Ri uqʼalajisanik ri Jesus Kristo: ri Dyos xuya chech, arech kukʼut chkiwach ri eʼupataninelabʼ, ri jas uwach che kpe kamik; ri Areʼ kutaq uloq ri anjel rech Areʼ, arech ri areʼ kubʼano che kretaʼmaj ri upataninel Axwan,

ri areʼ che kubʼij ri qastzij Utzij ri Dyos e ri ubʼim ri Jesus Kristo: ronojel ri xrilo ri areʼ.

¡Utz rech ri jun che kusikʼij e ri winaq che kkitatabʼej we tzij riʼ jeʼ jas tzij rech qʼaxebʼal utzij ri Dyos e we knaʼtisaj pa ri kanimaʼ ri tzʼibʼatal chupam, rumal rech che chi uchanim chik, naqaj chik kʼo wi ri kajbʼal!

Ri Xwan chkech ri ewuqubʼ Komon Tyox rech ri Asiʼa. Nimalaj Toqʼobʼ e jaʼmaril xya chiwech rumal: «Ri are Areʼ, ri are Areʼ Iwir, ri are Areʼ che kpe na riʼ», kumal ri ewuqubʼ uxlabʼal che ekanajinaq chuwach ri Utem,

e rumal ri Jesus Kristo, ri utzalaj qʼataltzij, ri nabʼeʼal chkixoʼl ri ekaminaqibʼ, ri nimalaj kinimal ri eʼajawinel rech ri uwachulew. Ri kujuloqʼoqʼej e ri uchʼajchʼobʼem ri qamak rumal ri ukikʼel,

ri ujubʼanom, uj jun ajawibʼal kech chuchqajawibʼ chuwach ri Udyos, chuwach ri Utatxel; chech ri Areʼ ri qʼijilanem, ri kowinem chubʼeqʼij chubʼesaq. Amen!

Chi kamik riʼ petinaq uloq chuxoʼl ri taq sutzʼ; ronojel winaq kril na uwach riʼ ri areʼ, xoqujeʼ kril uwach ri areʼ che xuqʼaxej chi chʼichʼ, kʼatekʼuriʼ, konojel ri ejuqʼat winaq chuwachulew, kkʼis kikʼux riʼ chuwach ri areʼ. ¡Jeʼ nakʼuriʼ! ¡Amen!

In ri in Alfa e ri Omega kcha ri Ajawxel Dyos, «ri are Areʼ, ri Areʼ Iwir, e ri Areʼ che kpe na riʼ», ri Ajaw che rajaw ronojel jas uwach.

Ri in, in Xwan, ri iniwachalal e ri iniwachiʼl pa ri kʼax, pa ri ajawibʼal e pa ri kochʼonik pa ri Jesus. Ri in, in kʼo pa ri chʼaqap ulew pa ri Polow rech Patmos, rumal ri Utzij ri Dyos e ri ubʼim ri Jesus.

Ri in xinok, pa ri wuxlabʼal pa ri uqʼij ri Ajawxel, kʼatekʼuriʼ, xinta chwij in, jun chʼabʼal che kchʼawik jeʼ jas jun tum e kubʼij:

«Ri jas uwach che kawil ri at, chatzʼibʼaj pa jun tzʼibʼatalik wuj, arech, ri at kataq ubʼik chkech ri ewuqubʼ Ekomon Tyox: chech ri Efeso, chech ri Esmirna, chech ri Pergamo, chech ri Tiʼatira, chech ri Sardes, chech ri Filadelfiʼa, e chech ri Laʼodiseʼa».

Xinsutij wibʼ arech kinwilo ri chʼabʼal che kchʼaw wukʼ; e aretaq chiʼ xinsutij wibʼ, ri in xinwil wuqubʼ chajbʼal rech qʼan pwaq,

kʼatekʼuriʼ, pa ri unikʼyajal, xinwil jun, che jacha Ukʼojol achi, ukojom jun roqorik ratzʼyaq che ximitalik xeʼupam rukʼ jun ximbʼal che qʼan pwaq.

Pa ri ujolom kʼo saq taq uwiʼ jeʼ jas ri saq rismal chij, jeʼ jas ri chuntew; ri uwoqʼoch jeʼ jas uxaq taq qʼaqʼ,

ri raqan jeʼ jas jun jeʼlikalaj chʼichʼ che jaʼrinaq e sukʼumarinaq pa ri qʼaqʼ; ri uchʼabʼal jeʼ jas uchojojebʼal ri nimaʼq taq jaʼ.

Pa ri rikyaqʼabʼ uqʼabʼ kʼo wuqubʼ chʼumil e pa ri uchiʼ kel uloq jun chʼichʼ che kketenik rukʼ ri kebʼ utzaltmal; kʼatekʼuriʼ, ri uwachbʼal, jeʼ jas ri qʼij che sibʼalaj kchuplinik.

Aretaq chi xinwil ri areʼ, xintzaq cho raqan jacha inkaminaq; kʼatekʼut xuya ri rikyaqʼabʼ uqʼabʼ panuwiʼ e xubʼij: «Ma- xeʼj awibʼ, in ri in nabʼe e in ri in kʼisbʼal,

in ri in kʼaslik, in ri xinkamisaxik we ukamik riʼ in kʼaslik chubʼeqʼij chubʼesaq, in ri kʼo wukʼ ri ulawibʼal ri kamikal e ri Ades.

Chatzʼibʼaj bʼaʼ ri jas uwach xawilo: ri chi jeʼwi kamik riʼ e ri jas uwach che chi uchanim kpe na riʼ.

Ri nimalaj awatalik chech ri wuqubʼ chʼumil che xawil pa ri wikyaqʼabʼ e ri wuqubʼ chajbʼal rech qʼan pwaq, are weriʼ: ri wuqubʼ chʼumil eʼare ri ewuqubʼ Anjelibʼ kech ri ewuqubʼ Komon Tyox; e ri wuqubʼ chajbʼal eʼare ri ewuqubʼ Komon Tyox.

«Chech ri anjel rech ri Komon Tyox rech ri Efeso, chatzʼibʼaj: Jewaʼ kubʼij ri areʼ che kʼo ri wuqubʼ chʼumil pa ri rikyaqʼabʼ uqʼabʼ, ri areʼ che kbʼin pa kinikʼyajal ri wuqubʼ chajbʼal rech qʼan pwaq.

Ri in wetaʼm ri achak, ri akosik e ri akochʼonik; ri in wetaʼm che man katkowin taj keʼakʼochʼo ri eʼitzel taq winaq: ri at keʼakoj pa ri kʼax ri eʼareʼ che kkikoj kibʼ etaqoʼnelabʼ e ri at xariqo ri kijoʼsil.

Ri at kʼo akochʼonik: ¿La man kakuy ta ri kʼax rumal ri nubʼiʼ in, e la man xatkos taj?

Kʼatekʼut, kinbʼan qʼatojtzij pawiʼ rumal rech che kasach ri loqʼoqʼebʼal akʼuʼx che kʼo pa ri umajibʼal kanoq.

Chnaʼtaj chawech ri kʼolbʼal jawiʼ attzaqinaq wi, chakʼexaʼ akʼuʼx e chachakuj ri nabʼe achak. We man jeriʼ kabʼano, kinbʼe na riʼ awukʼ arech kinjalkʼatij ri ukʼolbʼal ri achajbʼal, waʼ weriʼ, we man kakʼex ri akʼuʼx.

Kʼatekʼut, utz chawech che ri at kawetzelaj kiwach ri enikolayitas, che xoqujeʼ ri in kinwetzelaj kiwach.

Ri areʼ che kʼo uxikin chutatabʼej bʼaʼ ri tzij kubʼij ri Uxlabʼxel chkech ri Ekomon Tyox: chech ri chʼakanel, kinbʼan na arech kutij ri cheʼ rech ri kʼaslemal che kʼo pa ri Paraʼiso rech ri Dyos.

«Chech ri anjel rech ri Komon Tyox rech ri Esmirna, chatzʼibʼaj: Jewaʼ kubʼij ri Nabʼe e ri Kʼisbʼal, ri areʼ che xkamik e kʼo jun kʼakʼ ukʼaslemal.

Ri in wetaʼm ri akʼaxkʼolil e ri amebʼaʼil, kneʼbʼaʼ, ri at, at qʼinom, wetaʼm ri itzel taq tzij kech ri eʼareʼ che eʼajjudiʼos kecha che kibʼ, ¡kʼatekʼuriʼ man eʼajjudiʼos taj, xaneʼ ejun sinagoga rech ri Satanas!

Maxeʼj awibʼ chech ri kʼax che ri kakʼaxkʼolij na: kamik riʼ, ri kʼaxtokʼ keʼukʼyaq na riʼ pa cheʼ ejujun chiwech ri ix arech kixyaʼtaj pa ri kʼax, kʼatekʼuriʼ, ri ix kikʼaxkʼolij na lajuj qʼij rech kʼax. Sukʼ chatkʼoloq chi kʼa pa ri kamikal, kʼatekʼuriʼ, kinya na riʼ chawech ri ketakik retzʼbʼalil ajolom rech kʼaslemal.

Ri areʼ che kʼo uxikin, chuta bʼaʼ ri tzij kubʼij ri Uxlabʼxel chkech ri Ekomon Tyox: Ri chʼakanel man kuxeʼj ta ribʼ riʼ chuwach ri ukabʼ kamikal.

«Chech ri anjel rech ri Komon Tyox rech ri Pergamo, chatzʼibʼaj: Jewaʼ kubʼij ri Areʼ che kʼo ri chʼichʼ rukʼ che kketenik rukʼ kebʼ utzaltmal.

Ri in, wetaʼm jawiʼ atkanajinaq wi ri at: jelaʼ jawiʼ kʼo wi ri utem ri Satanas. Kʼatekʼut, ko achapom ri nubʼiʼ e man kawetzelaj ta uwach ri nukojonik, knebʼaʼ pa taq ri uqʼij ri Antipas, ri sukʼlaj qʼatal nutzij, che xkamisax pa ri itinimit, jawiʼ kanajinaq wi ri Satanas.

Kʼatekʼuriʼ, chi kʼo wi ri rumal katinyaj wi: ri at, eʼakʼolom ejujun winaq chixoʼl che kkitoʼ ri utzij ri Bʼalaʼam, ri areʼ che xukʼut chuwach ri Bʼalak ri ukojik jun kʼaʼm chkech ri eralkʼuwaʼl ri Israʼel, arech kkitij ri tiʼj rech tabʼal toqʼobʼ chkech ri joʼs taq eʼesal uwach dyos, e kimakun kukʼ taq ri edyoseʼs riʼ.

Xoqujeʼ ri at akʼolom pa ri atinimit ejujun winaq che kkitoʼ uwach ri kitzij ri enikolayitas.

Chakʼexaʼ bʼaʼ awibʼ, wema kakʼex awibʼ, chanim kinbʼek arech keʼinchʼojinoq kukʼ we winaq riʼ rukʼ ri chʼichʼ rech nuchiʼ.

Ri areʼ che kʼo uxikin, chutatabʼej bʼaʼ ri tzij kubʼij ri Uxlabʼxel chkech ri Ekomon Tyox: chech ri chʼakanel kinya na riʼ ri awatalik mana chech, e xoqujeʼ kinya na riʼ chech jun saq abʼaj, jun abʼaj che tzʼibʼatalik jun kʼakʼ bʼiʼaj chuwach che man kʼo ta jun winaq kchʼobʼowik, xuwiʼ retaʼm ri kkʼamow ri abʼaj riʼ.

«Chech ri anjel rech ri Komon Tyox rech ri Tiʼatira, chatzʼibʼaj: Jewaʼ kubʼij ri Ukʼojol ri Dyos che ri uwoqʼoch jeʼ jas ujuluwik qʼaqʼ e ri raqan che jeʼ jas jun jeʼlikalaj chʼichʼ.

Ri in wetaʼm ri achak: ri loqʼoqʼebʼal akʼuʼx, ri akojonik, ri apatanajik, ri akochʼonik; are sibʼalaj achak kamik riʼ chuwach ri iwir kanoq.

Kʼatekʼut, katinyaj rumal rech, che ri at ayaʼom bʼe chech ri Jesabʼel, ri jun ixoq riʼ kubʼij che ajqʼatal utzij ri Dyos; keʼusubʼu ri enupataninelabʼ, arech kemakun kukʼ ri edyoses aretaq chiʼ kkitij ri tiʼj che rech tabʼal toqʼobʼ chkech ri ejoʼs taq dyoses.

Nuyaʼom kebʼ oxibʼ ikʼ chech arech kukʼex ri ukʼaslemal ri areʼ, kʼatekʼut, man kraj taj kukʼex ri umak kukʼ ri ejoʼs taq dyoses.

Jeʼ nakʼut; ri in kinkʼyaq na waʼ ri areʼ cho jun chʼat rech kʼax, xoqujeʼ ri erachiʼl che kemakun rukʼ ri areʼ, keʼinkʼyaq na pa jun nimalaj kʼax we man kkikʼex ta ri kikʼaslemal.

Kʼatekʼuriʼ, keʼinkamisaj na riʼ ri eralkʼuwaʼl: rumal kʼu waʼ weriʼ, konojel ri Ekomon Tyox kketaʼmaj na che ri in, wetaʼm kipam e ri taq kanimaʼ; kʼatekʼuriʼ ronojel kintoj na riʼ chiwech jeʼ jas ri ichak,

kʼatekʼuriʼ, ri ix che ix ajtiʼatira, che man kʼo ta waʼ we tzij iwukʼ riʼ, ri ix che man iwetaʼm ta ri “najalaj kbʼe wi ri ubʼantajik ri Satanas”, jeʼ jas kkibʼij ri eʼareʼ, ri in kinbʼij chiwech che man kinkoj ta jun chi eqaʼn piwiʼ;

xuwi kinbʼij chiwech, che ri jastaq uwach che kʼo chi iwukʼ ix, utzalaj uchapik chibʼanaʼ chi kʼateʼ na kintzalij uloq ri in.

Ri ajchʼakanel, ri areʼ, che utzalaj kinupatanij na chi kʼateʼ pa ri ukʼisbʼalil, kinya na riʼ chech ri kowinem pakiwiʼ ri esiwan taq tinimit:

Kukʼam na kibʼe riʼ rukʼ jun chʼichʼ chʼamiʼy e kubʼan na riʼ jeriʼ jas kipaxik ri jetaq bʼoʼj.

Jeʼ nakʼut, ri in xinkʼam we kowinem riʼ chi rukʼ wi ri Nutat. E kinya na riʼ chech ri areʼ ri chʼumil che rech ri aqʼabʼil.

Ri jun che kʼo uxikin, chutatabʼej bʼaʼ ri tzij kubʼij ri Uxlabʼxel chkech ri Ekomon Tyox.

«Chech ri anjel rech ri Komon Tyox rech ri Sardes, chatzʼibʼaj: Jewaʼ kubʼij ri areʼ che kʼo ri wuqubʼ ruxlabʼal ri Dyos rukʼ e ri wuqubʼ chʼimil. Ri in wetaʼm ri achak; ri at jeʼ jas atkʼaslik, kʼatekʼut, ri at atkaminaq.

¡Chatkʼastajoq, chayaʼaʼ uchoqʼabʼ ri akʼaslemal, ri tuʼqarinaq akʼaslemal! Jayiʼ, pa ri akʼaslemal, man xinriq taj che sibʼalaj nojinaq chuwach ri Nudyos.

Chnaʼtaj chawech jas ukʼamik ri tzij xabʼano, chakʼoloʼ bʼaʼ pa ri awanimaʼ e chakʼexaʼ awibʼ. Rumal rech, che we ri at man katkʼasiʼ ta che ri laqʼabʼenik, ri in kinpe na riʼ in jeʼ jas jun elaqʼom, kʼatekʼuriʼ, man kawetaʼmaj ta riʼ ri kajbʼal aretaq chiʼ kinpe na pawiʼ ri at.

Kʼatekʼut, pa ri Sardes, ekʼo ejujun awech ri at che man kixoqʼolobʼisam ta ri katzʼyaq; ri eʼareʼ kebʼin na riʼ wukʼ in rukʼ saq katzʼyaq, rumal che esukʼalaj taq winaq.

Ri chʼakanel, kokisax riʼ sukʼ saqalaj taq ratzʼyaq, e ri ubʼiʼ, man kinchup ta riʼ pa ri uwuj ri kʼaslemal, kinqʼalajisaj na riʼ ri ubʼiʼ chuwach ri Nutat e chkiwach ri eʼanjel rech areʼ.

Ri jun che kʼo uxikin, chutatabʼej bʼaʼ ri tzij che kubʼij ri Uxlabʼxel chkech ri Ekomon Tyox.

«Chech ri anjel rech ri Komon Tyox rech ri Filadelfiʼa, chatzʼibʼaj: Jewaʼ kubʼij ri jun che Tyoxlaj ubʼantajik, ri Saqalajtzij, ri kʼo ri ulawibʼal ri David rukʼ: we kujaq ri areʼ, man kʼo ta jun ktzʼapinik, e we kutzʼapij ri areʼ man kʼo ta jun kjaqowik.

Ri in wetaʼm ri achak: Jeʼ nakʼut, ri in xinjaq chawach jun uchiʼjaʼ man kʼo ta jun kkowin che utzʼapixik, rumal rech, che ri at, kneʼbʼaʼ xa jubʼiqʼ ri achoqʼabʼ kʼolik, xakʼol ri nutzij e man xawetzelaj ta uwach ri nubʼiʼ.

Chawilampeʼ, kinbʼan na che ejujun chkech ri ekʼo pa ri sinagoga rech ri Satanas –ri eʼareʼ che kkibʼij chi aqʼan kibʼ che eʼajjudiʼo, kʼatekʼuriʼ man eʼajjudiʼo taj– ri in, kinbʼan na riʼ, che ri eʼareʼ kekixukabʼaʼ na kibʼ chuwach ri awaqan at, arech kketaʼmaj che ri in atinloqʼoqʼem.

Rumal rech che ri at, akʼolom ri nutzij che rech kochʼonik; xoqujeʼ, ri in katinkʼol na riʼ pa ri kajbʼal rech ri kʼax, ri kʼax che kpe na riʼ puwiʼ ronojel ri uwachulew, arech keʼukoj pa ri kʼax konojel ri winaq rech ri uwachulew.

Chi ukamik kinpetik: Ko achapik chabʼanaʼ ri kʼo awukʼ, arech man kʼo ta jun winaq kelaqʼan ubʼi ri ketakik retzʼabʼalil ajolom.

Ri chʼakanel kinokisaj na riʼ raqanja pa ri nim rachoch ri Nudyos; kʼatekʼuriʼ, chi qastzij wi riʼ man kel ta chi uloq e kintzʼibʼaj na riʼ chuwach ri ubʼiʼ ri Nudyos e ri ubʼiʼ ri utinimit ri Nudyos, ri kʼakʼ Jerusalem che kaqaj uloq chikaj chi rukʼ uloq ri Dyos, xoqujeʼ kintzʼibʼaj chuwach ri kʼakʼ nubʼiʼ in.

Ri jun che kʼo uxikin, chutatabʼej bʼaʼ we tzij kubʼij ri Uxlabʼxel chkech ri Ekomon Tyox.

«Chech ri anjel rech ri Komon Tyox rech ri Laʼodiseʼa: Jewaʼ kubʼij ri areʼ che are Amen, ri jun che sukʼalaj ubʼantajik, ri qastzij ilinel rech, ri Nabʼe chuwach aretaq chiʼ ri Dyos xukʼiysaj xutik ri uwach ulew.

Ri in wetaʼm ri achak: ri at, man at xuʼw taj e man at miqʼin taj. ¡Weta at xuʼw on weta at miqʼin!

Jeʼ nakʼut, rumal rech che ri at, at saqaliʼloj e man at miqʼin taj e man at xuʼw taj, ri in katinxabʼij uloq pa ri nuchiʼ.

Ri at kachomaj: Kamik riʼ ri in inqʼinom, inqʼinomarinaq, ronojel tzʼaqat wukʼ, man kʼo ta jun jas uwach kraj wukʼ; ¡kʼatekʼuriʼ, ri at man kawil taj: che ri at, at jun xuʼyalaj winaq, at mebʼaʼ, at moy e at jun chʼanalikalaj winaq!

Katinpixbʼaj ukoq, kinbʼij chawech, chaloqʼo bʼaʼ pa ri awachoch ri utzalaj qʼan pwaq ri kʼatisam pa ri qʼaqʼ arech ri at katqʼinomarik; chaloqʼoʼ ri saq atzʼyaq arech kakojo e kuchʼuqu ri ukʼixbʼal ri achʼanalik; chaloqʼoʼ jun utzalaj kunabʼal rech woqʼoch, kakoj pa ri awoqʼoch e xa jeriʼ katkaʼy rukʼ kʼakʼ taq awoqʼoch chik.

Ri in, ri keʼinloqʼoqʼej, keʼinyajo e kinkʼajisaj kiwach. ¡Chakʼutuʼ bʼaʼ ri achoqʼabʼ e chakʼexaʼ bʼaʼ ri akʼaslemal!

Jeʼ nakʼut, ri in, in kʼo uloq chuwach ri uchiʼja e kinkʼorkʼot ukoq; we kʼo jun ktow ri nuchʼabʼal e kujaq ri uchiʼja chnuwach, kinok riʼ pa ri rachoch arech kinbʼan ri waʼim rech xreʼqal rukʼ, ri in kinkʼojiʼ riʼ chunaqaj ri areʼ e ri areʼ kkʼojiʼ riʼ chunaqaj ri in.

Chech ri chʼakanel kinya bʼe riʼ chech arech katʼuyiʼ wukʼ ri in cho ri Nutem, jeriʼ in jacha in aretaq chiʼ xinchʼakanik, xintʼuyiʼ rukʼ ri Nutat cho ri Utem.

Ri jun che kʼo uxikin, chutatabʼej bʼaʼ ri tzij che kubʼij ri Uxlabʼxel chkech ri Ekomon Tyox».

Kʼatekʼuriʼ, ri in xinwil weriʼ: Jaqal jun uchiʼjaʼ pa ri kaj, e ri jun chʼabʼal che xinta nabʼe, che jeʼ uchʼabʼal jeʼ jas jun tum, xinuchʼabʼej e kubʼij chwech: Chatpaqal uloq waral, kʼatekʼuriʼ kinkʼut na chawach ri jastaq che kpe na, che kkʼulmataj na.

Chi chanim, ri in xinok pa ri wuxlabʼal. Xinwilo kʼo jun tem pa ri kaj e kʼo jun tʼuyul cho ri jun tem.

Ri jun che tʼuyulik, ri kkaʼyik jeʼ jas ri jeʼlikalaj jaspya abʼaj e ri jeʼlik kornalina abʼaj; kʼo jun raxkyaqʼabʼ usutim rij ri nimalaj tem, ri kkaʼyik jeʼ jas ri jeʼlikalaj abʼaj esmeralda.

Xinwil juwinaq kijebʼ tem chunaqaj ri nimalaj tem e chuwach taq ri tem riʼ etʼuyul juwinaq kijebʼ enim taq winaq che kikojom saq taq atzʼyaq e kʼo ketakik retzʼbʼalil kijolom rech qʼan pwaq.

Tza ri nimalaj tem kel uloq sibʼalaj kaypaʼ e jujun taq chʼabʼal e sibʼalaj kaqulja; e chuwach ri Nim Tem kʼo wuqubʼ chaj che kanikow che qʼaqʼ, weriʼ are ri wuqubʼ Ruxlabʼal ri Dyos.

Chuwach ri nimalaj tem ri kkaʼyik jeʼ jas jun tzintzojlaj polow, jeʼ jas ri kristal. Panikʼaj e chunaqaj ri nimalaj tem, etakʼal ekijebʼ Ekʼaskʼoj che kʼo kʼi kiwoqʼoch chkiwach e chkij.

Ri nabʼe kʼaskʼoj jeriʼ jeʼ jas jun koj, ri ukabʼ kʼaskʼoj jeriʼ jacha jun alaj amaʼ wakax; ri urox kʼaskʼoj jeriʼ jeʼ jas uwach jun winaq, ri ukaj kʼaskʼoj jeriʼ jacha jun xik che krapapik.

Ri ekijebʼ ekʼaskʼoj, chikijujunal kʼo waqibʼ kixikʼ, kʼo kʼi kiwoqʼoch chkij e chkipam. Kʼatekʼuriʼ man ketaniʼ ta che ubʼixik chi paqʼij chi chaqʼabʼ: Tyoxlaj ri ubʼantajik, Tyoxlaj ri ubʼantajik, Tyoxlaj ri ubʼantajik, ri Ajawxel, Dyos, ajawxel chkech Konojel, are areʼ iwir, are areʼ kamik e are areʼ che kpe na riʼ.

Kʼatekʼuriʼ, aretaq chiʼ ri Ekʼaskʼoj kkiya ri ukowinemlaj uqʼij ri maltyoxinik chech ri Areʼ ri tʼuyul puwiʼ ri nimalaj tem, ri Areʼ che kʼaslik chubʼeqʼij chubʼesaq,

ri juwinaq kijebʼ enimaʼq taq winaq, kexukiʼk kkijubʼaʼ kiwach chuwach ri Areʼ che tʼuyul cho ri nimalaj tem e nim kkil wi kkiqʼijilaj ri Areʼ che kʼaslik chubʼeqʼij chubʼesaq; kkiyak ri ketakik retzʼabʼalil kijolom chuwach ri nimalaj tem e kkibʼij:

Utz, taqal chawech, Qajaw e Qadyos che kya chawech ri kowinem, ri qʼijil e ri chuqʼabʼ, rumal rech che at xatbʼanowik, xatkʼiysan ri uwachulew.

Kʼatekʼuriʼ xinwil pa ri rikyaqʼabʼ ri jun che tʼuyul cho ri nimalaj tem, jun wuj che bʼotolik, tzʼibʼatal chuwach e chrij, tʼiqatalik rukʼ wuqubʼ tʼiqabʼal.

Kʼatekʼuriʼ xinwil jun kowlaj anjel che kuraq uchiʼ rukʼ jun nimalaj chʼabʼal: «¿Jachin jun che utz taqal chrij, arech kujaq ri wuj e kuwaqʼij ri taq tʼiqabʼal?».

Kʼatekʼuriʼ, man kʼo ta jun kkowinik pa ri kaj, cho ri uwachulew, chuxeʼ ri uwachulew, che kkowinik kujaqo e kusikʼij uwach ri jun wuj.

E ri in, sibʼalaj kinoqʼik rumal rech che man kʼo ta jun utz taqal chrij kujaqo e kusikʼij ri jun wuj.

Chi chanim jun chkech ri enimalaj taq winaq kubʼij chwech: «Matoqʼik. Jeʼ nakʼut, xchʼakan ri koj rech ri ujuqʼat ri Juda, ri rijaʼl ri David; ri areʼ kujaq na riʼ ri wuj e ri wuqubʼ tʼiqabʼal».

Kʼatekʼuriʼ, ri in xinwilo, che takʼal pa unikyajal ri nimalaj tem e pa kinikʼyajal ri ekijebʼ ekʼaskʼoj e pa kinikʼyajal ri enimalaj taq winaq, jun alaj chij che jeʼ jas kaminaq; kʼo wuqubʼ rukʼaʼ e wuqubʼ uwoqʼoch che eʼare waʼ ri ewuqubʼ Ruxlabʼal ri Dyos che etaqom pa ronojel ri uwachulew.

Kukʼamaʼ ri wuj pa ri rikyaqʼabʼ ri tʼuyul cho ri nimalaj tem.

Aretaq chiʼ kʼo ri areʼ che ukʼamik ri wuj, ri ekijebʼ ekʼaskʼoj e ri ejuwinaq kijebʼ enimalaj taq winaq kkimej kibʼ cho ri uwach ulew chuwach ri alaj chij, chkijujunal kʼo jun qʼojom arpa kukʼ e jun qʼanalaj pwaq pajbʼal che nojinaq che kʼokʼalaj kunabʼal, che are waʼ ri kichʼawem rukʼ ri Dyos ri etyoxlaj taq winaq;

e kkibʼixoj jun kʼakʼalaj bʼix: Utz e taqal chawech che kakʼam we jun wuj e che kajaq ri taq utʼiqabʼal, rumal rech che xatkamisax ri at e xeʼaloq rukʼ ri akikʼel sibʼalaj eʼuwinaq ri Dyos, winaq rech ronojel kibʼantajik, ronojel chʼabʼal, ronojel siwantinimit, ronojel amaqʼ rech uwachulew;

e ri at, xabʼan chkech ri eʼareʼ chuwach ri Qadyos jun Ajawibʼal kech chuchqajawibʼ che keʼajawinik puwiʼ ri uwachulew.

Kʼatekʼuriʼ, xinwilo e xinta ri kichʼabʼal sibʼalaj eʼanjelibʼ pa jun nimalaj mulin ibʼ kisutim rij ri nimalaj tem, ri Ekʼaskʼoj e ri enimalaj taq winaq –¡ekʼo kʼi rech sibʼalaj ekʼi, ekʼo miles rech miles!–,

kkibʼij rukʼ raqoj chiʼaj: Ri kaminaq alaj chij, utz taqal chrij che kukʼam ri chuqʼabʼalil, ri qʼinomal, ri noʼjibʼal, ri kowinem, ri utzalaj wachaj, ri qʼijil e ri tewchiʼbʼal.

Kʼatekʼuriʼ, ronojel ri xbʼantaj pa ri kaj pa ri uwachulew, chuxeʼ ri uwachulew e pa ri polow, e ronojel ri kʼo pa ri uwachulew, xinto che rukʼ riqoj chiʼaj kkibʼij: ¡Chech ri Areʼ che tʼuyul cho ri nimalaj tem, e chech ri Alaj chij, ri tewchiʼbʼal, ri utzalaj wachaj, ri qʼijil e ri choqʼabʼ chubʼeqʼij chubʼesaq!

Kʼatekʼuriʼ, ri ekijebʼ ekʼaskʼoj kkibʼij: Amen; e ri enimalaj taq winaq keqaj che mejlem che xukulem che qʼijilanik.

Kʼatekʼuriʼ, xinwilo, aretaq chiʼ ri alaj chij xujaq ri nabʼe chkech ri wuqubʼ tʼiqabʼal, xintaʼo che ri nabʼe chkech ri ekijebʼ Ekʼaskʼoj che kuraq uchiʼ jeʼ jas jun ujaninbʼal ri kuypaʼ: «¡Tasaʼjuloq!».

Xinkaʼyik e xinwilo che kʼo jun saq kej; e ri jun che ukejbʼem kʼo jun uchʼabʼ; rukʼam jun ketakik retzʼabʼalil ujolom e xelik chʼakanel e arech kutaqej chi na chʼakanik.

Aretaq chiʼ xujaq ri ukabʼ tʼiqabʼal, xintaʼo che ri ukabʼ Kʼaskʼoj kuraq uchiʼ: «¡Tasaʼj uloq!».

Kʼatekʼuriʼ, xpe chi jun kej che kyaq jeʼ jas ri qʼaqʼ, ri jun che ukejbʼem, rukʼam ri pixabʼ arech kresaj ubʼik ri jaʼmaril cho ri uwachulew, arech kkikamisaj kibʼ chkixoʼl; kukʼam jun nimalaj chʼichʼ rech chʼoʼj.

Aretaq chiʼ xujaq ri urox tʼiqabʼal, xintaʼo che ri urox Kʼaskʼoj che kuraq uchiʼ: «¡Tasaʼj uloq!». Kʼatekʼuriʼ xinwil jun qʼeq kej; ri jun che ukejbʼem kʼo jun pajbʼal pa uqʼabʼ,

xintaʼo jeriʼ jeʼ jas jun chʼabʼal xas pa kinikʼyajil ri ekijebʼ Ekʼaskʼoj che kubʼij: «¡Jun pajbʼal triko kya chech jun denariʼo, oxibʼ pajbʼal salwaʼt kya chech jun denariʼo! ¡Kʼatekʼuriʼ, mabʼan itzel chech ri oleʼo e chech ri vino!»

Aretaq chiʼ xujaq ri ukaj tʼiqabʼal, xintaʼo ri uchʼabʼal ri ukaj Kʼaskʼoj: «¡Tasaʼj uloq!».

Kʼatekʼuriʼ xinwil jun raxroj kej; ri jun che ukejbʼem, «Kamikal» ri ubʼiʼ; e ri areʼ terneʼbʼem rumal ri Ades. Kʼatekʼuriʼ xkikʼam ri kowinem puwiʼ jun chkech ri kijebʼ uchʼaqapil ri uwachulew arech kekamisan rukʼ ri chʼichʼ rech chʼoʼj, rukʼ ri wiʼjal, rukʼ ri chʼaʼk, kukʼ ri chikop e kʼo chuwach ri ulew.

Aretaq chiʼ kujaq ri uroʼ tʼiqabʼal xinwil chuxeʼ ri tabʼal ri kuxlabʼal ri xekamisaxik rumal rech che kkikʼut ri Utzij ri Dyos e che xkiya ri kitzij chrij.

Kkiraqaqej kichiʼ rukʼ jun kowlaj chʼabʼal: «At Tyoxlaj e At saqalajtzij Ajawxel, ¿Chi kʼa jampa na che man kabʼan ta qʼatoj tzij pakiwiʼ ri eʼuwinaq ri uwachulew e che man kakʼajisaj ta kiwach rumal ri qakikʼel uj?».

Kʼatekʼuriʼ, chkijujunal kya chkech jun saq atzʼyaq e kbʼix chkech che kkeyeʼj chi na jubʼiqʼ, chi kʼa jampa na kkimulij na kibʼ konojel ri epatanijel jeʼ jas ri eʼareʼ e ri ekachalal che kekamisax na jeʼ jas ri eʼareʼ.

E kintaqej na rilik aretaq chiʼ kujaq ri uwaq tʼiqabʼal; xpe jun nimalaj kabʼraqan e ri qʼij xujal qʼeqʼ jeriʼ jeʼ jas jun atzʼyaq rech uwiʼ kej e ri ikʼ ronojel xujalo jeriʼ jas ri kikʼel,

e ri chʼumil chikaj xetzaq uloq cho ri uwachulew, jeriʼ jeʼ jas kubʼan ri wikox che kutzaq uloq ri rax taq uwach rumal jun nimalaj kyaqiqʼ;

kʼatekʼuriʼ xsach ubʼi ri kaj jeriʼ jas ubʼotik jun wuj. E ronojel taq ri juyubʼ e ri chʼaqap taq ulew che ekʼo pa ri polow xesilobʼisaxik xas pa ri kikʼolbʼal.

Ri eʼajawibʼ chuwachulew, ri enimalaj taq winaq, ri ekinimal nimalaj taq winaq, ri eqʼinomabʼ, ri ekowinel taq winaq, konojel chi winaq, chi emokom xkikʼuʼ kibʼ pa taq ri pek cho taq abʼaj, e pa taq ri abʼaj kʼo cho taq ri juyubʼ,

kʼatekʼuriʼ kkibʼij chech taq ri juyubʼ e chech taq ri abʼaj: «Chixtzaq uloq paqawiʼ e naj wi chujikʼuʼ chuwach ri Jun che tʼuyul puwiʼ ri nimalaj tem e chuwach ri nimalaj royowal ri alaj chij».

Rumal rech xopan ri Nimalaj Uqʼij ri royowal e ¿jachin kkowin riʼ che kkanaj kanoq chuwach?

Kʼatekʼuriʼ, xeʼinwil ri ekijebʼ anjelibʼ etakʼalik pa ri ukʼolbʼal ri kijebʼ uxkut uwachulew, kichapom ri kijebʼ nimalaj taq kyaqiqʼ, arech man kxutʼun ta ri kyaqiqʼ cho ri uwachulew, cho ri polow, e man puwiʼ ta jun cheʼ.

Kʼatekʼuriʼ xinwil ri jun anjel che paqalinaq chi pa ri relbʼal qʼij uloq, rukʼam ri utʼiqabʼal ri kʼaskʼojlaj Dyos; rukʼ kowlaj chʼabʼal kuraq uchiʼ chkech ri ekijebʼ anjelibʼ che kikʼamom ri kowinem arech kkibʼan kʼax chech ri uwachulew e chech ri polow:

«Chiweyeʼj na ri ubʼanik kʼax chech ri uwachulew, chech ri polow e chech taq ri cheʼ jampa na che xtzʼibʼataj qumal uj ri jun kʼutbʼal pa kikursal kipalaj ri eʼupatanijelabʼ ri Qadyos».

Kʼatekʼuriʼ, chi chanim wetaʼm chi ri kejalabʼalil ri etʼiqʼitalik: wuqkʼal kijebʼ mil, ekech konojel ri kijuqʼat ri eʼuwinaq ri Israʼel.

Ekabʼlajuj mil rech ri ujuqʼat ri Juda ri kʼo ri tʼiqabʼal chkech, ekabʼlajuj mil rech ri ujuqʼat ri Rubʼen ri kʼo ri tʼiqabʼal chkech, ekabʼlajuj mil rech ri ujuqʼat ri Gad kʼo ri kitʼiqobʼal,

ekabʼlajuj mil rech ri ujuqʼat ri Aser, ekabʼlajuj mil rech ri ujuqʼat ri Neftali, ekabʼlajuj mil rech ri ujuqʼat ri Manases,

ekabʼlajuj mil rech ri ujuqʼat ri Simeʼon, ekabʼlajuj mil, rech ri ujuqʼat ri Levi, ekabʼlajuj mil rech ri ujuqʼat ri Isakar,

ekabʼlajuj mil rech ri ujuqʼat ri Sabʼulon, ekabʼlajuj mil rech ri ujuqʼat ri Xep, ekabʼlajuj mil rech ri ujuqʼat ri Bʼenjamin che etʼiqatalik.

Kʼatekʼuriʼ, xinwil chik, xeʼel uloq sibʼalaj ekʼi winaq, che man kʼo ta jun kkowin chkejalaxik, erech ronojel taq siwantinimit, ronojel amaqʼ, konojel kibʼantajik winaq, ronojel juqʼat winaq, ronojel chʼabʼal; etakʼal chuwach ri nimalaj tem e chuwach ri alaj chij, kikojom saqalaj taq atzʼyaq, e kʼo xaqchaj pa kiqʼabʼ,

rukʼ kowlaj kichʼabʼal kkiraqej kichiʼ: «¡Ri Kolotajem rech ri Qadyos che tʼuyul cho ri nimalaj tem, xoqujeʼ rech ri alaj chij!».

Kʼatekʼuriʼ konojel ri eʼanjelibʼ che kisutim rij ri nimalaj tem, ri Enimalaj taq Winaq e ri ekijebʼ Ekʼaskʼoj, xeqaj che mejlem xuklem chuwach ri nimalaj tem e kkiqʼijilaj ri Dyos;

kkibʼij: ¡Amen! Tewchiʼbʼal, qijlanem, noʼjibʼal, matyoxbʼal, utzalaj wachbʼal, kowinem e chuqʼabʼalil chech ri Qadyos, chubʼeqʼij chubʼesaq! ¡Amen!

Jun chkech ri Enimalaj taq Winaq, kubʼij chwech: «Le winaq leʼ che kikojom saqalaj taq atzʼyaq, ¿E jachin taq kʼu laʼ le eʼareʼ e jawijeʼ xepe wi uloq?».

Ri in kinbʼij chech: «Wajaw, at laʼ awetaʼm». Kubʼij chi jumul chwech: «Eʼare laʼ ri eʼareʼ ri epetinaq uloq chi pa ri nimalaj kʼax uloq; xkichʼaj uloq ri katzʼyaq e xkisaqarisaj uloq pa ri ukikʼel ri alaj chij.

Rumal kʼu waʼ weriʼ, ri eʼareʼ etakʼal chuwach ri nimalaj Utem ri Dyos e kkipatanij ri areʼ chipaqʼij chichaqʼabʼ pa ri Nimalaj Rachoch; e ri tʼuyul cho ri nimalaj tem kjeqiʼ na riʼ kukʼ.

Man kʼo ta chi jun riʼ kyawajik rumal ri wiʼjal e man kchaqij ta chi kichiʼ riʼ; man kqʼaqʼan ta chi riʼ ri qʼij pakiwiʼ; on jun qʼaqʼalaj kyaqiqʼ pakiwiʼ.

Rumal rech, che ri alaj chij che takʼal pa unikʼyajal ri nimalaj tem, are ajyuqʼ riʼ chkech ri eʼareʼ e kukʼam bʼi kibʼe riʼ pa ri ukʼiybʼal ri jaʼ rech ri kʼaslemal. E ri Dyos kusuʼ na riʼ ronojel uwaʼl kiwach».

Aretaq chiʼ, ri alaj chij kujaq ri uwuq tʼiqabʼal pa ri nikʼyaj kajbʼal, xkʼojiʼ jun tzʼinalik pa ri kaj, naj jubʼiqʼ xuqʼiʼo.

Kʼatekʼuriʼ, xeʼinwil wuqubʼ anjelibʼ che etakʼal chuwach ri Dyos e xyaʼtaj chkech, xkikʼam wuqubʼ tum.

Xpe chi jun anjel e xkanaj chunaqaj ri tabʼal toqʼobʼ, rukʼam jun qʼanalaj pwaq jopibʼal. Xyaʼtaj chech xukʼam kʼokʼalaj taq kunabʼal, arech rukʼ ri kichʼawem rukʼ ri Dyos kech konojel ri etyoxlaj taq winaq kuchiʼj cho ri qʼanalaj pwaq tabʼal che kʼo chunaqaj ri nimalaj tem.

Kʼatekʼuriʼ, chi pa ri uqʼabʼ ri Anjel xaqʼan ri usibʼal ri kʼokʼalaj taq kunabʼal chuwach ri Dyos, rachiʼl taq ri kichʼawem rukʼ Dyos ri etyoxlaj taq winaq.

Kʼatekʼuriʼ ri Anjel kuchap ukoq ri jopibʼal e kunojisaj che ri qʼaqʼ che rech ri tabʼal e kukʼyaq cho ri uwachulew. Kʼatekʼuriʼ kruqʼpanik ri taq kaquljaʼ, kʼo taq chʼabʼal, kʼo taq kuypaʼ e kʼo kabʼraqan.

Ri ewuqubʼ anjelibʼ che kkikʼam ri wu-qubʼ tum, kkisukʼumaj kibʼ che uroqʼisaxik.

Kroqʼesaj ri nabʼe e chi chanim kkʼojiʼ saqbʼach e qʼaqʼ rukʼ kyaqlaj kikʼel che kkʼyaq puwiʼ ri uwachulew: e oxibʼ uchʼaqapil ri uwachulew kportajik, xoqujeʼ ri raxlaj qʼayes kprotajik.

Ri ukabʼ anjel kroqʼisaj chi ri tum, e ksetex pa ri polow jun jas uwach che jeriʼ jeʼ jas jun juyubʼ rech qʼaqʼ, e oxibʼ uchʼaqapil ri polow kujal kikʼel.

Kekam oxibʼ uchʼaqapil ri eʼawaj che ekʼaskʼoj pa ri polow e oxibʼ uchʼaqapil taq ri kukubʼ ksachitaj uwach pa ri polow.

Kroqʼisaj chi ri tum ri urox anjel e ktzaqik chi cho ri kaj uloq jun nimalaj chʼimil che kkʼatik jeʼ jas jun yaʼbʼal qʼaqʼ, ktzaq puwiʼ ri oxibʼ uchʼaqapil taq ri nimaʼ e puwiʼ ri oxibʼ uchʼaqapil ri ukʼiybʼal taq jaʼ;

ri chʼumil ubʼiʼ «Ajenjo»: ri oxibʼ uchʼaqapil ri jaʼ chuwachulew kujal ajenjo, kʼatekʼuriʼ sibʼalaj winaq kekam rumal we kʼalaj jaʼ riʼ.

Kroqʼisaj chi ri ukaj anjel, kʼatekʼuriʼ kchʼaytaj ri oxibʼ uchʼaqapil ri uwach ri qʼij, ri oxibʼ uchʼaqapil uwach ri ikʼ e ri oxibʼ uchʼaqapil taq ri chʼimil; jun che ri oxibʼ kichʼaqapil qʼequʼm kkanajik, ri paqʼij ksach uwach ri oxibʼ uchʼaqapil usaqil e xoqujeʼ ri chaqʼabʼ.

Kʼatekʼuriʼ, kinwilo e kinto jun xik che krapapik cho ri nimalaj kaj e kuraq uchiʼ rukʼ kowlaj uchʼabʼal: «Itzel, itzel, itzel kech ri winaq rech ri uwachulew, aretaq chiʼ koqʼesax na ri uchʼabʼal ri kʼisbʼal taq tum kumal ri eʼoxibʼ anjelibʼ».

Kʼatekʼuriʼ, ri uroʼ anjel kroqʼesaj ri tum, e kinwil jun chʼimil che ktzaq uloq puwiʼ ri uwachulew. Kyaʼtaj chech, kukʼam ri lawibʼal che rech ri kʼwaʼ rech ri nimalaj siwan.

Kujaq ri kʼwaʼ rech ri nimalaj siwan e kaqʼan uloq jun sibʼ jeʼ jas chi jun nimalaj qʼaqʼ –kqʼequʼmar uwach ri qʼij e ri kaj rumal weriʼ–

kʼatekʼuriʼ, chi pa we sibʼ riʼ, keʼel ubʼi sakʼ puwiʼ ronojel ri uwachulew; kyaʼtaj chkech kikʼam jun kikowinem jeʼ jas ri kech ri xkabʼ chuwachulew.

Kbʼix chkech che kkitoʼo, kkikol kan ri qʼayes, ronojel rax e ronojel cheʼ are xuwi kkikʼajisaj kiwach ri winaq che man kʼo ta utʼiqabʼal ri Dyos cho ri ukursal kipalaj.

Man kyaʼtaj ta chkech, man kkikʼam ta ri kowinem che keʼkikamisaj ri eʼareʼ, xane xuwi kyaʼtaj chkech arech jobʼ ikʼ kkibʼan kʼax chkech. Ri qʼoxom kkiyaʼo jeʼ jas ri utiʼyoʼbʼal jun xkabʼ.

Pa we taq qʼij riʼ, ri winaq kkitzukuj riʼ ri kamikal e man kkiriq ta riʼ, ¡are kkaj riʼ kekamik e ri kamikal kanimaj ubʼi riʼ chkiwach ri eʼareʼ!

Ri esakʼ riʼ, jeriʼ kekaʼyik jeʼ jas ri ekej che kesukʼumax che ubʼanik ri chʼoʼj; cho ri kijolom kʼolik jeʼ jas ketakik retzʼabʼalil che qʼanlaj pwaq kkaʼyik; ri kiwach kkaʼyik jeʼ jas kiwach winaq;

ri kiwiʼ jeʼ jas ri kiwiʼ ri ixoqibʼ e ri kiwareʼ jeʼ jas ri kiware ri koj;

chʼichʼ ri uchʼuqbʼalil ri kibʼaqil, ri ujapibʼal kixikʼ, jeʼ jas ri utayik chʼichʼ che jikʼom kumal ekʼi taq kej che kkitij bʼenam pa ri chʼoʼj.

Kʼo kijeʼ jeʼ jas ri kijeʼ ri xkabʼ che kʼo kitiʼyobʼal; e pa ri kijeʼ kʼo ri kikowinem arech kkibʼan kʼax jobʼ ikʼ chkech ri winaq.

Ri kinimal jeʼ jas jun ajaw, are ri Anjel rech ri nimalaj siwan; «Abʼaddon» ri ubʼiʼ pa hebʼreʼo, «Apoliʼon» pa griʼego.

Xpetajik ri nabʼe kʼax, epetinaq chi na kebʼ kʼax.

Ri uwaq anjel xroqʼesaj chi ri jun tum. Kʼatekʼuriʼ xinta jun chʼabʼal che kel uloq pa ri kijebʼ rukʼaʼ ri tabʼal che qʼanalaj pwaq che kʼo chuwach ri Dyos;

kubʼij chech ri uwaq anjel che rukʼam ri tum: «Cheʼatzoqopij puwiʼ ri nim jaʼ eʼufrates ri ekijebʼ anjelibʼ che eyutlik».

Kʼatekʼuriʼ, ketzoqopisax ri ekijebʼ anjelibʼ che keyeʼm ri kajbʼal, ri qʼij, ri ikʼ e ri junabʼ arech kekikamisaj ri oxibʼ kichʼaqapil ri winaq rech ri uwachulew.

Ri eʼuwinaq rech chʼoʼj, ekʼo lajuj kʼal millones che kkikejbʼej kej: xinto, xbʼix chwech joropaʼ ri kajibʼalil.

Xeʼinwil ri kej e ri winaq che ri kikejbʼem, jeʼ jas weriʼ: ri winaq, qʼaqʼ ri kichʼuqbʼal, rech jasinto e rech asufre; ri kijolom ri kej jeʼ jas ri kijolom ri koj, e pa ri kichiʼ kkichubʼaj qʼaqʼ, sibʼ e asufre.

Kʼatekʼuriʼ, ri oxibʼ uchʼaqapil ri winaq rech ri uwachulew xekam rumal we oxibʼ kʼax riʼ; ri qʼaqʼ, ri sibʼ e ri asufre che kkichubʼaj ri kej pa kichiʼ.

Rumal rech che ri kikowinem ri kej kʼo pa kichiʼ e pa ri kijeʼ; rumal rech che ri kijeʼ jeʼ jas ri ekumatz, che kʼo kijolom, e rukʼ weriʼ kkibʼan ri itzel.

Kʼatekʼuriʼ, ri winaq che man xekam ta pa taq we kʼax riʼ, man xkikʼex ta ri uchak ri kiqʼabʼ: Man xetaniʼ ta chech uqʼijilaxik ri joʼs taq dyoses che ebʼanom rukʼ qʼan pwaq, rukʼ saq pwaq, rukʼ saq chʼichʼ, rukʼ abʼaj, e rukʼ cheʼ; che man kekowin taj kekaʼyik, ketanik, kebʼinik.

Man xetaniʼ ta chech ri kamisanik, che ri itzbʼal, che ri itzel kʼaslemal e che ri elaqʼ.

Kʼatekʼuriʼ, xinwil chi jun anjel che kʼo uchoqʼabʼ, kaqaj uloq chi chikaj uloq pa unikʼyajal jun sutzʼ, kʼo jun raxkiyaqʼabʼ cho ri ujolom, ri uwachbʼal kkʼayik jeʼ jas ri qʼij e ri raqan jeʼ jas qʼaqʼ raqan taq ja.

Pa uqʼabʼ kʼo jun alaj wuj che jaqalik. Xuya ri rikyaqʼabʼ raqan puwiʼ ri polow e ri umox raqan puwiʼ ri uwachulew,

kʼatekʼuriʼ xuraq uchiʼ rukʼ kowlaj uchʼabʼal jeʼ jas kuraqaqej uchiʼ jun koj; e xtatajik che xechʼaw wuqubʼ kaqulja.

Aretaq chiʼ xechʼawtajik ri wuqubʼ kaqulja, kwaj kintzʼibʼanik, kʼatekʼuriʼ xinta jun chʼabʼal chi pa ri kaj uloq che kubʼij chwech: «Chakʼuʼuʼ ri tzij xkibʼij ri wuqubʼ kaqulja e matzʼibʼaj waʼ».

Kʼatekʼuriʼ, ri jun anjel che xinwilo takʼal puwiʼ ri polow e puwiʼ ri uwachulew, xuyak ri rikyaqʼabʼ uqʼabʼ chikaj

e xuya utzij puwiʼ ri Areʼ ri kʼaslik chubʼeqʼij chubʼesaq, ri Areʼ che xbʼanow ri kaj e ronojel ri kʼo cho ri kaj, ri xbʼanow ri uwachulew e ronojel ri kʼo chuwach, ri xbʼanow ri polow e ronojel ri kʼo pa ri areʼ: «¡Kamik riʼ man kujbʼiyitaj ta chik!».

Xaneʼ pa taq ri uqʼij ri uchʼabʼal ri uwuq anjel, aretaq chiʼ kroqʼesaj na ri tum, pa uchanim riʼ kkʼis uwach ri jastaq uwach awatalik che rech ri Dyos, ri utzalaj tzij che uyaʼom ubʼixik chkech ri eʼupatanijel ri eqʼaxal utzij.

Kʼatekʼuriʼ, ri jun chʼabʼal che xinto xchʼaw pa ri kaj, xinuchʼabʼej chi jumul e xubʼij chwech: «Jat, jakʼamaʼ ri alaj wuj ri kʼo pa ri uqʼabʼ ri anjel che takʼal puwiʼ ri polow e puwiʼ ri uwachulew».

Xinbʼek, e xinta che ri jun anjel arech kuya ri alaj wuj chwech; kʼatekʼuriʼ, ri areʼ kubʼij chwech: «Chʼakʼamaʼ ubʼik, chatijaʼ bʼaʼ; sibʼalaj kukʼakʼarisaj na waʼ ri awixkoʼl, kʼatekʼut, pa ri achiʼ sibʼalaj kʼo ukiʼil waʼ jeʼ jas ri uwaʼlcheʼ».

Xinkʼam ukoq ri alaj wuj pa ri uqʼabʼ ri Anjel e xintij ubʼik; pa ri nuchiʼ sibʼalaj ukiʼil jeʼ jas ri uwaʼlcheʼ; kʼatekʼut aretaq chi xinbʼiqʼ ubʼik, xunojisaj ri wixkoʼl che ri ukʼayil.

Kʼatekʼuriʼ, xbʼix chwech: «Rajawaxik che ri at kaqʼaxej ri utzij ri Dyos chkech sibʼalaj esiwantinimit, chkech sibʼalaj jetaq amaqʼ, chkech sibʼalaj taq chʼawibʼal e chkech eʼajawinel».

Kʼatekʼuriʼ, xya chi chwech jun aj jeʼ jas jun xkʼabʼ, rukʼ we tzij riʼ: «Chatwaʼlijoq, e chawetaj ri Nimalaj Rachoch ri Dyos, ri tabʼal e ri ewinaq che keqʼijilan chupam;

ri uwoja cho ri Nim Rachoch ri Dyos chayaʼaʼ kanoq, mawetaj bʼaʼ, rumal rech che kayaʼtaj na chkech ri man kʼo ta ri qakojonik kukʼ arech che kkitakʼalej na riʼ ri tyoxalaj tinimit pa kawinaq kebʼ ikʼ.

Kʼatekʼut, kinbʼan na riʼ che ri ekebʼ eqʼataltzij chwij kkiqʼaxej na ri nutzij pa 1.260 qʼij rukʼ jun koxtar katzʼyaq».

Ri eʼareʼ riʼ, eʼareʼ ri kebʼ cheʼ olivos e are ri kebʼ chajbʼal che etakʼal chuwach ri Ajaw rech ri uwachulew.

We kʼo jun winaq kubʼan kʼax chkech, chi kel qʼaqʼ riʼ pa kichiʼ arech kkiporoj ubʼik ri kikʼulel; jeʼ nakʼut, ri jun che kraj kubʼan kʼax chkech, jeʼ na kʼuriʼ ri ukamikal kuriqo.

Ri eʼareʼ kʼo kikowinem che utzʼapixik ri kaj arech man kpe ta jabʼ pa taq ri qʼij aretaq chiʼ kkibʼan ri kichak; xoqujeʼ kʼo kikowinem puwiʼ ri jaʼ arech kkijal pa kikʼ, e ri kowinem arech kkichasaj ri uwachulew rukʼ kʼilaj taq kʼax xaq joropa mul kkaj ri eʼareʼ.

Kʼatekʼut, aretaq chiʼ xkʼistaj ri kichak ri eʼareʼ, ri jun Chikop che xel uloq chi pa ri nimalaj siwan, kpe na riʼ che ubʼanik ri chʼoʼj kukʼ eʼareʼ arech keʼuchʼako e keʼukamisaj.

E ri kaminaq taq kibʼaqil ri eʼareʼ, kcholexik riʼ pa ri kʼayibʼal rech ri Nim Tinamit, che xaq pa ubʼixkil ubʼiʼ Sodoma on Egipto, jawiʼ xoqujeʼ xripabʼax wi ri Ajawxel,

ri kaminaq taq kibʼaqil ri eʼareʼ, kekanaj kan riʼ chkiwach ri siwan taq tinimit, chkiwach taq ri juqʼat winaq, chkiwach ri jetaq kʼi chʼawibʼal, chkiwach jetaq amaqʼ, e kekikʼaʼyej riʼ oxibʼ qʼij rukʼ panikʼaj qʼij; kʼatekʼuriʼ man yaʼtal ta riʼ arech kemuqik.

Ri winaq rech ri uwachulew kekiʼkotik e kkinimaqʼijarisaj waʼ weriʼ; e kkiyaʼ sipanik chbʼil taq kibʼ, rumal rech, che we kebʼ eqʼaxal utzij ri Dyos riʼ, xkibʼan sibʼalaj kʼax chkech.

Kʼatekʼut, aretaq xokʼow ri oxibʼ qʼij rukʼ ri panikʼaj qʼij, ri Dyos kuya jun uxlabʼal kʼaslemal chkech ri eʼareʼ pa ri kaqan, ketakʼiʼk, kʼatekʼuriʼ sibʼalaj kkixeʼj kibʼ ri keʼilowik ri eʼareʼ.

Chi chanim xinta jun kowlaj chʼabʼal che kuraq uchiʼ chi chikaj wi: «¡Chixpaqal uloq waral!». Xepaqiʼ chikaj pa ri sutzʼ chkiwach ri kikʼulel.

Pa we jun kajbʼal riʼ xpe jun nimalaj kabʼraqan e xtzaq jun chech ri lajuj uchʼaqapil ri tinimit, e xekam 7.000 winaq pa we kʼax riʼ. Ri winaq che man xekam taj sibʼalaj xkixeʼj kibʼ, e rumal kʼu waʼ nim xkil wi, xkiya uqʼijil ri Dyos kʼo chikaj.

Xokʼowtajik ri ukabʼ kʼax, chi kamik riʼ petinaq ri urox.

Ri uwuq anjel, xroqʼesaj ri tum. Kʼatekʼuriʼ pa ri kaj xetataj nikʼaj chʼabʼal che nim xeʼil wi: «Xopan ri Rajawarem ri uwachulew che rech ri Qajaw e che rech ri Ukristo; e kajawinik chubʼeqʼij chubʼesaq».

Kʼatekʼuriʼ, ri juwinaq kijebʼ enimalaj taq winaq che etʼuyul cho ri kitem chuwach ri Dyos, jupalik ktzaq kiwach che uqʼijilaxik ri Dyos;

kkibʼij: «Kqamaltyoxij chawech, Qajawxel, Dyos Ajawxel, ajchaqʼe ronojel, ri Areʼ che are kamik, ri Areʼ che are Iwir, rumal rech che xakoj pa ri aqʼabʼ ri nimalaj achuqʼabʼ arech kajeqbʼaʼ ri awajawibʼal.

Ri jetaq amaqʼ xas petinaq ri koyowal; kʼatekʼut, kamik riʼ xopan ri awoyowal, e kamik riʼ rajawaxik che kbʼantaj qʼatojtzij pakiwiʼ ri ekaminaqibʼ; kamik riʼ rajawaxik che ri eʼapatanijelabʼ ri eqʼaxal taq atzij, kyaʼtaj chkech kkikʼam ri tojbʼal kech, xoqujeʼ ri etyoxlaj taq winaq, ri eʼareʼ che kkixeʼj kibʼ chuwach ri abʼiʼ, chi echʼutiʼn chi enimaʼq, e che kchasax kiwach ri eʼareʼ ri kchasaj uwach ri uwachulew».

Kʼatekʼuriʼ, xjaqataj ri Nim Rachoch ri Dyos pa ri kaj, e xqʼalajinik ri arka ukʼolbʼal ri chapbʼal uqʼabʼ ri Dyos pa ri Nim Rachoch ri Dyos; kʼatekʼuriʼ xruqʼapanik taq kuypaʼ, xjinin taq chʼabʼal e taq kaqulja, xpe nimalaj kabʼraqan e nimalaj saqbʼach.

Kʼatekʼuriʼ, jun nimalaj kʼutbʼal xqʼalajin pa ri kaj: Jun Ixoq sutalik rij rumal ri qʼij, kʼo ri ikʼ chuxeʼ ri raqan e kabʼlajuj chʼimil ubʼanom jun ketakik retzʼabʼalil puwiʼ ri ujolom.

Ri areʼ yawabʼ ixoq chik e kuraqaqej uchiʼ rumal ri kʼax kuriqo aretaq chiʼ kuʼtzir rukʼ ri akʼal.

Jun ukabʼ kʼutbʼal chik xqʼalajin pa ri kaj: jun nimalaj chikop che qʼaqʼ ri areʼ, kʼo wuqubʼ ujolom e lajuj rukʼaʼ, puwiʼ taq ri ujolom kʼo jun ketakik chapbʼal uwiʼ.

Ri ujeʼ kujokej jun chkech ri oxibʼ uchʼaqapil taq ri chʼimil kʼo cho ri kaj e kukʼyaq uloq chuwach ri ulew. Ri jun chikop riʼ xtakʼiʼ chuwach ri ixoq che kuʼtzir rukʼ ri akʼal arech kutij ubʼi ri alaj akʼal aretaq chiʼ kaʼlaxik.

Ri ixoq kril uwach jun alaj ala, ri Areʼ che keʼuyuqʼuj na riʼ konojel ri winaq rukʼ jun chʼichʼ chʼimiʼy; kʼatekʼuriʼ ri ral xkʼam ubʼik chi kʼa chuwach ri Dyos e chi kʼa ri nim utem,

ri ixoq xanimaj ubʼik pa ri tzʼinalikalaj ulew, jawiʼ xusukʼumaj ri Dyos chech jun ukʼolibʼal, arech ri areʼ kkʼojiʼ chilaʼ e kʼo uwa pa 1.260 qʼij.

Kʼatekʼuriʼ, xmajtaj jun chʼoʼj pa ri kaj: ri Migueʼl e ri anjel erachbʼil areʼ kechʼoʼjin rukʼ ri jun chikop. Xoqujeʼ ri jun chikop e ri eʼanjel erachbʼil kechʼojinik,

kʼatekʼut, we eʼare riʼ man kʼo ta chi kichuqʼabʼ e man xkʼojiʼ ta chi kikʼolbʼal pa ri kaj.

Xkʼyaq uloq ri Nimalaj Chikop, che ri ojer kumatz, ri kʼaxtokʼ on ri Satanas ubʼiʼ, ri taqchiʼnel chech ronojel ri uwachulew; xkʼyaq uloq puwiʼ ri uwachulew, ri eʼanjel erachiʼl areʼ xekʼyaq uloq rukʼ ri areʼ.

Kʼatekʼuriʼ xinta jun kowlaj chʼabʼal pa ri kaj: «Kamik riʼ xopan ri chʼakanik, ri chuqʼabʼ e ri ajawibʼal chech ri Qadyos e ri kowinem chech ri Ukristo, rumal rech che xpolex ubʼik ri kubʼij ri itzel pakiwiʼ ri eqachalal, ri areʼ che kubʼij ri itzel pakiwiʼ chi paqʼij ri chichʼaqʼabʼ chuwach ri Qadyos.

Kʼatekʼut, ri eʼareʼ, xkichʼako rumal ri ukikʼel ri alaj chij e rumal ri kitzij xkiya ubʼixik, rumal rech che man xkiya ta nim uqʼij ri kikʼaslemal chi kʼateʼ kekamik.

Chixkiʼkotoq ri ix, ri kaj e ri siwantinimit rech ri kaj, ¡Itzel chiwech ri ix!, ri uwachulew e ri polow, rumal rech che ri kʼaxtokʼ xqaj uloq pa ri ikʼolbʼal rukʼ nimalaj royowal e retaʼm che xa ejalam chik ri jetaq uqʼij».

Aretaq chiʼ ri jun chikop xrilo che xpolex uloq puwiʼ ri uwachulew, xroqataj ri jun Ixoq, ri Nan e ri ala ral.

Kʼatekʼut, xyaʼtaj chech kukʼam ubʼik ri kebʼ uxikʼ ri jun nim xik arech krapap ubʼi pa ri tzʼinalikalaj ulew, chi kʼa pa ri ukʼolbʼal, che naj chech ri kumatz, jawijeʼ chi kʼo wi ri uwa pa jun junabʼ, pa kebʼ junabʼ e xa panikʼyaj junabʼ.

Kʼatekʼut, ri jun kumatz xuxabʼej uloq puchiʼ jeʼ jas jun nimaʼ chrij ri Ixoq, arech kujurej uloq ri Ixoq.

Kʼatekʼut, ri uwachulew xpe che utoʼik ri Ixoq, ri uwachulew kukʼabʼaʼ ri uchiʼ e kutij ubʼi ri jun nimaʼ che xuxabʼej ri jun kumatz.

Xas chanim xpe royowal ri jun kumatz chech ri Ixoq, kʼatekʼuriʼ kbʼe che ubʼanik chʼoʼj kʼukʼ ri eralkʼuwaʼl chik, ri kkikʼol ri Upixabʼ ri Dyos e ri kʼo ri Utzij ri Jesus kukʼ.

Ri in, intakʼal puwiʼ ri sanyibʼ rech ri polow.

Kʼatekʼuriʼ, xinwilo che kel uloq pa ri polow, jun chikop che kʼo wuqubʼ ujolom e lajuj rukʼaʼ; puwiʼ ri taq ri rukʼaʼ kʼo lajuj ketakik chapbʼal wiʼaj, e puwiʼ taq ri ujolom tzʼibʼatalik itzel taq tzij chech ri Dyos.

Ri jun chikop che xinwilo chujala ubʼi jun bʼalam, ri raqan chujala ubʼi raqan oso e ri uchiʼ jeʼ jas uchiʼ koj; kʼatekʼuriʼ ri jun nimalaj chikop kuqʼaxej ri uchuqʼabʼ chech, ri nimalaj utem e kuya jun nimalaj ukowinem.

Jun chech taq ri ujolom jeʼ jas uriqom kamikal, kʼatekʼut ri nimalaj soktajinaq wi che kamikal, xkunatajik; kʼatekʼuriʼ, konojel ri winaq chuwachulew, sibʼalaj utz xkil weriʼ e xkiternebʼej ri jun chikop.

Jupalik xtzaq kiwach chuwach ri Nim Chikop, rumal rech che xuya ri kowinem chech ri jun chik chikop; kʼatekʼuriʼ jupalik xtzaq chi kiwach chuwach ri jun chik chikop e xkibʼij: «¿Jachin jewaʼ jeʼ jas we jun chikop riʼ, e jachin kkowinik kchʼoʼjin rukʼ ri areʼ?».

Xyaʼtaj chech areʼ e xukʼam ri kowinem arech kubʼij ri tzij rech taq ri nimal e ri itzel taq tzij chech ri Dyos; xukʼam we kowinem riʼ arech kubʼan weriʼ pa kawinaq kebʼ ikʼ;

kʼatekʼuriʼ, xubʼij ri itzel taq tzij chech ri Dyos, xubʼij itzel taq tzij chech ri ubʼiʼ e chech ri Rachoch, e chkech ri ekʼo pa ri kaj.

Xyaʼtaj ri kowinem chech arech kubʼan ri chʼoʼj chkech ri etyoxlaj taq winaq e arech keʼuchʼako. Xyaʼtaj ri kowinem chech puwiʼ konojel kibʼantajik ri winaq, pakiwiʼ konojel siwantinimit, puwiʼ ronojel chʼawibʼal on puwiʼ ronojel amaqʼ.

E konojel winaq chuwachulew che ri man tzʼibʼatal ta ri kibʼiʼ pa ri wuj rech ri ukʼaslemal ri kaminaq alaj chij chi pa ri umajibʼal uloq ri uwachulew, keʼok che uqʼijilaxik ri jun chikop.

¡Ri jun che kʼo uxikin, chutatabʼej bʼa weriʼ!

Ri jun che kyut che chʼichʼ chi kyut wi; ri jun che kkam rumal chʼichʼ chi rukʼ chʼichʼ riʼ kkam na riʼ: Pa weriʼ, chi rajawaxik wi ri kikochʼonik e ri kikojonik ri etyoxlaj taq winaq.

Kʼatekʼuriʼ, xinwil chi jun chikop che xel ubʼi pa ri uwachulew; kʼo kebʼ rukʼaʼ jeʼ jas rukʼaʼ jun chij, kchʼawik jeʼ jas jun Nim Chikop.

Kchakunik patanijel rech ri jun nabʼe chikop, kukoj ri ukowinem pa ronojel kʼolbʼal e kubʼano che ronojel ri uwachulew e konojel ri siwantinimit kkiqʼijilaj ri jun nabʼe chikop che soktajinaq che kamikal kʼatekʼuriʼ xkunatajik.

Xubʼan nimalaj taq kʼutbʼal: Chi kubʼano che ktzaq uloq qʼaqʼ chikaj puwiʼ ri uwachulew chkiwach konojel winaq;

kʼatekʼuriʼ, rumal ri nimalaj taq kʼutbʼal kkowinik kubʼano rumal rech upatanijel ri jun nabʼe chikop kubʼano joʼs chkech ri winaq rech ri uwachulew, kubʼij chkech che kkiyak jun uwachbʼal ri jun nabʼe chikop che xjichʼtaj rumal ri chʼichʼ, kʼatekʼuriʼ, xkʼojiʼ chi na jumul ukʼaslemal.

Kʼatekʼuriʼ, kʼo ri ukowinem arech kkowinik kuya jun uxlabʼnik chech ri jun uwachbʼal ri jun chikop arech kchʼawik, e arech che kekamisaxik konojel ri winaq ri man kkiqʼijilaj ta ri uwachbʼal ri jun chikop.

Rumal ri uchak, konojel winaq, chi chʼutiʼn, chi nim, chi qʼinom, chi mebʼaʼ, chi ajaw, chi patanijel kʼo jun kʼutbʼal che ri kikyaqʼabʼ kiqʼabʼ on cho ri ukursal kipalaj,

kʼatekʼuriʼ, man kʼo ta jun winaq kkowinik kuloqʼ na jun jas uwach on kukʼayij jun jas uwach we man kʼo ri kʼutbʼal rech ri ubʼiʼ ri chikop rukʼ on we man kʼo ta ri rajalabʼalil ri ubʼiʼ rukʼ.

Waral riʼ, rajawaxik ri noʼjibʼal: Ri winaq che kkowinik chrejalaj bʼa ri rejalbʼalil ri jun chikop, weriʼ, xaneʼ jun rejalabʼalil jun winaq: ri rejalabʼalil are ri 666.

Kʼatekʼuriʼ, ri Alaj Chij xukʼut ribʼ chuwach taq ri nuwoqʼoch; ri areʼ takʼal puwiʼ ri juyubʼ Siʼon, rukʼ 144.000 winaq che kʼo ri ubʼiʼ ri Areʼ e ri ubʼiʼ ri Utat cho ri ukursal kipalaj.

Kʼatekʼuriʼ xintaʼo che kʼo kchojojik pa ri kaj, jeʼ jas ri uchojojbʼal ri nimalaj taq jaʼ on ri uchʼabʼal ri kaqulja, on ujaninbʼal jun nimalaj kyaqiqʼ, e we xinto riʼ jeʼ jas ewinaq che kkiqʼojomaj ri arpa;

kkibʼixoj jun kʼakʼ bʼix chuwach ri nimalaj tem e chkiwach ri ekejebʼ ekʼaskʼoj e chkiwach ri Enimaʼq taq Winaq. E man kʼo ta jun xkowin chi retaʼmaxik ri bʼix, xuwi ri 144.000. ri eloqʼom xas pa ri uwachulew.

Eʼare ri eʼareʼ ri man xkibʼan ta ri itzel kukʼ ri ixoqibʼ, ekʼojolabʼ ri eʼareʼ; ri eʼareʼ che kkiterembʼej ri alaj chij pa ronojel kʼolbʼal jawiʼ kebʼe wi; ri eʼareʼ eloqʼom chi chkixoʼl ri winaq jeʼ jas e nabʼe taq toqʼobʼ chuwach ri Dyos e chuwach ri Alaj Chij.

Mawi ri kichiʼ xuchʼobʼ ri joʼs taq tzij; ri eʼareʼ e chʼajchʼoj taq winaq.

Kʼatekʼuriʼ, xinwil chi jun anjel che krapap pa ri nimalaj kaj, kʼo jun junalik utzalaj tzij rukʼ che kuya na ubʼixik chkech ri kekanaj kan chuwach ri uwachulew, chkech konojel amaqʼ, chkech konojel kibʼantajik juqʼat winaq, chkech konojel chʼawibʼal e chkech konojel siwantinimit.

Kuraq uchiʼ rukʼ jun kowlaj chʼabʼal: «Chixeʼj iwibʼ chuwach ri Dyos e nim chiwilaʼ wi, rumal rech che xopan ri kajbʼal rech ri qʼatbʼal utzij; nim chiwilaʼ wi ri Areʼ che xbʼanow ri kaj e ri uwachulew, ri polow e taq ri ukʼiybʼal jaʼ».

E jun ukabʼ anjel chik xuterneʼbʼej ri areʼ kuraq uchiʼ: «Xchachiʼ, xchachiʼ, ri Nimalaj Bʼabʼiloniʼa, ri xyoʼw ri amajaʼ rech royowal ri itzel kʼaslemal chkech konojel tinimit, arech kkitijo».

Jun urox anjel chik, keʼuterneʼbʼej ri eʼareʼ, kuraq uchiʼ rukʼ jun kowlaj chʼabʼal: «Ri jun che nim kril wi ri chikop e nim kril wi ri uwachbʼal, e kʼo ri ukʼutbʼal cho ri ukursal upalaj on cho ri uqʼabʼ,

ri areʼ, xoqujeʼ kutij na riʼ ri amajaʼ rech ri royowal ri Dyos, che sukʼumatajinaq chik, xas utz, pa ri pajbʼal amajaʼ rech ri royowal. Ri areʼ kuna na ri kʼax rumal ri qʼaqʼ e rumal ri asufre, chkiwach ri etyoxlaj taq anjelibʼ e chuwach ri Alaj Chij.

Kʼatekʼuriʼ, ri usibʼal ri kikʼaxkʼol, kwaʼlij chubʼeqʼij chubʼesaq; man kkʼojiʼ ta jaʼmaril, chi paqʼij chi chaqʼabʼ chkech ri nim kkil wi ri jun chikop e ri jun uwachbʼal, xoqujeʼ ri kekʼamow ri ukutbʼal ubʼiʼ».

Pa weriʼ rajawaxik ri kichuqʼabʼ ri etyoxlaj taq winaq, ri kkikʼol ri upixabʼ ri Dyos e ri kkikʼol ri kojonik chrij ri Jesus.

Kʼatekʼuriʼ xinta jun chʼabʼal pa ri kaj che xubʼij chwech: «Chatzʼibʼaj: Utz kech ri kaminaqibʼ che kekam rukʼ ri Ajawxel; chi ukamik ubʼik riʼ –jeʼ nakʼut, kcha ri Uxlabʼxel– kkʼojiʼ ri jaʼmaril chech ri kikosibʼal, rumal rech che xas bʼenaq ri kichak kukʼ».

Kʼatekʼuriʼ, xqʼalajin chuwach taq ri nuwoqʼoch jun saqalaj sutzʼ, e puwiʼ ri sutzʼ tuyul jun che jeʼ jas ralkʼuwaʼl winaq, kʼo puwiʼ ri ujolom jun qʼanalaj pwaq ketakik retzʼabʼalil ujolom e pa ri uqʼabʼ jun utzalaj chʼichʼ.

Kʼatekʼuriʼ, jun anjel chik, xel uloq pa ri Nimalaj Rachoch ri Dyos e kuraq uchiʼ rukʼ jun kowlaj chʼabʼal chech ri jun che tʼuyul puwiʼ ri sutzʼ: «Chakʼyaqaʼ ubʼi le achʼichʼ e chatqʼatanoq, rumal rech che we kamik riʼ rajawaxik kbʼan ri qʼatoj; ri triko rech ri uwachulew qʼan chik».

E ri jun che tʼuyul puwiʼ ri sutzʼ xukʼyaq ri chʼichʼ puwiʼ ri uwachulew e xbʼantaj ri qʼatoj, xbʼantaj ri chak chuwach ri uwachulew.

Kʼatekʼuriʼ jun anjel chik, xel uloq pa ri Nim Rachoch ri Dyos chikaj, xoqujeʼ rukʼam jun utzalaj chʼichʼ.

E xel chi uloq jun anjel pa ri tabʼal –ri anjel che kukʼol ri qʼaqʼ– kuraq uchiʼ rukʼ jun kowlaj uchʼabʼal chech ri jun che kʼo ri utzalaj chʼichʼ rukʼ: «Chakʼyaqaʼ ubʼi ri utzalaj achʼichʼ, chaqʼataʼ ri uwach ri tikbʼal uva rech ri uwachulew, rumal rech che chaqʼ chik ri uwach».

Ri jun anjel riʼ, kukʼyaq ri jun uchʼichʼ puwiʼ ri uwachulew, xuchʼup uwach ri tikbʼal uva e xujokej ubʼik ronojel pa ri yitzʼbʼal rech royowal ri Dyos; nimalaj ri yitzʼbʼal!

Kʼatekʼuriʼ ri yitzʼbʼal xtakʼaleʼx uwiʼ tzaʼn taq ja chech ri tinimit, e xbʼulbʼutik uloq kikʼel che xopan kʼa pa ri chʼichʼ che kʼo pakichiʼ ri kej, xchemchatik puwiʼ 1.600 estadiʼos.

Kʼatekʼuriʼ, xinwil chi jun nimalaj e utzalaj kʼutbʼal pa ri kaj: wuqubʼ anjel che kukʼam wuqubʼ kʼaxkʼolil, ri kisbʼal taq kʼaxkʼolil, rumal che rukʼ weriʼ kkʼis ri royowal ri Dyos.

Xinwil chik, jeʼ chujalaʼ ubʼik jun polow rech ktzintzatik kristal rukʼ qʼaqʼ, e ri eʼareʼ che xechʼakan chuwach ri jun chikop e chuwach ri uwachbʼal e chuwach ri rejalabʼalil ri ubʼiʼ, etakʼal chuwach we polow riʼ che ktzintzatik kristal. Kkiqʼojomaj taq ri arpas rech ri Dyos,

kkibʼixoj ri ubʼix ri Moʼises, ri upatanijel ri Dyos e ri ubʼix ri Alaj Chij: Nimalaj taq ubʼantajik e utzalaj taq ri achak, Ajawxel, Dyos Ajaw chech ronojel; sukʼalaj ubʼantajik e utzalaj taq ri abʼe, Ajawinel chkech taq ri tinimit.

¿Jachin man kuxibʼij ta ribʼ chuwach ri abʼiʼ, Ajawxel; e jachin man nim ta kril wi ri abʼiʼ? Rumal rech che xuwi ri at, tyoxlaj ri abʼantajik; e konojel riʼ ri man junam ta qakojonik kukʼ kepe na riʼ e mejlik xukulik riʼ kretzaq na chawach, rumal rech che xaqʼalajisaj ri utojbʼalil ri awoyowal.

Kʼatekʼuriʼ, ri in, xinwilo che kjaqatajik ri Nim Rachoch ri Dyos pa ri kaj, e pa ri ukabʼal ri Testimoniʼo,

xeʼel uloq ri wuqubʼ anjelibʼ che kukʼam ri wuqubʼ kʼax, kikojom katzʼyaq saqtuntuj taq lino, sibʼalaj jeʼlik kchupchatik, ri ximbʼal taq kipam qʼanlaj pwaq.

Kʼatekʼuriʼ, jun chkech ri ekijebʼ che Ekʼaskʼoj, xuya chkech ri ewuqubʼ anjelibʼ wuqubʼ qʼanlaj taq pwaq pajbʼal amajaʼ nojinaq chech ri royowal ri Dyos, ri Areʼ che kʼaslik chubʼeqʼij chubʼesaq.

E ri Nim Rachoch ri Dyos xnojik chech ri usibʼal ri Uqʼijil ri Dyos e chech ri uchuqʼabʼ, e man kʼo ta jun kkowinik kok ubʼi chupam xas kʼateʼ na aretaq chiʼ kkʼis ri wuqubʼ kʼaxkʼolil kech ri ewuqubʼ anjelibʼ.

Kʼatekʼuriʼ xinta jun chʼabʼal che chi pa ri Nim Rachoch ri Dyos kuraq uloq uchiʼ chkech ri ewuqubʼ anjelibʼ e kubʼij chkech: «Jix, jitixaʼ puwiʼ ri uwachulew ri wuqubʼ pajbʼal amajaʼ rech ri royowal ri Dyos».

Xbʼe ri nabʼe e xutixej ri jun pajbʼal rech royowal ri Dyos puwiʼ ri uwachulew; kʼatekʼuriʼ, ri winaq che kʼo ri ukʼutbʼal ri jun chikop kukʼ e ri mejlem xukulem xeqaj chuwach ri jun uwachbʼal, xpe jun itzel e kʼaxalaj yabʼil xas chkipam.

Ri ukabʼ, xutixej ri jun pajbʼal pa ri polow; e xujal kikʼ –jeʼ jas ukikʼel jun kaminaq– e ronojel kʼaskʼoj xkam pa ri polow.

Ri urox xutixej ri jun pajbʼal pa taq ri nimaʼ e pa taq ri ukʼiybʼal jaʼ; kʼatekʼuriʼ xujal kikʼ.

Kʼatekʼuriʼ, xinto che ri anjel rech taq ri jaʼ kubʼij: «At sukʼalaj ri At, ri Areʼ che are kamik, ri Areʼ che are iwir, ri Tyoxlaj, rumal rech che jewaʼ ri ukʼajisax wach kabʼano;

ri eʼareʼ xkiqʼejej ri kikikʼel ri etyoxlaj taq winaq e ri kikikʼel ri eqʼaxal utzij ri Dyos, e ri at, xabʼano arech nakut xkiqumuj ri kikʼel, utz e taqal weriʼ chkech».

Kʼatekʼuriʼ, xinto, che ri tabʼal kubʼij: «Jeʼ, Ajawxel, Dyos Ajaw chech ronojel, saqalajtzij e sukʼalaj taq ri kʼax kabʼano».

Ri ukaj anjel xutixej ri upajbʼal puwiʼ ri qʼij; e xyaʼtaj chech xukʼam ri kowinem che keʼuporoj ri winaq rukʼ ri qʼaqʼ,

e ri winaq xeporox rumal jun nimalaj qʼaqʼ. Kʼatekʼut, rukʼ weriʼ, man xkijal ta ri kikʼaslemal, man nim taj xkil wi ri Dyos, xkibʼij itzel taq tzij puwiʼ ri ubʼiʼ ri Dyos che kʼo ri ukowinem puwiʼ taq we kʼax riʼ.

Ri uroʼ, xutixej ri upajbʼal puwiʼ ri nimalaj utem ri jun Chikop; e ri rajawibʼal xqʼequʼmarik, kʼatekʼuriʼ, ri winaq xkitiʼ ri kaqʼ rumal ri qʼoxom.

E ri winaq man xkijal ta ri kichak, xkibʼij itzel taq tzij puwiʼ ri Dyos rajaw ri kaj, rumal ri uchuqʼabʼ ri qʼoxom e rumal taq ri chʼaʼk.

Ri uwaq, xutixej ri upajbʼal puwiʼ ri nimalaj nimaʼ Eʼufrates; xtzaj ri ujoron, e xkʼojiʼ jun bʼe kech ri Eʼajawinel kepe pa ri relbʼal qʼij.

Kʼatekʼuriʼ, xinwilo, che chi pa ri uchiʼ ri Nimalaj Chikop, chi pa ri uchiʼ ri jun chik chikop, e chi pa ri uchiʼ ri jun itzel qʼaxal utzij ri Dyos, xeʼel uloq oxibʼ itzel taq uxlabʼal, jeʼ jas taq ri ixtutzʼ.

–Ri eʼareʼ, qastzij che eʼitzel taq uxlabʼal, kkibʼan nimalaj taq jastaq, kebʼe che kimulixik ri eʼajawinel rech ronojel ri uwachulew arech kechʼoʼjinik pa ri Nimalaj Uqʼij ri Dyos Ajawxel chech ronojel.

Jeʼ nakʼut, ri in kinpetik jeʼ jas jun elaqʼom: Utz rech ri winaq che kkʼasiʼk e che kukʼol ri ratzʼyaq arech man kchʼanchʼatik taj e man kilitaj ta ri jetaq ukʼixbʼalil.

Xkimulij kibʼ pa jun kʼolbʼal che ubʼiʼ pa ri Hebʼreʼo: Harmaguedon.

Ri uwuq, xutixej ri upajbʼal pa ri kyaqiqʼ: kʼatekʼuriʼ, chi pa ri Nim Rachoch ri Dyos, kel uloq jun chʼabʼal che kubʼij: «¡Xkʼisik ri ubʼanik!».

Kʼatekʼuriʼ, xubʼan sibʼalaj kaypaʼ, sibʼalaj kjaninik taq chʼabʼal e kruqʼpan kaqulja e xpe jun nimalaj kabʼraqan. ¡Jayiʼ, chi man ubʼanom ta wi xas pa ri umajibʼal uloq che ekʼo winaq chuwach ri uwachulew, man ilitajinaq ta jun nim kabʼraqan jeʼ jas weriʼ!

Ri Nimalaj Tinimit xjachataj pa oxibʼ utzʼaqatil, kʼatekʼuriʼ ri tinimit kech taq ri amaqʼ xewilil ubʼik; e ri Nimalaj Bʼabʼiloniʼa, knaʼtaj chech ri Dyos, arech kuya ri jun pajbʼal chech jawiʼ kpoqʼow wi ri amajaʼ rech royowal.

Kʼatekʼuriʼ, ronojel taq ri ulew che kʼo pa ri polow xeʼanimajik, ri jetaq juyubʼ xesachik.

E jun nimalaj saqbʼach –jeʼ jas jumuchʼ pajbʼal raʼlal– xtzaq uloq chikaj pakiwiʼ ri winaq. Kʼatekʼuriʼ, ri winaq chi xkibʼij ri itzel taq tzij puwiʼ ri Dyos, rumal ri itzelalaj saqbʼach riʼ; tzij nakʼut che we saqbʼach riʼ xubʼan nim itzelalaj kʼax.

Kʼatekʼuriʼ, jun chkech ri ewuqubʼ anjelibʼ che kukʼam ri wuqubʼ pajbʼal amajaʼ, xpetik e xubʼij chwech: «Chasaʼj uloq, ri in kinkʼut na chawach ri qʼatojtzij kabʼantaj puwiʼ ri jun etamatal uwach ixoq kech nim chʼutiʼn, ri areʼ che tʼuyul chuchiʼ ri nim taq jaʼ,

rukʼ ri areʼ xemakunik xkibʼan ri itzel ri eʼajawinel rech ri uwachulew, e ri winaq ekʼo chuwachulew xeqʼabʼar rumal ri amajaʼ rech ri itzelalaj ukʼaslemal».

Xinukʼam ubʼi pa ri tzʼinalik ulew xaq pa ri wuxlabʼal. Kʼatekʼuriʼ, xinwil jun ixoq, tʼuyul chrij jun chikop kyaq kkaʼyik, nojinaq itzel taq tzij chrij, kʼo wuqubʼ ujolom e lajuj rukʼaʼ.

Ri jun ixoq ukojom kyaqtuntuj e eskarlata atzʼyaq, kchʼubʼlin che qʼan pwaq, che jeʼlikalaj taq abʼaj e che ktzintzatik taq abʼaj; rukʼam pa uqʼabʼ jun qʼanalaj pwaq pajbʼal amajaʼ nojinaq che itzel taq jastaq, nojinaq che ri itzelalaj ukʼaslemal, che ri umak kukʼ enim chʼutiʼn.

Tzʼibʼatalik cho ri ukursal upalaj jun bʼiʼ –jun awatalik jas uwach–. «Ri nimalaj Bʼabʼiloniʼa, ri kinan ri ixoqibʼ che ekech nim chʼuʼtiʼn e Nan che ri itzel taq jastaq chuwachulew».

Kʼatekʼuriʼ, chi chuwach taq ri nuwoqʼoch, ri jun ixoq xqʼabʼar rukʼ ri kikikʼel ri etyoxlaj taq winaq e rukʼ ri kikikʼel ri xekam rumal ri kikojonik chrij ri Jesus. Aretaq chiʼ xinwil weriʼ sibʼalaj xsach nukʼux,

kʼatekʼuriʼ, ri Anjel kubʼij chwech: «¿Jasche ksach akʼuʼx chech weriʼ? ri in kinya na ubʼixik chawech ri awatalik taq jastaq puwiʼ ri ixoq riʼ e puwiʼ ri jun chikop che rukʼam areʼ, ri jun chikop che kʼo wuqubʼ ujolom e lajuj rukʼaʼ.

«We jun chikop riʼ, ri areʼ che kʼo iwir, kʼatekʼut chi ukamik riʼ kkʼis uwach. Kamik riʼ, kel na uloq pa ri Nimalaj Siwan, e kuchap ubʼe pa ri ukʼisbʼalil uwach. Kʼatekʼuriʼ, konojel ri winaq ekʼo chuwachulew ri man tzʼibʼatal ta ri kibʼiʼ pa ri wuj rech kʼaslemal chi aretaq chiʼ xbʼantaj ri uwachulew, sibʼalaj utz kkil na riʼ ri uchak ri Chikop che ri areʼ kʼo iwir e ukamik riʼ xkʼis uwach, kʼatekʼut, chi kʼateʼ chi na riʼ kukʼut chi na ribʼ.

¡Chi waral wi rajawaxik jun uxlabʼal rukʼ noʼjibʼal! Ri wuqubʼ jolomaj are ri wuqubʼ juyubʼ jawiʼ tʼuyul wi ri jun ixoq. «Xoqujeʼ, weriʼ, ewuqubʼ ajawinel,

ejobʼ xkʼistaj kiwach, jun kʼaslik na uwach, e jun chik majaʼ petinaq. Aretaq chiʼ kpetik rajawaxik che xa jubʼiqʼ kuqʼiʼo.

Kʼatekʼuriʼ, ri jun chikop che ri areʼ are iwir e chi ukamik xkʼis uwach, are areʼ ri uwajxaq, kʼatekʼut are jun chkech ri ewuqubʼ; ri areʼ bʼenaq che ri ukamikal.

Ri lajuj rukʼaʼ eʼare elajuj ajawinel che majaʼ kikʼamon ri ukowinel kajawinem, rukʼ ri jun chikop kkikʼam na riʼ ri jun kowinem keʼajawinik xaq pa jun kajbʼal.

Konojel kkaj kkijach ri kichuqʼabʼ e ri kikowinem chech ri jun chikop.

Kʼatekʼuriʼ, eʼare waʼ we eʼareʼ riʼ kechʼoʼjin na waʼ rukʼ ri Alaj Chij, e ri Alaj Chij xas keʼuchʼak na riʼ, rumal rech che ri areʼ are ajaw chkech ri eʼajawibʼ, ajawinel chkech ri eʼajawinel, keʼuchʼak na kukʼ ri eʼuwinaq: ri xesikʼixik, ri echaʼom, ri utz kitakʼalem kibʼanom pa ri kikojonik.

«Xoqujeʼ ri Anjel kubʼij chwech: Ri jaʼ jawiʼ tʼuyul wi ri jun ixoq kech enim chʼutiʼn, eʼare waʼ ri jetaq tinimit, ri siwan taq tinimit, ri ejuqʼat taq winaq e ri jetaq chʼawibʼal.

Kʼatekʼuriʼ, we lajuj rukʼaʼ e ri jun chikop, sibʼalaj itzel kkil na e kkinaʼ chech ri jun ixoq che ekech enim chʼutiʼn, kkesaj na riʼ ronojel ri ratzʼyaq, chʼanalik e utukel na kkiyaʼ kanoq, kkitij na riʼ ri utiʼojal, e kkiporoj na riʼ pa ri qʼaqʼ:

rumal rech che ri Dyos xuya chkech ri jun animaʼ arech kkibʼano ri jastaq che kkaj ri eʼareʼ, arech konojel kkijach ri ukowinem ri kajaremal chech ri jun chikop, chi kʼateʼ wi aretaq chiʼ xbʼantaj ri utzij ri Dyos.

Kʼatekʼuriʼ, we jun ixoq riʼ, are ri Nimalaj tinimit, che ktaqan pakiwiʼ ri eʼajawinel erech ri uwachulew».

Kʼatekʼuriʼ, xinwil chi jun Anjel che kaqaj uloq chi chikaj uloq, kʼo nimalaj ukowinem, e ri uwachulew sibʼalaj xsaqar uwach rumal ri usaqil areʼ.

Kʼatekʼuriʼ rukʼ jun kowlaj chʼabʼal kuraqaqej uchiʼ: «Xchachiʼ, xchachiʼ, ri Nimalaj Bʼabʼiloniʼa; ri areʼ xkʼextajik kikʼolibʼal kʼaxtokʼ, xokik kachoch eʼitzel eʼitzʼil taq chikop rech uwokaj.

Rumal rech che konojel taq ri tinimit qas xkitij ri amajaʼ rech ri itzel umak kukʼ enim chʼutiʼn, e ri eʼajawinel erech ri uwachulew xemakun rukʼ ri areʼ, e ri eʼajkʼayibʼ erech ri uwachulew, xeqʼinomar rukʼ ri unimal ri areʼ».

Kʼatekʼuriʼ, xinta chi jun chʼabʼal che kubʼij chi chikaj uloq: «¡Chixel uloq chupan ri ix ixnuwinaq, chiyaʼaʼ kan ri areʼ, arech ri ix man kkʼojiʼ ta ri umak iwukʼ e man koqan ta ri uchʼaʼk chiwij!

Rumal rech che ri umak xumulij ribʼ chi kʼa pa ri kaj, e ri Dyos xnaʼtaj chech ri itzel taq jastaq xubʼano.

Chitojoʼ chech chi rukʼ ri upwaq: ¡Chiyaʼaʼ kamul chech ri itzel taq jastaq rech ri areʼ! Pa ri pajbʼal, jawijeʼ xuqʼej wi ri ujastaq ri areʼ, ¡chiqʼejaʼ kamul chech ri areʼ!

Jeriʼ kiqʼej chech jeʼ jas ri uqʼinomal e ri urayinik utzalaj ukʼaslemal, chiyaʼaʼ kʼax chech e chiyaʼaʼ itzel oqʼej chech! Ri areʼ kubʼij pa ranimaʼ: ri in, in tʼuyul cho ri nimalaj tem; kuchomaj, ri in man in malkaʼn taj e ri in man kinchʼobʼ ta riʼ jas ri oqʼej.

Rumal kʼu waʼ we jastaq riʼ, chi xa pa jun qʼij ktzaq riʼ puwiʼ ri kʼax: itzel chʼaʼk cho ri utzʼumal, ri oqʼej kʼisbʼal kʼuʼx, e ri wiʼjal; e kportaj riʼ rumal ri qʼaqʼ. Rumal rech che sibʼalaj ko, sibʼalaj uchuqʼabʼ ri Ajawxel Dyos ri xbʼanow qʼatojtzij puwiʼ ri areʼ».

Sibʼalaj keʼoq na riʼ, kejiqʼijat na riʼ rumal ri areʼ ri eʼajawinel erech ri uwachulew, ri eʼareʼ che xemakun rukʼ areʼ pa ri uqʼinomal, aretaq chiʼ kkil na ri ubʼuquwik ri usibʼal uqʼaqʼ;

naj ketakʼiʼ wi kan riʼ chech rumal rech che kkixibʼij kibʼ chuwach ri kʼax kuriq ri areʼ, e kkibʼij na riʼ: ¡Ayum! ¡Ayum! ¡Ri Nimalaj Tinimit, ri Bʼabʼiloniʼa, ri kowlaj tinimit xa pa jun kajbʼal xbʼantaj ri qʼatojtzij pawiʼ!

Ri eʼajkʼayibʼ erech ri uwachulew koqʼej na uwach riʼ e kebʼison na riʼ chech; ri eqaʼn upam taq ri jukubʼ, kamik riʼ man kʼo ta chi jun kloqʼowik!

Eqaʼn rech qʼan pwaq, rech saq pwaq, rech utzalaj taq abʼaj e rech katzintzatik taq abʼaj, eqaʼn rech lino e rech kyaqtuntuj, rech xela, e rech eskarlata, eqaʼn rech ronojel uwach kʼokʼalaj taq cheʼ, e ronojel jastaq uwach rech marfil, ronojel jastaq uwach rech utzalaj taq cheʼ, ronojel jastaq uwach rech saq chʼichʼ, rech chʼichʼ e rech ri saqchoqʼ;

kanela, kʼokʼalaj taq qʼayes, kʼokʼalaj taq kunabʼal, mirra, kʼokʼ qʼol, amajaʼ, aseʼite, kʼaj, triko, chikop rech eqaʼn, ri chij, ri kej, jetaq chʼichʼ, ri loqʼom patanijel e chi ri winaq wi.

Kʼatekʼuriʼ, ri chaqʼ taq uwach che sibʼalaj kurayij uwach ri awalmaʼ ri at, chi naj xbʼe wi chawech ri at; e ronojel ri nimal e ri utzil, xkʼis riʼ chawech ri at e man kʼo ta chi jumul ri kawil uwach.

Ri eʼajkʼayibʼ che xeqʼinomarik rukʼ weriʼ, naj ketakʼiʼ kan wi chech ri areʼ rumal rech che sibʼalaj kkixeʼj kibʼ riʼ che ri kʼax kuriq ri areʼ, sibʼalaj koqʼej na uwach riʼ e kejiqʼijat na riʼ chech.

¡Ayum! ¡Ayum! ¡Ri Nimalaj Tinimit, Ukojom lino ratzʼyaq, kyaqtuntuj, e rech eskarlata, kuqʼuj ri qʼanlaj pwaq, ri utzalaj taq abʼaj e ri katzintzatikalaj taq abʼaj!

Chi xa pa jun kajbʼal xkʼis uwach ronojel we nimal riʼ. Ri ebʼinsanel taq ri jukubʼ, ri eʼareʼ che kebʼe puwiʼ ri polow, ri winaq rech taq ri jukubʼ, e konojel ri kkichʼak pwaq rumal ri polow, naj ketakʼiʼ kan wi chech ri areʼ,

sibʼalaj kkiraqaqej kichiʼ aretaq chiʼ xkilo ri ubʼuquwik ri usibʼal ri qʼaqʼ: «¿Jachin jewaʼ jeʼ jas we Nimalaj Tinimit?».

Kʼatekʼuriʼ, xkikʼyaq ulew pa ri kijolom, kewuywutik, keʼoqʼik, kejiqʼijatik: ¡Ayum! ¡Ayum! ¡Ri Nimalaj Tinimit, rukʼ ri ukʼaslemal ri animal xeqʼinomar konojel ri ebʼinsanel chech taq ri jukubʼ e xa pa jun kajbʼal xkʼis uwach!

Ri kaj, chkiʼkotoq chech ri areʼ, xoqujeʼ ri ix che ix tyoxlaj taq winaq, ri ixtaqoʼnelabʼ, ri ix qʼaxal utzij ri Dyos, rumal rech che ri Dyos xubʼan qʼatojtzij puwiʼ ri areʼ e xubʼan toqʼobʼ chiwech ri ix.

Chi chanim, jun anjel che nimalaj ukowinem xukʼam ubʼi jun abʼaj, jeʼ jas jun nimalaj abʼaj rech jokʼbʼal triko, kʼatekʼuriʼ xukʼyaq ubʼi pa ri Polow e xubʼij: «Jeʼ jas weriʼ, chi xa pa jumul, kkʼyaq na ubʼik ri Nimalaj Tinimit Bʼabʼiloniʼa, ri areʼ, man jumul ta chik kriqitajik».

Man ktataj ta chi jumul riʼ ri kiqʼojom ri kkiqʼojomaj ri arpa e ri kibʼix ri kebʼixonik ri kkiqʼojomaj ri suʼ e ri tum, ri eʼajchakibʼ rech ronojel uwach chak man kkikʼut ta chi riʼ puwiʼ ri abʼiʼ; e ri uchʼabʼal ri abʼaj jokʼbʼal triko man ktataj ta chi jumul riʼ.

Ri usaqil ri chajbʼal man kchuplin ta chi jumul riʼ pawiʼ; ri kichʼabʼal ri chʼabʼ ala e ri chʼabʼ ali man ktataj ta chi jumul riʼ. Rumal rech che ri eʼawajkʼayibʼ ri at, eʼareʼ kanoq ri eʼajawinel rech ri uwachulew, kʼatekʼuriʼ, rukʼ ri itznik kabʼano xeʼasubʼ konojel ri winaq;

e rukʼ ri areʼ xriqitaj wi ri kikikʼel ri eqʼaxel utzij ri Dyos, e ri kikikʼel ri etyoxlaj taq winaq e ri kikikʼel konojel ri xekamisax chuwach ri uwachulew.

Kʼatekʼuriʼ, xinto jeʼ jas jun nimalaj kajininibʼal kech ejumulaj taq winaq chikaj che kkibʼij: «¡Aleluya! ri kolotajem, ri nimalaj qʼij e ri chuqʼabʼ rech ri Qadyos,

rumal rech che saqalajtzij e sukʼ ri qʼatojtzij kubʼano: xubʼan qʼatojtzij puwiʼ ri etaʼmatalik uwach ixoq che kech enim chʼutiʼn, ri areʼ che xukoj ri itzelalaj chʼamil pa ri uwachulew rukʼ ri itzelalaj ukʼaslemal, xtojtaj ukʼaxel puwiʼ ri areʼ ri kikikʼel ri eʼupatanijel».

Kʼatekʼuriʼ, kkibʼij chi jumul: «¡Aleluya! ¡Ri usibʼal kaqʼan chubʼeqʼij chubʼesaq!».

E ri juwinaq kijebʼ enim taq winaq e ri ekijebʼ Ekʼaskʼoj, jupalik xeqaj che uqʼijilaxik ri Dyos che tʼuyul cho ri nimalaj tem e kkibʼij: «¡Amen, Aleluya!»

Kʼatekʼuriʼ jun chʼabʼal xel uloq chi pa ri nimalaj tem: «Nim chiwilaʼ wi ri Qadyos, iwonojel ri ix ixupatanijel, ri ix ri kixibʼij iwibʼ chuwach ri areʼ, ri ix, ixchʼutiʼn e ri ix che ix nim winaq».

Kʼatekʼuriʼ, xinto, jeʼ jas ri kijininibʼal sibʼalaj winaq, jeriʼ jeʼ jas kchojojik nimalaj jaʼ, jeriʼ jeʼ jas ujininibʼal nimalaj kaqulja; e kkibʼij: «¡Aleluya! Rumal rech che ri Ajawxel, ri Dyos Ajaw che rech ronojel jas uwach, xokik pa ri rajawibʼal.

Chixkiʼkotoq e chjaʼjat iwach e nim chiwilaʼ wi ri Dyos, rumal rech che xpe ri ukʼulanem ri Alaj Chij; e ri rixoqil sibʼalaj utz uwiqik ribʼ xubʼano,

ri areʼ ukojom lino ratzʼyaq che sibʼalaj saqpupuj». Ri lino, are ri utzalaj taq kichak ri etyoxlaj taq winaq.

Kʼatekʼuriʼ, kubʼij chwech: «Chatzʼibʼaj: etewchiʼtalik ri winaq che kesikʼix pa ri ukʼulanem ri Alaj Chij. We tzij riʼ, utzij ri Dyos e saqalaj taq tzij».

Kʼatekʼuriʼ, jupalik xintzaq chuwach ri raqan chech uqʼijilaxik e ri areʼ kubʼij chwech: «Jayiʼ, ri in xa in jun ajpatanijel jeʼ jas ri at e jeʼ jas ri eʼawalalal che ko itakʼal che uyaʼik ri tzij chrij ri Jesus. Are ri, Dyos, rajawaxik kaqʼijilaj». Kʼatekʼuriʼ, ri yaʼl tzij chrij ri Jesus, are riʼ ri uxlabʼal rech ri qʼaxebʼal utzij ri Dyos.

Kʼatekʼuriʼ, xinwilo, jaqalik ri kaj, e petinaq jun saq kej: ri jun che ukejbʼem ubʼiʼ «kojonik» e «saqalajtzij», kubʼan qʼatojtzij e kchʼoʼjin chi pa sukʼil.

Ri jetaq uwoqʼoch jeʼ jas jun nimalaj qʼaqʼ; cho ri ujolom kʼo jujun taq ketakik chapbʼal wiʼ; tzʼibʼatalik puwiʼ jun bʼiʼaj, che xuwi ri areʼ etamaninaq;

ri ratzʼyaq ukojom, kmuʼmatik pa kikʼ, ¿e ri ubʼiʼ?: ri Utzij ri Dyos.

Ri ewinaq rech chʼoʼj chikaj, rukʼ saq taq kej e rukʼ lino katzʼyaq che saqalajpupuj, xkiterneʼbʼej ubʼi ri areʼ.

Pa ri uchiʼ kel uloq jun utzalaj chʼichʼ rech chʼoʼj arech keʼusoko ri man kʼo ta ri qakojonik kukʼ; ri areʼ keʼuyuqʼuj na riʼ rukʼ jun chʼichʼ chʼimiʼy; ri areʼ ktakʼiʼ puwiʼ ri yitzʼbʼal amajaʼ che rech ri nimalaj royowal ri Dyos, ri areʼ che Ajaw chech ronojel.

Tzʼibʼatalik jun bʼiʼaj cho ri ratzʼyaq e cho ri raqan: Ajaw chkech ri eʼajawinel e Ajawxel chkech ri eʼajawibʼ.

Kʼatekʼuriʼ, xinwil chi jun anjel, takʼal puwiʼ ri qʼij, kuraqaqej uchiʼ e rukʼ kowlaj uchʼabʼal kubʼij chkech konojel ri echikop ajuwokaj che tajin kerapap cho ri nimalaj kaj: «¡Chisaʼj, chimulij iwibʼ che ri nimalaj Uwaʼim ri Dyos!

Kitij na riʼ ri tiʼj kkitij ri eʼajawinel, ri tiʼj kkitiʼj ri ebʼinsanel taq ri jukubʼ, ri tiʼj kkitij ri winaq erech chʼoʼj, ri tiʼj kkitij ri kej e ri winaq che kkikejbʼem, ri tiʼj che kkitij konojel winaq, ri eʼajaw e ri eʼmokom, chi echʼutiʼn winaq e chi enim taq winaq!»

Kʼatekʼuriʼ, xinwil ri jun chikop e xeʼinwil ri erajawinel ri uwachulew, ekachiʼl ri ekiwinaq rech chʼoʼj, xkimulij kibʼ arech kechʼoʼjin rukʼ ri Jun che kʼo chrij ri kej e kukʼ ri eʼuwinaq erech chʼoʼj.

Kʼatekʼuriʼ ri chikop xyuttajik, xoqujeʼ, rukʼ ri man qastzij taj qʼaxal utzij ri Dyos –ri areʼ che upatanijel ri jun chikop, ri xubʼan ri nimalaj taq jastaq e rukʼ weriʼ xeʼusubʼ ri winaq che xkikʼam ri jun ukʼutbʼal ri Chikop e che xkiqʼijilaj ri uwachbʼal–, kʼatekʼuriʼ ekebʼ ekʼaslik xekʼyaq ubʼi pa ri polow rech qʼaqʼ, rech asufre che sibʼalaj kkʼatik.

Ronojel chi ri jastaq uwach; xchup uwach rumal ri chʼichʼ che kel uloq pa uchiʼ ri Jun che ukejbʼem ri jun kej, e konojel ri chikop ajuwokaj nimalaj xkitij ri kitiʼojal.

Kʼatekʼuriʼ, xinwil chi jun anjel che kqaj uloq chi chikaj uloq, rukʼam pa uqʼabʼ ri ulawibʼal ri Nimalaj Siwan, e jun nimalaj yutbʼal.

Xuyut ri Nimalaj Chikop, ri ojer kumatz kanoq –che are ri kʼaxtokʼ, are ri Satanas– kuyut ri areʼ chi pa kaqʼoʼ lajujkʼal junabʼ.

Kukʼyaq ubʼik pa ri Nimalaj Siwan, xutzʼapij taq ri tzʼapibʼal, xutʼiq uwiʼ, arech kataniʼ che kisubʼxik ri siwan taq tinimit pa mil junabʼ. E rajawaxik riʼ che ri areʼ kkir uloq xa pa kebʼ oxibʼ qʼij…

Kʼatekʼuriʼ xinwil nimalaj taq tem, xetʼuyiʼ chuwach, e xya chkech ri qʼatbʼal- tzij; xoqujeʼ xinwil ri kuxlabʼal konojel ri xket kijolom rumal ri uyaʼik tzij chrij ri Jesus e chrij ri Utzij ri Dyos, xeʼinwil konojel ri man xkaj taj xkiqʼijilaj ri Chikop e ri uwachbʼal, on ri man xkikʼam ta ri ukʼutbʼal cho ri ukursal kipalaj on cho ri kiqʼabʼ; kʼo chi jun kikʼaslemal e xeʼajawinik rukʼ ri Kristo pa kaqʼoʼ lajujkʼal junabʼ.

Ri enikʼaj kaminaqibʼ chik, man xekowin taj kʼo chi jun kikʼaslemal chi kʼa kkʼis na ri kaqʼoʼ lajujkʼal junabʼ. Waʼ weriʼ are waʼ we nabʼe kʼastajibʼal.

Utzalaj kech e etyoxlaj taq ri eʼareʼ che eʼutzʼaqatil ri nabʼe kʼastajibʼal! Ri ukabʼ kamikal man kʼo ta ukowinem pakiwiʼ ri eʼareʼ, xaneʼ echuchqajawibʼ rech ri Dyos e rech ri Kristo, e keʼajawinik kaqʼoʼ lajujkʼal junabʼ.

Aretaq chiʼ kkʼis ri kaqʼoʼ lajujkʼal junabʼ, kkiritaj na uloq riʼ ri Satanas pa ri tzʼapital wi,

e kbʼe na riʼ che kisubʼuxik ri jetaq amaqʼ pa ri kijebʼ uxkut kyaqiqʼ rech ri uwachulew, pa Gog e pa Magog, keʼumulij na riʼ che ubʼanik ri chʼoʼj, ekʼi keʼumulij jeʼ jas ri sanyebʼ rech ri polow,

xeʼaqʼan puwiʼ ronojel ri uwachulew e xeʼok pa ri kikʼolbʼal ri etyoxlaj taq winaq, ri loqʼalaj tinimit. Kʼatekʼut, jun qʼaqʼ xjabʼinik uloq pa ri kaj e xeʼuchasaj chiʼ ri eʼareʼ.

Kʼatekʼuriʼ, ri kʼaxtokʼ, ri subʼunel kech, xkʼyaq ubʼi pa ri polow rech qʼaqʼ e rech asufre, jawiʼ kʼo wi ri Chikop e ri man qastzij taj qʼaxel utzij ri Dyos, chilaʼ riʼ kkiriq wi kʼax chi paqʼij chi chaqʼabʼ, chubʼeqʼij chubʼesaq.

Kʼatekʼuriʼ, ri in xinwil jun saq tem, che jun nimalaj tem e ri Areʼ tʼuyul cho ri tem riʼ. Ri kaj e ri uwachulew xeʼanimaj chuwach ri ukʼolem e man xkiya ta kan jun retal kʼutbʼal.

E xeʼinwil ri kaminaqibʼ, chi enimaʼq chi echʼutiʼn etakʼal chuwach ri jun tem, xjaq nikʼaj wuj, e xjaq jun chik wuj che are wuj rech ri kʼaslemal; kʼatekʼuriʼ xbʼan qʼatojtzij pakiwiʼ ri ekaminaqibʼ jeʼ jas ri tzʼibʼatalik pa taq ri wuj, jeriʼ jacha ronojel uwach ri kichak.

Kʼatekʼuriʼ, ri polow xeʼutzalij ri kaminaqibʼ eʼukʼolom, ri kamikal e ri Hades xkitzalij ri ekaminaqibʼ kikʼolom e chkijujunal xbʼan qʼatojtzij pakiwiʼ jeʼ jas ri kichak.

Ri kamikal e ri Hades xekʼyaq pa ri polow rech qʼaqʼ –waʼ we polow rech qʼaqʼ riʼ are waʼ ri ukabʼ kamikal–.

E jachin che man tzʼibʼatal ta pa ri wuj rech kʼaslemal, xkʼyaq ubʼi pa ri polow rech qʼaqʼ.

Kʼatekʼuriʼ xinwil jun kʼakʼ kaj, jun kʼakʼ uwachulew –rumal rech, che ri nabʼe kaj e ri nabʼe uwachulew xsach uwach e ri polow man kʼo ta chik.

E xinwil ri Tyoxlaj Tinimit, ri kʼakʼ Jerusalem, che kqaj uloq chi chikaj uloq, chi pa ri ukʼolibʼal ri Dyos; jeʼlik uwiqik ribʼ ubʼanom, jeʼ jas jun chʼabʼ ali chuwach ri uchʼabʼ ala.

Kʼatekʼuriʼ, xinta jun chʼabʼal che kubʼij chi pa ri nimalaj tem uloq: «Waral waʼ ri Rachoch ri Dyos kukʼ ri winaq, kkʼojiʼ ri Rachoch kukʼ ri eʼareʼ; e ri eʼareʼ eʼare usiwantinimit riʼ ri areʼ Dyos-kukʼ-ri eʼareʼ, ri areʼ are Kidyos.

Kusuʼ na riʼ ronojel uwaʼl kiwach pa ri kiwoqʼoch: man kʼo ta chi kamikal riʼ; e man kʼo ta chi oqʼej riʼ, man kʼo ta chi raqoj chiʼaj riʼ e man kʼo ta chi jun kʼax riʼ, rumal rech che ri ojer uwachulew okʼowinaq chik».

Kʼatekʼuriʼ, ri Jun che tʼuyul cho ri nimalaj tem kubʼij: «Kamik kinbʼan ri kʼakʼ uwachulew». E kubʼij: «Chatzʼibʼaj: we tzij riʼ xas tzij wi e saqalajtzij».

Xoqujeʼ kubʼij chwech: «Bʼantajinaq chik, in ri in Alfa e ri Omega, in ri in Majibʼal e ri Kʼisbʼal; ri jun che kchaqij uchiʼ, kinya na riʼ chech ri ukʼiybʼal jaʼ rech ri kʼaslemal, e xaq kinsipaj riʼ chech.

Are waʼ ri rechbʼal ri ajchʼakanel winaq, e ri in, in Udyos riʼ, e ri areʼ walkʼuwaʼl riʼ.

Kʼatekʼuriʼ, ri kkixibʼij kibʼ, ri man kʼo ta kikojonik, ri kʼo itzelalaj kikʼaslemal, ri ekamisanelabʼ, ri kemakun rukʼ ixoq achi, ri eʼajitzabʼ, ri kkiqʼijilaj ri joʼs taq dyos e konojel ri ejoʼs taq winaq, kʼo riʼ ri kechbʼal pa ri polow rech qʼaqʼ e rech asufre: waʼ weriʼ, are waʼ ri ukabʼ kamikal».

Kʼatekʼuriʼ, jun chkech ri ewuqubʼ anjelibʼ, ri kkikʼam ri wuqubʼ pajbʼal amajaʼ che nojinaq che ri wuqubʼ kʼisbʼal taq kʼax, xpetik e xubʼij chwech: «Tasaʼj uloq, ri in kinkʼut na chawach ri Uchʼabʼ, ri Rixoqil ri Alaj Chij».

Xinukʼam ubʼik puwiʼ jun nimalaj juyubʼ xaq pa ri wuxlabʼal e xukʼut chnuwach ri tyoxlaj tinamit, ri Jerusalem, che kqaj uloq chikaj, chi pa ri ukʼolbʼal ri Dyos,

rukʼam ri uqʼijil ri Dyos: Kjuluwik jeʼ jas jun Utzalaj abʼaj, jeʼ jas ri katzintzatikilaj jaspe.

Kʼo jun nimalaj utapiyil che kʼo kabʼlajuj rokibʼal, e chunaqaj taq ri uchiʼja ekʼo kabʼlajuj anjelibʼ e tzʼibʼatal nikʼaj bʼiʼaj; che are kibʼiʼ ri ekabʼlajuj juqʼat kech ri eʼuwinaq ri Israʼel;

pa ri relbʼal qʼij kʼo oxibʼ uchiʼja, pa ri rikyaqʼabʼ ri relbʼal qʼij kʼo oxibʼ uchiʼ ja; pa ri umox relbʼal qʼij kʼo oxibʼ uchiʼja; pa ri uqajibʼal ri qʼij kʼo oxibʼ uchiʼja.

Ri utapiyil ri tinimit kʼo puwiʼ kabʼlajuj abʼaj che are utikbʼalil, chuwach ronojel taq ri abʼaj kʼo jun bʼiʼaj che kech ri ekabʼlajuj eʼutaqoʼnelabʼ ri Alaj Chij.

Ri jun che tajin kubʼij weriʼ chwech, kʼo jun etabʼal rukʼ, jun aj che qʼanalaj pwaq, arech kretaj ri tinimit, kretaj ri uchiʼ taq ja e ri utapiyil;

we tinimit riʼ kʼo kijebʼ utzaltmal: ri raqan junam rukʼ ri uwach. Xretaj ri areʼ rukʼ jun aj e we tinimit riʼ kretaj kabʼlajuj mil estadiʼos ri raqan junam rukʼ ri uwach e rukʼ ri unimal.

Kʼatekʼuriʼ xretaj ri utapiyil e xubʼan jun oʼkʼal kawinaq kijebʼ xkʼabʼ –Ri anjel xretaj rukʼ jun etabʼal che xas retbʼal winaq–.

We utapiyil, bʼanom rukʼ jaspya, ri tinimit bʼanom rukʼ chʼajchʼojalaj qʼanalaj pwaq che kjunamitaj rukʼ ri katzintzatikalaj abʼaj.

Ri jetaq abʼaj che utikibʼalil ri utapiyil, kʼo puwiʼ nikʼaj utzalaj taq abʼaj: ri nabʼe upaja, jaspya upam, ri ukabʼ safiro upam, ri urox kalsedoniʼa upam, ri ukaj esmeralda,

ri uroʼ sardonika, ri uwaq kornalina, ri uwuq krisolita, ri uwajxaq bʼerilo, ri ubʼelej topasiʼo, ri ulajuj krisoprasa, ri ujuʼlajuj jasinto upam, ri ukabʼlajuj amatista upam.

Kʼatekʼuriʼ, ri kabʼlajuj uchiʼja kabʼlajuj taq perlas, chjujunal chkech ri uchiʼ taq ja bʼanom rukʼ xaq jun perla; ri ukʼayibʼal ri tinimit bʼanom rukʼ qʼanalaj pwaq che man xolom taj, ktzin- tzatik upam jeʼ jas ri kristal.

Kʼatekʼuriʼ, man xinwil ta jun Rachoch ri Dyos chupam; rumal rech che ri Ajawxel, ri Dyos Ajaw chech ronojel jas uwach, are Areʼ ri Rachoch ri Dyos xoqujeʼ are Rachoch ri Dyos ri Alaj Chij.

Ri tinimit man kraj taj, man rajawaxik ta chech ri unikbʼal ri qʼij e ri unikbʼal ri ikʼ, rumal rech che ri uqʼij ri Dyos kchuplin puwiʼ e ri Alaj Chij are jun uchajbʼal.

Ri winaq kebʼin riʼ chuxeʼ ri usaqil, e ri eʼajawinel rech ri uwachulew kkikʼam na uloq riʼ chech ri kiqʼinomal.

Ri jetaq rokibʼal, jaqalik riʼ kkanajik kan pa Qʼij –rumal rech che man kʼo ta chaqʼabʼ riʼ chilaʼ–

kʼatekʼuriʼ, kkikʼam na uloq riʼ ri kiqʼinomal e ri kinimal ri eʼamaqʼ.

Jun tzʼajtajinaq uwach jastaq man kkowin ta riʼ kok chupam, xoqujeʼ man keʼok ta riʼ ri kkibʼan ri joʼs taq jastaq e ri itzel taq jastaq. Xuwi keʼok riʼ ri eʼareʼ ri tzʼibʼatal ri kibʼi pa ri uwuj ri ukʼaslemal ri Alaj Chij.

Kʼatekʼuriʼ, ri anjel xukʼut chnuwach ri nimaʼ rech ri kʼaslemal, ktzintzatik jeʼ jas ri kristal, kbʼulbʼat uloq pa ri nimalaj utem ri Dyos e pa ri utem ri Alaj Chij.

Pa ri unikʼyajal ri kʼayibʼal; pa ri jun chʼaqap e pa ri jun chik chʼaqabʼ chech ri nimaʼ, kʼo cheʼ rech kʼaslemal, che kewachin kabʼlajuj mul, jumul chjujunal ikʼ; e ri uxaq kkowin che kikunaxik ri man kʼo ta ri qakojonik kukʼ.

E man kʼo ta jun jas uwach chik che kajawaxik itzel chech; ri nimalaj tem rech ri Dyos e ri Alaj Chij sibʼalaj utz riʼ ri ukanajik pa ri tinimit, e kkiqʼijilaj na riʼ ri eʼupatanijel ri Dyos;

kkil na riʼ ri uwachbʼal, kʼatekʼuriʼ, ri ubʼiʼ tzʼibʼatal riʼ cho ri ukursal kipalaj.

Man kʼo ta chi jumul chaqʼabʼ riʼ; man kkaj ta chi saqil riʼ, man kkaj ta qʼij riʼ arech kʼo kichaj, rumal rech che ri Ajawxel Dyos kchuplin riʼ pakiwiʼ e ri eʼareʼ keʼajawinik riʼ chubʼeqʼij chubʼesaq.

Kʼatekʼuriʼ kubʼij chwech: «Waʼ we tzij riʼ chi qastzij waʼ e saqalajtzij; ri Ajawxel Dyos, che kuya ri Ruxlabʼal chkech ri eqʼaxel taq utzij, utaqom ri anjel rech Areʼ arech kukʼut chkiwach ri eʼupatanijel ri jastaq che kpe na riʼ chi ukamik.

¡Chi kamik riʼ, ri in kinpe chi na jumul! Sibʼalaj utz riʼ ri areʼ ri kkʼolow taq ri utzij we qʼaxebʼal utzij ri Dyos kʼo pa we wuj riʼ»:

In ri in Axwan, ri xinilowik e ri xintowik ronojel weriʼ; aretaq chiʼ xkʼis ronojel weriʼ, xintzaq chuwach taq ri raqan ri Anjel ri xkʼutuw chnuwach ronojel we jastaq riʼ arech kinqʼijilaj ri areʼ.

Kʼatekʼut, ri areʼ kubʼij chwech: «Jayiʼ, ri in, in jun patanijel jeʼ jas ri at, e in jun jeʼ jas ri eʼawachalal ri eqʼaxal taq utzij ri Dyos, in jun jeʼ jas ri eʼareʼ che kkikʼol ri tzij kʼo pa we wuj riʼ; are ri Dyos rajawaxik kqʼijilaxik».

Kʼatekʼuriʼ, kubʼij chwech: «Makuʼ bʼaʼ we tzij rech qʼaxebʼal utzij ri Dyos kʼo pa we wuj riʼ, rumal rech che xas ukamik riʼ kopanik ri kajbʼal.

Ri ajmakunel winaq chi chmakunoq e ri tzʼajtajinaq winaq xas chutzʼajaʼ na ribʼ; ri areʼ che kʼo jun utzalaj ukʼaslemal xas chkanajoq pa ri utzil, e ri tyoxlaj winaq, chi chutyoxrisaj na ribʼ.

Chi kamik riʼ, ri in kinpe chi na jumul, e xas wukʼam uloq wukʼ ri tojbʼal kech konojel winaq rumal ri kichak.

In ri in Alfa e ri in Omega, ri Umajibʼalil e in ri Ukʼisbʼalil; in ri in Uwinqil Jolom, in ri in Ukʼisbʼalil.

Eʼutzalaj riʼ ri eʼareʼ ri kkichʼaj na ri katzʼyaq; ri eʼareʼ riʼ kʼo riʼ kukʼ ri cheʼ rech ri kʼaslemal e kekowin riʼ keʼok pa ri tinimit pa taq ri uchiʼ taq ja.

Chiʼel ubʼik ri etzʼiʼ, ri eʼajitzabʼ, ri etzʼajtajinaqalaj taq winaq, ri ekamisanelabʼ, ri kkiqʼijilaj ri joʼs taq dyos e konojel ri utz kkilo e kkibʼan ri itzel».

Ri in, ri in Jesus, nutaqom ubʼi ri anjel che wech in, arech kubʼij weriʼ chiwech puwiʼ ri Ekomon Tyox. In ri in rabʼ ri rijaʼlil ri David, ri utzalaj chʼimil rech ri aqʼabʼil.

Ri Uxlabʼal e ri Ixoqilal kkibʼij: «¡Tasaʼj uloq!». E ri katowik, chubʼij bʼaʼ: «¡Tasaʼj uloq!». E ri kchaqij uchiʼ, chukʼamaʼ bʼaʼ ri jaʼ rech ri kʼaslemal, e ri jun che kraj, chukʼamaʼ bʼaʼ ri jaʼ che xa sipam chech.

Ri in, kinbʼij chkech konojel ri ketow we tzij qʼaxebʼal utzij ri Dyos che kʼo pa we wuj riʼ: «¡Ri jun che kukoj chi na ukoq jun tzij chik, ri Dyos kukoj na riʼ puwiʼ ri jetaq kʼax che kubʼij we wuj riʼ!

Kʼatekʼuriʼ, ri jun che kukʼam ubʼi jun tzij che rech we qʼaxebʼal utzij ri Dyos riʼ, ri Dyos, kukʼam ubʼi riʼ ri chʼaqap che rech ri areʼ pa ri jun cheʼ rech ri kʼaslemal e ri jun chʼaqap ¡che rech ri areʼ pa ri Tyoxlaj Tinimit, che cholem ubʼixik pa we wuj riʼ!».

Ri in, che kinya saqalajtzij puwiʼ we tzij riʼ, ri in kinbʼij: «¡Jeʼ nakʼut, chi ukamik kinpe in!». ¡Amen, Tasaʼj uloq Ajawxel Jesus!

¡Ri utzalaj usipanik ri Jesus, chkʼojiʼ bʼaʼ iwukʼ iwonojel! ¡Amen!