Witjai Pabloitjai, Silvano, Timoteo aajan ju papiinak agatjime atum Jisus nemagkau aidautijum yaakat Tesalónica batsamin aidautigmin. Ii Apají Apajuiya nunú Apu Jisukristujai wait anenjamag, shiig agkan anentaimsa pujutan amastinme.

Apajuí iina Apajiya nu aujkuish atum pachisa see tusaikí ainaji,

nuniaku ashí atumek tuke mijattsuk pachisaikí ainaji. Wagki, atum ii Apuji Jisukristuig kajintsá anentaimaidau asajum pegkeja duke takaajum nuaduí, Jisukristu aneamunum tikich aidau yayakjum, waitiakjumesh katsunjajum ichichmamja pujusjum, ni minakuish wainkatasajum dakaidau asagmin.

Yatsug aidauh, ubag aidauh, Apajuí atumnak anempajume, nunin asa atumnash ni etegtamjawa duka dekaji.

Ii Kristu uwemtikagtawai tusa chichagkagtukbauk, ayatak chichamaik chichagkagtukchamui. Wakaní Pegkejiya nuna senchijin, chichamak dekaske tusa etsegkamui. Jutii atum aneau asaja, atumjaish wajuk batsamsamiaji duka shiig dekagme.

Atumek jutii wajuk pujaku iwaintukuitjime, nuigtú Jisusa pujutí diigsagmeshkam nunisjumek pujuinagme. Chicham etsegbaush, tikima senchi waitiamunum pujakjumesh uyumatsuk antukuitjume, Wakaní Pegkeji dakujutan amainau asamtai.

Nu atum nuniakjum ashí Apajuí nemajin Macedonia nugkanum, Acaya nugkanum batsataina dushakam iwaintukugme.

Apajuí chichame etsegbauk atumiin nagkamna, Macedonianmash, Acayanmashkam, nuigtú ashí tikich nugkanmash pampagké. Atum Apajuiyai kajintsá anentaimjum nunak, ashí yantamnum augmatuidau asagmatai, jutii anuí chichagkagtumainaitag duka atsumnatsui.

Jutii atumiin taamtai, atum wajuk jukagtukiuwaitjume, nuigtú dakumkamu apajimá batsatutijum idaikujum, Apajuí iwaaku dekas tuke pujuwa nunú umigkujum,

Jisus Apajuí Uchijí, Apajuí inankim nayaimpinum weuwa nunú taatnuji dakainajum nunash ujaninawai. Jisusai, suwimak ishamain atina nui ayamjutpakua duka.

Yatsug aidauh, ubag aidauh atumek dekagme, iik atuminig tikima wainkaik ijaschabiaji.

Yaakat Filiposnum pujusá Jisus pachisa etsegjin kajegtamaidau asag, aentschau chichagtamainakui senchi waittsauwaitag dushakam atumek dekagme. Tujash Apajuí yaimpasmatai ishamkagtutsuk, Jisukristui uwemtikagtauk tusaish, tikich antutan dakituinaigkish atuminchakam chichagkagtukbaiji.

Ii anuí chichagkagtukmayag duka dewakbaukesh atsawai, nuniachkuish pegkegchau anentaiyaikish, tsanumkuikish tichamui.

Apajuí jutii anentainash ashí diigtamas, ni takatjinak Kristu pachis etsegtukti tusa sujamsauwa nu etsegtuinaji. Duka aents shiig awajkatasaikish takaatsji, Apajuí wakegamu takainaji, nigki jutii anentaibaujinash shiig dekawai.

Jutiik pegkejan chichai shiig anenjustinme tusa chichachuitag duka atumek dekagme. Jutiik atum tsanujá kuichik jujuktasaikish chichachuitji. Junak Apajuishkam shiig dekawai.

Atumkesh, nuniachkush tikich aidaukesh eme anenjitnume tusaikish wakegatsji.

Jutii dekas Jisus chicham etsegtugkatajum tusa awemamu asaja, atum yaijatkatajum tumainaitku duka tutsuk, nuwa uchijin kuitamama numamtuk, atumnak shiig anentsan puyatjusan kuitamkabiajime.

Imatika aneedau asaja, yamajam chichama duke ujaktasa wakeetsuk, atum aneamunum bakumatasaish wakegainaji.

Yatsug aidauh, ubag aidauwah atumek aneakjume, atum waitkat dakitau asaja wajuk takaayaji duka. Jutiik tsawai kashishkam takai takainakua yawejaish, Apajuí chichameg etsejiaji.

Atumetjume jutiinu dekautigmek, Apajuishkam aikasag dekagtamji, atum Apajuí nemagkau aidautigmijai jutii pujubiag duwik, pegkegchau aidauk takaachu asaja, makichik aentskesh tujamainchau shiig imagnisa pujusbaiji.

Jushakam dekagme, uchigtin uchijin utuja numamtuk chichagkun, makí makichkitigmin anentaimnash ichichtuyajime.

Dutikakun, Apajuí nemajin aidaush wajuk pujumainaita, nunisjumek shiig pujustajum, niina inamtaiji dekas pegkeja nui pujustinme tusa untsukbau asajum, tuyajime.

Nuaduí jutiishkam Apajuik mijattsuk see taji, atum ii chichagkagtamu aentsdauchuapi Apajuí chichamempapi tusajum, shiig antuku asagmin. Duka dekas Apajuin chichamegai. Nu chicham atumesh dekaskeapi tau asagmin, pujutjumnash kuashat yapagtugmawajui.

Yatsug aidauh, ubag aidauwah, atumshakam jutii waittsauwaitag nunisjumek waitiajume. Judeanmaya aents aidau Jisusa nemajuk Apajuin umijiagtai, ditanbaunak pempeentukiag waitkajakua numamtuk, atumnash atumin pataimik waitkagmainakui waitiagme.

Nunú mina pataag judío aina duke Apu Jisusnash maawajui. Yaunchuk Apajuí etsegtin aajakajua nunashkam ditak maawajui, nunisag jutiinashkam jiigmakiag ajapjamawagmayi. Nunidau asag Apajuinak shiig awagmainatsui, ashí aents aidaunak shiwagmainawai.

Judiuchu aidaush uwemjatnume tusa, Kristu pachisa ujakta tajinish dakituinawai, nunidau asag nuní nagkaemas tudaunak ikauntumainawai, nunidau asagmatai Apajuí shiig senchi suwimkan susatnai.

Yatsug aidauh, ubag aidauh, jutiik ujumak tsawantai atumjai wainitsuk pujakuish, tuke pachisaikí pujau asá, atum wainkatasa senchi wakeeyaji.

Nuniau asan wika atumin ijagsatasan dekaskenmag kuashtá wakekabiajai, tujash iwanch utugtamkamtai minichbaijai.

Apu Jisus ataktú juwi minakui, wi niina igkuaknush datsamamuk atsugtitnai, ayatak shiig aneakun emematnaitjai, atum imá Kristuig kajintsá anentaimaidau asagmin.

Atumiin jutiik eme anenmamku shiig aneastinaitji.

Nuaduí atumin kajimatmainchau dekapeau asan Atenas wiki juwakun,

iina yachi Timoteon awemabiajai, Apajuí takagku Kristu pachisa etsegbaunum yaimna nuna, atum Kristui kajintsá anentaimjum nunash, ni chichagtamak nuní nagkaemas ichichtamjatnume,

makichkitigmekesh waitiakjum Kristu nemajut idaisaijum tau asan. Atumshakam dekagme jutiik aaja waitmainaitag duka.

Nuigtushkam wi atumjai pujusan emtiksan ujayajime, jutiik waitiamu igkugtin ainaji tusan, duka nunisag nagkaetamjume yamai wainjum nunú.

Nuaduí atumin kajimatmainchau dekapeau asan, ii takasbau wainak megkaekai tusan, Timoteon awetibiajime. Nunak atumin kuashat puyatjakun, Jisukristui kajintsá anentaimtan, iwanch pegkegchau takamtikainam idaisainum tusan dutikabiajai.

Tujash Timoteo atumiin pujau jutiiní taa ujapakji chicham shiig pegkejan, atum Kristui kajintsá anentaimkujum aneniamugmin. Nuigtushkam ujapakmae, atumesh jutii shiig anenkagtusjum waijatkatasajum wakegainamunash, jutii atum wainkatasa wakegag nunisjumek, atumesh jutiijai ijunjatasajum anentaimjum nunashkam.

Yatsug aidauh, ubag aidauh, nuna antukan kuashat utugchatnum waitiaku pujamun ichichmamjamjai, atum Kristui kajintsá anentaibauk nunisjumek batsatjum nuaduí.

Atum Kristu nemagkujum shiig emetmamjajum batsatbaun antukan ichichmamjamjai.

Nunikan shiig senchi shiig aneamug ajutui Apajuí emtinish, nuniakun Apajuinashkam imatiksanuk see tajai, atumin pachisan.

Tsawai kashijai Apajuin tuke augjai, atumiin taan wainkata tabaujun pachisan, nunikan atum imanisa kajintsá anentaimainchau dekapeamu ajutjamkujaish shiig jintintuatasan.

Ii Apají Apajuiya nu, Apu Jisukristujai jutiinash yaimpakagti atumiin minimaina nunash.

Ii Apujiya nunú sujamsatnume, ashí tikich aidaujaish pempeentuniki aneenita nuna, jutii atum aneajim aikasag.

Apajuiya duke atumi anentaimnash ichichtugmagtinme, aan nagkaemasa kajintsá anentaimkujum, Apu Jisus niina aentsji pegkejam aidaujai minakuish, iina Apají Apajuiya nuna emtinish bakumamainchau wantinkamnujum tusan.

Nuigtushkam yatsug aidauh, ubag aidauh, Apu Jisus wakega dutiksanuk segajime: Wi jintintuabiajim nunisjumek, aan nagkaemasjum Apajuí wakega duke takaakjum shiig anemtiksatajum.

Atumek Apu Jisus tibauwa nuna jintintuabiajim duka dekagme.

Atumnak Apajuik imá midau pegkeg aina nunak takainak, tsanijintsuk pujustinme tusa wakejutpagme.

Maki makichik nuwentin aidauk niina nuwenak eme anentus diiyak, pegkegchau takagtsuk pujumainai,

aents Apajuin anentaimtuchu aidau ditá iyashí pegkegchaun takastatus wakega nuna takainak nuween waitkaina nunitsuk.

Tuja makichkitigmekesh tikich Kristu nemajuina nuna nuwejaig pegkegchau takasaigpa, nuigtush yatsum tsanujam pegkegchau takagsaipa, atum nunitaik Apu Kristu suwimkan senchi amastatjume, nunak duwikishkam tibaijime.

Apajuik iinak ashí pegkegchau aina nunak takatsuk, pegkee pujustinme tusa etegtamjauwai.

Tuja ju jintinkagtamun dakitauk aentsnakesh dakitak nuniatsui, Apajuin dakitak nuniawai, ni Wakaní Pegkejin sujamsauwa nuna.

Tujash Kristu nemagkau yatsut aidauti pempeentuniki aneenita nunak agatjashtatjime. Wagki pempeentuniki aneenitnak Apajuí jintinjamawaju asagmatai.

Duka nunisjumek aneniajume, ashí aents Kristu nemagkau Macedonia batsata nujaishkam. Tujashkam yatsug aidauh, ubag aidauh tajime: Atum aneeniajum nuní nagkaemasjum aneenitajum.

Atumek itugsanuk tikichin waitkatsuk pujusag tusajum kakanmamkujum, makí makichik atumin takatjum takastajum, jutii nuní takastajum tibaijim dutiksagmek.

Aatsa takau asajum atsumkas pujutai, tikich aents aidaush eme anenjamas diigmastinme.

Yatsug aidauh, ubag aidauh, Jisusa nemajin jakaush wajukatnuita nunú atumesh dekaatajum tusan wakegajai, aents Apajuí nemagchau aidau, jakau aidaush wajukatnaita nuna dekachu asag, wake besemag anentaimá pujuina nunikaijum tusan.

Jisus jaka nantakiuwa nuanuig kajintsá anentaimainaji, Jisusan nemagkau jinawajua nunashkam, Jisus ataktú juwi minitaiyap Apajuí inanjatnaita tusaja.

Nuaduí Apu Jisus tiuwa dutiksaik taji: Jutii iwaaku batsatutik Jisus minitta nuaduik, jakau aidau ukuakuik emjashtinaitji.

Apu Jisus nayaimpinmaya minitai, senchi untsuubau atinai jakau aidau nantagtinme tusa, tuja nayaimpinmaya aents aidau apujiya dushakam senchi untsumkatnai, nunitai tikich nayaimpinmaya aents trompetajin senchi umpuagtinai, nunikmatai Kristu nemajin jidau aina nunú nantajagtinai.

Nunikmatai iwaaku aidauti ditajai ijunja yakí takuntinaitji, agkajunum Apu Jisus yujagminum igkugtasa, nunika ii Apujijai atakea duwish tuke pujutnaitji.

Nuniktin asamtai jujú chichama jujai tikich aidaujaish anentai ichichtunigtajum.

Tuja tsawantash wajukeaig, jutiish wajukeajinig taati nuna pachisnuk agatmaitsujime.

Wagki, atumek shiig dekagme Apu Jisus minamu tsawagtina duka, kasa kashi pachiachmau waiya numamtuk wajaktinai.

Wajutiya aents aidau: Yamaik shiig agkan anentaimsa, nuigtush kajintsá batsatainaji, tiagtin ainawa nuniamunum pachiachmau dita waittsatnujig minittinai. Nuwa ejamtin uchigmatji jegamtai najaimamun ishamak, emegkakta takush emegkaumaitsu numamtuk, aents duwik uminkachu aidauk, nunú waitiamun emegkakta takush emegkakchagtinai.

Tujash yatsug aidauh, ubag aidauh atumnak uwaktamkashtatjume, kasa wajukea numamtuk minakush, wagki atumek tikich dekainatsu nuninchau asagmin.

Wi juna tajim junak, atumek Jisukristu aentsji asajum pegkeg takaakjum, tsaaptinnum pujumaina numamtuk wajaidau asagmin tajime. Jutii Jisukristui kajintsá anentaimaidautik, iwanchdau aidau suwenum yujaina nuninuk ainatsji.

Aents Apajuin nemajuinatsu duka, kashi kanaku wajukmaina numamtuk wajainawai. Tujash jutiik shiig umintsá aneaku batsamsagmi.

Wagki, aents kanuina duka dekainatsui wají nagkaemaktatua nunak, nampena dushakam wajukeawa nunak dekatsui.

Tujash jutiik tsawai batsaamaina numamtuk batsatu asaja aneaku batsamsagmi. Suntag aidau maanitnum weenak jiju najanamun detsepen ejaktatus nugkú ainawai, numamtuk jutii Jisukristui kajintsá anentaimaidautik, ni aneamua duwi pempentunisaik aneeninaku, nuigtú jutii uwemjau asaja dakainag nu atsejutai suntajan buuken ejata numamtina nujai ejamakagmi iwanch pegkegchaun takamtijamsainum.

Apajuik iinak suwimkan jukitin atinme tujamchauwai. Ayatak Apu Jisukristui uwemtan jukitnume tujabiajui.

Jisukristuk jutiiní jakauwai, iwaaku batsatkush, jakau akushkam imá wijaig ijunas pujustinme tujamu asa.

Nuaduí pempeentunikjum wakegat egketdayakjum ichichdaitajum, atum takaajum dutiksagmek.

Yatsug aidauh, ubag aidauh junashkam segajime: Atumin jintinjamainak Apu Jisus nemagtanum chichagtamaina duka eme anentsá diitajum.

Dutikakjum shiig anentsajum aneetajum, dita takaamujin eme anentsajum diyakjum, ditajai ijuntsajum shiig agkan anentaimsajum batsamsatajum.

Yatsug aidauh, junashkam tajime: Aents takatan dakitauk jiyaktajum, junik dekapedaush wakemitkaktajum, yainkatnume tusa atsumaidaush yaigtajum, nuniakjum tikich aidaujaish kajegdaitsuk pujustajum.

Pegkegchaun takagtamainakuish, pegkegchaunmak ikmakaig tusajum kuitamamkatajum. Dekas pegkeja duke ikdaikajum takastasajum kakanmamtajum, imá atumek dutikdaitsuk ashí tikich aidaujaish dutikatajum.

Tuke shiig aneasjum pujustajum.

Nuniakjum Apajuishkam tuke aujsagmeké atajum.

Ashí pachisjum see titajum, jujuwai Apajuí jutii Kristu Jisus nemajin aidautin nuniktinme tusa wakejutpa duka.

Wakaní Pegkeji anentaimin aujtabau antugtsuk idaisaipajum.

Apajuin etsegtuidaush, wainkaya nuninuk diisaigpajum.

Ayatak ashí ni chichaamujish shiig kuitamsajum antugkatajum, Wakaní Pegkeji tamash tawa tusajum, nunikjum pegkejan takuig antugkatajum.

Idaisatajum ashí pegkegchau takatak.

Atumnash Apajuí shiig agkan anentaimsa pujutan sukagtina nunú pegkeemtijamiagti. Nigki kuitamjutpagme atumi wakanminash, atum anentaibaunash, atumi iyashminashkam, Apu Jisukristu tataish bakumamainchau atinme tujamaidau asa.

Apajuí dekas betek umina nunú atumnak etegtamjauwai, dutijabau asa nigki nunak dutikattawai.

Yatsug aidauh, ubag aidauh, jutii pachijattsagmeshkam Apajuí aujkagtustajum.

Yatsug aidauh, ashí Kristu nemajin aidautigmek aneenisjum kumpamdayakjum pagkuniktajum.

Ju papí awetajim juka Apu Kristu wakega dutiksagmek ausatajum, ashí yatsug aidaush antuktinme.

Ii Apuji Jisukristu atumnash wait anenjamjatnume. Aatus atí.