Kristu duwik nagkamas nugkash najannatsaig pujujakua nunú chichaamu antuku asá, ni iwainaja takaamushkam puyatjusa iina jiin wainkaju asá, ii uwejinish achiká dekapsauwaitji, chicham pujuta sukagtin Kristuwa nunú.

Nunú pujut tuke atinun sukagtina nu Aentsmaga waintintugmakui. Nunú wainkau asaja pujut tuke atinun sukagtina nu pachisa etsegtaji, nigka yaunchkek ni Apajijai pujuwaitak wantintugmakui.

Nunin asamtai jutiik ii wainkamu aidau, ii antukbau aina nu etsejuinaji, jutii Apajuijai ijutkau ni Uchijí Jisukristujaish ijutkau pujuinag nunisjumek, atumshakam jutiijai ijutkau atajum tusa.

Ju dekaajum atumesh shiig aneakjumin, jutiishkam shiig aneasagmi tusan agatjime.

Jisukristu jintinjamkui antukuitag nuna ujajime, Apajuik makichkish pegkegchaunak takachui, iman asamtai niinig makichkish pegkegchauk shiig atsuuwai.

Jutii Jisukristujai ijutkau pujajai tayatku, pegkegchau takata duke wekaetakuik, waitjaku tu wekaemainai, dekaskea duke takaachiatku tau asá.

Tujash Apajuí makichkish pegkegchaun takatsuk pujuwa nunisaik, jutiishkam pegkegchau takatsuk pujaku, tikich aidaujaish ijutkau pujajinig, Apajuí niina Uchijí Jisukristu jutii tudaujin mantamdauwa nuna numpeen, ashí iina tudaujinash nijatjamag esakatjamui.

Tujash minak tudauk atsugtawai tumamkuik, iik pempeentumaki tsanuumaku tu wekaemainaitji, dekaskea nu tachau asá.

Dekas tu wekaetsuk, wika tudauwaitjai tusa Apajuí ujajinig, tsagkugtamag bakumamainchau etamtatji, nigka pegkeja ibau asa, ni tibaujinash betek umina duwi.

Tuja wika tudaunak takachujai tumamkuik, Apajuí waita nunin emaku taji, niina chichamega nu aatus tujamtsaig tau asá.

Mina uchuchig aidauwah, jujú aidaunak tudaun takasainum tusan agatjime. Tujash makichkitigmekesh yajá aneasjum tudau takaakjumesh dekaatajum, Apajuí emtin iina ayamjutpauk Jisukristu pegkegma nu pujugtamui.

Niiyai iina tudaujin tsagkugtamjatatus jakauwa duka, tujash imá jutii tudaujinkik nunikchauwai, ashí nugkanum aents batsata nuna tudauji tsagkujata tabaunum jakauwai.

Nuaduí niina chichame betek umiakuik, Apajuish yaita dusha shiig dekamainaitji.

Tuja aents: “Apajuik mina kumpajui” tayatak, chichaman umigchauk waitjak tu wekaewai, wagki dekaskenum tachau asa.

Tujash aents Apajuí chichame umiak puja nu dekaskenmag iwainawai Apajuí aneamujiya nunak. Nuniau asagmatai dekamainaitji Apajuijaimpap ijutkau ainawa tusa.

Aents Apajuijai ijutkau pujajai tauk, Jisukristu pujujakua nunisag pujumainai.

Yatsug aidauh, ubag aidauh, junak yamajam chicham umiktinak agattsujime. Kristu chichagtamak: Pempentunisjumek aneenitajum, tujabiuwa nuna agatjime. Tujash nunú chichamak yaunchuk nagkamsajum antujakuitjume.

Ju chichamak duwik tibauwa nuninaitak, yamagma nunin wega nuna pachis, Jisukristu umiktajum tujabiuwa nuna agatjime. Nuna umiinak dekas pegkeja nuna takainak, yaunchuk pegkegchau takaajakbauwa nunak idaisatnume tusan.

Aents Apajuí umigjai tayatak yachin kajejakug, pegkegchaun takaak nuniawai.

Tuja ni yachin anea duka pegkejan takaawai. Nuniau asa pegkegchaunak takagmaitsui.

Untsu yachin kajeja duka pegkegchaun takaak nuniawai. Pegkegchaunak takau asa, aents wainmachu wajukmaina numamtuk wajainawai.

Uchuchig aidauh, atumnak Jisukristu mantamnamunum Apajuí tudaugminak tsagkugtamjaju asagmatai agatjime.

Uchigtin aidautigminash agatjime, yaunchuk nagkamas nugkash najannatsaig tuke pujujakua nunú shiig dekau asagmin. Datsauch aidauh, atumnashkam agatjime, iwanch depetkau asagmin. Uchuchig aidauh, atumek iina Apají Apajuiya nu dekau asagmin agatjime.

Uchigtin aidautigminak agatjime, yaunchuk nagkamas nugkash najannatsaig tuke pujujakua nu dekau asagmin. Atum datsauch aidautigminashkam agatjime, atumek senchi asajum, Apajuí chichamega nu umiakjum, iwanch depetkau asagmin.

Pegkegchau takat ju nugkanmaya aidaun, Apajuí nemagchau takaina duka takasaigpa. Aents ju nugka juwiya pegkegchau takat aina nuna imá wakegak, juwiya takatnak takaa pujuidauk Apajuinak aneatsui.

Ashí nugkanum ayaa duka wainku wakejunui, tuja kuashat wajigtin asá, iik eme anentaimtumamua dushakam Apajuinumiachu ainawai. Nunak aents Apajuí nemajuinachu ju nugka juwi batsamas nuninawai.

Ju nugka juka, ashí wakejumain ayaa nujai megkaejattawai, tujash Apajuí wakegamun takaina nu tuke pujutin ainawai.

Uchuchig aidauh, yamaik tsawan nagkanbaunum batsatji, atum antukuitjume makichik aents Kristun shiwagbau atinai tabau. Yamaik kuashat aents nunin aidau wantinainawai. Nunidau asagmatai dekainaji tsawan nagkanbaunmap jeganji tusaja.

Duka jutii ainag juwiyag jiinjaje, tujash dekaskenmag jutiinumiachu asag aaninawai, jutii ainag juninuk ainakug, jutiijaig ijutkau batsaamain ainawai.

Tujash atumnak Jisukristu Wakaní Pegkejiya nuna sujamas, aents Apajuí nemagchau aina nujaig akantamkaju asamtai, dekaskea duka dekagme.

Junak atumnak dekaskea nu dekachu asagmin agattsujime, atumek juka shiig dekagme, makichkish waita nuwiyag dekaskek jiinmainchauwa duka.

¿Yaita waitash? ¿Jisusnak Apajuik Apu atí tusag etejachui tuina duchaukaih? Dekas nu ainawai Apajuin Uchijijai shiwagmagaina duka. Tuja Apajuinashkam niina Uchijin shiwagma dutiksag dakitainawai.

Ashí aents Jisusan pachis Apajuí Uchijichui tuina duka, Apajuijaig ijutkauk ainatsui. Untsu Jisusak Apajuí Uchijiyai tusag dekaskenum etsegtuina nuuwai Apajuijai ijutkau aidauk.

Yama nagkamchakjum antukuitjum nujaig pujakjumek, nu antukuitjum nunú imanisag ajutjamkuig, atumshakam nunisjumek Apajuijaish, niina Uchijiya nujaish ijutkau atatjume.

Duka Jisus pujut tuke atinun anagtamauwa nuuwai.

Junak agatjime tsanugmagta tuidau aidau asagmatai.

Tujash atumek Wakaní Pegkeji Kristu sujamsamua nu ajutjamu asamtai: Yaki Apajuin pachis jintinjuawa, tusagmek atsumaitsugme. Wakaní Pegkeji waitan jintinkagtutsuk, dekaskea nunak jintinjamaina nunisjumek pujakjum, Jisukristujaig ijutkau pujustajum.

Yamai uchuchig aidauh tajime: Imá Kristujaig ijuntsajum batsamsatajum, ni minakuish kajintsá datsamtsuk puyatkas igkugkagmi.

Atumek Kristu pegkeja duka dekagme, nunin asajum ashí aents Apajuí pegkeg wakegamua nuna takau wainkugmek, dekas Apajuí uchijimpap ainawa tusajum dekaatajum.

Anentaimsa diistajum wajupa iina Apajuí anempatsua, imatijamu asa mina uchig atajum tujamatai, yamaik niina uchijí waigji. Nuaduí aents Apajuin nemajuinatsu duka, Apajuish yaita nunak dekaachaju asag, jutiinashkam nunisag Apajuí uchijimpap ainawa tusajag dekagmainatsui.

Aneetaig aidauh, yamaik Apajuí uchijí ainaji, ii wajuku atinaitji duka yamaikik waintsuji, tujash dekainaji Jisukristu wantintugmaktina duwi, iishkam niiya imanuk agtinaitji, nunikaja wainkatnaitji shiig ni wajukuita imatiksaik.

Nuaduí aents niina dakaidauk, pegkegchaun takatsuk batsamas dakamainai, Kristu makichkish pegkegchaun takaschauwa nunisag.

Untsu aents pegkegchaun takaina duka, Apajuí takasaigpajum tibauwa nuna umiinachu asag nuninawai. Pegkegchau takata duka chicham umiachbaunum nuninui.

Atumek shiig dekagme, Jisukristu machikish pegkegchaunak takachu asa, jutii pegkegchaujin bakumamaina nuna agkanmitkagmatatus ju nugka juwi tajutjabauwa duka.

Nuaduí ashí aents Jisukristujai ijutkau pujuidauk, tudau takaajakbaujiya nunisagkek takaak pujumaitsui. Untsu aents tudaun takaina duka, Kristujaig ijutkauk ainatsui, nuigtushkam yaita Kristush nunash shiig dekainachu asag nuninawai.

Uchuchig aidauh, kuitamamkatajum makichik aentskesh tsanugmajainum. Aents pegkeg aina nuna takauk, pegkeg asa nuniawai. Nunú aents aidauk Apajuí emtinish pegkeg ainawai, Jisukristu pegkeja ibauk.

Tujash pegkegchaunak takaa wekaga duka, iwanchdau asa nuniawai, iwanch nugka yama najanetnum nagkamas pegkegchau takasua nujai betek takaidau asag. Nuaduí Apajuí Uchijiya nu, iwanchi takatjin emegkagtatus tauwai.

Apajuí uchijí aidauk pegkegchau takatnakek wejumain ainatsui, Apajuí pujutjiya nunú ajamu asag, tudaunak takaak pujumaitsui, Apajuí uchijí asag.

Duwi shiig dekanui ya ainawa Apajuí uchijí aidaush, tuja ya ainawa iwanchi uchijí aidaush. Iwanchi uchijí aina duka, pegkeg takatnak dakitin ainawai, nuigtushkam tikich aidaunash aneasash diichu ainawai.

Atum yama nagkamsajum chicham etsegbau antuku ainajum duka, tikich aidaujaish iikdaisa aneediagmi tawa juuwai.

Jutiik Caín iwanch wakejamun umiau asa, yachin mauwa nuninuk amaitsuji. ¿Wagka mauwaita? Caín ni takaamua duka pegkegchau asamtai, ni yachi imá pegkejan takatai kajejak mauwai.

Mina yatsug aidauh, ubag aidauh, aents Apajuí nemagchau aidau kajegtamainakuish, kajegtuinawapi tusagmek anentaimtú batsamigpajum.

Jutiishkam eke Apajuijai ijutkachu aajakuitag duwik, Apajuiyaig kanakú asá megkaekaujai betek aajakuitji. Tujash yamaik iina yachi aneau asaja, Apajuiyai ijutkau ainag duwi, tuke niijaig pujutnaitag nu dekainaji. Aents tikichin aneenatsu duka, eke Apajuijaig kanakú ainawai.

Ashí aents yachin kajejuina duka aents magkagtinjai betekai. Atumek shiig dekagme, magkagtin aidauk atakesh pujut tuke atina nunak jukishtin ainawai.

Jutiik Jisukristu iiní mantamdauwa duwi anenkak dekauwaitji. Ni jutiiní mantamnak waittsau asamtai, jutiishkam nunisaik nunimainaitji tikich Jisukristun nemajuina nui.

Aents Apajuí nemajin kuashat wají ajamaitak, tikich yachi atsugbau asa waitiaun wainiatak yayaatsu duka, Apajuí jutiin anempa nunú anenkak atsugbau asa nuniawai.

Mina uchuchig aidauh, jutiik imá chichamaikik anejatnuk amaitsuji, dekaskenum aneeniamua duka, ii yainiamunum iwainmamainaitji.

Dekaskenum pempeentuniki aneeniamua duwi, Apajuinuap ainaji tusaik dekainaji. Nunin asaja Apajuí aujkuishkam, jutii bakumamainuk atsugtamjiapi tuinaji.

Jutii pegkegchau takasbauji anentaimtuja dekaku, wake besemag dekapeajinchakam, Apajuí jutii anentaimtajin nagkaesaun shiig dekauwa iman asa, ni imá shiig dekagtamji.

Mina aneetaig aidauwah, ii nu aaja anentaimchamu atsakuig, jutii bakumamainuk Apajuí emtinig atsugtamjiapi tumainaitji.

Nuniaku ii atsumamuji aina nu segamak amastatji, niina chichamesh umigku, ashí wají niina shiig awagma duke takau asajin.

Ni chicham umiktajum tujabauwa duka: Niina Uchijí Jisukristui dekaskeapi takujum, ni tibauwa dutiksaik tikichjaish aneenitajum tawa nuuwai.

Aents Apajuí chichamen antujuk betek umijuk niijai ijutkawai. Nuniau asamtai Apajuishkam ditajai pujawai. Jutiik ni Wakaní Pegkejin sujamsauwa nu dekamtijamu asamtai, ni iiní pujamushkam shiig dekainaji.

Aneetaig aidauh: Apajuí dekamtijuae, tusa etsejuinakuish dekaskeapi tiigpajum. Dekas Wakaní Pegkeji ichachiamash tawa, atsa wainak tu wekaetsuash tusajum dekatkauk antugtá antugkatajum. Wagki kuashat waitan jintiidau ju nugka juwi yujaidau asagmatai.

Dutik dekamainaitjume aents dekas Wakaní Pegkeji chichamtikam chichaidauk. Ashí aents: Jisukristuk dekas Aentsmaga Akiinauwai, tuina nuuwai Wakaní Pegkeji ajamu aidauk.

Ashí aents: Jisukristuk aentsmaga akiinachui, tuina duka Wakaní Pegkejiya duka atsujui. Duka wakan Kristun shiwagbauwa nu ajamu asa tuinawai, atum yaunchuk nunin wantintinai tibau antukuitjum duka yamaik ju nugka juwig wantinui.

Uchuchig aidauh, atumek Apajuinu asajum, nu waitan etsejuina duka depetkaugme, Wakaní Pegkejiya nu pujugmau asajum. Dekas atumiin pujugtamjum nuuwai imá senchigtinuk, iwanch aents Apajuin shiwagbau aidaunum inama nuna nagkaesau.

Ditak ju nugkanmaya asag juwiya wajinak chichaagtai, tikich aents Apajuin dekainatsu duke antujuinawai.

Tujash jutiik Apajuinu ainaji. Nunin asajin, Apajuin shiig dekaina duke jutiinak antugtamainai. Untsu Apajuinuchu aidauk antugtamtsuji. Nuninakui dekainaji yaita Wakaní Pegkeji dekaskea nu dekamtikamu aidaush, tuja yaita dekaskechua nuna chichaina dushakam.

Aneetaig aidauh, Apajuí aneenitan sujabauwa duwi, pempeentuniki aneediagmi. Ashí aents dekaskenum anejatuina duka Apajuí uchijí ainawai, nunidau asag shiig niinash dekainawai.

Untsu anejatuinatsu duka Apajuinak shiig dekainatsui. Apajuí ashí dutika nunak anejatbaujin aikawai.

Nuniau asa Apajuik, niina Uchijí makichkiuchia nuna awetugmauwa duwi dekamtijamauwai, ni jutii anempamujinak: Mina Uchig ditan uwemtikak pujut tuke atina nunashkam susatnume, tujamu asa.

Jutiichuitji dekatkau Apajuí aneejakutik, niiyai jutii aidautin anempajua duka. Nuniau asa jutii suwimak jumaina nunak, niina Uchijin jutii tudaujin mantamnati tusa akuptugmakui.

Aneetaig yatsug, ubag aidauh, Apajuí jutiin aatus anempaju asamtai, jutiishkam tikich aidaujaish pempeentuniki aneenimainaitji.

Makichik aentskesh Apajuinak wainchau ainawai. Nunin aigkish jutii tikichjai aneeninakuik niijai ijutkau ainaji. Nuniau asajin ni anejattaijiya nunú jutiinashkam pegkegnum aputamji.

Jutii Apajuijai ijutkau asajin, Apajuishkam jutiijai ijutka duka, Apajuí Wakaní Pegkejin sujamsauwa duwi dekainaji.

Dekas jutii Jisusjai ijuntsa yujasú aidauti shiig wainkaju asaja, Apajuik niina Uchijin ju nugka juwiya aents aidautin uwemtijamjatnun awetugmauwai tusa etsejuinaji.

Ashí aents Jisusak Apajuí Uchijiyai tuina nujai Apajuik ijutkawai. Aantsag nu tuina dushakam Apajuijai ijutkau ainawai.

Aaja dekainaku dekaskeap Apajuik anejatua tuinaji. Apajuik anenkai. Aents tikichin anea nunuwai Apajuijai ijutkau aidauk, tuja Apajuishkam nu aentsjai ijutkawai.

Apajuik yaimpaji ni wakega dutiksaik tikich aents aidau aneetnum. Tuja Apajuí ashí aents takasbaujin diijus titina nunú tsawan jegatna duka ishamatsji, wagki ju nugka juwi pujakuish, Kristu Apajuijaig ijutkau pujujakua nunisaik pujuidau asaja.

Anejatut abaunmag ishamamuk atsuuwai. Anejatbauwa nu ishamamunak emegkainai. Apajuí anejata nuna dekaidauk Apajuinak ishamainatsui. Apajuí ni wakega dutiksag tikich aidaunash aneetnume tusa yaimpaina duwi, jutii Apajuí ishamainuk makichkish atsugtamji. Aents Apajuin ishamaina duka, Apajuí wakega dutiksaik tikich aneashbaunmap, suwimkanak sujustatua tusa ishamainawai.

Jutiik ni Apajuí nagkamchak anempaju asamtai, iishkam aneaji.

Makichik aentskesh: “Wika Apajuin aneajai”, tayatak yachin kajejakug, waitjak tawai. Yachin ni wainbaunakesh aneatsu aniaush, ¿utugsaya Apajuí waintsu nuniaush aneemainaita?

Jutiinak ju chicham umiktajum tujabiuwai. Apajuin anea duka yachinash dutiksag aneeti tibauwa nunuwai.

Ashí aents Jisusan pachisag, Apajuí Jisusnak Apu atí tusa etegkauwai tuina duka Apajuí uchijí ainawai. Apajuí aneakuik ni uchijí aidaushkam aneaku dutiknawai.

Apajuí aneaku niina chichamesh betek umiakuik dekanui, tikich Apajuin nemajuina nunash aneajapita tusaja.

Apajuí aneamuk ni chicham umiktajum timawa nu imatiksaik umiamua nuuwai. Ni chicham umiktajum tujamawa duka kakajus umikchamna nuninchauwai.

Wagki Apajuí uchijí aina nuuwai pegkegchau aidaunmash depetmauk, nunú depetmamua duka jutii Apajuiyai kajintsá anentaimainag duwi depetmainaji.

Kristuk Apajuin Uchijiyai tusa dekaskeapi tuina nuuwai pegkegchaunmash depetmaina duka, nunú aidauk Apajuí nemagchau wajukena nuninatsui.

Jisukristu Apajuí Uchijiya duka, Juan yamijua duwi Apajuí chichaak: “Ametme mina uchig aneetaigmek” tiuwa duwi dekanauwai. Nuigtushkam ni jaak numpen ukajua duwi kuashat wají nagkaemajua duwishkam dekanauwai. Nunisag Wakaní Pegkeji dekasken chichauwa dushakam: “Jisukristuk Apajuí Uchijiyai” tusa etsegtawai.

Jujú kampatuma juuwai dekaske tusa etsegtuina duka:

Wakaní Pegkejish: “Juka Apajuí Uchijiyai” tawai, aikasag Apajuishkam Jisus yamimagmatai chichaak: “Mina Uchijui” tiuwai, Jisus ni mantamnak numpeen ukajua duwishkam iwainmamkauwai Apajuí Uchijiya nuna. Ju kampatuma juka ashí Jisusnak “Apajuí Uchijiyai” tuinawai.

Aents aidau etsejuinakuishkam antuinaji, tujash Apajuí: “Mina Uchijui” tiuwa nu imá shiig antugmainaitji.

Apajuí Uchijiya nui kajintsá anentaimaidautik, Apajuiyai dekaskeapi tuinaji. Untsu Apajuin dekaskeapi tachauk, Apajuin waita nunin emak nuniawai. Ni Kristun pachis: “Mina Uchijui” tiuwa nuna dekaskeapi tuinachu asag.

Apajuí chichagtamak: “Wi pujut tuke atinun amastinaitjime”, tiuwai. Nunú pujuta nunak niina Uchijí Jisukristua nu sukagtawai.

Apajuí Uchijijai ijutkau pujuidautik, pujut tuke atina nu ajutjamainaji. Untsu Apajuí Uchijijai ijutkau pujuinachuk, nunú pujut tuke atina duka atsujuinawai.

Jujú aina junak Apajuí Uchijiya nu dekaskeapi tuidau asajum, pujut nagkanchau jukiuwaitjum nunú aidautigmin dekaatnume tusan agatjime.

Jutiik Apajuí wakegamua dutiksaik segamak antugkagtinapita tuidau asá, shiig kajintsá anentaimainaji.

Ii segamunash antugtawapi tusa dekainag nunisaik, ii sumamushkam dekas jukittajapi tumainaitji.

Aents Jisukristun nemajiatak tudau tsagkugnashtaya nuna takaachu wainkugmek Apajuí segatmainaitjume, dutikam ni pujutan sumainai. Awai tudau tsagkugnashtaya nu, wika nuna takaidau Apajuí segattajum tusanuk tatsujime.

Ashí pegkegchau takaamu aina duka tudau ainawai, tujash tudau Apajuiyai tuke datumtamainush awai.

Ashí aents Apajuí uchijí wajasú aidauk, duwik tudau takaajakbaujiya nunakek takaa pujumainchau aina duka dekainaji. Ditanak Apajuí Uchijí kuitamu asamtai, iwanchik pegkegchauwa nunak takastí tusag inamaitsui.

Jutiik Apajuinu ainag duka dekainaji, untsu ashí aents Apajuí nemagchau aina duka iwanchi inatai ainawai.

Dekainaji Apajuí uchijí ju nugka juwi tajutjama, Apajuí dekas tuke pujuwa nunash shiig dekamtijabauwa nu. Jutiik Jisukristujai ijuntsa pujuinaji, niiyai dekaskenmag Apajuik, nigki pujut tuke atinun sukagtina dushakam.

Uchuchig aidauh, wainka apajimtai aina duka ememattsuk, dekas Apajuiya nu ememattajum. Aatus atí.