Ri Pabʼlo, apostol rech ri Kristo Jesus, rumal ri urayibʼal ri Dyos e ri Timoteʼo ri achalaxik,

chkech ri etyoxlaj taq winaq rech ri Kolosa, che eʼutzalaj taq achalaxik pa ri Kristo. Chiwech ri ix ri sipanik e ri utzil pa ri ubʼiʼ ri Dyos Qatatxel.

Sibʼalaj qamaltyoxij chech ri Dyos, ri Tatxel rech ri Qajawxel Jesukristo, aretaq chiʼ kujchoman piwiʼ pa ri qachʼawem rukʼ ri Dyos,

chi are taq chiʼ ri uj xqata utzijol ri ikojonik chech ri Kristo Jesus e ri loqʼoqʼebʼal ikʼuʼx chkech konojel ri etyoxlaj taq winaq,

rumal rech, che ri ix kʼo ri iweyeʼbʼal chilaʼ chikaj. E chrech we eyeʼbʼal riʼ, ri ix xixtijoxik rumal ri utzij ri saqalaj tzij, che are ri Utzalaj Tzij,

che xopan iwukʼ ri ix; e jeriʼ jas pa ronojel ri uwachulew, kuyaʼ uwach e kkʼiyik, xoqujeʼ jeriʼ pa ri itinimit, chi pa ri qʼij, aretaq chiʼ ri ix xiwetaʼmaj e xichʼobʼ uwach ri usipanik ri Dyos pa ri saqalaj utzij.

Ri Epafras, che kchakun qukʼ ri uj, are xkʼutuw weriʼ chiwach, ri areʼ che are nukʼexwach ri in; utzalaj ajchak rech ri Kristo,

are ri areʼ ri xbʼin chqech ri loqʼoqʼebʼal ikʼuʼx ix pa ri Uxlabʼaxel.

Rumal kʼu waʼ weriʼ, xoqujeʼ ri uj, tza pa ri qʼij aretaq chiʼ xqata utzijol weriʼ, sibʼalaj kujchʼaw rukʼ ri Dyos piwiʼ e kqata chrech ri Dyos arech kuyaʼ chiwech ri ix ri utzalaj noʼjbʼal rech ri urayibʼal ri areʼ, e ronojel unoʼjibʼal e retambʼal ri Uxlabʼxel.

E rukʼ waʼ weriʼ, ri ix, kixkowin waʼ che kʼo jun utzalaj ikʼaslemal chuwach ri Ajawxel e sibʼalaj ix utz riʼ chuwach ri Areʼ pa ronojel jas uwach: ri ix sibʼalaj kiwachij utzalaj taq jastaq riʼ chuwach ri areʼ e kixkʼiy naʼ riʼ pa ri unoʼjibʼal ri Dyos.

Chiyaʼaʼ bʼaʼ ichuqʼabʼ pa ri uchuqʼabʼ uqʼijil Areʼ, arech qas kixkochʼonik pa ri kʼax e qas kichʼijej rukʼ kiʼkotemal;

arech kixmaltyoxin na riʼ chrech ri Tatxel che xixubʼano arech qas kʼo iwech kukʼ ri etyoxlaj taq winaq pa ri saqil.

Are ri areʼ xujbʼoqowik pa ri rajawibʼal ri qʼequʼmal e xujukʼam uloq pa ri Rajawibʼal ri loqʼalaj Ukʼojolxel,

che pa ri areʼ kʼo wi ri qakolotajem e ri sachibʼal qamak.

Ri areʼ, are uwachibʼal ri Dyos che man kujkowin taj kqil uwach, ri areʼ xalax nabʼe chuwach ronojel ri uwachulew,

rumal rech, che pa ri Areʼ xbʼan ronojel ri jastaq uwach, pa ri kaj e pa ri uwachulew, ri jastaq uwach che kqilo e ri jastaq uwach che man kqil taj, ri nimalaj taq tʼuybʼal, ri nimalaj taq ajawibʼal, ri nimalaj taq kowinem ronojel xbʼantajik rumal ri areʼ e chi rech wi ri areʼ ronojel.

Ri areʼ, chi are nabʼe kʼo uloq chuwach ronojel e ronojel jastaq kʼo pa ri areʼ.

Kʼatekʼuriʼ, ri areʼ, xoqujeʼ are ujolom ri ubʼaqilal che are ri Komon Tyox. Ri areʼ, are nimalaj ubʼantajik, ri areʼ che xaʼlax nabʼe chkixoʼl ri ekaminaqibʼ rajawaxik, che ri areʼ are nabʼe pa ronojel jastaq uwach,

rumal rech, che are utz che ri urayibʼal ri Dyos xubʼano pa ri areʼ, che ronojel utzil kkanaj kan pa ri areʼ.

Kʼatekʼuriʼ, rumal ri areʼ, ronojel winaq xubʼan sukʼ chuwach ri areʼ, cho ri uwachulew e xoqujeʼ cho ri kaj aretaq chiʼ xujaʼmarisaj ronojel rumal ri ukikʼel cho ri ripibʼal.

Xoqujeʼ ri ix, che ojer kanoq ix kaxlan taq winaq e ixkʼulel, rumal ri itzel taq ichomanik e ri itzel taq ichak,

ukamik riʼ, xixusukʼubʼa pa ri ubʼaqil aretaq chiʼ xuyaʼ pa ri kamikal, arech ri ix, chuwach ri areʼ ixtyoxlaj taq winaq, man kʼo ta xoqʼoʼlinaq iwach e man kʼo ta jun jas uwach itzel.

Xuwi rajawaxik, che ri ix kixkanaj kan pa ri kojonik, qas kʼo ichuqʼabʼ pa ri saqalaj tzij; e man kiya ta kan ri nimalaj iweyeʼbʼal ri xichʼobʼ uwach rumal ri Utzalaj Tzij che xitatabʼej ix, che xyaʼ ubʼixik chkech konojel winaq chi chuxeʼ ri kaj; e ri in che in Pabʼlo xinuxik in ajchak chrech.

Kamik riʼ, sibʼalaj kinkiʼkotik rumal taq ri kʼax che kinchʼijej in rumal utoqʼobʼisaxik iwach ri ix, e ri in kintzʼaqatisaj ukojik pa ri nubʼaqil ri jetaq kʼax che kraj na pa taq ri ukʼaxkʼolil ri Kristo rech ri toqʼobʼisabʼal uwach ri ubʼaqil Areʼ, che are ri Komon Tyox,

e chrech we Komon Tyox riʼ, ri in in rajchak, chi jeriʼ jacha ri taqanik xuyaʼ ri Dyos chwech, arech wumal ri in, kbʼantaj pa ri itinimit ix ri Upetbʼal ri Utzij ri Dyos,

ri awatalik uwach chubʼeqʼij chubʼesaq uloq e pa kʼi mayilqʼijsaq e kamik riʼ kuqʼalajisaj ribʼ chkiwach ri etyoxlaj taq uwinaq.

Ri Dyos, xraj che ketaʼmax uwach ri Uqʼij ri uqʼinomal we awatalik riʼ pa taq ri kitinimit ri eʼareʼ chen man kʼo ta ri qakojonik kukʼ, che are ri Kristo chixoʼl ri ix, ri areʼ che are reyeʼbʼal ri Qʼijil.

We Kristo riʼ, kqayaʼ ubʼixik ri areʼ kukʼ konojel winaq e rukʼ ronojel noʼjbʼal kqakʼutuʼ chkiwach konojel winaq, arech, chi konojel eʼutz chuwach ri Kristo.

Rumal kʼu waʼ, chi pa ri utoqʼobʼ waʼ weriʼ, ri in kinkosik chi rukʼ ri uchuqʼabʼ ri Kristo che xas kchakun wi wukʼ ri in.

Jeʼ nakʼut, ri in kinwaj, che ri ix kiwetaʼmaj ri kʼaxalaj chʼoʼj nutaqem rumal ri toqʼobʼisabʼal iwach ri ix, xoqujeʼ kumal utoqʼobʼisaxik kiwach ri winaq eʼajlaʼodiseʼa, xoqujeʼ kumal ri enikʼaj chik che man jumul kilom nuwach rukʼ ri kiwoqʼoch;

arech qas kkubʼiʼ kikʼuʼx e rukʼ junam uloqʼoqʼebʼal kikʼuʼx, kkiriq bʼa na sibʼalaj kinoʼjibʼal, arech keʼopan pa ri awatalik che rech ri Dyos,

che pa ri areʼ awatalik wi ronojel uwach noʼjbʼal e ronojel etaʼmanik.

Kinbʼij weriʼ chiwech arech man kʼo ta jun winaq kixsubʼuwik rukʼ ucholajil itzel taq tzij.

Qastzij nakʼut, che ri in, man in kʼo ta iwukʼ chi rukʼ ri nubʼaqil; kʼatekʼut, ri in, in kʼo iwukʼ rukʼ ri wuxlabʼal; sibʼalaj kinkiʼkotik rumal rech che sibʼalaj kʼo utzil kiʼkotemal chixoʼl e rumal che kixkojon chrech ri Kristo.

Ri Kristo, che ri xikʼamo, ri Jesus, ri Ajawxel, rajawaxik che pa ri areʼ kujbʼe wi,

che kbʼe ri qakʼamal pa ri areʼ e che kujyakataj pa ri areʼ; kʼatekʼuriʼ, utz utoqʼlexik iwibʼ pa ri kojonik jeriʼ jas ukʼutik xbʼan chiwech e rukʼ nimalaj maltyoxinik.

Chikʼoloʼ bʼaʼ iwibʼ arech man kʼo ta jun winaq kubʼan rajchakibʼ chiwech pa ri itzel taq tzij che xas rech taq noʼjibʼal, jun noʼjibʼal che xas rech wi winaq, xas rukʼ ri jastaq uwach rech ri uwachulew, e man je ta riʼ jacha ri uchomanik ri Kristo.

Rumal rech, che chi pa ri ubʼaqil ri Areʼ kanajinaq wi kanoq ronojel ri utzalaj tzʼaqat rech ri Dyos,

kʼatekʼuriʼ ri ix, pa ri Areʼ kiriq wi ronojel tzʼaqat utzil, ri Areʼ che are Jolomaj che ronojel Ajawibʼal e che ronojel Kowinem.

Ri ix, xoqujeʼ pa ri areʼ xpus uwiʼ ri ikowil, che man uqʼabʼ ta jun winaq xpusuwik, xane rumal che ri ix, xisach kan ri ibʼaqil che rech we uwachulew riʼ; ri jun upusik uwiʼ bʼaqilal rech ri Kristo:

ri ix, xixmuq rukʼ ri areʼ pa ri qasnaʼ e rukʼ ri Areʼ, ri ix xkʼastaj iwach, rumal che ri ix xikojo che are ri uchuqʼabʼ ri Dyos xuwaʼlisaj ri Areʼ chkixoʼl ri ekaminaqibʼ.

Ri ix, che ixkaminaq rumal taq ri imak e rumal ri ibʼaqil che man pusim ta uwiʼ, ri Areʼ, xuyaʼ jun chi kʼakʼ ikʼaslemal chi rukʼ ri Areʼ, kʼatekʼuriʼ xusach ronojel ri qamak.

Xusach uwach ri ukowinem ri Pixabʼ, ri wuj jawiʼ kʼo ri qakʼas, ri kubʼan itzel chqech; weriʼ xusach uwach cho ri ripibʼal.

Xchʼakan pakiwiʼ ri Erajawibʼal e pakiwiʼ ri Ekowinem, e xuqʼalajisaj kiwach chuwach ri uwachulew, aretaq chiʼ xeʼukʼam ubʼik ri ajchʼakanelalaj upetbʼal.

Rumal kʼu waʼ weriʼ, makʼojiʼ bʼa jun winaq che kʼax taq tzij kutzijoj piwiʼ rumal taq iwa on rumal taq iwukʼyaʼ on rumal taq nimaqʼij on rumal taq kʼakʼ ikʼ on rumal taq qʼij sabʼado.

Ronojel waʼ weriʼ, xaq are umuj waʼ ri jastaq uwach che kpe na; kʼatekʼut, ri kujriqitaj na wi riʼ are ri ubʼaqil ri Kristo riʼ.

Ma jun winaq bʼaʼ che kresaj weriʼ chiwech, aretaq chiʼ che kajawaxik krawasixik jun jas uwach, on aretaq chiʼ keqʼijilaxik ri eʼanjelibʼ rumal rech che kyaʼ ronojel rayibʼal chuwach ri jastaq che xiltajik, waʼ weriʼ xaq nimal waʼ pa ri chomanik rech bʼaqilal

kʼatekʼuriʼ, man are ta kjatʼix rukʼ ri Jolomaj, jawijeʼ wi, ronojel ri Bʼaqilal, kuriq wi ri uwa e ri utiqbʼalil, rumal taq ri yutbʼal e ri taq bʼatzʼ, arech kkʼiy rukʼ ri Dyos.

Ri ix, we xixkam chuwach taq ri jastaq rech ri uwachulew rukʼ ri Kristo ¿jas kʼu che, che ri ix kixniman na chuwach taq ri pixabʼ jacha ix kʼo na pa ri ikʼaslemal pa ri uwachulew riʼ?

«Makʼam ubʼi weriʼ, matij weriʼ, machap weriʼ».

Ronojel waʼ weriʼ, ksach uwach waʼ aretaq chiʼ kqakojo, che kipixabʼ e che kinoʼjibʼal winaq.

Ri uj, kqil we taq pixabʼ riʼ che nimalaj taq noʼjibʼal rumal rech che kukʼutinsaj che kʼo re ri Dyos chrech, e ri mochʼochik ibʼ che kubʼan kʼax che ri bʼaqilal; kʼatekʼut, man kʼo ta ubʼantajik chuwach ri unimal bʼaqilal.

Xa jekʼuriʼ, we ri ix, xixkʼastaj rukʼ ri Kristo, chitzukuj bʼaʼ ri jastaq che rech chikaj, jawijeʼ kʼo wi ri Kristo, che tʼuyulik pa ri rikyaqʼabʼ ri Dyos.

Are chixchoman chrech ri jastaq che rech chikaj, mixchoman chrech ri jastaq che rech ri uwachulew,

rumal rech, che ri ix xixkam rukʼ ri Kristo e ukamik riʼ, ri ikʼaslemal awatalik rukʼ ri Kristo pa ri Dyos:

Aretaq chiʼ, ri Kristo kuqʼalajisaj na ribʼ, che are areʼ ikʼaslemal, xoqujeʼ ri ix, nimalaj iqʼijil riʼ kqʼalajinik rukʼ ri Areʼ.

Xa jekʼuriʼ, chiqʼilaʼ bʼaʼ ri jetaq utzʼaqatil ri ibʼaqil chrech ri jastaq uwach rech we uwachulew riʼ: ri makunik rukʼ ixoq achi, ri man chʼajchʼoj taj, ri itzel taq rayibʼal, ri loqʼoqʼebʼal kʼuʼx chrech ri pwaq jun qʼijlanik chech ri man dyos taj;

ronojel waʼ weriʼ, kukʼamaʼ uloq ri royowal ri Dyos pakawiʼ ri eʼareʼ che ri man keniman taj.

Xoqujeʼ xibʼan ix weriʼ, aretaq chiʼ ix kʼo kukʼ eʼareʼ.

Kamik riʼ, chikʼyaqaʼ bʼaʼ ubʼik ronojel weriʼ: ri oyowal, ri kʼaʼnal, ri itzel taq chomabʼal, ri kʼax taq tzij, ri itzel taq tzij; rajawaxik, che weriʼ, man kʼo ta pa ri ichʼawibʼal ri ix.

Mibʼan taq tzij chbʼil taq iwibʼ. Ri ix, chiyaʼa bʼaʼ kan ri ojer winaq rukʼ taq ri uchak,

chiwatzʼyaqij bʼaʼ ri kʼakʼ winaq, ri areʼ che pa taq bʼiqʼal kbʼek chi kʼateʼ kopan na pa ri qas tzʼaqatalaj noʼjibʼal e kux kʼakʼ, jeʼ jas ri uwachbʼal ri xbʼanow ri areʼ.

Pa weriʼ, man kʼo ta ajgriʼego, man kʼo ta ajjudiʼo, man kʼo ta pusinik uwiʼ ukowil on man pusinik ta ukowil, man kʼo ta kaxlan winaq, man kʼo ta ajessita, man kʼo ta ajpatanel on ajaw; xane ronojel are ri Kristo e ri areʼ kʼo pa ronojel.

Ri ix, xixsikʼix rumal ri Dyos, arech ixtyoxlaj taq winaq e ixuloqʼ ri areʼ; chikojoʼ bʼaʼ iwukʼ jun chomabʼal rech utzil, nim chiwilaʼ wi ri jun chik, chiwonoʼ bʼaʼ iwibʼ; chkʼol bʼaʼ ri jaʼmaril e ri kochʼonik iwukʼ;

chikuyuʼ bʼaʼ iwibʼ we kʼo taq ri kichʼaʼ chixoʼl. Ri Ajawxel xusach ri imak ix, xoqujeʼ ri ix jewaʼ chibʼanaʼ bʼaʼ kamik riʼ.

Kʼatekʼuriʼ, ri sibʼalaj nim chuwach ronojel weriʼ, are riʼ, che ri ix kʼo ri loqʼoqʼebʼal ikʼuʼx; rukʼ weriʼ, kʼo ronojel utzil.

Rukʼ ronojel weriʼ, chkʼojiʼ bʼaʼ ri ujaʼmaril ri Kristo pa ri iwanimaʼ, rumal rech che ri ix ixsikʼitalik, arech xa jun bʼaqilal kiwoko. Kʼatekʼuriʼ, pa ri ikʼaslemal, nim chiwilaʼ wi ri Dyos.

Chkanaj kan bʼaʼ ri Utzij ri Kristo pa ri itinimit; chikʼutuʼ bʼaʼ ri noʼjibʼal e ri utzalaj taq tzij chbʼil taq iwibʼ. Chibʼixoj bʼaʼ taq maltyoxibʼal rech ri Dyos rukʼ ronojel iwanimaʼ, nikʼaj taq salmos, himnos e utzalaj taq bʼix.

E ronojel jas uwach che kibʼij on che kibʼano, chibʼanaʼ bʼaʼ pa ri ubʼiʼ ri Ajawxel Jesus e rumal ri areʼ chixmaltyoxin bʼaʼ chrech ri Dyos Tatxel.

Ix ixoqibʼ, chixniman bʼaʼ chrech ri iwachajil, jeriʼ jacha qas utz pa ri Ajawxel.

Ix ixachajilal chiloqʼoqʼej bʼaʼ ri iwixoqil e mibʼan kʼax chrech.

Ix ixalkʼuwaʼlaxelabʼ, chixniman bʼaʼ pa ronojel chkech ri inan itat, waʼ weriʼ, utz pa ri Ajawxel.

Ix ixnan tat, mibʼan kʼax chkech ri ewalkʼuwaʼl, arech ri eʼareʼ man kubʼan ta kebʼ kikʼuʼx.

Ix ixajpataninel, chixniman pa ronojel chkech ri iwajabʼ che erech we uwachulew riʼ, man xuwi ta rumal kixkil ri winaq, xane rukʼ jun utzalaj animaʼ, pa ri xibʼrikil chuwach ri Ajawxel.

Xaq apachichike ri ichak kibʼano, chibʼanaʼ bʼaʼ rukʼ ronojel iwanimaʼ, jeʼ jas jun chak chuwach ri Ajawxel e man rumal taj kixkil ri winaq,

kʼatekʼuriʼ, ri ix, qas iwetaʼm che ri Ajawxel kuyaʼ na riʼ chiwech ri utojbʼalil, aretaq chiʼ kuyaʼ na riʼ chiwech ri echbʼal. Ri Ajaw che kipatanij ix, are ri Kristo,

ri jun che kubʼan ri man sukʼil taj, kyaʼtaj na riʼ chrech ri utojbʼalil che xas ma sukʼil ta riʼ. Ri Ajawxel, man are ta kril na riʼ ri uwachbʼal ri winaq.

Ix ixajaw, chiyaʼa bʼa chkech ri iwajchakibʼ ri qas utz e ri qas usukʼil, kʼatekʼuriʼ, qas iwetaʼm che ri ix xoqujeʼ kʼo jun iwajaw chikaj.

Qas chixkanaj pa ri chʼawem rukʼ ri Dyos, ri kixbʼanow ko pa ri maltyoxinik.

Chixchʼaw rukʼ ri Dyos pa nimalaj paqawiʼ ri uj, arech ri Areʼ kujaq utz taq tinimit chqawach chech ri saqalajtzij, e xoqujeʼ arech kujkowin chech ubʼixik ri awatalik rech ri Kristo, che rumal areʼ, ri in inkʼo pacheʼ;

arech, kinkowinik kinyaʼ ubʼixik qas jeriʼ jeʼ jas ri rajawaxik.

Qas chkʼojiʼ bʼaʼ inoʼjibʼal kukʼ ri jachitaq man ekʼo ta qukʼ; chiwetaʼmaj resaxik ri utzil chech ri jastaq che rech we uchanim riʼ.

Qas chkʼojiʼ bʼaʼ utz taq tzij pa ri itzijonem, nikʼaj taq tzij che rech taq noʼjibʼal; chibʼij bʼaʼ utz alaj taq tzij chech utzalijik uwach ri tzij aretaq chiʼ kixchʼaw kukʼ eʼareʼ.

Kʼatekʼuriʼ, pa ri nuwiʼ ri in, ronojel riʼ kubʼij na ri Tikiko chiwech, ri areʼ che jun loqʼlaj achalaxik, jun sukʼalaj ajchak e jun achalaxik wachiʼl pa ri chak rukʼ ri Ajawxel.

Ri in, kintaq ubʼi ri areʼ iwukʼ, arech kuyaʼ jun qatzijol chiwech e kukubʼaʼ ikʼuʼx.

Rukʼ ri areʼ, kintaq ubʼik ri Onesimo, ri areʼ che sukʼ e loqʼlaj achalaxik e che ajitinimit. Eʼareʼ waʼ ri eʼareʼ kebʼin na chiwech, ronojel ri jastaq uwach che kqakʼulmaj waral.

Ri Aristarko, ri areʼ che kʼo wukʼ pa cheʼ, kutaq ubʼi jun rutzil iwach, xoqujeʼ ri Markos ri areʼ che rachalal ri Bʼernabʼe e puwiʼ ri areʼ xkʼamtaj iwumal kebʼ oxibʼ taq tzij. We kopan ri areʼ pa ri itinimit qas utz ukʼulaxik chibʼanaʼ bʼaʼ ri areʼ.

Ri Jesus che xoqujeʼ ubʼi Justo, xoqujeʼ ri areʼ kutaq ubʼi jun rutzil iwach. Ri eʼareʼ e xuwi ri pusim uwiʼ kikowil che xechakun wukʼ pa ri Rajawibʼal ri Dyos, xoqujeʼ ri eʼareʼ are xekubʼisan nukʼuʼx.

Ri Epafras che ewinaq, kutaq jun rutzil iwach; ri are riʼ rajchak ri Kristo Jesus, ri areʼ, kukoj uchuqʼabʼ piwiʼ ri ix pa ri uchʼawem rukʼ ri Dyos, arech ri ix, qas ix ko kixkanaj pa ronojel utzil e usukʼil e pa ronojel urayibʼal ri Dyos.

Jeriʼ kinbʼij puwiʼ ri areʼ, rumal rech che ri in, wilom ri nimalaj chak kubʼano rech toqʼobʼisabʼal iwach ri ix, xoqujeʼ rumal toqʼobʼisabʼal kiwach ri winaq rech Laʼodiseʼa e ri winaq rech Hiʼerapolis.

Ri ix, kutaq ubʼi rutzil iwach ri Lukas, ri loqʼalaj ajkunel, xoqujeʼ ri Demas.

Chiyaʼa bʼaʼ jun rutzil kiwach ri eʼachalaxik che erech Laʼodiseʼa, xoqujeʼ ri Ninfas e ri Komon Tyox che kkimulij kibʼ pa ri rachoch.

Aretaq chiʼ xsikʼitaj we wuj riʼ pa ri itinimit, xoqujeʼ chibʼana bʼaʼ, arech ksikʼix uwach pa ri Komon Tyox rech Laʼodiseʼa; e xoqujeʼ ri ix, chisikʼij bʼaʼ ri wuj che ktaq uloq chiwech chi pa ri Laʼodiseʼa uloq.

Chibʼij bʼaʼ chech ri Arkipo: «Qas chawilij ri chak che ri at xakʼamo chi pa ri Ajawxel e qas utz ubʼanik bʼaʼ chabʼanaʼ».

Ri in, kinya ubʼik ri rutzil iwach chi rukʼ ri nuqʼabʼ, ri in che in Pabʼlo. Chinaʼtisaj bʼaʼ ri jetaq chʼichʼ kojom chwech pa ri cheʼ. ¡Ri sipanik chkʼojiʼ bʼa ʼ iwukʼ!