Witjai Pabloitjai, Kristu Jisus chicham etsegtugkata tusa etegkamuitjai, Apu Kristu Jisus pegkejan sujabau jukitasa dakainaku niiní kajintsá anentaimainag nunú. Apajuí ii uwemtijamna nunú Kristu Jisusjai minak awetiuwai.

Timoteoh, juna papiin agatjame, wi chicham etsegbau antukam, Apu Kristu Jisusai kajintsá anentaimat jukiu asam, amek dekas mina uchijua imanaitme. Wakegajai Apajuí iina Apajiya nu, Jisukristu iina Apujiya nujai, wait anenjamag aminash shiig agkan anentaimsa pujutnash amastí tusan.

Wi Macedonia nugkanum wegakun, amek Efeso juwakam, makichik aentskesh waitan jintinkagtuawainum diiyaku atá tibaijam dutiksanuk yamaish tajame. Anuí aents waitá jintinkagtuina duka: Jintinkagtuawaipajum, tita.

Dutikakum ujaktá, wainka augmattsamu aidaun, nuigtú ditá muunji aajakú ejechamnun augmatú yujainak tsawantan megkagá batsata nuna idaisatnume tusam. Nuna dekaatatus wakejuidauk wainak jiyanitú yujau ainawai, tujash duka makichkish Apajuiyai kajintsá anentaimtanmag yaijattsui.

Wi juna taja nunak, Kristu nemajin aidauk pempentunisag aneenitnume tusan tajime. Nuna aatus aneeninak iwainainawai dekaskenum Kristui kajinas anentaimainamun, dekaskes Kristui kajinas anentaimainatai tumain wajatsuk.

Tujash wajumak aents nuna idayinak, kanakag wainak chichaa yujainawai.

Apajuí chicham umiktá tibauwa nuna jintiin atatus wakegainawai, ditakesh dita chichainamuji, tuja dita jintinkagtuinamujinakesh shiig dekainachiatak.

Chicham umiktinun Apajuí tibaun Moisés agajua nunú, imatiksaik umiamuk pegkeja duka dekainaji.

Chicham umiktina duka aents pegkejan takau aina nunú umiktinme tichamui. Ju chichama juka aents intimkiu aidau, chichaman umichu, tudau takau, Apajuinash ajantus diichu, chichamenash dakitin, pegkegchaunak takau, patayinak pempeentuki main, apajinash dukujinash main aidau, ashí aents magkagtin,

tsanijimtan wekaetin, mai aishmagkuk pempeentuniki dutikdayin, aentsun kasamak sujin, waitjin, tikichin tsanuak Apajuí daajin adayin, nuigtushkam chicham pegkeg Apajuí pachisa jintiamua dutiksag takatan dakitin aina nudauwai.

Pegkeg chicham jintinkagtamua duka, Kristu pachisa jintinkagtamua nuuwai. Apajuí shiig eme anentsá emematam pujuwa nunú, minak: Uwemat awai tusam etsegkata tusa awetiuwai.

Iina Apuji Kristu Jisusan see tajai, mina betek umimainun waitu asa, takagtusti tusa niina senchijin sujusua duwi.

Duwikik wika Jisusan pegkegchaun chichagkun, niina nemajuidaunash aikasnuk pegkegchaun chichagkun waitkau ayajai. Tujash nunak Jisusak Apajuí Uchijimpapita tusan dekachu asan, dekaskeapi tumainchau dekapeakun nuniyajai, nuní pujai Apajuí minak wait anenjujui.

Dutijuau asa shiig kuashat wait anenjug tsagkugtug, Kristu Jisusai kajintsá anentaimtan sujusuí, nuniak pempeentuniki anenitnash, Apajuí aneetnashkam sujusuí.

Juka shiig dekaske, ashí dekaskeapi tumain ainawai: Kristu Jisus ju nugka juwi tauwa nunak, aents tudau aidaun uwemtijatatus tauwai. Nu tudau aina nuwiyag dekas imá senchi tudaunuk witjai, tikich aidaun nagkaesaunuk.

Tuja wi iman aigkish, Jisukristu wait anenjug tsagkugtujui, ni waamak kajeachbaun tikichin iwaintukta tau asa. Juna wainak tikich aidaush: Jisukristu minash wait anenjawapita, tusag niiní kajinas anentaimainak pujut nagkanchaun jukitnume tusa.

Nuaduí Apu tuke pujuwa nu, ajumaish jakashtin, waintash wainmainchauwa nunú, Apajuí makichkiuch ashí dekauwa duke eme anentsá tuke ememattai atí. Aatus atí.

Uchuchi Timoteoh, jujú umiktá tajame: Apajuí etsegtin aidau amina pachipas, Apajuí chichamen etsejin atinai tujabiuwa nunismek, shiig anentaimsam pujusam imá Kristuig kajintsam anentaimkum senchi takastá, waitan jintinkagtuina nunú depetkata tabaunum.

Ame Jisukristui kajintsam anentaimam duka dutiksamek shiig anentaimsam pujustá, tikich aidau pegkegchaun takainak Kristu kajintsá anentaibaujin megkaekaja nunikaim.

Nunak Himeneo, Alejandrojai nunikaje. Nunikmatai iwanchin idaitusmajai, ni waittan susati, dutikam Apajuí pegkegchau chichagchau atinme tusan.

Dekatkauk jujú dutikatajum tajime: Apajuí aujkugmek, ashí tikich pachisjumesh segattajum ni wait anentug yaigtí tusajum, nuniakjum see titajum ashí ni yaibau pachisjumesh.

Ashí apu aidau pachisjumesh Apajuí aujtustajum, shiig agkan pujuinaku, tutitag atsamunum Apajuí wakegamuk umigku batsamsami tusajum.

Ju aaja augbau Apajuí iina uwemtikagtina nunak shiig awagmawai.

Nigka ashí aents uwemjatnume, nunikag dekaatnume dekaskea nuna, tusa wakegawai.

Apajuik makichki, nunisag aents aidautin Apajuijai epegtugmaushkam makichki: Duka Kristu Jisusai.

Nigka ashí aentsun uwemtijata tau asa mantamdauwai. Tsawan ni tibauji umintai Apajuí iwaintugmakui ashí aentsun uwemtijatatus wakejukua nuna.

Nuaduí wika chicham etsegkata tusa etegka awemamuitjai, nuigtushkam Jisukristun kajinas anentaimtustinme judiuchu aidaush jintintuata tibauwaitjai. Wi juna taja juka dekaske, waitjatsjai.

Nuaduí ashí yantamnum Apajuí ausami tusag ijunjamunum, aishmag aidau Apajuin aujuinakug, tikichjaish shiig anendaisag kajetsuk batsamas, Kristu shiig nemajuinak batsamsatnume tusan wakegajai.

Tuja aantsag nuwa Kristu nemajin aidaushkam Apajuí ememattasa ijunbaunmag, nuwa shiig anentaimkau iwagmamaina nunisag iwagmamjatnume tusan wakegajai. Nunisag intashinash shiig iwajug tikich aents aidau anentaimtuja diimain wajas yujatsuk, patakumtai oronash, peetai akik aidaun peeká, jaanch pegkeg akik aina imanun puyatjus iwagmamjatatus wakegá yujainmegka tusan.

Ayatak pegkejan takainak aents aidaush pegkegnum chichajam atinme, nuwa Apajuí wakegamun umin wajuk pujumainaita nunisag pujuinak.

Nuwak tuwakbaunum aishmag jintinkagtutaik takamtak pujus shiig antumain ainawai,

nuwa aidaunak ijunjamunum wajakí jintinkagtuati tatsujai, nuwak aishmagkun wagagkig dutikata tumaitsui, takamtak jintiamunak antumainai.

Apajuik dekatkauk Adagkan najana, duwi Evan najanauwai.

Adagkak iwanch tsanuamak asachui, Eva tsanuam asauwai, dutikamu asa Evak tudaun takasuí.

Tujash nuwa aidaush uwemjatnai, Jisukristu nuwanum akiinau asamtai. Tuja dita: Jisukristuapi uwemtijumainuk, tusag niina aneenak, tudaujin idayas pujuinakug uwemjagtinai.

Jisusa nemajuidaun diin atatus wakejuina duka, dekas pegkeg takata nuna wakegainak tuinawai.

Tujash aents nunú takatan wakejauk pegkegchauji diigsaish jiyashtai amainai: Makichik nuwentin imá nuwejaig pujustatus wakeyin, emetug shiig esegag anentaimkau, eme anentsá diitai, jeen minitaish shiig aneas jukagtin, Apajuí chichame jintinkagtutnash dekau,

nampechu, maanitnash wakeechau, kuichkinash imá nigki kuashat ajuttí tusa wakeechau, wait anenkagtin, kakagchau.

Nuigtushkam niina jeenish shiig chichas pujú amainai. Uchijí aidaush apajinash umijin, eme anenkagtus diijatin amainai.

Tuja ni jeenigkish shiig chichas pujachush, ¿itugsaya Jisusa nemajin aidaunash kuitamainaita?

Tujash Jisusa nemajuina nuna diinuk yamá sujumankauk amaitsui, ememak iwanch wajukauwa numamtuk wajak suwimkan jumain asamtai.

Nuigtushkam Apajuí nemagchau aidaush eme anentsá diitai amainai, pegkegchau chichajinum tau asa. Nunishtaik iwanch pegkegchau takamtiksamtai, Apajuí chichameshkam eme anentsá diiyam amainchau asamtai.

Nunisag Jisusa nemajuidau atsumamujin diin aidaushkam ajantusa diimain amainai, ni chichakbaujinash imatiksag umin, nampechu, takat pegkegchau aina nujai kuichkijinatatus wakegá wekaechau.

Nuigtushkam chichaman Apajuí iwaintugmakua nunash utujimtsuk dekaskeapi tinu amainai, nuniak dita dekaina nunisag pujumain ainawai.

Jisusa nemajuidau atsumamujin diin agtina duka, eke adaitsuk wajuk pujawa nu diigmain ainagme, dutikam utugchatkesh atsugkui duwi adaimain ainagme.

Nuna nuweshkam aantsag ajantusa diitai amainai, chichama wekaetuchu, emetug shiig anentaimkau, ashí betek umin.

Nunisag Jisusa nemajuidau atsumamujin diin aidaushkam makichik nuwentin, niina uchijinash shiig jintintin amainai.

Jisusa nemajuidau atsumamujin diin aidau takatan shiig takainakug pegkegnum augmatam amain ainawai, dutikam niishkam kajinmamas, Kristu Jisusai kajintsá anentaimta nunashkam etsegmainai.

Amina wainkatasan minita tayatkun juna papiin agajan awetajame,

wi yajá aneasan megkaekuish Jisusa nemajin aidau ijunjamunmash, wajuk pujumainaita nunú dekaata tusan. Jutii Jisus nemajin aidautik, niina uchijí waigkú asaja, Apajuí tuke pujuwa nuna aentsji ainaji. Nunin asaja jutii ainaji dekaskea nunú etsejin aidautik.

Dekas Apajuí iwaintugmakmawa nunuwai dekas ashí wagaakuk: Kristu aentsmaga wantinkauwai, Wakaní Pegkejishkam pegkegchaujish atsujui tiuwai, nayaimpinmaya aents aidaush wainkamu aajakuí, ashí nugkanum chichamesh etsegnakmatai, dita dekaskeapi tuidauk dekaskeapi tiaju ainawai, nunikmatai ataktú nayaimpinum jukimu aajakuí.

Wakaní Pegkeji shiig paan antumainun tawai: Tsawan nagkankattak wajataik, kuashat aents Kristu Jisusai kajinas anentaimtanak idayinak, wakan pegkegchau dekamtikam waitan jintinkagtuina nunú etsegbaun antujuinak.

Aents wainak tsanumaidaun antugkagtin ainawai, tujash duka datsantainkachu asag pegkegchau takainakush, pegkegchaunap takaja tusag dekapmamchagtinai.

Nuninak: Nuwenmaitsui, yutai yuwakuish ashí tinamjaik yutai aina duka yumaitsui, tiagtinai. Tujash jutii Jisus dekaskeapi tuidau asaja dekaskea dusha dekau aidautik, Apajuí ashí najankamua duka see tusa yumainaitji.

Ashí Apajuí ni najankamujinak pegkejai tiu asamtai, ashí yutaig dakittsuk see tusa yumainai.

Duwi Apajuí see tusa ashí ii yuwamuk iinishkam pegkejai, ni pegkejai tiu asamtai.

Jujú aajam yatsut Jisusa nemajuidau jintinkumek, Kristu Jisusan dekas shiig takajin atatme. Nuniakum Apajuí chichamega nu, nuigtú Jisukristui kajintsá anentaibau jintiam dushakam aan kuashat unuimagtatme.

Tuja wainak ju nugkanmaya imanchau augmattsamun augmatuina duka antujú wekayipa, amek Apajuí wakegamua duke puyatjusam umigkatasam kakanmamsata.

Iyash jamamtuchu atí tusa takamtikamua duka iyashnumag yaijatui, untsu Apajuí wakegamu puyatjusa umiktasa kakanmabauwa nu imá pegkejai, ju nugka juwi pujamunmash, atak nayaimpinum pujustinaitag duwish yaijatu asa.

Juka shiig dekaske. Nuniau asamtai ashí aentsuk dekaskeapi tumain ainawai.

Nuaduí waitiakuish senchi takaaji, Apajuí iwaaku pujuwa nunú dakau asaja. Niiyai ashí aents aidautin uwemtikagtumainuk, tujash imá Apajuiyaig kajinas anentaimaina nunak.

Juna taja ju, umiktajum tusam shiig jintinkagtuata.

Ame datsauch asamin imanchau chichagtaminum, dekas Jisusa nemajuina nuanuish iwainmamkata pegkeja duke chichaakum, shiig pujakum, anejatkum, Jisukristui kajintsá anentaimu asam pegkegchaush takatsuk pujakum.

Wi amina ijagsatasan eke anuí minatsaig, ijunjamunum Apajuí chichame aujkum, yatsug aidau, ubag aidau jintinkum anentai ichichtugta.

Jisusa nemajuidaun diin aidau, Wakaní Pegkeji dekamtikam, ame yupichu dutikatnun Apajuí anenjauch amasbaun etsegkamtai, ashí wainbaunum buukmin achigmakag Apajuin aujtugmainak, juuwai ame takatjumik tujabiajua nunú idaisaipa.

Ju aina juka shiig kuitamsam takastá, nuniamin ashí aents aidaush ame ju takatnum shiig eebaun waipakagtatui.

Kuitamamkam pujakum tikichish jintintuata, Jisus dekaskeapi tiuwaitam nunismek pujusam. Aajam takaakum ame suwimak jumainaitam duka uwemjattame, tuja tikich ame jintinbaushkam uwemjagtatui.

Muun aidau pegkegchau takainakuish jiyakaipa, ayatak amina apa anentsam chichagkata. Datsauch aidaushkam amina yatsum anentsam chichagkata.

Nuwa muunchakam duku anentsam chichagkata, tuja nuwa muntsujut aidaush ame umaim anentsam pegkegchau anentaimtutsuk shiig awajkata.

Nuwa waje aidau yaimainji atsujuina nu yaigtá.

Tujash nuwa waje uchijí ajuinamuk, nuniachkush tijajigkesh ajuinamuk, nunú uchi ditanak ashí atsumamujinash yaimainai, uchuch asamtai ditan kuitamkamu asa. Nunuwai Apajuí emtinish pegkeja duka, nigka nuna dutikatnume tusa wakegawai.

Tujash nuwa waje yaimainjish shiig atsugbau, imá Apajuinak dakak pujus tsawai kashishkam Apajuinak aujak puja nu yaigtajum.

Tujash waje ni iyashí pegkegchau wakegamun taká pujauk, tuke jakauwa nuninai iwaaku pujakush, nunin aidauk yaimaitsui.

Wi tajam nuna ditash betek dutikatnume tusa ujaktá, pegkegchauji diigsaikish tumainchau atinme.

Aents Jisusa nemajin niina patayí yaitan uyumatsuk, niina jeenianakesh uyumatsu duka, Kristui kajinas anentaimchau wajukmaina nuniawai. Nuniakug aents makichkish Jisusan anentaimtuchu aina nuna nagkagas pegkegchau wegawai.

Tuja nuwa wajemeaun Jisusa nemajin aidau yaigmí tusa papiinum agatuinakug, sesenta mijan ajamua nui nagkamas agatmain ainawai, makichkia aishintin aajakajua nuna,

nuigtushkam ni pegkeg takaamujish waitujakbau, uchijinash pegkeja jintintua tsakapaku, ijagnash shiig aneas ni jeenish ju wajakú, Kristu nemajin aidaunash nigki anenmamtsuk kuitamajakun.

Tuja nu yaigtin agatbauwa nuwig nuwa uchi wajemeauk agatjaigpa, dita wakegamun takainak Kristun tupantug aishinatatus wakegainawai,

nuninak dita wajemeawag, wika aishintsuk pujusan Kristu nemajuidaun yaigtajai tumabaujin umiachu asa, ditak suwimak jumainnum jegantainum.

Nuigtushkam ditak dakí unuimajag ijagka yujajainawai. Tikich chichamunum ditash chichaman patakí wajainak, chicham chichamainchau aidaun chichá yujainawai asamtai.

Duwi nuwa uchi wajemeau aidaunak, aishinawag uchijinatnume tajai. Nunik shiig pujusag uchijin kuitabiagtai, Jisusan dekaskeapi tuinachu kajegkagtuina nunú pegkegchaunum chichagtamkachagtinme tau asan.

Tikich waje aidauk Kristui kajintsá anentaimtanak idaisaje, nunikag iwanchin umijuinawai.

Nuwa Jisusa nemagna nuna patayí wajemeau pujutaik ni yaimainai, nunitai Jisusa nemagkau aina duka, nuwa wajemeau aidau yaimainji shiig atsugbau aina nuna yaimainai.

Jisukristu nemajuidaun diin aidauk eme anentsá diyaku, nuigtush yaigbau amainai, tujash Apajuí chichamen etsejuinak jintinkagtuina nunú aidau,

wagki agagbaunum chichaak: “Toro trigon dajag akaak wekaetauk, trigon yuwawai tusagmek nujig jigkatuawaipa, nigka taká duwi yuwawai.” Nuigtushkam: “Aents taká duka akiam auwai”, tau asamtai.

Tuja Jisukristu nemagnu diinun pachis jimag, nuniachkush kampatum aentskesh, pegkegchau takaawai tuinachkuig antugkaigpa.

Tuja pegkegchauwa nunak takaa weenakuig, Jisukristun nemajin ijunjamunum awayajum pegkegchauji iwainakjum etsegtuktajum, tikich aidaush nuna wainak pegkegchau takatan ajantuktinme.

Junash tajame: Uchuchih, aents ajantusa diyamu aina nunú pegkegchau takaakui pachitsuk idaikum, aents imanchau diiyamua nuna pegkegchauji etsegtin aipa, ashí betek iwaintukta. Apajuí, iina Apuji Jisukristu, ditá aentsji nayaimpinum batsamna nunuiya etegjamu aidaush, ashí wainu asamtai betek umiktá.

Apajuí takatjin takastin adaikumek, waugtukmek uwegmin achikam Apajuí aujtusaipa, nu aents tudaun takaakui ameshkam bakumaim. Tupanjata ashí pegkegchau aidauk.

Aents tudau takaidau dekajuami tumainchaush awai, pegkegchau takaamujig paan waindau asamtai, tuja nuniai tikich uumak taká pujú imapam wantinkui dekagmaush awai.

Nunisag aents pegkeg takaamuji paan wainmainush awai, nuniai pegkeg takaamuji paan wainmainchaush awai. Tujash duka tsawan jegatai paan wantinkatnai.

Amek wakemin beseakum waa waamak jaum nunin asam, yumik umutsuk machik vino uwagta.

Jisukristu nemajin inak aidautigmesh, atumi apujum eme anentsá diyaakjum ashí ni tabaujig umigkatajum, aents aidau Apajuin pachis, nuigtú ni chichame jintiamua nunash pegkegchau chichajinum.

Tuja inak Jisukristu nemaja nunú, niina apujishkam Jisukristu nemaju asa, Kristui kajintsá anentaibaunmag ni yachi asamtai imanchauk diisaigka. Dutiktsuk nuní nagkaemas shiig takagsatnume, dekas yatsut Jisusan dekaskeapi tuina nunú imatika aneasa takajam amain asamtai. Jisukristun nemajin aidau, nuigtú diin aidaushkam wi tajam juna umimain ainawai.

Tujash tikich aents dekaskea juna jintinkagtutan dakituidaush ainawai. Jutii iina Apuji Jisukristu pachisa dekas pegkeg jintinkagtag nunashkam dakituinawai.

Nunú aents nunin aidauk dekachiatak wainak ememainak tu yujainawai. Duka dita anentaimsa chichamujin pachisag jiyanitkatatus wakeyin ainawai. Nu jiyanitbaunmag kajegdayamu, shiwagmagamu, pegkegchau chichagdayamu, kajintsá anentaimtuniashbau,

nuigtushkam inagnamainchaun jiyanitú yujainawai, aents pegkegchaunak anentaimtin dekaskea nuna dekachu asag, Apajuí pachisa chichamunum wiyakchameautia nuninun anentaimainawai. Nunú nunin aidauk tupanjata.

Dekaskenmag Apajuí umigbauwa nuuwai, aents wiyakuch ashí wajiiji ajamu asa, shiig aneas pujuwa imanisa pujumaina duka. Tujash ni ajamua nujaig shiig aneas pujá nunú nunimainai.

Iik akiinkuish wajiigtin akiinachuitji. Nunisaik jaakuish wajiik jukiik wechatnaitji.

Duwi jutiik, yumain, nugkumain ajutjamkuig nujai shiig aneasa pujumainaitji.

Untsu wiyakuch wetatus wakejuidauk waamak tudau weenawai, wají imanchau pegkegchau ekagta nuna imá senchi wakejuidau asag. Nuniau asa, duka waittanum, megkaeta nuwi weenawai.

Kuichik itugsag kuashat ajutia tusa imá senchi wakejuta nuuwai dekas pegkegchau takatnum ekagta duka; nuniau asamtai kuichkin imá senchi wakejuidauk, nuna takainak Jisukristui kajintsá anentaimtanak idaisaje. Nunikag kuashat utugchatnum yujainak senchi waituinawai.

Timoteoh amek, Apajuí takajin asam jujú pegkegchau aidaun taja juka ashí tupanjata. Nuniakum pegkeja duke takastá, ame Kristui kajintsam anentaimam dusha mijattsuk ashí tikich aidaush aneeta. Utugchatnum jegakmesh katsunjam pujakum emematsuk pujustá.

Amek Jisukristui kajintsá anentaimam nujai utugchat aidaush depetkata, nuniakum pujut nagkanchau jukita; Apajuí nuna jukiti tusa etegtamjau asamtai. Tuja, ame Jisukristuap uwemtijumainaita tabauk aents ijunjamunum iwainakam etsegtumakuitme.

Ashí wainainag nuna Apajuí pujutan suuwa nunú waipau asamtai, nuigtú Jisukristu ni inamtaijin pachis Poncio Pilatun ujakua dusha waipa duwi,

wi tajam ju betek umiktá. Pegkegchau takatsuk pujustá, tikich aidaush pegkegchau takaawai tujaminum, nuniakum ii Apuji Jisukristu minitta dusha dakasta.

Apajuí ni tsawan dakamuji uminkamtai ataktú Jisukristun ju nugka juwi awematnai. Tuja imá nigki Apuk, ashí apu aina nuna Apujishkam, imá nigki eme anentsá ememattaiya duka.

Imá nigkiuchi ajumaish jakashtina duka, nigka tsaaptin makichkish adijmainchaunum pujuwai. Makichik aentskesh wainkauk atsawai, waintakesh wainmainchau asamtai. Niina senchijish, ni inabaujish tuke atina nunú tuke ememattai atí. Aatus atí.

Wiyakuch aidaush ememachu atajum tita, ditá wajiijinig kajinmas anentaimá pujuinum, ju nugka juwi wiyakchameamuk ashí megkaejatnai. Dekas Apajuiyai kajinas anentaimain ainawai, niiyai ashí ii atsumamunash shiig aneas pujustinme tusa sukagtina duka.

Nuigtushkam wiyakuch asag kuashat wají ajuina nujai, kuashat aents atsumaidaun yayaak Apajuiyaig wiyakchamemain ainawai.

Juna aatus takaidaunak Apajuishkam dita atak jukiagtinun nayaimpinum ukujui, nuigtú pujut nagkanchaunashkam jukiagtinai.

Timoteoh, Apajuí chichamen etsegkata timajam duka dutiksamek aents aidau ujaktá. Tikich chicham dekaskechun jintinkagtuidaujai jiyanitkaipa. Ditak dekaji tuinawai, tujash dekaskea nunak dekainatsui.

Nunú wait aina nuna etsejuinak, wajumak aents aidau Kristui kajintsá anentaimtan idaisaje. Apu Jisukristu atumnash wait anenjamjatnume.