Ri Pabʼlo, apostol rech ri Kristo Jesus, rumal urayibʼal ri Dyos, chkech ri etyox taq winaq e ri esukʼlaj taq winaq pa ri Kristo Jesus.

Chiwech ri ix, ri usipanik e ri rutzil ri Dyos e ri Ajawxel Jesus Kristo.

Tewchiʼm ta bʼaʼ ri Dyos e Tatxel rech Qajawxel Jesus Kristo, che xujutewchiʼj ri uj rukʼ ronojel uwach tewchiʼbʼal, chilaʼ chikaj, pa ri Kristo.

Kʼatekʼuriʼ, xujusikʼij pa ri areʼ, aretaq chiʼ majaʼ kbʼantaj ri uwachulew, arech ri uj, uj tyox e uj sukʼlaj taq winaq chuwach ri areʼ pa ri loqʼoqʼebʼal kʼuʼx

xujuʼuxisaj ri uj, uj ukʼojol pa ri Kristo Jesus jeʼ jas ri rutzilal urayibʼal,

e weriʼ jun bʼix rech ri uqʼijilanik ri usipanik che xuya chqech pa ri Loqʼalaj Ubʼantajik.

Pa ri Areʼ, ri uj kʼo ri qakolotajem rumal ri ukikʼel, kʼo ri sachibʼal makaj pa ri nimalaj usipanik,

che xuya chqech pa ronojel etaʼmabʼal e pa ronojel noʼjibʼal:

xubʼan chqech ri uj arech qetaʼmaj ri Awatalik urayibʼal we utzalaj chomabʼal riʼ che xuchomaj chuxeʼ ronojel jas uwach,

arech kubʼan ri areʼ, aretaq chiʼ ktzʼaqat ri qʼij: aretaq chiʼ ronojel jastaq uwach kʼo chuxeʼ xaq jun chi Jolomaj, ri Kristo, ri jastaq kʼo chikaj xoqujeʼ ri jastaq kʼo chuwachulew.

Kʼatekʼuriʼ, pa ri areʼ, ri uj ujtasatalik wi che ujsikʼitalik chi ojer kanoq, jeriʼ jas ri uchomabʼal ri Areʼ ri kbʼanow ronojel jastaq uwach jeʼ jas ri urayibʼal,

arech ri uj kujuxik uj yaʼl nim uqʼij ri uqʼijil ri uj che xas ojer kanoq qeyeʼm ri Kristo.

Pa ri Areʼ, xoqujeʼ ix kʼo ri ix aretaq chiʼ xitaʼ ri utzij ri saqalajtzij, ri Utzalaj tzij rech ri ikolotajem e xixkojon chech ri areʼ, ri ix, ix xixtʼiqik rumal ri ruxlabʼal rech ri chiʼnik, we Tyoxlaj Uxlabʼxel riʼ

che areʼ nabʼeʼal chrech ri iwechabʼal e kusukʼumaj ri kikolotajem ri winaq che keʼuloqʼ ri Dyos rech ubʼixoxik ri uqʼijil.

Xa rumal kʼuwaʼ che ri in aretaq chiʼ xinwetaʼmaj, ri ikojonik ri ix chrech ri Ajawxel Jesus xoqujeʼ aretaq chiʼ xinwetaʼmaj ri loqʼoqʼebʼal ikʼux kukʼ konojel ri etyoxlaj taq winaq,

sibʼalaj kinmaltyoxinik piwiʼ ri ix e kixinnaʼtisaj ri ix aretaq chiʼ kinchʼaw rukʼ ri Dyos.

Kinweyeʼj arech ri Dyos rech ri Qajawxel Jesus Kristo ri Tatxel rech ri qʼijil, kuya chiwech ri ix jun uxlabʼaxelalaj noʼjibʼal e jun uxlabʼaxel etaʼmabʼal, arech kubʼan chiwech ri ix, che qastzij kiwetaʼmaj uwach ri areʼ.

Ri areʼ, kuya ta bʼaʼ ri usaqil uwoqʼoch ri iwanimaʼ, arech ri ix kiwil ri eyeʼbʼal che kuya chiwech aretaq chiʼ kixusikʼij e kiwil ri Uqʼinomal ri Uqʼijil ri rechaʼbʼal chkixoʼl ri etyoxlaj taq winaq,

e ri nimalaj ubʼantajik ri ukowinem rech uʼatoqʼobʼ isaxik qawach ri uj che kujkojonik pa ri nimalaj uchoqʼabʼ

che ri areʼ xukʼut pa ri uwinaqil ri Kristo, aretaq chiʼ ri xuwaʼlajisaj uwach ri areʼ chkixoʼl ri ekaminaqibʼ e xutʼuybʼaʼ pa ri rikyaqʼabʼ chilaʼ chikaj,

puwiʼ ronojel nimalaj Rajawibʼal, puwiʼ ronojel Chuqʼabʼ, puwiʼ ronojel Utzil, puwiʼ ronojel Nim Ubʼantajik e puwiʼ ronojel taq bʼiʼaj che ri ix kixkowinik kibʼij, man xuwi ta pa we uwachulew riʼ xoqujeʼ pa ri uwachulew che petinaq.

Xukoj ronojel jastaq chuxeʼ raqan e xukojo Ujolom ri komon tyox,

che are Ubʼaqil, ri Tzʼaqat Ubʼantajik areʼ che ronojel kunojisaj pa ronojel.

Kʼatekʼuriʼ, ri ix che ixkaminaq rumal ri iwetzelal e rumal ri imak,

e pa weriʼ, ri ix xkʼojiʼ ri ikʼaslemal jacha ri kubʼan we uwachulew riʼ, jacha ri Ajaw rech ri rajawibʼal ri kyaqiqʼ we uxlabʼal riʼ che kroqataj ri kichak ri kexutunik.

Kʼatekʼuriʼ Qonojel ri uj ojer kanoq, uj jeriʼ ejacha ri eʼareʼ, ri uj kʼo ri qakʼaslemal pa ri urayibʼal ri bʼaqilal, ri uj are kqapatanij ri urayibʼal ri bʼaqilal e ri itzel taq chomabʼal, kʼatekʼuriʼ ri uj, ejacha ri enikʼaj chik xujbʼe chuwach ri Royowal.

Kʼatekʼut, ri Dyos che qʼinom pa ri loqʼoqʼebʼal ukʼux, rumal rech che sibʼalaj xujuloqʼoqʼej,

aretaq chiʼ ri uj ujkaminaqibʼ rumal ri qamak, xuya chqech jun kʼakʼ kʼaslemal rukʼ ri Kristo –rumal jun sipanik, ri ix xixkolotajik,

rukʼ ri areʼ xuwaʼlajisaj qawach e xujutʼuyubʼaʼ chikaj pa ri Kristo Jesus.

Rukʼ weriʼ, xukʼut chuwach ri uwachulew ri nimalaj uqʼinomal ri usipanik, rukʼ ri uloqʼoqʼebʼal ukʼuʼx chqech ri uj pa ri Kristo Jesus,

rumal rech che qastzij rumal ri usipanik xixkolotajik, rukʼ ri kojonik. We kolotajem riʼ man iwukʼ ta ix petinaq wi uloq, xane jun usipanik ri Dyos;

man petinaq ta rumal qachak uj, arech man kʼo ta jun kkowinik kubʼan nimalaj uqʼij.

Rumal rech che ri uj ujuchak, xujubʼan pa ri Kristo, arech ri uj kqabʼan ri utz taq chak che ri Dyos xusukʼumaj chi ojer uloq rech toqʼobʼisabʼal qawach.

Chnaʼtajoq bʼaʼ chiwech ri ix, che ojer kanoq, ri ix che man kʼo ta ri kikojonik ri eʼajjudiʼos iwukʼ, ri ix che xbʼix chiwech «man pusim ta kikowil», kumal ri winaq che kkibʼij che kibʼ «pusim uwiʼ kikowil», ¡rumal rech jun pusinik pa ri kikowil!

Chnaʼtajoq bʼaʼ chiwech, che ri ix, ojer kanoq man kʼo ta ri Kristo iwukʼ, xixpaqchiʼx ubʼik pa ri utinimit ri Israʼel, ix kʼaxlan taq winaq chuwach taq ri Chapbʼal qʼabʼ e ri jetaq Uchʼinik; ri ix man kʼo ta iweyeʼbʼal e man kʼo ta Idyos pa we uwachulew riʼ!

Kʼatekʼuriʼ, kamik riʼ, pa ri Kristo Jesus, ri ix che ojer naj ix kʼo wiʼ, ri ix chunaqaj chik ix kʼo wi, rumal ri ukikʼel ri Kristo.

Rumal rech, che are ri areʼ ri qajamaʼril, ri areʼ che chuxoʼl kebʼ bʼantajik xa jun chi bʼantajik xubʼano, xuqasaj ri tapya che ujachom kiwach ri eʼareʼ, kuchupu rukʼ ri Ubʼaqil ri areʼ ri kitiʼtik,

xuqasaj taq ri utzij e taq ri upixabʼ ri Pixabʼ, arech, rukʼ ri ubʼaqil ri Areʼ, kubʼan kukʼ ri ekebʼ bʼaqilal xa jun chi kʼakʼ winaq e xajekʼuriʼ kbʼantaj ri jaʼmaril,

e xajekʼuriʼ, ri eʼareʼ eʼutz rukʼ ri Dyos, pa jun chi Bʼaqilal rumal ri ripibʼal: rumal uripibʼal ri areʼ xukamisaj ri tiʼtik.

Ri areʼ xpe che uyaʼik ri utzil, ri utzil chiwech ri ix che naj ixkʼo wi apanoq, ri utzil chiwech ri ix che naqaj ix kʼo wi apanoq:

rumal ri areʼ, ri uj ujkebʼ ujkʼo pa jun chi Uxlabʼaxel kujkowinik kujbʼe chunaqaj ri Tatxel.

Xa jekʼuriʼ ri ix kamik riʼ man ix kaxlan winaq ta chik; ri ix, ix rech ri kitinimit ri etyoxlaj taq winaq, ix rech ri rachoch ri Dyos.

Ri ja che ix kʼo wi ri ix, jeriʼ jas jun kitikibʼalil ri jetaq Apostol e ri Eqʼaxel utzij ri Dyos e ri abʼaj pa ri rajawalja are ri Kristo.

Pa ri areʼ ronojel utz ja kkʼiyik, je kbʼantajik jun utzalaj tyox pa ri Ajawxel;

pa ri areʼ, xoqujeʼ ri ix, ix kʼo pa ri ja, arech ri ix ix jun rachoch ri Dyos pa ri Uxlabʼxel.

Rumal kʼu waʼ weriʼ, ri in, ri in Pabʼlo che in kʼo pacheʼ rumal ri Kristo iwumal ri ix che man ix ajjudiʼo taj…

We ri ix ichʼobʼom, jas uyaʼik xubʼan ri Dyos chwech ri jetaq sipanik rumal toqʼobʼisabʼal iwach ri ix;

xyaʼtaj chwech pa jun waram ri unoʼjibʼal ri Awatalik taq jastaq che ri xbʼitaj pa jujun taq tzij wumal in ri kamik riʼ.

Aretaq chiʼ ksikʼitaj we nutzij ri in, kixkowin riʼ kiwil ri noʼjibʼal kʼo wukʼ ri in puwiʼ ri Awatalik rech ri Kristo.

We Awatalik riʼ, man xukʼut ta chkiwach ri eʼojer taq winaq jeʼ jas ri ukʼutik kubʼan ukamik riʼ chkech ri eʼuʼapostol e ri eʼuqʼaxal utzij ri Dyos, rukʼ ri Uxlabʼaxel:

ri man eʼajjudiʼo taj xoqujeʼ kʼo ri kechbʼal, ri eʼareʼ eʼutzʼaqatil ri jun Bʼaqilal, kʼo ri chiʼnik kukʼ, pa ri Kristo Jesus rumal ri Utzalaj Tzij.

Kʼatekʼuriʼ, ri in che in Ajchak chech we Utzalaj Tzij riʼ rumal ri sipanik che xuya ri Dyos chwech rukʼ jun nimalaj chuqʼabʼ:

chwech ri in, che in are in nitzʼalaj chkixoʼl konojel ri etyoxlaj taq winaq, xuya chwech we sipanik riʼ, arech kinbʼij chkech ri man eʼajjudiʼo taj ri nimalaj uqʼinomal ri Kristo

e kuya pa nimalaj saqil ri usipanik che Awatalik: che xas awatalik uloq ri areʼ chi sibʼalaj junabʼ pa ri Dyos, ri Areʼ che kʼiysanel chech ronojel jastaq,

arech taq ri Ajawibʼal e taq ri Chuqʼabʼ rech ri kaj ketaʼmaj kamik riʼ, rumal ri Komon Tyox, ri nimalaj noʼjibʼal che xukoj ri Dyos

pa we junalik chomabʼal riʼ, che ri Areʼ xuchomaj pa ri Kristo Jesus Qajawxel,

che kuya chqech ri qachuqʼabʼ arech ri uj kujqebʼ rukʼ kubʼisabʼal kʼux pa ri ubʼe ri kojonik chunaqaj ri Kristo,

Jeʼ nakʼut, ri in kinta chiwech ri ix mixtuqaʼrik rumal taq ri kʼax tajin kinriq in rech toqʼobʼisabʼal iwach ri ix; are waʼ ri iqʼijil ix!

Rumal kʼu waʼ weriʼ kinmej ri nuchʼek chuwach ri Tatxel;

ronojel tatxel che kʼo pa ri kaj e pa ri uwachulew kʼo ri ubʼiʼ rukʼ ri Areʼ.

Arech ri Areʼ, rumal ri uqʼinomal ri uqʼijil, kuya bʼaʼ chiwech ri ichuqʼabʼ rumal ri Ruxlabʼaxel arech ri ix ko iwanimaʼ,

arech ri Kristo kjeqiʼ pa ri iwanimaʼ rumal ri ikojonik e arech che ri ikʼiybʼalil e ri itikibʼalil kkʼojiʼ bʼaʼ pa ri loqʼoqʼebʼal kʼuʼx.

Rukʼ weriʼ, ri ix kkʼojiʼ ri ichuqʼabʼ arech ri ix kichʼobʼo, kukʼ konojel ri etyoxlaj taq winaq, ri urabʼarik, ri uwach, ri ajsik e ri cho,

ri ix kixkowin na riʼ chi retaʼmaxik ri uloqʼoqʼebʼal ri Kristo che are sibʼalaj nim chuwach ronojel noʼjibʼal, e kixok na riʼ pa tzʼaqʼatalaj iwutzil pa ronojel ri tzʼaqatalaj Rutzil ri Dyos.

Chech ri Areʼ che ri uchuqʼabʼ kchakun paqawiʼ e kkowinik kubʼan sibʼalaj nim chi na chuwach ri jastaq uwach che kujkowinik kqato e kqachomaj,

chrech ri Areʼ ri uqʼijil, pa ri Komon Tyox e pa ri Kristo Jesus, pa ronojel ijaʼlil, chubʼeqʼij chubʼesaq. Amen.

Ri in sibʼalaj kintaʼ bʼaʼ chiwech ri ix, ri in che in kʼo pacheʼ pa ri Kristo, arech ri ix kkʼojiʼ jun utzalaj ikʼaslemal, rumal rech che ri ix ixsikitalik:

Chiwonej bʼaʼ iwibʼ, rukʼ kmeʼlalajʼ ibʼantajik e rukʼ kochʼonik, cheʼikuyuʼ bʼaʼ ri enikʼaj chik rukʼ ri loqʼoqʼebʼal ikʼux;

chikojoʼ bʼaʼ ichuqʼabʼ che xa jun iwach pa ri Uxlabʼaxel rumal ri nimalaj utzil.

Chkʼojiʼ bʼaʼ xa jun chi ibʼaqil e xa jun chi Uxlabʼaxel, e chkʼojiʼ bʼaʼ xa jun chi iweyeʼbʼal pa ri ixsikʼitalik wi;

jun chi Ajawxel, jun chi qakojonik, jun chi qaqasnaʼ,

jun chi Dyos e Tatxel qech qonojel; ri Areʼ che kʼo pakiwiʼ chi nimalaj konojel, ri areʼ che kʼo kumal konojel e ri areʼ che kʼo pa konojel.

Kʼatekʼut, qonojel chi qajujunal qakʼamom jubʼiqʼ ri toqʼobʼisabʼal wachaj rech ri Dyos jeʼ jas ri retabʼal ri usipanik ri Kristo.

Rumal kʼu waʼ weriʼ kbʼixik: Xpaqiʼ chikaj e xeʼukʼam ubʼi ri ekʼo pacheʼ xuya taq ri sipanik chkech ri winaq.

«Xpaqiʼk», ¿jas kʼu waʼ weriʼ, we man xoqujeʼ kubʼij che xxuliʼ chuxeʼ ri uwachulew?

Kʼatekʼuriʼ, ri areʼ che xxuliʼk, xoqujeʼ are ri areʼ che xpaqiʼ puwiʼ ronojel kaj, arech kunojisaj ronojel jastaq.

Kʼatekʼuriʼ ri areʼ «Xuya» chkech enikʼaj arech keʼuxik eʼapostol, chkech enikʼaj chik arech keʼuxikʼ eqʼaxal utzij ri Dyos, chkech enikʼaj chik arech keʼuxik etzʼibʼanel chech ri utzalaj tzij, chkech enikʼaj chik arech keʼuxik ajtijabʼ,

arech are waʼ ri ktaqan chkech ri etyoxlaj taq winaq pa ri chak, arech qas utz ri ja rech ri Ubʼaqil ri Kristo,

e rukʼ kʼu waʼ weriʼ ri uj junam kujbʼe qonojel pa ri kojonik e pa noʼjibʼal rech ri Ukʼojol ri Dyos e pa ri Tzʼaqatalaj Winaq, che pa ri ukowil ri ukʼaslemal kubʼano ri tzʼaqatalaj ukʼaslemal ri Kristo.

Rukʼ weriʼ, arech ri uj man ujakʼalabʼ ta chik, ri uj man kujbʼe ta chi rukʼ ronojel tzij e pa ronojel kyaqiqʼ, pa ri joʼs taq tzij kech ri winaq e pa ri ketzalal ri eʼareʼ che kekʼaman ubʼiʼk pa ri subʼunik.

Kʼatekʼut, ri uj chujkʼojiʼ bʼaʼ pa ri qakʼaslemal pa ri saqalajtzij e ri pa ri loqʼoqʼebʼal kʼuʼx, chujkʼiy bʼaʼ pa ronojel ri Areʼ che are ri Qajolom, ri Kristo,

e che ri Areʼ, kuya ri junam riqoj ibʼ che ri Bʼaqil ri junam e nimalaj uwokoxik, rukʼ kʼi uwach taq urabʼ jawiʼ kutzuqu e kusilobʼisaj ri areʼ jeʼ jas ri chak kkibʼan chi kijujunal, kʼatekʼuriʼ rukʼ weriʼ kkʼiyik e kuyak ribʼ pa ri loqʼoqʼebʼal kʼux.

Kʼatekʼuriʼ, kinbʼij chiwech e sibʼalaj kintaʼ chiwech pa ri Ajawxel, mibʼan jeriʼ ri ikʼaslemal jeʼ jas kkibʼan ri winaq che ma junam ta qakojonik kukʼ che kʼo ri itzel kichomabʼal,

ri eʼareʼ ekʼo pa ri qʼequʼm; ri eʼareʼ ekaxlan winaq chuwach ri ukʼaslemal ri Dyos, man ketaʼm ta ri saqalajtzij, rumal rech che ri eʼareʼ kʼo jun abʼajalaj kanimaʼ,

aretaq chiʼ man utz ta ri kinoʼj pa ri kikʼaslemal, ri eʼareʼ xkibʼan sibʼalaj itzel jas taq uwach e xkibʼan sibʼalaj tzʼil taq jas uwach.

Kʼatekʼuriʼ, man are ta weriʼ ri xiwetaʼmaj ri ix, ri ix are xiwetaʼmaj ri Kristo,

we ri ix are ri areʼ xikʼam pa ri tzij e pa ri kʼutbʼal, jun kʼutbʼal che jeriʼ jeʼ jas ri saqalajtzij rukʼ ri Jesus,

rajawaxik che ri ix kiya kan ri nabʼe ikʼaslemal e kiya kan ri qʼeʼl winaq che kixukʼam ubʼi pa ri kamikal e pa ri itzel taq rayibʼal,

kʼatekʼuriʼ, rajawaxik che ri ix kkojiʼ jun kʼakʼ ichomabʼal

e rajawaxik che ri ix kiwatzʼyaqij ri kʼakʼ winaq, che bʼanom rumal ri Dyos, pa ri sukʼil, pa ri utyoxil ri saqalajtzij.

Kamik riʼ mibʼan tzij. Chibʼij ri saqalajtzij rukʼ ri ajiltzʼaqat, ¿la man ujkitzaqatil ta ri enikʼaj chik?

We xpe iwoyowal, mixmakunik; ri qʼij maqaj bʼaʼ uwach we iwoyowal na;

rajawaxik che miʼokisaj ri Kʼaxtok iwukʼ.

Ri winaq che kelaqʼanik, maʼelaqʼan chi bʼaʼ; xane are utz chubʼanaʼ uchak rukʼ taq ri uqʼabʼ, arech kkowinik kubʼan ri utzil e keʼutoʼ ri emebʼaʼibʼ.

Maʼel bʼaʼ uloq jun itzel tzij pa ri ichiʼ, xane are chibʼij ri utz tzij, arech kibʼan ri rajawaxik e kibʼan ri utzil chkech ri kixtatabʼenik.

Miya bʼis chrech ri Tyoxlaj Uxlabʼaxel rech ri Dyos, ri areʼ che xixutʼiqo rukʼ ri utʼiqbʼal, rech ri jun qʼij arechiʼ kopam e ri kolotajem.

Ronojel bʼanoj, oyowal, nimalaj tzijtal, ri itzel taq tzij, waʼ ronojel weriʼ makʼojiʼ bʼaʼ iwukʼ ri ix.

Chibʼanaʼ bʼaʼ ri utzil chixol ri ix e rukʼ ri loqʼoqʼebʼal ikʼux, chisachaʼ bʼaʼ ri imak chixoʼl jeʼ jas ri usachik ri imak xubʼan ri Dyos pa ri Kristo.

Chiterneʼj bʼaʼ uwach ri Dyos jeʼ jas ixloqʼalaj taq alkʼuwaʼlaxel,

kʼatekʼuriʼ, jix bʼaʼ pa ri ubʼe ri loqʼoqʼebʼal kʼux, jeʼ jas ri Kristo che xixuloqʼoqʼej e xujach ribʼ rumal xutoqʼobʼisaj qawach ri uj, xujach ribʼ chrech ri Dyos pa jun tabʼal toqʼobʼ che jeʼlikalaj ruxlabʼ.

Kʼatekʼuriʼ, ri mak rukʼ ixoq achiʼ e ronojel uwach itzel, on ri loqʼoqʼobʼal chrech ri pwaq, mibʼij bʼaʼ weriʼ chixoʼl ri ix: are waʼ ri utz chkech ri etyoxlaj taq winaq.

Xoqujeʼ ri itzel taq tzij, ri chʼuʼj taq tzij, ri mox taq tzij; ronojel weriʼ man utz taj, xane chixmaltyoxin chrech ri Ajawxel.

Rumal rech che utz retaʼmaxik chibʼanaʼ, ri jun che kubʼan ri mak rukʼ ixoqʼ achiʼ e ri areʼ che kubʼan ri itzel taq jastaq e ri areʼ che kuloqʼoqʼej ri pwaq –ri jun riʼ kʼo jun joʼs udyos man kok ta riʼ pa ri Rajawibʼal ri Kristo e pa ri Rajawabʼal ri Dyos.

Man kʼo ta bʼaʼ jun kixsubʼuwik rumal enikʼaj joʼs taq tzij; rumal kʼu waʼ ronojel weriʼ, ri itzel e ri royowal ri Dyos kpe pakiwiʼ ri winaq che man kkaj ta uwach ri Areʼ.

Mibʼan bʼaʼ junam iwach kukʼ we winaq riʼ.

Ojer kanoq, ri ix ix qʼequʼm, kʼatekʼut kamik riʼ, ri ix ix saqil pa ri Ajawxel; chixkʼasleman bʼaʼ jeʼ jas ix ralkʼuwaʼl ri saqil,

rumal rech che ri uwachinik ri saqil, are ri utzil, ri sukʼil e ri saqalajtzij.

Qas utz rilik chibʼanaʼ ri jastaq che utz chuwach ri Ajawxel,

e mibʼan jun itzel chak che rech ri qʼequʼm, xane are chibʼanaʼ qʼatojtzij puwiʼ weriʼ.

Jeʼ nakʼut, ri jastaq che pa awal kkibʼan we winaq riʼ, ri uj kujkʼixik xuwi che ri ubʼixik;

kʼatekʼut, aretaq chiʼ kqabʼan qʼatojtzij puwiʼ weriʼ, kqʼalajinik pa ri saqil;

ronojel ri jastaq uwach che kqʼalajinik, saqil riʼ. Rumal weriʼ kbʼixik: Chatkʼastajoq ri at che katwarik chawaʼlisaj awibʼ chkixoʼl ri kaminaqibʼ e kchʼubʼlin na riʼ pawiʼ ri usaqil ri Kristo.

Xa jekʼuriʼ, qas utz unikʼoxik chibʼanaʼ rilik ri ikʼaslemal: makʼojiʼ bʼaʼ jun chʼuʼj ikʼaslemal, xane chkʼojiʼ bʼaʼ jun noʼjibʼalalaj ikʼaslemal

utz bʼaʼ chbʼe ri ikʼaslemal pa we uwachulew riʼ, rumal rech che itzel taq we qʼij riʼ;

mibʼam ri chʼuʼj jastaq uwach, kʼatekʼut are qas chiwilaʼ jachike ri uraybʼal ri Dyos.

Mixqʼabʼarik; waʼ weriʼ xaq itzel kʼaslemal kukʼama uloq chiwech, xane areʼ chitzukuj ri tzʼaqatalaj utzil pa ri Uxlabʼaxel.

Chixoʼl ri ix chiyaʼa bʼaʼ ubʼixik ri jetaq salmos, ri jetaq himnos e ri taq bʼixobʼal pa ri iwanimaʼ; chibʼixoj e chinimaqʼijarisaj ri Ajawxel rukʼ ronojel iwanimaʼ.

Pa ronojel qʼij e pa ronojel jastaq uwach chixmaltyoxin chrech ri Dyox Tatxel, rumal ri ubʼiʼ ri Qajawxel Jesus Kristo.

Chinimaj chbʼil taq iwibʼ pa ri uxibʼrikil ri Kristo.

Ri eʼixoqilal chkinimaj ri ekachajilal jeʼ jas ri unimaxik ri Ajawxel:

rumal rech che ri achajilal ri areʼ are ujolom ri rixoqilal, jeriʼ pa ri Kristo che are ujolom ri Komon Tyox, ri areʼ che xukol ri Bʼaqil;

kʼatekʼuriʼ, ri Komon Tyox kunimaj ri Kristo, rumal kʼuwaʼ weriʼ rajawaxik che ri eʼixoqilal kekinimaj ri ekachajilal pa ronojel.

Eʼachajilal, chiloqʼoqʼej bʼaʼ ri iwixoqilal jeriʼ jas uloqʼoqʼexik ri Komon Tyox kubʼan ri Kristo e xujach ribʼ rumal utoqʼobʼisabʼal uwach ri areʼ,

arech kutyoxarisaj ri e kuchʼajchʼobʼej ri areʼ rukʼ ri jaʼ e rukʼ tzij;

rumal rech che are kraj che chʼajchʼoj e saqil chuwach ri Areʼ; arech man kʼo ta jun tzʼilobʼinaq chech on jun bʼachʼuy chech on jun chik jas uwach, xane tyoxlaj e chʼajchʼojalaj ri ubʼantajik.

Jekʼuriʼ jas weriʼ, rajawaxik che ri ix ix achajilal keʼiloqʼoqʼej ri iwixoqilal jeʼ jas uloqʼisaxik ri ibʼaqil ri ix. Jachin kuloqʼoqʼej ri rixoqil xas are wi ri areʼ kuloqʼoqʼej ribʼ.

Rumal rech che man kʼo ta jun winaq xretzelaj jumul ri ubʼaqil; xane kukʼiysaj ri areʼ e kubʼan ri utz chrech. Jeʼ jas kubʼan ri Kristo chech ri Ukomon Tyox:

¿La man uj ujtzʼaqatil ta ri Ubʼaqil?

Rumal kʼuriʼ ri achi keʼuya kan riʼ ri unan utat e kuyutʼ na ribʼ rukʼ ri rixoqil e chi ekebʼ riʼ e jun chi bʼaqilal riʼ:

Wa weriʼ jun nimalaj awatalik, in kwaj kinbʼij weriʼ puwiʼ ri Kristo e puwiʼ ri Komon Utyox.

Kʼatekʼuriʼ kinbʼij weriʼ chiwech, iwonojel chiloqʼoqʼej ri iwixoqilal jeʼ jas uloqʼoxik iwibʼ ri ix e ri ixoqilal nim chrilaʼ wi ri rachajil.

Ix alkʼuwaʼlaxel chixniman chrech ri kitzij ri inan itat, pa ri Ajawxel; rumal che utz weriʼ.

Nim chiwilaʼ wi ri itat e ri inan, are waʼ weriʼ ri nabʼe pixabʼ che kʼo jun chiʼnik chrech,

arech ri at, at kiʼkotemal katkʼojiʼk e kkʼojiʼ jun nimalaj akʼaslemal choʼ ri uwachulew.

E ri ix, ix nan tat, mibʼan ri kʼax chkech ri eʼiwalkʼuwaʼl, are chikʼutuʼ ri utzil chkiwach, chikʼajisaj kiwach e chibʼij chkech jujun taq tzij jacha ri kraj ri Ajawxel.

Eʼajchakibʼ chinimaj kitzij ri eʼiwajaw chuwachulew rukʼ xibʼrikil, rukʼ jun utzalaj iwanimaʼ, jeriʼ jacha ri nimanik chrech ri Kristo;

mixnimanik rumal rech che are kiwaj utz kixkanaj chkiwach ri winaq, xane chibʼanaʼ che ix rajchakibʼ ri Kristo che rukʼ kanimaʼ kkibʼan ri urayibʼal ri Dyos.

Ri ichak ri ix, xas chuwach ri Ajawxel chibʼanaʼ wi e man chkiwach ta ri winaq,

ri ix, iwetaʼm che ronojel ri utojbʼalil kuya ri Ajawxel jeriʼ jas ri utz ubʼanik xibʼano, we ix ajchak on we ix ajaw.

Kʼatekʼuriʼ, ri ix ix ajawibʼ, jeriʼ chibʼanaʼ ri ix kukʼ ri eʼareʼ, mibʼan ri kʼax chkech e chichomaj che ri ix e ri eʼareʼ kʼo ri Iwajaw pa ri kaj e che ri areʼ man are ta kril ri upalaj ri winaq.

Kʼatekʼuriʼ, ri ix chikojoʼ ichuqʼabʼ pa ri Ajawxel e pa ri ukowil ukʼaslemal.

Ri ix, chiwatzʼyaqij ri jetaq chʼichʼ rech chʼoʼj rech ri Dyos, arech ri ix ix ko chuwach ri Kʼaxtok.

Rumal rech che ri uj man kujchʼojin ta kukʼ enikʼaj kʼulel rech kikʼel e ri bʼaqilal, xane kujchʼojin rukʼ taq ri Ajawibʼal, rukʼ taq ri Chuqʼabʼ, rukʼ taq ri eʼajaw che erech qʼequʼm ekʼo chuwachulew, rukʼ ri eʼuxlabʼal che ekʼo pa ri kaj.

Rumal kʼu waʼ weriʼ, rajawaxik che ri ix kiwatzʼyaqij ri chʼichʼ rech chʼoj rech ri Dyos, arech, pa ri itzel qʼij ri ix kʼo ri ichuqʼabʼ, e aretaq chiʼ xkʼis ronojel weriʼ, ri ix qas ko kixkʼojiʼk.

Ri ixtakʼalik kanoq; ximitalik ri uxeʼ ipam rukʼ ri Saqalajtzij, iwatzʼyaqim ri sukʼil jeʼ jas iwatzʼyaq rech chʼoʼj,

are ixajabʼ ri achixom kikojo, arech kjubʼux uwach ri Utzalaj Tzij rech ri Nimalaj Utzil,

che are kʼo pa ri iqʼabʼ ri chʼichʼ rech ri kojonik, arech rukʼ weriʼ ri ix kixkowin na riʼ che uchupik ri jetaq chʼabʼ che rukʼ qʼaqʼ utzijom ri Itzel;

xoqujeʼ, chikojoʼ piwiʼ ri ix ri chʼichʼ rech ri Kolotajem, e pa ri iqabʼ ri chʼichʼ rech chʼoʼj rech ri Uxlabʼaxel che are ri Utzij ri Dyos.

Chkʼojiʼ bʼaʼ ri ikʼaslemal pa ri chʼawem rukʼ ri Dyos amaqʼel chixchʼaw rukʼ ri Dyos, pa ronojel qʼij, utz ubʼanik chibʼanaʼ weriʼ, chixchʼawoq pa kitoqʼobʼisabʼal kiwach konojel ri etyoxlaj taq winaq.

Kʼatekʼuriʼ, chixchʼaw bʼaʼ panuwiʼ ri in rech toqʼobʼisabʼal nuwach, arech ri in kinkowinik che ubʼixik ri Tzij arechiʼ kinjaq ri nuchiʼ e arech kinkowinik rukʼ choqʼabʼ kinkʼutu ri kʼuʼtalik Utzalaj Tzij,

ri in che inyaʼl ubʼixik aretaq chi inximitalik pacheʼ; chuyaʼ bʼaʼ ri Dyos chwech arech ko kinya ubʼixik ri tzij.

Ri in kinwaj che ri ix kiwetaʼmaj, jas ri ubʼeʼal inbʼenaq e jas ri tajin kinbʼano; are ri Tikiko kubʼij na riʼ ronojel chiwech, ri are che loqʼalaj achalaxik e utz kchakun wukʼ pa ri Ajawxel.

Kintaq ubʼiʼ ri areʼ iwukʼ, arech kuya qatzijol chiwech e arech kuya uchuqʼabʼ ri iwanimaʼ.

Ri Dyos Tatxel e ri Ajawxel Jesus Kristo, kkiya ri Utzil chkech ri eʼachalaxik, rukʼ ri loqʼoqʼebʼal kʼux e rukʼ ri kojonik.

Ri Usipanik ri Dyos chkech konojel ri winaq che kkiloqʼoqʼej ri Qajawxel Jesus Kristo, pa ri kʼaslemal che makqʼiy taj.