Ri Simeʼon Pedro, ajpataninel e apostol rech ri Jesus Kristo, chkech ri eʼareʼ che rumal ri usukʼil ri Qadyos e Qakolonel Jesus Kristo, xkikʼam jun jeʼlik e nimalaj ubʼantajik kojonik jeʼ jas ri qakojonik ri uj,

chiwech ri ix, ri nimalaj sipanik e ri nimalaj utzil, aretaq chiʼ xiwetaʼmaj uwach ri Qajawxel.

Rumal rech ri uchuqʼabʼ ri Dyos, xyaʼtaj chqech ronojel jas uwach che rech ri kʼaslemal e che rech ri kʼaslemanik rukʼ ri Dyos, xubʼan chqech, arech ri uj qetaʼmaj uwach ri Areʼ; xujusikʼij rumal ri uqʼijil e rumal utzalaj ukʼaslemal.

Rumal kʼu weriʼ, xyaʼtaj chqech ri qʼinomal e ri nimalaj taq chiʼnik, arech ri ix, kixok pa ri ukʼaslemal ri Dyos aretaq chiʼ chixbʼoqtajik chuwach ri kkʼis uwach che kʼo pa we uwachulew rumal ri itzel rayibʼal.

Rumal kʼu waʼ weriʼ, chuwach weriʼ, xoqujeʼ chikojoʼ bʼaʼ ronojel ichuqʼabʼ, arech rukʼ ri ikojonik kkʼojiʼ utzalaj ikʼaslemal, e rukʼ ri utzalaj ikʼaslemal kkʼojiʼ ri inoʼjibʼal,

rukʼ ri inoʼjibʼal kkʼojiʼ ri tzʼaqat uqʼilik iwibʼ, rukʼ ri tzʼaqat uqʼilinik iwibʼ kkʼojiʼ ri ichuqʼabʼ, rukʼ ri ichuqʼabʼ kkʼojiʼ ri ikʼaslemanik rukʼ ri Dyos.

Rukʼ ri ikʼaslemanik rukʼ Dyos kkʼojiʼ ri loqʼoqʼebʼal ikʼuʼx chkech ri achalaxik; rukʼ ri loqʼoqʼebʼal ikʼuʼx chkech ri achalaxik kkʼojiʼ ri toqʼobʼisabʼal wach iwukʼ.

Rumal rech, we sibʼalaj kʼo weriʼ iwukʼ; weriʼ kubʼano chiwech che ri ix man yaʼtal taj che mata kʼo ichak, e man yaʼtal taj che mata kiwetaʼmaj uwach ri Qajawxel Jesus Kristo.

Jachin man kʼo ta weriʼ rukʼ, ri areʼ xas moy wi riʼ, e ri uwoqʼochʼ chi man utz ta wi riʼ; man knaʼtaj ta riʼ chrech che xsach uwach ri umak.

Chuwach nakʼut weriʼ, ri ix, ix achalaxik, chikojoʼ bʼa ichuqʼabʼ pa ri ikʼaslemal e pa ri ixsikʼital wi. We ri ix, jeriʼ kibʼano, xas man kixtzaq ta wi riʼ.

Kʼatekʼuriʼ, rukʼ weriʼ, ri ix kixok na riʼ pa ri Junalik Rajawibʼal ri Qajawxel e Qakolonel Jesus Kristo.

Rumal kʼuwaʼ weriʼ, ri in, amaqʼel kinyaʼ ubʼixik waʼ chiwech ronojel qʼij we jastaq riʼ, kneʼbʼaʼ, ri ix iwetaʼm chik e kʼo chi ri ichuqʼabʼ pa ri saqalajtzij.

Kinchomaj in, che utz waʼ che ri in kinnaʼtisaj chiwech aretaq chiʼ ri in, in kʼo pa we jun kabʼal riʼ, arech qas ixkʼaslik rumal we nutzij.

Kʼatekʼuriʼ, ri in, wetaʼm, che xas man naj ta chi waʼ kʼo wi, che ri in kinel ubʼi waʼ pa we nukabʼal riʼ, rumal rech che jeriʼ xuqʼalajisaj ri Ajawxel Jesus Kristo chwech.

Kʼatekʼut, ri in kinok il waʼ, arech, aretaq chiʼ ri in xinelitaj ubʼi iwukʼ; ri ix, chi pa ronojel mul, kinaʼtisaj we jastaq riʼ.

Ri uj man kʼo ta xaq apas uwach tzij xqaterembʼej, aretaq chiʼ xqabʼano che ri ix kiwetaʼmaj ri Uchuqʼabʼ e ri Upetbʼal ri Qajawxel Jesus Kristo; xane aretaq chiʼ xilitaj qumal ri uj ri Nimalaj Ubʼantajik.

Rumal rech, che ri Areʼ, xukʼamo chi rukʼ ri Dyos Tatxel, ri Utzil e ri uqʼijil, aretaq chiʼ ri Nimalaj Qʼijil, rukʼ ri ubʼantajik xuyaʼ ubʼixik chrech areʼ we tzij riʼ: «Are areʼ ri nukʼojol, ri nuloqʼ, si areʼ sibʼalaj utz chnuwach».

We chʼabʼal riʼ, che petinaq uloq pa ri kaj chi uj wi xujtowik, aretaq chiʼ uj kʼo rukʼ ri Areʼ puwiʼ ri Tyoxlaj Juyubʼ.

Xa jekʼuriʼ, rukʼ weriʼ, xas kʼo wi ri uchuqʼabʼ ri kitzij ri eqʼaxel taq utzij ri Dyos, e sibʼalaj utz, che ri ix kibʼan chrech we tzij riʼ, jeʼ jas jun chajbʼal pa ri qʼequʼm si kʼateʼ na kwaʼlaj ri chʼimil rech aqʼabʼil pa ri iwanimaʼ.

Kʼatekʼuriʼ, xas are utz che nabʼe kiwetaʼmaj weriʼ: man kʼo ta jun tzij kech ri eqʼaxel taq utzij Dyos che tzʼibʼatalik, kuyaʼo che jun winaq xaq pa rech wi kuchʼobʼo;

rumal che man kʼo ta jun tzij riʼ xpetik xaq rumal urayibʼal jun winaq, xane are ri Tyoxlaj Uxlabʼxel eʼuchʼikmim ejujun taq winaq arech kkibʼij jujun taq tzij che petinaq chi rukʼ wi ri Dyos.

Ojer tzij kanoq, ekʼo eʼitzelalaj taq eqʼaxal utzij ri Dyos chkixoʼl ri winaq; xoqujeʼ kepe na riʼ chixoʼl ri ix ejujun eʼitzel taq ajtijabʼ che kkibʼan na riʼ ejujun eʼitzel taq juqʼat chik, che man je taj kecha riʼ chrech ri Ajtij ri xixloqʼowik ri ix; e si chanim riʼ kpe na riʼ kʼax pakiwiʼ.

Ekʼi riʼ, ri kebʼe na rukʼ ri itzel kikʼaslemal; e kumal ri eʼareʼ sibʼalaj kyoqʼ na riʼ ri ubʼe ri saqalajtzij.

Rumal ri uloqʼoqʼebʼal kikʼuʼx chrech ri pwaq, e rukʼ unukʼik jujun itzel taq tzij, sibʼalaj kkichʼak na pwaq riʼ iwukʼ ri ix; kʼatekʼuriʼ, ri qʼatbʼal tzij pakiwiʼ man uxlaninaq taj e ri utzaqik kikʼaslemal man warinaq taj.

Rumal rech, ri Dyos man xeʼuyaʼ ta kanoq chilaʼ ri Eʼanjelibʼ che xemakunik, xane xeʼukʼyaq ubʼi pa ri qʼequʼmalaj siwan rech ri Tartaro, jawiʼ kekanaj kanoq chi kʼa pa ri uqʼij ri Qʼatbʼal Tzij.

We man xeʼuya ta kan chilaʼ ri ojer uwachulew, puneʼtaneʼ xeʼukol wajxaqibʼ winaq e jun chkixoʼl ri Noʼe, ri areʼ che jun winaq rech sukʼil; aretaq chiʼ xupetisaj ri nimalaj qʼalaj pakiwiʼ ri itzelalaj uwachulew;

we ri areʼ, xukʼis tzij pakiwiʼ e xuchajarisaj kiwach ri tinimit Sodoma e Gomorra, arech jun kʼamabʼal noʼj chkiwach ri jachintaq kepe na riʼ chweq kabʼij e che man kekojon taj;

we ri areʼ, xutoʼtajisaj uwach ri Lot, che sukʼ winaq; e che kʼax ubʼanom rumal ri itzel kikʼaslemal ri ekamisanel

–xa jekʼuriʼ, rumal rech we sukʼ winaq riʼ, che kʼo ri rachoch chkixoʼl ri eʼareʼ, ri areʼ, ronojel taq qʼij kʼax chech ri ruxlabʼal rumal rech che krilo e kuto ri itzel taq jastaq che kkibʼan eʼareʼ–.

Waʼ weriʼ, kubʼij, che ri Ajawxel, kkowinik, keʼutoʼ pa ri kʼax ri winaq che eʼutz pa ri kikojonik, e kkowinik keʼukʼol ri winaq che man kekojon taj arech ri Areʼ kubʼan kʼax chkech chi pa ri uqʼij ri qʼatbʼaltzij,

eʼare keʼunabʼisaj ri kebʼin chrij ri itzel taq rayibʼal rech ri bʼaqilal e ri kketzelaj uwach ronojel ri ujastaq ri Ajaw.

kʼatekʼuriʼ, ri eʼanjelibʼ che are kʼo kichuqʼabʼ e kikowinem chkiwach, aretaq chiʼ ekʼo chkiwach ri eʼareʼ, man kʼo ta jun qʼatojtzij kkiyaʼ ubʼixik pakiwiʼ ri eʼareʼ chuwach ri Ajawxel.

Kʼatekʼut, ri eʼareʼ, ejeriʼ jas ri awaj che man kichoman taj, rumal ri kibʼantajik, chi erech ketzaq na riʼ e chi kisach na wi; chi keyoqʼon chech jun jas uwach che man ketam ta ucholaj; jeʼ jas ri kʼax kech awaj, jeriʼ na ri kʼax kkiriq na eʼareʼ.

Ri eʼareʼ kkikʼaxkʼolij na riʼ ri man sukʼ taj, rumal rech chi man sukʼ taj xkibʼano. Ri eʼareʼ nimalaj utzil kkilo ri itzelalaj kʼaslemal kkiriq pa jun chi qʼij; ewinaq che xoqʼolitajinaq kij, eʼaqil pa ri itzelalaj kikʼaslemal e kkaj che kibʼan itzel ri ix, aretaq chiʼ kkibʼan jun jeʼlikalaj waʼim iwukʼ ri ix.

Nojinaq ri kiwoqʼoch che ri makunik rukʼ achi ixoq e sibʼalaj kkirayij we makaj riʼ, kkibʼan joʼs taq jas uwach e kekowin che kichʼakik ri etuqaʼr taq uxbʼal; chi are ri pwaq bʼenaq kikʼuʼx rukʼ, ri eʼareʼ ekyaqsaq kibʼantajik.

Aretaq chiʼ xkikʼyaq kan ri utzalaj bʼe, xkisach ubʼi kibʼ pa ri ubʼe ri Bʼalaʼam, ri areʼ che ukʼojol ri Bʼosor, che xas xuloqʼoqʼej ri man sukʼil taj.

Kʼatekʼuriʼ, ri areʼ xas xyajyatex wi rumal ri itzelalaj uchak. Ri areʼ jun awaj che man kʼo ta uchʼabʼal, jun awaj che rukʼ uchʼabʼal winaq xuqʼatej ri kʼax uchʼabʼexik ajqʼaxel utzij ri Dyos.

Ri eʼareʼ, echaqiʼj taq ukʼiybʼal jaʼ; esutzʼ che keʼujurej ubʼi nimalaj taq kyaqiqʼ; chkech eʼareʼ kʼolom apanoq ri nimalaj qʼequʼm.

Kkitzijoj nikʼaj taq tzij che man utz taj, rukʼ raqoj chiʼaj; rukʼ jas taq tzij, kkaj kekichʼak ri winaq pa ri urayibʼal bʼaqilal e pa ri itzel kʼaslemal, e ri winaq riʼ eʼare ri kʼateʼ xekiyaʼ kan ri winaq che xas ekʼo pa ri itzel kʼaslemal.

Ri eʼareʼ, kkichiʼj chkech we winaq riʼ ri tzoqopinem, kʼatekʼuriʼ, ri eʼareʼ ejatʼil pa ri man utz taj, rumal rech, che jun winaq, jatʼilik kkanaj kanoq rukʼ ri jas uwach che kchʼakan puwiʼ ri ukʼaslemal.

Rumal rech, we xeʼanimaj na chuwach ri itzel rech we uwachulew, aretaq chiʼ xkichʼobʼ uwach ri unoʼjibʼal ri Ajawxel e Kolonel Jesus Kristo, kʼatekʼuriʼ, kebʼe chi jumul pa ri itzel e keʼuchʼak chi ri itzel; ri ukamul kikʼaslemal riʼ, sibʼalaj itzel chi na riʼ chuwach ri nabʼe kikʼaslemal.

Are utz riʼ chkech, weta mata xketaʼmaj uwach ri ubʼe ri sukʼil; xketaʼmaj na, kʼatekʼuriʼ, kkiyaʼ chi kan jumul ri Pixabʼ che xkikʼamo.

Kukʼ ri eʼareʼ riʼ xbʼantaj ri noʼjibʼaltzij che kubʼij jeriʼ: «Ri tzʼiʼ ktzalij chech utijik ri uxabʼ».

«E ri jun atiʼt aqʼ che xchʼajtaj rij, kubʼalkaʼt la chi ribʼ pa ri xoqʼoʼl».

Loqʼlaj taq achalaxik, are waʼ ri ukabʼ tzʼibʼanik che kintzʼibʼaj chiwech; pa we kebʼ tzʼibʼanik riʼ, ri kinnaʼtaj chiwech, kwaj kinkʼasuj chiwech ri ix ri utzalaj noʼjbʼal.

Chinaʼtaj bʼaʼ ri jastaq uwach che ojer kanoq xkiyaʼ ubʼixik chiwech ri etyoxlaj taq qʼaxal utzij ri Dyos e ri kipixabʼ ri ewapostolos, che xas are upixabʼ ri Ajawxel e Kolonel.

Nabʼe are chiwetaʼmaj che pa ri kʼisbʼal taq qʼij rech we uwachulew, kepe pa ejujun riʼ che kketzʼebʼej uwach riʼ ri winaq e che are kkiterembʼej riʼ ri kirayibʼal.

Ri eʼareʼ, kkibʼij na riʼ: «Jawiʼ kʼo wiʼ ri Upetbʼal che uchiʼm. Xane chi pa ri kikamikal uloq ri Eqatat, ronojel jas uwach, jeriʼ kanajinaq kanoq jas pa ri umajibʼal uloq ri uwachulew».

Ri eʼareʼ, man kkaj taj ketaʼmaj che ojer kanoq kʼo jun chik kaj e jun chik uwachulew, che xas pa ri unikʼyajal e chi rumal ri jaʼ, xel uloq rukʼ ri Utzij ri Dyos,

e xoqujeʼ rumal weriʼ, ri jun uwachulew xsach uwach pa ri jun qʼalaj.

Kʼatekʼuriʼ, ri kaj e ri uwachulew kʼo kamik riʼ, chi rumal ri Tzij riʼ, xtoʼ kan uwach e kʼolom kanoq chech ri qʼaqʼ chi pa ri uqʼij ri qʼatojtzij e pa ri kʼisbʼaltzij pakiwiʼ ri eʼitzel taq winaq.

Kʼatekʼuriʼ; ix loqʼlaj taq achalaxik, jun jas uwach che xas rajawaxik wi kiwetaʼmaj ri ix: chuwach ri Ajawxel, jun qʼij jeʼ jas mil junabʼ, e mil junabʼ jeʼ jas jun qʼij.

Ri Ajawaxel man kbʼeyitaj ta che uyaʼik ri jastaq che ubʼim, jeʼ jas ubʼixik kkibʼij ejujun, che ri Areʼ kbʼiytajik; xane ri areʼ kʼo ukochʼonik qukʼ, kraj che mata kʼo jun kusach ribʼ; xane are kraj che konojel kkikʼex na kibʼ chuwach ri utzil.

Ri uqʼij ri Ajawxel, kpe na riʼ jeʼ jas jun elaqʼom; pa we jun qʼij riʼ, ri kaj nimalaj kjanin riʼ e ksach uwach riʼ; ri jastaq che kjuluw pa ri qʼaqʼ kjaʼr uwach riʼ; ri uwachulew e ronojel ri jastaq uwach kʼo chuwach, xas kkʼat ubʼik riʼ.

Ronojel waʼ we jastaq riʼ, xas ksach wi uwach waʼ; rukʼ weriʼ, ri ix, rajawaxik che kʼo jun tyoxlaj ikʼaslemal e kkʼojiʼ ri ichʼawem rukʼ ri Dyos,

kiweyeʼj e kikowixtaj ri upetbʼal ri Uqʼijil ri Dyos, aretaq kbʼantaj weriʼ, ri kaj kjanin riʼ pa ri qʼaqʼ e ksach uwach riʼ, e ri jastaq che kjuluw pa ri qʼaqʼ, kjaʼr na uwach riʼ.

Kʼatekʼut, ri uj, qeyeʼm jun kʼakʼ kaj e jun kʼakʼ uwach ulew jawiʼ kjeqiʼ wi riʼ ri sukʼil, jeʼ jas ubʼim ri uchiʼnik ri Dyos.

Rukʼ weriʼ, ixloqʼaj, aretaq chiʼ tajin kiweyeʼj weriʼ; chikojoʼ bʼaʼ ronojel ichuqʼabʼ, arech ri ix, man ixxoqʼolitajinaq taj e man kʼo ta jun itzel pa ri ikʼaslemal xane kixiriqitajoq pa ri jaʼmaril.

Ri ukochʼonik ri Ajawxel, chiwilaʼ bʼaʼ jeʼ jas kolotajem, jeʼ jas xutzʼibʼaj ri loqʼalaj achalaxik Pabʼlo chiwech; xtzʼibʼan chiwech pa ri noʼjibʼal che xyaʼtaj chech.

Xoqujeʼ, kutzʼibʼaj weriʼ pa ronojel tzʼibʼanik kubʼano, jawiʼ kubʼij wi jun tzij puwiʼ we jastaq riʼ. Kʼo jujun taq jastaq pa we utzibʼanik che xas kʼax uchʼobʼik, che qʼeqʼuʼm uwach kkanaj jun rukʼ; e ri winaq che ma kʼo ta unoʼjibʼal e uchuqʼabʼ xas kujal ri ucholajil –e xoqujeʼ jewaʼ kkibʼan rukʼ nikʼaj chik che Tzʼibʼatalik– e rukʼ weriʼ, ri eʼareʼ kisach kibʼ.

Kʼatekʼuriʼ, ixloqʼlaj, ri ix che iwetaʼm chi weriʼ, chichajij bʼaʼ iwibʼ; chixibʼij bʼaʼ iwibʼ, weneʼ rukʼ jun itzel rayibʼal, ri ix ki- tzaq ri ichuqʼabʼ.

¡Chixkʼiy bʼaʼ pa ri nimalaj sipanik e pa ri unoʼj ri Qajawxel e Qakolonel Jesus Kristo! ¡Chech bʼaʼ ri Areʼ ri qʼijil kʼamik riʼ chi kʼa pa ri uqʼij ri junalik! ¡Amen!