Ri kʼo pa ri umajibʼal, che xqata ri uj, che xqil ri uj rukʼ taq ri qawoqʼoch, che ri uj xqamay uwach, che ri uj xqachap rukʼ ri taq qaqʼabʼ ri Tzij rech ri kʼaslemal

–rumal rech che ri Kʼaslemal xuqʼalajisaj ribʼ chqawach ri uj: ri uj xqilo e kqaya ubʼixik jeʼ jas rilik xqabʼano, e ri uj, kqabʼij chiwech we junalik kʼaslemal riʼ, ri areʼ che kʼo chunaqaj ri Tatxel, e xuqʼalajisaj ribʼ chqawach ri uj–;

ri jastaq uwach che ri uj xqilo e xqato, ri uj kqaya ubʼixik chiwech, arech ri ix xoqujeʼ, komon riqoj ibʼ kixkʼojiʼ qukʼ ri uj. E ri uj ujkʼo pa utzil rukʼ ri Tatxel e rukʼ ri Ukʼojol Jesukristo.

Ri uj qas kqatzibʼaj ronojel weriʼ chiwech arech tzʼaqatalaj ri qakiʼkotemal.

Kʼatekʼuriʼ, are waʼ ri tzij, che ri uj xqataʼ chi rukʼ ri areʼ e che ri uj kqaya ubʼixik chiwech: ri Dyos saqil ri areʼ, man kʼo ta qʼequʼm pa ri areʼ

We ri uj kqabʼij che ujkʼo pa ri utzil rukʼ ri areʼ, kʼatekʼuriʼ, ri uj ujbʼenaq pa ri qʼequʼm ri uj ujajbʼanal tzij riʼ e man kqabʼan ta ri saqalajtzij.

Kʼatekʼuriʼ, we ri uj ujbʼenaq pa ri saqil jeriʼ jacha ri areʼ che kʼo pa ri saqil, ri uj junam qawach riʼ pa ri utzil e ri ukiʼkel ri Ukʼojol Jesus kujuchʼajchʼobʼej riʼ chuwach ronojel makaj.

We ri uj kqabʼij: «Ri uj man kʼo ta qamak», uj sachinaq riʼ, ri saqalajtzij man kʼo ta riʼ pa qanimaʼ.

We ri uj kqaya ubʼixik ri qamak, ri Areʼ man kukʼex ta riʼ ri utzij e sukʼalaj riʼ ri Areʼ kusach na riʼ ri qamak e kujuchʼajchʼobʼej na riʼ chrech ronojel ri itzel kʼo qukʼ.

We ri uj kqabʼij: «Ri uj man kʼo ta ujmakuninaq», ri uj, ajbʼanaltzij kqabʼan chrech ri Areʼ, e ri utzij man kʼo ta qukʼ ri uj.

Eʼalaj taq walkʼuwaʼl, ri in, kintzʼibʼaj weriʼ chiwech, arech ri ix man kixmakun taj. Kʼatekʼut, we kʼo jun winaq kmakunik, ri uj kʼo jun qʼaxel qatzij chuwach ri Tatxel: Are ri Jesus Kristo, ri sukʼalaj ubʼantajik.

Ri areʼ, are tabʼal toqʼobʼ chuwach taq ri qamak, man xuwi ta chuwach ri qamak uj xane xoqujeʼ chuwach ri kimak kech konojel ri uwachulew.

Rukʼ weriʼ, ri uj qetaʼm che kqachʼobʼ uwach ri areʼ: We ri uj kqakʼol taq ri upixabʼ.

Ri jun che kubʼij: «Ri in wetaʼm uwach» kʼatekʼuriʼ man kukʼol ta ri taq upixabʼ, ri areʼ jun ajbʼanaltzij, e ri saqalajtzij man kʼo ta pa ri ranimaʼ ri areʼ.

Kʼatekʼuriʼ, jachin kukʼol ri utzij, qastzij na kʼu riʼ che tzʼaqatinaq pa ri ranimaʼ ri loqʼoqʼebʼal ukʼuʼx ri Dyos. Rukʼ weriʼ, ri uj qetaʼm che ri uj ujkʼo pa ri Areʼ.

Jachin kubʼij che jaqal pa ri areʼ, xoqujeʼ rajawaxik jeriʼ kbʼinik jacha ri kbʼin ri Areʼ.

Ixloqʼalaj, ri in man kintzʼibʼaj ta jun kʼakʼ pixabʼ chiwech, xane kintzʼibʼaj jun ojer pixabʼ chiwech che ri ix xikʼamo chi pa ri umajibʼal uloq. We jun ojer pixabʼ riʼ are ri tzij che xita ri ix.

Kʼatekʼut, ri in kintzʼibʼaj jun kʼakʼ pixabʼ chiwech –qastzij nakʼut che kʼakʼ chiwech ri ix e kʼakʼ chrech ri Areʼ– rumal rech che ri qʼequʼm kel ubʼik e ri qastzij saqil, kchubʼlinik chik.

Jachin kubʼij che kʼo pa ri saqil kʼatekʼuriʼ are kraj ri itzel chrech ri rachalal, ri areʼ riʼ kanajinaq kanoq pa ri qʼequʼm.

Jachin kuloqʼoqʼej ri rachalal, kanajinaq pa ri saqil e ri areʼ man kʼo ta ktzaqik.

Kʼatekʼuriʼ, jachin ri kraj ri itzel chrech ri rachalal, kanajinaq pa ri qʼequʼm, kbʼin pa ri qʼequʼm man retaʼm taj jawijeʼ kbʼe wi, rumal rech che kʼo qʼequʼm cho ri uwoqʼoch.

Kintzʼibʼaj chiwech ri ix, ix eʼalaj taq walkʼuwaʼl, rumal rech che xchup uwach ri imak rumal ri ubʼiʼ ri areʼ.

Kintzʼibʼaj chiwech ri ix, ix tatxel, rumal rech, che ri ix iwetaʼm uwach ri areʼ che xas are ri areʼ pa ri umajibʼal uloq. Kintzʼibʼaj chiwech ri ix, ix alabʼom ix alitomabʼ, rumal rech che xixchʼakan puwiʼ ri Itzel.

Ixnutzʼibʼam ri ix ix alaj taq akʼalabʼ, rumal rech, che ri ix iwetaʼm uwach ri tatxel. Ixnutzʼibʼam ri ix, ix tatxel, rumal rech, che ri ix iwetaʼm uwach ri Areʼ che si kʼo pa ri umajibʼal. Ixnutzʼibʼam ri ix, ix alabʼom ix alitomabʼ rumal rech che ri ix ix ko, e ri utzij ri Dyos kanajinaq iwukʼ ri ix e ri ix xichʼakan puwiʼ ri itzel.

Miloqʼoqʼej uwach ri uwachulew e ri jastaq uwach che kʼo chuwach ri areʼ, we kʼo jun winaq kuloqʼoqʼej uwach ri uwachulew ri loqʼoqʼebʼal ukʼuʼx ri Dyos man kʼo ta pa ri areʼ.

Rumal rech, che ronojel ri jastaq uwach kʼo pa ri uwachulew –ri bʼaqilal che kraj ri itzel ri woqʼochaj che kraj ri itzel e ri unimal ri qʼinomal– man petinaq taj rukʼ ri Tatxel, xane petinaq cho ri uwachulew.

Ri uwachulew, rukʼ taq ri urayibʼal kqʼax uwach; kʼatekʼut, jachin ri kukʼam ri urayibʼal ri Dyos ri areʼ, xas pa junalik kjeqiʼ riʼ.

Eʼalaj taq akʼalabʼ, petinaq ri kʼisbʼal kajbʼal ri ix, xito che kpetik jun Itzel Kristo kʼatekʼuriʼ, sibʼalaj ekʼi ri eʼitzel kristo epetinaq chik, kʼatekʼuriʼ, rukʼ weriʼ, ri uj qetaʼm che ujkʼo chi pa ri kʼisbʼal kajbʼal.

Ri eʼareʼ, xeʼel uloq chi pa ri eqatinamit kʼatekʼut, ri eʼareʼ man ekʼo ta qukʼ ri uj. Ri eʼareʼ, weta ekʼo qukʼ, ri eʼareʼ xekanaj na kʼuriʼ qukʼ ri uj kʼatekʼut, rajawaxik che jeriʼ kkʼulmatajik arech kqʼalajinik che man konojel taj ekʼo qukʼ.

Kʼatekʼuriʼ, ri ix xikʼam ri jiʼonsanik che petinaq rukʼ ri tyoxlaj ubʼantajik e iwonojel kʼo ri inoʼjibʼal.

Ix nutzʼibʼam man xa ta rumal rech che ri ix mata iwetaʼm ri saqalajtzij xane rumal rech che ri ix iwetaʼm ri saqalajtzij e rumal rech che man kʼo ta jun tzijtal kpe rukʼ ri saqalajtzij.

¿Jachin ri ajbʼanal tzij we man areʼ ri jun che kubʼij, che ri Jesus man are ta ri Kristo? ¡Ri jun riʼ are riʼ ri Itzel Kristo! che man retaʼm ta uwach ri Tatxel e ri Ukʼojolxel.

Ri jun che man retaʼm ta uwach ri Kʼojolxel xoqujeʼ man retaʼm ta uwach riʼ ri Tatxel. Ri jun che retaʼm uwach ri Kʼojolxel xoqujeʼ retaʼm uwach ri Tatxel.

Kʼatekʼuriʼ, chiwech ri ix, che xita ri jastaq uwach chi pa ri umajibʼal uloq chkanaj bʼaʼ kan iwukʼ ri ix. We kkanaj kan iwukʼ ri ix ri jastaq che xita pa ri umajibʼal, xoqujeʼ ri ix, kixkanaj kan riʼ pa ri Kʼojolxel e pa ri Tatxel.

Kʼatekʼuriʼ, are waʼ ri jastaq uwach che ri areʼ xubʼij che kuya na riʼ chiwech: ri junalikalaj kʼaslemal.

Xinwaj xintzʼibʼaj weriʼ chiwech pakiwiʼ ri eʼareʼ che kkaj kixkisubʼu ri ix.

Kʼatekʼuriʼ, chiwech ri ix, ri jiʼonsanik che xikʼam ri ix, chi rukʼ ri Areʼ kanajinaq kanoq iwukʼ ri ix e man rajawaxik ta chiwech che ri ix kʼo jun ajtijoxel chiwech. Kʼatekʼut, rumal rech che ri ujiʼonsanik ri areʼ kukʼut ronojel jastaq uwach chiwech, e weriʼ saqalajtzij e man tzijtal taj, jacha xukʼut ronojel jastaq uwach chiwach, chixjeqel bʼaʼ rukʼ ri areʼ.

Jeʼ nakʼut, ix alaj taq walkʼuwaʼl, kamik riʼ, chixkanajoq bʼaʼ rukʼ ri areʼ, arech, aretaq chiʼ, kuqʼalajisaj ribʼ ri areʼ; ri uj qas kkubʼiʼ ri qakʼuʼx e arech man kujkʼix taj rumal rech che naj uj kʼo wi chech ri areʼ pa ri Upetibʼal.

We ri ix, iwetaʼm che sukʼ ri Areʼ chikʼamaʼ bʼaʼ uqʼabʼ che ronojel ri winaq ri kubʼan ri sukʼil, alaxinaq uloq rukʼ ri Areʼ.

Chiwilampeʼ ri loqʼoqʼebʼal ukʼuʼx ri xuyaʼ ri Tatxel chqech arech ujralkʼuwaʼl ri Dyos kchaʼ chqech. ¡Kʼatekʼuriʼ, weriʼ xas qastzij wi! We ri uwachulew, man retaʼm ta qawach are rumal riʼ che man retaʼm ta uwach ri Areʼ.

Ixloqʼalaj, kamik riʼ, ri uj ujralkʼuwaʼl ri Dyos, kʼatekʼuriʼ, ri kujux na majaʼ kuqʼalajisaj ribʼ. Ri uj qetaʼm, che aretaq chiʼ kpetik ri uj, uj jeriʼ na riʼ jeʼ jas ri areʼ, rumal rech, che ri uj qas kqil na riʼ uwach ri areʼ qas jacha ri ubʼantajikʼ.

Ri jun che kreyeʼj ri areʼ ri areʼ kubʼan na riʼ che ribʼ jeʼ jas ri areʼ che qas sukʼ.

Ri jun che kmakunik xoqujeʼ kmakunik pa ri itzel, rumal rech che itzel ri makaj.

Kʼatekʼuriʼ, ri ix iwetaʼm che ri areʼ xuqʼalajisaj ribʼ arech kuchup uwach taq ri makaj e pa ri areʼ man kʼo ta jun makaj.

Ri jun che kkanaj rukʼ ri areʼ man kmakun taj. Ri jun che kmakunik man rilom ta ri areʼ e man uchʼobʼom ta uwach ri areʼ.

Ix eʼalaj taq walkʼuwaʼl mata kʼo jun winaq che kixukoj pa ri itzel bʼe. Ri jun che kubʼan ri sukʼil, ri areʼ sukʼ riʼ jeʼ jas ri Areʼ che sukʼ.

Ri jun che kmakunik petinaq uloq tza rukʼ ri Kʼaxtokʼ, rumal rech, che ri Kʼaxtokʼ kmakunik qas pa ri umajibʼal uloq. Ri ukʼojol ri Dyos xuqʼalajisaj ribʼ arech kuwilij ri uchak ri Kʼaxtokʼ.

Ri jun che alaxinaq qas rukʼ ri Dyos man kmakun taj, rumal rech che ri rijaʼlil kanajinaq rukʼ ri areʼ; man kkowin taj kmakunik rumal rech che alaxinaq qas rukʼ ri Dyos.

Pa weriʼ, ri ix iwetaʼm kiwach ri eralkʼuwaʼl ri Dyos e ri eralkʼuwaʼl ri Kʼaxtokʼ: ri jun che man kubʼan ta ri sukʼ man petinaq ta uloq rukʼ ri Dyos xoqujeʼ ri jun che man kuloqʼoqʼej ta ri rachalal.

Are kʼu waʼ ri tzij che xitaʼ ri ix qas pa ri umajibʼal uloq: rajawaxik che ri uj kqaloqʼoqʼej qibʼ,

e mqabʼano jeʼ jas xubʼan ri Kaʼin che ri areʼ xas rech ri itzel, xa jeriʼ kʼut xukamisaj ri rachalal. ¿Jas kʼu che xukamisaj ri areʼ? Rumal rech che itzel ri uchak kʼatekʼuriʼ ri uchak ri rachalal sukʼ.

Mixibʼij bʼaʼ iwibʼ ix eʼachalaxik, we ri uwachulew kraj ri itzel piwiʼ.

Ri uj qetaʼm, che ri uj, xujqʼax chi pa ri kamikal e xujqʼax pa ri kʼaslemal, rumal rech che keqaloqʼoqʼej ri eqachalal. Ri jun che man kʼo ta loqʼoqʼebʼal ukʼuʼx, kkanaj kan pa ri kamikal.

Ri jun che kraj ri itzel chrech ri rachalal, ri areʼ jun kamisanel riʼ; e ri ix iwetaʼm che jun kamisanel man kʼo ta ri junalik kʼaslemal pa ri areʼ.

Pa weriʼ, ri uj xqetaʼmaj jas ri loqʼoqʼebʼal kʼuʼx: che ri Areʼ xuya ri ukʼaslemal rech toqʼobʼisabʼal qawach ri uj. Xa jekʼuriʼ, rajawaxik che ri uj kqaya ri qakʼaslemal rech toqʼobʼisabʼal kiwach ri eʼachalaxik.

We kʼo jun che kʼo ri uqʼinomal rech we uwachulew riʼ, kʼatekʼut, kril ri rachalal che kʼo urajawaxik e kutzʼapij ri ranimaʼ chuwach, ¿la kkanaj kan riʼ ri loqʼoqʼebʼal ukʼuʼx ri Dyos pa ri areʼ?

Ix eʼalaj taq walkʼuwaʼl mujloqʼonik xaq rukʼ ri tzij on xaq rukʼ ri qachiʼ, xane chujloqʼon bʼaʼ rukʼ ri qachak e rukʼ ri saqalajtzij.

Kʼatekʼuriʼ, pa weriʼ waʼ, kqetaʼmaj wi che ri uj ujkʼo pa ri saqalajtzij, e utz riʼ ri qanimaʼ chuwach ri areʼ.

We ri qanimaʼ kkowinik kubʼan qʼatoj tzij paqawiʼ ri uj, rumal rech, che ri Dyos, are nimalaj ubʼantajik chuwach ri qanimaʼ e ri areʼ retaʼm ronojel ri jastaq uwach.

Ixloqʼalaj, we ri qanimaʼ, man kubʼan ta qʼatoj tzij paqawiʼ ri uj, uj utz chuwach ri Dyos:

kʼatekʼuriʼ, ronojel ri jastaq uwach che kqataʼ chrech, kqakʼam na riʼ weriʼ, tza rukʼ ri Areʼ, rumal rech che kqakʼol ri taq upixabʼ e kqabʼano chuwach ri areʼ jachike ri utz chuwach.

E are waʼ ri upixabʼ riʼ: chujkojon bʼaʼ che ri ubʼiʼ ri Ukʼojol Jesukristo e chqaloqʼoqʼej bʼaʼ qibʼ jeriʼ jachaʼ ri pixabʼ xuya chqech.

Kʼatekʼuriʼ, jachin kukʼol taq ri upixabʼ kkanaj rukʼ ri Dyos e ri Dyos kkanaj rukʼ ri areʼ, e rukʼ weriʼ, ri uj qetaʼm che kkanaj qukʼ ri uj rumal ri Uxlabʼxel che xuyaʼ ri areʼ chqech ri uj.

Ixloqʼalaj miterembʼej xaq ronojel winaq xane qas utz rilik chibʼanaʼ ri kuxlabʼal arech kiwilo we petinaq chi rukʼ ri Dyos rumal rech che ekʼi eʼitzel qʼaxel taq utzij ri Dyos epetinaq chi cho ri uwachulew

Pa weriʼ, ri ix kuyaʼo kiwetaʼmaj ri ruxlabʼal ri Dyos: ronojel uxlabʼal, che kubʼij che ri Jesukristo xpe pa ri bʼaqilal ri areʼ petinaq qas rukʼ ri Dyos;

e ronojel uxlabʼal che man kuya ta ubʼixik ri Jesus, ri areʼ man petinaq ta rukʼ ri Dyos; ri areʼ riʼ, are ruxlabʼal ri Itzel Kristo. Ri ix xito che ri areʼ kpe na riʼ; kʼatekʼuriʼ, kamik riʼ, ri areʼ kʼo chi chuwachulew.

Ri ix ix alaj taq walkʼuwaʼl, ri ix, ix kʼo rukʼ ri Dyos e xixchʼakan chkech ri eʼareʼ. Rumal rech che ri jun che kʼo iwukʼ ri ix ri areʼ, are nimalaj chi na chuwach ri jun che kʼo pa ri uwachulew.

Ri eʼareʼ erech ri uwachulew; rumal kʼuriʼ kkiyaʼ ubʼixik ri jastaq che rech ri uwachulew kʼatekʼuriʼ ri uwachulew kuta ri kitzij.

Ri uj, ujkʼo rukʼ ri Dyos. Jachin retaʼm uwach ri Dyos kutaʼ riʼ ri qastzij, jachin ri man kʼo ta rukʼ ri Dyos man kuta ta ri qastzij. Pa weriʼ, ri uj qetaʼmaj uwach ri uxlabʼal rech ri saqalajtzij e ri uxlabʼal rech ri tzijtal.

Ixloqʼalaj chqaloqʼoqʼej bʼaʼ chqabʼil taq qibʼ rumal rech, che loqʼoqʼebʼal ukʼuʼx ri Dyos e ri jun che kʼo ri loqʼoqʼebʼal ukʼuʼx xaʼlax uloq chi rukʼ ri Dyos, e retaʼm uwach ri Dyos.

Ri jun che man kʼo ta ri loqʼoqʼebʼal ukʼuʼx, man retaʼm ta uwach riʼ ri Dyos, rumal rech che ri Dyos, xas loqʼoqʼebʼal kʼuʼx wi ri areʼ.

Kʼatekʼuriʼ, pa weriʼ, xuqʼalajisaj ribʼ ri uloqʼoqʼebʼal ukʼuʼx ri Dyos chqech: che ri Dyos, xutaq uloq chuwachulew ri xa jun chi Ukʼojol arech ri uj kujkʼasleman pa ri areʼ.

Kʼatekʼuriʼ, are waʼ ri loqʼoqʼebʼal kʼuʼx. man are taj, che ri uj xujloqʼon chech ri Dyos, xane are ri areʼ che xujuloqʼoqʼej e xutaq uloq ri Ukʼojol jeʼ jas jun tabʼal toqʼobʼ chuwach ri qamak.

Ixloqʼalaj we jeriʼ ri qaloqʼaxik xubʼan ri Dyos, xoqujeʼ, rajawaxik che jeriʼ uloqʼaxik qibʼ ri uj.

Man kʼo ta jun winaq rilom uwach ri Dyos. We ri uj kqaloqʼoqʼej chbʼil qibʼ ri Dyos kkanaj qukʼ ri uj, xa jekʼuriʼ, tzʼaqat riʼ ri loqʼoqʼebʼal ukʼuʼx kʼo qukʼ ri uj.

Pa weriʼ, ri uj qetaʼm che ri uj uj kanajinaq rukʼ ri areʼ, e ri areʼ qukʼ ri uj: che xuya ri Ruxlabʼxel chqech.

Kʼatekʼuriʼ, ri uj qilom e kqaya ubʼixik che ri Tatxel xutaq uloq ri Ukʼojol jeʼ jas kolonel rech ri uwachulew.

Jachin ri kubʼij che ri Jesus, are Ukʼojol ri Dyos, kkanaj rukʼ ri areʼ e ri areʼ kkanaj rukʼ ri Dyos.

Kʼatekʼuriʼ, ri uj xqetaʼmaj che ri Dyos ujuloqʼoqʼem, e ri uj xujkojon chech weriʼ. Loqʼoqʼebʼal ukʼuʼx ri Dyos: ri jun che kkanaj pa ri loqʼoqʼebʼal kʼuʼx kkanaj rukʼ ri Dyos e ri Dyos rukʼ ri areʼ.

Kʼatekʼuriʼ, rukʼ weriʼ nimalaj xtzʼaqatik ri loqʼoqʼebʼal kʼuʼx qukʼ ri uj: che ri uj, kkojiʼ ri ukowil qanimaʼ pa ri uqʼij ri qʼatojtzij; rumal rech che jeriʼ jas ri Areʼ xoqujeʼ uj jeriʼ ri uj cho we uwachulew.

Man kʼo ta xibʼrikil pa ri loqʼoqʼebʼal kʼuʼx; xane ri tzʼaqatalaj loqʼoqʼebʼal kʼuʼx kresaj ri xibʼrikil, rumal rech che ri xibʼrikil are kril ri kʼax e ri jun che kuxeʼj ribʼ man opaninaq ta pa ri tzʼaqatalaj loqʼoqʼebʼal kʼuʼx.

Ri uj xujloqʼoqʼen bʼaʼ rumal rech, che are nabʼe xujuloqʼoqʼej ri areʼ:

We kʼo jun winaq kubʼij: «Ri in kinloqʼoqʼej ri Dyos», kʼatekʼuriʼ, kraj ri itzel chrech ri rachalal, ri areʼ jun winaq ajbʼanaltzij riʼ; rumal rech, ri jun che man kuloqʼoqʼej ta ri rachalal che kril uwach man kkowin taj kuloqʼoqʼej ri Dyos che man loqʼ taj kril uwach.

Jeʼ nakʼut, qakʼamom ri jun Pixabʼ riʼ chi rukʼ ri Areʼ: jachin kuloqʼoqʼej ri Dyos, xoqujeʼ kuloqʼoqʼej ri rachalal.

Ri jun che kkojonik che ri Jesus are ri Kristo, alaxinaq uloq riʼ xas rukʼ ri Dyos e jachin kuloqʼoqʼej uwach ri xalkʼuwaʼlanik ri Areʼ, xoqujeʼ kuloqʼoqʼej uwach riʼ ri jun che xaʼlax rukʼ ri Areʼ.

Ri uj, pa weriʼ qetaʼmaj wi che keqaloqʼoqʼej ri eralkʼuwaʼl ri Dyos we kqaloqʼoqʼej ri Dyos e we ri uj kqabʼan taq ri upixabʼ.

Rumal rech che are waʼ ri loqʼoqʼebʼal kʼuʼx chrech ri Dyos: che kqakʼol ubʼanik ri upixabʼ. E ri jetaq upixabʼ man jun eqaʼn ta chqech uj,

rumal rech, che ronojel ri alaxinaq uloq tza rukʼ ri Dyos kchʼakan puwiʼ ri uwachulew. E ri xchʼakanik puwiʼ ri uwachulew areʼ ri qakojonik.

¿Jachin kʼut kchʼakan puwiʼ ri uwachulew: we mam are ri kukojo che ri Jesus areʼ Ukʼojol ri Dyos?

Are ri areʼ, ri xpetik rumal ri jaʼ e rumal ri kikʼel: ri Jesukristo; man xuwi ta xpetik rukʼ ri jaʼ, xane xpetik rukʼ ri jaʼ e ri kikʼel. Kʼatekʼut are ri Uxlabʼaxel kuya ubʼixik ri tzij puwiʼ ri saqalajtzij rumal rech che are ri uxlabʼaxel ri saqalajtzij.

Kʼatekʼuriʼ, eʼoxibʼ ri keyaʼow ubʼixik ri tzij puwiʼ ri saqalajtzij:

Ri Uxlabʼaxel, ri jaʼ e ri kikʼel, e junam ubʼixik, kkibʼij chi eʼoxibʼ.

We ri uj kqakʼam ri kitzij ri winaq, are nimalaj ubʼantajik chi na ri utzij ri Dyos. Rumal rech, che are waʼ ri utzij ri Dyos che uyaʼom ubʼixik puwiʼ ri Ukʼojol.

Ri jun che kkojon chrech ri Ukʼojol ri Dyos xas kʼo wi ri tzij rukʼ ri areʼ. Ri jun che man kkojon ta chrech ri Dyos kubʼan ajbʼanaltzij chrech ri Dyos, rumal rech che man kkojon ta chrech ri utzij che ri utzij ri uyaʼom ubʼixik ri Dyos puwiʼ ri Ukʼojol.

Are kʼu waʼ we uyaʼom ubʼixik riʼ: ri Dyos uyaʼom chqech ri junalikalaj kʼaslemal e we kʼaslemal riʼ kʼolik rukʼ ri Ukʼojol.

Ri jun che kʼo ri Kʼojolxel rukʼ, kkʼojiʼ ri kʼaslemal rukʼ; ri jun che man kʼo ta ri Kʼojolxel rukʼ man kʼo ta riʼ ri kʼaslemal rukʼ.

Ri in xintzʼibʼaj weriʼ chiwech chiwech ri ix che kixkojon chrech ri ubʼiʼ ri Ukʼojol ri Dyos, arech ri ix iwetaʼm che ri ix kʼo ri junalik ikʼaslemal.

Pa weriʼ kʼo wi ri kubʼisibʼal qakʼuʼx chrech ri Areʼ: che ri uj, we kʼo jun kqataʼ chrech jeʼ jas ri kraj ri areʼ ri areʼ kuta ri qatzij.

Kʼatekʼut, we ri uj, qetaʼm che ri areʼ kuta ri qatzij pa ronojel ri jastaq uwach che kqataʼ chrech, ri uj qetaʼm che kyaʼtaj na riʼ chqech ri xqata chrech ri Areʼ.

We kʼo jun winaq krilo jun rachalal che kmakunik kʼatekʼut, man krukʼaj ta ubʼi pa ri kamikal, chchʼaw bʼaʼ rukʼ ri Dyos e ri Dyos kuyaʼ na riʼ ri kʼaslemal chrech ri rachalal. Man utz ta riʼ kbʼan chʼawem pakiwiʼ ri eʼareʼ che kemakunik e makaj keʼukʼam bʼi pa ri kamikal; rumal rech che kʼo jun makaj che kkʼaman ubʼik pa ri kamikal, puwiʼ we makaj riʼ, man kinbʼij taj che rajawaxik kbʼan chʼawem rukʼ ri Dyos.

Ronojel itzel, chi makaj riʼ kʼatekʼut, kʼo makaj che man krukʼaj ta ubʼi jun pa ri kamikal.

Ri uj qetaʼm, ri jun che Xaʼlkʼuwaʼlaxik chi rukʼ ri Dyos man kmakun taj. Ri jun che xaʼlkʼuwaʼlaxik rumal ri Dyos, kukʼol riʼ ri Areʼ e ri itzel man kʼo ta ukowinen puwiʼ ri areʼ.

Ri uj qetaʼm, che ri uj xas uj rech ri Dyos e ronojel ri uwachulew kʼo chuxeʼ ri ukʼowinem ri itzel.

Ri uj qetaʼm che ri Ukʼojol ri Dyos xpetik, e xuya ri nojibʼal chqech arech ri uj qetaʼmaj uwach ri jun che Saqalaj Tzij. Ri uj, uj kʼo pa ri jun che Saqalaj Tzij pa ri ukʼojol che are ri Jesuskristo. ¡Are areʼ ri qas Dyos e ri junalikalaj kʼaslemal!

¡Ix alaj taq walkʼuwaʼl, chikʼolo bʼaʼ iwibʼ chuwach ri eʼesal uwach dyos!