Ri Pabʼlo, ri tzʼapital pa cheʼ rumal ri Kristo Jesus e ri Timoteʼo ri achalaxik, chrech ri loqʼalaj qachiʼl Filemon, ri areʼ che kchakun qukʼ,

xoqujeʼ chrech ri qanabʼ Apfiʼa, chrech ri Arkipo ri areʼ che qachiʼl pa ri chʼoʼj, xoqujeʼ chrech ri Komon Tyox che kkimulij kibʼ pa ri awachoch.

Chiwech ri ix, ri nimalaj usipanik e ri rutzil ri Dyos Qatatxel, ri usipanik ri Ajawxel Jesus Kristo.

Sibʼalaj kinmaltyoxij chrech ri Dyos chi amaqʼel, aretaq chiʼ kinchoman pawiʼ pa ri nuchʼawem rukʼ ri Dyos,

rumal rech, che ri in, nutom utzijol ri uloqʼoqʼebʼal akʼuʼx e ri akojonik che ukubʼisaʼm akʼuʼx, rech ta bʼaʼ ri Ajawxel Jesus, xoqujeʼ rech ta bʼaʼ utoqʼobʼisaxik kiwach konojel ri etyoxlaj taq winaq.

Utz we kojonik riʼ, kuyaʼ waʼ chawech ri uxlabʼal e ri tzʼaqatalaj saqil arech kachʼobʼo ronojel ri utzil kʼo qukʼ ri uj e ri katkowin che ubʼanik rumal ri toqʼobʼisabʼal uwach ri Kristo.

Ri in, sibʼalaj kinkiʼkotik e kʼo ri nuchuqʼabʼ rumal rech che xinta utzijol ri loqʼoqʼebʼal akʼuʼx: bʼim chwech wachalal, che akubʼam kikʼuʼx ri etyoxlaj taq winaq.

Rumal kʼu waʼ weriʼ, puneʼtaj, rumal ri Kristo Jesus, saq wukʼ ri in ri tzij e ri rajawaxik che loqʼ kintaq ubʼixik chawech, ronojel ri taqal chawij kabʼano,

ri in are kwaj kintaʼ apan chawech pa ri ubʼiʼ ri loqʼoqʼebʼal akʼuʼx jun jas uwach. Ri jun che kbʼin weriʼ chawech, are ri Pabʼlo, ri areʼ che riʼj winaq chik e kamik riʼ tzʼapital pacheʼ xa rumal ri Kristo Jesus.

Ri kinta chawech, are puwiʼ ri walkʼuwaʼl, ri areʼ che xinwalkʼuwaʼlaj xas rukʼ taq chʼichʼ che inujatʼim pacheʼ: are ri Onesimo,

che ojer kanoq, ri areʼ man kʼo ta upatan chawech, kʼatekʼut, kamik riʼ, nimalaj upatan chawech, jacha nimalaj upatan chwech ri in kamik riʼ.

Ri in, kintzalejisaj, kintaq ubʼi ri areʼ chawech, ri areʼ che xas wanimaʼ wi ri areʼ.

Xinwaj, che ri areʼ kkanaj kan wukʼ, arech kinupatanij aretaq chiʼ injatʼilik pa taq we chʼichʼ riʼ rumal ri Utzalaj Tzij;

kʼatekʼuriʼ, ri in, man xwaj taj xinta weriʼ chawech, arech ri utzil kabʼano man xata kattoqʼix chrech, xane are utz riʼ chex xas pa ri awanimaʼ kpe wi.

Ri Onesimo, weneʼ xesax awukʼ pa kebʼ oxibʼ qʼij, arech ri at chi pa junalik kakʼulaj chi na jumul.

E ri areʼ man jun ajpataninel taj kabʼan chrech, xane are nim na chuwach jun ajpataninel, xane jun loqʼalaj achalaxik; we wachalal chnuwach ri in, are sibʼalaj nim chi na waʼ chawach ri at, e man xuwi taj cho we uwachulew riʼ xane xoqujeʼ pa ri Ajawxel.

Kʼatekʼuriʼ, we ri at nim e utz kinawil wi ri in, chakʼulaj bʼaʼ ri areʼ jacha in ri areʼ.

We xubʼan kʼax chawech, on weneʼ kʼo ukʼas awukʼ chakojoʼ bʼaʼ weriʼ chwij ri in.

Ri in, in Pabʼlo, kintzʼibʼaj rukʼ nuqʼabʼ weriʼ: In riʼ kintojow na weriʼ chawech. Ri in, man kinchʼa ta ri akʼas at wukʼ ri in, rumal neʼ che chi at wi ri at kʼasaj wukʼ ri in.

Jeʼ nakʼut wachalal, kinweyeʼj chawech ri at we jun toqʼobʼ riʼ chi pa ri Ajawxel; chajororisaj bʼaʼ ri wanimaʼ chi pa ri Kristo.

Ri in, kintzʼibʼaj weriʼ chawech rukʼ ronojel kubʼal kʼuʼx chawij e rukʼ ri nuchuqʼabʼ kinweyeʼj che katnimanik; ri in wetaʼm, che ri at, nim chi na kabʼano chuwach ri kinta chawech.

Xoqujeʼ, chasukʼumaj apan jun ja chwech; rumal rech, che ri in kinweyeʼj che rukʼ taq ri ichʼawem rukʼ ri Dyos, ri in kinkʼojiʼ chi na jumul riʼ chixoʼl.

Ri at, kutaq ubʼi rutzil awach ri Epafras, ri wachiʼl intzʼapital pa cheʼ rumal ri Kristo Jesus,

xoqujeʼ kkitaq rutzil awach ri Markos, ri Aristarko, ri Demas e ri Lukas, ri eʼareʼ che kechakun wukʼ.

¡Kkʼojiʼ bʼaʼ ri usipanik ri ajawxel Jesus Kristo rukʼ ri awuxlabʼal!