Witjai Pabloitjai, minak Apajuí Kristu Jisusa chichame etsegtukti tusa wakegau asa awetiuwai. Yatsug Timoteojai pujusan atum Jisus nemajutijum yaakat Corinto batsatutigmin papiin agajan awetakun kumpamjime, nuigtú Acaya nugkanum batsata nunashkam kumpamjai.

Ii Apají Apajuiya nu, iina Apuji Jisukristujai wait anenjamag, shiig agkan anentaimsa pujuta nuna atumnash amastinme.

Emematiagmi Apajuí, ii Apuji Jisukristun Apajiya nu, niiyai jutii Apají tuke wait anenjamna duka, nigki Apajuí ichichkagtina dushakam.

Nigki ichichmamtanash sujamui ashí ii waitiamunmash, ditash tikich waitiagtaish dutiksag ichichkagtugtinme tujamu asa.

Kristu waittsauwa nunisaik jutii ni nemajuidautish kuashat waituinaji, nuniakuish imá niinig kuashat ichichmamainuk ajutjamainaji.

Jutii Apajuí chichame etsegjin, tikich aents waitkagmainakuish shiig aneenaji, jutii nuniamu diisjum atumesh ichichmamjajum uwemjatajum tabaunum. Tuja Apajuí jutii waitiajin ichichmamtan amakuishkam atum aidautigmesh: Jutii waitiajinish aikasagkeap Apajuí ichichtamjattaji, tusajum dekamainaitjume.

Jutiik atuminig kajinmasa anentaimainaji, wagki atumek jutii waituinag nunisjumek waitiakjumesh, Apajuí ichichmamtan sujabaujai ichichmamaidau asagmin.

Yatsug aidauh, ubag aidauh, jutii Asia nugkanum batsamsaja kuashat utugchatnum waittsabiag nu dekaatajum tusan wakegajai. Jutiik tikima atsanja nagkaemainchaunum jegantú asaja: Iwaakuk jiinjashtatjiapi, tibaiji.

Nuniaku: Mantamnati, tujamainakui anentaimaina imanika anentaibiaji. Tujash nu dekamtijamabi iík anenmamtsuk, Apajuí aents jakaunash inanna nui kajintsá anentaimtan.

Nuniau asajin Apajuí agkanmitkagmabi, dutijamsag ii jamain ishamain ataish ayamjutpaktatui. Nunin asamtai nigkiap ayamjutpaktatji tusa imá niinig kajinmasa anentaimainaji.

Atum jutii pachijattsajum Apajuí augjumin, tikich aidaush jutiin pachijattsag Apajuin aujiagtaig, kuashat tikich aidaush Apajuin see tumain ainawai, Apajuinumia pegkeg juwamua nuna wainaidau asag.

Aents aidau ditá yachajinig anentaimas yujau aina nunitsuk, jutiik Apajuí wait anenjamsamtai pegkeg aina duke anentaimainaku, tikich aidaujaish kuitamamka imagnisa yujaidau asaja, atumjaig nuní nagkaemasa kuitamamka yujasmayag duwi eme anenmabauk ajutjamainaji.

Wi papiin agatjamjim nuwig, tikich wají pachisaik atum aujkugmesh antukchamnukesh agatjashbaijime, nuniau asamtai shiig ausampap dekawagtatua tajime.

Atumek yamaik ii kuitamamsa yujasmayag duka shiig dekatsjume, tujash Apu Jisusa emtin ijunjatnaitag nunú tsawantinig dekajuatnaitjume, jutii wajuk pujusuitji nunú. Nunikjum shiig aneakjumin jutiishkam nunisaik atum dutikamua nu diisá shiig aneastinaitji.

Wika Macedonia nagkaemakun atumi tajuan wainkan ukuakun, nuwiya waketkunchakam ataktush wainkan ukuktajime tusan anentaimsabiajai. Nuna nuniakui atum minashkam wi Judea nugkanum wegakuish, atum yainkamnujum tau asan.

Wi nuna nuniktajai tiuwaitag nunash ¿anentaimtsukek tiuwaitag? ¿Atumek minishtinaitkumpap wainak minittajai tawa tujutjumek?

Tujash Apajuí ni tibaujinak betek umina nu dekagtamui jutii wainka atum tsanuachbaunak.

Wi, Silvano, Timoteo, jujú aidauti Jisukristu Apajuí Uchijiya nunú pachisaja atumnak ujakbaijime. Jisukristuk: “Yamaiya juwi dutikattajai” ti, ajuma duwi “dutikashtatjai” tujakchauwai. Nigka ni chichakbaujinak imatiksag umijakuí.

Wagki Apajuí ashí anagkagtuamua duka, Kristui ashí uminkauwai. Nuaduí Apajuí emematuinakuik: “Aatus atí”, tuinaji Kristu Jisus pachisa.

Tuja Apajuiyai jutiin atumnashkam Kristu nemaju asajin ashí ijupag niinu etamkajua duka.

Dutijamak: Juka midau atinme, tujamu asa emtikak Wakaní Pegkejiya nuna sujamsajui. Nuna dutijabau asamtai dekainaji, atakeap pegkeg aina nuna sujamsatnaita tusa.

Tujash wi Corinto minitjai tusa anentaimsamun minichag nunak Apajuí dekagtawai. Tuja wi minitjai taja nuna dekas tuchataik Apajuí suwimkan sujustí tajai. Wi anuí minichag nunak atumin kakaakan chichagkun wake ebeskaijim tau asan minichmajai.

Jutiik atum kajintsá anentaimjum duka: Ii wakegamu dutikatajum, tusaik tumaitsujime, atumek Kristui kajintsá anentaimu asagmin ayatak yaimkatasa wakegaji dakujustinme tau asaja.

Nuaduí: Dekas wechatjai, ditan wake besemag anentaimtiká wekayig, tusan juwakbaijai.

Atum mina shiig anemtijumaintigmin wake besemag anentaimtiktaish, ¿yaki minash shiijash anemtijusti?

Nuaduí ayatak agatjabiajime, atum mina shiig anemtijumain aidautigmin wake besemag anentaimtiktan dakitakun. Wika shiig dekajai, wi shiig aneakuig, atumshakam shiig aneemainaitjume.

Tujash wi papiin agatjabiajim nunak, senchi uyumaka waitiamunum buutkun pujusan agatjabiajime. Tujash atumin wake besemag anentaimtijatasanuk agatjashbaijime, ayatak wi atumin senchi aneajim nuna dekaatnume tusan agagbaijai.

Tuja mina makichik aents wake besemag anentaimtijujua duka, imá minakek dutijuache, ashí atumesh nunikugmeapi tajai. (Junak wika nunú aents dekas pegkegchau takasbaujiya nunak awagkinuk chichaa wekaechattajai).

Atum ainajum nuwiya imá kuashtatijum nu aents suwimak susauwaitjum duka: Maake, anuig atí.

Yamaik atumek tsagkujajum anentai ichichtugtajum, wake besemag pujak shiig pujuschamin dekapí.

Nuaduí, atum yaunchuk ni aneejakuitjum dutiksagmek aneetajum tusan segajime.

Duwik juna pachisan agatjabiajime, dekas wi tabaunash umikagtimpash tusan dekapsatasan.

Nuaduí atum tsagkujattajum nunak, wisha tsagkujattajai. Wi anuí atumjai ijuntsan pujusan Kristu emtin tsagkugmainaitag dutiksanuk.

Nu aaja dutikaku jutiik iwanch tsanujati tusaik agkantak idaitumaitsui, wagki dekaji ni pegkegchaun takamtijamsatatus wajuk anentaimnaita duka.

Yamajam chichaman Kristu pachisan etsegkatasan yaakat Troas jegaa ai, kuashat aents Apajuí chichamen dekawagtatus wakeyagmayi;

tujash yatsug Titun wainkachu asan wakeesan takamainchau dekapeakun, ditanak ukuakun Macedonia nugkanum webaijai.

See tajai Apajuin, Kristu depetmakua imanuk etamu asamtai, jutii ni chichame etsegbauwa dushakam pegkeg kugkuina iman, ashí yantamnum etsegbaun wakejus antuidau asagmatai.

Jutii Kristu pachisa etsejuinag duka, Apajuin shiig awagmawai. Juna antuk umiidaunak Apajuí uwemtikainawai. Jujú chichamak pegkejai chichaman umiina nuwig, tuja megkaejatin aina dushakam jujú chichamnak antuinawai.

Megkaejatin aina duka Apajuí chichamenak pegkegchauwa nunin antuinawai, dita megkaejatnujin pachis tau asamtai. Apajuí chichamen antukag umiina nunak Apajuí uwemtikui. Tuja nu chichaman umiina nujaig Apajuí chichamega juka pegkejai, duwi dekainawai: Nayaimpinmap pujustinaitji, tusag. Makichik aentskesh, Apajuí yayachmak shiig dekamaitsui, jujú chichama ju etsegtanak.

Jutiik, tikich aidau kuichkin jukitasag wainak tsanumag chichaman etsejin aina nuninatsji, jutiik Apajuí awetabiu asagmatai dekaskenum ni emtinish etsejuinaji, nuigtush Kristujai ijutkau asaja.

Wi juna pachisan chichaakuig, atumek: Ni eme anenmamkumpap tu wekaewa, tusagmek tujutmain ainatsjume. Atsa tikich wajukena nunikaik, ¿Jutiin pachijatus papiin agajagbau jukí atum iwaintumainaitjim?

Jutii anentaimsa papiinum agamaina numamtuk awajkamutigmek atumetjume, nunin asagmin ashí aents papiin aujus shiig dekamaina numamtuk, atumnak shiig dekagmainawai, atumi pujutjum yapajidaun wainaina nuaduí.

Kristuk, jutii chicham etsejuinag jujai ni pegkejan dutikauwa nuna aents aidaush wainkatnume tusa wakegawai. Tujash nigka jujú chichamnak aents aidau wainkati tusag papinumag agagchauwai. Nuigtushkam Apajuí chichaman kayanum agag Moisesan susauwa dutikag agagchauwai. Dekas atumnak Apajuí tuke pujuwa nunú Wakaní Pegkejiya nujai atumi pujutjuminig yapagtamawaju asamtai, tikich aidaush Kristu atumin yapagtabauwa nunak wainkagtatui.

Apajuiyai kajintsá anentaimainaku, Kristu atumiin dutikauwa duka dekaskeapi tuinaji.

Juka imá jutiik imatiksa takainaji tumamaitsuji, ashí jutii takainag duka Apajuí yaimpasmatai takainaji.

Nigki mina takagtin agtinme tusa jutiinak ni inake etamkauwai, yamajam chicham apakbauwa nuna etsejin atinme tujamu asa. Jutii chicham etsejuinag duka chicham umiktin aajakua duchauwai, juka Wakaní Pegkeji takaamua nuuwai. Wagki chicham umiktin aajakua nu umiachbaunmag Apajuijai tuke kanaaku kanatnum ejekagtiuwai, tujash Wakaní Pegkejiya duka pujut tuke atinun sukagtawai.

Chicham umiktin kayanum agagbau aajakua nunú, Apajuijai tuke kanaaku kanatnum ejekagtiuwa nu, Moisesa yapiin winchamtin awajtusmatai, Israel aents aidauk Moisesa yapiinak diimainchau dekapjajui. Duka, dukap asa megkaekatnaitak ibau wajasuí.

¿Dekas Wakaní Pegkeji jutiiní takaamua nuna tsaaptinji aan nagkaemas amainchaukaih?

Chicham umiktin bakujatmainaitak iman aajakua nuna nagkaesauwai, Apajuí: Aentsú bakumamainjig atsawai, tawa nu etsegbauwa duka.

Nu chicham umiktin iman aajakua duka, yamai yamajam chicham Kristu pachisa etsegna nujai apatkamak imanchauwai.

Chicham umiktin megkaekatnaitak iman aajakua nuna nagkaesau atinai yamajam chichama juka. Jujú chichamak ajumaish megkaekashtinai, tuke atinai.

Nuaduí nunú dekaidau asaja jutiik shiig kajintsá chichagkagtuinaji.

Moisés yapiin winchamtin wajasú asa, ju megkagun Israel aents aidau wainkainum tusa, jaanchi juki yapiin ejakua numamtukek jutiik wajainatsji, wagki Kristu chichamega juka tuke megkaekashtin asamtai.

Tuja Israel aents aidauk Moisés chicham umiktinun agajua nunak, shiig antumainchau dekapjajui. Nunijakajua nunisag yamaikishkam, nuna chichaman aujuinakush antumainchau dekapenawai, jaanchi ejakbau asa shiig wainmainchauwa numamtin juwakaju asag; tujash imá Kristuig kajintsá anentaibaunum shiig antumainaitji.

Ashí aents Apu Jisukristui sujumankaju aidauk, ni dekamtikbau asa shiig paan dekainawai.

Iina Apuji Jisukristuk wakani, nunin asamtai Wakaní Pegkeji jutiiní pujus chicham umiktajum tibau umiktasa waitujakbauwa nunak agkanmitkagbauwai.

Dutijabau asamtai yaunchuk iina yapiin jaanch ejatkamua numamtin aajakuitag nunak, yamaik Kristu pachisa dekainag nuaduí, Wakaní Pegkejiya nu anentaimtam yapagtugma Kristu anentaimtajiya imanuk etamji. Dutijamu asamtai Kristu wajukuita nuninuk weenaji. Nunak ni Apu Jisus dutijamu asamtai nuninaji.

Jutiinak Apajuí wait anenjamag, yamajam chichama ju etsegkatajum tujabiu asamtai, mijattsuk chichagkagtuinaji.

Nuniaku uuká takaamu nuigtú tikich datsanmain aina duka ashí idaisau asaja, tsanumsaikish chichatsuk, Apajuí chichamesh yapajiasa etsegtsuk, imá dekaskea duke ashí aents aidaush pegkeg diiyamua nu Apajuish dekamunum chichakagtuinaji.

Tujash yamajam chicham etsejuinag juna dekamainchau dekapena nunak, aents megkaejatin aina nu nuninawai.

Dita dekaskeapi tuinatsu nunak, iwanch ju nugká apujiya nu antumainchau emamu asag nuninawai. Nuaduí yamajam chicham Kristu pachisa etsegbauwa junak dekamainchau dekapenawai, Apajuish wajukuita nunak, Kristu iwainawai tusa pachisa etsegbauwa juna.

Chichagkagtuinag duka iinu pachisaik chichatsji, Jisukristu dekas Apua nu pachisa chichagkagtuinaji; tujash jutiik Jisukristu aneamunum, atumí inataigmia nunin ainaji tumamainaji.

Wagki Apajuiya duke suwen tsaaptin emati tima, tsaaptin emauwa numamtuk, jutii anentainish Apajuí imanjiya nu shiig dekaatnun, tsaaptina numamtinun amasuí. Ditash tikich aidaun Apajuin pachis shiig dekamtikatnume, jutiin Jisukristu Apajuí wajukuita nuna shiig dekamtijamauwa dutiksag tusa.

Jutiik duwe jukí ichinak najanamunum, nuna initken wají wakejumain pegkeg egketiama numamtuk awajkamu ainaji, Apajuí ni senchijí sukagtamua nunú iiní au asamtai.

Nuaduí utugchat ajutjamkuishkam epegsaikí auwaitji. Uyumamu imanik ajutjamkuishkam, wajukawajak tusaikish tuinatsji.

Iina shiwaji aidau waitkagmagtaish imá iinakek Apajuik idaitamtsuji, suwimjamainakush mantamtanak mantamainatsui.

Jutii tuwí wegaji nuwig, Jisusan maatatus itujujakú aina imatijamainaji. Jisus imatikajakbauwa nuna tikich aidaush jutii pujutinish betek nagkaema nuna diisag, Jisusap ditanak maam amainnash kuitamainawa tusag dekaatnume tabaunum. Nunin asamtai jutiik, Jisus pachisa etsegbaunum ni mantamdauwa nunisaik mantamnatasa umintsá yujainaji.

Jutii mantamnamainnum yujasá chicham etsegkamunum, atumesh pujut tuke atina nu jukiu ainagme.

Tujash agagbauwa nui: “Kajintsá anentaibau ajutu asamtai chichagkagtajai”, tibau awai, nuaduí jutiishkam nunisaik kajintsá anentaibau ajutjamu asamtai chichagkagtuinaji.

Apajuí, Apu Jisus maamunak inankiuwa dutiksagkeap jutiinash inantamkiag, atumjai ijupag niina pujutaijin jujamkiagtinaita tusa dekainaji.

Duka atum aneamunum imanikaik waituidau asajin, Apajuí aents aidaunashkam yaigtatui. Dutikainam juní kuashat Kristun nemajuinak, Apajuinashkam ni wait anenkagtugbaunum see tuinak imá niinak emematiagtatui.

Nuaduí iina iyashí muuntuch wegak mijamkuishkam, iina wakaniya nu kashí kashinig ayatak senchimeakui mijamtsuji.

Ju nugka juwi yamai waituinag duka, Apajuí pujut pegkeg tuke atinun sujamsatna nujai apattsa anentaimtamak wainkayai.

Aatus asamtai jutiik ju nugkanmaya wainainag juka puyatjutsuk, dekas nayaimpinmaya ii jukitin wainchamua nu imá senchi puyatjusa anentaimtiagmi. Ashí wainainag juka megkaejatin ainawai, tujash eke wainainatsug nuuwai ajumaish tuke atina duka.

Jutiik, ju nugka juwi jega jegamkamu aina nunin ainaji, aak tuke pujuchua numamtin. Tujash iina iyashí aak mamumaina numamtuk wajataishkam, Apajuí tuke atinun nayaimpinum umigtamkamu amastin ajutjamui. Duka aents takasbauwa nunin achatnai.

Nuaduí wajukaik yamajam iyash nayaimpinum pujustina nu waamak jukiag tusa anentaimtuinaku, shiig aneasa pujumain dekapenatsji.

Nunú yamajam iyashia nu iina wakaninak, wisú aig tusa nugkutiama numamtuk awajkatnai.

Ju nugka juwi batsamsaik tuke shiig aneasa batsatainatsug duka, jakata tau asaik nuniatsji, yamajam iyashin Apajuí nayaimpinum umigtamkawa nu jukita tau asa nuniaji. Wakegainaji ju iyash waitin aina ju ukuaku, yamajam jukí nu iyashimka waitkas pujustasaja.

Apajuí umigtamkauwai nunú iyash ii jukitna nunak. Nuna jukitnume tujamu asa emtikak Wakaní Pegkejinak amasuí.

Nuaduí tuke kajinmasa anentaimauk ajutjamainaji, wagki iina iyashiya jujai pujakuik, tikich nugkanum batsatu wajukmaina numamtuk, Apu Jisusjai atushat pujuinag nu dekaidau asaja.

Yamaik duka wainchayatku, jukitnapitji tusa kajintsá anentaibaunum batsatji.

Duwi wake besemjak batsattsuji, jujú iyash idaiku Apu Jisusjai pujustasa wetinaitag nu imá senchi wakegau asaja.

Nuaduí iwaaku pujaknush, nuniachkunush ni pujamunum wakanush, niina shiig awagma nunak takagsamig tabaunum kakanmamainaji.

Tsawan jegatnai ashí aentstí Kristu emtin ijunjatnaitag nunú, nunikbaunum makí makichik aents nugká pujusá takasbauji pegkeg ataish, tuja pegkegchau ataishkam dutiksag susatnai.

Nu nuniktin dekau asaja, puyatjusa tikich aents aidaush Kristu nemagkatajum tusa imatjuinaji. Nunak Apajuik shiig dekagtamui, nuniau asamtai atumshakam shiig dekamain ainagme.

Juka ataktú jutii emematmamsa chichaaku tatsuji. Tujash jutii pegkeg tuinag nunú atumesh dekaatajum tusa wakegainaji. Nunikjum aents aidau pegkejan takaak wajukmaina numamtuk wajaina nu, wi dutikag nuna dekainatsu dushakam shiig ujakminjum tau asan.

¿Atumesh jutiik pachimasa chichau asajinig, auk imaankau asag tu yujainawai tukagtuinajum? Imaankau asaja, juka Apajuí ememattasa taji, tujash imaankau asajaik chichagkagtuinatsji, juka atum yaigkagtasaja etsejuinaji.

Kristu senchi anempa nu dekaidau asaja, niina chichameg wakeesa etsejuinaji. Nigka ashí aents aidaunum mantamdauwa duwi, ni nemajuinaku ashí pegkegchau takatak idaisau asá jakaujai betek ainaji.

Kristuk ashí aentsun uwemtikatatus mantamdauwai. Nunin asamtai aents niina nemajuidauk, dita wakegamun taká batsamtsuk, Kristu ditai mantamna nantakiuwa nudaun takamain ainawai.

Nuaduí jutii Kristu nemajin aidautik Apajuí nemagchau anentaimaina nuninuk anentaimainatsji. Yaunchkek Kristu nemagchau anentaimaina nunin aajakuitji. Tujash yamaik nuninuk anentaimtuinatsji.

Nuaduí aents Kristun nemajuidauk duwik pujutinak idayinak, yamajam pujutan jukiaju asag, dekas yamajam aents ainawai.

Ashí nu aina nunak imá Apajuik dutikawai. Nigki ni Uchijin awetugmauwa duwi niijaish igkunikuitji, dutijabau asa jutiinashkam, tikich aents aidaush, Apajuijai pujutjum iwajatajum tusa ujaktajum tujabiuwai.

Nunak Apajuí ni Uchijin awemauwai, ashí aents aidauk epegtumatnume tusa. Dutikamu asa, iina tudauji aidaunash pachitjamtsuk idaitugmasui. Tuja jutiinak: Apajuijai pujutjum iwajatajum, tusa chichagkagtuktajum tujabiuwai.

Nunin asamtai jutiin, Kristu mina chichameg wi tumainaitag dutiksagmek etsegtugkatajum tusa awemamu asaja, Apajuí atumin tujaamaina nunak jutiin tujamiu asamtai Kristu tawa dutiksanuk tajime: Pujutjum Apajuijai iwajatajum.

Kristuk makichkish tudau aina nunak takaschauwai, nunikunak Apajuí jutii tudaujin niinak aents tudaujai betekak emauwai. Ni nunikbaujin iishkam uwemja niijai ijunjau asajin, yamaikish tudau ainajinig, tikima pegkegma iman diigmaji.

Jutiik Apajuí chichame etsegbaunum yaimin ainaji. Nunin asaja segajime: Apajuí wait anenkagtamun iwaintugmakua nu shiig dekaajum, ni chichamesh ayatak antukjum idaitsuk unuimagtajum tusan.

Wagki agagbaunum chichaak: “Tsawan wi antugmainaitjam nu jegau asamtai untsugkumin antugkan aikmajame, dutikan uwemainjum tsawanjum jegagtamatai yaigmajame”, tawai. Nu tsawantak yamaiya juuwai Apajuí aigmamainuk. ¡Yamaiyai tsawan uwemaina dushakam!

Tikich aidauk pegkegchaukesh iwaintuinatsji, ii takainag nuna pegkegchau chichajinum tuidau asaja.

Ayatak dekas Apajuin inakempap ainawa tusa dekagmatnume tabaunum, waitiakuish, atsumakuish kuashat katsuntuinaji.

Iinak achigmakag asu asutamainakua egkepawagmayi, jetepainakuish waittsabiaji, takatash imanik takabiaji, kanutskesh tuke tsawampabiaji, yujumak yutsuk yujasaishkam imanik waitbaiji.

Nu imaninakuish shiig pujuidau asá: Dekas Apajuí inakempap ainawa, tama agbaiji. Apajuin chichamega duka shiig dekainaji, nuniau asaja tikichjaish shiig anendaisa, uyumat aneakas pujuinaji. Wakaní Pegkeji jutiiní puja nu yaimpasmatai, tikich aidaush dekas aneamunum emamkesa shiig takasbaiji.

Chicham dekaskea dushakam, Apajuí senchijí iiní ajutjama nujai takasbaiji. Nunin asajin jutii shiig pujamujiya nunú, ii shiwaji aidaunum ayamjumamaina nuwishkam yaijatkauwai.

Aents wakejutpas eme anenjamas jujamainai, tikich aents dakitjamaidaush ainawai. Aents pegkegnum chichagtamainai, tikich aents pegkegchaun chichagtamainawai. Tikich chichagtamaidau: Waitjin agmae tujamainai, tikich chichagtamaidau: Waitjuchu agmae tujamainawai.

Tikich aents waipachu utugtamaina numamtuk awajtamainai; tikich aentsuk shiig waipau utugtamaina imatijamainawai. Mantamattak awajtamainaigkish, iwaaku pujaji. Suwimkan imatijama sujamainakush mantamachajui.

Kuashat utugchat ajutjamkujaish, tuke shiig aneasa pujuinaji. Ujunauchitkuish tikichik senchi yainaji, Apajuinu tuke atina nuna jukitnume tusa. Tikichin ajuina imatiksag ajutjamchakush, ashí ajutjamainawai.

Yatsug aidau, ubag Corintonmaya aidauwah, jutiik dekaskea duke ujakbaijime, ii anentaibaujiya duka uusá tutsuk, ashí ujakbaijime.

Jutii aaja nuniajinig, atumek uusá anentaimjume.

Nunin asagmin (muun uchijí aidaun chichajama dutiksanuk tajime), wait aneasjum minash atum anentaibau ujatkatajum, wi atumin uutsuk tajim aikasjumek.

Jisusa nemagchau aina nujaig nuwenawaigpa. Aantsagmek pegkegchau dutikainamush atuetukaigpa. Wagki, dita anentaimaina duka jutii anentaimainag nujaig betekchauwai. Ditak Kristunak umijuinatsui. Nuaduí pegkegchaun takaina duka, pegkejan takaina nuna kumpajig amainchauwai. Suwea duka tsaaptinjaig apatdaimaitsui.

Kristuk iwanchjaig makichkish apatdaimaitsui. Nunisag Kristun nemajuidaushkam Kristun nemagchau aina nujaig ijunmaitsui.

Atum ainagme dekas Apajuí pujutai aidautigmek. Apajuí jeega duka apajimtai aina nuna jeeg amaitsui. Apajuí chichaak: “Ditai pujustajai, nunikan ditajaig wetajai. Dita mina aentsug atinme, nuninakui wi dita Apají atajai”, tiuwai.

Junashkam Apajuí chichaak: “Tupandaijatajum aents pegkegchaun takaidaujaig, nuniakjum ashí tunamamain aidau takasaigpajum, nunikagmin wi atumnak jukitjime,

dutikan wi atumin Apa atajai, tuja atum mina uchig, mina nawantug atajum, tiuwai Apu ashí senchigtina nunú.”

Nuna aatus anagtabau asamtai aneetaig yatsug aidauh, ubag aidauh, shiig kuitamamsa pujaku iina iyashin, wakannumash pegkegchau etamaina duka ashí idaisa pujumainaitji. Apajuí ajantusa diinaku, ni pegkegma ibauk atasa kakanmamainaitji.

Dekaskenum anejattsa dijattsatajum, wagki makichik aentskesh pegkegchauk takagsachmayag nuaduí. Jutiik atumin pegkegchau etamainuk jintintuachuitjime. Makichik aentsú wajiiji atankitasaikish wainkaik tsanugchabiaji.

Wika junak atumek nunin ainagme tusan augmatkun tatsujime. Yaunchuk tibaijim nunisnuk, wika atumnak aneajime ijuntsan pujustasan, jaaknush atumjaig jakatasan wakegajai.

Dekaskenmag ii anentaibaujiya duka uusá tutsuk ashí ujakbaijime. Atumin anentaimtaknuk ememasan anentaimjai. Waitiaknush atumiin anentaimkun shiig aneasan dakunkut pujajai.

Macedonia taawabiag duwi nagkamsa waitiag nunisaik yamaikish ayamsaik batsattsuji. Ashí yantamnum utugchatak igkuibiaji, tikich aidau jutii etsegbaunak dakituidau asag pampanjamainakui ishamkagtaku.

Tujash Apajuí aents waituidaun anentain ichichtina nunú, Titun awetugma jutiinash anentain ichichtamjabi.

Tujash imá ni taa duwikik nunikchamjai, ni atumin waipak ichichmamjau asa, atum jutii waijatkatasa wakegamun, nuigtú wi waitiamu antukjum kuashat wake besemag batsatkujum, uyumatjuinajum nuna ujatkamtai antukan, nuní nagkaemasan shiig aneasmajai.

Tuja wi papí agaja awemamu ausajum, imá senchi wake besemag anentaimsamugmin ujatkamtai antukan, wishakam kuashat wake besemag dekapjabiajai. Nuniknush nunakek anentaimtuk pujatsjai. Dekas awemamainchauna awemayag tusankesh anentaimtatsjai.

Yamaik shiig aneajai, tujash atum wake besemag batsamsaujum duwi nuniatsjai. Atum wake besemag batsatkujum Apajuiyai ataktú wakitkiujum duwi. Duka Apajuí dutijamkui nunikugme, nuaduí atumin pegkegchau awagmamaina duka dutikashjiapi taji.

Apajuí wake besemag anentaimtijama nunak, iina pujutin yapajia uwemjati tusa dutijamui, nuniau asamtai nu anentaimtaku waitú pujumainuk atsawai. Untsu Apajuí nemagchau aidau wake besemag dekapenayatak pujutjin yapajinashkug, Apajuijai tuke kanaak kanamain ainawai.

Atumek wake besemag pujakjumesh Apajuí wakega dutiksagmek katsunjaugme. ¡Nunú yamai diistajum wají ajutjamsaje! Nunak atumiin utugchat awa nuna shiig dekamtijamak, minashkam ayamjutkatatus dutijamawaje. Kajeamush, nuigtushkam ishamamush ajutjamsaje, nunikjum mina waitkatasajum wakekaugme, nunikjum ya pegkegchaun takaawa dusha suwimak susaugme. Nu dutikaujum duwi iwainmamkaugme, atumesh dekas nunú pegkegchau dakituinajum duka.

Wi papiin agagmayag nunak imá aents pegkegchaun takasua nuna yaigtasanuk agagchabiajai. Nuniachkunush pegkegchaun takasua nuna apajin yaigtasankesh agagchabiajai. Ayatak atum jutii puyatjusjum antugkagtajum nuna iwaintuktasan agatjamjime.

Ashí nu atumin nagkaetamkiuwa duka jutiinak ichichtamjauwai. Tujash nunú ichichmamjamua nuní nagkaemas shiig aneasmaji. Tito shiig dakujus pujau wainku, duka ashí atum aidautigmeap dakujutak egketuaugme taji.

Wi atumin ememattsan anentaimtamun Titunash ujakmajai. Nuna tija nunak pegkegchauk juwakchajai. Ii ashí dekaskea nu pachisa atum ememattsa tibaijim nunisag Titushkam waipakaje.

Nigka atumnak senchi anempajume, ni atumin segapakuish betek umijujakbau asa. Nuigtushkam eme anentsá jukimu asa.

Wika atumiin shiig kajinmamsan pujag duwi shiig aneajai.

Yatsug aidauh, ubag aidauh, Jisusa nemajuidau Macedonia batsata nuna Apajuí wajuk wait anentamujin ditan iwaintuke nuna pachisan ujaktasan wakejajime.

Ditak senchi waitiamunum batsatiatak, shiig aneasag dakunkut pujusag ujunauch ainayatkush, wiyakuch wajukmaina imanisag wakejus tikichin anentag yaigkaje.

Wi dekas wainkamujun ditanak etsegtajai, dita dutikmainji ajamun diisag wakejus, dita anentaimtusbaujin inagkeasajashkam anenjauch susagmayi;

ditak nagkabiag, yatsug aidau, ubag aidau, Apajuí nemajuidau Jerusalén batsata nunú yaigmí taji tusag segatiagmayi.

Wi anentaimtusbauwa nuna inagkeasag dutikawagmayi. Dekatkauk ashí ditá pujutinak Apu Jisukristun idaitusag, nuaduí wi Apajuí wakegamun taja dutiksag umikagmayi.

Nuaduí Tito chicham susá awemaji, ni anuí taa, atum tikich wait anenjatin ijumkujum nagkabauwaitjum nuna jukiti tusa.

Atumek ashí wagaagme, Kristui dekaskeapi tusa nemagtanmash, tikich chicham dekatnumash, dekaskea nu shiig dekatnumshakam, atum jutiiní unuimajuitjum dutiksagmek, tikich aidaushkam aneasjum yayajume. Antsagmek atum tikich wait anentsajum yayajum nuwishkam wagatajum.

Wika ju dekas umiktajum tusanuk tatsujime. Tikich aidau dekaskenum anenkai wajuk shiig wakejus aikainawa nuna wainkatnume tusan tajime.

Atumek shiig dekagme, Apu Jisukristuk wiyakchaitak atumin wait anenjamu asa, ujunauch wajas tauwa duka. Nunak ni anentag sujamsauwa duwi, atumnashkam dekas shiig pegkeja nuna jukitnume tusa dutijabauwai.

Wika junak atumin shiig awajtamaina nuna pachisan tajime, tikich mijan nagkaemakmaya duwi kuichik anentag ijumkujum nagkamauwaitjum duka, dekaskenum dutikatasajum wakekauwaitjume.

Atum wakeesa dutikami tusa kuichik ijumat nagkamauwaitjum duka, yamaish wajupa kuichkish ajutjamainawa nunú ijumjajum idaisatajum awemanti.

Wagki, aents wakejus sukagta nuna Apajuik shiig anentus jujawai, wajupauchia anenjauch suwawa nuna. Apajuik aents shiig atsuja nunak segatsui.

Junak tikich yayakjum atum waittsatajum tusanuk tatsujime. Mai betekak atum atsumamua dusha ajutjamtinme tusan tajime.

Yamaik atum dita atsumainakui yaimainuk kuashat ajutjamainawai; tikich tsawantin atum atsumtaish dita yaimpamain ainawai. Junak mai betekak atum atsumamua dusha ajutjamtinme tusan tajime.

Apajuí chichame chichaakushkam: “Kuashat jukiuwa nudaush ampinjachui, tuja machik jukiunush tagagchauwai”, tawai.

See tajai Apajuin, wi atumin yaigtasan wakegag nunú wakeetanak Titunashkam susau asamtai.

Wi awemag juna juki, niishkam atumiin minitatus wakegau asa, wakejus minawai atumin waipaktatus.

Titujai awemajai makichik yatsutan, ashí tikich Jisusa nemajin aidaush chicham yamagma juna shiig jintinkagtawai tusag wakejin agma nuna.

Niinak Jisusa nemajin aina nu jutiijai minití tusa wakegainawai. Ujunauch aidau Jerusalén batsata nu kuichik susami tabaunum. Jutii aaja dutikamunum ditak Apajuin see tuinak, tikich Jisusa nemajin aidau yaigtasa wakegag nunash dekaawagtatui.

Nunú yatsut atsumaidau yaigtinun, anentag kuashat kuichik ijumjamu juwinag nuna pachisag, wainak augmatjamsainum tuidau asaja tuke kawemak yujainaji.

Nuniaku itusaik pegkeja duke takasag tusa kakanmamainaji. Imá Apajuí emtinig iwainmamkatasa nunitsuk, aents aidaush jutii shiig takainamun wainkatnume tabaunum.

Ditajai awemajai tikich iina yachí ashí wajiinum kuashtá dekapsamua nuna, nigka shiig kuitamas takauwai, yamai atuminish shiig kajinmas anentaimin asa wakegas minawai.

Titun pachisan tajime: Nigka wijai atuegak atumi yaimpaktatus takauwai. Tuja tikich yatsug jimaja nunak, Jisusa nemajin aina nu awemainawai. Ditashkam Apu Kristun emematin ainawai.

Jisusa nemajin aidau dekaatnume tabaunum, atum dita aneamugmish iwaintuktajum, jutiik atum eme anentaimtuidau asa tajime.

Wika Jisusa nemajuidau yaigtinuk kuichkik ijumjau asagmin, ataktú ijumjatajum tusanuk agatmaitsujime.

Wagki, wika atum wakesajum dutikamugminak shiig dekagjime, nuniau asan Macedonia nugkanmaya aidaun ujaknush, atumí eme anentsan ujainajai. Nuniakun Acaya nugkanmaya aidaush tikich mijanae duwi nagkamas, dita yaimkatnujinak umintsaje tajai. Nunú atum wakejusa dutikamun, Macedonianmaya antukag senchi wakekagmayi.

Atum imaniagminig yatsug aidaun awetajime, wi atumin ememattsan chichaag nuna wainak tu wekaguwa nunin diigsainum tusan, wi etsegtajim nunisjumek umintsajum asatajum tusan tajime.

Macedonianmaya aidau wijai anuí takamá, wi tajim nuninchaun waipainakuig, atum datsamain aig, ii atumiin kajinmasa chichakú asaja jutii datsamainaitji.

Nuaduí nunin ai tau asan, ju yatsug aidaun: Atum emkajum wetajum, nunikjum tikich mijan nagkaemakmaya duwi yaimkatnun wakejus nagkamawagmaya nuna ijumjatnume yaigtajum, tusan awemajai. Aatsa ijumja umisjum asatajum sujimayatku dutiktsuk, wakejusampap jutikainawa tumain atí.

Jushakam adeagtajum: Ajakan machik ajauk machik juwaawai, kuashat ajakmakushkam kuashat juwaawai.

Makí makichkitijum atum wajuk susatjai tusagmea anentaimsaugme, dutiksagmek susatajum, junik anentaimiatkujum, nuniachkugmesh tikich apusata tujamainakui dutiktsuk. Apajuik ya wakejus suwawa nuna imá shiig aneawai.

Apajuik ashí pegkeg aina nunak amainawai, dita atsumaina duka imanisag ajitnume, nunitai tikich aents atsumaina nunash yaigtinme tau asa.

Agagbaunum chichaak: “Ujunauch aidaun kuashat susaja nunak, Apajuik kajimatjukchatnai dita pegkeg dutikamujiya nunak”, tawai.

Apajuiyai ajak ajakmatnun, nuigtú yuwatnunash sukagtinuk. Nunin asa ajak ajakmamunash nigki tsapapak kuashat nejepitka numamtuk, atum wakesajum yaimjum nunak, nuní nagkaemas kuashat sujamsattagme, tikichin pegkegnum yaigtinme tusa.

Dutikamu asajum, ashí atum tikich yaimainush ajutjamtatjume. Atum kuichik ijumjajum jutiiní awemattajum nuna, yatsug aidau, ubag aidau waituidau jukiag, Apajuin see tiagtatui.

Yatsug aidau, ubag aidau yaigtin juwinag duka imá atsumamujinig yaigtasaik juwinatsji, duka Apajuinashkam see titinme tabaunum dutikaji.

Ditak Apajuin emematiagtatui, atum yaigtatjum duka Kristui dekaskeapi taji tau asajum umigjum nu iwainmamkujum dutikattajum duwi. Nuigtushkam ditak Apajuinak eme anentus diisagtatui, atum dita wakejusjum yayakjum, tikich aidaush yaigtatjum nuaduí.

Nuninak atumin anempas Apajuin aujtugmagtatui, Apajuí shiig kuashat wait anenkagtamujin atumin iwaintugmakaja duwi.

¡See tajai Apajuin, chichamaikish tumainchaun shiig kuashat anenjauch sujamsauwa nuaduí!

Witjai Pabloitjai, Kristu kakagchauch nuigtú wait anenkagtin aajakua dutiksanuk segajime. Mina chichagtuinak: Pablok jutiijai pujusag senchi ajankagtinuwe nuninaitak atushat kanaká kakaakan chichagkagtawai tujutuinawai.

Duwi segajime: Wi atumin wainkatasan taakun, jutii pachijatus aents wakegamun takainawai tukagtuina nuna, shiig titajai tusan umintsan pujag nuna kakaakan tiig tusan.

Dekaske, jutiik aents ainaji, tujash pegkegchaujai maaninag duka shiig aentsjai maanimaina nunikaik maaninatsji.

Wagki, maanitai takuinakag duka ju nugka juwiya ainatsui, duka Apajuí senchijí ashí pegkegchau aidaunash tsaimaina nu ainawai.

Nunú senchia duwik, ememainak wainak chichagkagtuina duka itatmitkamainaitji. Dutiksaik aentsú anentaimtajishkam yapagtumainaitji, Kristu umigkatnume tusaja.

Ashí atum Kristu chichame shiig umigkugminig, wishakam atum ainajum anuiya chichaman umiinachunak suwimkan sumainaitji.

Atumek mina niimjuí diigsagmek, paan kakakchauwa nunin diigjume. Atum ainajum anuiya, wika dekas Kristunuitjai tumamuk, minashkam niish Kristunuapi tujutmainai. Wishakam Kristunuketjai.

Atum tumamjum nuna nagkaesau ememasan, witjai chicham etsegtugkata tusa awemamunuk tumamkunush, Apu Apajuí atum yaigtinun sujamsamu tajim nuaduí datsamatsjai. Atum dekaskeapi tuinajum nuna emegkatkati tusa awetichui. Ayatak atum dekaskeapi tuinajum nuna yaigtí, dutikawajam nuní nagkaemas Kristui kajinas anentaimtinme tusa awetiu asamtai.

Wi papiin agajan awetajim junak, uwaktamkatasampap awetugmawa tujuttinme tusanuk wakegatsjai.

Tujash awai mina pachittsag: Pablo papiin agag awetugmakug najamnun tujamji, tujash taa pujakug chichamesh puyatjusa antugmainchauwe tujutuinawai.

Nuna aents aatus tujutuidaushkam dekaatnume: Wi papiinum agakun timayag nunak, anuí taaknushkam imatiksanuk umiktatjai.

Wika aents ditak emematmamas chichau aina nujai betekak chichamaitsujai, ditak wainak tumainchaun ditak pachimasag, tikich aina nunin achainjiash tusag tu yujainawai.

Tujash jutiik ii takaschamunum emematak shiig dakitin ainaji. Apajuiyai jutiish wajuk dutikmainaitji nuna tujamuk. Nigki jutiinak atum Corinto batsatjum anuish takastí tusa wakejutpaji.

Iinak Apajuí atumiin awetabiaju asamtai, atum Corintonmaya aidautigmijaig takasbaiji. Jutiiyaitji dekas atumiin taa tikichish etsegchamunum Kristu pachisa etsegkautik.

Jutiik ii takaschamu aig, tikich takasbaunmag ememamaitsuji. Ayatak wakeesa dakainaji atumjai aan kuashat takastasa. Atum Kristui kajintsá anentaimjum nu aan nagkaemas ajutjamti tusa. Jutiik Apajuí dutikata tujabauwa duka dutiksaik takainaji.

Nuniaku tikich atushat batsataidau yamajam chicham ujakchamu aina nunú ujaktasa wakegaji, tujash tikich chicham etsegkamunum waitsuk, tikich takasbaunum ememaig tuidau asaja.

Jutiikek eme anenmamaitsuji, ayatak Jisukristu takaamujiya nunú eme anenmainaitji.

Aents pegkejan takaajai tumama duka wainkayai, dekas Apajuí aentsun pachis, pegkejan takaawai tawa nuuwai dekas imanuk.

Wi imaanjau chichamaina numamtuk wajakuish, katsuntsajum antugtuktajum.

Wika Apajuí akasmataijiya nuna jukiu asan atumnak akasmainaitjime. Kristuig wi atumnak jukin ejeentauwaitjime, niinig pujusjum imá nigki umigkujum, nuwa aentsun adijkachu ni nemaktinjijaig dakaniyama nunisjumek pujustajum tusan.

Tujash dapi Evan tsanujua numamtuk atumnashkam tikich waitan jintinkagtin aidau tsanugmainakui, Kristu aneakjum nigki umigjum nunú idaisaijum tusan imá puyatjajime.

Atumek, jutii Jisus pachisa etsegkamua nuna tikich aents yajupia chichagkagtuinak, Wakaní Pegkeji jukiuwaitjum nunash pachitsuk, yamajam chicham etsegkamua nunash yajá jintinjamainakuish, shiig antugkatasajum wakegajume.

Tujash wi anuí taan wakitkiu ai, Jisus awemamu ainaji tusag kautjamawaja nu dekas iman anenmamaina nuna nugkaanik anenmamtsujai.

Wi shiig chichachkunush dekatjuig nuninchauwaitjai. Nunak ashí ii dutikamunum tuke iwaintibiajime.

Atumin Kristu pachisan ujaknush kuichkinak segachuitjime, ayatak yaigkan emtikata tau asan. ¿Nuna dutikauwaitag duwiká minak pegkegchauwai tusajum dakitjajum?

Wika tikich nugkanmaya Kristu nemajin aidau kuichkin akigkagmatai, nunú kuichkia duwik atumin yaigtasan wekaeyajai.

Wi atumiin pujubiag duwi atsumaknush makichkitigminakesh waitkaschabiajime, yatsug Macedonianmaya aidau taawag ashí wi atsumamunak sujusagmayi. Atumin waitkasaig tusan senchi kuitamamaijai, dutiksanuk atakea duwish wika atumnak tuke waitkaschatnaitjime.

Kristui dekaskeapi tau asan dekaskea nunak chichaajai. Nunin asan tajai, Apajuí nemajin Acaya nugkanum batsamin aidaunak makichkish kuichik sujustajum tusanuk segashtinaitjai.

Juna wi atumin wakejachu asanuk ¿tu chichagjim? Wi atumin senchi wakejajim nunak Apajuí shiig dekawai.

Wi chichaag jutiksanuk mina takatjunak emattajai. Imaniakun tikich aents waitan jintinkagtin ainayatak, dekas jutii Apajuí awemamu ainag imajuk anenmamaina nunak imijkattajai, aentsun tsanujainum tusan.

Ditak waitá etsejin tsanumin ainayatak, Kristu awemamu wajukmaina numamtuk wajainawai.

Dita nunina duka wainchataiya nuninuk anentaimtumaitsui, iwanchakam dita wajukena numamtuk, Apajuí aentsji nayaimpinmaya aina iman weeta wajauwai.

Nuaduí iwanchin takajin aina duwi, aents pegkejan takauwa iman wantinainawai. Tujash nu aents aidauk dita takasbaujiya dutiksaik suwimak suwam agtinai.

Awentsanuk tajime: Wait aneasjum imaanjauwa nunin anentaimjutkugmesh ayatak diigsatajum, wishakam shiig agkan ememasan chichastajai.

Wi chichaag nunak, Apu Jisus titá tujutbaun tatsujai. Nuaduí imaanjaujai betek chichaajai wi emematmamsan chichaag nunak.

Tujash tikich ainawai ditak emematmamas chichaidaush. Nunin asamtai wishakam wiki emematmamsan chichaajai.

Atumek shiig anentaimkau asajum, tikich anentainkachu chichaman etsejuinakui shiig antujuinagme.

Atumek ashí aentsuk antujuinagme. Tsanugmajag ditan inake etamkatatus wakejutpaidaushkam antugjume. Kuichkin jujutjamaina dushakam imatiksagmek antugjume. Aikasjumek pegkegchau chichagtamainak, yapiminish awatamaina dushakam shiig anentsajum antugkujum umigjume.

Datsamayatkun tajime, jutiik tikima kakakchauch asaja nu imanuk nunikchabiaji. Tujash tikich ditak emematmamaina nunisnuk wishakam emematmamjai (imaanjau wajukmaina nuniaknush).

Dita hebreo aina nunisnuk, wisha hebreowaitjai. Dita Israel aents aina nunisnuk, wishakam Israel aentsuitjai. Dita Abraham wegantu aina nunisnuk wisha Abraham wegantuitjai.

Kristu inakegaitjai tumamainawai, tujash witjai dekas ditan nagkaesaunuk. (Imanaitkun imaanjaujai betek chichaajai.) Wika takatnashkam ditan nagkaesau takasuitjai. Ditá nagkaesan achinkanush egkemauwaitjai, ditá nagkaesau asutnauwaitjai. Kuashtá mantumain awajtukaju ainawai.

Cincoa imaniá mina pataag judío aidau achigkag, treinta y nueveya imaaniá asutuawaju ainawai.

Kampatuma imaniá numí suwimjuawajui. Makichkia kayai kuashat aents tukujiaju ainawai. Kampatuma imaniá lancha wi wegamu tepeauwai, nunikmatai jakemain wajakan, makichkiá nayantsa ejapeen tsawampajuitjai.

Kuashat wekaesauwaitjai, namak ishamainnum, kasa ishamain ayamunmash, mina pataag judío aidau, tikich aents Apajuí nemagchau aidaujai kajegtuinakui. Nuigtú ishamain aidau yaaktanum, uwegshunum, nayantsanum wegakun, tuja Kristu nemagnaitjai tusa tsanumaidaunum wekaekun.

Senchi takasan yaweakun, kuashtá kanutsuk tsawaakun, yapajakun kitamakun, kuashtá yujumkan yutsuk wekaekun, tsetsekai waitiakun, jaanch atsugtakuishkam waittsauwaitjai.

Juna imaniaknush, kashí kashinig Jisusa nemajuina nu uyumamuk tuke ajutui.

Makichik aentskesh Jisusa nemajin waitiakuig, wishakam waitiajai. Pegkegchaun takasagmataishkam, ditan yayakun nuna pegkegchaun takamtikaun kajejajai.

Wi ememamainaitag nunak, Apajuí wi kuashat ishamainnum wekaekun kakakchau anentaimtaish yainkauwa duwi ememamainaitjai.

Apajuí, ii Apuji Jisukristu Apají nigki tuke ememattaya nu dekagtawai wi dekas taja nunak.

Damasco jegaa ai, Apu Aretas tutaya nujai takau aidau, ashí yaakta waitijin achijatin aidaun dakamtijagmayi mina achigkag jujuktatus.

Tujash Kristu nemajin aidau chagkinnum egketuawag, yaakat peegmagbau ventanajin detuawag ajuntuawagmatai, uwemjauwaitjai achigkata tuinamun.

Dekaskenmag wiki emematmamtak shiig awajtatsui, tujash Apu Jisus mina iwaintugkamun wainkauwaitag nuna tajai.

Wainjai makichik aents Kristu nemagnun, catorce mijan nagkaemawai kampatum nayaimpia nui iwakbau aajakua nu. Shiig dekatsjai ashí iyashijai jukimpash iwakabia, atsa nuniachkush wakaninakeash jukiabia, nunak imá Apajuik dekawai.

Duka nayaimpinum iwakam wajasá, chicham antushtain antukui makichik aentskesh ujamainchaun.

Nu aentsua nuna wika emematmainaitjai, tujash wika makichkish emematmamaitsujai, ayatak wi kakakchamujua nuwi emematmamjai.

Tujash wi emematmamtasan wakegaknush, tikima wainkanuk tumaitsujai dekaskea nuna tau asan, nunin aig nunak tatsujai, mina imá eme anenjutsuk pujutjun diigtusag, wi chichaamugnash antugtuktinme tusan wakegau asan.

Apajuí mina dekas imanun iwaintugkauwa duwi, ni imá wagaaku anenmami tujutu asa Apajuí jatan sujusuí, nunú jatak mina iyashjunak jagkí ijuam najaamaina imatijuauwai, nunak iwanch dutijuauwai mina waitkagsatatus.

Dutijuamtai Apajuin kampatumá segajai: “Wi waitiag nuna emegkatjukti”, tusan.

Tujash Apu Jisus chichagtak: “Amek wi aneamu asam, ashí ame atsumamugmea dushakam imanisag ajutjamtatui, wagki mina senchijua nunak aents kakakchauwa nui iwainajai”, tujutmayi. Tujutiu asamtai shiig aneajai wi kakakchauwaitag duwi, Kristu senchijiya nunash dekaatnume tau asan.

Nuaduí shiig aneajai kakakchau asan. Pegkegchaun chichagtuinakuish, atsumaknush, mantuatatus aintuinakuish, utugchat ajutkuish Kristu nemagbaunum imanikan waitiajai. Kakakchauwa nunin diijuinakuishkam, wika Kristu senchijí ajutu asamtai, wishakam senchigtin dekapmamjai.

Wi imaanjaujai betek mina pujutjun pachisan chichakmayag duka, atum chichamtijukmaugme. Wagki, atum mina pachittsajum pegkegnum chichagtumaina nu, tikich waitá jintinjamainak, jutii ainaji dekas chicham antujam amaintik, tuina nu antujuinakjum, minak imanchau diiju asagmin.

Wi atumiin pujusnuk shiig emamkesan kuitabaijime. Dutikakun atum wainkashbau aidaunashkam imanik iwaintakun, jaunash etsagauyajai. Imá jaunak dutiktsaijai, ashí tikich aidaunashkam imatiksanuk dutikiajai, atumshakam wi dekas Apajuí awemamuitag dusha dekajuatajum tau asan.

Atumek imá makichik wají dutikachbaunmag, tikich Jisusa nemajuina nujai betekak juwakchaugme, wi atumin: Yainkatajum, tusan segachuitjim duwi. Tujash wi atumin wake besemag egketuauwaitjim duka tsagkugtugtajum.

Kampatuma junash ijagsatjime tusan umintsan pujajai. Yamaishkam wi atsumamu sujustajum tusanuk waitkaschattajime. Wika atumin ajutjamaina nunak egatsjai, imá atumnak wainkatasan wakejajime. Aents uchigtin aina nuuwai uchijinu atinun kuichkin ijumaina duka, uchi aina duka apajinu atinnak dutikmaitsui.

Nunin asamtai wakeesan ashí wi dutikmainaitag nunak yaigta tajime. Nunisnuk mina iyashjuish waittsattajai, atum wakanmiin megkaekaijum tusan yayakun. Wi atumin imá senchi aneajime, dutikamaitkujum atumek minak imatikajum anentsugme.

Wi atumin segakun waitkaschauwaitjim nuna shiig dekajuinayatak, wainak ajankas tsanugmagtatus tu wekaewai tujutuinawai.

¿Wisha tikich yatsug aidaun awetibiajim duwiká tsanugbaijim?

Titun atumiin awemakun niijai tikich yatsutan awemabiajai, ¿Duká tsanugmajagmaya kuichkin sujustinme tusa? Tituk wijai betekai, wagki atumin yaimpaktatus wijai betek takau asa.

Aneetaig yatsug aidauh, ubag aidauwah, atum anentaimsagmek, tuke aneas ayamjumakagtatus tuinatsuash tautigmesh amainaitjume, tujash nuninchauwai. Jutiik ayatak Kristu nemajin asaja, Apajuish dekamunum shiig pujustinme tau asá yaigtasa taji.

Wagki, wi atumin wainkatasan takaman, atuminian pegkegchau wainkata tachamun atum jiyaniakjum, wainka kajegkagtakjum, kajeakjum tupandaikajum, pegkegchau chichagdayakjum, chicham patatdayakjum, ememakjum, wainka pachimdaekajum batsatjumin jegashtajash tusan puyatajai. Nunú nuniakjumin wi atumin kajegkan jiyaka ai, atum minai pegkeg dekatasa dakagbauwa nu nuninchau diigsaijum tau asan.

Nuigtushkam puyatajai wi ataktú ijagsattajim duwi, atum ainajum anuiya yaunchuk nagkamas tudau takainak, pegkegchau takataijinak idaitsuk, tsanijimtanak tunamatjag batsamtau asagmatai, Apajuí atumiin datsamtan sujusmatai buutig tusan.

Yamai minittag nuuwai kampatuma juna ijagsattajim nu. Aents pegkegchau takaun wainkau, jimag nuniachkush kampatumkesh etsegtuinakui, atum wajuk dutikattagme duka tumainaitjume.

Yaunchuk wi jimaja juwi ijagsatasan tajuawabiajim duwi, pegkegchau takaajum duka idaisatajum tiuwaitjime. Tuja nui pujus tikich pegkegchau takaunash suwimkan susattajai tiuwaitjim nunak awentsanuk tajime: Wi anuí atumin ataktú ijagsatasan minittag nunikman, pegkegchau taká batsatjumin wainkan suwimkan amasaijim tusan.

Nuna dutikakui, Kristu nigki niina takatjin inata duka shiig dekaattagme. Kristuk atumin dutijamatta duka kakakchauchui; niina senchijinak atumiin iwainaktatui.

Dekaske nigka senchigtuchua nunin wajasuí, nunikmatai yupichu achijaju ainawai, tujash yamaik Apajuí senchijijai pujawai. Jutiishkam nunisaik ni kakakchau aajakua nuninuk ainaji, tujash Apajuí senchijin Kristujai ijunja pujuinaji, atum chicham ujakta tau asaja.

Atumek niimastajum dekas pegkejash takaajum, atsa pegkegchauwash takaajum nunú. Atum pegkeg takaakjumek Jisukristu atumiin pujau asamtai nuniagme. Tujash Apajuiyai kajintsá anentaimchakjumek, pegkegchau takaakjum nuniagme.

Atumesh itusagmek jutii kuashat dekapsamu asaja, dekas Kristu chicham etsegtugkata tusa awemamu ainag dusha dekaawajum tusan wakegajai.

Nuniau asan atumshakam pegkegchau takasaijum tusan Apajuin aujtajime, wi Apajuin aujag nunak, wi Kristu chicham etsegtugkata tusa awemamuitag nuna dekajuatnume tusanuk tatsujai. Nunak ayatak pegkeja nuna takastinme tusan tajime, atum jutii Kristu awemachbauwa nunin diijatjuminig.

Jutiik dekaskea nuna shiwagmamaina duka makichkish takamaitsuji, chicham dekaskea duke takamainaitji.

Atum shiig ichichmamjajum pujajum duwi, wi kakakchauwaitkunush shiig aneasan pujajai, nuniau asan pegketnume tusanush Apajuinak tuke aujtajime.

Nuniau asan eke atumiin minitsuk, juna papiin agajan awetajime, wi atumiin taakun najam tiijim tusan, Apu Jisusak atumin waitkasti tusag senchijinak sujuschauwai, ayatak atumin yaigtí tusa sujusuí.

Yatsug aidauh, ubag aidauh, juna inagnakun tajime: Pegké pujakjum dakujusa pujustajum, nuniakjum ichichdaitajum, makichkia duke anentaimtuinakjum shiig agkan anentaimsa batsamsatajum, Apajuí atumin anempau asa pegké pujutan sujamsawa nunú atumiin atí.

Makí makichkitijum pempentunisjumek shiig anendaisajum kumpamdayatajum. Jisusa nemajin juwi batsata dushakam ashí kumpamjamainawai.

Apu Jisukristu wait anenkagtamuji, Apajuí anenkajiya nu, Wakaní Pegkejiya dushakam ashí atum aidaujai atí. Aatus atí.