Ri Pabʼlo, upataninel ri Dyos, apostol rech ri Kristo Jesus, arech ri in, keʼinkʼam ubʼi ri esikʼitalik rumal ri Dyos, pa ri kojonik e che uchʼobʼik ri saqalajtzij che xas jeriʼ jas ri kʼaslemanik pa ri Dyos,

rukʼ ri jun weyeʼbʼal chrij ri junalikalaj kʼaslemal, ri xuyaʼ ubʼixik ri Dyos, ri areʼ che man kʼo ta tzijtal kubʼij; e xubʼij xas pa kʼi junabʼ uloq,

kʼatekʼuriʼ, ri Areʼ, aretaq chiʼ utz xrilo, xukʼut ri utzij chi wumal ri in jeriʼ jacha ri utaqanik ri Dyos ri Qakolonel;

chrech ri Tito, ri qastzij walkʼuwaʼl pa ri komon qakojonik, chech ri areʼ, ri usipanik e ri nimalaj rutzilal ri Dyos Tatxel e xoqujeʼ ri rutzilal ri Jesus Kristo ri Qakolonel.

We ri in, xatinyaʼ kan pa ri Kreta, xa rumal riʼ, arech ri at kakʼis uwokoxik ri Komon Tyox e arech keʼakoj pa ronojel tinimit ejujun taq eriʼjabʼ jeriʼ jas xinbʼij chawech.

Chkijunal ri eʼareʼ, rajawaxik che xas eʼutz pa ronojel, rachajil xa jun chi ixoq, kekojonik ri eralkʼuwaʼl e man kʼo ta jun itzel kriqitaj pa ri kikʼaslemal, xoqujeʼ rajawaxik che enimanel.

Rumal rech che ri ajyuqʼ, ri areʼ che ajpataninel chrech ri Dyos, rajawaxik che ri areʼ utz pa ronojel: ri areʼ man nimal taj kubʼano, man kpe ta royowal, man kutijej ta ri amajaʼ, man ajchʼoj taj, ma kʼo ta pwaq itzel uchakuxik kubʼano,

xane utz kikʼulaxik ri winaq kubʼano, chi utz kikʼulaxik ri winaq kubʼano, utz uchomaxik ri jastaq kubʼano, sukʼlaj winaq, chi kchʼaw rukʼ ri Dyos, chi ajaw chrech aqʼan ribʼ ri areʼ.

Uyaʼom uwach rukʼ ri saqalajtzij, jacha ri utzalaj kʼutunik, arech kkowinik kuya ri choqʼabʼ rukʼ ri utzalaj tzij, e arech kusach kiwach e kutzalij ri kitzij ri kkikʼuleʼlaj ri utzij.

Rumal rech, che ekʼo ekʼiʼ eʼitzel taq uxlabʼal che man keniman taj, che kkiyaʼ ubʼixik ri ma utz taj, ebʼanal taq tzij, e ri eʼareʼ riʼ chi are enabʼe ekʼo chkixoʼl ri pusim uwiʼ kikowil.

Ri eʼareʼ riʼ, rajawaxik ktzʼapix kichiʼ; we winaq riʼ, kkibʼan kʼax chkech konojel ri enikʼaj ajupaja winaq aretaq chiʼ kkikʼut ri man utz taj, rumal che are kkaj uwach ri pwaq.

Jun chkixoʼl ri eʼareʼ, ajqʼaxel utzij ri Dyos, xubʼij: «Ri eʼajkreta, chi amaqʼel ebʼanal taq tzij, eʼitzel taq awaj, saqʼorilalaj kipam».

Waʼ we tzij riʼ, chi qastzij wi; rumal kʼu waʼ, sibʼalaj cheʼayajaʼ bʼaʼ ri eʼareʼ, arech utz ukʼolik chkibʼanaʼ bʼaʼ ri qakojonik,

e makil apanoq ri joʼs taq tzij kech ri eʼajjudiʼos, xoqujeʼ ri jetaq kipixabʼ ri winaq che chi kkitas apan kibʼ che ri saqalajtzij.

Ronojel jas uwach, sukʼ riʼ chkiwach ri esukʼ taq winaq. Kʼatekʼuriʼ, chkiwach riʼ ma esukʼ winaq taj, man kʼo ta jun jas uwach riʼ che sukʼ chkiwach. Xoqujeʼ na kʼuriʼ, man sukʼ ta riʼ ri kuxlabʼal e ri kichomabʼal.

Kkibʼij che ketaʼm uwach ri Dyos, kʼatekʼut pa ri kikʼaslemal kkipaqchiʼj uwach ri Areʼ, sibʼalaj eʼitzelalaj taq winaq, man enimanel taj, man kʼo ta jun jas uwach che utz kekowin chech ubʼanik.

Ri at, are chakʼutuʼ bʼaʼ ri usukʼ e ri qas utz tzij.

Ri eriʼjabʼ, makitij bʼaʼ ri amajaʼ, chkikʼaslemaj bʼaʼ jun utzalaj kʼaslemal, utz uchomaxik chkibʼanaʼ bʼaʼ ronojel jas uwach; qas chkʼojiʼ bʼaʼ kichuqʼabʼ pa ri kikojonik, pa ri loqʼoqʼebʼal kikʼuʼx e pa ri kochʼonik.

Xoqujeʼ, ri eriʼj ixoqibʼ, chkʼojiʼ bʼaʼ jun utzalaj kikʼaslemal jeriʼ jas ri taqal chkij ri etyoxlaj taq ixoqibʼ: makiqʼabʼaj bʼa tzij chkij ri winaq, makitij bʼa sibʼalaj amajaʼ; chkikʼutuʼ bʼaʼ ri qas utz taq pixabʼ,

rukʼ waʼ weriʼ, kkikʼut na kʼuriʼ chkiwach ri alitomabʼ ri uloqʼexik ri kachajilal e ri ekalkʼuwaʼl,

ri ixoqibʼ chkikʼoloʼ kibʼ, chekowin chech uqʼilik ri kirayij, utz ubʼanik kkibʼan ri kichak pa ja, ekmeʼl taq winaq, enimanel chkech ri ekachajil arech man kʼo ta itzel tzij kbʼix puwiʼ ri utzij ri Dyos.

Xoqujeʼ, chata bʼaʼ chkech ri alabʼom, arech utz kkibʼan chrech ri kikʼaslemal pa ronojel

chakʼutuʼ bʼaʼ pa ri akʼaslemal che at jun kʼamabʼal tzij rech ri utzalaj kʼaslemal: at sukʼ che ri atzij e at sukʼ che ri akʼaslemal,

utzalaj ri atzij, man kʼo ta kchʼaʼ chech, arech, ri kʼulel man kkowin taj kʼo jun kubʼij paqawiʼ ri uj e xa jeriʼ sibʼalaj kkʼix riʼ.

Ri eʼajpatanijelabʼ, cheniman pa ronojel chrech ri kajaw; are qas chitzukuj bʼaʼ ubʼanik ri utz chkiwach ri eʼareʼ, makibʼij bʼaʼ jun kʼax tzij chkech rʼareʼ.

Makibʼan jun itzel jas uwach chkiwach ri eʼareʼ, man kikʼex bʼa ri kitzij chkiwach: rukʼ waʼ weriʼ, xas kkiyaʼ riʼ pa ronojel ri uqʼijil ri Utzij ri Dyos, ri areʼ che Qakolonel.

Rumal rech, che xkʼuttajik ri usipanik ri Dyos, che ukʼiybʼalil ri kolotajem chkech konojel ri winaq,

kukʼut chqawach, arech ri uj, kqayaʼ kan ri kʼaslemal che man kkojon taj, xoqujeʼ kqayaʼ kan ri urayibʼal we uwachulew riʼ, arech ri uj, kujkanaj kan pa ri sukʼ kʼaslemal chi pa we uchanim riʼ, pa ri qʼatbʼaltzij e pa ri kojonik,

e jeriʼ, ri uj kqeyeʼj ri utzalaj Upetbʼal ri Uqʼijil ri Nimalaj Qadyos e nimalaj Qakolonel che are ri Kristo Jesus,

che xuyaʼ ribʼ pa toqʼobʼisabʼal qawach ri uj, arech kujuloqʼ ri uj chuwach ronojel makaj e kusukʼumaj jun siwantinimit che eʼare uwinaq ri areʼ e che eʼachixom chrech ubʼanik ri utz taq chak.

Jeriʼ, rajawaxik che ri at kakʼut ri tzij, chayaʼaʼ bʼaʼ ri chuqʼabʼ e chatyajan bʼaʼ rukʼ utzalaj aweqeleʼn. Makʼojiʼ bʼa jun winaq che kretzelaj awach.

Chabʼanaʼ bʼaʼ, chkech konojel arech knaʼtaj chkech, che rajawaxik keniman chkech ri eqʼatbʼaltzij e chkech ri enim winaq; utz we enimanel e chi aninaq bʼaʼ chkibʼanaʼ ri utzil pa ronojel,

makibʼij bʼaʼ ri itzel taq tzij chrech jun chik winaq, michʼojin bʼaʼ, utz bʼaʼ chkilaʼ ri enikʼaj chik e ekmeʼl bʼaʼ chkibʼanaʼ kukʼ konojel winaq.

Rumal rech6, ojer kanoq, xoqujeʼ ri uj man kʼo ta qanoʼjibʼal, man kʼo ta qakojbʼal, xuwi qaterneʼbʼem ri qarayibʼal e ri kuta ri qabʼaqil chqech, itzel qabʼantajik, tiʼtik kqanaʼo, qiwal e kqabʼan qiwal chbʼil taq qibʼ.

Kʼatekʼuriʼ ri qʼij, aretaq chiʼ, xukʼut ribʼ ri rutzilal ri Dyos ri Qakolonel e aretaq chi xukʼut ri loqʼoqʼebʼal ukʼuʼx xas rumal loqʼoqʼisabʼal kiwach ri winaq,

ri areʼ man are ta xril ri chak, ri sukʼilalaj qʼatbʼaltzij xqabʼano, xane xuwi rumal ri loqʼoqʼebʼal ukʼuʼx, rumal ri jaʼ che rech kʼakʼ kʼaslemal e kʼakʼ uxlabʼal, pa ri Tyoxlaj Uxlabʼxel.

Ri Uxlabʼal riʼ sibʼalaj xutoxej paqawiʼ ri uj xas rumal ri Jesus Kristo ri Qakolonel,

arech ri uj, aretaq chiʼ uj sukʼ chi rumal ri usipanik ri Kristo Jesus, kkʼojiʼ ri qeyeʼbʼal pa ri junalikalaj kʼaslemal.

Qastzij waʼ we tzij riʼ; e kwaj che pa we riʼ kkʼojiʼ ri achuqʼabʼ ri at, arech ri kekojon chrech ri Dyos, kkaj kqʼalajinik ri utzalaj kichak. Wa weriʼ utz e kubʼan utzil chkech ri winaq.

Ri utzukuxik ri mox taq chomanik, ri jetaq utzukuxik ri ijaʼlil, ri chʼoʼjinik, ri kʼuleʼlanik tzij puwiʼ ri Pixabʼ, chayaʼaʼ bʼaʼ kanoq, rumal rech, che weriʼ man utz taj e man kʼo ta jun utzil kuyaʼ kanoq.

Ri jun winaq che kʼo pa juqʼat, aretaq chiʼ xyajtaj jumul e xyajtaj ukamul, chatasaʼ bʼaʼ awibʼ chrech.

Ri at awetaʼm, che we jun winaq riʼ xas jun itzel winaq riʼ e chi ajmakunel riʼ, xas are wi ri areʼ kbʼanow qʼatojtzij puwiʼ ri areʼ.

Aretaq chiʼ, kintaq ubʼi ri Artemas on ri Tikiko awukʼ; xas chakowij uloq katpe wukʼ pa ri Nikopolis. Ri in, nuchoman che kinqʼaxij jelaʼ ri qʼälaj.

Qas chawilaʼ ronojel ri rajawaxik chkech pa ri kibʼinem, ri qʼatbʼaltzij Senas e ri Apolo, arech man kʼo ta jun jas uwach kajawtaj na chkech.

Rajawaxik, che ri eqawinaq, kketaʼmaj ubʼanik ri utzil pa ronojel chak, arech kekowinik ketobʼnik chuwach ri nimalaj taq rajawaxik kʼolik, xa jekʼuriʼ man ejun ta riʼ chkixoʼl ri winaq che man kʼo ta kipatan.

Ri at, kkiyaʼ apan jun rutzil awach, konojel ri ekʼo wukʼ. Chayaʼaʼ apanoq jun rutzil kiwach konojel ri kujkiloqʼaj pa ri qakojonik. ¡Chi nimalaj sipanik, chkʼojiʼ ta bʼaʼ iwukʼ iwonojel!