Ri Pabʼlo, ri Sivano e ri Timoteʼo, chkech ri Komon Tyox Eʼajtesalonika, pa ri Dyos Tatxel e pa ri Ajawxel Jesus Kristo.

Are ta bʼaʼ ri Dyos Tatxel e ri Ajawxel Jesukristo, keyaʼow ri toqʼobʼ e ri utzil chiwech ri ix.

Ri uj, rajawaxik che nim kqil wi ri Dyos pa ronojel kajbʼal rumal iwech ix achalaxik, jeʼ jas ri qas usukʼil, rumal rech che sibʼalaj tajin kkowir ri ikojonik e kkʼiy ri uloqʼoqʼebʼal ikʼuʼx iwonojel ix e chijujunal chixoʼl ix,

kʼatekʼuriʼ, ri uj kʼo nimalaj qaqʼijil iwumal ix chkixoʼl taq ri ekomon Tyox rech ri Dyos, rumal ri ichoqʼabʼ e ri ikojonik pa taq ri kʼax e pa ri itzel che tajin kiqʼiʼo.

Rumal kʼu weriʼ, kukʼut na ribʼ ri sukʼilalaj uqʼatbʼaltzij ri Dyos chiwach, pa ri kiriq na wi ri ix ri rutzilal ri Rajawibʼal ri Dyos, arech kpetik, che ma rumal na kʼu waʼ tajin kiriq ri kʼax.

Rumal rech, che chi rech wi ri usukʼil ri Dyos, che kuya ri kʼax chkech ri keyoʼw ri kʼax chiwech ri ix,

kʼatekʼuriʼ, chiwech ri ix che ichʼijijem ri kʼax, kuya na ri chiwech ri jaʼmarilalaj kʼaslemal jacha ri uyaʼom chqech ri uj aretaq chiʼ kukʼut na ribʼ ri Ajawxel Jesus chi chikaj wi kukʼ ri eʼanjelibʼ e rukʼ ri uchoqʼabʼ,

pa jun ujuluw qʼaqʼ kʼatekʼuriʼ kukʼajisaj na kiwach ri man ketaʼm ta uwach ri Dyos e ri man keniman ta chrech ri Utzalaj Utzij ri Qajawxel Jesus.

Ri eʼareʼ kkʼajisax na kiwach rukʼ jun kʼaxkʼolil chubʼe qʼij chubʼe saq, naj ketas apanoq chrech ri uqʼijil e ri uchoqʼabʼ ri Ajawxel

aretaq chiʼ kpe na pa ri jun qʼij che ukʼamik na ri uqʼijil kukʼ ri eʼutyoxlaj taq winaq e arech nim kil na wi kumal konojel ri xekojon chrech ri areʼ, kʼatekʼuriʼ, ri ix xixkojon chrech ri qatzij ri uj. Je na kʼuriʼ pa we jun qʼij riʼ.

Rukʼ waʼ we chomanik riʼ, xoqujeʼ, ri uj kujchʼaw piwiʼ rukʼ ri Dyos pa ronojel kajbʼal, arech ri Areʼ, utz kubʼan chiwech pa ri usikʼinik, arech utz kubʼan chrech ronojel ri irayibʼal rukʼ ri uchoqʼabʼ ri areʼ, arech ri ix kibʼan ri utzil e qas ix sakʼaj pa ri ikojonik.

Xa jekʼuriʼ rumal kʼu weriʼ, ri ubʼiʼ ri Qajawxel Jesus kqʼijilaxik iwumal ri ix e ri ix kixqʼijilax na xa rumal ri areʼ, jeʼ jas ri kraj ri utoqʼobʼ ri Qadyos e ri Ajawxel Jesus Kristo.

Achalaxik ri uj kqata weriʼ chiwech puwiʼ ri Upetbʼal ri Qajawxel Jesus Kristo e puwiʼ ri qamulin ibʼ rukʼ ri Areʼ,

mixchʼuʼjarik, mixeʼj iwibʼ chuwach jujun taq uqʼalajisabʼal uwach ri Uxlabʼxel, chuwach jujun taq tzij, on chuwach jun wuj tzʼibʼam che ksikʼix uwach e kbʼixik che qech uj, e che rumal, ri ix kichomaj che ri Uqʼij ri Ajawxel, xas petinaq chik.

Mata bʼaʼ kʼo jun winaq kixsubʼuwik pa jun jas uwach neʼ. Chuxeʼ na kanoq, kpaqchiʼx na ri ikojbʼal e kuqʼalajisaj na ribʼ ri Itzelalaj Achi, ri Ukʼojol ri Sachbʼal ibʼ,

ri jun che are, ri Kʼulel, ri kuwaʼlisaj na ribʼ puwiʼ ronojel jas uwach che rukʼam ri ubʼiʼ ri Dyos, on ronojel ri kqʼijilax uwach, e che kopan na ri areʼ ktʼuyiʼ pa ri tyoxlaj ukʼolibʼal ri Dyos e kukʼut na ribʼ che xas Dyos wi ri areʼ.

Qas utz unaʼtisaxik chibʼanaʼ che ri in xinbʼij waʼ weriʼ chiwech aretaq chiʼ xinkʼojiʼ iwukʼ.

Kʼatekʼuriʼ, ri ix iwetaʼm jas ri ximowinaq ri areʼ kamik riʼ arech qas kuqʼalajisaj na uwach riʼ chi pa ri ukajbʼal.

We uchanim riʼ, awatalik ri itzel uchak kubʼano. Kʼatekʼuriʼ xaq aretaq chiʼ kkʼam ubʼi ri ximowinaq rech,

kukʼut ribʼ riʼ ri Itzel e ri Ajawxel kusach na uwach ri areʼ rukʼ ri uxutʼbʼal kyaqiqʼ uchiʼ e kukʼis na tzij puwiʼ, aretaq chiʼ kuqʼalajisaj na ribʼ pa ri Upetbʼal.

Ri upetbʼal ri Itzel, kilitaj na riʼ rumal ri uchak ri Satanas kilitajik riʼ rukʼ ronojel chak rech choqʼabʼ, joʼs taq kʼutbʼal e maybʼal

jeriʼ jas ronojel ri joʼs taq jastaq rech ri itzel, che keʼukʼamij na ri kkisach na kibʼ, rumal rech che man xkikʼulaj ta ri loqʼoqʼebʼalalaj ukʼuʼx ri saqalaj tzij che xkowin neʼ chkikoloxik.

Rumal kʼu waʼ weriʼ, ri Dyos kutaq jujun taq chomanik chkech arech keʼusubʼu e kbʼan chkech che kkikoj ri joʼs taq jastaq,

kʼatekʼuriʼ, rumal weriʼ, kbʼan na qʼatojtzij pakiwiʼ konojel ri man xkaj taj xekojon chrech ri saqalaj tzij, xaneʼ are xkaj uwach ri itzel.

Ri uj, rajawaxik che nim kqil wi ri Dyos pa ronojel kajbʼal iwumal ri ix, achalaxik ri ix che ixloqʼ rumal ri Ajawxel, rumal rech che ri Dyos chi pa ri umajibʼal uloq xixusikʼij arech kixkoltaj rumal ri Uxlabʼxel e rumal areʼ kutyoxirisaj ri ikojonik pa ri saqalaj tzij:

xixusikʼij chrech weriʼ rumal ri Utzalaj Qatzij, arech kixkowin chech uriqik ri uqʼijil ri Qajawxel Jesus Kristo.

Rukʼ kʼu weriʼ achalaxik, qas chixkʼoloq, qas utz ukʼolik chibʼanaʼ ri kʼutunik che xiwetaʼmaj qukʼ ri uj, rumal neʼ ri qachʼawibʼal on rumal neʼ ri qatzʼibʼanik.

Are ta bʼaʼ ri Qajawxel Jesus Kristo e ri Dyos Qatatxel, che xas ujuloqʼoqem, ujuyaʼom rumal nimalaj toqʼobʼ, ukubʼisam qakʼuʼx pa ronojel qʼij e uyaʼom ri eyeʼbʼal chqech,

kukubʼisaj bʼaʼ ri ukʼuʼx iwanimaʼ, kuyaʼ bʼaʼ ri uchoqʼabʼ ri iwanimaʼ chech ubʼanik ronojel utzalaj chak e utzalaj tzij.

Kʼatekʼuriʼ, pa ukʼisbʼal kanoq, kqabʼij chiwech achalaxik, chixchʼaw paqawiʼ ri uj, chuwach ri Dyos chita bʼaʼ arech kbʼe raqanil ri utzij ri Ajawxel, arech qas kkʼojiʼ ri uqʼijil, jacha xkʼojiʼ pa ri itinimit ri ix,

xoqujeʼ, arech kujtoʼtaj pa kiqʼabʼ ri winaq che esachinaq e che eʼitzel taq winaq –rumal, rech che man xyaʼtaj ta ri kojonik chkech konojel ri ewinaq.

Kʼatekʼut, ri Ajawxel, ri areʼ man kukʼex ta ri Utzij: ri areʼ qas kuya na ri ichoqʼabʼ e qas kixukʼol na chuwach ri Itzel.

Kʼatekʼuriʼ, ri uj qakubʼaʼm ri qakʼuʼx chrech ri Ajawxel, utz ujikibʼaxik qabʼanom: che ronojel ri jastaq uwach kujtaqan chiwech, ri ix tajin kibʼano e chi kibʼan na waʼ.

Qakubʼaʼm qakʼuʼx che are ri Ajawxel kkʼutuw ri ubʼe ri iwanimaʼ chi kʼa pa ri uloqʼoqʼebʼal ukʼuʼx ri Dyos e kʼa pa ri uchoqʼabʼ ri Kristo.

Kʼatekʼuriʼ, pa ri ubʼiʼ ri Ajawxel Jesus Kristo, kujtaqan chiwech achalaxik, chitasaʼ iwibʼ chrech ronojel achalaxik che man rukʼam ta jun sukʼilalaj kʼaslemal e che man uterembʼem ta ri tzij che xiwetaʼmaj ix chi qukʼ ri uj.

Rumal rech che utz retaʼmaxik ibʼanom che ri ix rajawaxik kitaqej ri bʼe jeʼ jas xqabʼan ri uj che man xaq ta apas uwach kʼaslemal xqabʼano,

xoqujeʼ ma xaq ta loqʼ xyaʼtaj jun qawa kumal ri winaq, xaneʼ chi paqʼij chi chaqʼabʼ chujchakunik, xqakojoʼ qachoqʼabʼ e xujkosik, arech ma kʼo ta jun winaq chixoʼl ri ix che kʼo jun jas uwach kuya chqech:

ri uj taqal chqech, yaʼtal chqech weriʼ, kʼatekʼuriʼ, are kqaj che kqakʼut chiwach che ri uj, uj kʼambʼal noʼj chiwech, arech kujiterembʼej.

Kʼatekʼuriʼ, aretaq chiʼ uj kʼo chixoʼl, uj kʼo iwukʼ, ri uj xqaya we pixabʼ chiwech riʼ: we kʼo jun winaq che man kraj taj kchakunik, xoqujeʼ mawaʼik.

Rumal che ri uj, xqata raqanil, xqata utzijol che ekʼo jujun chixoʼl che man sukʼil taj ri kkibʼano, man kechakun taj. Kʼatekʼuriʼ, ronojel jas uwach keʼok ilo chrech.

Pa ri Ajawxel Jesukristo kqabʼan jun sikʼinik e kqata chkech we winaq riʼ, chechakun bʼaʼ rukʼ jaʼmaril arech chi eʼare kechʼakow ri kiwa kkitijo.

Kʼatekʼuriʼ, ri ix, ix achalaxik, mitanabʼaʼ mixkosik che uchakuxik ri utzil.

We kʼo jun winaq che man kunimaj ta we pixabʼ kqabʼij chiwech pa we wuj riʼ, chitzʼibʼaj ri ubʼiʼ, e arech kel ukʼix, chitasaʼ iwibʼ chrech ri areʼ;

kʼatekʼut, mibʼan ikʼulel chrech ri areʼ, xaneʼ chiyajaʼ bʼaʼ jeʼ jacha uyajik jun achalaxik.

Are ta bʼaʼ ri Areʼ ri Rajawxel ri jaʼmaril kyaʼow ri jaʼmaril chiwech ronojel qʼij e pa ronojel jas uwach. Kkʼojiʼ ta bʼaʼ ri Ajawxel iwukʼ.

We rutzil iwach riʼ chi pa ri nuqʼabʼ kel ubʼi wi, pa ri nuqʼabʼ ri in in Pabʼlo. Are waʼ ri retal nuqʼabʼ che kukʼut ronojel wuj kintzʼibʼaj. Jewaʼ kintzʼibʼanik.

Chkʼojiʼ bʼaʼ iwukʼ ri utoqʼobʼ ri Ajawxel Jesuskristo.