Ri Pabʼlo e ri Timoteʼo, eʼupataninel ri Kristo Jesus, chkech konojel ri etyoxlaj taq winaq pa ri Kristo, ri eʼareʼ che eʼajfilipo kukʼ ri ekajyuqʼabʼ e kukʼ ri ekidiʼakonos.

Ri sipanik e ri nimalaj utzil chiwech ri ix, rumal ri Dyos Qatat e ri Ajawxel Jesus Kristo.

Kinmaltyoxij chrech ri Nudyos ronojel taq mul aretaq chiʼ ri in kinchoman piwiʼ ri ix;

ronojel taq qʼij, pa ronojel mul aretaq chiʼ kinchʼaw rukʼ ri Dyos kintaʼ piwiʼ iwonojel ri ix rukʼ kiʼkotemal;

rumal rech che kinnaʼtisaj, che ri ix, utz ubʼanik ri chak kibʼano pa ri utzalaj tzij xas pa ri nabʼe qʼij chi kʼateʼ kamik riʼ.

Kʼatekʼuriʼ, qas are ri areʼ riʼ, che xuchapalej iwukʼ ri ix we utzalaj chak riʼ, kuterneʼbʼej na kʼuriʼ ri uchak chi kʼateʼ na pa ri Uqʼij ri Jesus Kristo.

Utz che ri in jewaʼ we nuchomanik chiwij riʼ, rumal rech che ri ix ixkʼo pa ri wanimaʼ, ri ix ixkʼo pa ri chʼichʼ inujatʼim pacheʼ, xoqujeʼ ixkʼo pa ri utoʼik e pa ri uyaʼik uchuqʼabʼ ri utzalaj tzij, ri ix ixkʼo wukʼ pa ri nusipanik.

Jeʼ nakʼut, ri Dyos xinrilo, ¡che ri in sibʼalaj kixinloqʼoj iwonojel pa ri ranimaʼ ri Kristo Jesus!

Kʼatekʼuriʼ, are waʼ weriʼ kinta pa ri nuchʼawem: ri loqʼoqʼebʼal ikʼuʼx, qas chnimar bʼaʼ; qas chkʼojiʼ bʼaʼ utzalaj inoʼjibʼal e qas utz rilik unikʼoxik ronojel,

ri kyaʼ na riʼ chiwech arech qas kinikʼoj na ri utzil e ri sukʼil, e ri nim ubʼantajik, arech kixopanik qas chʼajchʼoj ri ikʼaslemal e man kʼo ta kixqʼiliwik pa ri uqʼij ri Kristo,

qas ix kʼo ta bʼaʼ pa ri utzalaj chak rech ri sukʼil che kʼo qukʼ rumal ri Jesus Kristo, rech uqʼijilaxik e umaltyoxixik ri Dyos.

Eʼachalaxik, ri in kinwaj che ri ix kiwetaʼmaj ri jastaq che ri xinkʼulmaj ri in, utz xukʼamaʼ uloq chrech ri Utzalaj Tzij,

rumal rech che pa ri Pretoriʼo e pa ronojel kʼolibʼal, sibʼalaj etaʼmatalik che inyutulik e inkʼo pa cheʼ rumal ri Kristo,

e sibʼalaj eʼachalaxik kʼo ri kichuqʼabʼ pa ri Ajawxel rumal che inyutalik riʼ; e ri eʼareʼ kʼo sibʼalaj kichuqʼabʼ e man kkixibʼij ta kibʼ che ubʼixik we tzij riʼ.

Jeʼ nakʼut, ekʼo nikʼaj kkiya ubʼixik ri Kristo rukʼ ri kyaqreʼnik, rukʼ itzel taq uxlabʼal rech chʼoʼjinik; kʼatekʼut ekʼo enikʼaj chik, che rukʼ utzalaj chomanik kkiya ubʼixik ri Kristo.

Ri eʼareʼ, kkibʼan weriʼ rumal ri uloqʼoqʼebʼal kikʼuʼx; rumal rech che ketaʼm, che ri in rajawaxik kintoʼ uwach ri utzalaj tzij rukʼ weriʼ;

ri enabʼe, rukʼ jun itzel uxlabʼal rech chʼoʼjinik, kkiya ubʼixik ri Kristo; man sukʼ ta ri kichomanik; kkichomaj che rukʼ weriʼ kkiya chi na raʼlal ri jetaq chʼichʼ che inujatʼim.

Kʼatekʼut, ¿jas kʼut? Puneʼtaneʼ kumal ri kebʼ kiwach on kumal ri qastzij ekʼolik, xas kʼo jun tzij puwiʼ ri Kristo e ri in kinkiʼkotik rumal weriʼ e xas kuya na riʼ nukiʼkotemal,

rumal rech che ri in, qas wetaʼm che waʼ weriʼ kuya na ri nukolotajem rukʼ ri ichʼabʼal e rukʼ ri uchuqʼabʼ ri Ruxlabʼal ri Jesus Kristo che kyataj na chwech,

weriʼ, che sibʼalaj kinweʼyej ri in: man kinkʼix ta riʼ chuwach jun jas uwach, xane kinkʼol na waʼ ronojel ri ukowil nukʼuʼx; e we jumul riʼ jena kʼuwaʼ jacha ronojel taq jumul chik, ri Kristo kqʼijilaxik waʼ pa ri nubʼaqil ri in, kneʼbʼaʼ we kinkʼasiʼk on we kinkamik.

Rumal rech, che chnuwach ri in, are ri Kristo ri kʼaslemal e ri kamikal xa jun chʼakoj.

Kʼatekʼut, we rukʼ ri nukʼaslemal pa we nubʼaqil riʼ, ri in kinkowinik kinbʼan jun nimalaj utzil, ri in man wetaʼm taj jachinchikech kinchaʼo.

Kʼatekʼut, rukʼ we jun kʼamal riʼ: ri in are nabʼe kinwaj kinbʼe rukʼ ri Kristo e qastzij nakʼut che waʼ weriʼ are sibʼalaj utz;

e pa ri ukʼabʼ, we ri in kinkanaj kan pa ri nubʼaqil are sibʼalaj utz waʼ chiwech ri ix.

Xa jekʼuriʼ, rukʼ weriʼ, utz chnuwach ri in we kinkanaj kan iwukʼ iwonojel arech kkʼiyik ri ikojonik e ri ekiʼkotemal

arech, aretaq chiʼ kintzalej chi uloq jumul, ri nukʼolem iwukʼ kuya jun kiʼkotemal chiwech e kuya jun nimalaj iqʼij pa ri Kristo Jesus.

Chkʼojiʼ bʼaʼ jun utzalaj ikʼaslemal chuwach ri Utzalaj Utzij ri Kristo arech ri in, we kinbʼe na che iwilik pa ri itinimit on we man kinbʼe taj, ri in kintaʼ na utzijol che ri ix ix kʼo pa ri uchuqʼabʼ xa jun chi uxlabʼal, che ri ix rukʼ xa jun iwanimaʼ kikoj ichuqʼabʼ arech kkʼiy ri kojonik chech ri Utzalaj Tzij;

ri ix mixibʼij bʼaʼ iwibʼ chkiwach ri ikʼulel: we man kixibʼij iwibʼ, jun utzalaj kʼutbʼal riʼ rech kʼax chkech ri eʼareʼ e chiwech ri ix ukʼutbʼal ikolotajem riʼ. E waʼ weriʼ petinaq uloq tza xas ri Dyos:

rumal ri utoqʼobʼ, xyaʼtaj chiwech ri ix man xuwi ta ri ikojbʼal chech ri Kristo, xane xoqujeʼ xyaʼtaj chiwech kiriq na ri kʼax pa ri utoqʼobʼ ri areʼ.

Rumal kʼuwaʼ weriʼ, ri ix chikojo bʼaʼ ichuqʼabʼ, jeriʼ jacha xiwil chwech ri in e kamik riʼ ri ix iwetaʼm che tajin na kinkoj na nuchuqʼabʼ ri in.

Xa jekʼuriʼ, ri in sibʼalaj kinkʼomij chiwech puwiʼ ronojel ri rajawaxik taq sikʼinik kubʼan ri Kristo, kinkʼomij chiwech rukʼ sibʼalaj loqʼoqʼebʼal kʼuʼx, rukʼ ri riqoj ibʼ pa ri Uxlabʼxel, rukʼ nimalaj toqʼobʼisabʼal kʼuʼx,

chinojisaj bʼaʼ ri nukʼaslemal rukʼ xa jun chi ichomanik, xa jun chi loqʼoqʼebʼal ikʼuʼx, xa jun chi uxlabʼal, xa jun chi ichomabʼal;

makʼo jun jas uwach mibʼano rumal kʼulel iwibʼ e rumal nimal, chijujunal chichomaj che konojel winaq nimalaj kibʼantajik chiwach ri ix;

man xuwi taj kitzukuj ri utzil chiwech ri ix, xoqujeʼ chitzukuj ri utzil chkech ri enikʼaj chik.

Chkʼojiʼ bʼaʼ iwukʼ ri uchomabʼal ri Kristo Jesus:

Ri areʼ, che are uwachbʼal ri Dyos man xukoj taj ri taqal chrij che kbʼan chech jeriʼ jacha Dyos, ri ubʼantajik che junam rukʼ ri ubʼantajik ri Dyos.

Kʼatekʼut, ri Areʼ xubʼan ribʼ che xas ma kʼo ta wi ubʼantajik xruxisaj ribʼ che ximitalik xruxisaj ribʼ jachaʼ jun winaq, xchʼobʼtaj uwach pa ri ukaʼybʼal jeriʼ jacha jun winaq,

xunitzʼarisaj chi na ribʼ xnimanik chi kʼa pa ri kamikal e jun kamikal cho ri ripibʼal.

Rumal kʼu weriʼ, ri Dyos xunimarisaj ubʼantajik ri areʼ e xuya chech ri jun Bʼiʼaj che kʼo puwiʼ ronojel bʼiʼaj

arech, ronojel jas uwach, rumal ri ubʼiʼ ri Jesus, kexukiʼk konojel taq chʼeʼk, ri ekʼo pa ri nimalaj kaj ri ekʼo pa ri uwachulew, ri ekʼo chuxeʼ ri uwachulew

e ronojel aqʼaj kuya ubʼixik che ri Jesus Kristo are Ajawxel rech uqʼijilaxik ri Dyos Tataxel.

Xa jekʼuriʼ, ix nuloqʼ jeriʼ nakʼut jacha ix nimaninaq pa ronojel mul, rajawaxik che ma xuwi taj aretaq chiʼ ri in inkʼo iwukʼ, xane sibʼalaj rajawaxik chi na chanim riʼ che ri in ma inkʼo ta iwukʼ, chixchakun bʼaʼ rukʼ xibʼim ibʼ e rukʼ bʼirbʼitkil rech ri ikolotajem:

Xa jekʼuriʼ, ri Dyos kʼo waral riʼ, are areʼ kuchakuj iwukʼ ix ri ajawaxik e ri chakunem, che nimalaj utzil chrech ri utz taq uchomabʼal areʼ.

Chibʼanaʼ ronojel man rukʼ ta wixwitem e man rukʼ ta kʼuleʼlaʼn tzij,

e arech man kʼo ta jun jas uwach mak kchʼaʼ chiwech e arech sibʼalaj ixchʼojchʼoj, ix ralkʼuwaʼl ri Dyos chkixoʼl jun itzelalaj e kʼaxalaj ijaʼlil, che ri ix ma kʼo ta jun itzʼilal, chixchuplinoq bʼaʼ ix jeʼ jas jun yabʼal saqil pa we uwachulew riʼ,

rukʼ ri ukʼutik ri Tzij rech ri kʼaslemal. Rukʼ weriʼ, ri ix kisukʼumaj nimalaj wech ri in pa ri uqʼij ri Kristo, rumal rech che ri nubʼinem e ri xinkʼaxkʼolij man xaq ta ksach uwach riʼ.

We rajawaxik che xoqujeʼ kinqʼejej na ri nukikʼel rumal utoqʼobʼisaxik uwach ri ikojonik ri ix, ri in sibʼalaj kinkiʼkotik e kinkiʼkotik iwukʼ iwonojel,

xoqujeʼ bʼaʼ ri ix chixkiʼkot bʼaʼ e chixjaʼjatoq wukʼ ri in.

Ri in kinweyeʼj pa ri Ajawxel Jesus, che kintaq na ubʼiʼ chiwech chi pa aninaqil, ri Timoteʼo, arech ri in kkubʼiʼ nukʼuʼx aretaq chiʼ kintaʼ itzijol ri ix.

Rumal rech, che ma kʼo ta jun winaq wukʼ ri in che jeriʼ jas ri areʼ, che kkowinik rukʼ jun utzalaj ranimaʼ kixril wi ri ix,

konojel nakʼut are kkitzukuj ri utz kech wi ri eʼareʼ e man are ta kkitzukuj ri utzil rech ri Jesus Kristo.

Kʼatekʼuriʼ, ri ix iwetaʼm che utz ri uchak ri areʼ: ri areʼ jeʼ jas jun kʼojolxel che kʼo putzal ri utat, xupatanij wukʼ ri in ri utzalaj tzij.

Xa jekʼuriʼ, ri in kinwaj, che are areʼ kintaq na ubʼik iwukʼ, aretaq chiʼ ri in qʼalaj chik chnuwach ri kinriqitaj wi kamik.

Xoqujeʼ, ri in qas utz reyeʼxik kinbʼan pa ri Ajawxel che ri in chi ma naj ta chi waʼ ri in kinopan na waʼ iwukʼ.

Kʼatekʼuriʼ, ri in kinchomaj che kintaq na ubʼik iwukʼ ri Epafrodito, che wachalal, ri areʼ che wachiʼl pa ri nuchak e pa ri nuchʼoʼj e che ri ix, xitaq uloq wukʼ ri in arech ri areʼ kinulpatanij pa ri nurajawaxik.

Rumal rech che ri areʼ kixraj nimalaj iwonojel e sibʼalaj kixubʼisoj apanoq, rumal rech che ri ix iwetaʼm chik che ri areʼ yawabʼ kʼolik.

Qastzij nakʼut che ri areʼ xyabʼinik, e naqaj xkʼojiʼ ukoq chech ri kamikal; kʼatekʼut, ri Dyos xutoqʼobʼisaj uwach e man xuwi ta ri areʼ xutoqobʼisaj uwach xane xoqujeʼ ri in, arech ri in man kinkʼis ta nukʼuʼx pa ri bʼisobʼal.

Xa jeʼnakʼuriʼ, ri in aninaq kintaq na ubʼik ri areʼ iwukʼ, arech ri ix kixkiʼkotik aretaq chiʼ kiwil chi na uwach ri areʼ e xoqujeʼ arech ri in kintoʼtaj jubʼiq pa ri bʼisonik.

Qas chikʼulaj bʼaʼ ri areʼ pa ri Ajawxel rukʼ nimalaj kiʼkotemal e nim cheʼiwilaʼ wi konojel ri winaq che ejeriʼ jas ri areʼ.

Xane rumal utoqʼobʼisaxik uwach ri uchak ri Kristo, ri areʼ chunaqaj xkʼojiʼ ukoq chech ri kamikal, rumal rech, che ri areʼ kebʼ xkʼojiʼ wi ri ukʼaslemal aretaq chiʼ xinupatanij ri in, rumal rech che man xixkowin ta ri ix xibʼan we toqʼobʼ riʼ chwech ri in.

Kʼatekʼuriʼ, eʼachalaxik; chixkiʼkot bʼaʼ pa ri Ajawxel… Aretaq chiʼ ri in kinya ubʼixik weriʼ chiwech man kqʼaxow ta chwech ri in, xoqujeʼ jun sukʼabʼanik chiwech ri ix:

¡Chichajij iwibʼ chkiwach ri etzʼi taq winaq! ¡Chichajij iwibʼ chkiwach ri eʼitzel taq ajchakibʼ! ¡Chichajij iwibʼ chkiwach ri ewinaq che man qas ta tzij pusim uwiʼ kikowil!

Rumal rech, che ri uj qastzij pusim uwi ri qakowil, ri uj che kqaya ri qas toqʼobʼ jeʼ jas ri ruxlabʼal ri Dyos, e che kʼo qaqʼijil pa ri Kristo Jesus e che man kuʼl ta qakʼuʼx chrij ri qabʼaqil.

Puneʼtane, ri in kinkowinik kinjikibʼaʼ ri nukʼux chrij ri nubʼaqil; ¡we kʼo jun chik kuchomaj che kkowinik kujikibʼaʼ ukʼuʼx chrij ri ubʼaqil, ri in sibʼalaj nim kinkowin chi na chuwach ri areʼ!

Ri in pusim uwi ri nukowil chi pa ri uwajxaq nuqʼij; in rijaʼl ri Israʼel, in rech ri ujuqʼat ri Bʼenjamin, in ajhebʼreʼo e in ukʼojol jun ajhebʼreʼo; in fariseʼo chuwach ri Pixabʼ,

xinachixnik chkech ri eʼajkristo e xeʼinwoqataj; pa ri usukʼil ri Pixabʼ, ri in, in utzalaj winaq.

Kʼatekʼut ronojel ri utz taq jastaq wech ri in, ri in kinwilo che chuwach ri Kristo, weriʼ man utz taj.

Kʼatekʼuriʼ kamik riʼ, ri in, ronojel itzel kinwilo chuwach ri nimalaj taq jastaq che xinwetaʼmaj chrij ri Jesus Kristo ri Wajawaxel. Rumal ri areʼ ri in kinkʼamowaj che ri in ronojel xintzaqo e ronojel xa jun mes chnuwach ri in, arech ri in kinchʼak ri Kristo.

E arech ri in kinriqitaj pa ri areʼ man rukʼ ta ri nusukʼil ri in, che jun sukʼil che petinaq pa ri Pixabʼ, xane pa ri sukʼil che kpe pa ri kojonik chrech ri Kristo, pa ri sukʼil che kpe rukʼ ri Dyos e che toqʼem rumal ri kojonik,

arech ri in kinwetaʼmaj uwach ri areʼ rukʼ ri uchuqʼabʼ ri ukʼastajibʼal uwach e rukʼ ri riqoj ibʼ rukʼ taq ri ukʼaxkʼol ri areʼ, arech ri in, in jeriʼ pa ri ukamikal jachaʼ ri areʼ,

arech ri in kyaʼtaj chwech kkʼastaj nuwach chkixoʼl ri ekaminaqibʼ.

Ri in, majaʼ kinopan pa ri ukʼisbʼalil e majaʼ kinriqaʼ che in tzʼaqatalaj winaq; xane ri in kintij anim arech ri in kinriqaʼ, jeʼ jas uriqik xubʼan ri Kristo Jesus.

Eʼachalaxik, ri in man kinchomaj taj che xriqitajik wumal in, xane xuwi kinbʼij weriʼ: Ri in man kinchomaj ta chik ri bʼe che xbʼantaj wumal ri xkanaj kanoq chwij, xane are kinchomaj e kinkoj nuchuqʼabʼ chech ri kʼo chnuwach. Ri in kinbʼe rukʼ ronojel wuxlabʼal,

e ri in kintij anim arech kinopan pa ri ukʼisbʼalil, arech kʼo ri tojbʼal ukʼaxel chwech ri kujusikʼij wi ri Dyos chikaj pa ri Kristo Jesus, arech ri uj kqakʼamo.

Ri uj, che ri uj utzalaj taq winaq, rajawaxik che jeriʼ kujchomanik; kʼatekʼuriʼ, we kʼo nikʼaj jastaq chik kichomaj ri ix, are ri Dyos riʼ kyaʼow na ri usaqil chiwech.

Kʼatekʼuriʼ, kamik riʼ pa ronojel ri ujopaninaq wi, joʼ bʼaʼ pa we bʼe riʼ.

Eʼachalaxik, chibʼanaʼ ix jeriʼ jachaʼ ri in, qas utz kilik chibʼanaʼ ri eʼareʼ, ri kʼo jun kikʼaslemal che jeriʼ jachaʼ ri jun kʼambʼal noʼj kikʼamom qukʼ ri uj.

Rumal rech, che ekʼo sibʼalaj winaq ejeʼ jas eʼukʼulel ri uripibʼal ri Kristo, jachaʼ sibʼalaj nubʼim chik chiwech e kinbʼij chi jumul chiwech kamik riʼ rukʼ uwaʼl taq nuwach.

Pa ri ukʼisbʼal kech ri eʼareʼ kkiriq na ri sachibʼal ibʼ; ri eʼareʼ are kidyos ri kipam e are nim kkil wi ri kikowil ri achijabʼ; xuwi utz chkiwach ri jastaq uwach che rech we uwachulew riʼ.

Kʼatekʼuriʼ ri uj, ujuwinaqil ri kaj, e sibʼalaj qeyeʼm ri qakolonem pa ri Ajawxel Jesus Kristo che kʼo chilaʼ chikaj;

ri Areʼ che kuya na riʼ ri uqʼijil we jun mesalaj qabʼaqil riʼ jacha ri uqʼijil ri ubʼaqil ri areʼ; kkowin riʼ che uyaʼik rukʼ ri uchuqʼabʼ ri areʼ kʼolik, che kkowinik kuya chuxeʼ raqan ronojel jas uwach.

Kʼatekʼuriʼ, ixloqʼalaj taq achalaxik, ri ix ix nukiʼkotemal, ri ix ix utojbʼalil nuchak; chkʼojiʼ bʼaʼ ichuqʼabʼ pa ri Ajawxel, ixloqʼalaj taq achalaxik.

Sibʼalaj kintaʼ chrech ri Evodiʼa e xoqujeʼ chrech ri Sintike, qas utz bʼaʼ ukʼaslemaxik chkibʼanaʼ chkibʼil kibʼ pa ri Ajawxel.

Xoqujeʼ, kinta chawech ri at at Sisigo, che qas at jun wachiʼl, kintaʼ chawech arech qas cheʼapatanij bʼaʼ ri ixoqibʼ riʼ, rumal rech che ri eʼareʼ ekʼo wukʼ aretaq chiʼ xinkoj nuchuqʼabʼ che utoqʼobʼisaxik uwach ri utzalaj tzij; jachaʼ xkibʼan ri Klemente e ri enikʼaj chik che xechakun wukʼ, che ri kibʼiʼ tzʼibʼatalik pa ri uwujil ri kʼaslemal.

Chixkiʼkot bʼaʼ ronojel taq qʼij pa ri Ajawxel, kinkamulij ubʼixik weriʼ chiwech: chixkiʼkot bʼaʼ.

Chketaʼmaj bʼaʼ chi nimalaj konojel winaq ri chʼuchʼujalaj inojibʼal. Naqaj chik kʼo wi ri Ajawxel.

Mamayow ikʼuʼx rukʼ ronojel jastaq uwach e aretaq chiʼ kʼo jun irajawaxik, chixchʼaw bʼaʼ rukʼ ri Dyos, chitaʼ bʼaʼ chrech ri kiwaj e chixmaltyoxin chrech.

Kʼatekʼuriʼ, ri nimalaj rutzil ri Dyos che are nim chuwach ronojel noʼjibʼal, are areʼ riʼ ri kchajin na ri iwanimaʼ e ri ichomanik pa ri Kristo Jesus.

Kʼatekʼuriʼ, eʼachalaxik ronojel ri kʼolik che qastzij, che qas nimalaj, che qas sukʼil, che qas chʼajchʼoj, che qas kmeʼl animaʼ e che ronojel ri utzil e ronojel nim uqʼijil, ronojel waʼ weriʼ qas chikʼamaʼ bʼaʼ.

Ronojel ri jastaq uwach che xiwetaʼmaj, ri xikʼamo, ri xito e ri xiwilo xas pa ri in, qas chibʼanaʼ bʼaʼ. Xa jekʼuriʼ ri Dyos che rech ri nimalaj utzil qas kkʼojiʼ ri iwukʼ ri ix.

Sibʼalaj xinkiʼkotik pa ri Ajawxel rumal rech che xinnaʼtaj chiwech, qas xinichomaj, kʼatekʼut xuwi man ixkowininaq ta che ukʼutik chnuwach.

Man kinbʼij ta weriʼ, rumal rech che ri in xa in mebʼaʼ, ri in xinwetaʼmaj kinkʼasik pa ronojel ri kinriqitaj na wi.

Ri in wetaʼm kinkʼaslemanik rukʼ xuwi jubʼiqʼ e rukʼ kʼi jastaq. Pa ronojel qʼij e pa ronojel kʼolibʼal, ri in xinwetaʼmaj kinwaʼik e xinwetaʼmaj kinriq wiʼjal, xinwetaʼmaj kinkʼasiʼ rukʼ taq ri numebʼil e pa ri nuchʼanalik.

Ri in ronojel kinkowin chech pa Ri Jun, che are kyaʼow ri nuchuqʼabʼ.

Kʼatekʼut, ri ix utz ri xibʼano che xiwukʼaj ri kʼaxkʼol xinriqo.

Ri ix iwetaʼm, ix ajfilipo: Aretaq chiʼ xmajtaj ubʼixik ri utzalaj tzij, aretaq chiʼ xinya kan ri Masedoniʼa, man kʼo ta jun komon tyox che xuya nikʼaj pwaq chwech, xaq xuwi ri ix,

ri ix, aretaq chiʼ, ri in in kʼo pa ri Tesalonika, kamul xitaq ubʼi chwech ri jastaq che rajawaxik chwech.

Ri in, man xa ta kintzukuj we taq sipanik riʼ; xane are kintzukuj ri utzil che kunimarisaj ri iwutzilal ri ix.

Kamik riʼ, ri in kʼo ronojel jastaq uwach wukʼ che ri rajawaxik chwech, e ktoʼtaj na; xas kkʼuʼxnik ri kʼo wukʼ chi aretaq chiʼ ri Epafrodita xuya chwech ri toqʼobʼisabʼal iwach xitaq uloq chwech che utzalaj uxlabʼal, jelikalij tabʼal toqʼobʼ che kukʼam ri Dyos e che sibʼalaj utz chuwach.

E ri Dyos, kuya na riʼ chiwech, ronojel ri jastaq uwach che rajawaxik na chiwech, rukʼ nimalaj ujachanik e rukʼ nimalaj uqʼinomal pa ri Kristo Jesus.

Ri qʼijil chrech ri Dyos, Qatatxel, chubʼeqʼij chubʼesaq! Amen.

Chiyaʼaʼ jun rutzil kiwach ri etyoxlaj taq winaq pa ri Kristo Jesus. Ri eʼachalaxik che ekʼo wukʼ ri in kkiyaʼ apanoq jun rutzil iwach ri ix.

Konojel ri etyoxlaj taq winaq, kkiyaʼ apanoq jun rutzil iwach, are sibʼalaj enabʼe kkitaq apan jun rutzil iwach ri ejun ja winaq ekʼo pa ri rachoch ri Sesar.

Ri usipanik ri Ajawxel Jesus Kristo kuxta bʼaʼ pa ri iwuxlabʼal ri ix.