Ri Santiʼago, ajpataninel chech ri Dyos e chech ri Ajawxel Jesus Kristo, kuyaʼ jun rutzil kiwach ri ekabʼlajuj juqʼat che kijabʼum kibʼ chi naj wi.

Sibʼalaj chixkiʼkot bʼaʼ, ix achalaxik, aretaq chiʼ ri ix kiriq ronojel uwach kʼax.

Ri ix iwetaʼm: rukʼ waʼ we kʼax riʼ, ri ikojonik kkʼojiʼ uchuqʼabʼ;

kʼatekʼut, rukʼ ri uchuqʼabʼ ri ikojonik riʼ, qas chibʼanaʼ ri utzalaj jastaq uwach, arech ri ix, ix utz e ix sukʼlaj taq winaq, e jeriʼ, ri ix, man kʼo ta jun jas uwach riʼ kilitajik che kraj na chiwech.

We jun chiwech ri ix, man kʼo ta unoʼj, ri jun riʼ, chutaʼ bʼaʼ weriʼ chech ri Dyos –ri areʼ, sibʼalaj kuyaʼo e man kʼo ta kuchʼaʼo– e ri Dyos kuyaʼ na riʼ chrech.

Kʼatekʼut, rajawaxik, che ri areʼ, kuto si rukʼ ronojel ukojonik man xaq ta rukʼ kebʼ ukʼuʼx, rumal rech che ri jun che kubʼan kebʼ ukʼuʼx, junam riʼ rukʼ ri uqʼet ri polow che kuwaʼlisaj ri kyaqiqʼ e kyakyatik jewaʼ jeriʼ.

Muchomaj jun achi che jeriʼ, che kʼo na kyaʼtaj chech rumal ri Ajawxel.

We jun winaq riʼ, kʼo jun paqʼtajinaq ruxlabʼal e man kʼo ta uchuqʼabʼ pa taq ronojel ubʼe.

Ri winaq che mebʼaʼ kʼo nimalaj uqʼijil riʼ, rumal rech, che ri areʼ xas kyak na riʼ,

e ri qʼinom winaq, ri areʼ, are uqʼijil riʼ ri kqasax na riʼ, rumal rech che ri areʼ, ksachtaj na uwach riʼ jeriʼ jas jun ukotzʼijal qʼayes.

Ri qʼij, kel uloq rukʼ ri uqʼaqʼal, kuchaqiʼjarisaj ri qʼayes e ktzaq ubʼi riʼ ri ukotzʼiʼjal; ri jeʼlikalaj ukaʼyibʼal ksach uwach riʼ; jeriʼ nakʼu riʼ, ri qʼinom winaq, kusach uwach ribʼ riʼ pa taq ri ubʼe.

Utz rech riʼ ri winaq che kuchʼij ri kʼax; aretaq chiʼ, ketaʼmaxik uwach areʼ che utz, ri areʼ, kjach na riʼ chech ri ketakik rech ujolom che are ri kʼaslemal; ri uchiʼm ri Ajawxel chkech konojel ri kkiloqʼoqʼej ri Areʼ.

Jun winaq che kkajmaxik rumal ri makaj, mubʼij bʼaʼ: «Are ri Dyos kinukajmaj». Rumal rech che, ri Dyos, man kkajmax taj rumal ri itzel e xoqujeʼ man kʼo ta jun kukajmaj areʼ.

Kʼatekʼut, ronojel winaq kkajmax uwach rumal ri urayibʼal che krokisaj ri areʼ pa ri itzel.

Aretaq chiʼ ri rayibʼal xbʼantaj ri uchak: ri areʼ kril na uwach ri makaj; kʼatekʼuriʼ aretaq chiʼ ri makaj xbʼantaj ri uchak, kril na riʼ uwach ri kamikal.

Misach bʼaʼ, ixloqʼalaj taq wachalal:

ronojel utzalaj sipanik e ronojel sukʼilalaj jas uwach, xas petinaq uloq pa ri kaj, kqaj uloq tza rukʼ ri Utatxel ri kaj, ri areʼ che man kkʼextajik taj, ri areʼ che man kʼo ta kjalataj uwach rukʼ.

Ri areʼ xraj xujralkʼuwaʼlaj ri uj rumal ri Tzij che saqalajtzij, arech, uj ri uj nabʼe taq winaq chkech ri eʼuwinaq ri areʼ.

Qas chiwetaʼmaj bʼaʼ weriʼ, ixloqʼalaj taq wachalal: Chi ronojel winaq bʼaʼ, qas aninaq chutatabʼej ri tzij e man aninaq ta bʼaʼ kachʼawik, e man aninaq ta bʼa kpe ri royowal,

rumal rech, che ri royowal ri winaq man are ta kbʼanow utz chech usukʼil ri Dyos.

Chipaqchiʼj bʼaʼ, ronojel itzel jas uwach, ronojel itzel chomanik, e utz ukʼulaxik chibʼanaʼ bʼaʼ ri Tzij che xokisax pa ri iwanimaʼ ri ix, e che kkowinik kukol ri iwuxlabʼal.

Qas chibʼanaʼ bʼaʼ, ri jastaq ri kubʼij ri Tzij. ¡Mibʼan bʼaʼ jeriʼ jeʼ jas ri enikʼaj che kkita ri tzij e are kkichomaj chi apan ri jastaq che man utz ta chkech!

Ri jun che kuta ri Tzij e man kubʼan taj, ri areʼ riʼ, jeriʼ jacha jun winaq che kril ri uwach pa jun lemoʼ.

Ri areʼ, kril ribʼ, kʼatekʼut, kbʼe uwiʼ rukʼ e man knaʼtaj ta chik chrech ri qas kkaʼy ri areʼ.

Kʼatekʼuriʼ, ri jun, che utz kril ri Pixabʼ, are ajchaqʼeʼ riʼ ri tzoqopitajem e utz uchapik kubʼano, man jeriʼ ta riʼ jacha ri jun winaq che man kkanaj ta kan ri tzij chrech, xane utz ubʼanik riʼ kubʼan ri Tzij, e ri areʼ riʼ, nimalaj ukiʼkotemal riʼ aretaq chiʼ kubʼano.

We kʼo jun winaq kuchomaj, che ri areʼ utzalaj pa ri Komon Tyox, kʼatekʼuriʼ, man tzʼapital ta ri uchiʼ e kebʼ ukʼuʼx kubʼano; xas man utz ta riʼ ri ukojbʼal.

Ri saqililaj kojbʼal e chʼajchʼoj chuwach ri Dyos Qatatxel, are weriʼ: are ri kisoloxik ri akʼalabʼ che man kʼo ta kinan kitat, ri kisolik ri emalkaʼnibʼ chuchuʼibʼ aretaq chiʼ ekʼo pa nimalaj kʼax; kʼatekʼuriʼ, ri uchajixik ibʼ chuwach ri eʼitzel taq winaq che erech we uwachulew.

Ix wachalal; man are ta kiwil ri uwach ri winaq che kʼo pa ri ikojonik chrij ri Ajawxel Jesus Kristo che nimalaj uqʼijil.

Chichomaj neʼ, che kok ubʼi pa ri Ikomon Tyox, jun achi che ukojom jun qʼanalaj pwaq umulqʼabʼ, kʼo jun utzalaj ratzʼyaq; xoqujeʼ, kok ubʼi sin mebʼaʼ rukʼ jun tzʼililaj ratzʼyaq.

Ri ix, are kiwil ri jun che kʼo ri utzalaj ratzʼyaq e kibʼij chrech: «Ri at, chattʼuyul waral riʼ, pa ri ukʼolibʼal ri nim uqʼijil». Kʼatekʼuriʼ, chrech ri mebʼaʼ, ri ix kibʼij chech: «Ri at, at takʼalik chatkanaj kanoq», on kibʼij chrech: «Chattʼuytul bʼaʼ cho ri utem ri waqan».

¿La man kitas ta kiwach ri winaq chixoʼl ri ix riʼ, e ri jun iqʼatbʼaltzij kibʼano riʼ, la man jun itzelalaj chomanik ta kʼut?

Chitatbʼej bʼaʼ weriʼ, ixloqʼalaj taq wachalal: ¿La man xeʼuchaʼ ta ri Dyos ri emebʼaʼibʼ waral chuwachulew, che eqʼinomabʼ pa ri kikojonik e che kkechebʼej na riʼ ri Rajawibʼal, jeriʼ jas xubʼij chkech, ri eʼareʼ che keʼuloqʼoqʼej?

¡Kʼatekʼut, ¡ri ix, are kiwetzelaj uwach ri mebʼaʼ! ¿La man eʼare ta ri eqʼinomabʼ kibʼanow kʼax chiwech? ¿La man eʼare ta ri eʼareʼ kixkikʼam ubʼik chuwach ri qʼatbʼaltzij?

¿La man eʼare ta ri eʼareʼ ri kibʼin ri itzel taq tzij puwiʼ ri Utzalaj Bʼiʼaj che xbʼij piwiʼ ri ix?

We ri At, utz ubʼanik kabʼan ri Nim Pixabʼ, jeriʼ jacha kubʼij ri Tzij: «Chaloqʼoqʼej ri awachalal, jeriʼ jas uloqʼexik awibʼ». At, utz na kʼuriʼ ri kabʼano;

kʼatekʼut, we ri ix, are kiwil ri kikʼaʼyik ri winaq, ri ix, kixmakunik, e ri Pixabʼ, kubʼan qʼatojtzij riʼ piwiʼ.

We ri uj, kqabʼan ronojel ri Pixabʼ, kʼatekʼut kraj na chi xa jun, kbʼan qʼatbʼaltzij riʼ chqech puwiʼ ronojel.

Rumal rech, ri Areʼ che xubʼij: «Matmakun rukʼ ixoq achi»; xoqujeʼ xubʼij: «Matkamisanik». We ri at, man katmakun ta rukʼ ixoq achi, kʼatekʼut katkamisanik, ri at, xabʼan itzel chuwach ri Pixabʼ.

Chixchʼaw bʼaʼ e chixchakun bʼaʼ jeriʼ jas ri taqal chkij ri winaq che kbʼan na qʼatbʼaltzij pakiwiʼ rumal ri Pixabʼ rech ri Tzoqopinem.

Rumal rech, che kʼax riʼ ri qʼatbʼaltzij chrij ri jun che man xkʼojiʼ ta loqʼoqʼebʼal ukʼuʼx; kʼatekʼut, ri loqʼoqʼebʼal kʼuʼx kretzʼebʼej na uwach riʼ ri qʼatbʼaltzij.

¿Jas rutzilal riʼ, ix achalaxik, che jun winaq kubʼij: «Ri in kʼo nukojonik», kʼatekʼut we ri areʼ man kʼo ta uchak kubʼano? ¿La kkowin puch ri ukojonik che ukoloxik ri areʼ?

We kʼo jun qaxibʼal on jun qanabʼ chʼanalik e ronojel qʼij man kʼo ta uwa,

kʼatekʼuriʼ, jun chiwech ix, kubʼij chkech: «Jix bʼaʼ pa utzil, chimiqʼaʼ bʼaʼ iwibʼ e chixnoj bʼaʼ», kʼatekʼuriʼ, man kuyaʼ ta ri rajawaxik chkech ri kibʼaqil, ¿la utz kʼuwaʼ weriʼ?

Xoqujeʼ, je na kʼuwaʼ ri akojonik; we man kʼo ta uchak, jun kaminaq kojonik riʼ.

Kʼatekʼuriʼ, kʼo jun kubʼij chawech: «¿La kʼo ri akojonik ri at? Ri in kʼo ri nuchak. Chakʼutuʼ bʼaʼ chnuwach ri akojonik che man kʼo ta uchak; ri in, rukʼ ri nuchak, kinkʼut na riʼ ri nukojonik chawach.

Ri at, ¿la katkojonik che xa jun chi Dyos Kʼolik? Utz riʼ ri kabʼano. Ri eʼitzel taq uxlabʼal, xoqujeʼ jeriʼ kekojonik, kʼatekʼuriʼ kebʼirbʼatik.

¿La kawaj at kawetaʼmaj, ri at, che at winaq man kʼo ta anoʼjibʼal, ri kojonik che man kʼo ta uchak xas ma utz ta wi riʼ?

Ri Abʼraham, ri Qatat, ¿la man xuriq ta ri usukʼil rumal ri uchak, aretaq chiʼ xuchiʼj ri ukʼojol Isaʼak puwiʼ ri tabʼal toqʼobʼ?

Ri at, kawil weriʼ: ri ukojonik, xtobʼ rukʼ ri uchak, e rumal ri uchak xuriq ri tzʼaqalataj ukojonik.

Xa jekʼuriʼ qastzij xbʼantajik ri utzij ri Pixabʼ riʼ: Ri Abʼraham xkojon chrech ri Dyos, e weriʼ xejalaxik jeʼ jas usukʼil, e ri areʼ rachiʼl ri Dyos xuʼchuxik».

Qas chawilaʼ bʼaʼ weriʼ: ri winaq rumal ri uchak kkʼojiʼ ri usukʼil, e ri usukʼil man kkʼojiʼ taj xuwiʼ rukʼ ri ukojonik.

Xoqujeʼ, jeʼ na kʼuriʼ ri Rajabʼ, ri ixoq che kech nim chʼutiʼn, ¿la man rumal ta ri uchak, ri areʼ xkʼojiʼ usukʼil aretaq chiʼ xeʼukʼulaj ri etaqoʼnelabʼ, kʼatekʼuriʼ, xuya alaj arech xeʼel ubʼi pa jun chik bʼe?

Jeʼ na kʼut, jas ri bʼaqilal; we ri bʼaqilal man kʼo ta ruxlabʼal xas kaminaq wi riʼ, xoqujeʼ, ri kojonik che man kʼo ta uchak xas kaminaq na kʼuriʼ.

Mikʼojiʼ bʼaʼ ekʼiʼ nimalaj taq eʼajtijabʼ chixoʼl ri ix, ix wachalal. Ri ix, iwetaʼm, che ri uj, kʼo chi na waʼ jun kʼaxalaj qʼatbʼaltzij paqawiʼ,

rumal rech, che qonojel waʼ, kʼi taq mul kqabʼan ri itzel. We kʼo jun winaq, man kubʼan ta ri itzel rukʼ ri tzij, ri jun riʼ utzalaj winaq riʼ, katkowin riʼ che uchajixik ronojel ri abʼaqil.

Aretaq chiʼ, ri uj kqakoj jun chʼichʼ pa uchiʼ jun kej arech kujunimaj, ri uj, jeriʼ kujtaqan chrech ronojel ri ubʼaqil.

Xoqujeʼ, chiwilaʼ bʼaʼ ri taq kukubʼ; puneʼtaj nimalaj ri kukubʼ e nimalaj kyaqiqʼ ksilobʼisanik, ri kukubʼ ktaq rukʼ jun chʼutiʼn cheʼ, jeriʼ jas kraj ri ajbʼinsanel rech.

¡Xoqujeʼ, jeʼ nakʼuriʼ ri qaqʼ; ri areʼ chʼutiʼn, kʼatekʼuriʼ kkowin chech ubʼixik nimalaj taq jastaq che aqʼan ribʼ! Chiwilampeʼ, nitzʼ ri qʼaqʼ kporon jun nimalaj kʼacheʼlaj.

Ri qaqʼ, xoqujeʼ jun qʼaqʼ; ri areʼ jun uwachulew rech ri itzel; ri qaqʼ che jun qatzʼaqatil, kubʼan itzel chrech ronojel qabʼaqil; e aretaq chiʼ tzijim rumal ri gehenna, kuporoj ronojel ri uwachulew.

Konojel ri awaj che erech ri uwachulew e ri awaj rech ri uwokaj, ri kumatz, e konojel ri awaj ekʼo pa ri polow, konojel kuyaʼo keniman chrech ri winaq.

Kʼatekʼuriʼ, man kʼo ta jun winaq kowininaq arech knimax utzij rumal ri qaqʼ, ri qaqʼ, jun nimalaj kʼax e man kʼo ta jaʼmaril rumal, pa ri qaqʼ kʼo sibʼalaj kamisanelalaj kunabʼal.

Rukʼ ri qaqʼ, kqatewchiʼj ri Ajawxel e xoqujeʼ rukʼ ri qaqʼ kqetzelaj kiwach ri winaq che eʼuwachibʼal ri Dyos.

Qas chi pa jun chiʼaj kel uloq ri tewchiʼbʼal e ri etzelal. Ix achalaxik, wa weriʼ, man utz taj.

Pa ri kʼwaʼ ¿la junam kkʼiy uloq kiʼlaj joron e kʼalaj joron?

Ix achalaxik, jun wikox, ¿la kkowinik uwach olivos kuyaʼoʼ? ¿La kkowin jun uva, wikox uwach kuyaʼo? Xoqujeʼ, ri jaʼ che rech ri polow man kkowin ta riʼ kuyaʼ jaʼ che mata tza.

Chixoʼl ri ix, ¿la kʼo jun winaq che kʼo unoʼjibʼal e retaʼmabʼal? Chukʼutuʼ bʼaʼ pa ri ukʼaslemal ri uchak che kubʼan rukʼ ri ukiʼal ri nojibʼal.

Kʼatekʼuriʼ, we ri ix, kʼo pa ri iwanimaʼ jun kʼalaj tiʼtik e jun ajchʼojelalaj uxlabʼal; minimarisaj bʼaʼ iwibʼ, mibʼij bʼaʼ ri tzijtal chuwach ri saqalajtzij.

We jun noʼjibʼal riʼ man pa ri kaj taj qajinaq uloq, xane rech we uwachulew riʼ e awaj noʼjibʼal e kʼaxtokʼlaj noʼjibʼal.

Rumal rech, che jawiʼ kʼo wi achixinik e ri chʼoʼj, chilaʼ riʼ man kʼo ta riʼ ri usukʼ cholajil, xane are kʼo ronojel itzel uwach taq chak riʼ.

Kʼatekʼuriʼ, ri noʼjibʼal che kpe uloq pa ri kaj, ri areʼ chi saqil wi, kuyaʼ jaʼmaril, utz kril ronojel, utz ubʼanik kubʼan ri qʼatojtzij puwiʼ ronojel, kʼo sibʼalaj loqʼoqʼebʼal ukʼuʼx, xoqujeʼ utz taq uwach kuyaʼo, man are ta kril ri ukaʼyibʼal ri winaq e man kebʼ ta upalaj kubʼano.

Sukʼil taq uwach ktikitajik pa ri jaʼmaril, rech toqʼobʼisabʼal kiwach ri jachintaq kkiyaʼ ri jaʼmaril.

¿Jawiʼ kpe wi e jas kubʼan ri chʼoʼj chixoʼl ri ix? ¿La man petinaq ta rukʼ ri jetaq irayibʼal che kchʼoʼjin pa ri ibʼaqil?

Ri ix ¿la sibʼalaj kiwaj uwach taq ri jastaq, kʼatekʼuriʼ man kʼo ta kʼo iwukʼ? Kʼatekʼuriʼ, ri ix kixkamisanik e kibʼan ri chʼoʼj. Ri ix, man kʼo ta jastaq iwech rumal rech che ri ix man kita ta ri jastaq.

Ri ix, kitaʼo e man kʼo ta kyaʼ chiwech, rumal rech che man utz ta utayik weriʼ kibʼano, ri ix, xane kixsach rukʼ ri jetaq irayibʼal.

Ri ix che ix ajmakunel rukʼ ri uwachulew, ¿la man iwetaʼm taj che ri loqʼoqʼebʼal kʼuʼx chrech ri uwachulew are kbʼanowik che man kʼo ta ri loqʼoqʼebʼal kʼuʼx chrech ri Dyos? Ri jun che are krichiʼlaj we uwachulew, ri areʼ man krachiʼlaj ta riʼ ri Dyos.

Ri ix, ¿la kichomaj, che ri Tzij tzʼibʼatalik, xaq loqʼ kubʼij: kʼo nimalaj urayinik, ri uxlabʼal che xujeqabʼaʼ ri areʼ qukʼ ri uj?

Xane, kuyaʼ chi na jun nimalaj sipanik chi na; rumal nakʼuriʼ kubʼij ri Tzʼibʼatalik: Ri Dyos, kchʼojin kukʼ ri winaq che nimal kkibʼano; kʼatekʼuriʼ, kuyaʼ ri usipanik chkech ri kkiwonej kibʼ.

Chinimaj bʼaʼ ri Utzij ri Dyos, chixchʼoʼjin bʼaʼ rukʼ ri Kʼaxtokʼ e ri areʼ naj riʼ kanimaj ubʼi riʼ chiwach.

Chixqibʼ bʼaʼ rukʼ ri Dyos e ri areʼ kqibʼ na riʼ iwukʼ. Chichʼajchʼobʼej bʼa iqʼabʼ, ri ix che ixajmakibʼ; chityoxrisaj bʼaʼ ri iwanimaʼ, ri ix, ix winaq che kʼo jun saqʼor iwanimaʼ.

Chiwilaʼ bʼaʼ, che ri ix, ix kebʼ taq winaq, chikʼisaʼ bʼaʼ ikʼuʼx, chixoqʼoq. Chkʼextaj bʼaʼ ri itzeʼ pa jun oqʼej e ri ikiʼkotemal pa jun bʼisobʼal.

Chiwonobʼaʼ iwibʼ chuwach ri Ajawxel, kʼatekʼuriʼ ri Areʼ kixuchʼelej na riʼ.

Mitzijoj ri man utz taj pakiwiʼ ri enikʼaj chik. Ri jun che kutzijoj ri man utz taj puwiʼ jun rachalal on che kubʼan qʼatojtzij puwiʼ ri rachalal, kutzijoj ri man utz taj puwiʼ ri Pixabʼ; e ri at kabʼan qʼatojtzij puwiʼ ri Pixabʼ, we kabʼan qʼatojtzij puwiʼ ri Pixabʼ; ri at man at bʼanal rech ta chik ri Pixabʼ, xane at qʼataltzij chik puwiʼ ri Pixabʼ.

Xa jun ri kbʼanow ri Pixabʼ e xa jun ri ajqʼataltzij, xuwi ri areʼ kkowinik kukol jun winaq on kusacho, e ri at, ¿At jachin kʼut che kabʼan qʼatojtzij puwiʼ ri awachiʼl?

Kʼatekʼuriʼ, kamik riʼ, che ri ix kibʼij: «Kamik on chweʼq, ri uj, kujbʼe pa ri jun tinimit riʼ, kujkanaj kan waʼ jun junabʼ chilaʼ, ¡kujkʼayin riʼ chilaʼ e nim riʼ ri qachʼakoj kqabʼano!».

Ri ix, man iwetaʼm taj, jas kubʼan ri ikʼaslemal chweʼq kabʼij; rumal rech, che ri ix, ix jun sutzʼ che kukʼut ribʼ xas pa jubʼiqʼ e kʼatekʼuriʼ ksach chi uwach.

¿Jas kʼu che, che ri ix, man kibʼij taj: «We ri Ajawxel kraj, ri uj kʼo qakʼaslemal riʼ, e kqabʼan waʼ weriʼ on weriʼ»?

¡Kʼatekʼut, ri ix, are nim kiwil wi ri inimal! Ronojel nimal, che jeriʼ, xas itzel wi.

Ri jun che retaʼm kubʼan ri utzil e man kubʼan taj, ri are kubʼan jun umak.

Jeʼ na kʼut kamik riʼ, ri ix che ixqʼinomabʼ, chixoqʼoq, chiraqaqej ichiʼ chuwach ri kʼax che kpe na piwiʼ.

Ri iqʼinomal, man utz taj, qʼinaq; ri xjut tajin kkitij ri iwatzʼyaq.

Ri qʼan ipwaq e ri saq ipwaq, kyaqarinaq uwach, e waʼ weriʼ, kukʼut na waʼ ri iwetzalal: kutij na riʼ ri ibʼaqil jeʼ jas jun qʼaqʼ. Ri ix, ximulij iqʼinomal pa we qʼij riʼ che xas are kʼisbʼal taq qʼij.

Chiwilampeʼ, ri pwaq che man xitoj ta chkech ri ewajchakibʼ ri xechakun iwukʼ pa ri iwulew, tajin kuraqaqej uchiʼ; e ri raqow chʼiʼaj xopan chi pa ri uxikin ri Ajawxel ri rajaw sibʼalaj chʼumil.

Ri ix, xkʼojiʼ jun ikʼaslemal cho we uwachulew riʼ, jun kiʼlaj ikʼaslemal e nimal chiwech; ri ix sibʼalaj xinojisaj iwibʼ, aretaq chiʼ xekamisaxik sibʼalaj winaq.

Ri ix, xibʼan qʼatojtzij puwiʼ ri sukʼilalaj winaq e xikamisaj; ri sukʼilalaj winaq man xchʼojin ta iwukʼ.

Ri ix, ixachalaxik, chkʼojiʼ ta bʼaʼ ri ikochʼonik chi kʼa pa ri Upetbʼal ri Ajawxel. Chiwilaʼ bʼaʼ, ri jun che kusukʼumaj ri ulew, ri are rukʼ ukochʼonik kreyeʼj ri uwach tikoʼn chi kʼa pa ri nabʼe e taq jabʼ rech ri nabʼe ikʼ e pa ri kʼisbʼal taq jabʼ rech ri kʼisbʼal ikʼ.

Ri ix, che kʼo ikochʼonik, xoqujeʼ chiyaʼaʼ bʼaʼ uchuqʼabʼ ri iwanimaʼ, rumal rech, che ri Upetbʼal ri Ajawxel naqaj chik kʼo wi.

Ri ix, mixchʼoʼjin bʼaʼ chixoʼl, arech ri ix, man kʼo ta qatbʼaltzij kbʼan piwiʼ. Chiwilampeʼ, ri qʼataltzij, takʼal chik cho ri uchiʼ taq ja.

Eʼachalaxik, chikʼamaʼ bʼaʼ inoʼj chuwach taq ri kʼax e ri kochʼonik xkiqʼaxej ri eqʼaxel taq utzij ri Dyos, ri eʼareʼ che xkibʼij ri utzij ri Ajawxel.

Chiwilampeʼ, ri uj kqabʼij: utzalaj kech ri eʼareʼ che kʼo ri kikochʼonik. Ri ix, itom ri ukochʼonik ri Jobʼ, e iwetaʼm ri ukʼisbʼal urayibʼal ri Dyos xuyaʼ chrech; rumal rech che ri Ajawxel, ri areʼ loqʼoqʼebʼal ukʼuʼx e toqʼobʼisanel wachaj.

Ix wachalal, are nabʼe, mikoj bʼaʼ tzij puwiʼ ri kaj on puwiʼ ri uwachulew on puwiʼ jun chik jas uwach. Ri kibʼij jaʼe chrech, jaʼe riʼ e ri kibʼij jayiʼ chrech, jayiʼ riʼ, arech ri ix man kixqaj ta chuwach ri qʼatbʼaltzij.

¿La kʼo jun winaq chixoʼl ri ix che kuyawajij jun kʼax? Chchʼaw bʼa rukʼ ri Dyos. ¿La kʼo jun che kkiʼkotik? Chbʼixon bʼaʼ.

¿La kʼo jun yawabʼ chixoʼl? Cheʼusikij bʼaʼ ri enim taq winaq erech ri Komon Tyox, arech ri eʼareʼ kechʼaw rukʼ ri Dyos puwiʼ ri areʼ, e arech kkikoj ri jiʼonsabʼal puwiʼ ri areʼ xas pa ri ubʼiʼ ri Ajawxel.

Ri chʼawem rukʼ ri Dyos rukʼ kojonik kukol na riʼ ri yawabʼ, e ri Ajawxel, kuwaʼlajisaj na riʼ ri areʼ. We ri areʼ riʼ, ubʼanom umak, kkuytaj na riʼ.

Chibʼij bʼaʼ ri imak chbʼil taq iwibʼ e chixchʼaw bʼa rukʼ ri Dyos piwiʼ iwonojel e rech nimalaj toqʼobʼ piwiʼ iwonojel, arech ri ix kixkunatajik. Ri kutzʼonoj jun sukʼilalaj winaq rukʼ ronojel ukojonik, kʼo sibʼalaj uchuqʼabʼ.

Ri Eliʼas, jun winaq che jeriʼ uj jas ri uj; sibʼalaj rukʼ ronojel ranimaʼ xchʼaw rukʼ ri Dyos arech man kʼo ta jabʼ, xa jekʼuriʼ, man kʼo ta jabʼ xubʼano cho ri uwachulew chi pa oxibʼ junabʼ rukʼ waqibʼ ikʼ.

Kʼatekʼuriʼ, xchʼaw chi jumul rukʼ ri Dyos, kʼatekʼuriʼ xpe ri jabʼ chi pa ri kaj uloq e ri uwach ulew xuya taq uwach.

Ix, achalaxik, we kʼo jun chixoʼl ri ix, naj kbʼe wi chrech ri saqalajtzij, kʼatekʼuriʼ, jun chik kkʼamow chi uloq pa ri saqalajtzij,

chretaʼmaj bʼaʼ weriʼ: Ri areʼ, che kutzalij uloq jun ajmakibʼ pa ri ubʼe, kukʼol riʼ ri ruxlabʼal cho ri kamikal e kusach na sibʼalaj kʼi taq makaj riʼ.