᓐ ᐊᐎᔭᓐ᙮

ᐐᓐ ᑲᑭᓇ ᑫᑰᓐ ᐅᑮᐅᔑᑑᓐ, ᑲᑭᓇ ᑲᔦ ᑫᑰᓂᓂ ᑮᐅᒋᐊᔮᓂ ᐐᓐ ᐅᒋ, ᐐᓐ ᑲᔦ ᑲᑭᓇ ᑫᑰᓂᓂ ᑮᐅᔑᑕᒫᓱ᙮ ᑭᔐᒪᓂᑑ ᓴ ᓀᐱᒡ ᐃᑯ ᑕᓂᑭᒋ ᐃᓀᑖᑯᓯ᙮ ᐁᒣᓐ᙮

ᒦᑕᔥ ᓃᒋᐅᑌᐺᑕᒨᒃ, ᑭᔐᒪᓂᑑ ᐁᐌᓅᑕᓂᓂᒃ ᐅᑰᐹᓯᓈᑫᐎᓐ, ᑭᑲᑳᓱᒥᓂᓂᒻ ᒋᐸᑭᑎᓂᑎᓱᔦᒃ ᐁᓈᓴᒦᒡ ᑭᔐᒪᓂᑑ᙮ ᐃᐃ ᓴ ᑳᐱᒫᑕᒃ ᐸᑭᑎᓂᑫᐎᓐ ᒋᐃᔑᓈᑯᓯᔦᒃ, ᐐᓐ ᐁᑕ ᑯ ᐁᔑᐅᓇᑕᒫᓱᔦᒃ ᒋᐋᐸᒋᐃᓀᒃ ᐊᓄᑮᑕᐌᒃ, ᒦᑕᔥ ᐃᐃᐌᓂ ᑳᒥᓍᐸᑕᕽ ᑭᔐᒪᓂᑑ᙮ ᒦ ᓴ ᑕᔥ ᐃᐃ ᑌᐺ ᑾᔭᒃ ᐊᓇᒥᐋᐎᓐ ᑫᒦᓀᑭᐸᓐ ᑭᔐᒪᓂᑑ᙮

ᑫᑯ ᑕᔥ ᓈᐱᓈᑯᓯᑫᒃ ᐅᐅ ᑳᐃᔑᒋᑫᐙᒡ ᐅᐅᒫ ᐊᑮᕽ ᑳᐱᒫᑎᓯᐙᒡ᙮ ᒫᓄ ᐸᑭᑎᓂᒃ ᑭᔐᒪᓂᑑ ᒋᐋᒋᐃᓀᒃ ᐃᐃᒫ ᐲᒐᔭᐄ ᑭᐱᒫᑎᓯᐎᓂᐙᕽ, ᒋᐅᔥᑭᑑᒡ ᑲᔦ ᑭᑎᓀᑕᒧᐎᓂᐙᓐ᙮ ᒦ ᓴ ᑕᔥ ᒋᐅᒋᑭᑫᑕᒧᐌᒃ ᑭᔐᒪᓂᑑ ᐅᑎᓀᑕᒧᐎᓐ, ᒦ ᓴ ᐃᐌᓂ ᑳᐅᓂᔑᔑᓂᓂᒃ, ᐃᐃ ᑲᔦ ᑳᒥᓍᐸᑕᕽ, ᐃᐃ ᑲᔦ ᑳᑮᔑᓈᑾᓂᓂᒃ᙮

ᑭᔐᒪᓂᑑ ᓂᑮᒦᓂᒃ ᐅᑭᔐᐙᑎᓯᐎᓐ, ᒦᑕᔥ ᐅᐅ ᐁᓂᓇᑰᒃ ᑲᑭᓇ ᑳᑕᔑᔦᒃ, ᑫᑯ ᐊᐗᔑᒣ ᐃᓀᓂᑎᓱᑫᒃ ᐃᐃ ᑳᐊᐲᑌᑖᑯᓯᔦᒃ᙮ ᐌᐌᓂ ᓈᓈᑲᑕᐌᑕᒧᒃ ᒨᔕᒃ᙮ ᐃᐃ ᑕᔥ ᑌᐺᔦᑕᒧᐎᓐ ᑭᔐᒪᓂᑑ ᑳᒦᓂᓀᒃ, ᒦ ᓴ ᐃᒫ ᐃᔑᑎᐹᒋᑎᓱᒃ᙮

ᐃᐃᒫ ᑕᔥ ᑭᐐᔭᐎᓈᓂᕽ ᐋᐱᒋ ᐹᑏᓇᑎᓅᓐ ᐃᓂ ᐯᐸᑳᓐ ᑳᐃᓍᑌᑭᓐ᙮ ᐅᓄᐌᓂᐗᓐ ᑕᔥ ᑲᑭᓇ ᐯᐸᑳᓐ ᐃᓇᓄᑮᒪᑲᓅᓐ᙮

ᐋᓇ ᑕᔥ ᐐᓐ ᐁᐹᑏᓄᔭᕽ, ᒦ ᓴ ᐁᔑᓈᑯᓯᔭᕽ ᑖᐱᔥᑰ ᐅᐐᔭᐎᒫ ᑳᐯᔑᑾᒃ ᐁᐃᔑᐯᔑᑯᔭᕽ, ᐋᓃᔥ X ᑲᑭᓇ ᑭᐐᒌᐙᓈᓐ᙮ ᒦᑕᔥ ᐁᔑᓈᑯᓯᔭᕽ ᐁᐐᒌᑎᔭᕽ ᑲᑭᓇ ᑳᑕᔑᔭᕽ ᑖᐱᔥᑰ ᑳᔑᐐᒌᑏᒪᑲᑭᓐ ᐃᓂ ᐸᑫᓯᐎᓇᓐ ᐃᐃᒫ ᐐᔭᐎᒫᕽ᙮

ᑭᔐᒪᓂᑑ ᑕᔥ ᐁᑮᔕᐌᓂᒥᓇᕽ ᑭᑮᒦᓂᑯᓈᓐ ᐅᒦᑭᐌᐎᓇᓐ ᐯᐸᑳᓐ ᑳᐃᔑᐊᓄᑮᒪᑲᓂᓂᑭᓐ ᒋᐃᔑᒋᑫᐗᕽ᙮ ᑮᔥᐱᓐ ᐊᐎᔭ ᑮᐃᔑᒦᓂᑰᐎᓯᒡ ᒋᑕᔑᑕᕽ ᑭᔐᒪᓂᑑᓐ ᐅᑎᐹᒋᒧᐎᓂᓂ, ᑕᑲ ᒦ ᑫᐊᐲᑖᒋᒧᒡ ᐋᓃᓐ ᐁᐲᒋᑌᐺᔦᑕᕽ᙮

ᑮᔥᐱᓐ ᑕᔥ ᐊᐎᔭ ᑮᐃᔑᒦᓂᑰᐎᓯᒡ ᒋᐸᒥᐃᐌᒡ, ᑕᑲ ᓴ ᑕᐸᒥᐃᐌ᙮ ᑮᔥᐱᓐ ᑕᔥ ᐃᔑᒦᓂᑰᐎᓯᒡ ᒋᑭᑭᓄᐊᒫᑫᒡ, ᑕᑲ ᓴ ᑕᑭᑭᓄᐊᒫᑫ᙮

ᑮᔥᐱᓐ ᑕᔥ ᐃᔑᒦᓂᑰᐎᓯᒡ ᒋᒪᔥᑲᐎᑌᐁᐋᒡ ᐊᐎᔭᓐ, ᒦ ᓴ ᐃ ᑫᐃᔑᒋᑫᐸᓐ᙮ ᐊᐊ ᑲᔦ ᑳᐸᑭᑎᓂᑫᒡ, ᐱᓵᓂᑯ ᒋᒌᑫᑕᑭᐸᓐ ᐁᐸᑭᑎᓂᑫᒡ᙮ ᐊᐊ ᑲᔦ ᑳᓃᑳᓃᒡ, ᐱᓵᓂᑯ ᑕᑭᒋᐊᓄᑮ᙮ ᐊᐊ ᑲᔦ ᑳᒥᓄᑑᑖᑫᒡ, ᒋᒥᓉᑕᑭᐸᓐ ᐃᐃ ᐁᐃᔑᒋᑫᒡ᙮

ᑌᐺ ᐱᑯ ᑲᔦ ᐐᑫ ᓵᑭᐃᑎᒃ᙮ ᔒᑫᑕᒧᒃ ᐃᐃ ᑳᒪᒋᓈᑾᒃ, ᑭᒋᐎᓇᒧᒃ ᐃᑕᔥ ᐃᐃ ᑳᐅᓂᔑᔑᒃ᙮

ᐐᑫ ᑲᔦ ᓵᑭᐃᑎᒃ ᑖᐱᔥᑰ ᑳᐅᐐᒋᑭᐌᑎᐙᒡ ᑳᔑᓵᑭᐃᑎᐙᒡ᙮ ᓃᑳᓂᑭᑌᓂᒥᑾᒃ ᑮᒋᐅᑌᐺᑕᒨᒥᐙᒃ ᐊᐲᒡ ᑮᓇᐙ ᑳᐃᓀᓂᑎᓱᔦᒃ᙮

ᒨᔕᒃ ᑲᔦ ᐊᓄᑮᒃ, ᑫᑯ ᐐᑳ ᑭᑎᒥᑫᒃ᙮ ᐐᑫ ᐱᑯ ᒥᓯᐌ ᑭᑌᐃᐙᕽ ᐅᒋᐊᓄᑮᑕᐎᒃ ᑳᑎᐯᒋᑫᒡ᙮

ᐁᐊᔮᔦᒃ ᑕᔥ ᐃᐃ ᐊᐯᓂᒧᐎᓐ, ᒨᔕᒃ ᐃᑯ ᒌᑫᑕᒧᒃ᙮ ᐋᔩᑌᑕᒧᒃ ᑲᔦ ᐋᓂᒥᓯᐎᓐ ᐅᑎᓯᑯᔦᒃ᙮ ᒨᔕᒃ ᐃᑯ ᑲᔦ ᐊᓇᒥᐋᒃ᙮

ᒦᓂᑾᒃ ᑲᔦ ᐃᑭ ᐅᑕᓇᒥᐋᒃ ᑫᑰᓂᓂ ᑳᐃᔑᓅᑌᓭᐙᒡ, ᐌᐌᓂ ᓈᑲᒋᐃᑾᒃ ᑮᐅᑎᓯᓀᒀ ᐃᑭ ᐲᐎᑌᒃ ᑭᑖᐎᓂᐙᕽ᙮

ᑲᑴᒋᒥᒃ ᑲᔦ ᑭᔐᒪᓂᑑ ᒋᔕᐌᓂᒫᒡ ᐃᐃ ᑳᑲᒀᑕᑭᐃᒥᓀᒃ, ᑌᐺ ᑲᑴᒋᒥᒃ ᒋᔕᐌᓂᒫᒡ, ᑳᐐᓐ ᐐᓐ ᒋᒪᒐᑭᒫᒡ᙮

ᐐᒋᒥᓉᑕᒨᒥᑾᒃ ᓴ ᐃᑭ ᑲᔦ ᑳᒥᓉᑕᒧᐙᒡ, ᐐᒋᒪᐎᒥᑾᒃ ᑲᔦ ᐃᑭ ᑳᒪᐎᐙᒡ᙮

ᐯᔑᑾᓐ ᑲᔦ ᐃᓀᓂᑎᒃ ᑲᑭᓇ ᑳᑕᔑᔦᒃ, ᑫᑯ ᐐᓐ ᑭᒋ ᐃᓀᓂᑎᓱᑫᒃ᙮ ᐱᓵᓂᑯ ᐃᔑᒋᑫᒃ ᐃᓂ ᑳᑕᐸᓭᑖᑾᑭᓐ ᐊᓄᑮᐎᓇᓐ᙮ ᑫᑯ ᑲᔦ ᓂᑲᑮᑖᐌᑖᒥᓐ ᐃᓀᓂᑎᓱᑫᒃ᙮

ᑮᔥᐱᓐ ᐊᐎᔭ ᒪᒋᑑᑕᐎᓀᒃ, ᑫᑯ ᑲᑴᓈᐱᓇᒪᐙᑫᒃ ᐃᐃ ᑳᑑᑕᐎᓀᒃ᙮ ᑲᑴᐃᔑᒋᑫᒃ ᐃᑕᔥ ᐃᐃ ᐌᓂᔑᔑᕽ ᑲᑭᓇ ᐊᐎᔭ ᑳᒥᓍᐸᑕᕽ᙮

ᒫᐗᒡ ᐃᑯ ᑭᒋᐊᓄᑮᒃ ᐁᑯᑲᔥᑭᑑᔦᒃ, ᐱᓵᓐ ᒋᐐᒋᐱᒫᑎᓰᒣᒀ ᑲᑭᓇ ᐊᐎᔭᒃ᙮

ᑳᓵᑭᐃᓇᑰᒃ, ᑫᑯ ᑲᑴᑎᐸᐃᑫᑫᒃ ᐊᐎᔭ ᑫᑰᓂᓂ ᑑᑕᐎᓀᒃ᙮ ᑕᐎᓇᒪᐎᒃ ᑭᔐᒪᓂᑑ ᐅᓂᔥᑳᑎᓯᐎᓐ ᒋᓇᓇᐊᒋᑫᒪᑲᓂᓂᒃ᙮ ᑭᒋᒪᓯᓇᐃᑲᓐ ᐋᓃᔥ ᐃᔑᐲᐃᑳᑌ: ᓃᓐ ᓂᑲᓇᓇᐊᒋᑫ, ᓃᓐ ᓂᑲᑮᐌᑎᐸᐃᑫ, ᐃᑭᑐ ᑳᑎᐯᒋᑫᒡ᙮

ᐅᐅ ᑕᔥ ᐃᑭᑑᒪᑲᓐ ᑭᒋᒪᓯᓇᐃᑲᓐ: ᑮᔥᐱᓐ ᓴ ᐊᐊ ᑳᔒᑫᓂᒥᒃ ᓅᑌᔅᑲᑌᒡ, ᐊᔕᒻ ᑫᑰᓂᓂ᙮ ᑮᔥᐱᓐ ᑲᔦ ᓅᑌᐐᒥᓂᑴᒡ, ᐱᓵᓂᑯ ᒋᒥᓇᐊᒡ᙮ ᑮᔥᐱᓐ ᑕᔥ ᐃᐃ ᐃᔑᒋᑫᔭᓐ, ᑖᐱᔥᑰ ᓴ ᐁᒑᑭᓱᒡ ᑕᐃᔑᐊᔮ ᑫᐊᐲᑕᑲᒋᒡ᙮

ᑫᑯ ᑲᔦ ᐸᑭᑎᓇᑫᒃ ᐃᐃ ᑳᒪᒋᓈᑾᒃ ᒋᔖᑰᒋᐃᑯᔦᒃ᙮ ᐅᐅ ᑕᔥ ᐃᔑᒋᑫᒃ, ᑳᐅᓂᔑᔑᒃ ᐋᐸᒋᑑᒃ ᒋᔖᑰᒋᑑᔦᒃ ᐃᐃ ᑳᒪᒋᓈᑾᒃ᙮

ᒦᑕᔥ ᐁᔑᓈᑾᒃ ᑲᑭᓇ ᐊᐎᔭ ᒋᓇᐃᑕᑭᐸᓐ ᐃᐃ ᐅᑭᒫᐎᐎᓐ, ᐋᓃᔥ ᑮᔥᐱᓐ ᑭᔐᒪᓂᑑ ᐃᓀᑕᓯᑭᐸᓐ ᒋᐊᔮᓯᓂᓂᒃ ᐃᐃ ᐅᑭᒫᐎᐎᓐ ᑳᐐᓐ ᑖᑮᐊᔮᓯᓂᓂ᙮ ᒦᑕᔥ ᑳᐅᒋᐊᔮᓂᒃ ᐅᑭᒫᐎᐎᓐ ᑭᔐᒪᓂᑑ ᐐᓐ ᐃᑯ ᐁᑮᐸᑭᑎᓇᕽ ᐅᐅᒫ ᐊᑮᕽ᙮

ᐊᐎᔭ ᑕᔥ ᑳᒦᑳᑕᕽ ᐅᑭᒫᐎᐎᓐ ᒦᓴ ᑖᐱᔥᑰ ᐁᒦᑳᑕᕽ ᐃᐃ ᑭᔐᒪᓂᑑᓐ ᑳᑮᐅᓇᑑᓂᒡ᙮ ᐊᐊ ᑕᔥ ᐅᐅ ᑳᐃᔑᒋᑫᒡ ᐐᓐ ᐃᓴ ᐱᑯ ᑕᑲᔥᑭᑕᒫᓱ ᐋᑎ ᑫᐅᒋᐅᓇᔓᐙᓱᒡ᙮

ᐃᑭ ᑕᔥ ᐌᐌᓂ ᑳᐃᔑᒋᑫᐙᒡ ᑳᐐᓐ ᒣᒬᒡ ᐅᑲᑯᓵᓯᐙᐙᐞ ᐃᐃ ᐊᑮᐎᐅᑭᒫᐞ᙮ ᐃᑭ ᑕᔥ ᑳᓂᑖ ᒪᒫᔒᐙᒡ ᐁᑕ ᐅᑲᑯᓵᐙᐞ᙮ ᑭᓇᑕᐌᑖᒻ ᐃᓇ ᒋᑯᓵᓯᐌᒃ ᐊᐊ ᐊᑮᐎᐅᑭᒫ? ᐃᓇᔥᑫ ᑾᔭᒃ ᐃᔑᒋᑫᒃ, ᒦᑕᔥ ᑫᐃᓂᓀᒃ ᐁᑮᒥᓄᒋᑫᐌᒃ᙮

ᐋᓃᔥ ᒦ ᐃ ᑖᐱᔥᑰ ᐁᔑᓈᑯᓯᒡ ᐊᐞ ᐊᑮᐎᐅᑭᒫ ᐁᐊᓄᑮᑕᐙᒡ ᑭᔐᒪᓂᑑᓐ, ᐁᐊᓄᑮᒡ ᑮᓐ ᒋᒥᓄᓭᐗᒡ᙮ ᑮᔥᐱᓐ ᒪᒫᔒᔭᓐ, ᒦ ᓴ ᑕᔥ ᐃᐃ ᒋᑯᓴᒡ, ᐋᓃᔥ ᒪᔥᑲᐎᓰᐎᓂᓂ ᐅᑕᔮᓐ ᐌᐌᓂ ᐱᑯ ᒋᓇᓇᐊᓯᒃ, ᑳᐐᓐ ᑭᑲᒪᓈᒋᐃᑯᓰ᙮ ᑭᔐᒪᓂᑑᓐ ᐄᑐᒃ ᐅᑕᓄᑮᑕᐙᓐ᙮ ᐱᓵᓐ ᐃᑕᔥ ᐃᑯ ᐅᑲᓇᓇᐊᓵᓐ ᐊᐎᔭᓐ ᑳᒪᒫᔒᓂᒡ᙮

ᒦᑕᔥ ᐅᐅ ᑳᐅᒋ ᐃᔑᓈᑾᒃ ᒋᓇᐃᑕᒪᓐ ᐃᐃ ᐅᑭᒫᐎᐎᓐ, ᑳᐐᓐ ᐐᓐ ᐁᑕ ᒋᑯᑕᒧᐗᒡ ᑭᔐᒪᓂᑑ ᑳᐐᐃᔑᓇᓇᐊᓵᒡ ᐊᐎᔭᐞ, ᐃᐃ ᓴ ᑲᔦ ᒋᑭᑫᓂᑎᓱᔭᓐ ᑾᔭᒃ ᐁᐃᔑᒋᑫᔭᓐ᙮

ᒦᑕᔥ ᑳᐅᒋ ᐃᔑᓈᑾᒃ ᒋᑎᐸᐊᒣᒃ ᐃᐃᐌᓂ ᑳᓂᑖ ᑎᐸᐊᒪᐎᓐᒡ ᐌᑭᒫᐙᑎᓯᒡ, ᐋᓃᔥ ᐃᑭ ᐊᑮᐎᐅᑭᒫᒃ ᐅᑕᓄᑮᑕᐙᐙᓐ ᑭᔐᒪᓂᑑᓐ ᐁᑑᑕᒧᐙᒡ ᐅᑕᓄᑮᐎᓂᐙ᙮

ᑎᐸᐊᒧᒃ ᐃᑕᔥ ᐌᑯᓀᓂᓂ ᑯ ᑳᐊᑕᐌᓂᒥᓀᒀ ᒋᑎᐸᐊᒧᐌᒃ᙮ ᑎᐸᐊᒧᒃ ᑲᔦ ᐃᐃ ᑭᑕᑮᒥᐙ, ᐃᓂ ᑲᔦ ᐯᐸᑳᓐ ᑫᑰᓇᓐ ᑫᑮᑎᐸᐊᒣᑭᐸᓐ᙮ ᑭᑌᓂᒥᑾᒃ ᐃᑕᔥ ᑲᔦ ᐃᑭ ᑫᑭᑌᓂᒣᒀᐸᓐ, ᒦᑕᔥ ᑲᔦ ᐯᔑᑾᓐ ᑑᑕᐎᑾᒃ ᑫᑭᒋ ᐃᓀᓂᒥᑣᐸᓐ᙮

ᑫᑯ ᐊᐎᔭ ᑫᑰᓂᓂ ᒪᓯᓇᐊᒪᐙᑫᒃ, ᑭᓇᑕᐌᑖᑯᓯᒻ ᐃᑕᔥ ᒨᔕᒃ ᒋᓵᑭᐃᑎᔦᒃ, ᑖᐱᔥᑰ ᐊᐎᔭ ᒨᔕᒃ ᑳᑎᐸᐃᑫᒡ᙮ ᐊᐌᓀᓐ ᑕᔥ ᐃᑯ ᑳᓵᑭᐋᒡ ᐅᐐᒋᐱᒫᑎᓰᓐ ᒦ ᓴ ᐊᐌ ᑳᑎᐱᑑᑕᕽ ᒨᓯᓲᓐ ᐅᑑᓇᔓᐌᐎᓂᓂ᙮

ᐅᐅ ᑕᔥ ᐯᔑᒃ ᐅᓇᔓᐌᐎᓐ ᑳᐃᑭᑑᒪᑲᒃ: ᓵᑭᐃᑾᒃ ᐃᑭ ᑮᒋᐱᒫᑎᓰᒥᐙᒃ ᑖᐱᔥᑰ ᑳᐊᐲᒋᓵᑭᐃᑎᓱᔦᒃ, ᒦ ᓴ ᐯᔑᑾᓐ ᐊᐲᑌᑖᑾᓐ ᐅᓄ ᒫᒪᐤ ᑳᐊᐲᑌᑖᑾᑭᓐ ᐅᓇᔓᐌᐎᓇᓐ ᑳᐐᐐᑕᒫᓐ: ᑫᑯ ᐸᐹᒣᓂᒥᒫᑫᓐ ᐸᑳᓐ ᐊᐎᔭ ᐅᐐᒋᐙᑲᓇᓐ, ᑫᑯ ᓂᔑᐌᑫᓐ, ᑫᑯ ᑲᔦ ᒥᓴᐌᑕᒧᐙᑫᓐ ᐊᐎᔭ ᐸᑳᓐ ᐅᑕᔭᐄᒪᓐ ᑳᑎᐯᑕᕽ᙮

ᑮᔥᐱᓐ ᑕᔥ ᐊᐎᔭ ᓵᑭᐊᒡ, ᑳᐐᓐ ᐐᑳ ᑭᑲᒪᒋᑑᑕᐙᓰ᙮ ᒦ ᓴ ᑕᔥ ᐁᔑᓈᑾᒃ ᐊᐎᔭ ᑳᓵᑭᐃᐌᒡ ᐁᑎᐱᑑᑕᕽ ᑲᑭᓇ ᐅᓇᔓᐌᐎᓐ᙮

ᒦᑕᔥ ᐅᐅᐌ ᐁᔑᓈᑾᒃ ᒋᐃᔑᒋᑫᔦᒃ, ᐋᓃᔥ ᑭᑭᑫᑖᒻ ᐋᔕ ᑎᐸᐃᑲᓐ ᐁᐅᒋᒋᓭᒃ ᒋᑯᔥᑯᓯᔦᒃ᙮ ᓇᐗᒡ ᐄᑐᒃ ᓅᑯᒻ ᑭᐯᔣᐸᑖᒻ ᑳᐐᐃᔑᐱᒫᒋᐃᑰᔦᒃ ᐊᐲᒡ ᐐᓐ ᑳᑮᐊᐲᓵᐸᑕᒣᑭᐸᓐ ᓂᑕᒻ ᑮᒫᒌᑌᐺᑕᒣᒃ᙮

ᐋᔕ ᐅᔕ ᑫᑳ ᐃᔥᒀᑎᐱᑲᓐ, ᐋᔕ ᐅᔕ ᐲᑖᐸᓐ᙮ ᑕᑲ ᑕᔥ ᒦ ᐃ ᐃᔑᐴᓂᑑᑖᓂᓐ ᐃᓂ ᑫᑰᓇᓐ ᑎᐱᑲᓄᕽ ᑳᐅᒋᑎᐯᑖᑾᑭᓐ᙮ ᑕᑲ ᐱᓯᑲᑖᓂᓐ ᐃᓂ ᒦᑳᓱᐎᐋᐸᒋᒋᑲᓇᓐ ᐙᓭᔮᓯᐎᓂᕽ ᑳᐅᒋᑎᐯᑖᑾᑭᓐ᙮

ᑕᑲ ᑕᔥ ᐌᐌᓂ ᐱᒫᑎᓯᑖ, ᒋᐃᔑᒋᑫᔭᕽ ᑳᐃᔑᒋᑫᐙᒡ ᐙᓭᔮᕽ ᑳᐃᔑᑎᐯᑖᑯᓯᐙᒡ᙮ ᑕᑲ ᑳᐐᓐ ᐅᓄᐌᓂᐗᓐ ᑭᑲᐃᔑᒋᑫᓰᒥᓐ: ᐸᐹᑲᑮᐹᒋᒋᑫᐎᓐ, ᒥᓂᑴᐎᓐ, ᐐᓈᑎᓯᐎᓐ, ᐱᔑᒀᒋᒋᑫᐎᓐ, ᑮᑳᑎᐎᓐ, ᐋᔮᔐᓂᑎᐎᓐ᙮

ᐅᐅ ᑕᔥ ᑭᑲᐃᔑᒋᑫᒥᓐ: ᑕᑲ ᓴ ᐱᓯᑲᒧᐙᒃ ᑳᑎᐯᒋᑫᒡ ᒋᓴᔅ X ᐅᐱᒫᑎᓯᐎᓐ᙮ ᑳᐐᓐ ᑕᔥ ᐊᐗᔑᒣ ᑭᑲᐃᔑᒋᑫᓰᒥᓐ ᑳᐐᐃᔑᒋᑫᒪᑲᒃ ᐅᐅ ᑭᐐᔭᐎᓈᓐ ᐋᓃᓐ ᑲᔦ ᐁᔑᒥᓴᐌᑕᒨᒪᑲᒃ᙮

ᐅᑖᐱᓂᒃ ᓴ ᐊᐊ ᒪᔑ ᑳᒪᔥᑲᐎᑌᐺᑕᓯᒃ, ᑫᑯ ᑕᔥ ᐐᓐ ᑲᑴᔖᑰᓱᒫᑫᓐ ᐋᓃᓐ ᐁᓀᑕᕽ ᑫᑰᓂᓂ᙮

ᐯᔑᒃ ᐃᑕᔥ ᐃᔑᑌᐺᑕᒻ ᐱᓵᓂᑯ ᑲᑭᓇ ᑫᑰᓂᓂ ᒋᒦᒋᒡ᙮ ᐊᐊ ᑕᔥ ᒪᔑ ᑳᒪᔥᑲᐎ ᑌᐺᑕᓯᒃ ᑳᑭᑎᑳᑌᓂᒃ ᒦᒋᒻ ᐁᑕ ᐅᒦᒋᓐ᙮

ᑳᐐᓐ ᑕᔥ ᐃᔑᓈᑾᓯᓂᓂ ᐊᐊ ᑲᑭᓇ ᑫᑰᓂᓂ ᑳᒦᒋᒡ ᒋᐋᓇᐌᓂᒫᒡ ᐃᓂ ᑲᑭᓇ ᑫᑰᓂᓂ ᑳᒦᒋᓯᓂᒃ᙮ ᐊᐊ ᑕᔥ ᑲᔦ ᑳᑭᑎᑳᑌᓂᒃ ᒦᒋᒻ ᐁᑕ ᑳᒦᒋᒡ ᑳᐐᓐ ᑲᔦ ᐐᓐ ᐃᔑᓈᑾᓯᓂᓂ ᒋᐃᓈᐸᓐ ᐁᒪᒋᑑᑕᒥᓂᒡ ᐃᓂ ᑲᑭᓇ ᑫᑰᓂᓂ ᑳᒦᒋᓂᒡ᙮ ᑭᔐᒪᓂᑑᓐ ᐄᑐᒃ ᐅᑮᐅᑖᐱᓂᑯᓂ᙮

ᐊᐌᓀᓐ ᐃᑕᔥ ᑮᓐ ᐁᑎᓄᐎᔭᓐ ᒋᓈᓈᑲᓵᐸᒪᑎᐸᓐ ᐸᑳᓐ ᐊᐎᔭᓐ ᑳᐸᒦᑕᐙᒡ? ᐅᑑᑭᒫᒪᓐ ᐅᔕ ᐅᓈᓈᑲᒋᐃᑰᓐ ᑌᐺ ᑾᔭᒃ ᐁᔑᒋᑫᑴᓐ ᑯᒫ ᑲᔦ ᑾᔭᒃ ᐁᔑᒋᑫᓯᑴᓐ᙮ ᐌᐌᓂ ᓴ ᑕᐃᔑᒋᑫ, ᐋᓃᔥ ᑳᑎᐯᒋᑫᓂᒡ ᐅᑲᐐᒋᐃᑰᓐ ᒋᒥᓄᓭᒡ᙮

ᐯᔑᒃ ᐃᑕᔥ ᐃᓂᓂ ᐊᐗᔑᒣ ᐅᑎᓀᑖᓐ ᐯᔑᒃ ᐁᑮᔑᑲᓂᓂᒃ, ᑳᐐᓐ ᑕᔥ ᐋᐱᒋ ᐅᐸᐹᐱᓯᔅᑫᑕᓰᓇᓐ ᑯᑕᒃ ᑳᑮᔑᑲᓂᓂᑭᓐ᙮ ᐊᐊ ᑕᔥ ᑯᑕᒃ ᐯᔑᒃ ᒦᓇᐙ ᑲᑭᓇ ᐯᔑᑾᓐ ᐅᑎᓀᑖᓇᓐ ᐃᓂ ᑳᑮᔑᑲᓂᓂᑭᓐ᙮ ᒦ ᓴ ᑕᔥ ᐁᔑᓈᑾᓂᓂᒃ ᐁᑕᓱᐯᔑᑯᒡ ᐱᑯ ᒋᐋᔩᑌᑕᑭᐸᓐ ᐋᓃᓐ ᐙᐃᔑᑮᔑᑲᓄᑫᒡ᙮

ᐊᐌᓀᓐ ᓴ ᐱᑯ ᑳᑭᒋ ᐃᓀᑕᕽ ᐁᑮᔑᑲᓂᓂᒃ, ᒦ ᓴ ᐁᔑᒋᑫᒡ ᐁᐐᑭᑌᓂᒫᒡ ᑳᑎᐯᒋᑫᓂᒡ᙮ ᐊᐊ ᑲᔦ ᑲᑭᓇ ᑫᑰᓂᓂ ᑳᒦᒋᒡ, ᒦ ᓴ ᐁᔑᒋᑫᒡ ᐁᑭᑌᓂᒫᒡ ᑳᑎᐯᒋᑫᓂᒡ, ᐋᓃᔥ ᐅᒦᑴᒋᐌᓂᒫᓐ ᑭᔐᒪᓂᑑᓐ ᐁᒦᓂᑯᒡ ᒦᒋᒻ᙮ ᐊᐊ ᑕᔥ ᑲᔦ ᑯᑕᒃ ᐋᓂᑕ ᑫᑰᓂᓂ ᑳᒪᓈᒦᒋᒡ, ᒦ ᓴ ᑫᐐᓐ ᐁᔑᒋᑫᒡ, ᐁᑭᑌᓂᒫᒡ ᑳᑎᐯᒋᑫᓂᒡ, ᑫᐐᓐ ᐁᒦᑴᒋᐌᓂᒫᒡ ᑭᔐᒪᓂᑑᓐ᙮

ᑳᐐᓐ ᑕᔥ ᑳᑕᔑᔭᕽ ᐊᐎᔭ ᐐᓐ ᐁᑕ ᐱᑯ ᐱᒫᑎᓰᑕᒫᓱᓰ᙮ ᑳᐐᓐ ᑲᔦ ᐊᐎᔭ ᐐᓐ ᐃᑯ ᓂᐴᑕᒫᓱᓰ᙮

ᐋᓃᔥ ᑮᔥᐱᓐ ᑮᐱᒫᑎᓯᔭᕽ, ᑳᑎᐯᒋᑫᒡ ᐅᔕ ᑳᐅᒋᐱᒫᑎᓯᔭᕽ ᒋᑭᑌᓂᒥᓐᒡ᙮ ᑮᔥᐱᓐ ᑕᔥ ᓂᐳᔭᕽ, ᒋᑭᑌᓂᒥᓐᒡ ᐅᔕ ᑲᔦ ᑳᐅᒋᓂᐳᔭᕽ᙮ ᑯᒫ ᓴ ᐯᒫᑎᓯᐗᑴᓐ, ᑯᒫ ᑲᔦ ᓀᐳᐗᑴᓐ, ᑳᑎᐯᒋᑫᒡ ᐅᔕ ᑭᑎᐯᓂᒥᑯᓈᓐ᙮

ᒦ ᓴ X ᑳᑮᐅᒋᓂᐳᒡ, ᑳᑮᐅᒋᑮᐌᐱᒫᑎᓯᒡ ᑲᔦ, ᒋᑎᐯᓂᒫᒡ ᐃᐃ ᑳᐱᒫᑎᓯᓂᒡ, ᐃᐃ ᑲᔦ ᑳᓂᐳᓂᒡ᙮

ᐌᑯᓀᓐ ᐃᑕᔥ ᑮᓐ ᐌᒋᓈᓈᑲᓵᐸᒪᒡ ᐋᓃᓐ ᑮᑕᓇᒥᐋ ᐁᔑᐱᒫᑎᓯᒡ? ᐌᑯᓀᓐ ᑕᔥ ᑲᔦ ᑮᓐ ᐌᒋᐋᓇᐌᓂᒪᒡ ᑮᒋᐅᑌᐺᑕᒧ? ᑲᑭᓇ ᐄᑐᒃ ᑭᑲᓃᐸᐎᐙᒥᓐ ᐁᓈᓴᒦᒡ ᑭᔐᒪᓂᑑ ᐊᐲ ᑎᐹᑯᓂᓇᕽ᙮

ᑭᒋᒪᓯᓇᐃᑲᓐ ᓴ ᐃᔑᐲᐃᑳᑌ: ᓃᓐ ᑳᑎᐯᒋᑫᔮᓐ ᓂᑕᐱᐐᑖᓐ ᓂᐱᒫᑎᓯᐎᓐ, ᒫᐗᒡ ᐃᑯ ᓂᑭᒋᑌᐺ ᑳᐃᑭᑐᔮᓐ, ᑲᑭᓇ ᓴ ᐊᐎᔭ ᑕᐅᒋᒌᑾᓇᐱᑖ ᐁᓈᓴᒦᐗᒃ, ᑲᑭᓇ ᑲᔦ ᐊᐎᔭ ᑕᐃᑭᑐ ᓃᓐ ᐁᑭᔐᒪᓂᑑᐎᐗᒃ᙮

ᐃᓇᔥᑫ ᑕᔥ, ᑲᑭᓇ ᑳᑕᓱᐯᔑᑯᔭᕽ ᐃᔑᓈᑾᓐ ᒋᐐᑕᒪᐗᕽ ᑭᔐᒪᓂᑑ ᐋᓃᓐ ᑳᑮᐱ ᐃᔑᒋᑫᐗᕽ᙮

ᑕᑲ ᑕᔥ ᐃᐃ ᐃᔑᐴᓂᒋᑫᑖ ᐅᐅ ᑳᓂᑖᓈᓈᑲᓵᐸᑎᔭᕽ᙮ ᑕᑲ ᓴ ᐅᓀᑕᑖ ᒋ ᐃᔑᒋᑫᓯᐗᕽ ᐋᓃᓐ ᐊᐎᔭ ᑫᐅᒋᐱᓱᑫᔑᕽ, ᐋᓃᓐ ᑲᔦ ᑫᐅᒋᐸᑭᔑᕽ ᐊᐊ ᑮᑕᓇᒥᐋᓈᓐ᙮

ᑳᑎᐯᒋᑫᒡ ᒋᓴᔅ ᑕᔥ ᐁᐐᒌᐗᒃ ᑳᐅᒋᑭᑫᑕᒫᓐ, ᑳᐅᒋᑫᒋᓇᐅᔮᓐ ᑲᔦ, ᑲᑭᓇ ᒦᒋᒻ ᑳᑮᐅᔑᒋᑳᑌᒃ ᐁᐯᑲᒃ, ᐱᓵᓂᑯ ᒋᒦᒋᓈᑳᑌᒃ᙮ ᑮᔥᐱᓐ ᑕᔥ ᐐᓐ ᐊᐎᔭ ᐃᔑᑌᐺᑕᕽ ᐋᓂᑕ ᑫᑰᓐ ᒋᒪᓈᐃᔑᒋᑫᐸᓐ, ᒦ ᓴ ᑯ ᐃ ᒋᒫᔑᐱᓂᑎᓱᐸᓐ ᑮᔥᐱᓐ ᐃᔑᒋᑫᒡ ᑳᒪᓈᐃᔑᒋᑫᒡ᙮

ᑮᔥᐱᓐ ᑕᔥ ᐅᒋᒫᔑᓭᒡ ᑮᑕᓇᒥᐋ ᑭᐐᓯᓂᐎᓂᕽ, ᑳᐐᓐ ᐃᑕᔥ ᐄᓴᓐ ᓵᑭᐃᐌᐎᓂᕽ ᑭᑑᒋ ᐃᔑᒋᑫᓰ ᐃᐃ ᑳᐃᔑᒋᑫᔭᓐ᙮ ᑫᑯ ᐃᐃᒫ ᑭᑎᓇᒋᑫᐎᓂᕽ ᐅᒋᓂᔑᐗᓈᒋᐋᑫᓐ ᑮᑕᓇᒥᐋ᙮ Xᑕᓐ ᐄᑐᒃ ᑫᐐᓐ ᐅᑮᓂᐳᑕᒫᑰᓐ᙮

ᑫᑯ ᑕᔥ ᑫᑰᓐ ᐃᔑᒋᑫᑫᓐ ᒋᐅᒋᒪᒋᑕᔑᒋᑳᑌᒃ ᐃᐃ ᑳᐅᓂᔑᔐᑕᒪᓐ᙮

ᐃᐃᐌ ᓴ ᑮᑕᔑᑌᓂᒃ ᐋᓃᓐ ᑭᔐᒪᓂᑑ ᐁᔑᐅᑭᒫᑲᑕᐎᓇᕽ, ᑳᐐᓐ ᐐᓐ ᐋᓃᓐ ᑫᐃᓇᒋᑫᔭᕽ, ᐋᓃᓐ ᑲᔦ ᑫᔑᒥᓂᑴᔭᕽ ᑳᑕᔑᑌᒃ, ᐃᐃᐌ ᐅᔕ ᑳᐃᒋᑳᑌᒃ, ᑮᐃᔑᒋᑫᓈᓂᐗᕽ ᑭᔐᒪᓂᑑ ᑳᒥᓍᐸᑕᕽ, ᐱᓵᓐ ᑲᔦ ᒋᐐᒌᐗᕽ ᑭᔐᒪᓂᑑ, ᒥᓉᑕᒧᐎᓂᓂ ᑲᔦ ᑳᒦᓂᒥᓇᕽ ᑭᔐᒪᓂᑑ ᐅᑕᒑᑾᓐ᙮

ᐊᐎᔭ ᑕᔥ ᐅᐅ ᓇᑫ ᑮᐃᔑᐊᓄᑮᑕᐙᒡ Xᑕᓐ, ᑭᔐᒪᓂᑑᓐ ᐅᒥᓍᐸᒥᑰᓐ, ᐯᒫᑎᓯᓂᒡ ᑲᔦ ᐅᒥᓍᐸᒥᑰᐞ᙮

ᑕᑲ ᑕᔥ ᒨᔕᒃ ᐃᐃ ᑲᑴᐃᔑᒋᑫᑖ, ᐋᓃᓐ ᐱᓵᓂᑯ ᑫᔑᐐᒌᑎᔭᕽ, ᒋᐙᐐᒋᐃᑎᔭᕽ ᑲᔦ ᒋᓂᒪᔥᑲᐎᑭᔭᕽ᙮

ᑫᑯ ᑕᔥ ᐐᓐ ᐃᐃᒫ ᑭᒦᒋᒥᒥᕽ ᐅᒋᓂᔑᐗᓈᒋᑖᐙᑫᓐ ᑭᔐᒪᓂᑑ ᑳᑮᐅᔑᑑᒡ᙮ ᑲᑭᓇ ᒦᒋᒻ ᑮᐸᑭᑎᓂᑳᑌ ᒋᒦᒋᓈᑳᑌᒃ, ᑳᐐᓐ ᐃᑕᔥ ᑖᐅᓂᔑᔑᓯᓅᓐ ᒋᒦᒋᓈᑳᑌᑭᐸᓐ ᐃᐃ ᒦᒋᒻ ᑮᔥᐱᓐ ᐊᐎᔭ ᐃᐃᒫ ᐅᒋᒪᒋᑑᑕᕽ᙮

ᑮᔥᐱᓐ ᑮᑕᓇᒥᐋ ᐅᒋᐱᓱᑫᔑᕽ ᐃᐃᒫ, ᑳᐐᓐ ᑕᐅᓂᔑᔑᓯᓅᓐ ᒋᒦᒋᔭᐸᓐ ᐐᔮᔅ, ᒋᒥᓂᑴᔭᐸᓐ ᑲᔦ ᔔᒥᓈᐳ, ᒋᐃᔑᒋᑫᔭᐸᓐ ᑲᔦ ᑫᑰᓐ ᐃᑯ ᑫᐅᒋᐱᓱᑫᔑᑭᐸᓐ᙮

ᐃᐃ ᑕᔥ ᐃᓇᑫ ᑲᔦ ᑳᔑᑌᐺᑕᒪᓐ ᐅᓄ, ᑕᑲ ᑮᓀᑕᐙ ᐱᑯ ᑭᔐᒪᓂᑑ ᑭᑲᑭᑫᑖᒻ᙮ ᐋᐱᒋ ᓴ ᑕᒥᓉᑕᒻ ᐊᐊ ᐃᓂᓂ ᑳᒫᓀᑕᒧᔥᑳᑯᓯᒃ ᐁᐃᔑᒋᑫᒡ ᐐᓐ ᐃᑯ ᑳᔑᒥᓍᐸᑕᕽ᙮

ᑮᔥᐱᓐ ᑕᔥ ᐅᒋᑫᒋᓈᐅᐌᓂᑎᓱᓯᒃ ᐌᑯᓀᓂᓂ ᑳᒦᒋᒡ, ᑭᔐᒪᓂᑑᓐ ᐃᓴ ᐅᑲᐐᑕᒫᑰᓐ ᓭᓯᒃ ᐁᐃᔑᒋᑫᓯᒃ᙮ ᐋᓃᔥ ᐃᐃ ᑳᐃᔑᒋᑫᒡ ᑳᐐᓐ ᑌᐺᑕᒧᐎᓂᕽ ᐅᒌᒪᑲᓯᓂᓂ᙮ ᑫᑰᓐ ᑕᔥ ᑌᐺᑕᒧᐎᓂᕽ ᐁᐅᒌᓯᓄᒃ ᒦ ᓴ ᐃᐃ ᒪᒋᑑᑕᒧᐎᓐ᙮

ᑮᓇᐎᓐᑦ ᐃᑕᔥ ᑳᒪᔥᑲᐎᑌᐺᑕᒪᕽ, ᒦ ᓴ ᐁᔑᓈᑾᒃ ᒋᑮᐐᒋᐊᒀᐸᓐ ᐃᑭ ᒪᔑ ᑳᒪᔥᑲᐎᑌᐺᑕᓯᒀ᙮ ᑳᐐᓐ ᐐᓐ ᑮᓇᐎᓐᑦ ᐁᑕ ᒋᐃᔑᒋᑫᔭᑭᐸᓐ ᑫᑰᓐ ᑫᒥᓉᑕᒧᐃᑯᔭᕽ᙮

ᑕᑾᒡ ᐃᑕᔥ ᐃᔑᒋᑫᑖ ᑫᒥᓍᐸᑕᕽ ᑮᒋᐱᒫᑎᓰᓈᓐ ᑫᐅᒋᒥᓄᓭᒡ, ᑫᐅᒋᒫᒌᑭᒡ ᑲᔦ ᐅᑌᐺᑕᒧᐎᓂᕽ᙮

ᐐᓐ X ᐋᓃᔥ ᑳᐐᓐ ᑮᒥᓉᑕᒧᐃᑎᓱᓰ, ᐅᐅ ᐄᑐᒃ ᑮᐃᔑᒋᑫ ᑫᑌᐅᔑᐲᐃᑲᓐ ᑳᐃᔑᐲᐃᑳᑌᓂᒃ: ᐃᐃ ᓴ ᑳᑮᐃᔑᒪᒋ ᐃᑰᔭᓐ ᓃᓐ ᓂᑮᐸᑲᒥᔥᑳᑯᓇᓐ᙮

ᑲᑭᓇ ᑫᑰᓐ ᑕᔥ ᑳᑮᐅᔑᐲᐃᑳᑌᒃ ᐃᐃᒫ ᑫᑌᐅᔑᐲᐃᑲᓂᕽ, ᐁᑮᐅᔑᐲᐊᒫᑰᔭᕽ ᒋᐅᒋᑭᑫᑕᒪᕽ ᒋᔕᔒᐯᑕᒪᕽ, ᒋᒪᔥᑲᐌᑕᒪᕽ ᑲᔦ᙮ ᒦᑕᔥ ᐃᐃᒫ ᑫᐅᒋᐊᐯᓂᒧᔭᕽ᙮

ᑕᑲ ᑕᔥ ᑭᔐᒪᓂᑑ ᑳᒦᑭᐌᒡ ᔕᔒᐯᑕᒧᐎᓐ, ᒪᔥᑲᐌᑕᒧᐎᓐ ᑲᔦ, ᑭᑲᐃᔑᐃᑯᐙ ᐯᔑᑾᓐ ᐃᓇᑫ ᒋᐃᔑᓈᓈᑲᑕᐌᓂᑎᔦᒃ, ᐋᓃᔥ ᑭᐱᒥᓂᔕᐊᒧᐙᒻ X ᒋᓴᓲᓐ ᑳᑮᐃᔑᐱᒫᑎᓯᓂᒡ᙮

ᑕᑲ ᑕᔥ ᑳᑕᔑᔦᒃ ᒫᒪᐤ ᐃᑯ ᐃᓀᑕᒧᒃ ᒋᐯᔑᑯᑖᑯᓯᔦᒃ ᐁᒦᑴᒋᐌᓂᒣᒃ ᑭᔐᒪᓂᑑ ᑳᑎᐯᒋᑫᒡ ᒋᓴᔅ X ᑳᐅᔫᓯᒡ᙮

ᐅᑖᐱᓂᑎᒃ ᐃᑕᔥ ᑳᑕᔑᔦᒃ ᐱᓵᓐ ᒋᐙᐐᒌᑎᔦᒃ, ᑖᐱᔥᑰ X ᑳᑮᐃᔑᐅᑖᐱᓂᓀᒃ, ᑭᔐᒪᓂᑑ ᒋᑭᒋ ᐃᓀᑖᑯᓯᒡ᙮

ᑭᐐᑕᒪᐎᓂᓂᒻ X ᐁᑮᐱᑎᓄᐎᒡ ᐊᐎᔭ ᑳᒥᓄᑑᑕᐙᒡ ᒎᐗᐞ, ᐁᐐᓈᑯᑑᒡ ᑭᔐᒪᓂᑑᓐ ᐅᑌᐺᔦᑖᑯᓯᐎᓂᓂ, ᒋᐅᒋ ᐃᔑᓭᓂᒃ ᐋᓃᓐ ᑭᔐᒪᓂᑑ ᑳᑮᐃᔑᐊᔓᑕᒪᐙᑯᐸᓀᓐ ᑭᑫᑌᔭᐋᒥᓈᓂᐞ᙮

X ᑕᔥ ᑲᔦ ᑮᐃᔑᒋᑫ ᐁᑳ ᑳᒎᐎᐎᓯᓂᒃ ᒋᒦᑴᒋᐌᓂᒫᓂᒡ ᑭᔐᒪᓂᑑᓐ, ᐋᓃᔥ ᐅᑰᐹᓯᓈᑯᓂ᙮ ᑭᒋᒪᓯᓇᐃᑲᓐ ᐄᑐᒃ ᐃᔑᐲᐃᑳᑌ: ᓃᓐ ᓴ ᑭᑲᒦᑴᒋᐌᓂᒥᓐ ᐁᑳ ᑳᒎᐎᐎᓯᒀ ᑳᐃᔑᐊᔮᐙᒡ, ᓂᑲᐃᓇᐊᒻ ᑲᔦ ᒋᒦᑴᒋᐌᑕᒫᓐ ᑭᐐᓱᐎᓐ᙮

ᒦᓇᐙ ᑕᔥ ᐸᑳᓐ ᐃᔑ ᐃᔑᐲᐃᑳᑌ: ᑮᓇᐙ ᐁᑳ ᑳᒎᐎᐎᓯᐌᒃ, ᐐᒋᒥᓉᑕᒨᒥᑾᒃ ᑭᔐᒪᓂᑑ ᑳᑮᐅᓀᓂᒫᒡ ᐯᒫᑎᓯᓂᒡ ᐁᐐᑎᐯᓂᒫᒡ᙮

ᐸᑲᓐ ᐃᑕᔥ ᑲᔦ ᒦᓇᐙ ᐃᔑᐅᔑᐲᐃᑳᑌ: ᑮᓇᐙ ᐁᑳ ᑳᒎᐎᐎᓯᐌᒃ, ᒦᑴᒋᐌᓂᒥᒃ ᑳᑎᐯᒋᑫᒡ, ᒦᑴᒋᐌᓂᒥᒃ, ᑲᑭᓇ ᑳᐱᒫᑎᓯᔦᒃ!

ᐅᐅ ᑕᔥ ᐋᐃᓭᔭ ᑮᐃᔑᐲᐃᑫ: ᐊᐎᔭ ᓴ ᑕᐱᑕᑯᔑᓐ ᒉᓰᕽ ᑫᐅᑕᑳᓀᓯᒡ, ᒦ ᓴ ᑕᔥ ᐊᐊ ᑳᐐᐱᑕᑯᔑᕽ ᒋᑎᐯᓂᒫᒡ ᐁᑳ ᑳᒎᐎᐎᓯᓂᒃ, ᒦᑕᔥ ᐊᐊᐌ ᑫᐊᐯᓂᒧᓄᑖᑯᒡ ᐃᓂ ᐁᑳ ᑳᒎᐎᐎᓯᓂᒃ᙮

ᑕᑲ ᑭᔐᒪᓂᑑ ᑳᒦᑭᐌᒡ ᐊᐯᓂᒧᐎᓐ, ᑭᑲᒨᔥᑭᓀᒦᓂᑯᐙ ᒌᑫᑕᒧᐎᓐ, ᐱᓵᓂᓯᐎᓐ ᑲᔦ ᑳᔑᑌᐺᑕᐌᒃ᙮ ᑭᔐᒪᓂᑑ ᓴ ᐅᑕᒑᑾᓐ ᐅᒪᔥᑲᐎᓰᐎᓂᓃᕽ ᑭᑲᐅᒋᐐᒌᐎᑯᐙ, ᑭᑕᐯᓂᒧᐎᓂᐙ ᒨᔕᒃ ᒋᓂᐌᓅᑕᒃ᙮

ᓃᑕᓇᒥᐋᒃ, ᓃᓐ ᓴ ᐐᑫ ᓂᑫᒋᓈᐞ ᐁᒨᔥᑭᓀᔥᑳᑯᔦᒃ ᐃᐃ ᑳᐅᓂᔑᔑᕽ ᐃᐃ ᑲᔦ ᑲᑭᓇ ᑭᑫᑕᒫᐎᓐ, ᐁᑲᔥᑭᑑᔦᒃ ᑲᔦ ᒋᑲᑭᑭᓄᐊᒫᑎᔦᒃ᙮

ᐅᐅ ᐅᔑᐲᐃᑲᓐ ᑳᐅᔑᐲᐊᒪᐎᓇᑰᒃ ᐋᐱᒋ ᓂᓱᑭᑌᐁ ᐁᐐᑕᒪᐎᓇᑰᒃ ᑫᑰᓇᓐ ᑫᐅᒋᒫᒥᑲᐎᔦᒃ᙮ ᑭᔐᒪᓂᑑ ᐄᑐᒃ ᓂᑮᐃᔑᔕᐌᓂᒥᒃ ᐁᑮᐃᓇᓄᑮᐃᒡ

ᒋᐸᒦᑕᐎᒪᒃ X ᒋᓴᓲᓐ ᒋᐐᒋᐃᒪᒃ ᐃᐃ ᐁᑳ ᑳᒎᐎᐎᓯᓂᒃ᙮ ᑖᐱᔥᑰ ᓴ ᐊᓇᒥᐁᐎᑭᒫ ᑳᐃᓇᓄᑮᒡ ᒦ ᓴ ᐃ ᐁᓇᓄᑮᔮᓐ ᐅᐅ ᑳᑕᔑᑕᒧᐗᒃ ᑭᔐᒪᓂᑑ ᐅᒥᓍᒋᒧᐎᓐ, ᐃᑭ ᓴ ᑫᐐᓇᐙ ᐁᑳ ᑳᒎᐎᐎᓯᒀ ᒋᐃᔑᓈᑯᓯᐙᒡ ᐸᑭᑎᓈᓱᐎᓂᕽ, ᑫᒥᓍᐸᑕᒥᓂᒡ ᑭᔐᒪᓂᑑᓐ᙮ ᐋᓃᔥ ᑭᔐᒪᓂᑑᓐ ᐅᑕᒑᑯᓂ ᐅᐯᑭᐃᑯᐙᓐ᙮

ᐅᐅ ᑕᔥ ᑳᔑᐐᒌᐗᒃ X ᒋᓴᔅ, ᑌᐺ ᓴ ᐃᔑᓈᑾᓐ ᒋᑭᒋ ᐃᓀᑕᒫᓐ ᐅᐅ ᑳᔑᐊᓄᑮᑕᐗᒃ ᑭᔐᒪᓂᑑ᙮

ᑳᐐᓐ ᑕᔥ ᓂᑖᑌᐃᓀᓂᑎᓱᓰ ᑫᑰᓐ ᒋᑕᔑᑕᒫᐹᓐ, ᒦ ᐁᑕ ᑯ X ᑳᐱ ᐃᔑᐊᓄᑮᒡ ᓂᐱᒫᑎᓯᐎᓂᕽ, ᐁᑮᐋᐸᒋᑑᒡ ᓂᑎᑭᑐᐎᓇᓐ, ᓂᑎᔑᒋᑫᐎᓇᓐ ᑲᔦ, ᒋᐐᒋᐃᒪᒃ ᐁᑳ ᑳᒎᐎᐎᓯᓂᒃ ᒋᓇᐃᑕᐙᓂᒡ ᑭᔐᒪᓂᑑᓐ᙮

ᒦᐗᓐ ᑕᔥ ᑲᔦ ᐅᓄ ᑳᔮᐸᒋᑑᒡ ᑳᒪᔥᑲᐎᓈᑾᓂᓂᑭᓐ ᑭᑭᓇᐙᒋᒋᑲᓇᓐ, ᒫᒪᑳᒋᒋᑫᐎᓇᓐ ᑲᔦ, ᐁᔑᒪᔥᑲᐗᓄᑮᒡ ᑲᔦ ᑭᔐᒪᓂᑑ ᐅᑕᒑᑾᓐ᙮ ᐃᐃᒫ ᒉᕒᐆᓴᓬᐊᒥᕽ ᐁᑮᐅᒋᒫᒑᔮᓐ, ᐲᓂᔥ ᒥᓯᐌ ᐌᑎ ᐃᓬᐄᕒᐃᑲᒻ ᐊᑭ ᑳᐃᔑᓂᑳᑌᒃ ᐁᑮᐸᐹᐐᑕᒫᑫᔮᓐ ᐃᐃ ᒥᓍᒋᒧᐎᓐ ᑳᔑᑕᔑᒥᓐᒡ X᙮

ᓃᓐ ᐃᑕᔥ ᐃᐃ ᒨᔕᒃ ᐯᐃᔑᒥᓴᐌᑕᒫᓐ ᐁᐐᐸᐹᐐᑕᒫᑫᔮᓐ ᒥᓍᒋᒧᐎᓐ ᐋᓃᑎ X ᐁᔑᑭᑫᓂᒫᓯᐎᓐᒡ, ᐋᓃᔥ ᑳᐐᓐ ᓂᑎᔑᒋᑫᓰ ᒋᐋᑸᑕᐎᒫᒋᑖᐗᒃ ᐊᐎᔭ ᐋᔕ ᑳᑮᐃᔑᒫᑕᑭᒋᑫᒡ᙮

ᑫᑌᒪᓯᓇᐃᑲᓂᕽ ᐃᑕᔥ ᐃᔑ ᐃᔑᐲᐃᑳᑌ: ᐃᑭ ᓴ ᒪᔑ ᑳᑮᐐᑕᒪᐙᓯᐎᑣ ᐁᑕᔑᒥᒥᓐᒡ ᑕᐙᐸᑫᐗᒃ, ᐃᑭ ᑕᔥ ᑲᔦ ᒪᔑ ᑳᓅᑕᓯᒀ ᑕᓂᓯᑐᑕᒨᒃ, ᐃᔑᐲᐃᑳᑌ᙮

ᒨᔕᒃ ᐃᑕᔥ ᐁᐅᑕᒦᔮᓐ ᐌᑎ ᐁᐸᐹᒫᒋᒧᔮᓐ, ᑳᐅᒋ ᐃᔑᓭᓯᐙᓐ ᒋᐊᑕᐙᐸᒥᓇᑰᒃ᙮

ᐋᔕ ᑕᔥ ᐁᑮᑮᔑᑑᔮᓐ ᐅᐅ ᓂᑕᓄᑮᐎᓐ ᐃᐃᐌᑎ ᓇᑫ ᐊᑮᕽ, ᐋᔕ ᑕᔥ ᓃᐱᐗᐞ ᑕᓱᐱᐴᓇᑳ ᑳᑮᐃᓀᑕᒫᓐ ᐁᐐᐙᐸᒥᓇᑰᑭᐸᓐ,

ᒦᑕᔥ ᐁᓀᑕᒫᓐ ᒋᐃᔑᒋᑫᔮᓐ ᐊᐲ ᐃᔖᔮᓐ ᐃᔅᐯᓐ ᐊᑮᕽ᙮ ᓂᐸᑯᓭᑖᓐ ᐃᑕᔥ ᒋᒪᐗᑎᓯᓇᑰᒃ ᐊᐲ ᐌᑎ ᐊᓂᐱᒥᐊᔮᔮᓐ, ᒋᐐᒋᐃᔦᒃ ᑲᔦ ᐌᑎ ᑳᐐᐃᔖᔮᓐ᙮ ᐹᓂᒫ ᑯᑕ ᑮᐃᔥᒀ ᑌᒪᐗᑎᓯᓇᑰᒃ᙮

ᐱᓇᒫ ᑕᔥ ᓅᑯᒻ ᐌᑎ ᒉᕒᐆᓴᓬᐊᒥᕽ ᓂᑎᔖ, ᐁᐐᐐᒋᐃᒪᒃ ᑭᔐᒪᓂᑑ ᐅᐱᒫᑎᓰᒪᐞ ᐌᑎ ᑳᐊᔮᓂᒡ᙮

ᐃᑭ ᑕᔥ ᐅᑕᓇᒥᐋᒃ ᐌᑎ ᒫᓯᑑᓂᔭ ᐊᑮᕽ ᑳᐊᔮᐙᒡ, ᐌᑎ ᑲᔦ ᐊᑫᔭ ᐊᑮᕽ ᑳᐊᔮᐙᒡ ᐐᓇᐙ ᓴ ᐱᑯ ᑮᐃᓀᑕᒨᒃ ᐁᐐᐸᑭᑎᓂᑫᐙᒡ ᔔᓂᔮᓐ ᐁᐐᐐᒋᐋᐙᒡ ᑳᑰᐹᑎᓯᓂᒡ ᑳᑕᑸᓄᓂᒡ ᑭᔐᒪᓂᑑ ᐅᐱᒫᑎᓰᒪᐞ ᑳᐃᔑᐊᔮᓂᒡ ᐌᑎ ᒉᕒᐆᓴᓬᐊᒥᕽ᙮

ᐐᓇᐙ ᑕᔥ ᐃᑯ ᑮᐃᓀᑕᒨᒃ ᐁᐐᐃᔑᒋᑫᐙᒡ, ᐋᓃᔥ ᐅᒋᑕ ᐱᑯ ᐃᔑᓈᑾᓂᓂ ᒋᑮᐐᒋᐋᐙᐸᓐ᙮ ᐋᓃᔥ ᐃᑭ ᒎᐗᒃ ᐅᑮᒦᓈᐙᐞ ᓂᑕᒻ ᐃᐃ ᐁᑳ ᑳᑮᒎᐎᐎᓯᓂᒃ ᐃᐃ ᑳᑮᐃᔑᔕᐌᓂᒥᑯᐙᒡ ᑭᔐᒪᓂᑑᓐ᙮ ᒦᑕᔥ ᐁᔑᓈᑾᓂᓂᒃ ᐁᑳ ᑳᒎᐎᐎᓯᒀ ᐐᓂᑕᒪᐙ ᒋᐐᒋᐋᐙᐸᓐ ᐃᓂ ᒎᐗᐞ ᐋᓃᓐ ᑫᐐᓇᐙ ᐅᑕᔭᐄᒥᐙᓐ ᑳᑮᐃᔑᔕᐌᑖᑯᓯᐙᒡ᙮

ᐊᐲ ᑕᔥ ᑮᑮᔑᑑᔮᓐ ᐃᐃ ᓂᑕᓄᑮᐎᓐ, ᑮᐃᔥᒀᒥᓯᐌᒦᓇᒀ ᐃᓂ ᔔᓂᔮᓐ ᑳᑮᒫᐗᒋᒋᑲᓂᐎᓂᒡ, ᒦᑕᔥ ᐃᐃ ᒋᓂᒫᒑᔮᓐ ᐃᔅᐯᓐ ᐊᑮᕽ ᒋᐃᔖᔮᓐ᙮ ᓂᑲᐊᓂᑭᐱᒌ ᑕᔥ ᐁᐐᒪᐗᑎᓯᓇᑰᒃ᙮

ᐊᐲ ᑕᔥ ᐌᑎ ᐅᑎᓯᓇᑰᒃ, ᓂᑭᑫᑖᓐ ᓴ ᒋᐲᑖᐗᒃ X ᑳᐌᓅᑕᓂᓂᒃ ᐅᔕᐌᒋᑫᐎᓐ᙮

ᓃᑕᓇᒥᐋᒃ ᑭᑎᔑᑲᓅᓂᓂᓂᒻ ᐁᐐᒌᐗᕽ ᑳᑎᐯᒋᑫᒡ ᒋᓴᔅ X, ᐃᐃᒫ ᑲᔦ ᓵᑭᐃᑎᐎᓂᕽ ᑭᔐᒪᓂᑑ ᐅᑕᒑᑾᓐ ᑳᒦᓂᓇᕽ᙮ ᑭᑎᔑᑲᑳᓱᒥᓂᓂᒻ, ᐐᒋᐃᔑᒃ ᑳᔑᐊᓇᒥᐁᑕᐗᒃ ᑭᔐᒪᓂᑑ, ᐐᑫ ᐱᑯ ᐌᐌᓂ ᒋᐊᓇᒥᐁᑕᒪᐎᔑᔦᒃ᙮

ᐊᓇᒥᐁᑕᒪᐎᔑᒃ ᒋᐸᐹᒣᓂᒥᓯᒀ ᐃᑭ ᑳᑌᐺᑕᓯᒀ ᐌᑎ ᒎᑏᔭ ᐊᑮᕽ ᑳᐊᔮᐙᒡ, ᐃᐃ ᑕᔥ ᑲᔦ ᑳᔑᑲᑴᐐᒋᐃᒪᒃ ᑭᔐᒪᓂᑑ ᐅᐱᒫᑎᓰᒪᐞ ᐃᐃᒫ ᒉᕒᐆᓴᓬᐊᒥᕽ ᑳᐊᔮᓂᒡ ᒦ ᐃᐌᓂ ᑳ ᐊᑕᐌᑕᒧᐗᒃ ᒋᐅᑕᐱᓇᒥᓂᒡ᙮

ᒦᑕᔥ ᐃᐃ ᐊᐲ ᑫᐙᐸᒥᓇᑰᒃ ᑭᔐᒪᓂᑑ ᐃᓀᑕᕽ, ᒌᑫᑕᒧᐎᓐ ᑕᔥ ᑲᔦ ᓂᑲᐱᑭᑮ᙮ ᐊᐲ ᑕᔥ ᐌᑎ ᒪᐗᑎᓯᑎᔭᕽ, ᐐᑫ ᑭᑲᐅᒋᐅᔥᑭᒥᓋᒪᒋᐅᒥᓐ᙮

ᑕᑲ ᑭᔐᒪᓂᑑ ᑳᒦᑭᐌᒡ ᐱᓵᓀᑕᒧᐎᓐ ᑭᑲᐐᒌᐎᑯᐙ ᑲᑭᓇ ᑳᑕᔑᔦᒃ᙮ ᐁᒣᓐ᙮

ᑭᓇᑕᐌᓂᒥᓂᓂᒻ ᐃᑕᔥ ᒋᑭᑫᓂᒣᒃ ᐊᐊ ᐃᑴ ᑳᐅᑕᐌᒫᔭᕽ ᐲᐱ ᑳᐃᔑᓂᑳᓱᒡ᙮ ᐃᐃᐌᑎ ᓴ ᓭᑯᕒᐄᔮᑳᕽ ᐃᔑᐸᒦᑖᑫ ᐅᑕᓇᒥᐋᐞ ᑳᐃᔑᓂᑖ ᒫᐗᒋᐃᑎᓂᒡ᙮

ᐌᐌᓂ ᐲᑎᑲᓂᒃ, ᑳᑎᐯᒋᑫᓂᒡ ᐄᑐᒃ ᑫᐐᓐ ᐅᑎᐯᓂᒥᑰᓐ᙮ ᐋᓃᔥ ᒦ ᐃ ᑫᐃᔑᒋᑫᐙᐸᓐ ᐯᒫᑎᓯᐙᒡ ᑳᑎᐯᓂᒥᑯᐙᒡ ᑭᔐᒪᓂᑑᓐ᙮ ᐐᒋᐃᒃ ᑲᔦ ᐋᓃᓐ ᐃᑯ ᐁᔑᓅᑌᓭᒡ, ᐋᐱᒋ ᐅᔕ ᓃᐱᐗᐞ ᐅᑮᐐᒋᐋᐞ ᐯᒫᑎᓯᓂᒡ, ᑫᓃᓐ ᓴ ᐱᑯ ᓂᑮᐐᒋᐃᒃ᙮

ᓂᐴᔔᐋ ᓴ ᐸᕒᐃᓯᓬᐊ, ᐊᑶᓬᐊ ᑲᔦ, ᐊᒦᐗᒃ ᐃᓴ ᐃᑭ ᑳᐐᑕᓄᑮᒪᒀ ᐁᐊᓄᑮᑕᐗᑭᒡ X ᒋᓴᔅ᙮

ᐅᑮᓇᓃᓵᓂᑑᓈᐙᓐ ᐃᓴ ᐅᐱᒫᑎᓯᐎᓂᐙᓐ ᒣᒀ ᐁᑮᐐᒋᐃᐙᒡ᙮ ᑳᐐᓐ ᓃᓐ ᐁᑕ ᒦᑴᒡ ᓂᑎᓈᓰᒃ, ᐁᑳ ᑳᒎᐎᐎᓯᒀ ᐅᑌᐺᑕᒨᒃ ᐯᐸᑳᓐ ᑳᐃᔑᒫᒫᐗᒋᐃᑎᐙᒡ ᑫᐐᓇᐙ ᐅᒦᑴᒋᐌᓂᒫᐙᐞ᙮

ᓂᐴᔔᐋᒃ ᐃᑕᔥ ᑲᔦ ᐅᑕᓇᒥᐋᒃ ᐅᐙᑳᐃᑲᓂᓃᕽ ᑳᐃᔑᐲᑎᑫᐙᒡ᙮ ᐃᐴᔔᐋ ᑲᔦ ᐊᐊ ᐃᓂᓂ ᑳᓵᑭᐐᒌᐗᒃ ᐁᐲᓇᑕᔅ ᑳᐃᔑᓂᑳᓱᒡ᙮ ᐐᓐ ᐋᓃᔥ ᓂᑕᒻ ᐅᑮᑌᐺᑕᐙᓐ Xᑕᓐ ᐌᑎ ᐊᑮᕽ ᐁᔕ ᑳᐃᒋᑳᑌᒃ᙮

ᓂᐴᔔᐋ ᑲᔦ ᒣᕒᐃ ᑳᑭᒋᐊᓄᑮᒡ ᒨᔕᒃ ᑮᓇᐙ ᐅᒋ᙮

ᓂᐴᔔᐋ ᑕᔥ ᐁᑕᕒᐅᓈᐃᑲᔅ, ᒎᓂᔭᔅ ᑲᔦ᙮ ᒦᐗᒃ ᓴ ᐃᑭ ᑳᐐᒋᑎᓄᐐᒪᒀ ᐁᒎᐎᐎᔮᕽ, ᓂᑮᐐᒋᑕᑯᓂᑰᒥᑰᒃ ᐃᑕᔥ ᑲᔦ᙮ ᐅᑯᐌᓂᐗᒃ ᐃᑕᔥ ᐗᐐᑫ ᑭᑫᒋᑲᓂᐎᐗᒃ, ᐃᔑᓂᔕᐙᑲᓂᕽ ᐁᐃᔑᑕᑾᑭᒥᑣ᙮ ᐐᓇᐙ ᑕᔥ ᑲᔦ ᓂᑕᒻ ᐅᑮᑌᐺᔦᓂᒫᐙᓐ Xᑕᓐ ᒋᑆ ᑌᐺᔦᓂᒥᒪᒃ᙮

ᓂᐴᔔᐋ ᑲᔦ ᐁᐸᓬᐃᔦᑕᔅ, ᐋᓃᔥ ᓂᓵᑭᐐᒌᐙ, ᐅᐐᒌᐙᓐ ᑲᔦ ᑳᑎᐯᒋᑫᓂᒡ᙮

ᓂᐴᔔᐋ ᑲᔦ ᐅᕒᐯᓇᔅ ᓂᐐᑕᓄᑮᒫᑲᓂᓈᓐ ᐁᐊᓄᑮᑕᐗᑭᒡ X᙮ ᐊᐊ ᑲᔦ ᐃᔅᑌᑭᔅ ᑳᓵᑭᐊᒃ᙮

ᓂᐴᔔᐋ ᑲᔦ ᐊᐯᓬᐄᔅ, ᑳᐅᒋᒥᓍᐸᒋᑲᓂᐎᒡ ᐁᐱᒥᓂᔕᐙᒡ Xᑕᓐ᙮ ᓂᐴᔔᐋᒃ ᑲᔦ ᑲᑭᓇ ᐁᕒᐃᔅᑖᐱᔭᓬᐊᔅ ᐅᑖᐎᓂᕽ ᑳᐊᔮᓂᒡ᙮

ᓂᐴᔔᐋ ᑲᔦ ᐃᕒᐆᑎᔭᓐ, ᑳᐐᒋᒎᐎᒪᒃ᙮ ᓂᐴᔔᐋᒃ ᑲᔦ ᐃᑭ ᐅᑕᓇᒥᐋᒃ ᑳᐐᒌᐙᐙᒡ ᑳᑎᐯᒋᑫᓂᒡ, ᓈᕒᓯᓴᔅ ᐅᑖᐎᓂᕽ ᑳᐅᒌᓂᒡ᙮

ᓂᐴᔔᐋ ᑲᔦ ᒐᕒᐋᐃᐲᓇ, ᒐᕒᐋᐃᐴᓴ ᑲᔦ, ᑳᑮᑭᒋᐊᓄᑮᑕᐙᐙᒡ ᑳᑎᐯᒋᑫᓂᒡ᙮ ᓂᐴᔔᐋ ᑲᔦ ᐊᐊ ᐃᑴ ᐸᕒᓯᔅ ᑳᐃᔑᓂᑳᓱᒡ, ᑳᓵᑭᐊᒃ, ᑳᑮᑭᒋᐊᓄᑮᑕᐙᒡ ᑳᑎᐯᒋᑫᓂᒡ᙮

ᓂᐴᔔᐋ ᑲᔦ ᐅᕒᐆᐸᔅ, ᒦ ᐊᐌ ᐄᑐᒃ ᑳᑭᒋ ᐃᓇᑭᒥᓐᒡ ᐁᐱᒥᓂᔕᐙᒡ ᑳᑎᐯᒋᑫᓂᒡ᙮ ᐅᒫᒫᓐ ᑕᔥ ᑲᔦ ᓂᐴᔔᐃᒫᓐ, ᐋᓃᔥ ᑖᐱᔥᑰ ᐁᐅᑯᓯᓯᒥᒥᒡ ᓂᑮᐱᑑᑕᐎᒥᒃ᙮

ᓂᐴᔔᐋᒃ ᑲᔦ ᐊᓯᑲᕒᐃᑕᔅ, ᐸᓬᐁᑲᓐ ᑲᔦ, ᐊᕒᒦᔅ ᑲᔦ, ᐹᒐᕒᐅᐸᔅ ᑲᔦ, ᐊᕒᒪᔅ ᑲᔦ, ᐃᓂ ᑲᔦ ᑲᑭᓇ ᐅᑌᐺᑕᒨᒃ ᑳᐐᒌᐙᐙᒡ᙮

ᓂᐴᔔᐋ ᑲᔦ ᐱᓬᐋᓬᐊᑲᔅ, ᐊᐊ ᑲᔦ ᐃᑴ ᒎᓬᐃᔭ, ᓃᕒᐃᔭᔅ ᑲᔦ, ᐅᑕᐌᒫᓐ ᑲᔦ ᓂᐴᔔᐃᒫᓐ᙮ ᓂᐴᔔᐋ ᑲᔦ ᐅᓬᐄᐸᔅ, ᐃᓂ ᑲᔦ ᑲᑭᓇ ᐌᑎ ᑳᐐᒌᐙᐙᒡ ᐯᒫᑎᓯᓂᒡ ᑭᔐᒪᓂᑑᓐ ᑳᑎᐯᓂᒥᑯᓂᒡ᙮

ᐅᑌᐺᑕᒨᒃ ᐊᓇᒥᐁᐅᒌᒥᑾᒃ ᑮᐴᔔᐁᒀ, ᒦᐃ ᓇᑫ ᐃᔑᐴᔔᐃᑎᒃ᙮ ᑲᑭᓇ ᑕᔥ X ᑳᑎᐯᓂᒫᒡ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ ᐅᑌᐺᑕᒨᐞ ᑭᐴᔔᐃᑯᐙᒃ ᑲᑭᓇ ᑳᑕᔑᔦᒃ᙮

ᑭᑲᑳᓱᒥᓂᓂᒻ ᐃᑕᔥ, ᓃᑕᓇᒥᐋᒃ, ᐊᔓᐎᓄᑕᐎᑾᒃ ᐃᑭ ᐊᐎᔭᒃ ᑳᑲᔥᑭᐋᐙᒡ ᐊᐎᔭᐞ ᒋᐸᑫᐎᓂᑎᓂᒡ, ᑳᐗᓂᔥᑴᒥᓀᒀ ᑲᔦ, ᐁᐃᔑᑭᑭᓄᐃᑫᐙᒡ ᑭᒋᐸᑳᓐ ᐃᐃ ᑳᑮᐃᔑᓅᑕᒣᒃ᙮ ᑫᑯ ᓈᓯᑲᐙᑫᒀᓂᒃ ᐃᑭ ᑎᓄ ᐊᐎᔭᒃ᙮

ᐃᑭ ᑕᔥ ᐅᐅ ᑳᐃᔑᒋᑫᐙᒡ ᑳᐐᓐ ᐅᑕᓄᑮᑕᐙᓯᐙᐙᓐ Xᑕᓐ ᑳᑎᐯᓂᒥᒥᓇᕽ, ᒦ ᓴ ᐁᑕ ᐅᐐᔭᐎᐙᓐ ᐁᔑᒥᓴᐌᑕᒨᒪᑲᓂᓂᑭᓐ ᐁᔑᒋᑫᐙᒡ᙮ ᐋᐱᒋ ᑕᔥ ᒪᒥᓄᑮᔗᐗᒃ, ᐁᒥᓄᐃᓈᐙᒡ ᑲᔦ ᐊᐎᔭᐞ, ᐊᓂᔖ ᑕᔥ ᐁᐃᓈᐙᒡ ᐁᐐᐅᒋᐗᔦᔑᒫᐙᒡ, ᒦᑕᔥ ᑳᐅᒋᐗᓂᐎᓈᐙᒡ ᐯᒫᑎᓯᓂᒡ ᑳᑭᑫᑕᓯᓂᒃ ᐋᓃᓐ ᑫᐃᔑᒋᑫᓂᒡ᙮

ᑲᑭᓇ ᓴ ᐊᐎᔭᒃ ᐋᔕ ᓅᑕᒨᒃ ᐋᓃᓐ ᐁᐲᒋᓇᐃᑕᒧᐌᒃ ᐃᐃ ᒥᓍᒋᒧᐎᓐ᙮ ᐐᑫ ᑕᔥ ᓂᑑᒋᑭᒋ ᒌᑫᑕᒻ ᐃᐃ ᐁᐃᔑᒋᑫᔦᒃ᙮ ᑭᓇᑕᐌᓂᒥᓂᓂᒻ ᐃᑕᔥ ᑲᔦ ᒋᑲᑮᑖᐎᑭᑫᑕᒣᒃ ᐃᐃ ᑳᐅᓂᔑᔑᕽ, ᒋᓵᐱᑭᑫᑕᓯᐌᒃ ᐃᑕᔥ ᐃᐃ ᑳᒫᓈᑕᒃ᙮

ᑭᔐᒪᓂᑑ ᓴ ᑳᒦᓂᓀᒃ ᐱᓵᓂᓯᐎᓐ ᑭᑲᔑᑯᔥᑲᒫᑯᐙ ᓭᑕᓇᓐ ᑮᓇᐙ ᒋᑕᑯᑳᓂᒣᒃ᙮ ᑕᑲ ᑕᔥ ᐅᑭᔐᐙᑎᓯᐎᓐ ᑳᑎᐯᒋᑫᒡ ᒋᓴᔅ X ᑭᑲᐐᒌᐎᑯᐙᒻ᙮

ᑎᒪᑎ ᑕᔥ ᑳᐐᑕᓄᑮᒪᒃ, ᑲᔦ ᐐᓐ ᑭᐴᔔᐃᑯᐙ᙮ ᐅᑯᐌᓂᐗᒃ ᑲᔦ ᑭᐴᔔᐃᑯᐙᒃ ᓬᐆᔑᔭᔅ, ᒉᓴᓐ, ᓱᓰᐸᑕᕒ ᙮ ᒦᐗᒃ ᐃᓴ ᐅᑯ ᓃᒋᒎᐗᒃ᙮

ᑫᓃᓐ ᑕᔥ ᑕᕒᔑᔭᔅ ᑳᐅᔑᐲᐃᑫᑕᒪᐗᒃ ᑆᓬ ᑭᑕᑯᐴᔔᐃᓂᓂᒻ, ᑫᓃᓐ ᐄᑐᒃ ᑳᐐᒋᐅᑌᐺᑕᒨᒥᓇᑰᒃ᙮

ᐊᐊ ᑕᔥ ᑲᔦ ᑫᔭᔅ ᑳᐲᑎᑲᔑᒡ ᐅᐙᑳᐃᑲᓂᕽ, ᑭᐴᔔᐃᑯᐙ᙮ ᒦ ᓴ ᐗᐊ ᐅᐙᑳᐃᑲᓂᕽ ᑳᐃᔑᓂᑖᐲᑎᑫᓂᒡ ᑲᑭᓇ ᐅᑌᐺᑕᒨᐞ᙮ ᐃᕒᐋᔅᑕᔅ ᑳᓈᑲᒋᐋᒡ ᔔᓂᔮᓐ ᐃᐃᒫ ᐆᑌᓈᕽ, ᐊᔭᐋ ᑲᔦ ᒀᕒᑕᔅ ᑮᑕᓇᒥᐋᓈᓐ, ᑫᐐᓇᐙ ᓴ ᐴᔔ ᑭᑎᑯᐙᒃ᙮

ᑕᑲ ᑕᔥ ᑭᒋ ᐃᓀᓂᒫᑖ ᑭᔐᒪᓂᑑ᙮ ᐐᓐ ᐅᔕ ᑳᑲᔥᑭᑑᒡ ᒋᒪᔥᑲᐎᑌᐺᑕᒧᐃᓀᒃ, ᒦ ᐄᑐᒃ ᐃᐃᐌ ᒥᓍᒋᒧᐎᓐ ᑳᐱᑕᔑᑕᒧᐗᒃ, ᒦ ᓴ ᐃᒫ ᑳᔑᑕᔑᒋᑲᓂᐎᒡ ᒋᓴᔅ X᙮ ᒦᑕᔥ ᑲᔦ ᐁᑭᑑᒪᑲᒃ ᐃᐃ ᑌᐺᐎᓐ ᑳᑮᓈᑯᒋᑳᑌᒃ, ᑳᑮᑭᑫᒋᑳᑌᓯᓄᒃ ᒣᐎᔕ ᐅᑖᓈᕽ ᑳᑮᐱᒥᐊᑮᐗᕽ᙮

ᓅᑯᒻ ᐃᑕᔥ ᐃᐃ ᑌᐺᐎᓐ ᑮᐅᒋᓈᑯᒋᑳᑌ ᑳᑮᐃᔑᐲᐃᑫᓂᒡ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ᙮ ᐁᑮᐃᓈᑯᓂᑫᒡ ᐃᑕᔥ ᑭᔐᒪᓂᑑ ᑳᓀᐱᒋᐊᔮᒡ, ᑲᑭᓇ ᐊᐎᔭᒃ ᐅᒋᑭᑫᑕᒧᐋᐗᒃ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ, ᑲᑭᓇ ᓴ ᑯ ᒋᐅᒋᑌᐺᑕᒧᐙᒡ, ᒋᓇᐃᑕᒧᐙᒡ ᑲᔦ᙮

ᐐᓐ ᐃᑕᔥ ᐁᑕ ᐁᑭᔐᒪᓂᑑᐎᒡ, ᐐᓐ ᐁᑕ ᑲᔦ ᑳᒫᐗᒋᑲᑮᑖᐌᑕᕽ, ᑕᑲ ᑕᐃᓇᑭᒫ ᐁᑭᒋ ᐃᓀᑖᑯᓯᒡ ᐅᒋ ᒋᓴᔅ Xᑕᓐ ᐅᑎᔑᒋᑫᐎᓂᓃᕽ, ᒨᔕᒃ ᐃᑯ ᐊᐸᓀ! ᐁᒣᓐ᙮