dhammo maṅgalamukkaṭhaṃ | ahiṃsā saṃjamo tavo /

devā vi taṃ namaṃsanti | jassa dhamme sayā maṇo ||1||

jahā dumassa pupphesu | bhamaro āviyai rasaṃ /

na ya pupphaṃ kilāmei | so ya pīṇei appayaṃ ||2||

emee samaṇā muttā | je loe santi sāhuṇo /

vihaṃgamā va pupphesu | dāṇa-bhattesaṇe rayā ||3||

vayaṃ ca vittiṃ labbhāmo | na ya koi uvahammaī /

ahāgaḍesu rīyante | pupphesu bhamarā jahā ||4||

mahukāra-samā buddhā | je bhavanti aṇissiyā /

nāṇā-piṇḍa-rayā dantā, | teṇa vuccantisāhuṇo ||5|| tti bemi ||

|| prathamamadhyayanam ||1||

Dasaveyāliya: 2 dvitīyamadhyayanam (sāmaṇṇapuvvagaṃ.) /

kahaṃ nu kujjā sāmaṇṇaṃ | jo kāme na nivārae /

pae pae visīyanto | saṃkappassa vasaṃ gao? ||1||

vattha-gandhamalaṃkāraṃ | itthīo sayaṇāṇi ya /

acchandā je na bhuñjanti | na se "cāi" tti vuccaī ||2||

je ya kante pie bhoe | laddhe vippiṭhi-kuvvaī /

sāhīṇe cayai bhoe | se hu "cāi" tti vuccaī ||3||

samāe pehāe parivvayanto | siyā maṇo nissaraī bahiddhā, /

"na sā mahaṃ no vi ahaṃ pi tīse" | icceva tāo viṇaejja rāgaṃ ||4||

āyāvayāhī! caya sogumallaṃ! | kāme kamāhī! kamiyaṃ khu dukkhaṃ /

chindāhi dosaṃ! viṇaejja rāgaṃ! | evaṃ suhī hohisi saṃparāe ||5||

pakkhande jaliyaṃ joiṃ | dhūma-keuṃ durāsayaṃ /

necchanti vantayaṃ bhottuṃ | kule jāyā agandhaṇe ||6||

dhiratthu te jaso-kāmī | jo taṃ jīviya-kāraṇā /

vantaṃ icchasi āveuṃ! | seyaṃ te maraṇaṃ bhave ||7||

ahaṃ ca bhoga-rāyassa, | taṃ ca si andhavaṇhiṇo /

mā kule gandhaṇā homo, | saṃjamaṃ nihuo cara ||8||

jai taṃ kāhisi bhāvaṃ | jā jā dacchisi nārio /

vāyāiddho vva haḍho | aṭhiyappā bhavissasi ||9||

tīse so vayaṇaṃ soccā | saṃjayāe subhāsiyaṃ /

aṅkuseṇa jahā nāgo | dhamme saṃpaḍivāio ||10||

evaṃ karenti saṃbuddhā | paṇḍiyā paviyakkhaṇā /

viṇiyaanti bhogesu | jahā se purisuttamo ||11|| tti bemi ||

|| dvitīyamadhyayanam ||2||

Dasaveyāliya: 3 tṛtīyamadhyayanam (khuḍḍiyāyāro.) /

saṃjame suṭhiyappāṇaṃ | vippamukkāṇa tāiṇaṃ /

tesimeyamaṇāiṇṇaṃ | nigganthāṇa mahesiṇaṃ ||1||

uddesiyaṃ 1 kīyagaḍaṃ 2 | niyāgaṃ 3 abhihaḍāṇi 4 ya /

rāi-bhatte 5 siṇāṇe 6 ya | gandha 7 malle 8 ya vīyaṇe 9 ||2||

sannihī gihi-matte ya | rāyapiṇḍe kimicchae /

saṃbāhaṇa danta-pahoyaṇā ya | saṃpucchaṇa deha-paloyaṇāya ||3||

aṭhāvae ya nālī ya | chattassa ya dhāraṇaṭhāe /

tegicchaṃ pāṇahā pāe | samārambhaṃ ca joiṇo ||4||

sejjāyara-piṇḍaṃ ca | āsandī paliyaṅkae /

gihantara-nisejjā ya | gāyassuvvaaṇāṇi ya ||5||

gihiṇo veyāvaḍiyaṃ | jā ya ājīva-vattiyā /

tattānivvuḍa-bhoittaṃ | āura-ssaraṇāṇi ya ||6||

mūlae siṅgabere ya | ucchu-khaṇḍe anivvuḍe /

kande mūle ya saccitte | phale bīe ya āmae ||7||

sovaccale sindhave loṇe | romā-loṇe ya āmae /

sāmudde paṃsu-khāre ya | kālā-loṇe ya āmae ||8||

dhūvaṇe tti vamaṇe ya | vatthī-kamma vireyaṇe /

añjaṇe dantavaṇe ya | gāyābhaṅga-vibhūsaṇe ||9||

savvameyamaṇāiṇṇaṃ | nigganthāṇa mahesiṇaṃ /

saṃjamammi ya juttāṇaṃ | lahubhūya-vihāriṇaṃ ||10||

pañcāsava-parinnāyā | ti-guttā chasu saṃjayā /

pañca-niggahaṇā dhīrā | nigganthā ujju-daṃsiṇo ||11||

āyāvayanti gimhesu, | hemantesu avāuḍā /

vāsāsu paḍisaṃlīṇā | saṃjayā su-samāhiyā ||12||

parīsaha-riū dantā | dhuya-mohā jiindiyā /

savva-dukkha-ppahīṇaṭhā | pakkamanti mahesiṇo ||13||

dukkarāiṃ karettāṇaṃ | dussahāiṃ sahettu ya /

ke ettha devalogesu | keī sijjhanti nīrayā ||14||

khavittā puvva-kammāiṃ | saṃjameṇa taveṇa ya /

siddhi-maggamaṇuppattā | tāiṇo parinivvuḍa ||15|| tti bemi ||

|| tṛtīyamadhyayanam ||3||

Dasaveyāliya: 4 caturthamadhyayanam (chajjīvaṇiyā.) /

suyaṃ me āusaṃ teṇaṃ bhagavayā evamakkhāyaṃ | ||*1.1||

iha khalu chajjīvaṇiyā nāmajjhayaṇaṃ samaṇeṇaṃ bhagavayā ||*1.2||

mahāvīreṇaṃ kāsaveṇaṃ paveiyā suyakkhāyā supannattā | ||*1.3||

seyamme ahijjiuṃ || ajjhayaṇaṃ dhammapannattī || ||*1.4||

kayarā khalu sā chajjīvaṇiyā nāmajjhayaṇaṃ samaṇeṇaṃ ||*1.5||

bhagavayā mahāvīreṇaṃ kāsaveṇaṃ paveiyā suyakkhāyā ||*1.6||

supannattā? ||*1.7||

imā khalu sā chajjīvaṇiyā nāmajjhayaṇaṃ, taṃ ||*1.8||

jahā | puḍhavi-kāiyā āu-kāiyā teu-kāiyā ||*1.9||

vāu-kāiyā vaṇassai-kāiyā tasa-kāiyā || ||*1.10||

puḍhavi cittamantakkhāyā aṇega-jīvā puḍho-sattā ||*1.11||

annattha sattha-pariṇaeṇaṃ, āu cittamantakkhāyā ||*1.12||

aṇega-jīvā puḍho-sattā annattha sattha-pariṇaeṇaṃ, ||*1.13||

teu cittamantakkhāyā aṇega-jīvā puḍho-sattā annattha ||*1.14||

sattha-pariṇaeṇaṃ, vāu cittamantakkhāyā aṇega-jīvā ||*1.15||

puḍho-sattā annattha sattha-pariṇaeṇaṃ, vaṇassai cittamantakkhāyā ||*1.16||

aṇega-jīvā puḍho-sattā annattha sattha-pariṇaeṇaṃ, ||*1.17||

taṃ jahā | agga-bīyā mūla-bīyā pora-bīyā ||*1.18||

khandha-bīyā bīya-ruhā sammucchimā, taṇa-layā vaṇassai ||*1.19||

kāiyā sa-bīyā citamantakkhāyā aṇega-jīvā puḍhosattā ||*1.20||

annattha sattha-pariṇaeṇaṃ || ||*1.21||

se je puṇa ime aṇege bahave tasā pāṇā, taṃ ||*1.22||

jahā | aṇḍayā poyayā jarāuyā rasayā saṃseimā ||*1.23||

sammucchimā ubbhiyā ovavāiyā jesiṃ kesiṃci pāṇāṇaṃ ||*1.24||

abhikkantaṃ paḍikkantaṃ saṃkuciyaṃ pasāriyaṃ ruyaṃ ||*1.25||

bhantaṃ tasiyaṃ palāiyaṃ āgai-gai-vinnāyā || ||*1.26||

je ya kīḍa-payaṅgā jā ya kunthu-pipīliyā savve ||*1.27||

bendiyā savve teindiyā savve caurindiyā savve pañcindiyā ||*1.28||

savve tirikkha-joṇiyā savve neraiyā savve maṇuyā ||*1.29||

savve devā savve pāṇā paramāhammiyā, ||*1.30||

eso khalu chaṭho jīva-nikāo tasa-kāo tti ||*1.31||

pavuccaī, ||*1.32||

iccesiṃ chaṇhaṃ jīva-nikāyāṇaṃ neva sayaṃ daṇḍaṃ ||*1.33||

samārambhejjā, nevannehiṃ daṇḍaṃ samārambhāvejjā, daṇḍaṃ ||*1.34||

samārambhante vi anne na samaṇujāṇejjā || ||*1.35||

jāvajjīvāe tivihaṃ tiviheṇaṃ maṇeṇaṃ vāyāe ||*1.36||

kāeṇaṃ na karemi na kāravemi karentaṃ pi annaṃ na ||*1.37||

samaṇujāṇāmi, tassa bhante paḍikkamāmi nindāmi ||*1.38||

garihāmi appāṇaṃ vosirāmi || ||*1.39||

paḍhame bhante mahavvae pāṇāivāyāo veramaṇaṃ | ||*1.40||

savvaṃ bhante pāṇāivāyaṃ paccakkhāmi, se suhumaṃ vā bāyaraṃ ||*1.41||

vā tasaṃ vā thāvaraṃ vā | neva sayaṃ pāṇe aivāejjā, ||*1.42||

nevannehiṃ pāṇe aivāyāvejjā, pāṇe aivāyante vi ||*1.43||

anne na samaṇujāṇejjā, jāvajjīvāe tivihaṃ tiviheṇaṃ ||*1.44||

maṇeṇaṃ vāyāe kāeṇaṃ na karemi na kāravemi ||*1.45||

karentaṃ pi annaṃ na samaṇujāṇāmi, tassa bhante ||*1.46||

paḍikkamāmi nindāmi garihāmi appāṇaṃ vosirāmi, ||*1.47||

paḍhame bhante mahavvae uvaṭhio mi | savvāo pāṇāivāyāo ||*1.48||

veramaṇaṃ ||1|| ||*1.49||

ahāvare docce bhante mahavvae musāvāyāo veramaṇaṃ ||*2.1||

| savvaṃ bhante musāvāyaṃ paccakkhāmi, se kohā vā ||*2.2||

lohā vā bhayā vā hāsā vā | neva sayaṃ musaṃ vaejjā, ||*2.3||

nevannehiṃ musaṃ vāyāvejjā, musaṃ vayante vi anne na samaṇujāṇejjā, ||*2.4||

jāvajjīvāe tivihaṃ tiviheṇaṃ maṇeṇaṃ ||*2.5||

vāyāe kāeṇaṃ na karemi na kāravemi karentaṃ pi ||*2.6||

annaṃ na samaṇujāṇāmi, tassa bhante paḍikkamāmi ||*2.7||

nindāmi garihāmi appāṇaṃ vosirāmi, docce bhante ||*2.8||

mahavvae uvaṭhio mi | savvāo musāvāyāo veramaṇaṃ ||*2.9||

||2|| ||*2.10||

ahāvare tacce bhante mahavvae adinnādāṇāo ||*3.1||

veramaṇaṃ | savvaṃ bhante adinnādāṇaṃ paccakkhāmi, se gāme ||*3.2||

vā nagare vā ranne vā appaṃ vā ahuṃ vā aṇuṃ vā thūlaṃ vā cittamantaṃ ||*3.3||

vā acittamantaṃ vā | neva sayaṃ adinnaṃ geṇhejjā, ||*3.4||

nevannehiṃ adinnaṃ geṇhāvejjā, adinnaṃ geṇhante vi ||*3.5||

anne na samaṇujāṇejjā, jāvajjīvāe tivihaṃ tiviheṇaṃ ||*3.6||

maṇeṇaṃ vāyāe kāeṇaṃ na karemi na kāravemi ||*3.7||

karentaṃ pi annaṃ na samaṇujāṇāmi, tassa bhante paḍikkamāmi ||*3.8||

nindāmi garihāmi appāṇaṃ vosirāmi, ||*3.9||

tacce bhante mahavvae uvaṭhio mi | savvāo adinnādāṇao ||*3.10||

veramaṇaṃ ||3|| ||*3.11||

ahāvare cautthe bhante mahavvae mehuṇāo veramaṇaṃ ||*4.1||

| savvaṃ bhante mehuṇaṃ paccakkhāmi, se divvaṃ vā māṇusaṃ ||*4.2||

vā tirikkhajoṇiyaṃ vā | neva sayaṃ mehuṇaṃ sevejjā, nevannehiṃ ||*4.3||

mehuṇaṃ sevāvejjā, mehuṇaṃ sevante vi anne na ||*4.4||

samaṇujāṇejjā, jāvajjīvāe tivihaṃ tiviheṇaṃ maṇeṇaṃ ||*4.5||

vāyāe kāeṇaṃ na karemi na kāravemi karentaṃ pi ||*4.6||

annaṃ na samaṇujāṇāmi, tassa bhante paḍikkamāmi nindāmi ||*4.7||

garihāmi appāṇaṃ vosirāmi, cautthe bhante ||*4.8||

mahavvae uvaṭhio mi | savvāo mehuṇāo veramaṇaṃ ||4|| ||*4.9||

ahāvare pañcame bhante mahavvae pariggahāo veramaṇaṃ ||*5.1||

| savvaṃ bhante pariggahaṃ paccakkhāmi, se appaṃ vā ||*5.2||

bahuṃ vā aṇuṃ vā thūlaṃ vā cittamantaṃ vā acittamantaṃ ||*5.3||

vā | neva sayaṃ pariggahaṃ parigeṇhejjā, nevannehiṃ ||*5.4||

pariggahaṃ parigeṇhāvejjā, pariggahaṃ parigeṇhante ||*5.5||

vi anne na samaṇujāṇejjā, jāvajjīvāe tivihaṃ ||*5.6||

tiviheṇaṃ maṇeṇaṃ vāyāe kāeṇaṃ na karemi na ||*5.7||

kāravemi karentaṃ pi annaṃ na samaṇujāṇāmi, tassa ||*5.8||

bhante paḍikkamāmi nindāmi garihāmi appāṇaṃ ||*5.9||

vosirāmi, pañcame bhante mahavvae uvaṭhio mi | ||*5.10||

savvāo pariggahāo veramaṇaṃ ||5|| ||*5.11||

ahāvare chaṭhe bhante vae rāībhoyaṇāo veramaṇaṃ | ||*6.1||

savvaṃ bhante rāībhoyaṇaṃ paccakkhāmi, se asaṇaṃ vā pāṇaṃ ||*6.2||

vā khāimaṃ vā sāimaṃ vā neva sayaṃ rāiṃ bhuñjejjā, nevannehiṃ ||*6.3||

rāiṃ bhuñjāvejjā, rāiṃ bhuñjante vi anne na samaṇujāṇejjā, ||*6.4||

jāvajjīvāe tivihaṃ tiviheṇaṃ maṇeṇaṃ ||*6.5||

vāyāe kāeṇaṃ na karemi na kāravemi karentaṃ pi ||*6.6||

annaṃ na samaṇujāṇāmi, tassa bhante paḍikkamāmi ||*6.7||

nindāmi garihāmi appāṇaṃ vosirāmi, chaṭhe bhante ||*6.8||

vae uvaṭhio mi | savvāo rāībhoyaṇāo veramaṇaṃ || ||*6.9||

icceiyāiṃ pañca mahavvayāiṃ rāībhoyaṇaveramaṇachaṭhāiṃ ||*6.10||

atta-hiyaṭhayāe uvasaṃpajjittāṇaṃ viharāmi ||6|| ||*6.11||

se bhikkhū vā bhikkhuṇī vā saṃjaya-viraya-paḍihaya ||*7.1||

paccakkhāya-pāvakamme ||*7.1||

diyā vā rāo vā egao vā ||*7.2||

parisā-gao vā sutte vā jāgaramāṇe vā, se puḍhaviṃ ||*7.3||

vā bhittiṃ vā silaṃ vā leluṃ vā sasarakkhaṃ vā kāyaṃ sasararakaṃ ||*7.4||

vā vatthaṃ hattheṇa vā pāeṇa vā kaṭheṇa vā kaliñceṇa ||*7.5||

vā aṅguliyāe vā salāgāe vā salāgahattheṇa ||*7.6||

vā nālihejjā na vilihejjā na ghaejjā na ||*7.7||

bhindejjā, annaṃ nālihāvejjā na vilihāvejjā na ||*7.8||

ghaāvejjā na bhindāvejjā, annaṃ ālihantaṃ vā vilihantaṃ ||*7.9||

vā ghaantaṃ vā bhindantaṃ vā na samaṇujāṇejjā, ||*7.10||

jāvajjīvāe tivihaṃ tiviheṇaṃ maṇeṇaṃ vāyāe kāeṇaṃ ||*7.11||

na karemi na kāravemi karentaṃ pi annaṃ na samaṇujāṇāmi, ||*7.12||

tassa bhante paḍikkamāmi nindāmi garihāmi ||*7.13||

appāṇaṃ vosirāmi ||7|| ||*7.14||

se bhikkhū vā bhikkhuṇī vā saṃjaya-viraya-paḍihayapaccakkhāya-pāvakamme ||*8.1||

diyā vā rāo vā egao vā ||*8.2||

parisā-gao vā sutte vā jāgaramāṇe vā, se udagaṃ ||*8.3||

vā osaṃ vā himaṃ vā mahiyaṃ vā karagaṃ vā harataṇugaṃ ||*8.4||

vā suddhodagaṃ vā udaollaṃ vā kāyaṃ udaollaṃ vā vatthaṃ ||*8.5||

sasiṇiddhaṃ vā kāyaṃ sasiṇiddhaṃ vā vatthaṃ nāmusejjā ||*8.6||

na saṃphusejjā na āvīlejjā na pavīlejjā ||*8.7||

na akkhoḍejjā na pakkhoḍejjā na āyāvejjā na payāvejjā, ||*8.8||

annaṃ nāmusāvejjā na saṃphusāvejjā na āvīlāvejjā ||*8.9||

na pavīlāvejjā na akkhoḍāvejjā na pakkhoḍāvejjā ||*8.10||

na āyāvejjā na payāvejjā, annaṃ āmusantaṃ ||*8.11||

vā saṃphasantaṃ vā āvīlantaṃ vā pavīlantaṃ vā ||*8.12||

akkhoḍantaṃ vā pakkhoḍantaṃ vā āyāventaṃ vā payāventaṃ ||*8.13||

vā na samaṇujāṇejjā, jāvajjīvāe tivihaṃ tiviheṇaṃ ||*8.14||

maṇeṇaṃ vāyāe kāeṇaṃ na karemi na kāravemi karentaṃ ||*8.15||

pi annaṃ na samaṇujāṇāmi, tassa bhante paḍikkamāmi ||*8.16||

nindāmi garihāmi appāṇaṃ vosirāmi ||8|| ||*8.17||

se bhikkhū vā bhikkhuṇī vā saṃjaya-viraya-paḍihaya ||*9.1||

paccakkhāya-pāvakamme diyā vā rāo vā egao vā ||*9.2||

parisā-gao vā sutte vā jāgaramāṇe vā, se agaṇiṃ ||*9.3||

vā iṅgālaṃ vā mummuraṃ vā acciṃ vā jālaṃ vā alāyaṃ ||*9.4||

vā suddhāgaṇiṃ vā ukkaṃ vā na uñjejjā na ghaejjā na ||*9.5||

ujjālejjā na nivvāvejjā, annaṃ na uñjāvejjā na ||*9.6||

ghaāvejjā na ujjālāvejjā na nivvāvejjā, annaṃ ||*9.7||

uñjantaṃ vā ghaantaṃ vā ujjālantaṃ vā nivvāvantaṃ vā na ||*9.8||

samaṇujāṇejjā, jāvajjīvāe tivihaṃ tiviheṇaṃ maṇeṇaṃ ||*9.9||

vāyāe kāeṇaṃ na karemi na kāravemi karentaṃ ||*9.10||

pi annaṃ na samaṇujāṇāmi, tassa bhante paḍikkamāmi ||*9.11||

nindāmi garihāmi appāṇaṃ vosirāmi ||9|| ||*9.12||

se bhikkhū vā bhikkhuṇī vā saṃjaya-viraya-paḍihaya ||*10.1||

paccakkhāya-pāvakamme diyā vā rāo vā egao vā ||*10.2||

parisā-gao vā sutte vā jāgaramāṇe vā, se sieṇa vā ||*10.3||

vihuyaṇeṇa vā tāliya- eṇa vā patteṇa vā patta-bhaṅgeṇa ||*10.4||

vā sāhāe vā sāhā-bhaṅgeṇa vā pihuṇeṇa vā pihuṇahattheṇa ||*10.5||

vā celeṇa vā cela-kaṇṇeṇa vā hattheṇa vā ||*10.6||

muheṇa vā appaṇo vā kāyaṃ bāhiraṃ vā vi poggalaṃ ||*10.7||

na phumejjā na vīejjā, annaṃ na phumāvejjā na vīyāvejjā, ||*10.8||

annaṃ phumantaṃ vā vīyantaṃ vā na samaṇujāṇejjā, ||*10.9||

jāvajjīvāe tivihaṃ tiviheṇaṃ maṇeṇaṃ vāyāe kāeṇaṃ ||*10.10||

na karemi na kāravemi karentaṃ pi annaṃ na samaṇujāṇāmi, ||*10.11||

tassa bhante paḍikkamāmi nindāmi garihāmi ||*10.12||

appāṇaṃ vosirāmi ||10|| ||*10.13||

se bhikkhū vā bhikkhuṇī vā saṃjaya-viraya-paḍihaya ||*11.1||

paccakkhāya-pāvakamme ||*11.1||

diyā vā rāo vā egao vā ||*11.2||

parisā-gao vā sutte vā jāgaramāṇe vā, se bīesu vā ||*11.3||

bīya-paiṭhesu vā rūḍhesu vā rūḍha-paiṭhesu vā jāesu vā ||*11.4||

jāya-paiṭhesu vā hariesu vā hariya-paiṭhesu vā chinnesu ||*11.5||

vā chinna-paiṭhesu vā saccittesu vā saccitta-kolapaḍinissiesu ||*11.6||

vā na gacchejjā na ciṭhejjā na nisīejjā ||*11.7||

na tuyaejjā, annaṃ na gacchāvejjā na ciṭhāvejjā ||*11.8||

na nisīyāvejjā na tuyaāvejjā, annaṃ gacchantaṃ vā ||*11.9||

ciṭhantaṃ vā nisīyantaṃ vā tuyaantaṃ vā na samaṇujāṇejjā, ||*11.10||

jāvajjīvāe tivihaṃ tiviheṇaṃ maṇeṇaṃ vāyāe ||*11.11||

kāeṇaṃ na karemi na kāravemi karentaṃ pi annaṃ na ||*11.12||

samaṇujāṇāmi, tassa bhante paḍikkamāmi nindāmi ||*11.13||

garihāmi appāṇaṃ vosirāmi ||11|| ||*11.14||

se bhikkhū vā bhikkhuṇī vā saṃjaya-viraya-paḍihaya ||*12.1||

paccakkhāya-pāvakamme ||*12.1||

diyā vā rāo vā egao vā parisā-gao ||*12.2||

vā sutte vā jāgaramāṇe vā, se kīḍaṃ vā payaṅgaṃ ||*12.3||

vā kunthuṃ vā pipīliyaṃ vā hatthaṃsi vā pāyaṃsi vā ||*12.4||

bāhuṃsi vā ūruṃsi vā udaraṃsi vā sīsaṃsi vā vatthaṃsi ||*12.5||

vā (paḍiggahaṃsi vā kambalaṃsi vā pāyapuñchaṇaṃsi ||*12.6||

vā) rayaharaṇaṃsi vā gocchagaṃsi vā uṇḍuyaṃsi vā daṇḍagaṃsi ||*12.7||

vā pīḍhagaṃsi vā phalagaṃsi vā sejjaṃsi vā ||*12.8||

saṃthāragaṃsi vā annayaraṃsi vā taha-ppagāre uvagaraṇajāe ||*12.9||

tao saṃjayāmeva paḍilehiya paḍilehiya pamajjiya ||*12.10||

pamajjiya egantamavaṇejjā, no -aṃsaṃghāyamāvajjejjā ||12|| ||*12.11||

ajayaṃ caramāṇo u | pāṇa-bhūyāi hiṃsaī /

bandhaī pāvayaṃ kammaṃ, | taṃ se hoi kaḍuyaṃ phalaṃ ||1||

ajayaṃ ciṭhamāṇo u | pāṇa-bhūyāi hiṃsaī /

bandhaī pāvayaṃ kammaṃ, | taṃ se hoi kaḍuyaṃ phalaṃ ||2||

ajayaṃ āsamāṇo u | pāṇa-bhūyāi hiṃmaī /

bandhaī pāvayaṃ kammaṃ, | taṃ se hoi kaḍuyaṃ phalaṃ ||3||

ajayaṃ sayamāṇo u | pāṇa-bhūyāi hiṃsaī /

bandhaī pāvayaṃ kammaṃ, | taṃ se hoi kaḍuyaṃ phalaṃ ||4||

ajayaṃ bhuñjamāṇo u | pāṇa-bhūyāi hiṃsaī /

bandhaī pāvayaṃ kammaṃ, | taṃ se hoi kaḍuyaṃ phalaṃ ||5||

ajayaṃ bhāsamāṇo u | pāṇa-bhūyāi hiṃsaī /

bandhaī pāvayaṃ kammaṃ, | taṃ se hoi kaḍuyaṃ phalaṃ ||6||

kahaṃ care? kahaṃ ciṭhe? | kahaṃ āse? kahaṃ sae? /

kahaṃ bhuñjanto bhāsanto | pāvaṃ kammaṃ na bandhaī? ||7||

jayaṃ care, jayaṃ ciṭhe, | jayaṃ āse, jayaṃ sae, /

jayaṃ bhuñjanto bhāsanto | pāvaṃ kammaṃ na bandhaī ||8||

savva-bhūyappa-bhūyassa | sammaṃ bhūyāi pāsao /

pihiyāsavassa dantassa | pāvaṃ kammaṃ na bandhaī ||9||

paḍhamaṃ nāṇaṃ tao dayā, | evaṃ ciṭhai savva-saṃjae, /

annāṇī kiṃ kāhī | kiṃ vā nāhii cheya pāvagaṃ? ||10||

soccā jāṇai kallāṇaṃ | soccā jāṇai pāvagaṃ /

ubhayaṃ pi jāṇaī soccā | jaṃ cheyaṃ taṃ samāyare ||11||

jo jīve vi na yāṇāi | ajīve vi na yāṇaī /

jīvājīve ayāṇanto | kaha so nāhī u saṃjamaṃ? ||12||

jo jīve vi viyāṇāi | ajīve vi viyāṇaī /

jīvājīve viyāṇanto | so hu nāhī u saṃjamaṃ ||13||

jayā jīvamajīve ya | do vi ee viyāṇaī /

tayā gaiṃ bahuvihaṃ | savva-jīvāṇa jāṇaī ||14||

jayā gaiṃ bahuvihaṃ | savva-jīvāṇa jāṇaī /

tayā puṇṇaṃ ca pāvaṃ ca | bandhaṃ mokkhaṃ ca jāṇaī ||15||

jayā puṇṇaṃ ca pāvaṃ ca | bandhaṃ mokkhaṃ ca jāṇaī /

tayā nivvindae bhoe | je divve je ya māṇuse ||16||

jayā nivvindae bhoe | je divve je ya māṇuse /

tayā cayai saṃbhogaṃ | sabbhintara-bāhiraṃ ||17||

jayā cayai saṃbhogaṃ | sabbhintara-bāhiraṃ /

tayā muṇḍe bhavittāṇaṃ | pavvaie aṇagāriyaṃ ||18||

jayā muṇḍe bhavittāṇaṃ | pavvaie aṇagāriyaṃ /

tayā saṃvaramukkaṭhaṃ | dhammaṃ phāse aṇuttaraṃ ||19||

jayā saṃvaramukkaṭhaṃ | dhammaṃ phāse aṇuttaraṃ /

tayā dhuṇai kamma-rayaṃ | abohi-kalusaṃ kaḍaṃ ||20||

jayā dhuṇai kamma-rayaṃ | abohi-kalusaṃ kaḍaṃ /

tayā savvattagam nāṇaṃ | daṃsaṇaṃ cābhigacchaī ||21||

jayā savvatta-gaṃ nāṇaṃ | daṃsaṇaṃ cābhigacchaī /

tayā logamalogaṃ ca | jiṇo jāṇai kevalī ||22||

jayā logamalogaṃ ca | jiṇo jāṇai kevalī /

tayā joge nirumbhittā | selesiṃ paḍivajjaī ||23||

jayā joge nirumbhittā | selesiṃ paḍivajjaī /

tayā kammaṃ khavittāṇaṃ | siddhiṃ gacchai nīrao ||24||

jayā kammaṃ khavittāṇaṃ | siddhiṃ gacchai nīrao /

tayā loga-matthaya-ttho | siddho bhavai sāsao ||25||

suha-sāyagassa samaṇassa | sāyāulagassa nigāma-sāissa /

uccholaṇā-pahoissa | dulahā soggai tārisagassa ||26||

tavo-guṇa-pahāṇassa | ujju-mai-khanti saṃjama-rayassa /

parīsahe jiṇantassa | sulahā soggai tārisagassa ||27||

(pacchā vi te payāyā | khippaṃ gacchanti amara-bhavaṇāiṃ /)

(jesiṃ pī u tavo saṃjamo ya | khantī ya bambhaceraṃ ca || ||)

icceyaṃ chajjīvaṇiyaṃ | sammaddiṭhī sayā jae /

dulahaṃ labhittu sāmaṇṇaṃ | kammuṇā na virāhejjāsi ||28|| tti bemi ||

|| caturthamadhyayanam ||4||

Dasaveyāliya: 5-1 pañcamamadhyayanam || prathama uddeśakaḥ (piṇḍesaṇā) /

saṃpatte bhikkha-kālammi | asaṃbhanto amucchio /

imeṇa kama-jogeṇa | bhatta-pāṇaṃ gavesae ||1||

se gāme vā nagare vā | goyaragga-gao muṇī /

care mandamaṇuvviggo | avvakkhitteṇa ceyasā ||2||

purao juga-māyāe | pehamāṇo mahiṃ care /

vajjanto bīya-hariyāiṃ | pāṇe ya daga-maiyaṃ ||3||

ovāyaṃ visamaṃ khāṇuṃ | vijjalaṃ parivajjae /

saṃkameṇa na gacchejjā | vijjamāṇe parakkame ||4||

pavaḍante va se tattha | pakkhalante va saṃjae /

hiṃsejja pāṇa-bhūyāiṃ | tase aduva thāvare ||5||

tamhā teṇa na gacchejjā | saṃjae su-samāhie /

sai anneṇa maggeṇa | jayameva parakkame ||6||

iṅgālaṃ chāriyaṃ rāsiṃ | tusa-rāsiṃ ca gomayaṃ /

sasarakkhehi pāehiṃ | saṃjao taṃ naikkame ||7||

na carejja vāse vāsante | mahiyāe va paḍantie /

mahā-vāe va vāyante | tiriccha-saṃpāimesu vā ||8||

na carejja vesa-sāmante | bambhacera-vasāṇue /

bambhayārissa dantassa | hojjā tattha visottiyā ||9||

aṇāyaṇe carantassa | saṃsaggīe abhikkhaṇaṃ /

hojja vayāṇaṃ pīlā | sāmaṇṇammi ya saṃsao ||10||

tamhā eyaṃ viyāṇittā | dosaṃ duggai-vaḍḍhaṇaṃ /

vajjae vesa-sāmantaṃ | muṇī egantamassie ||11||

sāṇaṃ sūyaṃ gāviṃ | dittaṃ goṇaṃ hayaṃ gayaṃ /

saṃḍibbhaṃ kalahaṃ juddhaṃ | dūrao parivajjae ||12||

aṇunnae nāvaṇae | appahiṭhe anāule /

indiyāiṃ jahā bhāgaṃ | damaittā muṇī care ||13||

davadavassa na gacchejjā | bhāsamāṇo ya goyare /

hasanto nābhigacchejjā | kulaṃ uccāvayaṃ sayā ||14||

āloyaṃ thiggalaṃ dāraṃ | saṃdhiṃ daga-bhavaṇāṇi ya /

caranto na viṇijjhāe | saṅkaṇṭhāṇaṃ vivajjae ||15||

ranno gahavaīṇaṃ ca | rahasārakkhiyāṇi ya /

saṃkilesa-karaṃ ṭhāṇaṃ | dūrao parivajjae ||16||

paḍikuṭha-kulaṃ na pavise, | māmagaṃ parivajjae /

aciyatta-kulaṃ na pavise, | ciyattaṃ pavise kulaṃ ||17||

sāṇī-pāvara-pihiyaṃ | appaṇā nāvapaṅgure /

kavāḍaṃ no paṇollejjā | oggahaṃsi ajāiyā ||18||

goyaragga-paviṭho u | vacca-muttaṃ na dhārae /

ogāsaṃ phāsuyaṃ naccā | aṇunnaviya vosire ||19||

nīya-duvāraṃ tamasaṃ | koṭhagaṃ parivajjae /

acakkhu-visao jattha | pāṇā duppaḍilehagā ||20||

jattha pupphāi bīyāiṃ | vippaiṇṇāi koṭhae /

ahuṇovalittaṃ ollaṃ | daṭhūṇaṃ parivajjae ||21||

elagaṃ dāragaṃ sāṇaṃ | vacchagaṃ cāvi koṭhae /

ullaṅghiyā na pavise | viuhittāṇa va saṃjae ||22||

asaṃsattaṃ paloejjā, | nāidūrāvaloyae /

upphullaṃ na viṇijjhāe | niyaejja ayampiro ||23||

aibhūmiṃ na gacchejjā | goyaragga-gao muṇī /

kalassa bhūmiṃ jāṇittā | miyaṃ bhūmiṃ parakkame ||24||

tattheva paḍilehejjā | bhūmi-bhāgaṃ viyakkhaṇo /

siṇāṇassa ya vaccassa | saṃlogaṃ parivajjae ||25||

daga-maīṇāyāṇe | bīyāṇi hariyāṇi ya /

parivajjanto ciṭhejjā | savvindiya-samāhie ||26||

tattha se ciṭhamāṇassa | āhare pāṇa-bhoyaṇaṃ /

akappiyaṃ na geṇhejjā, | paḍigāhejja kappiyaṃ ||27||

āharantī siyā tattha | parisāḍejja bhoyaṇaṃ /

dentiyaṃ paḍiyāikkhe | "na me kappai tārisaṃ" ||28||

sammaddamāṇī pāṇāṇi | bīyāṇi hariyāṇi ya /

asaṃjama-kariṃ naccā | tārisaṃ parivajjae ||29||

sāhau nikkhivittāṇaṃ | saccittaṃ ghaiyāṇi ya, /

taheva samaṇaṭhāe | udagaṃ saṃpaṇolliyā ||30||

āgāhaittā calaittā | āhare pāṇa-bhoyaṇaṃ /

dentiyaṃ paḍiyāikkhe | "na me kappai tārisaṃ" ||31||

purekammeṇa hattheṇa | davvīe bhāyaṇeṇa vā /

dentiyaṃ paḍiyāikkhe | "na me kappai tārisaṃ" ||32||

evaṃ udaolle sasiṇiddhe | sasarakkhe maiyā ūse /

hariyāle hiṅgulue | maṇosilā añjaṇe loṇe ||33||

geruya vaṇṇiya seḍiya | soraṭhiya piṭha kukkusa kae ya /

ukkaṭhamasaṃsaṭhe | saṃsaṭhe ceva bodhavve ||34||

asaṃsaṭheṇa hattheṇa | davvīe bhāyaṇeṇa vā /

dijjamāṇaṃ na icchejjā | pacchākammaṃ jahiṃ bhave ||35||

sasaṃṭheṇa hattheṇa | davvīe bhāyaṇeṇa vā /

dijjamāṇaṃ paḍicchejjā | jaṃ tatthesaṇiyaṃ bhave ||36||

doṇhaṃ tu bhuñjamāṇāṇaṃ | ego tattha nimantae, /

dijjamāṇaṃ na icchejjā, | chandaṃ se paḍilehae ||37||

doṇhaṃ tu bhuñjamāṇāṇaṃ | do vi tattha nimantae /

dijjamāṇaṃ paḍicchejjā | jaṃ tatthesaṇiyaṃ bhave ||38||

guvviṇīe uvannatthaṃ | vivihaṃ pāṇa-bhoyaṇaṃ /

bhujjamāṇaṃ vivajjejjā, | bhutta-sesaṃ paḍicchae ||39||

siyā ya samaṇaṭhāe | guvviṇī kālamāsiṇī /

uṭhiyā vā nisīejjā | nisannā vā puṇuṭhae ||40||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||41||

thaṇagaṃ pajjemāṇī | dāragaṃ vā kumāriyaṃ /

taṃ nikkhivittu royantaṃ | āhare pāṇa-bhoyaṇaṃ ||42||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||43||

jaṃ bhave bhattapāṇaṃ tu | kappākappammi saṅkiyaṃ /

dentiyaṃ paḍiyāikkhe | "na me kappai tārisaṃ" ||44||

daga-vāraeṇa pihiyaṃ | nīsāe pīḍhaeṇa vā /

loḍheṇa vā vi leveṇa | sileseṇa va keṇaī ||45||

taṃ ca ubbhindiuṃ dejjā | samaṇaṭhāe va dāvae /

dentiyaṃ paḍiyāikkhe | "na me kappai tārisaṃ" ||46||

asaṇaṃ pāṇagaṃ vā vi | khāimaṃ sāimaṃ tahā /

jaṃ jāṇejja suṇejjā vā | "dāṇaṭhā pagaḍaṃ imaṃ" ||47||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||48||

asaṇaṃ pāṇagaṃ vā vi | khāimaṃ sāimaṃ tahā /

jaṃ jāṇejja suṇejjā vā | "puṇṇaṭhā pagaḍaṃ imaṃ" ||49||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||50||

asaṇaṃ pāṇagaṃ vā vi | khāimaṃ sāimaṃ tahā /

jaṃ jāṇejja suṇejjā vā | "vaṇimaṭhā pagaḍaṃ imaṃ" ||51||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||52||

asaṇaṃ pāṇagaṃ vā vi | khāimaṃ sāimaṃ tahā /

jaṃ jāṇejja suṇejjā vā | "samaṇaṭhā pagaḍaṃ imaṃ" ||53||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||54||

uddesiyaṃ kīyagaḍaṃ | pūī-kammaṃ ca āhaḍaṃ /

ajjhoyara pāmiccaṃ | mīsa-jāyaṃ ca vajjae ||55||

uggamaṃ se pucchejjā | kassaṭhā keṇa vā kaḍaṃ /

soccā nissaṅkiyaṃ suddhaṃ | paḍigāhejja saṃjae ||56||

asaṇaṃ pāṇagaṃ vā vi | khāimaṃ sāimaṃ tahā /

pupphesu hojja ummīsaṃ | bīesu hariesu vā ||57||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||58||

asaṇaṃ pāṇagaṃ vā vi | khāimaṃ sāimaṃ tahā /

udagammi hojja nikkhittaṃ | uttiṅga-paṇagesu vā ||59||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||60||

asaṇaṃ pāṇagaṃ vā vi | khāimaṃ sāimaṃ tahā /

agaṇimmi hojja nikkhittaṃ | taṃ ca saṃghaiyā dae ||61||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||62||

evaṃ ussakkiyā osakkiyā | ujjāliyā pajjāliyā nivvāviyā /

ussiñciyānissiñciyā | uvvattiyā oyāriyādae ||63||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||64||

hojja kaṭhaṃ sile vā vi | iālaṃ vā vi egayā /

ṭhaviyaṃ saṃkamaṭhāe | taṃ ca hojja calācalaṃ ||65||

na teṇa bhikkhu gacchejjā, | diṭho tattha asaṃjamo /

gambhīraṃ jhusiraṃ ceva | savvindiya-samāhie ||66||

nisseṇiṃ phalagaṃ pīḍhaṃ | ussavittāṇamāruhe /

mañcaṃ kīlaṃ ca pāsāyaṃ | samaṇaṭhāe va dāvae ||67||

duruhamāṇī pavaḍejjā | hatthaṃ pāyaṃ va lūsae, /

puḍhavi-jīve vi hiṃsejjā | je ya taṃ-nissiyā jagā ||68||

eyārise mahā-dose | jāṇiūṇa mahesiṇo /

tamhā mālohaḍaṃ bhikkhaṃ | na paḍigeṇhanti saṃjayā ||69||

kandaṃ mūlaṃ palambaṃ vā | āmaṃ chinnaṃ va sanniraṃ /

tumbāgaṃ siṅgabaraṃ ca | āmagaṃ parivajjae ||70||

taheva sattu-cuṇṇāiṃ | kola-cuṇṇāi āvaṇe /

sakkuliṃ phāṇiyaṃ pūyaṃ | annaṃ vā vi tahāviha ||71||

vikkāyamāṇaṃ pasaḍhaṃ | raeṇa pariphāsiyaṃ /

dentiyaṃ paḍiyāikkhe | "na me kappai tārisaṃ" ||72||

bahuṇaṭhiyaṃ poggalaṃ | aṇimisaṃ vā bahu-ka- ayaṃ /

atthiyaṃ tinduyaṃ billaṃ | ucchu-khaṇḍaṃ ca sambaliṃ ||73||

appe siyā bhoyaṇa-jjāe | bahuṇujjhiya-dhammie /

dentiyaṃ paḍiyāikkhe | "na me kappai tārisaṃ" ||74||

tahevuccāvayaṃ pāṇaṃ | aduvā vāra-dhoyaṇaṃ /

saṃseimaṃ cāulogadaṃ | ahuṇā-dhoyaṃ vivajjae ||75||

jaṃ jāṇejja cirādhoyaṃ | maīe daṃsaṇeṇa vā /

paḍipucchiūṇa soccā vā | jaṃ ca nissaṅkiyaṃ bhave ||76||

ajīvaṃ pariṇayaṃ naccā | paḍigāhejja saṃjae /

aha saṅkiyaṃ bhavejjā | āsāittāṇa royae ||77||

"thovamāsāyaṇaṭhāe | hatthagammi dalāhi me /

mā me accambilaṃ pūiṃ, | nālaṃ taṇhaṃ viṇettae" ||78||

taṃ ca accambilaṃ pūiṃ | nālaṃ taṇhaṃ viṇettae /

dentiyaṃ paḍiyāikkhe | "na me kappai tārisaṃ" ||79||

taṃ ca hojja akāmeṇaṃ | vimaṇeṇa paḍicchiyaṃ /

taṃ appaṇā na pibe, | no vi annassa dāvae ||80||

egantamavakkamittā | acittaṃ paḍilehiyā /

jayaṃ pariṭhavejjā, | pariṭhappa paḍikkame ||81||

siyā ya goyaragga-gao | icchejjā paribhottuyaṃ /

koṭhagaṃ bhitti-mūlaṃ vā | paḍilehittāṇa phāsuyaṃ ||82||

aṇunnavettu mehāvī | paḍicchannammi saṃvuḍe /

hatthagaṃ saṃpamajjittā | tattha bhuñjejja saṃjae ||83||

tattha se bhuñjamāṇassa | aṭhiyaṃ ka- ao siyā /

taṇa-kaṭha-sakkaraṃ vā vi | annaṃ vā vi tahāvihaṃ ||84||

taṃ ukkhivittu na nikkhive, | āsaeṇa na chaḍḍae /

hattheṇa taṃ gaheūṇaṃ | egantamavakkame ||85||

egantamavakkamittā | acittaṃ paḍilehiyā /

jayaṃ pariṭhavejjā, | pariṭhappa paḍikkame ||86||

siyā ya bhikkhu icchejjā | sejjamāgamma bhottuyaṃ /

sa-piṇḍapāyamāgamma | uḍuyaṃ paḍilehiyā ||87||

viṇaeṇa pavisittā | sagāse guruṇo muṇī /

iriyāvahiyamāyāya | āgao ya paḍikkame ||88||

ābhoettāṇa nīsesaṃ | aiyāraṃ jaha-kkamaṃ /

gamaṇāgamaṇe ceva | bhattapāṇe va saṃjae ||89||

ujjuppanno aṇuvviggo | avvakkhitteṇa ceyasā /

āloe guru-sagāse | jaṃ jahā gahiyaṃ bhave ||90||

na sammamāloiyaṃ hojjā | puvviṃ pacchā va jaṃ kaḍaṃ /

puṇo paḍikkame tassa, | vosiṭho cintae imaṃ ||91||

aho jiṇehi asāvajjā | vittī sāhūṇa desiyā /

mokkha-sāhaṇaheussa | sāhu-dehassa dhāraṇā ||92||

namokkāreṇa pārettā | karettā jiṇa-saṃthavaṃ /

sajjhāyaṃ paṭhavettāṇaṃ | vīsamejja khaṇaṃ muṇī ||93||

vīsamanto imaṃ cinte | hiyamaṭhaṃ lābhamaṭhio /

jaha me aṇuggahaṃ kujjā | sāhū, hojjāmi tārio ||94||

sāhavo to ciyatteṇaṃ | nimantejja jahakkamaṃ, /

jai tattha kei icchejjā | tehiṃ saddhiṃ tu bhuñjae ||95||

aha koī na icchejjā | tao bhuñjejja egao /

āloe bhāyaṇe sāhū | jayaṃ aparisāḍiyaṃ ||96||

tittagaṃ va kaḍuyaṃ va kasāyaṃ | ambilaṃ va mahuraṃ lavaṇaṃ vā /

eyaṃ laddhamannaṭha-pauttaṃ | mahu-ghayaṃ va bhuñjejja saṃjae ||97||

arasaṃ virasaṃ vā vi | sūiyaṃ vā asūiyaṃ /

ollaṃ vā jai vā sukkaṃ | manthu-kummāsa-bhoyaṇaṃ ||98||

uppannaṃ nāihīlejjā | appaṃ vā bahu phāsuyaṃ, /

muhā-laddhaṃ muhā-jīvī | bhuñjejjā dosa-vajjiyaṃ ||99||

dullahā u muhā-dāī, | muhā-jīvī vi dullahā, /

muhā-dāī muhā-jīvī | do vi gacchanti soggaiṃ ||100|| ti bemi ||

|| pañcamamadhyayanam ||5-1||

Dasaveyāliya: 5-2 pañcamamadhyayanam || dvitīya uddeśakaḥ /

paḍiggahaṃ saṃlihittāṇaṃ | leva-māyāe saṃjae /

dugandhaṃ vā sugandhaṃ vā | savvaṃ bhuñje, na chaḍḍae ||1||

sejjā nisīhiyāe | samāvanno ya goyare /

āyāvayaṭhā bhoccāṇaṃ | jai teṇa na saṃthare ||2||

tao kāraṇamuppanne | bhattapāṇaṃ gavesae /

vihiṇā puvva-vutteṇa | imeṇaṃ uttareṇa ya ||3||

kāleṇa nikkhame bhikkhū, | kāleṇa ya paḍikkame /

akālaṃ ca vivajjettā | kāle kālaṃ samāyare ||4||

"akāle carasi bhikkhū, | kālaṃ na paḍilehasi /

appāṇaṃ ca kilāmesi, | sannivesaṃ ca garihasi" ||5||

sai kāle care bhikkhū, | kujjā purisakāriyaṃ /

"alābho" tti na soejjā, | "tavo" tti ahiyāsae ||6||

tahevuccāvayā pāṇā | bhattaṭhāe samāgayā /

taṇujuyaṃ na gacchejjā, | jayameva parakkame ||7||

goyaragga-paviṭho u | na nisīejja katthaī /

kahaṃ ca na pabandhejjā | ciṭhittāṇa va saṃjae ||8||

aggalaṃ phalihaṃ dāraṃ | kavāḍaṃ vā vi saṃjae /

avalambiyā na ciṭhejjā | goyaragga-gao muṇī ||9||

samaṇaṃ māhaṇaṃ vā vi | kiviṇaṃ vā vaṇīmagaṃ /

uvasaṃkamantaṃ bhattaṭhā | pāṇaṭhāe va saṃjae ||10||

taṃ aikkamittu na pavise, | na ciṭhe cakkhu-goyare /

egantamavakkamittā | tattha ciṭhejja saṃjae ||11||

vaṇīmagassa vā tassa | dāyagassubhayassa vā /

appattiyaṃ siyā hojjā | lahuttaṃ pavayaṇassa vā ||12||

paḍisehie va dinne vā | tao tammi niyattie /

uvasaṃkamejja bhattaṭhā | pāṇaṭhāe va saṃjae ||13||

uppalaṃ paumaṃ vā vi | kumuyaṃ vā magadantiyaṃ /

annaṃ vā puppha saccittaṃ | taṃ ca saṃluñciyā dae ||14||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||15||

uppalaṃ paumaṃ vā vi | kumuyaṃ vā magadantiyaṃ /

annaṃ vā puppha saccittaṃ | taṃ ca sammaddiyā dae ||16||

taṃ bhave bhattapāṇaṃ tu | saṃjayāṇa akappiyaṃ /

dentiyaṃ paḍiyāikkhe | "na me kappai tārisaṃ" ||17||

sāluyaṃ vā birāliyaṃ | kumuyaṃ uppala-nāliyaṃ /

muṇāliyaṃ sāsava-nāliyaṃ | ucchu-kkhaṇḍaṃ anivvuḍaṃ ||18||

taruṇagaṃ vā pavālaṃ | rukkhassa taṇagassa vā /

annassa vā vi hariyassa | āmagaṃ parivajjae ||19||

taruṇiyaṃ vā chevāḍiṃ | āmiyaṃ bhajjiyaṃ saiṃ /

dentiyaṃ paḍiyāikkhe | "na me kappai tārisaṃ" ||20||

tahā kolamaṇassinnaṃ | veluyaṃ kāsava-nāliyaṃ /

tila-pappaḍagaṃ nīmaṃ | āmagaṃ parivajjae ||21||

taheva cāulaṃ piṭhaṃ | viyaḍaṃ vā tatta-nivvuḍaṃ /

tila-piṭha pūi-pinnāgaṃ | āmagaṃ parivajjae ||22||

kaviṭhaṃ māula-gaṃ ca | mūlagaṃ mūlagattiyaṃ /

āmaṃ a-sattha-pariṇayaṃ | maṇasā vi na patthae ||23||

taheva phala-manthūṇi | bīya-manthūṇi jāṇiyā /

bihelagaṃ piyālaṃ ca | āmagaṃ parivajjae ||24||

samuyāṇaṃ care bhikkhū | kulaṃ uccāvayaṃ sayā /

nīyaṃ kulamaikkamma | ūsaḍhaṃ nābhidhārae ||25||

adīṇo vittimesejjā | na visīejja paṇḍie /

amucchio bhoyaṇammi | māya-nne esaṇā-rae ||26||

"bahuṃ para-ghare atthi | vivihaṃ khāima-sāimaṃ" /

na tattha paṇḍio kuppe, | icchā dejja paro na vā ||27||

sayaṇāsaṇa-vatthaṃ vā | bhattapāṇaṃ va saṃjae /

adentassa na kuppejjā | paccakkhe vi ya dīsao ||28||

itthiyaṃ purisaṃ vā vi | ḍaharaṃ vā mahallagaṃ /

vandamāṇaṃ na jāejjā, | no ya -aṃ pharusaṃ vae ||29||

je na vande na se kuppe, | vandio na samukkase, /

evamannesamāṇassa | sāmaṇṇamaṇuciṭhaī ||30||

siyā egaīo laddhuṃ | lobheṇa viṇigūhaī /

"mā meyaṃ dāiyaṃ santaṃ | daṭhūṇaṃ sayamāyae" ||31||

attaṭhā-guruo luddho | bahuṃ pāvaṃ pakuvvaī /

duttosao ya se hoi, | nivvāṇaṃ ca na gacchaī ||32||

siyā egaīo laddhuṃ | vivihaṃ pāṇa-bhoyaṇaṃ /

bhaddagaṃ bhaddagaṃ bhoccā | vivaṇṇaṃ virasamāhare ||33||

jāṇantu tā ime samaṇā | "āyayaṭhī ayaṃ muṇī /

saṃtuṭho sevaī pantaṃ | lūha-vittī sutosao" ||34||

pūyaṇaṭhā jaso-kāmī | māṇa-sammāṇa-kāmae /

bahuṃ pasavaī pāvaṃ, | māyā-sallaṃ ca kuvvaī ||35||

suraṃ vā meragaṃ vā vi | annaṃ vā majjagaṃ rasaṃ /

sa-sakkhaṃ na pibe bhikkhū | jasaṃ sārakkhamappaṇo ||36||

piyā egaīo teṇo | na me koi viyāṇaī /

tassa passaha dosāiṃ, | niyaḍiṃ ca suṇeha me ||37||

vaḍḍhaī soṇḍiyā tassa | māyā-mosaṃ ca bhikkhuṇo /

ayaso ya anivvāṇaṃ | sayayaṃ ca asāhuyā ||38||

niccuvviggo jahā teṇo | atta-kammehi dummaī /

tāriso maraṇante vi | nārāhei saṃvaraṃ ||39||

āyarie nārāhei | samaṇe yāvi tāriso /

gihatthā vi -aṃ garahanti | jeṇa jāṇanti tārisaṃ ||40||

evaṃ tu aguṇa-ppehī | guṇāṇaṃ ca vivajjao /

tāriso maraṇante vi | nārāhei saṃvaraṃ ||41||

tavaṃ kuvvai mehāvī, | paṇīyaṃ vajjae rasaṃ /

majja-ppamāya-virao | tavassī aiukkaso ||42||

tassa passaha kallāṇaṃ | aṇega-sāhu-pūiyaṃ /

viulaṃ attha-saṃjuttaṃ | kittaissaṃ, suṇeha me ||43||

evaṃ tu guṇa-ppehī | aguṇāṇaṃ ca vivajjao /

tāriso maraṇante vi | ārāhei saṃvaraṃ ||44||

āyarie ārāhei | samaṇe yāvi tāriso /

gihatthā vi -aṃ pūyanti | jeṇa jāṇanti tārisaṃ ||45||

tava-teṇe vai-teṇe | rūva-teṇe ya je nare /

āyāra-bhāva-teṇe ya | kuvvaī deva-kibbisaṃ ||46||

laddhūṇa vi devattaṃ | uvavanno deva-kibbise /

tatthāvi se na yāṇāi | `kiṃ me kiccā imaṃ phalaṃch` ||47||

tatto vi se caittāṇaṃ | labbhihī ela-mūyagaṃ /

narayaṃ tirikkha-joṇiṃ vā | bohī jattha su-dullahā ||48||

eyaṃ ca dosaṃ daṭhūṇaṃ | nāyaputteṇa bhāsiyaṃ /

aṇu-māyaṃ pi mehāvī | māyā-mosaṃ vivajjae ||49||

sikkhiūṇa bhikkhesaṇa-sohiṃ | saṃjayāṇa buddhāṇa sagāse /

tattha bhikkhū suppaṇihiindie | tivva-lajja guṇavaṃ viharejjāsi ||50|| tti bemi ||

|| pañcamamadhyayanam ||5-2||

Dasaveyāliya: 6 ṣaṣṭhamamadhyayanam (dhammaṭhakahā.) /

nāṇa-daṃsaṇa-saṃpannaṃ | saṃjame ya tave rayaṃ /

gaṇimāgama-saṃpannaṃ | ujjāṇammi samosaḍhaṃ ||1||

rāyāṇo rāyamaccā ya | māhaṇā aduva khattiyā /

pucchanti nihuyappāṇo | kahaṃ bhe āyāra-goyaro? ||2||

tesiṃ so nihuo danto | savva-bhūya-suhāvaho /

sikkhāe su-samāutto | āikkhai viyakkhaṇo ||3||

handi dhammattha-kāmāṇaṃ | nigganthāṇaṃ suṇeha me /

āyāra-goyaraṃ bhīmaṃ | sayalaṃ durahiṭhiyaṃ ||4||

nannattha erisaṃ vuttaṃ | jaṃ loe parama-duccaraṃ /

viulaṇṭhāṇa-bhāissa | na bhūyaṃ na bhavissaī ||5||

sa-khuḍḍaga-viyattāṇaṃ | vāhiyāṇaṃ ca je guṇā /

akhaṇḍa-kuḍiyā kāyavvā | taṃ suṇeha jahā tahā ||6||

dasa aṭha ya ṭhāṇāiṃ | jāiṃ bālo 'varajjhaī /

tattha annayare ṭhāṇe | nigganthattāo bhassaī ||7||

vaya-chakka kāya-chakkaṃ | akappo gihi-bhāyaṇaṃ /

paliyaṅka nisejjā ya | siṇāṇaṃ sobha-vajjaṇaṃ ||8||

tatthimaṃ paḍhamaṃ ṭhāṇaṃ | mahāvīreṇa desiyaṃ /

ahiṃsā niuṇā diṭhā | savvabhūesu saṃjamo ||9||

jāvanti loe pāṇā | tasā aduva thāvarā /

te jāṇamajāṇaṃ vā | na haṇe no va ghāyae ||10||

savva-jīvā vi icchanti | jīviuṃ na marijjiuṃ /

tamhā pāṇa-vahaṃ ghoraṃ | nigganthā vajjayanti -aṃ ||11||

appaṇaṭhā paraṭhā vā | kohā vā jai vā bhayā /

hiṃsagaṃ na musaṃ būyā | no vi annaṃ vayāvae ||12||

musā-vāo ya logammi | savva-sāhūhi garahio /

avissāso ya bhūyāṇaṃ, | tamhā mosaṃ vivajjae ||13||

cittamantamacittaṃ vā | appaṃ vā jai vā bahuṃ /

danta-sohaṇa-mettaṃ pi | oggahaṃsi ajāiyā ||14||

taṃ appaṇā na geṇhanti | no vi geṇhāvae paraṃ /

annaṃ vā geṇhamāṇaṃ pi | nāṇujāṇanti saṃjayā ||15||

abambhacariyaṃ ghoraṃ | pamāyaṃ durahiṭhiyaṃ /

nāyaranti muṇī loe | bheyāyayaṇa-vajjiṇo ||16||

mūlameyamahammassa | mahādosa-samussayaṃ /

tamhā mehuṇa-saṃsaggaṃ | nigganthā vajjayanti -aṃ ||17||

viḍamubbheimaṃ loṇaṃ | tellaṃ sappiṃ ca phāṇiyaṃ /

na te sannihimicchanti | nāyaputta-vao-rayā ||18||

lobhassesaṇuphāse | manne annayarāmavi /

je siyā sannihī-kāme | gihī pavvaie na se ||19||

jaṃ pi vatthaṃ va pāyaṃ vā | kambalaṃ pāyapuñchaṇaṃ /

taṃ pi saṃjama-lajjaṭhā | dhārenti pariharanti ya ||20||

na so pariggaho vutto | nāyaputteṇa tāiṇā /

"mucchā pariggaho vutto" | ii vuttaṃ mahesiṇā ||21||

savvatthuvahiṇā buddhā | saṃrakkhaṇa-pariggahe /

avi appaṇo vi dehammi | nāyaranti mamāiyaṃ ||22||

aho niccaṃ tavo-kammaṃ | savva-buddehi vaṇṇiyaṃ /

jā ya lajjā-samā vittī | ega-bhattaṃ ca bhoyaṇaṃ ||23||

santime suhumā pāṇā | tasā aduva thāvarā /

jāiṃ rāo apāsanto | kahamesaṇiyaṃ care? ||24||

udaollaṃ bīya-saṃsattaṃ | pāṇā nivvaḍiyā mahiṃ /

diyā tāiṃ vivajjejjā, | rāo tattha kahaṃ care? ||25||

eyaṃ ca dosaṃ daṭhūṇaṃ | nāyaputteṇa bhāsiyaṃ /

savvāhāraṃ na bhuñjanti | nigganthā rāibhoyaṇaṃ ||26||

puḍhavikāyaṃ na hiṃsanti | maṇasā vayasa kāyasā /

tiviheṇa karaṇa-joeṇa | saṃjayā su-samāhiyā ||27||

puḍhavikāyaṃ vihiṃsanto | hiṃsaī u tayassie /

tase ya vivihe pāṇe | cakkhuse ya acakkhuse ||28||

tamhā eyaṃ viyāṇittā | dosaṃ duggai-vaḍḍhaṇaṃ /

puḍhavikāya-samārambhaṃ | jāvajjīvāe vajjae ||29||

āukāyaṃ na hiṃsanti | maṇasā vayasa kāyasā /

tiviheṇa karaṇa-joeṇa | saṃjayā su-samāhiyā ||30||

āukāyaṃ vihiṃsanto | hiṃsaī u tayassie /

tase ya vivihe pāṇe | cakkhuse ya acakkhuse ||31||

tamhā eyaṃ viyāṇittā | dosaṃ duggai-vaḍḍhaṇaṃ /

āukāya-samārambhaṃ | jāvajjīvāe vajjae ||32||

jāyateyaṃ na icchanti | pāvagaṃ jalaittae /

tikkhamannayaraṃ satthaṃ | savvao vi durāsayaṃ ||33||

pāīṇaṃ paḍiṇaṃ vā vi | uḍḍhaṃ aṇudisāmavi /

ahe dāhiṇao vā vi | dahe uttarao vi ya ||34||

bhūyāṇamesamāghāo | havvavāho, na saṃsao /

taṃ paīva-payāvaṭhā | saṃjayā kiṃci nārabhe ||35||

tamhā eyaṃ viyāṇittā | dosaṃ duggai-vaḍḍhaṇaṃ /

teukāya-samārambhaṃ | jāvajjīvāe vajjae ||36||

anilassa samārambhaṃ | buddhā mannanti tārisaṃ /

sāvajja-bahulaṃ ceyaṃ, | neyaṃ tāīhi seviyaṃ ||37||

tāliya- eṇa patteṇa | sāhā-vihuyaṇeṇa vā /

na te vīīumicchanti | vīyāveūṇa vā paraṃ ||38||

jaṃ pi vatthaṃ va pāyaṃ vā | kambalaṃ pāyapuñchaṇaṃ /

na te vāyamuīranti | jayaṃ pariharanti ya ||39||

tamhā eyaṃ viyāṇittā | dosaṃ duggai-vaḍḍhaṇaṃ /

vāukāya-samārambhaṃ | jāvajjīvāe vajjae ||40||

vaṇassaiṃ na hiṃsanti | maṇasā vayasa kāyasā /

tiviheṇa karaṇa-joeṇa | saṃjayā su-samāhiyā ||41||

vaṇassaiṃ vihiṃsanto | hiṃsaī u tayassie /

tase ya vivihe pāṇe | cakkhuse ya acakkhuse ||42||

tamhā eyaṃ viyāṇittā | dosaṃ duggai-vaḍḍhaṇaṃ /

vaṇassai-samārambhaṃ | jāvajjīvāe vajjae ||43||

tasakāyaṃ na hiṃsanti | maṇasā vayasa kāyasā /

tiviheṇa karaṇa-joeṇa | saṃjayā su-samāhiyā ||44||

tasakāyaṃ vihiṃsanto | hiṃsaī u tayassie /

tase ya vivihe pāṇe | cakkhuse ya acakkhuse ||45||

tamhā eyaṃ viyāṇittā | dosaṃ duggai-vaḍḍhaṇaṃ /

tasakāya-samārambhaṃ | jāvajjīvāe vajjae ||46||

jāiṃ cattāri 'bhojjāiṃ | isiṇāhāra-māīṇi /

tāiṃ tu vivajjanto | saṃjamaṃ aṇupālae ||47||

piṇḍaṃ sejjaṃ ca vatthaṃ ca | cautthaṃ pāyameva ya /

akappiyaṃ na icchejjā, | paḍigāhejja kappiyaṃ ||48||

je niyāgaṃ mamāyanti | kīyamuddesiyāhaḍaṃ /

vahaṃ te samaṇujāṇanti | ii vuttaṃ mahesiṇā ||49||

tamhā asaṇa-pāṇāī | kīyamuddesiyāhaḍaṃ /

vajjayanti ṭhiyappāṇo | nigganthā dhamma-jīviṇo ||50||

kaṃsesu kaṃsa-pāesu | kuṇḍa-moesu vā puṇo /

bhuñjanto asaṇa-pāṇāī | āyārā paribhassaī ||51||

sīodaga-samārambhe | matta-dhoyaṇa-chaḍḍaṇe /

jāiṃ chaṇṇanti bhūyāiṃ | diṭho tattha asaṃjamo ||52||

pacchākammaṃ purekammaṃ | siyā tattha na kappaī /

eyamaṭhaṃ na bhūñjanti | nigganthā gihi-bhāyaṇe ||53||

āsandī-paliyaṅkesu | mañca-māsālaesu vā /

aṇāyariyamajjāṇaṃ | āsaittu saittu vā ||54||

nāsandī-paliyaṅkesu | na nisejjā na pīḍhae /

nigganthā 'paḍilehāe | buddha-vuttamahiṭhagā ||55||

gambhīra-vijayā ee | pāṇā duppaḍilehagā, /

āsandī-paliyaṅkā ya | eyamaṭhaṃ vivajjiyā ||56||

goyaragga-paviṭhassa | nisejjā jassa kappaī /

imerisamaṇāyāraṃ | āvajjai abohiyaṃ ||57||

vivattī bambhacerassa | pāṇāṇaṃ ca vahe vaho /

vaṇīmaga-paḍīghāo | paḍikoho yagāriṇaṃ ||58||

aguttī bambhacerassa | itthīo yāvi saṅkaṇaṃ /

kusīla-vaḍḍhaṇaṃ ṭhāṇaṃ | dūrao parivajjae ||59||

tiṇhamannayarāgassa | nisejjā jassa kappaī /

jarāe abhibhūyassa | vāhiyassa tavassiṇo ||60||

vāhio vā arogī vā | siṇāṇaṃ jo u patthae /

vokkanto hoi āyāro, | jaḍho havai saṃjamo ||61||

santime suhumā pāṇā | ghasāsu bhilagāsu ya /

je u bhikkhū siṇāyanto | viyaḍeṇuppalāvae ||62||

tamhā te na siṇāyanti | sīeṇa usiṇeṇa vā /

jāvajjīvaṃ vayaṃ ghoraṃ | asiṇāṇamahiṭhagā ||63||

siṇāṇaṃ aduvā kakkaṃ | loddhaṃ paumagāṇi ya /

gāyassuvvaaṇaṭhāe | nāyaranti kayāi vi ||64||

nagiṇassa vā vi muṇḍassa | dīha-roma-nahaṃsiṇo /

mehuṇā uvasantassa | kiṃ vibhūsāe kāriyaṃ! ||65||

vibhūsā-vattiyaṃ bhikkhū | kammaṃ bandhai cikkaṇaṃ /

saṃsāra-sāyare ghore | jeṇaṃ paḍai duruttare ||66||

vibhūsā-vattiyaṃ ceyaṃ | buddhā mannanti tārisaṃ /

sāvajjā-bahulaṃ ceyaṃ, | neyaṃ tāīhi seviyaṃ ||67||

khaventi appāṇamamoha-daṃsiṇo | tave rayā saṃjama ajjave guṇe /

dhuṇanti pāvāi pure-kaḍāiṃ, | navāi pāvāi na te karenti ||68||

saovasantā amamā akiṃcaṇā | sa-vijja-vijjāṇugayā jasaṃsiṇo /

uu-ppasanne vimale va candimā | siddhiṃ vimāṇāi uventi tāiṇo ||69|| tti bemi ||

|| ṣaṣṭhamamadhyayanam ||6||

Dasaveyāliya: 7 saptamamadhyayanam (vakkasuddhī.) /

cauṇhaṃ khalu bhāsāṇaṃ | parisaṃkhāya pannavaṃ /

doṇhaṃ tu viṇayaṃ sikkhe, | do na bhāsejja savvaso ||1||

jā ya saccā avattavvā | saccāmosā ya jā musā /

jā ya buddhehi 'āiṇṇā | na taṃ bhāsejja pannavaṃ ||2||

asaccamosaṃ saccaṃ ca | aṇavajjamakakkasaṃ /

samuppehamasaṃdiddhaṃ | giraṃ bhāsejja pannavaṃ ||3||

eyaṃ ca aṭhamannaṃ vā | jaṃ tu nāmei sāsayaṃ /

sa bhāsaṃ saccamosaṃ pi | taṃ pi dhīro vivajjae ||4||

vitahaṃ pi tahāmottiṃ | jaṃ giraṃ bhāsae naro /

tamhā so puṭho pāveṇaṃ, | kiṃ puṇa jo musaṃ vae ||5||

tamhā `gacchāmo, vakkhāmo, | amugaṃ vā -e bhavissaī /

ahaṃ vā -aṃ karissāmi, | eso vā -aṃ karissaī` ||6||

evamāī u jā bhāsā | esa-kālammi saṅkiyā /

saṃpayāīya-maṭhe vā | taṃ pi dhīro vivajjae ||7||

aīyammi ya kālammī | paccuppanna-maṇāgae /

jamaṭhaṃ tu na jāṇejjā | `evameyaṃ` ti no vae ||8||

aīyammi ya kālammī | paccuppanna-maṇāgae /

jattha saṅkā bhave taṃ tu | `evameyaṃ` ti no vae ||9||

aīyammi ya kālammī | paccuppanna-maṇāgae /

nissaṅkiyaṃ bhave jaṃ tu | `evameyaṃ` ti niddise ||10||

taheva pharusā bhāsā | guru-bhūāvaghāiṇī /

saccā vi sā na vattavvā | jao pāvassa āgamo ||11||

taheva kāṇaṃ `kāṇe` tti | paṇḍagaṃ `paṇḍage` tti vā /

vāhiyaṃ vā vi `rogi` tti | teṇaṃ `core` tti no vae ||12||

eeṇanneṇa aṭheṇa | paro jeṇuvahammaī /

āyāra-bhāva-dosa-nnū | na taṃ bhāsejja pannavaṃ ||13||

taheva `hole` `gole` tti | `sāṇe` vā `vasule` tti ya /

`damae` `dūhae` vā vi | na taṃ bhāsejja pannavaṃ ||14||

ajjie pajjie vā vi | ammo māusiu tti ya /

piussie bhāiṇejja tti | dhūe nattuṇie tti ya ||15||

hale hale tti anne tti | bhae sāmiṇi gomiṇi /

hole gole vasule tti | itthiyaṃ nevamālave ||16||

nāmadhejjeṇa -aṃ būyā | itthī-gotteṇa vā puṇo /

jahārihamabhigijjha | ālavejja lavejja vā ||17||

ajjae pajjae vā vi | bappo culla-piu tti ya /

māulā bhāiṇejja tti | putte nattuṇiya tti ya ||18||

he ho hale tti anna tti | bhaā sāmiya gomiya /

hola gola vasula tti | purisaṃ nevamālave ||19||

nāmadhejjeṇa -aṃ būyā | purisa-gotteṇa vā puṇo /

jahārihamabhigijjha | ālavejja lavejja vā ||20||

pañcindiyāṇa pāṇāṇaṃ | `esa itthī, ayaṃ pumaṃ` /

jāva -aṃ na vijāṇejjā | tāva jāi tti ālave ||21||

taheva maṇusaṃ pasuṃ | pakkhiṃ vā vi sarīsivaṃ /

`thūle pameile vajjhe | pāime` tti ya no vae ||22||

parivuḍḍhe tti -aṃ būyā, | būyā uvacie tti ya /

saṃjāe pīṇie vā vi | mahākāe tti ālave ||23||

taheva gāo dujjhāo, | dammā go-rahaga tti ya /

vāhimā raha-jogga tti, | nevaṃ bhāsejja pannavaṃ ||24||

juvaṃ-gave tti -aṃ būyā, | dheṇuṃ rasadaya tti ya /

rahasse mahallae vā vi | vae saṃvahaṇe tti ya ||25||

taheva gantumujjāṇaṃ | pavvayāṇi vaṇāṇi ya /

rukkhā mahalla pehāe | nevaṃ bhāsejja pannavaṃ ||26||

alaṃ pāsāya-khambhāṇaṃ | toraṇāṇaṃ gihāṇa ya /

phalihaggala-nāvāṇaṃ | alaṃ udaga-doṇiṇaṃ ||27||

pīḍhae caṅgabere ya | naṅgale maiye siyā /

janta-laṭhī va nābhī vā | gaṇḍiyā va alaṃ siyā ||28||

āsaṇaṃ sayaṇaṃ jāṇaṃ | hojjā vā kiṃcuvassae /

bhūovaghāiṇiṃ bhāsaṃ | nevaṃ bhāsejja pannavaṃ ||29||

taheva gantumujjāṇaṃ | pavvayāṇi vaṇāṇi ya /

rukkhā mahalla pehāe | evaṃ bhāsejja pannavaṃ ||30||

jāimantā ime rukkhā | dīha-vaā mahālayā /

payāya-sālā viḍimā | vae darisaṇi tti ya ||31||

tahā phalāi pakkāiṃ | pāya-khajjāi no vae /

veloiyāi ālāiṃ | vehimāiṃ ti no vae ||32||

asaṃghaḍā ime ambā | bahu-nivvaimā phalā /

vaejja bahu-saṃbhūyā | bhūya-rūva tti vā puṇo ||33||

tahosahīo pakkāo | nīliyāo chavī i ya /

lāimā bhajjimāo tti | pihu-khajja tti no vae ||34||

rūḍhā bahu-saṃbhūyā | thirā ūsaḍhā vi ya /

gabbhiyāo pasūyāo | sasārāo tti ālave ||35||

taheva saṃkhaḍiṃ naccā | kiccaṃ kajjaṃ ti no vae /

teṇagaṃ vā vi vajjhe tti, | su-titthe tti ya āvagā ||36||

saṃkhaḍiṃ saṃkhaḍiṃ būyā, | paṇiyaṭhaṃ ti teṇagaṃ, /

`bahu-samāṇi titthāṇi | āvagāṇaṃ` viyāgare ||37||

tahā naīo puṇṇāo | kāya-tijja tti no vae /

nāvāhi tārimāo tti | pāṇi-pejja tti no vae ||38||

bahu-vāhaḍā agāhā | bahu-saliluppilodagā /

bahu-vitthaḍodagā yāvi, | evaṃ bhāsejja pannavaṃ ||39||

taheva sāvajjaṃ jogaṃ | parassaṭhāe niṭhiyaṃ /

kīramāṇaṃ ti vā naccā | sāvajjaṃ nālave muṇī ||40||

sukaḍe tti supakke tti | suchinne suhaḍe maḍe /

suniṭhie sulaṭhe tti | sāvajjaṃ vajjae muṇī ||41||

payatta-pakke tti va pakkamālave, | payatta-chinna tti va chinnamālave, /

payatta-laṭha tti va kamma-heuyaṃ, | pahāra-gāḍha tti va gāḍhamālave ||42||

savvukkasaṃ paragghaṃ vā | aulaṃ natthi erisaṃ /

acakkiyamavattavvaṃ | aciyattaṃ ceva no vae ||43||

`savvameyaṃ vaissāmi, | savvameyaṃ` tti no vae /

aṇuvīi savvaṃ savvattha | evaṃ bhāsejja pannavaṃ ||44||

su-kkiyaṃ vā su-vikkīyaṃ | akijjaṃ kijjameva vā /

`imaṃ geṇha, imaṃ muñca | paṇiyaṃ` no viyāgare ||45||

appagghe vā mahagghe vā | kae va vikkae vi vā /

paṇiyaṭhe samuppanne | aṇavajjaṃ viyāgare ||46||

tahevāsaṃjayaṃ dhīro | `āsa, ehi karehi vā /

saya, ciṭha, vayāhi` tti | nevaṃ bhāsejja pannavaṃ ||47||

bahave ime asāhū | loe vuccanti sāhuṇo /

na lave asāhuṃ sāhu tti, | sāhuṃ sāhu tti ālave ||48||

nāṇa-daṃsaṇa-saṃpannaṃ | saṃjame ya tave rayaṃ /

evaṃ-guṇa-samāuttaṃ | saṃjayaṃ sāhumālave ||49||

devāṇaṃ maṇuyāṇaṃ ca | tiriyāṇaṃ ca vuggahe /

amuyāṇaṃ jao hou | mā vā hou tti no vae ||50||

vāo vuṭhaṃ va sīuṇhaṃ | khemaṃ dhāyaṃ sivaṃ ti vā /

kayā -u hojja eyāṇi | mā vā hou tti no vae ||51||

taheva mehaṃ va nahaṃ va māṇavaṃ | na deva deva tti giraṃ vaejjā /

`sammucchie unnae vā paoe` | vaejja vā `vuṭhe balāhae` tti ||52||

antalikkha tti -aṃ būyā | gujjhāṇucariya tti ya /

riddhimantaṃ naraṃ dissa | `riddhimantaṃ` ti ālave ||53||

taheva sāvajjaṇumoyaṇī girā | ohāriṇī jā ya parovaghāiṇī /

se koha loha bhayasā va māṇavo | na hāsamāṇo vi giraṃ vaejjā ||54||

savvakka-suddhiṃ samupehiyā muṇī, | giraṃ ca duṭhaṃ parivajjae sayā /

miyaṃ aduṭhaṃ aṇuvīi bhāsae | sayāṇa majjhe lahaī pasaṃsaṇaṃ ||55||

bhāsāe dose ya guṇe ya jāṇiyā | tīse ya duṭhe parivajjae sayā /

chasu saṃjae sāmaṇie sayā jae | vaejja buddhe hiyamāṇulomiyaṃ ||56||

parikkha-bhāsī susamāhiindie | caukkasāyāvagae aṇissie /

sa niddhuṇe dhutta-malaṃ pure-kaḍaṃ, | ārāhae logamiṇaṃ tahā paraṃ ||57|| ti bemi ||

|| saptamamadhyayanam ||7||

Dasaveyāliya: 8 aṣamamadhyayanam (āyārapaṇihī.) /

āyāra-paṇihiṃ laddhuṃ | jahā kāyavva bhikkhuṇā /

taṃ bhe udāharissāmi | āṇupuvviṃ, suṇeha me ||1||

puḍhavi daga agaṇi māruya | taṇa rukkha sa-bīyagā /

tasā ya pāṇā jīva tti | ii vuttaṃ mahesiṇā ||2||

tesiṃ acchaṇa-joeṇa | niccaṃ hoyavvayaṃ siyā /

maṇasā kāya vakkeṇa, | evaṃ bhavai saṃjae ||3||

puḍhavi bhittiṃ silaṃ leluṃ | neva bhinde na saṃlihe /

tiviheṇa karaṇa-joeṇa | saṃjae su-samāhie ||4||

suddha-puḍhavīe na nisie | sasarakkhammi ya āsaṇe /

pamajjittu nisīejjā | jāittā jassa oggahaṃ ||5||

sīodagaṃ na sevejjā | silā-vuṭhaṃ himāṇi ya /

usiṇodagaṃ tatta-phāsuyaṃ | paḍigāhejja saṃjae ||6||

udaollaṃ appaṇo kāyaṃ | neva puñche na saṃlihe /

samuppeha tahā-bhūyaṃ | no -aṃ saṃghaae muṇī ||7||

iṅgālaṃ agaṇiṃ acciṃ | alāyaṃ vā sa-joiyaṃ /

na uñjejjā na ghaejjā | no -aṃ nivvāvae muṇī ||8||

tāliya- eṇa patteṇa | sāhā-vihuyaṇeṇa vā /

na vīejja appaṇo kāyaṃ | bāhiraṃ vā vi poggalaṃ ||9||

taṇa-rukkhaṃ na chindejjā | phalaṃ mūlaṃ va kassaī /

āmagaṃ vivihaṃ bīyaṃ | maṇasā vi na patthae ||10||

gahaṇesu na ciṭhejjā | bīesu hariesu vā /

udagammi tahā niccaṃ | uttiṅga-paṇagesu vā ||11||

tase pāṇe na hiṃsejjā | vāyā aduva kammuṇā /

uvarao savvabhūesu | pāsejja vivihaṃ jagaṃ ||12||

aṭha suhumāi pehāe | jāiṃ jāṇittu saṃjae /

dayāhigārī bhūesu | āsa ciṭha saehi vā ||13||

kayarāi aṭha suhumāiṃ | jāiṃ pucchejja saṃjae? /

imāi tāi mehāvī | āikkhejja viyakkhaṇe ||14||

siṇehaṃ puppha-suhumaṃ ca | pāṇuttiṅgaṃ taheva ya /

paṇagaṃ bīya hariyaṃ ca | aṇḍa-suhumaṃ ca aṭhamaṃ ||15||

evameyāṇi jāṇittā | savva-bhāveṇa saṃjae /

appamatte jae niccaṃ | savvindiya-samāhie ||16||

dhuvaṃ ca paḍilehejjā | jogasā pāya-kambalaṃ /

sejjamuccārabhūmiṃ ca | saṃthāraṃ aduvāsaṇaṃ ||17||

uccāraṃ pāsavaṇaṃ | khelaṃ siṅghāṇa-jalliyaṃ /

phāsuyaṃ paḍilehittā | pariṭhāvejja saṃjae ||18||

pavisittu parāgāraṃ | pāṇaṭhā bhoyaṇassa vā /

jayaṃ ciṭhe, miyaṃ bhāse, | na ya rūvesu maṇaṃ kare ||19||

bahuṃ suṇei kaṇṇehiṃ, | bahuṃ acchīhi pecchaī, /

na ya diṭhaṃ suyaṃ savvaṃ | bhikkhū akkhāumarihaī ||20||

suyaṃ vā jai vā diṭhaṃ | na lavejjovaghāiyaṃ /

na ya keṇai uvāeṇaṃ | gihi-jogaṃ samāyare ||21||

niṭhāṇaṃ rasa-nijjūḍhaṃ | bhaddagaṃ pāvagaṃ ti vā /

puṭho vā vi apuṭho vā | lābhālābhaṃ na niddise ||22||

na ya bhoyaṇammi giddho | care uñchaṃ ayampiro /

aphāsuyaṃ na bhuñjejjā | kīyamuddesiyāhaḍaṃ ||23||

sannihiṃ ca na kuvvejjā | aṇu-māyaṃ pi saṃjae /

muhā-jīvī asaṃbuddhe | havejja jaga-nissie ||24||

lūha-vittī su-saṃtuṭhe | appicche suhare siyā /

āsurattaṃ na gacchejjā | soccāṇaṃ jiṇa-sāsaṇaṃ ||25||

kaṇṇa-sokkhehi saddehiṃ | pemaṃ nābhinivesae /

dāruṇaṃ kakkasaṃ phāsaṃ | kāeṇa ahiyāsae ||26||

khuhaṃ pivāsa dussejjaṃ | sīuṇhaṃ araī bhayaṃ /

ahiyāse avvahio, | dehe dukkhaṃ mahā-phalaṃ ||27||

atthaṃgayammi āicce | puratthā ya aṇuggae /

āhāramaiyaṃ savvaṃ | maṇasā vi na patthae ||28||

atintiṇe acavale | appa-bhāsī miyāsaṇe /

havejja uyare dante, | thovaṃ laddhuṃ na khiṃsae ||29||

na bāhiraṃ paribhave, | attāṇaṃ na samukkase, /

suya-lābhe na majjejjā | jaccā tavasi buddhie ||30||

se jāṇaṃ ajāṇaṃ vā | kau āhammiyaṃ payaṃ /

saṃvare khippamappāṇaṃ, | bīyaṃ taṃ na samāyare ||31||

aṇāyāraṃ parakkamma | neva gūhe, na niṇhave /

suī sayā viyaḍa-bhāve | asaṃsatte jiindie ||32||

amohaṃ vayaṇaṃ kujjā | āyariyassa mahappaṇo, /

taṃ parigijjha vāyāe | kammuṇā uvavāyae ||33||

adhuvaṃ jīviyaṃ naccā | siddhi-maggaṃ viyāṇiyā /

viṇiyaejja bhogesu | āuṃ parimiyamappaṇo ||34||

(balaṃ thāmaṃ ca pehāe | saddhāmārogamappaṇo /)

(khettaṃ kālaṃ ca vinnāya | tahappāṇaṃ na juñjae || ||)

jarā jāva na pīlei | vāhī jāva na vaḍḍhaī /

jāvindiyā na hāyanti | tāva dhammaṃ samāyare ||35||

kohaṃ māṇaṃ ca māyaṃ ca | lobhaṃ ca pāva-vaḍḍhaṇaṃ /

vame cattāri dose u | icchanto hiyamappaṇo ||36||

koho pīiṃ paṇāsei, | māṇo viṇaya-nāsaṇo /

māyā mittāṇi nāsei, | lobho savva-viṇāsaṇo ||37||

uvasameṇa haṇe kohaṃ, | māṇaṃ maddavayā jiṇe /

māyaṃ cajjava-bhāveṇa, | lobhaṃ saṃtosao jiṇe ||38||

koho ya māṇo ya aṇiggahīyā | māyā ya lobho ya pavaḍḍhamāṇā /

cattāri ee kasiṇā kasāyā | siñcanti mūlāi puṇabbhavassa ||39||

rāiṇiesu viṇayaṃ pauñje, | dhuva-sīlayaṃ sayayaṃ hāvaejjā /

kummo vva allīṇa-palīṇa-gutto | parakkamejjā tava-saṃjamammi ||40||

niddaṃ ca na bahu-mannejjā, | sa-ppahāsaṃ vivajjae /

miho-kahāhiṃ na rame | sajjhāyammi rao sayā ||41||

jogaṃ ca samaṇa-dhammammi | juñje aṇalaso dhuvaṃ /

jutto ya samaṇa-dhammammi | aṭhaṃ lahai aṇuttaraṃ ||42||

ihaloga-pāratta-hiyaṃ | jeṇaṃ gacchai soggaiṃ /

bahu-suyaṃ pajjuvāsejjā, | pucchejjattha-viṇicchayaṃ ||43||

hatthaṃ pāyaṃ ca kāyaṃ ca | paṇihāya jiindie /

allīṇa-gutto nisie | sagāse guruṇo muṇī ||44||

na pakkhao na purao | neva kiccāṇa piṭhao /

na ya ūruṃ samāsejjā | ciṭhejjā guruṇantie ||45||

apucchio na bhāsejjā | bhāsamāṇassa antarā /

piṭhi-maṃsaṃ na khāejjā, | māyā-mosaṃ vivajjae ||46||

appattiyaṃ jeṇa siyā | āsu kuppejja vā paro /

savvaso taṃ na bhāsejjā | bhāsaṃ ahiya-gāmiṇiṃ ||47||

diṭhaṃ miyaṃ asaṃdiddhaṃ | paḍipuṇṇaṃ viyañjiyaṃ /

ayampiramaṇuvviggaṃ | bhāsaṃ nisira attavaṃ ||48||

āyāra-pannatti-dharaṃ | diṭhivāyamahijjagaṃ /

vai-vikkhaliyaṃ naccā | na taṃ uvahase muṇī ||49||

nakkhattaṃ sumiṇaṃ jogaṃ | nimittaṃ manta-bhesajaṃ /

gihiṇo taṃ na āikkhe | bhūyāhigaraṇaṃ payaṃ ||50||

annaṭhaṃ pagaḍaṃ layaṇaṃ | bhaejja sayaṇāsaṇaṃ /

uccāra-bhūmi-saṃpannaṃ | itthī-pasu-vivajjiyaṃ ||51||

vivittā ya bhave sejjā, | nārīṇaṃ na lave kahaṃ /

gihi-saṃthavaṃ na kujjā, | kujjā sāhūhi saṃthavaṃ ||52||

jahā kukkuḍa-poyassa | niccaṃ kulalao bhayaṃ /

evaṃ khu bambhayārissa | itthī-viggahao bhayaṃ ||53||

citta-bhittiṃ na nijjhāe | nāriṃ vā suṇalaṃkiyaṃ, /

bhakkharaṃ piva daṭhūṇaṃ | diṭhiṃ paḍisamāhare ||54||

hattha-pāya-paḍicchinnaṃ | kaṇṇa-nāsa-vigappiyaṃ /

avi vāsasaiṃ nāriṃ | bambhayārī vivajjae ||55||

vibhūsā itthi-saṃsaggī | paṇīya-rasa-bhoyaṇaṃ /

narassatta-gavesissa | visaṃ tālauḍaṃ jahā ||56||

aṅga-paccaṅga-saṃṭhāṇaṃ | cārullaviya-pehiyaṃ /

itthīṇaṃ taṃ na nijjhāe | kāma-rāga-vivaḍḍhaṇaṃ ||57||

visaesu maṇunnesuṃ | pemaṃ nābhinivesae /

aṇiccaṃ tesi vinnāya | pariṇāmaṃ poggalāṇa u ||58||

poggalāṇa parīṇāmaṃ | tesiṃ naccā jahā tahāũ/

viṇīya-taṇho vihare | sīībhūeṇa appaṇā ||59||

jāe saddhāe nikkhanto | pariyāyaṇṭhāṇamuttamaṃ /

tameva aṇupālejjā | guṇe āyariya-sammae ||60||

tavaṃ cimaṃ saṃjama-jogayaṃ ca | sajjhāya-jogaṃ ca sayā ahiṭhae /

sūre va seṇāe samatta-māuhe | alamappaṇo hoi alaṃ paresiṃ ||61||

sajjhāya-sajjhāṇa-rayassa tāiṇo | apāva-bhāvassa tave rayassa /

visujjhaī jaṃ se malaṃ pure-kaḍaṃ | samīriyaṃ ruppa-malaṃ va joiṇā ||62||

se tārise dukkha-sahe jiindie | sueṇa jutte amame akiṃcaṇe /

virāyaī kamma-ghaṇammi avagae | kasiṇabbha-puḍāvagame va candima ||63|| tti bemi

||

|| aṣamamadhyayanam ||8||

Dasaveyāliya: 9-1 navamamadhyayanam || prathama uddeśakaḥ (viṇayasamāhī.) /

thambhā va kohā va maya-ppamāyā | gurussagāse viṇayaṃ na sikkhe /

so ceva o tassa abhūi-bhāvo, | phalaṃ va kīyassa vahāya hoi ||1||

je yāvi manda tti guruṃ viittā | ḍahare ime appa-sue tti naccā /

hīlanti micchaṃ paḍivajjamāṇā | karenti āsāyaṇa te gurūṇaṃ ||2||

pagaīe mandā vi bhavanti ege | ḍaharā vi ya je suya-buddhovaveyā /

āyāramantā guṇa suṭhiyappā | je hīliyā sihiriva bhāsa kujjā ||3||

je yāvi nāgaṃ ḍaharaṃ ti naccā | āsāyae se ahiyāya hoi /

evāyariyaṃ pi hu hīlayanto | niyacchaī jāi-pahaṃ khu mande ||4||

āsīviso yāvi paraṃ su-ruṭho | kiṃ jīva-nāsāo paraṃ nu kujjā? /

āyariya-pāyā puṇa appasannā, | abohiṇāsāyaṇa natthi mokkho ||5||

jo pāvagaṃ jaliyamavakkamejjā | āsīvisaṃ vā vi hu kovaejjā /

jo vā visaṃ khāyai jīviyaṭhī | esovamāsāyaṇayā gurūṇaṃ ||6||

siyā hu se pāvaya no ḍahejjā, | āsīviso vā kuvio na bhakkhe /

siyā visaṃ hālahalaṃ na māre, | na yāvi mokkho guru-hīlaṇāe ||7||

jo pavvayaṃ sirasā bhettumicche | suttaṃ va sīhaṃ paḍibohaejjā /

jo vā dae sattiṇagge pahāraṃ | esovamāsāyaṇayā gurūṇaṃ ||8||

siyā hu sīseṇa giriṃ pi bhinde | siyā hu sīho kuvio na bhakkhe /

siyā na bhindejja va sattiṇaggaṃ | na yāvi mokkho guru-hīlaṇāe ||9||

āyariya pāyā puṇa appasannā, | ābohiṇāsāsaṇa natthi mokkho /

tamhā aṇābāha-suhābhikaṅkhī | guru-ppasāyābhimuho ramejjā ||10||

jahāhiyaggī jalaṇaṃ namaṃse | nāṇāhuī-manta-payābhisittaṃ /

evāyariyaṃ uvaciṭhaejjā | aṇanta-nāṇovagao vi santo ||11||

jassantie dhamma-payāi sikkhe | tassantie viṇaiyaṃ pauñje /

sakkārae sirasā pañjalīo | kāya-ggirā "bho" maṇasā ya niccaṃ ||12||

lajjā dayā saṃjama bambhaceraṃ | kallāṇa-bhāgissa visohiṇṭhāṇaṃ /

je me gurū sayayamaṇusāsayanti | te haṃ gurū sayayaṃ pūyayāmi ||13||

jahā nisante tavaṇaccimālī | pabhāsaī kevala-bhārahaṃ tu /

evāyario suya-sīla-buddhie | virāyaī sura-majjhe va indo ||14||

jahā sasī komui-joga-jutte | nakkhatta-tārā-gaṇa-parivuḍappā /

khe sohaī vimale abbha-mukke, | evaṃ gaṇī sohai bhikkhu-majjhe ||15||

mahāgarā āyariyā mahesī | samāhi-joge suya-sīla-buddhie /

saṃpāviu-kāme aṇuttarāiṃ | ārāhae, tosae dhamma-kāmī ||16||

soccāṇa mehāvi-subhāsiyāiṃ | sussūsae āyariyappamatto /

ārāhaittāṇa guṇe aṇege | se pāvaī siddhimaṇuttaraṃ ti ||17|| bemi ||

|| navamamadhyayanam ||9-1||

Dasaveyāliya: 9-2 navamamadhyayanam || dvitīya uddeśakaḥ /

mūlāo khandha-ppabhavo dumassa, | khandhāo pacchā samuventi sāhā /

sāha-ppasāhā viruhanti pattā, | tao se pupphaṃ ca phalaṃ raso ya ||1||

evaṃ dhammassa viṇao | mūlaṃ, paramo se mokkho /

jeṇa kittiṃ suyaṃ sagghaṃ | nissesaṃ cābhigacchaī ||2||

je ya caṇḍe mie thaddhe | duvvāī niyaḍī saḍhe /

vujjhaī se aviṇīyappā | kaṭhaṃ soya-gayaṃ jahā ||3||

viṇayaṃ pi jo uvāeṇa | coio kuppaī naro /

divvaṃ so sirimejjantiṃ | daṇḍeṇa paḍisehae ||4||

taheva aviṇīyappā | uvavajjhā hayā gayā /

dīsanti duhamehantā | ābhiogamuvaṭhiyā ||5||

taheva suviṇīyappā | uvavajjhā hayā gayā /

dīsanti suhamehantā | iḍḍhiṃ pattā mahāyasā ||6||

taheva aviṇīyappā | logaṃsi nara-nārio /

dīsanti duhamehantā | chāyā te vigalindiyā ||7||

daṇḍa-sattha-parijuṇṇā | asabbha-vayaṇehi ya /

kaluṇā vivanna-chandā | khuppivāsāe parigayā ||8||

taheva suviṇīyappā | logaṃsi nara-nārio /

dīsanti suhamehantā | iḍḍhiṃ pattā mahāyasā ||9||

taheva aviṇīyappā | devā jakkhā ya gujjhagā /

dīsanti duhamehantā | ābhiogamuvaṭhiyā ||10||

taheva suviṇīyappā | devā jakkhā ya gujjhagā /

dīsanti suhamehantā | iḍḍhiṃ pattā mahāyasā ||11||

je āyariyaṇuvajjhāyāṇaṃ | sussūsā-vayaṇaṃ-karā /

tesiṃ sikkhā pavaḍḍhanti | jala-sittā iva pāyavā ||12||

appaṇaṭhā paraṭhā vā | sippā neuṇiyāṇi ya /

gihiṇo uvabhogaṭhā | ihalogassa kāraṇā ||13||

jeṇa bandhaṃ vahaṃ ghoraṃ | pariyāvaṃ ca dāruṇaṃ /

sikkhamāṇā niyacchanti | juttā te laliindiyā ||14||

te vi taṃ guruṃ pūyanti | tassa sippassa kāraṇā /

sakkārenti namaṃsanti | tuṭhā niddesa-vattiṇo ||15||

kiṃ puṇa je suya-ggāhī | aṇanta-hiya-kāmae! /

āyariyā jaṃ vae bhikkhū | tamhā taṃ nāivattae ||16||

nīyaṃ sejjaṃ gaiṃ ṭhāṇaṃ, | nīyaṃ ca āsaṇāṇi ya, /

nīyaṃ ca pāe vandejjā, | nīyaṃ kujjā ya añjaliṃ ||17||

saṃghaaittā kāeṇaṃ | tahā uvahiṇā-mavi /

"khameha avarāhaṃ me" | vaejja "na puṇo" tti ya ||18||

duggao vā paoeṇaṃ | coio vahaī rahaṃ, /

evaṃ dubuddhi kiccāṇaṃ | vutto vutto pakuvvaī ||19||

(ālavante lavante vā | na nisejjāe paḍissuṇe /)

(mottūṇaṃ āsaṇaṃ dhīro | sussūsāe paḍissuṇe ||)

kālaṃ chandovayāraṃ ca | paḍilehittāṇa heuhiṃ /

teṇaṃ teṇaṃ uvāehiṃ | taṃ taṃ saṃpaḍivāyae ||20||

vivattī aviṇīyassa, | saṃpattī viṇiyassa ya /

jasseyaṃ duhao nāyaṃ | sikkhaṃ se abhigacchaī ||21||

je yāvi caṇḍe maiṇiḍḍhi-gārave | pisuṇe nare sāhasa hīṇa-pesaṇe /

adiṭha-dhamme viṇae akovie | asaṃvibhāgī na hu tassa mokkho ||22||

niddesa-vattī puṇa je gurūṇaṃ | suyattha-dhammā viṇayammi koviyā /

tarittu te ohamiṇaṃ duruttaraṃ | khavittu kammaṃ gaimuttamaṃ gaya ||23|| tti bemi ||

|| navamamadhyayanam ||9-2||

Dasaveyāliya: 9-3 navamamadhyayanam || tṛtīya uddeśakaḥ ||

āyariyaggimivāhiyaggī | sussūsamāṇo paḍijāgarejjā /

āloiyaṃ iṅgiyameva naccā | jo chandamārāhayaī sa pujjo ||1||

āyāra-maṭhā viṇayaṃ pauñje | sussūsamāṇo parigijjha vakkaṃ /

jahovaiṭhaṃ abhikaṅkhamāṇo | guruṃ tu nāsāyayaī, sa pujjo ||2||

rāiṇiesu viṇayaṃ pauñje | ḍaharā vi ya je pariyāya-jeṭhā /

niyattaṇe vaai sacca-vāī | ovāyavaṃ vakka-kare, sa pujjo ||3||

annāyaṇuñchaṃ caraī visuddhaṃ | javaṇaṭhayā samuyāṇaṃ ca niccaṃ /

aladdhuyaṃ no paridevaejjā, | laddhuṃ na vikaṃthayaī, sa pujjo ||4||

saṃthāra-sejjāsaṇa-bhattapāṇe | appicchayā ailābhe vi sante /

jo evamappāṇabhitosaejjā | saṃtosa-pāhanna rae sa pujjo ||5||

sakkā saheuṃ āsāe ka- ayā | aomayā ucchahayā nareṇaṃ /

aṇāsae jo u sahejja ka- e | vaīmae kaṇṇa-sare sa pujjo ||6||

muhutta-dukkhā u havanti ka- ayā | aomayā, te vi tao suṇuddharā /

vāyā-duruttāṇi duruddharāṇi | berāṇubandhīṇi mahabbhayāṇi ||7||

samāvayantā vayaṇābhighāyā | kaṇṇaṃ-gayā dummaṇiyaṃ jaṇanti /

dhammo tti kiccā paramagga-sūre | jiindie jo sahaī sa pujjo ||8||

avaṇṇa-vāyaṃ ca parammuhassa | paccakkhao paḍiṇīyaṃ ca bhāsaṃ /

ohāriṇiṃ appiyakāriṇiṃ ca | bhāsaṃ na bhāsejja sayā, sa pujjo ||9||

alolue akkuhae amāī | apisuṇe yāvi adīṇa-vittī /

no bhāvae no vi ya bhāviyappā | akouhalle ya sayā sa pujjo ||10||

guṇehi sāhū, aguṇehi 'sāhū, | geṇhāhi sāhū-guṇa, muñcasāhū /

viyāṇiyā appagamappaeṇaṃ | jo rāga-dosehi samo sa pujjo ||11||

taheva ḍaharaṃ va mahallagaṃ vā | itthī pumaṃ pavvaiyaṃ gihiṃ vā /

no hīlae no vi ya khiṃsaejjā, | thambhaṃ ca kohaṃ ca cae, sa pujjo ||12||

je māṇiyā sayayaṃ māṇayanti | jatteṇa kannaṃ va nivesayanti /

te māṇae māṇarihe tavassī | jiindie sacca-rae, sa pujjo ||13||

tesiṃ gurūṇaṃ guṇasāgarāṇaṃ | soccāṇa mehāvi subhāsiyāiṃ /

care muṇī pañcarae tigutto | caukkasāyāvagae, sa pujjo ||14||

gurumiha sayayaṃ paḍiyariya muṇī | jiṇa-vaya-niuṇe abhigama-kusale /

dhuṇiya raya-malaṃ pure-kaḍaṃ | bhāsuramaulaṃ gaiṃ gaya ||15|| tti bemi ||

|| navamamadhyayanam ||9-3||

Dasaveyāliya: 9-4 navamamadhyayanam || caturtha uddeśakaḥ ||

suyaṃ me āusaṃ teṇaṃ bhagavayā evamakkhāyaṃ | iha ||*1.1||

khalu therehiṃ bhagavantehiṃ cattāri viṇaya-samāhiṭhāṇā ||*1.2||

pannattā || kayare khalu te therehiṃ bhagavantehiṃ cattāri ||*1.3||

viṇaya-samāhiṭhāṇā pannattā? ime khalu te therehiṃ bhagavantehiṃ ||*1.4||

cattāri viṇaya-samāhiṭhāṇā pannattā, taṃ ||*1.5||

jahā | viṇaya-samāhī suya-samāhī tava-samāhī āyāra-samāhī ||*1.6||

||1|| ||*1.7||

viṇae sue tave ya | āyāre niccaṃ paṇḍiyā /

abhirāmayanti appāṇaṃ | je bhavanti jiindiyā ||2|| ||1||

cauvvihā khalu viṇaya-samāhī bhavai, taṃ jahā | aṇusāsijjanto ||*3.1||

sussūsai, sammaṃ saṃpaḍivajjai, veyamārāhayai, ||*3.2||

na ya bhavai atta-saṃpaggahie cautthaṃ payaṃ ||*3.3||

bhavai ||3|| bhavai ya ettha silogo ||*3.4||

pehei hiyāṇusāsaṇaṃ, | sussūsaī, taṃ ca puṇo ahiṭhae /

na ya māṇa-maeṇa majjai | viṇaya-samāhī āyayaṭhie ||4|| ||2||

cauvvihā khalu suya-samāhī bhavai, taṃ jahā ||*5.1||

suyaṃ me bhavissai tti ajjhāiyavvaṃ bhavai, egaggacitto ||*5.2||

bhavissāmi tti ajjhāiyavvaṃ bhavai, appāṇaṃ ||*5.3||

ṭhāvaissāmi tti ajjhāiyavvaṃ bhavai, ṭhio paraṃ ||*5.4||

ṭhāvaissāmi tti ajjhāiyavvaṃ bhavai cautthaṃ payaṃ ||*5.5||

bhavai ||5|| bhavai ya ettha silogo ||*5.6||

nāṇamegagga-citto ya | ṭhio ṭhāvayaī paraṃ /

suyāṇi ya ahijjittā | rao suya-samāhie ||6|| ||3||

cauvvihā khalu tava-samāhī bhavai, taṃ jahā | no ||*7.1||

ihalogaṭhayāe tavamahiṭhejjā, no paralogaṭhayāe tavamahiṭhejjā, ||*7.2||

no kitti-vaṇṇa-sadda-silogaṭhayāe tavamahiṭhejjā, ||*7.3||

nannattha nijjaraṭhayāe tavamahiṭhejjā cautthaṃ ||*7.4||

payaṃ bhavai ||7|| bhavai ya ettha silogo ||*7.5||

viviha-guṇa-tavo-rae ya niccaṃ | bhavai nirāsae nijjaraṭhie /

tavasā dhuṇai purāṇa-pāvagaṃ | jutto sayā tava-samāhie ||8|| ||4||

cauvvihā khalu āyāra-samāhī bhavai, taṃ jahā ||*9.1||

no ihalogaṭhayāe āyāramahiṭhejjā, nā paralogaṭhayāe ||*9.2||

āyāramahiṭhejjā, no kitti-vaṇṇa-sadda-silogaṭhayāe ||*9.3||

āyāramahiṭhejjā, nannattha ārahantehiṃ heūhiṃ ||*9.4||

āyāramahiṭhejjā cautthaṃ payaṃ bhavai ||9|| ||*9.5||

bhavai ya ettha silogo ||*10.1||

jiṇa-vayaṇa-rae atintaṇe | paḍipuṇṇāyayamāyayaṭhie /

āyāra-samāhi-saṃvuḍe | bhavai ya dante bhāva-saṃdhae ||10|| ||5||

abhigama cauro samāhio | suvisuddho susamāhiyappao /

viula-hiya-suhāvahaṃ puṇo | kuvvai so paya-khemamappaṇo ||11|| ||6||

jāi-maraṇāo muccaī | itthatthaṃ ca cayai savvaso /

siddhe vā bhavai sāsae | devo vā appa-rae mahiḍḍhie ||12|| ||7|| tti bemi ||

|| navamamadhyayanam ||9-4||

Dasaveyāliya: 10 daśamamadhyayanam (sa-bhikkhuṇajjhayaṇaṃ.) /

nikkhamma-māṇāya buddha-vayaṇe | niccaṃ citta-samāhio havejjā /

itthīṇa vasaṃ na yāvi gacche | vantaṃ no paḍiyāyaī je sa bhikkhū ||1||

puḍhaviṃ na khaṇe na khaṇāvae, | sīodagaṃ na pie na piyāvae /

agaṇi satthaṃ jahā su-nisiyaṃ | taṃ na jale na jalāvae je sa bhikkhū ||2||

anileṇa na vīe na vīyāvae, | hariyāṇi na chinde na chindāvae /

bīyāṇi sayā vivajjayanto | saccittaṃ nāhārae je sa bhikkhū ||3||

vahaṇaṃ tasa-thāvarāṇa hoi | puḍhavi-taṇa-kaṭha-nissiyāṇaṃ /

tamhā uddesiyaṃ na bhuñje, | no vi pae na payāvae je sa bhikkhū ||4||

roiya-nāyaputta-vayaṇe | appa-same mannejja chappi kāe /

pañca ya phāse mahavvayāiṃ | pañcāsava-saṃvarae je sa bhikkhū ||5||

cattāri vame sayā kasāe | dhuva-jogī ya havejja buddha-vayaṇe /

ahaṇe nijjāya-rūva-rayae | gihi-jogaṃ parivajjae je sa bhikkhū ||6||

sammaddiṭhī sayā amūḍhe | "atthi hu nāṇe tave saṃjame ya" /

tavasā dhuṇai purāṇa-pāvagaṃ | maṇa-vaya-kāya-susaṃvuḍe je sa bhikkhū ||7||

taheva asaṇaṃ pāṇagaṃ vā | vivihaṃ khāima-sāimaṃ labhittā /

"hohī aṭho sue pare vā" | taṃ na nihe na nihāvae je sa bhikkhū ||8||

taheva asaṇaṃ pāṇagaṃ vā | vivihaṃ khāima-sāimaṃ labhittā /

chandiya sāhammiyāṇa bhuñje | bhoccā sajjhāya-rae ya je sa bhikkhū ||9||

na ya vuggahiyaṃ kahaṃ kahejjā | na ya kuppe nihuindie pasante /

saṃjama-dhuva-joga-jutte | uvasante aviheḍae je sa bhikkhū ||10||

jo sahai hu gāma-ka- ae | akkosa-pahāra-tajjaṇāo ya /

bhaya-bherava-sadda sa-ppahāse | sama-suha-dukkha-sahe ya je sa bhikkhū ||11||

paḍimaṃ paḍivajjiyā masāṇe | no bhāe bhaya-bheravāi dissa /

viviha-guṇa-tavo-rae ya niccaṃ | na sarīraṃ cābhikaṅkhaī je sa bhikkhū ||12||

asaiṃ vosaṭha-catta-dehe | akkuṭhe va hae va lūsie vā /

puḍhavi-same muṇī havejjā | aniyāṇe akohalle ya je sa bhikkhū ||13||

abhibhūya kāeṇa parīsahāiṃ | samuddhare jāi-pahāo appayaṃ /

viittu jāī-maraṇaṃ mahabbhayaṃ | tave rae sāmaṇie je sa bhikkhū ||14||

hattha-saṃjae pāya-saṃjae | vāya-saṃjae saṃjaindie /

ajjhappa-rae susamāhiyappā | suttatthaṃ ca viyāṇaī je sa bhikkhū ||15||

uvahimmi amucchie agiddhe | annāyaṇuñchaṃ pula-nippulāe /

kaya-vikkaya-sannihiā virae | savva-saṅgāvagae ya je sa bhikkhū ||16||

alolo bhikkhū na rasesu giddhe | uñchaṃ care jīviya-nābhikaṅkhī /

iḍḍhiṃ ca sakkāraṇa pūyaṇaṃ ca | cae ṭhiyappā aṇihe je sa bhikkhū ||17||

na paraṃ vaejjāsi "ayaṃ kusīle" | jeṇanno kuppejja na taṃ vaejjā /

jāṇiya patteya puṇṇa-pāvaṃ | attāṇaṃ na samukkase je sa bhikkhū ||18||

na jāi-matte na ya rūva-matte | na lābha-matte na sueṇa matte /

mayāṇi savvāṇi vivajjayanto | dhamma-jjhāṇa-rae ya je sa bhikkhū ||19||

paveyae ajja-payaṃ mahā-muṇī, | dhamme ṭhio ṭhāvayaī paraṃ pi /

nikkhamma vajjejja kusīla-liṅgaṃ | na yāvi hāsaṃ kahae je sa bhikkhū ||20||

taṃ deha-vāsaṃ asuiṃ asāsayaṃ | sayā cae nicca-hiyaṇṭhiyappā /

chindittu jāī-maraṇassa bandhaṇaṃ | uvei bhikkhū apuṇāgamaṃ gaiṃ ||21|| ti bemi ||

|| daśamamadhyayanam ||10||

Dasaveyāliya: 11 ekādaśamadhyayanam (raivakka-cūliyā paḍhamā.)/

iha khalu bho pavvaieṇaṃ uppanna-dukkheṇaṃ saṃjame ||*0.1||

arai-samāvanna-citteṇaṃ ohāṇuppehiṇā aṇohāieṇaṃ ||*0.2||

ceva hayarassi-gayaṅkusa-poyapaḍāgā-bhūyāiṃ imāiṃ ||*0.3||

aṭhārasa ṭhāṇāiṃ sammaṃ saṃpaḍilehiyavvāiṃ bhavanti, taṃ ||*0.4||

jahā | ||*0.5||

haṃ bho dussamāe duppajīvī ||1|| ||*1||

lahussagā ittariyā gihīṇaṃ kāma-bhogā ||2|| ||*2||

bhujjo ya sāya-bahulā maṇussā ||3|| ||*3||

imaṃ ca me dukkhaṃ na cirakālovaṭhāi bhavissai ||4|| ||*4||

oma-jaṇa-purakkāre ||5|| ||*5||

vantassa ya paḍiyāiyaṇaṃ gihīṇaṃ ||6|| ||*6||

aharagai-vāsovasaṃpayā ||7|| ||*7||

dullabhe khalu bho gihīṇaṃ dhamme gihi-vāsa-majjhe vasantāṇaṃ ||8|| ||*8||

āyaṅke se vahāya hoi ||9|| ||*9||

saṃkappe se vahāya hoi ||10|| ||*10||

sovakkese gihi-vāse, niruvakkese pariyāe ||11|| ||*11||

bandhe gihi-vāse, mokkhe pariyāe ||12|| ||*12||

sāvajje gihi-vāse, aṇavajje pariyāe ||13|| ||*13||

bahu-sāhāraṇā gihīṇaṃ kāma-bhogā ||14|| ||*14||

patteyaṃ puṇṇa-pāvaṃ ||15|| ||*15||

aṇicce khalu bho maṇuyāṇa jīvie kusaggajala-bindu-cañcale ||*16.1||

||16|| ||*16.2||

bahuṃ ca khalu pāvaṃ kammaṃ pagaḍaṃ ||17|| ||*17||

pāvāṇaṃ ca khalu bho kaḍāṇaṃ kammāṇaṃ puvviṃ ||*18.1||

ducciṇṇāṇaṃ duppaḍikkantāṇaṃ veyaittā mokkho, natthi ||*18.2||

aveyaittā, tavasā vā jhosaittā | aṭhārasamaṃ payaṃ ||*18.3||

bhavai ||18|| bhavai ya ettha silogo ||*18.4||

jayā ya cayaī dhammaṃ | aṇajjo bhoga-kāraṇā /

se tattha mucchie bāle | āyaiṃ nāvabujjhaī ||1||

jayā ohāvio hoi | indo vā paḍio chamaṃ /

savva-dhamma-paribbhaṭho | sa pacchā paritappaī ||2||

jayā ya vandimo hoi | pacchā hoi avandimo /

devayā va ccuyā ṭhāṇā | sa pacchā paritappaī ||3||

jayā ya pūimo hoi | pacchā hoi apūimo /

rāyā va rajja-pabbhaṭho | sa pacchā paritappaī ||4||

jayā ya māṇimo hoi | pacchā hoi amāṇimo /

seṭhi vva kabbaḍe chūḍho | sa pacchā paritappaī ||5||

jayā ya therao hoi | samaikkanta-jovvaṇo /

maccho vva galiṃ gilittā | sa pacchā paritappaī ||6||

(jayā ya kukuḍaṃbassa | kutattīhiṃ vihammaī /)

(hatthī va bandhaṇe baddho | sa pacchā paritappaī ||)

putta-dāra-parikiṇṇo | moha-saṃtāṇa-saṃtao /

paṅkosanno jahā nāgo | sa pacchā paritappaī ||7||

"ajja yāhaṃ gaṇī honto | bhāviyappā bahussuo /

jai haṃ ramanto pariyāe | sāmaṇṇe jiṇa-desie" ||8||

devaloga-samāṇo u | pariyāo mahesiṇaṃ /

rayāṇaṃ, arayāṇaṃ ca | mahānaraya-sāliso ||9||

amarovamaṃ jāṇiya sokkhamuttamaṃ | rayāṇa pariyāe, tahārayāṇaṃ /

niraovamaṃ jāṇiya dukkhamuttamaṃ | ramejja tamhā pariyāya paṇḍie ||10||

dhammāo bhaṭhaṃ siriovaveyaṃ | jannāggi vijjhāyamivappa-teyaṃ /

hīlanti -aṃ duvvihiyaṃ kusīlā | dāḍhuddhiyaṃ ghora-visaṃ va nāgaṃ ||11||

ihevadhammo ayaso akittī | dunnāmadhejjaṃ ca pihujjaṇammi /

cuyassa dhammāo ahamma-seviṇo | saṃbhinna-vittassa ya heṭhao gaī ||12||

bhuñjittu bhogāi pasajjha ceyasā | tahāvihaṃ kau asaṃjamaṃ bahuṃ /

gaiṃ ca gacche aṇabhijjhiyaṃ duhaṃ, | bohī ya se no sulabhā puṇo puṇo ||13||

"imassa tā neraiyassa jantuṇo | duhovaṇīyassa kilesa-vattiṇo /

paliovamaṃ jhijjai sāgarovamaṃ, | kimaṅga puṇa majjha imaṃ maṇo-duhaṃ! ||14||

na me ciraṃ dukkhamiṇaṃ bhavissaī, | asāsayā bhoga-pivāsa jantuṇo /

na ce sarīreṇa imeṇavessaī, | avesaī jīviya-pajjaveṇa me" ||15||

jassevamappā u havejja nicchio | caejja dehaṃ, na u dhamma-sāsaṇaṃ /

taṃ tārisaṃ no payalenti indiyā | uvanta-vāyā va sudaṃsaṇaṃ giriṃ ||16||

icceva saṃpassiya buddhimaṃ naro | āyaṃ uvāyaṃ vivihaṃ viyāṇiyā /

kāeṇa vāyā adu māṇaseṇaṃ | tigutti-gutto jiṇa-vayaṇamahiṭhejjāsi ||17|| tti bemi ||

|| ekādaśamadhyayanam ||11||

Dasaveyāliya: 12 dvādaśamadhyayanam (cūliyā.) /

cūliyaṃ tu pavakkhāmi | suyaṃ kevali-bhāsiyaṃ /

jaṃ suṇittu sa-puṇṇāṇaṃ | dhamme uppajjae maī ||1||

aṇusoya-paṭhie bahu-jaṇammi | paḍisoya-laddha-lakkheṇaṃ /

paḍisoyameva appā | dāyavvo hou-kāmeṇaṃ ||2||

aṇusoya-suho logo, | paḍisoo āsavo suvihiyāṇaṃ /

aṇusoo saṃsāro, | paḍisoo tassa uttāro ||3||

tamhā āyāra-parakkameṇa | saṃvara-samāhi-bahuleṇaṃ /

cariyā guṇā ya niyamā ya | honti sāhūṇa daṭhavvā ||4||

aṇieya-vāso samuyāṇa-cariyā | annāyaṇuñchaṃ pairikkayā ya /

appovahī kalaha-vivajjaṇā ya | vihāra-cariyā isiṇaṃ pasatthā ||5||

āiṇṇaṇomāṇa-vivajjaṇā ya | osanna-diṭhāhaḍa-bhatta-pāṇe /

saṃsaṭha-kappeṇa carejja bhikkhū | tajjāya-saṃsaṭha jaī jaejjā ||6||

a-majja-maṃsāsi amaccharīyā | abhikkhaṇaṃ nivvigaīgayā ya /

abhikkhaṇaṃ kāussagga-kārī, | sajjhāya-joge payao havejjā ||7||

na paḍinnavejjā sayaṇāsaṇāiṃ | sejjaṃ nisejjaṃ taha bhatta-pāṇaṃ /

gāme kule vā nagare va dese | mamatta-bhāvaṃ na kahiṃci kujjā ||8||

gihiṇo veyāvaḍiyaṃ na kujjā | abhivāyaṇaṃ vandaṇa pūyaṇaṃ vā /

asaṃkiliṭhehi samaṃ vasejjā | muṇī carittassa jao na hāṇī ||9||

na yā labhejjā niuṇaṃ sahāyaṃ | guṇāhiyaṃ vā guṇao samaṃ vā /

ekko vi pāvāi vivajjayanto | viharejja kāmesu asajjamāṇo ||10||

saṃvaccharaṃ cāvi paraṃ pamāṇaṃ, | bīyaṃ ca vāsaṃ na tahiṃ vasejjā /

suttassa maggeṇa carejja bhikkhū | suttassa attho jaha āṇavei ||11||

jo puvvarattāvararatta-kāle | saṃpehaī appagamappaeṇaṃ /

"kiṃ me kaḍaṃ? kiṃ ca me kicca-sesaṃ? | kiṃ sakkaṇijjaṃ na samāyarāmi? ||12||

kiṃ me paro pāsai? kiṃ ca appā? | kiṃ cāhaṃ khaliyaṃ na vivajjayāmi?" /

icceva sammaṃ aṇupāsamāṇo | aṇāgayaṃ no paḍibandha kujjā ||13||

jattheva pāse kai duppauttaṃ | kāeṇa vāyā adu māṇaseṇaṃ /

tattheva dhīro paḍisāharejjā | āinno khippamiva kkhalīṇaṃ ||14||

jasserisā joga jiindiyassa | dhiīmao sappurisassa niccaṃ /

tamāhu loe "paḍibuddha-jīvī", | so jīvaī saṃjama-jīvieṇa ||15||

appā hu khalu sayayaṃ rakkhiyavvo | savvindiehiṃ susamāhiehiṃ /

arakkhio jāi-pahaṃ uvei, | surakkhio savva-duhāṇa muccai ||16|| tti bemi ||

|| dvādaśamadhyayanam ||12||